27-й день

Преподо́бнаго отца́ на́шего Сампсо́на Странноприи́мца

Преподобный Сампсон Странноприимец

Слу́жба благода́рственная Бо́гу, в Тро́ице Свято́й сла́вимому, о вели́кой, Бо́гом дарова́нной побе́де над све́йским короле́м Каро́лом вторы́м на́десять и во́инством его, соде́янной под Полта́вою в ле́то от воплоще́ния Госпо́дня 1709, ме́сяца ию́ня в 27-й день

Стихи́ры, глас 1.

Подо́бен: Всехва́льнии му́ченицы:

О́тче прехва́льне Сампсо́не,/ плотска́я стремле́ния/ воздержа́тельными увяди́л еси запале́ньми./ В пусты́ню всели́лся еси́, я́ко Илия́ дре́вле,/ ум очи́стив непреста́нными к Бо́гу манове́нии./ И ны́не моли́ся/ дарова́ти душа́м на́шим мир и ве́лию ми́лость.

О́тче Богому́дре Сампсо́не,/ по́стником приче́лся еси́,/ безстра́стием укра́шен,/ и всели́лся еси́ во оби́тели преподо́бных,/ иде́же Свет незаходи́мый/ и иде́же есть Дре́во жи́зни./ И ны́не моли́ся/ дарова́ти душа́м на́шим мир и ве́лию ми́лость.

О́тче Богодохнове́нне Сампсо́не,/ свети́льник был еси́,/ просвеща́я подсо́лнечную чуде́с сия́нии,/ душетле́нных неду́гов отгоня́я тьму,/ де́монский отрева́я мрак./ И ны́не моли́ся/ дарова́ти душа́м на́шим мир и ве́лию ми́лость.

Сла́ва, и ны́не, Богоро́дичен, глас и подо́бен то́йже:

Увы́ мне, что́ бу́ду,/ ум, и ду́шу, и те́ло оскверни́в прегреше́ньми?/ Что́ сотворю́?/ Ка́ко же избежу́ пла́мене нестерпи́маго,/ нереши́мых уз и ве́чных?/ Но, о Всенепоро́чная,/ пре́жде конца́ моли́ Сы́на Твоего́/ пода́ти ми оставле́ние.

Крестобогоро́дичен. Подо́бен то́йже:

Своего́ А́гнца А́гница и Непоро́чная Влады́чица/ на Кресте́ я́ко ви́де, зра́ка не иму́ща, ниже́ добро́ты,/ увы́ Мне, рыда́ющи, глаго́лаше:/ где добро́та Твоя́ за́йде, Сладча́йший?/ Где благоле́пие?/ Где благода́ть блиста́ющая о́браза Твоего́,/ Сы́не Мой любе́знейший?

Тропа́рь, глас 8:

В терпе́нии твое́м стяжа́л еси́ мзду твою́, о́тче преподо́бне,/ в моли́твах непреста́нно терпе́вый,/ ни́щия возлюби́вый и сия́ удовли́вый,/ но моли́ся Христу́ Бо́гу, Сампсо́не ми́лостиве блаже́нне,/ спасти́ся душа́м на́шим.

Кано́н, его́же краегране́сие: Пою́ тя, Сампсо́не, ве́рно Боже́ственными словесы́. Ио́сифово, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Пе́сньми твое́ пресве́тлое торжество́ восхвали́ти устреми́вшуся,/ свет ми низпосли́,/ предстоя́ венцено́сец престо́лу Влады́чню, преблаже́нне.

Еди́ну жела́я, я́же к жи́зни веду́щую тя, ми́ра кра́сная прете́кл еси́/ и преми́рное насле́дие стяжа́л еси́./ Те́мже тя, соше́дшеся, Сампсо́не, почита́ем.

Зако́ну Бо́жию повину́вся, досточу́дне,/ к кра́йней доброде́тели, ра́дуяся, восте́кл еси́, ми́лостив всем быв./ Те́мже тя ны́не ублажа́ем.

Богоро́дичен: Тя, Бо́жию па́че сло́ва Роди́тельницу,/ я́ко держа́вно заступле́ние всех, Пренепоро́чная, побежда́емых,/ сла́вим непреста́нно и ублажа́ем.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

 Сампсо́на свяще́ннаго восхва́лим:/ Бо́жию бо подо́бяся благоутро́бию, ми́лостив неду́жным бысть,/ наготу́ющим же всем оде́жда.

Свя́то и че́стно Боже́ственное житие́ твое́ препроводи́в, со святы́ми сочета́лся еси́/ и оби́тели преподо́бных дости́гл еси́, просвеще́ния неизрече́ннаго сподобля́емь.

Блаже́н еси ты, и бла́го тебе́ бу́дет,/ Боже́ственныя соблю́дшу, о́тче, зако́ны Го́спода и Бо́га на́шего,/ Его́же моли́ спасти́ся ста́ду твоему́.

Богоро́дичен: Души́ моея́ и ума́, Чи́стая, тьму отжени́/ и даждь я́ко в день наро́чит пожи́ти,/ спаси́тельная творя́щу повеле́ния.

Седа́лен, глас 4.

Подо́бен: Ско́ро предвари́:

Просия́в ду́хом, я́ко свети́льник све́тел, Сампсо́не всеблаже́нне,/ озаря́еши нас, че́стне, в дому́ твое́м:/ сего́ ра́ди врачева́ния, от Бо́га тебе́ да́нная, о́тче,/ су́щим в разли́чных неду́зех раздава́еши./ Те́мже мольба́ми твои́ми изба́ви ны от страсте́й.

Сла́ва, и ны́не, Богоро́дичен:

Обнови́ла еси́, Чи́стая, Боже́ственным Рождество́м Твои́м/ истле́вшее во страсте́х земноро́дных ме́ртвенное существо́/ и воздви́гла еси́ вся от сме́рти к животу́ нетле́ния./ Те́мже Тя по до́лгу блажи́м вси, Де́во Препросла́вленная,/ я́коже прорекла́ еси́.

Крестобогоро́дичен:

Де́во Пренепоро́чная, Ма́ти Христа́ Бо́га,/ ору́жие про́йде Твою́ пресвяту́ю ду́шу,/ егда́ распина́ема ви́дела еси́ во́лею Сы́на и Бо́га Твоего́,/ Его́же, Благослове́нная, моля́щи не преста́й проще́ние прегреше́ний нам дарова́ти.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ Еди́не Человеколю́бче.

Я́ко звезда́ пресве́тлая, всех нас просвеща́еши сердца́,/ достодо́лжно блажа́щих тя.

Дрема́ние от о́чию твое́ю отложи́в, бдел еси́ непреста́нно/ и сла́сти теле́сныя успи́л еси́.

Ни́щим дово́лен был еси́ Христа́ ра́ди/ и прия́л еси́ вы́шнее насле́дие, преподо́бне, ра́дуяся.

Богоро́дичен: Тя, Всенепоро́чная Влады́чице, све́тлую пала́ту Сло́ва,/ песносло́вим и ублажа́ем.

Песнь 5

Ирмо́с: Све́та Пода́телю и веко́в Тво́рче, Го́споди,/ во све́те Твои́х повеле́ний наста́ви нас:/ ра́зве бо Тебе́, ино́го бо́га не зна́ем.

Пречи́стый Свет, почи́вший в тебе́,/ всего́ тя светови́дна сотвори́, о́тче,/ просвеща́юща ве́рных доброде́телей твои́х све́тлыми сия́нии.

Ми́лованием мно́гим ни́щим бога́тство был еси́/ и врач су́щим в не́мощи воста́л еси́ я́ве,/ сих врачева́нием отъе́мля неду́ги.

Яви́лся еси храм чист Пресвята́го и Честна́го Ду́ха, страсте́й ти́ну очи́щ/ сам себе́ я́ко вои́стинну, о́тче Богоно́се,/ те́мже восхваля́ем тя.

Богоро́дичен: Тя, Пресвята́я Чи́стая, добро́ту Иа́ковлю,/ ве́рою Боже́ственными гла́сы песносло́вим,/ ро́ждшую нам Бо́га Плотоно́сца, Его́же трепе́щут вся́ческая.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Сокро́вищи Небе́сными обогати́лся еси́,/ любя́ ми́лование, Сампсо́не сла́вне,/ и отверза́я ни́щим твою́ утро́бу, соверше́нным умо́м.

Созда́л еси́ в сла́ву Бо́гу на́шему храм освяще́н,/ во́ньже притека́юще, от многови́дных очища́ются неду́г ве́рнии, преблаже́нне.

Чи́сто житие́ твое́ препроводи́л еси́/ и с преподо́бными преподо́бно всели́лся еси́;/ о нас моли́ся, ве́рно чту́щих тя, Богодохнове́нне.

Богоро́дичен: Не́бо высоко́ была́ еси́ всех Царя́ Бо́га, Всенепоро́чная,/ и чи́стая пала́та, и черто́г све́тел, Боже́ственною благода́тию.

Конда́к, глас 8.

Подо́бен: Яко нача́тки:

Яко врача́ всеизря́дна и моли́твенника благоприя́тна,/ к ра́це твое́й Боже́ственней притека́юще, Сампсо́не Богому́дре преподо́бне,/ соше́дшеся любо́вию, псалмы́ и пе́сньми, ра́дующеся, Христа́ прославля́ем,/ такову́ю тебе́ благода́ть подава́юща исцеле́ний.

И́кос:

Ста́рческое, кро́ткое и незло́бивое, непоро́чно житие́ соверши́вшаго,/ сла́вно благода́ть прии́мшаго чуде́с, тве́рду и неизрече́нну,/ Сампсо́на преподо́бнаго восхва́лим,/ а́лчущих пита́теля, и су́щих в ну́ждах помо́щника, и побо́рника вели́ка,/ неду́гующим воздви́гша Боже́ственный храм исцеле́ний.

Песнь 7

Ирмо́с: О́бразу злато́му, на по́ле Деи́ре служи́му,/ трие́ Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Кре́пость Христа́ держа́вну в напа́стех име́я, преблаже́нне,/ жития́ премину́л еси́ бу́рю без истопле́ния, преподо́бне,/ и к ти́хому приста́нищу, воспева́я, дости́гл еси́:/ благослове́н еси́, Бо́же оте́ц на́ших.

