[Глава 10] Слу́жба о́бща святи́телю еди́ному

Ве́чер,

на Го́споди воззва́х стихи́ры, гла́с 6.

Подо́бен: Всю́ отложи́вше:

Ве́сь освяще́н Богоно́сец показа́ся, ꙳ пома́зание Бо́жие свято́е, ꙳ Святы́м Ду́хом обложе́н: ꙳ и све́тло входя́ вы́ну ꙳ во свята́я святы́х, ꙳ Богонача́льными светлостьми́ озаря́емь, ꙳ благода́ти причаща́яся ꙳ святы́х та́ин, ꙳ я́ко и́стинный святи́тель пресла́вен, ꙳ со дерзнове́нием моля́ся ꙳ о душа́х на́ших.

Просвети́ся житие́ твое́ ꙳ доброде́тельными светлостьми́, ꙳ ве́рныя просвети́л еси́, ꙳ и ле́сти тьму́ разгна́л еси́, ꙳ и́стинное бо яви́лся еси́ светоза́рное со́лнце, ꙳ святи́телю преблаже́нне и́мярек, ꙳ и ны́не, всели́лся еси́, ꙳ иде́же сия́ет све́т невече́рний, ꙳ и сы́н дне́ благода́тию Ду́ха Свята́го бы́в. ꙳ Те́мже твою́ Боже́ственную па́мять и светоно́сную ꙳ че́стно соверша́юще приснопа́мятне, ꙳ любо́вию почита́ем.

Ум тво́й манове́нием е́же к Бо́гу, ꙳ Богому́дре, ве́рою удобря́емь, ꙳ све́тел яви́ся всесла́вне, ꙳ в ме́ртвеннем те́ле и тле́ннем, ꙳ прему́дре нетле́нию поучи́вся, ꙳ притяжа́л еси́ безпло́тных све́тлости, ꙳ и страсте́й вне́ бы́в, ꙳ безстра́стием украша́яся, ꙳ и́мярек, о́тче святи́телю прему́дре, ꙳ све́тлый свети́льниче, ꙳ и моли́твенниче о чту́щих ꙳ любо́вию па́мять твою́.

Сла́ва, и ны́не, Богоро́дичен:

Ра́дуйся, зако́на исполне́ние. Ра́дуйся, хра́ме святы́я Тро́ицы, неве́сто нетле́нная. Ра́дуйся, Боже́ственное носи́ло все́х Царя́. Ра́дуйся, огню́ невеще́ственный, я́ко клеща́ нося́щи на рука́х твои́х у́гля: но́вый раю́: вертогра́д затворе́нный: трапе́за Боже́ственная пресве́тлая: голуби́це нескве́рная: Престо́ле вы́шняго: о́др Боже́ственный мы́сленный, ю́же Ду́х Святы́й Отрокови́це осени́.

Крестобогоро́дичен: А́гнца своего́, ꙳ А́гница нескве́рная дре́вле, и непоро́чная Влады́чица, ꙳ на кре́ст воздвиза́ема я́ко ви́де, ꙳ ма́терски восклица́ше, ꙳ и удивля́ющися вопия́ше: ꙳ Ча́до сла́дкое, ꙳ что́ виде́ние сие́ но́вое и пресла́вное, ꙳ ка́ко лю́дие неблагода́тнии ꙳ суди́щу пила́тову предаю́т Тя́, ꙳ и осужда́ют сме́ртию живота́ все́х: ꙳ но пою́ Твое́ неизрече́нное сло́ве, схожде́ние.

А́ще и́мать самогла́сен.

Сла́ва, гла́с 8:

До́блестей твои́х, преподо́бне о́тче, пло́д просвети́л е́сть ве́рных сердца́: кто́ бо слы́ша безме́рное твое́ смире́ние, терпе́нию не удиви́ся, е́же к ни́щым ти́хости, к скорбя́щым утеше́нию, вся́ Боголе́пно научи́л еси́ святи́телю, и́мярек, и ны́не неувяда́емым венце́м увя́злся еси́: моли́ся о душа́х на́ших.

