1-й день

Обре́зание Го́спода на́шего Иису́са Христа́

Па́мять и́же во святых отца́ на́шего Васи́лия Вели́каго, архиепи́скопа Кесари́и Каппадоки́йския

Обре́зание Госпо́дне

Святи́тель Васи́лий Вели́кий

А́ще храм свята́го Васи́лия, твори́м бде́ние.

НА МАЛОЙ ВЕЧЕРНИ

На Го́споди, воззва́х: стихи́ры на 4, глас 3, самогла́сны:

Христа́ всели́в в ду́шу твою́ чи́стым твои́м житие́м,/ Исто́чника жи́зни, священноявле́нне Васи́лие,/ ре́ки источи́л еси́ уче́ний благочести́вых вселе́нней,/ от ни́хже напая́еми ве́рнии церко́внии лю́дие/ плоды́ усте́н, испове́дающих благода́ть, прино́сят/ Просла́вльшему па́мять твою́ во век ве́ка.

Ми́ро, излия́нное на тебе́ благода́ти,/ пома́за тя священноде́йствовати Ева́нгелие Ца́рствия Небе́снаго,/ Васи́лие Богоявле́нне,/ Христо́во благоуха́ние быв,/ воне́ю зна́ния Его́ вселе́нную испо́лнил еси́./ Те́мже, гла́сы раб твои́х благоприя́тне прие́мляй,/ испроси́ нам, чту́щим тя, ве́лия ми́лости.

Византи́ево: Святи́тельскою оде́ждею оде́ян,/ Тро́ицы побо́рниче Васи́лие,/ престо́лу предста́л еси́ суди́щному,/ беду́ прие́мляй о ве́ре?/ и, стра́дальческое противостоя́ние показа́в,/ я́рость епа́рхову посрами́л еси́,/ яря́щася держа́вою нече́стия/ и неми́лостивным разсече́нием претя́ща,/ усе́рдно, о́тче, проразсуди́в/ и му́ченик быв произволе́нием,/ вене́ц прия́л еси́ побе́ды от Христа́,/ иму́щего ве́лию милость.

Сла́ва, глас 2:

Су́щих извы́к естество́/ и всех усмотри́в нестоя́тельное,/ Еди́наго обрел еси́ непоколе́блема,/ Пресу́щнаго су́ща Соде́теля всех,/ Ему́же и па́че приложи́вся,/ не су́щих жела́ние отве́ргл еси́,/ моли́ и нам Боже́ственнаго жела́ния получи́ти,/ священноявле́нне Васи́лие.

И ны́не, праздника.

На стихо́вне стихи́ры, глас 2.

Подо́бен: До́ме Евфра́фов:

Храм всесве́тел/ трисо́лнечныя зари́ сый,/ озаря́еши ду́ши/ пита́ющихся/ словесы́ твои́ми, Васи́лие.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Труба́ с Небесе́/ шум гла́са твоего́ есть/ и огнь, и́мже попаля́ются/ ерети́ческая вся,/ Васи́лие, уче́ния.

Стих: Уста́ пра́веднаго поуча́тся прему́дрости,/ и язы́к его́ возглаго́лет суд.

Свет Еди́н Трисия́нный,/ разделя́яй Ли́цы,/ единя́яй же существо́м,/ А́рия низложи́л еси́/ и Саве́ллия, Васи́лие.

Сла́ва, и ны́не:

Плотско́е обре́зание/ Боговочелове́чнаго Сло́ва/ и па́мять Васи́лия/ почита́юще Вели́каго,/ Богоро́дицу почита́ем.

По О́тче наш: тропарь свята́го. Сла́ва, и ны́не, Обре́зания. Ектения́ и отпу́ст. На вели́цей же вече́рни, и на у́трени, и на Литурги́и пое́м все после́дование, я́коже изъяви́ся на ряду́.

НА ВЕЛИ́ЦЕЙ ВЕЧЕ́РНИ

Пое́м Блаже́н муж: 1-й антифо́н. На Го́споди, воззва́х: стихи́ры на 8. Пра́здника 4, глас 8. Самогла́сны:

Сходя́й Спас к ро́ду челове́ческому/ прия́т пелена́ми пови́тие,/ не возгнуша́ся плотска́го обре́зания,/ осмодне́вен по Ма́тери, Безнача́льный по Отцу́,/ Тому́, ве́рнии, возопии́м:/ Ты еси́ Бог наш, поми́луй нас.

Не устыде́ся Всеблаги́й Бог/ плотски́м обре́занием обре́затися,/ но даде́ Самаго́ Себе́ о́браз и начерта́ние всем ко спасе́нию,/ и́бо зако́на Творе́ц зако́нная исполня́ет/ и проро́ков прорече́ния, я́же о Нем./ И́же вся содержа́й го́рстию и пелена́ми пови́выйся,/ Го́споди, сла́ва Тебе́.

И́ны стихи́ры свята́го Васи́лия на 4, глас 4.

Подо́бен: Зва́нный свы́ше:

И́же тезоимени́тне нарече́н быв ца́рствия,/ егда́ ца́рское ты свяще́ние, Христо́в язы́к свят,/ любому́дрием и ху́дожеством, о́тче, упа́сл еси́,/ тогда́ венце́м тя украси́ ца́рствия, Васи́лие,/ ца́рствующими Ца́рствуяй и всех Госпо́дь,/ И́же Ро́ждшему́ соедине́ный,/ Присносу́щный Сын и Собезнача́льный./ Его́же моли́ спасти́ и просвети́ти ду́ши на́ша.

Святи́тельства оде́ждами укра́шен,/ ра́дуяся, пропове́дал еси́ Ева́нгелие Ца́рствия, Васи́лие,/ правосла́вия Це́ркви источи́в уче́ние./ И́миже ны́не просвеща́еми,/ Еди́но Божество́ е́же во Отце́ Вседержи́тели,/ и во Единоро́днем Бо́жии Сло́ве,/ и Боже́ственнем Ду́се,/ богосло́вим и сла́вим,/ в Трие́х Ли́цех неразде́льно./ Его́же моли́ спасти́ и просвети́ти ду́ши на́ша.

Небе́сным спребыва́я ликостоя́нием/ и соводворя́яся, о́тче Васи́лие,/ и́хже и житию́ поревнова́л еси́/ све́тлостию чи́стою жития́ твоего,/ еще́ с пло́тию живы́й с су́щими на земли́ я́ко безпло́тен./ Наслажда́ющияся Богодохнове́нным уче́нием твои́м/ от бед и тьмы неве́дения/ Христа́, Бо́га на́шего, моли́/ спасти́ и просвети́ти ду́ши на́ша.

Сла́ва, глас 8. Анато́лия:

Прему́дрости рачи́тель быв, преподо́бне,/ и всех су́щих, е́же к Бо́гу, предсуди́в сожи́тельницу поуче́ние сме́ртное,/ ле́потно житие́ препроводи́л еси́,/ и́бо, плотски́я стра́сти/ воздержа́ния кре́постьми себе́ обложи́в/ и Боже́ственного поуче́ния зако́ном,/ нерабо́тен душе́вный соблю́л еси́ сан,/ доброде́тели бо́гатством/ все плотско́е мудрова́ние повину́л еси́ ду́ху./ Те́мже плоть и мир возненави́дев и мироде́ржца,/ предстоя́ Христу́,/ проси́ душа́м на́шим ве́лия ми́лости.

И ны́не, глас то́йже, пе́рвую стихи́ру: Сходя́й Спас:

Вход. Проки́мен дне.

Бытия́ чте́ние (глава́ 17):

Яви́ся Госпо́дь Авра́му и рече́ ему́:/ Аз есмь Бог твой, благоугоди́ предо Мно́ю и бу́ди непоро́чен./ И положу́ заве́т Мой между́ Мно́ю и между́ тобо́ю, и умно́жу тя зело́./ И бу́деши оте́ц мно́гих язы́ков./ И не нарече́тся ктому́ и́мя твое́ Авра́м, но бу́дет и́мя твое́ Авраа́м,/ я́ко отца́ мно́гих язы́ков положи́х тя./ И возращу́ тя зело́ зело́,/ и положу́ тя в язы́ки, и ца́рие из тебе́ изы́дут./ И положу́ заве́т Мой между́ Мно́ю и тобо́ю/ и между́ се́менем твои́м по тебе́ в ро́ды их,/ в заве́т ве́чный, и бу́ду им Бог./ И паде́ Авраа́м на лице́ свое́м и поклони́ся Го́сподеви./ И рече́ Бог ко Авраа́му:/ ты же заве́т Мой да соблюде́ши,/ ты и семя твое́ по тебе́ в ро́ды их./ И сей заве́т, и́же соблюде́ши между́ Мно́ю и ва́ми/ и между́ се́менем твои́м по тебе́ в ро́ды их:/ обре́жите плоть ва́шу кра́йнюю, и бу́дет в зна́мение заве́та между́ Мно́ю и ва́ми/ и между́ се́менем твои́м по тебе́ в ро́ды их./ И отроча́ осмодне́вно обре́жется вам, всяк му́жеск пол в ро́дех ва́ших./ И му́жеский пол, и́же не обре́жет плоть кра́йнюю свою́ во осмы́й день,/ потреби́тся душа́ о́на от ро́да своего́, я́ко заве́т Мой разори́ла есть.

