[Глава 13] Слу́жба о́бща преподо́бным двема́ и мно́гим
Ве́чер,
На Го́споди воззва́х, стихи́ры. Гла́с 8.
Подо́бен: О пресла́внаго чудесе́!
Преподо́бнии отцы́ Богому́дрии, ꙳ слепы́м дае́те све́т, ꙳ боля́щым исцеле́ние, ꙳ и хромы́м здра́вие, ꙳ ми́лостивно приклоня́ющеся ꙳ к приходя́щым ве́рою ко хра́му ва́шему, ꙳ и прося́щым по́мощи ва́шея: ꙳ засту́пники бо и предста́тели ве́рнии вси́ обрето́хом, ꙳ восхваля́юще ва́с.
Преподо́бнии отцы́ всечестни́и, ꙳ доброде́тельми возше́дше на колесни́цу, ꙳ к Бо́гу востеко́сте, ꙳ побе́дныя по́чести прие́млюще: ꙳ и я́ко ми́лоть на́м телеса́ ва́ша ꙳ положе́на во гробе́х, отцы́, оста́вили есте́, ꙳ источа́ти исцеле́ния, ꙳ и прогони́ти ду́хи лука́выя: ꙳ те́мже блажи́м ва́с прехва́льнии.
Лико́м по́стническим сочта́стеся, укра́шшеся блаже́ннии ꙳ по́стническим житие́м, ꙳ и ны́не в небе́сных оби́телех живете́ веселя́щеся, ꙳ иде́же лику́ют а́нгели: ꙳ и све́том Боже́ственным ꙳ вои́стинну обожа́еми, ꙳ помина́йте любо́вию блажа́щих ва́с на земли́, ꙳ и свято́е ва́ше творя́щих пра́зднество.
Сла́ва, и ны́не, Богоро́дичен:
Помышле́ния нечи́ста, и устна́ льсти́ва, дела́ же моя́ вся́ оскверне́на: и что́ сотворю́, ка́ко усря́щу Судию́? Влады́чице Де́во, моли́ Сы́на Твоего́ и Зижди́теля и Го́спода, я́ко да в покая́нии прии́мет ду́х мо́й, я́ко Еди́н Благоутро́бен.
Крестобогоро́дичен: Ю́ница нескве́рная, Юнца́ ви́дящи на дре́ве пригвожда́ема во́лею, рыда́ющи жа́лостне, увы́ Мне́, вопия́ше, люби́мейшее Ча́до! Что́ Ти со́нм воздаде́ неблагода́рный евре́йский, хотя́ Мя обезча́дствовати от Тебе́ вселюбе́зне?
А́ще и́мут, самогла́сен.
Сла́ва, гла́с 6:
Преподо́бнии отцы́, во всю́ зе́млю изы́де веща́ние исправле́ний ва́ших: те́м на небесе́х обрето́сте мзду́ трудо́в ва́ших, де́монов разруши́сте полки́, а́нгелов достиго́сте чи́ны, и́хже житию́ непоро́чно поревнова́сте: дерзнове́ние иму́ще ко Го́споду, ми́р испроси́те душа́м на́шым.
И ны́не, Богоро́дичен:
Богоро́дице Де́во чи́стая, моли́ся Го́сподеви, я́ко да Твои́ми моли́твами пода́ст душа́м на́шым грехо́в оставле́ние, и ми́р, и ве́лию ми́лость.
Крестобогоро́дичен: На дре́ве Живо́т на́ш зря́щи Всенепоро́чная Богоро́дице ви́сящ, ма́терски рыда́ющи вопия́ла еси́: Сы́не Мо́й, и Бо́же Мо́й, спаси́ любо́вию пою́щыя Тя́.
[зри́] А́ще пра́зднуеши с полиеле́ем, глаго́ли Богоро́дичен: воскре́сный:
Кто́ Тебе́ не ублажи́т:
Вхо́д. Проки́мен дне́.
