Месяца сентября в 14-й день

Стихиры, глас 1.

Подобен: Небе́сных чино́в:

Крест возно́сится, и де́мони прогоня́ются, / разбо́йник Еде́ма у́бо врата́ отверза́ет, / смерть умерщвля́ется и ны́не пуста́ яви́ся, / Христо́с велича́ется. / Тем весели́теся, вси земноро́днии, / кля́тва разруши́ся. (2)

Прииди́те, боголюби́вии вси, / Крест честны́й возноси́мый ви́дяще, / возвели́чим ку́пно и сла́ву дади́м / Еди́ному Изба́вителю и Бо́гу, взыва́юще: / Распны́йся на Дре́ве кре́стнем, / не пре́зри моля́щихся нас.

Го́ресть дре́вле ослажда́я, Моисе́й / изба́ви Изра́иля, / о́бразом Крест пропису́я, / мы же, сего́ вси боже́ственно, ве́рнии, / та́инственно вообража́юще в сердца́х на́ших всегда́, / спаса́емся держа́вою его́.

Слава, и ныне, глас 6. Самогласен:

Днесь сад живо́тный / от земны́х незаходи́мых недр происхо́дит, / на нем пригвожде́ннаго Христа́ известву́ет Воскресе́ние / и, воздвиза́емый рука́ми свяще́нническими, / Того́ на Небеса́ возвеща́ет возноше́ние, / и́мже на́ше смеше́ние от е́же на зе́млю паде́ния / на Небесе́х жи́тельствует. / Те́мже благода́рственне возопии́м: / Го́споди, вознесы́йся на нем и тем совозне́с нас, / Небе́сныя Твоея́ ра́дости сподо́би, / я́ко Человеколю́бец.

Прокимен дне. И Сподо́би, Го́споди:

На стиховне стихиры, глас 2.

Подобен: До́ме Евфра́фов:

Водо́ю боготво́рною / и Кро́вию Твое́ю, Сло́ве, / све́тло Це́рковь украша́ется, / я́ко неве́ста, / Креста́ сла́ву пою́щи.

Стих: Возноси́те Го́спода Бо́га на́шего / и поклоня́йтеся подно́жию но́гу Его́, я́ко свя́то есть.

Копие́ со Кресто́м, / гво́зди и ина́я, / и́миже живоно́сное / Христо́во пригвозди́ся Те́ло, / вознося́ще, поклони́мся.

Стих: Бог же, Царь наш пре́жде ве́ка, / соде́ла спасе́ние посреде́ земли́.

Егда́ Амали́ка Моисе́й побежда́ше, / на высоту́ ру́це име́я / крестоявле́нно, / образова́ше Христо́ву Страсть пречи́стую.

Слава, и ныне, глас 6: Днесь Дре́во яви́ся, / днесь род евре́йский поги́бе, / днесь ве́рными цари́ ве́ра явля́ется, / и Ада́м дре́ва ра́ди испаде́, / и па́ки Дре́вом де́мони вострепета́ша: / Всеси́льне Го́споди, сла́ва Тебе́.

Тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

По отпущении же малыя вечерни:

Входит екклисиарх со иереем и диаконом и параекклисиархом в жертвенник со свещами, и облачится иерей и диакон; и, кадив честный Крест, глаголет: Благослови́, Влады́ко. Иерей: Благослове́н Бог наш: Таже Трисвятое и по О́тче наш: Тропарь Креста: Спаси́, Го́споди, лю́ди Твоя́: Сла́ва, и ны́не, кондак. И взимает иерей честный Крест с блюдом на главу, и вносит его во святый олтарь, предыдущим же пред ним со двема лампадама, и полагает честный Крест

на святей трапезе на Евангельстем месте, и вжигают пред ним свещу на всю нощь, а Евангелие поставляет на Горнее место.

Подобает ведати:

Яко аще случится праздник сей в Неделю, ничтоже поется воскресно, ни стихиры воскресны, ниже непорочны, ни степенна гласа, ни Евангелие воскресно чтется: точию Воскресе́ние Христо́во: глаголем; не поется же и Свят Госпо́дь Бог: но поем всю службу праздника.

Аще в субботу вечера, поем Блаже́н муж: кафисму всю. Аще же в Неделю вечера, поем Блаже́н муж: 1-й антифон.

Аще ли во иный день, Блаже́н муж: не поем, но по предначинательнем псалме поем: Го́споди, воззва́х: на глас 6.

И поем стихиры, глас 6. Подобен: Все отло́жше:

Крест воздвиза́емь / на нем Вознесе́ннаго Страсть пречи́стую / пе́ти повелева́ет тва́ри всей. / На том бо уби́ в нас уби́вшаго, / умерщвлéнныя оживи́л eсть, / и удобри́, и на Небесе́х жи́ти сподо́би, я́ко Милосе́рд, / премно́жеством бла́гости. / Тем, ра́дующеся, вознесе́м и́мя Eго́ / и Того́ возвели́чим кра́йнее снизхожде́ние. (3)

Моисе́й предобрази́ тя, / ру́ки просте́р на высоту́, / и побежда́ше Амали́ка мучи́теля, / Кре́сте честны́й, / ве́рных похвало́, / страда́льцев утвержде́ние, / апо́столов удобре́ние, / пра́ведных побо́рниче, / всех преподо́бных спаси́телю. Тем, тя воздвиза́ема зря́щи, тварь весели́тся / и торжеству́ет, сла́вящи Христа́, / тобо́ю разстоя́щая собра́вшаго кра́йнею бла́гостию. (3)

Кре́сте пречестны́й, / eго́же обстоя́т чи́ни а́нгельстии, веселя́щеся, / днесь воздвиза́емь, / Боже́ственным манове́нием возно́сиши вся / окраде́нием сне́ди отгна́нныя / и в смерть попо́лзшияся. / Те́мже тя сердцы́ и устна́ми, ве́рнии, лобыза́юще, / свяще́ние почерпа́ем, / возноси́те, вопию́ще, Христа́, Преблага́го Бо́га, / и Того́ покланя́йтеся Боже́ственному подно́жию. (2)

Слава, и ныне, глас 2: Прииди́те, вси язы́цы, / благослове́нному Дре́ву поклони́мся, / и́мже бысть ве́чная пра́вда: / пра́oтца бо Ада́ма прельсти́вый дре́вом / Кресто́м прельща́ется / и па́дает, низве́ржен, паде́нием стра́нным, / мучи́тельством одержа́вый ца́рское зда́ние; / Кро́вию Бо́жиею яд зми́ев отмыва́ется, / и кля́тва разруши́ся осужде́ния пра́веднаго, / непра́ведным судо́м Пра́веднику осужде́ну бы́вшу; / Дре́вом бо подоба́ше дре́во исцели́ти / и Стра́стию Безстра́стнаго, я́же на Дре́ве, / разреши́ти стра́сти осужде́ннаго. / Но сла́ва, Христе́ Царю́, / éже о нас Твоему́ му́дрому смотре́нию, / и́мже спасл eси́ всех, / я́ко Благ и человеколю́бец.

Вход. Прокимен дне.

Аще случится праздник сей в субботу, в пяток вечера прокимен дне оставляется и поется прокимен великий, глас 7: Бог наш на Небеси́ и на земли́ / вся, ели́ка восхоте́, сотвори́. Понеже в субботу вечера поется прокимен: Госпо́дь воцари́ся:

И чтения.