При́тчей чте́ние (глава́ 8):

Госпо́дь созда́ мя нача́ло путе́й Свои́х в дела́ Своя́./ Пре́жде век основа́ мя в нача́ле,/ пре́жде, не́же зе́млю сотвори́ти,/ и пре́жде, не́же бе́здны соде́лати,/ пре́жде, не́же произы́ти исто́чником во́дным,/ пре́жде, не́же гора́м водрузи́тися,/ пре́жде же всех холмо́в ражда́ет мя./ Госпо́дь сотвори́ страны́ и пусты́ни и концы́, населе́ны под небесе́м./ Егда́ гото́вяше не́бо, с ним бех,/ и егда́ отлуча́ше Себе́ Престо́л на ве́трех./ Егда́ кре́пки творя́ше вы́шния о́блаки/ и я́ко тве́рды полага́ше исто́чники поднебе́сныя,/ внегда́ полага́ти мо́рю преде́л его́, и во́ды не мимои́дут уст Его́,/ и кре́пки творя́ше основа́ния земли́, бех к Нему́ подо́бна./ Аз бех, о не́йже ра́довашеся,/ по вся же дни веселя́хся пред лице́м Его́ на вся́ко вре́мя.

При́тчей чте́ние (главы́ 10 и 11):

Уста́ пра́веднаго ка́плют прему́дрость,/ язы́к же непра́веднаго поги́бнет./ Устне́ муже́й пра́ведных ка́плют благода́ти,/ уста́ же нечести́вых развраща́ются./ Ме́рила льсти́вая ме́рзость пред Го́сподем,/ вес же пра́ведный прия́тен Ему́./ Иде́же а́ще вни́дет досажде́ние, та́мо и безче́стие,/ уста́ же смире́нных поуча́ются прему́дрости./ Соверше́ние пра́вых наста́вит их/ и поползнове́ние отрица́ющихся упасе́т их./ Не по́льзуют име́ния в день я́рости,/ пра́вда же изба́вит от сме́рти./ У́мер пра́ведный, оста́ви раска́яние,/ нару́чна же быва́ет и посмея́тельна нечести́вых па́губа./ Пра́вда непоро́чнаго исправля́ет пути́,/ в нече́стие же па́дает непра́вда./ Пра́вда муже́й пра́вых изба́вит их,/ безсове́тием же пленя́ются беззако́ннии./ Сконча́вшуся му́жу пра́ведну, не поги́бнет наде́жда,/ похвала́ же нечести́вых поги́бнет./ Пра́ведник от ло́ва убе́гнет,/ вме́сто же его́ предае́тся нечести́вый./ Во усте́х нечести́вых сеть гра́жданом,/ чу́вство же пра́ведных благоспе́шное./ Во благи́х пра́ведных испра́вится град,/ и в поги́бели нечести́вых ра́дование./ Во благослове́нии пра́вых возвы́сится град,/ усты́ же нечести́вых раскопа́ется./ Руга́ется гра́жданом лише́нный ра́зума,/ муж же му́дрый безмо́лвие во́дит.

На литии́ стихи́ра хра́ма, та́же свята́го Васи́лия, глас 3. Ге́рманово:

Христа́ всели́в в ду́шу твою́ чи́стым твои́м житие́м,/ Исто́чника жи́зни, священноявле́нне Васи́лие,/ ре́ки источи́л еси́ уче́ний благочести́вых вселе́нней,/ от ни́хже напая́еми, ве́рнии церко́внии лю́дие/ плоды́ усте́н, испове́дающих благода́ть, прино́сят/ Просла́вльшему па́мять твою́ во век ве́ка.

Ми́ро, излия́нное на тебе́ благодати,/ пома́за тя священноде́йствовати Ева́нгелие Ца́рствия Небе́снаго,/ Васи́лие Богоявле́нне./ Христо́во благоуха́ние быв,/ воне́ю ра́зума Его́ вселе́нную испо́лнил еси́./ Те́мже, гла́сы раб твои́х благоприя́тне прие́мляй,/ испроси́ нам, чту́щим тя, ве́лия ми́лости.

Византи́ево: Святи́тельскою оде́ждею оде́ян,/ Тро́ицы побо́рниче Васи́лие,/ престо́лу предста́л еси́ суди́щному,/ беду́ прие́мляй о ве́ре,/ и, страда́льческое противостоя́ние показа́,/ я́рость епа́рхову посрами́л еси́,/ яря́щася держа́вою нече́стия/ и неми́лостивным разсече́нием претя́ща,/ усе́рдно, о́тче, проразсуди́в,/ и, му́ченик быв произволе́нием,/ вене́ц прия́л еси́ побе́ды от Христа́,/ иму́щаго ве́лию ми́лость.

Сла́ва, глас 6:

Излия́ся благода́ть во устна́х твои́х, преподо́бне о́тче,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

И ны́не, глас 8:

Сходя́й Спас к ро́ду челове́ческому/ прия́т пелена́ми пови́тие,/ не возгнуша́ся плотска́го обре́зания,/ осмодне́вен по Ма́тери, Безнача́льный по Отцу́,/ Тому́, ве́рнии, возопии́м:/ Ты еси́ Бог наш, поми́луй нас.

На стихо́вне стихи́ры свята́го, самогла́сны, глас 1.

Византи́ево: О, Боже́ственная и свяще́нная Христо́вы Це́ркве пчело́,/ Васи́лие всеблаже́нне!/ Ты бо Боже́ственнаго жела́ния жа́лом тебе́ вооружи́в,/ богоме́рзких ересе́й хулы́ уязви́л еси́/ и душа́м ве́рных благоче́стия сла́дость сокро́виществовал еси́./ И ны́не Боже́ственнаго рая́ нетле́нныя проходя́ па́жити,/ помина́й и нас, предстоя́ Тро́ице Единосу́щней.

Стих: Уста́ моя́ возглаго́лют прему́дрость,/ и поуче́ние се́рдца моего́ ра́зум.

Васи́лия мона́ха: Всех святы́х собра́л еси́ доброде́тели,/ о́тче наш Васи́лие:/ Моисе́еву кро́тость и Илиину́ ре́вность,/ Петро́во испове́дание, Иоа́нново Богосло́вие./ Я́ко Па́вел, вопия́, не преста́л еси́:/ кто изнемога́ет, и аз не изнемога́ю?/ Кто соблажня́ется, и аз не разжиза́юся?/ Те́мже, с ни́ми водворяя́ся,/ моли́ спасти́ся душа́м на́шим.

Стих, глас 2: Уста́ пра́веднаго поуча́тся прему́дрости,/ и язы́к его́ возглаго́лет суд.

Иоа́нна мона́ха: Су́щих извы́к естество́/ и всех усмотри́в настоя́тельное,/ Еди́наго обре́л непоколе́блема,/ Пресу́щнаго су́ща Соде́теля всех,/ Ему́же и па́че приложи́вся,/ не су́щих жела́ние отве́ргл еси́,/ моли́ и нам Боже́ственнаго жела́ния получи́ти,/ священноявле́нне Васи́лие.

Сла́ва, глас 6:

Благода́ть чуде́с с Небесе́ прие́м/ и лесть и́дольскую обличи́в уче́ньми,/ святи́телей еси́ сла́ва и утвержде́ние,/ всеблаже́нне Васи́лие,/ и всех преподо́бных уче́ния о́браз./ Дерзнове́ние име́я к Бо́гу,/ Того́ моли́ спасти́ся душа́м на́шим.

И ны́не, глас 8:

Не устыде́ся Всеблаги́й Бог/ плотски́м обре́занием обре́затися,/ но даде́ Самаго́ Себе́ о́браз и начерта́ние всем ко спасе́нию,/ и́бо зако́на Творе́ц зако́нная исполня́ет/ и проро́ков прорече́ния, я́же о Нем./ И́же вся содержай го́рстию и пелена́ми пови́выйся,/ Го́споди, сла́ва Тебе́.

Тропарь свята́го, глас 1:

Во всю зе́млю изы́де веща́ние твое́,/ я́ко прие́мшую сло́во твое́,/ и́мже боголе́пно научи́л еси́,/ естество́ су́щих уясни́л еси́,/ челове́ческия обы́чаи украси́л еси́,/ ца́рское свяще́ние, о́тче преподо́бне,/ моли́ Христа́ Бо́га/ спасти́ся душа́м на́шим.

Сла́ва, и ны́не, пра́здника, глас то́йже:

На Престо́ле огнезра́чнем/ в Вы́шних седя́й со Отце́м Безнача́льным и Боже́ственным Твои́м Ду́хом,/ благоволи́л еси́ роди́тися на земли́/ от Отрокови́цы Неискусому́жныя, Твоея́ Ма́тере, Иису́се,/ сего́ ра́ди и обре́зан был еси́, я́ко Челове́к осмодне́вный./ Сла́ва всеблаго́му Твоему́ сове́ту,/ сла́ва смотре́нию Твоему́,/ сла́ва снисхожде́нию Твоему́, Еди́не Человеколю́бче.

И отпу́ст.

На повече́рии конда́к свята́го. Сла́ва, и ны́не: праздника. Полу́нощницу же пое́м, по обы́чаю, с кафи́змою. По 1-м трисвято́м тропа́рь пра́здника. По 2-м трисвято́м конда́к пра́здника же. Моли́твы же Помяни́, Го́споди, в наде́жди Воскресе́ния: не глаго́лем, то́чию: Го́споди, поми́луй, 12. И отпу́ст.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва свята́го, и ны́не, пра́здника.

