Месяца сентября в 21-й день

На Го́споди, воззва́х: стихиры, глас 1.

Подобен: Небе́сных чино́в:

В ма́ле был еси́ ве́рен, Дими́трие, / над мно́гими тя поста́ви Госпо́дь, / и вшел еси́ в ра́дость Го́спода твоего́, / иде́же предстоя́ Ему́, / мо́лишися о душа́х на́ших.

В единонадеся́тый час потруди́выйся, / ра́вен дина́рий с пе́рвыми прие́млеши: / жития́ бо святы́х написа́вый нам, / и сам в кни́ги живота́ ве́чнаго / с ни́ми написа́лся еси́.

О́трочество твое́ на уче́ние, / ю́ношество на по́двиги мона́шеския, / му́жественный же во́зраст на по́льзу всем освяти́л еси́, / и́хже ра́ди тя ны́не / во святы́х почита́ем.

Я́коже мир и вся кра́сная ми́ра, / та́ко и нача́льство над бра́тиею оста́вивый, / всели́лся еси́ в Ки́ев па́ки близ пеще́р, / отону́дуже би́сер жити́й святы́х / труды́ твои́ми ископа́л еси́ нам.

Слава, глас тойже: Препросла́влен бу́ди, / Триипоста́сный Бо́же наш, / я́ко в по́здняя ле́та

/ но́ваго чудотво́рца Дими́трия / Росси́и дарова́л еси́.

И ныне, праздника: вся сия зри 14 сентября.

Аще же несть отдания, Богородичен, глас тойже: Небе́сных чино́в ра́дование:

На стиховне стихиры, глас 2, самогласны:

Ра́дуйся, гра́де Росто́ве, / я́ко от Ки́ева, с преждепочи́вшими в тебе́, / и сего́ па́стыря Дими́трия, / ны́не во святы́х почита́емаго, прия́л еси́.

Стих: Свяще́нницы Твои́ облеку́тся в пра́вду, / и преподо́бнии Твои́ возра́дуются.

Ра́дуйся, свяще́нное сосло́вие, / в тебе́ бо возсия́ священнонача́льник Дими́трий, / на него́же излия́ся нетле́ние, / а́ки ми́ро на браду́ Ааро́ню.

Стих: Честна́ пред Го́сподем / смерть преподо́бных Его́.

Ра́дуйся, Дими́трие, / святи́телей похвало́, свяще́нников сла́во, / пра́вило мона́хов, / Це́ркве утвержде́ние.

Слава, глас тойже: Возда́ждь сла́ву Бо́гу твоему́, Росси́е, / я́ко Просла́вивый тебе́ пре́жде святы́ми / не оставля́ет прославля́ти и ны́не.

И ныне, праздника.

Аще несть отдания, Богородичен, глас тойже: Все упова́ние мое́:

По Ны́не отпуща́еши:

тропарь святителя, глас 8:

Правосла́вия ревни́телю и раско́ла искорени́телю, / Росси́йский целе́бниче и но́вый к Бо́гу моли́твенниче, / списа́ньми твои́ми бу́их уцелому́дрил еси́, / цевни́це духо́вная, Дими́трие блаже́нне, / моли́ Христа́ Бо́га спасти́ся душа́м на́шим.

Слава, и ныне, тропарь праздника, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

Аще несть отдания, Богоро́дичен, глас 8: И́же нас ра́ди рожде́йся от Де́вы:

Блаже́н муж: 1-й антифон.

На Го́споди, воззва́х: стихиры праздника на 6 и святаго на 4.

Аще несть отдания, стихиры святаго на 8. Глас 8.

Подобен: О, пресла́внаго чудесе́:

Днесь свиде́тельство сы́на гро́мова / и на тебе́ сбы́стся, свя́те Дими́трие, / вои́стину бо свиде́тельствовася ти от всех / и от Са́мыя И́стины, / я́ко твои́ми моли́твами немощни́и врачу́ются, / слепи́и презира́ют, хроми́и хо́дят, / де́мони отгоня́ются и вся ско́рби реша́тся. / Сего́ ра́ди почита́ем тя вси, / но́вый наш Росси́йский чудотво́рче.

Новоявле́нне святи́телю Дими́трие, / в час сме́рти, па́че же живота́ твоего́ / чре́сла любо́вию препоя́сал еси́ / и, но́зе обу́в во упова́ние Христо́во, / свети́льник ве́ры украси́л еси́ еле́ем дел благи́х. / Тем с му́дрыми вшел еси́ в Небе́сный черто́г, / иде́же предстоя́ Влады́це Христу́, помоли́ся, / да прише́дшу полу́нощному воплю, / изыдем в сретение Ему и мы гото́ви.

О, глубина́ суде́б Бо́жиих! / О, бе́здна неисчерпа́емых Его́ бла́гостей! / Ка́ко за пра́ведность мзду пра́ведничу восприя́т, / дерзнове́ние обре́т за ча́да твоя́, / и́хже храни́т Госпо́дь тебе́ ра́ди, / пра́ведниче Бо́жий Дими́трие. / С седма́го ме́сяца на́чал еси́ труди́тися в списа́ниих жити́й святы́х, / в седмы́й и мзду прия́л еси́ явле́нием моще́й твои́х. / Моли́ спасти́ся всем чту́щим тя, новоявле́нне Дими́трие.

Глас 6: В житии́ твое́м, святи́телю Дими́трие, / чре́сла любо́вию препоя́сал еси́, / и но́зе обу́в во упова́ние Христо́во, / свети́льник ве́ры украсил еси́ еле́ем дел благи́х, / тем с му́дрыми вшел еси́ в Небе́сный черто́г, / иде́же предстоя́ Влады́це Христу́, моли́ся, / да прише́дшу полу́нощному во́плю, / изы́дем в сре́тение Ему́ и мы гото́ви.

Слава, глас 8: Кра́сны но́зе благовеству́ющих мир, / благовеству́ющих блага́я, / кра́сны вои́стину но́зе и твои́, о Дими́трие, / па́че же весь красе́н еси́, / я́ко внегда́ приити́ тебе́ на престо́л свой, / а́бие мир всем благовести́л еси́: / мир Це́рквам и гра́дом, / мир домо́м и вся́кому сожи́тельству. / Мир Бо́жий, Па́вел, веща́л еси́, / да водворя́ется в сердца́х ва́ших, / и мир име́йте и святы́ню со все́ми, бра́тие. / Та́ко у́бо и ны́не посети́вый нас явле́нием моще́й твои́х, / благовеству́й и ми́рови ве́лию ми́лость.

И ныне, праздника, глас 2: Прииди́те, вси язы́цы, / благослове́нному Дре́ву поклони́мся, / и́мже бысть ве́чная пра́вда: / пра́oтца бо Ада́ма прельсти́вый дре́вом / Кресто́м прельща́ется / и па́дает, низве́ржен, паде́нием стра́нным, / мучи́тельством одержа́вый ца́рское зда́ние; / Кро́вию Бо́жиею яд зми́ев отмыва́ется, / и кля́тва разруши́ся осужде́ния пра́веднаго, / непра́ведным судо́м Пра́веднику осужде́ну бы́вшу; / Дре́вом бо подоба́ше дре́во исцели́ти / и Стра́стию Безстра́стнаго, я́же на Дре́ве, / разреши́ти стра́сти осужде́ннаго. / Но сла́ва, Христе́ Царю́, / éже о нас Твоему́ му́дрому смотре́нию, / и́мже спасл eси́ всех, / я́ко Благ и Человеколю́бец.

Аще несть отдания, Богородичен, глас тойже:

Царь Небе́сный / за человеколю́бие на земли́ яви́ся, / и с челове́ки поживе́: / от Де́вы бо Чи́стыя плоть прие́мый, / и из Нея́ проше́дый с восприя́тием. / Еди́н есть Сын, сугу́б естество́м, / но не Ипоста́сию. / Те́мже соверше́нна Того́ Бо́га / и соверше́нна Челове́ка вои́стину пропове́дающе, / испове́дуем Христа́ Бо́га на́шего: / Его́же моли́, Ма́ти Безневе́стная, / поми́ловатися душа́м на́шим.

Вход. Прокимен дне, и чтения три.