И ны́не, Богоро́дичен:

Кро́в Тво́й Богоро́дице Де́во, врачевство́ е́сть духо́вное: во́нь бо прибега́юще, от душе́вных неду́г избавля́емся.

Крестобогоро́дичен:

Подо́бен: О пресла́внаго чудесе́:

Не терплю́ Ча́до, ви́дящи Тя́, ꙳ на дре́ве усну́вша, ꙳ бо́дрость все́м подаю́щаго: ꙳ я́ко да и́же дре́вле преступле́ния плодо́м, ꙳ сно́м поги́бельным усну́вшым, ꙳ Боже́ственную и спаси́тельную бо́дрость пода́си, ꙳ Де́ва глаго́лаше пла́чущи: ꙳ ю́же велича́ем.

А́ще ли пра́зднуеши с полиеле́ем, глаго́ли Богоро́дичен: воскре́сный: Ца́рь Небе́сный: [пи́сан в конце́ кни́ги сея́.]

Вхо́д. Проки́мен дне́.

Чте́ния 3 святи́тельская, [пи́сана в конце́ кни́ги сея́].

На стихо́вне стихи́ры, гла́с 8:

Святи́телю, и́мярек, разу́мнаго све́та заре́, церко́вное свети́ло, святи́тельская красото́, и́ноческаго по́стнаго жития́ и́стовое пра́вило: на́м же засту́пник яви́лся еси́, свобожда́я от губи́теля врага́ ду́шы на́ша.

Сти́х: Честна́ пред Го́сподем сме́рть преподо́бных Его́.

Святи́телю, и́мярек, вели́кую вла́сть от Бо́га прия́л еси́, мно́жество лука́вых бесо́в моли́твою твое́ю отгна́л еси́, и си́х озлобле́ния от все́х ве́рою к тебе́ притека́ющих.

Сти́х: Что́ возда́м Го́сподеви о все́х, я́же воздаде́ ми́.

Святи́теля вели́каго, и́мярек, ка́ко досто́йно воспое́м, честна́го ума́, Богоза́рнаго све́та, освеща́ющаго на́с, и Боже́ственный ра́зум подаю́щаго, та́ин глуби́нных испове́дателя? согла́сно вси́ рце́м: ра́дуйся о́тче отце́в, и́мярек.

Сла́ва, гла́с 8:

Ты́ еси́ па́стырь до́брый и учи́тель те́плый, святи́телю, и́мярек, тя́ всегда́ похваля́юще вопие́м: тобо́ю Бо́г украси́ це́рковь свою́, и те́ло твое́ многоле́тно покрове́нное в земли́, нетле́нно яви́ лю́дем свои́м. Те́мже не преста́й моля́ся о хва́лящих тя́, и чту́щих па́мять твою́, проси́ оставле́ние грехо́в, и спасе́ния душа́м на́шым.

И ны́не, Богоро́дичен: воскре́сный: Безневе́стная Де́во:

А́ще ли не пра́зднуеши, глаго́ли се́й Богоро́дичен:

Влады́чице приими́ моли́тву ра́б Твои́х, и изба́ви на́с от вся́кия ну́жды и печа́ли.

Крестобогоро́дичен: Тя́ ви́дящи пригвожда́ема на Кресте́ Иису́се, и стра́сти прие́млюща во́лею Де́ва и Ма́ти твоя́, Влады́ко, увы́ мне́, вопия́ше, Ча́до сла́дкое, ра́ны непра́ведно ка́ко терпи́ши? Врачу́, исцели́вый челове́ческое неможе́ние, и от тли́ вся́ изба́вивый благоутро́бием Твои́м.

Тропа́рь во уста́ве.

А́ще ли не́сть уста́ва, глаго́ли се́й тропа́рь, гла́с 4:

Пра́вило ве́ры, и о́браз кро́тости, воздержа́ния учи́теля яви́ тя́ ста́ду твоему́, я́же веще́й и́стина: сего́ ра́ди стяжа́л еси́ смире́нием высо́кая, нището́ю бога́тая. О́тче священнонача́льниче, и́мярек, моли́ Христа́ Бо́га спасти́ся душа́м на́шым.

