3-й день

Предпра́зднство Просвеще́ния, и свята́го проро́ка Малахи́и, и свята́го му́ченика Горди́я

Святой пророк Малахия

Святой мученик Гордий

На Го́споди, воззва́х: стихи́ры проро́ка 3, и му́ченика 3. Проро́ка стихи́ры, глас 8.

Подо́бен: Го́споди, а́ще и на суди́щи:

Глаго́лы Богодви́жимаго твоего́ язы́ка сбыва́емы зря,/ тя ны́не ублажа́ю, проро́че, и́стинне удивля́емь:/ ты бо гла́сом све́тлым мир облиста́л еси́,/ Госпо́дне провозглаша́я прише́ствие спаси́тельное.

А́нгел ангелоподо́бным твои́м житие́м на земли́ был еси́/ и прозва́нием А́нгела всеподо́бно обогати́лся еси́,/ добро́ту душе́вную добро́те теле́сней сугу́бо сочета́в,/ Малахи́е всеблаже́нне.

Го́споди, к Тебе́ Твоего́ проро́ка,/ моле́бника и моли́твенника предлага́ю,/ его́же мольба́ми, Ще́дре, и моли́твами, я́ко Благоутро́бен,/ отча́янныя души́ согреше́ния разреши́,/ су́щественную име́я и есте́ственную благосты́ню.

И́ны стихи́ры му́ченика, глас то́йже.

Подо́бен: О, пресла́внаго чудесе́!

Превозвы́шенную ви́дев пре́лести мглу,/ бе́гая, удали́лся еси́, страстоте́рпче Горди́е, Бо́га ожида́я,/ мно́гими же боле́зньми искуша́емь и а́лчбами томи́мь,/ я́коже ве́дый свою́ си́лу подви́жник,/ устреми́лся еси́ самозва́н к противоборцу́.

Вельми́ упова́в,/ прише́л еси́ к проти́вных мно́жеству, всесла́вный Горди́е,/ в ничто́же вмени́в беззако́нных собо́рище,/ и, став посреди́, пропове́дник самовла́стен,/ велегла́сно Христа́ пропове́дал еси́ Зижди́теля и Го́спода,/ Отцу́ Собезнача́льна/ и Честно́му Ду́ху Единоче́стна и Соприсносу́щна.

Мече́м во главу усека́емь,/ от жи́зни в жизнь, от сме́рти в безмертие/ и от тле́ния к нетле́нию проявле́нно преше́л еси́,/ не пожда́в естества́ ме́ртвости,/ но самоизво́льно ведо́м умре́ти./ О, по́двигов твои́х, страстоно́сче Горди́е,/ и́миже Христа́, му́чениче, возвели́чил еси́,/ Еди́наго Благоутро́бнаго!

Сла́ва, и ны́не, глас 4. Иоа́нна мона́ха:

О, преславнаго чудесе́!/ И́же Ду́хом Святы́м креща́яй и огне́м/ на Иорда́н гряде́т крести́тися от Иоа́нна:/ Бог не наг, ниже́ Челове́к прост,/ но во двою́ естеству́,/ Еди́н тойжде Сын Единоро́дный,/ ища́й у́бо Креще́ния я́ко Челове́к от сме́ртнаго,/ взима́я же я́ко Бог грех ми́ра/ и подая́ всем ве́лию ми́лость.

На стихо́вне стихи́ры, глас 6.

Подо́бен: Тридне́вен:

Се Просвеще́ние ве́рных,/ се Очище́ние на́ше/ вни́ти хо́щет во струи́ ре́чныя,/ я́ко да скве́рну отмы́ет зло́бы челове́ческия/ и обнови́т сокруше́нныя ны.

Стих: Сего́ ра́ди помяну́х Тя/ от земли́ Иорда́нски и Ермонии́мски.

Я́ко ви́де Тя гряду́ща Предте́ча Твой, Го́споди,/ и прося́ща крести́тися от него́,/ со стра́хом вопия́ше:/ Бо́же мой, Соде́телю мой,/ ка́ко Тя крещу́, Нескве́рнаго?

Стих: Ви́деша Тя во́ды, Бо́же,/ ви́деша Тя во́ды и убоя́шася.

Сни́демся, ве́рнии, у́мне ко Иорда́нским струя́м,/ я́ко да чу́до ве́лие ви́дим я́ве:/ Зижди́тель бо всех яви́ся зрим/ и крести́тися прише́л есть.

Сла́ва, и ны́не, глас 5:

На Иорда́нскую реку́/ Христо́с Бог наш прихо́дит ко Креще́нию,/ очи́стити хотя́ ны от беззако́ний на́ших Свои́м явле́нием,/ я́ко Еди́н Благ и Человеколю́бец.

Тропа́рь му́ченика, глас 4:

Му́ченик Твой, Го́споди, Горди́й,/ во страда́нии свое́м вене́ц прия́т нетле́нный от Тебе́, Бо́га на́шего:/ име́яй бо кре́пость Твою́,/ мучи́телей низложи́,/ сокруши́ и де́монов немощны́я де́рзости./ Того́ моли́твами/ спаси́ ду́ши на́ша.

Тропа́рь предпра́зднства, глас то́йже:

Гото́вися, Завуло́не,/ и красу́йся, Неффали́ме,/ Иорда́не реко́, ста́ни,/ подыми́, взыгра́я, крести́тися гряду́ща Влады́ку,/ Весели́ся, Ада́ме с прама́терию,/ не кры́йта себе́, я́коже в раи́ пре́жде,/ и́бо, на́ги ви́дев вы, яви́ся,/ да облече́т в пе́рвую оде́жду:/ Христо́с яви́ся, всю тварь хотя́ обнови́ти.

НА ПОВЕЧЕ́РИИ

Трипе́снец, ирмосы́ по два́жды, тропари́ же на 6, глас 2 (его́же краегране́сие: Четве́ртому пою́).

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́./ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Су́етное бысть умышле́ние И́родово,/ хотя́щаго улучи́ти свобо́ду, беззако́нно убива́ющаго де́ти,/ Христо́с бо, Изба́витель наш,/ жизнь да́рует всем неуби́йственну, креща́яся.

Лю́тое совеща́ние И́родово младе́нцев пе́рвее уби́ но́вый во́зраст,/ Вифлее́м кровьми́ испо́лнив./ Ны́не же Христо́с гряде́т Це́ркве ча́да мно́гая Креще́нием сотвори́ти.

Други́й трипе́снец, глас 6 (его́же краегране́сие: Предсуббо́тие же).

Песнь 5

Ирмо́с: К Тебе́ у́тренюю,/ благоутро́бия ра́ди Себе́ истощи́вшему непрело́жно/ и раба́ руко́ю крести́тися восхоте́вшему,/ Сло́ве Бо́жий,/ мир пода́ждь ми, па́дшему,/ Челове́колюбче.