При́тчей чте́ние

Па́мять пра́веднаго с похвала́ми, и благослове́ние Госпо́дне на главе́ его́. Блаже́н челове́к, и́же обре́те прему́дрость, и сме́ртен, и́же уве́де ра́зум. Лу́чше бо сию́ купова́ти, не́жели зла́та и сребра́ сокро́вища. Честне́йшая же есть ка́мений многоце́нных, все же честно́е недосто́йно ея́ есть. Долгота́ бо дней и ле́та живота́ в десни́це ея́, в шу́йце же ея́ бога́тство и сла́ва, от уст ея́ исхо́дит пра́вда, зако́н же и ми́лость на язы́це но́сит. Послу́шайте у́бо мене́, о ча́да, честна́я бо реку́, и блаже́н челове́к, и́же пути моя́ сохрани́т, исхо́ди бо мои́, исхо́ди живота́, и уготовля́ется хоте́ние от Го́спода. Сего́ ра́ди молю́ вас и предлага́ю мой глас сыново́м челове́ческим, я́ко аз, прему́дрость, устро́их сове́т, и ра́зум, и смысл аз призва́х. Мой сове́т и утвержде́ние, мой ра́зум, моя́ же кре́пость. Аз мене́ лю́бящия люблю́, и́щущии же мене́ обря́щут благода́ть. Разуме́йте у́бо, незло́бивии, кова́рство, ненака́заннии же, прилага́йте сердца́. Послу́шайте мене́ и па́ки, честна́я бо реку́, и отве́рзу от усте́н пра́вая, я́ко и́стине поучи́тся горта́нь мой, ме́рзки же предо мно́ю устны́ лжи́выя. С пра́вдою вси глаго́лы уст мои́х, ничто́же в них стро́потно, ниже́ развраще́нно. Вся пра́ва суть разумева́ющим и про́ста обрета́ющим ра́зум. Науча́ю бо вас и́стине, да бу́дет о Го́споде наде́жда ва́ша, и испо́лнитеся Ду́ха.

Cр. Притч.10:7А, 5 А, 3:13–16, 8:6, 34А, 35, 4, 12, 14, 17, 5–9, (?)

При́тчей чте́ние

Уста́ пра́веднаго ка́плют прему́дрость, язы́к же непра́веднаго поги́бнет. Устне́ муже́й пра́ведных ка́плют благода́ти, уста́ же нечести́вых развраща́ются. Ме́рила льсти́вая ме́рзость пред Го́сподем, вес же пра́ведный прия́тен Ему́. Иде́же а́ще вни́дет досажде́ние, та́мо и безче́стие, уста́ же смире́нных поуча́ются прему́дрости. Соверше́ние пра́вых наста́вит их и поползнове́ние отрица́ющихся упасе́т их. Не по́льзуют име́ния в день я́рости, пра́вда же изба́вит от сме́рти. У́мер пра́ведный, оста́ви раска́яние, нару́чна же быва́ет и посмея́тельна нечести́вых па́губа. Пра́вда непоро́чнаго исправля́ет пути́, в нече́стие же па́дает непра́вда. Пра́вда муже́й пра́вых изба́вит их, безсове́тием же пленя́ются беззако́ннии. Сконча́вшуся му́жу пра́ведну, не поги́бнет наде́жда, похвала́ же нечести́вых поги́бнет. Пра́ведник от ло́ва убе́гнет, в него́же ме́сто предае́тся нечести́вый. Во усте́х нечести́вых сеть гра́жданом, чу́вство же пра́ведных благоспе́шное. Во благи́х пра́ведных испра́вится град, и в поги́бели нечести́вых ра́дование. Во благослове́нии пра́вых возвы́сится град, усты́ же нечести́вых раскопа́ется. Руга́ется гра́жданом лише́нный ра́зума, муж же му́дрый безмо́лвие во́дит.

Притч.10:31 – 11:12

Прему́дрости Соломо́новы чте́ние

Пра́ведник, а́ще пости́гнет сконча́тися, в поко́и бу́дет. Ста́рость бо честна́, не многоле́тна, ниже́ в числе́ лет исчита́ется. Седи́на же есть му́дрость челове́ком, и во́зраст ста́рости – житие́ нескве́рное. Благоуго́ден Бо́гови быв, возлю́блен бысть и живы́й посреде́ гре́шник преста́влен бысть, восхище́н бысть, да не зло́ба измени́т ра́зума его́ или́ лесть прельсти́т ду́шу его́. Раче́ние бо зло́бы помрача́ет до́брая и паре́ние по́хоти пременя́ет ум незло́бив. Сконча́вся вма́ле, испо́лни ле́та до́лга, уго́дна бо бе Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше, и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́, и посеще́ние во избра́нных Его́.

Прем.4:7–15

На литии стихиры праздника и святаго стиховныя.

Аще несть отдания, стихиры святаго. Глас 7:

Ве́лий еси́, Го́споди, / и ди́вен во святы́х Свои́х, / я́ко по успе́нии и во гро́бе Саму́илевы ко́сти проро́чествуют / и Елисе́евы ме́ртвыя ме́ртвых воскреша́ют, / Илиина́ же ми́лоть сю́ду и сю́ду во́ды разделя́ет. / Чу́дна сия́ вои́стину и ди́вна, / но чу́днее сень Петро́ва и главотя́жи Па́вла, / и́же ду́хи нечи́стыя прогоня́ху и исцеля́ху вся́ку боле́знь и я́зву. / Сим всем почуди́вшеся чудесе́м, / просла́вим чудоде́ющаго Бо́га и ны́не / во святе́м чудотво́рце Дими́трии.

Глас 6: Прие́мляй моли́твы святы́х Твои́х на Небеси́ / и обеща́вый ра́ди пра́ведных не погуби́ти гре́шныя на земли́, / повеле́л еси́ ты́я в моли́тву призыва́ти к Тебе́, Го́споди: / иди́те бо, глаго́леши, к рабу́ Моему́ И́ову, / и сотвори́т же́ртву и моли́тву за вы. / Но и сам Твой уго́дник Моисе́й, / и в пещи́ трие́ о́троцы, / егда́ умоля́ху Тя за лю́ди согре́шшия, / пре́жде почи́вших пра́отцев святы́х представля́ху Ти. / Си́це и ны́не, моля́щеся Тебе́, Христе́ Бо́же наш, / приво́дим в моли́тву уго́дника Твоего́ Дими́трия, свя́то пожи́вшаго, / да его́ ра́ди пра́ведника пощади́ши нас, гре́шных, / и спасе́ши ду́ши на́ша.

Глас 5: Прииди́те, правосла́вных собо́ри, / воспои́м святи́теля, уче́нием к богоразу́мию нас наста́вльшаго, / исто́чника чуде́с преди́внаго, / Це́ркве свети́льника пресве́тлаго, / учи́теля Росто́ву прему́драго / и всей Росси́и прекра́сное удобре́ние, / той бо избавля́ет нас от вся́ких злых искуше́ний и бед / и мо́лится о душа́х на́ших.

Христо́во ста́до слове́сных ове́ц / на зла́це благоче́стия до́бре упа́сл еси́, иера́рше, / те́мже и по преставле́нии / церко́вных твои́х чад не оставля́й, но посеща́й / и, Святе́й Тро́ице со архиере́и предстоя́, / моли́ спасти́ вся, / честны́х твои́х моще́й обре́тение любо́вию почита́ющия, / Дими́трие прехва́льне.

Зна́мении и чудесы́ тебе́ Госпо́дь просла́ви, / святи́телю Дими́трие, / прогоня́еши бо ду́хи и врачу́еши стра́сти, / ду́ши просвеща́еши ве́рных, приходя́щих к тебе́, / А́нгелов равностоя́телю, / архиере́ев сопресто́льне, / апо́столов единонра́вне, / благове́рия побо́рниче.

Слава, глас 6: Град освяти́ся, наро́ди благослови́шася, / Це́рковь перворо́дных ду́хом ликовству́ет / во обре́тении честны́х твои́х моще́й, иера́рше Дими́трие, / с людьми́ зову́щи: / ты моя́ кре́пость и утвержде́ние, / ты моя́ добро́та, и тобо́ю хвалю́ся. / Моли́ся спасти́ вся, / любо́вию всеми́рное святы́х твои́х моще́й обре́тение / при́сно сла́вящия.

И ныне, праздника, глас 4. Анатолия:

Честна́го Креста́, Христе́, де́йство прообрази́в, Моисе́й, / победи́ проти́внаго Амали́ка в пусты́ни Сина́йстей: / eгда́ бо простира́ше ру́це, Креста́ о́браз творя́, / укрепля́хуся лю́дие; / ны́не же веще́й сбытие́ в нас испо́лнися, / днесь Крест воздвиза́ется, / и де́мони бе́гают, / днесь тварь вся от тли свободи́ся, / вся бо Креста́ ра́ди возсия́ша нам дарова́ния. / Те́мже, ра́дующеся, вси / припа́даем Тебе́, глаго́люще: / я́ко возвели́чишася дела́ Твоя́, Го́споди, сла́ва Тебе́.