По 1-й кафи́зме седа́лен, глас 5.

Подо́бен: Собезнача́льное:

Я́ко ца́рское украше́ние Це́ркве, Васи́лия вси да восхва́лим,/ уче́ний сокро́вище неоску́дное,/ си́ми бо той наказа́ нас Тро́ицу почита́ти Святу́ю,/ соедине́ну у́бо Существо́м, разделе́ну же Ипоста́сьми.

Сла́ва, глас 1.

Подо́бен: Гроб Твой:

Васи́лие прему́дре, предстоя́й Тро́ице,/ моли́ся получи́ти в День суда́ нам, пою́щим тя и чту́щим па́мять твою́,/ благода́ть, ми́лость и очище́ние прегреше́ний,/ я́ко да усты́ прославля́ем и се́рдцем Еди́наго Человеколю́бца.

И ны́не:

Всех Творе́ц и Влады́ка ми́ра,/ Сый со Отце́м и Ду́хом горе́,/ я́ко Младе́нец обре́зуется на земли́ осмодне́вен./ И́стинно Боже́ственна же и чу́дна дела́ Твоя́:/ Ты бо, Влады́ко, нас ра́ди обре́зался еси́,/ я́ко Сый зако́на исполне́ние.

И чтем во Ева́нгелии толково́м поуче́ние Вели́каго Васи́лия мона́хом.

По 2-й кафи́зме седа́лен, глас 8.

Подо́бен: Прему́дрости:

Неизрече́нныя прему́дрости Богови́дне поче́рпл еси́ бога́тство та́йное,/ всем источи́л еси́ правосла́вия во́ды,/ ве́рных у́бо сердца́ Боже́ственне веселящия,/ неве́рных же веле́ния досто́йне потопля́ющия./ Отню́дуже обою́ду благоче́стия по́ты/ показа́лся еси́ непобеди́м Тро́ицы побо́рник, святи́телю Васи́лие./ Моли́ся Христу́ Бо́гу прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва, глас 3.

Подо́бен: Боже́ственныя ве́ры:

Всю напои́л еси́ вселе́нную, я́коже вода́ми,/ уче́нии твои́ми, благоче́стия собра́нными догма́ты,/ жи́зни бо Исто́чник в тебе́ препочива́ше вои́стинну, Васи́лие./ Его́же моли́, я́ко дерзнове́ние стяжа́вый, Богодохнове́нне,/ дарова́ти нам ве́лию ми́лость.

И ны́не, глас 4:

И́же естество́м Неви́димый, ны́не ви́дим есть пло́тию:/ Сло́во Несозда́нное, ны́не из Девы Чи́стыя ражда́емо, зи́ждется,/ Те́мже и по зако́ну нас ра́ди, челове́ков,/ я́коже осмодне́вен, обре́зуется Младенец./ Тому́ у́бо поклони́мся, я́ко Спа́су на́шему.

Велича́ние Обре́занию:

Велича́ем Тя, Живода́вче Христе́,/ и почита́ем пречи́стыя пло́ти Твоея́/ зако́нное обре́зание.

Велича́ние святи́телю о́бщее или сие́:

Велича́ем тя,/ святи́телю Христо́в Васи́лие,/ благоче́стно Це́рковь Христо́ву сохра́ншаго.

По полиеле́и седа́лен, глас 8.

Подо́бен: Прему́дрости:

Си́лою слове́с Боже́ственных е́реси низложи́л еси́ мра́чный,/ вся шата́ния Евно́миева погрузи́л еси́,/ челове́ком бо Ду́ха Бо́га бы́ти пропове́дал еси́/ и рук возде́нием враги́ умертви́л еси́./ Все прогна́л еси́ Саве́ллиево служе́ние,/ вся же мудрова́ния Несто́риева упраздни́л еси́,/ святи́телю Васи́лие./ Моли́ся Христу́ Бо́гу/ прегреше́ний оставле́ние дарова́ти/ пра́зднующим любо́вию святу́ю па́мять твою́.

Сла́ва:

Благода́ть слове́с твои́х Боже́ственных и догма́т высота́ та́инственная/ Боже́ственнаго нам бысть восхожде́ния ле́ствица:/ Ду́ха бо, о́тче стяжа́вый трубу́,/ то́ю пропове́дал еси́ Боже́ственная уче́ния./ Те́мже и на ме́сте всели́лся еси́ зла́чне,/ мзды по́двигов твои́х прие́м, преподо́бне иера́рше Васи́лие./ Моли́ся Христу Бо́гу/ прегреше́ний оставле́ние дарова́ти/ пра́зднующим любо́вию святу́ю па́мять твою́.

И ны́не:

Вся́ческих Влады́ка и Творе́ц, из пречи́стыя утро́бы Твоея́ плоть прие́мый,/ Предста́тельницу Тя показа́ челове́ком, Всенепоро́чная./ Сего́ ра́ди вси к Тебе́ прибега́ем,/ очище́ния прегреше́ний прося́ще, Влады́чице,/ и ве́чнующия изба́витися му́ки,/ и вся́каго озлобле́ния лю́таго мироде́ржца./ Сего ради вопием Ти:/ Моли́ся Твоему́ Сыну и Бо́гу/ прегреше́ний оставле́ние дарова́ти/ покланя́ющимся ве́рою всесвято́му Рождеству́ Твоему́.

И чтем надгро́бное сло́во Григо́рия Богосло́ва, е́же о Вели́цем Васи́лии, на четы́ре ча́сти.

Степе́нна, 1-й антифо́н 4-го гла́са. Проки́мен, глас 4: Уста́ моя́ возглаго́лют прему́дрость,/ и поуче́ние се́рдца моего́ ра́зум. Стих: Услы́шите сия́, вси язы́цы,/ внуши́те, вси, живу́щии по вселе́нней. Вся́кое дыха́ние: Ева́нгелие от Иоа́нна, зача́ло 36.

По 50-м псалме́, стихи́ра самогла́сна, глас 6:

Излия́ся благода́ть во устна́х твои́х, преподо́бне о́тче,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

Кано́н пра́здника. Творе́ние Стефа́ново. Ирмо́с по два́жды, тропари́ же на 4, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Осмери́ца дней, нося́щая о́браз бу́дущаго,/ Твое́ю, Христе́, просвеща́ется и освяща́ется во́льною нището́ю,/ в сей бо зако́нно обре́зался еси́ пло́тию.

Обре́зание прие́млет осмодне́вное Христо́с Своего́ рождества́,/ и сего́ днесь сень спря́тает,/ свет возсиява́я но́выя благода́ти.

Ин кано́н святи́теля Васи́лия, на 8. Творе́ние Иоа́нна Дамаскина́, глас и ирмо́с то́йже.

Твоему́ гла́су подоба́ше приити́, Васи́лие, нача́ти хотя́щим хвалы́ твоя́,/ но, о́тче, мольбу́ прие́м, благода́ть подава́й незави́стно нам.

Доброде́телей ты жесто́кий ше́ствовал еси́ путь,/ в гла́дкий дости́гл еси́ и несопроти́вный Небе́сный восхо́д/ и всем яви́лся еси́ о́браз, Васи́лие.

Страстно́е взыгра́ние, томя́щее плоть, любому́дрия жела́нием наказа́л еси́,/ те́мже в нетле́нных водворя́ешися Ца́рствиих,/ о́тче Васи́лие.

Душе́вныя стра́сти благопотре́бно, Васи́лие,/ вку́пе же и теле́сныя, духо́вным посе́кл еси́ мече́м,/ себе́ же Влады́це же́ртву прине́сл еси́.

Ты, быв неизрече́нных таи́нник, Васи́лие,/ Христо́ву Ца́рствию тайнонаучи́л еси́, свяще́нне о́тче,/ я́ве Тро́йческий свет облиста́л еси́ нам.

Богоро́дичен: Кто изрещи́ Твое́ по досто́инству возмо́жет, е́же па́че сло́ва зача́тие? Бо́га бо родила́ еси́ пло́тию, Всечи́стая,/ нам я́вльшася Спа́са и Го́спода.

Катава́сия: первый лик пое́т ирмо́с: Глубины́ откры́л есть дно/ и су́шею Своя́ влече́т,/ в ней покры́в проти́вныя,/ кре́пкий во бране́х Госпо́дь/ я́ко просла́вися.

Други́й лик, ирмо́с: Ше́ствует морску́ю волня́щуюся бу́рю,/ су́шу а́бие Изра́иль я́вльшуюся./ Чермны́й же понт триста́ты еги́петския покры́ ку́пно,/ водостла́нен гроб,/ си́лою кре́пкою десни́цы Влады́чни.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Сло́во вопло́щшееся Пресу́щественное в преста́тие зако́на обре́зася,/ нача́ток же Боже́ственныя благода́ти и жи́зни нетле́нныя нам подаде́.

Зако́на исполни́тель, не я́ко сопроти́вен Бо́гу сый, Христо́с воплоти́выйся показа́ся/ и сподо́бися во́лею обре́затися осмодне́вен.

Преподо́бнаго

Спритече́ Христо́ву и спросия́ па́мять твоя́, о́тче, Рождеству́,/ Его́же несказа́нное та́инство твои́ми уче́ньми я́ве сотвори́л еси́.

