[глⷡ҇а н҃и] Тро́ичны пѣ́сни, на и҃ гласѡ́въ, кі̑ѧ пою́тсѧ во ст҃ꙋ́ю вели́кꙋю м҃-цꙋ, и҆ въ про́чыѧ посты̀, є҆гда̀ пое́мъ А҆ллилꙋ́їа, во гла́съ ѻ҆смогла́сника, со стїхѝ є҆гѡ̀:

Ѿ но́щи ᲂу҆́тренюетъ дꙋ́хъ мо́й: и҆ про́чыѧ стїхѝ, Ли́стъ к҃.

Вѣ́домо бꙋ́ди, ꙗ҆́кѡ въ трⷪ҇чныхъ глаго́лемъ,

Въ понедѣ́льникъ ᲂу҆́бѡ въ концѣ̀ си́хъ, си́це: Предста́тельствы безпло́тныхъ твои́хъ поми́лꙋй на́съ.

Во вто́рникъ: Мл҃твами прⷣте́чи твоегѡ̀ поми́лꙋй на́съ.

Въ сре́дꙋ: Си́лою крⷭ҇та̀ твоегѡ̀ сохранѝ на́съ гдⷭ҇и. Подо́бнѣ и҆ въ пѧто́къ.

Въ четверто́къ: Мл҃твами ст҃ы́хъ а҆пⷭ҇лъ твои́хъ и҆ ст҃и́телѧ нїкола́а поми́лꙋй на́съ.

А҆ ᲂу҆ про́чихъ двою̀ тро́ичнѡвъ глаго́лати, ꙗ҆́коже въ конца́хъ и҆́хъ пи́сано є҆́сть.

Пѣ̑сни трⷪ҇чны, гла́съ а҃:

Плотски́ми ѡ҆бразова́нїи, безпло́тныхъ си́лъ, къ мы́сленномꙋ и҆невеще́ственномꙋ возводи́ми ᲂу҆мꙋ̀, и҆ трист҃о́ю пѣ́снїю трїѷпоста́снагѡ бж҃ества̀ прїе́млюще сїѧ́нїе, херꙋві́мски возопїи́мъ є҆ди́номꙋ бг҃ꙋ: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Со всѣ́ми нбⷭ҇ными си́лами, херꙋві́мски сꙋ́щемꙋ въ вы́шнихъ возопїи́мъ, трист҃ꙋ́ю возсыла́юще хвалꙋ̀: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ, поми́лꙋй на́съ.

И҆ ны́нѣ:

Воста́вше ѿ сна̀, припа́даемъ тѝ бл҃же, и҆ а҆́гг҃льскꙋю пѣ́снь вопїе́мъ тѝ си́льне: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.

Свѣти́ленъ:

Свѣ́тъ возсїѧ́й гдⷭ҇и, дꙋ́шꙋ мою̀ ѡ҆чи́сти ѿ всѧ́кагѡ грѣха̀:

Въ конца́хъ же свѣти́льнѡвъ. Въ понедѣ́льникъ ᲂу҆́бѡ къ пе́рвомꙋ:

Предста́тельствы безпло́тныхъ твои́хъ, и҆ сп҃си́ мѧ.

Въ вто́рникъ же: Мл҃твами гдⷭ҇и прⷣте́чи твоегѡ̀, и҆ сп҃си́ мѧ.

Въ сре́дꙋ и҆ пѧто́къ: Си́лою гдⷭ҇и крⷭ҇та̀ твоегѡ̀, и҆ сп҃си́ мѧ.

Въ четверто́къ: Мл҃твами гдⷭ҇и а҆пⷭ҇лъ твои́хъ, и҆ сп҃си́ мѧ.

Во второ́е на Сла́ва, глаго́лати всегда̀ въ конца́хъ: Мл҃твами гдⷭ҇и ст҃ы́хъ твои́хъ, и҆ сп҃си́ мѧ.

Въ тре́тїе же на И҆ ны́нѣ, въ конца́хъ глаго́лати: Мл҃твами гдⷭ҇и бцⷣы, и҆ сп҃си́ мѧ.