Прему́дростию мно́гою и любо́вию духо́вною подвиза́емь,/ храм созда́л еси́, о́тче, вели́к,/ в него́же притека́юще всегда́, исцеле́ние прие́млют вси, вопию́ще и глаго́люще:/ благослове́н еси́, Бо́же оте́ц на́ших.

Све́щник све́тел доброде́телей, Боже́ственным све́том просвеща́емь, Сампсо́не, яви́лся еси́/ и озари́л еси́ вселе́нныя концы́./ Те́мже, соше́дшеся, тя ве́рою ублажа́ем, пою́ще:/ благослове́н еси, Бо́же оте́ц на́ших.

Богоро́дичен: Руно́ иногда́ предъявля́ше чи́стую утро́бу Твою́, прие́мшую Небе́сный дождь,/ всех ороша́ющ одержи́мых жа́ждею грехо́вною, Всепе́тая./ Благослове́на еси́, Бо́га пло́тию ро́ждшая.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га/ по́йте, дела́, я́ко Го́спода,/ и превозноси́те во вся ве́ки.

Язы́к движа́ ра́достно на Бо́жия, о́тче Сампсо́не, пе́сни,/ стра́сти плотски́я воздержа́нием порабо́тил еси души́/ и раб Христу́ и́скренний яви́лся еса́ и Вы́шняго гра́да насле́дник.

Чи́стый твой ум, блиста́нии Боже́ственными укра́шен, пресве́тел яви́ся/ и прия́тен чи́стых, всеблаже́нне, Боже́ственных сия́ний,/ те́мже тя чтим, Сампсо́не, во ве́ки.

Освяще́нну име́я жизнь, пресла́вно, Сампсо́не всеблаже́нне,/ я́ве просла́вился еси́, к Бо́гу преше́д/ се бо пребыва́ет па́мять твоя́ во ве́ки и пра́вда.

Богоро́дичен: Уста́ви страсте́й мои́х лю́тую бу́рю, Чи́стая Благослове́нная,/ и возбрани́ всем, неща́дно мою́ нищету́, Де́во, борю́щим враго́м безпло́тным,/ я́ко да ве́рно пою́ Тя.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Се па́мять твоя́, о́тче, я́коже со́лнце, всем возсия́,/ просвеща́ющи све́тло в ней тя сла́вящия,/ я́ко служи́теля Христо́ва, и насле́дника Ца́рствия Его́,/ и всем преподо́бным соприча́стника.

Я́ко светоза́рно житие́ твое́, я́ко ве́лия сла́ва,/ я́ко бога́т гроб твой, му́дре, иде́же честно́е те́ло твое́ лежа́ше,/ здра́вие источа́ет притека́ющим ве́рно и твоея́ прося́щим по́мощи всегда́.

Твои́м пресла́вным, о́тче, врачевство́м, е́же боле́зньми стяжа́л еси́,/ посеща́ти при́сно не оскуде́й, мо́лимся, во мно́зе милосе́рдии непреста́нно предстоя́ нам/ и облегча́я боле́зни и труды́ душ на́ших.

Со́лнечныя облиста́я чту́щим тя, о́тче, зари́,/ просвети́ на́ша душе́вная чу́вства/ и све́тлости Боже́ственныя прича́стники сподо́би ны/ моли́твами твои́ми, блаже́нне, бы́ти, мо́лим тя.

Богоро́дичен: Светови́ден Тя о́блак пра́веднаго Со́лнца ве́дяще, Чи́стая,/ ра́дуйся, ве́рно Тебе́ взыва́ем,/ апо́столов сла́ва, и вене́ц му́чеников сла́вных,/ и ве́рных спасе́ние, Де́во Неискусобра́чная.

Свети́лен.

Подо́бен: Не́бо звезда́ми:

Расточи́л еси́ твое́ бога́тство ни́щим богоуго́дно/ и весь возложи́лся еси́, о Сампсо́не, Го́сподеви,/ Его́же моли́ вся́ческих страсте́й нас изба́вити.

Богоро́дичен:

Держа́вным Твои́м покро́вом/ от враг наве́та нас, Чи́стая, Твоя́ рабы́, сохрани́ вся невре́дны,/ Тя бо стяжа́хом еди́ну прибе́жище в ну́ждах.

НА ЛИТУРГИ́И

Проки́мен, глас 7: Честна́ пред Го́сподем/ смерть преподо́бных Его́. Апо́стол к Гала́том, зача́ло 213. Ева́нгелие от Луки́, зача́ло 67. Прича́стен: В па́мять ве́чную:

Моли́тва

О те́плый моли́твенниче, бла́гостный о́тче, преподо́бне Сампсо́не! Моли́ Бо́га о мне, гре́шнем, и низпосли́ от Всеблага́го Влады́ки по́мощь ми и избавле́ние, привре́менна бо есть жизнь моя́ и испо́лнена труда́, скорбе́й и боле́зней. Укрепи́ се́рдце мое́, да возмогу́ понести́ тяготу́ мою́, и не попусти́, да превозмо́гут искуше́ния мно́гая моя́ ма́лыя си́лы, но споспешеству́й мне заступле́нием твои́м и посреде́ обстоя́ний и бед упра́ви путь мой в Ца́рство Небе́сное, да сла́влю просла́вльшагося в тебе́ Го́спода во ве́ки. Ами́нь.

Преподобный Сампсон Странноприимец – образец истинно христианского милосердия, живой и действенной любви к людям, доходящей до полного самоотвержения.

Святой Сампсон родился в Риме в богатой и знатной семье. Он получил хорошее образование, особенно основательно изучил врачебное искусство и использовал его для того, чтобы лечить безвозмездно, преимущественно убогих и нищих. Понимая, что дела благотворительности можно совершать только при христианском воспитании души, преподобный Сампсон прилежно занимался чтением Священного Писания, много молился.

После смерти родителей святой Сампсон раздал все оставшиеся ему по наследству имения, исполняя на деле совет о совершенстве, данный Спасителем богатому юноше (Мф. 19, 21). Преподобный избрал подвижнический образ жизни, отпустил всех рабов на свободу и, желая стяжать себе духовное сокровище, отправился в пустыню с намерением проводить строгую жизнь аскета. По Промыслу Божию святой Сампсон прибыл в Константинополь. Здесь он поселился в небольшом доме и стал принимать странников, больных, нищих и с усердием служил им. Преподобный с любовью относился к людям, творил дела милосердия, и это стало для него глубокой потребностью. Господь прославил Своего угодника. Случилось так, что император византийский Юстиниан I (527–565) тяжело заболел. Не получив облегчения от помощи самых искусных придворных врачей, император стал усердно молиться Богу. Вскоре Юстиниан увидел во сне человека, о котором ему было сказано, что он-то и может исцелить императора. В поисках этого врача слуги императора обошли весь Константинополь, наконец, преподобный Сампсон был найден и приведен во дворец. Одним прикосновением руки к больному месту святой исцелил Юстиниана. Благодарный император стал предлагать ему много золота и серебра. Но преподобный отказался от даров, а взамен попросил императора построить странноприимный дом и больницу. Император охотно выполнил эту просьбу и даже приписал к этим учреждениям поместья для их содержания. До глубокой старости продолжал преподобный Сампсон свое служение. Кончина его († ок. 530) была безболезненной и мирной, тело святого погребли в храме во имя священномученика Мокия († ок. 295).

Господь прославил Своего угодника по смерти даром чудотворений. Однажды, когда в Константинополе был сильный пожар, пламя достигло и до странноприимницы святого Сампсона. Однако здание осталось неповрежденным, ибо по молитвам преподобного вдруг полил сильный дождь. Некий придворный, по имени Феодорит, оступившись, получил серьезную травму ноги, так что он не только не мог ходить, но от сильных страданий потерял даже сон и аппетит. Больной стал усердно молиться преподобному Сампсону и через три дня получил чудесное исцеление: преподобный сам явился ему, коснулся поврежденной ноги и сказал Феодориту: «Встань, ибо ты уже больше не будешь болеть».

Преподобный и по смерти не оставил своей странноприимницы. Когда начальник странноприимного дома, некто Енесий, стал допускать небрежности в выполнении своих обязанностей, преподобный Сампсон сам явился ему и стал грозно укорять за нерадение. Вразумление подействовало, вскоре Енесий исправился.

НА МА́ЛОЙ ВЕЧЕ́РНИ

Стихи́ры, глас 1:

Трисвяты́ми пе́сньми/ непреста́нно от А́нгелов хвали́мый,/ восприими́ и от нас, бре́нных, трисвяту́ю песнь, Победи́телю Бо́же,/ бре́нными и скве́рными усты́ вопию́щих:/ Святы́й Бо́же, гре́шников поми́ловавый,/ Святы́й Кре́пкий, си́льных горды́ню сокруши́вый,/ Святы́й Безсме́ртный, враго́в на́ших умертви́вый,/ нас же от сме́рти сохрани́вый,/ Тро́ице Свята́я, Бо́же наш, сла́ва Тебе.

Что́ Ти принесе́м,/ благ на́ших не тре́бующий Бо́же,/ я́ко яви́лся еси́ нам с щедро́тами Твои́ми,/ от ве́ка неслы́шанными?/ Несть что и́но,/ кроме́ от сосу́да Твоего́ избра́ннаго угото́ванную песнь сию́:/ Бо́гу благодаре́ние,/ да́вшему нам побе́ду Го́сподем на́шим Иису́с Христо́м/ и исходя́щим от Отца́ Всесвяты́м Ду́хом.

Падо́ша кре́пцыи си́лою Твое́ю, Всеси́льный Бо́же,/ но ну́ждою падо́ша пред Тобо́ю/ и не возмо́гут ста́ти./ Мы же, Твое́ю ми́лостию стоя́ще про́сти,/ во́лею Твоему́ вели́честву припа́даем, вопию́ще:/ вознесы́й рог Христа́ Твоего́ и всех правосла́вных,/ сломи́вый же ерети́ческий,/ Бо́же наш, сла́ва Тебе́.

Кто́ по достоя́нию/ воспе́ти мо́жет ми́лости Твоя́, Го́споди,/ я́вльшияся нам ны́не,/ не то́кмо от челове́к, но ниже́ от А́нгел?/ Ты бо бо́лий еси́ всея́ хвалы́,/ и ни еди́но же сло́во дово́льно к похвале́нию дел Твои́х./ Сам у́бо, и́же научи́л еси́ ру́це мои́ на ополче́ние,/ и устне́ отве́рзи,/ да, я́коже возмо́жно челове́ком,/ возвестя́т хвалу́ Твою́.