Стра́хом Госпо́дним утвержда́ем, нача́ло бо му́дрости сей есть,/ любо́вию лу́чшею впери́лся еси́ прему́дрости, о Васи́лие.

Наказа́ния быв вся́каго испо́лнен,/ не то́кмо до́льнаго и попира́емаго, мно́го же па́че лу́чшаго,/ показа́лся еси́ ми́ру свет, Васи́лие.

Васи́лие прему́дре, вшел еси́ дея́нием,/ и дея́ние вше́ствие виде́ния Боже́ственнейшаго показа́л еси́,/ и су́щих ра́зуму научи́лся еси́ я́ве.

Богоро́дичен: Безсе́менно во чре́ве Бо́га зачала́ еси́/ и ражда́еши несказа́нно воплоще́нна,/ на Него́же зре́ти не сме́ют, Чи́стая, Небе́сных си́лы, Присноде́во.

Катава́сия, лик пе́рвый: Кре́пость дая́й царе́м на́шим Госпо́дь/ и рог пома́занных Свои́х вознося́й/ от Де́вы ражда́ется, гряде́т же ко Креще́нию./ Тому́, ве́рнии, возопие́м:/ несть свят, я́ко Бог наш.

Други́й: Ели́цы дре́вних изреши́хомся се́тей/ бра́шен львов, сотре́нных члено́вными,/ ра́дуимся и разшири́м уста́, сло́во плету́ще от слове́с сладкопе́ния,/ и́мже к нам наслажда́ется дарова́ний.

Конда́к пра́здника, глас 3.

Подо́бен: Де́ва днесь:

Всех Госпо́дь обре́зание терпи́т/ и челове́ческая прегреше́ния, я́ко Благ, обре́зует,/ дае́т спасе́ние днесь ми́ру./ Ра́дуется же в Вы́шних и Созда́телев иера́рх,/ и светоно́сный, Боже́ственный таи́нник Христо́в Васи́лий.

Та́же седа́лен свята́го, глас 8.

Подо́бен: Прему́дрости:

Прему́дрости сло́ва навы́к и писа́ние зако́на отложи́в,/ всем пропове́дал еси́ благода́ти сло́во/ и душ скрижа́ли угла́дил еси́ словесы́ твои́ми,/ в ни́хже начерта́л еси́ Боже́ственная уче́ния./ Те́мже и мрак проше́д о́блаком покро́ва телесе́,/ и просия́л еси́ ду́хом, святи́телю Васи́лие./ Моли́ Христа́ Бо́га/ грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, пра́здника, глас 4.

Подо́бен: Яви́лся еси́ днесь:

Я́ко Сый бе́здна человеколю́бия,/ оде́ялся еси́, Влады́ко, в зрак ра́бий/ и пло́тию обре́зался еси́,/ да́руя всем челове́ком вели́кую Твою́ ми́лость.

Песнь 4

Ирмо́с: Услы́шах, Го́споди,/ слух Твоего́ смотре́ния,/ и просла́вих Тя,/ Еди́не Человеколю́бче.

Обре́зание преста́, отне́леже Христо́с во́лею обре́зася,/ язы́к мно́жество спаса́я благода́тию.

Бу́дущего непреста́нную осма́го ве́ка жизнь изобража́ет,/ в ню́же Влады́ка обре́зася пло́тию.

Преподо́бного:

Украша́ется я́коже Рождество́м Христо́ва неве́ста Це́рковь,/ та́ко и па́мятию твое́ю, всеблаже́нне.

Непребори́м яви́лся еси́, по Бо́зе боря́, Васи́лие,/ во всех Того́ повеле́нию покаря́яся.

Це́ркви подаде́ся от Бо́га огражде́ние и стена́ тверда́,/ Васи́лии всеблаже́нне.

Сопротивобо́жным се́чиво ты сека́тельное/ и огнь, пояда́яй пре́лесть, яви́лся еси́, о́тче Васи́лие.

Богоро́дичен: Мо́лим Тя, Чи́стая,/ я́же Бо́га безсе́менно заче́нши,/ при́сно моли́ти за рабы́ Твоя́.

Катава́сия: Услы́шах, Го́споди, глас Твой, его́же рекл еси́,/глас вопию́щаго в пусты́ни,/ я́ко возгреме́л еси́ над вода́ми мно́гими,/ Твоему́ свиде́тельствуяй Сы́ну,/весь быв соше́дшаго Ду́ха, возопи́:/ Ты еси́ Христо́с, Бо́жия му́дрость и си́ла.

Други́й: Огне́м очи́щся та́йнаго зре́ния,/ поя́ проро́к челове́ков новоде́йство,/ возглаша́ет глас, Ду́хом пле́щущ,/ воплоще́ние явля́ющ Неизрече́нна Сло́ва,/ И́мже си́льных держа́вы сотро́шася.

Песнь 5

Ирмо́с: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Ты, от Де́вы Ма́тере несказа́нно проше́д, Го́споди,/ и в челове́ческий не не сподо́бился еси́ оде́ятися о́браз,/ я́ко Младе́нец зако́нно зако́н испо́лнил еси́.

Но́щи уподо́бися, я́ко сень зако́нную лю́бящи Изра́иля, Ро́ждшая,/ из Нея́же облиста́вший Свет ми́ра, Христо́с, яви́ся.

Преподо́бнаго:

Во́дит вои́стинну сугу́б Це́рковь пра́здник днесь обре́зания,/ я́ко младе́нца Влады́ки, я́вльшагося на земли́,/ и па́мять раба́, му́дра и треблаже́нна.

Непостижи́мый свет почи́в в тебе́, преподо́бне,/ пресве́тлу свещу́ ми́ру тя показа́ Христо́с,/ те́мже па́мять твою́ пое́м, Васи́лие.

Всете́мно напи́санное в Сина́и бытие́ Моисе́ем,/ ты, сказу́я от Боже́ственных сокро́вищ,/ начерта́л еси́ всем, преблаже́нне Васи́лие.

Ни законополо́жник Моисе́й, ни пе́рвее зако́на Ио́сиф бысть,/ и́же по тебе́ пи́щи пшеницоме́ритель:/ Боже́ственныя бо пло́ти сам раздроби́тель яви́лся еси́, Васи́лие.

Богородичен: Тебе́, ро́ждшей Христа́, всех Соде́теля, зове́м:/ ра́дуйся, Чи́стая, ра́дуйся, Свет возсия́вшая нам,/ ра́дуйся, вмести́вшая Бо́га Невмести́маго.

Катава́сия: Иису́с, живота́ Нача́льник,/ разреши́ти осужде́ние гряде́т Ада́ма первозда́ннаго,/ очище́ний же, я́ко Бог, не тре́буя,/ па́дшаго очища́ет во Иорда́не,/ в не́мже вражду́ уби́в,/ преиму́щ всяк ум мир да́рует.

Други́й: Врага́ те́мнаго и оскверне́ннаго я́да очище́нием Ду́ха измове́ни,/ к но́вой приста́хом небла́зненной стези́,/ водя́щей в непристу́пную ра́дость, еди́нем присту́пну,/ и́мже Бог примири́ся.

Песнь 6

Ирмо́с: Бе́здна мя мно́га грехо́вная окружа́ет,/ и вопию́ Ти, проро́ка подража́яй:/ от тли мя, Го́споди, возведи́.

Прия́т коне́ц зако́н, отне́леже Христо́с, младе́нствовав,/ исполни́тель зако́на Сый, обре́зание восприя́т/ и разреши́ зако́нную кля́тву.

Суббо́тство, обре́зание же шата́ния евре́йскаго/ я́вльшагося Христа́ манове́нием преста́,/ и возсия́ благода́ти весна́.

Преподо́бнаго:

Напита́л еси́ ду́ши, та́ющия гла́дом, ни́щих оби́льно/ и а́лчущих сердца́ вся́каго испо́лнил еси́, Васи́лие, Боже́ственнаго весе́лия.

Напита́л еси́ бога́тно а́лчущия пи́щею Небе́сною:/ хлеб бо А́нгельский есть сло́во твое́, Васи́лие,/ и́мже изря́ден пшеницода́вец был еси́.

Собра́л еси́ пче́льный, Васи́лие, люботру́дно доброде́тели вся́кия цвет/ и, худо́г¹ быв, в ни́хже ублажа́ешися.

Потща́лся еси́ ми́ра отлучи́тися и с Бо́гом пожи́ти,/ те́мже нестоя́тельная и тле́нная, всеблаже́нне Васи́лие, оста́вль,/ пребыва́ющая, я́ко мудр, стяжа́л еси́.

Богоро́дичен: Спаси́ от бед рабы́ Твоя́, Богоро́дице,/ я́ко вси по Бо́зе к Тебе́ прибега́ем,/ я́ко к Неруши́мей Стене́ и Предста́тельству.

Катава́сия: Глас Словесе́, свети́льник Све́та,/ денни́ца Со́лнца, Предте́ча в пусты́ни, -/ пока́йтеся! – всем вопие́т лю́дем, – и предочи́ститеся:/ се бо предстои́т Христо́с,/ от тли мир избавля́яй.

Други́й: Вожделе́ннаго я́вствова со всеблаже́нным гла́сом Оте́ц,/ Его́же из чре́ва отры́гну./ Ей, – глаго́лет, – Сей соесте́ствен Сын,/ Сый светоза́рен, произни́че из челове́ча ро́да,/ Сло́во же мое́ жи́во, и Челове́к промышле́нием.

