7-й день

Собо́р свята́го сла́внаго Проро́ка, Предте́чи и Крести́теля Иоа́нна

Собор Предтечи и Крестителя Господня Иоанна

ВЕ́ЧЕР

Стихоло́гия не быва́ет бде́ния ра́ди бы́вшаго, кроме́ суббо́ты. На Го́споди, воззва́х: стихи́ры пра́здника 3 глас 2:

Просвети́теля нашего,/ просвеща́ющаго вся́каго челове́ка,/ ви́дев Предте́ча крести́тися прише́дша,/ ра́дуется душе́ю, и трепе́щет,/ руко́ю показу́ет Его́, и глаго́лет лю́дем:/ Сей избавля́яй Изра́иля, свобожда́яй нас от истле́ния./ О безгре́шный Христе́ Бо́же наш, сла́ва Тебе́!

Изба́вителю на́шему, от раба́ креща́ему,/ и Ду́ха прише́ствием свиде́тельствуему,/ ужасо́шася зря́ще, А́нгельская во́инства./ Глас же с Небесе́ принесе́ся от Отца́:/ Сей, Его́же Предте́ча руко́ю креща́ет,/ Сын Мой есть возлю́бленный, о Не́мже бла́говоли́х./ Христе́ Бо́же наш, сла́ва Тебе́!

Иорда́нския струи́ Тебе́, Исто́чника, прия́ша,/ и Уте́шитель в ви́де голуби́не схожда́ше:/ приклоня́ет ве́рх Приклони́вый Небеса́./ Зове́т и вопие́т бре́ние Зижди́телю:/ что ми повелева́еши, я́же вы́ше мене́?/ А́з тре́бую Твоего́ креще́ния,/ о безгре́шный Христе́ Бо́же наш, сла́ва Тебе́!

И Предте́чи 3. Глас 1.

Подо́бен: Всехва́льнии му́ченицы:

Ви́дев тя гряду́ща, Христе́, к себе́ Предте́ча,/ и Креще́ния прося́ща,/ с тре́петом возопи́:/ что ми повелева́еши,/ я́же па́че си́лы соверши́ти?/ О Всеси́льне Го́споди,/ ка́ко руко́ю косну́ся Тебе́,/ руко́ю вся содержа́щаго?/ Ты мя па́че крести́ раба́ Твоего́.

Яви́хся ве́сь Челове́к ны́не,/ присту́пен тебе́ бы́х,/ Естество́м Непристу́пный:/ во́лею обнища́х Бога́т сы́й,/ я́ко да обнища́вшее обогащу́ нетле́нием и избавле́нием./ Приступи́, крести́ тле́нию неподлежа́щаго,/ и мир от тли́ изыма́ющаго.

Содержи́мь е́смь отвсю́ду,/ и ка́мо бежа́ти недоуме́юся,-/ рече́ Зижди́телю Предте́ча,-/ пото́к сы́й пи́щный, Ще́дре,/ ка́ко у́бо Тя ре́чныя вше́дшаго прии́мут струи́,/ излива́юща спасение,/ почита́ющим Твое́ свято́е, Сло́ве, явле́ние?

Сла́ва, глас 6:

Во пло́ти свети́льниче, Предте́че Спа́сов,/ прозябе́ние непло́дныя,/ дру́же Су́щаго от Де́вы, Ему́же взыгра́ньми во утро́бе поклони́лся еси́/ и крести́л еси́ в вода́х Иорда́нских./ Сего́ моли́, мо́лимся, Проро́че,/ бу́дущих избежа́ти треволне́ний.

И ны́не, пра́здника, глас то́йже:

Бог Сло́во яви́ся пло́тию роду челове́ческому,/ стоя́ше крести́тися во Иорда́не,/ и глаго́лаше к Нему́ Предте́ча:/ ка́ко простру́ ру́ку и прикосну́ся верху́ Держа́щаго вся́ческая?/ А́ще и от Мари́и еси́ Младенец,/ но вем Тя, Бо́га Преве́чнаго,/ по земли́ хо́диши, пева́емый от Серафи́м,/ и раб Влады́ку креща́ти не научи́хся./ Непостижи́ме Го́споди, сла́ва Тебе́.

Вход. Проки́мен, глас 7: Бог наш на Небеси́ и на земли́,/ вся, ели́ка восхоте́, сотвори́.

Стих: Во исхо́де Изра́илеве от Еги́пта, дому́ Иа́ковля из люде́й ва́рвар,/ бы́сть Иуде́я свя́тыня Его́, Изра́иль о́бласть Его́.

Стих: Мо́ре ви́де и побеже́, Иорда́н возврати́ся вспять.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?

И па́ки: Бог наш на Небеси́ и на земли́:

Та́же, ектения́.

На стихо́вне стихи́ры, глас 4.

Подо́бен: Дал еси́ зна́мение:

Я́ко ви́де Тя Влады́ко, Иоа́нн Предте́ча, к нему́ иду́ща,/ ужа́сен бы́в,/ я́ко благонра́вен ра́б со стра́хом вопия́ше:/ ко́е смире́ние, Спа́се?/ ка́я нищета́, в ню́же оде́ялся еси́?/ Бога́тством бла́гости смири́вшагося челове́ка возне́с,/ я́ко Благоутро́бен,/ я́ко в него́ оде́явыйся?

Стих: Мо́ре ви́де и побеже́,/ Иорда́н возврати́ся вспять.

Гряди́ ко Мне́,-/ та́инство соверша́ющему спаси́тельное Предте́чи противовеща́л еси́,-/ со стра́хом послужи́, Спа́су вся́ческих, и не ужаса́йся./ Сокруше́ннаго бо Ада́ма грехо́м обновля́я,/ креща́юся, я́ко Челове́к, естество́м Нескве́рный,/ Иорда́нскими вода́ми,/ в ни́хже ви́диши прише́дша Мя.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?

Со́лнце очища́емо кто́ от земноро́дных ви́де,-/ Иоа́нн проти́ворече́,-/ и Одева́ющаго не́бо о́блаки обнажа́ема всего́,/ и исто́чники, и ре́ки Содева́ющаго в во́ды входя́ща?/ Дивлю́ся несказа́нному смотре́нию Твоему́, Влады́ко,/ не отягчи́ раба́ Твоего́ стра́шными повелении.

