Четверг

На Го́споди воззва́х, поста́вим стихо́в 10. И пое́м самогла́сен два́жды: и му́ченичен, и три́ подо́бны трипе́снца.

Самогла́сен, гла́с 4:

Блу́дно расточи́х оте́ческое мое́ бога́тство, пу́ст бы́х, во стране́ всели́хся лука́вых гра́ждан, и безслове́сным уподо́бихся несмы́сленным ското́м, и вся́кия обнажи́хся Боже́ственныя благода́ти. Те́мже обра́щься вопию́ Тебе́ благоутро́бному и ще́дрому Отцу́: согреши́х, приими́ мя́ ка́ющася Бо́же, и поми́луй мя́.

Му́ченичен: Же́ртвы одушевле́нныя, всесожже́ния слове́сная, му́ченицы Госпо́дни, заколе́ния соверше́нная Бо́жия, Бо́га зна́ющая, и Бо́гом зна́емая овча́та, и́хже огра́да волко́м невхо́дна, моли́теся и на́м упасе́нным бы́ти с ва́ми на воде́ поко́я.

Други́я стихи́ры господи́на Ио́сифа. Гла́с 6.

Подо́бен: Всю́ отложи́вше:

Со́лнца мы́сленнаго зари́ я́вльшеся богови́дцы апо́столи, просвеще́ние испроси́те душа́м на́шым, и страсте́й изба́витися мра́чныя тьмы́, и де́нь спаси́тельный ви́дети помоли́теся, посто́м и моле́ньми сердца́ очи́стившым, я́же лука́вый уязви́, я́ко да ва́с ве́рою спаса́еми чти́м при́сно, всему́дрым пропове́данием ми́р спа́сшыя.

Подо́бен:

В страну́ блу́дный отше́д зло́бы, зле́ ижди́х е́же ми́ О́тче благоутро́бне, бога́тство да́л еси́, и гла́дом та́ю благи́х де́л, и студо́м преступле́ния се́ оде́яхся, благода́ти Бо́жия обнажа́яся, и зову́ Ти: согреши́х, ве́м бо Твою́ бла́гость, приими́ мя́ я́ко еди́наго, Ще́дре, от нае́мников Твои́х Христе́, апо́стол моле́ньми возлю́бльших Тя́.

И́на стихи́ра подо́бна господи́на Фео́дора.

Гла́с то́йже. Подо́бен: Одесну́ю спа́са:

Апо́столи Спа́совы, свети́ла вселе́нныя и благоде́телие и спаси́телие, Бо́жия сла́вы я́ко небеса́ пове́дателие, и преукраше́ннии звезда́ми чуде́с, и зна́меньми исцеле́ний, приле́жно о на́с моли́твы Го́сподеви принеси́те, в воню́ чи́стую, моли́твы прия́ти на́шя, и сподо́битися все́м живоно́снаго Креста́ и целова́ти, и ви́дети стра́хом. того́ поклоне́нием низпосли́ на́м ми́лости Твоя́ Спа́се, я́ко Человеколю́бец.

И в Мине́и 4.

Сла́ва, и ны́не, Богоро́дичен:

Проки́мен, псало́м 51, гла́с 4: Упова́х на ми́лость Бо́жию во ве́ки, и в ве́к ве́ка. Сти́х: Что́ хва́лишися во зло́бе си́льне?

Бытия́ чте́ние. [Быт. 7:6–9.]

Но́е бе́ ле́т шести́ со́т, и пото́п во́дный бы́сть на земли́. Вни́де же Но́е, и сы́нове его́, и жена́ его́, и жены́ сыно́в его́ с ни́м в ковче́г, воды́ ра́ди пото́па. И от пти́ц чи́стых, и от пти́ц нечи́стых, и от ско́т чи́стых, и от ско́т нечи́стых, [и от звере́й,] и от все́х гадо́в пресмыка́ющихся по земли́: Два́ два́ внидо́ша к Но́ю в ковче́г, му́жеский по́л и же́нский, я́коже запове́да [Госпо́дь] Бо́г Но́ю.

Проки́мен, псало́м 52, гла́с 4: Внегда́ возврати́т Госпо́дь плене́ние люде́й свои́х. Сти́х: Рече́ безу́мный в се́рдце свое́м: не́сть Бо́г.

При́тчей чте́ние. [Притч. 9:12–18.]