Сла́ва, и ны́не, глас 8:

Сла́ва Тебе́, Предве́чный О́тче,/ сих, и́же не суть досто́йни нарещи́ся сы́ны Твоя́,/ возлюби́вый и просла́вивый;/ сла́ва Тебе́, Сы́не Единоро́дный,/ рабо́в Твои́х, а́ки сыно́в, от па́губы искупи́вый;/ сла́ва Тебе́, Ду́ше Пресвяты́й,/ вся во всех благода́тию Свое́ю соде́явший и де́йствующий./ Тро́ице Свята́я, Бо́же наш, сла́ва Тебе́.

На стихо́вне стихи́ры, глас 2.

Подо́бен: До́ме Евфра́фов:

Торже́ственными ве́твьми/ преукра́шенна,/ но́вый Сио́не, Росси́е,/ благода́рственная воспо́й Бо́гу,/ победи́вшему супоста́ты твоя́.

Стих: Услы́шите сия́, вси язы́цы,/ внуши́те вси живу́щии по вселе́нней.

Стени́, вра́же правосла́вия,/ се бо тя, вознесе́нна,/ покори́ Бог/ под но́зе/ боя́щимся Его́.

Стих: Го́споди, Госпо́дь наш,/ я́ко чу́дно И́мя Твое́ по всей земли́.

Вси о́крестнии наро́ди,/ хотя́щии бра́ни,/ вострепещи́те, ви́дяще,/ я́ко Бог/ побо́рствует по нас.

Сла́ва, и ны́не, глас то́йже:

Всяк правосла́вный/ да воспое́т ди́вное Бо́жие смотре́ние,/ устро́ившее ве́рным сла́ву,/ еретико́м же/ студ и па́губу.

Тропа́рь зри на вели́цей вече́рни.

НА ВЕЛИ́ЦЕЙ ВЕЧЕ́РНИ

На Го́споди, воззва́х: стихи́ры, глас 6:

Тебе́, Триипоста́сному,/ победи́тельную песнь Росси́я возсыла́ет,/ Отцу́, всемогу́ществом вра́жию сокруши́вшему си́лу,/ Сы́ну, прему́дростию расточи́вшему лука́вых сове́ты,/ Ду́ху Свято́му Паракли́ту, нас в ско́рбех уте́шившему,/ се́рдцем и устна́ми вопию́щи:/ Свят еси́, Отче Всемогу́щий,/ Свят еси́, Сы́не, Бо́жия Прему́дросте,/ Свят еси́ Ду́ше, Благода́ть неистощи́мая,/ Бо́же наш, сла́ва Тебе́.

Воспо́йте, росси́йстии наро́ди,/ Победи́телю Бо́гу песнь но́ву,/ соде́явшему чу́до нове́йшее всех дре́вних чуде́с:/ си́льныя бо сокруши́ во бра́ни,/ немощны́я же препоя́са си́лою свы́ше/ и вознесе́ смире́нныя./ Тому́ победи́тельная возсыла́ем/ и, припа́дающе, вопие́м:/ Бо́же наш, сла́ва Тебе́.

Пои́м Го́сподеви,/ и ны́не бо сла́вно просла́вися,/ ничи́мже ме́ньше от пре́жних:/ И́же бо дре́вле го́рдаго фарао́на погрузи́ в Чермне́м мо́ри,/ сей и ны́не ра́внаго фарао́ну/ го́рдостию и суровство́м в чермне́м кро́ве/ во́ев его́ потопи́ мо́ри сопроти́внаго./ Мы же, преше́дше по су́ху посреде́ сего́ мо́ря,/ пое́м Го́сподеви:/ сла́вно бо просла́вися.

Сказа́л еси́, Го́споди, де́лом и сло́вом,/ чесо́ ра́ди дре́вле возне́сл еси́ лю́таго на лю́ди Твоя́ фарао́на;/ позна́хом и ны́не от стра́ннаго де́ла Твоего́,/ чесо́ ра́ди воздви́гл еси́ востаю́щия на ны,/ я́ко да вознесе́нии смиря́тся паде́нием,/ Твое́ же чу́дное И́мя вознесе́тся превы́ши небе́с./ Непостижи́ме в де́лех Твои́х, Бо́же,/ сла́ва милосе́рдию Твоему́.

Благослове́н еси́, Го́споди Бо́же наш,/ научи́вый ру́це на́ши на ополче́ние,/ пе́рсты на́ша на брань:/ Твое́ю бо Ипоста́сною Му́дростию неве́жество на́ше/ на хи́трость вра́жию умудри́ся,/ Твое́ю си́лою не́мощь на́ша на гордоси́льнаго укрепи́ся,/ Твое́ю благода́тию мно́жество грехо́в на́ших покры́ся/ и я́рость льво́вая смири́ся./ Вся ве́дый, вся моги́й,/ вся беззако́ния рабо́в Твои́х презира́яй,/ Бо́же наш, сла́ва Тебе́.

Бо́же, песнь но́ву воспева́ем Тебе́,/ даю́щему спасе́ние лю́дем,/ избавля́ющему Петра́, я́коже Дави́да, раба́ Своего́,/ от стреля́ния лю́та./ Ты посла́л ру́ку Твою́ с высоты́/ и изба́вил еси́ нас от вод мно́гих,/ от рук сыно́в чужди́х,/ и́хже хра́брость ублажи́ша и убоя́шася мно́зи;/ но нам, на Тя наде́ющимся,/ а не на свою́ си́лу упова́ющим, спобо́рствуяй,/ я́вственно показа́л еси́,/ я́ко си́и то́кмо лю́дие блажени́ суть,/ и́мже Госпо́дь Бог их.

Сла́ва, глас 1:

Кто́ возглаго́лет си́лы Твоя́, Го́споди?/ Слы́шаны сотворя́т вся хвалы́ Твоя́?/ Ты бо и ны́не смири́л еси́ я́ко я́звена го́рдаго,/ мы́шцею си́лы Твоея́ разгна́л еси́ враги́ Твоя́,/ нам же, безчи́сленнаго ра́ди милосе́рдия Твоего́,/ не по беззако́нием на́шим сотвори́л еси́,/ но я́коже ще́дрит оте́ц сы́ны,/ уще́дрил еси́ боя́щихся Тебе́./ Испове́дят Небеса́ чудеса́ Твоя́, Го́споди,/ и земля́ и́стину Твою́ в Це́рквах святы́х./ Мы же воспое́м ми́лости Твоя́:/ испове́мыся Тебе́, Го́споди,/ я́ко Благ еси́, я́ко во ве́ки ми́лость Твоя́.

И ны́не, Богоро́дичен: Всеми́рную сла́ву:

Исхо́да чте́ние (гла́вы 13 и 14):

Воздви́гшеся сы́нове Изра́илевы от Сокхо́фа,/ ополчи́шася во Офо́ме при пусты́ни./ Бог же вожда́ше их днем у́бо в столпе́ о́блака, показа́ти им путь,/ но́щию же в столпе́ огня́./ И не оскуде́ столп о́блака дне/ и столп о́гненный но́щи пред все́ми людьми́./ И возглаго́ла Госпо́дь к Моисе́ю, глаго́ля:/ глаго́ли сыново́м Изра́илевым,/ и, возврати́вшеся, да ополча́тся пря́мо предгра́дия,/ посреде́ Магда́ла и посреде мо́ря, пря́мо Веелсепфо́ну,/ пред ни́ми ополчи́вшеся при мо́ри./ И рече́т фарао́н лю́дем свои́м о сыне́х Изра́илевых:/ заблужда́ют си́и по земли́, затвори́ бо их пусты́ня./ Аз же ожесточу́ се́рдце фарао́ново, и пожене́т созади́ их,/ и просла́влюся в фарао́не и во всем во́инстве его́,/ и уразуме́ют вси еги́птяне, я́ко Аз Госпо́дь./ И сотвори́ша та́ко./ И возвеще́но бысть царю́ еги́петскому, я́ко бежа́ша лю́дие,/ и преврати́ся се́рдце фарао́ново и служи́телей его́ на лю́ди, и реко́ша:/ что́ сие́ сотвори́хом? Отпусти́те сы́ны изра́илевы, е́же не рабо́тати нам?/ Впряже́ у́бо фарао́н колесни́цы своя́ и вся лю́ди своя́ собра́ с собо́ю./ И поя́т шестьсо́т колесни́ц избра́нных,/ и вся́каго коня́ еги́петскаго, и триста́ты над все́ми./ И ожесточи́ Госпо́дь се́рдце фарао́на, царя́ еги́петскаго,/ и погна́ созади́ сыно́в Изра́илевых,/ сы́нове же Изра́илевы исхожда́ху руко́ю высо́кою./ И погна́ша еги́птяне во след их/ и обрето́ша их, ополчи́вшихся при мо́ри,/ и всяк конь и колесни́цы фарао́новы, и во́инство его́, и ко́нницы его/ пря́мо предгра́дия, сопроти́ву Веелсепфо́на./ И фарао́н приближа́шеся, и, воззре́вше, сы́нове Изра́илевы очи́ма ви́деша,/ и се еги́птяне ополчи́шася в след их, и убоя́шася зело́,/ возопи́ша же сы́нове Изра́илевы ко Го́споду./ И ре́ша к Моисе́ю:/ за е́же не бы́ти ли гробо́м во Еги́пте, изве́л еси́ нас умертви́ти в пусты́ни сей?/ Что́ сие́ сотвори́л еси́ нам, изве́д нас из Еги́пта?/ Не сей ли бе глаго́л, его́же ре́хом к тебе́, глаго́люще:/ оста́ви нас, я́ко да рабо́таем еги́птяном./ Лу́чше бо бе нам рабо́тали еги́птяном, не́жели умре́ти в пусты́ни сей./ Рече́ же Моисе́й к лю́дем:/ дерза́йте, сто́йте и зри́те спасе́ние от Го́спода, е́же сотвори́т нам днесь./ И́мже бо о́бразом зря́сте еги́птяны днесь,/ не приложите́ ктому́ ви́дети их в ве́чное ле́то./ Госпо́дь побо́рет о вас, и вы умолкни́те./ Рече́ же Госпо́дь к Моисе́ю: что́ вопие́ши ко Мне?/ Глаго́ли сыново́м Изра́илевым, и да путеше́ствуют./ И ты возми́ жезл твой, и простри́ ру́ку твою́ на мо́ре, и расто́ргни е,/ и да вни́дут сы́нове Изра́илевы посреде́ мо́ря по су́ху./ И се Аз ожесточу́ се́рдце фарао́ново, и слуг его́, и еги́птян всех,/ и вни́дут в след их,/ и просла́влюся в фарао́не, и во всем во́инстве его́,/ и в колесни́цех, и в ко́нех его́./ И уразуме́ют вси еги́птяне, яко Аз Госпо́дь/ прославля́ющу Ми ся в фарао́не, и в колесни́цех, и в ко́нех его́./ Взя́тся же А́нгел Бо́жий, ходя́й пред полко́м сыно́в Изра́илевых,/ и по́йде созади́ их,/ взя́тся же и столп о́блака от лица́ их и ста созади́ их./ И вни́де посреде́ полка́ еги́петскаго и посреде́ полка́ сыно́в Изра́илевых,/ и бысть тьма и мрак, и прии́де нощь,/ и не смеси́шася друг с дру́гом во всю нощь./ Простре́ же Моисе́й ру́ку на мо́ре,/ и возгна́ Госпо́дь мо́ре ве́тром ю́жным си́льным всю нощь,/ и сотвори́ мо́ре су́хо, и разступи́ся вода́,/ и внидо́ша сы́нове Изра́илевы в посре́д мо́ря по су́ху,/ и вода́ им бысть стена́ одесну́ю и стена́ ошу́юю./ Погна́ша же еги́птяне, и внидо́ша созади́ их/ всяк конь фарао́нов, и колесни́цы, и вса́дницы посреде́ мо́ря./ Бысть же в стра́жу у́треннюю, и воззре́ Госпо́дь на полк еги́петский,/ в столпе́ о́гненном и о́блачном, и смяте́ полк еги́петский./ И связи́ о́си колесни́ц их, и ведя́ше их с ну́ждею, и реко́ша еги́птяне:/ бежи́м от лица́ Изра́илева, Госпо́дь бо побора́ет по них на еги́птяны./ Рече́ же Госпо́дь к Моисе́ю:/ простри́ ру́ку твою́ на мо́ре, и да возврати́тся вода́,/ и да покры́ет еги́птяны, колесни́цы же и вса́дники./ Простре́ же Моисе́й ру́ку на мо́ре, и устро́ися вода́ ко дню на ме́сто,/ еги́птяне же бежа́ша под водо́ю, и истрясе́ Госпо́дь еги́птяны посреде́ мо́ря./ И, обрати́вшися, вода́ покры́ колесни́цы, и вса́дники, и триста́ты,/ и всю си́лу фарао́нову, вше́дших в след их в мо́ре,/ и не оста́ от них ни еди́н./ Сы́нове же Изра́илевы проидо́ша по су́ху посреде́ мо́ря,/ вода́ же им – стена́ одесну́ю и стена́ ошу́юю./ И изба́ви Госпо́дь Изра́иля в день он из руки́ еги́птян,/ и ви́де Изра́иль еги́птяны уме́рша при кра́и мо́ря./ Ви́де же Изра́иль ру́ку вели́кую, я́же сотвори́ Госпо́дь еги́птяном,/ и убоя́шася вси лю́дие Го́спода,/ и ве́роваша Бо́гу и Моисе́ю, уго́днику Его́.