Сла́ва, глас 4. Византи́ево:

Я́ко Духа рачи́тель/ и бла́года́ти Боговеща́нная ла́стовица,/ я́сно смотре́ние Царе́во,/ челове́ческому роду из Чи́стыя светло возсия́вшаго/ челове́ков на обновле́ние/ просвети́л еси́, Предте́че,/ сетующих обы́чай отъе́мля в коне́ц,/ и жи́зни присносу́щныя прия́ти направля́я сердца́, в покая́нии креща́емых,/ блаже́нне Богоприя́тне.

И ны́не, глас то́йже:

Прииди́те, подража́им мудрыя девы,/ прииди́те, сря́щим я́вльшагося Влады́ку,/ я́ко прии́де, я́ко Жени́х, ко Иоа́нну./ Иорда́н ви́дев Тя убоя́ся и пожда́./ Иоа́нн вопия́ше:/ не сме́ю держа́ти верха́ Безсме́ртнаго./ Дух схожда́ше в ви́де голуби́не освяти́ти во́ды./ И глас с Небесе́:/ Сей есть Сын Мой,/ прише́дый в мир спасти́ род челове́ческий,/ Го́споди, сла́ва Тебе́.

Тропа́рь, глас 2:

Па́мять пра́веднаго с похвала́ми,/ тебе́ же довле́ет свиде́тельство Госпо́дне, Предте́че:/ показа́л бо ся еси́ вои́стинну и проро́ков честне́йший,/ я́ко и в струя́х крести́ти сподо́бился еси́ Пропове́даннаго./ Темже за и́стину пострада́в ра́дуяся,/ благовести́л еси́ и су́щим во а́де Бога, я́вльшагося пло́тию,/ взе́млющаго грех мира/ и подаю́щаго на́м ве́лию ми́лость.

Сла́ва, и ны́не, пра́здника:

Во Иорда́не креща́ющуся Тебе́, Го́споди,/ Тро́йческое яви́ся поклоне́ние:/ Роди́телев бо глас свиде́тельствоваше Тебе́,/ возлю́бленнаго Тя Сына имену́я,/ и Дух в ви́де голуби́не,/ изве́ствоваше словесе утвержде́ние./ Явле́йся Христе́ Бо́же,/ и мир просвеще́й, сла́ва Тебе́.

На повече́рии, по трисвято́м, конда́к Предте́чи: Плотска́го Твоего́ прише́ствия: На полу́нощнице глаго́лем кафи́зму обы́чную. По 1-м трисвято́м, вме́сто: Се Жени́х: глаго́лем тропа́рь пра́здника. По 2-м трисвя́то́м, конда́к Предте́чи: Плотска́го Твоего́ прише́ствия:

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, Предте́чи. И ны́не, пра́здника.

По 1-й стихоло́гии седа́лен, глас 1.

Подо́бен: Ка́мени запеча́тану:

Иису́су ро́ждшуся от Де́вы Мари́и/ и во Иорда́не кре́щшуся от Иоа́нна,/ Дух сни́де на Него́, зри́мый в ви́де голуби́не,/ Сего́ ра́ди проро́к со А́нгелы глаго́лаше, зовы́й:/ сла́ва прише́ствию Твоему́, Христе́,/ сла́ва Ца́рствию Твоему́,/ сла́ва смотре́нию Твоему́, Еди́не Человеколю́бче.

Сла́ва, и ны́не, то́йже.

По 2-й стихоло́гии седа́лен, глас 4.

Подо́бен: Яви́лся еси́ днесь:

Во струя́х ви́дев Тя Иорда́нских, крести́тися хотя́ща,/ вели́кий Предте́ча, Христе́, с весе́лием взыва́ше:/ прише́л еси́, и яви́лся еси́,/ Свет Непристу́пный.

Сла́ва, и ны́не, то́йже.

Кано́н пра́здника пе́рвый со ирмосо́м на 6, тропари́ на 4, и други́й со ирмосо́м на 4. (зри в сам день пра́здника). Ирмосы́ обою́ кано́нов пра́здника по два́жды и Предте́чи кано́н на 4. Кано́н Предте́чи. Творе́ние Феофа́ново, его́же краегране́сие: Крести́телю Христо́в, хвале́ния мо́я приими́. Глас 2.

Песнь 1

Ирмо́с: Непроходи́мое волня́щееся мо́ре,/ Бо́жиим Свои́м веле́нием изсуши́вшему,/ и пешеше́ствовати сквозе́ е изра́ильтеския лю́ди наста́вльшему,/ Го́сподеви пои́м: сла́вно бо просла́вися.

Погружа́ема мя страсте́й бу́рею, Предте́че,/ моли́твами твои́ми предвари́в спаси́:/ безстра́стия бо сам был еси́ прия́телище честно́е и чисте́йшее,/ Го́споду свы́ше от младе́нства возложе́н.

Ра́дуяся, Богу предстоя́й А́нгел равноа́нгельнаго благовести́ Заха́рии честно́му,/ твоему́ свяще́нствующу отцу́,/ тя всебла́же́нне, Госпо́дня Предте́чу, и дру́га бы́вша.

Испо́лнен был еси́ Всесвята́го Ду́ха, еще́ во чре́ве твоея́ ма́тере вну́трь носи́мь,/ и взыгра́нием кра́сным Де́вственный Пло́д, ра́дуяся, возвести́л еси́,/ и поклони́лся еси́, проро́че всече́стне.

Непрохо́дный всем челове́ком пе́рвее стра́нный пу́ть жития́ просе́кшаго/ и крести́вшаго Христа́ во Иорда́нских струя́х,/ восхва́лим Госпо́дня Предте́чу, Боже́ственнаго и Богому́драго.

Богоро́дичен: Всеосвяще́нный Де́вства храм, во чре́ве Бо́га Сло́ва чревоноси́вшая,/ притека́ющия к Тебе́ и призыва́ющия, Чи́стая, спаси́ моли́твами Твои́ми,/бе́д разруша́ющи нахожде́ние, Всенепоро́чная.

Катава́сия: Глубины́ откры́л есть дно:

Други́й: Ше́ствует морску́ю: По кли́росом.

Песнь 3. Ин

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свя́т, я́коже Бог наш, и несть пра́веден, па́че Тебе́, Го́споди.

Непло́дствия поноше́ние разреши́л еси́, позна́в Де́вы Боже́ственное Рождество́,/ взыгра́л еси́ ра́дуяся во чре́ве ма́терни, всехва́льне,/ А́нгелов сожи́телю, Госпо́день Предте́че блаже́ннейший.

