В 27-й день

Свята́го мученика Не́стора

В той же день. Преподобнаго Не́стора Летопи́сца, в Ближних пещерах почивающаго

В той же день. Свята́го благовернаго князя Андре́я Смоле́нскаго, Переяславскаго чудотворца

В той же день. Преподобнаго Не́стора Некни́жнаго, в Дальних пещерах почивающаго

На Го́споди, воззва́х: стихиры, глас 8.

Подо́бен: О преславнаго чудесе:

Не́сторе, страда́льче чу́дне,/ всеоружием Христовым себе обложи́л еси,/ чу́вственне убо Ли́ю спле́тся, того погуби́л еси,/ неви́димыми же неви́димаго стрела́ми велиа́ра/ ты запя́л еси и умертви́л еси./ Темже победы венце́м/ твою́ главу́ венча́ Великодарови́тый.

Словесы́ Боже́ственными укрепля́ем, Не́сторе му́дре,/ истинно Димитрия мученика,/ гордаго мучителя му́жески умертви́л еси,/ и уме́ршаго и ад разо́ршаго/ испове́дав Бога Безсмертна,/ смерть неправедну подъя́л еси, славне./ Темже Жизнь, радуяся,/ некончаемую наследовал еси.

Боже́ственный юноша был еси,/ телесе красото́ю, мудре, сияя/ и благодатию Божественною укра́шен,/ и силою удобре́н./ Темже Ли́еву разори́в силу силою Вседержителя,/ радуяся, пострадал еси/ и лико́м счи́слился еси страдальцев,/ с нимиже, радуяся, нас поминай.

Сла́ва, и ны́не, Богоро́дичен:

Тя молим, Пречистая,/ Предста́тельницу нашу:/ смуща́емыя в печа́лех не пре́зри/ до конца поги́бнути рабы́ Твои́,/ но ускори́ изъяти ны настоя́щаго гне́ва и печа́ли,/ о Богорадованная, Пресвятая Чистая,/ Ты бо на́ша еси стена́ и по́мощь необоримая.

Крестобогоро́дичен:

Тя ви́дящи, пригвожда́ема на Кресте́, Иисусе,/ и стра́сти прие́млюща во́лею,/ Дева и Мати Твоя, Владыко,/ увы́ Мне, вопия́ше,/ Чадо Сладкое!/ Ра́ны непра́ведно ка́ко терпи́ши,/ Врачу́, исцели́вый челове́ческое неможе́ние/ и от тли вся изба́вивый милосе́рдием Твои́м.

Тропа́рь, глас 4:

Мученик Твой, Го́споди, Не́стор,/ во страдании своем венец прият нетленный от Тебе́ Бога нашего,/ имеяй бо крепость Твою́,/ мучителей низложи,/ сокруши и де́монов немощны́я де́рзости:/ того моли́твами/ спаси́ души на́ша.

НА У́ТРЕНИ

Канон на 4, глас 4.

Песнь 1

Ирмо́с: Колесни́цы фарао́новы и си́лу его/ вве́рже в мо́ре Крепкий во бра́нех,/ воспое́м песнь новую, я́ко прославися.

На колесни́цу пла́менную твое́ю кровию, му́дре, радуяся, всел еси/ и к Небе́сней высоте́, иде́же Иисус Безлетный Свет,/ с радостию возше́л еси.

Броня́ми мы́сленными веры тебе́, Не́сторе, обложи́в,/ и крест, я́ко копие́, име́я в рука́х,/ вра́жия кре́пко ссекл еси полки́.

Теплото́ю Христовы укрепля́ем любве́,/ внутрь вскочил еси в три́знище и вся разори́л еси Ли́евы ко́зни,/ и победу победи́тельну поста́вил еси.

Богоро́дичен:

Зачала́ еси во чре́ве Собезнача́льнаго Отцу/ и родила́ еси, Неискусому́жная, па́че естества́ пло́тию,/ пребы́вши Дева и́стинно, Чистая:/ темже Тя вси почитаем.

Песнь 3

Ирмо́с: Утвержда́яй гром и созида́яй дух,/ утверди́ мене́, Го́споди,/ да Тя пою́ и́стинно/ и творю́ во́лю Твою́,/ я́ко несть свят, я́ко Ты, Боже наш.

Укрепи́вся держа́вою кре́пости вереи́ Сокруши́вшаго и а́дова врата́,/ со тща́нием в три́знище вшел еси/ и кре́пце сокруши́л еси вра́жия ко́зни.

Ве́тхий пре́лести начальник под нога́ми твои́ми простре́ся,/ ю́ношески бо к посече́нию просте́рлся еси меча́, Не́сторе, мучеников похвало́:/ темже восхваля́ем тя.

Предразру́шив горды́ню пребеззако́нников, Бо́гу поже́рл еси, мучениче, жертву,/ кровь твою́ возме́здие свяще́нную Тому́ подая́:/ темже ти возмзди́ богатыми дарова́ньми.

Богоро́дичен:

Еже от Ада́ма ро́да безобра́зие, внесе́нное сне́дию,/ во чреве Твое́м носимый Иисус, Богородице,/ преесте́ственно назда́в,/ первую добро́ту подаде́ нам.

Седален, глас 4.

Подо́бен: Вознесы́йся:

Не устраши́вся враго́в томи́тельства, ни ужа́сся плотски́х ран,/ но безбоя́зненно поте́кл еси к боре́нию, му́дре,/ нося́ непобеди́мое Креста́ Боже́ственное ору́жие./ Темже, внеза́пу льсти́ваго умертви́в, умерщвле́н был еси, Не́сторе,/ и жизни сподо́бился еси, Христу предстоя́.

Сла́ва, и ны́не, Богоро́дичен:

Грехолюби́в сый, молю Тя, Безгрешнаго Бога рождшую,/ вземлющаго грехи́ мира, Пречистая:/ многогре́шную ду́шу мою уще́дрити и грехи́ моя мно́гия очи́стити,/ гре́шных бо Ты еси очище́ние/ и спасе́ние верных, и заступле́ние.

Крестобогоро́дичен:

От Безнача́льнаго Отца Рожде́ннаго,/ напосле́док Тя пло́тию Рождшая,/ на Кресте́ ви́сяща зря́щи, Христе, увы Мне, любе́знейший Иисусе, вопия́ше,/ ка́ко сла́вимый я́ко Бог от Ангел,/ от беззако́нных ны́не челове́к, Сы́не, хотя́, распина́ешися,/ пою́ Тя, Долготерпели́ве.

Песнь 4

Ирмо́с: Услы́шах, Боже, слух Твой и убоя́хся,/ разуме́х дела́ Твоя и ужасо́хся, Го́споди,/ я́ко Твоего хваления испо́лнь земля́.

Дими́триевыми озари́вся светолу́чными учении,/ е́ллинския суеты́ мрака отбегл еси/ и муче́ния све́том облиста́лся еси.

Неве́рия сла́ное возмути́л еси море/ сла́достию твоея́, мучениче, благи́я веры,/ нечести́вых во́инства глубино́ю твоих крове́й потопи́л еси.

Воздвиза́емо к жизни яви́лся еси дре́во,/ благопло́дием пита́я по́двиг твоих верных полноту́,/ Не́сторе Христов, мучеников хвала́.

Богоро́дичен:

Очистилище мне бу́ди грехо́в/ и даждь мне ру́ку по́мощи, бе́дствующему, Всесвятая Владычице,/ христиа́н твердое заступление.

Песнь 5

Ирмо́с: Утро светлое/ нам посли́ я́ко Благ/ и наста́ви ны в страх Твой, Владыко.

Словесы́ Боже́ственнаго ра́зума по́мысл напои́в,/ муче́ния клас зрел, славне Несторе, израсти́л еси.

Исцеле́нием слове́с твоих, о Дими́трие, мучениче Христов,/ безбожия беззаконие великое Нестор уста́вил есть.

Ко врагу́ ви́димому спле́тся,/ Божию неви́димо по́мощь стяжа́л еси, Не́сторе сла́вне.

Богоро́дичен:

Радуйся, Ро́ждшая Бога нашего без се́мене;/ радуйся, Едина Богомати Пречистая;/ радуйся, Невесто Неневестная.

Песнь 6

Ирмо́с: Буря мя помышле́ний пости́гши,/ во глубину́ низвлачи́т мя безмерных грехов,/ но Ты, Упра́вителю Благи́й,/ предвари́в, упра́ви,/ я́ко пророка, и спаси́ мя.

Печа́тию назна́менав твое́ сердце,/ до́блественно уязви́л еси мужества твоего копие́м сердце Ли́ево, страдальче./ И, радуяся, умерщвля́ешися за всех Жизнь, Иисуса.

Я́ко жених, от черто́га плоти твоея́, мудре, изшел еси,/ одеждами, истка́нными от крове́й твоих, мучениче, свяще́нных, ясно украша́ем,/ и Владыце предста́л еси Христу.

Возвы́сив на ка́мени твоя но́ги благоче́стия,/ поста́ви Христос Жизни камень и напра́ви, Не́сторе, к Себе стопы́ твоя/ и враги́ твоя посрами́.

Богоро́дичен:

Расто́ргни плени́цы моих прегрешений,/ Я́же Бога ро́ждшая, взе́млющаго мира грех, Дево Марие,/ на Тя бо надежду спасения возложи́х.

Конда́к, глас 2.

Подо́бен: Вышних ища́:

Страда́льчествовав до́бре, безсмертную славу насле́довал еси ны́не,/ я́ко воин изря́дный Владыки был еси, моли́твами Димитрия мученика:/ с ним убо, Несторе мудре, моля́ не престай о всех нас.

Ин конда́к, глас 4:

Благоче́стия непобеди́маго во́ина/ и истине согла́сника и ору́жника/ вси по достоянию восхвалим Нестора великаго днесь/ и к нему возопием:/ моли Христа Бога о всех нас.

Икос:

В путь Госпо́день от младе́нства ше́ствовал еси, треблаже́нне,/ и Того́ благоче́стно свиде́тельств возжеле́л еси,/ и, крест на ра́мена, Не́сторе Богому́дре, усердно взем,/ пре́лесть лю́тую идолонеи́стовства разори́л еси,/ сокруши́в и стер Ли́евы ко́зни и ловле́ния./ Темже верою притека́ем в твой кров, вопию́ще:/ пребога́те, моли́ Христа Бога о всех нас.

Песнь 7

Ирмо́с: Глаго́лавый на горе́ с Моисе́ом/ и о́браз де́вства явле́й в купине́,/ благослове́н еси, Боже отец наших.

Озари́вый верных сердца́/ заре́ю подвиго́в страстоте́рпца,/ благослове́н еси, Го́споди, Боже отец наших.