Аще несть отдания, Богородичен, глас тойже:

Творе́ц и Изба́витель мой, Пречи́стая, / Христо́с Госпо́дь из Твои́х ложе́сн проше́д, / в мя Оболки́йся, / пе́рвыя кля́твы Ада́ма свободи́. / Те́мже Ти, Всечи́стая, / я́ко Бо́жии Ма́тери же и Де́ве, / вои́стинну вопие́м немо́лчно: / ра́дуйся А́нгельски, ра́дуйся, Влады́чице, / Предста́тельство и Покро́ве, / и Спасе́ние душ на́ших.

На стиховне стихиры праздника с припевы их.

Аще несть отдания, стихиры святаго, глас 3:

Слу́шая гла́са Госпо́дня, призыва́ющаго тя к Себе́, / гото́в был еси́, Дими́трие, к исхо́ду твоему́ от сея́ жи́зни. / В ве́чер и в полу́нощи, / в петлоглаше́ние же и у́тро не воздрема́л еси́, / ожида́я к себе Го́спода, / до́ндеже, сре́тив, вшел еси́ к Нему в ра́дость ве́чную, / иде́же предстоя́ Ему́, мо́лишися: / да пода́ст и нам жизнь свя́ту / и кончи́ну христиа́нскую.

Стих: Свяще́нницы Твои́ облеку́тся в пра́вду / и преподо́бнии Твои́ возра́дуются.

Облеки́йся ны́не за по́двиги в преподо́бие, / обле́клся еси́ и во святы́ню за незло́бие, / я́ко жениху́ целому́дренну, возложи́ти вене́ц чудотворе́ния / и, я́ко неве́сту, украси́ тя Госпо́дь за чистоту́ нетле́нием. / Дарова́ же ти сокро́вища неветша́ющая на Небеси́, / я́ко и́ноческую нищету́ соблю́л еси́ до сме́рти на земли́, / ве́руя Бо́гу быти приятнее сие́, / аще кто тя помянет ничто́же оста́вивша по себе́. / Помина́й у́бо нас ты па́че, приснопа́мятный Дими́трие, / мно́го прегреше́ний иму́щих, / но ничто́же от благи́ х дел содержа́щих.

Стих: Честна́ пред Го́сподем / смерть преподо́бных Его́.

Любопы́тную десни́цу да отрази́ши от поиска́ния име́ний твои́х, / предвозвести́л еси́ в заве́те, нищелю́бче Дими́трие, глаго́ля: / я́ко а́ще и мно́го кто потру́дится о тех, но ничто́же обря́щет. / От него́же и мы научи́мся, бра́тие, / я́ко лу́чше не име́ти или расточа́ти на ни́щия, / не́же собира́ти и оставля́ти по себе́. / Си́це бо мо́жем купи́ти у Христа́ Ца́рство Небе́сное.

Слава, глас 4: Возра́дуемся, Росси́йстии собо́ри, / похвалу́ Росто́вскую ублажа́юще, / чудотво́рца Дими́трия, / сей бо мно́го потруди́ся в списа́нии душеполе́зных нам книг, / и́миже развраще́нныя от пра́ваго благоче́стия пути́ / ко и́стине направля́ются, / правосла́вных же сердца́ в правове́рии утвержда́ются. / Ему́же и возопии́м: / о прему́дрый учи́телю, моли́ся Христу́, / да твои́м уче́нием наставля́еми, / полу́чим живо́т ве́чный.

И ныне, праздника, глас 8. Иоанна Монаха:

Его́же дре́вле Моисе́й прообразова́в собо́ю, / Амали́ка низложи́в, победи́, / и Дави́д песнопе́вец / подно́жию Твоему́, вопия́, кла́нятися повелева́ше, / честно́му Кресту́ Твоему́, Христе́ Бо́же, / днесь, гре́шнии, кла́няемся, / устна́ми недосто́йными / Тя, изво́лившаго пригвозди́тися на нем, воспева́юще, мо́лимся: / Го́споди, с разбо́йником Ца́рствия Твоего́ сподо́би нас.

Аще несть отдания, Богородичен, глас тойже:

При́зри на моле́ния Твои́х раб, Всенепоро́чная, / утоля́ющи лю́тая на ны воста́ния, / вся́кия ско́рби нас изменя́ющи. / Тя бо, Еди́ну, тве́рдое и изве́стное Утвержде́ние и́мамы, / и Твое́ предста́тельство стяжа́хом. / Да не постыди́мся, Влады́чице, Тя призыва́ющии, / потщи́ся на умоле́ние, Тебе́ ве́рно вопию́щих: / ра́дуйся, Влады́чице, всех По́моще, / Ра́досте и Покро́ве, и Спасе́ние душ на́ших.

Тропарь святаго, глас 8:

Правосла́вия ревни́телю и раско́ла искорени́телю, / Росси́йский целе́бниче и но́вый к Бо́гу моли́твенниче, / списа́ньми твои́ми бу́их уцелому́дрил еси́, / цевни́це духо́вная, Дими́трие блаже́нне, / моли́ Христа́ Бо́га спасти́ся душа́м на́шим. (Дважды.)

И тропарь праздника, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство. (Единожды.)

Аще несть отдания, тропарь святаго дважды и Богоро́дице, Де́во: единожды.

На Бог Госпо́дь: тропарь праздника, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство. (Дважды.)

Слава, святаго, глас 8:

Правосла́вия ревни́телю и раско́ла искорени́телю, / Росси́йский целе́бниче и но́вый к Бо́гу моли́твенниче, / списа́ньми твои́ми бу́их уцелому́дрил еси́, / цевни́це духо́вная, Дими́трие блаже́нне, / моли́ Христа́ Бо́га спасти́ся душа́м на́шим. (Единожды.)

И ны́не, праздника.

Аще несть отдания, тропарь святаго дважды.

Слава, и ныне, Богородичен, глас 8:

И́же нас ра́ди рожде́йся от Де́вы / и распя́тие претерпе́в, Благи́й, / испрове́ргий сме́ртию смерть и воскресе́ние явле́й я́ко Бог, / не пре́зри, я́же созда́л еси́ руко́ю Твое́ю. / Яви́ человеколю́бие Твое́, Ми́лостиве. / Приими́ ро́ждшую Тя Богоро́дицу, моля́щуюся за ны. / И спаси́, Спа́се наш, лю́ди отча́янныя.

По 1-м стихословии седален, глас 3:

Ма́рфа и Мари́я, се́стры Ла́заревы, / о́ва, седя́щи при ногу́ Иису́сову, слы́шаше сло́во Его́, / о́ва же печа́шеся о Христо́вом угоще́нии, / ты же, обои́м сим подража́я, / и в разли́чных послуша́ниих Христо́во и́го сла́дце носи́л еси́, / и, слы́ша и творя́ сам сло́во Бо́жие, / тому́ же про́чиих учи́л еси́. / Тем я́коже на земли́ от царе́й и влады́к разли́чныя по́чести, / та́ко и на Небеси́ неотъе́млемыя тех ча́сти у Христа́ сподо́бился еси́, / Его́же моли́, да пода́ст душа́м на́шим богому́дрие Мари́ино, / телесе́м же трудолю́бие Ма́рфино.

Слава, и ныне, праздника, глас 1.

Подобен: Ка́мени запеча́тану:

Креста́ Твоего́ Дре́ву покланя́емся, Человеколю́бче, / я́ко на нем пригвозди́лся еси́, Животе́ всех. / Рай отве́рзл еси́, Спа́се, ве́рою прише́дшему Ти разбо́йнику, / и сла́дости сподо́бися, испове́даяся Тебе́: / помяни́ мя, Го́споди. / Приими́, я́коже о́наго, и нас, зову́щих: / согреши́хом вси, благоутро́бием Твои́м не пре́зри нас.

Аще же несть отдания, Богородичен, глас тойже:

Егда́ ся́дет на Престо́ле сла́вы Своея́ Судия́ нелицеме́рный, / тогда́, о Богоневе́стная Влады́чице Мари́е, / всеси́льным предста́тельством Твои́м заступи́ мя, / ни внима́ния бо, ни трудолю́бия стяжа́х сестр Ла́заревых, / но все житие́ мое́ ижди́х, прилежа́ самолю́бию и молва́м жите́йским. / Те́мже пре́жде вре́мене прибега́ю под кров Твой и вопию́: / заступи́ мя, о Всеблага́я моя́ Покрови́тельнице, в День он Су́дный.

