[глⷡ҇а к҃д] Ѡ҆ вжига́нїи свѣ́щъ, ка́кѡ подоба́етъ въ цр҃кви вжига́ти, въ недѣ́лю, и҆ на пра́здники хрⷭ҇тѡ́вы, и҆ бцⷣы, и҆ ст҃ы́хъ, и҆ про́чыѧ дни̑

На ма́лѣй вече́рни, по бл҃гослове́нїи і҆ере́евѣ, до́лжно є҆́сть вжига́ти свѣщꙋ̀ пред̾ ѡ҆́бразомъ сп҃са хрⷭ҇та̀, и҆ є҆гѡ́же є҆́сть хра́мъ на деснѣ́й странѣ̀, и҆ пред̾ ѡ҆́бразомъ прест҃ы́ѧ бцⷣы на лѣ́вой странѣ̀, и҆ пред̾ а҆нало́гїемъ: ᲂу҆гаша́ти же си́хъ на ѿпꙋ́стѣ вече́рнѣмъ.

На вели́цѣй же вече́рни, пре́жде кажде́нїѧ і҆ере́ева, до́лжно є҆́сть вжига́ти свѣщы̀ ꙗ҆́коже ᲂу҆каза́сѧ на ма́лѣй вече́рни, и҆ пред̾ влⷣчнимъ ѡ҆́бразомъ въ тѧ́блѣ, а҆́ще и҆́мать ст҃ы́й бдѣ́нїе. И҆ по а҃-мъ а҆нтїфѡ́нѣ каѳі́смы, въ нача́лѣ Гдⷭ҇и воззва́хъ, вжига́ти и҆ про́чыѧ свѣщы̀: ᲂу҆гаша́ти же на коне́чномъ трист҃о́мъ.

На ᲂу҆́трени, на Бг҃ъ гдⷭ҇ь, подоба́етъ вжига́ти свѣщы̀, ꙗ҆́коже пре́жде и҆з̾ѧви́сѧ. Въ нача́лѣ же полѷеле́а подоба́етъ вжига́ти всѧ̑ свѣщы̀, и҆ ѡ҆ставлѧ́ти ѧ҆̀ горѣ́ти до сконча́нїѧ г҃ пѣ́сни, и҆ тогда̀ па́ки погаша́ти ѧ҆̀. И҆ на и҃ пѣ́сни вжига́емъ па́ки всѧ̑, и҆ ѡ҆ставлѧ́емъ ѧ҆̀ горѣ́ти до конца̀ вели́кагѡ славосло́вїѧ.

На лїтꙋргі́и, пре́жде нача́ла лїтꙋргі́и, во ѻ҆лтарѣ̀ вжига́ти свѣщꙋ̀ на же́ртвенницѣ. И҆ є҆гда̀ і҆ере́й ѡ҆блачи́тсѧ въ ри̑зы, и҆ приспѣ́вшꙋ вре́мени зво́на, пре́жде вжига́ти свѣщꙋ̀ на прⷭ҇то́лѣ, та́же въ цр҃кви, ꙗ҆́коже предрече́сѧ. Въ нача́лѣ же ст҃а́гѡ є҆ѵⷢ҇лїа, вжига́ти всѧ̑ свѣщы̀, и҆ ѡ҆ставлѧ́ти ѧ҆̀ горѣ́ти до заамвѡ́нныѧ мл҃твы.