Авваку́м чу́дный,/ зарю́ Ду́ха прие́м,/ бысть весь Боже́ствен;/ и суде́й нече́стие, и суд непра́ведный зря,/ негоду́ет, нра́ва показу́я пра́вость Христа́ и Влады́ки,/ боголюбе́зно и теплою мы́слию,/ я́ко утесня́емь, разгара́ется.

На Боже́ственней стоя́ стра́жи,/ честны́й Авваку́м слы́шаше та́инство/ к нам Твоего́ прише́ствия, Христе́, неизрече́нное/ и пропове́дание Твое́ проро́чествует я́вственнейше,/ прови́дя и прему́дрыя апо́столы, я́коже ко́ни,/ язы́к многоплеме́нных, возмуща́ющия мо́ре.

В Го́споде ра́дуяся, Бо́зе Спа́се твое́м,/ Богоглаго́ливе сла́вне, веселя́ся,/ и та́мо су́щаго сия́ния зарю́ прие́м/ и све́том Богоде́льным мы́сленно просвеща́емь,/ па́мять твою́ всепра́зднственную ве́рою соверша́ющия/ напа́стей же и бед твои́ми моли́твами изба́ви.

И́ны стихи́ры Богоро́дицы, глас и подо́бен то́йже.

(А́ще аллилу́ия, си́и стихи́ры пою́тся пре́жде):

Ту́чами Ду́ха Свята́го, Пречи́стая,/ мою́ мысль ороси́,/ Ка́плю ро́ждшая – Христа́ – безме́рную,/ беззако́ния земны́х щедро́тами омы́вшую,/ изсуши́ исто́чник страсте́й мои́х/ и пото́ка сподо́би мя сла́дости/ присноживо́тною Твое́ю моли́твою.

Под зе́млю низве́ржен бых,/ грехи́ умертви́вся, душе́вными страстьми́ и теле́сными,/ те́мже тьмо́ю покрыва́юся отча́яния,/ но воздви́гни мя ны́не к жи́зни нетле́нней,/ путеводя́щи мя к Вы́шнему оте́честву,/ иде́же глас чист пра́зднующих/ и иде́же, свет лица́ Твоего́, Христе́.

Я́же Бо́га невмести́маго во чре́во Твое́ вмести́вшая,/ человеколю́бно Челове́ка бы́вша,/ и на́ше смеше́ние из Тебе́ прии́мша,/ и обожи́вшаго я́ве,/ не пре́зри мене́, Пречи́стая, ны́не скорбя́ща,/ но уще́дри вско́ре/ и вся́кия вражды́ и вре́да лука́ваго свободи́.

Сла́ва, и ны́не, глас и подо́бен то́йже:

Тьма́ми, Пречи́стая, обеща́хся/ покая́ние о мои́х сотвори́ти согреше́ниих,/ но не оставля́ет мя неподо́бный мой злый обы́чай,/ сего́ ра́ди вопию́ Ти/ и, припа́дая, молю́ся:/ Ты мя, Влады́чице, изми́ такова́го томле́ния,/ путеводя́щи к лу́чшим/ и спасе́ния близ су́щим.

Крестобогоро́дичен. Подо́бен то́йже:

А́гнца и Па́стыря,/ Тя на Дре́ве я́ко ви́де,/ А́гница ро́ждшая рыда́вше/ и ма́терски Тебе́ веща́ше:/ Сы́не Возжеле́нне,/ ка́ко на Дре́ве Кре́стнем пове́шен еси́, Долготерпели́ве?/ ка́ко руки́ и но́ги Твоя́, Сло́ве,/ пригвозди́шася от беззако́нных/ и Кровь Твою́ излия́л еси́, Влады́ко?

Тропа́рь, глас 2:

Проро́ка Твоего́ Авваку́ма па́мять, Го́споди, пра́зднующе,/ тем Тя мо́лим:/ спаси́ души на́ша.

НА У́ТРЕНИ

Кано́н проро́ка, глас 4. Его́же краегране́сие: Тя, проро́че Авваку́ме, пою́, блаже́нне. Феофа́ново.

Песнь 1

Ирмо́с: Воспою́ Тебе́, Го́споди Бо́же мой,/ я́ко изве́л еси́ лю́ди из рабо́ты еги́петския,/ покры́л же еси́ колесни́цы фарао́новы и си́лу.

Умудри́ мя, Го́споди Бо́же мой,/ Твоего́ проро́ка Авваку́ма пе́ти Боже́ственнаго/ и благода́тию Твое́ю просвети́, Бла́же, се́рдце мое́.

Доко́ле, Го́споди, проро́к глаго́лет, возопию́ к Тебе́, и не услы́шиши?/ Вску́ю же ми показа́л еси́ суде́й нече́стие?

Честну́ю па́мять твою́, проро́че, соверша́ющия благоче́стно/ твои́ми мольба́ми от бед изба́ви/ и лю́тых обстоя́ний.

Богоро́дичен: Бог Святы́й яви́ся, внегда́ прибли́житися вре́мени,/ из Тебе́, Богоро́дице, быв Челове́к,/ да спасе́т челове́ка.

Песнь 3

Ирмо́с: Лук си́льных изнемо́же,/ и не́мощетву́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Воззре́нием к Бо́гу возвыша́емь/ и светодая́нии от Него́ просвеща́емь,/ бу́дущих предзре́л еси́, Богоявле́ние, проображе́ние.

Вся́ку доброде́тель содержа́л еси́,/ вся́ку же зло́бу от ума́ возненави́дел еси́/ и пра́ведно беззако́ннующих возгнуша́лся еси́, всеблаже́нне.

Рече́нием Свята́го Ду́ха ты, я́ко чист, вве́рился еси́,/ ясне́йше проро́чествуя бу́дущих сбытия́, досточу́дне.

Богоро́дичен: Гора, доброде́тельми приосене́нная,/ из нея́же Влады́ка рабо́лепно прии́де рабо́ты свободи́ти челове́ки,/ яви́лася еси́, Всечи́стая.

Седа́лен, глас 4.

Подо́бен: Вознесы́йся:

На Боже́ственней стра́жи стал еси́, блаже́нне,/ и уразуме́л еси́ Бо́жие прише́ствие проро́ческими очесы́, Богодохнове́нне;/ те́мже и возопи́л еси́, Авваку́ме, со стра́хом:/ Го́споди, услы́шах стра́шное прише́ствие Твое́ и воспева́ю Тя,/ плоть бре́нную от Де́вы понести́ восхоте́вшаго.

Сла́ва, и ны́не, Богоро́дичен:

По Бо́зе в Твой, Богоро́дице, прибега́ю, смире́нный, покро́в Боже́ственный,/ припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу,/ моле́ние сотвори́, Чи́стая, к Сы́ну Твоему́/ от сих изба́вити мя.

Крестобогоро́дичен:

И́же из Безнача́льнаго Отца́ рожде́ннаго,/ напосле́док Тя пло́тию Ро́ждшая, на Кресте́ ви́сяща зря́щи, Христе́,/ увы́ мне, Любе́знейший Иису́се,– вопия́ше:/ ка́ко сла́вимый, я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Твоего́ на земли́ явле́ния, Христе́ Бо́же,/ пропове́дая проро́к прише́ствие,/ с весе́лием вопия́ше:/ сла́ва си́ле Твое́й, Го́споди.

Светови́ден доброде́телию яви́лся, Богодохнове́нне,/ и Све́т Невече́рний возвести́л еси́,/ Ему́же ны́не ве́рою зове́м:/ сла́ва си́ле Твое́й, Го́споди.

Всесве́тлая благода́ть ду́ха, оби́льно все́льшися в тя, всему́дре,/ проро́ка соверши́, всем Спа́са возвеща́юща.

Слу́хом огласи́вся Вседержи́теля,/ благогове́йно убоя́лся еси́, о чу́дне!/ Разуме́в же дела́ Сего́, во у́жасе был еси́.

Богоро́дичен: Киво́т свиде́ния Тя, Де́во, пи́шет,/ Хле́б и́стинно Жи́зни прие́мшую, Чи́стая,/ Сло́во, Отцу́ Соприсносу́щное.

Песнь 5

Ирмо́с: Возсия́вый Све́т,/ и просвети́вый у́тро,/ и показа́вый день,/ сла́ва Тебе́, сла́ва Тебе́,/ Иису́се, Сы́не Бо́жий.

Ны́не возви́жена ви́дит честна́я Це́рковь Со́лнца на Дре́ве,/ я́коже проре́кл еси́, Авваку́ме свяще́ннейше.

Впери́в ум, на стра́жи твое́й стал еси́, пребога́те,/ и усмотри́л еси́ Госпо́дне прише́ствие.

Велегла́сно, му́дре, о Бо́зе Спа́се возра́дуюся,– возопи́л еси́,–/ и возвеселю́ся, Авваку́ме всеблаже́нне.

Богоро́дичен: Отягче́н плени́цами мно́гих мои́х прегреше́ний, к Тебе́ прибега́ю,/ спаси́ мя, Влады́чице Богоро́дице,/ ве́рных похвало́.

Песнь 6

Ирмо́с: Возопи́, прообразу́я погребе́ние тридне́вное,/ проро́к Ио́на, в ки́те моля́ся:/ от тли изба́ви мя, Иису́се, Царю́ сил.

От ю́га Бог, вопло́щся, прии́де, я́ко проре́кл еси́,/ от Него́ све́тло просвеща́емь, Авваку́ме треблаже́нне,/ и мир све́том уясни́.

Озари́, Бо́же, ду́ши пою́щих Тя/ моли́твами Авваку́ма честна́го и Богому́драго,/ и́же вдохнове́нием Боже́ственным просвеще́й того́ помышле́ние.

Веща́ние Твое́ и глаго́л Боже́ственных си́ла, Богоглаго́ливе,/ про́йде вся концы́,/ Сло́ва Боже́ственное прише́ствие нам проро́чествуя.

Богоро́дичен: Су́щаго Отцу́ Сы́на Единосу́щна/ и безнача́льно ро́ждшему я́ве сразуме́ваемаго,/ в после́док плоть бы́вша,/ Де́во, родила́ еси́.

Конда́к глас 8.

Подо́бен: Взбра́нной:

Возгласи́вый вселе́нней от ю́га прише́ствие Бо́жие от Де́вы, Авваку́ме Богоглаго́ливе,/ и на Боже́ственней стра́жи предстоя́нием/ слы́шания от светоно́сна А́нгела/ Христо́во Воскресе́ние возвести́л еси́ ми́ру,/ сего́ ра́ди ве́село зове́м ти:/ ра́дуйся, проро́ков све́тлая добро́то.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Науча́емь, блаже́нне, па́че сло́ва зна́нию/ и проро́чествуя Многосве́тлую Свещу́, взыва́еши ны́не:/ оте́ц на́ших Бо́же, благослове́н еси́.

Сия́ния Трисве́тлаго и Невече́рния Сла́вы прича́стия тебе́ даде́ Христо́с,/ его́же просла́вил еси́, вопия́:/ оте́ц на́ших Бо́же, благослове́н еси́.

Богоро́дичен: В ро́дех родо́в Ма́ти Де́ва яви́лася еси́, Благослове́нная,/ па́че ума́ Сло́во ро́ждши воплоще́нное,/ те́мже, Чи́стая, воспева́ем Тя.

Песнь 8

Ирмо́с: Вся дела́ Бо́жия и вся тварь,/ благослови́те Го́спода,/ преподо́бнии и смире́ннии се́рдцем, по́йте Его́/ и превозноси́те во вся ве́ки.

Просвеще́н Све́том Трисо́лнечным,/ сподо́бился еси́, всеизря́дне, Боже́ственных и преесте́ственных виде́ний, зовы́й:/ превозноси́те Бо́га во ве́ки вся.

Пия́ от пото́ка сла́дости и невеще́ственнаго виде́ния исполня́емь,/ сла́вы же проро́ческия и председа́тельства причаща́яся,/ ра́дуяся, воспева́еши Бо́га во ве́ки.

О, Боже́ственныя и честны́я проро́ка Авваку́ма красоты́!/ сей бо, со А́нгельскими лику́я си́лами,/ ра́дуяся, Христа́ воспева́ет во ве́ки.

Богоро́дичен: Ма́ти яви́лася еси́ и́стинно пре́жде век из Отца́ Возсия́вшаго,/ еди́на бо святе́йши всех была́ еси́,/ Тя превозно́си́м, Чи́стую, во ве́ки.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.

Блиста́ет па́мять твоя́, проро́че,/ све́тлу испуща́ющи зарю́ твоего́ Богоглаго́лания/ и твоего́ та́иноуче́ния и проро́чества/ тя чту́щим, Авваку́ме блаже́ннейше.

Пропове́дав Го́спода Сла́вы и Сего́ проре́к прише́ствие,/ от Святы́я Де́вы проявле́нно бы́вшее, и пока́занное ви́дя,/ весели́ся, Авваку́ме Богоблаже́нне.

Ра́дуются вси проро́цы,/ в ра́достный твой день веселя́щеся, Богому́дре,/ ра́дости твоея́ причаща́ющеся и Боже́ственныя сла́вы,/ с ни́миже моля́ся, пою́щия тя спаса́й.

Богоро́дичен: Кроплением, Чи́стая, щедро́т Твои́х/ души́ моея́ омы́й скве́рну/ и то́ки слез источа́ти мне непреста́нно сотвори́, Отрокови́це,/ страсте́й мои́х пото́ки уставля́ющи.

Святой пророк Аввакум

Святой пророк Аввакум был восьмым из числа двенадцати малых пророков. Свое служение проходил в иудейском царстве; полное его молчание о израильском царстве дает основания догадке, что он пророчествовал уже по разрушении этого царства. Пророк говорит о нашествии халдеев, как о народе новом, которого иудеи еще не видели, но увидят его в своей земле даже современники пророка. Значит, святой Аввакум пророчествовал до 606 года, когда халдеи в первый раз явились в Иудею при Иоакиме, сыне Иосии. Из пророков, впервые назвавших халдеев врагами иудеев, нам известен Аввакум; вероятно, он-то и разумеется в числе пророков, предсказавших иудейскому царю Манассии «такое зло, о котором кто услышит, зазвенит в обоих ушах у того» (4Цар.21:12). Несчастье это – разрушение Иерусалима и погибель Иуды.

По возвращении из ассирийского (Вавилонского) плена нечестивый царь Манассия раскаялся и обратился к Богу, но зло, посеянное им в первую половину его царствования, глубоко укоренилось в народе. «Грабительство и насилие предо мною; и восстает вражда и поднимается раздор. От этого закон потерял силу, и суда правильного нет: так как нечестивый одолевает праведного» (Авв.1:3–4),– взывал пророк к Господу и спрашивал, доколе это будет продолжаться (Авв.1:2). Господь возвестил Своему избраннику, что за всеобщее нечестие скоро будет наказание через свирепых халдеев.

Но у него родилось новое недоумение – почему Бог попустил наказать евреев именно через халдеев, когда они виновнее евреев. Сам Бог выставил на вид их жестокость, наглую надменность и нечестивую гордость. Неужели Бог не может положить конец одному злу иначе, как посредством другого, еще большего зла? (Авв.1:12–17). В ответ пророк получает от Господа повеление записать нечто особенно важное, что непременно сбудется: «Вот, душа надменная не успокоится, а праведный своею верою жив будет» (Авв.2:1–4). Этот общий приговор относится к халдеям, и далее пророк пять раз произносит «горе» по поводу их гибели и перечисляет их преступления (Авв.2:5–20).

Глубоко потрясенный сообщенным ему от Бога откровением о грозном суде, пророк Аввакум обращается к Богу с теплой молитвой. Святой молит праведного Судию, чтобы Он в откровении Своего гнева сначала над иудеями, а потом над их врагами, показал над первыми Свое милосердие.

В заключение от лица общества верующих пророк выражает перед Богом те чувства, которые возбудило в них откровение Божие.

Цель пророчества Аввакума – установить правильный взгляд на пути Промысла Божьего, поддержать и утешить верующих.

