Вторник

На Го́споди воззва́х поста́вим стихо́в 6, и пое́м настоя́щыя подо́бны трипе́снца: и Мине́и 3.

Стихи́ры подо́бны господи́на Ио́сифа. Гла́с 1.

Подо́бен: Всехва́льнии му́ченицы:

По́ст возлю́бим, души́ стра́сти люте́йшыя де́йством Ду́ха увяда́ющий, и Боже́ственная дея́ния де́яти укрепля́ющий, и у́м на не́бо возсыла́ющий, и проще́ние хода́тайствующий, о ни́хже согреши́хом, да́руемое от Бо́га Ще́драго.

Подо́бен:

Все́ житие́ мое́ сту́дно ижди́в Го́споди, со блудни́цами окая́нный, я́коже блу́дный умиле́нием зову́: О́тче Небе́сный, согреши́х, очи́сти и спаси́ мя, и не отри́ни мене́ самого́ от Тебе́ удали́вшася, и Боже́ственными де́лы ны́не обнища́вшаго.

И́на стихи́ра подо́бна господи́на Фео́дора, гла́с 3:

Подобен: Прииди́те вси́:

Прииди́те вси́ в кимва́лех псало́мских, честно́е воздержа́ние целу́юще, возгласи́м: в не́м бо мы́сленно зми́я злонача́льнаго расто́ргнем. те́мже со дерзнове́нием возопии́м Христу́: пода́ждь Спа́се неосужде́нно всесвяты́й Тво́й Кре́ст ви́дети, и поклони́тися, во псалме́х и пе́ниих пра́здновати све́тло.

И мине́и 3. Сла́ва и ны́не, Богоро́дичен:

Проки́мен, псало́м 43, гла́с 4: О Бо́зе похва́лимся ве́сь де́нь, и о и́мени Твое́м испове́мыся во ве́к. Сти́х: Бо́же, уши́ма на́шима услы́шахом:

Бытия́ чте́ние. [Быт. 6:9–22.]

Но́е челове́к пра́веден, соверше́н сы́й в ро́де свое́м, Бо́гу угоди́ Но́е. Роди́ же Но́е три́ сы́ны, Си́ма, Ха́ма, Иа́фефа. Растле́ся же земля́ пред Бо́гом, и напо́лнися земля́ непра́вды. И ви́де Госпо́дь Бо́г зе́млю, и бе́ растле́нна: я́ко растли́ вся́ка пло́ть пу́ть сво́й на земли́: И рече́ Госпо́дь Бо́г Но́ю: вре́мя вся́каго челове́ка прии́де пред Мя́, я́ко испо́лнися земля́ непра́вды от ни́х: и се́ А́з погублю́ и́х и зе́млю. Сотвори́ у́бо себе́ ковче́г от дре́в [негнию́щих] четвероуго́льных: гне́зда сотвори́ши в ковче́зе, и посмоли́ши его́ внутрьу́ду и внеу́ду смоло́ю. И та́ко сотвори́ши ковче́г: тре́х со́т лакте́й долгота́ ковче́га, и пяти́десяти лакте́й широта́, и три́десяти лакте́й высота́ его́. Собира́я сво́дом сотвори́ши ковче́г, и в ла́коть сверши́ши его́ свы́ше: две́рь же ковче́га сотвори́ши от страны́: обита́лища двокро́вна и трекро́вна сотвори́ши в не́м. А́з же се́ наведу́ пото́п, во́ду на зе́млю, погуби́ти вся́ку пло́ть, в не́йже е́сть ду́х жи́зни под небесе́м: и ели́ка су́ть на земли́, сконча́ются. И поста́влю заве́т Мо́й с тобо́ю: вни́деши же в ковче́г ты́, и сы́нове твои́, и жена́ твоя́ и жены́ сыно́в твои́х с тобо́ю. И от все́х ското́в, и от все́х га́д, и от все́х звере́й, и от вся́кия пло́ти, два́ два́ от все́х введе́ши в ковче́г, да пита́еши с собо́ю: му́жеский по́л и же́нский бу́дут. От все́х пти́ц перна́тых по ро́ду, и от все́х ското́в по ро́ду, и от все́х гадо́в по́лзающих по земли́ по ро́ду и́х, два́ два́ от все́х вни́дут к тебе́, пита́тися с тобо́ю, му́жеский по́л и же́нский. Ты́ же возми́ себе́ от все́х бра́шен, я́же и́мате я́сти, и собере́ши к себе́, и бу́дут тебе́ и о́ным бра́шно. И сотвори́ Но́е вся́, ели́ка запове́да ему́ Госпо́дь Бо́г, та́ко сотвори́.

