[Глава 12] Слу́жба о́бща преподо́бному еди́ному

Ве́чер,

на Го́споди воззва́х, стихи́ры, гла́с 8.

Подо́бен: Му́ченицы Госпо́дни:

Преподо́бен и че́стен свети́льник Боже́ственный и светоно́сный, под спу́дом жите́йския толстоты́ никогда́же скрыва́ется: но на версе́ полага́ет его́ высо́ких чуде́с человеколю́бец. Того́ моли́твами, Христе́, да́руй лю́дем твои́м ве́лию ми́лость.

На ра́ло возложи́л еси́, всече́стне, де́лание ру́к твои́х, де́лая всегда́ Боже́ственная, и не возврати́лся еси́ зря́ вспя́ть: но бы́л еси́ упра́влен во Ца́рствие Христа́ вопло́щшагося Бо́га, во спасе́ние ду́ш на́ших.

В лодии́ теле́сней вози́мь, кро́ткими дыха́нии кро́ткаго ду́ха, легко́ преше́л еси́ жите́йскую пучи́ну, му́дре: и на би́сере многоце́ннем твоя́ име́ния прода́в, и обре́т его́ в себе́ удержа́л еси́, блаже́н бы́в Боже́ственными добро́тами его́.

Сла́ва, и ны́не, Богоро́дичен:

Помышле́ния нечи́ста и устна́ льсти́ва, дела́ же моя́ вся́ оскверне́на: и что́ сотворю́? ка́ко усря́щу судию́? Влады́чице Де́во, моли́ Сы́на Твоего́ и Зижди́теля и Го́спода, я́ко да в покая́нии прии́мет ду́х мо́й, я́ко Еди́н благоутро́бен.

Крестобогоро́дичен: Ю́ница нескве́рная, юнца́ ви́дящи на дре́ве пригвожда́ема во́лею, рыда́ющи жа́лостне, увы́ мне́, вопия́ше, люби́мейшее Ча́до: что́ Ти со́нм воздаде́ неблагода́рный евре́йский, хотя́ мя обезча́дствовати от Тебе́, вселюбе́зне?

А́ще и́мать самогла́сен. Сла́ва, гла́с 6:

Е́же по о́бразу соблю́д невреди́мо, у́м влады́ку на стра́сти па́губныя по́стнически поста́вив, во е́же по подо́бию я́ко мо́щно возше́л еси́: му́жески бо естество́ пону́див, потща́лся еси́ ху́ждшее покори́ти лу́чшему, и пло́ть порабо́тити ду́ху. Те́мже мона́шествующих яви́лся еси́ наста́вник, жи́тель пусты́нный, благотеку́щих обучи́тель, пра́вило доброде́тели изве́стнейшее: и ны́не на небесе́х зерца́лом разре́шшымся о́тче на́ш, и́мярек, чи́сте зри́ши святу́ю Тро́ицу, моля́ся несре́дственне о и́же ве́рою и любо́вию чту́щих тя́.

И ны́не Богоро́дичен:

Богоро́дице, Ты́ еси́ лоза́ и́стинная:

Крестобогоро́дичен: Ви́дящи Тя́ распина́ема Христе́, Тебе́ ро́ждшая, вопия́ше: что́ стра́нное е́же ви́жу та́инство Сы́не Мо́й? Ка́ко на дре́ве умира́еши пло́тию пове́шен жи́зни пода́телю,

А́ще пра́зднуеши с полиеле́ем, глаго́ли Богоро́дичен: воскре́сный: Кто́ тебе́ не ублажи́т:

Вхо́д. Проки́мен дне́.

Чте́ния преподо́бническая, [пи́саны в конце́ кни́ги сея́].

На стихо́вне стихи́ры, гла́с 1.

Подо́бен: Небе́сных чино́в:

Наста́ Богоно́се, ꙳ со́лнца светле́йший тво́й пра́здник, ꙳ озаря́ет приходя́щыя к тебе́ ве́рою, ꙳ и безсме́ртием облагоуха́ет, ꙳ и душа́м источа́ет исцеле́ния, ꙳ и́мярек, преподо́бне, моли́твенниче о душа́х на́ших.

Сти́х: Честна́ пред Го́сподем сме́рть преподо́бных Его́.

