[глⷡ҇а і҃] Ѡ҆ є҆́же ка́кѡ чтꙋ́тсѧ є҆ѵⷢ҇лїа, и҆ тогѡ̀ толкова̑нїѧ

Подоба́етъ вѣ́дати, ꙗ҆́кѡ во ст҃ꙋ́ю и҆ вели́кꙋю недѣ́лю па́схи начина́етсѧ є҆́же ѿ і҆ѡа́нна є҆ѵⷢ҇лїе, и҆ чте́тсѧ до пентїко́стїа. Толкова̑нїѧ же тогѡ̀ є҆ѵⷢ҇лїа златоꙋ́стова чтꙋ́тсѧ на ᲂу҆́тренѧхъ, въ ты̑ѧ дни̑. Ѿ недѣ́ли же пентїко́стїа, до мѣ́сѧца септе́мврїа, чте́тсѧ є҆́же ѿ матѳе́а є҆ѵⷢ҇лїе, тогѡ́же толкова̑нїа златоꙋ́стагѡ чтꙋ́тсѧ на ᲂу҆́тренѧхъ. Ѿ но́вагѡ же лѣ́та, си́рѣчь, ѿ недѣ́ли ꙗ҆́же по воздви́женїи, до недѣ́ли сы́рныѧ, чте́тсѧ є҆́же ѿ лꙋкѝ ст҃а́гѡ є҆ѵⷢ҇лїе. На ᲂу҆́тренѧхъ же чте́тсѧ толкова́нїе ѳеофѷла́ктово, метафра́стъ логоѳе́товъ, и҆ толкова̑нїѧ посла́нїй ст҃а́гѡ а҆пⷭ҇ла па́ѵла, ꙗ҆̀же ѿ златоꙋ́ста. Та́кожде и҆ маргарі́тъ златоꙋ́стовъ. Ѿ пе́рвыѧ же недѣ́ли четыредесѧ́тницы:

Въ сꙋббѡ́тахъ, и҆ недѣ́лѧхъ, чте́тсѧ є҆́же ѿ ма́рка є҆ѵⷢ҇лїе. На ᲂу҆́тренѧхъ же шестодне́вникъ златоꙋ́стовъ. Въ про́чыѧ же дни̑ м҃-цы, на всѧ́кꙋю ᲂу҆́треню прочита́ютсѧ четы́ре чтє́нїѧ, два̀ во ст҃о́мъ є҆фре́мѣ, и҆ въ лаѵсаи́цѣ два̀. Лѣ́ствицꙋ же чте́мъ на часѣ́хъ. На трапе́зѣ же чтꙋ́тсѧ чрез̾ всѐ лѣ́то житїѧ̑ ст҃ы́хъ, и҆ патерїкѝ.

[зрѝ] Вѣ́домо же бꙋ́ди: Ꙗ҆́кѡ въ недѣ́лѧхъ ст҃а́гѡ и҆ вели́кагѡ поста̀, и҆ въ на́вечерїѧхъ гдⷭ҇скихъ пра́здникѡвъ, ре́кше, хрⷭ҇то́ва ржⷭ҇тва̀ и҆ бг҃оѧвле́нїѧ: Вели́кагѡ васі́лїа лїтꙋргі́а пое́тсѧ: та́кожде и҆ въ па́мѧть є҆гѡ̀. Преждеѡсщ҃е́ннаѧ же лїтꙋргі́а пое́тсѧ то́чїю во ст҃ѣ́й м҃-цѣ, въ сре́ды, и҆ пѧткѝ. въ про́чыѧ же дни̑ лѣ́та всегѡ̀ соверша́етсѧ лїтꙋргі́а златоꙋ́стагѡ.