Очи́стивше умы́ и предызмы́вшеся та́инства прича́стием стра́шнаго смотре́ния,/ вси ве́рнии, гряду́ща Христа́ сря́щем Иорда́нскими струя́ми очи́стити ны.

Зри́те, дру́зи, глас Сло́ва, Со́лнца свети́льника, дру́га Женихо́ва:/ пока́йтеся! – лю́дем вопию́ща,-/ и потщи́теся очи́ститися Зижди́теля на сре́тение.

Песнь 8

Ирмо́с: Глаго́л мучи́телев поне́же превозмо́же,/ седмери́цею пещь разжже́на бысть иногда́,/ в не́йже о́троцы не опали́шася, царе́во попра́вше веле́ние, но вопия́ху:/ вся дела́ Госпо́дня, Го́спода по́йте и превозноси́те во вся ве́ки.

Излия́вше сле́зныя исто́чники, ве́рнии, от оче́с,/ очи́стим вся́ку скве́рну душе́вную/ и Свет во Све́те Све́том у́зрим, крести́тися Христу́ гряду́щу./ Ему́же присвиде́тельствует Оте́ц с Небесе́,/ и Ду́ха Свята́го блиста́ет прише́ствие голуби́ным ви́дом.

Сле́зу вся́кую Христо́с отъе́мля от вся́каго лица́, предгряде́т,/ душ многоболе́зненныя неду́ги неболе́зненно водо́ю уставля́я/ и обветша́вшия челове́ки обновля́я па́ки бытие́м,/ превознося́щи Его́ во ве́ки.

Священноде́йствуются ду́ши Креще́ния Богода́нною ба́нею и Ду́ха огне́м,/ стра́сти очища́ющаго, и вещь попаля́ющаго всю скве́рныя зло́бы,/ и благода́ть даю́щаго вопи́ти во умиле́нии:/ Тя превозно́сим, Христе́, во ве́ки.

Ин

Ирмо́с: Столпу́ зло́бы:

От ве́ждей душе́вных зло́бы сон оттря́сше,/ лука́вствия оты́мем, ве́рнии, от серде́ц на́ших/ и слеза́ми те́плыми омы́ем смы́слы,/ я́ко да зри́телие я́вльшемуся яви́мся,/ Христа́ сла́вяще во ве́ки.

Скве́рно сло́во лука́вых помышле́ний да не внесе́м,/ сло́ву же Боже́ственному поучи́вшеся, пе́сни да принесе́м Сло́ву,/ нас ра́ди пло́тию я́вльшемуся и просвеща́ющему су́щия во тьме,/ Его́же вся тварь благослови́т, сла́вящи во ве́ки.

Глубина́ прему́дрости сокрове́нного та́инства ны́не явля́ется челове́ком,/ Бо́жиих суде́б бе́здна ны́не ве́рным открыва́ется,/ Бо́гу с пло́тию на земли́ я́вльшуся на обновле́ние челове́ческаго ро́да,/ Его́же вся тварь благослови́т, сла́вящи во ве́ки.

Отрица́ешися, Иоа́нне, е́же да соде́лаеши вско́ре, повину́яся Мне,/ оста́ви у́бо ны́не, та́ко бо подоба́ет нам вся́ку испо́лнити вои́стинну пра́вду,-/ Влады́ка рабу́ рече́,/ Его́же вся тварь благослови́т, сла́вящи во ве́ки.

Та́же: Хва́лим, благослови́м, покланя́емся Го́сподеви, пою́ще и превознося́ще во вся ве́ки.

Ирмо́с: Столпу́ зло́бы/ лю́таго Ирода вси поруга́вшеся,/ на Иорда́н прииди́те./ И́дем, ве́рнии, да у́зрим Христа́ Изба́вителя,/ от Предте́чи креща́емаго пло́тию во струя́х,/ Его́же вся тварь благослови́т, сла́вящи во веки.

Песнь 9

Ирмо́с: Душа́ми чи́стыми и нескве́рными устна́ми,/ прииди́те, возвели́чим Нескве́рную и Пречи́стую Ма́терь Емману́илеву,/ Е́юже из Нея́ к Рожде́нному принося́ще моли́тву:/ пощади́ ду́ши на́ша, Христе́ Бо́же, и спаси́ нас.

Неразу́мен никто́же и ко Христу́ неблагода́рен да бу́дет,/ долготерпе́ние пожда́ния Его́ и бла́гость укоря́я, да не преоби́дит,/ но со стра́хом и ра́достию да порабо́таем Ему́, пою́ще:/ пощади́ ду́ши на́ша, Христе́ Бо́же, и спаси́ нас.

Глаго́лет лю́дем непокори́вым Предте́ча:/ кто вам показа́ от гне́ва убежа́ти гряду́щаго, ехи́днова исча́дия?/ Покая́ния у́бо плоды́ покажи́те досто́йны, вопию́ще:/ пощади́ ду́ши на́ша, Христе́ Бо́же, и спаси́ нас.

О, сле́потнаго неразу́мия де́рзости!/ Ему́же бо иноплеме́нницы, я́ко Изба́вителю Христу́, поклони́шася, с да́ры почествова́вше,/ дома́шнии же неи́стовне иска́ху уби́ти Рожде́ннаго./ Пощади́ ду́ши на́ша, Христе́ Бо́же, и спаси́ нас.

Ин

Ирмо́с: Честне́йшую Херуви́м:

Всегуби́тельное паде́ние Ада́мово ны́не исправля́я, яви́ся Но́вый Ада́м,/ свобожде́ние па́ки бытия́ подая́ пресла́вно Креще́нием.

Зако́н и проро́ки исполня́я и пра́вду скончава́я,/ всех Спас ны́не под длань преклоня́ется раба́,/ от рабо́ты восхища́я вра́жия челове́ка.

Язы́ком возсия́ вели́кий Свет,/ омраче́нным Боже́ственная просия́ заря́,/ в се́ни дре́вле сме́ртней седя́щим Со́лнце сла́вы, Христо́с, возсия́.

Окружа́ху А́нгельская во́инства во Иорда́не креща́емаго Изба́вителя/ и тре́петом вели́кое та́инство воспева́ху,/ Сего́ неизглаго́ланное соше́ствие.

Та́же ирмо́с: Честне́йшую Херуви́м/ и сла́внейшую без сравне́ния Серафи́м,/ без истле́ния Бо́га Сло́ва ро́ждшую,/ су́щую Богоро́дицу, Тя велича́ем. И покло́н.

НА У́ТРЕНИ

На Бог Госпо́дь: тропа́рь предпра́зднства, два́жды, Сла́ва, му́ченика. И ны́не, предпра́зднства.

По 1-й стихоло́гии седа́лен, глас 3.

Подо́бен: Красоте́ де́вства:

Неопи́сан Сый Божество́м, опи́сан ве́щию теле́сною,/ хо́щет приити́ вода́ми Иорда́нскими крести́тися,/ Сего́ чистото́ю мы́сленною прии́мем:/ всем бо соде́лати обновле́ние хо́щет./ К Нему́же возопии́м со стра́хом:/ сла́ва, Христе́, явле́нию Твоему́.