Леви́тских книг чте́ние (глава́ 26):

Глаго́ла Госпо́дь сыно́м Изра́илевым, глаго́ля:/ а́ще в повеле́ниих Мои́х хо́дите,/ и за́поведи Моя́ сохраните́, и сотворите́ я́./ И дам вам дождь во вре́мя его́,/ и земля́ даст рожде́ния своя́, и древа́ по́льная отдадя́т плод свой./ И пости́гнет вас млаче́ние ⁶⁵, обра́ние вина́, и вина́ обра́ние пости́гнет се́ятву,/ и сне́сте хлеб ваш в сы́тость, и всели́теся с тве́рдостию на земли́ ва́шей./ И дам мир в земли́ ва́шей, и у́спнете,/ и не бу́дет вас устраша́яй./ И погублю́ зве́ри лю́тыя от земли́ ва́шея,/ и брань не про́йдет сквозе́ зе́млю ва́шу./ И пожене́те враги́ ва́ша, и паду́т пред ва́ми убие́ни./ И пожене́те пять из вас сто, и сто вас пожене́те тьмы:/ и паду́т врази́ ва́ши пред ва́ми мече́м./ И при́зрю на вы, и возблагословлю́ вы,/ и возвращу́ вы, и умно́жу вы,/ и положу́ заве́т Мой с ва́ми./ И сне́сте ве́тхая, и ве́тхая ве́тхих,/ и ве́тхая от лица́ но́вых изнесе́те./ И положу́ заве́т Мой в вас,/ и не возгнуша́ется душа́ Моя́ ва́ми./ И похожду́ в вас, и бу́ду вам Бог,/ и вы бу́дете Мне лю́дие./ А́ще же не послу́шаете Мене́, ниже́ сотворите́ повеле́ний Мои́х сих,/ но ни покорите́ся им,/ и суде́б Мои́х вознегоду́ет душа́ ва́ша,/ я́коже вам не твори́ти всех за́поведей Мои́х,/ и я́ко разори́ти заве́т Мой./ И Аз сотворю́ си́це вам:/ наведу́ на вы ску́дость, и се́ете вотще́ се́мена ва́ша,/ и изъядя́т труды́ ва́ша проти́внии ва́ши,/ и поста́влю лице́ Мое́ на вы, и паде́те пред враги́ ва́шими:/ и пожену́т вы ненави́дящии вас,/ и побе́гнете никому́же, гоня́щу вас./ И сокрушу́ досажде́ние горды́ни ва́шея,/ и положу́ не́бо вам, я́ко желе́зно,/ и зе́млю ва́шу, я́ко ме́дяну./ И бу́дет вотще́ кре́пость ва́ша,/ и земля́ ва́ша не даст се́мене своего́,/ и древа́ се́льная не дадя́т плода́ своего́./ И послю́ на вы зве́ри ди́вия земны́я, и поядя́т вас и потребя́т скоты́ ва́ша,/ и ума́лены сотворю́ вы, и погуби́т вы находя́й меч./ И бу́дет земля́ ва́ша пуста́, и двори́ ва́ши бу́дут пу́сты,/ я́ко вы ходи́сте ко Мне страно́ю,/ и Аз пойду́ к вам в я́рости страно́ю–/ глаго́лет Госпо́дь Бог, Святы́й Изра́илев.

Проро́чества Софо́ниева чте́ние (глава́ 3):

Та́ко глаго́лет Госпо́дь:/ ра́дуйся зело́, дщи Сио́нова,/ пропове́дуй, дщи Иерусали́мова,/ весели́ся и красу́йся от всего́ се́рдца твоего́, дщи Иерусали́мова./ Отъя́т Госпо́дь непра́вды твоя́,/ изба́вил тя есть из руки́ враг твои́х,/ воцари́тся Госпо́дь посреде́ тебе́, и не у́зриши зла ктому́./ Во вре́мя о́но рече́т Госпо́дь Иерусали́му:/ дерза́й, Сио́не, да не ослабе́ют ру́це твои́./ Госпо́дь Бог твой в тебе́ си́лен спасти́ тя,/ наведе́т на тя весе́лие, и обнови́т тя в возлюбле́нии Свое́м,/ и возвесели́тся о тебе́ в красоте́, я́ко в день пра́здника./ И собере́т сокруше́нныя./ Го́ре, кто прия́т нань поноше́ние?/ Се Аз творю́ в тебе́ Мене́ ра́ди, глаголе́т Госпо́дь,/ во вре́мя о́но спасу́ сотре́нную,/ и отринове́нную восприиму́,/ и положу́ их в похвалу́/ и имени́ты по всей земли́.

На лити́и стихи́ры, глас 1:

Прииди́те, окре́стнии наро́ди,/ и ви́дите дела́ Бо́жия,/ я́же сотвори́ во днех и во страна́х на́ших:/ его́же врага́ убоя́стеся и ублажи́сте, облия́ студо́м;/ на него́же кре́пко упова́сте,/ я́ко стена́ преклоне́на/ и опло́т возринове́н разори́ся,/ и, его́же непобеди́ма бы́ти глаго́ласте,/ паде́, я́ко еди́н от челове́к./ Мы же, си́лою Вы́шняго непобеди́ми стоя́ще,/ че́стни и сла́вни, ку́пно же и благода́рни,/ воспева́ем Бо́гу песнь побе́дную.

Глас 4: Непочита́тель Креста́ Свята́го, лжехристиа́нин/ и Боже́ственных ико́н посмея́тель/ си́лою Креста́ Свята́го побежде́н есть и пору́ган/ и, не наде́яся на по́мощь Всеси́льнаго,/ Его́же честь во ико́нах повреди́,/ к ненави́стником и́мене Христо́ва побеже́,/ крестоно́снии же лю́дие правосла́внии Росси́йстии,/ святы́х ико́н побо́рницы,/ победи́тельную песнь Бо́гу воспева́ющия,/ да благоде́нствуют во ве́ки в ми́ре.

Возвесели́шася Небеса́ и вси, живу́щии на них,/ па́дшу зми́ю и а́ггелом его́/ во бра́ни с Михаи́лом;/ возвесели́ся и ты, земле́,/ я́ко паде́ лев све́йский, борю́щийся с на́ми./ Ны́не спасе́ние и си́ла и о́бласть Христа́ Госпо́дня:/ низложе́н бо есть клеветни́к бра́тии на́шея/ и уничиже́н уничижа́яй нас.

Свя́зан верхо́внейшаго моли́твою, святота́ть лета́ющий/ лю́те паде́ от возду́ха, и сокруши́ го́лени,/ и, и́же криле́ восприя́т, внеза́пу ног лиши́ся./ Того́же верхо́внейшаго моли́твами/ и его́ тезоимени́таго труда́ми/ све́йский Си́мон, мня́йся от горды́ни не по земли́ ходи́ти,/ устреле́н, охроме́ на постыде́ние своея́ го́рдости./ Мы же, сие́ де́ло Бо́жие ви́дети сподо́бльшиися, согла́сно возопие́м:/ Бо́же, го́рдаго смири́вый, а смире́ннаго возвы́сивый,/ сла́ва смотре́нию Твоему́.