И чте́ния преподо́бническая, [пи́сана в конце́ кни́ги сея́.]
На стихо́вне стихи́ры, гла́с 4.
Подо́бен: Я́ко до́бля:
Во Христа́ обле́кшеся, ꙳ тле́емаго челове́ка Богому́дренно совле́кшеся, ꙳ те́м духо́вною благода́тию ꙳ при́сно просвеща́еми, ꙳ я́ко зве́зды све́тлыя ꙳ ми́рови просия́ли есте́, ꙳ моля́щеся от тли́ и бе́д изба́витися, ꙳ ве́рою соверша́ющым ꙳ при́сно честну́ю па́мять ва́шу.
Сти́х: Честна́ пред Го́сподем сме́рть преподо́бных Его́.
Ны́не пи́щу восприе́млюще, ꙳ и све́том огражда́еми, ꙳ и жи́знь ве́чную насле́дствующе, ꙳ к ва́м прибега́ющыя от бе́д изба́вите, ꙳ и искуше́ний разли́чных, ꙳ и вся́каго озлобле́ния, ꙳ Богому́дренно к Бо́гу дерзнове́ние стяжа́вше, ꙳ и любо́вь показу́юще ꙳ вои́стинну Христоподо́бную.
Сти́х: Блаже́н му́ж боя́йся Го́спода, в за́поведех его́ восхо́щет зело́.
Богоно́сцы вседи́внии, ꙳ Тро́ице побо́рницы, ꙳ к миродержи́телеву боре́нию ꙳ му́жескою му́дростию ополчи́вшеся, ꙳ того́ низложи́сте тве́рдыми сплете́нии, ꙳ и побе́дными увязо́стеся венцы́: ꙳ сего́ ра́ди Боже́ственную ꙳ и светоно́сную соверша́ем ва́шу па́мять, ꙳ освяща́еми благода́тию.
Сла́ва, гла́с 8:
Преподо́бнии отцы́, ми́ра красоты́ и пи́щи вре́менныя отню́д возненави́девше, и и́ноческое житие́ па́че возлю́бльше, а́нгелом собесе́дницы бы́сте: и свети́льницы многосве́тлии вселе́нней, чудеса́ми я́коже второ́е со́лнце сия́ете, но о все́х на́с помина́йте, соверша́ющих свяще́нную па́мять ва́шу: мы́ бо ча́да ва́ша, и о́вцы слове́сных ва́ших уче́ний, ва́с на по́мощь призыва́ем, прося́ще ва́ми прия́ти ми́р, и ве́лию ми́лость.
И ны́не, Богоро́дичен: воскре́сен: Безневе́стная Де́во:
А́ще ли не пра́зднуеши, глаго́ли се́й Богоро́дичен:
А́з, Де́во свята́я Богоро́дице, к покро́ву Твоему́ прибега́ю: ве́м, я́ко обря́щу Тобо́ю спасе́ние, мо́жеши бо, Чи́стая, помощи́ мне́.
Крестобогоро́дичен: Тя́ ви́дящи пригвожда́ема на Кресте́ Иису́се, и стра́сти прие́млюща во́лею Влады́ко, Де́ва и Ма́ти Твоя́, увы́ мне́, вопия́ше, Ча́до сла́дкое: ра́ны непра́ведно ка́ко терпи́ши, Врачу́ исцели́вый челове́ческое неможе́ние, и от тли́ вся́ изба́вивый благоутро́бием Твои́м?
Тропа́рь во уста́ве.
А́ще ли не́сть уста́ва, глаго́ли се́й тропа́рь, гла́с 4:
Бо́же оте́ц на́ших, творя́й при́сно с на́ми по Твое́й кро́тости, не отста́ви ми́лость Твою́ от на́с: но моли́твами и́х в ми́ре упра́ви живо́т на́ш.
Сла́ва, и ны́не, Богоро́дичен, или́ Крестобогоро́дичен.
На у́трени,
на Бо́г Госпо́дь, тропа́рь то́йже.