Слова пророчества: «идый приидет и не умедлит» (Авв.2:3) святой апостол Павел относит к Иисусу Христу, Который не умедлит воздать всем верующим в Него (Евр. 10, 37). А изречение пророка: «праведник от веры жив будет» (Авв.2:4) святой апостол Павел берет текстом, на котором он основывает учение о благодатном оправдании верою, без дел закона (Гал.3:11; Евр.10:38). Значит, святой Аввакум пророчествовал, что в царстве Мессии для спасения требуется истинная, живая вера, а при ней Господь дарует оправдание и спасение. Замечательна общность выражения, не имеющая в виду прямо никого – ни еврея, ни халдея: кто бы ни был по происхождению,– имей правую веру, и будешь жив. Изречение это приложимо не только к отдельным личностям, но и к целым народам.

Язык книги отличается краткостью, точностью, живостью образов, возвышенной простотой, так что книга с литературной точки зрения принадлежит к числу замечательных Библейских Писаний.

Мощи святого пророка Аввакума, как свидетельствует церковный историк V века Созомен, по Божественному откровению, данному в сонном видении Зевенну, епископу Елевферопольскому, были обретены в царствование императора Феодосия II Младшего (408–450) близ Елевферополя. Вскоре, подобным образом были обретены мощи святого пророка Михея (VIII в. до Рождества Христова, память 5 января и 14 августа).

Преподо́бнаго Афана́сия затво́рника, в Бли́жних пеще́рах почива́ющаго

ВЕ́ЧЕР

На Го́споди, воззва́х: стихи́ры на 6, глас 4.

Подо́бен: Я́ко до́бля:

Умертви́ти хотя́ плоть свою́,/ в те́сный затво́р, аки во гроб, вшел еси́, о́тче,/ и погре́бл еси́ тую непосла́бне по́стническими дея́нии,/ но пре́жде о́бщаго воскресе́ния изве́стное воста́ние ме́ртвых показу́я,/ по двою́ дню воскре́сл еси́./ И ны́не, в безсме́ртии живы́й,/ моли́ся и нам ве́чныя избежа́ти сме́рти/ и улучи́ти у Христа́ Бо́га ве́лию ми́лость.

Ве́руяй в Мя,– я́коже рече́ Писа́ние,–/ а́ще и у́мрет, жив бу́дет во ве́ки,–/ на тебе́ сло́во де́лом испо́лнися, Афана́сие преподо́бне:/ у́мерл бо еси́ ми́ру и пло́ти,/ но ве́ра, споспешеству́ема благи́ми де́лы,/ воздви́же тя на живо́т лу́чший,/ и был еси́ во удивле́ние всем у́жа́сно,/ па́че же в поле́зное исправле́ние,/ е́же и нам пода́ждь моли́твами твои́ми, мо́лимтися,/ па́мять твою́ соверша́юще.

Сказа́вый пути́ ве́чныя жи́зни,/ не дал еси́ ви́дети преподо́бному Твоему́ истле́ния,/ по двою́ дню того́ воздви́гнувы́й,/ я́коже Ла́заря четверодне́внаго,/ разруши́в узы сме́ртныя Боже́ственнаго гла́са воззва́нием./ Сим и нас воззови́, Христе́ Царю́,/ и от ме́ртвых дел воскреси́,/ мо́лимтися, Жизнода́вче и Спа́се душ на́ших.

Сла́ва, глас 3:

По воста́нии Твое́м, Христе́ Спа́се,/ сме́рти вереи́ сотро́шася,/ и ве́рнии лю́дие то́ю не суть облада́еми,/ я́коже показа́ нам чу́дный в преподо́бных Афана́сий,/ уверя́я свои́м воста́нием/ и поле́зное подая́ треми́ де́тели и́ночествующим исправле́ние./ Сие́ и в на́ших сердцах утверди́, Спа́се, мо́лимтися,/ ле́тнюю па́мять преподо́бнаго Твоего́ почита́юще.

И ны́не, Богоро́дичен или Крестобогоро́дичен.

На стихо́вне во Окто́ихе.

Сла́ва, глас 2:

Сле́зными ту́чами, преподо́бне,/ облада́ющую во удесе́х смерть потопи́л еси́,/ Тридне́вновавшему же во гро́бе Животу́ всех уподо́бився,/ от ме́ртвых по двою́ дню воскре́с,/ тесне́йшую стезю́ к ве́чной жи́зни избра́л еси́,/ е́юже дости́г в безсме́ртную страну́,/ отту́ду да при́зриши на ны незакосне́нно,/ умерщвля́ющия ны стра́сти да прожене́ши/ и прича́стники безсме́ртию твоему́ нас сотвори́ши,/ во дне́шний день па́мять твою́ соверша́ющих,/ о́тче Афана́сие преблаже́нне.

И ны́не, Богоро́дичен или Крестобогоро́дичен.

Тропа́рь, глас 3:

Блаже́нство пла́чущих получи́ти жела́я,/ день и нощь непреста́нно пла́кал еси́,/ име́я во уме́ час Су́дный,/ тем по кончи́не твое́й обре́л еси́ утеше́ние на Небеси́,/ преподо́бне Афана́сие./ Пода́ждь и нам пла́катися зде грехо́в на́ших вы́ну,/ я́ко да пла́ча безконе́чнаго избы́вше,/ та́мо прии́мем ве́чное утеше́ние.

Кано́н, глас 1.

Песнь 1

Ирмо́с: Песнь побе́дную пои́м вси Бо́гу,/ сотво́ршему ди́вная чудеса́ мы́шцею высо́кою/ и спа́сшему Изра́иля,/ я́ко просла́вися.

Бре́нными усты́ пе́ти сугу́бое твое́ успе́ние хотя́ща мя ны́не, о́тче, не пре́зри,/ но уще́дри, молю́тися, зовы́й ны́не в день торжества́ твоего́,/ в о́ньже па́мять твоя́ просла́вися.

Сме́ртною секи́рою посека́емь,/ в ми́ре сем живо́т челове́ческий разуме́в, преподо́бне,/ да сокруши́ши ту собо́ю, к тве́рдому Ка́мени прите́кл еси́/ и, притупи́в доброде́тельми сме́ртныя прило́ги,/ пое́ши Бо́гу, я́ко просла́вися.

У́мер пе́рвее ми́ру отверже́нием того́ многостра́стных ловле́ний,/ стопы́ ше́ствий твои́х упра́вил еси́, свя́те, к Животу́ непозы́блемому:/ те́мже ны́не, сын Живота́ су́щи, при́зри на ны,/ пою́щия в па́мяти твоей Бо́гу, я́ко просла́вися.

Богоро́дичен: Умерщвле́нную мою́ ду́шу самохо́тными страстьми́/ оживотвори́ти потщи́ся, Чи́стая Де́во:/ Ты бо еси́ Ма́ти Живота́ и подае́ши уме́ршим воста́ние.

Песнь 3

Ирмо́с: Ка́мень, его́же небрего́ша зи́ждущии,/ сей бысть во главу́ у́гла:/ той есть Ка́мень,/ на не́мже утверди́ Це́рковь Христо́с,/ Ю́же от язы́к искупи́.

Связа́лся еси́, преблаже́нне, Богоуго́днаго жити́я ве́рвию,/ смерть у́бо плени́ся, не иму́щи на тебе́ вла́сти:/ а́ще бо и похи́ти тя, но па́ки возврати́ти повеле́л есть мно́гим в по́льзу/ и́же сме́ртию Свое́ю всех от сме́рти искупи́.

Мертв свя́зан лежал еси́, о́тче, ма́нтии укро́ем на одре́,/ и Вы́шняго Про́мысл чудотвори́ти тща́шеся тобо́ю:/ по двою́ бо дню возврата́ ду́шу твою́,/ и жив обре́лся еси́ во удивле́ние всем зря́щим,/ и́же ви́дяху твое́ успе́ние.

Боле́знь твоя́ не бя́ше, преподо́бне, к сме́рти, но к сла́ве Бо́жией:/ у́мерл бо, смерть, а́ки сон, прия́л еси́ во отра́ду боле́зни твоея́,/ и по двою́ дню, а́ки от сна, воспря́нув,/ лице́ твое́ умыва́л еси́ струя́ми сле́зными.

Богоро́дичен: Боле́знь сме́ртную пресе́кшая Святы́м Рождество́м Твои́м/ и Живо́т да́вшая всему́ ми́ру,/ аз еди́н оста́х, умерщвле́н скве́рными де́лы,/ Ма́ти Бо́жия, возложи́ на мя ру́ку, и живо́т лу́чший обря́щу.

Седа́лен, глас 8:

На безсме́ртие взира́я, да сме́рти ве́чныя избе́гнеши,/ живо́т те́сный избра́л еси́, Афана́сие преблаже́нне,/ во умерщвле́нном ти телеси́./ Сего́ ра́ди, удивля́ющеся ди́вному на тебе́ смотре́нию,/ сла́вим Еди́наго Челове́колюбца, И́же даде́ всем живо́т и нетле́ние.

Сла́ва, и ны́не, Богоро́дичен:

Сме́ртной повину́вшихся рабо́те свободи́ла еси́ Рождество́м Твои́м, Богоневе́сто Де́во,/ тем Тя пе́сньми сла́вят христиа́нстии ро́ди,/ я́ко дала́ еси́ им живо́т и нетле́ние.

Песнь 4

Ирмо́с: Взя́тся со́лнце, и луна́ ста в чи́не свое́м,/ возне́слся еси́, Долготерпели́ве, на Дре́во/ и водрузи́л еси́ на нем Це́рковь Твою́.

Лежа́ безду́шен, воздви́глся еси́/ и, дыха́ние прие́мь, па́ки на бы́тие́ прише́л еси́, о́тче,/ е́же ви́девше, предстоя́щий со стра́хом славосло́виша Бо́жию си́лу.

Коль стра́шен час сме́рти и Суда́, ви́дев, блаже́нне,/ го́рце рыда́я, молча́нием и воздыха́нием изъяви́л еси́,/ и бы́ша сле́зы твоя́ мно́гим написа́ние Суда́ Стра́шнаго.

При́сно исхо́д свой помина́я, свя́те,/ пла́кал еси́ в жи́зни сей боле́зненной,/ и бо́льшая прибыва́ху ти рыда́ния, чу́вственне ви́девшу,/ ка́ков отходя́щии и́мут страх и тре́пет,/ его́же да убежи́м и мы,/ моли́ся, о́тче преподо́бне.

Богоро́дичен: Суда́ Стра́шнаго не бою́ся,/ ни страшу́ся го́рькия гее́нны,/ я́ко от мно́гих страсте́й окамене́ мое́ се́рдце./ Се́чивом бла́гоутро́бия Твоего́, Чи́стая Де́во Ма́ти, порази́ е,/ да очувстви́тся па́мятию мук стра́шных.

Песнь 5

Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое́ и́мену́ем,/ я́ко Бог живы́х и ме́ртвых еси́.

Твой плач и неуте́шное рыда́ние предстоя́щии ви́девше,/ ужа́сни прося́ху, да ска́жеши им сло́во на по́льзу./ Ты же три поле́зная сказа́л еси́ им:/ да храня́т послуша́ние, покая́ние и моли́тву,/ я́ко бо́льшия доброде́телей ине́х,/ в ни́хже и мы да утверди́мся, моли́ся, о́тче Афана́сие.

Сам послушли́в сый за́поведем Христо́вым,/ послуша́ние вы́ше всех доброде́телей бы́ти бра́тии сказа́л еси́, преподо́бне,/ то бо и по сме́рти не умира́ет, но снабдева́ет живо́т с Бо́гом,/ и́же есть стра́шен Судия́ живы́м и ме́ртвым.

Покая́ние и моли́тва – две криле́ о́гненне,/ и си́ми прехо́д неудержи́мь от мыта́рств возду́шных извести́л еси́, блаже́нне,/ молча́ния яви́л еси́ пути́, и́ми́же поте́кл еси́ на бо́льшая,/ наказа́ние оста́вль вопроси́вшим./ И нам даждь исправле́ние, день весе́лия твоего́ соверша́ющим.

Богоро́дичен: Моли́твеннице ско́рая о христиа́нстем ро́де, Мари́е Де́во,/ моли́твы певе́ц Твои́х прие́мши в Пречи́стыя дла́ни,/ принеси́ к Твоему́ Сы́ну и испроси́ нам грехо́в проще́ние/ и тишину́ даждь су́щим в страсте́х.

Песнь 6

Ирмо́с: Отве́ргл мя еси́ во глуби́ны се́рдца морска́го,/ и спасл еси́ мя, Спа́се, от рабо́ты сме́ртныя,/ и разреши́л еси́ узы беззако́ний мои́х.

Отве́ргся коне́чнее живота́ и чу́вственнаго све́та ви́дети,/ в те́мен затво́р вшел еси́, пременя́я чу́вственное на мы́сленнаго Све́та зре́ние,/ его́же и мы да улучи́м моли́твами твои́ми, о́тче,/ отве́ргшеся беззако́ний на́ших.

Умерщвле́нную плоть по́стническими труды́ да оживи́ши, свя́те,/ струя́ми слез твои́х напая́л еси́ вы́ну,/ двана́десят лет пребы́в в пеще́ре, жив погребе́н,/ наде́ждою живота́ безсме́ртнаго оживля́емь.

Дре́во жи́зненное плоть твоя́, Афана́сие преподо́бне, израсти́ покая́ния всем плоды́,/ от ни́хже вкуси́ти даждь и мне любо́вию твое́ю,/ да укреплю́ся разреши́ти у́зы беззако́ний мои́х.

Богоро́дичен: Дре́во присноцвету́щее Ты еси́, Пречи́стая Де́во,/ пали́мых зно́ем беззако́ний покрыва́ющее се́нию Твое́ю./ Се́ю и нас покры́й, страстьми́ жего́мых, и воспое́м:/ ра́дуйся, Дре́во благосенноли́ственное, и́мже покрыва́ются мно́зи.

Конда́к, глас 5:

Яко безсме́ртия тезоимени́т, по уме́ртвии свое́м воста́л еси́ жив;/ показу́я же, я́ко зело́ лю́та есть смерть, пла́кался еси́ го́рько./ Ны́не, обре́тши неконча́емую ра́дость,/ моли́ся о нас, я́ко да пла́ча ве́чнаго избу́дем.

Песнь 7

Ирмо́с: Су́щим в пещи́ отроко́м Твои́м, Спа́се,/ не прикосну́ся, ниже́ стужи́, огнь./ Тогда́ трие́, я́ко еди́неми усты́, поя́ху/ и благословля́ху, глаго́люще:/ благослове́н Бог оте́ц на́ших.

Жизнь твою́ в пла́че и воздыха́нии проводи́в/ и струя́ми слез твои́х убели́в а́нгельскаго о́браза ри́зу,/ отше́л еси́ в безплаче́вныя страны́, радующися и пою́щи:/ благослове́н Бог оте́ц на́ших.

Чи́ни А́нгельстии в день успе́ния твоего́ приспе́ша/ и, дух твой ми́рно прие́мше, проводи́ша в ра́йския оби́тели,/ иде́же живы́й, помяни́ нас, о́тче преподо́бне, пою́щих:/ благослове́н Бог оте́ц на́ших.

Мертве́ц два́жды в жи́зни сей был еси́, свя́те,/ и пе́рвее у́бо возвраща́ющася вси ви́деша тя па́ки в плотски́х соста́вах,/ от ни́хже втори́цею разре́шся, ны́не живе́ши со А́нгельскими чи́нми,/ иде́же и нас не забу́ди, пою́щих:/ благослове́н Бог оте́ц на́ших.

Богоро́дичен: Уме́ршаго мя злы́ми дея́нии оживотвори́те потщи́ся, Влады́чице:/ на Тя бо упова́ние возложи́х несумне́нно,/ я́ко ро́ждшую Безсме́ртнаго Царя́ и ми́ру всему́ Живода́вца.

Песнь 8

Ирмо́с: Небеса́ небе́с и вода́, я́же превы́ше небе́с,/ благослови́те, по́йте Го́спода/ и превозноси́те Его́ во ве́ки.

Небеса́ ра́дуются, прие́мше дух твой в не́дра своя́,/ и мы весели́мся, кла́няющеся моще́м твои́м, преподо́бне,/ от ни́хже пода́ждь тре́бующим благода́ть/ и сподо́би пе́ти Го́спода во ве́ки.

