Среда

На Го́споди воззва́х, поста́вим стихо́в 6. И пое́м подо́бны трипе́снца 3, и мине́и 3.

Подо́бен господи́на Ио́сифа. Гла́с 3:

Подобен: Поста́виша три́десять сре́бреник:

Го́споди, Кресто́м уби́вый льсти́ваго, от пре́лести его́ изба́ви мя́ согреша́ющаго, и прельща́ема: и посто́м очи́стив мя́, да́ждь ми́ Твоя́ хоте́ния соверши́ти, я́ко да ви́жду Влады́ко, ра́дуяся, честны́я стра́сти Твоя́.

Подо́бен:

Уязви́хся сла́дости ору́жием, Го́споди, и лю́те ве́сь умертви́хся, исцели́, и оживи́ смире́нную мою́ ду́шу, копие́м прободы́йся Влады́ко: и уя́звена стрело́ю врага́, я́ко Ще́др исцели́, и честны́х Твои́х страсте́й прича́стника мя́ покажи́.

И́на стихи́ра господи́на Фео́дора, гла́с 2.

Подо́бен: Да ра́спнется:

Поще́нием Го́споди, ду́шы просвети́вше, да сподо́бимся неосужде́нно Кре́ст Тво́й ви́дети в ра́дости, и поклони́тися стра́хом и любо́вию: просвеща́ет бо то́й стра́сти Твоя́ во́льныя, я́же благоволи́ дости́гнути на́м, я́ко Человеколю́бец.

И в Мине́и 3. Сла́ва, и ны́не, Богоро́дичен.

Проки́мен, псало́м 47, гла́с 3: Ве́лий Госпо́дь, и хва́лен зело́, во гра́де Бо́га на́шего. Сти́х: Во гра́де Го́спода си́л, во гра́де Бо́га на́шего.

Бытия́ чте́ние. [Быт. 7:1–5.]

Рече́ Госпо́дь Бо́г к Но́ю: вни́ди ты́ и ве́сь до́м тво́й в ковче́г, я́ко тя́ ви́дех пра́ведна предо Мно́ю в ро́де се́м. От ското́в же чи́стых введи́ к себе́ се́дмь се́дмь, му́жеский по́л и же́нский: от ското́в же нечи́стых два́ два́, му́жеский по́л и же́нский. И от пти́ц небе́сных чи́стых се́дмь се́дмь, му́жеский по́л и же́нский, и от все́х пти́ц нечи́стых две́ две́, му́жеский по́л и же́нский, препита́ти се́мя по все́й земли́. Еще́ бо дне́й се́дмь, А́з наведу́ до́ждь на зе́млю четы́редесять дне́й и четы́редесять ноще́й: и потреблю́ вся́кое воста́ние, е́же сотвори́х, от лица́ всея́ земли́. И сотвори́ Но́е вся́ ели́ка запове́да ему́ Госпо́дь Бо́г.

Проки́мен, псало́м 48, гла́с 2: Уста́ моя́ возглаго́лют прему́дрость, и поуче́ние се́рдца моего́ ра́зум. Сти́х: Услы́шите сия́ вси́ язы́цы.

При́тчей чте́ние. [Притч. 8:32–36, 9:1–11.]

Сы́не, послу́шай мене́: и блаже́ни, и́же пути́ моя́ сохраня́т. Услы́шите прему́дрость, и умудри́теся, и не отмещи́те. Блаже́н му́ж, и́же послу́шает мене́, и челове́к, и́же пути́ моя́ сохрани́т, бдя́й при мои́х две́рех при́сно, соблюда́яй пра́ги мои́х вхо́дов: Исхо́ди бо мои́, исхо́ди живота́, и уготовля́ется хоте́ние от Го́спода. Согреша́ющии же в мя́, нече́ствуют на своя́ ду́шы: и ненави́дящии мя́, лю́бят сме́рть. Прему́рость созда́ себе́ до́м, и утверди́ столпо́в се́дмь: закла́ своя́ же́ртвенная, и раствори́ в ча́ши свое́й вино́, и угото́ва свою́ трапе́зу. Посла́ своя́ рабы́, созыва́ющи с высо́ким пропове́данием на ча́шу, глаго́лющи: И́же е́сть безу́мен, да уклони́тся ко мне́: И тре́бующым ума́, рече́ прииди́те, яди́те мо́й хле́б, и пи́йте вино́, е́же раствори́х ва́м. Оста́вите безу́мие, и жи́ви бу́дете: да во ве́ки воцарите́ся: и взыщи́те ра́зума да поживете́, и испра́вите ра́зум в ве́дении. Наказу́яй злы́я, прии́мет себе́ безче́стие: облича́яй же нечести́ваго, поро́чна сотвори́т себе́: [обличе́ния бо нечести́вому ра́ны ему́]. Не облича́й злы́х, да не возненави́дят тебе́: облича́й прему́дра, и возлю́бит тя́. Да́ждь прему́дрому вину́, и прему́дрейший бу́дет: сказу́й пра́ведному, и приложи́т приима́ти. Нача́ло прему́дрости стра́х Госпо́день, и сове́т святы́х ра́зум: разуме́ти бо зако́н, по́мысла е́сть блага́го. Си́м бо о́бразом мно́гое поживе́ши вре́мя, и приложа́тся тебе́ ле́та живота́ твоего́.