Пѣ̑сни трⷪ҇чны, гла́съ в҃:

Вы̑шнїѧ си̑лы подража́юще на землѝ, побѣ́днꙋю пѣ́снь прино́симъ тѝ бл҃же: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Несозда́нное є҆стество̀ всѣ́хъ зижди́телю, ᲂу҆стнѣ̀ на̑ша ѿве́рзи, ꙗ҆́кѡ да возвѣсти́мъ хвалꙋ̀ твою̀ вопїю́ще: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

Ѿ ѻ҆дра̀ и҆ сна̀ воздви́глъ мѧ̀ є҆сѝ гдⷭ҇и, ᲂу҆́мъ мо́й просвѣтѝ и҆ се́рдце, и҆ ᲂу҆стнѣ̀ моѝ ѿве́рзи, во є҆́же пѣ́ти тѧ̀ ст҃а́ѧ трⷪ҇це: ст҃ъ, ст҃ъ, ст҃ъ є҆сѝ бж҃е, бцⷣею поми́лꙋй на́съ.

Свѣти́ленъ:

Свѣ́тъ тво́й присносꙋ́щный низпослѝ хрⷭ҇тѐ бж҃е, и҆ просвѣтѝ ѻ҆́чи та̑йныѧ се́рдца моегѡ̀:

Пѣ̑сни трⷪ҇чны, гла́съ г҃:

Трⷪ҇це є҆диносꙋ́щнаѧ и҆ нераздѣ́льнаѧ, є҆ди́нице трїѷпоста́снаѧ и҆ соприсносꙋ́щнаѧ, тебѣ̀ ꙗ҆́кѡ бг҃ꙋ а҆́гг҃льскꙋю пѣ́снь вопїе́мъ: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Ѻ҆ц҃а̀ безнача́льна, сн҃а собезнача́льна, дх҃а соприсносꙋ́щна, бж҃ество̀ є҆ди́но, херꙋві́мски славосло́вити дерза́юще, глаго́лемъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

꙾Напра́снѡ꙾[[꙾ Внеза́пꙋ꙾]] сꙋдїѧ̀ прїи́детъ, и҆ коегѡ́ждо дѣѧ̑нїѧ ѡ҆бнажа́тсѧ. но стра́хомъ зове́мъ въ полꙋ́нощи: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.

Свѣти́ленъ:

Низпослѝ свѣ́тъ тво́й хрⷭ҇тѐ бж҃е, и҆ просвѣтѝ се́рдце моѐ:

Пѣ̑сни трⷪ҇чны, гла́съ д҃:

Оу҆́мныхъ твои́хъ слꙋ́гъ приноси́ти сме́ртнїи пѣ́снь дерза́юще, глаго́лемъ: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Ꙗ҆́кѡ чи́ни ны́нѣ а҆́гг҃льстїи на нб҃сѝ, и҆ стоѧ̑нїѧ стра́хомъ человѣ́чєскаѧ на землѝ, побѣ́днꙋю пѣ́снь прино́симъ тѝ бл҃же: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

Безнача́льнаго твоего̀ ѻ҆ц҃а̀, и҆ тебѐ хрⷭ҇тѐ бж҃е, и҆ прест҃а́го твоего̀ дх҃а, херꙋві́мски славосло́вити дерза́юще глаго́лемъ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.

Свѣти́ленъ:

Свѣ́тъ возсїѧ́й мі́рꙋ твоемꙋ̀, во тьмѣ̀ дꙋ́шꙋ мою̀ сꙋ́щꙋю ѿ всѧ́кагѡ грѣха̀ ѡ҆чи́сти:

Пѣ̑сни трⷪ҇чны, гла́съ є҃:

Пѣ́нїю вре́мѧ, и҆ мл҃твѣ ча́съ, прилѣ́жнѡ возопїи́мъ є҆ди́номꙋ бг҃ꙋ: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Ѡ҆бразова́ти дерза́юще ᲂу҆́мнаѧ твоѧ̑ вѡ́инства, трⷪ҇це безнача́льнаѧ, ᲂу҆сты̀ недосто́йными вопїе́мъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

И҆́же въ ложесна̀ дв҃и́чєскаѧ вмѣсти́выйсѧ, и҆ нѣ́дръ ѻ҆ч҃ескихъ не разлꙋчи́выйсѧ, со а҆́гг҃лы и҆ на́съ хрⷭ҇тѐ бж҃е прїимѝ вопїю́щихъ тѝ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.