Исхо́да чте́ние

Поя́т Моисе́й сы́ны Изра́илевы от мо́ря Чермна́го и веде́ ты́я в пусты́ню Сур, и идя́ху три дни в пусты́ни, и не обрета́ху воды́, да бы́ша пи́ли. Приидо́ша же в Ме́рру и не можа́ху пи́ти воды́ из Ме́рры, горька́ бо бе; сего́ ра́ди нарече́ся и́мя ме́сту тому́: го́ресть. И ропта́ху лю́дие на Моисе́я, глаго́люще: что пие́м? Возопи́ же Моисе́й ко Го́споду, и показа́ ему́ Госпо́дь дре́во, и вложи́ то́е в во́ду, и сладка́ бысть вода́; та́мо положи́ ему́ Бог оправда́ния и суды́. И та́мо искуша́ше его́ и рече́: А́ще слу́хом услы́шиши глас Го́спода Бо́га твоего́, и уго́дная пред Ним сотвори́ши, и внуши́ши за́поведи Его́, и сохрани́ши вся оправда́ния Его́, вся́ку боле́знь, ю́же наведо́х еги́птяном, не наведу́ на тя. Аз бо есмь Госпо́дь, исцеля́яй тя. И приидо́ша во Ели́м, и бя́ху та́мо двана́десять исто́чников вод, и се́дмьдесят сте́блий фи́никовых, и ополчи́шася та́мо при вода́х. И воздвиго́шася от Ели́ма, и прии́де весь сонм сыно́в Изра́илевых в пусты́ню Син, я́же есть ме́жду Ели́мом и между́ Си́ною.

Исх.15:22–27, 16:1

При́тчей чте́ние

Сы́не, не пренебрега́й наказа́ния Госпо́дня, ниже́ ослабева́й, от Него́ облича́емый. Его́же бо лю́бит Госпо́дь, наказу́ет, бие́т же вся́каго сы́на, его́же прие́млет. Блаже́н челове́к, и́же обре́те Прему́дрость, и сме́ртен, и́же уве́де ра́зум. Лу́чше бо Сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, не сопротивля́ется Ей ничто́же лука́вое, благоразу́мна есть всем лю́бящим Ю́, вся́кое же честно́е недосто́йно Ея́ есть. Долгота́ бо жития́, и ле́та жи́зни в десни́це Ея́. В шу́йце же Ея́ бога́тство и сла́ва, из уст Ея́ исхо́дит пра́вда, зако́н же и ми́лость на язы́це но́сит. Путие́ Ея́, путие́ добры́, и вся стези́ Ея́ с ми́ром. Дре́во живота́ есть всем держа́щимся Ея́ и восклоня́ющимся на Ню, я́ко на Го́спода, тверда́.

Притч.3:11–18

Проро́чества Иса́иина чте́ние

Сия́ глаго́лет Госпо́дь: отве́рзутся врата́ твоя́, Иерусали́ме, вы́ну день и нощь и не затворя́тся, е́же ввести́ к тебе́ си́лу язы́ков и цари́ их ведо́мыя. Язы́цы бо и ца́рие, и́же тебе́ не порабо́тают, поги́бнут, и язы́цы запусте́нием запусте́ют. И сла́ва Лива́нова к тебе́ прии́дет, в кипари́се, и пе́вке и ке́дре вку́пе, просла́вити ме́сто свято́е Мое́, и ме́сто ног Мои́х просла́влю. И по́йдут к тебе́, боя́щеся, сы́нове смири́вших тя и прогне́вавших тя и покло́нятся следо́м ног твои́х вси прогне́вавшии тя, и нарече́шися град Госпо́день, Сио́н Свята́го Изра́илева, за е́же бы́ти тебе́ оста́влену и возненави́дену, и не бе помога́яй тебе́. И положу́ тя в ра́дость ве́чную, весе́лие родо́м родо́в. И иссе́ши млеко́ язы́ков, и бога́тство царе́й сне́си, и разуме́еши, я́ко Аз Госпо́дь, спаса́яй тя и избавля́яй тя, Бог Изра́илев.

Ис.60:11–16

На литии стихиры самогласны, глас 1.

Андрея Иерусалимскаго:

Днесь я́ко вои́стину / святовеща́нный глаго́л Дави́дов коне́ц прия́т: / се бо я́ве пречи́стых ног Твои́х покланя́емся подно́жию / и, на сень крилу́ Твоéю наде́ющеся, / Всеще́дрый, вопие́м Ти: / да зна́менуется на нас свет Лица́ Твоего́. / Правосла́вных люде́й Твои́х рог вознеси́ / честна́го Креста́ Твоего́ воздви́жением, / Христе́ Многоми́лостиве.

Насажде́нное в кра́ниеве ме́сте Дре́во су́щаго живота́, / на не́мже соде́ла спасе́ние Преве́чный Царь посреде́ земли́, / возноси́мо днесь, освяща́ет ми́ра концы́, / и обновля́ется Воскресе́ния дом. / Ра́дуются А́нгели на Небеси́, / и веселя́тся челове́цы на земли́, / Дави́дски вопию́ще и глаго́люще: / возноси́те Го́спода Бо́га на́шего / и поклоня́йтеся подно́жию но́гу Eго́, / я́ко свя́то eсть, / подая́й ми́ру ве́лию ми́лость.

Прообразу́я Крест Твой, Христе́, / патриа́рх Иа́ков, вну́ком благослове́ние да́руя, / на глава́х пременéны ру́ки сотвори́. / Eго́же, Спа́се, мы днесь вознося́ще, взыва́ем: / да́руй христолюби́вому во́инству побе́ды, / я́ко Константи́ну одоле́ние.

Глас 2:

Феофаново: Боже́ственное сокро́вище, в земли́ скрыва́емо, / Жизнода́вца Крест, / на небесе́х показа́ся царю́ благочести́вому / и побе́ды на враги́ подписа́ние явля́ет разу́мно; / eго́же, ра́дуяся, ве́рою и любо́вию, боже́ственно восте́к к высоте́ зре́ния, / тща́нием же того́ от земны́х недр изнесе́, / во избавле́ние ми́ра и спасе́ние душ на́ших.

Киприаново: Рук премене́ние патриа́рха Иа́кова / на благослове́ние чад / держа́вное Креста́ Твоего́ предъявля́ше зна́мение; / его́же мы держа́ще тве́рда храни́теля, / де́монския всемо́щно отго́ним полки́ / и велиа́рову горды́ню в нем низлага́ем, / вражде́бнейшаго Амали́ка побежда́ем всегуби́тельную си́лу. / Того́ и ны́не возноси́ма / благочестивому́дренно, ве́рнии, во очищение́ грехо́в, / Твое́й бла́гости, во многомножа́йшем гла́се вопию́ще, прино́сим: / Го́споди, поми́луй, / из Де́вы воплоти́выйся, / уще́дри рук Твои́х, Бла́же, му́дрое созда́ние.

Льва Деспота: Ты мой покро́в держа́вен еси́, / трича́стный Кре́сте Христо́в, / освяти́ мя си́лою твое́ю, / да ве́рою и любо́вию покланя́юся и сла́влю тя.

Глас 4:

Воспле́щем днесь пе́сненное торжество́ / и све́тлым лице́м и язы́ком я́сно возопии́м: / нас ра́ди, Христе́, суд прие́мый, / и оплева́ния, и ра́ны, и червлени́цею оде́явыйся, / и на Крест возше́д, / его́же ви́девше, со́лнце и луна́ свет скры́ша, / и стра́хом земля́ колеба́шеся, / и заве́са церко́вная раздра́ся на дво́е. / Ты и ны́не да́руй Крест Твой честны́й нам блюсти́теля и храни́теля / и прогони́теля де́монов, / я́ко да вси, облобыза́юще, вопие́м ему́: / спаси́ ны, Кре́сте, си́лою твое́ю, / освяти́ ны све́тлостию твое́ю, честны́й Кре́сте, / и укрепи́ ны воздви́жением твои́м, / я́ко свет нам дарова́н еси́ / и спасе́ние душ на́ших.

