[глⷡ҇а к҃в] Подоба́етъ вѣ́дати, когда̀ кади́тъ і҆ере́й

Кади́тъ ве́черъ, на Гдⷭ҇и воззва́хъ, въ стїхи́рахъ и҆ въ нача́лѣ ᲂу҆́трени, и҆ на ѳ҃-й пѣ́сни. Кади́тъ же и҆ на непоро́чнахъ, въ сꙋббѡ́тꙋ и҆ недѣ́лю. Кади́тъ же и҆ на пра́здники гдⷭ҇скїѧ, въ нача́лѣ вели́кїѧ вече́рни.

Кади́ти же і҆ере́ю, и҆лѝ дїа́конꙋ си́це: Пе́рвѣе ста́въ пред̾ ст҃о́ю трапе́зою, и҆ твори́тъ крⷭ҇тъ кади́ломъ. И҆ та́кѡ ѿ полꙋ́денныѧ страны̀ ста́въ, та́кожде твори́тъ крⷭ҇тъ. Подо́бнѡ же и҆ ѿ восто́чныѧ и҆ ѿ полꙋ́нощныѧ, крⷭ҇тови́днѡ кади́тъ ст҃ꙋ́ю трапе́зꙋ, и҆ ве́сь ст҃ы́й ѻ҆лта́рь, и҆ же́ртвенникъ: и҆ и҆схо́дитъ сѣ́верными две́рьми. И҆ прише́дъ пред̾ ца̑рскїѧ двє́ри, и҆ та́мѡ твори́тъ крⷭ҇тъ кади́ломъ:

И҆ и҆́детъ и҆ кади́тъ ст҃ы̑ѧ і҆кѡ̑ны, по ю҆́жнѣй странѣ̀ ѡ҆́бразъ сп҃са хрⷭ҇та̀, и҆ хра́ма, и҆ про́чыѧ тоѧ̀ страны̀: подо́бнѣ и҆ лѣ́вѣй, ѡ҆́бразъ прест҃ы́ѧ бцⷣы, и҆ про́чихъ, та́же предстоѧ́телѧ. А҆́ще ли нѣ́сть настоѧ́телѧ, кади́тъ ѡ҆́бразъ на мѣ́стѣ є҆гѡ̀. И҆ та́кѡ кади́тъ ве́сь пра́вый ли́къ бра́тїй, по два́жды, воздвиза́ѧ пред̾ кі́имждо кади́ло пра́вѣ и҆ прекѝ, творѧ̀ крⷭ҇тъ.

И҆ є҆гда̀ покади́тъ ве́сь ли́къ, и҆ ста́въ прѧ́мѡ и҆́хъ посредѣ̀: а҆́ще пое́тъ та̀ страна̀ сті́хъ, ѡ҆жида́етъ до́ндеже дрꙋга́ѧ страна̀ сво́й сті́хъ начне́тъ. Семꙋ́ же ли́кꙋ ᲂу҆молча́вшꙋ, тогда̀ твори́тъ крⷭ҇тъ кади́ломъ на ве́сь ли́къ, и҆ поклоне́нїе твори́тъ къ ни̑мъ бл҃гочи́ннѡ, ко всѣ̑мъ є҆ди́но, и҆ ѻ҆нѝ къ немꙋ̀ всѝ та́кожде творѧ́тъ поклоне́нїе: подо́бнѣ и҆ лѣ́вый ли́къ, и҆ всю̀ бра́тїю стоѧ́щꙋю въ це́ркви кади́тъ.

И҆ и҆схо́дитъ въ притво́ръ, и҆ та́мѡ кади́тъ по чи́нꙋ, твори́тъ крⷭ҇тъ кади́ломъ, пред̾ кра́сными враты̀. Та́же кади́тъ на ѻ҆́бѣ страны̑, ст҃ы̑ѧ і҆кѡ̑ны, и҆ бра́тїю всю̀ по чи́нꙋ и҆́хъ.

Послѣди́ же возвра́щьсѧ къ кра̑снымъ вратѡ́мъ, зрѧ̀ къ за́падꙋ, кади́тъ крⷭ҇тови́днѡ всѣ́хъ.

И҆ є҆гда̀ вни́ти во хра́мъ и҆з̾ притво́ра, твори́тъ крⷭ҇тъ кади́ломъ, пред̾ ца́рскими две́рьми: и҆ пото́мъ кади́тъ і҆кѡ́нꙋ сп҃са хрⷭ҇та̀, и҆ на лѣ́вой, бцⷣы, и҆ на а҆нало́гїи, и҆ настоѧ́телѧ.

И҆ вхо́дитъ во ст҃ы́й ѻ҆лта́рь ю҆́жными две́рьми, и҆ твори́тъ крⷭ҇тъ пред̾ ст҃о́ю трапе́зою, и҆ ѿлага́етъ кади́ло.