Чу́вственныя стра́сти теле́сныя, ꙳ победи́в воздержа́ния брозда́ми, ꙳ чудоде́йственниче, и́мярек, ꙳ и ре́вности безпло́тных на земли́ показа́в, ꙳ вся́ плотска́я жела́ния ду́ху повину́л еси́: ꙳ те́м ны́не в небе́сных селе́ниих водворя́яся, ꙳ моли́ о душа́х на́ших.

Сти́х: Блаже́н му́ж боя́йся Го́спода, в за́поведех Его́ восхо́щет зело́.

Блаже́нне, и́мярек, ꙳ основа́ние положи́в доброде́тели, ꙳ дре́вняго челове́ка совле́клся еси́ с похотьми́, ꙳ и во Христа́ обле́клся вои́стину: ꙳ те́м и обличи́л еси́, преподо́бне, мно́гая вра́жия ополче́ния, ꙳ наста́вник мона́хов бы́в, ꙳ моли́ спасти́ся душа́м на́шым.

Сла́ва, гла́с 8:

Мона́хов мно́жества, наста́вника тя́ почита́ем, о́тче на́ш, и́мярек: твое́ю бо стезе́ю вои́стинну пра́во ходи́ти позна́хом: блаже́н еси́ Христу́ рабо́тав, и вра́жию обличи́л еси́ си́лу, а́нгелов собесе́дниче, преподо́бных соприча́стниче и пра́ведных, с ни́миже моли́ся Го́сподеви, поми́ловатися душа́м на́шым.

И ны́не, Богоро́дичен: воскре́сный:

Безневе́стная Де́во: [пи́сан в конце́ кни́ги сея́].

А́ще ли не пра́зднуеши, глаго́ли се́й Богоро́дичен:

Чи́стая Де́во, сло́ва врата́, Бо́га на́шего Ма́ти, моли́ спасти́ся на́м.

Крестобогоро́дичен: Не терплю́ ча́до, ви́дящи Тя́ на дре́ве усну́вша, бо́дрость все́м подаю́щаго: я́ко да дре́вле преступле́ния плодо́м, сно́м поги́бельным усну́вшым, Боже́ственную и спаси́тельную бо́дрость пода́си, Де́ва глаго́лаше пла́чущи, Ю́же велича́ем.

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 8:

В тебе́ о́тче изве́стно спасе́ся е́же по о́бразу: прии́м бо кре́ст после́довал еси́ Христу́, и де́я учи́л еси́ презира́ти у́бо пло́ть, прехо́дит бо, прилежа́ти же о души́ ве́щи безсме́ртней. Те́мже и со а́нгелы сра́дуется преподо́бне и́мярек, ду́х тво́й.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-м стихосло́вии седа́лен, гла́с 4:

Подо́бен: Ско́ро предвари́:

Зва́нию Го́спода твоего́ после́довал еси́, ми́р отве́рг и вся́ я́же в ми́ре кра́сная, всеблаже́нне, и́мярек, претерпе́л еси́ пусты́нное озлобле́ние усе́рдно, полки́ же отрази́л еси́ де́монов му́жественне. Те́мже твою́ и па́мять при́сно пе́сньми восхваля́ем ве́рно. [Два́жды.]

Сла́ва, и ны́не, Богоро́дичен:

Обнови́ла еси́ чи́стая, Боже́ственным рождество́м Твои́м истле́вшее страстьми́ земноро́дных ме́ртвенное существо́: и воздви́гла еси́ вся́ от сме́рти к жи́зни нетле́ния. Те́мже Тя́ по до́лгу блажи́м вси́, Де́во препросла́вленная, я́коже прорекла́ еси́.

По 2-м стихосло́вии седа́лен, гла́с 5:

Подо́бен: Собезнача́льное:

По́стника Госпо́дня пе́сньми почти́м, я́ко умертви́вша вся́ прило́ги страсте́й, воздержа́нием и тве́рдым терпе́нием вои́стину, и посрами́вша зело́ противоборца́ врага́, и всю́ сего́ горды́ню, и ны́не моля́щася Го́сподеви, поми́ловатися душа́м на́шым. [Два́жды.]

Сла́ва, и ны́не, Богоро́дичен:

Ужа́сно чу́до зача́тия, и несказа́нен о́браз рождества́ в Тебе́ позна́ся, Присноде́во чи́стая, ужаса́ет мо́й у́м, и удивля́ет помышле́ние, сла́ва Твоя́ Богоро́дице во все́х простре́ся, ко спасе́нию ду́ш на́ших.