Сы́не, а́ще прему́др бу́деши, себе́ прему́др бу́деши, и и́скренним твои́м: а́ще же зо́л бу́деши, еди́н почерпне́ши зла́я. сы́н нака́зан прему́др бу́дет, безу́мный же слуго́ю употреби́тся. и́же утвержда́ется на лжа́х, се́й пасе́т ве́тры, то́й же пожене́т пти́цы паря́щыя: оста́ви бо пути́ своего́ виногра́да, в стезя́х же своего́ земледе́лания заблуди́: прохо́дит же сквозе́ пусты́ню безво́дную, и зе́млю определе́нную в жа́ждех, собира́ет же рука́ма непло́дие. Жена́ безу́мная и проде́рзая скудна́ хле́бом быва́ет, я́же не ве́сть стыде́ния. Се́де при две́рех до́му своего́, на столце́ я́ве на сто́гнах, Призыва́ющая мимоходя́щих, и исправля́ющих пути́ своя́: И́же е́сть от ва́с безу́мнейший, да уклони́тся ко мне́: и лише́нным ра́зума повелева́ю, глаго́лющи: Хле́бом сокрове́нным в сла́дость прикосни́теся, и во́ду татьбы́ сла́дкую пи́йте. О́н же не ве́сть, я́ко земноро́днии у нея́ погиба́ют, и во дне́ а́да обрета́ются. но отскочи́, не заме́дли на ме́сте ея́, ниже́ наста́ви о́ка своего́ к не́й: та́ко бо про́йдеши во́ду чужду́ю, и пре́йдеши реку́ чужду́ю. от воды́ же чужди́я оша́йся, и от исто́чника чужда́го не пи́й: да мно́гое вре́мя поживе́ши, и приложа́тся тебе́ ле́та живота́.

И а́бие Боже́ственная слу́жба Преждесвяще́нных.

Тро́ичны

По 1-м стихосло́вии глаго́лем седа́льны апо́стольския осмогла́сника.

По 2-м же стихосло́вии глаго́лем настоя́щий седа́лен, господи́на Ио́сифа. Гла́с 6.

Подо́бен: Наде́жде ми́ра:

Свети́ла ми́ра непреле́стная, ученицы́ Спа́совы, просвети́те мою́ ду́шу грехо́м осле́пшую, и покажи́те боже́ственнаго дне́ о́бщника, храня́ща спаси́тельныя за́поведи, и тьмы́ мя́ изба́вите о́ныя несвети́мыя, я́ко да ва́с прославля́ю.

Сла́ва, то́йже.

И ны́не, Богоро́дичен: Свята́я Влады́чице Богоро́дице, Христа́ Бо́га на́шего Ма́ти, я́ко все́х Творца́ неизрече́нно ро́ждшая, моли́ся со апо́столы свяще́нными всегда́ бла́гости Его́, страсте́й на́с изба́вити, и оставле́ние на́м да́ти грехо́в.

По 3-м же стихосло́вии други́й седа́лен господи́на Фео́дора.

Гла́с 6.

Подо́бен: А́нгельския:

Миросве́тлая свети́ла боже́ственнии апо́столи, просвети́те певцы́ ва́шя, возме́здие творя́ще вре́мени поста́, досто́йно моля́щеся, все́м ви́дети дре́во живоно́снаго Креста́, и лобыза́ти нескве́рныма устна́ма и очи́ма, вопию́щым псало́мски: Го́споди сла́ва Тебе́.

Сла́ва, то́йже.

И ны́не, Богоро́дичен: Наде́жде ми́ра блага́я Богоро́дице Де́во, Твое́ и еди́но стра́шное предста́тельство дви́жем, умилосе́рдися на безпомо́щныя лю́ди, умоли́ ми́лостивнаго Бо́га, изба́витися душа́м на́шым от вся́каго преще́ния, еди́на Благослове́нная.

Кано́н Мине́и, и настоя́щий трипе́снец господи́на Ио́сифа.

И стихосло́вится пе́снь. Гла́с 6.

Пе́снь 4.

Ирмо́с: Христо́с моя́ си́ла:

По́ст, сле́зы, моли́твы, ми́лостыню, благоумиле́нный нра́в, мы́сль пра́вую, жития́ чистоту́, пока́жем ве́рнии, я́ко да сла́вы наслади́мся.

