[глⷡ҇а н҃ѕ] Кондакѝ ѻ҆́бщыѧ ст҃ы̑мъ

Конда́къ прⷪ҇ро́кꙋ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Просвѣти́вшеесѧ дх҃омъ чи́стое твоѐ се́рдце, прⷪ҇ро́чества бы́сть свѣтлѣ́йшагѡ прїѧ́телище: зри́ши бо ꙗ҆́кѡ настоѧ̑щаѧ дале́че сꙋ̑щаѧ. сегѡ̀ ра́ди тѧ̀ почита́емъ, прⷪ҇ро́че бл҃же́нне, и҆́мⷬ҇къ, сла́вне.

Конда́къ а҆пⷭ҇лꙋ, гла́съ д҃. Подо́бенъ: Ꙗ҆ви́лсѧ є҆сѝ дне́сь:

Ꙗ҆́кѡ ѕвѣздꙋ̀ пресвѣ́тлꙋю цр҃ковь всегда̀ стѧжа́ тѧ а҆пⷭ҇ле, и҆́мⷬ҇къ, чꙋде́съ твои́хъ многоподава́нїемъ просвѣща́ема. тѣ́мже зове́мъ хрⷭ҇тꙋ̀: сп҃сѝ чтꙋ́щихъ вѣ́рою па́мѧть твоегѡ̀ а҆пⷭ҇ла, многомлⷭ҇тиве.

Конда́къ а҆пⷭ҇лѡмъ, гла́съ д҃:

Ло́зїе ꙗ҆ви́стесѧ хрⷭ҇то́ва вїногра́да мꙋ́дрїи, гро́здїе приносѧ́ще въ добродѣ́телехъ, вїно̀ на́мъ сп҃се́нїѧ и҆сточа́юще: є҆го́же прїе́млемъ весе́лїѧ и҆сполнѧ́ющесѧ, пра́зднꙋемъ честнꙋ́ю ва́шꙋ па́мѧть, въ ню́же моли́те дарова́тисѧ на́мъ вели́цѣй млⷭ҇ти и҆ ѿпꙋще́нїю грѣхѡ́въ, гдⷭ҇ни а҆пⷭ҇ли.

Конда́къ ст҃и́телю, гла́съ в҃. Подо́бенъ: Вы́шнихъ и҆щѧ̀:

Бж҃е́ственный гро́мъ, трꙋба̀ дх҃о́внаѧ, вѣ́ры насади́телю, и҆ ѿсѣка́телю є҆ресе́й. трⷪ҇цы ᲂу҆го́дниче вели́кїй ст҃и́телю, и҆́мⷬ҇къ, со а҆́гг҃лы предстоѧ̀ при́снѡ, молѝ непреста́ннѡ ѡ҆ всѣ́хъ на́съ.

Конда́къ ст҃и́телємъ, гла́съ и҃. Подо́бенъ: Ꙗ҆́кѡ нача́тки:

Ꙗ҆́кѡ добродѣ́телей ᲂу҆чи́телїе, и҆ і҆ера́рхѡвъ ᲂу҆краше́нїе, цр҃ковь пою́щи ва́съ сла́витъ: мл҃твами ва́шими пода́йте чтꙋ́щымъ ва́съ любо́вїю, добродѣ́телей и҆справле́нїе, и҆ собла́знѡвъ и҆збавле́нїе, ꙗ҆́кѡ непобѣди́мїи.

Конда́къ прпⷣбномꙋ, гла́съ в҃. Подо́бенъ: Вы́шнихъ и҆щѧ̀:

Чистото́ю дꙋше́вною бж҃е́ственнѡ воѡрꙋ́живсѧ, и҆ непреста̑нныѧ мл҃твы, ꙗ҆́кѡ копїѐ врꙋчи́въ крѣ́пкѡ, пробо́лъ є҆сѝ бѣсѡ́вскаѧ ѡ҆полчє́нїѧ, и҆́мⷬ҇къ, ѻ҆́тче на́шъ, молѝ непреста́ннѡ ѡ҆ всѣ́хъ на́съ.

Конда́къ прпⷣбнымъ, гла́съ в҃. Подо́бенъ: Вы́шнихъ и҆щѧ̀:

Волне́нїй мно́жество невла́жнѡ проходѧ́ще, безплѡ́тныѧ врагѝ стрꙋѧ́ми сле́зъ ва́шихъ крѣ́пкѡ погрꙋзи́ли є҆стѐ бг҃омꙋ́дрїи и҆ прпⷣбнїи: и҆ чꙋде́съ да́ръ прїи́мше, моли́те непреста́ннѡ ѡ҆ всѣ́хъ на́съ.