По 2-м стихословии седален, глас 8:

Я́ко на седа́лищи седо́ша и у нас суеве́рствующий фарисе́и, / показу́юще себе́ бы́ти пред неве́жы законоучи́тельми, / но не разуме́юще ни я́же са́ми утвержда́ют, ни я́же пред други́ми глаго́лют, / и́хже де́рзкое по прише́ствии твое́м в па́ству уви́дев неи́стовство, / а́бие ревну́я по благоче́стии, возревнова́л еси́ / и, а́ки Илия́, вся тайноводи́тельства раско́льническая изве́д на среду́, / посрами́л еси́, оста́вив нам в позна́ние лжи их обличи́тельное наставле́ние. / Его́же ра́ди тя ны́не я́ко и́стиннаго наста́вника на́шего и учи́теля / почита́ем вси, богому́дре Дими́трие.

Слава, и ныне, праздника, глас 8.

Подобен: Повеле́нное та́йно:

Прообража́ше та́инственно дре́вле Иису́с Нави́н Креста́ о́браз, / егда́ ру́це простре́ крестови́дно, Спа́се мой, / и ста со́лнце, до́ндеже враги́ низложи́, противостоя́щия Тебе́, Бо́гу; / ны́не бо за́йде, на Кресте́ Тя зря, / и, держа́ву сме́ртную разруши́в, / весь мир совоздви́гл еси́.

Аще несть отдания, Богородичен, глас тойже:

На всяк день и час чрез Моисе́я и проро́ков / взыва́ет Сын Твой на покая́ние мя, о Госпоже́ Влады́чице, / но аз не токмо сим, но ниже́ а́ще кто и от ме́ртвых воста́л бы, небрегу́ внима́ти. / Что у́бо бу́дет и на что наде́юся аз, окая́нный? / То́кмо к Тебе́ со слеза́ми вопию́: / напра́ви слух и ум мой к призыва́ющему мя Сы́ну Твоему́, / да и́миже весть судьба́ми наста́вит мя на путь покая́ния.

Полиелей и величание:

Велича́ем тя, / святи́телю о́тче Дими́трие, / и чтим святу́ю па́мять твою́, / ты бо мо́лиши за нас / Христа́, Бо́га на́шего.

Псалом избранный

Лик 1: Услы́шите сия́ вси язы́цы, внуши́те вси́, живу́щии по вселе́нней. 2: Уста́ моя́ возглаго́лют прему́дрость, и поуче́ние се́рдца моего́ ра́зум. 1: Прииди́те, ча́да, послу́шайте мене́, стра́ху Госпо́дню научу́ вас. 2: Благовести́х пра́вду в це́ркви вели́цей. 1: И́стину Твою́ и спасе́ние Твое́ рех. 2: Пове́м И́мя Твое́ бра́тии мое́й, посреде́ це́ркве воспою́ Тя. 1: Услы́шати ми глас хвалы́ Твоея́ и пове́дати вся чудеса́ Твоя́. 2: Го́споди, возлюби́х благоле́пие до́му Твоего́, и ме́сто селе́ния сла́вы Твоея́. 1: Возненави́дех це́рковь лука́внующих, и с нечести́выми не ся́ду. 2: Я́ко сохрани́х пути́ Госпо́дни и не нече́ствовах от Бо́га моего́. 1: Уста́ пра́веднаго поуча́тся прему́дрости, и язы́к его́ возглаго́лет суд. 2: Пра́вда Его́ пребыва́ет в век ве́ка. 1: Свяще́нницы Твои́ облеку́тся пра́вдою, и преподо́бнии Твои́ возра́дуются. 2: Блаже́ни живу́щии в дому́ Твое́м, в ве́ки веко́в восхва́лят Тя.

Сла́ва, и ны́не: Аллилу́иа, трижды.

По полиелеи седален, глас 7:

Я́ко фи́никс, процве́л еси́ нетле́нием от земли́, / и, я́ко кедр, и́же в Лива́не, умно́жился еси́ чудесы́, / превозне́слся еси́ явле́нием, я́ко град, верху́ стоя́й, / и возсия́л еси́ па́мятию твое́ю, я́ко свети́льник из под спу́да на свет. / Я́же вся на тебе́ ви́дяще сбытия́, / прославля́ем Возвели́чившаго тя та́ко во святы́х Свои́х. / Ты же, я́ко име́я дерзнове́ние ко Христу́ Го́споду, / помоли́ся, святоявле́нне Дими́трие, / да спасе́т и просвети́т ду́ши на́ша.

Ин седален, глас 7:

Просия́л еси́ доброде́тельным житие́м твои́м, святи́телю Дими́трие, / украша́яся красото́ю нра́ва, воздержа́нием и милосе́рдием, / златослове́сными же твои́ми уче́нии украша́я Христо́ву Це́рковь, / те́мже, приснопа́мятне, предстоя́ Престо́лу Вседержи́теля, / моли́ Христа́ Бо́га дарова́ти грехо́в оставле́ние / пра́зднующим любо́вию всечестну́ю па́мять твою́.

Слава, и ныне, праздника, глас 8.

Подобен: Повеле́нное та́йно:

В раи́ мя пре́жде дре́во обнажи́, / о вкуше́нии враг принося́ умерщвле́ние, / Креста́ же Дре́во, живота́ одея́ние челове́ком нося́, / водрузи́ся на земли́, и мир весь испо́лнися вся́кия ра́дости. / Его́же зря́ще возвыша́ема, / Бо́гу ве́рою, лю́дие, согла́сно возопии́м: / испо́лнь сла́вы дом Твой.

Аще несть отдания, Богородичен, глас тойже:

Проро́цы Тя предвозвести́ша, апо́столи Тя пропове́даша, / му́ченицы просла́виша, святи́телие ублажи́ша. / Тем и мы с ни́ми, Богоро́дицу, Тя испове́дающе, благоче́стно велича́ем.

Степенна, 1-й антифон 4-го гласа:

От ю́ности моея́ / мно́зи бо́рют мя стра́сти, / но Сам мя заступи́, / и спаси́, Спа́се мой.

Ненави́дящии Сио́на, / посрами́теся от Го́спода, / я́ко трава́ бо огне́м / бу́дете изсо́хше.

Сла́ва, и ны́не: Святы́м Ду́хом / вся́ка душа́ живи́тся, / и чистото́ю возвыша́ется, / светле́ется Тро́ическим Еди́нством священнота́йне.

Прокимен, глас 4:

Уста́ моя́ возглаго́лют прему́дрость / и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней.

Другий прокимен: Вся́кое дыха́ние / да хва́лит Го́спода. Стих: Хвали́те Бо́га во святы́х Его́, хвали́те Его́ в утверже́нии си́лы Его́.

Евангелие от Иоанна, зачало 35, от полу

Рече́ Госпо́дь ко прише́дшым к Нему́ иуде́ем: ами́нь, ами́нь глаго́лю вам, не входя́й две́рьми во двор о́вчий, но прела́зя и́нуде, той тать есть и разбо́йник. А входя́й две́рьми па́стырь есть овца́м. Сему́ две́рник отверза́ет, и о́вцы глас его́ слы́шат, и своя́ о́вцы глаша́ет по и́мени, и изго́нит их. И егда́ своя́ о́вцы иждене́т, пред ни́ми хо́дит, и о́вцы по нем и́дут, я́ко ве́дят глас его́. По чужде́м же не и́дут, но бежа́т от него́, я́ко не зна́ют чужда́го гла́са. Сию́ при́тчу рече́ им Иису́с, они́ же не разуме́ша, что бя́ше, я́же глаго́лаше им. Рече́ же па́ки им Иису́с: ами́нь, ами́нь глаго́лю вам, я́ко Аз есмь дверь овца́м. Вси, ели́ко их прии́де пре́жде Мене́, та́тие суть и разбо́йницы, но не послу́шаша их о́вцы. Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет.

Ин.9:39–10:9

По 50-м псалме

Слава: Моли́твами святи́теля Дими́трия, / Ми́лостиве, очи́сти / мно́жества согреше́ний на́ших.

И ныне: Моли́твами Богоро́дицы, / Ми́лостиве, очи́сти / мно́жества согреше́ний на́ших.

Таже, глас 6: Поми́луй мя, Бо́же, / по вели́цей ми́лости Твое́й / и по мно́жеству щедро́т Твои́х / очи́сти беззако́ние мое́.

И стихира, глас 6:

Излия́ся благода́ть во устна́х твои́х, / святи́телю Дими́трие, / уче́ньми бо твои́ми Це́рковь украси́л еси́, / и́стину Правосла́вия уясни́л, / па́губное же раско́льническое мудрова́ние посрами́л еси́. / Тем я́коже в житии́, / та́ко по отше́ствии твое́м потщи́ся, / да поне́ чудесы́ твои́ми уверя́еми, / прии́дут в чу́вство и просла́вят ку́пно с на́ми / Триипоста́снаго Бо́га / от нас исходя́щий, но не от нас су́щии.

