[Глава 11] Слу́жба о́бща святи́телем двема́ и мно́гим

Ве́чер,

на Го́споди воззва́х, стихи́ры, гла́с 4.

Подо́бен: Я́ко до́бля:

Я́ко зве́зды многосве́тлыя, ꙳ утвержде́ни прехва́льнии, ꙳ ми́р украси́сте всечестни́и, ꙳ и се́й луча́ми просвеща́ете, ꙳ догма́ты благове́рия, ꙳ и е́реси тьму́ отго́ните святи́телие: ꙳ моли́теся от тли́ и бе́д изба́витися, ꙳ ве́рою творя́щым ꙳ всечестну́ю па́мять ва́шу.

Сия́нии духо́вными ꙳ просвети́вше вселе́нную, ꙳ светода́тельная со́лнца яви́стеся, ꙳ я́ко лучи́ веле́ний ꙳ во вся́ концы́ простира́юще, ꙳ ве́рных сердца́ просвеща́ете преблаже́ннии, ꙳ отгоня́ще тьму́ ересе́й Богоно́сцы, ꙳ си́лою от Де́вы возсия́вшаго.

От Христо́вы це́ркве преблаже́ннии, ꙳ отгна́сте мы́сленныя во́лки, жезло́м веле́ний ва́ших: ꙳ и сию́ о́крест огради́сте ꙳ слове́сною тве́рдостию, ꙳ и предста́висте ю́ Христу́ це́лу и недви́жиму. ꙳ Его́же моли́те ꙳ от тли́ и бе́д изба́витися, ꙳ ве́рою творя́щым всечестну́ю па́мять ва́шу.

Сла́ва, и ны́не, Богоро́дичен:

Осужде́ния изба́ви, Пресвята́я Богоневе́сто, и лю́тых прегреше́ний, смире́нную мою́ ду́шу и сме́рти измени́ моли́твами Твои́ми, и да́руй оправда́ние улучи́ти в де́нь испыта́ния, е́же получи́ша святы́х собо́ри, покая́нием очище́на мя́ пре́жде конца́ покажи́, и сле́зными излия́нии.

Крестобогоро́дичен: Распина́ема ви́дящи, ꙳ и в ре́бра пробода́ема копие́м, ꙳ Пречи́стая, Христа́ Человеколю́бца, ꙳ пла́чущи вопия́ше: ꙳ что́ сие́ Сы́не Мо́й? ꙳ Что́ Тебе́ неблагода́рнии лю́дие возда́ша, ꙳ вме́сто я́же сотвори́л еси́ до́брая и́м? ꙳ И тщи́шися безча́дствовати Мя́ вселюбе́знейший, ꙳ дивлю́ся Благоутро́бне, Твоему́ во́льному распя́тию.

А́ще и́мут самогла́сен.

Сла́ва, гла́с 6:

Челове́цы Бо́жии и ве́рнии раби́, служи́телие Госпо́дни, му́жие жела́ния, сосу́ди избра́ннии, столпи́ и утвержде́ние це́ркве, Ца́рствия насле́дницы, не премолчи́те е́же о на́с вопи́ти ко Го́споду.

И ны́не, Богоро́дичен:

Бо́га из Тебе́ воплоти́вшагося разуме́хом, Богоро́дице Де́во: Того́ моли́ о спасе́нии ду́ш на́ших.

Крестобогоро́дичен: Ви́дящи Тя́ распина́ема Христе́, Тебе́ ро́ждшая вопия́ше: что́ стра́нное е́же ви́жу та́инство, Сы́не Мо́й? Ка́ко на дре́ве умира́еши, пло́тию пове́шен, Жи́зни пода́телю?

[зри́] А́ще пра́зднуеши с полиеле́ем, глаго́ли Богоро́дичен: воскре́сный:

Кто́ Тебе́ не ублажи́т:

Вхо́д. Проки́мен дне́.

Чте́ния святи́тельская, [пи́саны в конце́ кни́ги сея́.]