Сла́ва, и ны́не, подо́бен то́йже:

Я́вльшуся Тебе́ во, Иорда́не, Спа́се, в вода́х крести́тися пло́тию,/ А́нгельская во́инства ужаса́хуся, зря́ще рабу́ предстоя́ща Влады́ку тва́ри:/ свы́ше пропове́да Тя Оте́ц Пребезнача́льный./ Те́мже с весе́лием вопие́м Ти:/ сла́ва Бо́гу крести́вшемуся.

По 2-й стихоло́гии седа́лен, глас 5.

Подо́бен: Собезнача́льное Сло́во:

Единоче́стное Сло́во Отцу́ и Ду́ху,/ воплоще́нно за милосе́рдие и креща́емо,/ А́нгельстии ли́цы ви́дяще, трепета́ху,/ и Иорда́нская река́, устыде́вшися и убоя́вшися, возврати́ся вспять,/ нас возводя́ к высоте́ спасе́ния, страстьми́ истле́вшия.

Сла́ва, и ны́не, то́йже подо́бен:

Собезнача́льное Сло́во Отцу́ и Ду́ху,/ вообра́жься за милосе́рдие ны́не в чужде́е,/ крести́тися нас ра́ди уже́ гряде́т,/ усря́щем Его́ мы́слию чи́стою:/ благослове́н еси́,– вопиюще,– Христе́ Спа́се Благоде́телю,/ освяти́ти нас приходя́й.

Кано́ны три: предпра́зднства со ирмосо́м на 6, и проро́ка на 4, и му́ченика на 4. Кано́н предпра́зднства, его́же краегране́сие по алфави́ту. Ио́сиф, глас 4.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Бе́здны повеле́нием сотвори́в, Человеколю́бче,/ И́же зе́млю на вода́х пове́сивый, Го́споди,/ смиря́яся, предгряде́ши крести́тися ре́чными струя́ми,/ омыва́я мя от скве́рных страсте́й.

Хоте́нием обнища́л еси́,/ самово́льно обнища́вшаго злы́ми дея́ньми мене́ обогаща́я, Христе́,/ и к вода́м предгряде́ши Иорда́нским, Креще́ния прося́, Безгре́шный.

Обветша́вший прегреше́ньми мир обновля́я, Человеколю́бче,/ стра́нно поро́ждение гряде́ши сотвори́ти водо́ю и Ду́хом челове́ком./ Те́мже Твое́ сла́вим явле́ние.

Дави́д, Боже́ственным Ду́хом провозглаша́я, веща́ше:/ что ти есть мо́ре, я́ко побе́гло еси́?/ И ты же, я́ко возврати́лся еси́, Иорда́не,/ Христа́ ви́дев, на́га стоя́ща в тебе́?

Ин кано́н проро́ка, его́же краегране́сие: Малахи́ева мно́ю сла́ва да сла́вится. Творе́ние Феофа́ново, глас 8.

Песнь 1

Ирмо́с: Посе́ченый насеко́маго пресече́,/ и ви́де со́лнце зе́млю, ю́же не ви́де,/ лю́таго врага́ вода́ потопи́/ непроходи́мое про́йде Изра́иль./Песнь же воспева́шеся:/ Го́сподеви пои́м, сла́вно бо просла́вися.

Го́рнему ли́ку сра́дуяся, и сему́ сликовству́я и свеселя́ся,/ и Боже́ственнаго просвеще́ния досто́йно насыща́яся, Богодохнове́нне,/ ве́рою твою́ честну́ю па́мять пра́зднующия, Го́споду пою́щия,/ моли́твою твое́ю сохрани́.

Ангелообра́зныя души́ красото́ю и добро́тою сия́я, па́ки теле́сною,/ вы́шнюю зарю́ Боже́ственнаго сия́ния прия́л еси́, Богоглаго́ливе, све́тло/ и, ра́дуяся, взыва́л еси́:/ Го́споду пои́м, сла́вно бо просла́вися.

Непоро́чно соверша́я житие́ твое́, и о́бразом благоукраше́ния украша́яся,/ и нра́вы благи́ми, преблаже́нне, чи́стя себе́,/ проро́к благоче́стия и́стиннаго, зовы́й, был еси́:/ Го́споду пои́м, сла́вно бо просла́вися.

Богоро́дичен: Чи́стая Ма́ти Бо́га Вседержи́теля, Я́же от ца́рскаго коле́на, Влады́чице, возра́стши/ и Еди́наго Бо́га, все́ми ца́рствующаго, ро́ждши пло́тию па́че естества́,/ от бед мя спаси́, Сы́ну Твоему́ пою́ща:/ сла́вно бо просла́вися.

Кано́н му́ченика, его́же краегране́сие: Му́ченика Горди́я пе́сньми сла́дкими пою́. Творе́ние Феофа́ново, глас 8.

Песнь 1

Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.

Свиде́тель и́стины, Горди́е всеблаже́нне, познава́емь,/ светоно́сную мне благода́ть с Небесе́ пода́ждь моли́твами твои́ми.

Пои́м Го́сподеви, страстоте́рпца укре́пльшему на противобо́рныя/ и венце́м побе́ды украси́вшему.

Си́лою и всеору́жием всех Царя́ укрепля́емь,/ мучи́телей низложи́л еси́ вражду́, всесла́вный Горди́е.

Богоро́дичен: Воды́, теку́щия в безсме́ртие, яви́лася еси́ селе́ние,/ источа́ющаго всем челове́ком жизнь, Богоневе́сто.

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Возвесели́ся, пусты́ня жа́ждущая, челове́ческое естество́ все:/ се вода́ явля́ется жи́зненная, напая́ющи тя новора́сленною благода́тию,/ Христо́с, всех обновле́ние.

Взыска́ти мя, ра́зумом заблу́ждшаго, предгряде́ши на во́ды, Христе́,/ в ня́же вшед, потопля́еши моя прегреше́ния/ и из глубины́ возво́диши мя вся́кия зло́бы, я́ко Благоутро́бен.

Со́лнце, зре́ти Тя иму́щее, Сло́ве, обнаже́на, сокрыва́ет зари́:/ гряде́ши бо обнаже́на мя ле́стию змии́ною/ честны́м Креще́нием во оде́жду облещи́ спаси́тельную.

Ин

Ирмо́с: Ты еси́ утвержде́ние притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.

Ра́дуешися ны́не, зря прорече́ний сбытие́, блаже́нне, твои́х и соверше́ние,/ Мала́хие Богоприятне.

Исцеле́ние в крила́х име́яй, возсия́ Со́лнце мы́сленное пра́вды,/ я́коже проре́кл еси́, Богодохнове́нне.

Богоро́дичен: Всю наде́жду мою на Тя, Всенепорочная, возлага́ю,/ всю к Тебе́, ра́дуяся, простира́ю и ду́шу, и помышле́ние.

