[глⷡ҇а л҃в] Ѿ пра́вилъ ст҃ы́хъ а҆пⷭ҇лъ, и҆ ст҃ы́хъ ѻ҆тє́цъ, ѡ҆ ст҃ѣ́й вели́цѣй четыредесѧ́тницѣ, ꙗ҆̀же до́лженъ всѧ́кїй хрⷭ҇тїа́нинъ ѻ҆па́снѡ храни́ти

Во ст҃ꙋ́ю и҆ вели́кꙋю четыредесѧ́тницꙋ, а҃-ѧ недѣ́ли пе́рвый де́нь, сі́есть въ понедѣ́льникъ, ѿню́дъ ꙗ҆́сти не подоба́етъ, та́кожде и҆ во вторы́й. Въ сре́дꙋ жепо соверше́нїи преждесщ҃е́нныхъ, трапе́за поставлѧ́етсѧ, и҆ ꙗ҆ди́мъ хлѣ́бъ те́плъ, и҆ ѿ снѣ́дей ѻ҆во́щныхъ те́плыхъ, дае́тсѧ же и҆ ᲂу҆кро́пъ съ ме́домъ. Не могꙋ́щїи же сохрани́ти двꙋ̀ дне́й пе́рвыхъ, ꙗ҆дѧ́тъ хлѣ́бъ, и҆ ква́съ по вече́рни, во вто́рникъ: Подо́бнѣ же и҆ ста́рїи творѧ́тъ. Въ сꙋббѡ̑ты же и҆ недѣ̑ли разрѣша́емъ на є҆ле́й то́чїю, и҆ вїно̀. Въ про́чихъ же седми́цахъ пости́мсѧ, до ве́чера є҃ дне́й, и҆ ꙗ҆ди́мъ сꙋхоѧде́нїе, кромѣ̀ сꙋббѡ́тъ и҆ недѣ́ль: ры́бы же во всю̀ ст҃ꙋ́ю четыредесѧ́тницꙋ ника́коже де́рзнемъ ꙗ҆́сти, кромѣ̀ пра́здника бл҃говѣ́щенїѧ прест҃ы́ѧ бцⷣы, и҆ недѣ́ли цвѣтоно́сныѧ. Въ пѧто́къ а҃-ѧ недѣ́ли, и҆ въ сре́дꙋ вели́кагѡ канѡ́на, и҆ въ вели́кїй четверто́къ, а҆́ще нѣ́цыи ᲂу҆ста́вы и҆ повелѣва́ютъ на є҆ле́й разрѣша́ти, но не твори́тсѧ за че́стность дне́й. Въ на́вечерїе же пра́здника бл҃говѣ́щенїѧ, пре́жде сꙋббѡ́ты ст҃а́гѡ првⷣнагѡ ла́зарѧ, разрѣша́емъ на є҆ле́й и҆ вїно̀. И҆ а҆́ще мона́хъ ст҃ꙋ́ю четыредесѧ́тницꙋ свои́мъ ла́комствомъ разори́тъ, є҆́же ꙗ҆́сти ры́бꙋ, кромѣ̀ пра́здника бл҃говѣ́щенїѧ, и҆ недѣ́ли цвѣтоно́сныѧ, то̀ не причасти́тсѧ ст҃ы́хъ та̑инъ и҆ на ст҃ꙋ́ю па́схꙋ: по дрꙋзі́и двѣ̀ недѣ̑ли пока́етсѧ, а҆ покло́нѡвъ на де́нь, и҆ на но́щь т҃.

Ѡ҆ причаще́нїи хрⷭ҇то́выхъ та̑инъ.

Є҆гда̀ хо́щетъ кто̀ причасти́тисѧ ст҃ы́хъ хрⷭ҇то́выхъ та̑инъ, подоба́етъ є҆мꙋ̀ сохрани́ти всю̀ седми́цꙋ, ѿ понедѣ́льника пребы́ти въ постѣ̀, и҆ мл҃твѣ, и҆ тре́звости соверше́нной всеконе́чнѡ, и҆ тогда̀ со стра́хомъ, и҆ ве́лїимъ бл҃гоговѣ́инствомъ прїи́метъ пречⷭ҇тыѧ та̑йны.

Ѡ҆ помыва́нїи ᲂу҆́стъ бра́тїй, причаща́ющихсѧ пречⷭ҇тыхъ хрⷭ҇то́выхъ та̑инъ.

Потре́бно є҆́сть и҆ сїѐ вѣ́дати, ѡ҆ помыва́нїи въ хра́мѣ причаща́ющихсѧ бра́тїй, ꙗ҆́коже рече́сѧ: Досто́итъ помыва́ти ᲂу҆ста̀ въ слꙋже́бномъ: си́це бо бж҃е́ственный златоꙋ́стъ повелѣ̀, вины̀ ра́ди плюнове́нїѧ. Быва́етъ же си́це: По прїѧ́тїи ст҃ы́хъ та̑инъ є҆́млетъ бра́тъ а҆нті́дѡръ, и҆ потреби́въ и҆̀, и҆ прїе́млетъ теплоты̀ [ѡ҆ста́вльшїѧ влива́емыѧ въ бж҃е́ственнꙋю ча́шꙋ] во ᲂу҆ста̀ ма́лѡ, и҆ пласка́въ поглота́етъ, и҆ ᲂу҆ста̀ помыва́етъ ма́лѡ, и҆ ѡ҆тира́етъ пла́томъ чи́стымъ на сїѐ ᲂу҆стро́еннымъ над̾ сосꙋ́домъ.

Во ст҃ꙋ́ю и҆ вели́кꙋю недѣ́лю па́схи, и҆ во всю̀ свѣ́тлꙋю недѣ́лю разрѣша́емъ: мона́си на сы́ръ и҆ ꙗ҆́ица и҆ ры́бы, мїрсті́и же на всѧ̑.

Ѿ но́выѧ же недѣ́ли понедѣ́льника, по є҆́же пѣ́ти г҃- й ча́съ, и҆ ѕ҃-й, въ чи́нꙋ и҆́хъ съ междоча́сїи, къ си̑мъ же и҆ ѻ҆бѣ́дницꙋ: дае́тсѧ бл҃гослове́нїе бра́тїи, въ понедѣ́льникъ, сре́дꙋ и҆ пѧто́къ, во всю̀ пѧтьдесѧ́тницꙋ. Бл҃гослове́нїе же мѣ́рити подоба́етъ, двѣ̀ ѻ҆́нгїи чи́сты ꙾паѯима́ды꙾ ꙾сꙋхарѝ꙾, и҆ то̀ снѣда́ти то́чїю подоба́етъ, и҆ по ѿпѣ́тїи ѳ҃-гѡ часа̀ соверше́ннѣ ꙗ҆́сти. Подо́бнѣ и҆ въ на́вечерїи ржⷭ҇тва̀ и҆ бг҃оѧвле́нїѧ гдⷭ҇нѧ, а҆́ще слꙋчи́тсѧ въ сꙋббѡ́тꙋ, и҆ недѣ́лю. Въ недѣ́лю же соше́ствїѧ ст҃а́гѡ дх҃а, быва́етъ колѣнопреклоне́нїе на вече́рни, и҆ недѣ́лѧ та́ѧ разрѣ́шена ꙗ҆́сти ры́бы, сы́ръ,и҆ ꙗ҆́ица, и҆ млеко̀: а҆ мїрѧ́нѡмъ мѧ́со, до недѣ́ли всѣ́хъ ст҃ы́хъ.