Проки́мен, псало́м 44, гла́с 6: Помяну́ и́мя Твое́ во вся́ком ро́де и ро́де. Сти́х: Отры́гну се́рдце мое́ сло́во бла́го:

При́тчей чте́ние. [Притч. 8:1–21]

Сы́не, ты́ прему́дрость пропове́ждь, да ра́зум послу́шает тебе́. На высо́ких бо крае́х е́сть, посреде́ же сте́зь стои́т: При врате́х бо си́льных приседи́т, во вхо́дех же пое́тся. Ва́с о челове́цы, молю́, и вдаю́ мо́й гла́с сыно́м челове́ческим. уразуме́йте незло́бивии кова́рство, ненака́заннии же приложи́те се́рдце. Послу́шайте мене́: честна́я бо реку́, и изнесу́ от усте́н пра́вая. Я́ко и́стине поучи́тся горта́нь мо́й, ме́рзки же предо мно́ю устны́ лжи́выя. С пра́вдою вси́ глаго́лы у́ст мои́х, ничто́же в ни́х стро́потно, ниже́ развраще́нно: Вся́ пра́ва разумева́ющым, и пра́ва обрета́ющым ра́зум. Приими́те наказа́ние, а не сребро́, и ра́зум па́че зла́та искуше́на: избира́йте же ве́дение па́че зла́та чи́ста. Лу́чше бо прему́дрость ка́мений многоце́нных, вся́кое же честно́е недосто́йно ея́ е́сть. А́з прему́дрость всели́х сове́т и ра́зум, и смы́сл а́з призва́х. Стра́х Госпо́день ненави́дит непра́вды, досажде́ния же и горды́ни, и пути́ лука́вых: возненави́дех же а́з развраще́нныя пути́ злы́х. Мо́й сове́т и утвержде́ние, мо́й ра́зум, моя́ же кре́пость. Мно́ю ца́рие ца́рствуют, и си́льнии пи́шут пра́вду. Мно́ю вельмо́жи велича́ются, и власти́тели мно́ю держа́т зе́млю. А́з лю́бящыя мя́ люблю́, и́щущии же мене́ обря́щут благода́ть. Бога́тство и сла́ва моя́ е́сть, и стяжа́ние мно́гих и пра́вда. Лу́чше е́сть плоди́ти мене́ па́че зла́та и ка́мения дра́га: мои́ же плоды́ лу́чше сребра́ избра́нна. В путе́х пра́вды хожду́, и посреде́ сте́зь оправда́ния живу́: Да разделю́ лю́бящым мя́ име́ние, и сокро́вища и́х испо́лню благи́х.

На стихо́вне самогла́сен дне́, два́жды. Гла́с 2:

О́тче Благи́й, от все́х я́же да́л ми́ еси́, обнажи́ мя́ безу́мие мое́: удали́хся от Тебе́, и порабо́тах стра́нному граждани́ну, живо́тная ме́рзкая пасо́х, и ни те́х пи́щи насы́тихся. Те́мже притеко́х к Тебе́, ве́дый Твое́ благоутро́бие: покры́й мою́ наготу́ человеколю́бием Твои́м, и спаси́ мя́.

Му́ченичен: Святы́м му́чеником моля́щымся о на́с, и Христа́ пою́щым, вся́кая пре́лесть преста́, и челове́ческий ро́д ве́рою спаса́ется.

Сла́ва, и ны́не, Богоро́дичен, гла́с то́йже: От ложе́сн Твои́х деви́ческих све́т ми́рови возсия́, сло́вом Сло́во: Того́ моли́ Чи́стая Всесвята́я Де́во, изба́витися душа́м на́шым от се́тей вра́жиих.