Свети́льницы светя́щии на тве́рди честны́я Це́ркве, пресве́тло яви́стеся апо́столи: те́мже просвети́те на́ша сердца́ Боже́ственным Ду́хом.

Я́ко Боже́ственное у́глие вже́гшеся огне́м невеще́ственным, страстна́я вещества́ попали́те серде́ц на́ших, му́дрии Бо́га на́шего апо́столи.

Богоро́дичен: Све́щниче негаси́мый, черто́же всесве́тлый, серафи́м превы́шшая, херуви́мская колесни́це Всенепоро́чная, грехо́в мя́ лю́тых и бе́д свободи́.

И́ный господи́на Фео́дора. Гла́с то́йже.

Ирмо́с: Услы́ша проро́к:

Свети́льницы богоявле́ния, апо́столи Спа́совы яви́вшеся, неве́дения но́щь разруши́сте, и Це́рковь уясни́вше, просвеща́ете вселе́нную огневеща́нными уче́ньми ва́шими.

Ми́р проте́кше, и́ный у́бо во и́ную страну́, во еди́ну ве́ру вся́ собра́сте апо́столи, и улучи́вше небе́сная, лику́ете, Христа́ непреста́нно моля́ще, спасти́ся все́м на́м.

Тро́ичен: Сы́на от Отца́, и Ду́ха сла́влю, я́ко от со́лнца све́т и лучу́: о́ваго у́бо рожде́ственне, зане́ и рожде́ние: о́ваго же происхо́дне, зане́ и происхожде́ние, собезнача́льную Боже́ственную Тро́ицу, покланя́емую от вся́кия тва́ри.

Богоро́дичен: Де́ва Младе́нца роди́вшая, и чистоту́ соблю́дшая Чи́стая, Ты́ яви́лася еси́, Бо́га ро́ждши и Челове́ка, еди́наго Того́ во обою́ зра́ку, чу́до Твое́ Де́во Ма́ти, ужаса́ет вся́кий слу́х и по́мысл.

Сла́ва Тебе́ Бо́же на́ш, сла́ва Тебе́.

Моли́твами ва́шими святы́ми, апо́столи Госпо́дни, да сподо́бимся животворя́щий Кре́ст облобыза́ти чи́стыми устна́ми и очи́ма, предлежа́щий су́щым в ми́ре, и покланя́емый.

Ирмо́с: Услы́ша проро́к прише́ствие Твое́ Го́споди, и убоя́ся, я́ко хо́щеши от Де́вы роди́тися, и челове́ком яви́тися, и глаго́лаше: услы́шах слу́х Тво́й, и убоя́хся, сла́ва си́ле Твое́й Го́споди.

Пе́снь 8.

Ирмо́с: Из пла́мене преподо́бным:

Моисе́а по́ст Богови́дца показа́, и Илию́ о́гненною колесни́цею взя́т: потщи́ся, помышле́ний вре́дных удержи́ся, я́ко да долу влеку́щия, душе́, изба́вишися пре́лести.

Поползну́вся в го́ршая впадо́х, и я́зве стру́п прилага́ю: исцели́ Христе́, окамене́нное моего́ се́рдца ожесточе́ние, апо́стольскими Ще́дре моли́твами.

Ми́ра свети́ла богоза́рная, страсте́й на́ших о́блаки разори́те, и покло́нники све́тлаго Воскресе́ния покажи́те, пою́щыя Со́лнца сла́вы.

Богоро́дичен: Ро́дове родо́в Тя́ Богоблаже́нная ублажа́ют, я́коже дре́вле прорекла́ еси́: еди́на бо челове́ком блаже́нное родила́ еси́ Сло́во несказа́нно, из Тебе́ воплоще́нное.

И́ный. Ирмо́с: Преподо́бнии Твои́ о́троцы:

Во глубине́ пре́лести пла́вающыя улови́вше тро́стию ве́ры апо́столи, Го́сподеви приведо́сте сия́, благословя́щыя, пою́щыя и превознося́щыя Го́спода во ве́ки.

Ве́лия кре́пость Твоя́ во апо́столех я́ко се́ни и суда́рия и́х исцелева́ют боля́щыя, благословя́щыя, пою́щыя и превознося́щыя Го́спода во ве́ки.

Благослови́м Отца́, и Сы́на, и Свята́го Ду́ха, Го́спода.