Сла́ва, и ны́не, Богоро́дичен.

На у́трени,

на Бо́г Госпо́дь, тропа́рь то́йже.

По 1-й кафи́сме, седа́лен, гла́с 1.

Подо́бен: Гро́б Тво́й:

Служи́тель бы́в Христу́ вся́ческих Влады́це, научи́л еси́ лю́ди, и просвети́л еси́ Боже́ственным креще́нием, к разуме́нию сего́ наста́вль святи́телю: те́мже пропове́дника тя́ и́стины вси́ имену́ем, святи́теля и уго́дника Христо́ва. [Два́жды.]

Сла́ва, и ны́не, Богоро́дичен:

Безневе́стная чи́стая Богоро́дице Де́во, еди́на предста́тельнице ве́рных и покро́в: бе́д и скорбе́й, и лю́тых обстоя́ний все́х изба́ви на Тя́ упова́ние иму́щих отрокови́це, и ду́шы на́ша спаси́ Боже́ственными мольба́ми Твои́ми.

По 2-й кафи́сме седа́лен, гла́с 4:

От ю́ности взе́м кре́ст тво́й, благочести́вно Христу́ после́довал еси́, увяди́в плотско́е мудрова́ние воздержа́нием: те́мже на святи́тельстем седа́лищи се́д святи́телю, возвели́чил еси́ Влады́ку, и Того́ Пречи́стую Ма́терь, разли́чными дарова́нии твою́ украси́вша ра́ку, и́мярек, Богоблаже́нне. [Два́жды.]

Сла́ва, и ны́не, Богоро́дичен:

Де́во всенепоро́чная, пресу́щнаго Бо́га ро́ждшая, со святи́телем Того́ непреста́нно моли́, оставле́ние прегреше́ний и исправле́ние жития́ да́ти на́м пре́жде конца́, ве́рою и любо́вию пою́щым Тя́ по до́лгу, еди́на всепе́тая.

По Хвали́те и́мя Госпо́дне:

Припе́в: Велича́ем тя́ святи́телю о́тче, и́мярек, и чте́м святу́ю па́мять твою́: ты́ бо мо́лиши за на́с Христа́ Бо́га на́шего.

Псало́м избра́нный: Услы́шите сия́ вси́ язы́цы:

По полиеле́и седа́лен, гла́с 8.

Подо́бен: Прему́дрости:

Над страстьми́ ца́рствовав плотски́ми, святи́тель яви́лся еси́ Богоподо́бен, и па́ству твою́ пресла́вно упа́сл еси́ преподо́бне: креще́нием же просвети́л еси́, и наказа́л еси́ сла́вити еди́наго Бо́га в трие́х ипоста́сех: те́мже источа́еши исцеле́ния и по кончи́не, ве́рою приходя́щым ко святе́й Бо́жией це́ркви, и к ра́це моще́й твои́х, святи́телю, и́мярек, моли́ Христа́ Бо́га, согреше́ний оставле́ние пода́ти чту́щым любо́вию святу́ю па́мять твою́. [Два́жды.]

Сла́ва, и ны́не, Богоро́дичен:

Небе́сную две́рь и ковче́г, всесвяту́ю го́ру, све́тлый о́блак воспои́м, неопали́мую купину́, слове́сный ра́й, Е́вино свобожде́ние, вселе́нныя всея́ вели́кое сокро́вище, я́ко спасе́ние в не́м соде́лася ми́ру, и оставле́ние дре́вних согреше́ний. Те́мже и вопие́м Ей: моли́ Христа́ Бо́га, прегреше́ний оставле́ние дарова́ти благоче́стно покланя́ющымся пресвято́му рождеству́ Твоему́.

Степе́нна, 1-й антифо́н 4-го гла́са.

Проки́мен: Уста́ моя́ возглаго́лют прему́дрость, и поуче́ние се́рдца моего́ ра́зум.