Тро́ичны гла́са. По 1-м стихосло́вии седа́льны умили́тельны Осмогла́сника.

По 2-м же стихосло́вии седа́лен господи́на Ио́сифа, гла́с 1.

Подо́бен: Ка́мени запеча́тану:

Посто́м и моле́нием себе́ очи́стим, и о убо́гих промышле́нием Бо́гу угоди́м. Воздохне́м, воспла́чемся те́пле, я́ко и́мамы вре́мя обраще́ния: да пла́ча ве́чнаго су́щаго в пла́мени гее́нны изба́вимся, сла́ву возсыла́юще Христу́, покая́ние определи́вшему челове́ком все́м, обраща́ющымся мы́сли пра́востию. [Два́жды.]

Богоро́дичен: Ру́це Твои́ боже́ственнии, и́миже Соде́теля носи́ла еси́ Де́во Пресвята́я, воплоще́нна Божество́м, просте́рши умоли́, изба́витися на́м от искуше́ний, и страсте́й, и бе́д, восхваля́ющым Тя́ любо́вию и вопию́щым Тебе́: сла́ва все́льшемуся в Тя́, сла́ва проше́дшему из Тебе́, сла́ва свободи́вшему на́с Рождество́м Твои́м.

По 3-м стихосло́вии седа́лен господи́на Фео́дора, гла́с 3.

Подо́бен: Да веселя́тся:

Посто́м веселя́щеся, пе́сньми ра́дующеся, и моли́твами держа́ву на вся́ стра́сти обнося́ще, попере́м ловле́ния велиа́рова, возопии́м Христу́ после́дующе: Кре́ст Тво́й ви́дети сподо́би на́с, я́ко Ще́др, подая́ на́м ве́лию ми́лость. [Два́жды.]

Богоро́дичен: Подо́бен: Красоте́ де́вства:

Богоблаже́нная Ма́ти Безневе́стная, боле́знующую мою́ ду́шу уврачу́й, я́ко содержи́мь е́смь лю́те прегреше́ньми Богоро́дице. Отону́дуже и взыва́ю Ти́ воздыха́нием се́рдца моего́: приими́ мя́ Всенепоро́чная, многосогреши́вшаго, да дерзнове́нием вопию́ Ти́: ра́дуйся Бо́жие жили́ще.

Кано́н в Мине́и, и настоя́щий трипе́снец, господи́на Ио́сифа.

И стихосло́вится пе́снь. Гла́с 1.

Пе́снь 2.

Ирмо́с: Ви́дите ви́дите, я́ко Бо́г А́з е́смь, порабоще́ныя лю́ди Изра́илевы, Моисе́ю народоводи́ти в пусты́ни повеле́вый, и спасы́й я́ко си́лен вла́стию Мое́ю.

Присво́ил мя́ еси́ ба́нею креще́ния, преблаги́й О́тче, бога́тством вся́ким украси́в до́брых: но порабо́тах хотя́ непло́дным помысло́м, те́мже обнища́х.

Ми́лостив, ми́лостив, ми́лостив бу́ди ми́ Го́споди, суди́ су́д мо́й мне́, пра́ведный Судие́, ма́лое мое́ воздыха́ние за ми́лость ве́лию прие́м Христе́, и не пре́зри мене́.

Совле́кшеся скве́рныя оде́жды невоздержа́ния, облече́мся в све́тлую ри́зу воздержа́ния, и све́тли бы́вше, све́тлое Изба́вителя дости́гнем воста́ние.

Богоро́дичен: Спаси́ мя́, спаси́ мя́ Спа́са ро́ждшая: ви́ждь ско́рбь мою́ Чи́стая, ю́же мно́жество безме́рных мои́х зо́л притворя́ет по вся́ дни́, окая́нней мое́й души́, от неча́яния.

И́ный господи́на Фео́дора, гла́с 3.

Ирмо́с: Ви́дите ви́дите:

Ви́дите ви́дите, я́ко А́з е́смь, спасе́ние ва́м источи́вый, я́ко Бо́г, е́же воздержа́нием вси́ земни́и почерпи́те.

Ви́дите ви́дите, я́ко А́з е́смь, вре́мя определи́вый свяще́нное, свято́е ва́м, во учрежде́ние душе́вное, поста́ по́прище.

