[глⷡ҇а ѳ҃і] Ѡ҆ катава́сїи:

Пое́мой въ гдⷭ҇скїѧ влⷣчни и҆ бг҃оро́дичны пра́здники, и҆ въ воскрⷭ҇ныѧ дни̑, и҆ наро́читыхъ ст҃ы́хъ всегѡ̀ лѣ́та: начина́ющейсѧ ѿ мѣ́сѧца септе́мврїа съ а҃-гѡ числа̀, до тогѡ́же числа̀.

Мѣ́сѧца септе́мврїа съ а҃-гѡ, тогѡ́же мѣ́сѧца до к҃а-гѡ числа̀, до ѿда́нїѧ пра́здника воздви́женїѧ честна́гѡ крⷭ҇та̀. Катава́сїа: Крⷭ҇тъ начерта́въ мѡѷсе́й:

Ѿ к҃в-гѡ септе́мврїа до к҃-гѡ ное́мврїа: Ѿве́рзꙋ ᲂу҆ста̀ моѧ̑:

Ѿ к҃а-гѡ ное́мврїа, до л҃а-гѡ деке́мврїа, до ѿда́нїѧ ржⷭ҇тва̀ хрⷭ҇то́ва: Хрⷭ҇то́съ ражда́етсѧ:

Ѿ а҃-гѡ і҆аннꙋа́рїа, до д҃і тогѡ́же мѣ́сѧца, до ѿда́нїѧ бг҃оѧвле́нїѧ: Глꙋбины̀ ѿкры́лъ є҆́сть дно̀:

Ѿ є҃і тогѡ́же мѣ́сѧца, до ѿда́нїѧ срѣ́тенїѧ гдⷭ҇нѧ: Сꙋ́шꙋ глꙋбороди́тельнꙋю зе́млю:

Ѿ ѿда́нїѧ срѣ́тенїѧ гдⷭ҇нѧ: кромѣ̀ четыредесѧ́тницы недѣ́ль и҆ пѧтьдесѧ́тницы, а҆́ѵгꙋста до а҃-гѡ: Ѿве́рзꙋ ᲂу҆ста̀ моѧ̑:

Ѿ а҃-гѡ а҆́ѵгꙋста до са́магѡ пра́здника преѡбраже́нїѧ, и҆ на са́мый пра́здникъ: Крⷭ҇тъ начерта́въ мѡѷсе́й:

Въ попра́зднствѣ преѡбраже́нїѧ, и҆ до ѿда́нїѧ: Ли́цы і҆и҃льтестїи:

Ѿ д҃і до к҃г-гѡ, до ѿда́нїѧ ᲂу҆спе́нїѧ: Преꙋкраше́ннаѧ бж҃е́ственною сла́вою:

Ѿ ѿда́нїѧ ᲂу҆спе́нїѧ, до пе́рвагѡ септе́мврїа: Крⷭ҇тъ начерта́въ:

Четыредесѧ́тницы же и҆ пѧтьдесѧ́тницы,

Въ недѣ́лю мытарѧ̀ и҆ фарїсе́а: во в҃-ю, д҃-ю, є҃-ю, ст҃ы́хъ постѡ́въ: Ѿве́рзꙋ ᲂу҆ста̀ моѧ̑:

Въ недѣ́лю блꙋ́днагѡ, мѧсопꙋ́стнꙋю, сыропꙋ́стнꙋю: въ а҃-ю, г҃-ю, ст҃ы́хъ постѡ́въ, въ недѣ́лю ва́їй, страстнꙋ́ю недѣ́лю, катава́сїа трїѡ́ди.

А҆́ще слꙋчи́тсѧ пра́зднꙋемый ст҃ы́й во всю̀ четыредесѧ́тницꙋ въ седми̑чныѧ дни̑: Ѿве́рзꙋ ᲂу҆ста̀ моѧ̑:

Ѿ недѣ́ли ст҃ы́ѧ па́схи, и҆ до ѿда́нїѧ: Воскрⷭ҇нїѧ де́нь:

Въ де́нь преполове́нїѧ пѧтьдесѧ́тницы, и҆ на ѿда́нїе: Мо́ре ѡ҆гꙋсти́лъ є҆сѝ:

Въ недѣ́лю ѕ҃-ю по па́сцѣ, и҆ на ѿда́нїе па́схи: Сп҃си́телю бг҃ꙋ:

На са́мый пра́здникъ вознесе́нїѧ: Бж҃е́ственнымъ покрове́нъ:

Ѿ вознесе́нїѧ до ѿда́нїѧ: Сп҃си́телю бг҃ꙋ:

Въ недѣ́лю же з҃-ю по па́сцѣ ст҃ы́хъ ѻ҆тє́цъ: Бж҃е́ственнымъ покрове́нъ:

Въ сꙋббѡ́тꙋ пѧтьдесѧ́тнꙋю трїѡ́ди. Ѿ недѣ́ли пѧтьдесѧ́тныѧ, и҆ до ѿда́нїѧ: Бж҃е́ственнымъ покрове́нъ:

Въ недѣ́лю всѣ́хъ ст҃ы́хъ: Ѿве́рзꙋ ᲂу҆ста̀ моѧ̑: и҆ до а҃-гѡ днѐ а҆́ѵгꙋста.