Конда́къ мч҃нкꙋ, гла́съ в҃. Подо́бенъ: Вы́шнихъ и҆щѧ̀:

Ѕвѣзда̀ свѣ́тлаѧ ꙗ҆ви́лсѧ є҆сѝ, непреле́стнаѧ мі́рови, сл҃нца хрⷭ҇та̀ возвѣща́ющи, зарѧ́ми твои́ми стрⷭ҇тоте́рпче и҆́мⷬ҇къ, и҆ пре́лесть погаси́лъ є҆сѝ всю̀: на́мъ же подае́ши свѣ́тъ, молѧ́сѧ непреста́ннѡ ѡ҆ всѣ́хъ на́съ.

Конда́къ мч҃нкѡмъ, гла́съ в҃. Подо́бенъ: Вы́шнихъ и҆щѧ̀: Свѣти́льницы свѣ́тлїи ꙗ҆́вльшесѧ, бж҃е́ственнїи мч҃нцы, тва́рь всю̀ свѣ́тлостїю чꙋде́съ ѡ҆зарѧ́ете, недꙋ́ги разрѣша́юще, и҆ глꙋбо́кꙋю тьмꙋ̀ всегда̀ ѿгонѧ́юще, хрⷭ҇тꙋ̀ бг҃ꙋ молѧ́щесѧ непреста́ннѡ ѡ҆ всѣ́хъ на́съ.

Конда́къ сщ҃енномч҃нкꙋ, гла́съ д҃. Подо́бенъ: Вознесы́йсѧ на крⷭ҇тъ:

Во ст҃и́телехъ бл҃гоче́стнѡ пожи́въ, и҆ мꙋче́нїѧ пꙋ́ть проше́дъ, і҆́дѡльскїѧ ᲂу҆гаси́лъ є҆сѝ жє́ртвы, и҆ побо́рникъ бы́въ твоемꙋ̀ ста́дꙋ бг҃омꙋ́дре. тѣ́мже тѧ̀ почита́юще та́йнѡ вопїе́мъ тѝ: ѿ бѣ́дъ и҆зба́ви ны̀ при́снѡ твои́ми мольба́ми ѻ҆́тче на́шъ, и҆́мⷬ҇къ.

Конда́къ сщ҃енномч҃нкѡмъ, гла́съ г҃. Подо́бенъ: Дв҃а дне́сь: Ꙗ҆́кѡ свѣти́льники незаходи̑мыѧ разꙋ́мнагѡ со́лнца, соше́дшесѧ дне́сь восхва́лимъ пѣ́сньми: возсїѧ́ли бо є҆стѐ сꙋ́щымъ во тьмѣ̀ неразꙋ́мїѧ, всѣ́хъ созыва́юще къ высотѣ̀ бл҃гоче́стїѧ сщ҃енномч҃нцы. тѣ́мъ вопїе́мъ ва́мъ: ра́дꙋйтесѧ по́стникѡвъ всѣ́хъ ѡ҆снова́нїе.

Конда́къ прпⷣбномч҃нкꙋ, гла́съ в҃. Подо́бенъ: Твє́рдыѧ:

Ꙗ҆́кѡ по́стника бл҃гоче́стна и҆ и҆скꙋ́сна, и҆ страда́льца произволе́нїемъ че́стна, и҆ пꙋсты́ни жи́телѧ соѡбра́зна, въ пѣ́снехъ досто́йнѡ восхва́лимъ, и҆́мⷬ҇къ, приснохва́льнаго: то́й бо ѕмі́ѧ попра́лъ є҆́сть.

Конда́къ прпⷣбномч҃нкѡмъ, гла́съ в҃. Подо́бенъ: Вы́шнихъ и҆щѧ̀:

Волне́нїй мно́жество невла́жнѡ проходѧ́ще, безплѡ́тныѧ врагѝ стрꙋѧ́ми сле́зъ ва́шихъ крѣ́пкѡ погрꙋзи́ли є҆стѐ бг҃омꙋ́дрїи, прпⷣбнїи мч҃нцы, и҆ чꙋде́съ да́ръ прїе́мше, моли́те непреста́ннѡ ѡ҆ всѣ́хъ на́съ.

Конда́къ мч҃нцѣ, гла́съ в҃. Подо́бенъ: Вы́шнихъ и҆щѧ̀:

Хра́мъ тво́й всечестны́й, ꙗ҆́кѡ цѣльбꙋ̀ дꙋше́внꙋю ѡ҆брѣ́тше всѝ вѣ́рнїи, велегла́снѡ вопїе́мъ тѝ дѣ́во мч҃нце, и҆́мⷬ҇къ, великоимени́таѧ: хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.