Сла́ва: Тро́ицу просла́вим, Еди́нице поклони́мся, безнача́льному безнача́льнаго Отца́ Сы́ну единоро́дному, Ду́ху сопресто́льному, и Отцу́ соприсносу́щному.

Богоро́дичен: Моли́ непреста́нно Спа́са Всенепоро́чная, Тя́ Бо́гу усты́ и душе́ю испове́дающым, от вся́каго обстоя́ния изба́витися.

Сла́ва Тебе́ Бо́же на́ш, сла́ва Тебе́.

Ве́лий еси́ Го́споди и чу́дна дела́ Твоя́, я́ко в ро́ве неснеде́на показа́л еси́ иногда́ Дании́ла от льво́в, посто́м огражда́ема.

Ирмо́с: Ви́дите ви́дите, я́ко А́з е́смь Спа́с ми́ра, Све́т и́стинный, Исто́чник жи́зни, Сы́н Бо́жий.

Пе́снь 8.

Ирмо́с: Его́же ужаса́ются:

Пла́чу и рыда́ю, ча́с помышля́я, во́ньже и́мам предста́ти престо́лу стра́шному, муче́нием пови́нен мно́гих мои́х зо́л, я́же в неве́дении сотвори́х, и ра́зуме.

Моисе́й очисти́лище по́ст обре́т, Бо́га разуме́ еди́наго Чи́стаго: душе́ моя́ посто́м очи́стися, да прибли́жишися Бо́гу Человеколю́бцу.

По́ст возлю́бим, ма́терь доброде́телей: пи́щу возненави́дим, роди́тельницу страсте́й, и воззове́м: О́тче, И́же на Небесе́х, спаси́ на́с, спаси́ моли́твами святы́х Твои́х.

Богоро́дичен: Судию́, Его́же родила́ еси́ Де́во Мариа́м, умоли́ в ча́с мя́ суда́ уще́дрити Чи́стая, и спасти́ осужде́ннаго, еди́на предста́тельнице ро́ду челове́ческому.

И́ный. Ирмо́с: В пла́мень ко отроко́м:

Посто́в пресве́тлую благода́ть прие́мше, доброде́тельми облиста́имся, ти́хая ли́ца, ти́хия и обы́чаи показу́юще, душе́внаго устрое́ния.

Пости́вся Елиссе́й, о́трока Сомани́тиде подаде́ жи́ва. о се́м разуме́им бра́тие, по́ст ко́ль до́бр, ко́ль вели́к, ко́ль богодарова́нная благода́ть.

Благослови́м Отца́, и Сы́на, и Свята́го Ду́ха, Го́спода.

Тро́ичен: Со Отце́м Сы́ну поклони́мся, и Ду́ху Свято́му в Тро́ице еди́ней, со а́нгелы зову́ще бре́нными усты́: сла́ва в вы́шних Бо́гу, и́же в Тро́ице.

Богоро́дичен: Отроча́ ражда́еши, де́вствующи еди́на Богора́дованная, та́йна вели́кая, ужа́сное чу́до: Бо́га бо родила́ еси́ воплоще́нна, Спа́са ми́ру.

Сла́ва Тебе́ Бо́же на́ш, сла́ва Тебе́.

Да никто́же на́с уны́нием и ле́ностию обложи́тся, о бра́тие! вре́мя де́лания, ча́с торжества́: кто́ прему́др у́бо во еди́н де́нь приобрести́ вся́ ве́ки;

Хва́лим, благослови́м, покланя́емся Го́сподеви:

Ирмо́с: В пла́мень ко отроко́м евре́йским снизше́дшаго, Бо́жиею си́лою, и я́вльшагося Го́спода, свяще́нницы благослови́те, и превозноси́те во вся́ ве́ки.

Пе́снь 9.

Ирмо́с: Светоно́сный о́блак:

В грехо́вную пучи́ну, во отча́яния глубину́, в треволне́ния помышле́ний, и страсте́й бу́ри впа́д вопию́: ми́лости бе́здно, помози́ ми́, и твои́м благоутро́бием одожди́ ми́ очище́ние грехо́в.