Нече́стия угаси́в пла́мень росо́ю крове́й твоих,/ Боже́ственный му́чениче Не́сторе, пое́ши:/ благослове́н еси, Го́споди, Боже отец наших.

Же́ртву жи́ву в воню́ благово́ния Господу принес,/ му́чениче Не́сторе,/ благослове́н еси, взыва́л еси, Го́споди, Боже отец наших.

Богоро́дичен:

Святе́йши Херуви́м яви́лася еси,/ ро́ждшая Пресвятое Бога Слово, Всесвятая Владычице,/ нас освяща́ющаго.

Песнь 8

Ирмо́с: Земля́ и вся, яже на ней,/ мо́ре и вси исто́чницы,/ Небеса́ небе́с, свет и тьма, мраз и зной,/ сы́нове челове́честии,/ священницы, благослови́те Господа/ и превозноси́те Его во веки.

Земля кровь твою́ честну́ю прия́т, пролия́вшуюся за Христа,/ Небеса же ду́шу, я́коже невесту укра́шену,/ мучеников же ли́цы и праведных всех ду́си радостию срето́ша тя, мучениче.

О души́ твоея́ Боголюби́выя,/ смерть привре́менную в ничтоже вмени́вшия,/ но еже жити в Господе избравшия!/ О Божественнаго му́жества, нему́жества врагов крепча́йша!/ Не испове́дающих бо Христа обличи́л еси.

По́двигом твоим добрым подвиза́вся,/ течение истинно, мучениче, скончал еси, му́дре,/ и соблю́л еси твою́ веру;/ про́чее тебе́ венец правды лежит, егoже тебе́ пода́ст Христос во веки.

Богоро́дичен:

Не убою́ся врагов ловле́ний, Тя имея помощь,/ не убою́ся злых, к Тебе́ прите́к, Богороди́тельнице,/ в Тебе́ бо хвалю́ся и в Тебе́ прейду́, Чистая, сте́ну греха́,/ спа́сся моли́твами Твоими.

Песнь 9

Ирмо́с: Я́ко сотвори́ Мне вели́чия Сильный/ и свя́то Имя Его,/ и милость Его в род и род боя́щимся Его.

Багряни́цу, от кро́ве твоея́ очервле́ну, священно оде́ял еси/ и, держа́ в десни́це, я́коже скиптр, крест,/ ца́рствуеши со Христом, Не́сторе блаже́нне.

Зрел грозд явился еси лозы́ мы́сленныя,/ точи́лы же мучения изгне́тся,/ умиле́ния нам вино источи́л еси, при́сно хва́лящим тя.

Лику́я со Ангелы пред лице́м Иису́совым и Славы насыща́яся Того́,/ творя́щих твою́ верно, Не́сторе, память честну́ю при́сно поминай.

Богоро́дичен:

Света яви́лася еси прия́телище,/ разори́вшаго мглу дре́вняго неразу́мия и́стинно,/ свяще́ния храм, златы́й светильник, Небес вы́шши, Чистая.

Светилен.

Подо́бен: Жены́, услы́шите:

Безбожнаго велича́ние и вра́жию горды́ню/ Креста силою и моли́твами Димитрия, славнаго мученика, низложи́л еси,/ пе́рвее, Не́сторе, стра́сти победи́в,/ и мученик изря́ден явился еси Христо́в, му́дре страда́льче.

Сла́ва, и ны́не, Богоро́дичен:

Я́ко оружие непобедимое и сте́ну необориму,/ и столп всякия крепости, и спасения пристанище,/ и Боже́ственное основание воистинну,/ и мост, преводяй от земли к Небе́сным,/ поем Тя, Богородице, Тобою спасаемии.

На Литургии: Прокимен, глас 4: Святым, иже суть на земли Его, удиви́ Господь вся хотения Своя в них. Стих: Предзрех Господа предо мною выну: Апостол к Ефесеом, зачало 233. Аллилуия, глас 4: Воззваша праведнии, и Господь услыша их. Стих: Многи скорби праведным: Евангелие от Луки, зачало 106. Причастен: В память вечную:

НА ВЕЧЕ́РНИ

На Го́споди, воззвах: стихиры, глас 4.

Подо́бен: Я́ко до́бля:

Времена́ и ле́та достопа́мятных дея́ний,/ подвиги и труды Богоносных отец,/ Несторе блаженне, напису́я,/ любовию возгорелся еси ко у́мному желанию/ и, я́ко добр ученик показа́вся,/ последовал еси стопа́м первоначальных;/ еще же в жизни сей избрал еси часть благую,/ сущую и ны́не с тобою./ Тоя́ и нас причастники сотвори моли́твами твоими,/ усердно поющих память твою́.

Словеси́ Боже́ственных писаний,/ подвиги Ангельски поживших в книгу неле́ностно напису́я,/ написал еси в книзе сердца твоего память будущаго воздаяния,/ тем имя твое́ и́маши напи́сано в Книзе Животней;/ но, о блаже́ннейший отче, моли о нас,/ да и мы обрящемся в Книзе Животней напи́санни,/ чтущии твоея́ любве́ воспоминание.

Прему́дрости духовныя разум имети хотя, преподобне,/ пришел еси к великим отцем,/ от нихже научился еси Небесных разумений;/ тем Ангельски во плоти пожив,/ просиял еси, я́ко мысленное утро,/ и ны́не, сын дне и причастник света сущи,/ не престай, прилежно молящи от тли и бед избавитися/ верою поющим всечестну́ю память твою́.

Сла́ва, глас 6:

Скрижаль Духу Святому/ угото́вав сердце твое́, Не́сторе отче наш,/ душу твою́ украси́л еси чистотою и смирением,/ избранием вольныя нищеты́,/ бдением, и послушанием, и молением непрестанным/ и написал еси тростию целомудрия своего,/ не от внешния философии, но духовнаго разума,/ святоле́пная жития первонача́льных отец Печерских,/ непрестанное желание име́яй к Бо́гу,/ обрел еси, Eгoже иска́л./ И ны́не, я́ко сцарствуя Безконечному Свету,/ моли спастися душам нашим.

И ны́не, Богоро́дичен или́ Крестобогоро́дичен.

На стиховне в Октоихе.

Сла́ва, глас 5:

Пророческое рече́ние исполнил еси, Не́сторе преподобне,/ возвещая нам писанием дела Божия,/ глаголя с Дави́дом в псалме:/ помянух дела Господня и от начала чудеса Твоя, Боже,/ яже в начале обители Твоея́ Матере ви́дев, почуди́хся,/ позна́нну творю последнему роду/ в преподобных силу Твою́:/ сию мы от твоих писаний, преблаженне, уви́девше,/ лобызаем труды твоя,/ ублажаем пе́сньми память твою́,/ и в Вышних Сущему псаломское пение приносим:/ Ты еси Бог, творяй чудеса.

И ны́не, Богоро́дичен по гласу.

или Крестобогоро́дичен.

Тропа́рь, глас 4:

Великих князей русских деяния/ и преподобных отец Печерских жития и чудеса написа́вый,/ свое же, Богомудре Несторе, многих ти ради добродетелей имя/ напи́сано на Небеси стяжа́вый,/ моли и нам написатися в Книги Животныя.

Ин тропа́рь, глас 4:

Времена́ и ле́та достопа́мятных дея́ний,/ по́двиги и труды́ Богоно́сных отец,/ Не́сторе прему́дре, напису́я,/ любо́вию возгоре́лся еси после́довати стопа́м первонача́льных,/ с нимиже не преста́й моли́тися Христу Бо́гу,/ спасти́ся душа́м нашим.

Канон преподобному, глас 4.

Песнь 1

Ирмо́с: Ли́цы Изра́ильстии/ невла́жными стопами/ понт Че́рмный и влажную глуби́ну прогна́вше,/ всадники триста́ты враги видяще в ней погруже́ны,/ с веселием пояху:/ пои́м Бо́гу нашему, я́ко прославися.

Ли́цы и́ночестии, в летней памяти Богоноснаго отца стеци́теся усердно к святей пещере/ и, любовию кланяющеся ра́це мощей Нестора любомудраго,/ воспойте Бо́гу, я́ко во святых Своих славно просла́вися.

Лико́м и́ноческим сочета́ющуся и в днешний день память твою́ воспети дерзающу,/ мне, па́че всех грубейшему, моли́твами твоими способствуй, Несторе святе,/ Бог бо в тебе́ дивно просла́вися.

Лико́м Ангельским причте́н быти хотяй,/ лико́м равноангельным во пло́ти причта́лся еси, отче,/ от нихже Ангельскому житию научи́вся, возшел еси к умному желанию:/ темже тя чтим, я́ко Бог в тебе́ дивно прославися.

Богоро́дичен:

Ли́ки святых и преподобных отец с ли́ки Ангельскими предстояще,/ сла́вите Рождшую всех святых Святе́йшее Слово;/ сла́вити же днесь Божию Матерь и нам земным помози́те, Та бо от всех дивно просла́вися.

Песнь 3

Ирмо́с: Лук сильных изнемо́же,/ и немощству́ющии препоя́сашася силою:/ сего ради утверди́ся в Господе сердце мое.

Предложение твоего ума бе, аки лук напряже́н, отче,/ живы́й бо во юдо́ле сей плачевней, восхождение имел еси в сердце своем выну к Бо́гу;/ и мне убо, жизнь свою веду́щу выну в печалех, Не́сторе,/ помози, моля́ся о мне, да возвеселится о Господе сердце мое.

Седмьнадесятоле́тен сый, мысленне приял еси мужа совершенна возраст:/ просиял бо еси, аки в старческих седи́нах, де́лы благи́ми,/ сия и во мне испра́ви, блаженне, и возвеселится о Господе сердце мое.

Чистоту и смирение глубо́ко к нищете прием,/ возлетел еси, святе, аки крило́ма, на го́ру и́ноческих добродетелей;/ отню́дуже, усмотри́в во мгновении ока преходя́щ мира сего образ,/ и па́че в любовь Божию впери́л еси сердце твое́.

Богоро́дичен:

Сад чистоты Рождшая, плодо́м сего, верующих Тя быти Матерь Божию, напита́ла еси обильно;/ и мне убо, верою покланяющемуся Тебе́, Богоневестная Дево,/ даждь от сего плода поне́ мало вкусити,/ да печальное возвеселится сердце мое.

Седален, глас 4:

От великих отец упра́влен в благия нравы/ и в юности весь Бо́гови присоединився,/ плотски́я похоти умертви́л еси поще́нием кре́пким,/ дух оживи́л еси наде́ждою благ вечных;/ Ангельски на земли пожи́в,/ со Ангелы ны́не водворяешися,/ тем тя почитаем, Несторе блаженне.