Конда́к, глас 4.

Подо́бен: Яви́лся еси́ днесь:

Явился еси́ основа́ние непоколеби́мое Це́ркве,/ подая́ всем некрадо́мое госпо́дьство челове́ком,/ запечатле́я твои́ми веленьми,/ небоявле́нне Васи́лие преподо́бне.

И́кос:

Целому́дрия ча́ша, уста́ прему́дрости/ и степе́нь уче́ний, Васи́лий Вели́кий всем облиста́ет мы́сленно./ Прииди́те у́бо, и ста́нем в дому́ Бо́жии, те́пле взира́юще,/ чудесы́ сего́ крася́щеся, я́коже луче́ю, облиста́вшеся жития́,/ чи́стым духом прохла́ждшеся,/ подо́бящеся того́ ве́ре, и теплоте́, и смире́нию,/ и́миже дом яви́ся естества́ Бо́жия./ К нему́же вопию́ще, пое́м:/ небоявле́нне Васи́лие преподо́бне.

Песнь 7

Ирмо́с: О́бразу злато́му, на по́ле Деи́ре служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Све́тло и пресве́тло Рождество́ Христо́во,/ и бу́дущаго обновле́ния подписа́вшее та́инство днесь,/ я́ко зако́нным чи́ном Спас обре́зуется,/ не я́ко Бог, но я́ко Челове́к и зако́на исполне́ние.

Зако́н исполня́я, зако́на Творе́ц, пло́тию днесь во́лею обре́зуется,/ обре́зание содева́я грехо́вныя зимы́ и зва́ти да́руя:/ благослове́н еси́, Бо́же оте́ц на́ших.

Преподо́бнаго

О́браз Отца́ Сын, и Сы́на Дух есть./ Ты же Ду́ха, о Васи́лие, нескве́рнено зерца́ло, дом же всея́ Тро́ицы./ Блаже́нна па́мять твоя́, и сла́вящии ю воспрославля́ются.

Углуби́в ум во глубины́ Бо́жия непостижи́мыя/ и собра́в многоце́нный ты би́сер ра́зума,/ напо́лнил еси́ мир прему́дростию и зва́ти научи́л еси́:/ благослове́н еси́, Бо́же оте́ц на́ших.

О, еди́но дохнове́ние ума́ свяще́нных сопру́г,/ я́коже еди́на душа́ во двою́ телесе́х неразде́льно:/ в Григо́рии Васи́лий, жела́нием Боже́ственным совоку́плени, в Васи́лии же Григо́рий,/ ны́не моли́те Христа́ о ста́де ва́шем.

Оте́ц сиро́т, и вдов защи́тник, и бо́гатство ни́щих,/ боля́щих утеше́ние и су́щих в бо́гатстве окормле́ние,/ ста́рости жезл яви́лся еси́, и наказа́ние ю́ности,/ и мона́шествующих доброде́тели пра́вило, Васи́лие.

Очи́стив от вся́каго ти́ннаго скверне́ния ум, Васи́лие,/ сразсмотри́л еси́ духо́вная жела́нным твои́м ду́хом./ Те́мже, воспева́я Тро́ицу, со дерзнове́нием взыва́л еси́:/ благослове́н еси́, Бо́же оте́ц на́ших.

Богоро́дичен: Тя купину́ Моисе́й в горе́ Сина́йстей огнепали́му, Чи́стая, прови́дяше,/ прие́мшую неопа́льно нестерпи́мую зарю́ Неизглаго́ланнаго Существа́,/ соедини́вшагося дебельству́ пло́ти еди́ныя в Нем святы́х Ипоста́сей.

Катава́сия: Ю́ноши благочести́выя, пе́щи о́гненней приобщи́вшияся,/ шумя́щ дух ро́сный невреди́мы сохрани́/ и Бо́жия А́нгела снизхожде́ние./ Те́мже, в пла́мени ороша́еми, благода́рственно воспева́ху:/ препе́тый оте́ц Го́споди и Бо́же, благослове́н еси́.

Други́й: Опали́ струе́ю зми́евы главы́ пе́щный высо́кий пла́мень,/ ю́ноши нося́щ благочести́выя,/ Ути́шивый, неудободержи́мую мглу из греха́/ всю же омыва́ет росо́ю Ду́ха.

Песнь 8

Ирмо́с: Неизрече́нною му́дростью соста́вльшаго вся́ческая Бо́га Сло́ва/ и от не су́щих во е́же бы́ти приве́дшаго,/ благослови́те, дела́, я́ко Го́спода,/ и превозноси́те во вся ве́ки.

Во осмы́й день обре́зуется я́ко Младе́нец Влады́ка,/ Иису́са же прие́млет именова́ние,/ я́ко ми́ра есть Спас и Госпо́дь.

Ко Христо́ву Рождеству́ досто́йно осмы́й спряже́ся,/ святи́теля всесла́вная па́мять,/ ю́же почита́юще ве́рою, пое́м Го́спода и превозно́сим во веки.

Преподо́бнаго

Несказа́нным Про́мыслом дарова́вшаго Васи́лия ми́ру,/ свет благоче́стия, трубу́ же Богосло́вия,/ благослови́те, дела́ Госпо́дня, Го́спода.

Бога́тным де́йством все́льшася в му́драго Васи́лия/ и тем благоче́стно Богосло́вившаго,/ благослови́те, дела́ Госпо́дня, Го́спода.

Боже́ственных тво́их слове́с наслади́вшиися, Васи́лие,/ непреста́нно в твое́й па́мяти торжеству́юще, вопие́м:/ благослови́те, дела́ Госпо́дня, Го́спода.

Лучи́ слове́с испусти́л еси́, Васи́лие, ми́ру,/ све́том наставля́ющия Еди́но чествова́ти Тро́йческое Естество́:/ благослови́те, дела́ Госпо́дня, Го́спода.

Богоро́дичен: Из Отца́, проше́дшаго пре́жде век, и безле́тнаго Бо́га Сло́ва/ и в после́дняя возсия́вша из Де́вы,/ благослови́те, дела́ Госпо́дня, Го́спода.

Катава́сия: Та́йну пресла́вную вавило́нская показа́ пещь, источи́вшая ро́су,/ я́ко струя́ми имя́ше Невеще́ственный Огнь восприя́ти Иорда́н/ и объя́ти пло́тию креща́ема Зижди́теля,/ Его́же благословя́т лю́дие и превозно́сят во вся ве́ки.

Други́й: Свобо́дна у́бо тварь познава́ется/ и сы́нове Све́та, пре́жде омраче́ннии,/ еди́н стене́т тьмы предста́тель./ Ны́не да благослови́т усе́рдно Вино́внаго/ пре́жде окая́нное язы́ков всенасле́дие.

На 9-й пе́сни Честне́йшую: не поем, но поем припе́вы Обре́зания: Велича́й, душе́ моя́,/ по зако́ну пло́тию обре́завшегося Го́спода.

Песнь 9

Ирмо́с: Я́же пре́жде со́лнца свети́льника Бо́га возсия́вшаго,/ пло́тски к нам прише́дшаго из боку́ Деви́чу,/ неизрече́нно воплоти́вшая, Благослове́нная, Всечи́стая,/ Тя, Богоро́дице, велича́ем.

Та́же вторы́й лик пое́т то́йже припе́в и ирмо́с. Про́чия же три припева́ем к тропаре́м.

Велича́й, душе́ моя́,/ во осмы́й день обре́зание Прие́млюща. (два́жды)

Днесь Влады́ка обре́зуется пло́тию я́ко Младе́нец,/ исполня́я зако́н. (еди́ножды)

Днесь Влады́ка пло́тию обре́зася,/ Иису́с нарече́ся. (еди́ножды)

Преше́д преде́лы Христо́с челове́ческаго всего́ естества́,/ преесте́ственно из Де́вы ражда́ется/ и, писа́ние зако́нное я́коже повелева́ет,/ пло́тию обре́зается,/ и испо́лнитель зако́на явля́ется.

Прииди́те, Влады́ки сла́вная Христо́ва именова́ния во святы́ни торжеству́им,/ Иису́с бо Боголе́пно нарече́ся днесь./ С си́ми же и па́мять святи́теля велича́ем.

Та́же свята́го припе́вы к тропаре́м его́:

Велича́й, душе́ моя́, во иера́рсех Васи́лия Вели́кого. (два́жды)

Велича́й, душе́ моя́,/ вселе́нныя пресве́тлаго свети́льника. (два́жды)

Велича́й, душе́ моя́,/ от Кесари́и Васи́лия Вели́каго. (два́жды)

Сей же вме́сто Сла́ва:

Велича́й, душе́ моя́,/ украси́вшаго Христову Це́рковь.

Вме́сто И ны́не:

Велича́й, душе́ моя́,/ Честне́йшую Небе́сных во́инств,/ Де́ву Пречи́стую Богоро́дицу.

Пе́рваго па́стыря, я́ко овча́ ве́рное Христо́во, Васи́лие,/ живоно́сным стопа́м после́довал еси́,/ мучи́телю бо твою́ ду́шу, о́тче, пре́дал еси́,/ до́блественне предбе́дствуя о Це́ркви, всеблаже́нне.