Свѣти́ленъ:

Свѣтода́вче гдⷭ҇и, низпослѝ свѣ́тъ тво́й, и҆ просвѣтѝ се́рдце моѐ.

Пѣ̑сни трⷪ҇чны, гла́съ ѕ҃:

Предстоѧ́ще со стра́хомъ херꙋві́ми, ᲂу҆жаса́ющесѧ съ тре́петомъ серафі́ми, трист҃ꙋ́ю пѣ́снь прино́сѧтъ немо́лчнымъ гла́сомъ, съ ни́миже и҆ мы̀ вопїе́мъ грѣ́шнїи: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Безпло́тными ᲂу҆сты̀, немо́лчными славословле́ньми, шестокри́льнїи вопїю́тъ тѝ трист҃ꙋ́ю пѣ́снь бж҃е на́шъ, и҆ мы̀ и҆̀же на землѝ, недосто́йными ᲂу҆сты̀ хвалꙋ̀ тѝ возсыла́емъ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

Трⷪ҇чныѧ є҆ди́ницы бж҃ество̀ неслїѧ́ннымъ соедине́нїемъ сла́вимъ, и҆ а҆́гг҃льскꙋю пѣ́снь вопїе́мъ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.

Свѣти́ленъ:

Предста́тельствы гдⷭ҇и безпло́тныхъ твои́хъ, низпослѝ дꙋша́мъ на́шымъ свѣ́тъ тво́й присносꙋ́щный.

Здѣ́ же въ ѕ҃-мъ гла́сѣ, въ нача́лѣ свѣти́льна, вмѣ́стѡ: Предста́тельствы гдⷭ҇и безпло́тныхъ: и҆ прѡ́чаѧ до конца̀.

А҆́ще во вто́рникъ глаго́летсѧ, си́це: Мл҃твами гдⷭ҇и прⷣте́чи твоегѡ̀: и҆ прѡ́чаѧ до конца̀ глаго́ли.

Въ сре́дꙋ же и҆ пѧто́къ вмѣ́стѡ: Предста́тельствы гдⷭ҇и безпло́тныхъ: Въ нача́лѣ глаго́лати си́це: Си́лою крⷭ҇та̀ твоегѡ̀ гдⷭ҇и, низпослѝ дꙋша́мъ на́шымъ свѣ́тъ тво́й присносꙋ́щный.

Въ четверто́къ же си́це:

Мл҃твами гдⷭ҇и ст҃ы́хъ а҆пⷭ҇лъ твои́хъ, и҆ ст҃и́телѧ нїкола́а, низпослѝ дꙋша́мъ на́шымъ свѣ́тъ тво́й присносꙋ́щный.

Во второ́е, на Сла́ва глаго́лати въ нача́лѣ свѣти́льна: Мл҃твами гдⷭ҇и всѣ́хъ ст҃ы́хъ, низпослѝ дꙋша́мъ на́шымъ свѣ́тъ тво́й присносꙋ́щный.

Въ тре́тїе же, на И҆ ны́нѣ, въ нача́лѣ свѣти́льна глаго́лати си́це:

Мл҃твами гдⷭ҇и бцⷣы, низпослѝ дꙋша́мъ на́шымъ свѣ́тъ тво́й присносꙋ́щный,

Пѣ̑сни трⷪ҇чны, гла́съ з҃:

Вы́шнею си́лою херꙋві́мски воспѣва́емый, и҆ бж҃е́ственною сла́вою а҆́гг҃льски покланѧ́емый, прїимѝ и҆ на́съ сꙋ́щихъ на землѝ, недосто́йными ᲂу҆стна́ми хвале́нїе тебѣ̀ возсыла́ющихъ: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Ꙗ҆́кѡ со́нъ лѣ́ность ѿложи́вши дꙋшѐ, и҆справле́нїе ко хвале́нїю покажѝ сꙋдїѝ, и҆ со стра́хомъ возопі́й: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

Непристꙋ́пномꙋ бж҃ествꙋ̀, во є҆ди́ницѣ трⷪ҇цѣ, серафі́мскꙋю трист҃ꙋ́ю возсыла́юще хвалꙋ̀, со стра́хомъ возопїи́мъ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.