Ин

Ирмо́с: Несть свят, я́ко Госпо́дь,/ и несть пра́веден, я́ко Бог наш,/ Его́же пое́т вся тварь:/ несть пра́веден, па́че Тебе́, Го́споди.

Теку́щих нестоя́тельное помышля́я/ и пребыва́ющих состоя́ние, му́чениче сла́вне, воспомина́я, блаже́нне,/ без стра́ха в суди́лище вшел еси́ страдания.

Отступи́л еси́ привре́меннаго су́етства,/ и приложи́лся еси́, всебога́тне, при́сно пребыва́ющим,/ и, бе́гая от челове́к, А́нгелом единокро́вник, Богому́дре, был еси́.

Земна́я мудрова́ния оста́вив, жи́тельство Небе́сное, му́чениче, обре́л еси́,/ зре́ти бо не терпя́ пре́лести шата́ния,/ в пусты́ню удали́лся еси́.

Богоро́дичен: Несть непоро́чны, я́коже Ты, Влады́чице,/ и несть пречи́сты, па́че Тебе́, Всенепоро́чная:/ во утро́бе бо Зижди́теля всех вмести́ла еси́,/ Еди́наго Многоми́лостиваго.

По 3-й пе́сни конда́к проро́ка, глас 4.

Подо́бен: Яви́лся еси́:

Проро́чества дарова́нием богате́я, проро́че,/ Христо́во предвозвести́л еси́ прише́ствие я́ве и ми́рови спасе́ние,/ Его́же сия́нием мир просвети́ся.

Ин кондак пророку, глас 8:

Подо́бен: Взбра́нной:

Яко А́нгел послужи́л еси́, всеблаже́нне,/ и сподо́бися пре́ди бу́дущая веща́ти,/ Госпо́дне бо вочелове́чение всем уясни́л еси́,/ те́мже вопие́м ти:/ ра́дуйся, проро́че Бо́жий Малахи́е, приснопа́мятне.

Други́й конда́к му́ченика, глас 8.

Подо́бен: Я́ко нача́тки:

Твоя́ по́ты, пресла́вне, всю зе́млю напои́ша,/ и честны́ми кровьми́, Горди́е, мир весь возвесели́л еси́./ Моли́твами твои́ми, Богому́дре,/ спаса́й вся, ве́рою тя воспева́ющия и ублажа́ющия,/ вопию́щия песнь досто́йную, всехва́льне, я́ко многострада́лец.

Ин конда́к му́ченику, глас 4.

Подо́бен: Яви́лся еси́ днесь:

Все́ю любо́вию днесь Це́рковь твою́ памя́ть соверша́ет, Горди́е,/ восхваля́ющи та́йно,/ я́ко по той пострада́л еси́,/ му́чеником добро́то/ и всем ве́рным во Христа́ похвало́.

Седа́лен, проро́ка, глас 8.

Подо́бен: Прему́дрости:

Проро́чествия благода́тию обога́щся,/ бу́дущих зна́нию боголе́пно научи́лся еси́ ду́хом, Малахи́е Богодохнове́нне,/ и предглаго́леши всем Христо́во прише́ствие/ и язы́ков, пребога́те, Боже́ственное призва́ние./ Те́мже честну́ю твою́ пра́зднуем па́мять,/ и любо́вию пое́м тя, и ве́рно ублажа́ем, взыва́юще тебе́, сла́вне:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва му́ченика, глас то́йже:

Разже́гся любо́вию Иису́совою,/ самово́льным хоте́нием, му́чениче му́дре, усе́рдно на смерть себе́ преда́л еси́/ и посреди́ суди́ща самозва́н стал еси́, вопия́ мучи́телем:/ се аз приидо́х./ Те́мже и лесть дерзнове́нием обличи́в,/ мече́м во главу́ усе́чен еси́, сла́вне,/ и к жи́зни бесконе́чней преста́вился еси́, всехва́льне./ Моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

И ны́не, пра́здника глас то́йже.

Подо́бен: Свире́лей па́стырских:

Лик проро́ческий, пропове́дуя, ра́дуется, Креще́ние Христо́во, живо́т источа́ющее./ Зове́т Иса́ия:/ почерпи́те во́ду чисти́тельную./ Пи́шет Богооте́ц:/ ка́ко от лица́ бежи́т мо́ре/ благоволе́нием спаса́ющаго Бо́га род челове́ческий?

Песнь 4

Ирмо́с: Неизсле́дный Бо́жий сове́т,/ е́же от Де́вы воплоще́ния Тебе́, Вы́шняго,/ проро́к Авваку́м усмотря́я, зовя́ще;/ сла́ва си́ле Твое́й, Го́споди.

У́жасом содержи́тся не́бо и А́нгельская во́инства,/ раболе́пно Тя иду́ща, Христе́, к Твоему́ рабу́ ви́дяще и прося́ща Креще́ния.

Иоа́нне, взыгра́й, гряде́т бо всех избавляяй Госпо́дь/ преклони́тися руце́ твое́й смире́нно,/ я́ко да смире́ннаго мя Боже́ственным вознесе́т Креще́нием.

Преклони́в Небеса́, сшел еси́ в Де́ву, Человеколю́бче,/ и Иоа́нну прекланя́еши верх, прося́ Креще́ния./ Сла́ва мно́гому благоутро́бию Твоему́.

Разреша́я безме́рныя моя́, Сло́ве, плени́цы согреше́ний,/ на во́ды Иорда́нския тщи́шися приити́ и крести́тися, Влады́ко./ Сла́ва мно́гому благоутро́бию Твоему́.

Ин

Ирмо́с: Услы́шах, Госпо́ди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.

Проро́к быв Богонача́льныя, блаже́нне, бла́гости,/ всем язы́ком пропове́дал еси́ бы́вшее избавле́ние.

Научи́вся Ду́хом преесте́ственному Сло́ва воплоще́нию,/ неизглаго́ланное та́инство, Малахи́е блаже́нне, провозгласи́л еси́.

Богоро́дичен: На Тя возложи́х вся́ко ча́яние спасе́ния моего́ и жития́ окормле́ние,/ обра́дованная Ма́ти Де́во.

Ин

Ирмо́с: Из Горы́ приосене́нныя, Сло́ве, проро́к,/ еди́ныя Богоро́дицы,/ хотя́ща воплоти́тися богови́дно усмотри́/ и со стра́хом славосло́вяше си́лу Твою́.

Рече́ния Христо́ва, всеблаже́нне, услы́шав,/ ра́дуяся, тле́нное оста́вил еси́ во́инство/ и Царю́ вво́инился еси́ Небе́сному, венцено́сче му́чениче Горди́е.

Сокруши́шася, му́чениче, го́ры мучи́телей,/ раста́яшася же хо́лми и́дольстии терпели́вным твои́м страда́нием,/ и со дерзнове́нием, венцено́сче, прибли́жившася.

