3-й день

Преподо́бнаго игу́мена Са́ввы Стороже́вскаго, Звенигоро́дскаго

Свята́го проро́ка Софо́нии

Свята́го му́ченика Ангели́

Творе́ние иеромона́ха Никифора Хио́сскаго

Преподо́бнаго Феоду́ла, бы́вшаго епа́рха Константиногра́да

ВЕ́ЧЕР

Блаже́н муж: 1-й антифо́н. На Го́споди, воззва́х: стихи́ры на 6, глас 6.

Подо́бен: Все отло́жше:

Мир возненави́дев,/ Христа́ возлюби́л еси́,/ Сио́на мы́сленнаго жи́тель показа́лся еси́./ Наставле́нием учи́теля твоего́/ соверше́ннаго послуша́ния дости́гл еси́/ и многая искуше́ния претерпе́л еси́./ Боже́ственным Ду́хом себе́ вооружи́в,/ к боре́нию льсти́ваго, ра́дуяся, изше́л еси́/ и сего́ победи́л еси́/ си́лою из Де́вы Возсия́вшаго.

От ю́ности, преподо́бне,/ плотска́я мудрова́ния покори́л еси́ ду́ху,/ и, в живоно́сную ме́ртвость оде́явся,/ свети́льник, блаже́нне, яви́лся еси́ пресве́тлый./ Благода́тию Боже́ственнаго Ду́ха/ и́стинен па́стырь показа́вся,/ слове́сною, Са́вво, цевни́цею/ собра́нное ста́до о Христе́ до́бре упа́сл еси́/ и на па́жить духо́вную возве́л еси́.

Зре́ти жела́я мы́сленную све́тлость/ Боже́ственнаго обоже́ния,/ житие́ возжеле́в невеще́ственное,/ мир оста́вил еси́,/ пусты́ню дости́гл еси́ и слеза́ми сию напои́л еси́, жела́ние улучи́в,/ е́же ко Влады́це твоему́ предстоя́ние,/ и ны́не священноле́пно предстои́ши,/ со А́нгелы ликовству́я.

Сла́ва, глас то́йже. Самогла́сен:

Е́же по о́бразу соблю́д невреди́мо,/ ум влады́ку на стра́сти па́губныя по́стнически поста́вив,/ во е́же по подо́бию я́ко мо́щно возше́л еси́:/ му́жески бо естество́ пону́див,/ потща́лся еси́ ху́ждшее покори́ти лу́чшему/ и плоть порабо́тити ду́ху;/ те́мже мона́шествующих яви́лся еси́ верх,/ жи́тель пусты́нный, благотеку́щих обучи́тель,/ пра́вило доброде́тели изве́стнейшее;/ и ны́не на Небесе́х, зерца́лом разре́шшимся,/ о́тче наш Са́вво,/ чи́сте зри́ши Святу́ю Тро́ицу,/ моля́ся несре́дственне о и́же ве́рою и любо́вию чту́щих тя.

И ны́не, Богоро́дичен: Кто Тебе́ не ублажи́т:

Вход. Проки́мен дне, и чте́ния 3.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние;/ они́ же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я/ и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости, испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните судии́ конце́в земли́./ Внуши́те, держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 4.

Подо́бен: Я́ко до́бля:

Бо́жиею си́лою укрепля́емь,/ мысль свою́ Горе́ возвыша́я,/ Небе́сное насле́дие, о́тче, прия́л еси́/ и на земли́ благоче́стно со́бранная твоея́ па́ствы ча́да упасл еси́,/ до́блим твои́м нра́вом/ и равноа́нгельным житие́м,/ ду́ха светлостьми́ святы́ми осия́емь,/ о всех при́сно моли́ся,/ творя́щих свяще́нную па́мять твою́.

Стих: Честна́ пред Го́сподем/ смерть преподо́бных Его́.

Жела́я улучи́ти Небе́сную добро́ту,/ на земли́, я́ко безпло́тен, о́тче, подвиза́лся еси́;/ име́я посо́бие непобеди́мо,/ си́лу Влады́ки твоего́,/ над страстьми́ воцари́лся еси́/ и ны́не Ве́чному Царю́ предстои́ши,/ Его́же моли́, Са́вво преподо́бне,/ спасти́ся душа́м на́шим.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Житие́ твое́ благоче́стно/ доброде́тельми укра́шено,/ пра́вдою, я́ко Боже́ственным венце́м, венча́вся,/ Влады́чню Престо́лу предстои́ши,/ со А́нгельскими лику́я во́инствы./ Сего́ ра́ди тя в пе́снех почита́ем,/ Са́вво преподо́бне, о́тче наш,/ моли́ спасти́ся ста́ду твоему́/ от всех искуше́ний.

Сла́ва, глас 8:

Мона́хов мно́жества/ наста́вника тя почита́ем, о́тче наш Са́вво:/ твое́ю бо стезе́ю вои́стинну пра́во ходи́ти позна́хом./ Блаже́н еси́, Христу́ рабо́тав,/ и вра́жию обличи́л еси́ си́лу,/ А́нгелов собесе́дниче, преподо́бных соприча́стниче и пра́ведных;/ с ни́миже моли́ся Го́сподеви/ поми́ловатися душа́м на́шим.

И ны́не, Богоро́дичен: Безневе́стная Де́во:

Тропа́рь, глас 8:

Пусты́ни яви́лся еси́ до́брое прозябе́ние, преподо́бне:/ от ю́ности бо изво́лил еси́ чи́стое житие́,/ духо́вному твоему́ учи́телю после́дуя,/ и того́ уче́нием ум к Небе́сным впери́в,/ и ста́ду твоему́ прему́др наста́вник показа́лся еси́;/ тем и Христо́с я́ко пресве́тла тя свети́льника чудесы́ обогати́./ Са́вво, о́тче наш, моли́ спасти́ся душа́м на́шим.

НА У́ТРЕНИ

По 1-м стихосло́вии седа́лен, глас 4:

Зако́нно устро́ив твою́ жизнь,/ стра́стная взыгра́ния до конца́ увяди́л еси́,/ побе́ды вене́ц от Бо́га прия́л еси́, Са́вво, о́тче наш,/ моли́ спасти́ся душа́м на́шим.

Сла́ва, и ны́не, Богоро́дичен:

В кров Твой, Пречи́стая Де́во, прибега́ющих,/ моли́тву прие́мши от нас,/ не преста́й моля́щи Челове́колюбца спасти́ся рабо́м Твои́м.

По 2-м стихосло́вии седа́лен, глас 1:

Соверше́нную к Бо́гу любо́вь стяжа́л еси́, о́тче,/ земна́я преоби́дев, к Небе́сным возше́л еси́, ра́дуяся;/ венцено́сче преблаже́нне,/ моли́ Христа́ Бо́га, спасти́ся душа́м на́шим.

Сла́ва, и ны́не, Богоро́дичен:

Упова́ние христиа́ном, Пресвята́я Де́во,/ его́же родила́ еси́, Бо́га, па́че ума́ и сло́ва,/ непреста́нно моли́ о воспева́ющих Тя,/ пода́ти оставле́ние грехо́в на́ших всех/ и исправле́ние жития́ ве́рою и любо́вию при́сно сла́вящим Тя.

По полиеле́и седа́лен, глас 8:

Влады́це Христу́ во всем, о́тче Са́вво, угоди́л еси́,/ И́же Своего́ Ца́рства снасле́дника тя сотвори́,/ и по свято́м преставле́нии честны́я твоя́ мо́щи источа́ют разли́чная исцеле́ния,/ те́мже вопие́м ти:/ моли́ спасти́ся душа́м на́шим.

Сла́ва, и ны́не, Богоро́дичен:

От вся́каго преще́ния и озлобле́ния челове́к спаси́ ны, Пресвята́я Де́во:/ Тя бо и́мамы покро́в и заступле́ние, прибега́ющии к Тебе́, Богома́ти,/ и рожде́ннаго из Тебе́ Бо́га на́шего,/ Его́же моли́ изба́вится от бед рабо́м Твои́м.

Степе́нна, 1-й антифо́н 4-го гла́са. Проки́мен: Честна́ пред Го́сподем/ сме́рть преподо́бных его́. Стих: Что возда́м Господе́ви о всех, я́же воздаде́ ми. Ева́нгелие от Матфе́я, зачало 43.

По 50-м псалме́ стихи́ра, глас 2:

Преподо́бне о́тче,/ измла́да в доброде́тели приле́жно обучи́вся,/ орга́н был еси́ Свята́го Ду́ха,/ и от Него́ прие́м чуде́с де́йство,/ научи́л еси́ челове́ки преоби́дети сла́дкая./ Ны́не же, Боже́ственным све́том чисте́йше осиява́емь,/ просвети́ и на́ша мы́сли,/ Са́вво, о́тче наш.

Кано́н Богоро́дице со ирмосо́м на 6. И свята́го на 8, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя пото́пляема,/ Бо́гу побе́дную пе́снь пои́м, вопия́ше.

Наста́ви мя, Го́споди Бо́же мой,/ да возмогу́ благоче́стно уго́дника Твоего́, преподо́бнаго Са́ввы,/ сла́вное и че́стное восхва́лити торжество́.

Му́жески подвиза́лся еси́/ и, зарю́ духо́вную восприе́м,/ взя́лся еси́ к высоте́ Небе́сней,/ и ны́не со А́нгелы прославля́ешися.

Ору́жием креста́ огражда́яся, преподо́бне,/ всю си́лу проти́внаго победи́л еси́/ и до конца́ сего́ без ве́сти сотвори́л еси́.

Богоро́дичен: Пресу́щное Сло́во, существо́ на́ше прие́м от чи́стых крове́й Твои́х,/ богосоде́ла нас, тле́ния изба́вив, Чи́стая:/ сего́ ра́ди Тя при́сно сла́вим.

Катава́сия: Христо́с ражда́ется:

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Молча́нием язы́к обузда́л еси́/ и немяте́жным житие́м во пло́ти а́нгельски, о́тче, пожи́л еси́.