Сла́ва, и ны́не, Богоро́дичен:

Страшных чудес несказа́нный образ вижду в Тебе́, Пречистая Дево,/ я́ко Бога зачала еси и Необыме́ннаго объяла еси утробою Твое́ю,/ но какова се бысть тайна, не испыту́ю,/ па́че же верую и со страхом ублажаю Тя, поющи:/ радуйся, Бога Невместимаго пространное селение.

Песнь 4

Ирмо́с: Услыша́х славное смотрение Твое́, Христе Боже,/ я́ко родился еси от Девы,/ да от лести изба́виши зовущия:/ сла́ва силе Твое́й, Го́споди.

Услышав славная и предивная на горе Пече́рской, пришел еси тамо, преподобне,/ и, ви́дев с огнем и росо́ю низходящую благодать Божию в начале основания церкве,/ юн еще сый, со старцы воспел еси:/ сла́ва силе Твое́й, Го́споди.

Бо́льшую и соверше́ннейшую в души твое́й скинию творя Духу Святому,/ любезным восприятием за́поведи от Богоносных отец позлатил еси о́ну, Несторе святе:/ тем, я́ко в красный чертог, прии́де и обитель в тебе́ сотвори Отец с Сыном и Духом.

Аки сладкое млеко́, учение отец Богоносных прием, слово де́лом исполнил еси, блаженне,/ и исполнен был еси Вышния Премудрости, юже и мы от писаний твоих чтуще,/ увеселя́ем ду́ши на́ша ве́дением на сих горах бывшия Божия благодати.

Богоро́дичен:

Сладкое млеко́ покаяния и нектар Небесный умиления/ песни любовию Тебе́ приносящим, подаеши, Чистая Отроковице,/ яже и аз, страхом одержим, любовию же движим, приношу Ти, Владычице, и молю:/ услади сердце мое, Сладкаго Иисуса Христа моего рождшая.

Песнь 5

Ирмо́с: От света пресеки́й Первородный Свет,/ я́ко во свете дела поют Тя, Христе, Соде́теля,/ во Свете Твое́м пути на́ша напра́ви.

От света лестнаго любве́ удалився,/ желанием вожделел еси, Несторе, великих отец стопам, нравом и учениям последовати:/ сим даждь и нам прилежа́ти, и во свете дея́ний о́ных моли́твами твоими пути на́ша направи.

Глубоким смирением огражде́н сый, преподобне,/ высото́ю тщеславия ходящаго врага низве́рг, ногами попрал еси;/ хода́тайством твоим к Бо́гу, отче, даждь и нам смирение и во о́ном стопы на́ша напра́ви.

Ангельски жизнь свою управльша, вси тя, аки Ангела Божия, име́яху;/ тем и на диа́конский степе́нь взы́ти сподобился еси, в немже до́бре шествие свое управив,/ и на́ша пути во святыни, Несторе, управи.

Богоро́дичен:

Путь рождшая Жизни, Всесвятая Дево,/ стезями соблазн ходящих я́ко Милосердая наставляеши на стези правды;/ и мене, заблуждающаго, Владычице, не пре́зри,/ но я́ко рождшая Наставника заблуждшим, во Свете Его пути моя направи.

Песнь 6

Ирмо́с: Внегда скорбе́ти ми,/ возопих ко Господу,/ и услыша мя Бог спасения моего.

В преподобии и правде чин свой управля́я, храм Духу Святому весь сотворился еси,/ и, вшед в храм нерукотворенный, Престолу Вышняго предстои́ши;/ и мне, хотящему быти тамо, моли́твами твоими, отче, помози́,/ молю тя, молитвенника спасения моего.

Краснаго сада Де́лателя Небе́снаго кра́сное был еси прозябе́ние,/ кра́сными бо де́лы украше́н, благия плоды, ихже ны́не благоухание обоняем, возрастил еси;/ молю убо тя, блаженне, подаждь сия в дар и мне от Бога Спаса моего.

От труда подви́гов твоих, Несторе преподобне, многия излив по́ты, напоил еси ниву души́ твоея́/ и, израстив добродетелей кла́сы, пожина́еши ны́не рукоя́ти, живы́й во веки в Небесных кро́вех;/ в нихже и мне быти моли Христа Спаса моего.

Богоро́дичен:

Насе́янная Духом Отчим земле́ святая, радуйся, я́ко прозябла́ еси нам Древо благосенноли́ственное;/ зноем мя страсте́й опале́нна под сень о́наго приведи, Владычице,/ молю Тя я́ко Ходатаицу спасения моего.

Конда́к, глас 2:

Я́ко сый Богоноснаго Феодо́сия ученик/ и истинный жития того подражатель,/ первый честны́х его мощей самови́дец быти сподобился еси,/ яже с прочиими святолепно прене́с,/ насле́дил еси с темиже Царство Небесное,/ еже получи́ти и нам, чтущим тя, Го́сподеви моли́ся.

Песнь 7

Ирмо́с: Авраа́мстии иногда в Вавилоне отроцы/ пе́щный пламень попра́ша,/ песньми взывающе:/ отец наших Боже, благословен еси.

Авраа́мовым стопа́м последуя, святе, исполнением заповедей принесл еси, я́коже он Исаа́ка, чист ум Владыце,/ сего ради от жизни сея́ прешел еси в землю, точа́щую безконечную сладость,/ идеже и мне моли быти, Несторе, собеседниче Богоносных отец наших.

От стра́стнаго мира сего преставлься, прешел еси в безстрастный мир,/ иде́же в мире с сына́ми мира живы́й, и нас, в мире сем сущих, не отступай,/ моля Творца своего, да сопричастницы тебе́ будем, пою́ще:/ Боже, благослове́н еси.

Не уклони́л еси се́рдца своего в словеса лукавствия в жизни сей многомятежней, преподобне,/ тем и возду́шных духо́в лукавствия безмятежно прошед, к Небе́сным врато́м доспе́л еси:/ яже и нам отве́рзти потщися моли́твами твоими, да и мы с тобою поем:/ Боже, благословен еси.

Богоро́дичен:

Уклони́хся от стези правды и не хождах ногама моима на пути пра́вы,/ но на стремни́нах страсте́й заблуждающе, уязви́х плесне́ мои тернием греха,/ обаче и храмля́я, притекаю к Твое́й благости и молюся:/ Владычице, исцели мя, Ты бо еси души́ моея врачевание.

Песнь 8

Ирмо́с: В Вавилоне о́троцы/ Божественною распала́еми ре́вностию,/ мучителя и пламене преще́ние му́жески попра́ша,/ и посреде́ огня вве́ржени, ороша́еми, пояху:/ благословите вся дела Господня Господа.

Силою духовною укрепле́н, прелетел еси, Богомудре, крило́ма твоих добродетелей к Горним,/ и по ле́тех сих живеши ны́не, идеже ле́та не оскудевают,/ к ни́мже и нам доспе́ти моли́, поющим:/ благословите вся дела Господня Господа.

От дому Божия Матере прешел еси, Несторе, в Дом Божий, всесветя́щийся Иерусалим,/ и, А́нгелом в числе граждан Небесных сожительствуя, ходатайствуй и нам темже причтенным быти,/ в памяти твое́й поющим песньми Господа.

Троичен:

Троическое Едино Естество: Отче, и Сы́не, и Душе Святый, Едино Царство, силу и власть имущее,/ нас от власти князя тьмы избави, моли́твами Богоносных отец наших Печерских,/ с нимиже и Нестора приводим Ти в молитву днесь,/ благословяще Тя во веки, Господа.

Богоро́дичен:

Троическому предстоящи Престолу, Мати Дево, и славу Триипостаснаго Божества выну зрящи,/ моли́ся за ны грешныя, да и мы Небесныя Славы не лишимся,/ песньми Тя славяще и из Тебе́ рождшагося Господа.

Песнь 9

Ирмо́с: Рождество Твое́ нетленно яви́ся,/ Бог из боку́ Твое́ю про́йде,/ я́ко Плотоно́сец явися на земли/и с человеки поживе́,/ Тя, Богородице, тем вси величаем.

Отшел еси в селения праведных и духом предстоиши Присносу́щному Свету;/ при́зри убо на ны, живущия в се́лех многомятежнаго мира,/ и пособствуй сущим во бра́нех, Несторе блаженне,/ я́ко песньми тя ны́не величаем.

С нимиже любовь стяжал еси живы́й телом, с сими, и духом изше́д, сожительствуеши не отлучен,/ я́коже показу́ют мощи твоя, преподобне, со святыми в пещере лежащия,/ с нимиже предстани о нас молящися Бо́гу, память твою́ величающих.

Любит милость и истину Господь,/ и ты, преблаженне, подо́бяся Тому, милостивый буди хода́тай о спасении нашем,/ да тебе́ ради и мы, обретше благодать, не отпаде́м вечныя славы,/ я́ко успение твое́ святое песньми величаем.

Богоро́дичен:

Любит всех Владыка ходатайство Твое́, Пречистая Дево, и молитвы Твоя о человечестем роде прие́млет;/ моли́ся убо и о нас, рабех Твоих, Всецарице, да улучи́м милость в день Судный,/ выну бо Тебе́ я́ко Хода́таицу, кланяющеся, величаем.

На стиховне в Октоихе.

Сла́ва, глас 2:

Предочи́стився и́ноческими деянии, преподобне,/ сосу́д че́стен сотворился еси Духа Свята́го:/ от Негoже приял еси благодать неоску́дну/ всем, с верою к тебе́ притекающим, посо́бствовати в ско́рбех./ И ны́не убо нам, к раце мощей твоих припа́дающим,/ помощник неотступен буди,/ пособствуя невидимо на борю́щияся с нами,/ и моли Творца всех и Бога/ подати нам грехов прощение/ и милость улучити в день Судный,/ блажащим память твою́, Несторе Богомудре.

И ны́не, Богоро́дичен или́ Крестобогоро́дичен.

НА МА́ЛОЙ ВЕЧЕ́РНИ

Стихиры на 4, глас 8:

Преблаже́нне кня́же Андре́е,/ от юности потща́лся еси непорочно ста́ти в день Судный,/ отри́нув вся́кая сладостра́стия,/ и труды и терпением собрав богатство духовное,/ просветил еси душевную свещу́ твою́/ и, радуяся, к Бо́гу восте́кл еси:/ Емуже предстоя, моли спастися душам нашим.

Богоблаже́нне княже Андре́е,/ возненави́дев вре́менная Царствия ради Небе́снаго,/ плотски́я страсти умертви́л еси духом./ Богоуго́дно же подвизався и вражия ко́зни попра́в,/ на высоту добродетелей востекл еси/ и от земли́ к Бо́гу преставился еси,/ победы венец от Него восприи́м:/ Емуже с ли́ки праведных предстоя,/ моли спастися душам нашим.