Тро́ичен: Безнача́льным и рождество́м же и происхожде́нием Отцу́ покланя́юся ро́ждшему, Сы́на прославля́ю ро́ждшася, и воспева́ю совозсия́вша Отцу́ же и Сы́ну Ду́ха Свята́го.

Богоро́дичен: Его́же родила́ еси́ Де́во несказа́нно, всегда́ я́ко Человеколю́бца не преста́й моля́щи, да бе́д спасе́т к Тебе́ прибега́ющыя.

Сла́ва Тебе́ Бо́же на́ш, сла́ва Тебе́.

Двоенадеся́тице святы́х апо́стол, честно́му Кресту́ сподо́би неосужде́нно поклони́тися мя́, благословя́ща, пою́ща и превознося́ща во вся́ ве́ки.

Хва́лим, благослови́м, покланя́емся Го́сподеви:

Ирмо́с: Преподо́бнии Твои́ о́троцы, в пещи́ херуви́мы подража́ху, трисвяту́ю пе́снь воспева́юще: благослови́те, по́йте и превозноси́те во вся́ ве́ки.

Пе́снь 9.

Ирмо́с: Бо́га челове́ком:

Бо́же и Го́споди Многоми́лостиве, моего́ се́рдца очи́сти я́звы, покая́ния мне́ прилага́я лечбы́: согреши́х, согреши́х Тебе́, уще́дри, спаси́ мя́ апо́стол Твои́х моли́твами, я́ко Многоми́лостив.

Стремле́нием безме́стным после́довах умовре́дно, и вне́ себе́ ве́сь бы́х, сластьми́ жесто́кими пита́емь, и спаси́тельныя лиша́емь сне́ди блу́дный: Христе́ уще́дри, и спаси́ мя́.

Душе́ зло́бы не очи́стившаяся, и сласте́й тлетво́рных себе́ не удали́вшая, что́ безвре́менно ра́дуешися постя́щися: сего́ бо поста́ не избра́ Госпо́дь, еди́н на́шего хотя́й исправле́ния.

Богоро́дичен: Све́том Боже́ственным мене́ просвети́, Де́во Богоро́дице, Све́та роди́тельнице, и души́ моея́ мглу́ отжени́, я́ко да блажу́ Тя́, Ю́же блажа́т вси́ челове́честии ро́ди, я́коже предрекла́ еси́.

И́ный. Ирмо́с: Безсе́меннаго зача́тия:

Сло́вом неве́жи, прему́дри яви́стеся ра́зумом, плете́ния слове́с мудрецо́в разруши́вше, вети́ям сугу́бствия, и число́ звездоче́тцов. Те́м апо́столи Христо́вы еди́ни, всея́ вселе́нныя показа́стеся учи́телие.

Пе́тр вети́йствует, и Плато́н умолче́: учи́т Па́вел, Пифаго́р постыде́ся: про́чий апо́стольский богосло́вяй собо́р, е́ллинское ме́ртвое веща́ние погреба́ет, и ми́р совозставля́ет к слу́жбе Христо́ве.

Сла́ва, тро́ичен: Еди́наго Единороди́телю, Единоро́днаго Сы́на О́тче: и еди́не еди́наго, све́те све́та сия́ние: и еди́ный еди́не, еди́наго Бо́га Святы́й Ду́ше, Го́спода, Госпо́дь вои́стинну сы́й. О Тро́ице Еди́нице Свята́я, спаси́ мя́ богосло́вяща Тя́.

Богоро́дичен: Чу́до Рождества́ Твоего́ удивля́ет мя́ Всенепоро́чная, ка́ко зачина́еши безсе́менно необыме́ннаго? рцы́, ка́ко де́вствуеши, ро́ждши я́ко Ма́ти? е́же па́че естества́ ве́рою прие́м, Рожде́нному поклони́ся: ели́ка хо́щет бо, и мо́жет.

Сла́ва Тебе́ Бо́же на́ш, сла́ва Тебе́.

Кре́ст честны́й дре́во всесвято́е, е́же ми́ру спасе́ние процвете́, ви́дети и поклони́тися вси́ да сподо́бимся, чи́стыми устна́ми и душе́ю, моли́твами все́х ва́с святы́х апо́стол Христо́вых.

Ирмо́с: Безсе́меннаго зача́тия Рождество́ несказа́нное, Ма́тере безму́жныя нетле́нен Пло́д: Бо́жие бо Рожде́ние обновля́ет естества́. Те́мже Тя́ вси́ ро́ди, я́ко Богоневе́стную Ма́терь правосла́вно велича́ем.