Анатолия: Светосия́нен звезда́ми о́браз / предпоказа́, Кре́сте, побе́ду одоле́ния / благочести́вому царю́ вели́кому, / его́же ма́ти Еле́на изобре́тши, / мироявле́нна сотвори́, / и, тя днесь воздви́жуще, ве́рных ли́цы, зове́м: / просвети́ ны све́тлостию твое́ю, / Кре́сте живоно́сный, / освяти́ ны кре́постию твое́ю, / всечестны́й Кре́сте, / и утверди́ ны воздви́жением твои́м, / воздвиза́емый ко ополче́нию враго́в.

Слава, и ныне, глас тойже. Анатолия:

Честна́го Креста́, Христе́, де́йство прообрази́в, Моисе́й, / победи́ проти́внаго Амали́ка в пусты́ни Сина́йстей: / eгда́ бо простира́ше ру́це, Креста́ о́браз творя́, / укрепля́хуся лю́дие; / ны́не же веще́й сбытие́ в нас испо́лнися, / днесь Крест воздвиза́ется, / и де́мони бе́гают, / днесь тварь вся от тли свободи́ся, / вся бо Креста́ ра́ди возсия́ша нам дарова́ния. / Те́мже, ра́дующеся, вси / припа́даем Тебе́, глаго́люще: / я́ко возвели́чишася дела́ Твоя́, Го́споди, сла́ва Тебе́.

На стиховне стихиры, глас 5. Самоподобен:

Ра́дуйся, живоно́сный Кре́сте, / благоче́стия непобеди́мая побе́да, / дверь ра́йская, / ве́рных утвержде́ние, / Це́ркве огражде́ние, / и́мже тля разори́ся и упраздни́ся, / и попра́ся сме́ртная держа́ва, / и вознесо́хомся от земли́ к Небе́сным; / oру́жие непобеди́мое, / бесо́в сопротивобо́рче, / сла́ва му́чеников, / преподо́бных я́ко вои́стину удобре́ние, / приста́нище спасе́ния, / да́руяй ми́ру ве́лию ми́лость.

Стих: Возноси́те Го́спода Бо́га на́шего / и покланя́йтеся подно́жию но́гу Eго́, я́ко свя́то eсть.

Ра́дуйся, Госпо́день Кре́сте, / и́мже разреши́ся от кля́твы челове́чество, / су́щия ра́дости зна́мение, / прогоня́яй враги́ во твое́м воздви́жении, всече́стне, / нам помо́щниче, царе́й держа́во, / кре́пость пра́ведных, / свяще́нников благоле́пие, / вообража́емый, и лю́тых избавля́яй, / жезл си́лы, и́мже пасе́мся, / oру́жие ми́ра, eго́же со стра́хом обстоя́т А́нгели, / Христа́ Боже́ственная сла́ва, / подаю́щаго ми́ру ве́лию ми́лость.

Стих: Бог же, Царь наш пре́жде ве́ка, / соде́ла спасе́ние посреде́ земли́.

Ра́дуйся, слепы́х наста́вниче, / немощны́х врачу́, / воскресе́ние всех уме́рших, / воздви́гнувый ны, во тлю па́дшия, / Кре́сте честны́й, / и́мже разруши́ся кля́тва, и процвете́ нетле́ние, / и земни́и обожи́хомся, / и диа́вол всеконе́чно низве́ржеся. / Днесь воздвиза́ема тя ви́дяще рука́ми архиере́йскими, / возно́сим Вознесе́ннаго посреде́ тебе́ / и тебе́ покланя́емся, / почерпа́юще бога́тно ве́лию ми́лость.

Слава, и ныне, глас 8. Иоанна Монаха:

Его́же дре́вле Моисе́й прообразова́в собо́ю, / Амали́ка низложи́в, победи́, / и Дави́д песнопе́вец / подно́жию Твоему́, вопия́, кла́нятися повелева́ше, / честно́му Кресту́ Твоему́, Христе́ Бо́же, / днесь, гре́шнии, кла́няемся, / устна́ми недосто́йными / Тя, изво́лившаго пригвозди́тися на нем, воспева́юще, мо́лимся: / Го́споди, с разбо́йником Ца́рствия Твоего́ сподо́би нас.

Таже: Ны́не отпуща́еши:

На благословении хлебов тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство. (3)

И чтем слово о честнем Древе.

На Бог Госпо́дь: тропарь трижды, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство. (3)

По 1-м стихословии седален, глас 6:

То́кмо водрузи́ся Дре́во, Христе́, Креста́ Твоего́, / основа́ния поколеба́шася сме́рти, Го́споди: / Его́же бо пожре́ жела́нием ад, отпусти́ тре́петом; / яви́л еси́ нам спасе́ние Твое́, Святы́й, / и славосло́вим Тя, Сы́не Бо́жий, поми́луй нас.

Слава, и ныне, глас 1.

Подобен: Ка́мени запеча́тану:

Креста́ Твоего́ Дре́ву покланя́емся, Человеколю́бче, / я́ко на нем пригвозди́лся еси́, Животе́ всех. / Рай отве́рзл еси́, Спа́се, ве́рою прише́дшему Ти разбо́йнику, / и сла́дости сподо́бися, испове́даяся Тебе́: / помяни́ мя, Го́споди. / Приими́, я́коже о́наго, и нас, зову́щих: / согреши́хом вси, благоутро́бием Твои́м не пре́зри нас.

По 2-м стихословии седален, глас 6:

Днесь проро́ческое испо́лнися сло́во: / се бо покланя́емся на ме́сто, / иде́же стоя́ша но́ги Твоя́, Го́споди. / И, Дре́во спасе́ния прие́мше, / грехо́вных страсте́й свобо́ду получи́хом / моли́твами Богоро́дицы, Еди́не Человеколю́бче.

Слава, и ныне, глас 8.

Подобен: Повеле́нное та́йно:

Прообража́ше та́инственно дре́вле Иису́с Нави́н Креста́ о́браз, / егда́ ру́це простре́ крестови́дно, Спа́се мой, / и ста со́лнце, до́ндеже враги́ низложи́, противостоя́щия Тебе́, Бо́гу; / ны́не бо за́йде, на Кресте́ Тя зря, / и, держа́ву сме́ртную разруши́в, / весь мир совоздви́гл еси́.

Таже полиелей. Величание поется в олтаре пред престолом.

Величание:

Велича́ем Тя, / Живода́вче Христе́, / и чтим Крест Твой святы́й, / и́мже нас спасл еси́ / от рабо́ты вра́жия.

