Месяца сентября в 8-й день

На Го́споди, воззва́х: стихиры на 4. Глас 1.

Подобен: Небе́сных чино́в:

Иоаки́м и А́нна торжествуют, / Нача́ток ро́ждше на́шего спасе́ния, / еди́ну Богоро́дицу, / с ни́миже и мы пра́зднуем днесь, / от ко́рене о́наго Иессе́ева / блажа́ще Де́ву Чи́стую.

От А́нны днесь цвет, / сад Богода́нный, / Богоро́дица прозябе́, спасе́ние челове́ков, / из Нея́же всех Зижди́тель ро́ждься па́че ума́, / Ада́мову очища́ет, я́ко Благ, / всю скве́рну бла́гостию.

Кто дово́льно по досто́инству пе́ти возмо́жет / от А́нны неизрече́нно младе́нствующую Де́ву? / Го́ры у́бо и хо́лми, сла́дость иска́пайте днесь: / всех бо жизнь и очище́ние / млеко́м пита́ется, / Богоро́дица Чи́стая.

Я́же пре́жде непло́дная страна / зе́млю плодоно́сну ражда́ет / и, от непло́дныя утро́бы плод свят да́вши, млеко́м пита́ет. / Чу́до стра́шно! Пита́тельница Жи́зни на́шея, / Я́же Небе́сный Хлеб во чре́ве прие́мши, / млеко́м от сосцу́ пита́ется.

Слава, и ныне, глас 4: Всечестно́е Твое́ рождество́, / Пресвята́я Де́во Чи́стая, / А́нгелов мно́жество на Небеси́ / и челове́ческий род на земли́, ублажа́ем, / я́ко Ма́ти была́ еси́ Творца́ всех, Христа́ Бо́га. / Того́ моля́щи о нас не преста́й, мо́лимся, / и́же на Тя по Бо́зе упова́ние поло́жших, / Богоро́дице Всепе́тая и Неискусобра́чная.

Hа стиховне стихиры, глас 2.

Подобен: До́ме Евфра́фов:

Ра́дуйся, Иоаки́ме, и А́нно: / ра́дуйтеся, я́ко ра́дости / и спасе́ния Хода́таица, / от непло́дове Де́ва, / нам ражда́ется.

Стих: Слы́ши, Дщи, и виждь, / и приклони́ у́хо Твое́.

Ты еди́на земны́х / показа́лася еси́ спасе́ние, / я́ко ро́ждши Сло́во, / па́че сло́ва и естества́: / тем Тя ублажа́ем.

Стих: Лицу́ Твоему́ помо́лятся / бога́тии лю́дстии.

Отложи́, Ада́ме и Е́во, / вся́ку печа́ль: / Ма́ти бо Ра́дости / от непло́дове / пресла́вно прозяба́ет днесь.

Слава, и ныне, подобен тойже:

Храм Бо́жий, / Еди́на Богоро́дица, / от непло́дове / и неражда́ющия происхо́дит, / и ра́дуется Ада́м, взыва́я.

Тропарь, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный.

На Го́споди, воззва́х: стихиры на 8, глас 6,

самогласны. Сергия Патриарха:

Днесь И́же на разу́мных Престо́лех почива́яй Бог / Престо́л свят на земли́ Себе́ предугото́ва: / утверди́вый му́дростию Небеса́ / Не́бо одушевле́нное человеколю́бием соде́ла, / от непло́днаго бо ко́рене / сад живоно́сен израсти́ нам, Ма́терь Свою́, / И́же чуде́с Бог / и ненаде́ющихся наде́жда, / Го́споди, сла́ва Тебе́.

Сей день Госпо́день, / ра́дуйтеся, лю́дие: / се бо Све́та черто́г / и кни́га Сло́ва Живо́тнаго / из утро́бы произы́де, / и Я́же к восто́ком дверь, ро́ждшися, / ожида́ет вхо́да Святи́теля вели́каго, / eди́на и Eди́наго вводя́щи Христа́ во вселе́нную, / во спасе́ние душ на́ших.

А́ще и Боже́ственным хоте́нием / све́тлыя непло́дны жeны́ прозябо́ша, / но всех Мари́я рожде́нных боголе́пно превозсия́: / я́ко, от непло́дныя пресла́вно ро́ждшися ма́тере, / породи́ пло́тию всех Бо́га, / па́че eстества́ от безсе́менныя утро́бы; / eди́на дверь Eдиноро́днаго Сы́на Бо́жия, / Ю́же проше́д, заключе́нну сохрани́ / и, вся му́дре устро́ив, я́ко весть Сам, / всем челове́ком спасе́ние соде́ла. (2)

Стефана Святоградца:

Днесь непло́дная врата́ отверза́ются, / и дверь деви́ческая Боже́ственная предгряде́т, / днесь плод ражда́ти благода́ть начина́ет, / явля́ющи ми́ру Бо́жию Ма́терь, / Éюже земна́я с Небе́сными совокупля́ются, / во спасе́ние душ на́ших. (2)

Днесь всеми́рныя ра́дости провозвеще́ние, / днесь возве́яша ве́три, / спасе́ния провозве́стницы, / eстества́ на́шего разреша́ется непло́дство: / непло́ды бо ма́ти показу́ется / де́вствующия и по рождестве́ Зижди́ телеве, / из Нея́же чу́ждее присвоя́ет И́же eстество́м Бог / и заблу́ждшим Пло́тию спасе́ние содева́ет, / Христо́с Человеколю́бец, / и Изба́витель душ на́ших.

Днесь непло́дная А́нна ражда́ет Богоoтрокови́цу, / от всех родо́в произбра́нную / в жили́ще всех Царя́ и Зижди́теля, Христа́ Бо́га, / во исполне́ние Боже́ственнаго смотре́ния, / и́мже назда́хомся, земноро́днии, / и обнови́хомся от тли к жи́зни неконе́чней.

Слава, и ныне, 1-ю стихиру: Днесь И́же на разу́мных Престо́лех почива́яй Бог / Престо́л свят на земли́ Себе́ предугото́ва: / утверди́вый му́дростию Небеса́ / Не́бо одушевле́нное человеколю́бием соде́ла, / от непло́днаго бо ко́рене / сад живоно́сен израсти́ нам, Ма́терь Свою́, / И́же чуде́с Бог / и ненаде́ющихся наде́жда, / Го́споди, сла́ва Тебе́.

Вход. Прокимен дне.

Бытия́ чте́ние

Изы́де Иа́ков от студенца́ кля́твеннаго и и́де в Харра́нь. И обре́те ме́сто, и спа та́мо: за́йде бо со́лнце, и взят от ка́мения ме́ста того́, и положи́ возгла́вие себе́, и спа на ме́сте о́ном. И сон ви́де. И се ле́ствица, утвержде́на на земли́, eя́же глава́ досяза́ше до небе́с, и А́нгели Бо́жии восхожда́ху и низхожда́ху по ней. Госпо́дь же утвержда́шеся на ней, и рече́: Аз Бог Авраа́мов, отца́ твоего́, и Бог Исаа́ков, не бо́йся: земля́, иде́же ты спи́ши на ней, тебе́ дам ю́ и се́мени твоему́. И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки; и возблагословя́тся о тебе́ вся коле́на земна́я и о се́мени твое́м. И се Аз с тобо́ю, сохраня́яй тя на вся́ком пути́, а́може а́ще по́йдеши. И возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́. И воста́ Иа́ков от сна своего́, и рече́: я́ко eсть Госпо́дь на ме́сте сем, аз же не ве́дех. И убоя́ся, и рече́: я́ко стра́шно ме́сто сие́; несть сие́, но дом Бо́жий и сия́ врата́ Небе́сная.