Укрепи́лся еси́ Креста́ Боже́ственною си́лою/ собо́ру злочести́вому вопи́ти велегла́сно:/ не и́щущим обрето́хся, не вопроша́ющим, ны́не упова́в, явля́юся.

Весь на тя, Богому́дре, мучи́теля воздви́гл еси́ неудержи́мый гнев,/ уди́вльшася, всеблаже́нне, умышле́нию и души́ твоея́ воста́нию.

Богоро́дичен: Неве́сто Бо́жия, Мари́е Богоро́дице,/ изба́ви мя лю́тых прегреше́ний и бед/ и к ти́хому приста́нищу и спаси́тельному твои́ми моли́твами наста́ви.

Песнь 5

Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

Дале́че челове́чество от Бо́га бы́вшее, Сло́во Бо́жие, уще́дрив, Челове́к яви́ся,/ и Креще́нием Богоде́льным сие́ присвоя́ет боголе́пно,/ и к первообра́зному возво́дит достоя́нию.

Ме́ртвы бы́вшия ны преступле́ньми/ гряде́ши, Живода́вче Всеще́дрый, оживи́ти Иорда́нскими струя́ми./ Те́мже Твое́ сла́вим ве́рно ны́не явле́ние и неизрече́нную ми́лость.

Диви́тся вся́ка душа́, помышля́ющи Твое́, Сло́ве, стра́шное смотре́ние:/ ка́ко, назда́ти вся хотя́, гряде́ши вни́ти в ре́чныя струи́ обнаже́н,/ И́же све́том одева́яйся.

Ин

Ирмо́с: От но́щи неве́дения/ Богове́дением просвети́вый концы́,/ просвети́ мя у́тром человеколю́бия Твоего́, Го́споди.

Стра́шный день Христо́ва прише́ствия провозвести́л еси́, Малахи́е Богому́дре,/ Боже́ственным просвеща́емь Ду́хом.

Душ скве́рну отъе́мля и омыва́я благода́тию,/ я́коже бели́лом перу́щих,/ си́це тя, Богому́дре, просла́ви.

Богоро́дичен: Держа́ву сме́рти, Отрокови́це,/ живоно́сным Твои́м рождество́м разори́ла еси́, Всесвята́я Де́во,/ и Жизнь источи́ла еси́ неразори́му.

Ин. Ирмо́с тойже.

Вшед без стра́ха и до́блественне, я́ко лев, в позо́рище,/ я́коже ка́мение безду́шное, блаже́нне, вмени́л еси́ безу́мныя.

Нака́зан, му́чениче, Богодохнове́ннаго писа́ния уче́нием,/ вся ко спасе́нию обре́л еси́ веду́щая, Горди́е.

Разуме́в, Богому́дре, тве́рдое твое́ мучи́тель противле́ние,/ я́коже о ка́мень волна́, твое́ю разсе́деся тве́рдостию.

Богоро́дичен: И́же из Твоея́ утро́бы пресу́щественно, Де́во, Воплоща́яйся/ мир Богоразу́мия заре́ю просвети́, Пречи́стая.

Песнь 6

Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ приидите, рука́ми воспле́щим,/ от Нея́ ро́ждшагося, Бо́га сла́вим.

И́же во тьме дре́вле седя́щии Свет прише́дш зря́ще, ра́дости испо́лнитеся:/ се яви́ся Госпо́дь, Иорда́нскими струя́ми оде́ян.

Ка́ко у́зрит Тя, иду́ща, Предте́ча, Спа́се,/ и прося́ща Боже́ственнаго Креще́ния?/ Ка́ко Тя во́ды прии́мут Иорда́нския,/ Во́ду су́щу оставле́ния?

Да кропя́т, веселя́щеся, о́блацы мы́сленное ра́дование:/ се прии́де крести́тися Госпо́дь,/ разоря́я те́мныя о́блаки серде́ц на́ших.

Ин

Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.

Просве́щшися твоя́ му́драя мысль от самого́ Боже́ственнаго светозаре́ния,/ и до́льных отлучи́лся еси́ веще́й, бу́дущих сподо́бися ра́зума:/ зва́ние бо язы́ков и зако́на преста́тие проре́кл еси́.

Прии́де вои́стинну Госпо́дь, Его́же мы ра́достно иска́хом,/ во храм, Его́же Сам от Де́вы благослове́нныя му́дре созда́,/ я́коже рече́, от Бо́га осия́вся, Малахи́й сла́вный.

Богоро́дичен: Безнача́льный Отцу́ и Единоро́дный,/ То́йже Единоча́дый от Де́вы вопло́щся, и неизрече́нно роди́ся,/ и Ро́ждшую Де́ву сохрани́:/ Бог бо бе и́стинен, а́ще и естество́ челове́ческое прия́т.

Ин

Ирмо́с: Я́коже проро́ка изба́вил еси́/ из глубины́ преиспо́дния, Христе́ Бо́же,/ и мене́ от грехо́в мои́х изба́ви, я́ко Человеколю́бец,/ и упра́ви живо́т мой, молю́ся.

Священноде́йствуется же́ртва,/ и прия́тно приноше́ние Тебе́ прино́сится, иска́пая кро́вию, Горди́й, Влады́ко,/ во́льней стра́сти Твое́й подо́бяся.

Несмы́сленный умо́м тебе́ тле́нную обещава́ет сла́вицу,/ сла́вою нетле́нною, Горди́е, обога́щшемуся/ и безсме́ртное бога́тство сокры́вшему.

Напра́влена упова́ния к Бо́гу име́я, прете́кл еси́ жития́ нестоя́тельное/ и, мече́м посека́емь, к простра́нней широте́ преше́л еси́.

Богоро́дичен: Умерщвле́нный ум мой страсте́й треволне́ньми возста́ви,/ Жизнь Ве́чную, Христа́, Ро́ждшая, подаю́щаго всем исцеле́ния.

Конда́к предпра́зднства, глас 4.

Подо́бен: Яви́лся еси́ днесь:

Во струя́х днесь Иорда́нских быв, Госпо́дь/ Иоа́нну вопие́т:/ не убо́йся крести́ти Мя,/ спасти́ бо приидо́х/ Ада́ма первозда́ннаго.

И́кос:

Не истязу́ю тя, Крести́телю, преде́лы преходи́ти,/ не глаго́лю тебе:/ рцы Ми, я́же глаго́леши беззако́нным и учи́ши гре́шники./ То́чию крести́ Мя молча́ и ча́я, я́же от Креще́ния:/ прии́меши бо сего́ ра́ди досто́инство, е́же не бысть А́нгелом,/ и́бо всех проро́ков бо́льша тя сотворю́./ От о́ных у́бо ни еди́н я́ве Мя ви́де,/ но во о́бразех, и се́нех, и гада́ниих,/ ты же пред тобо́ю стоя́ща ви́дел еси́,/ спасти́ бо приидо́х Ада́ма первозда́нного.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Сокруше́на мя прегреше́ньми и лежа́ща во тьме, Го́споди, преступле́ния,/ поми́ловав, уще́дрил еси́ за благосты́ню/ и в вода́х Иорда́нских, Влады́ко, гряде́ши крести́тися.