Вои́стинну благи́я жи́зни сподо́бился еси́, преподо́бне,/ чистото́ю и поще́нием сию обре́т./ И ны́не со безпло́тными вопие́ши:/ несть свят, па́че Тебе́, Го́споди.

Трисия́нным Све́том озаре́н,/ и благода́ть Ду́ха Свята́го всели́ся в тя, преподо́бне,/ возлю́бльши чи́стую твою́ ду́шу, и непреста́нно вопие́ши:/ не́сть свят, па́че Тебе́, Го́споди.

Богоро́дичен: Разуме́ти рождества́ Твоего́, Чи́стая, неизглаго́ланную глубину́/ недоуме́ет ум челове́чь:/ Бог бо, истощи́в Себе́ за милосе́рдие во утро́бе Твое́й,/ всего́ мя обнови́.

Седа́лен, глас 4:

Мраз нощны́й претерпе́л еси́,/ и тяготу́ ва́ра дневна́го поне́сл еси́,/ и сих ра́ди ве́чное наслажде́ние и пи́щу присноживу́щую восприя́л еси́,/ Христо́в уго́дниче, блаже́нне Са́вво:/ моли́ спасти́ся душа́м на́шим.

Сла́ва, и ны́не, Богоро́дичен:

Чи́стая, Всенепоро́чная и Неискусому́жная,/ я́же Еди́на Безле́тнаго Сы́на и Сло́ва Бо́жия в ле́то ро́ждши,/ Сего́ со святы́ми и честны́ми патриа́рхи,/ му́ченики, проро́ки и преподо́бными моли́/ дарова́ти нам о́чище́ние и ве́лию ми́лость.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смысла чи́ста о Го́споде пра́зднующи.

Безме́рное смире́ние возлюби́в,/ своея́ мы́сли зри́тельное очи́стил еси́/ и ны́не, в ра́йских селе́ниих водворя́яся, вопие́ши:/ сла́ва си́ле Твое́й, Го́споди.

Сле́зными пото́ки, преподо́бне, зе́млю се́рдца твоего́ напои́л еси́,/ предстоя́ в моли́тве неколе́блен,/ Творцу́ всех взыва́л еси́:/ сла́ва си́ле Твое́й, Го́споди.

Не забу́ди ста́да твоего́, преподо́бне,/ е́же му́дре собра́л еси́/ и в жи́зни сей упасл еси́ благоче́стно:/ потщи́ся, о́тче наш Са́вво, ввести́ во огра́ду Небе́сную.

Богоро́дичен: Чистоты́ жили́ще, селе́ние Влады́ки всех/ и проро́ков всех сбытие́, Богора́дованная Чи́стая,/ пою́щия Тя уще́дри.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Бо́дренными бде́нии, блаже́нне, и ча́стыми воздыха́нии,/ Благода́ть Ду́ха возрасте́ в тебе́, о́тче,/ и сла́вна тя, Са́вво, показа́.

Влады́чне смире́ние восприи́м, во́ду почерпа́я,/ на ра́мех свои́х носи́ти изво́лил еси́:/ нача́льника трудополо́жна во всем себе́ показа́л еси́.

Преблаже́нне, Богоприя́тне о́тче наш Са́вво,/ непреста́нно ста́до твое́ вопие́т ти:/ моли́твами твои́ми ко Го́споду спаси́ ны, мо́лимся.

Богоро́дичен: По рожде́нии стра́шнем пребыла́ еси́ Де́ва, я́коже пре́жде./ Бог бе рожде́йся, устроя́яй вся во́лею,/ Безневе́стная Мари́е Богоблагода́тная.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Страда́нии по́двиг твои́х, преблаже́нне,/ клас Боже́ственный возрасти́л еси́ и пита́еши благоче́стно восхваля́ющия тя,/ Са́вво преподо́бне, о́тче наш.

Кня́зя проше́ние, о́тче, со тща́нием исполня́я,/ храм Богома́тере воздви́гл еси́,/ в не́мже пра́здничною ра́достию мона́хов мно́жества веселя́тся,/ па́мять твою́ прославля́юще.

Ка́плями по́тов твои́х, преподо́бне,/ враго́в ополче́ния попра́л еси́/ и дости́гл еси́ а́нгельския невеще́ственныя ли́ки.

Богоро́дичен: Всеблага́я Влады́чице,/ я́же преблага́го Бо́га пло́тию ро́ждши,/ озло́бленное страстьми́ мое́ се́рдце очи́сти,/ да ве́рою и любо́вию велича́ю Тя.

Конда́к, глас 2.

Подо́бен: Вы́шних ища́:

Госпо́дним жела́нием распали́вся,/ стра́сти плотски́я воздержа́нием оттря́с,/ Боже́ственнаго све́та незаходи́мое свети́ло яви́лся еси́,/ чуде́с луча́ми всех просвеща́еши,/ притека́ющих к моще́м твои́м,/ Са́вво преподо́бне, о́тче наш.

И́кос:

Всеси́льное Ду́ха Свята́го де́йство богови́дно в тя всели́ся,/ и Боголе́пными манове́нии благоте́чне иды́й к горе́,/ иде́же хоте́л еси́ оби́тель воздви́гнути,/ и, я́коже Небе́сный рай, благово́нными насажде́н цветы́,/ сию обре́т, всели́лся еси́/ и храм Богома́тере чу́ден воздви́гл еси́,/ мона́хов мно́жество собра́л еси́,/ и сия́, доброде́тельными дея́нии све́тло блиста́ющия,/ воздержа́нии му́дростная вообра́жь;/ и ны́не, в па́мять твою́ соше́дшеся, вопие́м ти:/ моли́ о нас, Са́вво преподо́бне, о́тче наш.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

Пучи́ною слез твои́х, пребога́те,/ злонача́льнаго зми́я потопи́л еси́,/ я́ко победоно́сец изря́ден к Небе́сным возлете́л еси́,/ непреста́нно вопие́ши:/ благослове́н Бог оте́ц на́ших.

Житие́ незло́биво име́л еси́, и непоро́чно,/ и укра́шено по́ты страда́ния, прехва́льне,/ Боже́ственнаго светоли́тия испо́лнився, взыва́л еси́:/ благослове́н Бог оте́ц на́ших.

Хва́лится, преподо́бне, град твой,/ я́ко венце́м ца́рским обложи́ся, име́я мо́щи твоя́ в себе́,/ я́ко добра́ граждани́на от Бо́га прия́л есть.

Богоро́дичен: Препе́тая Де́во, препе́таго Бо́га ро́ждшая,/ пою́щия Тя прича́стники покажи́ Све́та/ и изба́ви гее́нны огня́/ и вся́каго вре́да вра́жия моли́твами Твои́ми.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Мудрова́ние плотско́е умертви́л еси́,/ че́сти и име́ния совле́клся еси́,/ от земли́ к Небе́сным взы́ти тщася и вся пе́ти науча́я:/ Го́спода по́йте и превозноси́те Его́ во ве́ки.

Се́рдца твоего́ бразды́, о́тче Са́вво, му́дре возде́лал еси́,/ сле́зными ту́чами сия́ напои́л еси́/ и благоуха́нно ми́ро прине́слся еси́ Христу́,/ Ему́же вопие́ши:/ Го́спода по́йте и превозноси́те Его́ во ве́ки.

Христу́ принося́, блаже́нне, поще́ния, и сле́зы,/ и непоро́чную моли́тву, ри́знуто ле́поту/ и мя́гкия оде́жды власяны́ми ру́бы премени́л еси́,/ сим показу́я глубоча́йшее смире́ние.

Богоро́дичен: Изба́вльшеся пе́рвыя кля́твы Рождество́м Твои́м,/ всеблагослове́нная Отрокови́це Богора́дованная,/ Гаврии́лов тебе́ глас возсыла́ем:/ ра́дуйся, вино́вная всех спасе́ния.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Ви́дети сла́ву Вседержи́теля жела́я,/ обнови́л еси́ души́ кре́пость/ и сла́вою обогати́лся еси́ Небе́сною.

Честно́е украше́ние благода́ти, о́тче преподо́бне Са́вво,/ испроси́ нам во бране́х кре́пость и здра́вие телесе́,/ я́ко да непреста́нно тя велича́ем.

Чи́ни А́нгельстии тебе́, о́тче, срето́ша,/ и пра́ведных собо́ри возвесели́шася,/ и от вседержи́тельныя десни́цы Влады́чни венча́лся еси́,/ те́мже тя досто́йно велича́ем.

Богоро́дичен: Све́том Твои́м мя,/ Богора́дованная в жена́х Де́во,/ просвети́, молю́ся,/ и огня́ ве́чнаго изба́ви мя,/ я́ко да велича́ю Тя/ и по до́лгу да воспою́ вели́чия Твоя́.

Свети́лен:

По́мыслом лу́чшим стра́сти удержа́в,/ и де́монов свире́пства низложи́л еси́./ И ны́не со дерзнове́нием предстоя́ Христу́,/ моли́ся о ста́де твое́м, о́тче наш.

Богоро́дичен:

По Бо́зе на Тя упова́ем, Пречи́стая,/ из Тебе́ проше́дшему сраспина́еми Христу́,/ Твои́ми к Нему́ мольба́ми неврежде́нны до конца́ ны сохрани́.

На хвали́тех стихи́ры на 4, глас 8. Самогла́сны:

Боже́ственною си́лою оде́явся,/ умертви́л еси́ себе́ ми́рови;/ житие́ непоро́чно пожи́в, пресла́вне,/ единожи́тель Се́ргия Боже́ственнаго был еси́.

Чистоты́ сосу́д показа́вся,/ исцеле́ний зари́ облиста́л еси́,/ по́стников удобре́ние, мона́шествующих похвала́,/ Са́вво преподо́бне, о́тче наш.