По 1-м стихосло́вии седа́лен, гла́с 4.
Подо́бен: Ско́ро предвари́:
Свети́льницы пресве́тлии и́стины Христо́вы, ми́р просвети́сте уче́нием ва́шим, отцы́ Богоглаго́ливии: погуби́вше е́реси злове́рных ху́льник, погаси́сте пла́менная ху́лящих смуще́ния, те́м я́ко Христо́вы уго́дницы все́х просвеща́ете. [Два́жды.]
Сла́ва, и ны́не, Богоро́дичен:
Де́во Всенепоро́чная, я́же пресу́щнаго Бо́га ро́ждшая, со преподо́бными Того́ непреста́нно моли́, оставле́ние прегреше́ний и исправле́ние жития́ да́ти на́м, пре́жде конца́ ве́рою и любо́вию пою́щым Тя́ по до́лгу еди́на всепе́тая.
По 2-м стихосло́вии седа́лен, гла́с 8:
Отреко́стеся пло́ти Христа́ ра́ди, и духо́внии яви́вшеся лю́дем води́телие, услы́шасте словеса́ та́йных уче́ний: мона́хом же яви́стеся пра́вило пра́вости, стра́сти вся́ кре́постию попра́вше. Те́м и кова́рства бесо́в до конца́ попали́вше, к нему́ изря́дно всегда́ Богоно́снии отцы́ моли́теся грехо́в оставле́ние пода́ти, чту́щым любо́вию святу́ю па́мять ва́шу. [Два́жды.]
Сла́ва, и ны́не, Богоро́дичен:
Се́ Тебе́ ро́ди родо́в сла́вят, я́коже прорекла́ еси́ Отрокови́це: Созда́теля во все́х была́ еси́ пала́та и Боже́ственный хра́м, к не́мже всели́ся Вы́шний, и пло́тию обложи́ся, да спасе́т на́с.
По Хвали́те и́мя Госпо́дне:
Припе́в:
Ублажа́ем ва́с преподо́бнии отцы́, и чте́м святу́ю па́мять ва́шу, наста́вницы мона́хов, и собесе́дницы а́нгелов.
Псало́м избра́нный: Терпя́ потерпе́х Го́спода:
По полиеле́и седа́лен, гла́с 8.
Подо́бен: Прему́дрости:
Егда́ блаже́ннии к Боже́ственному жела́нию у́м сво́й впери́сте, тогда́ оста́вили есте́ вся́ до́лу влеку́щая мудрова́ния, и в пусты́ню все́льшеся, я́ко кри́н процвето́сте доброде́тельми прекра́снии, страсте́й искорени́вше те́рние, в не́й насади́сте плоды́ трудо́в ва́ших. Те́мже и пожа́вше рукоя́ти бога́тство неоте́млемое на небесе́х, отцы́ преподо́бнии, моли́те Христа́ Бо́га, согреше́ний оставле́ние дарова́ти, чту́щым ве́рою святу́ю па́мять ва́шу. [Два́жды.]
Сла́ва, и ны́не, Богоро́дичен:
О Тебе́ ра́дуется, Благода́тная, вся́кая тва́рь, а́нгельский собо́р и челове́ческий ро́д, освяще́нный хра́ме, и раю́ слове́сный, де́вственная похвало́, из Нея́же Бо́г воплоти́ся, и Младе́нец бы́сть, пре́жде ве́к сы́й Бо́г на́ш: ложесна́ бо Твоя́ Престо́л сотвори́, и чре́во Твое́ простра́ннее небе́с соде́ла. о Тебе́ ра́дуется, Благода́тная, вся́кая тва́рь, сла́ва тебе́.
Степе́нна, 1-й антифо́н 4-го гла́са.
Проки́мен: Честна́ пред Го́сподем сме́рть преподо́бных его́.
Сти́х: Что́ возда́м Го́сподеви о все́х, я́же воздаде́ ми?