На стихо́вне самогла́сен дне́, два́жды. Гла́с 2:

Отца́ Тя́ Созда́теля написа́ти дерза́ю Го́споди, живо́тное сы́й земноро́дное, Твоего́ причаща́яся о́браза, а́ще и сыно́вства погреши́х, блу́дно пожи́в, и забве́нием Твои́х даро́в ижди́в бога́тство. Да не у́бо отрече́ши мя́, Твоему́ благоволи́вый Сы́ну единоро́дному, Кре́ст мене́ ра́ди пло́тию и сме́рть претерпе́ти: но ублажи́в присво́й к Себе́ Человеколю́бче.

Му́ченичен: Ли́цы му́ченик проти́вишася мучи́телем, глаго́люще: мы́ во́инствуем Царю́ си́л: а́ще и огню́ и му́кам преда́сте на́с, не отмета́емся Тро́ическия си́лы.

Сла́ва, и ны́не, Крестобогоро́дичен, гла́с то́йже.

Подо́бен: Егда́ от Дре́ва:

Егда́ Тя́ беззако́ннии лю́дие, Спа́се, живота́ все́х на Дре́ве обе́сиша, тогда́ и Всечи́стая А́гница и Ма́ти Твоя́, предстоя́щи рыда́ше пла́чущи: Ча́до Мое́ сладча́йшее, све́те Мое́ю о́чию, увы́ Мне́, ка́ко посреде́ злоде́ев к Дре́ву пригвозди́тися претерпе́л еси́, зе́млю пове́сивый на вода́х?

Тро́ичны.

По 1-м стихосло́вии седа́льны кре́стныя осмогла́сника.

По 2-м же стихосло́вии глаго́лем настоя́щий седа́лен господи́на Ио́сифа, гла́с 3.

Подо́бен: Красоте́ де́вства:

Дре́вом увяди́л еси́ пла́мень Влады́ко преступле́ния на Кре́ст возвыша́емь, и умертви́л еси́ врага́, умертви́вся во́лею. Те́мже Тя́ молю́, пло́ти моея́ хоте́ния умертви́, и оживи́ окая́нное се́рдце мое́, посто́м страстоуби́йственным, очи́стив мя́ от вся́кия скве́рны, я́ко Благоутро́бен.

Сла́ва, то́йже.

И ны́не, Крестобогоро́дичен. Подо́бен:

Поно́сную Ще́дре сме́рть, распя́тием, во́лею претерпе́л еси́: Его́же Ро́ждшая Тя́ Христе́, зря́щи уязвля́шеся, утро́бою терза́шеся, ма́терски рыда́ше. ея́же моли́твами, за милосе́рдие ми́лости Твоея́ уще́дри, и спаси́ ми́р, взе́мляй сего́ гре́х.

По 3-м стихосло́вии седа́лен, гла́с 2.

Подо́бен: Воскре́с от гро́ба:

Све́тлую преходя́ще по́стную трапе́зу, вопии́м: вся́ соблюди́ Го́споди в ми́ре, вся́каго кова́рства вра́жия избавля́я, и сподо́би на́с я́ко преблаги́й, Кре́ст Тво́й честны́й любо́вию лобыза́ти, и́мже ми́лости Твоя́ подая́ вселе́нней, еди́не Многоми́лостиве.

Сла́ва, то́йже.