Глас 7: Не ста нога́ на правоте́ супоста́та на́шего,/ те́мже и уязвле́на пра́вды стреля́нием;/ Петра́ же, я́коже Дави́да,/ нога́ ста на ка́мени правосла́внаго испове́дания и и́стины./ Те́мже невреди́ма пребы́сть страна́ на́ша вра́жиими стрела́ми,/ ю́же я́ко ны́не неподви́жиму показа́л еси́, Го́споди,/ утверди́ и сохрани́ во век ве́ка непреткнове́нну.

Сла́ва, и ны́не, глас 6:

Ра́дуйся, Бо́гом в бра́ни просла́вленная Росси́е,/ Бо́гом венча́нная правосла́вия сла́во,/ ра́дуйтеся, военача́льницы и великоду́шнии во́ини Иису́с Христо́вы/ и вси благочести́вых соста́вы:/ порази́ Бог враго́в и супоста́т твои́х/ и возвели́чи Свое́ Ца́рство,/ в тишину́ и весе́лие христиа́нскому ро́ду/ и спасе́ние всем.

На стихо́вне стихи́ры, глас 5:

Прииди́те, ве́рнии,/ возра́дуемся Го́сподеви со стра́хом и ра́достию,/ победи́тельныя ве́тви, я́же дарова́ нам,/ под но́гу Его́ подстила́юще,/ со стра́хом Бо́жия ра́ди вели́чества,/ и лю́таго, а́ще и не ско́раго, на нечести́вых отмще́ния,/ с ра́достию же, неизглаго́ланнаго милосе́рдия ра́ди,/ и́мже презре́в беззако́ния на́ша,/ толи́кая недосто́йным дарова́ нам.

Стих: Услышите сия́, вси язы́цы,/ внуши́те, вси, живу́щии по вселе́нней.

И́же дре́вле посла́ А́нгела Своего́/ и поби́ полки́ ассири́йския,/ Сей и ны́не Госпо́дь сил не стерпе́ наруга́ния све́йскаго/ на Росси́йскую держа́ву,/ посла́ А́нгела Своего́, и́же ополчи́ся о́крест боя́щихся Его́,/ и разгна́ вся полки́ проти́вных,/ росси́йскому же ро́ду/ спасе́ние и безсме́ртную сла́ву соде́ла.

Стих: Го́споди, Госпо́дь наш,/ я́ко чу́дно И́мя Твое́ по всей земли́.

Я́коже лю́дие изра́ильтестии/ уви́девше вели́кую ру́ку Госпо́дню на еги́птянов,/ та́ко и мы ны́не, уви́девше,/ коли́ка соде́ла све́ем, враго́м на́шим,/ весели́мся, и ве́руем Тебе́, Го́споди, и уго́дником Твои́м,/ и, с тре́петом припа́дающе, вопие́м:/ стра́шен и ди́вен еси́, Го́споди,/ не то́кмо наказу́ющий, но и ми́лующий челове́ков.

Сла́ва, и ны́не, глас 8:

Ви́десте и вы, све́йстии военача́льницы и си́лы,/ ца́рствующий град росси́йский,/ но не я́коже хоте́сте,/ но я́ко Бог изво́ли:/ ви́десте, преклоне́ни до́лу, я́ко побежде́ни ведо́ми,/ я́коже подоба́ет пле́нником./ Ра́дуйтеся оба́че в себе́, обре́тше ми́лостиваго победи́теля,/ о не́мже ро́ди правосла́вных благогове́йно вопию́т:/ Го́споди Савао́фе, поми́луй поми́ловавшаго и враго́в свои́х/ и утверди́ его́ держа́ву/ во век ве́ка ненаве́тну.

Тропа́рь, глас 8:

Препросла́влен еси́, Го́споди Бо́же наш,/ дарова́вый кре́пость на враги́ оте́честву на́шему,/ я́коже Дави́ду на прего́рдаго Голиа́фа,/ осени́л еси над главо́ю его́ в день бра́ни,/ препоя́сал еси́ немощны́я си́лою свы́ше/ и те́ми всю де́рзость вра́жию низложи́л еси́./ Многоми́лостиве, сла́ва Тебе́.

НА У́ТРЕНИ

На Бог Госпо́дь: тропа́рь три́жды: Препросла́влен еси́, Го́споди:

По 1-м стихосло́вии седа́лен, глас 7:

Пра́здновати уста́вихом наро́читый день сей Тебе́, Ми́лостиве Го́споди,/ во́ньже возвесели́л еси́ нас о вразе́х на́ших,/ я́ко да позна́ет род ин, сы́нове родя́щиися,/ и воста́нут, и пово́дят я сыново́м свои́м:/ я́ко да положа́т на Бо́га упова́ние, и не забу́дут дел Бо́жиих,/ и за́поведи Его́ взы́щут, и с на́ми просла́вят от ро́да в род/ Тя, зело́ просла́вльшагося в нас.

Сла́ва, и ны́не, глас то́йже:

О, кра́йняго неи́стовства и зло́бы!/ Обре́теся ны́не после́дующий зле предыду́щему Иу́де,/ обре́теся вторы́й Иу́да, раб и льстец,/ обре́теся сын поги́бельный, диа́вол нра́вом, а не челове́к,/ трекля́тый отсту́пник Мазе́па,/ и́же оста́вив страну́ правосла́вную,/ и прилепи́ся к супоста́ту, совеща́я возда́ти зла́я за блага́я,/ за благодея́ние – злоде́йство, за ми́лость – не́нависть,/ Бог же воздаде́ второ́му, я́коже и пе́рвому Иу́де, по дело́м их.

По 2-м стихосло́вии седа́лен, глас 8:

Ра́вно дре́внему столпотворе́нию,/ высокоу́мное враго́в на́ших зда́ние подо́бное прия́т разоре́ние:/ сни́де бо Бог ви́дети де́ло их и смеси́ язы́ки им,/ я́ко не слы́шати друг дру́га своего́,/ ни во́инству нача́льников гла́су внима́ти,/ и разсы́па их по лицу́ земли́ живы́х, ме́ртвых же прия́ша преиспо́дняя земли́,/ и де́ло их в прах разсы́пася./ Мы же в зда́ниях храмо́в Бо́жиих, о ни́хже брань твори́м, воспое́м велегла́сно:/ сла́ва снизхожде́нию и смотре́нию Твоему́, еди́не Человеколюбче.

Сла́ва, и ны́не, глас то́йже:

Не уподо́бился еси́ челове́ку купцу́,/ и́щущему до́брыя би́серы, неблагода́рный и лука́вый ра́бе,/ но неи́стовому Иу́де, и́щущему па́губы/ и взыска́вшему преда́ти многоце́нный би́сер – Христа́,/ и благи́ми все́ми, и́хже лиши́ся, купи́ неизглаго́ланная зла́я./ Сему́ уподо́бился еси́, юро́де, сему́ подража́л еси́, неблагода́рне,/ сему́ после́довал еси́, ле́стче Мазе́по,/ те́мже и благи́х лише́н, ра́вныя зла́я стяжа́л еси́/ и к нему́ преше́л еси́ на ме́сто свое́.

По полиеле́и припе́в:

Велича́ем Тя,/ Триипоста́сный Бо́же,/ вознесе́нную го́рдость смири́вшаго/ и на Тя упова́ющим/ побе́ду дарова́вшаго.

Псало́м избра́нный: Суди́, Го́споди, оби́дящия мя: Зри на Воздви́жение Честна́го Креста́.

Седа́лен, глас 4:

Не вопроша́й про́чее, Дави́де, где суть ми́лости Госпо́дни дре́вния,/ и́миже кля́лся есть отце́м на́шим?/ Обрето́хом бо я́ в но́вой благода́ти./ Обрето́хом и во днех на́ших ты́яжде ми́лости Госпо́дня дре́вния на поля́х полта́вских,/ егда́ сни́де к нам Госпо́дь сил на по́мощь,/ и ополчи́ся на враго́в на́ших си́льных, и смути́ их,/ творя́ ми́лость Христу́ Своему́ Петру́/ и Свое́ Кресто́м сохраня́я вруче́нное тому́ жи́тельство.

Сла́ва, и ны́не, то́йже.

Степе́нна, 1-й антифо́н 4-го гла́са. Проки́мен, глас 4: Бу́ди, Го́споди, ми́лость Твоя́ на нас,/ я́коже упова́хом на Тя. Или́: Госпо́дь Сил с на́ми, засту́пник наш, Бог Иа́ковль. Стих: Госпо́дь разоря́яй сове́ты язы́ков и отмета́яй мы́сли люде́й. Или́: Бог нам прибе́жище и си́ла, Помо́щник в ско́рбех, обре́тших ны зело́. Вся́кое дыха́ние: Ева́нгелие от Матфе́я, зача́ло 27.

По 50-м псалме́ стихи́ра, глас 6:

Восхва́лим днесь согла́сныя Свята́го Ду́ха орга́ны,/ Бо́гом собра́нный лик апо́стольский,/ не подража́вший Иу́де преда́телю,/ но ве́рою и любо́вию да́же до сме́рти послужи́вший своему́ Учи́телю./ О блаже́ннии о́вцы, слу́шающии па́стыря,/ блази́и раби́ и ве́рнии,/ повину́ющиися Го́споду своему́,/ досто́йно внидо́сте в ра́дость Го́спода своего́,/ досто́йно ся́дете на двуна́десятих престо́лех,/ судя́ще двана́десяте коле́нома Изра́илевома!/ Блаже́ни и вам подража́ющии ве́рою и любо́вию к свои́м наста́вником,/ ча́да отце́м, раби́ влады́кам послушли́вии!/ Да восхва́лятся ны́не с ва́ми земни́и А́нгели,/ не прилепи́вшиися диа́волу крамо́льнику,/ да почту́тся, я́коже апо́столи,/ не согласи́вшиися со вторы́м Иу́дою Мазе́пою,/ но ду́ши преда́вшии за своего́ влады́ку./ Возвесели́теся ны́не, пла́чущим отсту́пником,/ взыгра́йте, стеня́щим и рыда́ющим супоста́том:/ досто́йни есте́ за ве́рность и послуша́ние/ прия́тия че́сти и венце́в Небе́сных.