Канон праздника со ирмосом на 8 и святаго на 6. Аще несть отдания, канон Богородицы со ирмосом на 6 и святаго на 8.

Канон святаго, глас 6.

Песнь 1

Ирмос: Я́ко по су́ху, пешеше́ствовав Изра́иль / по бе́здне стопа́ми, / гони́теля фарао́на / ви́дя потопля́ема, / Бо́гу побе́дную песнь пои́м, вопия́ше.

Го́рдому фарао́ну в ожесточе́нии уподо́бихся / и того́ потопле́нию за нераска́яние подпадо́х, / но ты, святый Дими́трие, путеводи́тель ми бу́ди к покая́нию, / я́ко да и аз от Христа́ получу́ вход в Зе́млю Обетова́нную.

Ни себе́ пощади́х, ни бли́жняго поми́ловах, / но при́сно чре́ву, я́ко на Еги́пет, рабо́тая, / и сам истаева́ю гла́дом и жа́ждею, / и други́м от крупи́ц па́дающих насыща́тися возбраня́ю. / Сего́ ра́ди к тебе́, па́стырю до́брый Дими́трие, оставля́емый, прибего́х, / да напита́еши мя, а́ки ма́нною, словесы́ твои́ми / и напои́ши мя слеза́ми умиле́ния.

Уты́х, утолсте́х, забы́х Тя, Бо́га, Спаса́ющаго мя, тя́жко бо уши́ма слы́шу и се́рдцем разуме́ю, / а́ще и призыва́еши мя к Себе́ чрез зако́н и проро́ки. / Те́мже, о Тво́рче и Изба́вителю мой, / житие́м и уче́нием уго́дника Твоего́ Дими́трия испра́ви и спаси́ мя.

Богородичен: Ка́я по́льза в кро́ви мое́й, внегда́ сходи́ти ми во истле́ние, / или́ что приложи́тся мне, / а́ще и весь мир приобря́щу, ду́шу же погублю́, / но Ты, Влады́чице, помози́ ми, / да получу́ от Христа́ Спа́са Твоего́ проще́ние грехо́в и жизнь ве́чную.

Катавасия: Крест начерта́в, Моисе́й / впря́мо жезло́м Чермно́е пресече́, / Изра́илю пешеходя́щу; / то́же обра́тно фарао́новым колесни́цам, / уда́рив, совокупи́, / вопреки́ написа́в непобеди́мое ору́жие. / Тем Христу́ пои́м, Бо́гу на́шему, я́ко просла́вися.

Песнь 3

Ирмос: Несть свят, / я́коже Ты, Го́споди Бо́же мой, / вознесы́й рог ве́рных Твои́х, Бла́же, / и утверди́вый нас на ка́мени / испове́дания Твоего́.

Утверди́ся се́рдце мое́ в памятозло́бии, / разшири́шася уста́ моя́ на сме́хи и осужде́ния, / возвесели́хся о паде́нии бли́жняго моего́, / уче́нию же твоему́ богоуго́дному, святи́телю, ни ма́ло внима́х. / Поне́ у́бо чудесы́ твои́ми премени́ мя отсе́ле / и сотвори́ подража́теля житию́ твоему́.

Ины́я стра́ны хва́лятся прему́дростию свое́ю, / други́я си́лою и бога́тством, / мы же похваля́емся многоцеле́бными святы́х Бо́жиих и твои́ми мощми́, чудотво́рче Дими́трие, / от ни́хже получа́ем телесе́м здра́вие / и душа́м на́шим спаси́тельное врачева́ние.

Дая́й моли́тву моля́щимся / и благословля́яй в ле́та на́ша па́мять пра́ведника Твоего́, Дими́трия, / пода́ждь моли́твами того́ заступле́ние от враг ви́димых и неви́димых.

Богородичен: Взбра́нная Победи́тельнице и кре́пкая во искуше́ниих на́ших Засту́пнице, / не пре́зри грех ра́ди на́ших ускори́ти на по́мощь / и от бед изба́вити нас, еди́на Чи́стая, еди́на Благослове́нная.

Катавасия: Жезл во о́браз та́йны прие́млется, / прозябе́нием бо предразсужда́ет свяще́нника; / неплодя́щей же пре́жде Це́ркви, / ны́не процвете́ Дре́во Креста́, / в держа́ву и утвержде́ние.

Аще отдание, кондак и икос святаго.

Седален святаго, глас 8:

Дре́вних преподо́бию подража́я, / освяти́л еси́ житие́ твое́ на слу́жбу Бо́гови в осмоена́десять ле́то. / Отне́леже и был еси́ вели́к мона́х, / свяще́нник, учи́тель, иера́рх, / ны́не же чудотво́рец и моли́твенник о душа́х на́ших.

Слава, и ныне, праздника, глас 4.

Подобен: Ско́ро предвари́:

В тебе́, треблаже́нне и жизнода́вче Кре́сте, / лю́дие учрежда́ющеся, спра́зднуют с невеще́ственными ли́ки, / чи́ни архиере́йстии благогове́йно воспева́ют, / мно́жества же мона́шествующих и по́стников покланя́ются, / Христа́ же распе́ншагося вси сла́вим.

Аще несть отдания,

Богородичен, глас тойже:

Златокова́нный киво́т вмеща́ше в себе́ дре́вле / богопи́санный зако́н и небе́сную ма́нну. / Ты же, Богороди́тельнице, заче́нши, пло́тию Сы́на Бо́жия родила́ еси́ / во обновле́ние и спасе́ние душ на́ших.

Песнь 4

Ирмос: Христо́с моя́ си́ла, / Бог и Госпо́дь, / честна́я Це́рковь / боголе́пно пое́т, взыва́ющи, / от смы́сла чи́ста, о Го́споде пра́зднующи.

Позна́ вол я́сли го́спода своего́ и осе́л стяжа́вшаго его́, / аз же безслове́сными страстьми́ удали́хся от Творца́ моего́, / но ты, па́стырю благи́й Дими́трие, я́ко овча́ заблу́ждшее, взыщи́ мене́ / и Христо́ву ста́ду сопричти́ мя.

Удо́бее от те́рния собира́ти виногра́дное гро́здие и от ре́пия смоко́вие, / не́же от жесто́каго моего́ се́рдца приноси́ти еле́й милосе́рдия. / Сего́ ра́ди, де́лателю виногра́да Христо́ва Дими́трие, / огради́ мя стра́хом Госпо́дним и напо́й мя водо́ю умиле́ния.

Сия́я со́лнце Свое́ на благи́я и дождя́ на пра́ведныя, / да и влас главы́ моея́ не поги́бнет, храни́ши мя, гре́шнаго. / Вся стихи́ и мене́ ра́ди зла́го ста́ша в чи́не свое́м, / аз еди́н то́чию пребыва́ю в нечу́вствии. / Но даждь ми, Го́споди, уго́дника ра́ди Твоего́ Дими́трия / разуме́ти дела́ Твоя́ и, слы́ша слух Твой, боя́тися Тебе́.

Богородичен: Внегда́ прибли́житися лето́м воплоще́нию, / посреде́ двою́ живо́тну позна́н бысть. / Внегда́ приити́ вре́мени ко спасе́нию, / посреде́ двою́ разбо́йнику яви́ся Сын Твой, Богоро́дице. / Непостижи́мо во обои́х сих Сло́во, / да мы, воплоще́нному и пострада́вшему за ны покланя́ющеся Сло́ву, / Тя, Ма́терь Бо́жию, в пе́снех возвели́чим.

Катавасия: Услы́шах, Го́споди, / смотре́ния Твоего́ та́инство, / разуме́х дела́ Твоя́ / и просла́вих Твое́ Божество́.

Песнь 5

Ирмос: Бо́жиим све́том Твои́м, Бла́же, / у́тренюющих Ти ду́ши любо́вию озари́, молю́ся, / Тя ве́дети, Сло́ве Бо́жий, / и́стиннаго Бо́га, / от мра́ка грехо́внаго взыва́юща.

Свети́льник нога́ма мои́ма зако́н Госпо́день, / и свет стезя́м мои́м оправда́ния Его́, / аз же, во тьме неве́дения ползя́ и толки́йся, / не хощу́ с му́дрыми свети́льника стяжа́ти. / Но ты мне, светоявле́нне Дими́трие, невестоводи́тель предста́ни, / я́ко да и аз ду́хом к Бо́гу от но́щи у́треневати потщу́ся.