Сти́х: Уста́ пра́веднаго поуча́тся прему́дрости:

Вся́кое дыха́ние:

Ева́нгелие, святи́тельское, [пи́сано в конце́ кни́ги сея́.]

По 50-м псалме́ стихи́ра, гла́с 6:

Насле́дниче Бо́жий, соприча́стниче Христо́в, служи́телю Госпо́день, свя́те, и́мярек, по и́мени твоему́ та́ко и житие́ твое́: просия́ бо седи́не ра́зум, свиде́тельствоваше све́тлость лица́ твоего́ душе́вное незло́бие, изве́ствоваше кро́тость, сло́ва молчали́вое. Жи́знь твоя́ сла́вна, и успе́ние со святы́ми: моли́ о душа́х на́ших.

Кано́н, гла́с 6.

Пе́снь 1.

Ирмо́с: Я́ко по су́ху пешеше́ствовав Изра́иль, по бе́здне стопа́ми гони́теля фарао́на, ви́дя потопля́ема, Бо́гу побе́дную пе́снь пои́м, вопия́ше.

С вы́шними ли́ки я́ко святи́тель, я́ко Бо́жий служи́тель предстоя́, о на́с приле́жно моли́ся, получи́ти на́м ве́чная блага́я моли́твами твои́ми.

Избра́н бы́в Го́сподеви служи́ти честно́му Ева́нгелию, блаже́нне, и́мярек, во благоразу́мии лю́ди, уче́нии прему́дрыми о́тче, возрасти́л еси́.

Ра́зумом Бо́жиим обога́щься, сло́во живо́тное от се́рдца источи́л еси́, напоя́я ду́шы оляде́вшыя страстьми́, прему́дре святи́телю Бо́жий, и́мярек, Богоблаже́нне.

Богоро́дичен: Свяще́нный ли́к проро́ческий проявля́ше издале́ча хотя́щую Тя́ бы́ти Бо́жию и́стинную роди́тельницу чи́стая, вы́шшую херуви́м и всея́ тва́ри.

Пе́снь 3.

Ирмо́с: Не́сть свя́т, я́коже Ты́ Го́споди Бо́же мо́й, вознесы́й ро́г ве́рных Твои́х, бла́же, и утверди́вый на́с на ка́мени испове́дания Твоего́.

Иска́пая Боже́ственную сла́дость из усте́н твои́х о́тче, и го́рькаго безбо́жия изсуши́л еси́ ка́пли, напои́в благочести́вых питие́м Бо́жияго ра́зума, блаже́нне.

Бо́жиим судо́м произбра́н бы́в, святи́тель показа́лся еси́, безкро́вны же́ртвы Бо́гу принося́, поже́ршемуся на́с ра́ди, о́тче святи́телю, и́мярек.

Гро́б, иде́же лежи́т честно́е те́ло твое́, благово́ние источа́ет я́ко ра́й Бо́жий, облагоуха́я ве́рныя, святи́телю пресла́вне и всече́стне, и́мярек.

Богоро́дичен: Разуме́ти рождества́ Твоего́ чи́стая, неизрече́нныя глубины́ недоуме́ет у́м челове́чь: Бо́г бо себе́ смири́в щедро́т ра́ди, во чре́ве Твое́м всего́ мя обнови́.

Седа́лен, гла́с 4.

Подо́бен: Яви́лся еси́ дне́сь:

Правове́рно, преподо́бне, це́рковь Христо́ву упа́сл еси́, и ерети́ческия отгна́л еси́ го́рькия пле́велы, в вы́шних водворя́ешися блаже́нне.

Сла́ва, и ны́не, Богоро́дичен:

Сло́во о́тчее Христа́ Бо́га на́шего, от Тебе́ воплоти́вшагося позна́хом Богоро́дице Де́во, еди́на чи́стая, еди́на благослове́нная: те́м непреста́нно тя́ воспева́юще велича́ем.

Крестобогоро́дичен: На дре́ве ви́дящи воздви́жена Сы́на Твоего́ Пречи́стая, утро́бою ма́тернею растерза́ема, жа́лостно вопия́ла еси́: увы́ мне́! ка́ко заше́л еси́ Све́те Мо́й безле́тный?