На стихо́вне стихи́ры, гла́с 1:

Подо́бен: Всехва́льнии му́ченицы:

Таи́нники духо́вныя вку́пе ꙳ и слове́сныя трубы́ Бо́жия, ꙳ Боже́ственная зерца́ла, ꙳ восхва́лим дне́сь досто́йно, ꙳ святи́тели Боже́ственныя и огнедохнове́нныя, ꙳ точа́щих златы́я струи́ уче́ния на́м. ꙳ Христу́ моли́теся, дарова́ти душа́м на́шым ми́р и ве́лию ми́лость.

Сти́х: Честна́ пред Го́сподем сме́рть преподо́бных Его́.

Степе́нь ве́ры ра́зумом, ꙳ Боже́ственныя и бо́дрыя, ꙳ ре́ки златостру́йныя, ꙳ всесве́тлыя свети́льники, ꙳ Тро́ическия побо́рники, ꙳ прия́телища благода́тная Свята́го Ду́ха, ꙳ столпы́ непоколеби́мыя, ꙳ и утвержде́ния це́ркве, ꙳ досто́йно пе́сньми восхва́лим.

Сти́х: Свяще́нницы Твои́ облеку́тся в пра́вду, и преподо́бнии Твои́ возра́дуются.

Духо́внии орга́ни гро́ма, ꙳ Боже́ственнаго манове́ния, ꙳ мо́лнии пропове́дания, ꙳ све́щницы всезлати́и, ꙳ све́тлии и светоно́снии о Бо́зе, ꙳ преблаже́ннии святи́телие, ꙳ о на́с чту́щих ва́с Христа́ моли́те, ꙳ дарова́ти душа́м на́шым ꙳ ми́р и ве́лию ми́лость.

Сла́ва, гла́с 6:

Та́йныя дне́сь Ду́ха трубы́ Богоно́сныя отцы́ восхва́лим, воспе́вшыя посреде́ це́ркве пе́снь сли́чную богосло́вия, Тро́ицу еди́ну непреме́нную, существо́ же и Божество́: потреби́тели ересе́й и правосла́вных побо́рники, моля́щыяся всегда́ Го́споду, поми́ловатися душа́м на́шым.

И ны́не, Богоро́дичен:

Богоро́дице, Ты́ еси́ лоза́ и́стинная, возрасти́вшая на́м пло́д живота́, Тебе́ мо́лимся, моли́ся Влады́чице со святи́тели, поми́ловати ду́шы на́ша.

Крестобогоро́дичен: Предстоя́щи Кресту́ иногда́, во вре́мя распя́тия Де́ва, и с де́вственником ученико́м, пла́чущи вопия́ше: увы́ мне́, ка́ко стра́ждеши, все́х Христе́ сы́й безстра́стие!

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 4:

Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с, но моли́твами и́х в ми́ре упра́ви живо́т на́ш.

Сла́ва, и ны́не, Богоро́дичен, или́ Крестобогоро́дичен.

На у́трени,

на Бо́г Госпо́дь, тропа́рь то́йже.

По 1-м стихосло́вии седа́лен, гла́с 5.

Подо́бен: Собезнача́льное Сло́во:

Я́ко ца́рское украше́ние це́ркве, святи́телей Госпо́дних вси́ восхва́лим, догма́тов сокро́вище неоскуде́емо: си́ми бо са́м наказа́ на́с Тро́ицу чествова́ти святу́ю, соедине́ну у́бо существо́м, разделе́ну же ипоста́сьми. [Два́жды.]

Сла́ва, и ны́не, Богоро́дичен:

Пресвята́я Де́во, поми́луй на́с прибега́ющих ве́рою к Тебе́ милосе́рдой, и прося́щих те́плаго Твоего́ заступле́ния: мо́жеши бо я́ко блага́ все́х спасти́, я́ко су́щи Ма́ти Бо́га вы́шняго, ма́терними Твои́ми моли́твами, при́сно объе́млющи, Богора́дованная.