Конда́къ мч҃нцамъ, гла́съ и҃. Подо́бенъ: Ꙗ҆ви́лсѧ є҆сѝ:

Стрⷭ҇тоте́рпицъ хрⷭ҇то́выхъ па́мѧть пра́зднꙋимъ, и҆ вѣ́рою просѧ́ще по́мощи, и҆зба́витисѧ всѣ̑мъ ѿ всѧ́кїѧ ско́рби, зовꙋ́ще: бг҃ъ на́шъ съ на́ми, и҆́же си́хъ просла́вивый, ꙗ҆́коже и҆зво́ли.

Конда́къ прпⷣбнѣй женѣ̀, гла́съ в҃. Подо́бенъ: Бл҃года́ть прїе́мше:

За любо́вь гдⷭ҇ню прпⷣбнаѧ, поко́ѧ жела́нїе возненави́дѣла є҆сѝ, поще́нїемъ дх҃ъ тво́й просвѣти́вши, крѣ́пкѡ бо ѕвѣ́ри побѣди́ла є҆сѝ: но мл҃твами твои́ми проти́вныхъ шата́нїе разорѝ.

Конда́къ прпⷣбнымъ жена́мъ, гла́съ в҃:

Тѣлеса̀ своѧ̑ посто́мъ и҆знꙋри́вше, и҆ неꙋсы́пными мл҃твами молѧ́ще зижди́телѧ ѡ҆ грѣсѣ́хъ свои́хъ, ꙗ҆́кѡ да прїи́мете соверше́нное проще́нїе: и҆ прїѧ́сте бж҃е́ственное ѡ҆ставле́нїе, и҆ црⷭ҇твїе нбⷭ҇ное. моли́те хрⷭ҇та̀ бг҃а ѡ҆ всѣ́хъ на́съ.

Конда́къ прпⷣбномч҃нцѣ, гла́съ д҃. Подо́бенъ: Ско́рѡ предварѝ:

Бж҃е́ственнаѧ па́мѧть твоѧ̀, и҆́мⷬ҇къ, дне́сь возсїѧ́вши ꙗ҆ви́сѧ мі́рови ꙗ҆́кѡ со́лнце, сказꙋ́ющи житїѐ твоѐ: ты́ бо воздержа́нїемъ плѡтска́ѧ двиза̑нїѧ разо́рши, и҆ страда́нїѧ кро́вїю ᲂу҆невѣсти́ласѧ є҆сѝ хрⷭ҇тꙋ̀. тѣ́мже хва́лѧщыѧ тѧ̀ и҆зба́ви ѿ всѧ́кихъ ѕѡ́лъ, да зове́мъ тѝ: ра́дꙋйсѧ ма́ти прпⷣбнаѧ.

Конда́къ и҆сповѣ́дникꙋ, гла́съ в҃:

Наслади́всѧ бг҃омꙋ́дре воздержа́нїѧ, и҆ жела̑нїѧ плѡтска́ѧ ты̀ ᲂу҆спи́лъ є҆сѝ, ꙗ҆ви́всѧ вѣ́рою возраща́емь, и҆ ꙗ҆́кѡ живота̀ дре́во ра́йское процвѣ́лъ є҆сѝ, и҆́мⷬ҇къ, ѻ҆́тче сщ҃е́нный.

Конда́къ безме́здникѡмъ, гла́съ в҃:

Бл҃года́ть прїе́мше и҆сцѣле́нїй, простира́ете здра́вїе сꙋ́щымъ въ нꙋ́ждахъ, вра́чеве, чꙋдотво́рцы пресла́внїи: но ва́шимъ посѣще́нїемъ ра́тникѡвъ де́рзѡсти низложи́те, мі́ръ и҆сцѣлѧ́юще чꙋдесы̀.

Конда́къ ю҆рѡ́дивымъ, гла́съ и҃:

Вы́шнїѧ красоты̀ жела́ѧ, и҆ ни́жнїѧ сла̑сти тѣлє́сныѧ то́щнѡ ѡ҆ста́вилъ є҆сѝ. нестѧжа́нїемъ сꙋ́етнагѡ мі́ра, а҆́гг҃льское житїѐ преходѧ̀. сконча́всѧ, и҆́мⷬ҇къ, бл҃же́нне: съ ни́миже хрⷭ҇та̀ бг҃а молѝ непреста́ннѡ ѡ҆ всѣ́хъ на́съ.