Вся́кое дыха́ние:
Сти́х: Хвали́те Бо́га во святы́х его́:
Ева́нгелие преподо́бных. [Пи́сано в конце́ кни́ги сея́].
По 50-м псалме́ стихи́ра, гла́с 6:
И́же на земли́ а́нгели, и на небеси́ челове́цы Бо́жии, ми́ра благо́е украше́ние, и благи́х пита́телей удобре́ние, мона́хов и преподо́бных похвалу́, вели́ких отце́в почти́м: насажде́ни бо в дому́ Го́сподни, и процвето́ша пра́ведно, и я́ко ке́дри в пусты́ни, умно́жили есте́ ста́до Христо́во слове́сных ове́ц, в преподо́бии и пра́вде.
Кано́н, гла́с 2.
Пе́снь 1.
Ирмо́с: Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.
Просвеще́нием трисо́лнечнаго Божества́ озари́вшеся прему́дрии, свети́ла яви́стеся, просвеща́ете ве́рно сия́, светоно́сную ва́шу па́мять чту́щих.
Вы́ вси́ Творцу́ возложи́вше себе́, все́ духо́вное жела́ние излия́сте к Нему́: сего́ ра́ди духо́вную благода́ть восприя́ли есте́.
Све́том благода́ти озаря́еми преподо́бнии, ве́рою па́мять ва́шу торжеству́ющих просвети́те, и от тьмы́ грехо́вныя моли́твами ва́шими изба́вите.
Богоро́дичен: Пло́тию безпло́тнаго поро́ждши, Богороди́тельнице Пречи́стая, теле́сных на́с и душе́вных скве́рн омы́й, окропле́нием Боже́ственныя Твоея́ моли́твы.
Пе́снь 3.
Ирмо́с: Утверди́ на́с в Тебе́ Го́споди, дре́вом умерщве́й гре́х, и стра́х Тво́й всади́ в сердца́ на́с пою́щих Тя́.
Напои́вше ду́шы сле́зными пото́ки соде́ясте и́х преподо́бнии плодоно́сны, доброде́тели вся́кия износя́ще чуде́с показа́нии пресла́внии.
Исцеле́ние содева́ет Боже́ственный хра́м ва́ш, и отго́нит боле́зни челове́ческия, и укрепля́ет мудрова́ния и́х, восхвали́ти труды́ ва́шя всечестни́и.
Со враго́м дре́вле бо́ршеся воздержа́нием, и ны́не кре́постию поста́вивше на него́ побе́ду преподо́бнии, му́жески претерпе́сте, и низложи́сте бесо́в шата́ния.
Богоро́дичен: Из ложе́сн твои́х Де́во, вели́кое Со́лнце возсия́: пресла́вно просвети́в земна́я, преподо́бных ли́к прия́л е́сть.
Седа́лен, гла́с 4.
Подо́бен: Яви́лся еси́ дне́сь:
Жите́йское мо́ре воздержа́нием без труда́ преплы́вше, ко приста́нищу мы́сленному безстра́стия приста́ли есте́, преподо́бнии отцы́ и Богому́дрии.
Сла́ва, и ны́не, Богоро́дичен:
Де́вство и рождество́ вы́ше естества́ и сло́ва в Тебе́ Богоро́дице, стеко́стася, я́ко, Бо́га вопло́щшася породила́ еси́ Спа́са ду́ш на́ших.
Крестобогоро́дичен: На дре́ве ви́дящи воздви́жена Сы́на Твоего́, Пречи́стая, утро́бою ма́терски растерза́ющися, взыва́ла еси́: увы́ Мне́, ка́ко заше́л еси́, Све́те мо́й безле́тный?
Пе́снь 4.
Ирмо́с: Услы́шах, Го́споди, сла́вное Твое́ смотре́ние, и просла́вих, Человеколю́бче, непостижи́мую Твою́ си́лу.
Я́ко Христо́во смире́ние возлюби́вше, вознесо́стеся безстра́стием, и смири́сте вся́ бесо́вския горды́ни.