По 2-м стихосло́вии седа́лен, гла́с 3.

Подо́бен: Боже́ственныя:

Столпи́ бы́сте це́ркве, и бога́тство некра́домое благоче́стия яви́лися есте́, Богослове́снии святи́телие, в безстра́стии осия́ли есте́ житие́ свое́, и Тро́ическия изъясни́сте догма́ты, отцы́ преподо́бнии, Христа́ Бо́га моли́те о спасе́нии ду́ш на́ших. [Два́жды.]

Сла́ва, и ны́не, Богоро́дичен:

Боже́ственнаго естества́ не отлу́чься, пло́ть бы́в во чре́ве Твое́м: но Бо́г вочелове́чься и пребы́сть, и́же по рождестве́ Ма́терь Тя́ Де́ву, я́ко пре́жде рождества́ сохрани́в всенепоро́чну, еди́н Госпо́дь: Того́ приле́жно моли́, дарова́ти на́м ве́лию ми́лость.

По Хвали́те и́мя Госпо́дне:

Припе́в: Велича́ем ва́с, святи́телие вели́цыи, и чте́м святу́ю па́мять ва́шу: вы́ бо мо́лите за на́с Христа́ Бо́га на́шего.

Псало́м избра́нный: услы́шите сия́ вси́ язы́цы:

По полиеле́и седа́лен, гла́с 4:

Прему́дрии учи́телие вселе́нныя, и́же Бо́га просла́вльшии де́лы и словесы́ на земли́, да возвели́чатся дне́сь, я́ко спасе́ния на́м су́ще хода́таи. [Два́жды.]

Сла́ва, и ны́не, Богоро́дичен:

Предста́тельнице необори́мая оскорбля́емых, и те́плое заступле́ние упова́ющих на Тя́, от бе́д мя́ изба́ви: Ты́ бо еси́ все́х помо́щница.

Степе́нна, 1-й антифо́н 4-го гла́са.

Проки́мен: Честна́ пред Го́сподем сме́рть преподо́бных Его́.

Сти́х: Что́ возда́м Го́сподеви о все́х, я́же воздаде́ ми?

Вся́кое дыха́ние:

Ева́нгелие святи́телем, [пи́сано в конце́ кни́ги сея́.]

По 50-м псалме́ стихи́ра, гла́с 6:

Преподо́бнии отцы́, во всю́ зе́млю изы́де веща́ние исправле́ний ва́ших, те́м на небесе́х обрето́сте мзду́ трудо́в ва́ших, де́монов разруши́сте полки́, а́нгелов достиго́сте чи́ны, и́хже житию́ непоро́чно поревнова́сте: дерзнове́ние иму́ще ко Го́споду, ми́р испроси́те душа́м на́шым.

Кано́н, гла́с 8.

Пе́снь 1.

Ирмо́с: Пои́м Го́сподеви, прове́дшему лю́ди своя́ сквозе́ Чермно́е мо́ре, я́ко еди́н сла́вно просла́вися.

Возсия́вше в ми́ре святи́телие прему́дрии, сия́юще Ца́рствующаго Царя́ все́х Боже́ственными веле́нии: те́м Христа́ воспое́м, я́ко просла́вися.

Я́ко просвети́вшихся в ми́ре благоче́стия све́том, и нече́стия тьму́ отгна́вших, почти́м ве́рнии, я́ко святи́тели вели́кия и всечестны́я.

Я́ко предстоя́ще со а́нгелы неприкоснове́нному Царю́, соверша́ющым па́мять ва́шу, помоли́теся дарова́ти на́м очище́ние грехо́в, священнопропове́дницы су́ще Богоно́снии.

Богоро́дичен: Я́ко заче́нши преве́чное и безнача́льное от Отца́ Сло́во, пло́тию ро́ждши па́че сло́ва Пречи́стая, моли́ся приле́жно изба́витися на́м от бе́д.

Пе́снь 3.

