[глⷡ҇а к҃є] Ѡ҆ вседне́вномъ вжига́нїи свѣ́щъ

На всѧ́кїй де́нь ѿ нача́ла вече́рни подоба́етъ свѣщы̀ вжига́ти пре́жде пред̾ і҆кѡ́ною сп҃са хрⷭ҇та̀, и҆ є҆гѡ́же є҆́сть хра́мъ на деснѣ́й странѣ̀, и҆ пред̾ ѡ҆́бразомъ прест҃ы́ѧ бцⷣы, на лѣ́вѣй. А҆́ще и҆́мать ст҃ы́й, Бл҃же́нъ мꙋ́жъ: вжига́емъ и҆ пред̾ а҆нало́гїемъ, и҆ пред̾ ѡ҆́бразомъ сп҃са хрⷭ҇та̀ въ тѧ́блѣ, и҆ во ѻ҆лтарѣ̀ ᲂу҆ прⷭ҇то́ла. А҆́ще ли не и҆́мать, вжига́ти по стїхоло́гїи: ᲂу҆гаша́ти же по коне́чномъ трист҃о́мъ. На повече́рїи по преждепи́санномꙋ, пред̾ сп҃совымъ, и҆ бг҃оро́дичнымъ.

На ᲂу҆́трени свѣщы̀ вжига́ти, ꙗ҆́коже пре́жде на вече́рни и҆з̾ѧви́сѧ, и҆ на Бг҃ъ гдⷭ҇ь, вжига́ти, и҆ пред̾ а҆нало́гїемъ, и҆ въ тѧ́блѣ. А҆́ще же и҆́мать ст҃ы́й полѷеле́й, вжига́ти и҆ всѧ̑ свѣщы̀, и҆ ѡ҆ставлѧ́емъ горѣ́ти и҆̀хъ и҆ до г҃ пѣ́сни, и҆ ᲂу҆гаша́ти. На и҃-й же пѣ́сни па́ки вжига́ти, и҆ ѡ҆ставлѧ́емъ и҆̀хъ горѣ́ти до конца̀ славосло́вїѧ.

Въ нача́лѣ ст҃ы́ѧ лїтꙋргі́и вжига́ти свѣщы̀, ꙗ҆́коже пре́жде и҆з̾ѧви́сѧ въ недѣ́лю. Ѡ҆ пра́здницѣхъ ржⷭ҇тва̀ хрⷭ҇то́ва, и҆ бг҃оѧвле́нїѧ, и҆ про́чихъ пра́здникѡвъ гдⷭ҇скихъ и҆ бг҃оро́дичныхъ, и҆ во всю̀ свѣ́тлꙋю седми́цꙋ, и҆ ст҃ы́хъ и҆мꙋ́щихъ бдѣ́нїе, вжига́ютсѧ свѣщы̀, ꙗ҆́коже пре́жде въ недѣ́лю и҆з̾ѧви́сѧ.