Стези́ предугото́вив Госпо́дни, ше́ствовал еси́ пред лице́м Его́, проро́че,/ я́ко свети́льник бо всем явля́яй сла́вы О́тчее сия́ние,/ я́вльшееся пло́тию нас ра́ди,/ показа́лся еси́ всех изя́щнейший.

Возсия́л еси́, я́ко у́тро, пра́вды Со́лнце возвеща́я су́щим во тьме:/ всех бо спасе́ния ты был еси́ пропове́дник и Предте́ча,/ и всем глаго́лал еси́:/ ко Христу́ приступи́те ве́рою, и спасе́теся.

Богоро́дичен: Ра́дость неизглаго́ланную прие́мши,/ зачала́ еси́ безсе́менно Твоего́ Влады́ку, всю, Богома́ти, вселе́нную призва́вшаго./ Ему́же и взыва́ем:/ я́ко несть свя́т, па́че Тебе́, Го́споди.

Катава́сия: Кре́пость дая́й:

Други́й: Ели́цы дре́вних:

Конда́к, глас 4:

Яви́лся еси́ днесь вселе́нней,/ и свет Твой, Го́споди, зна́менася на нас,/ в ра́зуме пою́щих Тя:/ прише́л еси́, и яви́лся еси́,/ Свет Непристу́пный.

И́кос:

Галиле́и язы́честей, Завуло́нстей стране́, и Неффали́мстей земли́,/ я́коже рече́ проро́к, Свет вели́к возсия́ – Христо́с./ Омраче́нным светла́ яви́ся Заря́ из Вифлее́ма облиста́ющая,/ па́че же из Мари́и – Госпо́дь, всей вселе́нней возсиява́ет лучи́ Со́лнце пра́вды./ Темже, и́же от Ада́ма нази́и, прииди́те вси́ облече́мся в Него́, да согре́емся:/ покрыва́ет бо нагия и просвеща́ет те́мныя./ Прише́л еси́, и яви́лся еси́, Свет Непристу́пный.

Та́же седа́лен, глас 8.

Подо́бен: Прему́дрости:

Иорда́н струя́ми слу́жит, и Иоа́нн простира́ет ру́ку тле́нную/ я́вльшуся Тебе́, Неви́диме, пло́тию ко Креще́нию./ Но ов у́бо возвраща́шеся вспять со стра́хом,/ ов же а́бие держа́ще с тре́петом Тя, Нетле́ннаго./ Вои́стинну А́гнец Бо́жий, Исто́чник присноживо́тный,/ исто́чники же, и моря́, и челове́ки освяти́в:/ Тро́ица бо просия́ свы́ше,/ Сы́на Тя имену́ет Роди́тель, и Свя́тый Дух схо́дит.

Сла́ва, и ны́не, то́йже.

Песнь 4. Ин

Ирмо́с: Пою́ тя, слу́хом бо, Го́споди, услы́шах и ужасо́хся:/ до ме́не бо и́деши, мене́ ища́ заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Оскверне́нныя омы́ти водо́ю посла́лся еси́,/ от Влады́ки уготовля́я прия́ти взе́млющаго грех Христа́/ и лесть отгоня́ща Богоразу́мия заре́ю, всече́стне.

Я́да ми змии́на угрызе́ния исцели́ти, бла́же́нне, моли́, и́же Христа́ вода́ми крести́в Иорда́нскими,/ в ни́хже змие́в возгнезди́вшуюся зло́бу Спа́с сокруши́.

Му́дростию Бо́жиею укра́шен, прише́л еси́ Христопропове́дник:/ Вопию́щаго бо был еси́ зову́щий, – пока́йтеся! -/ глас, я́ко проро́к провозгласи́,/ Су́щаго па́че всех человек Тя показу́я на́м.

Стра́нное и челове́ки нетре́нное живы́й житие́,/ предста́л еси́ вода́м, всеизря́днейше, Иорданским,/ глас О́тчий слы́шав, и прише́ствие Духа узре́в.

Богоро́дичен: И́же вся созда́вый Госпо́дь, по на́м Сам зи́ждется,/ всели́вся, Всечи́стая, во утро́бу Твою́ всесвяту́ю,/ во о́браз челове́чь оде́яся, и Сво́й о́браз спасе́.

Катава́сия: Услы́шах, Го́споди:

Други́й: Огне́м очи́щся:

Песнь 5. Ин

Ирмо́с: Просвеще́ние во тьме лежа́щих,/ спасе́ние отча́янных, Христе́, Спа́се мой,/ к Тебе́ у́тренюю Царю́ мира,/ просвети́ мя сия́нием Твои́м:/ ино́го бо, ра́зве Тебе́, бога не зна́ю.

Преесте́ственныя доброде́тели светлостьми́ озаре́н,/ я́ко от Небе́снаго тайновожде́ния вода́м предста́л еси́ Иорданским,/ креща́я и очища́я водо́ю, Предте́че,/ве́рою душе́вною приступа́ющия тебе́.

Чи́стый и Нетле́нный Свет хотя́ крести́ти,/ сосу́д чисте́йший показа́лся еси́, Иоа́нне:/ бо́лий бо всех от Него́ предызбра́лся еси́, проро́ков же честне́йший,/ Проро́чествованнаго бо сподо́бился еси́ ви́дети.

По́слан бы́в пред лице́м Госпо́дним,/ всего́ всем стези́ челове́ком показу́я,/ прикаса́ется, трепе́ща, верху́ Влады́чню, и креща́ет, глаго́ля, Предте́ча:/ ино́го, ра́зве Тебе́, бога не вем.

Кто ви́де, или́ кто слы́ша,/ когда́ Безскве́рнаго созда́нию ве́рх преклоня́юща, руко́ю вся Содержа́щаго?/ Тем тре́петно Крести́тель вопия́ше:/ ино́го, па́че Тебе́, бога не вем.

Богоро́дичен: Сын Бо́жий, Сын Твой, Де́во, я́ве показа́ся,/ дела́ я́ко Бог соверша́я во́лею еди́ною./ Те́мже тя вси́, и́стинно Богородицу, и госпо́дьственно имену́ем:/ ины́я бо ма́тере Бо́жия не вемы.

Катава́сия: Иису́с, живота́ Нача́льник:

Други́й: Врага́ те́мнаго:

Песнь 6. Ин

Ирмо́с: В бе́здне грехо́вней валя́яся,/ неизсле́дную милосердия Твоего́ призыва́ю бе́здну:/ от тли, Бо́же, мя возведи́.