Кано́н благода́рственный Бо́гу, в Тро́ице сла́вимому, да́вшему сию́ пресла́вную побе́ду. Глас 1.

Песнь 1

Ирмо́с: Твоя́ победи́тельная десни́ца/ боголе́пно в кре́пости просла́вися:/ та бо, Безсме́ртне,/ я́ко всемогу́щая, проти́вныя сотре́,/ изра́ильтяном путь глубины́ новосоде́лавшая.

Трисве́тлое Еди́но Божество́, испо́лни уста́ на́ша Всесвята́го Твоего́ Ду́ха,/ да о сих возмо́жем Тебе́ воспе́ти песнь благода́рственную,/ я́же нам, Светоде́телю, ми́лостивно соде́лал еси́.

Боже́ственных чино́в ли́ки да ста́нут ны́не с на́ми/ и воспою́т победи́тельную песнь Бо́гу, ди́вному и пресла́вному в де́лех,/ И́же чуде́сно смири́ враго́в на́ших вознесе́нную горды́ню.

К похвале́нию Триипоста́снаго Божества́ стецы́теся, земноро́днии,/ и а́ще не по достоя́нию, то по усе́рдию воспо́йте нераздели́мую Тро́ицу,/ толи́кая блага́я нам, недосто́йным, соде́лавшую.

Богоро́дичен: Вмести́вшая во утро́бе Деви́ческой невмести́мое Сло́во, Богороди́тельнице,/ даждь нам сло́во хвале́ния, да с Небе́сными си́лами воспое́м Тя,/ предста́тельство стра́шное и непобеди́мое на враги́ во бра́ни.

Ин, глас то́йже

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Терпя́ потерпе́х Го́спода, рцы, Росси́е, и внят ми,/ и услы́ша моли́тву мою́, и испра́ви стопы́ моя́,/ и вложи́ во уста́ моя́ песнь но́ву, Бо́гу благода́рственную,/ и у́зрят мно́зи, и убоя́тся, и упова́ют на Го́спода.

Боговеща́нный Дави́де, ны́не с доброгла́сными гу́сльми ста́ни,/ и созови́ всех к торже́ственному правосла́вных пе́нию,/ и воспо́й с на́ми Бо́гу песнь победи́тельную.

Словесе́м Твои́м, Го́споди, утверди́шася небеса́ и пове́дают сла́ву Твою́;/ те́мже словесе́м утверди́ уста́ на́ша,/ да и ты́я возвестя́т сла́ву Твою́, ю́же нам дарова́л еси́,/ О́тче, и Сы́не, и Всесвяты́й Ду́ше.

Богоро́дичен: Приими́ благода́рственную песнь, Хода́таице благода́ти на Тя наде́ющимся,/ и мир испроси́ Це́рквам, оте́чество на́ше всегда́ неодоле́нно сохраня́ющи,/ ему́же побе́ду на враги́ дарова́ла еси́.    

Песнь 3

Ирмо́с: Утверди́, Го́споди, Це́рковь Твою́,/ ю́же стяжа́л еси́/ си́лою Креста́ Твоего́,/ и́мже врага́ победи́л еси́/ и просвети́л еси́ вселе́нную.

Жезл си́лы посла́л еси́ нам, Го́споди, Крест Твой честны́й,/ и сим ору́жие вра́жие притупи́л еси́;/ сему́ жезлу́ си́лы Твоея́ покланя́емся/ и, покланя́ющеся, Тебе́ Сама́го почита́ем.

Моисе́й, крестообра́зно распросте́р дла́ни, побежда́ше Амали́ка;/ мы же, Крест Христо́в почита́юще, победи́хом сопроти́внаго си́лою на Нем Распя́таго,/ Ему́же победи́тельная воспева́ем.

Светосия́нен Креста́ о́браз на небеси́ ви́дев, царь Константи́н Максе́нтия победи́;/ сим же зна́мением и Петр, све́йскаго Максе́нтия низложи́в си́лу, Бо́гу победи́телю благодаре́ние возсыла́ет.

Богоро́дичен: Иуди́фе но́ваго Изра́иля, Богороди́тельнице Мари́е,/ Ты еси́ похвала́, и весе́лие, и честь на́ша,/ Ты бо укрепи́ла еси́ се́рдце на́ше на разоре́ние но́ваго Олофе́рна.

Ин, глас 4

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Вои́стинну Крест Твой, Го́споди, ору́жие непобеди́мое есть:/ сим бо враг наш и посмея́тель си́лы Креста́ низложи́ся,/ мы же победи́тели яви́хомся.

Вознесе́н змий исцели́ от змие́в угрызе́ныя;/ вознесе́н Христо́с на Крест уврачева́ от зми́я и от льва све́йскаго угрызе́ныя,/ Тому́ сла́ва и благодаре́ние со Отце́м и Святым Ду́хом.

Покланя́емся подно́жию Твоему́, Го́споди, я́ко свя́то есть,/ сим бо враго́в на́ших подно́жие ног на́ших положи́л еси́,/ возне́сл же еси́ главу́ на́шу, ю́же Тебе́ приклоня́ем,/ да бу́дет всегда́ подно́жие ног Твои́х.

Богоро́дичен: Не упова́ша, Влады́чице, на Тя беззако́ннующии,/ но упова́ша на язык велере́чив,/ на язык челове́ч,/ те́мже, Влады́чице, че́люсти их сокруши́ла еси́,/ упова́ющим на Тя посо́бствующи.

Седа́лен, глас 5:

Трисо́лнечный свет славосло́вим и про́сте Тро́ице ны́не поклони́мся,/ я́ко просвети́ нас и поми́лова/ и воздаде́ сосе́дом на́шим седмери́цею в не́дро их поноше́ние их, и́мже поноси́ша нам,/ сохраня́ющи о́вцы па́жити Своея́ от похище́ния ненасы́тнаго зве́ря.

Сла́ва, и ны́не, Богоро́дичен:

Ра́дуйся, стено́ тве́рдая почита́ющим Тя./ Ра́дуйся, паде́ние не покланя́ющимся Тебе́./ Ра́дуйся, возведе́ние правосла́вных люде́й, Богоро́дице,/ вои́стинну упова́ющих на Тя,/ моли́твами Твои́ми избавля́ющи нас от бед вся́ческих и от прего́рдых враг.

Песнь 4, глас 6

Ирмо́с: Удиви́ся Твой ра́зум от мене́,/ услы́шавшу пресла́вная веле́ния смотре́ния Твоего́,/ укрепи́ся же возлюбле́нием Твоего́ схожде́ния:/ Ты бо моея нищеты́ не отве́рглся еси́.

Да не бу́дет нам де́вять прокаже́нных муже́й подража́ти неблагода́рствию,/ но, пресла́вно победи́вше Го́сподем на́шим Иису́с Христо́м,/ с самаряни́ном на но́гу Его́ ниц па́даем, хвалу́ Ему́ возда́юще.

Небеса́ пове́дают сла́ву Бо́жию,/ мы же до́лжни Пресвято́е Имя Его́ превы́ше небе́с превозноси́ти,/ я́ко сни́де с Небе́с спасти́ во бра́ни пома́занныя Своя́.

Четы́рех живо́тных, о́крест престо́ла Бо́жия стоя́щих, возгласи́м песнь сию́:/ Свят, Свят, Свят Госпо́дь Бог Вседержи́тель,/ враго́в на́ших победи́вый.

Богоро́дичен: Руно́, ороше́нное благода́тию Бо́жиего, Мари́я, одоле́ние над све́ями соде́ла,/ я́коже пре́жде Гедео́ну на Мадиа́ма./ Той у́бо, по Бо́зе победи́тельная воспева́юще, глаго́лем:/ ра́дуйся, заступле́ние правосла́вным христиа́ном, еретико́м же низложе́ние.

Ин, глас 2

Ирмо́с: Храни́тель тве́рдый/ и незы́блемое утверждение Ты еси́, Христе́,/ наде́ющияся на Тя неукло́нны утвержда́я нас/ извести́, в тве́рдом Твое́м основа́нии наде́жды и ве́ры.

Два́десять и четы́рем старе́йшинам подража́юще,/ паде́м пред седя́щим на Престо́ле и поклони́мся Живу́щему во ве́ки веко́в:/ сим бо престо́л росси́йский не подви́жеся вра́жиими наве́ты.

Кто́ победи́ льва све́йскаго,/ изше́дшаго от ны́рища своего́, и́щуща кого́ поглоти́ти?/ Се победи́л есть Лев, И́же сый от коле́на Дави́дова,/ Его́же прославля́ем непостижи́мую си́лу.

А́ще и А́гнец еси́ непоро́чен и смире́н се́рдцем, Христе́,/ но Твое́ю кро́тостию лев лю́тый упраздни́ся,/ Тебе́ у́бо со ста́рцы припа́даем и глаго́лем,/ спасе́ние седя́щаго на престо́ле Бо́га на́шего и А́гнца.

Богоро́дичен: Киво́т дре́вний, износи́м в полки́, побежда́ше иноплеме́нников,/ позлаще́нный Ду́хом киво́т – Мари́я, победи́ враго́в на́ших,/ нас же защити́ от смертоно́сныя я́звы,/ Ю́же я́ко Ма́терь Бо́жию почита́ем.

Песнь 5, глас 7

Ирмо́с: Роса́, и́же от Тебе́, Христе́ Бо́же,/ исцеле́ние ве́рным нам яви́ся:/ земли́ же нече́ствующих злочести́во паде́ние обеща́ется,/ те́мнее от но́щи у́тренююще,/ песнь Ти прино́сим.

Ве́дом Бог во всех де́лех Свои́х,/ наипа́че же в тя́жестех, егда́ заступа́ет, зна́емь есть;/ Его́же и мы в тя́жестех позна́вше заступле́ние, егда́ разгна́ враги́ на́ша,/ благода́рственную песнь Ему́ прино́сим.

Отверзо́ша на ны уста́ своя́, я́ко лев восхища́яй и рыка́яй;/ Ты же, Го́споди, не удали́л еси́ по́мощи Твоея́ от нас,/ сокруши́в члено́вныя львом.

Пове́мы И́мя Твое́ бра́тии на́шей и посреде́ Це́ркве воспое́м Тя,/ я́ко спасл еси́ нас от уст льво́вых,/ вознося́, я́ко единоро́га, рог правосла́вных.