Пе́снь 4.

Ирмо́с: Христо́с моя́ си́ла, Бо́г и Госпо́дь, честна́я це́рковь Боголе́пно пое́т взыва́ющи, от смы́сла чи́ста, о Го́споде пра́зднующи.

Ты́ испо́лнен Свята́го Ду́ха, свяще́нный о́тче, и́мярек, лука́выя ду́хи от челове́к отгна́л еси́, ве́рны же духо́вными уче́нии твои́ми сотвори́л еси́.

Еди́ницу несозда́нную благосло́вил еси́, тре́ми ли́цы разделя́ему, непресеко́му и несме́сну, просвеща́я благочести́выя свяще́нными Богосло́вии твои́ми.

Умертви́в пе́рвее плотска́я мудрова́ния воздержа́нием и труды́, святи́тель Боже́ствен показа́лся еси́, и предста́тель Тро́ице всесвяще́н.

Богоро́дичен: Кля́тва разори́ся пра́бабняя тобо́ю, Богома́ти: ты́ бо на́м Пречи́стая, Исто́чника породила́ еси́, святы́ни присносу́щнаго живота́.

Пе́снь 5.

Ирмо́с: Бо́жиим све́том твои́м, бла́же, у́тренюющих ти́ ду́шы любо́вию озари́, молю́ся, тя́ ве́дети, сло́ве Бо́жий, и́стиннаго Бо́га, от мра́ка грехо́внаго взыва́юща.

Бо́жия Боже́ственне соверша́я, и чисте́йшим по́мыслом чи́стым прикаса́яся, непоро́чен яви́лся еси́, служя́ Бо́гу, я́ко Бо́жий святи́тель свяще́ннейший.

И́дольстии уго́дницы бы́ша уго́дницы Бо́гу, твои́ми уче́нии честны́ми, и́хже от недосто́йных изъима́я, досто́ин яви́лся еси́ уго́дник Бо́гу вседержи́телю.

Благода́тию при́зван бы́в, разруши́л еси́ безбо́жия и́дольская, одожде́нием слове́с твои́х преподо́бне, олядене́вшая сердца́ плодоно́сна соде́лал еси́ Бо́жиею благода́тию.

Богоро́дичен: По рождестве́ Твое́м стра́ннем пребыла́ еси́ Де́вою, я́коже пре́жде: Бо́г бо бе́ рожде́йся, и претворя́яй вся́ во́лею, безму́жная Мари́е Богоневе́стная.

Пе́снь 6.

Ирмо́с: Жите́йское мо́ре воздвиза́емое зря́ напа́стей бу́рею, к ти́хому приста́нищу Твоему́ прите́к, вопию́ Ти: возведи́ от тли́ живо́т мо́й, Многоми́лостиве.

Язы́к тво́й ду́хом изъощре́н разу́мно, я́ко тро́сть скоропи́сца, написа́ в сердца́ благочести́вых сло́во благода́тное, всесвяще́нне о́тче, Бо́жиим манове́нием.

Боже́ственным поуча́яся, я́ко входя́ в мы́сленная свята́я святы́х, ве́рных соверша́еши ду́хом, Тро́ическою заре́ю свяще́нный о́тче всесоверше́ннейший, и́мярек.

Струя́ми веле́ний твои́х загради́в му́тная нечести́вых веле́ния, я́ко река́ показа́лся еси́ ми́рная, благоче́стия напоя́я составле́ния ве́рных, святи́телю всече́стне.

Богоро́дичен: Сло́во во чре́ве Твое́м всели́ся без се́мене, и Челове́к яви́ся соверше́н, обновля́я естество́ Боголе́пно, я́коже Са́м ве́сть еди́н, Богоприя́тная Отрокови́це всенепоро́чная.

Конда́к во уста́ве.

А́ще ли не́сть уста́ва, глаго́ли се́й конда́к, гла́с 2.

