[глⷡ҇а л҃а] Ѡ҆ є҆́же ка́кѡ подоба́етъ и҆мѣ́ти бꙋди́льника

Въ вели́кꙋю четыредесѧ́тницꙋ повелѣва́етъ предста́тель є҆ди́номꙋ ѿ бра́тїй возбꙋжда́ти бра́тїю въ цр҃кви, и҆́же на ко́еждо чте́нїе, по є҆́же почестѝ ма́лѡ чтꙋ́щемꙋ, востае́тъ ѿ своегѡ̀ мѣ́ста, и҆ твори́тъ трѝ покло́ны насредѝ, и҆ та́кѡ ѡ҆бхо́дитъ бра́тїю молчѧ̀: и҆ коего́ждо а҆́ще ѡ҆брѧ́щетъ дре́млюща, возбꙋжда́етъ є҆го̀ ти́хѡ: ѻ҆́нъ же воста́въ прихо́дитъ въ средꙋ̀, и҆ твори́тъ колѣнопреклонє́нїѧ г҃, и҆ къ ликѡ́мъ по є҆ди́номꙋ: и҆ ѿше́дъ сѧ́детъ на мѣ́стѣ свое́мъ.

Сїе́ же ны́нѣ не быва́етъ, и҆ во множа́йшихъ ᲂу҆ста́вѣхъ не ѡ҆брѣта́етсѧ, мни́тсѧ же мѝ, ꙗ҆́кѡ за лѣ́ностное на́ше прилѣжа́нїе, и҆ занѐ не терпи́мъ съ любо́вїю ѡ҆бличе́нїѧ, сегѡ̀ ра́ди ᲂу҆молча́но нѣ́кїими.

То́йже бꙋди́льникъ и҆ во всѐ лѣ́то возбꙋжда́етъ бра́тїю по ке́ллїамъ въ цр҃ковь.