И ны́не, Крестобогоро́дичен, гла́с то́йже.

Подо́бен: Милосе́рдия:

Де́ва и Ма́ти Твоя́ Христе́, на Дре́ве зря́щи Тя́ ме́ртва просте́рта, пла́чущи го́рько, вопию́щи глаго́лаше: что́ стра́шное сие́ та́инство? все́м да́руяй жи́знь ве́чную, во́лею на Кресте́ ка́ко умира́еши сме́ртию поно́сною?

Кано́н в Мине́и, и настоя́щий трипе́снец господи́на Ио́сифа.

И стихосло́вится пе́снь. Гла́с 3.

Пе́снь 3.

Ирмо́с: утвержде́ние:

Сраспина́ема на́с ра́ди распе́ншемуся, умертви́м вся́ плотски́я у́ды в посте́х, и моли́твах, и моле́ниих.

Те́рние греха́ искорени́вый Кресто́м Твои́м Го́споди, терно́вная помышле́ния ума́ моего́ исто́ргни.

Вооружи́вше мы́сли посто́м, побежда́им чужди́я полки́ бесо́вския, си́лою Креста́ огражда́еми.

Богоро́дичен: Воплоща́емое из Тебе́ про́йде Сло́во, паде́ние Пречи́стая пра́отец, за милосе́рдие щедро́т, исправля́я.

И́ный господи́на Фео́дора, гла́с 2.

Ирмо́с: утверди́ на́с в Тебе́ Го́споди:

Тво́й животво́рный Кре́ст Го́споди, печа́ть мне́ е́сть во спасе́ние: те́м бо сопротивоборца́ упражня́я, воспева́ю Тя́ я́ко Бо́га Всеси́льнаго.

Дре́во Кре́стное пло́д принесе́ ми́ру, оживле́ния присносу́щнаго: его́же мы́ вкуша́юще, от сме́рти Христе́ избавля́емся.

Тро́ичен: Три́ еди́наго зра́ка Ли́ца сла́влю, Отца́, Сы́на, и Ду́ха еди́ну держа́ву Божества́: ца́рствующи бо и единонача́льствует я́ко Бо́г.

И ны́не, Богоро́дичен: Рождество́ Твое́ Чи́стая, стра́шно е́сть: Бо́г бо е́сть вочелове́чивыйся, безле́тно от Отца́ рожде́йся, и из Тебе́ в после́дняя без му́жа роди́вся.

Сла́ва Тебе́ Бо́же на́ш, сла́ва Тебе́.

Благода́ть Креста́ предпросия́вши ми́ру к Боже́ственным Твои́м страсте́м Ще́дре, призыва́ет вся́ ны́: и́мже ве́рно поклони́тися сподо́би.

Ирмо́с: Утверди́ на́с в Тебе́ Го́споди, Дре́вом умерщвле́й гре́х, и стра́х Тво́й всади́ в сердца́ на́с пою́щих Тя́.

Пе́снь 8.

Ирмо́с: Нестерпи́мому огню́:

Кресто́м нача́ла победи́вый, и вла́сти те́мныя, Светода́вче, егда́ прии́деши со вла́стию суди́ти ми́ру всему́, да не моя́ Сло́ве объяви́ши та́йная, да мно́гое Твое́ прославля́ю благоутро́бие.

Суди́мь Судия́ пред суди́щем ста́л еси́, осужда́я вражду́ Кресто́м Твои́м, долготерпели́ве правосу́де. Те́мже осужде́ния ве́чнаго изба́ви, стра́хом зову́щыя и превознося́щыя Твое́ человеколю́бие.

Поста́ огне́м обостри́вшеся де́ти благочести́вии, возвыше́ный дре́вле пла́мень, Боже́ственною росо́ю угаси́ша вои́стинну. И мы́ постя́щеся, пе́щи все́х страсте́й угаси́м, я́ко да гее́нскаго избе́гнем пла́мене.

Богоро́дичен: Из Тебе́ Бо́жия му́дрость хра́м Себе́ созда́вши, воплоти́ся неизрече́нным снизхожде́нием, Отрокови́це неискусобра́чная: Ты́ бо еди́на от все́х родо́в избра́нна еси́ нетле́нная, нетле́ннаго в жили́ще Сло́ва.