Умертви́в себе́ ми́ру,/ жи́знь равноа́нгельну на земли́ пожи́л еси́,/ и, я́ко дар освяще́н, Влады́це, преподо́бне,/ Твою́ ду́шу, Са́вво, прине́сл еси́,/ исцеле́ний зари́ облиста́л еси́/ и Боже́ственнаго Ца́рствия досто́йно получи́л еси́,/ моли́ спасти́ся душа́м на́шим.

Све́тлое и Богоуго́дное житие́ твое́,/ я́ко свет, вои́стинну на земли́ показа́ся,/ Боже́ственную ви́дети све́тлость, Са́вво, сподо́бился еси́,/ те́мже и ви́димая вся оста́вил еси́/ и Непостижи́маго зре́ти сподо́бился еси́,/ его́же моли́, преподо́бне,/ спасти́ся душа́м на́шим.

Сла́ва, глас 6:

Преподо́бне о́тче Са́вво,/ во всю зе́млю изы́де веща́ние исправле́ний твои́х,/ те́мже на Небесе́х обре́л еси́ мзду́ трудо́в твои́х,/ де́монския разори́л еси́ полки́/ и А́нгельския дости́гл еси́ чи́ны,/ и́хже житию́ без поро́ка поревнова́л еси́,/ дерзнове́ние име́я ко Го́споду,/ мир испроси́ душа́м на́шим.

И ны́не, Богоро́дичен: Богоро́дице, Ты еси́ лоза́ и́стинная:

Славосло́вие вели́кое и отпу́ст.

НА ЛИТУРГИ́И

Блаже́нны, пе́сни 3-я и 6-я. Проки́мен: Честна́ пред Го́сподем/ смерть преподо́бных Его́. Апо́стол к Гала́том, зачало 213. Ева́нгелие от Матфе́я, зачало 10. Прича́стен: В па́мять ве́чную:

Преподобный Савва Сторожевский, Звенигородский чудотворец

Преподобный Савва Сторожевский, Звенигородский чудотворец, очень молодым пришел в обитель преподобного Сергия Радонежского († 1392, память 5 июля и 25 сентября) и принял от него постриг в монашество. Он был одним из первых учеников и сподвижников преподобного Сергия. Под руководством этого наставника преподобный Савва научился послушанию, смирению, хранению помыслов, воздержанию и целомудрию. Преподобный любил безмолвие, поэтому избегал бесед с людьми. Он никогда не был праздным; часто плакал о нищете своей души. Святой питался только растительной пищей, носил грубую одежду, спал на полу. Подвижническая жизнь преподобного Саввы снискала ему всеобщую любовь; он был поставлен во пресвитера и назначен преподобным Сергием духовником братии. Наставления преподобного Саввы были настолько назидательны, что не только иноки, но и миряне открывали ему свои души.

По благословению преподобного Сергия инок Савва стал игуменом обители Успения Божией Матери. Ее устроил на реке Дубенке великий князь Московский благоверный Димитрий Донской в благодарность за победу над Мамаем. В 1392 году, когда преемник преподобного Сергия – игумен Никон – оставил управление монастырем и затворился в своей келлии, братия Троицкого монастыря умолили преподобного Савву вернуться в их обитель и принять игуменский жезл. В течение шести лет преподобный Савва, прибегая к молитвенной помощи преподобного Сергия, пас порученное ему стадо. По примеру преподобного Сергия святой Савва во время игуменства молитвою извел источник воды за северной стеной монастыря.

Князь Юрий Димитриевич Звенигородский, крестный сын преподобного Сергия, избрал преподобного Савву своим духовником. По его просьбе преподобный основал близ Звенигорода новую обитель. Но, стремясь к уединению, преподобный Савва ушел на пустынное место – гору Сторожевскую. Там он построил деревянный храм в честь Рождества Пресвятой Богородицы и малую келлию для себя. Слухи о иноческих подвигах привлекли к нему многих искавших уединения и безмолвной жизни. В 1399 году преподобный основал на Сторожевой горе монастырь и с отеческой любо́вью принимал всех ищущих спасения, научал их иноческому послушанию и смирению. Преподобный Савва, несмотря на преклонные годы, много потрудился при устройстве обители. Подавая пример инокам, он выполнял все необходимые работы, предостерегая всех от праздности. Преподобный выкопал себе пещеру в версте от монастыря, в которой подолгу со слезами молился и предавался Богомыслию.

За высокую добродетельную жизнь Господу угодно было прославить преподобного даром прозорливости. Перед походом князя Звенигородского Юрия Димитриевича на войну, святой старец, помолившись, благословил его и предсказал ему победу и благополучное возвращение.

Скончался святой в глубокой старости 3 декабря 1406 года. В грамоте 1539 года преподобный Савва называется чудотворцем. В середине XVI в. было составлено описание чудес. От мощей преподобного исцелялись больные и изгонялись бесы из одержимых. Несколько раз преподобный Савва Сторожевский являлся насельникам обители, молитвенно обращавшимся к нему за помощью.

Однажды преподобный Савва явился во сне игумену Сторожевской обители Дионисию, который был иконописцем. После этого видения игумен Дионисий написал первую икону святого Саввы. Празднование преподобному Савве было установлено в 1547 году на Московском Соборе. Нетленные мощи его обретены 19 января 1652 года.

На Го́споди, воззва́х: стихи́ры проро́ка 3, глас 4.

Подо́бен: Зва́нный свы́ше:

И́же зарю́ Богонача́льнейшаго сия́ния прии́м/ ума́ чистото́ю и Боже́ственных слове́с/ провозве́стник, и прозна́менатель,/ и проро́к Боже́ственный быв,/ уста́ Богодви́жимая яви́лся еси́ Ду́ха,/ я́же от Него́ тебе́ показу́емая пропове́дуя/ и сказу́я всем язы́ком/ дае́мое спасе́ние и Ца́рствие Христо́во, всече́стне,/ Его́же моли́/ спасти́ и просвети́ти души на́ша.

И́же Боговиде́нием сия́я досто́йно,/ и проро́ческим председа́тельством/ и благода́тию почествова́н, Богодохнове́нне,/ и Боже́ственнаго сподо́блен блаже́нства,/ к Преблаго́му ны́не дерзнове́нием твои́м/ и ми́лованием одержи́мь,/ моля́ся не преста́й/ о и́же ве́рою тя восхваля́ющих/ и чту́щих я́ко Богоглаго́лива/ и че́стна, и Богоприя́тна,/ от бед изба́вити и спасти́ ду́ши на́ша.

Твоего́ проро́ка,/ я́ко одушевле́нна о́блака,/ показа́л еси́, Безсме́ртне,/ во́ду точаща в жи́знь вои́стинну ве́чную,/ посла́в сего́ бога́тно/ и дарова́в Ду́ха Всесвята́го,/ Еди́носущнаго Тебе́, Отцу́ Вседержи́телю,/ и Сы́ну Твоему́,/ из Твоего́ Существа́ возсия́вшему,/ И́мже прорече́ спаси́тельное прише́ствие/ Христа́ Бо́га на́шего/ и язы́ком всем спасе́ние провозвести́.

И́ны стихи́ры Богоро́дицы, глас и подо́бен то́йже:

(А́ще аллилу́ия, пою́тся си́и стихи́ры пре́жде, потом свята́го.)

И́же благоче́стно покланя́ющияся Твоему́ Рождеству́/ от вся́каго спаса́й наве́та вра́жия,/ Богороди́тельнице Всенепоро́чная,/ я́ко Предста́тельница всего́ ро́да на́шего су́щи:/ Тя бо ны́не по́мощь вси стяжа́хом,/ прибе́жище же и утвержде́ние/ и Хода́таицу ко Влады́це Христу́ и Го́споду;/ Его́же моли́/ дарова́ти мир ми́ру, мо́лимся,/ и грехо́в разреше́ние/ притека́ющим в кров Твой.

Се гное́ния обнажа́ю Тебе́ души́ моей/ и показу́ю лю́тыя я́звы,/ я́же разбо́йницы наложи́ша мне,/ лука́вствия по́мыслы/ де́монскими смуще́нии,/ Влады́чице Всенепоро́чная,/ Цели́теля душ и теле́с ро́ждшая,/ исцеле́ние Ты ми пода́ждь сим,/ излива́ющи еле́й милосе́рдия Твоего́ и бла́гости/ к благорастворе́нию спасе́ния и здра́вия.

Не скры́ю, окая́нный, лю́тых мои́х,/ я́ко вся стяжа́х, я́же ненави́дит Бог:/ плоть оскверни́х и дух мой,/ и ум помышле́нии нечи́стыми,/ и де́лы, и словесы́ скве́рными;/ язы́ком осужда́ю согреша́ющих,/ сам го́ршая содева́ю, Богороди́тельнице;/ всех мне сих даждь исправле́ние,/ да, восклони́вся зла́го моего́ обы́чая,/ припа́даю и пла́чуся,/ о ни́хже зле соде́лах/ в жи́зни мое́й хожде́нием.

Сла́ва, и ны́не. Подо́бен то́йже:

Я́ко во глубину́ мно́гих согреше́ний впадо́х/ от ле́ности моея́/ и уны́ния, окая́нный, и неве́дения,/ и отча́янием ны́не одержи́мь есмь;/ бу́ди ми по́мощь, и очище́ние,/ и спасе́ние, Пречи́стая,/ и утеше́ние благопреме́нно подаю́щи ми,/ Тя молю́,/ и Тебе́ ми́лся де́ю и припа́даю,/ и ве́рою зову́ Ти,/ да не явлю́ся до конца́ льсти́вому обра́дование.

Крестобогоро́дичен, подо́бен то́йже:

Не рыда́й Мене́, Ма́ти,/ зря́щи на Дре́ве пове́шена Твоего́ Сы́на и Бо́га,/ на вода́х пове́сившаго зе́млю неодержи́мо/ и всю тварь созда́вшаго;/ и́бо воста́ну и просла́влюся,/ и а́дова ца́рствия сокрушу́ кре́постию,/ и погублю́ того́ си́лу,/ и свя́занныя изба́влю/ от злоде́йства его́,/ я́ко Благоутро́бен,/ и Отцу́ Моему́ приведу́,/ я́ко Человеколю́бец.