Псалом избранный

Лик 1: Суди́ Го́споди оби́дящия мя́, побори́ борю́щия мя. 2: Приими́ ору́жие и щит, и воста́ни в по́мощь мою́. 1: Зна́менася на нас свет лица́ Твоего́ Го́споди. 2: Я́ко ору́жием благоволе́ния венча́л еси́ нас. 1: Дал еси́ зна́мение боя́щимся Тебе́, е́же убежа́ти от лица́ лу́ка. 2: Позна́ти на земли́ путь Тво́й, во всех язы́цех спасе́ние Твое́. 1: Ви́деша вси концы́ земли́ спасе́ние Бо́га на́шего. 2: Поклони́мся на ме́сто, иде́же стоя́сте но́зе Его́. 1: Тогда́ возра́дуются вся древа́ дубра́вная. 2: Бог же Царь наш пре́жде ве́ка, соде́ла спасе́ние посреде́ земли́. 1: Возноси́те Го́спода Бо́га на́шего, и покланя́йтеся подно́жию но́гу Его́, я́ко свя́то есть. 2: Благослови́ ны Бо́же, Бо́же наш, благослови́ ны Бо́же. 1: Спаси́ лю́ди Твоя́, и благослови́ достоя́ние Твое́. 2: И упаси́ я́, и возми́ я́, до ве́ка.

Сла́ва, и ны́не: Аллилу́иа, трижды.

По полиелеи седален, глас 8.

Подобен: Повеле́нное та́йно:

В раи́ мя пре́жде дре́во обнажи́, / о вкуше́нии враг принося́ умерщвле́ние, / Креста́ же Дре́во, живота́ одея́ние челове́ком нося́, / водрузи́ся на земли́, и мир весь испо́лнися вся́кия ра́дости. / Его́же зря́ще возвыша́ема, / Бо́гу ве́рою, лю́дие, согла́сно возопии́м: / испо́лнь сла́вы дом Твой.

Сла́ва, и ны́не, тойже.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой. Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Ви́деша вси концы́ земли́ / спасе́ние Бо́га на́шего. Стих: Воспо́йте Го́сподеви песнь но́ву, я́ко ди́вна сотвори́ Госпо́дь.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Иоанна, зачало 42 от полу

Рече́ Госпо́дь: О́тче, просла́ви и́мя Твое́. Прии́де же глас с небесе́: и просла́вих, и па́ки просла́влю. Наро́д же стоя́й слы́шав, глаго́лаху: гром бысть, ини́и глаго́лаху: А́нгел глаго́ла Ему́. Отвеща́ Иису́с, и рече́: не Мене́ ра́ди гла́с се́й бы́сть, но наро́да ра́ди. Ны́не суд есть ми́ру сему́: ны́не кня́зь ми́ра сего́ изгна́н бу́дет вон. И а́ще Аз вознесе́н бу́ду от земли́, вся привлеку́ к Себе́. Сие́ же глаго́лаше, назна́менуя, ко́ею сме́ртию хотя́ше умре́ти. Отвеща́ Ему́ наро́д: мы слы́шахом от зако́на, я́ко Христо́с пребыва́ет во ве́ки: ка́ко Ты глаго́леши, вознести́ся подоба́ет Сы́ну Челове́ческому? Кто есть сей Сын Челове́ческий? Рече́ же им Иису́с: еще́ ма́ло вре́мя свет в вас есть. Ходи́те, до́ндеже свет и́мате, да тма вас не и́мет. И ходя́й во тме не весть, ка́мо и́дет. До́ндеже свет и́мате, ве́руйте во свет, да сы́нове све́та бу́дете.

Ин.12:28–36А

Таже: Воскресе́ние Христо́во ви́девше, / поклони́мся Свято́му Го́споду Иису́су, / еди́ному безгре́шному. / Кресту́ Твоему́ покланя́емся, Христе́, / и свято́е Воскресе́ние Твое́ пое́м и сла́вим. / Ты бо еси́ Бог наш, / ра́зве Тебе́ ино́го не зна́ем, / и́мя Твое́ имену́ем. / Прииди́те, вси ве́рнии, / поклони́мся Свято́му Христо́ву Воскресе́нию: / се бо прии́де Кресто́м ра́дость всему́ ми́ру. / Всегда́ благословя́ще Го́спода, / пое́м Воскресе́ние Его́: / распя́тие бо претерпе́в, / сме́ртию смерть разруши́.

Псалом 50-й.

По 50-м псалме

Слава: Моли́твами Апо́столов, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6:

Кре́сте Христо́в, христиа́н упова́ние, / заблу́ждших наста́вниче, / обурева́емых приста́нище, / в бра́нех побе́да, / вселе́нныя утвержде́ние, / неду́жных врачу́, / ме́ртвых воскресе́ние, / поми́луй нас.

Канон Креста, егоже краегранесие:

Кресту́, наде́явся, пе́ние отрыга́ю.

Творение кир Космы.

Ирмосы по дважды, тропари же на 12, глас 8.

Песнь 1

Ирмос: Крест начерта́в, Моисе́й / впря́мо жезло́м Чермно́е пресече́, / Изра́илю пешеходя́щу; / то́же обра́тно фарао́новым колесни́цам, / уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

О́браз дре́вле Моисе́й пречи́стыя Стра́сти в себе́ само́м прообрази́, / свяще́нных среде́ стоя́: / Крест же вообрази́в, / просте́ртыми побе́ду дла́ньми воздви́же, / держа́ву погуби́в Амали́ка всегуби́теля. / Тем Христу́ поим, Бо́гу на́шему, я́ко просла́вися.

Возложи́ Моисе́й на столпе́ врачевство́, / тлетвори́ваго избавле́ние и ядови́таго угрызе́ния, / и дре́ву о́бразом Креста́ / по земли́ пресмыка́ющагося зми́я привяза́, / лука́вный в сем обличи́в вред. / Тем Христу́ пои́м, Бо́гу на́шему, я́ко просла́вися.

Показа́ не́бо Креста́ побе́ду благоче́стия держа́телю и царю́ богому́дру, / враго́в в не́мже злосе́рдных низложи́ся свире́пство, / лесть же преврати́ся, / и ве́ра распростре́ся земны́м конце́м Боже́ственная. / Тем Христу́ пои́м, Бо́гу на́шему, я́ко просла́вися.

Катавасия, оба лика вкупе: Крест начерта́в:

Песнь 3

Ирмос: Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви, / ны́не процвете́ Дре́во Креста́, / в держа́ву и утвержде́ние.

Я́ко испусти́, ударя́емь, во́ду краесеко́мый / непокори́вым лю́дем и жестосе́рдым, / богозва́нныя проявля́ше Це́ркве та́инство, / ея́же Крест держа́ва и утвержде́ние.

Ре́бром пречи́стым, копие́м прободе́нным, / вода́ с Кро́вию истече́, / обновля́ющая Заве́т и омыва́тельная греха́: / ве́рных бо Крест похвала́ и царе́й держа́ва и утвержде́ние.

Седален, глас 4 Подобен:

Ско́ро предвари́:

В тебе́, треблаже́нне и жизнода́вче Кре́сте, / лю́дие учрежда́ющеся, спра́зднуют с невеще́ственными ли́ки, / чи́ни архиере́йстии благогове́йно воспева́ют, / мно́жества же мона́шествующих и по́стников покланя́ются, / Христа́ же распе́ншагося вси сла́вим.

Сла́ва, и ны́не, тойже.

Песнь 4

Ирмос: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Горькоро́дныя преложи́ дре́вом Моисе́й / источники в пусты́ни дре́вле, / Кресто́м ко благоче́стию язы́ков / проявля́я преложе́ние.

Глубине́ вне́дривый секу́щую / издаде́ Иорда́н дре́ву, / Кресто́м и креще́нием / сече́ние ле́сти зна́менуя.

Свяще́нно ополча́ются / четвероча́стнии лю́дие, предходя́ще / о́бразом свиде́тельства ски́нии, / крестообра́зными чи́нми прославля́еми.

Чу́дно простира́емь, / со́лнечныя лучи́ испуща́ше Крест, / и пове́даша небеса́ / сла́ву Бо́га на́шего.

Песнь 5

Ирмос: О треблаже́нное Дре́во, / на не́мже распя́ся Христо́с, Царь и Госпо́дь! / И́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

Тебе́, приснопе́тое Дре́во, на не́мже простре́ся Христо́с, / Еде́м храня́щее обраща́ющееся ору́жие, Кре́сте, устыде́ся: / стра́шный же Херуви́м уступи́ на тебе́ пригвожде́нному Христу́, / подаю́щему мир душа́м на́шим.

Подзе́мных си́лы проти́вныя Креста́ страша́тся / начерта́ема зна́мения на возду́се, / по нему́же хо́дят Небе́сных и земноро́дных ро́ди, / коле́на приклоня́юще Христу́, / подаю́щему мир душа́м на́шим.

Заря́ми нетле́нными я́влься Боже́ственный Крест / омраче́нным язы́ком, заблужде́нным в пре́лести, / Боже́ственный свет облиста́в, / усвоя́ет на нем пригвожде́нному Христу́, / подаю́щему мир душа́м на́шим.

Песнь 6

Ирмос: Во́днаго зве́ря во утро́бе / дла́ни Ио́на крестови́дно распросте́р, / спаси́тельную Страсть прообража́ше я́ве. / Тем, тридне́вен изше́д, / преми́рное Воскресе́ние прописа́ше / Пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Ста́ростию преклони́вся и неду́гом отягче́н, испра́вися Иа́ков, ру́це премени́в, / де́йствие явля́я жизноно́снаго Креста́: / и́бо ве́тхость зако́ннаго сено́внаго писа́ния новописа́ на сем Пло́тию пригвозди́выйся Бог / и душегуби́тельный неду́г ле́сти отгна́.

На ю́ныя возложи́в дла́ни боже́ственный Изра́иль, крестови́дно главы́ явля́ше, / я́ко старе́йшая сла́ва, законослужи́тели лю́дие. / Те́мже, подмне́вся та́ко испрельсти́тися, не измени́ жизноно́снаго о́браза: / превзы́дут бо лю́дие Христо́вы Бо́жии новоутвержде́ннии, / вопия́ху, Кресто́м огражда́еми.

Кондак, глас 4. Самоподобен:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ си́лою Твое́ю ве́рныя лю́ди Твоя́, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Икос: И́же до тре́тияго Небесе́ восхище́н бысть в рай / и глаго́лы слы́шав неизрече́нныя и Боже́ственныя, / и́хже не леть язы́ки (челове́ческими) глаго́лати, / что Гала́том пи́шет, я́ко рачи́телие Писа́ний прочто́сте и позна́сте: / мне, глаго́лет, хвали́тися да не бу́дет, то́кмо во еди́ном Кресте́ Госпо́дни, / на не́мже, страда́в, уби́ стра́сти. / Того́ у́бо и мы изве́стно держи́м, Крест Госпо́день, хвалу́ вси: / есть бо нам спаси́тельное сие́ Дре́во / oру́жие ми́ра, непобеди́мая побе́да.

Песнь 7

Ирмос: Безу́мное веле́ние мучи́теля злочести́ваго / лю́ди поколеба́, / ды́шущее преще́ние и злохуле́ние богоме́рзкое; / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному Ду́ху, / со огне́м су́ще, поя́ху: / Препе́тый отце́в и нас Бо́же, благослове́н еси́.

От дре́ва вкуси́в, пе́рвый в челове́цех в тле́ние всели́ся: / отверже́нием бо жи́зни безче́стнейшим осуди́ вся, / всему́ ро́ду телотле́нен не́кий я́ко вред неду́га преподаде́; / но, обре́тше, земноро́днии, воззва́ние кре́стным Дре́вом, зове́м: / препе́тый отце́в и нас Бо́же, благослове́н еси́.

Разруши́ повеле́ние Бо́жие преслуша́ние, / и дре́во принесе́ смерть челове́ком, / е́же неблаговре́менно прича́стно бы́вшее; / во утвержде́ние же зело́ честна́го / отту́ду жи́зни дре́во возбраня́емо бе, / е́же разбо́йнику злоуме́ршу отве́рзе, благоразу́мно зову́щу: / препе́тый отце́в и нас Бо́же, благослове́н еси́.

Жезла́ объе́млет край Ио́сифова, / бу́дущая зря, Изра́иль, / Ца́рствия держа́вное, / я́ко возыму́ществит пресла́вный Крест, проявля́я: / сей бо царе́й победоно́сная похвала́ и свет ве́рою зову́щим: / препе́тый отце́в и нас Бо́же, благослове́н еси́.

Песнь 8

Ирмос: Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во, / и огнь в ро́су претво́ршее, / и превозноси́те всем жизнь подава́ющаго / Ду́ха Всесвята́го во ве́ки.

Воздвиза́ему Дре́ву, / окропле́ну Кро́вию вопло́щшагося Сло́ва Бо́га, / по́йте, Небе́сныя Си́лы; / земны́х воззва́ние пра́зднующе, лю́дие, / поклони́теся Христо́ву Кресту́, / и́мже ми́ру воста́ние во ве́ки.

Земноро́днии, дла́ньми, строи́телие благода́ти, / Крест, на не́мже стоя́ше Христо́с Бог, возноси́те священноле́пно / и копие, Бо́жия Сло́ва Те́ло пробо́дшее, / да ви́дят язы́цы вси спасе́ние Бо́жие, / сла́вяще Его́ во ве́ки.

Боже́ственным судо́м предызбра́ннии, весели́теся, / христиа́нстии ве́рнии ца́рие, / хвали́теся победоно́сным ору́жием, / прие́мше от Бо́га Крест честны́й: / в сем бо коле́на бра́ней, де́рзости и́щуще, / разсыпа́ются во ве́ки.

На 9-й песни Честне́йшую: не поем, но поем припев праздника: Велича́й, душе́ моя́, / пречестны́й Крест Госпо́день. Таже ирмос 1-го канона: Та́ин еси́, Богоро́дице, рай:

И другий лик подобне, припев и ирмос. И к прочим 6-ти стихом тойже припев поем.

Песнь 9

Ирмос: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся Ему́, Тя велича́ем.

Да возра́дуются древа́ дубра́вная вся, освяти́вшуся естеству́ их, / от Него́же изнача́ла насади́шася, / Христу́ распросте́ршуся на Дре́ве; / тем, ны́не возноси́му, / покланя́ющеся Ему́, Тя велича́ем.

Свяще́нный воста́ рог / и глава́ всем богому́дрым, Крест, / и́мже гре́шных мы́сленно стира́ются ро́зи вси; / тем, ны́не возноси́му, покланя́ющеся ему́, Тя велича́ем.

Другий припев: Велича́й, душе́ моя́, / животворя́щаго Креста́ Госпо́дня воздви́жение.

И ирмос: Сне́дию дре́ва:

И другий лик подобне, припев и ирмос. Тропари же 6 с симже припевом.

Ин. Ирмос: Сне́дию дре́ва ро́ду прибы́вшая смерть / Кресто́м упраздни́ся днесь, / и́бо прама́терняя всеро́дная кля́тва разруши́ся / прозябе́нием Чи́стыя Богома́тере, / Ю́же вся Си́лы Небе́сныя велича́ют.

Го́рести уби́йственныя, я́же от дре́ва, не оста́вив, Го́споди, / Кресто́м бо сию́ соверше́нно истреби́л еси́. / Сего́ ра́ди и дре́вом услади́ иногда́ го́ресть вод Ме́рры: / прообразу́ющее Креста́ де́йство, / е́же вся Си́лы Небе́сныя велича́ют.