И́ный. Ирмо́с: В купине́ Моисе́ю:

Нося́й вся́ сло́вом, мене́ ра́ди вся́ терпи́ши, зауше́ния, и оплева́ния, и распя́тие Христе́: хвалю́ вели́чия Твоего́ человеколю́бия во вся́ ве́ки.

Закала́ешися Христе́ я́ко А́гнец, прободе́н в ре́бра Твоя́, да мя́ овча́ заблу́ждшее спасе́ши от се́ти диа́воли, и до́брей твое́й огра́де причте́ши во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Божество́ еди́но Тро́ице, неразде́льное Естество́, разде́льно же Ли́цы, присносу́щная держа́во, О́тче, Сы́не, и Ду́ше Святы́й, Тя́ песносло́вим во вся́ ве́ки.

Богоро́дичен: Богороди́тельнице Чи́стая, небе́сная две́ре, спаси́тельная врата́, все́х христиа́н мольбу́ приими́, Тебе́ блажа́щих во вся́ ве́ки.

Сла́ва Тебе́ Бо́же на́ш, сла́ва Тебе́.

О Кресте́ Твое́м Христе́, свяще́нницы хва́лятся, и́ноки укрепля́ются, вся́кий просвеща́ется ве́рный: сподо́би мя́ сего́ ви́дети, и поклони́тися, и пе́ти во ве́ки.

Хва́лим, благослови́м, покланя́емся Го́сподеви, пою́ще и превознося́ще во вся́ ве́ки.

Ирмо́с: В купине́ Моисе́ю Де́вы чу́до, на Сина́йстей горе́, прообрази́вшаго иногда́, по́йте, благослови́те и превозноси́те во вся́ ве́ки.

Пе́снь 9.

Ирмо́с: В зако́не се́ни:

Зми́я Моисе́й на дре́во возне́с, образова́ше Тя́ Иису́се на Кресте́ во́лею вознесе́на, и лука́ваго ядови́тую зло́бу изгна́вшаго, к Себе́ же челове́ки привле́кша, Человеколю́бче.

Огне́м мя́ Твоего́ стра́ха очи́сти, возжига́я в мое́й души́ Боже́ственную Твою́ любо́вь, и Кресто́м Твои́м огради́ мя, е́же прельсти́ ве́тхий запина́тель, сластьми́ омрачи́в мое́ Христе́ помышле́ние.

Скве́рных помышле́ний, и дея́ний злы́х, пости́мся бра́тие, очи́стим сердца́, впери́мся боже́ственными доброде́тельми, и долере́вностныя зло́бы стремле́ний уклони́мся, да Па́сху вели́кую светоно́снии у́зрим.

Богоро́дичен: Из Тебе́ в на́шу нищету́ Де́во, хотя́ облече́ся, Бога́тый естество́м, ви́димь же на́м бы́сть Неви́димый вы́шними ли́ки пева́емый, сокруше́нный о́браз обновля́я благосты́нею.

И́ный. Ирмо́с: Тебе́ мы́сленную:

Тебе́ на Кресте́ ру́це распросте́рша и четвероконе́чная присво́ивша, И́мже ко Отцу́ обрето́хом вхо́д, Сы́не Бо́жий, вси́ велича́ем.

Тебе́ те́рнием Христе́ венча́вше, беззако́ннии бия́ху, и распя́ша, Его́же ра́ди поднебе́сная колеба́шася вся́: мы́ же спа́сшеся Тя́ велича́ем.

Тро́ичен: Тя́ трисве́тлое Свято́е Божество́, все́ содержа́щее, и храня́щее при́сно, Отца́, Сы́на же, и Ду́ха Жива́го, пе́сньми немо́лчными велича́ем.

Богоро́дичен: Тя́ све́тлый о́блак Ду́ха, из него́же на́м возсия́ све́т непристу́пный, Христо́с, пра́вды вели́кое Со́лнце, пе́сньми Богоро́дице велича́ем.

Сла́ва Тебе́ Бо́же на́ш, сла́ва Тебе́.

Ты́ на́м све́т, свято́е сложе́ние, одоле́ние побе́ды, Христо́в Кре́сте, ты́ на́м воздержа́ние услади́, и тебе́ поклони́тися сподо́би.

Ирмо́с: Тебе́ мы́сленную и одушевле́нную ле́ствицу, на не́йже Бо́г на́ш утверди́ся, е́юже к небеси́ обрето́хом восхожде́ние, пе́сньми Богоро́дице велича́ем.