Боле́зную те́лом, боле́зную и душе́ю: / о́вому я́ко досади́х объяде́нием и пия́нством, / о́ву же я́ко разсла́бих грехми́. / Сугу́ба боле́знь и тяжка́, / но ты, но́вый чудотво́рче, умоли́ Христа́, Врача́ всех, / да обоя́ исцели́ти благоизво́лит.

Го́споди Бо́же наш, даждь нам мир во днех на́ших, / Го́споди Бо́же наш, стяжи́ в нас любо́вь, / да вси еди́ными усты́ и еди́ным се́рдцем / испове́дуем Еди́наго Тя в Тро́ице сла́вимаго Бо́га.

Богородичен: Стра́ха Госпо́дня во чре́ве не прия́х, / ни се́рдцем о нераде́нии поболе́х, / но, при́сно зачина́я и ражда́я грехи́ ко грехо́м, / от умноже́ния тех со́вестию снеда́юся. / Сего́ ра́ди в многопло́дии сем беззако́нием к Тебе́, Влады́чице, вопию́: / сотвори́ мя возроди́тися в живо́т ве́чный покая́нием.

Катавасия: О треблаже́нное Дре́во, / на не́мже распя́ся Христо́с, Царь и Госпо́дь! / И́мже паде́ дре́вом прельсти́вый, / Тобо́ю прельсти́вся, / Бо́гу пригвозди́вшуся пло́тию, / подаю́щему мир душа́м на́шим.

Песнь 6

Ирмос: Жите́йское мо́ре, / воздвиза́емое зря напа́стей бу́рею, / к ти́хому приста́нищу Твоему́ прите́к, вопию́ Ти: / возведи́ от тли живо́т мой, / Многоми́лостиве.

От ки́та Ио́ну, от бла́та же е́зернаго тебе́, святи́телю Дими́трие, изведе́ Госпо́дь на свет, / ов тридне́вен во утро́бе не вреди́ся, ты же четыредесятоле́тен неистле́нен в не́дрех земны́х пре́был еси́. / Ве́лие чу́до! Но бо́льше дарова́ние Бо́жие, / и́ бо тя чудесы́, я́ко проро́ка, просла́ви.

Дре́внии о́нии ниневи́тяне, неве́рнии язы́цы су́ще, / еди́ною проро́ческою про́поведию пока́яшася. / Аз же, толи́ко наставле́ний боже́ственных име́я / и по вся дни что́мая слу́шая, неиспра́вен пребыва́ю, / но ты, святи́телю, моли́твами твои́ми к де́ланию сих наста́ви мя.

Бе́здна грехо́в после́дняя обы́де мя, / и треволне́ние страсте́й погружа́ет мя. / Тем, до́ндеже не понре́ душа́ моя́ во а́де, / к Тебе́, Го́споду Бо́гу, от ско́рби вопию́, / да пра́ведника Твоего́ ра́ди Дими́трия услы́шиши и спасе́ши мя.

Богородичен: Ско́рая в беда́х Помо́щнице, / гото́вое обурева́емым приста́нище, / сохрани́ мя, Ма́ти Бо́жия, от потопле́ния жите́йскаго / и не даждь ми разби́тися о ка́мень па́губы душе́вныя.

Катавасия: Во́днаго зве́ря во утро́бе / дла́ни Ио́на крестови́дно распросте́р, / спаси́тельную Страсть прообража́ше я́ве. / Тем, тридне́вен изше́д, / преми́рное Воскресе́ние прописа́ше / Пло́тию пригвожде́ннаго Христа́ Бо́га / и тридне́вным Воскресе́нием мир просве́щшаго.

Аще отдание, токмо кондак и икос праздника,

глас 4. Самоподобен:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ си́лою Твое́ю ве́рныя лю́ди Твоя́, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Икос: И́же до тре́тияго Небесе́ восхище́н бысть в рай / и глаго́лы слы́шав неизрече́нныя и Боже́ственныя, / и́хже не леть язы́ки (челове́ческими) глаго́лати, / что Гала́том пи́шет, я́ко рачи́телие Писа́ний прочто́сте и позна́сте: / мне, глаго́лет, хвали́тися да не бу́дет, то́кмо во еди́ном Кресте́ Госпо́дни, / на не́мже, страда́в, уби́ стра́сти. / Того́ у́бо и мы изве́стно держи́м, Крест Госпо́день, хвалу́ вси: / есть бо нам спаси́тельное сие́ Дре́во / oру́жие ми́ра, непобеди́мая побе́да.

Аще несть отдания,

кондак святаго, глас 8:

Звезду́ Росси́йскую, от Ки́ева возсия́вшую / и чрез Но́вград Се́верский в Росто́в дости́гшую, / всю же страну́ сию́ уче́ньми и чудесы́ озари́вшую, / ублажи́м златослове́снаго учи́теля Дими́трия, / той бо всем вся написа́, я́же к наставле́нию, / да всех приобря́щет, я́коже Па́вел, Христу́ / и спасе́т правове́рием ду́ши на́ша.

Икос: Пра́ведным о ка́ющихся на Небеси́, / нам же, гре́шным, на земли́ о тебе́, пра́ведниче Дими́трие, / подоба́ет возра́доватися, / я́ко но́ваго тя к Бо́гу моли́твенника о нас стяжа́хом, / его́же досто́йными похвала́ми ублажа́юще, / си́це от ра́дости зове́м: / ра́дуйся, Росто́вская похвало́ и всея́ Росси́и прославле́ние.

Песнь 7

Ирмос: Росода́тельну у́бо пещь / соде́ла А́нгел / преподо́бным отроко́м, / халде́и же опаля́ющее / веле́ние Бо́жие мучи́теля увеща́ вопи́ти: / благослове́н еси́, Бо́же оте́ц на́ших.

Я́коже трие́ о́троцы в пещи́ вавило́нстей / о́гненную си́лу угаси́ша моли́твою, / та́ко ты, богоявле́нне Дими́трие, / возни́кший огнь в саможего́мых ски́тах уче́ньми твои́ми потреби́л еси́. / Отню́дуже тя за спасе́ние душ погиба́ющих / Госпо́дь просла́ви чудесы́ и нетле́нием, / мы же святоле́пными пе́сньми ублажа́ем.

О коли́ких благ, окая́ннии, лиши́стеся, раско́льницы: / ни священнонача́льника бо и́мате, ни вождя́ и́стиннаго ко спасе́нию, / ниже́ Безкро́вныя Же́ртвы, ниже́ други́х та́инств сподобля́етеся. / Но поне́ ны́не позна́йте па́губное свое́ заблужде́ние, / и а́ще дело́м и уче́нию ангелоподо́бнаго Дими́трия не ве́рите, / то чудесе́м, от него́ быва́емым, я́коже халде́и о́нии, ве́руйте, / да с на́ми ку́пно еди́ными усты́ помо́литеся Бо́гу оте́ц на́ших.

Вои́стину, Бо́же наш, / Ты еси́ Еди́н Бог бого́в и Госпо́дь господе́й / и ра́зве Тебе́ ина́го и Твоея́ Святы́я Собо́рныя Це́ркве несть / ни на Небеси́, ни на земли́, иде́же подоба́ет спасти́ся. / Сего́ ра́ди даждь нам еди́ными усты́ и еди́ным се́рдцем / удивля́ющаго вся хоте́ния Своя́ во святы́х, Тебе́ сла́вити.

Богородичен: Прови́дец Дании́л усмотри́ Тя го́ру, Неискусому́жная Де́во, / приснопа́мятный же во святы́х наш Дими́трий, / я́коже Гедео́н, Руно́ Ороше́нное Тя нарече́. / Мы же, обоя́ испове́дающе, про́сим: / да на отто́ргшемся от Тебе́ Ка́мени, Христе́, утвержда́ется Це́рковь / и пра́во ве́рующих сердца́ росо́ю благода́ти Твоея́ напая́ются.

Катавасия: Безу́мное веле́ние мучи́теля злочести́ваго / лю́ди поколеба́, / ды́шущее преще́ние и злохуле́ние богоме́рзкое; / оба́че три о́троки не устраши́ я́рость зве́рская, / ни огнь снеда́яй, / но противоды́шущу росоно́сному Ду́ху, / со огне́м су́ще, поя́ху: / Препе́тый отце́в и нас Бо́же, благослове́н еси́.

Песнь 8

Ирмос: Из пла́мене преподо́бным ро́су источи́л еси́, / и пра́веднаго же́ртву водо́ю попали́л еси́: / вся бо твори́ши, Христе́, то́кмо е́же хоте́ти. / Тя превозно́сим во вся ве́ки.