Подо́бен: Вы́шних:

Боже́ственный гро́м, труба́ духо́вная, ве́ры насади́телю, и отсека́телю ересе́й, Тро́ицы уго́дниче, вели́кий святи́телю, и́мярек, со а́нгелы предстоя́ при́сно, моли́ непреста́нно о все́х на́с.

И́кос: Ле́ностию окая́нный а́з отпадо́х, и в сме́рть усну́х: но я́ко па́стырь до́бр воздви́гни мя́ о́тче, и стра́сти моя́ успи́, зле́ му́чащыя мя́: я́ко да воста́в чи́сте воспою́ твое́ светоно́сное торжество́, е́же Влады́ка вселе́нныя просла́ви досто́йно, я́ко раба́ ве́рнейша, и я́ко учи́теля прему́дра, я́ко дру́га и таи́нника, и я́ко строи́теля свои́х преда́ний, я́же до́бре сохрани́л еси́, пома́зание нескве́рное, и́мярек, прему́дре, при́сно моли́ непреста́нно о все́х на́с.

Пе́снь 7.

Ирмо́с: Росода́тельну у́бо пе́щь соде́ла а́нгел преподо́бным отроко́м, халде́и же опаля́ющее веле́ние Бо́жие, мучи́теля увеща́ вопи́ти: благослове́н еси́ Бо́же оте́ц на́ших.

Просвеща́емь духо́вною благода́тию, я́же к Боже́ственному манове́нию причаще́нии, светода́тельная бы́л еси́ звезда́, просвеща́я му́дре пою́щыя: благослове́н Бо́г оте́ц на́ших.

Святе́йшая це́рковь бы́в, озаря́ема доброде́тельными дея́нии, живу́щу име́л еси́ в тебе́ свяще́нне Тро́ицу несозда́нную, вопия́: благослове́н Бо́г оте́ц на́ших.

Дрема́ние от о́чию отри́нув, Боже́ственными бодростьми́, Бо́жия сия́ния прия́л еси́ от а́нгела све́та, сто́лп и подпо́р ве́рным, святи́теля и́стинна соверша́юща тя́.

Богоро́дичен: Седя́й в не́дрех роди́теля неопи́сан, в не́дрех Твои́х, Пречи́стая, ны́не седи́т опи́сан, Твои́м обложе́н зра́ком, за спасе́ние Ада́мле опи́сан бы́в.

Пе́снь 8.

Ирмо́с: Из пла́мене преподо́бным ро́су источи́л еси́, и пра́веднаго же́ртву водо́ю попали́л еси́: вся́ бо твори́ши Христе́, то́кмо е́же хоте́ти. Тя́ превозно́сим во вся́ ве́ки.

Го́рдаго зми́я смире́нием твои́м смири́л еси́ блаже́нне, возвыша́емь к Бо́гу чи́стыми твои́ми ра́зумы: те́мже тя́ чти́м, Христа́ превознося́ще во ве́ки.

Воплоще́нно Сло́во богосло́вил еси́, и лю́ди от рабо́тныя ле́сти спа́сл еси́, отгоня́я и́дольская нече́стия, о́тче святи́телю, и́мярек, прему́дре, и Богоно́се.

Житие́ твое́ Влады́це твоему́ име́я подо́бно, и сло́во житию́ име́я подо́бящееся, испо́лнен бы́в дне́й духо́вных о́тче, в вы́шняя преше́л еси́ поко́ища.

Богоро́дичен: Изба́вльшеся пе́рвыя кля́твы Твои́м рождество́м, преблагослове́нная Отрокови́це Богора́дованная, гла́с Гаврии́лов возсыла́ем Ти́: ра́дуйся вина́ все́х спасе́ния.

Пе́снь 9.

Ирмо́с: Бо́га челове́ком не возмо́жно ви́дети, на Него́же не сме́ют чи́ни а́нгельстии взира́ти: Тобо́ю же, Всечи́стая, яви́ся челове́ком Сло́во воплоще́нно, Его́же велича́юще, с небе́сными во́и Тя́ ублажа́ем.