Богодухнове́нне княже Андре́е,/ потща́вся победи́ти се́ти лукаваго,/ вводящия в неверие и слабости всех прелестей мира сего,/ дарование Свята́го Духа восприял еси:/ показався же юро́д быти миру, но Христу мудр быв,/ подвизался еси Царствия ради Небе́снаго, еже и достигл еси./ И ны́не со Ангелы ликовству́я,/ Спасу молися спастися душам нашим.

Сла́ва, глас 8. Самогла́сен:

Возлюбив Небесная и возненави́дев земная,/ за уме́ты вся вменил еси, тесным и ско́рбным шествуя путем,/ победи́л еси стра́сти мира сего,/ в терпении и страдании храбр воин яви́вся,/ разори́л еси вся хитроплете́нныя ко́зни вра́жия,/ поче́рп же желание от источника благодатнаго/ и всесовершенно Божией во́ли себе предложи́в,/ возымел еси, княже Андре́е, дерзновение ко Христу Бо́гу,/ Eгoже моли помиловати души на́ша.

И ны́не, Богоро́дичен:

Небесная поют Тя,/ Обрадованная Мати Безневестная,/ и мы славословим неизсле́дованно Рождество Твое́,/ Богородице Дево, моли спастися душам нашим.

На стиховне стихиры, глас 2.

Подо́бен: Доме Евфрафов:

Дом чистоты, досточу́дне Андре́е, был еси,/ пи́щи многия телеснаго добролю́бия/ от младе́нства возненави́дев,/ будущия ради жизни.

Стих: Пра́ведник, я́ко фи́никс, процвете́т/ и я́ко кедр, иже в Ливане, умножится.

Дом Духа Свята́го был еси,/ святе княже Андрее,/ дом бо родителей оставив,/ жилища Небесная получил еси,/ идеже со Ангелы ликовствуеши.

Стих: Насаждени в дому Господни,/ во дворех Бога нашего процветут.

Дом Христова благодая́ния, Богодухнове́нне, был еси,/ богатство бо сокрове́нно в души́ имел еси./ Сего ради лучи́ светлыя благодати/ возсиява́еши душа́м нашим.

Сла́ва, глас 5:

Приклонил еси главу́ твою́/ от юности твоея́ к Божественному званию,/ преблаженне княже Андре́е,/ и, взем крест, последовал еси Христу:/ расто́ргнув сети вражия/ и попра́в всю гордыню его,/ разум прав стяжал еси,/ посреде́ же молв живы́й/ и с до́льними ходя́й плотию,/ духом всегда Го́рняя видети желал еси/ и скоро востекл еси к венцу вышняго звания:/ моли спастися душам нашим.

И ны́не, Богоро́дичен:

Блажи́м Тя, Богородице Дево,/ и славим Тя ве́рнии по до́лгу:/ град непоколеби́мый, сте́ну необори́мую,/ твердую Предстательницу и Помощницу,/ и прибежище душ наших.

Таже Ны́не отпущаеши: Трисвятое, и по Отче наш: тропари свята́го, писаны на благословении хлебов.

НА ВЕЛИ́ЦЕЙ ВЕЧЕ́РНИ

Блажен муж: первый антифон.

На Го́споди, воззвах: поем стихов 8, глас 1.

Подо́бен: Небесных чино́в ра́дование:

Ра́йския добро́ты сматря́я,/ земныя добро́ты возгнуша́лся еси,/ блаженне княже Андрее,/ возжелав жития́ Небе́снаго,/ еже и получил еси:/ моли спастися душам нашим.

Разумом Богомудрым отечество твое́ оста́вил еси,/ странствуя те́лом на земли́,/ Небесная духом взира́л еси,/ ихже и достигл еси,/ моли спастися душам нашим.

Земна́го черто́га лише́н был еси,/ получи́в житие Черто́га Небе́снаго,/ с Вышними лики Троице предстои́ши,/ Юже о нас моли, княже Андрее Богоблаженне,/ Твою́ святую память почитающих.

В дому́ чу́днаго Николая странно водвори́вся,/ Божественному престолу непорочно послужил еси,/ и Небе́снаго Престола стоя́ние получи́в,/ невече́рним Светом обогати́лся еси,/ просвети́ убо нас, творящих святую память твою́.

Ины стихиры, глас 8. Самоподо́бен:

Преподобен и праведен,/ че́стен же и Боже́ствен светильник явился в Росси́йстей стране:/ сияя бо в Богоспаса́емом граде Переяславле чудесы́,/ мно́гия стра́сти и неду́ги отгоня́я,/ всех верных исцеляет Богомудрый Андре́й/ и мо́лится Го́сподеви/ помиловатися душам нашим.

Иго Господне от юности взем/ и крест терпения на себе возложи́в,/ Евангельски Христу после́довал еси/ и, в мире жи́тельствуя,/ Божественная во сто трудо́в уплодоноси́л еси./ И был еси светильник, сия́я гра́ду твое́му чудесы́,/ егoже от враг ви́димых и невидимых невреди́м сохраня́й/ и моли́ся Господеви/ помиловатися душам нашим.

Богому́дренно прешел еси телесную тесноту́/ с кро́тостию духа и смиренным терпением,/ ны́не же сия́еши многими чудесы́,/ преславная всем верным подая́ исцеления, предстоиши бо Престолу Влады́чню,/ блаженне княже Андре́е,/ и мо́лишися помиловатися душам нашим.

Страннолюби́в и уве́тлив,/ я́коже древле Авраам Вышняго дойде́ светлаго селения,/ в немже, блаженне княже Андре́е,/ предстоя́, сияеши, я́ко солнце./ Темже и нас просвети́,/ ны́не чтущих пресветлое твое́ торжество.

Сла́ва, глас 8:

Прииди́те, вси ве́рнии христиане,/ согла́сно ублажи́м и достойно почти́м/ блаженнаго Андре́я, Богомудраго князя Смоленскаго,/ еже бо измла́да подвиза́вся,/доброде́тели прилежа́, явился сосу́д Пресвята́го Духа,/ и ны́не то́чит нам непрестанно мно́гая исцеления:/ темже с верою вси приходяще к нему/ и похвальная вопиюще, сице глаголем:/ радуйся, земны́й Ангеле и Небесный человече;/ радуйся, свети́льниче пресветлый, осиява́яй град Переясла́вль чудесы́ твоими./ Темже мо́лим тя:/не преста́й моли́ти Христа Бога/ о совершающих и чтущих верою и любовию/ приснора́достную и всепра́зднественную память твою́.

И ны́не: Богоро́дичен: Царь Небесный за человеколюбие: Таже вход, прокимен дне. Чтения три, преподобническая (зри страницы 791– 792).

На литии стихиры, глас 2:

Те́сным и прискорбным ше́ствовал путе́м,/ достигл еси Райския широты́,/ ны́не же наслажда́ешися Небесныя пи́щи,/ и венце́м страдания венчаешися от руки Вседержителя./ Eгoже моли́, блаженне княже Андре́е,/ о еже сохрани́тися гра́ду твое́му от враг ненаве́тну/ и душам нашим дарова́ти велию милость.

Ле́гкостию крил прелете́в от многомяте́жнаго мира,/ в небу́рное и тихое пристанище достигл еси,/ заступая от напа́стей вся призыва́ющия тя верно:/ покрыва́й убо и нас, притекающих в храм твой,/ преблаженне княже Андрее,/ и спаси́ стадо твое́, ко Господу моли́твами твоими.

Я́ко солнце светоза́рное,/ добродетельнаго ради твоего жития́ всюду просиял еси:/ грады же Смоленск и Переясла́вль, ихже прославил еси,/ трубы́ велегласнее вопиют, проповедуя,/ имуще тя процве́тша чуде́с источника неисчерпа́емаго/ и изобильно всем подаю́ща различна дарова́ния чудес./ Темже молим тя, преблаженне и чудоно́сче княже Андре́е,/ испроси́ моли́твами твоими у Христа Бога,/ еже дарова́ти пособие на ва́рвары,/ и нам, иже твое́ успение че́стно празднующим,/ очищение и спасение душ наших.

Сла́ва, глас 8:

Добродетелей твоих, Богому́дре,/ исправле́ния уясни́ша верных сердца́,/ кто бо слы́шав безмерное твое́ смирение,/ терпению не удиви́тся,/ еже ко всем кротость и беззло́бие,/ к скорбящим ми́лование,/ к су́щим в беда́х ско́рое поможе́ние,/ к путешествующим благое поспеше́ние/ и к плавающим немяте́жное оти́шие./ Всех во всем предваряеши, досточу́дне Андре́е,/ и ны́не неувядаемым венце́м венчался еси/ от руки Вседержителя Бога,/ Eгoже моли помиловатися душам нашим.

И ны́не, Богоро́дичен:

Владычице, приими молитвы раб Твоих,/ и изба́ви нас/ от всякия ну́жды и печали, Тебе́ величающих.

На стиховне стихиры, глас 4

Подо́бен: Я́ко до́бля:

Я́ко дом душе́вный яви́лся еси во граде Переясла́вле,/ светя́щийся благодатию, и чудесными дея́нми просвещая всех,/ и сохраня́я невреди́м свой град от всех наве́т вра́жиих,/ спасая же ве́рных/ ко Господу моли́твами твоими.

Стих: Честна́ пред Го́сподем/ смерть преподобных Его.

Добродетельным твоим житие́м мир презре́л еси,/ чувственныя стра́сти и телесныя победи́л еси,/ воздержания брозда́ми вся плотска́я желания ду́ху повину́л еси/ и прия́л еси наследие вечнаго блаженства,/ Богомудре княже Андре́е пребогате,/ молитвенниче о душах наших.

Стих: Что воздам Го́сподеви о всех,/ яже воздаде́ ми.

Исцеле́ний дарова́ния источают, славне, твоя мо́щи/ честву́ющим тя усердно,/ потопля́юще стра́сти и врачу́юще неду́ги, Андре́е,/ и разоря́юще лукавых де́монов то́лпы,/ напая́ют же верных сердца́,/ иже прозябают добродетелей плоды́ Божественныя/ и благочестия разуме́ния:/ моли спастися нам.

Сла́ва, глас 6:

Прииди́те, Христолюби́вии лю́дие,/ добрый по́двиг и праводу́шие созерцаем в благоверии княжеском:/ нас бо ради обнищавшему Христу пострада́ плотию,/ крест терпения восприи́м, победу на всю силу де́монскую соде́ла,/ свобождая и нас от страстей,/ темже сла́вяще его, похва́льная сия́ принесе́м:/ радуйся, воздержания наста́вниче,/ терпения тве́рдый сто́лпе, простоты́ сокро́вище,/ молчания храни́телю и смирения учи́телю,/ усердно днесь в памяти твое́й просим: святе Андре́е, великий княже,/ молися вы́ну о утверждении благочестия,/ миру же мир дарова́ти/ и душам нашим велию милость.