А́нгели торжеству́ют, сожи́теля тя иму́ще,/ весели́тся и гора́ Пече́рская, содержа́щи ра́ку моще́й твои́х, а́ки би́сер многосве́тлый,/ сим просвети́ нас, мра́ком страсте́й одержи́мых,/ и даждь пе́ти Го́спода во ве́ки.

Благоугоди́л еси́, о́тче, в жи́зни сей Влады́це своему́/ и прия́л еси́ дар неду́ги исцеля́ти./ Нас, страстьми́ одержи́мых, посети́, я́коже ля́двиями боля́ща Вави́лу,/ и сподо́би Го́спода пе́ти во ве́ки.

Богоро́дичен: В печа́ли и тузе́ есмь, скве́рное мое́ житие́ помышля́я, и не и́мам наде́жды./ К Тебе́ Еди́ной прибега́ю, ра́дости всеми́рной, Чи́стая Де́во,/ и молю́, да ра́дость возсия́ет души́ мое́й во ве́ки.

Песнь 9

Ирмо́с: Сотвори́ держа́ву мы́шцею Свое́ю,/ низложи́ бо си́льныя со престо́л/ и вознесе́ смире́нныя Бог Израи́лев,/ в ни́хже посети́ нас Восто́к с высоты́/ и напра́вил ны есть на путь ми́ра.

Сотвори́ любо́вь моля́щимся тебе́, о́тче,/ и моли́твою твое́ю даждь цельбу́ стра́ждущим неду́ги душе́вными,/ па́че же ра́туемых вра́жиими наве́ты напра́ви на путь ми́рен.

Пое́т Вели́кая Ла́вра труды́ и по́двиги твоя́, преподо́бне,/ сла́вит вы́ну пеще́ра, храня́щая чудотво́рныя мо́щи твоя́,/ и́мже и мы покланя́ющеся, мо́лим тя:/ напра́ви стопы́ на́ша на путь ми́рен.

Воста́ни ско́ро и прииди́, аз исцелю́ тя,– рцы, Афана́сие преблаже́нне,/ се бо от мно́гия боле́зни душе́вныя вопию́ ти, не имы́й отра́ды,/ па́че же молю́:/ наста́ви мя на спасе́ния путь ми́рен.

Сла́влю Тя, Тро́ице Пресвята́я, О́тче Безнача́льне с Сыно́м Безле́тным,/ и пою́ Ду́ха Твоего́ Свята́го,/ Его́же даждь се́рдцу моему́ хода́тайтвом уго́дника Твоего́,/ да обря́щу путь ми́рен.

Богоро́дичен: А́ще кто не сла́вит чи́стаго зача́тия/ и не пое́т несказа́ннаго Рождества́ Твоего́, Марие́ Богоневе́сто,/ да отпаде́т ве́чныя Сла́вы/ и не бу́дет соо́бщник Све́та и сын присносу́щнаго мира.

Свети́лен:

В преподо́бных ди́внаго Афана́сия пе́сньми, лю́дие, восхва́лим:/ той бо жив у́мре, и по двою́ дню воскре́се, и па́ки преста́вися,/ живе́т, не ктому́ сме́ртию облада́емь,/ но присносу́щную нача́ жизнь,/ я́ко сын су́щи Живота́ и Воскресе́ния пра́ведных насле́дник.

Сла́ва, и ны́не, Богоро́дичен:

Ди́вны Твоя́ та́йны, Чи́стая, кто испове́сть/ или́ кто возвести́т на Тебе́ сбытие́ неизрече́нных?/ Родила́ бо еси́ в ле́то Сы́на, пре́жде век от Отца́ рожде́нна,/ Живота́ и Воскресе́ния Пе́рвенца,/ моли́ у́бо Его́, да и аз Воскресе́ния бу́ду и Живота́ насле́дник.

На хвали́тех стихи́ры, глас 2.

Подо́бен: Егда́ от Дре́ва:

Прииди́те, лю́дие, воспое́м/ на Небеси́ от А́нгел пое́маго ди́внаго Афана́сия,/ по́стников красоту́ и преподо́бных сия́ние,/ и́хже житию́ поревнова́в,/ те́сный путь неле́ностно про́йде,/ вся́кия стра́сти увяди́в воздержа́нием,/ неудержи́мое жела́ние име́я к Бо́гу,/ Ему́же предстои́т ны́не со А́нгелы/ и мо́лится о душа́х на́ших.

Прииди́те, бра́тие и празднолю́бных собо́ри,/ вся́кое сосло́вие Богоно́сных усте́н,/ принесе́м венцы́ песносло́вных цвето́в,/ ко гро́бу ше́ствуим преблаже́ннаго отца́/ и припаде́м, глаго́люще:/ преподо́бне преблаже́нне, А́нгелом сожи́телю,/ не забу́ди, хода́тайствуя ко Влады́це всех Бо́гу,/ да улучи́м ве́чный живо́т и ми́лость в День Су́дный.

Прииди́те, и́ночествующих ли́ки,/ к ра́це многочуде́сных моще́й преподо́бнаго Афана́сия/ и почти́м Богоглаго́ливая уста́,/ наказу́ющая нас послуша́нию,/ всегда́шнему́ же покая́нию и моли́тве,/ и, си́ми доброде́тельми, а́ки о́гненными криле́,/ к Бо́гу восходя́ще,/ обря́щем благода́ть и ве́лию ми́лость.

Сла́ва, глас 8:

Преподо́бне, преблаже́нне, свя́те во святы́х Афана́сие,/ твое наказа́ние мно́гим бысть исправле́ние/ и от паде́ния возставле́ние па́мятию бу́дущаго Суда́,/ его́же и сам ожида́я по твоем воскресе́нии,/ неутоли́мыя сле́зы от о́чию изводи́л еси́./ Со весе́лием ны́не Христу́ предстоя́,/ моли́ся пою́щим че́стное твое преставле́ние прия́ти грехо́в оставле́ние/ и ве́лию ми́лость в День Су́дный.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ну́жды и печа́ли.

Преподобный Афанасий, затворник Печерский

Преподобный Афанасий, затворник Печерский (XII в.), был простым и смиренным иноком, проводил Богоугодную жизнь, за что исполнились на нем слова Спасителя: «Аз есмь Воскрешение и Живот, веруяй в Мя, аще и умрет, оживет» (Ин.11:25).

По сообщению автора Жития, преподобного Симона, епископа Владимирского, после продолжительной тяжелой болезни преподобный Афанасий скончался и был положен во гроб. На третий день, когда игумен с братией пришли совершать погребение, он внезапно ожил. На все вопросы инок с плачем отвечал: «Спасайтесь послушанием, слезным покаянием, молитвой». После этого преподобный Афанасий прожил 12 лет в строгом затворе, питаясь только хлебом и водой, не видя солнечного света. Перед кончиной, собрав братию, он повторил ранее сказанные слова и мирно отошел ко Господу (ок. 1176). Погребен был в Ближних пещерах преподобного Антония. У мощей преподобного Афанасия получил исцеление инок Вавила, много лет страдавший болезнью ног. «Однажды лежал я,– рассказывал он братии,– и кричал от сильной боли. Внезапно вошел ко мне блаженный Афанасий и сказал: приди ко мне, и я исцелю́ тебя. И стал невидим. Я попросил, чтобы принесли меня к его мощам. И вот, я исцелился». Предстательством его молящимся с верою у святых мощей преподобного Афанасия подается Господом истинное покаяние.

Память преподобного Афанасия совершается также 28 сентября и во вторую Неделю Великого поста.

Свята́го блаже́ннаго младаго царя́ и му́ченика У́роша

НА МАЛОЙ ВЕЧЕ́РНИ

Стихи́ры , глас 1.

Подо́бен: Небе́сных чино́в:

Зако́нно венча́н был еси́, му́чениче,/ стражда́ сего́ све́та лише́ние,/ У́роше всече́стне и преблаже́нне,/ не оскуде́й, моля́ся о нас ко Го́споду,/ и сро́дство твое́ назира́й,/ творя́щее святу́ю па́мять твою́.

От ли́ка избра́н был, му́чениче,/ ра́дость подава́еши нам днесь виде́нием честны́х моще́й твои́х,/ и, веселя́щеся, торжеству́ем:/ страстоте́рпче, моли́ся о нас,/ творя́щих святу́ю твою́ па́мять.

Ми́рныя во́ни и бла́гоухания пролива́еши,/ вселе́нная же, дар восприе́мши мощми́ твои́ми,/ У́роше всече́стне и превожделе́нне,/ возлете́ к любви́ Христо́вой, прехва́льне,/ и ны́не моли́ся о нас, творя́щих па́мять твою́.

Основа́ние Боже́ственное,/ истка́но от Вы́шния прему́дрости,/ тве́рдости твоего́ ума́ не поколеба́,/ ни убие́ния уби́йственнаго убоя́ся,/ еди́ну ве́ру к Бо́гу име́я,/ и тому́ предстои́ши во сла́ве.

Сла́ва, глас 5:

Днесь весна́ бла́гоухает/ явле́нием моще́й твои́х,/ и но́ва тварь лику́ет/ и ра́дуется, зря́щи днесь чу́до пресла́вное,/ ли́цы, пою́ще, удивля́хуся,/ весе́лие неизрече́нное показу́юще, У́роше всече́стне и превожделе́нне./ Си́ле Твое́й сла́ва, Человеколю́бче.

И ны́не, Богоро́дичен:

Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т/ и очище́ние мно́гих прегреше́ний, мо́лимся.

На стихо́вне стихи́ры, глас 2.

Подо́бен: До́ме Евфра́фов:

Хвала́ми венча́им/ му́ченика У́роша,/ его́же венча́ Бо́жия благода́ть,/ Боже́ственными моли́твами/ низложи́ враги́ на́ша.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

На столпе́х му́ченических водворя́ешися,/ я́ко добр во́ин,/ обре́тся на земли́,/ и возлете́л еси́/ к Вы́шнему Престо́лу.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

До́ма земна́го/ лиши́лся еси́,/ дом Небе́сный насле́довал еси́,/ му́чениче блаже́нне,/ У́роше сла́вне.

Сла́ва, глас и подо́бен то́йже:

Му́чениче У́роше/ многострада́льне,/ моли́твами твои́х прароди́телей/ ум наш озари́/ воспе́ти сла́ву твою́.

И ны́не, Богоро́дичен:

Две́ри Небе́снии, возми́теся,/ зря́ще дверь Вы́шняго,/ све́тлыми заря́ми озаря́ющи Влады́чицу.

Тропа́рь свята́го писан на вели́цей вечерни.

Сла́ва, и ны́не, Богоро́дичен.

НА ВЕЛИ́ЦЕЙ ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры на 8, глас 4.

Подо́бен: Зва́нный свы́ше:

Све́тлая днесь па́мять наста́,/ Се́рбское украше́ние,/ объявле́нием честны́х моще́й твои́х/ на просвеще́ние и похвалу́ сро́дства твоего́,/ У́роше всеблаже́нне,/ да́ры доброде́тельными обогати́лся еси́,/ моли́ся о нас ко Го́споду, творя́щих па́мять твою́.

Струю́ исцеле́ний источа́еши приходя́щим с ве́рою/ и подае́ши дарова́ния прося́щим у тебе́/ хода́тайством прароди́телей твои́х./ Не оскуде́й, моля́ся ко Го́споду/ о творя́щих святу́ю па́мять твою́.

А́ще и за́вистию убие́н был еси́ от твои́х при́сных,/ но при́сно в раи́ водворя́ешися с прароди́тели твои́ми./ А́ще и непра́ведную смерть подъя́л еси́,/ но ликовству́еши со святы́ми,/ уби́йцы же твои́ вско́ре погибо́ша.

Еще́ не во вре́мя созре́в,/ в Госпо́дню жи́тницу всели́лся еси́,/ скорбь ве́лию оста́вив сро́дству твоему́,/ неве́дущу о сме́рти твое́й;/ на лови́тву исхо́диши/ и та́мо убййственну я́зву подъя́л еси́,/ многострада́льне У́роше.

Сла́ва, глас 3:

Во све́тлости святы́х доброде́телей просия́л еси́,/ светле́яся, я́ко со́лнце,/ и осиява́я всех пра́ведным сия́нием./ Днесь ра́дуются вся оте́чествия язы́к Се́рбскаго сро́дства/ моще́й твои́х явле́нием:/ всю́ду испо́лнил еси́ бла́гоуха́ния/ и просвети́л еси́ твое́ оте́чество вся́кими добро́тами,/ манове́нием Бо́жия Ду́ха/ вся восприе́м, многострада́льне У́роше./ Моли́ся о нас, чту́щих святу́ю па́мять твою́.

И ны́не, Богоро́дичен: Ка́ко не диви́мся:

Вход, проки́мен дне и чтения три му́ченическая

Проро́чества Иса́иина чте́ние (глава́́ 43):

Та́ко глаго́лет Госпо́дь:/ вси язы́цы собра́шася вку́пе,/ и соберу́тся кня́зи от них./ Кто возвести́т сия́ в них?/ или́ я́же от нача́ла, кто слы́шана сотвори́т вам?/ да приведу́т свиде́тели своя́, и оправдя́тся,/ и да услы́шат, и да реку́т и́стину./ Бу́дите Ми свиде́тели,/ и Аз Свиде́тель, глаго́лет Госпо́дь Бог,/ и О́трок, Его́же избра́х./ Да позна́ете и ве́руете Ми, и разуме́ете, я́ко Аз есмь:/ пре́жде Мене́ не бысть ин бог, и по Мне́ не бу́дет,/ Аз есмь Бог и несть ра́зве Мене́ спаса́яй./ Аз возвести́х и спасо́х,/ уничижи́х и не бе в вас чужди́й./ Вы Мне свиде́тели и Аз Госпо́дь Бог,/ и еще́ от нача́ла Аз е́смь:/ и несть от рук Мои́х избавля́яй./ Сотворю́, и кто отврати́т то?/ си́це глаго́лет Госпо́дь Бог,/ избавля́яй вас Святы́й Изра́илев.

Прему́дрости Соломо́новы чте́ние (глава́́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти/ и вмени́ся озлобле́ние исхо́д их./ И е́же от нас ше́ствие сокруше́ние,/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я,/ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и я́ко и́скры по сте́блию потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (глава́́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́, не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть:/ и живы́й посреде́ гре́шников, преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́:/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ положи́вше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На литии стихи́ра храма и свята́го, глас 1:

Ве́село днесь Це́рковь Бо́жия одева́ется/ явле́нием моще́й твои́х,/ Се́рбская земля́ красу́ется в Боже́ственней па́мяти твое́й,/ уби́йцы же твои́, студа́ испо́лнени, посрами́шася,/ ты же в пи́щи ра́йстей водворя́ешися,/ У́роше всеблаже́нне.

Прароди́телие твои́ мольбу́ творя́т ко Го́споду/ напосле́док обнови́ти сро́дство свое́/ в похвалу́ и просвеще́ние и на обличе́ние уби́йцам твои́м,/ тебе́ же на сла́ву и похвалу́, У́роше преблаже́нне,/ моли́ся спасти́ся душа́м на́шим.

Стезе́ю те́сною ше́ствовав,/ рая́ широту́ дости́гл еси́/ и сро́дство твое́ просвети́л еси́,/ чуде́сными де́лы осия́н,/ всю подсо́лнечную обогати́л еси́,/ дар исцеле́ния прие́м, У́роше достоблаже́нне.

А́ще и безвре́мену смерть подъя́л еси́,/ за́вистию ратоборца́ убива́ем непови́нно./ О, непра́веднаго уби́йства!/ но они́ у́бо суть во тьме и мра́це,/ ты же с прароди́тели во Ца́рствии водворя́ешися, достоблаже́нне.

Ны́не днесь свети́ло вели́кое яви́ся Се́рбскому ро́ду:/ Це́рковь бо, коне́чне запусте́вшая,/ па́ки Бо́жиим манове́нием обновля́ется/ на похвалу́ твою́, преблаже́нне У́роше./ Моли́ся о нас, творя́щих святу́ю па́мять твою́.

Сла́ва, глас 5:

Красу́йся и лику́й ве́село, Це́ркви Бо́жия,/ в дар бо тебе́ царь У́рош прино́сится/ объявле́нием честны́х моще́й свои́х./ Лик а́нгельский весели́тся./ С ни́миже моли́ся непреста́нно Христу́ за ны/ изба́вити от бед творя́щия прече́стное и светоно́сное твое́ и́мя,/ мно́гострада́льне У́роше преблаже́нне.