Возсия́вше я́ко со́лнце от восто́ка, чуде́с луча́ми просвеща́ете, преподо́бнии, всю́ подсо́лнечную.
Кади́ло благоуха́ния Всеви́дцу преподо́бнии, своя́ моли́твы принесо́сте, я́же обоня́, и прия́т, в по́стном ку́пно пра́зднице устроя́ет.
Богоро́дичен: Блажи́т Тя́ Пречи́стая, преподо́бных ли́к, и вся́ка душа́ ве́рных: Бо́жие бо Сло́во па́че ума́ и сло́ва родила́ еси́.
Пе́снь 5.
Ирмо́с: Све́та пода́телю, и веко́в тво́рче Го́споди, во све́те Твои́х повеле́ний наста́ви на́с: ра́зве бо Тебе́ ино́го Бо́га не зна́ем.
Еди́ной любви́ Христо́ве вы́ прило́жшеся душа́ми, и потща́вшеся испо́лнители бы́ти Бо́жиих за́поведей, мно́гих чуде́с прия́сте благода́ть пресла́внии.
Незло́бивы и кро́тцы, вся́ зло́бы вра́жия погуби́сте, ми́лостиви до конца́ я́вльшеся: от еди́наго же ми́лостиваго прия́сте благода́ть и́стинную и спаси́тельную.
Зако́ном и моли́твою и посто́м всегда́ претерпева́сте, в безстра́стие оде́ястеся, пло́тский ра́зум смири́вше кре́постию Свята́го Ду́ха.
Богоро́дичен: Воспо́йте Го́сподеви пе́снь но́ву, по́йте же и́мени возсия́вшему Боголе́пно из чре́ва Неискусобра́чныя, и Сию́ ве́рным показа́вшу тве́рдую наде́жду и похвалу́.
Пе́снь 6.
Ирмо́с: В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли́, Бо́же, мя́ возведи́.
Кропле́нием вели́ких по́двиг ва́ших отцы́, победи́ли есте́ бесо́в ли́ца, распе́ншемуся на́с ра́ди Го́споду угожда́юще преподо́бнии.
Благи́я нра́вы отцы́ стяжа́вше, от благода́теля Бо́га да́р прия́сте бога́тно, и сего́ подае́те тре́бующым преподо́бнии.
Дарова́ний напо́лнившеся духо́вных отцы́, неприя́зненныя ду́хи повину́сте я́ко у́мны и разу́мны, к Бо́гу отню́д прилежа́сте.
Богоро́дичен: Душе́вныя моя́ стра́сти исцели́, безстра́стия бы́вши исто́чник, просвети́вшая ли́ки преподо́бных оте́ц рождество́м Твои́м.
Конда́к во уста́ве.
А́ще ли не́сть уста́ва, глаго́ли се́й конда́к, гла́с 2.
Подо́бен: Вы́шних ищя́:
Волне́ний мно́жество невла́жно проходя́ще, безпло́тныя враги́ струя́ми сле́з ва́ших кре́пко погрузи́ли есте́ Богому́дрии и преподо́бнии: и чуде́с да́р прии́мше, моли́те непреста́нно о все́х на́с.
И́кос: Премно́жеством доброде́телей ва́ших преподо́бнии, я́ко са́д кра́сный испо́лнь су́ще, и я́ко от рая́ процвели́ есте́, поще́нием и моли́твами, все́х благоуха́юще от вони́ мно́гих ва́ших трудо́в и по́двигов, и по́тов преподо́бнических, в ни́хже преидо́сте благоиску́сно к безско́рбному животу́, и венце́м побе́дным увязо́стеся: моли́те непреста́нно о все́х на́с.
Пе́снь 7.
Ирмо́с: О́бразу злато́му на по́ле Деи́ре служи́му, трие́ Твои́ о́троцы небрего́ша безбо́жнаго веле́ния, посреде́ же огня́ вве́ржени, ороша́еми поя́ху: благослове́н еси́ Бо́же оте́ц на́ших.