По Хвали́те и́мя Госпо́дне:

Припе́в:

Ублажа́ем тя́ преподо́бне о́тче, и́мярек, и чте́м святу́ю па́мять твою́, наста́вниче мона́хов, и собесе́дниче а́нгелов.

Псало́м избра́нный: Терпя́ потерпе́х Го́спода:

По полиеле́и седа́лен, гла́с 1.

Подо́бен: Гро́б Тво́й, Спа́се:

Погре́бл еси́ страсте́й все́ воста́ние умерщвле́нием пло́ти, свяще́нный о́тче, жи́знь безконе́чную по сме́рти прия́л еси́: те́мже дне́сь Христо́ва це́рковь пра́зднует твою́ досточу́дную па́мять, преподо́бных украше́ние. [Два́жды.]

Сла́ва, и ны́не, Богоро́дичен:

Наста́ви ны́ на пу́ть покая́ния, уклоня́ющыяся при́сно к злы́м безпу́тием, и преблага́го прогне́вающыя Го́спода, неискусобра́чная Благослове́нная Мари́е, прибе́жище отча́янных челове́ков, Бо́жие обита́лище.

Степе́нна, 1-й антифо́н 4-го гла́са.

Проки́мен: Честна́ пред Го́сподем сме́рть преподо́бных его́.

Сти́х: Что́ возда́м Го́сподеви о все́х, я́же воздаде́ ми?

Вся́кое дыха́ние:

Ева́нгелие преподо́бническое: [пи́сано в конце́ кни́ги сея́.]

По 50-м псалме́ стихи́ра, гла́с 6:

Преподо́бне о́тче, во всю́ зе́млю изы́де веща́ние исправле́ний твои́х: те́мже на небесе́х обре́л еси́ мзду́ трудо́в твои́х, де́монская разори́л еси́ по́лчища, и а́нгельския дости́гл еси́ чи́ны, и́хже житию́ непоро́чно поревнова́л еси́. Дерзнове́ние име́я ко Христу́ Бо́гу, ми́р испроси́ душа́м на́шым.

Кано́н, гла́с 8.

Пе́снь 1.

Ирмо́с: Во́ду проше́д я́ко су́шу, и еги́петскаго зла́ избежа́в, Изра́ильтянин вопия́ше: изба́вителю и Бо́гу на́шему пои́м.

Благи́ми нра́вы украси́вся, Христу́ прилепи́лся еси́ от ю́ности, плотски́я стра́сти умертви́в воздержа́нием, и к животу́ преподо́бне преста́вился еси́.

Глаго́лов и зако́нов Бо́жиих испо́лнитель бы́в, испо́лнился еси́, о́тче прему́дре, Боже́ственных даро́в и чуде́с, и все́м лучы́ бога́тно испусти́л еси́.

Кре́постию Христа́ возмо́г, держа́ву низложи́л еси́, и си́лу вра́жию, и похвалу́ побе́дную по́чести прия́л еси́ преподо́бне, чуде́сными сия́нии.

Со́весть име́л еси́ бла́гу, и о́ко серде́чное взира́ющее к Бо́гу: те́мже вня́т моли́тве твое́й прему́дре, с преподо́бными сочта́ тя́.

Богоро́дичен: Стра́сти пло́ти моея́, и ума́ моего́ двиза́ния неподо́бная утоли́, молю́ Тя пречи́стая Де́во, и испра́ви мя́ заблу́ждшаго умо́м.

Пе́снь 3.

Ирмо́с: Ты́ еси́ утвержде́ние притека́ющих к Тебе́, Го́споди, Ты́ еси́ све́т омраче́нных, и пое́т Тя́ ду́х мо́й.

Ве́сь прилежа́ Вседержи́телю, преподо́бне о́тче прему́дре, всея́ бесо́вския зло́бы избе́гл еси́.

Высото́ю смире́ния украша́емь, све́ргл еси́ на зе́млю велехва́льнаго, изря́дными де́лы твои́ми.

Пло́тию обложе́н о́тче прему́дре, смири́л еси́ превзя́тую вы́ю нечести́ваго, смире́нием слове́с твои́х.

Име́я поспешеству́ющую тебе́ Бо́жию си́лу прему́дре, я́ко чу́ден, чудеса́ источа́еши, и отго́ниши неду́ги.

Богоро́дичен: В ложесна́ Твоя́ воплоща́емь Всенепоро́чная, всели́ся Зижди́тель, на благодея́ние ве́рно пою́щым Тя́.

Седа́лен, гла́с 4.

Подо́бен: Ско́ро предвари́:

Страстно́е покори́л еси́ плотско́е мудрова́ние, и го́ршая порабо́тив лу́чшему, о́тче и́мярек, пресла́вне сокруши́л еси́ бесо́вския ко́зни посто́м, и возсия́л еси́ в ми́ре я́ко луча́ со́лнечная, сия́нии твои́х доброде́телей: сего́ ра́ди тя́ воспева́ем.

Сла́ва, и ны́не, Богоро́дичен:

Стена́ непобеди́мая на́м Христиа́ном еси́ Богоро́дице Де́во, к Тебе́ бо прибега́юще невреди́ми пребыва́ем: и па́ки согреша́юще и́мамы Тя́ моли́твенницу. Те́м благодаря́ще вопие́м Ти́: ра́дуйся благода́тная, Госпо́дь с Тобо́ю.

Крестобогоро́дичен: Де́во пренепоро́чная Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею, Сы́на и Бо́га Твоего́: Его́же, Преблагослове́нная, моля́щи не преста́й, проще́ние прегреше́ний на́м дарова́ти.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Соде́яв пресла́вне ду́шу твою́ хра́м Свято́му Ду́ху, бы́л еси́ насле́дник го́рняго Ца́рствия, с вы́шними си́лами.

Многоболе́зненныя стра́сти всегда́ врачу́еши приступа́ющих к тебе́: благода́ть бо преподо́бне прии́м от Го́спода, содева́ти зна́мения и чудеса́.

Красне́йшим прозябе́нием о́тче, в дому́ Бо́жии прозя́бл еси́. Доброде́тельми укра́шен, и плоды́ чуде́сными облагоуха́емь.

Богоро́дичен: Ни́ва духо́вная, я́коже из бразды́ кла́с изнесла́ еси́, всю́ тва́рь пита́ющаго, вся́ческих Бо́га, Присноде́во.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве Тебе́ ино́го не ве́мы.

Умо́м очище́нным, пресла́вне, зри́ши добро́ту неизрече́нную Христа́, вся́ческих Бо́га на́шего.

Я́коже Илиа́ на колесни́це о́тче, доброде́тельми твои́ми возше́л еси́ на не́бо, Ду́хом облегчева́емь.

Стягну́в те́ло твое́ воздержа́нием и чистото́ю, в вы́шняя селе́ния, к широте́ о́тче дости́гл еси́.

Богоро́дичен: Исцели́ неду́гующаго ума́ моего́ омраче́ние, врача́ ро́ждшая Христа́ всенепоро́чная Влады́чице.

Пе́снь 6.

Ирмо́с: Моли́тву пролию́ ко Го́споду, и Тому́ возвещу́ печа́ли моя́, я́ко зо́л душа́ моя́ испо́лнися, и живо́т мо́й а́ду прибли́жися, и молю́ся я́ко Ио́на: от тли́ Бо́же возведи́ мя.

Лука́вый умертви́ся зми́й свяще́нными твои́ми моли́твами Богоблаже́нне, и от того́ разреша́ются зло́бы, и́же зна́мения от Тебе́ испроси́вшии. Еси́ бо уго́дник Бо́жий всесве́тел, позна́н бы́л еси́ ве́рен.

Обнови́в приле́жным ра́лом ду́шу твою́, свяще́нный о́тче, доброде́тельная в ню́ вве́ргл еси́ прему́дренно многопло́дная се́мена: и пожа́л еси́ многоразли́чных исцеле́ний бога́тыя кла́сы.

Кре́постию ду́ха о́тче возмо́г, держа́ву вра́жию и си́лу низложи́л еси́: и похвалу́ побе́дную по́чести прия́л еси́ преподо́бне, чуде́сными сия́нии.

Богоро́дичен: Госпо́дь с Тобо́ю Пречи́стая, я́коже изво́лил е́сть, бы́в Отрокови́це, все́х на́с от о́бласти льсти́ваго хода́тайством Твои́м изба́вил е́сть: те́мже Тя́ ны́не по до́лгу ро́дове родо́в ублажа́ем.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2:

Подо́бен: Вы́шних ищя́:

Чистото́ю душе́вною Боже́ственно вооружи́вся, и непреста́нныя моли́твы, я́ко копие́ вручи́в кре́пко, пробо́л еси́ бесо́вская ополче́ния, и́мярек, о́тче на́ш, моли́ непреста́нно о все́х на́с.