Поще́нием те́ло, воздержа́нием ду́х, слеза́ми ду́шу очи́стим ве́рнии, и чи́сти Чи́стаго све́тло усря́щем, зря́ще спаси́тельныя стра́сти, я́же претерпе́ на́с ра́ди Изба́витель.

Я́ко мыта́рь стеню́, я́коже блудни́ца слезю́, я́ко разбо́йник вопию́: помяни́ мя́ Ще́дре, я́ко слепы́й зову́ Ти́: сы́не Бо́жий, отве́рзи о́чи души́ моея́, ослепле́нныя зло́бою льсти́ваго запина́теля.

Богоро́дичен: Несеко́мую го́ру, непроходи́мую две́рь, вы́шшую небесе́ и тва́ри всея́, добро́ту Иа́ковлю, ру́чку всезлату́ю, и мо́ст, и Ма́терь Зижди́теля, Де́ву ублажи́м ве́рнии.

И́ный. Ирмо́с: На Сина́йстей горе́:

Настоя́щыя дни́ поразуме́вше, па́че все́х свяще́нных, моли́твы Бо́гу возсле́м, со́вестию чи́стою, ча́сто прекланя́юще коле́на, и глаго́люще: Го́споди, приими́ моле́ния и моли́твы рабо́в Твои́х при́сно.

Лю́дие седо́ша, я́коже пи́шется, я́сти же и пи́ти, и воста́ша игра́ти, служа́ще истука́нному Веельфего́ру: ви́ждь объяде́ния лю́тыя во́лны. Мы́ же пости́мся, и просла́вимся, я́ко вели́кий Моисе́й.

Сла́ва: Существо́м Еди́ница е́сть несеко́ма, Пребоже́ственная Тро́ица, соединя́ема Естество́м, дели́тся Ли́цы сво́йственно: несеко́ма бо сече́тся, еди́но су́щи трои́тся: Сия́ Оте́ц е́сть, Сы́н, и Ду́х Живы́й соблюда́ющая все́.

И ны́не: Отрокороди́тельницу де́ву кто́ слы́ша, и ма́терь без му́жа? Мари́е соверша́еши чу́до: но скажи́ ми, ка́ко, не испыту́й глубины́ Богорожде́ния Моего́, сие́ всеи́стинное па́че челове́ческаго ума́ постиже́ние.

Сла́ва Тебе́ Бо́же на́ш, сла́ва Тебе́.

Я́ко Тво́й гне́в нестерпи́мый на гре́шники, кто́ про́чее стерпи́т Го́споди, от сего́ преще́ния? безме́рную име́яй ми́лость, спаси́ мя́ благоутро́бием Твои́м не по дело́м мои́м мно́гим и лю́тым.

Ирмо́с: На Сина́йстей горе́, ви́де Тя́ в купине́ Моисе́й, неопа́льно о́гнь Божества́ заче́ншую во чре́ве, Дании́л же Тя́ ви́де го́ру несеко́мую, же́зл прозя́бший, Иса́иа взыва́ше, от ко́рене Дави́дова.

Свети́лен гла́са.

На стихо́вне самогла́сен дне́, два́жды. Гла́с 7:

Согреши́х, испове́даюся Тебе́ Го́споди, блу́дный а́з, не сме́ю на не́бо воззре́ти очи́ма, отту́ду бо отпа́д, бы́х окая́нен: согреши́х на не́бо и пред Тобо́ю, и не́смь досто́ин нарещи́ся сы́н Тво́й, самого́ себе́ отрица́ю, не тре́бую оглаго́льников, ниже́ па́ки свиде́телей: и́мам облича́ющий мя́ блу́д, и́мам облича́ющее зло́е житие́, и́мам посрамля́ющую одержа́щую мою́ наготу́, к срамоте́ же ру́бы, и́миже оде́ян е́смь. Благоутро́бне О́тче, Сы́не единоро́дный, Ду́ше Святы́й, ка́ющася мя́ приими́, и поми́луй мя́.

Му́ченичен: Посреде́ суди́ща законопресту́пник, ра́дующеся вопия́ху страстоте́рпцы Твои́: Го́споди сла́ва Тебе́.