Быт.28:10–17

Прoро́чества Иезеки́илева чте́ние

Та́ко глаго́лет Госпо́дь: бу́дет от дне осма́го и про́чее, сотворя́т иере́и на олтари́ всесожже́ния ва́шего и я́же спасе́ния ва́шего, и прииму́ вы, глаго́лет Адонаи́ Госпо́дь. И обрати́ мя на путь врат святы́х вне́шних, зря́щих на восто́ки, и сия́ бя́ху затворе́на. И рече́ Госпо́дь ко мне: врата́ сия́ затворе́на бу́дут и не отве́рзутся, и никто́же про́йдет сквозе́ их; я́ко Госпо́дь Бог Изра́илев про́йдет и́ми, и бу́дут затворе́на. Я́ко Игу́мен ся́дет в них сне́сти хлеб, по пути́ Ела́мских врат вни́дет и по пути́ его́ изы́дет. И введе́ мя по пути́ врат святы́х, су́щих к се́веру, пря́мо хра́му, и ви́дех, и се испо́лнь сла́вы храм Госпо́день.

Иез.43:27, 44:1–4

При́тчей чте́ние

Прему́дрость созда́ Себе́ дом и утверди́ столпо́в седмь. Закла́ Своя́ же́ртвенная, и раствори́ в ча́ши Свое́й вино́, и угото́ва Свою́ трапе́зу. Посла́ Своя́ рабы́, созыва́ющи с высо́ким пропове́данием на ча́шу, глаго́лющи: И́же есть безу́мен, да уклони́тся ко Мне. И тре́бующим ума́ рече́: Прииди́те, яди́те Мой хлеб, и пи́йте вино́, е́же раствори́х вам. Оста́вите безу́мие и жи́ви бу́дете, и взыщи́те ра́зума, да поживете́, и испра́вите ра́зум в ве́дении. Наказу́яй злы́я прии́мет себе́ безче́стие, облича́яй же нечести́ваго опоро́чит себе́: обличе́ния бо нечести́вому ра́ны ему́. Не облича́й злых, да не возненави́дят тебе́. Облича́й прему́дра, и возлю́бит тя. Даждь прему́дрому вину́, и прему́дрший бу́дет. Сказу́й пра́ведному, и приложи́т приима́ти. Нача́ло прему́дрости страх Госпо́день и сове́т святы́х ра́зум: разуме́ти бо зако́н по́мысла есть блага́го. Сим бо о́бразом мно́гое поживе́ши вре́мя, и приложа́тся тебе́ ле́та живота́.

Притч.9:1–11

На литии стихиры, глас 1, самогласны.

Стефана Святоградца:

Нача́ло на́шего спасе́ния, лю́дие, днесь бысть: / се бо пронарече́нная от родо́в дре́вних / Ма́ти и Де́ва и прия́телище Бо́жие / от непло́дове роди́тися происхо́дит, / цвет от Иессе́я и от ко́рене eго́ жезл прозябе́. / Да ра́дуется Адам пра́oтец, / и Éва да весели́тся ра́достию, / се бо созда́нная от ребра́ Ада́мова Дщерь и Вну́ку блажи́т я́вственне: / роди́ся бо мне, рече, избавле́ние, / eго́же ра́ди от уз а́довых свобожду́ся. / Да ра́дуется Дави́д, бия́ в гу́сли, / и да благослови́т Бо́га, / се бо Де́ва происхо́дит от утро́бы непло́дныя, / ко спасе́нию душ на́ших.

Глас 2:

Прииди́те, любоде́вственнии вси / и чистоты́ рачи́телие, / прииди́те, подыми́те любо́вию де́вства похвалу́, / от ка́мене тве́рдаго теку́щий исто́чник жи́зни / и от безча́дствующия купину́ невеще́ственнаго Oгня́, / очища́ющаго и просвеща́ющаго ду́ши на́ша.

Анатолия Патриарха:

Что шум пра́зднующих бывает? / Иоаки́м и А́нна торжеству́ют та́йно: / ра́дуйтеся с на́ми, глаго́люще, Ада́ме и Éво, днесь, / я́ко и́мже дре́вле преступле́нием затвори́ша рай, / плод благосла́вен нам даде́ся, / Богоoтрокови́ца Мари́я, / отверза́ющи eго́ всем вход.

Пронарече́нная всех Цари́ца, / Бо́жие oби́телище, / от непло́дныя днесь утро́бы про́йде А́нны сла́вныя, / Присносу́щнаго Существа́ Боже́ственное пребыва́лище, / Éюже безсту́дный ад попра́ся / и всеро́дная Éва в тве́рдую жизнь вво́дится. / Той досто́йно возопии́м: / блаже́нна Ты в жена́х, и Плод чре́ва Твоего́ благослове́н.

Слава, и ныне, глас 8. Сергия Патриарха:

В благознамени́тый день пра́здника на́шего / востру́бим духо́вною цевни́цею: / Я́же бо от се́мене Дави́дова, днесь ражда́ется Ма́ти Живота́, / тьму разреша́ющи, / Ада́мово обновле́ние, и Éвино воззва́ние, / и нетле́ния исто́чник, тли премене́ние, / Eя́же ра́ди мы обожи́хомся / и от сме́рти изба́влени бы́хом, / и возопии́м Той с Гаврии́лом, ве́рнии: / ра́дуйся, Благода́тная, Госпо́дь с Тобо́ю, / Тебе́ ра́ди да́руя нам ве́лию ми́лость.

На стиховне стихиры, глас 4, самогласны.

Германа Патриарха:

Всеми́рная ра́дость от пра́ведных возсия́ нам, / от Иоаки́ма и А́нны, Всепе́тая Де́ва, / Я́же премно́гия ра́ди чистоты́ / храм Бо́жий одушевле́нный быва́ет / и eди́на вои́стинну Богоро́дица познава́ется. / Тоя́ моли́твами, Христе́ Бо́же, / мир ми́ру низпосли́ / и душа́м на́шим ве́лию ми́лость.

Стих: Слы́ши, Дщи, и виждь, / и приклони́ у́хо Твое́.

А́нгеловым прорече́нием / плод пречи́ст от Иоаки́ма и А́нны, пра́ведников, / днесь произы́де Де́ва, / не́бо и престо́л Бо́жий, / и прия́телище Чистоты́, / ра́дость провозвеща́ющи всему́ ми́ру, / живота́ на́шего Хода́таица, / кля́твы отъя́тие, благослове́ния пода́ние. / Тем в рождестве́ Твое́м, Де́во Богозва́нная, / ми́ру мир испроси́ / и душа́м на́шим ве́лию ми́лость.

Стих: Лицу́ Твоему́ помо́лятся / бога́тии лю́дстии.

Непло́ды безча́дная А́нна / днесь рука́ми да воспле́щет све́тло, / да светлоно́сят зeмна́я, ца́рие да игра́ют, / святи́телие во благослове́ниих да веселя́тся, / да пра́зднует весь мир: / се бо Цари́ца и непоро́чная Неве́ста Óтча / от ко́рене Иессе́ева прозябе́. / Ктому́ жены́ в печа́лех не родя́т чад: / Ра́дость бо процвете́, и Живо́т всем челове́ком в ми́ре жи́тельствует. / И ктому́ да́ры Иоаки́мовы не возвраща́ются, / рыда́ние бо А́нны в ра́дость преложи́ся: / сра́дуйтеся мне, глаго́лющи, весь избра́нный Изра́иль, / се бо даде́ ми Госпо́дь одушевле́нную пала́ту / Боже́ственныя сла́вы Eго́, / во óбщее весе́лие и ра́дость / и спасе́ние душ на́ших.

Слава, и ныне, глас 8. Сергия Патриарха:

Прииди́те, вси ве́рнии, к Де́ве теце́м: / се бо ражда́ется Я́же пре́жде чре́ва предви́денная Бо́га на́шего Ма́ти, / де́вства сосу́д, Ааро́нов прозя́бший жезл от ко́рене Иессе́ева, / проро́ческое пропове́дание / и пра́ведных Иоаки́ма и А́нны прозябе́ние. / Ражда́ется у́бо, и мир с Не́ю обновля́ется. / Ражда́ется, и Це́рковь во свое́ благоле́пие украша́ется. / Храм святы́й, Божества́ прия́телище, / де́вственный сосу́д, ца́рский черто́г, / в не́мже пресла́вное неизрече́ннаго соедине́ния, соше́дшихся во Христе́ eсте́ств, / соверше́нное соде́яся та́инство. / Eму́же покланя́ющеся, / воспева́ем Де́вы Всенепоро́чныя рождество́.

На благословении хлебов тропарь, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный. (3)

На Бог Госпо́дь:

тропарь праздника, трижды, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный. (3)

По 1-м стихословии седален, глас 4.

Подобен: Удиви́ся Ио́сиф:

Возопи́й, Дави́де, что кля́тся тебе́ Бог? / Я́же мне кля́тся, рече́, и испо́лни уже́: / от плода́ чре́ва моего́ да́вый Деви́цу, / из Нея́же Соде́тель Христо́с, Но́вый Ада́м роди́ся, Царь на престо́ле мое́м; / и ца́рствует днесь, име́яй Ца́рство недви́жимо. / Непло́ды ражда́ет Богоро́дицу и Пита́тельницу Жи́зни на́шея.

Сла́ва, и ны́не, тойже. И чтение праздника.

По 2-м стихословии седален, глас 4.

Подобен: Удиви́ся Ио́сиф:

От ко́рене Иессе́ева и от чресл Дави́довых / Богоотрокови́ца Мариа́м ражда́ется днесь нам; / ра́достию бо ра́дуются вся́ческая и обновля́ются. / Сра́дуйтеся ку́пно, Не́бо и земля́, / восхвали́те Ю́, оте́чествия язы́к! Иоаки́м весели́тся, и А́нна торжеству́ет, зову́щи: / непло́ды ражда́ет Богоро́дицу и Пита́тельницу Жи́зни на́шея.

Сла́ва, и ны́не, тойже.

Величание:

Велича́ем Тя, / Пресвята́я Де́во, / и чтим святы́х Твои́х роди́телей, / и всесла́вное сла́вим / рождество́ Твое́.

Псалом избранный

Лик 1: Помяни́, Го́споди, Дави́да и всю кро́тость его́. 2: Я́ко кля́тся Го́сподеви, обеща́ся Бо́гу Иа́ковлю. 1: Се, слы́шахом я́ во Евфра́фе, обрето́хом я́ в поля́х дубра́вы. 2: Пресла́вная глаго́лашася о тебе́, гра́де Бо́жий. 1: Бог посреде́ его́, и не подви́жится. 2: Кля́тся Госпо́дь Дави́ду и́стиною, и не отве́ржется ея́. 1: От плода́ чре́ва твоего́ посажду́ на престо́ле твое́м. 2: Я́ко избра́ Госпо́дь Сио́на, изво́ли его́ в жили́ще себе́. 1: Освяти́л есть селе́ние Свое́ Вы́шний. 2: Святы́ня и велеле́пота во святи́ле его́. 1: Свят храм твой, ди́вен в пра́вде. 2: До́му Твоему́ подоба́ет святы́ня, Го́споди, в долготу́ дней. 1: Помяну́ и́мя Твое́ во вся́ком ро́де и ро́де. 2: Благослове́н Госпо́дь во век, и в век ве́ка.

Сла́ва, и ны́не: Аллилу́иа, трижды.

По полиелеи седален, глас 8.

Подобен: Повеле́нное та́йно:

Да ра́дуется Не́бо, и земля́ да весели́тся: / Бо́жие бо не́бо на земли́ роди́ся, Богоневе́стная Сия́, от обетова́ния. / Непло́ды Младе́нца дои́т Мари́ю, и ра́дуется о рождестве́ Иоаки́м: / жезл, глаго́ля, роди́ся мне, / из него́же Цвет Христо́с прозябе́, / из ко́рене Дави́дова. / Вои́стину чу́до пресла́вно!

Слава, и ныне, глас тойже: Обнови́ся, Ада́ме, ра́дуйся, Е́во, весели́ся, Дави́де, благоду́шствуй А́нно, / и́бо Ма́ти Зижди́теля твоего́ ражда́ется пресла́вно; / лику́ет, обно́вльшися, вся земля́ / и ра́дуется, оде́яна во оде́жду; / всяк язы́к, лику́я, да вопие́т Мари́и: / блаже́н дом Дави́дов, я́ко пита́ет Пита́тельницу Жи́зни на́шея.

И чтем слово Григория иеромонаха.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Помяну́ и́мя Твое́ / во вся́ком ро́де и ро́де. Стих: Отры́гну се́рдце мое сло́во бла́го, глаго́лю аз дела́ моя Царе́ви.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Луки, зачало 4

Во дни о́ны, воста́вши, Мариа́м, и́де в го́рняя со тща́нием, во град Иу́дов. И вни́де в дом Заха́риин, и целова́ Елисаве́т. И бысть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́: и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́де Ма́ти Го́спода моего́ ко мне? Се бо, я́ко бысть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м. И блаже́нна Ве́ровавшая, я́ко бу́дет соверше́ние глаго́ланным Ей от Го́спода. И рече́ Мариа́м: вели́чит душа́ Моя́ Го́спода, и возра́довася дух Мой о Бо́зе Спа́се Мое́м. Я́ко призре́ на смире́ние Рабы́ Своея́: се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя Его́. Пребы́сть же Мариа́м с не́ю я́ко три ме́сяцы, и возврати́ся в дом Свой.

Лк.1:39–49, 56

По 50-м псалме

Слава: Моли́твами Богоро́дицы, / Ми́лостиве, очи́сти / мно́жества согреше́ний на́ших.

И ныне, тойже.

И посем, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира праздника, глас 6:

Сей день Госпо́день, / ра́дуйтеся, лю́дие: / се бо Све́та черто́г / и кни́га Сло́ва Живо́тнаго / из утро́бы произы́де, / и Я́же к восто́ком дверь, ро́ждшися, / ожида́ет вхо́да Святи́теля вели́каго, / eди́на и Eди́наго вводя́щи Христа́ во вселе́нную, / во спасе́ние душ на́ших.

Канона два, ирмосы обоих канонов по дважды, тропари же их на 12.

Канон первый, творение кир Иоанна. Глас 2.

Песнь 1

Ирмос: Гряди́те, лю́дие, / пои́м песнь Христу́ Бо́гу, / разде́льшему мо́ре и наста́вльшему лю́ди, / я́же изведе́ из рабо́ты еги́петския, / я́ко просла́вися.

Гряди́те, ве́рнии, Ду́хом Боже́ственным ра́дующеся, / Ю́же от непло́дове днесь прише́дшую челове́ков на спасе́ние / Присноде́ву Отрокови́цу пе́сньми почти́м.

Ра́дуйся, Чи́стая, Ма́ти и Рабо́ Христа́ Бо́га, / Я́же пе́рвому Хода́таица блаже́нству, / челове́ческий род, Тя вси досто́йно пе́сньми сла́вим.

Жи́зни ражда́ется днесь мост, / и́мже челове́цы, воззва́ние паде́ния, е́же от а́да, обре́тшии, / Христа́ Живнода́вца пе́сньми прославля́ют.

Ин канон, кир Андрея, глас 8.

Песнь 1

Ирмос: Сокруши́вшему бра́ни мы́шцею Свое́ю / и прове́дшему Изра́иля сквозе́ Чермно́е мо́ре / пои́м Ему́, я́ко Изба́вителю на́шему Бо́гу, / я́ко просла́вися.

Да ликовству́ет вся тварь, да весели́тся же и Дави́ д, / я́ко от коле́на и от се́мене его́ произы́де жезл, / Цвет нося́щи, Го́спода, Творца́ вся́ческих.

Свята́я Святы́х, во святе́м святи́лищи Младе́нец возлага́ется / воспита́тися от руки́ А́нгеловы. / Вси у́бо ве́рно спра́зднуим в рождестве́ Ея́.

Непло́ды неражда́ющая А́нна, но не безча́дна Бо́гу: / се бо пронарече́ся от родо́в Чи́стая Де́ва Ма́ти. / Те́мже естества́ израсти́ Зижди́теля в ра́бии о́бразе.

Тя, незло́бивую А́гницу, / А́гнца Христа́ Младе́нца от чре́ва Твоего́ приве́дшую в на́ше существо́, / вси от А́нны рожде́нную Тя пе́сньми почита́ем.

Троичен: Три Безнача́льна сла́влю, / Три Свя́та пою́, / Три Соприсносу́щна в Существе́ Еди́ ном пропове́дую: / Еди́н бо во Отце́, и Сы́не, и Ду́се славосло́вится Бог.

Богородичен: Кто ви́де Отроча́, Его́же не все́я Оте́ц, млеко́м пита́емое? Или́ где ви́дена бысть Де́ва Ма́ти? / И́стинно па́че ума́ обоя́, Богороди́тельнице Чи́стая.

Катавасия: Крест начерта́в, Моисе́й / впря́мо жезло́м Чермно́е пресече́, / Изра́илю пешеходя́щу; / то́же обра́тно фарао́новым колесни́цам, / уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Песнь 3

Ирмос: Утверди́ нас в Тебе́, Го́споди, / Дре́вом умерщвле́й грех, / и страх Твой всади́ / в сердца́ нас, пою́щих Тя.

Непоро́чно Бо́гу пожи́вшии, / всех роди́сте Спасе́ние, / богому́дрии роди́теле / Зижди́теля Ро́ждшия и Бо́га на́шего.

Всем жизнь источа́яй Госпо́дь / от непло́дове произведе́ Де́ву, / в Ню́же всели́тися изво́ли, / и по Рождестве́ сохрани́в нетле́нну.

А́ннин плод, Мари́ю, днесь, / Грозд ро́ждшую живоно́сный, / я́ко Богоро́дицу воспои́м, / Предста́тельницу же всех, и Помо́щницу.

Ин. Ирмос: Утверди́ся се́рдце мое́ во Го́споде, / вознесе́ся рог мой в Бо́зе мое́м, / разшири́шася на враги́ моя́ уста́ моя́, / возвесели́хся о спасе́нии Твое́м.

Воспита́вшися во Свята́я Святы́х, / Де́во Пречи́стая Богоро́дице, / вы́шши яви́лася еси́ тва́ри, / Зижди́теля пло́тию поро́ждши.

Благослове́нно чре́во твое́, целому́дренная А́нно, / плод бо израсти́ла еси́ де́вства, / Ю́же безсе́менно Пита́теля тва́ри ро́ждшую / и Изба́вителя Иису́са.

Тя блажи́т, Присноде́во, вся тварь, / от А́нны днесь ро́ждшуюся, / от ко́рене Иессе́ева жезл, / пречи́ст цвет, Христа́, израсти́вшую.

Тя вы́шшую всея́ тва́ри, Богоро́дице, / показу́я, Чи́стая, Сын Твой, / е́же от А́нны вели́чит Твое́ рождество́ / и всех весели́ т днесь.

Троичен: Тебе́ покланя́емся, О́тче, Безнача́льне Существо́м, / пое́м Безле́тнаго Сына Твоего / и чтем Соприсносу́щнаго Ду́ха Твоего́, / я́ко Еди́наго Тро́е естество́м Бо́га.

Богородичен: Светода́вца и Нача́льника жи́зни челове́ческия ро́ждшая, Чи́стая Богоро́дице, / яви́лася еси́ сокро́вище жи́зни на́шея / и дверь непристу́пнаго Све́та.

Катавасия: Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви, / ны́не процвете́ Дре́во Креста́, / в держа́ву и утвержде́ние.

Седален, глас 4.

Подобен: Удиви́ся Ио́сиф:

Де́ва Мари́я и Богоро́дица и́стинно, / я́ко о́блак све́та, днесь возсия́ нам / и от пра́ведных предгряде́т в сла́ву на́шу. / Не ктому́ Ада́м осужда́ется, / и Е́ва от уз свободи́ся, / и сего́ ра́ди зове́м, вопию́ще со дерзнове́нием еди́ней Чи́стей: / ра́дость возвеща́ет рождество́ Твое́ всей вселе́нней.

Сла́ва, и ны́не, тойже.

Песнь 4

Ирмос: Услы́шах, Го́споди, / слух Твоего́ смотре́ния / и просла́вих Тя, / Еди́не Человеколю́бче.

Воспева́ем Тя, Го́споди, / ве́рным спаси́тельное приста́нище пода́вшаго всем, / Тебе́ Ро́ждшую.

Тя, Богоневе́сто, / похвалу́ всем Христо́с яви́ и держа́ву / пою́щим ве́рно Твое́ та́инство.

Неискусобра́чная Влады́чице, / Твои́ми моли́твами избавля́еми прегреше́ний, / благоразу́мно вси Тя ублажа́ем.

Ин. Ирмос: Проро́к Авваку́м у́мныма очи́ма / прови́де, Го́споди, прише́ствие Твое́, / тем и вопия́ше: от ю́га прии́дет Бог. / Сла́ва си́ ле Твое́й, / сла́ва снизхожде́нию Твоему́.

Патриа́рх Иа́ков, прови́дев, Спа́се, вели́чия я́сно строе́ния Твоего́, / вопия́ше Ду́хом, ко Иу́де глаго́ля та́йно: / от ле́торасли возше́л еси́, Сы́не мой, / возвеща́я Тя от Де́вы Бо́га.

Ны́не жезл Ааро́нов, от ко́рене Дави́дова прозя́бший, / ны́не Де́ва Чи́стая происхо́дит, / и сликовству́ет Не́бо и земля́, и вся оте́чествия язы́ков, / и А́нна и Иоаки́м та́инственно.

Ны́не да весели́тся Не́бо, да ра́дуется же земля́, и да лику́ет Иоаки́м и Дави́д: / ов у́бо я́ко роди́тель Твой, и́стинно ро́ждшия Бо́га, / ов же я́ко пра́отец Твой, / пропове́дая Твоя́ вели́чествия, Чи́стая.

Сра́дуется Тебе́ днесь, богому́дренная А́нно, вселе́нная: / Изба́вителя бо тоя́ Ма́терь процвела́ еси́, / Ю́же от ко́рене прозя́бшую Дави́дова, / жезл си́лы, нам нося́щую Цвет, Христа́.

Троичен: Сла́влю Безнача́льна Бо́га, Отца́ и Сы́на и Свята́го Ду́ха, / Единосу́щную Тро́ицу Несозда́нную, / Е́йже предстоя́т Серафи́ми благогове́йно, зовуще: / Свят, Свят, Свят еси́, Бо́же.

Богородичен: Пребезнача́льное Нача́ло нача́ло прие́млет из Тебе́, Богороди́тельнице, плотски́м вре́менем / и пребыва́ет собезнача́льно и вопло́щься Сло́во О́тчее и Ду́ху соприсносу́щное, / сохраня́я Боже́ственное досто́инство.

Катавасия: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Песнь 5

Ирмос: Сеннопи́санный мрак гада́ний разори́в / и ве́рных прибы́тием и́стины, / Богоотрокови́цею, озари́в сердца́, / и нас све́том Твои́м, Христе́, наста́ви.

Воспои́м, лю́дие, всех вину́ / су́щаго по нам бы́ти Вино́внаго: / Ея́же о́бразу ра́довахуся сподобля́еми проро́цы, / явле́нное спасе́ние от Тоя́ плодя́ще.

От су́ха прозябе́ние жезла́ иере́ева / Изра́илю показа́ проразсужде́ние, / и ны́не све́тлость прозя́бших пресла́вно све́тит, / от непло́дове всесла́вное рожде́ние.

Ин. Ирмос: Го́споди Бо́же наш / мир даждь нам, / Го́споди Бо́же наш, стяжи́ ны, / Го́споди, ра́зве Тебе́ ино́го не ве́мы, / И́мя Твое́ имену́ем.

Пречи́стое Твое́ рождество́, Де́ва Непоро́чная, несказа́нное, / и зача́тие неизглаго́ланно, и рожде́ние Твое́, / Неве́сто неневе́стная, / Бог бо бе, весь в мя облеки́йся.

Днесь да веселя́тся а́нгельстии чи́ни, / пе́сньми да лику́ют су́щии из Ада́ма: / роди́ся бо жезл, Цвет возрасти́вший, Христа́, / Еди́наго Изба́вителя на́шего.

Днесь Е́ва разреша́ется осужде́ния, / разреша́ется же и непло́дство, / и Ада́м дре́вния кля́твы о рождестве́ Твое́м, / Тобо́ю бо от тли изба́вихомся.

Сла́ва Тебе́, Просла́вльшему непло́дную днесь: / роди́ бо жезл присноцвету́щий от обеща́ния, / от него́же прозябе́ Христо́с, / Цвет жи́зни на́шея.

Троичен: Сла́ва Тебе́, О́тче Святы́й, Бо́же Нерожде́нне; / сла́ва Тебе́, Сы́не Безле́тне, Единоро́дне; / сла́ва Тебе́, Ду́ше Боже́ственный и Сопресто́льный, / от Отца́ происходя́й и в Сы́не пребыва́яй.

Богородичен: Бысть чре́во Твое́ Со́лнца носи́ло, / пребы́сть чистота́ Твоя́, я́коже пре́жде, невреди́ма, Де́во, / Христо́с бо Со́лнце, / я́ко от черто́га жени́х, яви́ся из Тебе́.

Катавасия: О треблаже́нное Дре́во, / на не́мже распя́ся Христо́с, Царь и Госпо́дь! / И́мже паде́ дре́вом прельсти́вый, / Тобо́ю прельсти́ вся, / Бо́гу пригвозди́вшуся пло́тию, / подаю́щему мир душа́м на́шим.

Песнь 6

Ирмос: Ко Го́споду от ки́та Ио́на возопи́: / Ты мя возведи́ из глубины́ а́да, молю́ся, / да я́ко Изба́вителю, во гла́се хвале́ния, / и́стины же ду́хом пожру́ Тебе́.

Ко Го́споду в ско́рби непло́дства возопи́ша / Богома́тере богому́дрии роди́тели / и Сию́ в ро́ды родо́в роди́ша, / на о́бщее спасе́ние и похвалу́.

Прия́ша Небе́сный дар от Бо́га досто́ин / Богома́тере богому́дрии роди́тели, / саме́х Херуви́мов превы́шшее носи́ло, / Сло́ва и Зижди́теля Роди́тельницу.

Ин. Ирмос: Я́ко во́ды морски́я, Человеколю́бче, / волна́ми жите́йскими обурева́юся, / те́мже, я́ко Ио́на, та́ко вопию́ Ти: / возведи́ от тли живо́т мой, / Благоутро́бне Го́споди.

Святу́ю Святы́х су́щу, / целому́дреннии роди́тели Твои́, Чи́стая, / возложи́ша Тя в хра́ме Госпо́дни воспита́тися че́стно / и угото́ватися в Ма́терь Ему́.

Непло́ды и ма́тери, лику́йте, / дерза́йте и игра́йте, безча́дныя: / безча́дна бо непло́ды Богоро́дицу прозяба́ет, / Я́же изба́вит от боле́зней Е́ву и кля́твы Ада́ма.

Слы́шу Дави́да, пою́ща Тебе́: / приведу́тся де́вы во след Тебе́, / приведу́тся в храм Царе́в. / И с ним Тя и аз, Дщерь Царе́ву, воспева́ю.

Пое́м свято́е Твое́ рождество́, / чтим и непоро́чное зача́тие Твое́, / Неве́сто Богозва́нная и Де́во; / сла́вят же с на́ми А́нгелов чи́ни и святы́х ду́ши.

Троичен: В Тебе́ Тро́ическое та́инство пое́тся и сла́вится, Чи́стая: / Оте́ц бо благоволи́, / и Сло́во всели́ся в Тя, / и Боже́ственный Дух Тебе́ осени́.

Богородичен: Злата́я кади́льница была́ еси́, / Огнь бо во утро́бе Твое́й всели́ся, Сло́во от Ду́ха Свя́та, / и челове́ческим зра́ком в Тебе́ ви́деся, / Богороди́тельнице Чи́стая.

Катавасия: Во́днаго зве́ря во утро́бе / дла́ни Ио́на крестови́дно распросте́р, / спаси́тельную Страсть прообража́ше я́ве. / Тем, тридне́вен изше́д, / преми́рное Воскресе́ние прописа́ше / Пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Кондак, глас 4:

Иоаки́м и А́нна поноше́ния безча́дства / и Ада́м и Éва от тли сме́ртныя свободи́стася, Пречи́стая, / во святе́м рождестве́ Твое́м. / То пра́зднуют и лю́дие Твои́, / вины́ прегреше́ний изба́вльшеся, / внегда́ зва́ти Ти: / непло́ды ражда́ет Богоро́дицу и Пита́тельницу Жи́зни на́шея.

Икос: Моли́тва ку́пно и воздыха́ние непло́дства и безча́дства Иоаки́ма же и А́нны благоприя́тное / и во у́ши Госпо́дни вни́де, и прозябе́ плод живоно́сен ми́ру. / Ов бо моли́тву на горе́ творя́ше, о́ва же в саде́ поноше́ние ноша́ше, / но с ра́достию непло́ды ражда́ет Богоро́дицу и Пита́тельницу Жи́зни на́шея.

Песнь 7

Ирмос: Купина́ в горе́ огненеопа́льная / и росоно́сная пещь халде́йская / я́ве предписа́ Тя, Богоневе́сто, / Боже́ственный бо Невеще́ственный / в веще́ственнем чре́ве Огнь неопа́льно прия́ла еси́. / Те́мже из Тебе́ Ро́ждшемуся пое́м: / благослове́н еси́, Бо́же оте́ц на́ших.

Твое́ в веще́ственных явле́ниих / законополо́жник возбрани́ся разуме́ти / и вели́кое, Пречи́стая, та́инство, / не му́дрствовати земноре́вностная обра́зно наказу́емь иногда́. / Те́мже, уди́влься чудеси́, глаго́лаше: / благослове́н Бог оте́ц на́ших.

Го́ру и дверь Небе́сную и мы́сленную Тя ле́ствицу / боголе́пно лик боже́ственный пронарече́, / от Тебе́ бо Ка́мень отсече́ся не рука́ми му́жескими, / и дверь, Е́юже про́йде Госпо́дь, И́же чуде́с Бог оте́ц на́ших.

Ин. Ирмос: Халде́йская пещь, огне́м распала́емая, / ороша́шеся Ду́хом, / Бо́жиим предстоя́нием, / о́троцы поя́ху: / благослове́н еси́, Бо́же оте́ц на́ших.

Пра́зднуем, Чи́стая, / и ве́рно покланя́емся свято́му Твоему́ Рождеству́, / пою́ще Сы́на Твоего́, / И́мже изба́вихомся дре́вняго Ада́мова ны́не осужде́ния.

Ны́не А́нна весели́тся и вопие́т, хва́лящися: / непло́ды су́щи, роди́х Бо́жию Ма́терь, / Ея́же ра́ди осужде́ние Е́вино разреши́ся / и я́же в печа́лех боле́знь.

Ада́м свободи́ся, и Е́ва лику́ет, / и вопию́т ду́хом к Тебе́, Богоро́дице: / Тобо́ю изба́вихомся перворо́дныя кля́твы, / я́вльшуся Христу́.

О чре́во, вмести́вшее Бо́жие селе́ние! / О утро́бо, носи́вшая Небе́с ши́ршую, престо́л святы́й, / мы́сленный киво́т свяще́ния!

Троичен: Отца́ просла́вим, Сы́на и Ду́ха, / во Еди́нстве Божества́, / Тро́ицу Пресвяту́ю, Неразде́льную, Несозда́нную, / и Соприсносу́щную, и Единосу́щную.

Богородичен: Ты Бо́га еди́на родила́ еси́, Де́во, пресла́вно, / Ты естество́ обнови́ла еси́ Рождество́м Твои́м, Мари́е, / Ты Е́ву разреши́ла еси́ перворо́дныя кля́твы, / Богороди́тельнице Чи́стая.

Катавасия: Безу́мное веле́ние мучи́теля злочести́ваго / лю́ди поколеба́, / ды́шущее преще́ние и злохуле́ние богоме́рзкое; / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному Ду́ху, / со огне́м су́ще, поя́ху: / Препе́тый отце́в и нас Бо́же, благослове́н еси́.

Песнь 8

Ирмос: В пещи́ о́трочестей прообрази́л еси́ иногда́ Твою́ Ма́терь, Го́споди, / о́браз же Сия́ из огня́ изыма́ше неопа́льно входя́щия, / Ю́же пое́м, я́вльшуюся Тобо́ю конце́м днесь, / и превозно́сим во вся ве́ки.

Я́же к Бо́гу на́шего примире́ния предопределе́нная ски́ния / е́же бы́ти ны́не начина́ет, / иму́щи роди́ти Сло́ва, нам дебельство́м Пло́ти я́вльшася, / Его́же пое́м, из не су́щих во е́же бы́ти Тем прие́мшии, / и превозно́сим во вся ве́ки.

Непло́дства преложе́ние мирско́е благи́х разреши́ непло́дство / и я́сно чу́до Христа́ показа́, к земны́м прише́дша, / Его́же пое́м, из не су́щих во е́же бы́ти Тем прие́мшии, / и превозно́сим во вся ве́ки.

Ин. Ирмос: Покрыва́яй вода́ми превы́спренняя Своя́, / полага́яй мо́рю преде́л песо́к и содержа́й вся, / Тя пое́т со́лнце, Тя сла́вит луна́, / Тебе́ прино́сит песнь вся тварь, / я́ко Соде́телю всех во ве́ки.

Сотвори́вый пресла́вная непло́дней утро́бе, / отве́рзый А́нны неражда́ющая ложесна́ и плод ей дав, / Ты, Бо́же Святы́й, Ты, Сы́не Де́вы, / Ты от Сея́ Плоть прия́л еси́, / присноцвету́щия Де́вы и Богоро́дицы.

Затворя́яй бе́здну и отверза́яй ю, / вознося́й во́ду во о́блацех и дая́й дождь, / Ты, да́вый, Го́споди, от непло́днаго ко́рене / прозя́бнути А́нны святы́я пречи́ст плод / и роди́ти Богоро́дицу.

Де́лателю мы́слей на́ших / и Насади́телю душ на́ших, / Ты, непло́дную зе́млю благопло́дну показа́вый, / Ты дре́вле суху́ю родови́ту, благокла́сну, бразду́ плодоно́сну соде́лал еси́ А́нну святу́ю, / пречи́ст плод израсти́ти, Богоро́дицу.

Прииди́те, вси у́зрим, / я́ко от черто́га ма́ла, Бо́жий град, ны́не ражда́емый, / и́же от две́ри утро́бныя исхо́д иму́щую, / вход же не ве́дущу обще́ния: / Еди́н Бог Зижди́тель Се́ю про́йде стезе́ю стра́нною.

Троичен: О Тро́ице Пресу́щная, Еди́нице Собезнача́льная! / Тя пое́т и трепе́щет мно́жество А́нгел, / Не́бо и земля́ и бе́здны ужаса́ются, / челове́цы благословя́т, огнь рабо́тает, / вся послу́шают Тебе́, Тро́ице Свята́я, со стра́хом, я́же в тва́ри.

Богородичен: О нове́йшаго слы́шания: Бог Сын Жены́! / О безсе́меннаго Рождества́! Безму́жныя Ма́ти и рожде́нное Бог! / О ужа́снаго виде́ния! О зача́тия стра́ннаго Де́вы! О несказа́ннаго Рождества́! / И́стинно па́че ума́ вся и виде́ния.

Катавасия: Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во, / и огнь в ро́су претво́ршее, / и превозноси́те всем жизнь подава́ющаго / Ду́ха Всесвята́го во ве́ки.

На 9-й песни Честнейшую: не поем, прежде же ирмоса и тропарей, припев сей поем:

Велича́й, душе́ моя́, / пресла́вное рождество́ Бо́жия Ма́тере.

Песнь 9

Ирмос: Я́же пре́жде со́лнца свети́льника Бо́га возсия́вшаго, / пло́тски к нам прише́дшаго, / из боку́ Деви́чу неизрече́нно воплоти́вшая, / Благослове́нная Всечи́стая, / Тя, Богоро́дице, велича́ем.

И́же непокори́вым лю́дем из ка́мене источи́в во́ду, / благопокори́вым же язы́ком да́рует от чресл непло́дных плод на весе́лие нам, / Тя, Богома́ти Пречи́стая, / Ю́же досто́йно велича́ем.

Напра́снаго дре́вняго Отъя́тельницу осужде́ния и прама́тере исправле́ние, / Ю́же ро́да к Бо́гу вину́ присвое́ния, к Зижди́телю мост, / Тя, Богоро́дице, велича́ем.

Другий припев: Велича́й, душе́ моя́, / от непло́дове ро́ждшуюся Де́ву Мари́ю.

Ин. Ирмос: Чу́жде ма́терем де́вство, / и стра́нно де́вам деторожде́ние; / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

Досто́йное, Богома́ти, / Твоея́ чистоты́ рождество́ насле́довала еси́ чрез обеща́ние: / иногда́ бо непло́дней богопрозябе́н плод вдала́ся еси́. / Тем Тя, вся племена́ земна́я, непреста́нно велича́ем.

Испо́лнися вопию́щаго проро́чество, / глаго́лет бо: возста́влю ски́нию па́дшую свяще́ннаго Дави́да, / в Тебе́, Чи́стая, прообрази́вшуюся, / Ея́же ра́ди всех челове́ков персть в Те́ло созда́ся Бо́жие.

Пелена́м покланя́емся Твои́м, Богоро́дице, / сла́вим Да́вшаго плод пре́жде непло́дней / и Отве́рзшаго ложесна́ неражда́ющей пресла́вно. / Твори́т бо вся, ели́ка хо́щет, Бог сый самовла́стен.

Я́ко дар Тебе́, Богоро́дице, песнопе́ние, от А́нны ро́ждшейся, ве́рно дароно́сим: / ма́тери Ма́терь, де́вы же Де́ву еди́ну, / славосло́вяще, покланя́емся Тебе́, пое́м и сла́вим.

Троичен: Чу́жде есть беззако́нным сла́вити Безнача́льную Тро́ицу, / Отца́, и Сы́на же, и Свята́го Ду́ха, / несозда́нное Вседержа́вство, / Е́юже мир весь содержи́тся ма́нием держа́вы Ея́.

Богородичен: Вмести́ла еси́ во утро́бе Твое́й, Де́во Ма́ти, Еди́наго от Тро́ицы, Христа́ Царя́, / Его́же пое́т вся тварь и трепе́щут вы́шнии чи́ни: / Того́ моли́, Всечи́стая, спасти́ся душа́м на́шим.

Катавасия с припевы праздника: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся ему́, Тя велича́ем.

И другий: Сне́дию дре́ва ро́ду прибы́вшая смерть / Кресто́м упраздни́ся днесь, / и́ бо прама́терняя всеро́дная кля́тва разруши́ся / прозябе́нием Чи́стыя Богома́тере, / Ю́же вся Си́лы Небе́сныя велича́ют.

Светилен:

От непло́дныя днесь А́нны цвет произы́де, Богоро́дица, / вся благово́ния Боже́ственнаго исполня́ющи концы́ ми́ра / и ра́дости всю наполня́ющи тварь, / Ю́же пою́ще, досто́йно восхваля́ем, / я́ко су́щу земноро́дных превы́шшую. (2)

Слава, и ныне: Ада́ме, обнови́ся, и Е́ва, возвели́чися, / проро́цы, со апо́столы лику́йте и пра́ведными, / о́бщая бо ра́дость возсия́, А́нгелов же и челове́ков / от пра́ведных днесь Иоаки́ма и А́нны, Богоро́дица Мари́я.

На хвалитех стихиры, на 4, глас 1.

Подобен: О, ди́внаго чудесе́:

О, ди́внаго чудесе́! / Исто́чник Жи́зни / от непло́дныя ражда́ется, / и благода́ть плодороди́ти све́тло начина́ется, / весели́ся, Иоаки́ме, / Богоро́дицы быв роди́тель: / несть ин, я́коже ты, / земноро́дных роди́телей, богоприя́тне: / боговмести́мая бо Oтрокови́ца, / Бо́жие селе́ние, пресвята́я гора́ / тобо́ю нам дарова́ся. (2)

О, ди́внаго чудесе́! / От непло́дове плод возсия́ / манове́нием всех Соде́теля и Вседержи́теля, / до́блественно мирско́е благи́х разреши́ непло́дство. / Ма́тeри с ма́терию Богоро́дичною лику́йте, зову́ще: / Обра́дованная, ра́дуйся, с Тобо́ю Госпо́дь, / подая́й ми́ру Тобо́ю ве́лию ми́лость.

Столп целому́дрия одушевле́н / и све́тлое прия́телище, блиста́ющееся благода́тию, / А́нна благосла́вная я́вльшися, / породи́ забра́ло вои́стинну де́вства, / Боже́ственное процвете́ние: / Я́же всем де́вствeнным / и де́вства жела́ющим дарова́ние, / де́вства добро́ту я́ве подаю́щую, / и да́рующую всем ве́рным ве́лию ми́лость.

Слава, и ныне, глас 6. Самогласен:

Сей день Госпо́день, / ра́дуйтеся, лю́дие: / се бо Све́та черто́г / и кни́га Сло́ва Живо́тнаго / из утро́бы произы́де, / и Я́же к восто́ком дверь, ро́ждшися, / ожида́ет вхо́да Святи́теля вели́каго, / eди́на и Eди́наго вводя́щи Христа́ во вселе́нную, / во спасе́ние душ на́ших.