Церко́вное всесвяще́нное Христо́во ви́дев совокупле́ние,/ твои́м укра́шено святи́тельством, му́дре,/ всегуби́тель, я́ко от гро́ма, треснове́н быв, паде́ся мучи́тель,/ су́щия бо в тебе́ Ду́ха зари́ не стерпе́, Васи́лие.

Апо́столов седа́лища, ли́ка же страда́лец Христо́вых,/ патриа́рхов ски́нии, и пра́ведных сла́дости,/ и ра́дости проро́ков сподо́бился еси́, Васи́лие:/ Богоро́дицы бо служи́тель и Тро́ицы таи́нник был ecи́.

Превы́спренняя вода́ми покрыва́яй Еди́н Госпо́дь,/ востязу́яй мо́ре, бе́здны же изсуша́яй, из Тебе́, Чи́стая, плоть восприе́мый,/ от Вифлее́ма тщи́тся ко Иорда́ну крести́тися пло́тию.

Та́же о́ба ли́ка, соше́дшеся вку́пе, пою́т пе́рвый припе́в пра́здника и ирмо́с: Недоуме́ет всяк язы́к благохвали́ти по достоя́нию,/ изумева́ет же ум и преми́рный пе́ти Тя, Богоро́дице,/ оба́че Блага́я су́щи, ве́ру приими́,/ и́бо любо́вь ве́си Боже́ственную на́шу:/ Ты бо христиа́н еси́ Предста́тельница, Тя велича́ем.

Та́же припе́в: Велича́й, душе́ моя́,/ Честне́йшую Небе́сных во́инств,/ Де́ву Пречи́стую Богоро́дицу.

И ирмо́с: О, па́че ума́ Рождества́ Твоего́ чуде́с!/ Неве́ста Всечи́стая,/ Ма́ти Благослове́нная,/ Е́юже получи́вше всесоверше́нное спасе́ние,/ досто́йно хва́лим я́ко Благоде́теля, дар нося́ще песнь благодаре́ния.

Свети́лен.

Подо́бен: Ду́хом во святи́лищи:

Любому́дрия жела́нием обре́зал еси́, о́тче, души́ твоея́ покрыва́ло,/ и ми́ру показа́лся еси́, я́ко со́лнце, чудесы́,/ и ве́рных озари́л еси́ мы́сли, Богому́дре,/ Тро́ицы таи́нниче, о Васи́лие му́дре, и служи́телю Богоро́дицы.

Сла́ва, и ны́не, пра́здника:

Пло́тию обре́зуется зако́н испо́лнивый, я́ко Младе́нец осмодне́вен, веко́в Зижди́тель,/ и пелена́ми повива́ется, я́ко Челове́к, и млеко́м пита́ется,/ И́же вся безме́рною кре́постию я́ко Бог содержа́й/ и манове́нием возводя́й.

На хвали́тех стихи́ры, на 6, глас 5.

Подо́бен: Ра́дуйся:

Терпи́т обре́зание пло́тию/ из Отца́ кроме́ сече́ния же и тле́ния/ неизрече́нно ро́ждься я́ко Слово/ и я́ко Бог от Бо́га, в непрело́жнем пребыва́яй Божестве́./ Тем по зако́ну па́че зако́на бы́вый/ кля́твы зако́нныя избавля́ет вся/ и свы́ше благослове́ние да́рует./ Те́мже, преблаго́е Его́ схожде́ние восхваля́юще,/ пое́м и благода́рственно прославля́ем,/ Того́ моля́ще душа́м на́шим дарова́ти ве́лию ми́лость. (Два́жды)

По благода́ти Сын Бо́жий быв/ возрожде́нием Боже́ственнаго креще́ния,/ естество́м и и́стиною,/ и первове́чна Сы́на Бо́жия и Сло́ва,/ Единосу́щна Отцу́ и Собезнача́льна испове́дал еси́, преподо́бне, еретико́в же незатворе́нная уста́/ све́тлостию твои́х слове́с загради́л еси́./ Те́мже и в Ца́рства Вы́шняя всели́лся еси́,/ сца́рствуяй Еди́ному и есте́ственне Ца́рствующему Христу́,/ бога́тно раздаю́щему ми́ру ве́лию ми́лость.

Внутрь Небе́снаго хра́ма/ я́ко святи́тель свяще́нен вмести́лся еси́,/ дея́нием и виде́нием,/ прему́дрости нача́лами, я́ко оде́ждею свято́ю, обложе́н./ И ны́не в Вы́шнем же́ртвеннице, преподо́бне, свяще́нствуя,/ и Бо́гу предстоя́, и невеще́ственную слу́жбу соверша́я,/ помина́й ми́лостивно, всеблаже́нне Васи́лие,/ соверша́ющия па́мять свяще́нную твою́ и всечестну́ю,/ Христа́ моля́,/ подаю́щаго ми́рови ве́лию ми́лость.

Весь освяще́н Бо́гу/ и всеобра́зно от де́тства возложе́н,/ Му́дрости Пребоже́ственныя озари́вся заря́ми,/ су́щих разуме́ние уясни́л еси́,/ све́тло сказу́я и му́дре пове́дая,/ е́же в су́щих благочи́ние творя́/ позна́ния Боже́ственнейшаго де́ла./ Те́мже тя, Богоглаго́лива и Боже́ственна учи́теля/ и светоно́сна свети́льника церко́внаго, пропове́дуем,/ Христа́ моля́ща,/ подаю́щаго ми́ру ве́лию ми́лость.

Стра́хом утверди́вся Бо́жиим,/ нача́ло Прему́дрости разуме́л еси́, Васи́лие,/ страх прему́дростию и жития́ пра́востию превозше́л еси́, о́тче,/ любо́вию же Бо́гу сраствори́вся,/ и сво́йственнейший был еси́./ Те́мже Боже́ственным наказа́вся оправда́нием и судьба́м,/ челове́ков изучи́л еси́ обы́чаи/ и украси́л еси́ ве́рных ра́зумы,/ законоположе́ньми духо́вными уясни́в собо́р./ Христа́ у́бо моли́/ душа́м на́шим дарова́ти ве́лию ми́лость.

Сла́ва, глас 6:

Излия́ся благода́ть во устна́х твои́х, преподо́бне о́тче,/ и был еси́ па́стырь Христо́вы Це́ркве,/ уча́ слове́сныя о́вцы/ ве́ровати в Тро́ицу Единосу́щную/ во Еди́ном Божестве́.

И ны́не, глас 8:

Сходя́й Спас к ро́ду челове́ческому/ прия́т пелена́ми пови́тие,/ не возгнуша́ся плотска́го обре́зания,/ осмодне́вен по Ма́тери, Безнача́льный по Отцу́./ Тому́, ве́рнии, возопии́м:/ Ты еси́ Бог наш, поми́луй нас.

Славословие вели́кое. По трисвято́м тропа́рь Васи́лия. Сла́ва, и ны́не, пра́здника. Ектении́ и отпу́ст. И зна́менуются бра́тия елеем от канди́ла свята́го, а́ще изво́лит настоя́тель, и пое́м стихи́ру самогла́сну. На 1-м часе́ тропа́рь пра́здника. Сла́ва, Васи́лия. И ны́не, Богоро́дичен часо́в. По трисвятом конда́к пра́здника. И про́чая. И соверше́нный отпу́ст. На часе́х кондаки́ глаго́лем пра́здника и свята́го, пременя́юще.

НА ЛИТУРГИ́И:

Блаже́нны: от кано́на пра́здника, песнь 3-я, и свята́го, песнь 6-я. По вхо́де тропа́рь пра́здника и свята́го. Сла́ва, конда́к свята́го. И ны́не, пра́здника. Проки́мен, глас 6: Спаси́, Го́споди, лю́ди Твоя́: Стих: К Тебе́, Го́споди: И свята́го, глас 1: Уста́ моя́ возглаго́лют: Апо́стол к Колосса́ем, зача́ло 254. И свята́го, ко Евре́ем, зача́ло 318. Аллилу́ия, глас 8: Пасы́й Изра́иля: Стих: Уста́ пра́веднаго поуча́тся прему́дрости: Ева́нгелие от Луки́, зача́ло 6. И свята́го, зача́ло 24. И про́чее. Соверша́ется Боже́ственная Литурги́я Вели́каго Васи́лия. И пое́м за Досто́йно: О Тебе́ ра́дуется: Прича́стен: Хвали́те Го́спода с Небе́с: Други́й: В па́мять ве́чную бу́дет пра́ведник:

