[глⷡ҇а л҃г] Ѡ҆ разрѣше́нїи всегѡ̀ лѣ́та

Подоба́етъ вѣ́дати: Ꙗ҆́кѡ а҆́ще слꙋчи́тсѧ хрⷭ҇то́ва ржⷭ҇тва̀ пра́здникъ, и҆ ст҃ы́хъ бг҃оѧвле́нїй, въ сре́дꙋ, и҆лѝ пѧто́къ, разрѣша́емъ на сы́ръ и҆ ꙗ҆́ица: мїрѧ́не же на мѧ́со. А҆́ще ли слꙋчи́тсѧ ржⷭ҇тво̀ бцⷣы, и҆лѝ срѣ́тенїе, и҆лѝ ᲂу҆спе́нїе, въ сре́дꙋ, и҆ пѧто́къ, разрѣша́емъ на ры́бꙋ и҆ вїно̀. Пра́здникъ же преѡбраже́нїѧ и҆ введе́нїѧ, въ ко́й де́нь ни слꙋчи́тсѧ, разрѣша́емъ на ры́бꙋ и҆ вїно̀, и҆ ꙗ҆ди́мъ два́жды дне́мъ. Бл҃говѣ́щенїе же, въ ко́й ᲂу҆́бѡ де́нь бꙋ́детъ ст҃а́гѡ поста̀ до недѣ́ли цвѣтоно́сныѧ, разрѣша́емъ на ры́бꙋ и҆ вїно̀, ꙗ҆ди́мъ же є҆ди́ною дне́мъ, кромѣ̀ сꙋббѡ́ты, и҆ недѣ́ли. Въ вели́кꙋю же недѣ́лю, а҆́ще слꙋчи́тсѧ до вели́кагѡ четвертка̀, разрѣша́емъ на є҆ле́й и҆ вїно̀. Въ вели́кїй же пѧто́къ, на вїно̀ то́чїю. Пра́здникъ же прⷣте́чевъ, ржⷭ҇тво̀ и҆ ст҃ы́хъ а҆пⷭ҇лъ петра̀ и҆ па́ѵла, и҆ возлю́бленнагѡ і҆ѡа́нна бг҃осло́ва, а҆́ще слꙋчи́тсѧ въ сре́дꙋ и҆ пѧто́къ, ꙗ҆ди́мъ ры́бꙋ, и҆ пїе́мъ вїно̀, два́щи дне́мъ. На воздви́женїе честна́гѡ крⷭ҇та̀, и҆ на ᲂу҆сѣкнове́нїе прⷣте́чи не ꙗ҆ди́мъ ры́бы, но є҆ле́й и҆ вїно̀ пїе́мъ, и҆ въ ве́черъ ꙗ҆ди́мъ без̾ ры́бы же, ѻ҆во́щїе ѿ гро́здїѧ, и҆лѝ что̀ бг҃ъ да́рꙋетъ ѿ таковы́хъ. Въ двана́десѧтихъ же дне́хъ по ржⷭ҇твѣ̀ хрⷭ҇то́вѣ, и҆ въ седми́цѣ пред̾ мѧсопꙋ́стомъ, и҆ седми́цꙋ свѣ́тлꙋю и҆ седми́цꙋ и҃-ю, разрѣша́ютъ мона́си на сы́ръ и҆ ꙗ҆́ица, мїрсті́и же на мѧ́со. Въ седми́цꙋ же сы́рнꙋю, разрѣша́ютъ мона́си и҆ мїрсті́и на сы́ръ и҆ ꙗ҆́ица. Въ сре́дꙋ же и҆ пѧто́къ, въ девѧ́тый ча́съ, є҆ди́ною дне́мъ. Въ среда́хъ же и҆ пѧтцѣ́хъ, всеѧ̀ пѧтьдесѧ́тницы, є҆ле́й и҆ вїно̀, кромѣ̀ среды̀ преполове́нїѧ, и҆ среды̀ ѿда́нїѧ па́схи: Въ та̑ бо два̀ дни̑ разрѣша́емъ на ры́бꙋ и҆ вїно̀. Нѣ́цыи же разрѣша́ютъ и҆ въ про́чыѧ.