Ирмо́с: Утверже́й в нача́ле небеса́ ра́зумом, и зе́млю на вода́х основа́вый, на ка́мени мя́, Христе́, за́поведей Твои́х утверди́: я́ко не́сть свя́т, па́че Тебе́, еди́не Человеколю́бче.

Воздержа́нием и́стинным, и моли́твою неукло́нною, взыдо́сте в вы́шний гра́д доброде́телей, преподо́бнии и Богоно́снии, иде́же пи́щнаго пото́ка наслажда́етеся при́сно.

Я́ко иму́ще дерзнове́ние к Бо́гу, святи́телие преподо́бнии, моли́теся о на́с спасти́ся на́м, ве́рою пою́щым па́мять ва́шу.

Я́ко благочести́вых веле́ний, учи́телие, прему́дрых Боже́ственных слове́с, повести́телие и́стины, и побе́ду на е́реси прия́ли есте́ преподо́бнии.

Богоро́дичен: Я́ко не́бо и Престо́л Тя́ Бо́жий воспева́ем вси́, Богороди́тельнице чи́стая Де́во, я́ко из Тебе́ яви́ся Иису́с Христо́с и́стина, на спасе́ние на́ше.

Седа́лен, гла́с 3.

Сосу́ди честни́и воздержа́ния, и бога́тства некра́домая благоче́стия яви́стеся вои́стинну блаже́ннии, безстра́стием житие́ просвети́вше, и тре́бующым обогаща́юще ми́лость отцы́ преподо́бнии: Христа́ Бо́га моли́те, дарова́ти на́м ве́лию ми́лость.

Сла́ва, и ны́не, Богоро́дичен:

Ки́йждо иде́же спаса́ется, та́мо пра́ведно и притека́ет: и ко́е ино́е таково́е прибе́жище, я́ко ты́, Богоро́дице, покрыва́ющее ду́шы на́ша.

Крестобогоро́дичен: Же́зл си́лы стяжа́вшии, Кре́ст Сы́на Твоего́, Богоро́дице, те́м низлага́ем враго́в шата́ния, любо́вию Тя́ непреста́нно велича́юще.

Пе́снь 4.

Ирмо́с: Услы́шах, Го́споди, смотре́ния Твоего́ та́инство, разуме́х дела́ Твоя́, и просла́вих Твое́ Божество́.

Святи́тели прему́дрыя вси́ в пе́снех восхва́лим, глаго́люще: Богоно́снии отцы́ приле́жно моли́те, спасти́ся на́м.

Я́ко благочести́вых веле́ний сказа́тели и насади́тели, и прему́дрыя учи́тели и святи́тели, иму́ще Богоблаже́ннии вои́стинну, пе́сньми и пе́ньми восхваля́ем ва́с.

Свяще́нную па́мять ва́шу ве́рнии, наста́вники и пита́телие преподо́бнии, святи́телие Госпо́дни, пе́сньми и пе́нии пра́зднуем.

Богоро́дичен: Безневе́стная неве́сто, и неискусобра́чная чи́стая Ма́ти Христа́ Бо́га, Того́ непреста́нно моли́, спасти́ ду́шы пою́щих Тя́.

Пе́снь 5.

Ирмо́с: У́тренююще вопие́м Ти́, Го́споди, спаси́ ны: Ты́ бо еси́ Бо́г на́ш, ра́зве Тебе́ ино́го не ве́мы.

Па́стырски пома́завшеся благоче́стия ми́ром, Богому́дрии, те́м я́ко святи́телей вси́ почти́м ва́с Богоно́сцы.

Я́ко подо́бницы бы́вше апо́столом, Богому́дрии сла́внии, боле́зньми и бде́нии, церко́вных люде́й предста́тели.

Ревни́телю Илии́, и Моисе́ю Богови́дцу возревнова́вше отцы́ Богови́дцы, ересе́й нача́льники посрами́сте.

Богоро́дичен: Я́ко Цари́цу, все́х Царя́ ро́ждшую, прииди́те ве́рнии вси́, согла́сно со а́нгелом благослове́нную почти́м.