Моли́тва святи́телю Васи́лию Вели́кому

О вели́кий во иера́рсех, вселе́нныя учи́телю богому́дрый, преблаже́нне о́тче Васи́лие! Ве́лия по́двиги и труды́ твоя́, я́же во сла́ву Святы́я Це́ркве соверши́л еси́: ты испове́дник тве́рдый и свети́льник ве́ры Христо́вы на земли́ был еси́, све́том Богове́дения ве́рныя озаря́яй, ло́жная уче́ния попаля́яй и всему́ ми́ру сло́во спаси́тельный и́стины возвеща́яй. Ны́не же, ве́лие на Небесе́х име́яй дерзнове́ние ко святе́й Тро́ице, помози́ нам, со смире́нием к тебе́ припа́дающим, тве́рдо и неизме́нно святу́ю Правосла́вную ве́ру до конца́ жития́ на́шего сохрани́ти, от малове́рия же, сомне́ний и колеба́ния в ве́ре соблюди́, да не прельще́ни бу́дем богопроти́вных и душепа́губных уче́ний словеса́ми. Дух ре́вности святы́я, е́юже ты пламене́л еси́, о пресла́вный Це́ркве Христо́вы па́стырю, возгре́й предста́тельством твои́м и в нас, и́хже Христо́с поста́ви бы́ти па́стырями, да всеусе́рдно просвеща́ем и утвержда́ем в пра́вей ве́ре слове́сное ста́до Христо́во. Умоли́ Го́споди, да возвы́сится страна́ на́ша, и да да́рует всему́ наро́ду на́шему здра́вие, долгоде́нствие и во всем благо́е поспеше́ние. Испроси́, о милосе́рдый святи́телю, от Отца́ све́тов и всем, вся́кий дар коему́ждо благопотре́бен: младе́нцем благо́е в стра́се Бо́жием возраста́ние, ю́ным целому́дрие, ста́рым и немощны́м укрепле́ние, скорбя́щим утеше́ние, неду́гующим исцеле́ние, заблуждшим вразумле́ние и исправле́ние, оби́димым заступле́ние, сирота́м и вдови́цам защище́ние, искуша́емым благода́тное поможе́ние, отше́дшим от сего́ вре́меннаго жития́ отце́м и бра́тиям на́шим блаже́нное упокое́ние. Ей, свя́тче Бо́жий, при́зри ми́лостиво от оби́телей Го́рних на нас, смире́нных, мно́гими собла́знами и напа́стьми обурева́емых, и к земли́ приве́рженных возведи́ к высоте́ Небе́сней. Препода́ждь нам преблаги́й о́тче, твое́ архипа́стырское и свято́е благослове́ние, да, о́ным осеня́емии, в сие́ но́вое ле́то и во все про́чее вре́мя живота́ на́шего в ми́ре, покая́нии и послуша́нии Святе́й Правосла́вной Це́ркви поживе́м, за́поведи Христо́вы усе́рдно творя́ще, по́двигом до́брым ве́ры подвиза́ющеся, и та́ко Ца́рствия Небе́снаго дости́гнем, иде́же с тобо́ю и все́ми святы́ми сподо́би Тро́ицу Святу́ю, Единосу́щную и Неразде́льную пе́ти и сла́вити во ве́ки веко́в. Ами́нь.

ЗРИ: А́ще случи́тся Обре́зание Госпо́дне в свята́го Васи́лия Вели́каго в неде́лю. Твори́м бде́ние. На ма́лой вече́рни стихи́ры воскре́сны по обы́чаю. На стихо́вне стихи́ра воскре́сна гла́са еди́на. Та́же стихо́вныя стихи́ры Васи́лия, вели́кия вече́рни, глас 1, самогла́сны, с припе́вы их. Сла́ва, глас 6: Излия́ся благода́ть: И ны́не: Не устыде́ся Всеблаги́й Бог: По Трисвято́м тропа́рь воскре́сен. Сла́ва, свята́го. И ны́не, пра́здника. И отпу́ст.

На вели́цей вече́рни: На Го́споди, воззва́х: пое́м стихи́ры воскре́сны 3, и пра́здника 3, и свята́го, на 4. Сла́ва, свята́го: Прему́дрости рачи́тель. И ны́не, Богоро́дичен 1-й гла́са. Вход, проки́мен. И чте́ния 3. На литии́ стихи́ра хра́ма. И свята́го Васи́лия, Сла́ва, свята́го. И ны́не, пра́здника. На стихо́вне стихи́ры Окто́иха. Сла́ва, свята́го. И ны́не, пра́здника. На благослове́нии хле́бов тропа́рь свята́го два́жды и Богоро́дице Де́во: еди́ножды. И чте́ние в посла́ниих Апо́стольских.

На у́трени: На Бог Госпо́дь: тропа́рь воскре́сен два́жды. Сла́ва, свята́го. И ны́не, пра́здника. По кафизма́х седа́льны воскре́сны с Богоро́дичны их. И чте́ние во Ева́нгелии толково́м, Неде́ли пред Богоявле́нием. По полиеле́и тропари́: Ангельский собо́р: и ипакои́ гла́са, и седа́льны свята́го вси, по еди́ножды. Сла́ва, седа́лен по полиеле́и. И ны́не, пра́здника. И чте́ние в Богосло́ве, сло́во надгро́бное о Вели́ком Васи́лии. Степе́нна и проки́мен гла́са. Вся́кое дыха́ние: Ева́нгелие воскре́сно. Воскресе́ние Христо́во: и псало́м 50. Стихи́ра воскре́сна. Кано́н воскре́сен со ирмосо́м на 4, и пра́здника на 4, и свята́го на 6. Катава́сия: Глуби́ны откры́л есть дно: и Ше́ствует морску́ю: ки́йждо лик свой ирмо́с. По 3-й пе́сни конда́к пра́здника и седа́лен свята́го, два́жды: Сла́ва, и ны́не, пра́здника. По 6-й пе́сни конда́к свята́го и и́кос. И чтем Про́лог. На 9-й пе́сни пое́м Честне́йшую: Припе́вы же пра́здника и свята́го не пое́м. Свети́лен воскре́сен. Сла́ва, свята́го. И ны́не, пра́здника. На хвали́тех стихи́ры воскре́сны 4, и свята́го подо́бны 4, со обы́чными припе́вы его́. Сла́ва, стихи́ра Ева́нгельская. И ны́не: Преблагослове́нна еси́. Славосло́вие вели́кое, тропа́рь воскре́сен. Ектении́ и отпу́ст. И оглаше́ние Студи́тово. Дае́тся же и еле́й, по обы́чаю, от канди́ла свята́го, и исхожде́ние в притво́р, и час 1-й. И коне́чный отпу́ст. На часе́х тропа́рь воскре́сен. Сла́ва, пра́здника. И ны́не, Богоро́дичен часо́в. По трисвято́м конда́к пра́здника. На 3-м часе́ тропа́рь воскре́сен. Сла́ва, свята́го. И ны́не, Богоро́дичен часо́в. По трисвято́м конда́к свята́го и пра́здника, пременя́юще, глаго́лем.

На Литурги́и: Блаже́нны: гла́са на 4, и пра́здника песнь 3-я, на 4, и свята́го 6-я, на 4, По вхо́де тропа́рь воскре́сен и пра́здника, и свята́го. Сла́ва, конда́к свята́го. И ны́не, пра́здника. Проки́мен Неде́ли пред Просвеще́нием, глас 6: Спаси́, Го́споди, лю́ди Твоя́: Стих: К Тебе́, Го́споди, воззову́: И свята́го, глас 1: Уста́ моя́ возглаго́лют прему́дрость: Апо́стол Неде́ли пред Просвеще́нием, к Тимофе́ю зача́ло 298. Други́й Апо́стол к Колосса́ем, зача́ло 254. Аллилу́ия, глас 8; Неде́ли пред Просвеще́нием: Бо́же, уще́дри ны: Стих: Пасы́й Изра́иля: Ева́нгелие Неде́ли пред Просвеще́нием от Ма́рка, зача́ло 1 и Обре́зания, от Луки́, зача́ло 6. Прича́стен: Хвали́те Го́спода: Други́й: В па́мять: литурги́я Васи́лия Вели́каго, За Досто́йно: О Тебе́ ра́дуется:

ЗРИ: Суббо́та пред Богоявле́нием: На Литурги́и Апо́стол к Тимофе́ю, зача́ло 254. Ева́нгелие от Матфе́я, зача́ло 5.

ЗРИ: Неде́ля пред Богоявле́нием: Проки́мен, глас 6: Спаси́, Го́споди, лю́ди Твоя́: Стих: К Тебе́, Го́споди, воззову́, Бо́же мой. Апо́стол к Тимофе́ю, зача́ло 298. Аллилу́ия, глас 8: Бо́же, уще́дри ны; Ева́нгелие от Ма́рка, зача́ло 1. Прича́стен: Хвали́те Го́спода с Небе́с:

На восьмой день после Своего Рождества Богомладенец Иисус принял обрезание крайней плоти (Лк.2, 21), установленное по новозаветному закону для всех младенцев мужского пола в знамение Завета Бога с праотцем Авраамом и его потомками (Быт.17:10–14; Лев.12:3). По толкованию святых отцов Церкви, Господь, Творец закона, принял обрезание, являя пример, как людям следует неукоснительно исполнять Божественные установления (Мф. 5, 17). Господь принял обрезание для того, чтобы никто впоследствии не мог усомниться в том, что Он был истинным Человеком, а не носителем призрачной плоти, как учили впоследствии некоторые еретики (докеты). Святой Ефрем Сирин поучает: «Он был воистину плотию, и обрезан был как Человек…». При совершении обрезания Богомладенцу было дано Имя Иисус, возвещенное Архангелом Гавриилом в день Благовещения Пресвятой Деве Марии: «И сказал Ей Ангел: не бойся, Мария, ибо Ты обрела благодать у Бога; и вот, зачнешь во чреве, и родишь Сына, и наречешь Ему Имя: Иисус» (Лк.1:31–33).