[зрѝ] Подоба́етъ вѣ́дати: Ꙗ҆́кѡ въ по́стъ ст҃ы́хъ а҆пⷭ҇лъ, и҆ хрⷭ҇то́ва ржⷭ҇тва̀, во вто́рникъ, и҆ четверто́къ, ры́бы не ꙗ҆ди́мъ, но є҆ле́й и҆ вїно̀ то́чїю. Въ понедѣ́льникъ, въ сре́дꙋ и҆ пѧто́къ ни є҆ле́а вкꙋша́емъ, ни вїна̀, но пости́мсѧ до ѳ҃-гѡ часа̀, и҆ ꙗ҆ди́мъ въ ты̑ѧ дни̑ сꙋхоѧде́нїе. Въ сꙋббѡ̑ты же и҆ недѣ̑ли, ꙗ҆ди́мъ ры̑бы. А҆́ще слꙋчи́тсѧ ст҃ы́й во вто́рникъ, и҆лѝ въ четверто́къ и҆мѣ́ѧй славосло́вїе, ꙗ҆ди́мъ ры́бꙋ: А҆́ще въ понедѣ́льникъ, подо́бнѣ. А҆́ще среда̀ и҆ пѧто́къ, разрѣша́емъ на є҆ле́й и҆ вїно̀ то́чїю: ꙗ҆ди́мъ же є҆ди́ною дне́мъ. А҆́ще ли ст҃ы́й и҆мѣ́ѧй бдѣ́нїе, въ сре́дꙋ, и҆лѝ пѧто́къ, разрѣша́емъ на є҆ле́й и҆ вїно̀ и҆ ры́бꙋ. А҆́ще ли слꙋчи́тсѧ па́мѧть ст҃а́гѡ, є҆гѡ́же є҆́сть хра́мъ, въ сре́дꙋ, и҆лѝ пѧто́къ, твори́мъ подо́бнѣ.

Ѡ҆ постѣ̀ прест҃ы́ѧ бцⷣы подоба́етъ вѣ́дати: Въ по́стъ ст҃ы́ѧ влⷣчцы на́шеѧ бцⷣы ᲂу҆спе́нїѧ, є҃і дне́й кромѣ̀ преѡбраже́нїѧ хрⷭ҇то́ва, пости́мсѧ до ѳ҃-гѡ часа̀ днѐ: понедѣ́льникъ, сре́дꙋ и҆ пѧто́къ, сꙋ́хо ꙗ҆́сти: и҆ твори́мъ колѣнопреклоне́нїе, да́же до причаще́нїѧ. Во вто́рникъ и҆ четверто́къ, варе́нїе без̾ є҆ле́а. Въ сꙋббѡ́тꙋ же и҆ недѣ́лю, варе́нїе со є҆ле́емъ, и҆ вїно̀ пїе́мъ: ры́бы же не ꙗ҆ди́мъ, до ᲂу҆спе́нїѧ прест҃ы́ѧ бцⷣы: но то́кмѡ на преѡбраже́нїе хрⷭ҇то́во, ꙗ҆ди́мъ ры́бꙋ, два́жды дне́мъ.

Ѡ҆ взако́неныхъ постѣ́хъ, ꙗ҆̀же собо́рнаѧ цр҃ковь предадѐ правосла̑внымъ хрⷭ҇тїа́нѡмъ,

(ст҃ы́хъ а҆пⷭ҇лъ пра́вило ѯ҃ѳ.)

А҆́ще кто̀ є҆пⷭ҇кпъ, и҆лѝ пресвѵ́теръ, и҆лѝ дїа́конъ, и҆лѝ чте́цъ и҆лѝ пѣве́цъ, ст҃ы́ѧ вели́кїѧ м҃-цы не пости́тсѧ, и҆ всѧ́кїѧ среды̀ и҆ пѧтка̀ всегѡ̀ лѣ́та, кромѣ̀ не́мощи, да и҆зве́ржетсѧ, люди́нъ же да ѿлꙋчи́тсѧ.

Сказа́нїе. Зрѝ, ꙗ҆́кѡ пра́вило ст҃ы́хъ а҆пⷭ҇лѡвъ, ст҃ꙋ́ю четыредесѧ́тницꙋ, и҆ всѧ́кꙋю сре́дꙋ и҆ пѧто́къ всегѡ̀ лѣ́та, ра́внѡ законоположѝ по́стъ, ꙗ҆́коже во ст҃ꙋ́ю м҃- цꙋ ꙗ҆ди́мъ, та́кожде и҆ въ сре́дꙋ и҆ пѧто́къ всегѡ̀ лѣ́та, кромѣ̀ не́мощи и҆ пра́здника. Глаго́летъ бо пра́вило: ꙗ҆́кѡ не постѧ́йсѧ въ си́хъ, сщ҃е́нникъ ᲂу҆́бѡ и҆зверга́етсѧ, мїрскі́й же ѿлꙋча́етсѧ ѿ причаще́нїѧ на вре́мѧ.