[глⷡ҇а к҃] Ѡ҆ є҆́же когда̀ пое́тсѧ Чⷭ҇тнѣ́йшꙋю, и҆ когда̀ не пое́тсѧ

Подоба́етъ вѣ́дати: Ꙗ҆́кѡ всегда̀ пое́тсѧ Чⷭ҇тнѣ́йшꙋю: въ недѣ́лѧхъ всегѡ̀ лѣ́та и҆ въ предпра́зднствахъ, и҆ попра́зднствахъ, и҆ въ седми̑чныѧ дни̑. Не пое́тсѧ же Чⷭ҇тнѣ́йшаѧ во влⷣчнихъ и҆ бг҃оро́дичныхъ пра́здникахъ, є҆́же є҆́сть, На ржⷭ҇тво̀ бцⷣы, и҆ на ѿда́нїе пра́здника є҆ѧ̀. На воздви́женїе чⷭ҇тна́гѡ крⷭ҇та̀, и҆ на ѿда́нїе є҆гѡ̀. На введе́нїе бцⷣы, и҆ на ѿда́нїе є҆гѡ̀. На ржⷭ҇тво̀ хрⷭ҇то́во, и҆ на ᲂу҆́трїе, и҆ на ѿда́нїе є҆гѡ̀. На ѡ҆брѣ́занїе гдⷭ҇не, и҆ въ па́мѧть вели́кагѡ васі́лїа. На бг҃оѧвле́нїе гдⷭ҇не, и҆ на ᲂу҆́трїе, и҆ на ѿда́нїе є҆гѡ̀. Въ па́мѧть во ст҃ы́хъ ѻ҆тє́цъ на́шихъ, и҆ вели́кихъ і҆ера́рхѡвъ, васі́лїа вели́кагѡ, григо́рїа бг҃осло́ва, и҆ і҆ѡа́нна златоꙋ́стагѡ. На срѣ́тенїе гдⷭ҇не, и҆ на ѿда́нїе є҆гѡ̀. На бл҃говѣ́щенїе. Ѿ сꙋббѡ́ты првⷣнагѡ ла́зарѧ, до недѣ́ли ѳѡмины̀, во всѣ́хъ недѣ́лѧхъ пѧтьдесѧ́тницы, кромѣ̀ недѣ́ли ст҃ы́хъ ѻ҆тє́цъ. Въ преполове́нїе пѧтьдесѧ́тницы, и҆ на ѿда́нїе є҆гѡ̀. Въ сре́дꙋ, пред̾ вознесе́нїемъ. На вознесе́нїе, и҆ на ѿда́нїе є҆гѡ̀. На соше́ствїе ст҃а́гѡ дх҃а, и҆ на ᲂу҆́трени въ понедѣ́льникъ, и҆ на ѿда́нїе є҆гѡ̀. На преѡбраже́нїе, и҆ на ѿда́нїе є҆гѡ̀. На ᲂу҆спе́нїе бцⷣы, и҆ на ѿда́нїе є҆гѡ̀. То́чїю а҆́ще слꙋчи́тсѧ пра́здникъ, и҆лѝ ѿда́нїе пра́здника ко́егѡ въ недѣ́лю: и҆ тогда̀ пое́тсѧ Чⷭ҇тнѣ́йшꙋю.