И ны́не, Богоро́дичен: Творец и Избавитель мой: Таже: Ны́не отпущаеши раба твоего, Владыко: Трисвятое, и по Отче наш:

Тропа́рь, глас 8:

Блаже́нство Ева́нгельское возлюби́в,/ Богому́дре кня́же Андре́е,/ чистоту́ се́рдца де́вством почти́л еси́/ и, суету́ ми́ра сего́ презре́в,/ устреми́лся еси́ зре́ти Бо́га,/ Иже тя просла́ви чудесы́/ во врачева́нии разли́чне стра́ждущих./ Сего ради мо́лим тя:/ проси́ нам у Христа Господа/ вся́ких скорбе́й избавле́ния/ и получе́ние Ца́рства Небе́снаго.

Ин, глас 2:

Град твой Смоле́нск я́ко чужд име́я,/ водвори́лся еси́ во гра́де Переясла́вле,/ и в дому́ святи́теля Ни́кола́я/ жесто́ким житие́м вре́менную жизнь соверши́в,/ восте́кл еси в Го́рняя предстоя́ти Христу́,/ Eго́же моли́ о творя́щих па́мять твою́,/ да вси вопие́м ти:/ радуйся, свя́те кня́же Андре́е,/ А́нгелом собесе́дниче и челове́ком помо́щниче.

Ин, глас 4:

Возвы́сився на доброде́тель/ и, очи́стив ум свой, к жела́нию прекра́сному дости́гл еси́,/ безстра́стием украси́вся свои́м поще́нием изря́дно,/ в моли́твах безпло́тно вознесе́ся/ и возсия́ в ми́ре, я́ко со́лнце,во гра́де Переясла́вле,/ о́тче преблаже́нне, свя́те кня́же Андре́е Смоле́нский,/ моли́ спасти́ся душа́м на́шим.

НА У́ТРЕНИ.

На Бог Госпо́дь: поем тропари свята́го, оба по единожды. Сла́ва, и ны́не: Богоро́дичен: Вся па́че смысла:

По 1-м стихословии седален, глас 4:

Все плотско́е мудрова́ние умертви́л еси,/ блаженне княже Андре́е,/ и ху́дшее покори́л еси лу́чшему,/ и вся, яже в мире злострада́ния, претерпе́л еси усердно,/ возсия́в я́ко солнце лучами доброде́тельными,/ полки́ же бесо́вския му́жески победи́л еси./ Тем твою́ память присно восхваляем верно.

Сла́ва, и ны́не, Богоро́дичен:

Обнови́ла еси, Чистая, Божественным Рождество́м Твоим,/ истле́вшее страстьми́ земноро́дных ме́ртвенное существо́,/ и воздви́гла еси вся от смерти к жизни нетления:/ темже тя по до́лгу блажи́м вси, Дево Препросла́вленная,/ я́коже прорекла́ еси.

По 2-м стихословии, седален, глас 8:

Тве́рдаго адама́нта и столпа́, непоколеби́маго вра́жиими прило́ги,/ Богоноснаго и блаженнаго князя Андрея пе́сньми почти́м,/ терпе́нием бо вои́стину посрами́л есть сопроти́внаго врага́/ и без ве́сти его сотворил есть./ И ны́не мо́лим:/ да изба́вит верою чту́щих память его,/ моля́ся о спасении душ наших.

Сла́ва, и ны́не, Богоро́дичен:

Ужа́сно чу́до зача́тия/ и несказа́нен о́браз рождества/ в Тебе́ позна́ся, Чистая Приснодево,/ ужаса́ет мой ум и удивля́ет по́мысл,/ сла́ва Твоя, Богородице, всем распростре́ся/ во спасение душ наших.

По Хвалите Имя Господне: поем величание святому:

Ублажаем тя,/ благоверный великий княже Андре́е,/ и чтим святую память твою́;/ ты бо мо́лиши за нас/ Христа Бога нашего.

Псало́м избра́нный: Терпя́ потерпе́х Го́спода:

По полиелеи седален, глас 1:

Погре́бл еси страсте́й все востание умерщвле́нием пло́ти,/ преблаженне княже Андре́е,/ жизнь безконе́чную по смерти прия́л еси:/ темже днесь Христова Церковь ве́село пра́зднует твою́ досточудную память, верных украшение.

Сла́ва, и ны́не, Богоро́дичен:

Наста́ви ны на путь покая́ния,/ уклоня́ющияся всегда к злым безпу́тием,/ и Преблага́го прогневля́ющия Го́спода, Неискусобранная Благословенная Марие,/ прибе́жище отча́янных челове́ков, Божие селе́ние.

Степенна, 1 антифон, 4 гласа. Прокимен, глас 4: Возвеселится праведник о Господе/ и уповает на Него. Стих: Услыши, Боже, глас мой,/ внегда молитимися к Тебе́. Таже: Вся́кое дыхание да хвалит Господа. Стих: Хвалите Бога во святых Его,/ хвалите Его во утверждении силы Его. Евангелие от Матфея, зачало 43.

По 50-м псалме стихира, глас 6:

Челове́че Божий и кня́же чу́дный!/ Ты, возше́д на ле́стницу добродетелей,/ возше́л еси по ней к Го́рнему Иерусали́му/ и та́мо узре́л еси желаемаго Христа,/ Eгoже ра́ди плоть твою́ изнури́л еси/ и тело ме́ртвенное на безсме́ртную Жизнь изменил еси,/ о нас непрестанно моли́ся,/ дарова́ти душам нашим мир и велию милость.

Ина стихира, глас тойже:

Мона́хов мно́жества/ наставника тя почита́ем,/ отче наш княже Андре́е,/ тобою бо путь су́щий пра́вый ходи́ти уве́дехом,/ блаже́н еси, я́ко Христу рабо́тав/ и вра́жию обличи́л еси си́лу,/ А́нгелом собесе́дник быв/ и святым единокро́вниче и преподобным,/ с ними же моли́ся Го́сподеви/ помиловатися душам нашим.

Канон Богородице, со ирмо́сом на 6,

и свята́го два канона на 8, глас 8.

Емуже краегранесие сицево́: Моли́твами твоими подаждь ми Христа благоуве́тлива бы́ти, блаженне.

Песнь 1

Ирмо́с: Во́ду проше́д я́ко су́шу/ и египетскаго зла избежа́в,/ изра́ильтянин вопия́ше:/ Изба́вителю и Бо́гу нашему пои́м.

Припев Сладчайшему Иисусу: Милостиве Го́споди, услы́ши молитву раб Твоих, молящихся Тебе́.

Приими́ песнь усте́н моих, Человеколюбче Го́споди,/ и подаждь отверзе́ние усто́м моим и уму́ просвещение,/ да возмогу воспети угодника Твоего, князя Андре́я преди́внаго.

Припев святому: Святы́й благоверный кня́же Андрее, моли Бога о нас.

От Смоленска града возсия́в, я́ко солнце,/ дошел еси града Переясла́вля,/ грехми́ омраче́нную мою ду́шу плодоно́сну яви́ Владыце,/ Емуже моли́ся приле́жно о верно почитающих твое́ успение, святе княже Андре́е, и тя воспева́ющих.

Житейскую и временную славу возненави́дев и по узкому пути́ вожделе́в ходи́ти,/ устрани́лся еси во́лею мира сего и Вечное Царствие приял еси, блаженне княже Андре́е Смоленский./ Темже в Вышних, ра́дуяся, поеши Го́сподеви:/ сла́вно бо просла́вися.

Ни богатство, ни сла́ва, ни сла́дость жите́йская, ни теле́сная красота́,/ я́коже Павел напису́ет, разлучи́ша тебе́, святе княже Андрее, от любве́ Божия,/ в нейже ны́не моля́ся за ны Владыце, пое́ши:/сла́вно бо просла́вися.

Богоро́дичен:

Востока восто́ков поне́сши,/ омраче́нна мя су́ща грехо́вными страстьми́ просвети́, Владычице, и Церкви соедини́,/ подай же мир моли́твами Твоими и певцы Твоя сохрани.

Ин канон, глас 4.

Песнь 1

Ирмо́с: Моря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Высо́ко житие́ име́я и восхожде́нии Божественными весь све́тел быв,/ просвеще́ние ми испроси́, похваля́ющу честныя твоя по́двиги,/ имиже до́бре пожи́в, получи́л, ихже надеялся еси, блаженне княже Андре́е.

Мироуха́нная любя́ учения и во чтении святых Писаний упражня́яся,/ сласте́й уклони́лся еси, блаженне, смра́дных и безче́стных,/ и облагово́нился еси, Божественными дарова́ньми удобря́яся.

Дремание ве́ждома от души́, блаженне, отгна́л еси, бдя,/ и Бо́гу присоединя́яся всенощны́ми стоя́нии,/ непрекло́нен ну́ждами есте́ственными./ Темже ко Дню невечернему прешел еси.

Богоро́дичен:

Я́ко черто́г одушевле́нный Божий,/ кади́льницу разу́мнаго и светоно́снаго У́гля,/ Приснора́дованную блажи́м Богородицу, зову́ще:/ радуйся, сего мира воззвание.

Катавасия: Отверзу уста моя

Песнь 3

Ирмо́с: Небе́снаго круга Верхотворче Го́споди,/ и Це́ркве Зижди́телю,/ Ты мене́ утверди́ в любви́ Твое́й/ жела́ний кра́ю, верных утвержде́ние,/ Еди́не Человеколю́бче.

Небе́снаго жития́ Преве́чнаго Христа славу возлюби́в, блаженне,/ и быв соверше́н доброде́телию, святе Андре́е Смоленский,/ Христо́вою любо́вию разжига́ем, му́дре, мирская вся возненавидел еси./ Ны́не предстоя Христу, поеши:/ несть свят, па́че Тебе́, Го́споди.

Иностра́нен я́влься я́ко солнце во гра́де Переясла́вле,/ и в дому́ святителя и Чудотворца Николая мно́ги сле́зы и по́ты пролия́в,/ живы́й во пло́ти пел еси:/ несть свят, па́че Тебе́, Го́споди.

Утаи́вся сродства́ своего и княжества,/ странствовав, пришел еси во град Переясла́вль,/ Бо́гу тако изво́лившу, Иже у́мна тебе́ помощника и благодатию чудес обогати́ тя,/ я́ко Своего угодника, Емуже пое́ши:/ несть свят, па́че Тебе́, Го́споди.

Богоро́дичен:

Мари́е Владычице, Творца вся́ческих неизрече́нно и па́че естества́ Христа ро́ждшая,/ уя́звленную страстьми́ ду́шу мою исцели́,/ молю Тя, Едину Пречистую, я́ко да воспева́ю Тя.