И́кос: Возлюби́в преподо́бне Христо́вы Боже́ственныя за́поведи, и возненави́дев ми́ра сего́ наслажде́ние, прише́л еси́ усе́рдно к тому́, и бы́л еси́ свети́льник просвеща́я концы́ блиста́нием духо́вным: те́м припа́дая молю́ тя: просвети́ мои́ о́чи душе́внии, воспе́ти твоя́ по́двиги, поще́ние, и бде́ние, и сле́зы, боле́зни и изможде́ние те́ла, блаже́нныя ра́ди бу́дущия жи́зни, ея́же ны́не наслажда́ешися. Моли́ непреста́нно о все́х на́с.

Пе́снь 7.

Ирмо́с: От Иуде́и доше́дше о́троцы, в Вавило́не иногда́, ве́рою Тро́ическою пла́мень пе́щный попра́ша, пою́ще: отце́в Бо́же благослове́н еси́.

Проше́д по́двиги по́стныя о́тче, умо́м кре́пким у́м прего́рдый Боже́ственным смире́нием смири́л еси́, поя́: благослове́н Бо́г оте́ц на́ших.

Красне́йшее прозябе́ние о́тче, в дому́ Бо́жии прозя́бл еси́, доброде́тельми укра́шен, и плоды́ чуде́сными облагоуха́л еси́.

Просвети́в твое́ се́рдце, нача́льник бы́л еси́ свяще́ннаго собо́ра о́тча, наказу́я и учя́, и вся́ приводя́ к Бо́жией во́ли, поя́: оте́ц на́ших Бо́же, благослове́н еси́.

Богоро́дичен: Но́во отроча́ ро́ждши Пребезнача́льнаго Сло́ва, обетша́вшыя ны́ грехо́м, обнови́ла еси́ Де́во, и пе́ти укрепи́ла еси́: оте́ц на́ших Бо́же, благослове́н еси́.

Пе́снь 8.

Ирмо́с: Богоглаго́ливии о́троцы в пещи́, со огне́м пла́мень попира́юще поя́ху: благослови́те дела́ Госпо́дня Го́спода.

Насле́дниче Боже́ственных селе́ний, а́нгельски о́тче, пожи́л еси́: те́м со а́нгелы лику́ет ду́х тво́й.

Невозвра́тно ше́ствовав о́тче прему́дре и досточу́дне, веду́щими к небеси́ Боже́ственными стезя́ми, от зле́ веду́щих до конца́ уклони́лся еси́.

Все́льшеюся благода́тию в ду́шу твою́ о́тче, лука́вно живу́щии в челове́цех нечи́стии ду́си отгони́ми быва́ют.

Богоро́дичен: Вода́ еси́ неизчерпа́емая Де́во, от нея́же вси́ пию́ще благода́ти исполня́емся, душе́ю и те́лом освяща́еми.

Пе́снь 9.

Ирмо́с: Устраши́ся вся́к слу́х неизрече́нна Бо́жия снизхожде́ния, я́ко вы́шний во́лею сни́де да́же и до пло́ти, от деви́ческаго чре́ва бы́в челове́к: те́мже Пречи́стую Богоро́дицу ве́рнии велича́ем.

Исцеле́ние источа́ет бога́тно честна́я твоя́ ра́ка Бо́жиим ду́хом, и стра́сти многовре́менныя исцеля́ет о́тче, приходя́щих к тебе́, и прого́нит лука́выя ду́хи лю́тыя, и воздвиза́ет ве́рныя, восхвали́ти твоя́ све́тлыя по́двиги.

Я́ко вели́кое со́лнце на́м, вели́чием по́двиг твои́х возсия́л еси́ и озари́л еси́ Богому́дре, вся́ земны́я концы́, у́мер преше́л еси́ от све́та к све́ту возсия́вшему. Те́м вопие́м ти́: просвети́ на́ша помышле́ния о́тче преподо́бне, и́мярек.

Те́ло твое́ блаже́нне, терпели́вое связа́вшееся вери́гами стра́сти неисце́льныя прикоснове́нием исцеля́ет, Бо́гу и Спа́су тя́ вельми́ просла́вльшу, о́тче прему́дре и досточу́дне, и́мярек, я́ко де́лы твои́ми до́брыми просла́вльшуся, преподо́бне.

Процве́л еси́ в по́стнических удо́лиях прехва́льне о́тче на́ш, я́ко ши́пок благоуха́нен, и я́коже кри́н объюха́л еси́ со́вести ве́рных доброде́тельми и чудесы́. Те́мже преподо́бне, отжени́ от на́с стра́сти смердя́щыя.