Славословие великое.

По Трисвятом тропарь праздника единожды и ектении.

Отпуст:

Христо́с, и́стинный Бог наш, моли́твами пречи́стыя Своея́ Ма́тере, святы́х сла́вных и всехва́льных Апо́стол, святы́х пра́ведных Богооте́ц Иоаки́ма и А́нны, и всех святы́х, поми́лует и спасе́т нас, я́ко Благ и Человеколю́бец.

Знаменуются же братия от иерея святым елеем, и поем стихиру самогласну праздника, юже хощет екклисиарх.

Антифон 1, глас 2

Стих 1: Помяни́, Го́споди, Дави́да / и всю кро́тость его́.

Моли́твами Богоро́дицы, Спа́се, / спаси́ нас.

Стих 2: Се, слы́шахом я́ во Евфра́фе, / обрето́хом я́ в поля́х дубра́вы.

Моли́твами Богоро́дицы, Спа́се, / спаси́ нас.

Стих 3: Пресла́вная глаго́лашася о тебе́, / гра́де Бо́жий.

Моли́твами Богоро́дицы, Спа́се, / спаси́ нас.

Стих 4: Бог посреде́ его́, / и не подви́жится.

Моли́твами Богоро́дицы, Спа́се, / спаси́ нас.

Сла́ва, и ны́не: Моли́твами Богоро́дицы, Спа́се, / спаси́ нас.

Антифон 2, глас 2

Стих 1: Кля́тся Госпо́дь Дави́ду и́стиною, / и не отве́ржется ея́.

Спаси́ ны, Сы́не Бо́жий, / во святы́х ди́вен сый, пою́щия Ти: аллилу́иа.

Стих 2: От плода́ чре́ва твоего́ / посажду́ на престо́ле твое́м.

Спаси́ ны, Сы́не Бо́жий, / во святы́х ди́вен сый, пою́щия Ти: аллилу́иа.

Стих 3: Та́мо возращу́ рог Дави́дови, / угото́вах свети́льник пома́занному Моему́.

Спаси́ ны, Сы́не Бо́жий, / во святы́х ди́вен сый, пою́щия Ти: аллилу́иа.

Стих 4: Я́ко избра́ Госпо́дь Сио́на, / изво́ли его́ в жили́ще себе́.

Спаси́ ны, Сы́не Бо́жий, / во святы́х ди́вен сый, пою́щия Ти: аллилу́иа.

Сла́ва, и ны́не: Единоро́дный Сы́не:

Антифон 3, глас 4

Стих 1: Зде вселю́ся, / я́ко изво́лих и́.

Тропарь, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный.

Стих 2: Освяти́л есть селе́ние / Свое́ Вы́шний.

Тропарь: Рождество́ Твое́, Богоро́дице Де́во:

Стих 3: Свят храм твой, / ди́вен в пра́вде.

Тропарь: Рождество́ Твое́, Богоро́дице Де́во:

Стих 4: Святы́ня и велеле́пота / во святи́ле его́.

Тропарь: Рождество́ Твое́, Богоро́дице Де́во:

Вход:

Прииди́те, поклони́мся и припаде́м ко Христу́, / спаси́ ны, Сы́не Бо́жий, / во святы́х ди́вен Сый, пою́щия Ти: / аллилу́иа.

Тропарь, глас 4:

Рождество́ Твое́, Богоро́дице Де́во, / ра́дость возвести́ всей вселе́нней: / из Тебе́ бо возсия́ Со́лнце Пра́вды, Христо́с Бог наш, / и, разруши́в кля́тву, даде́ благослове́ние, / и, упраздни́в смерть, дарова́ нам живо́т ве́чный.

Сла́ва, и ны́не: кондак, глас 4:

Иоаки́м и А́нна поноше́ния безча́дства / и Ада́м и Éва от тли сме́ртныя свободи́стася, Пречи́стая, / во святе́м рождестве́ Твое́м. / То пра́зднуют и лю́дие Твои́, / вины́ прегреше́ний изба́вльшеся, / внегда́ зва́ти Ти: / непло́ды ражда́ет Богоро́дицу и Пита́тельницу Жи́зни на́шея.

Трисвятое.

Прокимен, песнь Богородицы, глас 3:

Вели́чит душа́ Моя́ Го́спода, / и возра́довася дух Мой о Бо́зе Спа́се Мое́м.

Стих: Я́ко призре́ на смире́ние Рабы́ Своея́, се бо, отны́не ублажа́т Мя вси ро́ди.

Апостол к Филипписием, зачало 240

Бра́тие, сие́ да му́дрствуется в вас, е́же и во Христе́ Иису́се. И́же во о́бразе Бо́жии сы́й, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́, и дарова́ Ему́ и́мя, е́же па́че вся́каго и́мене. Да о и́мени Иису́сове вся́ко коле́но поклони́тся Небе́сных, и земны́х, и преиспо́дних. И всяк язы́к испове́сть, я́ко Госпо́дь Иису́с Христо́с, в сла́ву Бо́га Отца́.

Флп.2:5–11

Аллилуиа, глас 8

Стих: Слы́ши, Дщи, и виждь, и приклони́ ухо Твое́. Стих: Лицу́ Твоему́ помо́лятся бога́тии лю́дстии.

Евангелие Луки, зачало 54

Во вре́мя о́но, вни́де Иису́с в весь не́кую: жена́ же не́кая и́менем Ма́рфа прия́т Его́ в дом свой. И сестра́ ей бе нарица́емая Мари́я, я́же и се́дши при ногу́ Иису́сову, слы́шаше сло́во Его́. Ма́рфа же мо́лвяше о мно́зе слу́жбе, ста́вши же рече́: Го́споди, не бреже́ши ли, я́ко сестра́ моя́ еди́ну мя оста́ви служи́ти; рцы у́бо ей, да ми помо́жет. Отвеща́в же Иису́с, рече́ ей: Ма́рфо, Ма́рфо, пече́шися и мо́лвиши о мно́зе. Еди́но же есть на потре́бу. Мари́я же благу́ю часть избра́, я́же не оты́мется от нея́. Бысть же егда́ глаго́лаше сия́, воздви́гши не́кая жена́ глас от наро́да, рече́ Ему́: блаже́но чре́во носи́вшее Тя, и сосца́, я́же еси́ ссал. Он же рече́: те́мже у́бо блаже́ни слы́шащии сло́во Бо́жие, и храня́щии е́.

Лк.10:38–42, 11:27–28

Вместо Достойно:

Велича́й, душе́ моя́, / пресла́вное рождество́ Бо́жия Ма́тере.

Ирмос, глас 8: Чу́жде ма́терем де́вство, / и стра́нно де́вам деторожде́ние; / на Тебе́, Богоро́дице, / обоя́ устро́ишася. / Тем Тя, вся племена́ земна́я, / непреста́нно велича́ем.

И до отдания, с припевом праздника.

Ча́шу спасе́ния прииму́, / и и́мя Госпо́дне призову́. / Аллилу́иа, трижды.

Бывает же на трапезе утешение братии, довольно же и духовно.