И ны́не, Богоро́дичен:

Ра́дуйся, Ма́ти Христа́ Бо́га,/ и, Его́же родила́ еси́, моли́/ согреше́ний оставле́ние дарова́ти/ ве́рою воспева́ющим Тя.

На стихо́вне стихи́ры, глас 2.

Подо́бен: Егда́ от Дре́ва:

С преми́рными чи́нми ны́не водворя́яся,/ с Небесе́ прие́м Богоразу́мие,/ моле́бныя гла́сы тебе́ возсыла́ем:/ подви́гни сро́дство твое́/ и за ны моли́ся при́сно ко Го́споду/ сохрани́ти нас, У́роше достоблаже́нне.

Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.

Богора́зу́мия све́тлостию сия́я,/ ми́ра красоту́ презре́л еси́,/ Авраа́ма в ло́не почива́еши./ Не пре́зри нас, моля́щихся тебе́, многострада́льне/ и приснопа́мятне У́роше всече́стне.

Стих: Насажде́ни в дому́ Госпо́дни,/ во дво́рех Бо́га на́шего процвету́т.

И́стинным венце́м, венча́вшим тя,/ и ца́рскою диади́мою одева́яся,/ вене́ц добро́ты прия́л еси́, досточу́дне,/ не презри́, блаже́нне, певцы́ твоя́, почита́ющия тя,/ предстоя́ со А́нгелы во сла́ве.

Сла́ва, глас 6:

Ма́тернее очи́ма зря чуде́сне,/ А́нгелом соприча́стник был еси́;/ просвеща́еши вся, приходя́щия с ве́рою к ра́це твое́й честне́й,/ и ревну́еши прароди́телем твои́м;/ изря́ден в све́рстницех яви́вся,/ доброде́телию и ра́зумо́м всех удиви́л еси́,/ многострада́льне У́роше превожделе́нне,/ моли́ся спасти́ся душа́м на́шим.

И ны́не, Богоро́дичен:

Ма́тернее дерзнове́ние/ е́же к Сы́ну Твоему́ иму́щи, Пречи́стая,/ к рожде́нию по́мощи/ на́ша мольбы́ не пре́зри, мо́лим Тя,/ я́ко Тебе́ еди́ну ко Влады́це очище́ние и́мамы.

Тропа́рь, глас 3:

Юношески процве́л еси́/ во оте́чествии твое́м, добро́тою украше́н,/ и непра́ведную и безвре́менную смерть подъя́л еси́,/ У́роше всече́стне;/ ца́рскаго ко́рене плод сла́док,/ а́ще и не во вре́мя созре́в,/ в Госпо́дню жи́тницу всели́лся еси́/ и жа́лость ве́лию сро́дству твоему́ оста́вил еси́./ Моли́ся о нас, творя́щих святу́ю па́мять твою́.

Таже Богоро́дице Дево:

НА У́ТРЕНИ

По 1-м стихосло́вии седа́лен, глас 5.

Подо́бен: Собезнача́льное Сло́во:

Мы́сленныма очи́ма прозре́в бу́дущая,/ сове́том ма́терним пожи́л еси́/ и це́ркви воздви́гл еси́ в похвалу́ прароди́телей твои́х/ и в сла́ву Пречи́стыя Бо́гома́тере,/ Ея́же моли́твами, Христе́, поми́луй нас.

Сла́ва, и ны́не, Богоро́дичен:

Ту́чами Ду́ха Свята́го, Пречи́стая, мою́ мысль ороси́,/ я́же Ка́плю ро́ждши безме́рную – Христа́;/ изсуши́ исто́чник страсте́й мои́х/ и пото́ка пи́щи мя напо́й моли́твою Твое́ю.

По 2-м стихосло́вии седа́лен, глас 3.

Подо́бен: Красоте́ де́вства:

Красе́н быв во виде́нии в животе́ твое́м,/ красне́йший же показа́лся еси́ по сме́рти твое́й объявле́нием честны́х моще́й твои́х/ и всех зря́щих удиви́л еси́, многострада́льне У́роше всеблаже́нне.

Сла́ва, и ны́не, Богоро́дичен:

Под земле́ю низве́ржен бых грехми́,/ умертви́хся душе́вными страстьми́ и теле́сными,/ те́мже тьмо́ю покрыва́юся отча́яния./ Но воздви́гни мя ны́не к покая́нию и спаси́ мя:/ мо́жеши бо, ели́ка хо́щеши.

По полиеле́и седа́лен, глас 8.

Подо́бен: Прему́дрости:

Егда́ тя сего́ све́та лише́нию преда́ша,/ отнесе́ну бы́вшу те́лу твоему́ во храм Успе́ния Пречи́стыя,/ испря́товают та́йно в гробни́це внутрь,/ иде́же Боже́ственная соверша́ются,/ и никому́ о сем ве́домо бысть, то́чию оби́тели предста́телю,/ до́ндеже Бо́гу, объявле́нна тя сотво́ршу./ Уби́йцы же твои́, студа́ испо́лнени, вско́ре сконча́шася./ Ты же в ра́йстей пи́щи водворя́ешися, многострада́льне У́роше и всеблаже́нне,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Я́ко во глубину мно́гих согреше́ний впадо́х/ от ле́ности моея́, и уны́ния, окая́нный, и неве́дения/ и отча́янием ны́не одержи́м есмь./ Бу́ди ми по́мощь, и очище́ние, и спасе́ние, Пречи́стая,/ и утеше́ние благопреме́нно подаю́щи ми,/ Тя молю́, и Тебе́ мился де́ю, и припа́даю, и ве́рою зову́ Ти,/ да не явлю́ся до конца́ льсти́вому обра́дование.

Степенна, 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Луки́, зачало 106.

По 50-м псалме́ стихи́ра, глас 6:

У́рош ди́вный,/ Боже́ственныя тишины жела́я,/ за́вистию лише́н све́та сего́ быва́ет,/ и безвре́менную смерть прие́млет,/ венце́м доброде́телей увязе́ся,/ и с преми́рными ли́ки ра́дуется,/ и дерзнове́нно предстои́т Влады́це/ со преподо́бным Симео́ном и Са́ввою преосвяще́нным,/ я́ко хода́таи при́снии/ и моли́твенницы о душа́х на́ших.

Кано́н Богоро́дицы со ирмосом на 6 и свята́го У́роша на 8. Кано́н му́ченика, глас 4, его́же краегранесие: Паисий недосто́йный, пою́ тя, блаженне У́роше.

Песнь 1

Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.

Пе́рвее грехо́вным не приобщи́вся жела́нием,/ зла́та честне́йший показа́лся еси́,/ я́ко от ко́рене благоро́дна изра́сл еси́, блаже́нне.

А́ще и гони́тель твой бысть Волкаши́н,/ но ра́вен произше́л еси́ роди́телем твои́м, де́лы и словесы́ подо́бяся,/ и, я́коже звезда́, просия́л еси́, блаже́нне.

И́же зако́нную сень премину́в, У́роше,/ к ше́ствию Небе́сному возше́л еси́, ра́дуяся, и Тро́ице предстои́ши,/ сего́ ра́ди блажи́м па́мять твою́.

Богоро́дичен: А́гницу Тя посреде́ те́рния обре́т,/ невла́емое Приста́ни́ще/ и к Бо́гу Руководи́тельницу кре́пкую, Ма́ти Де́во Влады́чице.

Катава́сия: Христо́с ражда́ется, сла́вите:

Песнь 3

Ирмо́с: Твоя́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.

Се́мене благоро́днаго цвет прекра́сен показа́лся еси́/ напосле́док явле́нием честны́х моще́й твои́х,/ в похвалу́ сро́дству твоему́, всеблаже́нне У́роше.

Еще́ от рожде́ния блага́я о́трасль показа́лся еси́/ все́ми ви́ды доброде́телию,/ ревну́я прароди́телем твои́м, це́ркви воздвиза́я/ и и́ны утвержда́я.

Из нача́ла о Бо́зе пева́емыя пе́сни,/ всю́ду прослу́ся²

и́мя твое́ явле́нием честны́х моще́й твои́х,/ мно́гострада́льне У́роше всему́дре, назира́й нас.

Богоро́дичен: Ра́дуйся, Чи́стая Де́во,/ и не забу́ди нас, моля́щихтися,/ в тузе́ су́щих и ско́рбех,/ Твою́ ми́лость изле́й на нас, мо́лимтися, Влады́чице.

Седа́лен, глас 8.

Подо́бен: Прему́дрости:

Прему́дре, достои́н был еси́ и́менем и де́лом, роди́телем твои́м подо́бяся,/ и сро́дству твоему́ обновле́нное твори́ши,/ Бо́гу просла́вльшу тя в животе́,/ И́же и по сме́рти просла́вил тя есть/ в похвалу́ сро́дству твоему́, многострада́льне и преблаже́нне У́роше всече́стне,/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен:

Небе́сную дверь и киво́т,/ всесвяту́ю гору, светоза́рный о́блак воспои́м,/ Небе́сную ле́ствицу, слове́сный рай,/ Е́вино избавле́ние, вселе́нныя всея́ вели́кое сокро́вище,/ я́ко спасе́ние в Ней соде́лася ми́рови/ и оставле́ние дре́вних согреше́ний./ Сего́ ра́ди вопие́м Ти:/ моли́ Сы́на Твоего́ и Бо́га/ прегреше́ний оставле́ние дарова́ти/ благоче́стно покланя́ющимся Пресвято́му Рождеству́ Твоему́.

Песнь 4

Ирмо́с: Седя́й в Сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.

Неизглаго́ланная твоя́ чудоде́йствия,/ я́же напосле́док показа́шася, У́роше всему́дре,/ не забу́ди сро́дства твоего́ и поми́луй нас, моля́щихтися.

Е́же от нача́ла Безнача́льному Слову ве́ровал еси́/ и роди́телю единоро́ден был еси́,/ и ца́рскою диади́мою украша́ют тя в сла́ву и похвалу́ сро́дству твоему́.

Доброде́тели твоя́ и красоту́ кто изрещи́ мо́жет?/ Удиви́л бо еси́ всех, приходя́щих к ра́це моще́й твои́х,/ ра́зумом превосходя́ мно́гия.

Богоро́дичен: Хвалы́ моле́бныя к Тебе́ воспуща́ю, Пречи́стая Влады́чице,/ не забу́ди нас, но моли́ся о нас к Ро́ждшемуся из Тебе́,/ да спасе́т Тебе́ ра́ди ду́ши на́ша.

Песнь 5

Ирмо́с: У́жасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.

От непра́ведный сме́рти и безвре́менныя,/ Ю́же подъя́л еси́, У́роше всече́стне,/ превы́шше бо в ра́дости пребыва́еши с ли́ки избра́нными.

Стезе́ю оте́ческою ше́ствовал еси́ всеизря́дною,/ чудесы́ удиви́л еси́ сро́дство твое́,/ ра́ка же твоя́ исцеле́ния подава́ет, У́роше блаже́нне.

Твоя́ па́мять днесь весе́лия всех исполня́ет,/ и́же, удивля́ющеся, глаго́лют:/ сла́ва благоутро́бию Твоему́, Христе́ Царю́,/ да́вшему нам сие́ украше́ние.

Богоро́дичен: Ты еси́ всем По́мощница,/ и и́стинная христиа́ном Засту́пница,/ и Покро́ви́тельница, и спасе́ние душ на́ших.

Песнь 6

Ирмо́с: Боже́ственное сие́ и всече́стно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.

От о́трасли благоро́дный просия́л еси́,/ му́дростию и ра́зумом всех превозше́л еси́/ и, безвре́менную смерть подъе́м, венце́м му́ченическим венча́лся еси́, сла́вне.

Твои́м явле́нием Се́рбская область ра́дуется,/ и сро́дство твое́ напосле́док твои́м явле́нием просвети́л еси́,/ не забу́ди и нас, моля́щихся тебе́.

На спасе́нную стезю́ наста́ви нас ходи́ти при́сно,/ и почита́ти тя, и па́мять твою́ соверша́ти,/ и богоуго́дно пожи́ти в честне́м хра́ме твое́м.

Богоро́дичен: Пречи́стая Де́во Ма́ти Иису́с Христо́ва,/ поми́луй и спаси́ и́же ве́рою к Тебе́ прибега́ющия,/ я́ко на Тя с Бо́гом упова́ние и́мамы.

Конда́к, глас 6.

Подо́бен: Рукопи́саннаго:

О́трасли благоро́дныя цвет прекра́сный яви́лся еси́, У́роше всече́стне,/ за́вистию бо убие́н был еси́ от твои́х при́сных,/ Бо́жиим же Ду́хом просвеще́н,/ святоро́днаго пле́мене свят был еси́/ и, му́ченическим венце́м увя́зся,/ в черто́зе Небе́снем водворя́ешися./ Моли́ся о нас, свя́те, творя́щих любо́вию па́мять твою́.

И́кос:

Кто достои́н устне́ отве́рзти или́ язы́к дви́гнути/ и похвали́ти хвали́маго Бо́гом,/ оба́че в толи́ко вре́мя в тиме́нии земно́м пребы́в,/ от Христа́ Спа́са вене́ц прия́л есть/ и, дарова́ньми исцеле́ний обогати́вся, исцеле́ния дар прия́т,/ и че́стен страда́лец показа́ся, принося́ моле́ние Благоде́телю,/ и прие́м сла́ву с Небесе́ и вене́ц добро́ты,/ и мо́лится о творя́щих любо́вию па́мять его́.

Песнь 7

Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.

Твою оби́тель вску́ю забы́л еси́?/ Воспряни́ у́бо си́лою прароди́тель твои́х/ и испроси́ от Го́спода по́мощь и заступле́ние твое́й оби́тели, я́ко да пое́м:/ оте́ц на́ших Бо́же, благослове́н еси́.

Почита́ю мо́щи твоя́ и покланя́юся:/ исцеле́ние бо подае́ши ве́рою приходя́щим./ Пода́ждь и нам ми́рное житие́ во оби́тели твое́й, пою́щим:/ оте́ц на́ших Бо́же, благослове́н еси́.

О́трок был еси́, Небе́снаго жили́ща хода́тай,/ вся́кими бо добро́тами украше́н,/ уби́йственною я́звою измени́л еси́ живо́т твой,/ они́ у́бо студа́ испо́лнишася, ты же вопие́ши:/ оте́ц на́ших Бо́же, благослове́н еси́.

Богоро́дичен: Све́тлыми заря́ми всю зе́млю возсия́вшее Со́лнце от свята́го чре́ва Твоего́ озаря́ет, Влады́чице,/ и́мже и нас просвети́ Твое́ю ми́лостию, вопию́щих:/ препе́тый отце́в Госпо́дь и Бог, благослове́н еси́.

Песнь 8

Ирмо́с: О́троки бла́гочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.

Ю́ношески пожи́в во оте́чествии твое́м,/ и блажи́т тя сро́дство твое́,/ и весе́лием ра́дуется твоему́ объявле́нию, дивя́ся, глаго́лет:/ Го́спода по́йте, дела́, и превозноси́те Его́ во вся ве́ки.

Треплете́нный восприя́л еси́ вене́ц от Вы́шняго Дарода́теля,/ изря́ден быв твое́й оби́тели/ и це́рковь просвети́в мощми́ твои́ми, вопия́:/ Го́спода по́йте, дела́, и превозноси́те Его́ во вся ве́ки.

Естество́ премени́в тле́нное,/ в ве́чныя оби́тели вшел еси́, блаже́нне,/ и житию́ пресвято́му после́довал еси́ прароди́телей твои́х, вопия́:/ Го́спода по́йте, дела́, и превозноси́те Его́ во вся ве́ки.

Богоро́дичен: Коне́ц благи́й пода́ти ми, Де́во, Го́спода умоли́,/ да избу́ду ожида́ющих мя ве́чных мук,/ я́ко да Тя пою́, Благослове́нная, во вся ве́ки.

Песнь 9

Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же Безпло́тных умов естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная Богоро́дице,/ Чи́стая При́сноде́во.