Богоро́дичен: Просвети́ чи́стая Де́во, се́тующее се́рдце мое́ при́сно преступле́ньми, и жите́йскими мно́гими молва́ми, не оста́ви мене́ враго́м бы́ти в ра́дость, я́ко да сла́влю Тя́, и любо́вию пою́ Препе́тая.

Свети́лен.

Подо́бен: Жены́ услы́шите:

Процве́л еси́ я́ко фи́никс Дави́дски о́тче, и оби́тель яви́лся еси́ Ду́ха Пресвята́го, и сла́вна тя́ вселе́нней показа́. О на́с непреста́нно моли́, почита́ющих ве́рою пречестну́ю па́мять твою́, преподо́бне, и́мярек.

Богоро́дичен: Тя́ пе́сньми немо́лчными ублажа́ем Де́во, я́ко от Тро́ицы еди́наго родила́ еси́ Богоро́дице, и но́сиши на Боже́ственную руку́ пребога́тое Сло́во, непреме́нно и неизме́нно.

На хвали́тех стихи́ры, самогла́сны, гла́с 6.

Богоно́се преблаже́нне, и́мярек, все́ плотско́е мудрова́ние ду́ху повину́л еси́, поще́ния страда́ньми утверди́вся, я́ко зла́то в горни́ле искуше́но сия́я яви́вся, прия́телище бы́л еси́ Ду́ха Пресвята́го. Собра́в мона́шествующих мно́жества, и уче́нии твои́ми, я́ко не́коею ле́ствицею восхо́дною на не́бо, на высоту́ доброде́телей возве́л еси́. Помина́й на́с чту́щих па́мять твою́ при́сно свяще́нную, и моли́ спасти́ся душа́м на́шым. [Два́жды.]

Возсия́ дне́сь пресве́тлая и всепра́зднственная па́мять твоя́, пресла́вне, и́мярек, созыва́ющи многочи́сленное по́стник сосло́вие, и преподо́бных ликостоя́ния: а́нгелы же с челове́ки я́ко вои́стинну к похвале́нию в Тро́ице покланя́ема Христа́ Бо́га на́шего. Те́мже притека́юще ко свяще́нней ра́це моще́й твои́х, исцеле́ния да́ры оби́льно прие́млем, и тебе́ венча́вшаго Христа́ прославля́ем, Спа́са ду́ш на́ших.

Богоно́се преблаже́нне, о́тче, и́мярек, ты́ проро́чески слеза́ми зе́млю омака́л еси́, и не да́л еси́ сна́ твои́ма очи́ма, ни ве́ждома твои́ма дрема́ния: серде́чное жела́ние ко Христу́ явля́я, его́же возлюби́л еси́. Те́м мона́хов о́браз бы́л еси́, и вся́кия доброде́тели ви́д испра́вил еси́: те́мже тя́ ублажа́ем велича́юще тебе́ просла́вльшаго.

Сла́ва, гла́с 2:

Преподо́бне о́тче, из младе́нства доброде́тели приле́жно обучи́вся, орга́н бы́л еси́ Свята́го Ду́ха, и от него́ прии́м чуде́с де́йство, увеща́л еси́ челове́ки преоби́дети сла́дкая: ны́не же Боже́ственным све́том чисте́йше осиява́емь, просвети́ и на́ша мы́сли, и́мярек, о́тче на́ш.

И ны́не Богоро́дичен:

Все́ упова́ние мое́ на Тя́ возлага́ю, Ма́ти Бо́жия, сохрани́ мя́ под кро́вом Твои́м.

Крестобогоро́дичен.

Подо́бен: Егда́ от дре́ва:

Поноше́ния претерпе́ла еси́ мно́гая, на Кресте́ возноси́ма вся́ческих Творца́ ви́дящи Пречи́стая, стеня́щи глаго́лала еси́: Пресвяты́й Го́споди, Сы́не Мо́й, и Бо́же Мо́й, ка́ко почти́ти хотя́ Твое́ созда́ние Влады́ко, терпи́ши пло́тию безче́стия, сла́ва мно́гому Твоему́ милосе́рдию и соше́ствию Человеколю́бче.

А́ще и́мать на стихо́вне Сла́ву, глаго́ли вече́рний:

И ны́не, Богоро́дичен: или́ Крестобогоро́дичен.