Непреста́нно гружа́емыя мра́ком пра́отца, Го́споди, / Кресто́м возвы́сил еси́ днесь, / я́ко бо ле́стию весьма́ неудержа́нно естество́ преднизведе́ся, / всеро́дне ны па́ки испра́ви свет Креста́ Твоего́, / его́же, ве́рнии, велича́ем.

Да о́браз пока́жеши ми́ру покланя́емый, Го́споди, Креста́, / во всех я́ко пресла́вный, на небесе́х изобрази́л еси́, / све́том безме́рным озаре́н, / царю́ всеору́жие непобеди́мое. / Тем Тя вся Си́лы Небе́сныя велича́ют.

Катавасия: Та́ин еси́, Богоро́дице, рай: Другий: Сне́дию дре́ва: С припевы. И поклон.

Светилен.

Подобен: Ученико́м:

Крест, храни́тель всея́ вселе́нныя, / Крест красота́ Це́ркве, / Крест царе́й держа́ва, / Крест ве́рных утвержде́ние, / Крест А́нгелов сла́ва и де́монов я́зва. (2)

Слава, и ныне.

Подобен: Жены́, услы́шите:

Крест воздвиза́ется днесь, и мир освяща́ется: / И́же бо со Отце́м седя́й и Ду́хом Святы́м на сем ру́це распростре́, / мир весь привлече́ к Твоему́, Христе́, позна́нию; / и́же у́бо на Тя наде́ющияся / боже́ственныя сподо́би сла́вы.

На хвалитех стихиры, на 4, глас 8. Самоподобен:

О, пресла́внаго чудесе́, / живоно́сный сад, / Крест пресвяты́й / на высоту́ возноси́мь явля́ется днесь. / Славосло́вят вси концы́ земни́и, / устраша́ются де́монския полки́. / О, каковы́й дар земны́м дарова́ся! / И́мже, Христе́, спаси́ ду́ши на́ша, / я́ко Eди́н Благоутро́бен. (2)

О, пресла́внаго чудесе́, / я́ко грозд, испо́лнен живота́, / понесы́й Вы́шняго, / от земли́ воздвиза́емь Крест ви́дится днесь, / и́мже вси к Бо́гу привлеко́хомся, / и поже́рта бысть до конца́ смерть. / О, Дре́во пречестно́е, / и́мже восприя́хом во Eде́ме безсме́ртную пи́щу, / Христа́ сла́вяще!

О, пресла́внаго чудесе́, / широта́ Креста́ и долгота́ / Небеси́ равна́ eсть, / я́ко Боже́ственною благода́тию освяща́ет вся́чeская. / О сем язы́цы ва́рварстии побежда́ются, / о сем ски́птры царе́й утвержда́ются. / О, боже́ственныя ле́ствицы, / éюже восхо́дим на Небеса́, / вознося́ще в пе́снех Христа́ Го́спода.

Слава, и ныне, глас 6: Днесь происхо́дит Крест Госпо́день, / и ве́рнии прие́млют того́ жела́нием, / и взе́млют исцелéния души́ же и те́ла / и вся́кия боле́зни. / Сего́ целу́им ра́достию и стра́хом: / стра́хом, греха́ ра́ди, я́ко недосто́йни су́ще; / ра́достию же, спасе́ния ра́ди, / éже подае́т ми́ру на том пригвозди́выйся Христо́с Бог, / име́яй ве́лию ми́лость.

И славословие великое тихо и согласно поют. Поему же великому славословию, облачится настоятель во всю священную одежду, и приемлет кадильницу с фимиамом, и приходит ко Святей Трапезе, и кадит Честный Крест крестообразно, и взимает его на главу, и исходит северными дверьми, предидущим ему со двема лампадами даже до Царских врат, и тамо став ожидает конца Славословия и Трисвятаго. Сему же скончану, возглашает

настоятель велегласно: Прему́дрость, про́сти. Мы же начинаем тропарь: Спаси́, Го́споди, лю́ди Твоя́: трижды. И приходит настоятель, нося на главе Честный Крест до среды церкве пред святыя Царския двери: тамо убо уготовану аналогию, полагает верху его Честный Крест, и кадит крестообразно. Таже творит поклоны три до земли, в кой либо буди день, и взем Честный Крест со благовонными васильками, на подножие Креста обложенными,

станет пред аналогием зря к востоком. И диакон возглашает велегласно во услышание всех: Поми́луй нас, Бо́же, по вели́цей ми́лости Твое́й, мо́лимся Тебе́, услы́ши нас, Го́споди, и поми́луй, рцем вси. И начинаем первую сотницу, Го́споди, поми́луй, 40: знаменающу настоятелю в начале Честным Крестом, трижды. Таже преклоняет главу, елико пядию

отстояти главе от земли, и помалу воздвизается горе даже до скончания втораго, 40, Го́споди, помилуй. Егда же доспеет до 97, Го́споди, поми́луй, возвышает глас свой екклисиарх, настоятель же прямо стоя, и конца сотницы ожидая, знаменует крестом паки трижды. Таже

обращается к западней стране. И глаголет диакон: Еще́ мо́лимся о ми́лости, жи́зни и оставле́нии грехо́в Вели́каго господи́на и отца́ на́шего Святе́йшаго Патриа́рха [имя рек], и всего́ о Христе́ бра́тства на́шего, о здра́вии и о спасе́нии, рцем вси. И начинаем вторую сотницу, Го́споди, помилуй. И творит настоятель второе воздвижение, якоже преднаписася. Таже обращается к полуденной стране. И глаголет диакон: Еще́ мо́лимся о Богохрани́мей стране́ Росси́йстей, о власте́х и во́инстве ея́, да ти́хое и безмо́лвное житие́ поживе́м во вся́ком благоче́стии и чистоте́, рцем вси. И начинаем третию сотницу, Го́споди, поми́луй. Скончаваемей же той, обращается настоятель к северной стране. И глаголет диакон: Еще́ мо́лимся о вся́кой души́ христиа́нстей, скорбя́щей же и озло́бленней, здра́вия, спасе́ния, и оставле́ния грехо́в тре́бующей, рцем вси. И бывает 4-е воздвижение. И обращается настоятель к востоком. И глаголет диакон: Еще́ мо́лимся о всех служа́щих и послужи́вших во святе́й оби́тели сей [или хра́ме сем], оте́ц и бра́тий на́ших, о здра́вии и о спасе́нии, и оставле́нии грехо́в их, рцем вси. И начинаем пятую сотницу. По пятом же воздвижении, поем: Сла́ва, и ны́не, кондак: Вознесы́йся на Крест во́лею: Поему же сему, полагает настоятель Честное древо Креста на аналогии, и поет тропарь сей во глас 6-й: Кресту́ Твоему́ покланя́емся, Влады́ко, и свято́е воскресе́ние Твое́ сла́вим. Трижды. Поющим же и братиям тойже тропарь начинает кланятися настоятель, и творит метания два пред честным крестом,

таже целует его. По целовании же творит паки едино метание, такожде и на оба лика по единому метанию. Посем приходят братия вся от десныя и левая страны два два, по чину покланяются, и целуют честный крест. Поем же и стихиры самогласны, дóндеже совершится целование. И по скончании целования Честнаго Креста, поставляется аналогий, с Честным Крестом, одесную страну Царских дверей, и тамо стоит, дóндеже праздник отдастся.