Что́ стра́нное сие́ виде́ние? -/ возопи́ша А́нгельстии чи́ни:/ езе́ра и ре́ки сотвори́вый веле́нием Иорда́нскими струя́ми гряде́т оде́ятися,/ си́ми бо Ада́ма обновля́ет.

Высота́ неизрече́нна и глубина́ неизме́рна есть, Влады́ко, смотре́ния Твоего́,/ вся́ко преходя́ ума́ постиже́ние:/ ка́ко водо́ю и Всесвяты́м Ду́хом земны́я очища́еши?

Ин

Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су огнь проложи́ша, вопию́ще:/ благослове́н еси́, Го́споди Бо́же, во ве́ки.

Ты Влады́чествующаго все́ми всечестно́е проре́кл еси́ прише́ствие,/ Малахи́е проро́че сла́вне, зовы́й:/ благослове́н еси́, Го́споди Бо́же, во ве́ки.

Приими́ моля́щагося, Ще́дре, сла́внаго проро́ка Малахи́я/ о и́же благоче́стно пою́щих и вопию́щих;/ благослове́н еси́, Го́споди Бо́же, во ве́ки.

Богоро́дичен: Всему́ мне весь неслия́нно по Ипоста́си соедини́лся еси́, Бо́жий Сло́ве,/ от Де́вы Чи́стыя обо́лкся в мя, Ще́дре,/ благослове́н еси́, Го́споди Бо́же, во ве́ки.

Ин

Ирмо́с: О́троки ороси́вый в пещи́/ и Де́ву сохрани́вый Ро́ждшую Тя по рождестве́⁵,/ благослове́н еси́, Бо́же оте́ц на́ших.

Муче́ния сла́ву стяжа́в, со А́нгелы лику́еши, венцено́сче, Христу́ взыва́я:/ благослове́н еси́, Го́споди Бо́же оте́ц на́ших.

Благочести́вое дерзнове́ние име́я,/ злочести́выя облича́еши, воспева́я велегла́сно:/ благослове́н еси́. Го́споди Бо́же оте́ц на́ших.

Изба́витися прегреше́ний ны́не моли́/ ве́рою чту́щим твою́ честну́ю па́мять и пою́щим велегла́сно:/ благослове́н Бог оте́ц на́ших.

Богоро́дичен: Ядоме́тное те́рние греха́ исцеле́ний одожде́нием Твои́х отмыва́еши,/ Богороди́тельнице Благослове́нная Всечи́стая,/ Бо́га безсе́менно ро́ждшая.

Песнь 8

Ирмо́с: О́троки благочести́выя в пещи́/ Рождество́ Богоро́дичо спасло́ есть,/тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Глас Роди́телев с высоты́ Сы́на свиде́тельствует Единосу́щна, входя́ща в во́ды/ и благослове́ние Твое́ сим предпосыла́юща, Благослове́нне Христе́,/ и Дух Тя Святы́й всем пропове́дует Бо́га воплоще́нна.

Лику́й, тва́ре, уви́девши Бо́жие свято́е явле́ние,/ А́нгели, по́йте,/ мо́ре, весели́ся, езе́ра и исто́чницы, взыгра́йте,/ и ре́ки, та́йно восплещи́те пе́сньми:/ предста́ благослове́ньми вас Христо́с просвеща́яй.

Пое́м Го́споду во хвале́нии, я́вльшемуся на вода́х,/ и сокруше́ние на́ше си́ми обно́вльшему,/ и главы́ сте́ршему неви́димых враго́в, и воззове́м:/ по́йте, дела́, Го́спода и превозноси́те Его́ во вся ве́ки.

О, чу́до чуде́с!/ Ка́ко, вся́кия тва́ри вы́шши, Бог наш зи́ждется/ и обновля́ется от Богороди́тельницы, и обновля́ет во́лею,/ и назида́ет нас водо́ю и Ду́ха обновле́нием чу́дным,/ Еди́ный Благоде́тель?

Ин

Ирмо́с: Победи́теля мучи́теля и пла́мене/ благода́тию Твое́ю бы́вше,/ за́поведем Твои́м зело́ прилежа́ще,/ о́троцы вопия́ху:/ благослови́те, вся дела́ Госпо́дня, Го́спода.

Очужди́вся вся́каго ве́щнаго явле́ния, священноявле́нне,/ Боже́ственныя зари́ яви́лся еси́ нескве́рно зерца́ло, поя́:/ благослови́те, вся дела́, Го́спода и превозноси́те Его́ во ве́ки.

Неизрече́нный сла́вы зри́тель ты был еси́/ и та́ин Небесных, блаже́нне, пропове́дник быв, поя́ непреста́нно:/ благослови́те, вся дела́, Го́спода и превозноси́те Его́ во ве́ки.

Богоро́дичен: Жи́зни Тя Ма́терь и Бо́жию Роди́тельницу позна́вше,/ правосла́вною ве́рою вси блажи́м, Де́во Ма́ти,/ благословя́ще вку́пе Рождество́ Твое́ Пречи́стое и превознося́ще, Чи́стая, во вся ве́ки.

Ин

Ирмо́с: Богоглаго́ливии о́троцы в пещи́,/ со огне́м пла́мень попира́юще, поя́ху:/ благослови́те, дела́ Госпо́дня, Го́спода.

Возсле́дующая тебе́ благода́ть,/ неви́димо просве́щши, му́чениче, до́блести испо́лни,/ благослови́те,– вопию́ща,– вся дела́ Госпо́дня, Го́спода.

Тече́нием ско́рым гоня́, страда́льче,/ к жела́емому концу́, Ца́рствия дости́гл еси́, зовы́й:/ благослови́те, дела́ Госпо́дня, Го́спода.

В непроходи́мыя ве́ки пребыва́ет му́чеников Твои́х сла́ва и безсме́ртное благохвале́ние:/ благослови́м Тя, вся дела́, я́ко Го́спода.

Богоро́дичен: Воплоще́нно Сло́во заче́нши, пе́рвее безпло́тное,/ Е́вину кля́тву дре́внюю отврати́ла еси́,/ Благослове́ние, Де́во, ми́ру ро́ждши.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжествуе́т же безпло́тных умо́в естество́,/ почита́ющее свяще́нное торжество́ Богома́тере и да вопие́т:/ ра́дуйся, Всеблаже́нная Богоро́дице,/ Чи́стая Присноде́во.

Се А́гнец взе́мляй прегреше́ния челове́чества,/ прии́де и предста́ к рабу́, прося́ Креще́ния,/ раболе́пно предстои́т свободи́ти ища́й порабоще́нныя ны от льсти́ваго/ и добро́ту пе́рвую погу́бльшия.