Ору́жием ва́ших моли́тв преподо́бнии, победи́вше бе́сы лука́выя, с небесе́ благода́ть прия́сте, исцеля́ти неду́ги, и прогоня́ти ду́хи лука́выя от взыва́ющих: благослове́н Бо́г оте́ц на́ших.
Пло́ти ва́шя повину́сте отцы́ му́дрии ду́ху, воздержа́нием вся́цем пожи́сте в добродея́нии прехва́льнии, иму́ще чи́сту со́весть и житие́ небе́сное, воспева́юще: благослове́н Бо́г оте́ц на́ших.
Путе́м и́стинным входя́ще в Боже́ственное поко́ище, уклони́стеся напа́стей бесо́вских блаже́ннии, Боже́ственною покрыва́еми благода́тию, вопию́ще: благослове́н Бо́г оте́ц на́ших.
Богоро́дичен: Ору́жие чи́стая Де́во, храня́щее пре́жде врата́ Еде́мская, плещи́ все́м дае́т, низложи́вшым по́стнически бори́теля врага́, при́сно взыва́ющым: благослове́н Бо́г оте́ц на́ших.
Пе́снь 8.
Ирмо́с: В купине́ Моисе́ю Де́вы чу́до, на сина́йстей горе́, прообрази́вшаго иногда́, по́йте, благослови́те и превозноси́те во вся́ ве́ки.
Сле́з ва́ших ка́пли угаси́ша о́гнь грехо́вный, ре́ку же чуде́с показа́ша все́м на́м, вся́кия стра́сти потопля́ющую, притека́ющих к ва́м пресла́внии отцы́.
Ве́ру и наде́жду неразори́му, и любо́вь и́стинну име́сте отцы́, и ми́лостивное прилежа́ние, терпе́ние благо́е и поуче́ние слове́с духо́вных, смиренному́дрство и соверше́нное беззло́бие.
Подвиза́стеся до́бре, победи́вше вся́ вра́жия де́йства, и на коне́ц жития́ венча́стеся му́дрии, и ко все́м преподо́бным причто́стеся, с ни́миже ва́с чти́м, и превозно́сим Христа́ во ве́ки.
Богоро́дичен: Спаси́ мя Ма́ти Бо́жия, спасе́ния нача́ло ми́рови я́вльшися, избавля́ющи мя́ молвы́ нечи́стых страсте́й и вся́кия проти́вныя ско́рби, да Тя́ сла́влю во вся́ ве́ки.
Пе́снь 9.
Ирмо́с: От Бо́га Бо́га Сло́ва, неизрече́нною му́дростию, прише́дшаго обнови́ти Ада́ма, я́дию в тле́ние па́дшаго лю́те, от Святы́я Де́вы неизрече́нно воплоти́вшагося на́с ра́ди, ве́рнии единому́дренно пе́сньми велича́ем.
Се́ отве́рзеся ва́м отцы́, Ца́рство Небе́сное, сконча́вшым до́брое тече́ние, ви́дите, я́же ви́дят а́нгели, и возда́ние трудо́в подае́т ва́м по́чести Бо́г почита́яй вы́: те́м отцы́ святи́и ублажа́ем ва́с.
Сокруше́нным се́рдцем Бо́гу угоди́вше, сокруши́сте бесо́в ко́зни, и сокруше́нныя от ни́х испра́висте Богоно́сцы: те́м ублажа́ем ва́с ве́рно, кла́няющеся ра́це моще́й ва́ших, Богоблаже́ннии.
Вы́спрь к Бо́гу име́вше мы́сль, Богоно́снии отцы́ преподо́бнии земна́я оста́висте, и небе́сная восприя́сте, трудо́в ра́ди ва́ших и воздержа́ния неосла́бнаго: сего́ ра́ди почита́ем ва́с.