Ты Сло́ва глас предше́ствовал еси́,/ и я́ко светоно́сная звезда́ возсия́л еси́,/ провозвеща́я, Предте́че, ты пра́вды Со́лнца.

Земны́х попече́ний не уве́дел еси́,/ и Небе́сными наде́ждами обогати́лся еси́:/ на земли́, я́ко А́нгел, жи́знь соверши́л еси́, всеблаже́нне.

Проро́ков тя печа́ть зна́ем,/ я́ко ве́тхаго и но́ваго хода́тая,/ и Крести́теля, и Предте́чу Спа́са Христа́ предвозвеща́ем.

Богоро́дичен: Несказа́нно вои́стинну зача́тие,/ неизрече́нно Рожде́ство́ Твое́ и непостижи́мо всем верным познава́ется и ве́руется,/ Еди́на Богоневе́сто.

Катава́сия: Глас Словесе́:

Други́й: Вожделе́ннаго я́вствова:

Конда́к, глас 6:

Плотска́го Твоего́ прише́ствия убоя́вся,/ Иорда́н стра́хом возвраща́шеся:/ проро́ческое же служе́ние исполня́я,/ Иоа́нн тре́петом спря́ташеся;/ А́нгельския чи́ни ужаса́хуся,/ зря́ще Тя, во струя́х пло́тию креща́ема;/ и вси́, су́щии во тьме, озаря́хуся,/ воспева́юще Тя, я́вльшагося, и просвети́вшаго вся.

И́кос:

Осле́пшу Ада́му во Еде́ме, яви́ся Со́лнце из Вифлее́ма/ и отве́рзе ему́ зе́ницы, омы́в сия́ Иорда́нскими вода́ми./ Очерне́вшему и омраче́нному Свет возсия́ неугаси́мый./ Уже́ ему́ несть но́щь, но всегда́ де́нь,/ е́же ко у́тру у́тро,/ его́ ра́ди роди́ся;/ к ве́черу бо сокры́ся, я́коже пи́шет,/ обре́те зарю́, возставля́ющую того́./ И́же к ве́черу пады́й измени́ся мра́ка/ и дости́же ко у́тру Я́вльшагося, и Просвети́вшаго вся.

Песнь 7. Ин

Ирмо́с: Купина́ в горе́ огненеопа́льная/ и росоно́сная пе́щь халде́йская я́ве предписа́ Тя, Богоневе́сто:/ Боже́ственный бо, Невеще́ственный в веще́ственнем чре́ве Огнь неопа́льно прия́ла еси́./ Те́мже из Тебе́ Ро́ждшемуся пое́м:/ благослове́н еси́, Бо́же оте́ц наших.

Свя́щенноде́йствовав Креще́ние и соверши́в, Предте́че,/ я́же от Бо́га я́ве да́нныя тебе́ тайны,/ я́ко а́гнец незло́бив священноде́йствуемый, прине́слся еси́ же́ртва./ Темже с тобо́ю согласно пое́м:/ благослове́н Бог оте́ц наших.

Но́вый Илия́ ты был еси́,/ со дерзнове́нием, Предте́че, и царя́ облича́я беззако́нновавша,/ и житие́ невеще́ственно показу́я на́м, я́коже о́н, требла́же́нне./ Темже с тобо́ю, проро́че, пое́м:/ благослове́н Бог оте́ц наших.

И́же проро́ков бо́льший, и апо́столов, Предте́че, Христо́вых/ Боже́ственную честь насле́довав,/ ты зако́на исполне́ние, и нача́ло я́ве но́выя бла́года́ти яви́лся еси́./ Темже с тобо́ю, требла́же́нне, пое́м:/ благослове́н Бог оте́ц наших.

Богоро́дичен: Песнослове́ньми Всечи́стую и Богоприя́тную Влады́чицу,/ бла́гочести́вии, досто́йно вси воспои́м,/ я́ко Бога ро́ждшую Единоро́днаго нам челове́ком я́вльшася./ К Нему́же, ве́рнии, согласно пое́м:/ благослове́н Бог оте́ц наших.

Катава́сия: Ю́ноши благочести́выя:

Други́й: Опали́ струе́ю зми́евы главы́:

Песнь 8. Ин

Ирмо́с: Пе́щь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Тя, и́же на земли́ равноа́нгельна я́вльшася премене́нным житие́м/ и всех вы́шша, Иоа́нне всебла́же́нне, ра́достно почита́ем, зову́ще:/ благослови́те, вся дела́ Госпо́дня, Го́спода.

Еди́но в Трех Боже́ства́ Существо́, Единосу́щными Ипоста́сьми, проро́че, научи́л еси́:/ гла́сом бо Роди́теля, и прише́ствием Духа позна́л еси́ Креща́емаго:/ Сло́ва Бо́жия Присносу́щнаго.

У́тро мы́сленное, Со́лнце возвеща́я, е́же из Де́вы возсия́вшее,/ из непло́дныя предте́кл еси́, Иоа́нне всече́стне,/ и А́гнца пропове́дал еси́, ми́ра грех человеколю́бием взе́млющаго.

Свы́ше нас ны́не назира́я, бла́же́нне, твои́ми моли́твами сохрани́,/ Боже́ственному пропове́данию после́дующия твоему́, всебла́же́нне,/ и во уче́ниих пребыва́юще, Предте́че, Боже́ственных и спаси́тельных твои́х догма́тов.

Богоро́дичен: Сла́вы О́тчия зачала́ еси́ несказа́нно Преве́чное Осия́ние/ и Сло́во Безнача́льное, в нача́ле су́щее разумева́емое,/ и ны́не из Тебе́ перворожде́нна, Всечи́стая, бы́вша неизме́нно тва́ри.

Катава́сия: Та́йну пресла́вную Вавило́нская:

Други́й: Свобо́дна у́бо тва́рь познава́ется:

На 9-й пе́сни Честне́йшую: не пое́м, но пое́м припе́вы пра́здника, и Предте́чи, и ирмосы́.

Припе́в: Велича́й, душе́ моя́,/ Честне́йшую го́рних во́инств, Де́ву Пречи́стую Богоро́дицу.

Песнь 9.

Ирмо́с: Недоуме́ет вся́к язы́к благохвали́ти по достоя́нию,/ изумева́ет же у́м и премирный пе́ти Тя, Богородице./ Оба́че, Бла́га́я су́щи, ве́ру приими́,/ и́бо любо́вь ве́си Боже́ственную нашу:/ Ты бо христиа́н еси́ Предста́тельница, Тя велича́ем.