В зе́млю кро́тких ты́ всели́лся еси́ святи́телю, кро́ток и незло́бив бы́в, с вы́шними совокупля́яся во́инствы: ве́сь укра́шен доброде́тельными све́тлостьми, и све́том доброде́телей преоде́ян.

Зри́ши Бо́жия и а́нгельския све́тлости, патриа́рх и му́ченик, и апо́стольския красоты́, моля́ с ни́ми Человеколю́бца, оставле́ние грехо́в и жития́ исправле́ние дарова́ти на́м преподо́бне, хва́лящым тя́.

Я́ве Престо́л пе́рвее украси́л еси́ све́тло, все́х председя́щих градо́в, в не́мже пожи́в я́ко а́нгел, и святи́тельством се́й украси́в, пома́зав освяти́л еси́, соверши́в лю́ди Богому́дры.

Богоро́дичен: Я́коже ка́пля небе́сная, во Твое́ чре́во Де́во, до́ждь сни́де, и изсуши́ пото́ки ле́стныя: одожди́ нетле́ние все́м челове́ком, и избавле́ние Тобо́ю Богора́дованная дарова́ся.

Свети́лен.

Подо́бен: Посети́л ны́:

Сла́вно краси́тся дне́сь светоза́рное торжество́, во све́те сла́вы лица́ Бо́жия предстоя́ святи́телю, и́мярек, помяни́ на́с хва́лящих твою́ па́мять.

Богоро́дичен: С Бо́гом на Тя́ Пречи́стая, упова́ние возлага́ем, и́же из Тебе́ проше́дшему сраспина́еми Христу́: Твои́ми же к нему́ мольба́ми невреди́мы да́же до конца́ на́с сохрани́.

На хвали́тех стихи́ры, гла́с 8.

Подо́бен: О пресла́внаго чудесе́!

Преподо́бне о́тче, и́мярек, ꙳ ты́ возше́д на ле́ствицу Боже́ственнаго ра́зума, ꙳ и к Бо́гу приближа́яся, ꙳ всыне́ния да́р прии́м, ꙳ исцеля́еши неду́ги неисце́льныя, ꙳ и отго́ниши ду́хи нечи́стыя: ꙳ те́м твою́ па́мять пра́зднуем, ꙳ ра́достию се́рдца, Христа́ велича́юще, ꙳ возвели́чившаго Своего́ уго́дника. [Два́жды.]

О́тче чу́дный, и́мярек, ꙳ световиде́нием ума́ ꙳ чи́сто облиста́емь, ꙳ страсте́й успи́л еси́ ꙳ многово́лненное мо́ре, ꙳ и безстра́стием лета́я, ꙳ чи́стыми кри́лы, дости́гл еси́, ꙳ иде́же добро́та неизрече́нна и недомы́сленна, ꙳ о на́с всегда́ моля́ хва́лящих тя́.

О́тче отце́в, и́мярек, ꙳ свяще́нства пра́вило, ꙳ целому́дрия о́браз, ꙳ мона́шествующих кре́пость, ꙳ це́ркве утвержде́ние, ꙳ любве́ свети́льник, Престо́л чу́вства, ꙳ исто́чник чуде́с, ꙳ и язы́к огнедохнове́нный: уста́ сладкоглаго́лива, ꙳ сосу́д Боже́ственнаго Ду́ха, и разу́мный бы́л еси́ ра́й Богоблаже́нне.

Сла́ва, гла́с 6:

Преподо́бне и треблаже́нне, святе́йший о́тче, па́стырю до́брый, и началопа́стыря Христа́ учениче́, положи́вый ду́шу за о́вцы, ты́ и ны́не, всехва́льне, и́мярек, святи́телю, проси́ моли́твами твои́ми, дарова́ти на́м ве́лию ми́лость.

И ны́не, Богоро́дичен:

Бо́га из Тебе́ воплоти́вшагося разуме́хом Богоро́дице Де́во: Того́ моли́ о спасе́нии ду́ш на́ших.

Крестобогоро́дичен: Предстоя́щи у Креста́ Де́ва Ма́ти, зря́щи Сы́на Своего́ во́лею стра́ждуща, Того́ велича́ше.