Свети́лен гла́са.

На стихо́вне самогла́сен дне́, два́жды, гла́с 2:

В че́сти сы́й сыновства́, Отца́ блага́го несмы́сленный а́з не разуме́х: но себе́ сла́вы лиши́х, бога́тство зле́ ижди́в благода́ти. недоста́точествуемь же Боже́ственныя пи́щи, ласка́тель бы́х скве́рному граждани́ну, от него́же по́слан бы́х в душетле́нное его́ село́, живы́й блу́дно, пасо́мь бы́х со скоты́, и сласте́м рабо́тая не насыща́хся: но обра́щься вопию́ благоутро́бному и ще́дрому Отцу́: на не́бо и пред Тобо́ю согреши́х, поми́луй мя́.

Му́ченичен: Святы́х Твои́х мно́жества мо́лят Тя́ Христе́, поми́луй ны́, я́ко Человеколю́бец.

Сла́ва, и ны́не, Крестобогоро́дичен:

Подо́бен: Егда́ от Дре́ва:

Боле́зни претерпе́вшая мно́гия в распя́тии Сы́на и Бо́га Твоего́ Пречи́стая, воздыха́ла еси́ слезя́щи, и вопия́ла еси́ го́рько: увы́ Мне́ Ча́до сладча́йшее! непра́ведно ка́ко стра́ждеши, хотя́й изба́вити су́щыя от Ада́ма земноро́дныя? Те́м Всесвята́я Де́во, Тя́ мо́лим ве́рою, ми́лостива на́м Сего́ сотвори́.

На 6-м часе́ тропа́рь проро́чества. Гла́с 8:

Соста́ва де́л в на́с не́сть Го́споди: ми́лостив еси́ Человеколю́бче, де́л ру́к Твои́х не пре́зри Безгре́шне.

Проки́мен, псало́м 49. Гла́с 4: Пожри́ Бо́гови же́ртву хвалы́, и возда́ждь Вы́шнему моли́твы твоя́. Сти́х: Бо́г бого́в Госпо́дь глаго́ла, и призва́ зе́млю:

Проро́чества Иса́иина чте́ние. [Ис. 10:12–20]

Бу́дет, егда́ сконча́ет Госпо́дь вся́ творя́ в горе́ Сио́ни, во Иерусали́ме, наведе́т на у́м вели́кий, на кня́зя Ассири́йска, и на высоту́ сла́вы о́чию его́. Рече́ бо: кре́постию руки́ моея́ сотворю́, и прему́дростию ра́зума [моего́] отиму́ преде́лы язы́ков, и си́лу и́х пленю́: И сотрясу́ гра́ды населе́ныя, и вселе́нную всю́ объиму́ руко́ю мое́ю я́ко гнездо́, и я́ко оста́вленая я́ица возму́, и не́сть, и́же убежи́т мене́, или́ проти́ву мне́ рече́т, и отве́рзет уста́, и глуми́т. Еда́ просла́вится секи́ра без секу́щаго е́ю? или́ вознесе́тся пила́ без влеку́щаго ю́? та́кожде а́ще кто́ во́змет же́зл, или́ дре́во: и не та́ко. Но по́слет Госпо́дь Савао́ф на твою́ че́сть безче́стие, и на твою́ сла́ву о́гнь горя́ возгори́тся. И бу́дет све́т Изра́илев во о́гнь, и освяти́т его́ огне́м горя́щим, и поя́ст я́ко се́но вещество́. В то́й де́нь уга́снут го́ры и хо́лми, и дубра́вы, и поя́ст от души́ да́же до пло́тей: и бу́дет бежа́й, я́ко бежа́й от пла́мене горя́ща. И оста́вльшиися от ни́х бу́дут в число́, и отроча́ ма́лое напи́шет я́. И бу́дет в то́й де́нь, не приложи́тся к тому́ оста́нок Изра́илев, и спасе́ннии Иа́ковли не бу́дут ктому́ упова́юще на оби́девшыя и́х: но бу́дут упова́юще на Бо́га Свята́го Изра́илева и́стиною.

Проки́мен, псало́м 50, гла́с 6: Поми́луй мя́ Бо́же, по вели́цей ми́лости Твое́й. Сти́х: Се́рдце чи́сто сози́жди во мне́ Бо́же.