Та́же вторы́й ли́к пое́т то́йже припе́в и ирмо́с.

Велича́й, душе́ моя́,/ от Предте́чи Креще́ния Прося́ща.

Велича́й, душе́ моя́,/ во Иорда́не Прише́дшаго крести́тися.

Дави́де, прииди́ Духом к просвеще́нным,-/ ны́не приступи́те,– по́й к Богу,-/ ве́рою, – глаго́ля, – просвети́теся!/ Сей ни́щий воззва́ Ада́м в паде́нии,/ и́бо того́ услы́ша Госпо́дь,/ прише́д, струя́ми Иорда́нскими тле́ннаго же обнови́. (Два́жды)

Велича́й, душе́ моя́,/ от Оте́ческаго гла́са свиде́тельствованна.

Иса́ия, – измы́йтеся, очи́ститеся! – глаго́лет, – лукавствия пред Го́сподем оста́вите./ Жа́ждущии, на во́ду жи́ву иди́те:/ кропи́т бо водо́ю, обновля́я Христо́с приступа́ющия к Нему́ ве́рою/ и к животу́ нестаре́емому креща́ет Духом.

Велича́й, душе́ моя́,/ Еди́наго от Тро́ицы,/ прекло́ншаго вы́ю, и креще́ние прие́мша.

Соблюда́емся благода́тию, ве́рнии, и печа́тию:/ я́ко бо губи́теля, бежа́ша пра́га евре́и, дре́вле окрова́влена,/ та́ко и на́м исхо́дное Боже́ственное сие́, пакибытия́ ба́ня бу́дет./ Отсю́ду и Тро́ицы у́зрим Свет Незаходи́мый.

Та́же пе́рвый ли́к пое́т втора́го кано́на припе́в:

Днесь Влады́ка/ преклоня́ет вы́ю под ру́ку Предте́чеву.

И ирмо́с: О, па́че ума́ Рожде́ства́ Твоего́ чуде́с!/ Неве́сто Всечи́стая, Ма́ти благослове́нная!/ Е́юже получи́вше всесоверше́нное спасение,/ досто́йно хва́лим, я́ко Благоде́теля, да́р нося́ще песнь благодаре́ния.

Та́же вторы́й ли́к пое́т то́йже припе́в, и ирмо́с.

Днесь Иоа́нн креща́ет Влады́ку/ во струя́х Иорда́нских.

Уве́дехом Моисею купино́ю явле́нная,/ гряди́ стра́нными уста́вы соде́ланная:/ я́ко бо спасе́ся, О́гнь нося́щи, Де́ва, Светоно́сна ро́ждши Благоде́теля,/ во Иорда́нских же струя́х явле́нна.

Днесь Влады́ка/ вода́ми погреба́ет челове́ческий грех.

Помазу́еши, соверша́я челове́ческое существо́, Ца́рю́ Безнача́льне,/ Ду́ха обще́нием, струя́ми чи́стыми отмы́в/ и тьмы́ кре́пость же посра́мль возвы́шенную;/ ны́не в безпреста́ннем возда́ти житии́.

Ин

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к на́м прише́дшаго из боку́ Де́ви́чу,/ неизрече́нно воплоти́вшая, Благослове́нная Всечи́стая,/ Тя Богородице, велича́ем.

Припе́в к тропаре́м Предте́чевым:

Велича́й, душе́ моя́,/ [и́же] во проро́цех вели́каго Предте́чу.

Из пусты́ни Предте́ча глас Сло́во показу́ет, пло́тски к на́м прише́дшее,/ и прису́щее прера́достно крести́ти гото́вится,/ ду́ши очища́ющее от греха́ ве́ры ра́ди.

Благода́ть же и зако́н хода́тая тя че́стна я́ве предлага́ют:/ о́в у́бо запеча́тствующаго, о́вая же начина́ющаго,/ всех проро́ков Сло́вом предпочте́ннаго,/ па́че ви́димых пожи́вша, всече́стне.

Безтеле́сным подо́бное житие́ показа́в, со А́нгельскими ли́ки весели́тся/ и, престо́лу предстоя́ Влады́чню, ра́дуется,/ восхваля́ющим оставле́ние и спасе́ние испроша́я.

Припе́в пе́рвый: Велича́й, душе́ моя́,/ Честне́йшую го́рних во́инств,/ Де́ву Пречи́стую Богоро́дицу.

Богоро́дичен: За благоутро́бие всех Изба́витель Челове́к быва́ет/ и плотско́е рожде́ние прие́млет,/ человеколю́бно па́че челове́ков сы́й Человеколю́бец,/ из де́вственнаго ложесна́ Твоего́, Богороди́тельнице Всеблаже́нная.

И посем на схо́де пое́м о́ба ли́ка вку́пе припе́в пра́здника. Та́же катава́сия: Недоуме́ет вся́к язы́к: Та́же припе́в Богоро́дице, и ирмо́с: О, па́че ума́: И покло́н.

Свети́лен Предте́чи.

Подо́бен: Ду́хом во святи́лищи:

Стези́ предугото́вал еси́ чу́дно Го́сподеви:/ глас бо был еси́ Того́ прише́ствия и пропове́дник и́стиннейший,/ проро́ков превы́шший, блаже́нне Иоа́нне:/ ты Свет ви́дел еси́, я́ко неизглаго́ланное Его́ сконча́в смотре́ние.

Сла́ва, и ны́не, пра́здника:

Яви́ся Спа́с, Благода́ть и И́стина во струя́х Иорда́нских/ и су́щия во тьме и се́ни спя́щия просвети́л есть,/ и́бо прии́де и яви́ся Свет Непристу́пный.

На хвали́тех стихиры на 4, глас 1.

Самогласны: Свет от Света/ возсия́ ми́ру Христо́с, Спа́с наш,/ явле́йся Бог:/ Сему́, лю́дие, поклони́мся.

Ка́ко Тя, Христе́,/ раби́, Влады́ку, досто́йно почти́м?/ я́ко в вода́х всех нас обнови́л еси́.

Ты во Иорда́не кре́щся, Спа́се наш,/ во́ды освяти́л еси́,/ дла́нию раба́ рукополага́емый,/ и стра́сти ми́ра врачу́яй./ Ве́лие та́инство явле́ния Твоего́,/ Человеколю́бче Го́споди, сла́ва Тебе́.