Вся сре́дства, святи́телю, на взыска́ние заблу́ждших употреби́л еси́, / разлива́ющийся пла́мень по скито́м водо́ю покая́ния погаша́я, / море́льщиков к безсме́ртней трапе́зе призыва́я, / просвеще́нных же и отпа́дших, да не второ́е крестя́щеся па́ки распина́ют Христа́, / еди́наго держа́тися креще́ния утвержда́л еси́. / Всех повсю́ду правове́рию учи́л еси́ / и ны́не свои́ми списа́ньми тому́жде учи́ши. / Тем я́ко и́стиннаго учи́теля во святы́х почита́ем тя.

Дре́вним о́ным вавило́нским столпотвори́телем врази́ на́шего благоче́стия уподо́бльшеся, / дерзну́ша неразу́мия своего́ то́лки на песце́ суеве́рия назда́ти. / И́мже егда́ опро́шася уче́ний твои́х во́ды, святи́телю, / а́бие поколеба́шася во основа́нии и бысть им паде́ние ве́лие, / нам же, благочести́вым, подкрепле́ние и исправле́ние.

Безнача́льне О́тче, Сы́не Собезнача́льне, Уте́шителю Благи́й, Ду́ше Пра́вый, / Сло́ва Бо́жия Роди́телю, Отца́ Безнача́льна Сло́ве, / Ду́ше Живы́й и Зи́ждяй, / Тро́ице Еди́нице, поми́луй мя.

Богородичен: Я́коже купина́, огне́м распаля́ема, сама́ не сгара́ше, / но Богови́дца, устраши́в, приведе́ к почита́нию, / та́ко Ты, Неискусобра́чная Неве́сто, / прие́мши во утро́бу Огнь Божества́, / нетле́нна в Рождестве́ пребыла́ еси́. / Ди́вное та́инство! / Непоко́рников благоче́стию стыдо́м опаля́еши, / почита́телей же правове́рных ороша́еши чудесы́ изоби́льно.

Катавасия: Благослови́те, о́троцы, / Тро́ицы равночи́сленнии, / Соде́теля Отца́ Бо́га, / по́йте снизше́дшее Сло́во, / и огнь в ро́су претво́ршее, / и превозноси́те всем жизнь подава́ющаго / Ду́ха Всесвята́го во ве́ки.

Песнь 9

Ирмос: Бо́га / челове́ком невозмо́жно ви́дети, / на Него́ же не сме́ют чи́ни А́нгельстии взира́ти; / Тобо́ю же, Всечи́стая, яви́ся челове́ком / Сло́во воплоще́нно, / Его́же велича́юще, / с Небе́сными во́и / Тя ублажа́ем.

Благослове́н Госпо́дь наш, я́ко посети́ нас в ле́та сия́ / и воздви́же нам в Росси́йстей Це́ркви но́ваго чудотво́рца Дими́трия, / я́коже бо во дни живота́ своего́ служа́ше преподо́бием и пра́вдою, / та́ко и по кончи́не подае́т ра́зум заблу́ждшим / ко взыска́нию путе́й спаси́тельных.

Сла́ва Тебе́, Пастыренача́льниче, / я́ко и во дни на́ша поста́вил еси́ на стра́жи бо́драго па́стыря Дими́трия, / и́мже прогоня́ются посмра́дшия ко́злища от ста́да Твоего́ непоро́чнаго.

Сла́ва Тебе́, Христе́ Бо́же, / благочести́вым похвало́ и правове́рным весе́лие, / я́ко пропове́дание свята́го Твоего́ Дими́трия / достове́рными чудесы́ утвержда́еши.

Богородичен: Ра́дость от А́нгела прии́мшей, / и мы, по прорече́нию Твоему́ / ублажа́юще со все́ми ро́ды, ева́нгельски вопие́м: / ра́дуйся, Благода́тная, Госпо́дь с Тобо́ю.

Катавасия: Та́ин еси́, Богоро́дице, рай, / невозде́ланно возрасти́вший Христа́, / И́мже кре́стное живоно́сное на земли́ насади́ся Дре́во. / Тем, ны́не возноси́му, / покланя́ющеся Ему́, Тя велича́ем.

Светилен праздника.

Подобен: Ученико́м:

Крест, храни́тель всея́ вселе́нныя, / Крест красота́ Це́ркве, / Крест царе́й держа́ва, / Крест ве́рных утвержде́ние, / Крест А́нгелов сла́ва и де́монов я́зва. (2)

Слава, святаго, глас 8:

Поставля́яй преде́лы язы́ков по числу́ А́нгел Свои́х / и собира́яй от разсе́янных сыно́в Ада́млих Це́рковь Свою́, / умножа́еши в ней святы́я Твоя́, Бо́же наш, я́ко зве́зды на небеси́, / от ни́хже просия́ и па́мять святи́теля Твоего́ Дими́трия. / Его́же ра́ди просвети́ ду́ши, помраче́нныя раздо́рным суеве́рием, / да вку́пе зове́м Ти песнь трегу́бую: аллилу́ия.

И ныне, праздника.

Подобен: Жены́, услы́шите:

Крест воздвиза́ется днесь, и мiр освяща́ется: / И́же бо со Отце́м седя́й и Ду́хом Святы́м на сем ру́це распростре́, / мiр весь привлече́ к Твоему́, Христе́, позна́нию; / и́же у́бо на Тя наде́ющияся / боже́ственныя сподо́би сла́вы.

Аще несть отдания:

Слава, и ныне, Богородичен, глас тойже:

Стопа́м отходя́щаго от нас в го́рняя святи́теля Дими́трия после́дующе, / со упова́нием к Тебе́, Влады́чице, вопие́м: / я́коже Тя на пречи́стей ико́не с Преве́чным Младе́нцем пи́шемую зрим на земли́, / та́ко даждь нам ви́дети стоя́щую одесну́ю Сы́на Твоего́ Бо́га / в непристу́пнем све́те на Небеси́.

На хвалитех стихиры праздника 3 и святаго 3.

Аще несть отдания, стихиры святаго. Глас 6.

Подобен: Все отло́жше:

Весь от ю́ности твоея́ возложи́лся еси́ / на взыска́ние прему́дрости и стра́ха Бо́жия, / я́же обре́т, не в земли́, а́ки лени́вый раб, сокры́л еси́, / но, уча́ и творя́ по Да́вшему ти тала́нт, / во сто трудо́в умно́жил еси́ его́, / и был еси́ вели́кий купе́ц, / износя́й на свет ве́тхая и но́вая, / и, открыва́я глубины́ ра́зума богопи́санных книг, / ку́плю добру́ де́яти научи́л еси́ нас. / Тем, благи́й и ве́рный ра́бе Бо́жий Дими́трие, / за толи́ка явле́нна твоя́ к нам сокро́вища / вшел еси́ в ра́дость Го́спода Твоего́.

Весь ум плени́л еси́ в послуша́ние ве́ры, / да благи́ми де́лы украси́ши ю́, / отню́дуже и де́латель виногра́да Христо́ва яви́лся еси́ иску́сный, / вся́ку бо розгу́, не творя́щу плода́, / стра́хом Госпо́дним посе́кл еси́ / и еди́но благоче́стие сохраня́л еси́ в нем, / отвне́ его́ огражда́л еси́ догма́ты церко́вными, / внутрьу́ду укрепи́л еси́ столпо́м правове́рия, / всю́ду предточи́лия ископова́я уче́ний твои́х. / Тем и ны́не, святы́й трудолю́бче Дими́трие, / присеща́й виногра́д твой, его́же насади́ десни́ца Вы́шняго, / да плодоприно́сит гро́здие спасе́ния.

Весь невозвра́тно наде́ждею возве́рглся еси́ на Бо́га: / препла́вая пучи́ну мiра сего́, блаже́нне, / молва́ми жите́йскими не погрузи́лся еси́, / ниже́, искуше́ньми обурева́ем, прирази́лся собла́зном, / но, при́сно благоти́шием наставля́ем, / дости́гл еси́ безмо́лвнаго приста́нища. / И, наче́н кора́бль Це́ркве Христо́вы пра́вити, / па́ки к безбе́дному пла́ванию испра́вил еси́, / па́ки ереседы́шущия преложи́л еси́ в тщету́ ве́тры / и ко́твою твои́х наставле́ний утверди́л еси́ его́, / я́ко диви́тися нам и от Бо́га проси́ти, / да и впредь проти́вныя ересе́й ве́тры, / моли́твами твои́ми утиши́ши.

