[глⷡ҇а к҃г] Ѡ҆ завѣ́сѣ ст҃а́гѡ ѻ҆лта́рѧ, когда̀ ѿверза́етсѧ, и҆ когда̀ затворѧ́етсѧ

Ѿверза́етсѧ завѣ́са въ нача́лѣ вече́рни, и҆ стои́тъ ѿве́рзена да́же до ѿпꙋ́ста. На ᲂу҆́трени, та́кожде съ нача́ла и҆ до конца̀. На часѣ́хъ же є҆гда̀ чтꙋ́тсѧ кромѣ̀ лїтꙋргі́и, ѿверза́етсѧ ко чте́нїю а҆пⷭ҇ла, и҆ стои́тъ до ѿпꙋ́ста ѿве́рзена. По ѿпꙋ́стѣ же затворѧ́етсѧ.

Въ нача́лѣ же лїтꙋргі́и ѿверза́етсѧ завѣ́са, и҆ стои́тъ ѿве́рзена, да́же до вели́кагѡ вхо́да. По вхо́дѣ же па́ки затворѧ́етсѧ, до́ндеже і҆ере́й, и҆лѝ дїа́конъ возглаго́летъ: Двє́ри двє́ри, премꙋ́дростїю во́нмемъ. Тогда̀ ѿверза́етсѧ, и҆ стои́тъ ѿве́рзена до возглаше́нїѧ: Ст҃а̑ѧ ст҃ы̑мъ. И҆ тогда̀ па́ки затворѧ́етсѧ. По причаще́нїи же па́ки ѿверза́етсѧ, и҆ стои́тъ ѿве́рзена до конца̀ ст҃ы́ѧ лїтꙋргі́и. Но ѿпꙋ́стѣ же лїтꙋргі́и соверше́ннѣ затворѧ́етсѧ. Є҆гда́ же моле́бенъ пое́тсѧ, ѿ нача́ла и҆ до ѿпꙋ́ста ѿве́рзена быва́етъ.

[зрѝ] Вѣ́домо бꙋ́ди, ꙗ҆́кѡ ст҃ы̑ѧ двє́ри никогда́же ѿверза́ютсѧ, то́кмѡ въ нача́лѣ вели́кїѧ вече́рни, є҆гда̀ быва́етъ бдѣ́нїе, и҆ кади́тъ сщ҃е́нникъ, и҆ во всѧ̑ вхо́ды, си́рѣчь вече́рни, и҆ лїтꙋргі́и, и҆ ст҃а́гѡ є҆ѵⷢ҇лїа: та́кожде ѿверза́ютсѧ и҆ ѿ поѧвле́нїѧ ст҃ы́хъ та̑инъ, да́же до и҆сполне́нїѧ бж҃е́ственныѧ лїтꙋргі́и.