28-й день
Преподо́бнаго отца на́шего и испове́дника Васи́лия, спо́стника свята́го Проко́пия
На Господи, воззва́х: стихиры, глас 4.
Подо́бен: Дал еси́ зна́мение:
Блаже́нства су́щаго па́че ума́ жела́я,/ вмени́л еси́, чу́дне,/ пи́щу воздержа́ние,/ нищету́ бога́тство,/ нестяжа́ние име́ние оби́льно/ и благосла́вие смире́ние./ Те́мже и жела́ние,/ е́же по ра́зуму, получи́л еси́,/ в ски́ниих водворя́яся святы́х, Васи́лие.
Тече́ние воздержа́ния/ непрело́жно соверши́л еси́/ и ве́ру соблю́л еси́./ Те́мже и венце́м украси́лся еси́, о́тче, пра́вды,/ Его́же тебе́ угото́ва Христо́с,/ по достоя́нию подава́яй возме́здия,/ и по́чести да́руя, и боле́зней воздая́ния./ Его́же моли́, Богодухнове́нне,/ спасти́ ду́ши на́ша.
Вся́кое сладостра́стие,/ порабоща́я те́ло твое́, отве́ргл еси́, Богому́дре,/ огорчева́я чу́вство воздержа́ния боле́зньми/ и жестокопребыва́ньми,/ терпе́нием же напа́стей/ и пожда́нием обстоя́ний,/ и́миже безко́нечное прие́млеши наслажде́ние,/ и сла́дость непрее́мную,/ и ра́дость неизглаго́ланную.
Сла́ва, и ны́не, Богоро́дичен, глас 4.
Подо́бен то́йже:
Де́монскими преклоне́на прило́ги/ и в ров поги́бели вве́ржена/ уще́дри, Влады́чице,/ и утверди́ мя на ка́мени доброде́телей,/ и, наве́ты вра́жия разори́вши,/ сподо́би мя твори́ти повеле́ния/ Твоего́ Сы́на и Бо́га на́шего,/ я́ко да улучу́/ оставле́ние в День Суда́.
Крестобогоро́дичен.
Подо́бен то́йже:
Распина́ема Христа́ Человеколю́бца/ ви́дящи, Пречи́стая,/ и ре́бра ископова́ема копие́м,/ пла́чущи, вопия́ше:/ что́ сие́, Сы́не Мой?/ Что́ Ти безблагода́тнии лю́дие возда́ша,/ за я́же сотвори́л еси́ до́брая им?/ И тщи́шися безча́дствовати Мя, вселюбе́знейший,/ удивля́юся, Благоутро́бне, Твоему́ во́льному распя́тию.
Тропарь, глас 1:
Пусты́нный жи́тель, и в телеси́ А́нгел,/ и чудотво́рец я́вился еси́, Бого́носе, о́тче наш Васи́лие,/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою притека́ющих ти./ Сла́ва Да́вшему ти кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
Кано́н, его́же краегране́сие: Ве́ры основа́ние тя зна́ю, о́тче. Творе́ние Феофа́ново. Глас 4.
Песнь 1
Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.
Восхожде́ние на ка́мени положи́в, о́тче, ве́ры,/ напа́стей не убоя́лся еси́ стремле́ния,/ но непоколеби́м пребы́л еси́, я́ко доброде́тели побо́рник/ и я́ко ца́рствия тезоимени́т.
Благода́ть Пресвята́го Ду́ха тя укрепи́вши,/ боле́зненныя ра́ны претерпе́ти утверди́/ и победоно́сца показа́ на мучи́теля суему́дреннаго.
Сострада́льца и сво́ина му́дра, о́тче, получи́л еси́, доброде́тельми преспева́юща при́сно,/ с ни́мже, ра́дуяся, пребога́те, по́двиг страда́ния проше́л еси́ мучением.
Богородичен: Предста́тельницу, и спасе́ния Хода́таицу, и сте́ну необори́му,/ Тя предлага́ю моея́ жи́зни, Богоро́дице Всепе́тая,/ Бо́га ро́ждшую, Благоде́теля всея́ тва́ри.
Песнь 3
Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя кре́пость, Го́споди,/ и прибе́жище, и утвержде́ние.
Напра́вил еси́ усе́рдно твое́ се́рдце к Бо́гу, преподо́бне,/ по́стною благода́тию и испове́данием просия́л еси́.
Во́инство восприи́м и всеору́жие Креста́,/ победи́л еси́ мы́сленнаго зми́я и чу́вственнаго, о́тче, льва.
Соблю́дше благочести́ве, е́же по о́бразу души́, преподо́бнии,/ Христо́в пречи́стый чту́ще о́браз, пострада́сте.
Богородичен: Благослови́ся Тобо́ю пе́рвая кля́тва,/ и тле́нием держи́мое естество́ на́ше, Чи́стая, нетле́ние прия́т.
Седа́лен, глас 3.
Подо́бен: Красоте́ де́вства:
Бога́тство тле́нное и сла́ву теку́щую оста́вив,/ Небе́сное бога́тство восприя́л еси́/ и сла́ву, о́тче, вои́стинну, блаже́нне, ве́чную./ Те́мже блажи́м свято́е твое́ успе́ние/ и, торжеству́юще, в нем вопие́м ти:/ помина́й нас, к Богу име́я дерзнове́ние, Васи́лие.
Сла́ва, и ны́не, Богородичен:
Недомы́сленно и непостижи́мо есть, Влады́чице Богора́дованная,/ е́же соде́ланное о Тебе́ стра́шное Бо́жие та́инство,/ и́бо, необыме́ннаго заче́нши, родила́ еси́/ пло́тию обложе́нна от пречи́стых крове́й Твои́х./ Его́же всегда́, Чи́стая, я́ко Сы́на Твоего́ моли́/ спасти́ся душа́м на́шим.
Крестобогоро́дичен:
Неискусобра́чная Чи́стая и Ма́ти Твоя́, Христе́,/ ви́дящи Тя, ме́ртва ви́сяща на Кресте́, ма́терски пла́чущи, глаго́лаше:/ что́ Тебе́ воздаде́ евре́йский беззако́нный собо́р и неблагода́рный,/ и́же мно́гих и вели́ких Твоих, Сы́не Мой, даро́в наслади́выйся?/ Пою́ Твое́ Боже́ственное снизхожде́ние.
Песнь 4
Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.
Я́ко красно́ твое́, всеблаже́нне, терпе́ние,/ в ста́рости ю́ностную показу́я, преподо́бне, тве́рдость,/ в не́йже взыва́л еси́:/ сла́ва си́ле Твое́й, Го́споди.
Соедине́н любо́вию твоему́ Влады́це и Того́ по́мощию оде́явся,/ боле́зни не чу́вствовал еси́ плотски́я,/ взыва́я же, пел еси́:/ сла́ва си́ле Твое́й, Го́споди.
Ца́рства я́ко тезоимени́т Небе́снаго, и́же к нему́ веду́щим путе́м ше́ствовал еси́,/ спу́тника обре́т Проко́пия, зову́ща:/ сла́ва си́ле Твое́й, Го́споди.
Богородичен: Неискусобра́чно родила́ еси́, о Де́во,/ и по Рождестве́ яви́лася еси́ де́вствующи па́ки./ Те́мже немо́лчными гла́сы,– ра́дуйся,– Тебе́, Влады́чице,/ ве́рою несумне́нною зове́м.
Песнь 5
Ирмо́с: Ты, Го́споди, мо́й Свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.
Ты, преподо́бне, све́тло подвиза́лся еси́, Васи́лие,/ льво́ву укори́в неукроти́мую де́рзость, и нрав неразу́мный.
Равномо́щна обре́т Проко́пия в труде́х,/ соверша́еши страда́ние преспе́янии многообра́зными,/ Боже́ственне венча́емь.
Ны́не ви́диши мы́сленно Христа́, Его́же возжела́л еси́/ и Его́же издале́ча явле́ния де́йственно ви́дел еси́,/ преблаже́нне свяще́ннейше.
Богородичен: Тя, ору́жие непобеди́мое на враги́ предлага́ем,/ Тя, утвержде́ние и наде́жду на́шего спасе́ния, Богоневе́сто, стяжа́хом.
Песнь 6
Ирмо́с: Пожру́ Ти со гла́сом хвале́ния, Го́споди,/Це́рковь вопие́т Ти,/ от бесо́вския кро́ве очи́щшися/ ра́ди ми́лости от ре́бр Твои́х/ исте́кшею Кро́вию.
Раче́нием Ца́рствие Вы́шнее восприе́м,/ земна́го царя́ несмы́сленный нрав, и повеле́ния, и за́поведи, Богоно́се,/ до́блественне пренебре́гл еси́.
Наг у́бо су́щих на земли́, му́дростне подвиза́лся еси́,/ оде́ян же Боже́ственною си́лою,/ яви́лся еси́ венцено́сец,/ я́ко победи́в безбо́жных мучи́телей противле́ние.
Богоро́дичен: Се ны́не проро́ков исполня́ются пропове́дания/ Тебе́, Де́ве, ро́ждшей проро́ки дре́вле пропове́даннаго/ и исполня́ющаго прорече́нная Ду́ха благода́тию.
Конда́к, глас 2.
Подо́бен: Вышни́х ища́:
С высоты́ прии́м Боже́ственное открове́ние,/ изше́л еси́, му́дре, от среды́ молв/ и, мона́шествовав преподо́бно,/ чуде́с прия́л еси́ де́йство/ и неду́ги исцеля́ти благода́тию,/ Васи́лие всеблаже́нне свяще́ннейший.
Песнь 7
Ирмо́с: В пещи́ Авраа́мстии о́троцы перси́дстей,/ любо́вию благоче́стия па́че,/ не́жели пла́менем, опаля́еми, взыва́ху:/ благослове́н еси́ в хра́ме сла́вы Твоея́, Го́споди.
Укрепле́н Боже́ственною си́лою, о́тче,/ обличи́л еси́ вся, честна́го о́браза Христо́ва отмета́ющияся, я́ко пребезу́мны,/ благослове́н еси́, вопия́, в хра́ме сла́вы Твоея́, Го́споди.
Возде́ланна и очище́на воздержа́нием, о́тче,/ и поще́нием возсия́вша терпели́вно, Христо́с тя прия́т,/ благослове́н еси́, зову́ща, в хра́ме сла́вы Твоея́, Го́споди.
Богоро́дичен: Я́ко Богоро́дицу и Цари́цу всея́ тва́ри, вси ве́рнии, пое́м Тя, Чи́стую,/ и – е́же ра́дуйся,– Тебе́ взыва́ем:/ благослове́на Ты в жена́х еси́, Всенепоро́чная Влады́чице.
Песнь 8
Ирмо́с: Ру́це распросте́р, Дании́л/ львов зия́ния в ро́ве затче́:/ о́гненную же си́лу угаси́ша,/ доброде́телию препоя́савшеся,/ благоче́стия рачи́тели, о́троцы, взыва́юще:/ благослови́те, вся дела́ Госпо́дня, Го́спода.
Те́ло, Богоно́се, и ум во всепло́дие Христу́ прине́сл еси́,/ я́ко всесожже́ние соверше́но огне́м сведе́ния, и пла́менем ран всесожега́емь, и зовы́й:/ благослови́те, вся дела́ Госпо́дня, Го́спода.
Погна́в твоя́ враги́ и гони́м, о́тче, низложи́л еси́/ и попра́л еси́, преподо́бне, безу́мие высокому́дреннаго,/ неукроти́мы ви́дя тебе́ му́чащия, взыва́я:/ благослови́те, вся дела́ Госпо́дня, Го́спода.
Я́коже не́кий худо́жник, нам уче́ньми изря́ден яви́лся еси́, пребога́те:/ пе́рвее бо воздержа́ние к страда́нием му́жественнейше предложи́л еси́,/ сострада́льца име́я ученика́ Проко́пия, и вопию́ща:/ благослови́те, вся дела́ Госпо́дня, Го́спода.
Богородичен: Две́рь светоно́сну Небе́сную Тя имену́ем,/ е́юже про́йде Бог и воплоти́ся, Пречи́стая, безпло́тный пе́рвее,/ я́ко Бог и Отцу́ Сый Единосу́щен,/ Ему́же вопи́ем:/ благослови́те, вся дела́ Госпо́дня, Го́спода.
Песнь 9
Ирмо́с: Камень нерукосе́чный/ от несеко́мыя горы́ Тебе, Дево,/ краеуго́льный отсече́ся,/ Христос, совокупи́вый разстоя́щаяся естества́./ Тем, веселя́щеся, Тя, Богоро́дице, велича́ем.
Вся́ко чу́вство, о́тче, ны́не превозше́д, ко Влады́це, ра́дуяся, преше́л еси́ любо́вию,/ твои́х подвиго́в бога́тство обра́в,/ а́нгельскую красоту́ и рая́ сла́дость непреста́нную.
С твои́м ученико́м и сострада́льцем восприе́мля, Богоно́се,/ блаже́нных наде́жду и ве́чнующее весе́лие,/ ва́ше торжество́ творя́щих назира́йте.
От земли́ к Небе́сному наслажде́нию, венцено́сцы, преста́вльшеся,/ иде́же святы́х собо́ри, и А́нгел Боже́ственная во́инства,/ учени́к сосло́вие ва́шими моли́твами спаса́йте.
Богоро́дичен: Расто́ргни плени́цы прегреше́ний Тя пою́щих, Богома́ти,/ уста́ви стремле́ния напа́стей, грехо́вную ути́ши молву́,/ бу́рю сокруши́ бед, Ма́ти Де́во.
Преподобный Василий Исповедник
Преподобный Василий Исповедник был иноком. Он пострадал в царствование иконоборца Льва Исаврянина (716 –741). Когда началось гонение на почитателей святых икон, святой Василий вместе с преподобным Прокопием (память 27 февраля) был предан многим истязаниям: их терзали железными крючьями, заключили в темницу, где оба мученика томились долгое время, до самой смерти нечестивого императора. Когда преподобных Василия и Прокопия освободили вместе с другими почитателями святых икон, они снова стали подвизаться в иноческих подвигах, наставляя многих в православной вере и добродетельной жизни. В 750 году преподобный Василий мирно отошел ко Господу.
Свята́го блаже́ннаго Никола́я Са́ллоса, Христа́ ра́ди юро́диваго, Пско́вскаго
Тропа́рь, глас 4:
Слове́нска язы́ка, Пско́вския земли́/ плотски в юро́дстве быв,/ юро́дства притворе́нием Го́рняго Иерусали́ма граждани́н яви́ся,/ А́нгелом, сла́вне, свесели́шися,/ мироточи́ваго святи́теля Никола́я зва́ние восприи́м,/ с ни́мже всегда Христа́ Бо́га моли́/ дарова́ти нам ве́лию ми́лость.
Конда́к, глас 8:
Чудотво́рец яви́ся, Нико́лае,/ ца́рску держа́ву и смы́сла свире́пство на ми́лость обрати́в,/ и сего́ ра́ди своему́ оте́честву тепл моле́бник показа́ся,/ и ны́не мо́лим тя, свя́те,/ пребу́ди в нас еще́, защити́ от кова́рств вра́жиих,/ ты бо еси гра́ду Пско́ву и всем христолюби́вым лю́дем похвала́ и утвержде́ние.
Блаженный Николай
Блаженный Николай жил в городе Пскове во времена царя Иоанна Грозного (1533–1584). Он взял на себя высокий подвиг юродства, получившего на Руси расцвет, как особый вид подвижничества, в XVI столетии. «Блаженный Николай Псковский вобрал в себя основные черты святых юродивых Христа ради, включая особенности его времени» («Журнал Московской Патриархии», 1976, №1).
Псковичи звали его Микула (Микола, Никола) Саллос, что в переводе с греческого означает «блаженный, юродивый», и еще при жизни почитали как святого, называя также Микула Свят. Блаженный Николай зимой и летом ходил в ветхой одежде, почти нагой, перенося с терпением и сильнейшие морозы, и чрезмерную жару. Жил он в келье под соборной колокольней, мало заботясь о пропитании, но возрастая духовно. За внешне безумными поступками, бессмысленными словами, блаженный Николай скрывал свое духовное богатство и внутреннюю близость к Богу. Еще задолго до своей кончины блаженный Николай стяжал благодатные дары Святого Духа и был удостоен от Бога дара чудотворения и пророчества. Так, он предсказал преподобному Никандру Псковскому († 1581; память 24 сентября) испытания, которые ждали того в дальнейшей пустыннической жизни.
В 1569 году опричные войска во главе с царем Иоанном Грозным выступили походом против Новгорода и Пскова. Мнительный царь подозревал эти города в измене. Разгромив Новгород, перебив мирян и духовенство, бояр и простых людей, в первую неделю Великого поста в феврале 1570 года царь подошел ко Пскову и остановился, не доходя до города, в Никольском монастыре. Псков ожидала та же участь, что и Новгород. Жители города не знали, что делать: защищаться или бежать. Блаженный Николай посоветовал встретить грозного царя хлебом с солью. Все жители города вышли на улицы, и каждая семья встречала царя хлебом с солью у своего дома. Это смягчило Иоанна, и он решил разграбить городскую казну, но жителей не трогать. Тогда блаженный Николай, увещевавший царя «покушать хлеба-соли, а не христианской крови», сказал ему, чтобы он не грабил город, в противном случае – «не на чем ему будет бежать» из Пскова. Не поверивший пророчеству, царь уже приказал снимать колокол с Троицкого собора, как вдруг ему сообщили, что пал его лучший конь. В преданиях сохранилось также свидетельство об обличении юродивым неправедной жизни Иоанна Грозного. Блаженный Николай предложил царю кусок сырого мяса; на это царь сказал, что он – христианин и не ест мяса в Великий пост. Тогда блаженный Николай возразил царю так: «Ты делаешь хуже: питаешься плотию и кровию человеческою, забывая не только пост, но и Бога». Испугавшись сбывшегося пророчества и обличений в злодеяниях от блаженного Николая, царь вместе со своими опричниками покинул город.
Скончался блаженный Николай 28 февраля 1576 года. По особому почитанию жителей Пскова он был погребен под соборным храмом; такой почести удостаивались только князья и архипастыри. В 1581 году, перед осадой Пскова войсками польского короля Стефана Батория, кузнецу Дорофею было явление Божией Матери с сонмом псковских святых, молившихся за город. Среди этих святых был и блаженный Николай. Согласно этому видению была написана икона, на которой среди других святых был изображен и блаженный Николай. С того времени была установлена память святого блаженного Николая Псковского. Мощи блаженного Николая Псковского почивают ныне в кафедральном соборе города Пскова во Имя Пресвятой Троицы.