Боже́ственное селе́ние ты был еси́, пресве́тло просвети́вся, У́роше всеблаже́нне,/ сро́дство твое́ назира́й и от неду́г и бед избавля́й,/ да тя непреста́нно велича́ем.

Лесть искорени́л еси́ злу́ю, Правосла́вию ревну́я,/ прароди́телем твои́м чудесы́ подо́бяся,/ удиви́л еси́ зря́щия твоя́ пресла́вная чудеса́, блаже́нне.

Жела́я уподо́битися блаже́нному Симео́ну, и святи́телю Са́вве,/ и ины́м сро́дством, до́бре пожи́вшим,/ и не лиши́л тя есть Вели́кий Дарода́тель, У́роше всече́стне.

Богоро́дичен: Приими́ на́ше ма́лое сие́ приноше́ние, о Всенепоро́чная Госпоже́ Влады́чице,/ и е́же от недосто́йных усте́н приноси́мое Ти моле́ние приими́/ и не отри́ни, Всенепоро́чная Влады́чице.

Свети́лен.

Подо́бен: Не́бо звезда́ми:

Ны́нешнюю сла́ву презре́л еси́,/ Вы́шнюю сла́ву получи́л еси́/ и, земны́ми Небе́сная насле́довав, блаже́нне,/ Влады́це я́ко предстоя́, о нас всегда́ моли́ся.

Богоро́дичен:

Еди́на Чи́стая и Нескве́рная,/ оскверне́на мя вся́кими паде́ньми лю́тыми/ изба́ви лю́тыя му́ки и тьмы кроме́шныя.

На хвали́тех стихи́ры на 4, глас 4.

Подо́бен: Я́ко до́бля:

Умудри́ тя Вы́шняя си́ла,/ земна́я вся презре́в,/ ум впери́в ко Го́споду, У́роше всече́стне,/ оте́чество твое́ назира́й и оби́тель твою́ не забу́ди,/ просвеще́ние нам подава́я,/ творя́щим святу́ю па́мять твою́.

Рода све́тла был еси́, блаже́нне,/ я́ко ши́пок, процве́л еси́ Це́ркви/ и, я́ко фи́никс многора́сленный, благоуха́ния испо́лнился еси́,/ лесть ересе́й разруши́в неви́димою си́лою,/ и нас не забу́ди, моля́щихтися,/ У́роше достоблаже́нне.

Ше́ствовал еси́ стезе́ю оте́ческою/ и блаже́нную жизнь пости́гл еси́,/ прароди́телем подо́бяся вся́кими доброде́тельми:/ це́ркви воздвиза́я при животе́ твое́м/ и ины́я подтвержда́я прароди́телей твои́х,/ и по сме́рти твою́ це́рковь мощми́ облагоуха́л еси́,/ и чудесы́ всех удиви́л еси́,/ достоблаже́нне У́роше всече́стне.

Ума́ твоего́ не поколеба́ тве́рдость,/ адама́нта тверде́йший яви́вся,/ а́ще и юн был еси́/ и не доспе́л еси́ соверше́ннаго во́зраста,/ но Ду́ха Свята́го испо́лнен быв благода́ти./ Дивя́тся мно́зи, зря́ще твоя́ мо́щи кра́сныя,/ це́рковь бо твою́ просвети́л еси́ разли́чными благоуха́ньми,/ всече́стне и преблаже́нне.

Сла́ва, глас 4:

Све́тлая днесь наста́ па́мять твоя́, У́роше блаже́нне,/ светле́йший же есть приходя́й во Вифлее́ме роди́тися Христо́с,/ И́же всей вселе́нней ра́дость подае́т,/ твоя́ же уби́йственная и безвре́менная смерть–/ Се́рбстей земли́ рыда́ние неутеши́мо и жа́лость ве́лию./ И ны́не, блаже́нне и досточу́дне,/ не преста́й о нас моля́ся,/ я́ко с му́ченическими ли́ки водворя́ешися,/ и, у Престо́ла Святы́я Тро́ицы предстоя́ с прароди́тели твои́ми,/ твое́ сро́дство помина́й,/ творя́щее любо́вию святу́ю па́мять твою́.

И ны́не, Богоро́дичен:

Иму́ще Тя, Богоро́дице, упова́ние и предста́тельство,/ вра́жиих наве́т не убои́мся,/ я́ко спаса́еши души на́ша.

Славосло́вие вели́кое и отпу́ст.

НА ЛИТУРГИ́И

Блаже́нны от кано́на свята́го пе́сни 3-я и 6-я. Проки́мен, глас 4: Возвесели́тся пра́ведник о Го́споде/ и упова́ет на Него́. Стих: Услы́ши, Бо́же, глас мой:Апо́стол к Тимофею, зачало 295.Аллилу́ия,глас 4: Пра́ведник, я́ко фи́никс, процвете́т:Стих: Насажде́ни в дому́ Госпо́дни:Ева́нгелие от Луки́, зачало 73. Прича́стен: В па́мять ве́чную бу́дет пра́ведник:

Святой Стефан Урош V

Святой Стефан Урош V родился в 1337 году. Отец его, Душан Неманя (1331–1355), первым среди сербских властителей получил царский титул (1346). Во времена его правления Сербия достигла вершин своего государственного могущества. Святой Урош V вступил на престол в восемнадцатилетнем возрасте после внезапной смерти отца; в наследство он получил огромное царство, простиравшееся от Черного моря до Адриатического.

Смиренный и кроткий молодой правитель ревностно заботился о чистоте Православной веры, о благоустроении храмов, опекал нищих, вдов и сирот. Святой Урош не хотел, подобно отцу, держать в страхе своих подданных. Мощь сербского государства, утвержденная отцом на силе оружия, стала слабеть, начались междоусобные распри. Многие областные правители стремились овладеть престолом, действуя и силой, и хитростью. Одного из них, Хумского деспота Вукашина, простодушный властитель возвел в королевское достоинство.

В 1365 году святой Урош оставил престол и стал жить милостями своих подданных.

Исполненный христианского смирения, святой Урош с великим терпением переносил унижения и скорбел о вражде и раздорах в своем отечестве. Только безмерное упование на Господа было его опорой в защите от обидчиков. Во время охоты на Косовом поле Вукашин совершил предательское убийство святого. С его кончиной прервалась династия Неманичей. Тело святого Стефана было перенесено в монастырь в честь Успения Пресвятой Богородицы в Неродимле. Царь Урош V был причислен Церковью к лику святых около 1583 года. Когда раку мученика раскрыли, храм исполнился благоухания, а от прикосновения к ней верующие получали исцеления.

11 мая 1705 года святые мощи царя Уроша V были перенесены монахом Христофором в монастырь Язак. В течение XVIII и последующих веков мощи святого Уроша покоились в ряде других сербских монастырей. 14 апреля 1942 года они были положены в кафедральном соборе в Белграде. В 1954 году Архиерейским Собором было принято решение о перенесении их в Язак. Святому Урошу посвящен монастырь, построенный в Неродимле, близ места его кончины. Память святого совершается 2 декабря.

Большинство источников свидетельствуют, что мученическая кончина настигла его в 1371 году. По другим данным, это произошло 2 декабря 1367 или 5 декабря 1365 года. Наиболее важный источник – Романовский типикон Хиландарского монастыря, написанный в 1382 году, указывает 3 декабря 1371 года как дату кончины сербского мученика. Почитание его в России установлено в XVII веке.

Преподо́бнаго отца́ на́шего Иоанни́кия Деви́ченскаго

НА МА́ЛОЙ ВЕЧЕ́РНИ

На Го́споди, воззва́х:стихи́ры, глас 4.

Подо́бен: Дал еси́ знамение:

Све́тло, я́коже со́лнце,/ просия́ твоя́ па́мять, преподо́бне,/ луче́ю облиста́ющая твоя́ доброде́тельная де́лания, всеблаже́нне,/ и све́том чуде́с твои́х озаря́ющая ве́рных чу́вства,/ те́мже пра́зднуем ра́достно и ублажа́ем ве́рно/ всепра́зднственную па́мять твою́.

Мир возненави́дев, преподо́бне,/ посто́м и моли́твами к Небе́сной высоте́ возлете́л еси́,/ свети́лом свои́м челове́ки на земли́ просиява́еши,/ со А́нгелы на Небеси́ лику́я./ Тем тя мо́лим, преподо́бне,/ с ве́рою приходя́щии к твои́м моще́м:/ Христа́ умоли́ грехо́в оставле́ние нам пода́ти.

Стра́сти теле́сныя воздержа́нием умертви́л еси́/ и приле́жными моли́твами и сле́зными то́ки/ удави́л еси́ льсти́ваго зми́я, о́тче,/ Бо́гу же угоди́л еси́ па́че мно́гих,/ досточу́дне Иоанни́кие преподо́бне./ Те́мже тя Свое́ю благода́тию украси́ Творец ми́ра/ и Спас душ на́ших.

Сла́ва, глас 8:

Преподо́бне и блаже́нне о́тче Иоанни́кие,/ во дни и в нощи́ поуча́лся еси́ за́поведем Боже́ственным,/ и́хже соблю́д, яви́лся еси́ дом Святы́я Тро́ицы,/ Ю́же моли́ непреста́нно, преподо́бне о́тче,/ спасти́ся душа́м на́шим.

И ны́не, Богоро́дичен:

Влады́чице, приими́ моли́твы раб Твои́х/ и изба́ви нас/ от вся́кия ско́рби и печа́ли.

На стихо́вне стихи́ры, глас 2.

Подо́бен: До́ме Евфра́фов:

Яви́лся еси́ от ма́терних пеле́н/ освяще́н, Богоно́се Иоанни́кие,/ и был еси́ сосу́д Пресвята́го Ду́ха.

Стих: Честна́ пред Го́сподем/ смерть преподо́бных Его́.

Лесть лука́вых бесо́в посрами́л еси́,/ о́тче Иоанни́кие,/ кре́стною си́лою уясни́л еси́ сла́ву Христо́ву.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Нося́ в руце́ свое́й/ Крест Го́сподень,/ бесо́вская мечта́ния с ним погуби́л еси́,/ сего́ ра́ди и мы согла́сно вопие́м ти:/ ра́дуйся, о́тче наш Иоанни́кие.

Сла́ва, и ны́не, глас то́йже:

Влады́чице Блага́я,/ Преблагослове́нная и Пренепоро́чная,/ Чи́стая Деви́це,/ Защи́тнице ро́да христиа́нскаго,/ приле́жно вси к Тебе́ зове́м:/ руки́ Твоя́ святы́я распростри́ ми́лостивно к Сы́ну Своему́/ и всегда́ моли́ его́ спасти́ души на́ша.

Тропа́рь пи́сан на вели́цей вече́рни.

Сла́ва, и ны́не, Богоро́дичен.

НА ВЕЛИЦЕЙ ВЕЧЕРНИ

Блаже́н муж: 1-й антифо́н. На Го́споди, воззва́х: постави́м стихов 8, глас 8.

Подо́бен: О, пресла́внаго чудесе́:

О́тче Иоанни́кие, преподо́бне,/ вои́стинну вы́ну носи́л еси́/ в горта́ни Бо́жия возноше́ния,/ поуча́яся, всему́дре,/ де́тельнейшим словесе́м Богодухнове́нным,/ и отту́ду, обогаще́н быв истека́ющею благода́тию, блаже́нне,/ всех нечести́вых сове́тования низвраща́еши.

О́тче Иоанни́кие пресла́вне,/ исто́чниками слез ду́шу свою́ очи́стив/ и всено́щными стоя́нии Бо́га уми́лостивив,/ воспери́лся еси́ к любле́нию и красоте́ Сего́, блаже́нне,/ ея́же ны́не досто́йно наслажда́яся,/ ра́дуешися непреста́нно/ со страда́льцы твои́ми, Богому́дре преподо́бне.

О́тче Иоанни́кие преподо́бне,/ воспери́в ум к Бо́гу ве́рою,/ омерзи́л еси́ непостоя́нное мирска́го смеше́ния/ и, крест свой восприи́м,/ Всеви́дцу после́довал еси́,/ порабо́тив по́мыслу необузда́нное те́ло по́двигами обуче́ния,/ кре́постию Боже́ственнаго Ду́ха.

О́тче Иоанни́кие,/ твое непрело́жное житие́ – ве́ра вои́стинну Пра́восла́вная,/ и́бо от дея́ния к зело́ вели́кому виде́нию дости́гл еси́,/ Прему́дрости быв жили́ще,/ во двою́ естеству́ чтый от Тро́ицы Христа́,/ Его́же моли́ о душа́х на́ших.

Глас 5.

Подо́бен: Ра́дуйся:

Ра́дуйся, преподо́бне по́стниче,/ святы́й о́тче наш,/ святи́телю Богому́дре, Бо́гом возлю́бленне!/ В ми́ре жизнь свою́ свя́то устро́ив,/ Ду́хом Боже́ственным оживи́л еси́,/ е́же облагоуха́ти на́ша чу́вства и ду́ши,/ и́миже восходи́м на Небеса́ / и земны́я стра́сти прогоня́ем,/ Христа́ зря́ще, И́мже спаса́емся.

Ра́дуйся, о́тче, мирска́я возненави́дев/ и и́ноческое житие́ возлюби́в,/ А́нгелом собесе́дник показа́лся еси́/ и явля́ешися свои́ми чудеса́ми, а́ки звезда́, сия́ющая на Небеси́./ Моли́ся Го́споду о всех нас,/ соверша́ющих святу́ю па́мять твою́.

Ра́дуйся, святи́телю сла́вный,/ отступи́в от мирски́я и мяте́жныя молвы́,/ прите́кл еси́ ко Христо́вой тишине́, Богому́дре,/ и виде́нием Боже́ственных дея́ний,/ я́ко всебога́тыми светлостьми́, обогати́вся вои́стинну,/ и́миже ве́рныя назира́еши,/ бла́голепным сия́я житие́м.

Чу́вственныя стра́сти победи́л еси́/ брозда́ми воздержа́ния, чудоде́йственниче,/ и, ре́вности Безпло́тных на земли́ показа́в,/ вся жела́ния плотска́я ду́хови покори́л еси́./ Тем ны́не в Небе́сных селе́ниих водворя́яся,/ моли́ о душа́х на́ших.

Сла́ва, глас 5:

Преподо́бне о́тче,/ гла́са Ева́нгелия Госпо́дня послу́шав,/ мир оста́вил еси́,/ нивочто́же вмени́в бога́тство и сла́ву,/ и, живы́й в уедине́нии, всем взыва́л еси́ отту́ду:/ возлюби́те Бо́га, и обря́щете благода́ть,/ и ничто́ же предпочти́те любви́ его́,/ да егда́ прии́дет во сла́ве Свое́й,/ обря́щете упокое́ние со все́ми святы́ми./ И́хже моли́твами, Хри́сте, сохрани́ и спаси́ ду́ши на́ша.

И ны́не, Богоро́дичен, глас 5: В Чермне́м мо́ри:

Вход. Проки́мен дне. И чте́ния.

Прему́дрости Соломо́новы чте́ние (глава́́ 3):

Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от на́с ше́ствие, сокруше́ние;/ они́ же суть в ми́ре./ И́бо пред лице́м челове́ческим, а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше,/ вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их,/ и я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут Ему́./ Я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́новы чте́ние (главы́ 5, 6):

Пра́ведницы во ве́ки живу́т,/ и в Го́споде мзда их, и попече́ние их у Вы́шняго./ Сего́ ра́ди прии́мут Ца́рствие благоле́пия/ и вене́ц добро́ты от руки́ Госпо́дни;/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́т тварь в месть враго́м./ Облече́тся в броня́ пра́вды/ и возложи́т шлем – суд нелицеме́рен./ Прии́мет щит непобеди́мый – преподо́бие,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины,/ и, я́ко от благокру́гла лу́ка облако́в, на наме́рение полетя́т./ И от каменоме́тныя я́рости испо́лнь, паду́т гра́ды,/ вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы,/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́, конце́в земли́./ Внуши́те держа́щии мно́жества/ и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́новы чте́ние (глава́́ 4):

Пра́ведник, а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком/ и во́зраст ста́рости – житие́ нескве́рное./ Благоуго́ден Бо́гу быв, возлю́блен бысть/ и живы́й посреде́ гре́шников преста́влен бысть./ Восхище́н бысть, да не зло́ба измени́т ра́зума его́,/ или́ лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́споду душа́ его́,/ сего́ ра́ди потща́ся от среды́ лука́вствия./ Лю́дие же, ви́девше и не разуме́вше,/ ниже́ поло́живше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На лити́и стихи́ры свята́го, глас 2:

Ки́ими похва́льными пе́сньми/ ублажи́м святи́теля Иоанни́кия?/ по́стников украси́теля, преподо́бных побо́рника,/ свети́ло свяще́нником и похвала́ и́ноком,/ це́ркви своей утвержде́ние непоколеби́мое,/ неду́гом врача́./ Его́ же моли́твами, Го́споди, спаси́ души на́ша.