Свети́лен гла́са.

На стихо́вне, самогла́сен, два́жды. Гла́с 6:

Сыноположе́ния отпа́д блу́дный а́з, раболе́пно с свиния́ми пита́яся, и ниже́ те́х пи́щи насыща́яся, прихожду́ к Тебе́ Отцу́ благоутро́бному, отону́дуже изыдо́х зле́, возвраща́юся до́бре в покая́нии зовы́й: согреши́х на не́бо и пред Тобо́ю, О́тче пода́ждь ми́ во обраще́нии вели́кую ми́лость.

Му́ченичен: Избра́нныя удиви́ и святы́я Бо́г на́ш, ра́дуйтеся и весели́теся вси́ раби́ Его́, ва́м бо угото́ва венцы́, и Ца́рствие Свое́: но мо́лим, и на́с не забу́дите

Сла́ва, и ны́не, Богоро́дичен: Богоро́дице, Ты́ еси́ лоза́ и́стинная, возрасти́вшая на́м Пло́д живота́: Тебе́ мо́лимся, моли́ся Влады́чице, со святы́ми апо́столы [и все́ми святы́ми,] поми́ловати ду́шы на́ша.

На 6-м часе́ тропа́рь проро́чества. Гла́с 3:

А́ще беззако́ния на́зриши Человеколю́бче, ка́я спасе́ния наде́жда на́м? Но твою́ свы́ше по́мощь, я́ко Ще́др, лю́дем Твои́м низпосли́ Го́споди.

Проки́мен, псало́м 53, гла́с 4: Бо́же, во и́мя Твое́ спаси́ мя, и в си́ле Твое́й суди́ ми. Сти́х: Бо́же, услы́ши моли́тву мою́, внуши́ глаго́лы у́ст мои́х.

Проро́чества Иса́иина чте́ние. [Ис. 11:10–16, 12:1–2.]

Та́ко глаго́лет Госпо́дь: бу́дет в де́нь о́ный ко́рень Иессе́ов, и востая́й владе́ти язы́ки, на того́ язы́цы упова́ти бу́дут: и бу́дет поко́й его́, че́сть. И бу́дет в де́нь о́ный, приложи́т Госпо́дь показа́ти ру́ку Свою́, е́же возревнова́ти по оста́нку про́чему люде́й, и́же а́ще оста́нет от Ассири́ов, и от Еги́пта, и Вавило́на, и от Ефио́пии, и от Елами́тов, и от восто́ков со́лнца, и от Арави́и, и от острово́в морски́х. И воздви́гнет зна́мение в язы́ки, и собере́т поги́бшыя Изра́илевы, и расточе́нныя Иу́дины собере́т от четы́рех кри́л земли́. И оти́мется ре́вность Ефре́мова, и врази́ Иу́дины поги́бнут: Ефре́м не возревну́ет Иу́де, и Иу́да не оскорби́т Ефре́ма. И полетя́т в корабля́х иноплеме́нничих, мо́ре ку́пно пленя́т, и су́щих от восто́к со́лнца, и Идуме́ю: и на Моа́ва пе́рвее ру́ки возложа́т, сы́нове же Аммо́ни пе́рвии покоря́тся. И опустоши́т Госпо́дь мо́ре Еги́петское, и возложи́т ру́ку Свою́ на реку́ ду́хом преси́льным: и порази́т на се́дмь де́брий, я́коже преходи́ти ю́ во обуве́нии: И бу́дет проше́ствие лю́дем Мои́м оста́вльшым во Еги́пте, и бу́дет Изра́илю, я́коже в де́нь, егда́ изы́де от земли́ Еги́петския. И рече́ши в де́нь о́ный: благословлю́ Тя́, Го́споди, я́ко разгне́вался еси́ на мя́, и отврати́л еси́ я́рость Твою́ [от мене́,] и поми́ловал мя́ еси́. Се́ Бо́г мо́й, Спа́с мо́й, упова́я бу́ду на Него́, и не убою́ся: зане́ сла́ва моя́ и похвала́ моя́ Госпо́дь, и бы́сть ми́ во спасе́ние.

Проки́мен, псало́м 54. Гла́с 7: Внуши́ Бо́же, моли́тву мою́, и не пре́зри моле́ния моего́. Сти́х: Вонми́ ми, и услы́ши мя́.