Весь еси́ любо́вию прилепи́лся к Бо́гу и бли́жнему, / па́стырское бо о ста́де свое́м возыме́в попече́ние, / душе́ю труди́лся еси́ в богомы́слии и в поуче́ниих, / те́лом же в послуже́нии тре́бующим от Тебе́ по́мощи: / изнемога́ющий ве́рою укрепля́я, / боля́щия душе́ю покая́нием врачу́я, / сокруше́нныя со́вестию тве́рдым упова́нием обязу́я, / заблу́ждшия от и́стины на путь пра́вый обраща́я / и поги́бшия ересьми́ к благоче́стию взыску́я. / Тем, о па́стырю наш предо́брый, святи́телю Дими́трие, / помоли́ся о ста́де твое́м Пастыренача́льнику Христу́ Бо́гу, / да упасе́т е́ Сам в единомы́слии, любви́ и правове́рии.

Слава, глас 6: Воспо́й, Росси́е, Го́сподеви песнь но́ву, / похвали́, гра́де, Бо́га Твоего́, Росто́ве, / я́ко благоволи́ Вы́шний дарова́ти нам но́ваго чудотво́рца Дими́трия, / свиде́тельствованна от всех и от Са́мыя И́стины. / Его́же па́мять во святы́х почита́юще, / восхва́лим и мы, ста́рцы с ю́нотами, / и возвели́чим да́вшаго Бо́га на́шего / толи́кому уго́днику Своему́ в нас просия́ти / нетле́нием святоле́пным и чудоде́йствием.

И ныне, праздника, глас 6: Днесь происхо́дит Крест Госпо́день, / и ве́рнии прие́млют того́ жела́нием, / и взе́млют исцелéния души́ же и те́ла / и вся́кия боле́зни. / Сего́ целу́им ра́достию и стра́хом: / стра́хом, греха́ ра́ди, я́ко недосто́йни су́ще; / ра́достию же, спасе́ния ра́ди, / éже подае́т ми́ру на том пригвозди́выйся Христо́с Бог, / име́яй ве́лию ми́лость.

Аще несть отдания, Богородичен, глас тойже: Красота́ де́вства Твоего́ неопи́санна, / добро́та Твоя́, о Богома́ти, несказа́нная, / избра́нна бо еси́, я́коже со́лнце, / полна́, я́ко луна́ и дуга́ в явле́ния своя́, / а́ки стебло́ лива́ново в жа́тву на гора́х / и я́ко кипари́с, возраста́яй от удо́лия до небе́с. / Мно́гия добро́ты Твоя́ и вели́чия, Присноде́во, / но бо́льши всех, я́ко но́сиши Нося́щаго вся. / Его́же моли́ ку́пно со святы́м Дими́трием, / да спасе́т и просвети́т правове́рием ду́ши на́ша.

Славословие великое. Тропарь святаго. Сла́ва, и ны́не, праздника или Богородичен. И отпуст.

Блаженны праздника, песнь 9-я, на 4, и святаго, песнь 3-я или 6-я, на 4. Аще несть отдания, блаженны от канона святаго, песни 3-я и 6-я, на 8.

Тропарь праздника, глас 1:

Спаси́, Го́споди, лю́ди Твоя́ / и благослови́ достоя́ние Твое́, / побе́ды правосла́вным христиа́ном на сопроти́вныя да́руя / и Твое́ сохраня́я Кресто́м Твои́м жи́тельство.

И тропарь святаго, глас 8:

Правосла́вия ревни́телю и раско́ла искорени́телю, / Росси́йский целе́бниче и но́вый к Бо́гу моли́твенниче, / списа́ньми твои́ми бу́их уцелому́дрил еси́, / цевни́це духо́вная, Дими́трие блаже́нне, / моли́ Христа́ Бо́га спасти́ся душа́м на́шим.

Слава, кондак святаго, глас 8:

Звезду́ Росси́йскую, от Ки́ева возсия́вшую / и чрез Но́вград Се́верский в Росто́в дости́гшую, / всю же страну́ сию́ уче́ньми и чудесы́ озари́вшую, / ублажи́м златослове́снаго учи́теля Дими́трия, / той бо всем вся написа́, я́же к наставле́нию, / да всех приобря́щет, я́коже Па́вел, Христу́ / и спасе́т правове́рием ду́ши на́ша.

И ныне, кондак праздника,

глас 4. Самоподобен:

Вознесы́йся на Крест во́лею, / тезоимени́тому Твоему́ но́вому жи́тельству / щедро́ты Твоя́ да́руй, Христе́ Бо́же, / возвесели́ си́лою Твое́ю ве́рныя лю́ди Твоя́, / побе́ды дая́ нам на сопоста́ты, / посо́бие иму́щим Твое́ oру́жие ми́ра, / непобеди́мую побе́ду.

Прокимен, аллилуиарий, причастен праздника и святаго.

Прокимен праздника, глас 7:

Возноси́те Го́спода Бо́га на́шего / и поклоня́йтеся подно́жию но́гу Его́, я́ко свя́то есть.

Стих: Госпо́дь воцари́ся, да гне́ваются лю́дие.

И прокимен святаго, глас 1:

Уста́ моя́ возглаго́лют прему́дрость / и поуче́ние се́рдца моего́ ра́зум. Стих: Услы́шите сия́, вси язы́цы, внуши́те, вси живу́щии по вселе́нней.

Апостол, ко Евреем, зачало 318

Бра́тие, тако́в нам подоба́ше архиере́й, преподо́бен, незло́бив, безскве́рнен, отлуче́н от гре́шник и вы́шше Небе́с быв. И́же не и́мать по вся дни ну́жды, я́коже первосвяще́нницы, пре́жде о свои́х гресе́х же́ртвы приноси́ти, пото́м же о людски́х: сие́ бо сотвори́ еди́ною, Себе́ принес. Зако́н бо челове́ки поставля́ет первосвяще́нники, иму́щыя не́мощь: сло́во же кля́твенное, е́же по зако́не, Сы́на во ве́ки соверше́нна. Глава́ же о глаго́лемых: такова́ и́мамы первосвяще́нника, и́же се́де одесну́ю Престо́ла Вели́чествия на Небесе́х, святы́м служи́тель и ски́нии и́стинней, ю́же водрузи́ Госпо́дь, а не челове́к.

Евр.7:26–8:2

Аллилуиа праздника, глас 1

Стих: Помяни́ сонм Твой, его́же стяжа́л еси́ испе́рва. Стих: Бог же, Царь наш пре́жде ве́ка, соде́ла спасе́ние посреде́ земли́.

И Аллилуия святаго, глас 2

Стих: Уста́ пра́веднаго поуча́тся прему́дрости, / и язы́к его́ возглаго́лет суд. Стих: Зако́н Бо́га его́ в се́рдце его́, и не за́пнутся стопы́ его́.

Евангелие от Иоанна, зачало 36

Рече́ Госпо́дь ко прише́дшым к Нему́ иуде́ем: Аз есмь дверь: Мно́ю а́ще кто вни́дет, спасе́тся, и вни́дет, и изы́дет, и па́жить обря́щет. Тать не прихо́дит, ра́зве да укра́дет, и убие́т, и погуби́т: аз приидо́х, да живо́т и́мут и ли́шше и́мут. Аз есмь па́стырь до́брый: па́стырь до́брый ду́шу свою́ полага́ет за о́вцы. А нае́мник, и́же несть па́стырь, ему́же не суть о́вцы своя́, ви́дит во́лка гряду́ща и оставля́ет о́вцы, и бе́гает, и волк расхи́тит их, и распу́дит о́вцы. А нае́мник бежи́т, я́ко нае́мник есть и неради́т о овца́х. Аз есмь па́стырь до́брый, и зна́ю Моя́, и зна́ют Мя Моя. Я́коже зна́ет Мя Оте́ц, и Аз зна́ю Отца́, и ду́шу Мою́ полага́ю за о́вцы. И и́ны о́вцы и́мам, я́же не суть от двора́ сего́, и ты́я Ми подоба́ет привести́: и глас Мой услы́шат, и бу́дет еди́но ста́до, и еди́н па́стырь.

Ин.10:9–16

Причастен:

Зна́менася на нас свет лица́ Твоего́, Го́споди.

И святаго: В па́мять ве́чную бу́дет пра́ведник, от слу́ха зла не убои́тся.

По отпущении литургии исходит иерей с кадилом и диакон со свещею, и кадит Честный Крест и тако взимает иерей Честный Крест с блюдом на главу и вносит его во святый олтарь царскими дверьми, предыдущу же пред ним диакону со свещею и кадит Честный Крест. Таже полагает иерей Честный Крест на святый престол и кадит его крестообразно. И тако отдается праздник Честнаго Креста.