И́стинный Свет яви́ся/ и всем просвеще́ние да́рует./ Креща́ется Христо́с с на́ми,/И́же вся́кия вы́шши чистоты́,/ влага́ет свяще́ние воде́,/ и душа́м сие́ очище́ние быва́ет,/ земно́е явля́емое, и вы́шше Небе́с разумева́емое./ Ба́нею спасе́ние, водо́ю же Дух,/ погруже́ния ра́ди, и́же к Богу, наш восхо́д быва́ет./ Чуде́сна дела́ Твоя, Го́споди, сла́ва Тебе́.

Сла́ва, глас 6. Самогласен:

А́нгел из непло́дных ложе́сн произше́л еси́, Крести́телю,/от самы́х пеле́н в пусты́ню всели́лся еси́,/ печа́ть же всех проро́ков показа́лся еси́:/ Его́же бо они́ многообра́зно ви́деша,/ и гада́тельно пропове́даша,/ Сего́ крести́ти во Иорда́не сподо́бился еси́./ Глас же услы́шал еси́ Оте́ческий с Небесе́,/ свиде́тельствующ Его́ Сыновство́,/ и Ду́ха ви́дел еси́ голуби́ным ви́дом,/ Глас влеку́щаго на Креща́емаго./ Но, о всех проро́ков превы́шший,/ не преста́й моли́тися о нас,/ ве́рно творя́щих твою́ па́мять.

И ны́не, глас 2. Анато́лия:

Днесь Христо́с на Иорда́н прии́де крести́тися,/ днесь Иоа́нн каса́ется верху́ Влады́чню./ Силы Небе́сныя ужасо́шася,/ пресла́вное ви́дяще та́инство./ Мо́ре ви́де и побеже́,/ Иорда́н, ви́дев, возврати́ся./ Мы́ же просве́щшеся вопие́м:/ сла́ва яви́вшемуся Богу,/ и на земли́ ви́денному, и просвети́вшему мир.

Славосло́вие вели́кое. По трисвято́м тропа́рь Предте́чи. Сла́ва, и ны́не, пра́здника, ектении́ и отпу́ст, и ча́с пе́рвый. На 1-м часе́ тропа́рь пра́здника. Сла́ва, Предте́чи. И ны́не, Богородичен часо́в. По трисвято́м конда́к пра́здника, и про́чее. И соверше́нный отпу́ст.

НА ЛИТУРГИ́И:

Блаже́нны пра́здника, песнь 3-я, на 4 и свята́го песнь 6-я, на 4. По вхо́де тропа́рь пра́здника и Предте́чи. Сла́ва, конда́к Предте́чи. И ны́не, пра́здника. Вхо́дное: Спаси́ ны, Сыне Бо́жий, во Иорда́не крести́выйся, пою́щия Ти: аллилу́ия. Си́це пое́м и до отда́ния. Проки́мен, глас 7: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой: Апо́стол в Дея́ниих, зача́ло 42. Аллилу́ия, глас 5: Свет возсия́ пра́веднику/ и правым сердцем веселие. Стих: Весели́теся, пра́веднии, о Го́споде: Ева́нгелие от Иоа́нна, зача́ло 3. Прича́стен: Яви́ся благода́ть Бо́жия: Други́й: В па́мять ве́чную бу́дет пра́ведник:

Молитва

Крести́телю Христо́в, пропове́дниче покая́ния, ка́ющагося не презри́ ме́не, но, совокупля́яся с во́и Небе́сными, моли́ся ко Владыце за ме́не, недосто́йнаго, уны́лаго, немощна́го и печа́льнаго, во мно́гия бе́ды впа́дшаго, утружде́ннаго бу́рными по́мыслы ума́ моего́. Аз бо есмь верте́п злых дел, отню́дь не име́яй конца́ грехо́вному обы́чаю, пригвожде́н бо есть ум мой земны́м веще́м. Что сотворю́, не вем, и к кому́ прибе́гну, да спасе́на бу́дет душа́ моя́, то́кмо к тебе́, свя́тый Иоа́нне, благода́ти тезоимени́те, я́ко тя пред Го́сподем, по Богоро́дице, вем бо́льша быти рожде́нных всех: ты бо сподо́бился еси косну́тися верху́ Царя́ Христа́, взе́млющаго грехи́ ми́ра, А́гнца Божия. Его́же моли́ за гре́шную мою́ ду́шу, да поне́ отны́не, в пе́рвый-надеся́ть час, понесу́ тяготу́ благу́ю и прииму́ мзду с после́дними. Ей, Крести́телю Христо́в, честны́й Предте́че, кра́йний проро́че, пе́рвый во благода́ти му́чениче, по́стников и пусты́нников наста́вниче, чистоты́ учи́телю и бли́жний дру́же Христо́в, тя молю́, к тебе́ прибега́ю, не отри́ни ме́не от твоего́ заступле́ния, но возста́ви мя, па́дшагося мно́гими грехи́, обнови́ ду́шу мою́ покая́нием, я́ко вторы́м креще́нием, поне́же обо́его нача́льник еси́, креще́нием омыва́яй грех, покая́ние же пропове́дуяй во очище́ние кого́ждо дел скве́рных; очи́сти у́бо мя, грехми́ оскверне́ннаго, и понуди́ вни́ти, а́може ничто́ же скве́рно вхо́дит, в Ца́рствие Небе́сное, Ами́нь.

А́ще прилучи́тся собо́р Иоа́нна Предте́чи в неде́лю, пое́м си́це: в суббо́ту ве́чера на ма́лой вече́рни стихиры воскре́сны и Богородицы, по обы́чаю. На вели́цей вече́рни по кафи́сме, на Го́споди, воззва́х: стихиры воскре́сны гласа, 3. И пра́здника, 4, глас 2: Просвети́теля нашего: и Предте́чи 3, глас 1, подо́бен: Всехва́льнии му́ченицы: Сла́ва, Предте́чи. И ны́не, Богородичен пе́рвый, гласа. Проки́мен дне. На литии́ стихиры пра́здника, пое́мыя на са́мый пра́здник. Сла́ва, пра́здника, глас 8: Го́споди, испо́лнити хотя: И ны́не, глас то́йже: Днесь тва́рь просвеща́ется: На стихо́вне стихиры воскре́сны, от алфави́та. Сла́ва, Предте́чи, глас 4: И ны́не, пра́здника. На благослове́нии хле́бов тропа́рь, Богородице Де́во: еди́ножды, и пра́здника еди́ножды, и Предте́чи, еди́ножды. И чтем в Посла́ниих апостольских.