На стихо́вне Окто́иха.

Тропа́рь, глас 2:

Проро́ка Твоего́ Софо́нии па́мять, Го́споди, пра́зднующе,/ тем Тя мо́лим:/ спаси́ души на́ша.

НА У́ТРЕНИ

Кано́н, глас 6, его́же краегране́сие: Софо́ниева мя сла́ва да уясни́т. Феофа́ново.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя пото́пляема,/ Бо́гу побе́дную песнь пои́м, вопия́ше.

Тя мо́лим, проро́че, Бо́жию Престо́лу предстоя́ща,/ моли́ти приле́жно просвеще́ние дарова́ти нам,/ ве́рою честну́ю пою́щим па́мять твою́.

Орга́н Боже́ственный яви́лся еси́,/ вмеща́ющ Боже́ственнаго Ду́ха просвеще́ний и даро́в, Софо́ние всему́дре:/ тем, ра́дующеся, ве́рнии, тя ублажа́ем.

Богоро́дичен: Светле́йшими заря́ми всю зе́млю возсия́вшее Со́лнце/ из свята́го чре́ва Твоего́ озаря́ет, Влады́чице;/ и́миже просве́щшеся,/ Тя, Бо́жию Ма́терь, почита́ем.

Песнь 3

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Вся ви́дяй, я́ко Бог, бу́дущих зна́ние/ и хотя́щих бы́ти ве́дение Тебе́ явле́нно проявля́ет боголе́пно/ и показу́ет, блаже́нне досточу́дне.

Вжили́в, блаже́нне, твой ум благоче́стным дерзнове́нием,/ Ду́ху Боже́ственному подклони́л еси́ тебе́/ и был еси́ прия́тен та́мо су́щих Боже́ственных вдохновений.

Богоро́дичен: Се, Тебе́ вси ро́ди блажа́т ве́рою,/ Безле́тное Сло́во пло́тию в ле́то ро́ждшую преесте́ственно/ и Де́ву па́ки пребы́вшую.

Седа́лен, глас 6.

Подо́бен: Милосе́рдия две́ри:

Очи́стив от скве́рн ум, всему́дре,/ зерца́ло Боже́ственное соде́лал еси́,/ луч прия́тно Боже́ственнаго Ду́ха;/ и ны́не ко Исто́чнику, ра́дуяся, отше́л еси́ сия́ний,/ проро́че Софо́ние.

Сла́ва, и ны́не, Богоро́дичен:

От се́рдца стена́ние и от утро́бы приноша́ю Ти, Пренепоро́чная,/ Твое́ прося́ благопребы́тное заступле́ние:/ поми́луй всестра́стную мою́ ду́шу,/ уми́лостиви Многоми́лостиваго Бо́га изба́вити мя Суда́/ и е́зера о́гненнаго, еди́на Благослове́нная.

Крестобогоро́дичен:

Тя ро́ждшая, Христе́, При́сноде́ва Отрокови́ца,/ на Кресте́ зря́щи нас ра́ди вознесе́на,/ уя́звляше свое́ печа́ли ору́жием се́рдце и ду́шу/ и пла́кате, рыда́ющи ма́терски./ Тоя́ моли́твами поми́луй ны, Го́споди Ми́лостиве.

Песнь 4

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Всех Госпо́дь нам яви́ся по проро́честву, блаже́нне, твоему́,/ вся призыва́я к позна́нию Своему́,/ и рабо́ты свободи́.

Благода́тию озаря́емь, провозгласи́л еси́, глаго́ля,/ под и́го еди́но подкла́няющимся рабо́тати,/ после́дующим ве́ре и Го́споду служа́щим.

Богоро́дичен: Мари́е Всечи́стая,/ страсте́й смуще́ние моего́ по́мысла и напа́стей бу́рю разори́,/ безстра́стия Исто́чник ро́ждши, Ма́ти Де́во.

Песнь 5

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

От непра́вды к доброде́тели/ и от страсте́й плене́ния мя, блаже́нне,/ обрати́ твои́ми мольба́ми, проро́че сла́вне,/ и к све́ту благоче́стия дел упра́ви.

Просвети́в твою́ ду́шу доброде́телей благообра́зиями,/ уго́дну показа́л еси́ к сия́нием Боже́ственнаго Ду́ха,/ от Него́же и проро́чества благода́тию обогати́лся еси́.

Богоро́дичен: Возгла́шают проро́ческая рече́ния, Пречи́стая,/ мно́гими о́бразы Рождество́ Твое́,/ и́хже мы ны́не сбытие́ зря́ще,/ и́стинно Богоро́дицу Тя возвеща́ем.

Песнь 6

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.

Прие́м, сла́вне, ду́ха зари́ явле́нием,/ я́ко зерца́ло проро́чествия Боже́ственнаго сия́ния, облиста́л еси́,/ я́ко су́щая, проро́чествуя бу́дущая.

Твой прии́де Царь,/ ра́дуйся, Сио́не, и красу́йся, ви́дя,/ и мир просвети́ блиста́ньми Своего́ Божества́,/ и де́монскую лесть посрами́.

Богоро́дичен: Пло́ти бре́нней соедини́ся/ И́же из Отца́ Еди́нородный в ложесна́х Твои́х,/ Еди́н из двух про́йде без тле́ния,/ соблю́д неврежде́нно чи́стое де́вство Твое́, Всепе́тая.

Конда́к, глас 4.

Подо́бен: Яви́лся еси́:

Яви́лся еси́ светоза́рен Боже́ственным Ду́хом, проро́че Софо́ние,/ Бо́жие явле́ние возгласи́в:/ ра́дуйся зело́, дщи Сио́ня Иерусали́мова, пропове́ждь:/ се Царь Твой гряде́т, спаса́яй.

Песнь 7

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучите́ля увеща́ вопи́ти:/ благослове́н еси́, Бо́же оте́ц на́ших.

Возсия́ па́мять твоя́, проро́че, ми́ру, я́коже со́лнце,/ озаря́ющи проро́чества благода́тию твое́ю согла́сно пою́щия ве́рно:/ благослове́н еси́, Бо́же оте́ц на́ших.

Ту́чнейший о́блак ты яви́вся,/ ту́чу Богоразу́мия нам возсия́л еси́ от спаси́тельных, блаже́нне, исто́чников,/ и́миже просвеща́емся вопи́ти:/ благослове́н еси́, Бо́же оте́ц на́ших.

Богоро́дичен: Сло́во, дре́вле Е́же бы́ти подаю́щее все́м Боже́ственным хоте́нием,/ воззва́ти восхоте́в челове́ка, Чи́стая,/ в Твою́ всели́ся утро́бу, Благослове́нная,/ Я́же Бо́га пло́тию ро́ждши.

Песнь 8

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.

Возложе́н весь Вседержи́телю, промышле́ния образо́м тайнонаучи́лся еси́,/ строи́тельно язы́ки наказу́я;/ тем тя пое́м, проро́че Богоглаго́ливе.

Моле́бное пе́ние Бо́гу принеси́ о пою́щих тя, Богоблаже́нне,/ и напа́стей разори́ смуще́ние,/ да тя пое́м, проро́че Богоглаго́ливе.

Богоро́дичен: Жизнода́вца ро́ждши Бо́га и Го́спода,/ сме́ртное губи́тельство неуде́ржное уста́вила еси́, Пречи́стая, сие́ умертви́вши;/ тем Тя пое́м во вся ве́ки.

Песнь 9

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

На земли́ кро́тких ты всели́лся еси́,/ иде́же по кончи́не А́нгельския зри́ши све́тлости,/ Софо́ние всему́дре, проро́че Бо́жий,/ кро́ток быв, сия́я благода́тию;/ те́мже, ра́дующеся, ве́рнии, тя ублажа́ем.

Твои́х прорече́ний, пресла́вне,/ све́тло ви́дяще бы́вшее сбытие́,/ да́нней тебе́ благода́ти чуди́мся, и ума́ твоего́ чистоте́,/ и души́ Богови́дному удивля́емся.

Богоро́дичен: Я́ко Ты, никогда́же и́на дарова́ся от родо́в дре́вних, Богома́ти Всенепоро́чная:/ Ты бо еди́на всех несравне́нную име́ла еси́ святы́ню и чистоту́,/ те́мже прия́ла еси́ Бо́га, в Тебе́ вопло́щаема.

Свети́лен дне.

Святой пророк Софония

Святой пророк Софония, один из 12 малых пророков, о себе говорит, что он – сын Хусия, имел деда Годолию, прадеда Аморию, прапрадеда Езекию. Все святые пророки, кроме Варуха, избегали длинных родословий. Не без причины святой Софония отступил от этого правила. Видимо, его предки прославились в своем отечестве. Возможно, что упоминаемый в Родословии (Мф.1:9–10) Езекия – известный благочестивый царь Иудейский (нач. VIII в. до Рождества Христова). Святитель Епифаний, епископ Кипрский († 403, память 12 мая), полагает, что пророк Софония происходил из колена Симеонова, из горной страны Саравафа (или Варафа – юго-западная пограничная часть Палестины). Сам святой Софония говорит о времени своего пророческого служения так: «Слово Господне, которое было к Софонии... во дни Иосии, сына Амонова, царя Иудейского» (Соф.1:1). Следовательно, жил пророк Софония за 600 с лишним лет до Рождества Христова.

В городах Иудеи того времени стояли языческие капища и идольские жертвенники. Совершались приношения человеческих жертв Молоху. В святом храме Иерусалимском на месте кивота Завета стоял идол Астарты. Царь Иосия, видя беззакония народа, воспламенился любовью к Истинному Богу и объявил решительную войну такому нечестию. Он разрушил статуи ложных богов, истребил языческие жертвенники. Своей жизнью Иосия являл пример добродетели.