Господь получил Имя Иисус (Спаситель) как печать Своего служения делу спасения мира (Мф.1:21; Mк.16:17, 9:38–39; Лк.10:17; Деян 3:6, 16; Фил. 2:9–10). Эти два события, совершившиеся в самом начале земной жизни Спасителя, напоминают христианам, что они вступили в Новый Завет с Богом и «обрезаны обрезанием нерукотворенным, совлечением греховного тела плоти, обрезанием Христовым» (Кол. 2, 11). Само имя христианина свидетельствует о вступлении человека в Новый Завет с Богом. В Новом Завете обряд обрезания уступил место таинству Крещения, прообразом которого он являлся (Кол. 2, 11–12).

Начало праздника Обрезания Господня восходит к первым векам христианства. Известны поучения, произнесенные на этот день в IV веке святителями Амфилохием Иконийским, Григорием Нисским, Амвросием Медиоланским и другими. Канон празднику написан в VII веке преподобным Стефаном Савваитом (память 28 октября).

Родился около 330 года в городе Кесарии Каппадокийской (Малая Азия), в благочестивой христианской семье Василия и Емилии. Отец святителя был адвокатом и преподавателем риторики. В семье было десять детей, из которых пять причислены Церковью к лику святых: сам святитель Василий, его старшая сестра преподобная Макрина (†380; память 19 июля), бpaт Григорий, епископ Нисский (†385; память 10 января), брат Петр, епископ Севастийский (†IV; память 9 января) и младшая сестра – праведная Феозва, диакониса (†385: память 10 января). К лику святых причислены также и мать святители праведная Емилия (†IV; память 1 января).

Первоначальное образование святой Василий получил под руководством своих родителей и бaбки Макрины, высокообразованной христиански, в молодые годы слышавшей наставления святителя Григория Чудотворца, епископа Неокесарийского (†ок. 266–270; память 17 ноября).

После смерти отца и бабки святитель Василий отправился для дальнейшего образования в Константинополь, а затем в Афины. Здесь он пробыл около пяти лет, в совершенстве изучив разнообразные науки – риторику и философию, астрономию и математику, физику и медицину. Святой Григорий Богослов (†389; память 25 января) также учился в то время в Афинах; между ними установилась тесная дружба, продолжавшаяся всю жизнь. Впоследствии Григорий Богослов, вспоминая те годы, писал, что в Афинах им известны были только две дороги – одна в церковь, а другая – в училище.

Около 357 года святой Василий вернулся в Кесарию, где некоторое время преподавал риторику. Чувствуя призвание к духовной жизни, он решил отправиться туда, где процветало подвижничество. С этой целью святитель предпринял путешествие в Египет, Сирию и Палестину.

В Египте святой Василий провел целый год у архимандрита Порфирия, изучая богословские творения святых отцов и упражняясь в постнических подвигах; затем он посетил преподобного Пахомия, подвизавшегося в Фиваидской пустыне, преподобных Макария Старшего и Макария Александрийского, Пафнутия, Павла и других подвижников. После этого святой Василий совершил паломничество в Иерусалим, где поклонился святым местам земной жизни Спасителя.

На обратном пути святитель Василий некоторое время находился в Антиохии, где в 362 году был посвящен в сан диакона епископом Мелетием.

В Кесарии святой Василий проводил строгую иноческую жизнь. В 364 году он был посвящен в сан пресвитера епископом Кесарийским Евсевием. Исполняя свое служение, святой Василий ревностно проповедовал и неустанно заботился о нуждах своей паствы, благодаря чему снискал высокое уважение и любовь. Епископ Евсевий, по немощи человеческой, проникся завистью к нему и начал выказывать свое нерасположение. Чтобы не возникла смута, святой Василий удалился в Понтийскую пустыню (южный берег Черного моря), где поселился недалеко от монастыря, основанного его матерью и старшей сестрой. Здесь святой Василий подвизался в аскетических подвигах вместе со своим другим святым Григорием Богословом. Руководствуясь Священным Писанием, они написали уставы иноческой жизни, принятые впоследствии христианскими монастырями.

После смерти императора Константина Великого, при сыне его Констанции (337–361), арианское лжеучение, осужденное на 1-м Вселенском Соборе в 325 году, стало вновь распространяться и особенно усилилось при императоре Валенте (364–378), стороннике ариан. Для святых Василия Великого и Григория Богослова настал час, когда Господь призвал их из молитвенного уединения в мир для борьбы с ересью. Святой Григорий вернулся в Назианзин, а святой Василии – в Кесарию, вняв письменной просьбе епископа Евсевия, примирившегося с ним. Епископ Евсевий Кесарийский (автор знаменитой «Церковной истории») умер на руках у святого Василия Великого, благословив его быть своим преемником.

Вскоре святой Василий был избран Собором епископов на Кесарийскую кафедру (370 г.). В тяжелое для Церкви время он проявил себя как пламенный защитник Православной веры, ограждая ее от ересей своими словами и посланиями. Особенно следует отметить три его книги против арианского лжеучителя Евномия, в которых святитель Василий Великий учил о Божестве Святого Духа и единстве Его природы с Отцом и Сыном.

В непрестанных подвигах поста и молитвы святитель Василий стяжал у Господа дар прозорливости и чудотворений. Однажды, во время молебна пред иконой Пресвятой Богородицы и великомученика Меркурия (III в., память 24 ноября), святитель Василий получил откровение о гибели императора Юлиана Отступника (361–363), пытавшегося вновь утвердить язычество. Святитель Василий увидел, как изображение великомученика Меркурия исчезло, а когда вновь появилось на иконе, копье великомученика было обагрено кровью. В это самое время Юлиан Отступник был пронзен копьем и погиб на Персидской войне.

Когда император Валент (361 – 378) отдал в Никее православную церковь арианам, святитель Василий предложил прибегнуть к Божьему суду, передать церковь той стороне (православным или арианам), по чьей молитве откроются ее запертые запечатанные двери.

Три дня и три ночи молились ариане, но все было тщетно. После этого к церкви подошел святитель Василий с православным клиром и народом, и по молитве святителя двери храма раскрылись.

Известны многие случаи чудесных исцелений, совершенных святителем Василием Великим. Сила молитв святителя Василия была столь велика, что он дерзновенно мог испросить у Господа прощение отрекшемуся от Христа грешнику, приведя его к искреннему покаянию. По молитвам святителя получали прощение и разрешались от своих грехов многие великие, отчаявшиеся в спасении грешники. Так, например, некая знатная женщина, стыдясь своих блудных грехов, записала их и отдала запечатанный свиток святителю Василию. Святитель всю ночь молился о спасении этой грешницы. Утром он отдал ей нераспечатанный свиток, в котором все грехи оказались изглаженными, кроме одного страшного греха. Святитель посоветовал женщине идти в пустыню к преподобному Ефрему Сирину. Однако преподобный, лично знавший и глубоко почитавший святого Василия, отослал каявшуюся грешницу обратно, сказав, что лишь святитель Василий силен испросить ей у Господа полное прощение. Вернувшись в Кесарию, женщина встретила погребальное шествие с гробом святителя Василия. В глубокой скорби она с рыданиями упала на землю, бросив свиток на гроб святителя. Один из клириков, желая посмотреть, что было написано в свитке, взял его и, развернув, увидел чистый лист; так был изглажен последний грех женщины по молитве святителя Василия, совершенной им посмертно.

Находясь на смертном одре, святитель обратил ко Христу своего врача иудея Иосифа. Последний был уверен, что святитель не сможет дожить до утра, и сказал, что в противном случае уверует во Христа и примет Крещение. Святитель испросил у Господа отсрочки своей кончины.

Прошла ночь и, к изумлению Иосифа, святитель Василий не только не умер, но, встав с одра, пришел в храм, сам совершил таинство Крещения над Иосифом, отслужил Божественную Литургию, причастил Иосифа, преподал ему поучение, а затем, простившись со всеми, с молитвою отошел ко Господу, не выходя из храма.

На погребение святителя Василия Великого собрались не только христиане, но язычники и иудеи. Прибыл проводить своего друга святитель Григорий Богослов, которого святитель Василий незадолго до своей кончины благословил принять Константинопольскую кафедру.

За свою короткую жизнь (†379) святитель Василий оставил нам множество богословских трудов: девять бесед на Шестоднев, 16 бесед на разные псалмы, пять книг в защиту православного учения о Святой Троице; 24 беседы на различные богословские темы; семь аскетических трактатов; правила монашеские; устав подвижнический; две книги о Крещении; книгу о Святом Духе; несколько проповедей и 366 писем разным лицам.

Святитель Амфилохий, епископ Иконийский (†394; память 23 ноября), в своем надгробном слове о святителе Василии сказал: «Он для христиан всегда был и будет учителем спасительнейшим».

За свои заслуги перед Православной Церковью святитель Василий назван Великим и прославляется, как «слава и красота Церкви», «светило и око вселенной», «учитель догматов», «палата учености».

Святитель Василий Великий является небесным покровителем просветителя Русской Земли – святого равноапостольного великого князя Владимира, нареченного в Крещении Василием. Святой Владимир глубоко чтил своего Ангела и в честь его построил на Руси несколько храмов. Святитель Василий Великий, наряду со святителем Николаем Чудотворцем, издревле пользовался особым почитанием в среде русского верующего народа. Частица мощей святителя Василия и поныне пребывает в Лавре. Честная глава святителя Василия благоговейно хранится в Лавре святого Афанасия на Афоне, а десница его – в алтаре храма Воскресения Христова в Иерусалиме.