ЗРИ: А иде́же несть всено́щнаго, на повече́рии по Досто́йне и по трисвято́м глаго́лем конда́к Предте́чи. Сла́ва, и ны́не, пра́здника.

На у́трени: На Бог Госпо́дь, тропа́рь воскре́сен два́жды. Сла́ва, Предте́чи. И ны́не, пра́здника. По обы́чных стихоло́гиях седальны воскре́сны с Богородичны и́х и чте́ние в толкова́нии Ева́нгелия, е́же от Матфе́я, неде́ля по Креще́нии. По непоро́чнах тропари́ и́х, и ипакои́ гласа. И чтем в толкова́нии Ева́нгелия, неде́ля ряд. А́ще ли же неде́ля ря́д бу́дет во отсту́пке, тогда́ Ева́нгелие неде́ли ря́д не чтем. Степе́нна гласа, и проки́мен: Вся́кое дыха́ние: Ева́нгелие воскре́сно. Воскресение Христо́во: и про́чее воскре́сно. Кано́н воскре́сен со ирмосо́м на 4, и пра́здника, о́ба кано́на на 6, и Предте́чи на 4. Катава́сия пра́здника, о́ба лика вку́пе. По 3-й пе́сни конда́к и и́кос пра́здника и седа́лен Предте́чи два́жды: Сла́ва, и ны́не, пра́здника. И чте́ние о принесе́нии руки́ Предте́чевы. По 6-й пе́сни конда́к и и́кос Предте́чи. На 9-й пе́сни пое́м Честне́йшую: Свети́лен воскре́сен. Сла́ва, Предте́чи. И ны́не, пра́здника. На хвали́тех стихиры воскре́сны 4: и пра́здника 4, со стихи́ пра́здничными, и́же пи́саны ве́чера на стихо́вне. Та́же глаго́лем стих на глас 6-й: Возвесели́тся пра́ведник: и пое́м самогла́сну стихи́ру Предте́чи, я́же пи́сана на Сла́ву, на хвали́тех: А́нгел из непло́дных ложе́сн: Сла́ва, стихи́ра Ева́нгельская. И ны́не: Преблагослове́нна еси́, Богородице Де́во: Славосло́вие вели́кое: и тропа́рь воскре́сен то́чию: и ектении́, и отпу́ст. На 1-м часе́ тропа́рь воскре́сен: Сла́ва, пра́здника: И ны́не, Богородичен часо́в. По трисвято́м конда́к пра́здника. На 3-м часе́ тропа́рь воскре́сен. Сла́ва, Предте́чи: И ны́не, Богородичен часо́в. По трисвято́м конда́к Предте́чи. Та́кожде глаго́лем и на про́чих часе́х тропа́рь и конда́к пра́здника и Предте́чи, пременя́юще.

На Литурги́и: Блаже́нны Окто́иха на 4: и пра́здника песнь 3-я, на 4, обои́х кано́нов, и Предте́чи песнь 6-я, на 4. По вхо́де тропа́рь воскре́сен, и пра́здника, и Предте́чи. Та́же Сла́ва, конда́к Предте́чи. И ны́не, пра́здника. Проки́мен, Апостол, аллилу́ия, и Ева́нгелие Неде́ли по Богоявле́нии, и Предте́чи. Прича́стен пра́здника и Предте́чи: В па́мять ве́чную: А́ще не бу́дет отсту́пки, то неде́ли ряд чтем Апо́стол и Ева́нгелие, под зача́ло. А́ще ли же отсту́пка бу́дет, Апо́стола и Ева́нгелия неде́ли ря́ду не чтем и проки́мен гла́са оставля́ется.

Подоба́ет ве́дати:

А́ще прилучи́тся попра́зднство Креще́ния Христо́ва в неде́лю, а свя́тый пое́тся на 4, или́ на 6.

В суббо́ту ве́чера на ма́лой вече́рни стихиры воскре́сны и Богоро́дице, по обы́чаю. Тропа́рь воскре́сен. Сла́ва, и ны́не, Богородичен его́. На вели́цей вече́рни, по стихоло́гии, на Го́споди, воззва́х: стихиры воскре́сны 4, и пра́здника 3, того́ дне́, и свята́го 3.

ЗРИ: А́ще ли пое́тся свя́тый на 6, или́ ему́же и полиеле́й, и пое́м стихиры воскре́сны 3, и пра́здника 3, и свята́го 4. Сла́ва, свята́го. А́ще же ни, Сла́ва, пра́здника. И ны́не, Богородичен пе́рвый гласа.

На литии́ стихи́ры пра́здника, того́ дне рядовы́я стихо́вныя. Сла́ва, и ны́не, пра́здника. А́ще ли и́мать свя́тый Сла́ву, Сла́ва, свята́го. И ны́не, пра́здника. На стихо́вне стихиры воскре́сны. Сла́ва, свята́го, а́ще есть: И ны́не, пра́здника. А́ще ли ни, Сла́ва, и ны́не, пра́здника. На благослове́нии хле́бов тропа́рь, Богородице Де́во: два́жды, и пра́здника еди́ножды: и Бу́ди И́мя Госпо́дне: и про́чее, и чте́ние в Посла́ниих апо́стольских.

На у́трени, на Бог Госпо́дь, тропа́рь воскре́сен, два́жды. Сла́ва, свята́го, а́ще есть, а́ще ли ни, Сла́ва, и ны́не, пра́здника. По кафи́смах седа́льны воскре́сны, и Богородичны их, и чте́ние во Ева́нгелии толково́м, неде́ля по Просвеще́нии, и непоро́чны, и тропари́: А́нгельский собо́р: ипакои́ гласа. И чте́ние во Ева́нгелии толково́м, неде́ля ря́д.