Яви́ся я́вственно Бог, воплоща́емь за бла́гость,/ и Иорда́нскими оде́ятися гряде́т вода́ми, одева́яй Не́бо о́блаки вои́стинну:/ Сего́ вси ны́не предпра́зднуим честно́е ра́достию явле́ние.

Взыгра́й ра́достно и предугото́вися подъя́ти во́ду теку́щую, о Иорда́не, в ве́чную жизнь;/ ре́ки, лику́йте, ви́дяще ны́не пи́щнаго Пото́ка,/ во струи́ Иорда́нския входя́ща и зло́бы излия́ние изсуша́юща.

Озари́ся нам день спаси́тельный, в нощи́ лю́тых всегда́ спя́щим,/ и́бо предста́ Христо́с Госпо́дь, пра́вды Со́лнце сый и разумева́емый,/ подклони́ти главу́ Свою́ рабу́ и пло́тию крести́тися во́лею.

Ужаса́ются Херуви́ми и все Небе́сное естество́, Всенепоро́чная,/ па́че постиже́ния Честна́го Твоего́ Рождества́,/ уподо́бльшагося нам за благоутро́бие неизглаго́ланное и кре́щшагося пло́тию,/ Его́же Боже́ственное вси явле́ние пра́зднуем ны́не, ра́дующеся.

Ин

Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от Деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.

Наста́ Богосия́нный проро́ка пра́здник и честны́й,/ озаря́я приходя́щия ве́рою и пою́щия проро́ческими блиста́нии,/ и всем точа́щий душа́м исцеле́ния,/ и просвеща́ющий я́сно Богому́дрыя.

Соблюди́ живонача́льною десни́цею Твое́ю держа́вною, Многоми́лостиве, Це́рковь Твою́,/ мольба́ми Твоего́ уго́дника, проре́кшаго нам Твое́ вочелове́чение,/ и́мже возсия́ спасе́ние и душа́м избавле́ние.

Богоро́дичен: Зре́лу объе́млю жизнь, неврежде́н дре́вом ра́зума:/ Ты бо, Всенепоро́чная, Жи́зни дре́во – Христа́, прозябла́ еси́,/ вхо́ды живота́ всем показа́вшаго./ Тем Тя, Всечи́стая, Богоро́дицу, ве́рнии, возвеща́ем.

Ин

Ирмо́с: Проявле́нное на горе́ законополо́жнику/ во огни́ и купине́ Рождество́ Присноде́вы/ в на́ше, ве́рных, спасе́ние/ пе́сньми немо́лчными велича́ем.

Ми́лостива бы́ти моли́ Влады́ку ве́рою тя чту́щим/ и твой светоно́сный и честны́й пра́здник соверша́ющим, Горди́е,/ му́чеников украше́ние.

Ны́не нетле́нныя пи́щи и Боговиде́ния насыща́яся, Горди́е,/ и Све́та Невече́рняго,/ в жили́щах ве́чных прие́млеши припло́дия по́двигов твои́х.

Сла́ву мимотеку́щую, и тле́нную, и попира́емую презре́в, Богому́дре му́чениче,/ присносу́щныя ны́не сла́вы и ра́дости вои́стинну наслажда́ешися,/ Престо́лу Влады́чнему предстоя́.

Богоро́дичен: Я́ко спа́сшеся, Де́во, пе́рвыя кля́твы Твои́м Боже́ственным Рождество́м,/ досто́йно пою́ще, гла́сы немо́лчными вопие́м:/ ра́дуйся, Богоро́дице, наде́жда на́ша.

Свети́лен.

Подо́бен: Ду́хом во святи́лищи:

Вифлее́м оста́вивше, пресла́вное чу́до, ко Иорда́ну теце́м душе́ю те́плою/ и та́мо у́зрим стра́шное та́инство:/ боголе́пно бо предста́, обнажи́вся, Христо́с мой,/ одева́я мя во о́дежду Небе́снаго Ца́рствия.

Сла́ва, и ны́не, то́йже.

На хвали́тех стихи́ры, на 4, глас 6.

Подо́бен: А́нгельския:

Престо́л Не́бо име́я, Влады́ка/ прии́де на зе́млю, вопло́щся от Де́вы,/ и, на Иорда́не предста́в,/ очище́ния всех про́сит от Иоа́нна,/ Оте́чествия земли́ всея́, Тому́ пое́м:/ благослове́н явле́йся, Бо́же наш, сла́ва Тебе́.

Приспе́ Христо́с ко струя́м Иорда́нским,/ Креще́ния прося́, очища́яй грехи́./ Вся земля́ да игра́ет,/ Небеса́ да веселя́тся./ Ра́дуйся, язы́ческая Це́рковь, Царю́ уневе́стившися,/ ве́рно возопи́й:/ благослове́н явле́йся, Бо́же наш, сла́ва Тебе́.

Го́ры сла́дость весе́лия да ка́плют,/ рука́ми та́инственно ны́не восплещи́те, язы́цы,/ пусты́ня да процвете́т./ Иорда́не, подыми́, гряди́, Крести́телю, та́инству Изба́вителя послужи́, ра́дуяся./ Лю́дие, воспои́м:/ благослове́н явле́йся, Бо́же наш, сла́ва Тебе́.

Свет из Све́та пре́жде лет возсия́вый,/ в нощи́ седя́щим яви́ся/ и тьму греха́ очи́сти и просвети́./ Лику́й, Ада́ме, и весели́ся, Е́во,/ избавле́ние, Христо́с, прии́де./ Дави́де, возопи́й:/ благослове́н, явле́йся, Бо́же наш, сла́ва Тебе́.

Сла́ва, глас и подо́бен то́йже:

Звезда́ из Иа́кова возсия́ ми́ру/ и, пла́менный челове́ков грех восприи́м,/ погреба́ет во Иорда́нских вода́х,/ сия́я Божества́ сия́нием/ и просвеще́ние Богоразу́мия подава́я язы́ком:/ благослове́н явле́йся, Бо́же наш, сла́ва Тебе́.

И ны́не, подо́бен то́йже:

Зако́на Испо́лнитель по пло́ти быв,/ прии́де Христо́с,/ нача́ток спасе́ния на Иорда́н соверши́ти, я́ко Благосе́рд,/ и Крести́телю подклоня́ет верх, ве́рно вопию́щу:/ лю́дие, зове́м:/ благослове́н явле́йся, Бо́же наш, сла́ва Тебе́.

На стихо́вне стихи́ры, глас 2.

Подо́бен: До́ме Евра́фов:

От Вифлее́ма/ на Иорда́н пре́йдем,/ та́мо бо Свет/ су́щим во тьме/ озаря́ти уже́ начина́ет.

Стих: Сего́ ра́ди помяну́х Тя/ от земли́ Иорда́нски и Ермонии́мски.

Земля́ Завуло́ня,/ су́щии обо́нпол Иорда́на,/ услы́шите:/ приближа́ется Христо́с,/ Спасе́ние, Свет и Избавле́ние.