Ин

Ирмо́с: Весели́тся о Тебе́ Церковь Твоя, Христе, зову́щи:/ Ты моя кре́пость, Го́споди,/ и прибе́жище, и утвержде́ние.

Глаго́лом живото́чным внимая, испи́л еси во́ду спасения,/ возгнуша́вся горькаго греха́, и поя́ глаго́лал еси Бо́гу, княже Андре́е,/ я́ко несть свят, па́че Тебе́, Го́споди.

Ми́лование стяжа́л еси Христоподо́бно, разда́л еси богатство тре́бующим,/ Небе́снаго бога́тства восхоте́в, еже и получи́л еси, вопия́, княже Андре́е:/ я́ко несть свят, па́че Тебе́, Го́споди.

Присво́ився Зижди́телю, любо́вию Божественною прия́л еси Небе́сное насле́дие,/ дре́ва Живо́тнаго получи́ти сподо́бился еси, блаженне,/ благотворением обожа́яся и поя:/ я́ко несть свят, па́че Тебе́, Го́споди.

Богоро́дичен:

Су́щи Ангел честне́йшая, Зижди́теля бо Ангелов во Твою́ боку́ носи́ла еси/ и родила́ еси, Богомати, на избавле́ние челове́ком, поющим Тя:/ я́ко несть Пречистыя, разве Тебе́, Владычице.

Седален, глас 8:

Удиви́ся в мире житие́ твое́,/ преблаженне свя́те княже Андрее,/ страсте́й бо поревновав Спа́са своего,/ распя́лся еси миру, презре́в всю земну́ю сладость и славу./ Тем и венец сугу́б прия́л еси от Подвигополо́жника Христа Бога,/ Eгoже моли́ о нас, творя́щих пречестну́ю па́мять твою́.

Сла́ва, и ны́не, Богоро́дичен:

Се Тебе́ ро́ди родо́в славосло́вят, я́коже прорекла́ еси, Отроковице,/ Создателя бо всех была Боже́ственный храм и палата,/ в нейже всели́ся Вышний и обложи́ся пло́тию, да спасет нас.

Песнь 4

Ирмо́с: Ты моя кре́пость, Го́споди,/ Ты моя и сида,/ Ты мой Бог, Ты мое ра́дование,/ не оста́вль не́дра Отча/ и нашу нищету посетив./ Тем с проро́ком Авваку́мом зову́ Ти:/ силе Твое́й сла́ва, Человеколюбче.

Ты на зе́млю снизше́д неизрече́нно, Милостиве,/ земныя на Небо возве́л еси образом нищелюбия и воздержания, имже препоя́сався угодник Твой, благоверный князь Андре́й Смоленский,/ после́дова по стопа́м Твоим, Христе Боже наш, и вопия:/ силе Твое́й сла́ва, Человеколюбче.

Тве́рдым умо́м стал еси на правоте́ Богозна́ния, Богомудре блаженне княже Андре́е,/ темже утвержда́й души на́ша в Господе наде́жду во всем полага́ти и вопи́ти:/ силе Твое́й сла́ва, Человеколюбче.

По́хоть пло́ти, по́хоть оче́й и гордость жите́йскую презре́в,/ утверди́лся еси в любви́ Иису́сове, блаженне княже Андрее,/ тако и нам в то́ежде помощник бу́ди.

Сему́ вси возлюбленнии поревну́ем князю Андре́ю Смоле́нскому,/ устраня́юще себе от всех земны́х по́хотей, гне́ва и я́рости, в я́рости бо душа погиба́ет,/ тем бо на Небо к Бо́гу взы́дем.

Приле́жную моли́тву сотвори́ за ны к Бо́гу, свя́те кня́же Андре́е,/ пречестно́е по́стное тече́ние соверши́ти жела́ем и стра́сти Христовы, и Воскресение ви́дети,/ твои́ми моли́твами да прии́мем просты́ню от всех грехо́в,/ свя́те Андре́е, кня́же Смоле́нский, Богоблаженне.

Богоро́дичен:

Мати Бо́гу, Ты Едина в жена́х Пренепорочная Дево,/ молюся Ти:/ ны́не возведи́ от ро́ва грехо́в моих, Пречистая,/ и умоли́ Твоего Сына,/ я́ко да помилует мя окаяннаго.

Ин

Ирмо́с: Вознесе́на Тя ви́девши Церковь на Кресте́,/ Солнце пра́ведное,/ ста в чи́не свое́м,/ досто́йно взыва́ющи:/ сла́ва силе Твое́й, Го́споди.

Пресели́вся, блаженне, от оте́чества твоего во град Переясла́вль,/ в не́мже пребыва́я, плоть твою́ злострада́нием изнури́л еси/ и вре́менную жизнь на безсме́ртную премени́л еси,/ идеже ны́не со Ангелы ликовству́еши.

Красне́йш процвел еси, блаженне, я́ко крин, доброде́тельми в дому́ Божии,/ напо́лнил еси свой град чудесы́/ и яви́лся еси хода́тай наш, святе, ко Господу моли́твами твоими.

Соде́ла тя Господь храм Пресвятому Духу,/ ду́шу бо Твою́ чи́сту соблюде́ и добро́тою украси́в в дому́ чу́днаго святителя Николая,/ с ни́мже, святе, о нас при́сно моли́ся.

Богоро́дичен:

Седя́й на Престоле превознесе́ние,/ я́ко Престол Тя имея, Пречистая Дево, Марие, Богоневесто Владычице;/ Херувимов бо честне́йшая и Серафи́м сла́внейшая яви́лася еси, Чистая,/ на руку́ бо Твое́ю почи́ препросла́вленный Бог наш.

Песнь 5

Ирмо́с: Вску́ю мя отри́нул еси/ от лица́ Твоего, Све́те незаходи́мый,/ и покры́ла мя есть чужда́я тьма окаяннаго,/ но обрати́ мя и к свету за́поведей Твоих/ пути́ моя напра́ви, молюся.

Невеще́ственным житие́м возсия́в па́че солнца,/ богатство тле́емое расточи́л еси убо́гим, по глаго́лу Псалмопевца, пра́вдою обогати́вся./ Темже во Царствии Христове с лики святых весели́шися.

Поще́нием изря́дно стра́сти плотски́я умертви́л еси, святе княже Андре́е,/ терпением бо твоим в ме́ру возраста совершеннаго разума житие достиже,/ в немже ны́не Христу предстоя, о нас всегда моли́ся.

Душе́ моя, почто́ не ревну́еши святых житию́, но во гресе́х все житие́ изнури́ла еси?/ воспряни́ и припади́ ко Творцу твое́му, в покая́нии вопиющи:/ Боже, мольбами угодника Твоего, свята́го князя Андрея, очисти ду́ши и телеса́ на́ша.

Богоро́дичен:

Во страсте́х все мое житие́ аз, окая́нный, изнури́в,/ умильно вопию́ Ти, Богомати:/ спаси́ мя, окаяннаго, спаси́,/ к Тебе́ бо прибего́х, Спасению рода человеческаго.

Ин

Ирмо́с: Ты, Го́споди мой, Свет/ в мир прише́л еси,/ Свет Святы́й, обраща́яй из мра́чна неве́дения/ ве́рою воспева́ющия Тя.

Уподо́бился еси распе́ншемуся волею на Древе Христу Бо́гу нашему, всече́стне,/ сраспе́нся Ему всяким воздержанием и многими доброде́янми.

Уподо́бился еси купцу́, и́щущему добраго би́сера,/ иже обре́т един многоценен, шед, не скрыл еси в песце́ жития́ сего,/ но умно́жив, тмою талант возрасти́л еси, от негoже подае́ши дина́рь благодати неоскудно.

Возшел еси, Богомудре, на Небо, я́коже Илия на колеснице, добродетелями твоими, Духом облегчаваем,/ ны́не верных сохрани́ от всякаго искушения.

Ны́не, преблаже́нне кня́же Андре́е, Престо́лу Влады́чнему и огнезра́чному предстои́ши,/ зряще на добро́ту неизрече́нную очище́нным умо́м,/ благода́рственно моля́ся своему Влады́це.

Богоро́дичен:

Исцели́, Чистая, неду́гующаго ума́ моего омраче́ние,/ праведнаго сего моли́твами,/ Ты бо, Пренепорочная Владычице, породила еси Христа на спасение верных.

Песнь 6

Ирмо́с: Очисти мя, Спа́се,/ мно́га бо беззако́ния моя,/ и из глубины́ зол возведи́, молю́ся:/ к Тебе́ бо возопи́х и услы́ши мя,/ Боже спасе́ния моего́.

Волею нас ради обнища́вшему Христу последовал еси,/ Eгoже ны́не нищетою обогати́вся, святе княже Андре́е,/ оставил еси житие́ вредное и, славу мира сего презре́в,/ в мир Небесный радуяся прешел еси.

Человече Божий, Андре́е чу́дне,/ твори́ши бо чудеса с верою к тебе́ приходя́щим, и тебе́ те́пле призывающим:/ исцеляеши бо стра́сти и врачуе́ши болезни, и мо́лишися о душа́х наших.

Даже до конца, княже Андре́е, подвиза́лся еси при храме святителя Николая,/ идеже святыя твоя мощи преподобный Дании́л Богоносный це́лы обре́т,/ престаре́лыма свои́ма рукама благоговейно осяза́,/ благоухание испуща́ющих и болезни целя́щих.

Богоро́дичен:

Недоумение предлежи́т ми от обыше́дших мя зол, Пречистая,/ темже изба́ви мя от них скоро, к Тебе́ бо Единей прибего́х, Богомати,/ Богоразумия светом одевающей.

Ин

Ирмо́с: Пожру́ Ти со гла́сом хвале́ния, Го́споди,/ Церковь вопие́т Ти,/ от бесо́вския кро́ве очи́щшеся,/ ра́ди ми́лости от ребр Твоих/ истекшею Кровию.

Непреткнове́нно ше́ствуя стезя́ми Божественнаго Разума, Богомудре, свыше наставля́ем,/ я́ко из купины́ тебе́ возгласи́ Господь в мысли твое́й,/ и а́бие получил еси страсте́й свобождение силою Духа.

Немо́кренно преплыл еси жития́ сего свире́пую пучи́ну, в нейже погрузи́л еси главу́ па́губнаго зми́я,/ твой же, блаженне, корабль направля́ем рукою Держащаго вся,/ Иже у́чит человеки не уклоня́тися к падению Ада́мля злаго нра́ва грехо́вна.

Источник приснотекущий явился еси, блаженне,/ чудесную благодать источающ и недуги от человек отгоняющ,/ державу вражию и силу низложи́л еси,/ и по́чести победы венец от руки Божия приял еси, пребогате.