Пе́снь 6.

Ирмо́с: Ри́зу мне́ пода́ждь све́тлу, одея́йся све́том я́ко ри́зою, многоми́лостиве Христе́ Бо́же на́ш.

Церко́вную сла́ву укра́сили есте́ отцы́ блаже́ннии, Боже́ственными ва́шими веле́нии, и е́реси из ко́рене изсуши́ли есте́.

Я́ко свети́ла благоче́стия, веле́ний добро́тою возсия́ли есте́, во всю́ тва́рь уче́ньми сла́внии, помрачи́вше е́реси сло́вом Бо́жиим.

Вме́сто ору́жия язы́к и сло́во взе́мше преподо́бнии, чужда́я отсе́кли есте́ уче́ния вся́, и изъясни́ли есте́ Тро́ицу все́м я́вственно.

Богоро́дичен: Роди́вся от Де́вы, ми́р просвети́л еси́, Христе́ Бо́же: и мене́ от прегреше́ний мои́х изба́ви, я́ко человеколю́бец, и упра́ви живо́т мо́й, молю́ Тя.

Конда́к, во уста́ве.

А́ще ли не́сть уста́ва, глаго́ли се́й конда́к, гла́с 8.

Подо́бен: Я́ко нача́тки:

Я́ко доброде́телей учи́телие, и иера́рхов украше́ние, це́рковь пою́щи ва́с сла́вит: моли́твами ва́шими пода́йте чту́щым ва́с любо́вию, доброде́телей исправле́ние, и собла́знов избавле́ние, я́ко непобеди́мии.

И́кос: Ре́ки благоче́стия я́вльшеся, уче́ний ва́ших струя́ми всю́ зе́млю напои́вше, я́ко святи́телие Боже́ственнии, и чуде́с ту́чами скве́рны омы́вше, и пи́щный пото́к досто́йно насле́дивше. Те́мже соше́дшеся благоче́стно ва́с почита́ем пе́сньми дне́сь, и ве́рно вопие́м ва́м: моли́те Христа́ Бо́га непреста́нно о все́х на́с, я́ко непобеди́мии.

Пе́снь 7.

Ирмо́с: В нача́ле зе́млю основа́вый, и небеса́ сло́вом утверди́вый, благослове́н еси́ во ве́ки, Го́споди Бо́же оте́ц на́ших.

И́же и́стинныя святи́тели Боже́ственныя, ста́ду Твоему́ па́стыри показа́вый, благослове́н Бо́г оте́ц на́ших.

И́же страсте́й погаси́сте пла́мень, и ду́шы благочести́вых Боже́ственно ороси́сте, вопию́щих: благослове́н Бо́г оте́ц на́ших.

Воздержа́нием, и бде́нием, и ве́рою и́стинною тру́ждшеся святи́телие, помина́йте все́х на́с.

Богоро́дичен: И́же на́с ра́ди рожде́йся от Де́вы, и от врага́ изба́вивый ми́р, благослове́н Бо́г оте́ц на́ших.

Пе́снь 8.

Ирмо́с: На горе́ святе́й просла́вльшася, и в Купине́ огне́м Присноде́вы Моисе́ови та́йну я́вльшаго, Го́спода по́йте, и превозноси́те во вся́ ве́ки.

Моисе́ю подо́бящеся отцы́, на го́ру безстра́стия взыдо́сте, во мра́к разу́мный, и благода́тный прия́сте зако́н святи́тели. Те́м воспева́ем Христа́ во ве́ки.

Лю́ди Христо́вы упа́сше преподо́бнии, еги́петския ле́сти отбе́гше, Вавило́на страстна́го избе́гли есте́, Сио́на вы́шняго обре́тше жили́ще во вся́ ве́ки.

Я́ко ми́ром пома́завшеся Бо́жии святи́телие, е́же в сло́ве и де́ле благоче́стия, священноде́йствуете Боже́ственная свяще́ннии: те́мже Тро́ицу во еди́ном существе́ пое́те во вся́ ве́ки.