Стих: Ви́деша Тя во́ды, Бо́же,/ ви́деша Тя во́ды и у́бояшася.

Угото́ви и ты,/ Иорда́не, струи́,/ огне́м бо Креща́яй/ приближа́ется обнови́ти/ сокруше́нное созда́ние.

Сла́ва, и ны́не, глас и подо́бен то́йже:

Яви́ся сла́вы/ О́тчее Сия́ние/ во струя́х Иорда́нских,/ Креще́нием очища́я/ скве́рну душ на́ших.

НА ЛИТУРГИ́И

Блаже́нны от кано́на предпра́зднства песни 3-я и 6-я. Проки́мен, глас 7: Возвесели́тся пра́ведник о Го́споде: Стих: Услы́ши, Бо́же, глас мой, внегда́ моли́ти ми ся к Тебе́. Апо́стол к Тимофе́ю. зача́ло 292. Аллилу́ия. Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Ева́нгелие от Матфе́я, зача́ло 36. Прича́стен: В па́мять ве́чную бу́дет пра́ведник:

Святой пророк Малахия – последний из известных нам ветхозаветных пророков, почему святые отцы называют его «печатью пророков». «Некоторые утверждали,– говорит святитель Кирилл Александрийский († 444; память 18 января и 9 июня),– что Малахия по естеству был Ангел, но по воле Божией облекся в тело и отправлял в израильском народе должность пророка; но сего вымысла не надо принимать. Ангелом Малахия назван глазным образом, по значению своего имени (Малахия – посланник Божий, евр.), а частию, вероятно, и потому, что возвещал израильтянам Божественные глаголы. По сей последней причине сам пророк Малахия называет Ангелом всякого вообще священника (Мал. 2,7).

По свидетельству преподобного Ефрема Сирина († 373–379; память 28 января) и святителя Епифании Кипрского († 403; память 12 мая), святой Малахия происходил из колена Завулонова. Он родился в селении Суфа, в земле Завулоновой.

Большинство толкователей согласно говорят, что святой пророк Малахия жил по возврещении иудеев из плена Вавилонского, спустя некоторое время после святых пророков Аггея (500 до РХ.; память 16 декабря) и Захарии (520 до Р.Х.; память 8 февраля). В то время был вновь построен Иерусалимский храм (ок. 486 г.), в нем совершалось Богослужение и приносились священниками жертвы.

Свое пророческое служение святой Малахия называет бременем, т. е. печальным пророчеством, потому что оно предвозвещает наказание нечестивым (Мал. 2:1–12, 3:5–9, 4:1). Пророк пламенно обличает иудейский народ и священников за то, что они не имеют должного благоговения к Богу, приносят Ему «худые жертвы», не соблюдают Его заповедей, своим лицемерием и нечестием уклонились от правого пути.

Пророк Малахия угрожает иудейскому народу Судом Божиим и за разные другие пороки – прелюбодеяния и чародейства, ложные клятвы, притеснение вдов и сирот, отвержение пришельцев, удерживание платы у наемником, неисполнение закона о церковной десятине: «И прииду к вам для суда, и буду скорым обличителем чародеев и прелюбодеев, и тех, которые клянутся ложно и удерживают плату у наемника, притесняют вдову и сироту, и отталкивают пришельца, и Меня не боятся,– говорит Господь Саваоф» (Мал. 3,5).

Видя неравное раздаяние между людьми земных благ, видя, что нечестивые благоденствуют, а благочестивые страдают, иудеи осмелились сетовать, что Бог благоволит к порочным, что тот хорош в очах Его, кто делает зло, а потому нет промышления Божьего о людях, нет правосудия Божьего на земле (Мал. 2,17). Таковым святой пророк Малахия возвещает, что Божий Промысел воздает каждому должное, что есть Бог Правосудный, Который видит и знает все дела людей, и что Он скоро явится на земле. А чтобы уготовать в их сердцах и душах путь Ему Господь пошлет Своего вестника, который возвестит пришествие Мессии в мир и наступление благодатного Царства Божия на земле: «Вот Я пошлю к вам Илию пророка пред наступлением дня Господня, великого и страшного. И он обратит сердца отцов к детям и сердца детей к отцам их, чтобы Я пришед не поразил земли проклятием» (Мал. 4, 5–6).

В Новом Завете книга святого пророка Малахии цитируется неоднократно, как книга пророческая и Богодухновенная, всем известная и признанная за каноническую (Мф.11, 10; Мк. 1, 2; Лк. 2, 17; Рим. 9, 13).

Из святоотеческих толкований на книгу святого пророка Малахии известны толкования преподобного Ефрема Сирина, блаженного Иеронима, святителя Кирилла Александрийского, блаженного Феодорита (имеются переводы на русский язык).

Святой пророк Малахия скончался в молодых летах и, по преданию, был погребен со своими предками в отечественном селении Суфа.

Святой мученик Гордий родился во второй половине III века в Кесарии Каппадокийской, в христианской семье. Достигнув юношеского возраста он был взят в войско и получил чин сотника, так как отличался храбростью и силой.

С воцарением императора Ликиния (307–324) усилились гонения на христиан.

В Кесарию, как и в другие города Римской империи, был дослан указ о запрещении христианства: отвергавшие поклонение идолам подвергались смертной казни, а имущество казненных отдавали доносителям.

Сотни жителей Кесарии были убиты, многие, спасаясь от гонения, бросали свои дома и скрывались за пределами города.

Святой мученик Гордий отказался от своего воинского звания и ушел в добровольное изгнание. Он поселился в пещере на горе Хорив, где подвизался в посте и молитве. В то время правитель Кесарии, желая привлечь к язычеству горожан, назначил торжественное празднество в честь бога войны Марса; в городском цирке были устроены состязания наездников. Толпы народа, в том числе много христиан, собрались на них.

Узнав о языческом празднестве, святой Гордий вышел из своего уединения и появился в цирке. Своим видом (оборванный, изможденный, с большой бородой) он обратил на себя всеобщее внимание. Поднявшись на возвышение, святой Гордий обратился с пламенной проповедью о Христе Спасителе, бесстрашно обличал языческое зловерие.

Схваченный воинами и подведенный к правителю Кесарии, находившемуся в цирке, святой Гордий не убоялся его жестоких угроз, отверг и льстивые посулы правителя.

Окружившие святого тайные христиане, из сострадания к нему, пытались уговорить его отречься от Господа на словах, а в сердце сохранять веру в Христа. Но святой Гордий преодолел этот соблазн и напомнил слова Спасителя: «кто отречется от Меня перед людьми, отрекусь от того и Я пред Отцем Моим Небесным» (Мф. 10, 32). Затем святой Гордий вновь громогласно исповедал Христа как Воплотившееся Слово Божие и, осенив себя крестным знамением, подошел к палачу. С просветленным и радостным ликом святой Гордий принял мученический венец через усекновение честно́й главы.