Свѣти́ленъ:

Воздви́гни мѧ̀ гдⷭ҇и къ твоемꙋ̀ пѣснопѣ́нїю, и҆ наꙋчи́ мѧ твори́ти во́лю твою̀ ст҃ы́й:

Пѣ̑сни трⷪ҇чны, гла́съ и҃:

На нб҃о сердца̀ и҆мꙋ́ще, а҆́гг҃льскїй подражи́мъ чи́нъ, и҆ со стра́хомъ сꙋдїѝ припаде́мъ, побѣ́днꙋю взыва́юще хвалꙋ̀: ст҃ъ, ст҃ъ, ст҃ъ є҆сѝ бж҃е на́шъ:

Сла́ва:

Зрѣ́ти тебѐ не смѣ́юще херꙋві́ми, летѧ́ще зовꙋ́тъ со восклица́нїемъ бж҃е́ственнꙋю пѣ́снь трист҃а́гѡ гла́са, съ ни́миже и҆ мы̀ вопїе́мъ тѝ: ст҃ъ, ст҃ъ, ст҃ъ є҆сѝ бж҃е на́шъ, мл҃твами всѣ́хъ ст҃ы́хъ твои́хъ поми́лꙋй на́съ.

И҆ ны́нѣ:

Слѧца́еми мно́жествомъ прегрѣше́нїй на́шихъ, и҆ не смѣ́юще воззрѣ́ти на высотꙋ̀ нбⷭ҇нꙋю, дꙋ́шꙋ съ тѣ́ломъ прекло́ньше, со а҆́гг҃лы пѣ́снь вопїе́мъ тѝ: ст҃ъ, ст҃ъ, ст҃ъ є҆сѝ бж҃е на́шъ, бцⷣею поми́лꙋй на́съ.

Свѣти́ленъ:

Свѣ́тъ сы́й хрⷭ҇тѐ, просвѣти́ мѧ тобо́ю:

[зрѝ] Подоба́етъ вѣ́дати и҆ сїѐ: Ꙗ҆́кѡ держи́тъ цр҃ковь вселе́нскаѧ, ни на бл҃же́ннахъ, ни на лїтꙋргі́ахъ, честѝ а҆по́столъ и҆ є҆ѵⷢ҇лїе по всѧ̑ дни̑ ст҃ы́хъ, то́чїю рѧдово́е, ре́кше сто́лпъ чрез̾ всѐ годи́ще, ꙗ҆̀же сꙋ́ть на рѧдꙋ̀, и҆ ст҃ы́хъ и҆збра́нныхъ, ко́ихъ є҆́сть пи́сано а҆по́столъ и҆ є҆ѵⷢ҇лїе. А҆ є҆́же честѝ на всѧ́къ де́нь ст҃а́гѡ а҆по́столъ и҆ є҆ѵⷢ҇лїе, сїѐ ѿ своегѡ̀ неразꙋ́мїѧ, а҆ не по цр҃ко́вномꙋ ᲂу҆ста́вꙋ.

[зрѝ] А҆́ще же кто̀ хо́щетъ твори́ти лїтꙋргі́ю ко́егѡлибо ст҃а́гѡ, и҆лѝ мч҃нка, и҆лѝ ст҃и́телѧ, и҆лѝ прпⷣбнагѡ, и҆лѝ а҆пⷭ҇ла, и҆лѝ прⷪ҇ро́ка, и҆лѝ мч҃нцъ: чтѝ ѻ҆́бщее є҆ѵⷢ҇лїе, ѡ҆брѣ́тъ подо́бно ст҃а́гѡ, є҆гѡ́же твори́ши слꙋ́жбꙋ, та́кожде и҆ а҆по́столъ, зрѝ ни́же сегѡ̀.