Сла́ва, и ны́не, Богоро́дичен.

Подо́бен:

Роди́лся еси́ от Де́вы несказа́нно Христе́, и просвети́л еси́ су́щыя во тьме́, вопию́щыя: Го́споди сла́ва Тебе́.

На 6-м часе́ тропа́рь проро́чества, гла́с 7:

Спасе́ние на́ше еси́ Го́споди, и Защи́титель в де́нь печа́ли, поми́луй на́с по вели́цей ми́лости Твое́й Человеколю́бче.

Проки́мен, псало́м 45, гла́с 4: Госпо́дь си́л с на́ми, Засту́пник на́ш Бо́г Иа́ковль. Сти́х: Бо́г на́м прибе́жище и си́ла.

Проро́чества Иса́иина чте́ние. [Ис. 9:9–21, 10:1–4.]

Та́ко глаго́лет Госпо́дь: уразуме́ют вси́ лю́дие Ефре́мовы, и живу́щии в Самари́и, в досажде́нии и высо́ком се́рдце глаго́люще: Пли́нфы падо́ша, но прииди́те, изсече́м ка́мение, и посече́м черни́чие и ке́дры, и сози́ждем себе́ сто́лп. И разруши́т Бо́г востаю́щыя на го́ру Сио́ню, и враги́ Его́ разсы́плет: Сири́ю от восто́к со́лнца, и е́ллины от за́пада со́лнца, пояда́ющыя Изра́иля все́ми усты́, во все́х си́х не отврати́ся я́рость его́, но еще́ рука́ Его́ высока́. И лю́дие не обрати́шася, до́ндеже я́звени бы́ша, и Го́спода не взыска́ша. И отя́т Госпо́дь от Изра́иля главу́ и о́шиб, вели́ка и ма́ла, во еди́н де́нь: Ста́рца, и чудя́щихся ли́цам, сие́ нача́ло: и проро́ка уча́ща беззако́нная, се́й о́шиб. И бу́дут блажа́щии люде́й си́х льстя́ще, и льстя́т, я́ко да поглотя́т я́. Сего́ ра́ди о ю́ношах и́х не возвесели́тся Госпо́дь, и сиро́т и́х, и вдови́ц и́х не поми́лует: я́ко вси́ беззако́ннии и лука́вии, и вся́кая уста́ глаго́лют непра́вду. во все́х си́х не отврати́ся я́рость его́, но еще́ рука́ Его́ высока́. И разгори́тся я́ко о́гнь беззако́ние, и я́ко тро́скот сухи́й пояде́н бу́дет огне́м: и разгори́тся в ча́щах дубра́вных, и поя́ст, я́же о́крест холмо́в вся́. За я́рость гне́ва Госпо́дня сгоре́ вся́ земля́, и бу́дут лю́дие, я́ко огне́м пожже́ни: челове́к бра́та своего́ не поми́лует. Но уклони́тся на де́сно, я́ко вза́лчет, и сне́сть от шу́иих, и не насы́тится челове́к яды́й пло́ти мы́шцы своея́: сне́сть бо Манасси́й Ефре́мово, и Ефре́м Манасси́ино, я́ко вку́пе повою́ют Иу́ду. Во все́х си́х не отврати́ся я́рость [Его́] но еще́ рука́ Его́ высока́. Го́ре пи́шущым лука́вство: пи́шущии бо, лука́вство пи́шут: уклоня́юще су́д убо́гих, восхища́юще су́д ни́щих люде́й мои́х, я́ко бы́ти и́м вдови́це в расхище́ние, и сироте́ в разграбле́ние. И что́ сотворя́т в де́нь посеще́ния? ско́рбь бо ва́м отдале́че прии́дет, и к кому́ прибе́гнете, да помо́жет ва́м; и где́ оста́вите сла́ву ва́шу, Е́же не впа́сти в плене́ние? и под убие́нными паду́т: и во все́х си́х не отврати́ся гне́в Его́, но еще́ рука́ Его́ высока́.

Проки́мен, псало́м 46, гла́с 3: По́йте Бо́гу на́шему, по́йте, по́йте Царе́ви на́шему, по́йте. Сти́х: Вси́ язы́цы восплещи́те рука́ми: