[глⷡ҇а а҃і] Ѡ҆ канѡ́нѣхъ всеѧ̀ седми́цы, гдⷭ҇а ка́кѡ пою́тсѧ канѡ́ни ѻ҆ктѡ́иха съ мине́ею

Въ понедѣ́льникъ на ᲂу҆́трени: Канѡ́нъ покаѧ́ненъ пое́мъ со і҆рмосо́мъ на ѕ҃: И҆ безпло́тныхъ на д҃: И҆ мине́и ст҃а́гѡ на д҃. А҆́ще ли пое́тсѧ ст҃а́гѡ на ѕ҃, ѡ҆ставлѧ́ютсѧ во ѻ҆ктѡ́ихѣ ѻ҆́ба мꙋ́ченична. И҆ пое́мъ ст҃а́гѡ на ѕ҃. А҆́ще ли пое́тсѧ ст҃а́гѡ полѷеле́й: тогда̀ не пое́тсѧ ѻ҆ктѡ́ихъ: Но пое́мъ канѡ́нъ бцⷣѣ, и҆лѝ а҆́ще предпра́зднство, и҆лѝ попра́зднство со і҆рмосо́мъ на ѕ҃: І҆рмо́съ по два́жды, тропарѝ на д҃: И҆ ст҃а́гѡ на и҃. Си́це ᲂу҆́бѡ во всю̀ седми́цꙋ пое́мъ полѷеле́йнагѡ ст҃а́гѡ канѡ́нъ на и҃, ꙗ҆́коже въ понедѣ́льникъ се́й ꙗ҆вле́но є҆́сть. А҆́ще прилꙋча́тсѧ два̀ ст҃ы́хъ, ѡ҆ставлѧ́етсѧ канѡ́нъ безпло́тныхъ: И҆ пое́мъ канѡ́нъ покаѧ́ненъ, со і҆рмосо́мъ на ѕ҃: И҆ ст҃ы́хъ по д҃ стїха̀.

Во вто́рникъ на ᲂу҆́трени: Канѡ́нъ покаѧ́ненъ со і҆рмо́сомъ на ѕ҃: и҆ предте́чи на д҃: и҆ мине́и ст҃а́гѡ на д҃. А҆́ще ли пое́тсѧ ст҃ы́й на ѕ҃, ѡ҆ставлѧ́ютсѧ во ѻ҆ктѡ́ихѣ ѻ҆́ба мꙋ́ченична: и҆ пое́мъ ст҃а́гѡ на ѕ҃. Полѷеле́й же по предпи́санномꙋ. Та́кожде быва́етъ, а҆́ще и҆ два̀ ст҃ы́хъ, канѡ́ны и҆̀мъ по четы́ре стїха̀.

Въ сре́дꙋ на ᲂу҆́трени: Канѡ́нъ крⷭ҇та̀, со і҆рмосо́мъ на ѕ҃, и҆ бцⷣы на д҃: и҆ ст҃а́гѡ на д҃. А҆́ще ли пое́тсѧ ст҃ы́й на ѕ҃, ѡ҆ставлѧ́ютсѧ ѻ҆́ба мꙋ́ченична во ѻ҆ктѡ́ихѣ, и҆ пое́тсѧ крⷭ҇тный канѡ́нъ со і҆рмосо́мъ на д҃, и҆ бцⷣы на д҃: и҆ ст҃а́гѡ на ѕ҃. Та́кожде быва́етъ, а҆́ще бꙋ́детъ и҆ два̀ ст҃ы́хъ во є҆ди́нъ де́нь.

Въ четверто́къ на ᲂу҆́трени: Пое́мъ канѡ́нъ ст҃ы́хъ а҆пⷭ҇лѡвъ, со і҆рмосо́мъ на ѕ҃: и҆ ст҃а́гѡ нїкола́а на д҃: и҆ мине́и ст҃а́гѡ на д҃. А҆́ще ли пое́тсѧ ст҃ы́й на ѕ҃: Пое́мъ канѡ́нъ а҆пⷭ҇лѡвъ, со і҆рмосо́мъ, и҆ съ бг҃оро́дичнымъ, на є҃: и҆ ст҃а́гѡ нїкола́а, съ бг҃оро́дичны на г҃: и҆ мине́и на ѕ҃. А҆́ще бꙋ́дꙋтъ два̀ ст҃ы́хъ, и҆ пое́мъ канѡ́нъ а҆пⷭ҇лѡвъ, со і҆рмосо́мъ на ѕ҃, и҆ ст҃ы̑мъ на и҃.

Въ пѧто́къ пое́мъ, ꙗ҆́коже и҆ въ сре́дꙋ ꙗ҆вле́но є҆́сть неизмѣ́ннѡ.

Въ сꙋббѡ́тꙋ же, всегда̀ предварѧ́етъ въ мине́и ст҃ы́хъ: и҆ пое́мъ ст҃а́гѡ мине́и, со і҆рмосо́мъ на ѕ҃. Та́же хра́ма ст҃а́гѡ, на д҃, и҆ во ѻ҆ктѡ́ихѣ мч҃нченъ канѡ́нъ на д҃. А҆́ще ли два̀ ст҃ы́хъ: въ мине́и пое́мъ є҆ди́номꙋ канѡ́нъ со і҆рмосо́мъ на ѕ҃: и҆ дрꙋго́мꙋ на д҃: и҆ мч҃нченъ канѡ́нъ ѻ҆ктѡ́иха на д҃: Хра́ма же канѡ́нъ ѡ҆ставлѧ́етсѧ. А҆́ще ли хра́мъ хрⷭ҇то́въ, и҆лѝ бцⷣы: и҆ пое́мъ пре́жде хра́ма канѡ́нъ, со і҆рмосо́мъ на ѕ҃. І҆рмо́съ по два́жды, тропарѝ на д҃: и҆ ст҃а́гѡ на д҃: и҆ ѻ҆ктѡ́иха мч҃нченъ канѡ́нъ на д҃. А҆́ще ли ст҃ы́й на ѕ҃: И҆ пое́мъ хра́ма со і҆рмосо́мъ на д҃: и҆ ст҃а́гѡ на ѕ҃: и҆ ѻ҆ктѡ́иха на д҃.

[зрѝ] Вѣ́домо же бꙋ́ди и҆ сїѐ: Въ кꙋ́юлибо сꙋббѡ́тꙋ славосло́вїе прилꙋчи́тсѧ: на ᲂу҆́трени канѡ́нъ хра́ма, а҆́ще є҆́сть хрⷭ҇то́въ и҆лѝ бцⷣы, со і҆рмосо́мъ на ѕ҃: і҆рмо́съ по два́жды, тропарѝ на д҃: и҆ ст҃а́гѡ на и҃. А҆́ще же хра́мъ ст҃а́гѡ и҆лѝ ст҃ы́ѧ: пое́мъ канѡ́нъ бцⷣы преше́дшїѧ недѣ́ли ᲂу҆́треннїй, со і҆рмосо́мъ на ѕ҃: и҆ ст҃а́гѡ на и҃: Хра́ма же канѡ́нъ ѡ҆ставлѧ́етсѧ. По ѳ҃-й пѣ́сни свѣти́ленъ ст҃а́гѡ два́жды. Сла́ва, и҆ ны́нѣ, бг҃оро́диченъ.