Святой пророк Софония помогал благочестивому царю в его стремлении истребить идолопоклонство, призывая народ иудейский к покаянию. Проповедь пророка по силе и глубине напоминала пламенные речи великих пророков Исаии (VIII в. до Р.X., память 9 мая) и Иеремии (VI в. до Р.X., память 1 мая). Однако язычество, затаившись при царе Иосии, после его смерти появилось снова. Поэтому Господь устами пророка Софонии предрек наказание народу иудейскому. Так, было дано страшное пророчество о Ниневии: «...прострет Он руку Свою на север... и обратит Ниневию в развалины, в место сухое, как пустыня» (Соф.2:13).

Пророк Софония глубоко скорбел о нечестии своего народа и горячо молился об обращении соотечественников на путь истины и спасения. И Господь открыл ему о наступлении того благодатного времени, когда явится Мессия, а с ним радость, мир и спасение для всей земли. «Ликуй, дщерь Сиона! Торжествуй, Израиль!.. Господь, Царь Израилев, посреди тебя...» (Соф.3:14–15),– так пророчествовал святой Софония, возвещая беспредельную милость Божию, чтобы надеждою утешить и укрепить смиренных. Святая Православная Церковь видит в этих словах ясное указание на пришествие Христа Спасителя – на торжественный вход Господень в Иерусалим. Поэтому в службе Недели ваий в церкви читают среди паремии одну из книги святого пророка Софонии.

О дне своей смерти пророк Софония узнал по откровению свыше. Скончался он в чаянии всеобщего воскресения и был, по преданию, погребен в своем доме.

НА ВЕЛИЦЕЙ ВЕЧЕРНИ

Блаже́н муж: на Го́споди, воззва́х: ста́вим стихо́в 6 и пое́м стихи́ры, глас 8.

Подо́бен: О, пресла́внаго чудесе:

Сла́ва Твоея́ бла́гости,/ Сы́не и Сло́ве Бо́га, Иису́се Всеблаги́й,/ я́ко не хоте́ погуби́ти творе́ние/ Твои́х пречи́стых рук, Человеколю́бче,/ но благоволе́нием, Свое́ю благода́тию/ к ра́зуму отве́ргшагося Тя Ангели́/ приведе́ от прегреше́ния и отмета́ния.

Му́чениче Ангели́ пречу́дне,/ искони́ зло́биваго врага́/ многоразли́чную му́дрость, Богому́дре, разруши́/ и, небесному́дрый сый, утаи́ от ве́дущих тя/ свое Небе́сное житие́, сла́вне,/ еди́ным Христо́м живы́й/ и ве́дый Созда́вшаго тя.

В све́дении³ зла́го отмета́ния и прегреше́ния быв,/ посто́м и слеза́ми Боже́ственное проси́ и ве́лию ми́лость/ и с высоты́ Боже́ственную по́мощь,/ е́юже и насы́ти дерзнове́нием и си́лою ду́шу свою́/ и побе́ду получи́.

Христа́ сотвори́ти чашу жела́яй, Ангели́/ вмени́, я́ко уме́ты,/ я́ко су́етное всего́ ми́ра, блаже́нне,/ бога́тство, сла́ву и ле́поту/ и не пощади́ те́ла своего́,/ но ра́ны го́рестныя соде́ла/ и жи́зни изво́ли ве́лию смерть.

Му́чениче Христо́в, соиме́нный А́нгелом,/ с а́нгельстими ли́ками к Бо́гу предста́вший,/ лю́дем ве́рным святы́х, блаже́нне, испроси́ приноше́ние,/ су́щих на земли́ храни́ моли́твами твои́ми,/ су́щим же на мо́ри ути́ши бу́ри.

Прося́щим за ны к Бо́гу насле́ди,/ соиме́нный А́нгелом,/ се́мо скорбя́щим:/ с Миропи́ею Иси́дору,/ с Марке́ллом темни́цы стра́жу,/ с Фео́филом Никола́ю/ и с Ману́илом Ники́те, и Ма́ркону, и честне́й Матро́не,/ и оста́ви нече́стия прише́ствие.

Сла́ва, глас 2:

Но́вый му́ченик приложи́ся к му́ченик лико́м,/ Ангели́ пречу́дный,/ но́вую вину́ пра́здника и торжества́ вдал еси́ Це́ркви,/ в нейже ве́рно собра́вшеся,/ восхва́лим тя, глаго́люще:/ ра́дуйся, и́же Христа́ просла́вивый боголе́пно дерзнове́нным испове́данием твои́м/ и враг посрами́вый благодерзнове́нием слове́с твои́х,/ ра́дуйся, ору́жниче Небе́снаго Ца́рствия ополче́ния/ и во́ине непобеди́мый,/ ра́дуйся, и́же Ца́рствие красоты́ поима́вый/ и вене́ц добро́ты из рук Го́спода прия́вый,/ Ему́же моли́тися не престава́й за ве́рных/ и с любо́вию соверша́ющих присночестну́ю па́мять твою́.

И ны́не, глас то́йже, Богоро́дичен:

Се вре́мя прибли́жися спасе́ния на́шего,/ гото́вися, верте́пе:/ Де́ва приближа́ется, е́же роди́ти,/ Вифлее́ме, земле́ Иу́дова,/ красу́йся и весели́ся,/ я́ко из тебе́ возсия́ Госпо́дь наш,/ услы́шите, горы, и хо́лми, и окре́стныя стра́ны Иуде́йския,/ я́ко гряде́т Христо́с,/ да спасе́т, его́же созда́, челове́ка, я́ко Человеколю́бец.

Вход. Свете ти́хий: Проки́мен и чтения:

Проро́чества Иса́иина чте́ние (глава́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете и ве́руете Ми, и разуме́ете, я́ко Аз есмь:/ пре́жде Мене́ не бысть ин бог, и по Мне́ не бу́дет,/ Аз есмь Бог и несть ра́зве Мене́ спаса́яй./ Аз возвести́х и спасо́х,/ уничижи́х и не бе в вас чужди́й./ Вы Мне свиде́тели и Аз Госпо́дь Бог,/ и еще́ от нача́ла Аз е́смь:/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я,/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и я́ко и́скры по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть:/ и живы́й посреде́ гре́шников, преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́:/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и, стихи́ра, глас 1:

Сокруше́нным се́рдцем/ и душе́ю, горя́щей любо́вию муче́ния,/ сотвори́ти ше́дый ча́шу,/ уста́вил еси́ ны́не любве́ жела́ния обы́чай,/ соиме́нный А́нгелом всечу́дный,/ сего́ ра́ди му́ченическим дерзнове́нием и сла́вою Христу́ предста́вый,/ испроси́ любящим тя Боже́ственную и бога́тую ми́лость.

Сла́ва, глас 5:

Блаже́н еси́, я́ко вои́стинну до́брый, страстоте́рпче Христо́в,/ соиме́нный А́нгелом, добропобе́дниче,/ а́ще бо иногда́ в во́ле нечести́вых пребыва́,/ певце́м уста́вися гре́шных/ и на престо́ле нече́стия восседа́,/ но, во И́мя Го́спода твоего́ возноше́ния де́лу/ и неизрече́нному Бо́жию Человеколю́бию поучи́вся,/ по́прища дости́же муче́ния,/ и свое́ю честно́ю кро́вию напои́выйся оби́льно,/ я́ко дре́во у пото́ка вод,/ в стра́сти плоды́ принесе́ спасе́ния,/ и ны́не, дре́ва жи́зни насы́тивыйся,/ помяни́ и нас, с любо́вию восхваля́ющих тя.

И ны́не, глас то́йже, Богоро́дичен:

Не дряхлу́й, Ио́сифе,/ зря мою́ утро́бу:/ у́зриши бо Ражда́емаго от Мене́, и возра́дуешися,/ и я́ко Бо́гу поклони́шися,/ Богоро́дица глаго́лаше ко Своему́ обру́чнику,/ хотя́щи роди́ти Христа́./ Сию́ воспои́м, глаго́люще:/ ра́дуйся, Обра́дованная, с Тобо́ю Госпо́дь/ и Тебе́ ра́ди с на́ми.

На стихо́вне стихи́ры, глас 2.

Подо́бен: Егда́ от Дре́ва:

Ра́дуяся, поручи́ себе́ посра́мленным мучи́телем,/ му́чениче Христо́в Ангели́,/ вельми́ пресла́вный,/ к Бо́гу жела́нием ду́шу заже́гший/ и жа́ждущий от любве́ испи́ти ча́шу стра́сти,/ Ю́же и испи́вый, страстоте́рпче, мече́м усекнове́нный,/ пожи́л еси́ в Христе́.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Му́жественный Ангели́/ пред суди́щем нечести́вым, му́чениче све́тле,/ Тро́ическое Богонача́льствие и Еди́ное пропове́да/ и лесть безбо́жную словесы́ твои́ми прему́дрыми обличи́, крепкоду́шне,/ име́яй в се́рдце Боже́ственнаго Ду́ха благода́ть,/ я́же Христо́вы рече́ глаго́лы.

Стих: Насажде́ни в дому́ Госпо́дни/ во дво́рех Бо́га на́шего процвету́т.

Му́чениче, страстоте́рпче Ангели́,/ твои́ми к Бо́гу моли́твами/ преста́ви прише́ствие нече́стия и ве́лию па́губу,/ отгони́ вся́кия от сла́вящих честну́ю твою́ страсть ка́зни/ и стра́шное ору́жие/ и изба́ви нас лю́тыя сме́рти, благоми́лостиве.

Сла́ва, глас 8:

Моли́тва твоя́ неусыпа́ющая к Бо́гу/ и хода́тайство твое́ достосла́вное за чту́щих тя, новому́чениче,/ соиме́нный А́нгелом,/ не ра́бским стра́хом,/ но благи́м дерзнове́нием и му́ченическою сла́вою/ мо́лишися за нас,/ посе́чен бы́вый, уме́рший,/ и соверше́нную любо́вь показа́вый,/ ми́лостив бу́ди и изба́ви стра́шнаго прише́ствия па́губы/ с любо́вию па́мять соверша́ющих твою́/ и воспева́ющих Боже́ственную твою́ страсть.

И ны́не, глас то́йже:

Восприими́, Вифлее́ме, Бо́жию митропо́лию,/ Свет бо незаходи́мый в тебе́ роди́тися прихо́дит,/ Ангели́, удиви́теся на Небеси́,/ челове́цы, просла́вите на земли́,/ волсви́, от Перси́ды пресла́вный дар принеси́те,/ па́стырие, свиря́юще, трисвято́е пе́ние сла́дце воспо́йте:/ вся́кое дыха́ние да хва́лит Вседе́теля.

Тропа́рь, глас 1.

Подо́бен: Лик а́нгельский:

Лик а́нгельский, Ангели́ новому́чениче,/ и со́нмы страстоте́рпец/ восплеска́ша выспрь/ твоему́ ве́ры ра́ди терпе́нию и прекосло́вию/ и дух твой по благому́дрию возведо́ша на Небеса́/ со сла́вою ко Христу́ Бо́гу на́шему.

НА У́ТРЕНИ

По 1-м стихосло́вии седа́лен, глас 4.

Подо́бен: Удиви́ся Ио́сиф:

В сокруше́нии сердца и в покая́нии души́/ ще́драго Бо́га моля́, Ангели́ взыва́ше:/ беззако́ние мое́ ви́жду, Человеколю́бче Христе́,/ И́же хотя́й челове́цы спасти́,/ приими́ мое́ покая́ние, и слез мои́х виждь ка́пли,/ и не оста́ви мя, молю́ся./ Ны́не же любо́вию, треблаже́нне, чту́щих тя помяни́.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря и внима́ше мы́слию,/ и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопа́льную,/ жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по Рождестве́ па́ки пребыва́ет Де́ва.

По 2-м стихосло́вии седа́лен, глас 3.

Подо́бен: Бо́жия ве́ры:

Положи́ Христа́ искрь⁴, соиме́нный А́нгелом му́чениче кре́пкий,/ и, я́ко же́ртву, себе́ принесе́, не преста́й в Боже́ственных моли́твах за нас моля́щи, раб твои́х,/ па́мять твою́ святу́ю и честну́ю помина́ющих в пе́снех и хвала́х.

Сла́ва, и ны́не, Богоро́дичен:

Чу́до преве́лие,/ ка́ко вмести́ся Невмести́мый во чре́ве Твое́м,/ и воплоти́ся, и яви́ся я́ко Челове́к, не претерпе́вый смеше́ния или́ разделе́ния/ Боже́ственнаго и непрело́жнаго Божества́, Отрокови́це Всечи́стая./ Те́мже Богоро́дицу Тя ве́рно пропове́даем при́сно и сла́вим.

По полиеле́е, седа́лен, глас 4.

Подо́бен: Яви́лся еси́ днесь:

Честно́е твое́ лице́ блиста́яй ви́дится/ от Боже́ственной благода́ти зря́щим,/ явля́яй сла́ву, на́ми пои́му, сла́вне.

Сла́ва, глас то́йже:

О́браза твоего́, свя́те, препросла́вленнаго от Бо́га, красоту́/ в Боже́ственней све́тлости и твою́ сла́ву ви́дети мя сподо́би, раба́ твоего́.

И ны́не, Богоро́дичен:

Предста́тельнице, от бед заступле́ние непобеди́мое/ и моли́тва, угото́ванная наде́ющимся на Тя,/ от напа́стей мя изба́ви и не пре́зри ма́лаго моего́ воздыха́ния.

Степенны, антифо́н 4-го гла́са. Проки́мен: Пра́ведник, я́ко фи́никс, процвете́т: Стих: Насажде́ни в дому́ Госпо́дни: Вся́кое дыха́ние: Ева́нгелие ищи свято́му Георгию на у́трени. По 50-м псалме́ стихи́ра му́ченика, глас 2: Но́вый му́ченик: (зри славник на вели́цей вече́рни).

Кано́ны Богоро́дице и свято́му. Кано́н свято́му Ангели́, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Тьму, соиме́нный А́нгелом, ра́зума моего́/ моли́твами твои́ми ко Го́споду, му́чениче, потреби́,/ да воспою́ тя в пе́снех,/ прия́вшаго честну́ю и Боже́ственную страсть.

Пресла́вная страсть и заколе́ние твое́/ све́тлаго нам сотвори́ша пра́здника образ,/ побе́дный Ангели́, в пе́снех восхваля́ем тя.

Го́рняя си́ла Боже́ственный дух твой яви́ша, му́чениче, соиме́нный А́нгелом,/ мо́ря же глубина́ от свере́пия судии́ те́ло твое́ утаи́.

Богоро́дичен: Ми́лости бе́здну ражда́ющая,/ поми́луй, уще́дри мою́ не́мощь, Богобла́гостная,/ и наста́ви к све́ту покая́ния.

Ин кано́н свята́го, глас 4.

Ирмо́с: Мо́ря чермну́ю пучи́ну/ невла́жными стопа́ми/ дре́вний пешеше́ствовав Изра́иль,/ крестообра́зныма Моисе́овыма рука́ма/ Амали́кову си́лу в пусты́ни победи́л есть.

Я́ко дру́га бли́жняго Влады́ки тя ве́рно хва́лим,/ я́ко дерзнове́ние иму́ща мно́гое к Нему́, соиме́нный А́нгелом,/ я́ко страстоте́рпец непобеди́мый и достохва́льный.

Претерпе́ любо́вию Христа́ и рачи́тельством, пора́довавыйся ду́хом,/ темни́цу, му́ки и усекнове́ние главы́ твоея́, новому́чениче,/ и, я́ко же́ртва непоро́чная и приноше́ние, ему́ принесе́ся.

Лица́ твоего́ мно́зей све́тлости вся удиви́шася ди́вней, му́чениче Ангели́,/ е́юже, мертв уже́, блиста́я по Боже́ственней благода́ти, пресла́вне.

Богоро́дичен: Пои́стине родила́ еси́ Бо́га и Го́спода, Богоро́дице,/ Еди́ная, и Избра́нная, и Чи́стая,/ сего́ же ра́ди ве́рно Тя хва́лим и вои́стину сла́вим.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ И́же над вода́ми не́бо утвержде́й второ́е/ и основа́вый на вода́х зе́млю, Всеси́льне.

Попаля́емое огне́м се́рдце твое́/ ко Боже́ственней любви́ неся́й,/ преда́ся в заколе́нии во́льнем, соиме́нный А́нгелом, пречу́дне,/ сего́ ра́ди восхваля́ем тя.

Вни́де в рвы,/ пренесе́ до́бре, Христо́в му́чениче Ангели́, вся му́ки,/ и, смерть прия́вый,/ же́ртва непоро́чная Христу́ принесе́ся.

Собира́ющихся в па́мять твою́/ и восхваля́ющих ве́рою те́плою твои́ по́двиги и заколе́ние во́льное, Ангели́,/ от губи́тельства лю́таго защити́ и от вся́каго зла.

Богоро́дичен: Яви́ ми путь спасе́ния,/ сего́ же ра́ди Ца́рство Небе́сное насле́дую, Блага́я, недосто́йный раб Твой,/ и услы́шу Трисвяту́ю песнь, ра́дуяся.

Ин

Ирмо́с: Весели́тся о Тебе́ Це́рковь Твоя́, Христе́, зову́щи:/ Ты моя́ кре́пость, Го́споди,/ и прибе́жище, и утвержде́ние.

Ра́довашеся в темни́це, злы́я ра́ны, Ангели́, име́л еси́,/ Ты моя́, Христе́, си́ла,– вопия́,–/ и кре́пость моя́ непобеди́мая.

Разруши́л еси́ му́жески велехвале́ния го́рдость ага́рян, хра́бре,/ словесы́ твои́ми/ и обличи́л еси́ нече́стие.

Воспева́ем ра́ны твои́, Ангели́, и во мра́це затворе́ние,/ и́мже кре́пце ну́жен бысть,/ и усекнове́ние главы́ твоея́.

Богоро́дичен: Покро́ве светоза́рный вои́стинну вся́каго естества́,/ све́те таи́нственный Христа́,/ све́та луча́ дай ми.

Седа́лен, глас 3.

Подо́бен: Красоте́ де́вства:

Пото́ки крове́й твои́х зе́млю напои́л еси́,/ но и мо́ре ты освяти́л еси́ телесе́м твои́м,/ в него́же низве́ржен бысть неми́лостивным и злым свире́пием, Ангели́,/ те́мже мо́лим тя:/ су́щих на земли́ и пла́вающих спаси́ от вся́ких бед/ Боже́ственным твои́м, страстоте́рпче, промышле́нием.

Сла́ва, и ны́не, Богоро́дичен:

Красоте́ де́вства Твоего́ и пресве́тлой чистоте́ Твое́й/ Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ Что же возымену́ю Тя?/ Недоумева́ю и ужаса́юся./ Те́мже, я́ко повеле́н бых, вопию́:/ ра́дуйся, Благода́тная.

Песнь 4

Ирмо́с: Ду́хом прови́дя, проро́че Авваку́ме, Словесе́ вопло́щение,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Духа благода́ть, поста́вивши шате́р в Тебе́,/ вся оста́вити ми́ра красоту́, му́чениче сла́вный Ангели́,/ пону́ди тя и наслажде́ние, и соверше́нный плод Боже́ственный Бо́гу бы́ти.

Страсть твоя́, му́чениче Богому́дре Ангели́,/ пра́здника о́бразу све́тлому причасти́/ возлюби́вших тя, непобеди́мый новому́чениче, красота́ и сла́ва,/ темже, собра́вшеся, воспева́ем тя.

Мо́ре гроб твой сотвори́ся,/ ты неви́димо предста́ни и свободи́ от злых к тебе́ вопию́щих в ве́ре и благоче́стии/ и ско́рое твое́ предста́тельство прося́щих в треволне́нии и бу́рях.

Богоро́дичен: Поми́луй мя, Еди́ная, ми́лости Исто́чник, Богоро́дице, породи́вши,/ и свободи́ боле́зней души́ моея́ и безчу́вствия се́рдца,/ и даждь покая́ние и лю́тых избавле́ние.

Ин

Ирмо́с: Вознесе́на Тя ви́девши Це́рковь на Кресте́,/ Со́лнце Пра́ведное,/ ста в чи́не свое́м,/ досто́йно взыва́ющи:/ сла́ва си́ле Твое́й, Го́споди.

Бие́нием ли́ка и пе́рсей тя умертви́ти хоте́ша,/ сего́ ра́ди уя́звлен ра́нами был еси́,/ и честну́ю главу́ твою́ отсеко́ша, му́чениче страстоте́рпче Ангели́.

По обы́чаю и любви́, му́чениче,/ прославля́ю по́двиги, и свято́е твое́ заколе́ние,/ и проли́тие кро́ви, и к Христу́ Боже́ственное рачи́тельство.

Моли́твами твои́ми ко Го́споду, новому́чениче,/ чту́щих тя защити́ от напа́стей теле́сных и душе́вных/ на земли́ и на мо́ре во вся́кое вре́мя, соиме́нный А́нгелом.

Богоро́дичен: Законода́вца ро́ждши и Светода́вца,/ лю́тую разруши́ тьму ума́ моего́ Твои́х моли́тв све́том/ и спаси́ мя, Влады́чице, оскверне́ннаго, Чи́стая.

Песнь 5

Ирмо́с: Твой мир даждь нам,/ Сы́не Бо́жий,/ ино́го бо, ра́зве Тебе́, бо́га не зна́ем,/ И́мя Твое́ имену́ем,/ я́ко Бог живы́х и ме́ртвых еси́.

Твои́ми моли́твами даждь нам, Христо́в страстоте́рпче,/ разреше́ние зол и грех отпуще́ние,/ сла́вящим твою́ страсть и целу́ющим написа́ние о́браза твоего́.

Я́ко возлю́бленнаго Христа́ тя воспева́ем, му́чениче,/ я́ко страсте́й приобщи́вшагося/ и соверше́нную и неизрече́нную ко Христу́ любо́вь име́ющаго.

Я́ко со́лнце, возсия́ па́мять твоя́ све́тлая,/ все сердца́ Боже́ственно просвеща́ющая/ и любо́вию Бо́га, венча́ющаго тя, согрева́ющая, блаже́нне.

Богоро́дичен: Цари́цу Де́ву Тя пропове́да Дави́д, Пречи́стая,/ сего́ ра́ди молю́ Тя:/ Небе́снаго Ца́рствия мя сотвори́ насле́дника, да Тя ублажа́ю.

Ин

Ирмо́с: Ты, Го́споди, мой свет,/ в мир прише́л еси́,/ Свет Святы́й, обраща́яй из мра́чна неве́дения/ ве́рою воспева́ющия Тя.

Ран губи́тельства, лю́таго и зла́го обстоя́ния/ моли́твами твои́ми, новому́чениче, к Бо́гу предстоя́й, изба́ви, соиме́нный А́нгелом.

Прише́ствие губи́тельства моли́твами твои́ми удержи́ дале́че/ от восхваля́ющих па́мять твою́ всесвяту́ю, соиме́нный А́нгелом.

Боле́зни злой изба́ви раб твои́х, тя воспева́ющих,/ и губи́тельства стра́шнаго моли́твами твои́ми, соиме́нный А́нгелом.

Богоро́дичен: Рай живота́, Богоро́дице, су́щи,/ сме́рти грехо́вныя и страсте́й многообра́зных свободи́ мя ско́ро.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Превосхо́дит вои́стинну похва́льныя обы́чаи терпе́ние мно́гое,/ его́же показа́л еси́, всечу́дне, вели́колепие.

Небе́сный в тебе́ огнь разжига́ся, му́чениче,/ его́же Госпо́дь вложи́,/ прии́де Блаже́нный на зе́млю и опали́ се́рдце твое́ в Боже́ственной любве́.

В ра́дости духо́вней, новому́чениче Ангели́,/ благочеству́ющих мно́жество твою́ па́мять соверша́ет/ и воспева́ет Боже́ственную страсть и боре́ние.

Богоро́дичен: Ма́терь Бо́жию и красне́йшую в жена́х, молю́ Тя приле́жно:/ не оста́ви мя, но поми́луй и от вся́каго вре́да сохрани́.

Ин

Ирмо́с: Пожру Ти со гла́сом хвале́ния, Го́споди,/ Це́рковь вопие́т Ти,/ от бесо́вския кро́ве очи́щшися/ ра́ди ми́лости от ребр Твои́х/ исте́кшею Кро́вию.

Поима́ет тя, Ангели́, храни́телем, стра́жем/ и засту́пником ве́лиим в напа́стех вся́ких о́стров Хио́с,/ в немже и свяще́нную кровь изли́л еси́.

Чту́ще твое́, Ангели́, заколе́ние во́льное и благи́я дея́ния,/ пра́здник по вся ле́та соверша́ем/ и твоего́ предста́тельства про́сим.

Освяти́лися суть земля́, кровь твою́ прии́мши,/ во́здух же – твой дух/ и мо́ря глубина́ – те́ло,/ сего́ ра́ди спаси́ су́щих на земли́ и на мо́ре моли́твами твои́ми.

Богоро́дичен: Еди́ну Тя честне́йшую ве́даем, Всесвята́я, Херуви́м,/ я́ко ро́ждшую Све́та Пода́теля, Богоро́дице,/ Его́же умоли́ к Све́ту мя всели́ти незаходи́мому.

Конда́к, глас 3:

Свята́го тя му́ченик лик, Ангели́, прия́,/ ты же, на Небесе́х ны́не ра́дуяся, пострада́л еси́,/ и зако́нно, благому́дрый, посрами́л еси́ мучи́телей безбо́жную си́лу,/ и вене́ц взял еси́ нетле́ния, ору́жием посе́ченный.

И́кос:

Вы́шняго жития́ ве́чнаго хотя́й дости́гнути, соиме́нный А́нгелом/ и ангелому́дрый Ангели́, новому́ченик Христо́в достосла́вный,/ ни́жнее тле́ние разу́мно оста́вил еси́,/ сего́ ра́ди во́лею преда́л еси́ себе́ свире́пию и посрамле́нию мучи́телей/ и безбо́жную си́лу и горде́ние размета́л еси́/ безстра́шным предстоя́нием и дерзнове́нием слове́с твои́х,/ их же ра́ди нече́стие обличи́л еси́,/ Христа́ же пропове́дал еси́,/ Бо́га соверше́ннаго и соверше́ннаго Челове́ка,/ сего́ ра́ди вене́ц нетле́ния взял еси́, ору́жием посе́ченный.

Песнь 7

Ирмо́с: Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.

Ра́ны мно́гия, их же прия́л еси́,/ темни́цы страсть и смерть, соиме́нный А́нгелом,/ ве́рно воспева́ем и восхваля́ем.

О, те́плаго твоего́ ко Го́споду рачи́тельства,/ о, твоего́ терпе́ния и любве́!/ То́йже тя от тле́ния жи́зни изведе́ к нетле́нию.

Зако́нно, страстоте́рпче, подвиза́яся, ве́ру к Творцу́ сохрани́л еси́,/ сего́ ра́ди есть тебе́ побе́дный вене́ц, соиме́нный А́нгелом.

Богоро́дичен: О́блак Тя разуме́ю, Богоневе́сто,/ Со́лнце сла́вы поро́ждший,/ све́том озаря́яй нощь мои́х прегреше́ний.

Ин

Ирмо́с: Спасы́й во огни́ авраа́мския Твоя́ о́троки/ и халде́и уби́в,/ я́же Пра́вда пра́ведно уловля́ше,/ препе́тый Го́споди,/ Бо́же оте́ц на́ших, благослове́н еси́.

Прииди́те, страстолю́бцы, потече́м с любо́вию/ и по вся ле́та све́тло пра́здник почти́м све́тлаго новому́ченика,/ в пе́снех изя́ществию его́ пле́щуще.

Ка́ко восписа́ся в тебе́, му́чениче, благода́ть Свята́го Ду́ха/ и умно́жися чрез покая́ние и мучение!

Со Иа́ковом Ангели́ и с Панха́рием воспое́м/ и с о́троки страстотерпцы и с Петро́м зело́ прославля́ем,/ со учени́к мно́жеством, я́ко побе́ду.

Богоро́дичен: Неизрече́нно во чре́ве сла́вно прия́вшей Бо́га бла́гоутро́бия ра́ди,/ челове́ки сла́вимой, ве́рнии, поклони́мся,/ я́ко Ма́тери Бо́жией Благослове́нной.

Песнь 8

Ирмо́с: Его́же ужаса́ются Ангели́ и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Удиви́л еси́ горе́ А́нгел ли́ки/ и у́жасу прича́ствовал еси́ челове́ком, Ангели́,/ и бе́сы, ви́дяще поспеше́ние к заколе́нию, устраши́лися.

Ору́жие те́ло разлучи́ и ду́шу твою́,/ но ты взы́де ко Христу́,/ ны́не ца́рствуеши с Ним, Ангели́,/ и живе́ши в сла́ве во вся ве́ки.

Дух твой взы́де к А́нгел лико́м,/ те́ло же пове́ржено бысть в мо́ря глубину́,/ ты яви́ся обличи́ти мучи́телей го́рько на неми́лостивом суди́щи.

Богоро́дичен: Возведи́ лежа́щаго мя в глубине́ злых,/ ны́не боря́щих мя побори́ враг,/ вредя́щих безме́стными сластьми́ ду́шу, Чи́стая,/ не осуди́, но поми́луй и спаси́.

Ин

Ирмо́с: Изба́вителю всех, Всеси́льне,/ посреде́ пла́мене благоче́ствовавшия,/ снизше́д, ороси́л еси́/ и научи́л еси́ пе́ти:/ вся дела́, благослови́те, по́йте Го́спода.

Главы́ и пе́рсей ра́ны, и о́чию сле́зы,/ и из глубины́ воздыха́ния се́рдца, всеми́лостивый, пострада́ти изво́ли.

Воспева́юще сла́ву страсте́й твои́х,/ к Бо́гу тя хода́тая нарица́ем,/ злых избавле́ние и грех оставле́ние, Богому́дре му́чениче,/ тя про́сим, рабы́ твои́.

Богоро́дичен: Мно́гия нас спаса́ют Твои́ щедро́ты, Всесвята́я Ма́терь Бо́жия,/ от грех и напа́стей,/ Ты бо, ро́ждшая Бо́га, ми́луеши весь мир.

Песнь 9

Ирмо́с: Светоно́сный о́блак, в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Светоно́сную ду́шу твою́ А́нгел ли́ки и му́ченик, Ангели́,/ и пра́ведник со́нмы с любо́вию поя́ша све́тле,/ ко Христу́ приведо́ша Влады́це,/ и́же прия́ ю ра́достне, я́ко неве́сту избра́нную.

Вельми́ све́тлый день и ра́достный яви́ся, му́ченик Го́спода Ангели́,/ в не́мже ты пострада́л еси́ с любо́вию и Боже́ственным рачи́тельством Христо́вым,/ просла́вил еси́ Его́ Боже́ственными страстя́ми твои́ми,/ и, венце́м увенча́выйся побе́дным, взы́де ко Христу́.

Све́тлый ны́не день наста́,/ в немже мно́жество ве́рных помина́ет па́мять твою́, и дела́ твои́,/ и кончи́ну твою́ блаже́нную, соиме́нный А́нгелом му́чениче,/ темже поми́луй чту́щих тя ве́рно.

Богоро́дичен: Свет породи́вши Боже́ственный,/ омраче́ннаго мя ко́зньми вра́жиими и ле́ностию живу́щаго,/ гне́вающаго Бо́га, Непоро́чная, просвети́,/ наста́ви к до́брым дея́ниям,/ я́ко вина́ су́щи вся́каго добраго.

Ин

Ирмо́с: Я́ко одушевле́нному Бо́жию Киво́ту,/ да ника́коже ќоснется рука́ скве́рных,/ устне́ же ве́рных Богоро́дице немо́лчно,/ глас А́нгела воспева́юще, с ра́достию да вопию́т:/ ра́дуйся, Благода́тная, Госпо́дь с Тобо́ю.

Сликовству́еши со А́нгел чи́ны/ и с му́ченик со́нмы ра́дуешися на Небесе́х,/ в це́ркве песньми немо́лчными, му́чениче, сла́вим,/ Богонача́льствие блиста́ния непристу́пнаго, блаже́нне, приима́яй при́сно.

В Небе́сных селе́ниих живя́й, в ме́сте разу́мнем, му́чениче Госпо́день,/ иде́же ли́ки а́нгельстии и святы́х ви́дят красоту́ неизрече́нную,/ о блаже́нне, услы́ши и моли́ся за ве́рных,/ чту́щих тя ны́не.

С любо́вию Боже́ственную па́мять твою́ песньми сла́вящему, му́чениче Богому́дре,/ даждь, Ангели́, твои́ми мольба́ми Богоприя́тными злых свободи́тися/ и печа́лей и зол оставле́ние,/ име́яй дерзнове́ние мно́гое, я́ко му́ченик Христа́ Бо́га.

Богоро́дичен: Я́ко пресве́тлую, Богоро́дице, души́ чи́стую иму́щи красоту́,/ благода́тию же Боже́ственною с Небесе́ насыща́ющи,/ Све́том присносу́щным озаря́еши воспева́ющих Тя, Де́во Чи́стая.

Ексапостила́рий.

Подо́бен: Ду́хом:

Ве́ру Боже́ственную, Ангели́, Ю́же отве́ргше пе́рвее,/ восприя́, блаже́нне,/ и пропове́да а́бие пред безбо́жными мучи́тели,/ и, пролия́вый свою́ кровь,/ и́стинно пребыва́еши нам наде́жда и любо́вь.

Сла́ва: Наде́ющихся на тя ны́не, до́брый страстоте́рпче, прии́мая,/ в День Су́дный не погуби́ наде́жду,/ бу́дет к Бо́гу же любо́вь и ко вся́кому мно́жеству А́нгел и святы́х.

И ны́не: Наде́жда всего́ ми́ра, Богоро́дице Де́во,/ непобеди́мыя Влады́чицы предста́тельства про́сим,/ и́же в ско́рбех пребыва́ющии и носи́мии жития́ волна́ми:/ умири́ стра́сти и в приста́нище к Бо́гу введи́.

На хвали́тех стихи́ры, глас 8.

Подо́бен: О, пресла́внаго чудесе́:

Прия́ любо́вь Боже́ственную,/ но́вый Христо́в му́чениче,/ ве́рно в па́мять твою́ сте́кшимся/ днесь воспева́ти стра́сти твоя́ и по́двиги,/ и́хже сверши́ Боже́ственною любо́вию, ра́дуяся,/ и во́льное честны́я главы́ усече́ние, и твое́ спасе́ние,/ даждь грех оставле́ние.

С бла́годарствием тя воспева́ем,/ му́чениче Христо́в Ангели́,/ и со о́троки всеми восхваля́ем с любо́вию тя,/ и ве́рно тя сла́вим со Иа́ковом пе́рсом пе́сньми,/ и с Боже́ственным Петро́м верхо́вником/ в хвала́х ублажа́ем,/ я́ко сотвори́ побе́ду страстя́ми твои́ми.

О́ку ми́лостивому предае́мся,/ недосто́йнии твои́ хвали́тели,/ и моли́твами твои́ми исполня́еши/ проше́ния на́ша, Боже́ственный му́чениче,/ принима́еши приноше́ния на́ша/ за спасе́ние души́ и телесе́,/ я́ко предста́тельство име́яй ко Го́споду,/ Его́же возлюби́л еси́,/ и любо́вию, я́ко вои́стинну смерть избра́вый,/ житие́ отве́ргл еси́.

Губи́тельныя боле́зни прише́ствия,/ му́чениче Христо́в Ангели́,/ и злых твои́ми моли́твами ко Го́споду и моле́ниями изба́ви/ ве́рою прося́щих тя,/ Боже́ственныя благода́ти и заступлени́я не лиши́ нас, раб твои́х,/ те́пле лю́бящих тя,/ и в лю́тых стяжа́вших изба́вителя тя/ и Боже́ственное сохра́нение.

Сла́ва, глас 8:

Путь му́ченичества прия́вый,/ соиме́нный А́нгелом му́чениче Христо́в,/ жела́ние уста́вивый в по́двизе Христа́ восприя́ти,/ сего́ ра́ди ны́не в Небе́сных черто́зех живя́й/ и Пречи́стыми ра́зума приложе́ниями/ пресла́вныя зари́ Боже́ственности восприя́вый,/ моли́ся за ны, во тьме жития́ ше́ствующих,/ да Боже́ственнаго све́та получи́м,/ в ве́ре и любве́ помина́ющих присночестну́ю па́мять твою́.

И ны́не, глас то́йже:

Восприими́, Вифлее́ме, Бо́жию митропо́лию,/ Свет бо незаходи́мый в тебе́ роди́тися прихо́дит,/ А́нгели, удиви́теся на Небеси́,/ челове́цы, просла́вите на земли́,/ волсви́, от Перси́ды пресла́вный дар принеси́те,/ па́стырие, свиря́юще, Трисвято́е пе́ние сла́дце воспо́йте:/ вся́кое дыха́ние да хва́лит Го́спода.

Славосло́вие вели́кое и отпу́ст.

НА ЛИТУРГИ́И

Слу́жба му́ченическая, Блаже́нны особыя:

Ра́дуйся, страстоте́рпче но́вый Христо́в Ангели́ треблаже́нный,/ с а́нгельскими ны́не чи́ны,/ с му́ченик со́нмы и все́ми святы́ми/ я́ко предстои́ши Престо́лу Вседержи́теля.

Хвала́ми и пе́сньми, благове́рне,/ я́ко Христа́ возлю́бленное ча́до, тя восхваля́ем/ и о́бщника Боже́ственных страсте́й и сме́рти, Ангели́ сла́вный.

Со Христо́м сочета́ся усекнове́нием честно́й главы́,/ досто́йный Ангели́,/ живе́ши и сла́вишися вку́пе с Ним, блаже́нне,/ во вся ве́ки ра́дуяся.

Не преста́й моли́тися, страстоте́рпче Бо́жий,/ за вся, благове́рно тя ублажа́ющия,/ я́ко му́ченика Госпо́дня,/ я́ко иму́щаго дерзнове́ние ко Го́споду, Ангели́ сла́вный.

Святой новомученик Ангели

Святой новомученик Ангели родился в Аргосе Пелопоннесском (Греция). На острове Хиосе святой Ангели был осужден мусульманами на жестокие пытки и обезглавлен, с радостью приняв смерть за Христа. Мученичество святого Ангели совершилось в 1813 году.

Тропа́рь, глас 8:

В тебе́, о́тче, изве́стно спасе́ся, е́же по о́бразу,/ прии́м бо крест, после́довал еси́ Христу́/ и, де́я, учил еси́ презира́ти у́бо плоть, прехо́дит бо,/ прилежа́ти же о души́, ве́щи безсме́ртней./ Те́мже и со А́нгелы сра́дуется, преподо́бне Феоду́ле, дух твой.

Конда́к, глас 2:

Подо́бен: Вы́шних ища́:

Царя́ тле́ннаго и скороги́бнущия сла́вы,/ му́дре о́тче, измени́л еси́ ве́чно пребыва́ющими,/ от сто́лпнаго же и приско́рбнаго жития́ в Го́рнее и всера́достное взы́де,/ превели́чества сла́вы Небе́сному Царю́ сца́рствуя, Феоду́ле,/ моли́ непреста́нно о всех нас.