спаси́ нас моли́твами твои́ми, свя́те кня́же Андре́е, ве́рою творя́щих память твою́,/ и от всех бед сохрани́ град свой невреди́м от вся́каго зла,/ и от нахожде́ния инове́рных, и междоусобныя бра́ни тебе́ воспева́ющих.

Богоро́дичен:

Господь Сил с Тобою, Пречистая,/ я́коже изво́лил есть, быв Отроковице,/ всех нас от о́бласти льстиваго хода́тайством Твоим изба́вил есть:/ темже Тя по долгу ро́дове родо́в присно ублажают.

Конда́к, глас 8:

Насажде́н во дво́рех Госпо́дних,/ своими преподо́бными де́тельми/ в дому́ свята́го Чудотворца Никола́я/ кра́сно процве́л еси,/ ми́ра красоту́ и славу сего света ни во что вмени́в,/ Единаго Христа возлюби́л еси;/ слез твоих тече́нием напая́ем,/ уязви́лся еси желанием бу́дущих даро́в./ Темже зовем ти:/ радуйся, свя́те кня́же Андре́е Смоле́нский,/ граду Переясла́влю похвало́/ и всей Росси́йстей земли́ великое утвержде́ние.

Икос:

Человек убо бысть естеством, но яви́ся сограждани́н и собеседник А́нгелом,/ на земли́ я́ко безпло́тен пожи́в, плотско́е все помышление отве́ргл еси,/ темже и мы, земни́и, зове́м ти, глаго́люще:/ радуйся, отца благочестиваго сы́не;/ радуйся, от ма́тере роди́выйся благоверныя;/ радуйся, я́ко от ю́ности последовал еси Христо́ви; радуйся, я́ко увя́дил еси вся плотски́я стра́сти;/ радуйся, я́ко пришествием твоим град Переяславль освяти́вый;/ радуйся, я́ко в нем житие́м твоим путь нам ко спасению показа́вый;/ радуйся, я́ко чудесы́ твоими вся люди удивляеши;/ радуйся, я́ко честна́я твоя благодать то́ки целе́б изливает;/ радуйся, православным лю́дем похвало и верных храни́телю;/ радуйся, те́плый наш предстателю и от всякия ско́рби изба́вителю;/ радуйся, святе Андре́е, великий княже Смоленский,/ гра́ду Переясла́влю и всей Российстей земли́ похвало́ и великое утверждение.

Песнь 7

Ирмо́с: От Иуде́и доше́дше о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Боже, благослове́н еси.

Себе потаи́в и ники́мже зна́ем,/ град Переясла́вль вельми́ возлюби́л еси, егoже пришествием твоим освяти́л еси,/ в немже пребывая и плоть твою́ изнуря́я, пел еси:/ отец наших Боже, благословен еси.

Тридесятоле́тное по́прище на земли́ жития́ твоего совершая/ и при храме Божественнаго Престола пребывая,/ плоды́ досто́йны Христу сотвори́л еси, Богомудре княже Андре́е,/ отню́дуже всели́вся в вечныя Кро́вы,/ земным мир подае́ши, идеже зри́ши Троицы Свет нераздельный.

Измла́да прилежа́в Вседержителю/ и воззрев неуклонно на высоту́ разума, постигл еси мудрости глубину́,/ и дарованием чуде́с обогати́лся еси, Богомудре княже Андре́е:/ темже избавля́й нас от бед ко Господу моли́твами твоими.

Юность и красоту́, и по́хоти плотски́я возненави́дев, и по у́зкому пути́ вожделе́в ходи́ти,/ страстьми́ обложи́вся и во́инство восприи́м Безплотных сил,/ с нимиже предстоя́ у Престола всех Царя Христа Бога, восприя́л еси славу вечную на Небеси́,/ темже за ны помоли́ся, святе преподобне княже Андре́е, поя:/ отец наших Боже, благословен еси.

Богоро́дичен:

Eгoже родила́ еси Господа, Владычице Чистая,/ не преста́й моля́щи Сына Твоего,/ изъяти мя присно от враг оскорбля́ющих, и тяжкое бремя грехов моих расточи́, Богоневесто,/ я́ко да, радуяся, вопию:/ Благословен, Пречистая, Плод чрева Твоего.

Ин

Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси в хра́ме Сла́вы Твоея́, Го́споди.

Прошел еси мужественно плотско́е мудрова́ние посто́м крепким и умо́м смиренномудрым,/ крестным ору́жием победил еси гордаго зми́я лукаваго, княже Андре́е пребогате,/ на негoже и нам бу́ди помощник.

Я́ко кра́сен яви́ся в дому́ святи́теля и Чудотво́рца Николая,/ потаи́в себе и народу переясла́вскому незна́ем быв,/ град же Переяславль Божиим Про́мыслом вельми́ возлюби́л еси,/ пребывая в дому́ свята́го Чудотворца Николая, святе Андрее, княже Смоленский преподобне,/ помоли́ся о нас, поя:/ отец наших Боже, благословен еси.

Я́коже просла́вил еси Господа де́лы благйми, непорочно соблю́д Божественная Его повеления,/ тако и Он просла́ви и упоко́и тя в не́дрех Авраа́млих,/ идеже нас, чтущих тя, поминай.

Радуйся, Российская земле, и вси Христолюбивии лю́дие весело ликовствуйте,/ свяще́ннии собо́ри собери́теся во святый храм, идеже ны́не прославляется наш заступник, благоверный князь Андре́й Смоленский,/ моля́ще его, я́ко да будет нам помощник в сем житии́ и в день Судный.

Богоро́дичен:

Преукра́шена Божественною славою Ты еси, Пречистая,/ Едина бо от века Слово Божие, заче́нши, родила́ еси/ и яви́лася еси Мати и Дева,/ благословенна в женах, Всенепорочная Марие Владычице.

Песнь 8

Ирмо́с: Седмери́цею пещь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Избавителю вопия́ше:/ о́троцы, благослови́те,/ свяще́нницы, воспойте,/ лю́дие, превозноси́те во вся ве́ки.

Кто изочте́т страда́ния твоя, алчбу́, наготу́ и жа́жду, имиже украша́лся еси,/ па́че бо солнечных светлостей просияв, святе княже Андре́е./ Ны́не на Небесе́х со Ангелы предстои́ши,/ о нас непрестанно Христу Бо́гу моля́ся и пе́ти повелева́я:/ о́троцы, благослови́те, священницы, воспойте, лю́дие, превозноси́те Христа во веки.

Вышних ища́, на земли пре́лести возненавидел еси, Богоблаженне,/ темже с преподобными в любви духовной соедини́вся, с ними восприял еси побе́ды вене́ц на Небесе́х,/ отню́дуже моля́щим тя сла́дце зове́ши:/ о́троцы, благословите, священницы, воспойте, лю́дие, превозноси́те Христа во веки.

Кий язык, блаженне княже Андре́е, твое́ житие́ и страдание может исчести́ и достойно восхвали́ти;/ ты бо яви́лся еси на земли́ я́ко безплотен,/ земну́ю жизнь и славу мира сего возненави́дев,/ Христа Единаго возлюбил еси, при́сно воспевая:/ отроцы,благослови́те, священницы, воспойте, людие, превозноси́те Христа во веки.

Яви́ тя Господь пресве́тлаго свети́льника в пресла́вном граде Переясла́вле,/ земна́го Ангела, Небе́снаго челове́ка, гра́ду на́шему Переясла́влю преди́внаго чудотво́рца,/ Боже́ственное сокро́вище, духо́вный о́браз,/ вельмо́жам наказа́тель и оби́димым засту́пник,/ граду нашему Переясла́влю крепкий страж,/ непрестаю́щее чудотворе́ние твое́ и великое милосе́рдие, преподобне, верным лю́дем,/ спаси́ души на́ша.

Богоро́дичен:

Владычице Дево Чистая,/ Препрославленная Мати Марие,/ моли́ся Сыну Твое́му прилежно/ изба́витися от вся́кия ну́жды и напа́сти,/ и всякаго злаго обстоя́ния/ тебе́, Госпоже, блажа́щим, поющим и превозносящим во вся веки.

Ин

Ирмо́с: Ру́це распросте́р Дании́л,/ львов зия́ния в ро́ве затче́,/ о́гненную же силу угаси́ша,/ доброде́телию препоя́савшеся,/ благоче́стия рачи́тели/ о́троцы, взыва́юще:/ благослови́те вся дела́ Госпо́дня Го́спода.

Всем сердцем Святей Троице приложи́вся, блаженне княже Андре́е,/ и от Нея лучи́ Боголепно прии́м, световиден был еси и со Ангелы лику́еши и пое́ши:/ благослови́те вся дела Господня Господа.

Невозвратно ше́ствовал еси к Небеси́, блаженне, Божественными стезя́ми,/ от зле же веду́щих до конца уклонился еси умерщвлением пло́ти, преподобне, к Бо́гу взывая:/ благословите вся дела Господня Господа.

Все́льшаяся благодать в ду́шу твою́, свя́те, сотвори́ тя бесо́м стра́шна,/ живу́щии бо в челове́цех нечистии ду́си моли́твами твоими прогони́мы бывают,/ вси же притекающии к тебе́ верно спасаются и поют:/ благослови́те вся дела Господня Господа.

Богоро́дичен:

Вода неисчерпа́емая Ты еси, Богородице Владычице,/ от Тебе́ бо пиющии вси благодати исполня́ются,/ душа́ми и телесы́ освящаются и вопиют:/ благослови́те вся дела Господня Господа.

Песнь 9

Ирмо́с: Ужасе́ся о сем Небо/ и земли́ удиви́шася концы́,/ я́ко Бог яви́ся челове́ком пло́тски,/ и чре́во Твое́ бысть простра́ннейшее Небе́с./ Тем Тя, Богородицу,/ Ангелов и челове́к чинонача́лия велича́ют.

Крило́ма духо́вныма ум твой впери́в к Сио́ну Вышнему, егoже и наследовал еси,/ бысть единокро́вник с ли́ки святых, всегда веселящихся и поющих в све́тлости неизрече́нней Го́сподеви:/ Eгoже моли о творящих память твою́, да достойно тебе́ величаем.

Всезри́тель Бог, ви́дев твое́ усердие, святе княже Андре́е, и совершенную веру к Нему,/ просла́ви тя славою вечною, облагоде́тельствовав тя чудесы́,/ Eгoже моли́ к пользе уще́дрити ны, Богомудре, да тебе́, достойно воспева́юще, величаем.

спаси́ моли́твами твоими, святе княже Андре́е, верою творя́щих память твою́/ и от всех бед сохрани́ град Переясла́вль, и всякий град, и страну́,/ и храм твой невреди́мы от нахожде́ния инове́рных и междоусобныя бра́ни, и от всякаго зла,/ тебе́ воспева́ющих и величающих.