Богоро́дичен: В беда́х су́щим близ Ты еси́, Де́во Чи́стая,/ те́мже, к Тебе́ прибега́юще, премене́ние во всех ско́рбех обрета́ем, Влады́чице,/ Тобо́ю и ны́не спасо́хомся от стреля́ния вра́жия.

Ин, глас 6

Ирмо́с: Неизрече́нныя Твоея́ си́лы/ и содержи́тельныя всех прему́дрости Твоея́/ устраша́юся, помышля́яй,/ и вопию́ Ти, Бла́же:/ на враги́ да вознесе́тся, Христе́, рог мой.

В нощи́ кова́рств объя́ша нас, я́ко лев, гото́в на лов,/ но предвари́ Госпо́дь и запя́ им:/ посла́ с Небе́с Сампсо́на Своего́ и растерза́ че́люсти львом.

Боя́щиися Го́спода, восхвали́те Его́, я́ко не уничижи́,/ ниже́ негодова́ моли́твы смире́нных, ниже́ отврати́ лице́ Свое́ от нас,/ и, егда́ воззва́хом к Нему́, услы́ша нас.

Сла́ва Тебе́, И́же во святы́х живе́ши, хвало́ Изра́илева,/ на Тя упова́ша отцы́ на́ши, и изба́вил еси́ я́;/ и мы воззва́хом и спасо́хомся, упова́хом и не постыде́хомся.

Богоро́дичен: Купино́ю горя́щею и несгара́емою прообразова́нная,/ Ты нас посреде́ огня́ ра́тнаго неопа́льных сохрани́ла еси́,/ пречу́дная Ма́ти и Де́во Богороди́тельнице,/ того́ ра́ди от ро́да в род воспева́ти Тя не преста́нем.

Песнь 6, глас 5

Ирмо́с: Обы́де мя бе́здна,/ гроб мне кит бысть,/ аз же возопи́х к Тебе́, Человеколю́бцу,/ и спасе́ мя десни́ца Твоя́, Го́споди.

Испыту́ете, язы́цы, отку́ду нам си́ла на си́льнаго?/ Не слы́шите ли напе́рсника Госпо́дня, глаго́люща:/ сия́ есть побе́да – побе́ждшая мир ве́ра наша.

Иже рече́:/ е́ще и́мате ве́ру, я́ко зерно́ гору́шно,/ рече́те горе́ сей: прейди́! и пре́йдет,/ и ничто́же невозмо́жно бу́дет вам,/ Сей ны́не подаде́ си́лу во бра́ни ве́рующим во И́мя Его́.

И́же Петру́ на мо́ри подаде́ ру́ку,/ Сей и ны́не во вре́мя ра́тнаго волне́ния Петра́ ят за ру́ку/ и изведе́ его́ от печа́лей мно́гих.

Богоро́дичен: Дево́ра проро́чица, судя́щая дре́вле Изра́илеви, изы́де на брань/ и победи́ Ханаа́на, Сиса́ра же в бе́гство сотвори́./ Сни́де и с на́ми на брань Дево́ра но́ваго Изра́иля – Мари́я и та́яжде сотвори́,/ да бу́дет прославля́ема от всех родо́в.

Ин, глас 2

Ирмо́с: Возопи́х в ско́рби мое́й/ ко Го́споду Бо́гу моему́,/ и посла́ Спа́са ми́ра,/ и изба́ви от тли живо́т мой.

Возопи́ Росси́я в печа́ли свое́й ко Го́споду, глаго́лющи:/ кто́ возмо́жет кре́пкаго сего́ врага́ победи́ти?/ Бог же отвеща́ и сло́во де́лом утверди́,/ я́ко вся возмо́жна суть ве́рующему.

Ве́рою дре́вний загради́ша уста́ львом, избы́ша о́стрея меча́,/ бы́ша кре́пцы во бране́х, обрати́ша в бе́гство полки́ чужди́х;/ то́южде ве́рою Госпо́днею и нам ны́не подо́бная сотвори́ти дарова́ Всеси́льный Госпо́дь,/ Тому́ сла́ва во ве́ки.

Благодари́м Тя, Христе́ Бо́же наш, я́ко на ка́мени основа́л еси́ Це́рковь Твою́,/ и не паде́ся ве́тром и волне́ниям наше́дшим,/ и врата́ а́дова ерети́ческия си́лы не одоле́ша ей.

Богоро́дичен: Благослове́нна Иаи́ль в жена́х Изра́илевых, я́ко разби́ главу́ Сиса́ра;/ благослове́нна еси́ от всех родо́в, Мари́е Богоро́дице,/ я́ко главы́ ху́льныя сиса́ров ны́нешних пресе́кла еси́,/ сохраня́ющи ста́до Свое́ невреди́мо.

Конда́к, глас 2:

В Вы́шних живы́й и на смире́нныя призира́яй,/ И́же не дал еси́ ве́прю от дубра́вы озоба́ти/ и уедине́нному ди́вому поя́сти виногра́да Твоего́,/ утверди́, Бо́же, е́же соде́лал еси́ в нас,/ при́зри с Небесе́ и виждь, и посети́ виногра́д сей, и соверши́ его́,/ его́же насади́ десни́ца Твоя́.

И́кос:

Ра́дуйся, Бо́гом насажде́нный но́вый виногра́де Госпо́день, Свята́я Це́ркви,/ его́же насади́ в богопокори́вой земли́ Росси́йской десни́ца Вы́шняго./ Ра́дуйся, я́ко простре́ ро́зги твоя́ до мо́ря и да́же до рек о́трасли твоя́./ Ра́дуйся, я́ко тве́рдым опло́том огради́ тя/ и осене́нием благода́ти сохрани́ невреди́ма от всех звере́й ди́виих,/ исходя́щих от ны́рищ свои́х на пояде́ние и попра́ние твое́./ Ра́дуйся и ты, вертогра́дарю правосла́вный, с про́чими де́лательми виногра́да Христо́ва,/ прогна́вший и порази́вший ны́не по́мощию Вы́шняго льва све́йскаго,/ устреми́вшагося на похище́ние плодо́в са́да твоего́./ Ра́дуйтеся, вси древеса́, благоче́стием и сла́вою процвета́ющии,/ и, благодаря́ще Бо́гу, рцы́те па́ки:/ утверди́, Бо́же, е́же соде́лал еси́ в нас,/ при́зри с Небесе́, и виждь, и посети́ виногра́д сей, и соверши́ его́,/ его́же насади́ десни́ца Твоя́.

Песнь 7, глас 4

Ирмо́с: Оте́ц на́ших Бо́же, не посрами́ нас,/ но да́руй нам со дерзнове́нием вопи́ти Тебе́:/ благослове́н еси́, Бо́же оте́ц на́ших.

Я́коже дре́вле трие́х отроко́в, та́кожде и нас, посреде́ огня́ вра́жия стоя́щих,/ за благоче́стие невре́дных сохрани́л еси́, враго́в же пояде́ пла́мень./ Те́мже со о́троки Тебе́ вопие́м:/ благослове́н еси́, Бо́же оте́ц на́ших.

Да о И́мени Иису́сове вся́ко коле́но поклони́тся, Небе́сных и зе́мных, и преиспо́дних,/ и всяк язы́к испове́сть, я́ко Госпо́дь Иису́с Христо́с сотвори́ с на́ми ми́лость,/ благослове́н Бог оте́ц на́ших.

Во И́мя Иису́са Христа́ Петр хрома́го смире́ннаго воздви́же и утверди́;/ во И́мя Того́жде Иису́са Петр ны́не го́рдо ходя́щаго охроми́ и кре́пкаго обезси́ли./ Благослове́нно И́мя сла́вы Твоея́, Го́споди.

Богоро́дичен: Преобразу́емо Рождество́ Твое́, Богоро́дице, о́троки в пещи́ спасло́ есть;/ собы́вшее же ся ны́не враго́в на́ших ра́тный пла́мень угаси́./ Тому́ покланя́ющеся и Тебе́, Нача́льницу на́шего спасе́ния, велича́юще, глаго́лем:/ благослове́н Бог оте́ц на́ших.

Ин, глас 5

Ирмо́с: Прехва́льно есть и препросла́влено и́мя Твое́,/ Го́споди, Бо́же оте́ц на́ших, во вся ве́ки,/ и препросла́влен, я́ко пра́веден еси́ о всех,/ я́же сотвори́л еси́ нам.

О́браза зла́та бо́жески не поче́тше,/ победи́ша горды́ню Навуходоно́сорову пресла́внии о́троцы;/ мы же, Боже́ственныя ико́ны благоче́стно почита́юще, подо́бное све́йское высокоу́мие смири́хом:/ благослове́н Бог оте́ц на́ших.

Паде́ Навуходоно́сор, о́браз свой, а́ки Бо́жий, почита́ти повелева́ющий;/ падо́ша све́и, о́бразы святы́х поруга́ющи./ Мы же, обои́х нече́стию сопротивобо́рцы, си́лою Вы́шняго победи́хом:/ благослове́н Бог оте́ц на́ших.

Ра́вно со́нному виде́нию Навуходоно́сорову помышля́ше коро́ль све́йский,/ и паде́ на него́ ка́мень, и зда́ние умышле́ния его́ разсы́па, и все мечта́ние исчезе́:/ благослове́н Бог оте́ц на́ших, сотвори́вый та́ко.

Богоро́дичен: Ты еси́ гора́, от нея́же отто́ржеся Ка́мень/ и разсы́па зда́ние мечта́ния вра́жия, Преблагослове́нная Богоро́дице Мари́е,/ Тебе́ у́бо по Бо́зе, я́ко паде́ся супоста́т наш,/ благодаре́ние возсыла́ем, воспева́юще:/ благослове́н Бог оте́ц на́ших.

Песнь 8, глас 1

Ирмо́с: Прему́дростию и Сло́вом вся соста́вльшаго Бо́га,/ от язы́ков и ва́рваров изба́вльшаго нас,/ о́троцы, по́йте,/ свяще́нницы, просла́вите,/ лю́дие, превозноси́те во вся ве́ки.

Забы́ лев естества́ своего́ уста́в, е́же лови́ти во огра́де свое́й,/ дерзне́ вни́ти в преде́лы чужды́я./ Те́мже и уловле́н есть от Го́спода,/ о сем Го́спода просла́вите во вся ве́ки.