Егда же целуем честный Крест,

поем стихиры самогласны честнаго Креста, глас 2:

Прииди́те, ве́рнии, / животворя́щему Дре́ву поклони́мся, / на не́мже Христо́с, Царь сла́вы, во́лею ру́це распросте́р, / вознесе́ нас на пе́рвое блаже́нство, / я́же пре́жде враг сла́стию укра́д, / изгна́ны от Бо́га сотвори́. / Прииди́те, ве́рнии, Дре́ву поклони́мся, / и́мже сподо́бихомся неви́димых враг сокруши́ти главы́. / Прииди́те, вся oте́чeствия язы́ков, / Крест Госпо́день пе́сньми почти́м. / Ра́дуйся, Кре́сте, па́дшаго Ада́ма соверше́нное избавле́ние! / О тебе́ бо ве́рнейшии ца́рие на́ши хва́лятся, / я́ко твое́ю си́лою исма́ильтeския лю́ди держа́вно покаря́юще. / Тя ны́не со стра́хом христиа́не целу́юще, / на тебе́ пригвозди́вшагося Бо́га сла́вим, глаго́люще: / Го́споди, на том пригвозди́выйся, поми́луй нас, / я́ко Благ и Человеколю́бец.

Глас 5: Прииди́те, лю́дие, / пресла́вное чу́до ви́дяще, Креста́ си́ле поклони́мся: / я́ко дре́во в раи́ смерть прозябе́, / сие́ же жизнь процвете́, / безгре́шнаго иму́щее пригвожде́нна Го́спода, / от Него́же, вси язы́цы, нетле́ние взе́млюще, зове́м: / И́же Кресто́м смерть упраздни́вый / и нас свободи́вый, сла́ва Тебе́.

Глас тойже: Глас проро́к Твои́х, Иса́ии и Дави́да, / испо́лнися, Бо́же, глаго́лющий: / прии́дут вси язы́цы, Го́споди, / и покло́нятся пред Тобо́ю. / Се бо лю́дие, и́же Твоея́, Бла́же, благода́ти напо́лнишася, / во дво́рех Твои́х Иерусали́ма. / Крест претерпе́вый за ны / и Воскресе́нием Твои́м животворя́й, / сохрани́ и спаси́ ны.

Глас 6: Четвероконе́чный мир / днесь освяща́ется, / четвероча́стному воздвиза́ему Твоему́ Кресту́, Христе́ Бо́же наш, / и рог ве́рных христиа́н совозно́сится; / тем враго́в сокруша́ем ро́ги. / Ве́лий еси́, Го́споди, / и ди́вен в де́лех Твои́х, / сла́ва Тебе́.

Проро́ков гла́си / Дре́во свято́е предвозвести́ша, / и́мже дре́вния свободи́ся кля́твы сме́ртныя Ада́м, / тварь же, днесь возноси́му тому́, совозвыша́ет глас, / от Бо́га прося́щи бога́тыя ми́лости; / но, Еди́ный в благоутро́бии безме́рный, Влады́ко, / очище́ние бу́ди нам / и спаси́ ду́ши на́ша.

Глас 8: Глас проро́ка Твоего́ Моисе́я, Бо́же, / испо́лнися, глаго́ляй: / у́зрите Живо́т ваш, ви́сящь пред очесы́ ва́шими. / Днесь Крест воздвиза́ется, / и мир от ле́сти свобожда́ется, / днесь Христо́во Воскресе́ние обновля́ется, / и концы́ земли́ ра́дуются, / в кимва́лех дави́дски песнь Тебе́ принося́ще и глаго́люще: / соде́лал еси́ спасе́ние посреде́ земли́, Бо́же, / Крест и Воскресе́ние, / и́хже ра́ди нас спасл еси́, Бла́же и Человеколю́бче, / Всеси́льне Го́споди, сла́ва Тебе́.

Глас тойже: Днесь Влады́ка тва́ри / и Госпо́дь сла́вы / на Кресте́ пригвожда́ется / и в ре́бра пробода́ется, / же́лчи и о́цта вкуша́ет Сла́дость церко́вная, / венце́м от те́рния облага́ется покрыва́яй не́бо о́блаки, / оде́ждею облачи́тся поруга́ния и зауша́ется бре́нною руко́ю, / руко́ю созда́вый челове́ка, / по плеще́ма бие́н быва́ет, / одева́яй не́бо о́блаки, / заплева́ния и ра́ны прие́млет, / поноше́ния и зауше́ния, / и вся терпи́т мене́ ра́ди, осужде́ннаго, / Изба́витель мой и Бог, / да спасе́т мир от пре́лести, / я́ко Благоутро́бен.

Слава, и ныне, глас тойже:

Днесь Неприкоснове́нный Существо́м / прикоснове́н мне быва́ет / и стра́ждет Стра́сти, / свобожда́яй мя от страсте́й, / свет подава́яй слепы́м / от беззако́нных усте́н оплева́ется / и дае́т плещи́ за пленéнныя на раны. / Сего́ Чи́стая Де́ва и Ма́ти на Кресте́ зря́щи, / боле́зненно веща́ше: / увы́ Мне, Ча́до Мое́, / что сие́ сотвори́л eси́ ? / Кра́сный добро́тою па́че всех челове́к / бездыха́нный, беззра́чный явля́ешися, / не име́я ви́да, ниже́ добро́ты, увы́ Мне, Мой Све́те, / не могу́ спя́ща зре́ти Тя, / утро́бою уязвля́юся, / и лю́тое oру́жие се́рдце Мое́ прохо́дит; / воспева́ю Твоя́ стра́сти, / покланя́юся благоутро́бию Твоему́, / Долготерпели́ве Го́споди, сла́ва Тебе́.

Таже ектении, и прочее обычное. И бывает совершенный отпуст.

Отпуст:

Христо́с, и́стинный Бог наш, моли́твами пречи́стыя Своея́ Ма́тере, си́лою честна́го и животворя́щаго Креста́, святы́х сла́вных и всехва́льных Апо́стол, и всех святы́х, поми́лует и спасе́т нас, я́ко Благ и Человеколю́бец.

Антифон 1-й, псалом 21, глас 2

Стих 1: Бо́же, Бо́же мой, вонми́ ми, / вску́ю оста́вил мя еси́? Моли́твами Богоро́дицы, Спа́се, спаси́ нас.

Стих 2: Дале́че от спасе́ния моего́ / словеса́ грехопаде́ний мои́х.

Моли́твами Богоро́дицы, Спа́се, спаси́ нас.

Стих 3: Бо́же мой, воззову́ во дни, и не услы́шиши, / и в нощи́, и не в безу́мие мне.

Моли́твами Богоро́дицы, Спа́се, спаси́ нас.

Стих 4: Ты же во святе́м живе́ши, / Хвало́ Изра́илева.

Моли́твами Богоро́дицы, Спа́се, спаси́ нас.

Сла́ва, и ны́не: Моли́твами Богоро́дицы, Спа́се, спаси́ нас.

Антифон 2-й, псалом 73, глас 2

Стих 1: Вску́ю, Бо́же, / отри́нул ны еси́ до конца́?

Спаси́ ны, Сы́не Бо́жий, / Пло́тию распны́йся, пою́щия Ти: / аллилу́иа.

Стих 2: Помяни́ сонм Твой, / его́же стяжа́л еси́ испе́рва.

Спаси́ ны, Сы́не Бо́жий, / Пло́тию распны́йся, пою́щия Ти: / аллилу́иа.

Стих 3: Гора́ Сио́н сия́, / в не́йже всели́лся еси́.