Вышняго Иерусали́ма и быв граждани́н Небе́снаго Царствия,/ со Ангелы предстоя́ во Славе неизреченней,/ тоя́ же сла́вы я́ко щедрый отец моли́твами твоими, свя́те Андре́е, княже Смоленский, о́бщники нас сотвори́,/ Христу Бо́гу моля́ся, да достойно тя величаем.

Богоро́дичен:

Марие Пречистая Владычице, омраче́нную мою ду́шу и сердце просвети́,/ и жизни вечныя сподо́би мя, Госпоже,/ не поминающи безчисленных моих зол/ и моля́щи Сына Твоего и Бога нашего за мя, окаяннаго.

Ин

Ирмо́с: Ева у́бо неду́гом преслуша́ния/ кля́тву всели́ла есть:/ Ты же, Дево Богородице,/ Прозябе́нием чревоноше́ния ми́рови благослове́ние процвела еси́./ Тем Тя вси велича́ем.

Источаеши, славне, исцеления, и страсти отгоняеши от приходя́щих к тебе́ с верою,/ прогони́ми бо бывают ду́хи лю́тыя,/ ты воздвиза́еши верныя восхвали́ти светлыя твоя подвиги.

Я́ко великое солнце, возсиял еси величием по́двиг твоих и озарил еси вся Русския страны, свобожда́я всяких напа́стей, душевных и телесных,/ молящи со пророки и апостолы, с мученики и преподобными и Богоносным Дании́лом,/ и всеми святыми Христа Бога о всех нас.

Нам, чтущим тя и похваля́ющим по́двиги твоя,/ испроси́, блаженне, моли́твами твоими у Христа Бога ны́не/ и во исхо́де душ наших, и на Стра́шнем Суди́щи получи́ти милость,/ я́ко и мы со всеми вопием ти:/ радуйся, великий княже Андре́е,/ Ангелов собеседниче и человеков помощниче.

Любо́вию впери́в к Вышним ум свой и дух, блаженне свя́те Андре́е, княже Смоленский,/ житейское море преше́л еси без поро́ка и ны́не на ло́не Авраа́мли, пресвяте,/ почиваеши во славе со Ангелы, непреста́нно велича́я Христа Бога нашего.

Богоро́дичен:

Великий воин невеще́ственных сил Ангельских Тебе́, Всечестна́я Владычице, благовести́, рек:/ радуйся, Благодатная, Господь с Тобою./ Темже и мы Тебе́ вопие́м, Всесвятая:/ радуйся, Сына Божия воплощение, всего мира свобождение.

Светилен:

Треблаженне княже Андре́е,/ предстоя́ со Ангелы Христову ны́не Престолу и Света оттуду исполня́яся,/ миру мир исхода́тайствуй и нам спасение,/ благочестно и благоприятно память твою́ совершающим, и в ско́рбех к тебе́ притекающим.

Ин светилен:

Процве́л еси, я́ко финикс, дави́дски, свя́те княже Андре́е,/ и обитель явился еси Духу Пресвято́му,/ Иже сла́вна тя вселе́нней показа́ и Росси́йстей земли́ пресве́тла свети́льника,/ о нас непреста́нно моли́, почита́ющих пречестную память твою́, княже Андре́е.

Сла́ва:

Оста́вя свое оте́чество, град Смоле́нск,/ и удали́вся своих и мирска́го сожи́тельства, блаженне княже Андре́е,/ Христу, Иже над всеми Бо́гу нашему, непоро́чным житием благоугоди́л еси,/ Eгoже ны́не моли́ о нас, рабе́х твоих, ве́рою пра́зднующих всечестную память твою́.

И ны́не, Богоро́дичен:

Тя немолчными песньми блажи́м, Богородице Дево,/ я́ко родила́ еси Единаго от Троицы,/ и на руку́ Твое́ю носи́ла еси Христа Жизнодавца/ на спасение всего мира и обновление.

На хвалитех, стихиры свята́го на 4, глас 1:

Позна́хом тя суща человека Божия бы́ти,/ блаженне княже Андре́е:/ стра́нствовав бо на земли́,/ нищету вольную и кротость смиренному́друю стяжа́л еси,/ терпением бо твоим в доброде́телех совершенство восприял еси/ и чудесы́ твоими вся верныя удиви́л еси,/ молитвенниче о душах наших.

Любовию Христовою ороша́ем,/ блаженне княже Андре́е,/ мирски́я ле́сти вся возненавидел еси,/ княжескую же честь и славу нищетою почти́л еси/ и Ангелов житие́ наследовал еси,/ с нимиже моли́ся Го́сподеви дарова́ти душа́м нашим мир и велию милость.

Послужи́л еси, Богомудре,/ усердно во хра́ме Госпо́дни,/ в дому́ чу́днаго святителя Николая,/ отону́дуже и в Го́рняя вшел еси,/ последи́ же все́ми познался еси,/ рукописа́ние бо твое́ лю́дем показа́л еси,/ и чуде́с то́ки испусти́л еси,/ святе княже Андре́е,/ молитвенниче о душах наших.

Святе княже Андре́е,/ нището́ю черто́г измени́,/ от гра́да своего Смоле́нска в чу́ждый посели́ся,/ и в дому́ святителя Христова Николая всели́вся,/ идеже пожи́в благоче́стно страннолю́бием,/ Боже́ственное Ангельское подо́бие насле́довал еси,/ с ни́миже моли́ся дарова́ти душа́м нашим мир и ве́лию милость.

Пребыва́я незна́ем, му́дре свя́те княже Андре́е,/ в дому́ святителя Христова Николая,/ надо́лзе премени́ в ни́щенстем о́бразе/ и ко Господу преста́вися,/ явился еси чуде́с пода́тель,/ ихже от Бога восприи́м/ в по́льзу многим, приступающим к тебе́,/ исцеля́я лю́дем неду́ги и прогоня́я неприя́зненныя ду́хи,/ рукописа́ние показа́в лю́дем Переясла́вского жи́телем гра́да/ на уве́дение сла́внаго и́мене твоего,/ ихже сохраняй моли́твами твоими/ от всяких бед и напа́стей,/ преблаженне княже Андре́е Смоленский и наш ди́вный засту́пниче.

Сла́ва, глас 6:

Егда́ благоизво́лил Бог сугу́бо тя просла́вити/ и лю́дем в по́льзу показа́ти мо́щи твоя,/ тогда бысть преподобному Дании́лу открове́ние о тебе́,/ он же возвести́ самодержа́вному государю́ царю́ Иоа́нну/ и первопресто́льному святи́телю Иоаса́фу о сем:/ они же повеле́ша честно́е те́ло твое́ из земны́х недр изъя́ти,/ и поста́вити я́ко свети́льника на све́щнице,/ да све́тит всему миру и гра́ду твоему́ чудесы́./ Преподобный же отец наш Дани́ил/ со освяще́нным собо́ром и всенаро́дным мно́жеством/ обрето́ша е и я́вственно ви́деша,/ я́ко нетленно су́щее и благоухание испуща́ющее,/ тогда мно́гая чудеса́ от моще́й твоих соде́ял еси,/ всякия болезни от человек отгна́л еси,/ и о тебе́ неве́рствующих наказа́л еси./ Мы же ви́дяще сицевая,/ я́ко изво́лил еси те́лом с нами пребыва́ти,/ си́це спребыва́й с нами и ду́хом неотступно,/ тя мо́лим, угодниче Христов, блаженне княже Андре́е,/ от Негoже миру мир испроси́,/ и нам, твое́ успе́ние пра́зднующим,/ и всем, к тебе́ прибегающим,/ спасение душа́м и велию милость.

Ина сла́ва, глас тойже:

Прииди́те днесь, Росси́йстии Христолюбивии лю́дие,/ мудрии, богатии и нищии,/ и вси правове́рнии гра́ждане,/ и́ноцы и про́тчии, юноши и старцы,/ память праведнаго князя Андре́я че́стно да восхва́лим/ псалмы́ и пе́нии, и пе́сньми духо́вными,/ и радостно торжеству́ем дивнаго нашего заступника,/ к Бо́гу хода́тая чу́днаго нашего,/ чудотворца князя Андре́я,/ и ублажи́м, си́це вопию́ще:/ радуйся, ра́бе Христа Бога,/ служителю Святыя Троицы, жи́телю Горняго гра́да Иерусали́ма,/ стра́нствовавый на земли́ Богоугодне,/ оста́вив отечество земно́е, получи́в Небесное,/ возненави́дел еси богатство тле́нное,/ возже́лев иска́ти Небесное, егoже и получив,/ наслажда́ешися ны́не неизрече́нныя сладости и присносу́щна веселия./ Тем и Христос тя просла́ви и пресла́вна светильника на земли́ показа́,/ в Росси́йстей земли́ учини́ тя, я́ко второе солнце,/ чуде́с лучи́ испуща́юща и вся болезни на́ша исцелева́юща,/ мрак уныния разгоня́юща светом преславных чудес твоих,/ и всех верных сердца́ просвети́, и от лю́тых неду́г свободи́/ верою совершающих Божественную твою́ память,/ Богоносе княже Андре́е Смоле́нский и Переясла́вский,/ досточу́дный чудотворче,/ хода́таю к Бо́гу при́сный о спасении душ наших.

И ны́не, Богоро́дичен: Богородице, Ты еси Лоза истинная: Таже Славословие великое, ектении и отпу́ст.

На Литургии: блаженны от перваго канона свята́го, песнь 3-я на 4, и втораго, песнь 6-я на 4. Прокимен, глас 7: Честна́ пред Го́сподем смерть преподобных Его. Стих: Что возда́м Го́сподеви о всех, яже воздаде́ ми. Апостол, к Галатом, зачало 213. Аллилуия, трижды, глас 6: Блаже́н муж, боя́йся Го́спода, в за́поведех Его восхо́щет зело́. Стих: Си́льно на земли́ будет се́мя Его. Евангелие от Матфея, зачало 10. Причастен: В память вечную будет праведник:

Тропа́рь, глас 2:

Чист и прав сый сердцем,/ и свят, преподобне Не́сторе, душею,/ прост же паки и не уме́я сам чести́ книг,/ сего ради чтущим я́ приле́жне внимал еси/ и, о́ная в себе соблюдая, спе́шно тща́лся еси исправля́ти,/ яже я́ко разумен исполнив, обрел еси Царствие Небесное.

Конда́к, глас 5:

Дивный во святых Своих Господь/ удивися изрядне в сем святем Не́сторе,/ иже аще и безкни́жен сый и прост,/ но превзы́де премудрых и посрами́ книжников,/ чтущих и не творящих,/ насле́ди блага вечная/ и молит присно еже спастися нам.