ЗРИ: [А́ще ли и́мать свя́тый полиеле́й: И по полиеле́и тропари́: А́нгельский собо́р: И по ектении́ седальны свята́го вси, и чте́ние]. Степе́нна, и проки́мен гласа, и Вся́кое дыха́ние: Ева́нгелие воскре́сно, стихи́ра воскре́сна, и про́чее воскре́сно. Кано́н воскре́сен со ирмосо́м на 4, и Богородице на два́, и пра́здника на 4, и свята́го на 4. Катава́сия пра́здника. А́ще полиеле́й или́ славосло́вие, и пое́м кано́н воскре́сен со ирмосо́м на 4, и пра́здника на 4, и свята́го на 6. По 3-й пе́сни конда́к и и́кос пра́здника, и свята́го, а́ще и́мать, и седа́лен свята́го. Сла́ва, и ны́не, пра́здника, и чте́ние. По 6-й пе́сни конда́к воскре́сен и и́кос, и про́лог. На 9-й пе́сни пое́м Честне́йшую. Свети́лен воскре́сен: Сла́ва, свята́го, а́ще и́мать: а́ще ли ни́, Сла́ва, и ны́не, пра́здника. На хвали́тех стихиры воскре́сны 4, и свята́го, а́ще и́мать, подо́бны 3, и самогласен, и́же на Сла́ву, пое́м с припе́вы его́. А́ще ли не и́мать свя́тый хвали́тных, и пое́м стихи́ры воскре́сны 4, и пра́здника 4, того́ дне́ стихо́вны у́тренния с припе́вы пра́здничными. Сла́ва, стихи́ра Ева́нгельская. И ны́не, Преблагослове́нна еси́: Славосло́вие вели́кое. По трисвято́м тропа́рь воскре́сен то́чию. Ектении́, и отпу́ст, и оглаше́ние, и обы́чное исхожде́ние в притво́р, и час 1-й. На 1-м часе́ тропа́рь воскре́сен. Сла́ва, пра́здника. И ны́не, Богородичен часо́в. По О́тче наш: конда́к пра́здника. Та́кожде и в про́чия часы́ глаго́лем конда́к пра́здника и воскре́сен пременя́юще, а́ще полиеле́й, и свята́го.

На Литурги́и: Блаже́нны гласа на 6, и пра́здника песнь рядова́я на 4. А́ще ли и́мать свя́тый песнь, и Блаже́нны воскре́сны на 4, и пра́здника песнь рядова́я на 4, и свята́го песнь 6-я, на 4. По вхо́де тропа́рь воскре́сен, и пра́здника. Та́же хра́ма, и свята́го, а́ще и́мать. Сла́ва, конда́к свята́го. И ны́не, пра́здника.

ЗРИ: А́ще ли не и́мать свя́тый тропаря́ и кондака́: Сла́ва, воскре́сен. И ны́не, пра́здника. Проки́мен, Апо́стол, аллилу́ия, и Ева́нгелие неде́ли по Просвеще́нии. Та́же свята́го, а́ще и́мать. А́ще ли ни, ряд. А проки́мен гла́са оставля́ется. Прича́стен: Хвали́те Го́спода с Небе́с: Други́й свята́го, а́ще и́мать. А́ще ли ни, пра́здника.

ЗРИ: Суббо́та по Просвеще́нии. Проки́мен, аллилу́ия, и прича́стен пра́здника. Апо́стол к Ефесе́ем, зача́ло 233. Ева́нгелие от Матфе́я, зача́ло 7.

Неде́ля по Просвеще́нии.

Проки́мен, глас 1: Бу́ди, Го́споди, ми́лость Твоя́ на нас,/ я́коже упова́хом на Тя. Стих: Ра́дуйтеся, пра́веднии, о Го́споде, правым подоба́ет похвала́. Апо́стол к Ефесе́ем, зача́ло 224 от полу́. Аллилу́ия, глас 5: Ми́лости Твоя́, Го́споди, во ве́к воспою́,/ в род и род возвещу́ и́стину Твою́ усты мои́ми. Стих: Зане́ ре́кл еси́, в ве́к ми́лость сози́ждется,/ на Небесех угото́вится и́стина Твоя́. Ева́нгелие от Матфе́я, зача́ло 8. Прича́стен пра́здника: Яви́ся бла́года́ть Бо́жия, спаси́тельная всем челове́ком. Други́й: Хвали́те Го́спода с Небе́с, хвали́те Его́ в Вы́шних.

В Православной Церкви установлен обычай на следующий день великих Господских и Богородичных праздников вспоминать тех святых, которые ближайшим образом послужили данному священному событию в истории. На следующий день Богоявления Церковь чтит того, кто послужил делу крещения Христова, возложив свою руку на главу Спасителя. Святой Предтеча и Креститель Господень Иоанн, величайший из пророков, завершает историю Церкви Ветхозаветной и открывает эпоху Нового Завета. Он, по словам Блаженного Августина, епископа Ипонийского, «всех превосходит, пред всеми имеет преимущество; всяк, кто токмо рожден от жены, ниже Иоанна». Святой пророк Иоанн засвидетельствовал о пришествии на землю Единородного Сына Божия, воспринявшего человеческую плоть. Он сподобился крестить Его в водах Иордана и свидетельствовал таинственное Явление Пресвятой Троицы в день Крещения Спасителя. Сродник Господень по матери, сын священника Захарии и праведной Елисаветы, Предтеча Господень родился шестью месяцами раньше Иисуса Христа. Архангел Гавриил предвозвестил о его рождении в храме священнику Захарии. Испрошенный молитвами благочестивой четы, до преклонных лет лишенной детей, младенец Иоанн был исполнен благодати Святого Духа. Спасенный, по милости Божией, от смерти, постигшей младенцев в Вифлееме, он возрос в дикой и бесплодной пустыне, приготовляя себя к пророческому служению строгим постом, богомыслием и молитвой.

В возрасте около 30 лет святой Иоанн вышел на проповедь покаяния на берег Иордана, чтобы своей проповедью приготовить народ к принятию Спасителя мира. По выражению церковных песнопений, святой Иоанн был «светлою утреннею звездою», которая своим блеском превосходила сияние всех других звезд и предвещала утро благодатного дня, освещаемого духовным Солнцем – Христом (Мал. 4,2).

Свою жизнь святой Иоанн Предтеча завершил мученически. Он обличил царя Ирода в беззаконном сожительстве с Иродиадой, женой своего брата Филиппа, за что был заключен в темницу и обезглавлен (Мф. 14, 1–10). Святое тело Иоанна Предтечи было погребено его учениками в самарийском городе Севастии, где совершилось злодеяние. Память зачатия святого пророка Иоанна Предтечи Церковь празднует 23 сентября; рождество – 24 июня; усекновение главы – 29 августа; ее первое и второе обретение (452 г.) – 24 февраля; третье (ок. 850 г.) – 25 мая; перенесение десной руки из Антиохии в Константинополь (956 г.) – 7 января; перенесение ее с острова Мальта в Петербург (1799 г.) – 12 октября.