Ки́ими слове́сными венцы́ венча́ем Иоанни́кия?/ свяще́ннаго тече́ния жела́теля,/ Небе́снаго ученика́, Боже́ственныма крило́ма превзя́таго Богови́дца,/ столп смире́ния необори́мый,/ сте́ну разсужде́ния непоколеби́мую,/ нра́вом украше́ние,/ честно́е благоле́пие,/ моли́твенника Христу́, непреста́нно моля́щагося о ча́дех свои́х.

Ки́ими пе́сненными пе́нии воспои́м Иоанни́кия?/ преиспещре́нна дея́ньми и изоби́льна бла́годатию,/ равноа́нгельна житие́м, ве́ры утвержде́ние,/ неду́гов цели́теля, бесо́в прогони́теля/ и всем правове́рным ско́раго помо́щника.

Сла́ва, глас 4:

Прииди́те, вси празднолюбцы,/ ублажи́м па́мять святи́теля Христо́ва Иоанни́кия:/ а́ще бо и возлете́ от нас,/ но неви́димо с на́ми стои́т/ и преподо́бныя руки́ своя́ простирает о нас ко Го́споду./ Притеце́м у́бо, и припаде́м к ра́це святы́х моще́й его́,/ и поклони́мся, прося́ще,/ я́ко да святы́ми свои́ми моли́твами/ испроси́т ча́дом свои́м мир и душа́м их ве́лию ми́лость.

И ны́не, Богоро́дичен:

Я́ко Всенепоро́чная Неве́ста Творцу́,/ я́ко Неискусому́жная Ма́ти,/ прия́телшце Изба́вителя и Уте́шителя,/ потщи́ся изба́вити мя бесо́вскаго злоде́йства,/ преложи́вши скве́рное те́ло мое́ в све́тлое жили́ще доброде́телей,/ разжени́ о́блак страсте́й мои́х Твои́ми моли́твами/ и сподо́би мя Вы́шняго прича́стия в Невече́рнем Све́те.

На стихо́вне стихи́ры, глас 1.

Подо́бен: Небе́сных чино́в:

Небе́сныя круги́ превозлете́в Боже́ственною доброде́телию,/ преблаже́нне о́тче,/ заше́л еси́ во мрак, иде́же, осия́ние прии́м от благода́ти Бо́жия,/ вои́стинну светле́ешися, преподо́бне.

Стих: Честна́ пред Го́сподем/ смерть преподо́бных Его́.

Доброде́тельми просвети́в ду́шу и ум,/ к Небеси́ преста́вился еси́ в Ца́рствии Христо́ве, Иоанни́кие блаже́нне,/ принося́ ему́ рукоя́тия трудо́в свои́х,/ в по́стницех бо ты яви́ся свети́льник,/ наслажда́яся нестаре́емыя пи́щи.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Преподо́бне о́тче,/ не дал еси́ сна очи́ма свои́ма,/ ниже́ ве́ждома свои́ма дрема́ния,/ до́ндеже ду́шу и те́ло от страсте́й свободи́л еси́,/ угото́вав себе́ в жили́ще Ду́хови./ Прише́д бо, Христо́с со Отце́м/ оби́тель сотвори́ у тебе́,/ те́мже Единосу́щныя Тро́ицы служи́тель был еси́,/ великопропове́дниче Иоанни́кие,/ моли́ся о душа́х на́ших.

Сла́ва, глас 2:

На земли́ А́нгела и на Небесе́х челове́ка Бо́жия,/ благоукраше́ние ми́ра, наслажде́ние благи́х,/ доброде́телей по́стнических похвалу́, Иоанни́кия почти́м:/ насажде́н бо в дому́ Бо́жии, процвете́ пра́ведно/ и, я́ко кедр в пусты́ни,/ умно́жи ста́до Христо́во слове́сными овца́ми/ в преподо́бии и пра́вде.

И ны́не, Богоро́дичен.

На благослове́нии хлебов, тропа́рь свято́му, два́жды, и Богоро́дице Де́во: еди́ножды. Прочая до конца́ по ряду.

Тропа́рь свята́го, глас 1:

Поще́нием, моли́твами и благода́тию Боже́ственною просвети́вся,/ земны́я концы́ све́тло озаря́еши благоче́стно,/ чуде́с благода́ть от Бо́га прие́м,/ исцеля́еши неду́ги, ду́хи же лука́выя от челове́ков отгоня́еши,/ и́же с ве́рою притека́ют к ра́це моще́й твои́х святы́х,/ преподо́бне о́тче наш Иоанни́кие./ Сла́ва Да́вшему ти благода́ть,/ сла́ва Укрепи́вшему тя,/ сла́ва Де́йствующему тобо́ю всем исцеле́ния.

НА У́ТРЕНИ

По 1-м стихосло́вии седа́лен, глас 8.

Подо́бен: Прему́дрости:

Многосве́тлая звезда́ и́ночествующим показа́ся,/ и степе́нь изве́стен, и преде́л воздержа́ния,/ пресве́тлое зерца́ло разсужде́ния, преподо́бне,/ Бо́гови предстоя́, проси́ проще́ния прегреше́ниям/ ра́достно соверша́ющих твою́ па́мять, преблаже́нне.

Сла́ва, и ны́не:

Наста́ви нас на путь покая́ния, уклоня́ющияся при́сно к злым безпути́ям/ и преблага́го прогне́вающия Го́спода,/ и моли́, Неискусобра́чная Благослове́нная Мари́е, спасти́ся всем, ча́ющим утеше́ния.

По 2-м стихосло́вии седа́лен, глас 8.

Подо́бен: Прему́дрости:

Боже́ственным жела́нием безсме́ртия одержи́м, о́тче Иоанни́кие,/ и крест на ра́мо взем,/ в пусты́нях всели́лся еси́,/ иде́же Го́сподеви усе́рдно порабо́та,/ те́мже тя и стяжа́хом те́пла моли́твенника ко Го́споду.

Сла́ва, и ны́не:

Боже́ственное селе́ние была́ еси́ Сло́ву, еди́на Всечи́стая Де́во,/ чистото́ю А́нгелы превозше́дшая,/ очи́сти мя, оскверне́нна плотски́ми прегреше́ньми, моли́твами Твои́ми.

По полиеле́и, седа́лен, глас 4.

Подо́бен: Удиви́ся Ио́сиф:

На земли́ А́нгела и на Небесе́х челове́ка Бо́жия,/ ми́ра благоукраше́ние, наслажде́ние благи́х,/ по́стнических доброде́телей похвалу́,/ Иоанни́кия вси почти́м:/ насажде́н бо в дому́ Бо́жии, процвете́ пра́ведно/ и, я́ко кедр в пусты́ни, умно́жи ста́до слове́сное Христо́вых ове́ц в преподо́бии и пра́вде,/ ему́же вси воскли́кнем:/ ми́лостиве, помина́й нас, преподо́бне,/ любо́вию творя́щих святу́ю па́мять твою́.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря и внима́ше мы́слию,/ и́же на руно́ дождь, в безсе́менном зача́тии Твое́м, Богоро́дице,/ купину́, огне́м неопали́мую, жезл Ааро́нов прозя́бший,/ и, свиде́тельствуя, обру́чник Твой и храни́тель свяще́нником взыва́ше:/ Де́ва ражда́ет и по рождестве́ па́ки Де́вою пребыва́ет.

Таже 1-й антифо́н, 4-го гла́са. Проки́мен, глас 4: Честна́ пред Го́сподем/ смерть преподо́бных Его́. Стих: Что возда́м Го́сподеви о всех, я́же воздаде́ ми. Вся́кое дыха́ние: Ева́нгелие от Матфе́я, зачало 43.

По 50-м псалме́ стихи́ра самогла́сна, глас 6:

Гора́ Небеси́ подо́бяшеся,/ прие́млющи свети́льник, в пусты́ни горя́щ,/ отца́ Иоанни́кия./ Ты же, преподо́бне о́тче,/ Святы́м Ду́хом, я́ко оре́л, прелете́в го́ры и верте́пы Деви́ческия,/ о красноду́шне,/ просвеща́еши ве́рныя,/ притека́ющия к ра́це моще́й твои́х/ и с весе́лием взыва́ющия ти:/ моли́ся с Богоро́дицею о спасе́нии душ на́ших.

Кано́н Введе́нию Пресвяты́я Богоро́дицы, глас 4: Прему́дрости, Пречи́стая, Тя сокро́вище ве́мы: поется зде, поне́же созда́ святы́й Иоанни́кий це́рковь в честь Введения Пресвяты́я Богоро́дицы, украси́в ю благоле́пно, идеже и мо́щи его́ положе́ны. И кано́н преподо́бному Иоанни́кию на 8, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь сла́вно бо просла́вися.

Присносу́щным Све́том Триипоста́снаго ны́не озаря́емь,/ предстои́ши весь све́тел, я́коже А́нгели,/ но молю́ тя, о́тче Иоанни́кие:/ отжени́ от се́рдца моего́ омраче́ние,/ препода́я свет жити́я твоего́.

Жела́ние Христо́вы красоты́ стяжа́в,/ затвори́л еси́ чу́вства своя́ от всего́ тле́ннаго и мимотеку́щаго/ и по́двигами души́ своея́ возше́л еси́ на высоту́, блаже́нне.

Вели́кое смотре́ние Бо́жие освяти́ тя от утро́бы/ и показа́ тя сосу́д прия́тен Свято́му Ду́ху,/ те́мже яви́лся еси́ от ю́ности огражда́емь стра́хом Бо́жиим.

От Небе́с прие́м оби́льно дарова́ние Ду́ха Пресвята́го, о́тче Иоанни́кие,/ да́руй ми сло́во во отверзе́ние уст мои́х,/ да воспою́ равноа́нгельское житие́ твое.

Любо́вию Влады́чнею разже́гся, оста́вил еси́ вся земна́я/ и, восприя́в крест свой на ра́мо, Тому́ после́довал еси́,/ просла́влься зна́меньми и чудесы́, преподо́бне.

Богоро́дичен: Словеса́ Гаврии́ла Архистрати́га слы́шавши, Непоро́чная,/ и, наше́дшу на Тя Ду́ху Свято́му, заче́нши, родила́ еси́ Сы́на,/ Отцу́ Собезнача́льна.

Песнь 3

Ирмо́с: На ка́мени мя ве́ры утверди́в,/ разшири́л еси́ уста́ моя́ на враги́ моя́,/ возвесели́ бо ся дух мой, внегда́ пе́ти:/ несть свят, я́коже Бог наш,/ и несть пра́веден, па́че Тебе́, Го́споди.

Ви́девши бо́дренная душа́ твоя́ разу́мныма очи́ма, я́ко вся су́етна суть,/ отве́ргл еси́ всю мирску́ю красоту́/ и, разда́в и́мение свое́ ни́щим, стяжа́л еси́ некра́домое.

Боже́ственных послу́шав за́поведей,/ в молча́нии пребы́л еси́ чрез все житие́ свое́/ и, быв в поноше́ние во оте́чествии свое́м,/ пита́лся еси́ жела́нием и́стинныя сла́вы.

Отврати́л еси́ плещи́ своя́ от мирски́я красоты́/ и возве́л еси́ о́чи свои на го́ру, ча́я отту́ду Боже́ственныя по́мощи./ Те́мже от горы́ святы́я услы́ша тебе́ Госпо́дь/ и Свои́ми просла́ви чудесы́.

Кре́пкую с высоты́ по́мощь и озаре́ние ра́зума получи́в,/ пожи́л еси́ на земли́ равноа́нгельски,/ те́мже был еси́ исто́чник чуде́с, о́тче Иоанни́кие.

Я́ко дре́во, о́тче, насажде́нное при исхо́дищих вод,/ процве́л еси́ Боже́ственными доброде́тельми, я́ко кедр в Лива́не,/ те́мже осеня́еши недужныя.

Седа́лен, глас 8.

Подо́бен: Прему́дрости:

Мона́хов све́рстник яви́лся еси́, му́дре,/ подо́бник быв Анто́нию в после́док лет, блаже́нне,/ просвеща́я ве́рныя све́тлостию чуде́с, преподо́бне./ Те́мже, собра́вшеся в па́мять твою́, вси ве́рнии,/ про́сим благода́ти ко исцеле́нию страсте́й на́ших и вопие́м ти:/ моли́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, Богоро́дичен.

Ра́дуйся, я́же А́нгелом ра́дость ми́ра прие́мшая./ Ра́дуйся, ро́ждшая Творца́ Твоего́ и Го́спода./ Ра́дуйся, сподо́бльшаяся бы́ти Ма́ти Бо́жия.

Песнь 4

Ирмо́с: Прише́л еси́ от Де́вы не хода́тай, ни А́нгел,/ но Сам, Го́споди, вопло́щся,/ и спасл еси́ всего́ мя, челове́ка./ Тем зову́ Ти: сла́ва си́ле Твое́й, Го́споди.

Воззва́л тя есть Госпо́дь от Сио́на, я́коже дре́вле пра́отца́ Авраа́ма,/ повеле́в ти изы́ти от земли́ оте́чествия./ Ты же после́довал еси́ Того́ словеси́, о́тче Иоанни́кие, со усе́рдием.

Свети́льник нога́ма твои́ма зако́н благода́ти,/ и, сего́ зако́на придержа́вся,/ вел еси́ твоя́ исправле́ния,/ те́мже и просия́л еси́, о́тче, я́ко в полу́дни.

Оде́жда пло́ти твоея́ ри́за ко́жна,/ в ню же обле́кся, умертви́л еси́, о́тче, стра́стная взыгра́ния,/ те́мже и истни́л еси́ дебе́льство ко́жное.

Умертви́л еси́ по́хоть плотску́ю, быв ча́до Бо́га на́шего,/ не роди́вся от по́хоти плотски́я, но сын быв благода́тию./ Те́мже и прия́л еси́ жре́бий оте́ческий в ве́чном Ца́рстве.

Ра́зум и ум свой украси́л еси́ от ю́ности, стяжа́в ста́рость Соломо́нову;/ оба́че всю сладостра́стную пи́щу отмета́л еси́,/ потща́вся стяжа́ти нестаре́ющую пи́щу трудо́м/ и боле́зньми свои́х по́двигов, блаже́нне.

Богоро́дичен: Написа́ся персто́м Бо́жие Сло́во в Тебе́, Препе́тая, Безнача́льное,/ я́коже в глави́зне кни́жне./ Те́мже, припа́дая Ти, молю́ Тя:/ долгое рукопи́сание мно́гих мои́х страсте́й изгла́ди из кни́ги живо́тныя.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же:/ Тобо́ю бо, Влады́ко, к Светонача́льнику Отцу́ Твоему́,/ от но́щи неве́дения/ приведе́ние и́мамы.

Собла́зн готовля́ет тебе́ диа́вол, полага́я претыка́ния души́ твоей,/ и посла́ разбо́йники отгна́ти тя от ма́лыя хра́мины./ Ты же, преблаже́нне о́тче, я́ко за Христа́ гони́м, ра́довашеся.

Завеща́л еси́ души́ своей по гора́м превита́ти,/ я́ко птене́ц го́рличищ, о́тче Иоанни́кие,/ и ту научи́лся еси́ ви́дети Бо́га.

Науче́н зако́ном Христо́вым не пещи́ся о пи́щи и о оде́жди,/ испо́лнил еси́ де́лание птиц небе́сных,/ те́мже, всели́вся в ду́пленно дре́во,/ в мно́гия дни пребы́л еси́ без кро́ва и пи́щи.