Богоро́дичен: Пощади́ мя Го́споди, пощади́, егда́ хо́щеши ми́ суди́ти, и не осуди́ мене́ во о́гнь, ни я́ростию Твое́ю обличи́ мене́: мо́лит Тя́ Христе́, ро́ждшая Тя́ Де́ва, и а́нгельстии собо́ри, и преподо́бных соста́вы.
Свети́лен.
Подо́бен: Посети́л ны́ е́сть:
Процвели́ есте́ я́ко фи́никс Дави́дски отцы́, оби́тели яви́стеся Ду́ха Пресвята́го, и сла́вни вселе́нней показа́вшеся, о на́с непреста́нно моли́те, почита́ющих ве́рою пречестну́ю па́мять ва́шу преподо́бнии.
Богоро́дичен: Тя́ пе́сньми немо́лчными ублажа́ем Де́во, я́ко от Тро́ицы Еди́наго родила́ еси́ Богоро́дице, и но́сиши на Боже́ственную руку́ Пребога́тое Сло́во, непреме́нно и неизме́нно.
На хвали́тех стихи́ры, гла́с 4.
Подо́бен: Да́л еси́ зна́мение:
Светле́йше просия́вши, ꙳ я́коже со́лнце преподо́бнии, ꙳ всепра́зднственная па́мять ва́ша, ꙳ луча́ми облистава́ет ꙳ ва́ших доброде́тельных дея́ний блаже́ннии, ꙳ озаря́ющи ве́рных чу́вства све́том чуде́с ва́ших: сию́ у́бо пра́зднующе ра́достно ва́с восхваля́ем, и ве́рно ублажа́ем всепра́зднственную па́мять ва́шу. [Два́жды.]
Я́коже друзи́и а́нгели земни́и пожи́ли есте́, ꙳ воздержа́нием те́ло свое́ удручи́вше всесла́внии, ꙳ бде́нием и па́мятию сме́ртною, ꙳ приле́жно помышля́юще, ꙳ Боже́ственныя отцы́ возраща́ху, ꙳ и вели́кими восхожде́нии ꙳ к жела́нию верхо́вному. ꙳ Те́м вои́стинну прибли́жилися есте́, ꙳ к самому́ ка́меню Христу́ краеуго́льному.
Стра́сти теле́сныя ꙳ воздержа́нием утоми́ли есте́, ꙳ и приле́жным моле́нием, ꙳ зми́я льсти́ваго сле́зными пото́ки ꙳ удави́ли есте́ отцы́ преподо́бнии: ꙳ и угоди́ли есте́ Бо́гу па́че ине́х досточу́днии. ꙳ Те́м ва́с украси́ небе́сными дарова́ньми ꙳ Иису́с человеколю́бец, ꙳ и Спа́с ду́ш на́ших.
Сла́ва, гла́с 8:
Преподо́бнии отцы́, поучи́вшеся де́нь и но́щь в зако́не Госпо́дни, сподо́бистеся дре́ва живо́тнаго снасажде́ни бы́ти, и пло́д ва́шего страда́ния венцы́ процвете́. Дерзнове́ние иму́ще к подвигополо́жнику Бо́гу, и на́м испроси́те очище́ние, и ве́лию ми́лость.
И ны́не, Богоро́дичен:
Влады́чице, приими́ моли́тву ра́б Твои́х, и изба́ви на́с от вся́кия ну́жды и печа́ли.
Крестобогоро́дичен: Пречи́стая я́ко узре́ Тя́ пло́тию ви́сяща на Кресте́, и се́рдцем растерза́ющися вопия́ше слезя́щи: Сло́ве, ка́мо заше́л еси́, прелюби́мый Иису́се Сы́не Мо́й Го́споди? не оста́ви Мене́ еди́ну Христе́, ро́ждшую Тебе́.
А́ще и́мут на стихо́вне Сла́ва, и ты́ глаго́ли:
И ны́не, вече́рний Богоро́дичен, или́ Крестобогоро́дичен.