Спаси́ ны, Сы́не Бо́жий, / Пло́тию распны́йся, пою́щия Ти: / аллилу́иа.

Стих 4: Бог же, Царь наш, пре́жде ве́ка / соде́ла спасе́ние посреде́ земли́. Спаси́ ны, Сы́не Бо́жий, / Пло́тию распны́йся, пою́щия Ти: / аллилу́иа. Сла́ва, и ны́не: Единоро́дный Сы́не: Оба лика вкупе.

Антифон 3-й, псалом 98, глас 1

Стих 1: Госпо́дь воцари́ся, да гне́ваются лю́дие.

Тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

Стих 2: Госпо́дь воцари́ся, да гне́ваются лю́дие, / седя́й на Херуви́мех, да подви́жится земля́.

Тропарь: Спаси́, Го́споди, лю́ди Твоя́:

Стих 3: Госпо́дь в Сио́не вели́к / и высо́к есть над все́ми людьми́. Тропарь: Спаси́, Го́споди, лю́ди Твоя́:

Стих 4: Поклони́теся Го́сподеви во дворе́ святе́м Его́. Тропарь: Спаси́, Го́споди, лю́ди Твоя́:

Таже вход

Диакон речет: Премудрость, прости.

Мы же входное: Возноси́те Го́спода Бо́га на́шего / и поклоня́йтеся подно́жию но́гу Его́, я́ко свя́то есть.

Тропарь, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

Сла́ва, и ны́не: кондак, глас 4:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ си́лою Твое́ю ве́рныя лю́ди Твоя́, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Вместо же Трисвятаго: Кресту́ Твоему́ покланя́емся, Влады́ко, / и свято́е Воскресе́ние Твое́ сла́вим.

Прокимен, глас 7:

Возноси́те Го́спода Бо́га на́шего / и поклоня́йтеся подно́жию но́гу Его́, я́ко свя́то есть. Стих: Госпо́дь воцари́ся, да гне́ваются лю́дие.

Апостол к Коринфяном, зачало 125

Бра́тие, сло́во кре́стное погиба́ющим у́бо юро́дство есть, а спаса́емым нам си́ла Бо́жия есть. Пи́сано бо есть: погублю́ прему́дрость прему́дрых, и ра́зум разу́мных отве́ргу. Где прему́др? Где кни́жник? Где совопро́сник ве́ка сего́? Не обуи́ ли Бог прему́дрость ми́ра сего́? Поне́же бо в прему́дрости Бо́жией не разуме́ мир прему́дростию Бо́га, благоизво́лил Бог бу́йством про́поведи спасти́ ве́рующих. Поне́же и иуде́е зна́мения про́сят, и е́ллини прему́дрости и́щут: Мы же пропове́дуем Христа́ ра́спята, иуде́ем у́бо собла́зн, е́ллином же безу́мие. Саме́м же зва́нным, иуде́ем же и е́ллином, Христа́, Бо́жию си́лу и Бо́жию прему́дрость.

1Кор.1:18–24

Аллилуиа, глас 1

Стих: Помяни́ сонм Твой, его́же стяжа́л еси́ испе́рва. Стих: Бог же, Царь наш пре́жде ве́ка, соде́ла спасе́ние посреде́ земли́.

Евангелие от Иоанна, зачало 60

Во вре́мя о́но, сове́т сотвори́ша архиере́е и ста́рцы на Иису́са, я́ко да убию́т Его́. И приведо́ша Его́ к Пила́ту, глаго́люще: возми́, возми́, распни́ Его́. Глаго́ла им Пила́т: поими́те Его́ вы и распни́те. Аз бо не обрета́ю в Нем вины́. Отвеща́ша ему́ иуде́е: мы зако́н и́мамы, и по зако́ну на́шему до́лжен есть умре́ти, я́ко Себе́ Сы́на Бо́жия сотвори́. Егда́ же слы́ша Пила́т сие́ сло́во, па́че убоя́ся. И вни́де в прето́р па́ки, и глаго́ла Иису́сови: отку́ду еси́ Ты? Иису́с же ответа́ не даде́ ему́. Глаго́ла же Ему́ Пила́т: мне ли не глаго́леши? Не ве́си ли, я́ко власть и́мам распя́ти Тя, и власть и́мам пусти́ти Тя? Отвеща́ Иису́с: не и́маши вла́сти ни еди́ныя на Мне, а́ще не быти дано́ свы́ше. Пила́т же слы́шав сие́ сло́во, изведе́ вон Иису́са, и се́де на суди́щи, на ме́сте глаго́лемем Лифострото́н, евре́йски же Гавва́фа. Бе же пято́к Па́сце, час же я́ко шесты́й. И глаго́ла Иуде́ом: се Царь ваш. Они́ же вопия́ху: возми́, возми́, распни́ Его́. Глаго́ла им Пила́т: Царя́ ли ва́шего распну́? Отвеща́ша архиере́е: не и́мамы царя́, то́кмо ке́саря. Тогда́ же предаде́ Его́ им, да ра́спнется. Пое́мше же Иисуса, и ведо́ша. И нося́ крест Свой, изы́де в глаго́лемое Ло́бное ме́сто, е́же глаго́лется евре́йски Голго́фа. Иде́же пропя́ша Его́ и с Ним и́на два, сю́ду и сю́ду, посреде́ же Иису́са. Написа́ же и ти́тла Пила́т, и положи́ на кресте́. Бе же напи́сано: Иису́с Назоряни́н, Царь Иуде́йский. Сего́ же ти́тла мно́зи что́ша от Иуде́й, я́ко близ бе ме́сто гра́да, иде́же пропя́ша Иису́са. И бе напи́сано: евре́йски, гре́чески, ри́мски. Стоя́ху же при кресте́ Иису́сове Ма́ти Его́ и сестра́ Ма́тере Его́, Мари́я Клео́пова, и Мари́я Магдали́на. Иису́с же ви́дев Ма́терь, и ученика́ стоя́ща, его́же любля́ше, глаго́ла Ма́тери Свое́й: Же́но, се сын Твой. Пото́м же глаго́ла ученику́: се Ма́ти твоя́. И от того́ часа́ поя́т Ю́ учени́к во своя́ си. Посе́м ве́дый Иису́с, я́ко вся уже́ соверши́шася, и прикло́нь главу́, предаде́ дух. Иуде́е же, поне́же пято́к бе, да не оста́нут на кресте́ телеса́ в суббо́ту, бе бо вели́к день тоя́ суббо́ты, моли́ша Пила́та, да пребию́т го́лени их, и во́змут. Приидо́ша же во́ини, и пе́рвому у́бо преби́ша го́лени, и друго́му распя́тому с Ним. На Иису́са же прише́дше, я́ко ви́деша Его́ уже́ уме́рша, не преби́ша Ему́ го́лений. Но еди́н от во́ин копие́м ре́бра Ему́ прободе́, и а́бие изы́де кровь и вода́. И ви́девый свиде́телствова, и и́стинно есть свиде́тельство его́.

Мф.27:1–2; Ин.19:6Б-11А, 13–20, 25–28А, 30Б-35А

Вместо Достойно: поем:

Велича́й, душе́ моя́, / Пречестны́й Крест Госпо́день.

Ирмос, глас 8: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся Ему, Тя велича́ем.

Причастен:

Зна́менася на нас свет лица́ Твоего́, Го́споди. Аллилу́иа, трижды.

На трапезе же бывает утешение братии, от елея, и вина, и прочих снедей овощных; сыра же, и яиц, и рыбы никакоже дерзнем коснутися.