Напои́л еси́ зе́млю души́ твоея́ слеза́ми, блаже́нне,/ те́мже и ненасе́янная земли́ препита́ тя,/ даю́щи телу твоему́ ма́лое утеше́ние.

Не дал еси́ сна свои́ма очи́ма, преподо́бне,/ ниже́ ве́ждома свои́ма дрема́ния,/ до́ндеже плотска́я уста́вил еси́ стремле́ния,/ и к Све́ту за́йде незаходи́мому, Влады́ку всех воспева́я.

Богоро́дичен: Ру́чку злату́ю, и све́щник, Деви́це,/ и трапе́зу дре́вле прообразова́ху нело́жно проро́ческая прорече́ния,/ быва́ющая по Бо́жию смотре́нию,/ во е́же бы Ты была́ Богороди́тельница Рождество́м Свои́м.

Песнь 6

Ирмос, глас 8: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.

Пути́ мы́сленнаго лука́вства избе́гл еси́ воздержа́нием и моли́твою, любо́вию же и и́стиною./ Те́мже кре́плим жела́нием и и́стинным сми́рением восхо́д ко Христу́ стяжа́л еси́, о́тче.

Не дал еси́ сна свои́м очесе́м,/ до́ндеже показа́ся дом Святы́я Тро́ицы и Прему́дрости сокро́вище.

Мир обогаща́я Боже́ственными исцеле́ньми,/ бла́гоговением же к Творцу́ я́вственне прибли́жився к вели́кому Све́ту,/ соде́лался еси́ земны́й А́нгел и Небе́сный челове́к.

Богоро́дичен: Мари́е Пресвята́я,/ чи́стое де́вства сокро́вище,/ очи́сти ум мой, стра́стию омраче́нный,/ и испо́лни се́рдце мое́ Боже́ственною благода́тию, Всенепоро́чная.

Конда́к, глас 8.

Подо́бен: Взбра́нной Воево́де:

От ю́ности, Богому́дре, возлюби́в а́нгельское житие́,/ вся кра́сная оста́вил еси́,/ за́йде бо, я́коже звезда́ от ми́ра,/ восте́к к разу́мному и пра́ведному со́лнцу, Христу́,/ от Него́ же прие́мь благода́ть исцеле́ния,/ разли́чныя неду́ги врачу́еши притека́ющих к свяще́нней ра́це твое́й./ Те́мже и мы, соверша́юще любо́вию всечестну́ю твою́ па́мять, вопие́м ти:/ ра́дуйся, о́тче Иоанни́кие.

И́кос:

Христо́в услы́шав глас, преподо́бне,/ ше́ствовал еси́ вслед за́поведей Его́, наг жи́тель быв,/ зане́ отрече́ся попече́ния о стяжа́нии,/ па́че же отве́ржеся при́сных и сро́дных свои́х,/ еди́н в пусты́ни бесе́дуя с Бо́гом,/ с Ни́мже соединя́яся бде́нием, посто́м и моли́твами, ра́зума дарова́ние восприя́л еси́./ Той же дар и нам ниспосли́, пою́щим ти си́це:/ ра́дуйся, о́тче Иоанни́кие.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть,/ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Взя́лся еси́ к высоте́ безстра́стия,/ уподо́бився А́нгелом, в пло́ти сый,/ и, быв прича́стник присносу́щней пи́щи, взыва́л еси́, блаже́нне:/ благослове́н еси́, Бо́же оте́ц на́ших.

Сия́я луча́ми Богови́дными,/ разгна́л еси́ бесо́вския нахо́ды/ и ве́рныя от озлобле́ний мно́гих изба́вил еси́, вопию́щих, преподо́бне:/ благослове́н еси́, Бо́же оте́ц на́ших.

Святы́я све́тлости, и жи́зни безконе́чныя,/ и ра́дости неизрече́нныя, и Ца́рствия Небе́снаго сподо́бився, всеблаже́нне,/ посыла́еши освяще́ние и избавле́ние всем, ве́рою взыва́ющим:/ благослове́н еси́, Го́споди, Бо́же оте́ц на́ших.

Богоро́дичен: Се Де́ва, Ю́же Ду́хом прови́де Иса́ия,/ заче́нши, роди́ Спа́са и Изба́вителя нам, пою́щим:/ благослове́н еси́, Го́споди, Бо́же оте́ц на́ших.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Недрема́нну душе́вную свещу́ ма́слом по́двигов твои́х сохрани́в,/ ра́достно вшел еси́ к нетле́нному Жениху,/ иде́же ве́чно живе́ши, вопия́:/ вся дела́, благослови́те, по́йте Го́спода.

Окормле́нием Свята́го Ду́ха преплы́в мо́ре искуше́ний немо́кренно, преподо́бне,/ дости́гл еси́ тишину́ Ца́рствия Небе́снаго,/ потопи́в неви́димыя враги́ сле́зными струя́ми,/ отону́дуже источа́еши цельбы́ приходя́щим и вопию́щим:/ благослови́те, вся дела́ Госпо́дня, Го́спода.

Ны́не дерзнове́ние име́я, я́ко Бо́гу предстоя́/ и злоко́зненныя бе́сы победи́в,/ сотвори́ моли́тву о нас ко Го́споду,/ я́ко да изба́вимся собла́знов диа́вольских и ве́чных избу́дем мук, ве́рою зову́ще:/ благослови́те, вся дела́ Госпо́дня, Го́спода.

Богоро́дичен: Умерщвле́нную ду́шу мою́ оживи́,/ па́дшую возста́ви, уязвле́нную исцели́,/ ум мой умири́, волне́ния искуше́ний, Де́во, укроти́ и спаси́ вопию́щия:/ благослови́те, дела́ Госпо́дня, Го́спода.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Христо́ви соца́рствовати вы́ну сподо́бился еси́ на Небесе́х, равноа́нгельное житие́ на земли́ пожи́в,/ моли́ся Творцу́ и Влады́це со дерзнове́нием о всех,/ ве́рою соверша́ющих всечестну́ю па́мять твою́.

В земли́ положе́нныя твоя́ свяще́нныя мо́щи освяща́ются, стяжа́вши Боже́ственную благода́ть,/ е́юже то́чат исцеле́ния, стра́сти душе́вныя исцеля́ют/ и от вредоно́сных я́зв бесо́вских свобожда́ют.

Боже́ственными добро́тами, о́тче, обложе́н,/ святы́м житие́м обожи́лся еси́/ и, просвеще́н, предстоя́ вели́кому Све́ту,/ помина́й прибли́жающихся тебе́, чту́щих тя ве́рно/ и па́мять твою́ ве́рно соверша́ющих.

Богоро́дичен: Пречи́стая Богоро́дице,/ я́же Бо́га несказа́нно заче́нши и ро́ждши пло́тию на спасе́ние всему́ ми́ру,/ Того́ моли́, Преблага́я, умири́ти мир и спасти́ души на́ша.

Свети́лен:

Доброде́тели крило́ма на Небеса́ возлете́в,/ прибли́жився же Трисо́лнечному Све́ту,/ со А́нгелы воспева́еши Трисвяту́ю песнь,/ с ни́миже всех нас помина́й, почита́ющих па́мять твою́.

Богоро́дичен:

Ю́же дре́вле пропове́даша проро́чески ли́цы,/ апо́столи научи́ша, Де́ву по рождестве́,/ му́ченицы испове́даша и́стинную Богоро́дицу,/ Ту́южде и мы согла́сно воспои́м и велича́ем я́ко Ма́терь Бо́жию/ и с Гаврии́лом зове́м к Ней:/ ра́дуйся, Ма́ти Госпо́дня, христиа́ном Засту́пнице.

На хвали́тех стихи́ры на 4, глас 1.

Подо́бен: Небе́сных чино́в:

Презира́тель до́льних и пресе́льник,/ рачи́тель Вы́шних и пусты́нный граждани́н, Иоанни́кий Богому́дрый/ всем нам пра́здновати повелева́ет/ е́же к Бо́гу отше́ствие его́,/ те́мже и твори́м сие́, науча́емии от Ду́ха Свята́го.

Мир доброде́телей быв во пло́ти, о́тче Богому́дре,/ житие́м свои́м на земли́ просла́вил еси́ Го́спода сла́вы,/ И́же тя по достоя́нию просла́ви,/ еси́ бо исто́чник целе́бный си́лою Его́,/ Иоанни́кие преподо́бне.

Ве́дяще тя сми́ренна, незло́бива,/ кро́тка, про́ста, молчали́ва,/ прославля́ем я́ко вои́стинну па́че челове́ка, о́тче,/ я́ко невеще́ственна, я́ко храм Бо́жий,/ от Него́же прибы́вшая ти дарова́ния ми́лостивно подава́й нам.

Сла́ва, глас 6:

Преподо́бне о́тче,/ во всю зе́млю изы́де веща́ние исправле́ний твои́х,/ те́мже на Небеси́ обре́л еси́ полки́/ и а́нгельския дости́гл еси́ чи́ны,/ и́хже житию́ непоро́чно поревнова́в,/ и́маши дерзнове́ние моли́тися Влады́це,/ мир испроси́ душа́м на́шим.

И ны́не, Богоро́дичен:

Богоро́дице, Ты еси́ лоза и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы/ поми́ловатися душа́м на́шим.

Та́же славосло́вие вели́кое и отпу́ст.

НА ЛИТУРГИ́И

Блаже́нны от кано́на свято́му, пе́сни 3-я и 6-я. Проки́мен, глас 7: Восхва́лятся преподо́бнии во сла́ве/ и возра́дуются на ло́жах свои́х. Апо́стол ко Евре́ем, зачало 235. Аллилу́ия, глас 2: Свяще́нницы Твои́ облеку́тся в пра́вду,/ и преподо́бнии Твои возра́дуются. Ева́нгелие от Луки́, зачало 24. Прича́стен: В па́мять ве́чную:

Преподобный Иоанникий Девический

Преподобный Иоанникий Девический подвизался в первой половине XV века. Святой был родом из Черногорского приморья. С юности избрал он путь монашеского подвига, рано покинул отчий дом и поселился в пещере на берегу реки Ибар, где, по преданию, в XIV веке жил другой сербский пустынник – преподобный Петр Коришский. Вскоре сюда, в место, называемое Черная Река, стали приходить иноки, до которых дошла молва о благочестивом отшельнике. Они оставались здесь с благословения преподобного, подражая его строгой и богоугодной жизни. Послушание святому Иоанникию они считали великим благом. Со временем, когда братия стала многочисленной, преподобный Иоанникий и его сподвижники воздвигли храм.

В обитель стекалось все больше людей. Слава святого Иоанникия росла. Это тяготило пустынника. Предав своих духовных чад воле Божией, он удалился в пустынный Девический лес. Жил святой по слову Спасителя, подобно птице, не заботясь о пище и месте для ночлега. Многие дни проводил в дупле дерева. Слезной молитвой побеждал посылаемые искушения.

Святой получил от Бога власть над демонами и чудесный дар врачевания недугов. Когда весть о пустыннике достигла княжеского двора, деспот Георгий Бранкович (1427–1459) отправился к нему с просьбой исцелить больную дочь. Молитвами святого Иоанникия Господь избавил ее от болезни, и тогда благодарный властитель воздвиг в Девиче храм в честь Введения Пресвятой Богородицы. Впоследствии там был основан монастырь.

Преподобный Иоанникий отошел ко Господу 2 декабря 1430 года. Его святые мощи покоятся в Девиче и славятся чудотворениями. В Сербии особенно чтут преподобного Иоанникия как целителя душевных болезней.

Святы́е великому́ченицы Миропи́и

Творе́ние Ники́фора, иеромона́ха из Хио́са

НА ВЕЛИЦЕЙ ВЕЧЕРНИ

Блаже́н муж: На Го́споди, воззва́х: поста́вим стихо́в 6 и поем пре́жде проро́ку Авваку́му.

Таже святой, глас 1.

Подо́бен: Всехва́льнии му́ченицы:

Я́ко ми́ро, принесе́ ко Христу́ де́вство без порока/ и пот тружда́ний свои́х, Боже́ственно пожи́вши,/ пречестна́я Миропи́е,/ та́коже и кровь свою́ и ду́шу непоро́чну,/ те́мже сла́вы тя сподо́би/ с пра́ведник и му́ченик чи́нми.

Ты спасе́на еси́ пои́стине,/ Миропи́е всехва́льная,/ по о́бразу́, неврежде́нну Боже́ственными де́лы,/ и Бо́гу подража́тельно,/ по подо́бию показа́ доброде́тели явле́ние,/ та́коже и кро́вию му́ченическою обагри́ оде́жду свою́/ и ко Христу́ притекла́ еси́.

Стра́сти ви́дящи сла́вныя Иси́дора,/ потща́ся им, Миропи́е, подража́ти,/ те́мже, те́ло его́ взя́вши,/ прия́ жела́нное, пострада́вши све́тло, де́во,/ и в червле́ных оде́ждах от кро́ви своей вошла́ еси́,/ такова́я неве́ста, к Христу́, Жениху́ своему́.

В благоуха́нии ми́ра своего́, Христе́,/ поте́кши, Миропи́я пречу́дная/ смра́дныя стра́сти пло́ти воздержа́нием трезви́ и моли́твою умертви́,/ слеза́ми ду́шу очи́стивши,/ на по́прище изгна́ страсть,/ и, свое́ю кро́вию обагри́вшися,/ неве́сто кра́сная, де́вством и му́ченичеством украше́нная,/ к Нетле́нному и Безсме́ртному Жениху́ притече́,/ и, у Того́, Нача́льника жи́зни, двойны́м венце́м увенча́вшися,/ испроси́ла еси́ по дерзнове́нию за ны ве́лию ми́лость.

И ны́не, Богоро́дичен.

Вход. Све́те ти́хий: Проки́мен и паремии́:

Проро́чества Иса́иина чте́ние (глава́́ 43):

Прему́дрости Соломо́новы чте́ние (глава́́ 3):

Прему́дрости Соломо́новы чте́ние (глава́́ 4):

На лити́и стихи́ры, глас 1:

Посто́м те́ло, Миропи́е, истощи́вши/ и ду́шу доброде́тель кре́постию укрепи́вши,/ вше́дши на му́ченик по́прище/ и му́жески подвиза́вшися,/ мучи́телей разруши́ гордость благодерзнове́нием слове́с твои́х,/ и, Христа́ Бо́га всем пропове́давши,/ смерть, безсмертию подо́бну, поя за Него́,/ Ему́же непреста́нно моля́щися за души на́ша.

Сла́ва, глас 5:

Непоро́чно пожи́вши и страстоте́рпчески, Миропи́е всехва́льная,/ досто́йно прия́ у Бо́га нетле́ния вене́ц,/ и ны́не с му́ченики Боже́ственному Престо́лу предстоя́щи,/ и от ве́ка со избра́нными зря́щи,/ и та́мо сла́вы исполня́ющися,/ помяни́ и ны, я́же в ве́ре и любве́ соверша́ющия/ при́сночестну́ю па́мять твою́.

И ны́не, Богоро́дичен:

Блажи́м Тя, Богоро́дице Де́во,/ и сла́вим Тя, ве́рнии, по до́лгу,/ град непоколеби́мый, сте́ну необори́мую,/ тве́рдую Предста́тельницу/ и Прибе́жище душ на́ших.

На стихо́вне стихи́ры, глас 2.

Подо́бен: Егда́ от Дре́ва:

Ми́ро взявши благоче́стия,/ ве́рным ты дая́ше незави́стно, всечестна́я,/ от Боже́ственнаго гро́ба Ермио́нии иногда́,/ и от него́ и́мя получи́ – Миропи́я,/ но и кровь твою́, ми́ра алава́стр,/ Го́споду принесе́ честны́м му́ченичеством,/ му́ченице страстоте́рпице, Жениху́ своему́.

Стих: Терпя́, потерпе́х Го́спода, и внят ми,/ и услы́ша моли́тву мою́.

Ты очи́сти себе́ де́лы Боже́ственными/ и дея́нии от всея́ пло́ти скве́рны,/ и ду́ху, всечестна́я, при́сно приле́жа прему́дростию,/ и, приве́дши все свое́ жела́ние на Не́бо от земли́,/ тем и жития́ вре́менное ты отве́ргла еси́ вельми́, Миропи́е,/ но смерть изво́лиши во́льную.