Петр апо́стол рече́:/ супоста́т наш диа́вол, я́ко лев./ Петр же росси́йский ви́де супоста́та льва, я́ко диа́вола,/ вни́де бо в держа́вы Росси́йския, но ничто́же, кроме́ рыка́ния, сотвори́,/ низложе́н бо и изгна́н Го́сподем на́шим,/ Его́же превозноси́те во вся ве́ки.

Ка́мо, изгна́н, бежи́ши, супоста́те?/ В ста́до ага́рянское, полки́ своя́ в пораже́ние и в плен оста́вив;/ о сем мы воспои́м Го́спода и превозно́сим во вся ве́ки.

Богоро́дичен: Предвари́вши вско́ре и предстоя́щи те́пле, Де́во Богоро́дице,/ зело́ одержи́мых нас лю́тыми обстоя́нии от печа́ли свободи́ла еси́,/ о сем да пою́т Тя свяще́нницы, лю́дие превозно́сят во вся ве́ки.

Ин, глас 3

Ирмо́с: А́нгелами немо́лчно в Вы́шних сла́вимаго Бо́га,/ небеса́ небе́с, земля́, и го́ры, и хо́лми, и глубина́,/ и весь род челове́ческий,/ пе́сньми Того́, я́ко Созда́теля и Изба́вителя, благослови́те/ и превозноси́те во вся ве́ки.

Со А́нгелы немо́лчно славосло́вим си́лу Твою́, Го́споди,/ е́юже низложи́л еси́ си́лы вра́жия,/ и бы́ша я́ко прах пред лице́м ве́тра, и путь их тьма и по́лзок,/ и А́нгел Госпо́день погоня́я их лю́тым паде́нием.

Ополчи́шася А́нгели Твои́, Го́споди, о́крест нас,/ и ничто́же успе́ша проти́ву нас си́лы вра́жия./ Те́мже, Тебе́ припа́дающе и благодаря́ще, мо́лим:/ огради́ нас и в бу́дущая времена́ святы́ми А́нгелы Твоими.

Ка́ко бы́ша в запусте́ние?/ Внеза́пу исчезо́ша, я́ко со́ние востаю́щаго./ Ты, Го́споди, умно́жил еси́ на нас вели́чествие Твое́ и, обра́щся, уте́шил еси́ нас,/ за льще́ния их положи́л еси́ им зла́я,/ внегда́ разгорде́шася.

Богоро́дичен: В ско́рбех утеше́ние,/ в напа́стех и в беда́х Предста́тельницу Тя, Ма́ти Бо́жия, стяжа́вше,/ печа́лей на́ших изба́вихомся;/ тем Тя по до́лгу, я́ко Ма́терь Бо́жию и Засту́пницу ро́да христиа́нскаго, велича́ем.

Песнь 9, глас 1

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Изра́илев,/ в ни́хже посети́ нас Восто́к с высоты́/ и напра́вил ны есть на путь ми́ра.

Вску́ю полага́ете ору́жие супоста́ты?/ На се ли внесо́сте е в страны́ на́ша,/ да я́коже Голиа́ф свои́м мече́м пораже́н есть,/ та́ко и вы от своего́ ору́жия пострада́ете.

Позна́ете на коне́ц, я́ко ору́жие ва́ше не спасе́т вас, того́ ра́ди е поверго́сте./ Рцы́те у́бо с на́ми, я́ко Госпо́дь спаса́ет во бра́ни:/ благоволи́т Госпо́дь в смире́нных и упова́ющих на ми́лость Его́.

Позна́хом и мы, Го́споди, я́ко не ору́жием на́шим спасо́хомся,/ но десни́ца Твоя́ и мы́шца Твоя́,/ е́юже врази́ на́ши побежде́ни покори́шася.

Богоро́дичен: Неле́стно упова́ние и по́мощь иму́ще Тя, Богоро́дице, наве́тов вра́жиих не убоя́хомся,/ они́ же не иму́ще Твоея́ по́мощи, смято́шася./ Та́ко да трепе́щут вси, не призыва́ющии Тя на по́мощь,/ раби́ же Твои́ ничи́мже устраша́еми пребу́дут.

Ин, глас 8

Ирмо́с: Да умолча́т еретико́в собра́ния,/ не и́стинно Богоро́дицу испове́дающих Тя,/ и́бо свы́ше Тя проро́цы предпропове́даша/ Ма́терь бы́ти Бо́жию/ и Хода́таицу ро́да на́шего./ Тем Тя, Де́во, велича́ем.

Госпо́дь Савао́ф вождь бе полко́в на́ших, Сей устраши́ враго́в на́ших,/ я́ко им, мно́гим число́м су́щим, ору́жие тре́петным от рук испаде́,/ е́же прие́мше, Го́спода сил велича́ем.

Нам ли кла́няетеся, супоста́ти, и́хже уничижи́сте?/ Не нам, но И́мени Госпо́дню с на́ми дади́те сла́ву,/ И́же немощны́я ми́ра избра́, да посрами́т кре́пкая,/ и уничиже́нная избра́ и не су́щая, да су́щая упраздни́т.

С на́ми Бог, разуме́йте, язы́цы, и покаря́йтеся, я́ко с на́ми Бог,/ и бо́лее безу́мно не дерза́йте:/ а́ще бо па́ки возмо́жете, и па́ки побежде́ни бу́дете,/ я́ко с на́ми Бог.

Богоро́дичен: Не умолчи́м никогда́, Богоро́дице, си́лы Твоя́ глаго́лати, недосто́йнии:/ а́ще бо Ты не бы предстоя́ла моля́щи,/ кто бы нас изба́вил от толи́ких бед?/ Кто́же бы сохрани́л до ны́не свобо́дны?/ Не отсту́пим, Влады́чице, от Тебе́,/ Твоя́ бо рабы́ спаса́еши при́сно от вся́ких лю́тых.

Ексапостила́рий:

Возда́л еси́ сосе́дом на́шим седмери́цею в не́дра их поноше́ние их,/ и́мже поноси́ша нам, Го́споди,/ мы же, лю́дие Твои и о́вцы па́жити Твоея́, Тобо́ю сохране́ннии и просла́вленнии,/ испове́мыся Тебе́, Бо́же, во век,/ в род и род возвести́м хвалу́ Твою́.

Сла́ва, и ны́не, то́йже.

На хвали́тех стихи́ры на 4, глас 4:

Где есте́ врази́ на́ши,/ де́рзостно на преде́лы Росси́йския наше́дшии?/ Где ва́ше ору́жие?/ Где во́инская зна́мения?/ Где коры́сти, от мно́гих земе́ль награ́бленныя?/ Где толи́кая су́етная сла́ва?/ Ничто́же, кроме́ безче́стия ва́шего./ Вои́стинну сбы́стся ны́не проро́ческое сло́во:/ врази́ Госпо́дни, ку́пно просла́витися им и вознести́ся,/ исчеза́юще, я́ко дым, исчезо́ша,/ упова́ющии же на Го́спода не постыдя́тся во ве́ки.

Рцы нам ны́не, Богодохнове́нный Дави́де:/ где есть превознося́щийся и вы́сящийся?/ Ви́дех бо, глаго́леши, нечести́ваго, превознося́щася и вы́сящася,/ я́ко ке́дры лива́нския,/ и где ны́не есть, рцы нам?/ Исчезе́ от оче́с твои́х и на́ших,/ и ми́мо идо́х, и се не бе, и не обре́теся./ О, су́етнаго киче́ния!/ О, преходя́щия сла́вы!/ О, вели́кия Твоея́, Бо́же, и́стины на враги́!/ О, неизглаго́ланнаго к нам милосе́рдия!

С ма́терию Сиса́ровою призира́ше све́я, глаго́лющи:/ вску́ю уме́длиша стопы́ Каро́ловы в дом свой возврати́тися?/ Нача́льствующии отвеща́ша ей:/ не́гли разделя́ет коры́сть/ или́ в Росси́и се́де на престо́ле/ и того́ ра́ди о ме́ньшем свое́м неради́т./ Госпо́дь же сотвори́ ему́,/ я́ко Мадиа́му и Сиса́ре/ и всем, и́же ре́ша:/ да насле́дим себе́ святи́лище Бо́жие,/ положи́ его́, я́ко ко́ло,/ я́ко трость, пред лице́м ве́тра,/ я́ко огнь, попаля́яй дубра́вы,/ та́ко погна́ его́ бу́рею Свое́ю/ и гне́вом Свои́м смяте́ его́.

Сла́ва, и ны́не, глас 8:

Вознесе́ ру́ку скве́рную на Це́рковь Бо́жию нечести́вый Никано́р/ и кля́тся дом Бо́жий разори́ти,/ Бог же, помо́щник рабо́м Свои́м, кля́тву его́ ло́жну сотвори́./ Та́ко сотвори́ и супоста́ту на́шему,/ просте́ршему ру́ку на Це́рковь Бо́жию,/ гла́вныя его триста́ты/ и кре́пкия военача́льники предаде́ в ру́це на́ши,/ сам же, победи́тельною ного́ю наде́ющийся в ца́рствующий град вни́ти,/ охромле́н, побеже́ к ва́рваром/ и ме́ста упокое́ния не обре́те./ Та́ко да поги́бнут вси врази́ Твои́, Го́споди,/ лю́бящии же Тя, я́ко восто́к со́лнца, да возсия́ют.

НА ЛИТУРГИ́И

Блаже́нны от кано́на пе́сни 3-я и 6-я. Проки́мен, глас 7: Госпо́дь кре́пость лю́дем Свои́м даст,/ Госпо́дь благослови́т лю́ди Своя́ ми́ром. Стих: Кре́пость моя́ и пе́ние мое́ Госпо́дь, и бысть мне во спасе́ние. Или́: Кто Бог ве́лий, я́ко Бог наш? Ты еси́ Бог, творя́й чудеса́. Апо́стол к Ри́мляном, зача́ло 99. Аллилу́ия. Стих: Госпо́дь сил с на́ми, засту́пник наш Бог Иа́ковль. 2: Бог нам прибе́жище и си́ла: Ева́нгелие от Луки́, зача́ло 51: Се даю́ вам власть: Или́ у́треннее. Прича́стен: Хвали́те Го́спода с Небе́с:

О победе русских войск над шведами под Полтавой 27 июня 1709 года смотри 30 июня .