Богоро́дичен: Все́льшагося во чре́во святы́я Де́вы, и в се́м стра́шно па́че сло́ва, ве́тхаго Ада́ма обно́вльша, Го́спода по́йте, и превозноси́те Его́ во ве́ки.

Пе́снь 9.

Ирмо́с: Проявле́нное на горе́ законополо́жнику во огни́ и купине́, рождество́ Присноде́вы, в на́ше ве́рных спасе́ние, пе́сньми немо́лчными велича́ем.

И́же безстра́стием и ве́рою, наде́ждею и любо́вию, словеса́ на́м живота́ ве́чнаго показа́вше прему́дрии святи́телие, моли́теся спасти́ся душа́м на́шым.

Жезло́м Ду́ха Свята́го я́ко упа́сшыя лю́ди, и от Бо́жия це́ркве отгна́вшыя е́реси богобо́рных, святи́телие всечестни́и: те́мже ва́с пе́сньми восхваля́ем.

Я́ко церко́вная свети́ла святи́тели в пе́снех и пе́ниих почита́ем вси́ немо́лчно, ра́ку моще́й ва́ших, блаже́ннии отцы́, досто́йно велича́юще.

Богоро́дичен: Ра́дуйся, Присноживо́тный исто́чниче нетле́ния, ра́дуйся всесве́тлый со́лнца о́блаче. Ра́дуйся, колесни́це всего́ Божества́. Ра́дуйся, ковче́же освяще́ния.

Свети́лен.

Светоза́рныя свети́льники, па́че со́лнечных лу́чь от светонача́льныя Тро́ицы и трисо́лнечныя еди́ницы, преесте́ственно сме́шены, Богоно́сныя восхва́лим отцы́.

Богоро́дичен: Тебе́ пе́сньми немо́лчными ублажа́ем, Де́во, я́же от Тро́ицы еди́наго во чре́ве прии́мши, Богоро́дице, Боже́ственными рука́ми пресу́щное сло́во носи́ла еси́, непрело́жно и неизме́нно.

На хвали́тех стихи́ры, гла́с 6.

Подо́бен: Тридне́вен:

Благода́ть превозмо́же, ꙳ ве́ра преукрепи́ся, ꙳ и испо́лнишася вся́ ꙳ ра́зума Бо́жия, ꙳ апо́стол и учи́телей ра́ди, ꙳ спасе́нием обогати́хомся. [Два́жды.]

Небе́сных та́инств, ꙳ и челове́ческих уче́ний ꙳ благода́тей стече́ние со исправле́ньми, ꙳ побежда́ющими вся́кое ерети́ческое сло́во, ꙳ святи́тели твоя́ удиви́л еси́, Го́споди.

Прему́дрии учи́телие вселе́нныя, ꙳ и́же Бо́га сла́вяще, ꙳ словесы́ и де́лы на земли́, ꙳ да возвели́чатся дне́сь, ꙳ я́ко спасе́ния все́м на́м пода́телие.

Сла́ва, гла́с 6:

До́брии раби́, блази́и и ве́рнии, до́брии де́лателие виногра́да Христо́ва, и́же и тяготу́ дневну́ю поне́сшии, и да́нный ва́м тала́нт возрасти́вшии, и по ва́с прише́дшым не зави́девшии: те́мже и врата́ ва́м небе́сная отверзо́шася. Вше́дше у́бо в ра́дость Влады́ки Христа́, моли́те о на́с, святи́и учи́телие.

И ны́не, Богоро́дичен:

Богоро́дице, Ты́ еси́ лоза́ и́стинная:

Крестобогоро́дичен: Пречи́стая, я́ко ви́де Тя́ на Кресте́ пове́шена, пла́чущи вопия́ше ма́терски: Сы́не Мо́й, и Бо́же Мо́й, сладча́йшее Мое́ Ча́до, ка́ко терпи́ши стра́сть поно́сную?