Стих: Поста́ви на ка́мени но́зе мои́/ и испра́ви стопы́ моя́.

Те́ло Иси́дора честно́е ты утаи́, Миропи́е,/ взя́вши от страж, и, любо́вию ума́стивши, погребе́,/ и́щущим же отыну́ду глаго́ла а́бие,/ тем, я́ко ви́нная, посра́мленная судие́ю,/ приведе́на бысть и обличи́ словесы́ дерзнове́нными, Богому́драя,/ окая́нствие и безче́стие.

Сла́ва, глас 3:

Бла́гою му́дростию и неустраши́мым се́рдцем/ предстоя́вши мучи́телю,/ такова́я отвеща́, не раде́ющи и плева́ющи,/ я́ко сотвори́ли есть сие́ окая́нствие и безбо́жствие,/ сего́ ра́ди бие́на бысть непоща́дно дреко́лием/ и по всему́ гра́ду влеко́ма бысть, веселя́щися крепкоду́шне,/ хотя́ше на Небесе́х блаже́нство,/ его́же и получи́вши и наелади́вшися уже́,/ помяни́ и ны, я́же с любо́вию стра́сти воспева́ющия твоя́.

И ны́не, Богоро́дичен.

Тропа́рь, глас 1:

Доброму́ченице Миропи́е и Христа́ неве́сто нетле́нная,/ ны́не Ему́же предстои́ши, прекра́сная,/ ра́ны нося́щи пло́ти,/ я́ко ка́мни све́тлы и светообра́зны,/ и в крова́вую порфи́ру, я́ко цари́ца, облече́нная, пресла́вная,/ умоли́ Его́ за ны,/ я́же с любо́вию восхваля́ющия/ хвалы́ побе́дными и пе́сньми твою́ Боже́ственную страсть.

НА У́ТРЕНИ

По 1-м стихосло́вии седа́лен, глас 3:

Прекра́сну де́ву Миропи́ю и доброму́ченицу/ восхва́лим, избра́нную неве́сту Христа́, Нетле́ннаго Жениха́,/ Ю́же прия́ в черто́зех Небе́сных/ и ликостоя́нием введе́ держа́вшую де́вства све́тлую лампа́ду в черто́г нетле́нный.

Сла́ва, и ны́не, Богоро́дичен:

Красоте́ де́вства Твоего́/ и пресве́тлой чистоте́ Твое́й Гаврии́л удиви́вся, вопия́ше Ти, Богоро́дице:/ ку́ю Ти похвалу́ принесу́ досто́йную?/ что же возымену́ю Тя?/ недоумева́ю и у́жасаюся./ Те́мже, я́ко повеле́н бых, вопию́ Ти:/ ра́дуйся, Благода́тная.

По 2-м стихосло́вии седа́лен, глас 1.

Подо́бен: Гроб Твой:

Деви́ца избра́нная, нетле́нная отрокови́ца,/ де́ва и́стинная и непоро́чная неве́ста, Миропи́я всехва́льная,/ доброде́тельми светле́йшая и страсте́й украше́нная многоразли́чно Боже́ственными ра́нами,/ к Царю́ всех, Христу́, притекла́ есть.

Сла́ва, и ны́не, Богоро́дичен:

Мари́е, честно́е Влады́ки прия́телище,/ воскреси́ ны, па́дшия в про́пасть лю́таго отча́яния, и прегреше́ний, и скорбе́й./ Ты бо еси́ гре́шным спасе́ние, и по́мощь, и кре́пкое предста́тельство/ и спаса́еши рабы Твоя́.

По полиеле́е седа́лен, глас4.

Подо́бен: Вознесы́йся:

Нестерпи́мыя ра́ны, я́же претерпе́ла еси́, и главы́ боле́зни,/ влачи́ма бо бысть по гра́ду за власы́ безми́лостивно, Миропи́е,/ сему́ ра́дующися, пренесла́ еси́, сла́вная, темни́цу и смерть,/ Христу́ в моли́тве за ны предста́тельствуй.

Сла́ва, и ны́не, Богоро́дичен:

Тя заступле́ние вси и́мамы, гре́шнии, о Пречи́стая Де́во,/ Ты благоуве́тлива нам сотвори́ Сы́на Твоего́ ма́терними Твои́ми моли́твами.

Степе́нна 1-й антифо́н 4-го гла́са. Проки́мен, глас 4: Терпя́, потерпе́х Го́спода: Стих: И поста́ви на ка́мени но́зи мои: Ева́нгелие от Ма́рка, зачало 21.

Кано́н, глас 1.

Песнь 1

Смра́ден и ме́рзок аз сый, Миропи́е имени́тая,/ чи́стую и непоро́чную тя, благоуха́ние Христо́во, прославля́ти дерза́ю,/ но ты мя прости́.

Возлю́бленными пе́сньми твою́ воспева́ти страсть, по́двиги/ благода́ть мне от высо́т святы́х ниспосли́/ твои́ми моли́твами, благода́тная.

Храня́щи непоро́чность по о́бразу Бо́жию и подо́бию,/ от о́трочества сподо́бися о́бщница страсте́м Христо́вым ста́ти, сла́вная.

Богоро́дичен: Свет носи́вшая во чре́ве, Изба́вителя моего́,/ тьмы мя изба́ви и мук, Пречи́стая, ве́чных,/ та́ко, спасе́нный, воспою́ вели́чествие Твое́.

Песнь 3

Ирмо́с: Да утверди́тся се́рдце мое́ в во́ли Твое́й, Христе́ Бо́же,/ и́же над вода́ми не́бо утвержде́й второ́е/ и основа́вый на вода́х, зе́млю, Всеси́льне.

К Боже́ственному гро́бу приступи́вши Ермио́нии, Миропи́е честна́я,/ источи́ от него́ Боже́ственное ми́ро/ и от того́ и́мя взя, е́же су́ще и́мени́тое.

Гоне́нию одержа́вшу всю Аси́ю,/ ты, ну́ждена бы́вши неми́лостивно оста́вити Ефе́с,/ ма́терне оте́чество обрела́ еси́, Хио́с, прибе́жище.

Моли́тве при́сно прилежа́щи воздержа́нием,/ и трезве́нием велему́дрым омраче́ние страсте́й умертви́,/ и Христу́ бысть ми́ро жития́ чи́ста.

Боже́ственною любо́вию и рачи́тельством, о страстоте́рпице Миропи́е честна́я,/ погуби́ страх и оста́нки Иси́дора исхи́ти.

Богоро́дичен: Беспло́днаго помышле́ния моего́ беспло́дие вся́чески изгони́/ и плодови́тое доброде́тельми души́ моей яви́,/ Всесвята́я Богоро́дице, ве́рных По́мощнице.

Седа́лен, глас 4.

Подо́бен: Яви́лся еси́ днесь:

Ран я́звами украше́нная и кро́вию свое́ю очервле́нная,/ разу́мно в сла́ве предста́ла еси́ Боже́ственному Христа́ Престо́лу,/ Миропи́е сла́вная.

Сла́ва, и ны́не, Богоро́дичен:

Ра́дуйся, Престо́ле о́гненный Царя́ и Свети́льниче злато́й Све́та Бо́жияго,/ ду́ши и помышле́ния освеща́ющи воспева́ющих Тя, Де́во Всепе́тая.

Песнь 4

Ирмо́с: Ду́хом прови́дя, проро́че Авваку́ме, Словесе́ воплоще́ние,/ пропове́дал еси́, вопия́:/ внегда́ прибли́житися ле́том – позна́ешися,/ внегда́ приити́ вре́мени – пока́жешися./ Сла́ва си́ле Твое́й, Го́споди.

Ве́лие твое дея́ние и зело́ ди́вное:/ ка́ко, посреде́ страж дости́гнувши те́ла,/ взяла́ еси́ сие́, Миропи́е крепкоду́шная,/ и не зна́ша бы́вшее храня́щии.

В любве́ пребы́вши, Миропи́е чу́дная,/ Боже́ственное те́ло прия́ рука́ма,/ пе́сньми благослови́, просла́ви Бо́жий дар, Иси́дора те́ло,/ и, с ве́рою обнима́ющи сие́, ума́сти.

Погре́бши с че́стию те́ло честно́е, ра́довашеся,/ я́ко иму́щи Боже́ственное сокро́вище,/ но, уве́давши иска́ние мучи́теля, хотя́щаго изнури́ти тя,/ веща́ла еси́ испыта́ющим, не убоя́вшися сме́рти.

Богоро́дичен: Де́во Пресвята́я,/ Неоскверне́нная Ски́ние,/ оскверне́нна грехи́ очи́сти мя ны́не/ щедро́т Твои́х ка́плями чисте́йшими/ и даждь ми ру́ку по́мощи,/ да воспою́ сла́ву Тебе́, Чи́стая, Благослове́нная.

Песнь 5

Ирмо́с: Твой мир даждь нам,/ Сы́не Бо́жий:/ ино́го бо, ра́зве Тебе́, бо́га не зна́ем,/ И́мя Твое и́мену́ем,/ я́ко Бог живы́х и ме́ртвых еси́.

Му́жеским смы́слом, бла́гою душе́ю ста́ла еси́, Миропи́е всечу́дная,/ пред мучи́телем го́рдым и рекла́ еси́,/ я́ко те́ло хотя́щи укра́сти.

О, чудесе́, ка́ко не устраши́ся вельми́ го́рдаго и безми́лостиваго мучи́теля,/ и посрамле́ния, и лю́тости, и я́рости, чу́дная Миропи́е,/ но избра́ла еси́ благодерзнове́ние.

Ка́ко дерзну́вшая решти́ о злых,/ глаго́лала еси́ му́жески о окая́нствии и бесче́стии, Миропи́е,/ твои́ми словесы́́ дерзнове́ния.

Богоро́дичен: Умоли́, Его́же родила́ еси́, Де́во,/ спасти́ ве́рою Тебе́ вопию́щих:/ ра́дуйся, Де́во Всеблаже́нная,/ ра́дуйся, Благослове́нная, всему́ ми́ру заступле́ние.

Песнь 6

Ирмо́с: Проро́ка Ио́ну подража́я, вопию́:/ живо́т мой, Бла́же, свободи́ из тли/ и спаси́ мя, Спа́се ми́ра, зову́ща: сла́ва Тебе́.

Дерзнове́ние твое́ мно́гое/ преступи́ пои́стине и превзы́де вся́ческая словесы́ хи́трыми, Миропи́е достохва́льная.

Ка́ко возмогла́ еси́ изглаго́лати и пропове́дати мно́го/ и извеща́ти чу́дно любо́вь твою́ ко Христу́, всехва́льная,/ ея́же ра́ди смерть приявши.

Хра́брость, Миропи́е достохва́льная, души́ твоея́,/ словеса́ мно́зи, дерзнове́ние лука́вое разруши́,/ мучи́теля, му́ченице, уничижи́.

Богоро́дичен: Бла́говоле́нием Отца́ воплоти́ся Сын Ду́хом Бо́жиим во чре́ве Твое́м, Чи́стая,/ спаси́ нас, Бо́га Ро́ждшая.

Конда́к, глас 3.

Подо́бен: Де́ва днесь:

По и́мени, о страстоте́рпице Миропи́е,/ ми́ро источа́еши благода́ти чуде́с/ и пасе́ши всех, подоба́ющих и взыска́ющих/ и ве́рою и доброде́телию прибега́ющих к ра́це твое́й пречестне́й,/ я́же держи́т прах твой.

И́кос:

Я́ко неве́ста Христу́ жития́ ра́ди чисте́йшая/ и стра́сти ра́ди светле́йшая, прекрасноде́во Миропи́е достосла́вная,/ чуде́с благода́ть источа́еши, я́ко ми́ро,/ и пасе́ши всех, с ве́рою и любо́вию к пречестне́й ра́це твоей приходя́щих,/ пребыва́ет бо в ней Свята́го Ду́ха благода́ть,/ я́ко держи́т свяще́нный прах твой.

Песнь 7

Ирмо́с: Пещь, Спа́се, ороша́шеся,/ о́троцы же, лику́юще, поя́ху:/ отце́в Бо́же, благослове́н еси́.

Повеле́вшу дреко́льми му́чити посрамле́ну мучи́телю те́ло твое́,/ прия́ го́рькия и боле́зненныя ра́ны.

Те́ло твое́ я́звами похвали́ся,/ струя́ми кро́ви пора́довася,/ но любо́вию Христо́вою претерпе́ла еси́ вся му́жески.

Кро́вию очерви́ оде́жду деви́ческу, всехва́льная,/ и неве́стою приведе́ся ко Христу́, Царю́ всего́ ми́ра.

Богоро́дичен: Тя ве́даю, Богоневе́сто, Со́лнце Сла́вы ро́ждшую,/ просвети́вшее ночь мои́х согреше́ний.

Песнь 8

Ирмо́с: Его́же ужаса́ются А́нгели и вся во́инства,/ я́ко Творца́ и Го́спода,/ по́йте, свяще́нницы, просла́вите, о́троцы,/ благослови́те, лю́дие,/ и превозноси́те во вся ве́ки.

Посрами́ла еси́ ум зве́ря лю́таго,/ повеле́вшаго тя на студ за власы́ влещи́ по гра́ду.

Уязви́вше те́ло твое неми́лостивно/ и повле́кше тя за власы́, де́во,/ сме́рти близ оста́виша Миропи́ю в темни́це.

Но́щию моли́вшуся тебе́ те́пле в темни́це,/ свет ве́лий возсия́, и А́нгели све́тлии предста́ша внеза́пу,/ и возлю́бленный Иси́дор рече́:/ мир тебе́, Миропи́е.

Богоро́дичен: Воздви́гше лежа́щаго мя в глубине́ зол,/ ны́не борю́щих мя враг побори́,/ изыми́ от нечи́стых сласте́й ду́шу, Чи́стая,/ не оста́ви, но уще́дри и спаси́.

Песнь 9

Ирмо́с: Светоно́сный о́блак, в о́ньже всех Влады́ка,/ я́ко дождь с Небесе́ на руно́, сни́де/ и воплоти́ся нас ра́ди,/ быв Челове́к, Безнача́льный,/ велича́ем вси я́ко Ма́терь Бо́га на́шего Чи́стую.

Светле́йшую ду́шу твою́ а́нгельстии ли́ки ку́пно с Иси́дором сла́вным в ми́ре взя́вше,/ вознесо́ша тя на Небеса́ я́ко блаже́нну ко Христу́ Жениху́,/ И́же повеле́л сие́ де́вам в черто́зе разу́мнем.

И́стиннаго нетле́ния светле́йшую лампа́ду иму́щи в руце́ и вене́ц кра́сен,/ в багря́ную оде́жду та́йную, окра́шенную кро́вию твое́ю, страстоте́рпице,/ све́тло облече́нная, ца́рствуеши со Христо́м.

Я́зв боле́зни, и держа́ние влас,/ и вред главе́, и кро́ве проли́тие,/ и телесе́ всего́ свяще́нныя ра́ны принесе́ ко Христу́ в моли́тве за вся,/ чту́щих тя ве́рно.

Богоро́дичен: Грехолю́бец сый, в небреже́нии пребыва́ю/ и Суда́, Чи́стая, безме́зднаго страшу́ся,/ на немже сохрани́ Твои́ми святы́ми моли́твами, Богоневе́сто,/ и ублажи́ неосужде́нну предста́ти.

Ексапостила́рий.

Подо́бен: Не́бо звезда́ми:

Претерпе́ла еси́ муче́ния путь Богому́дрый вельми́ горя́щею душе́ю/ и ны́не всели́лася на Небеса́, в нетле́нныя черто́зи,/ де́во му́ченице Миропи́е.

Богоро́дичен:

Сла́дость А́нгел, скорбя́щих ра́дость,/ христиа́н предста́тельство, Де́во, Ма́ти Бо́га,/ заступи́ нас, изба́ви ве́чных мук.

На хвали́тех стихи́ры, глас 4.

Подо́бен: Я́ко до́бля:

Ко Христу́ Боже́ственной любо́вию/ боде́на бы́вши, всепе́тая,/ ра́дующися, взы́де на по́прище му́ченическое,/ и прия́ ра́ны и я́звы,/ и разруши́ враг го́рдость/ и шата́ние пре́ю твое́ю, Миропи́е,/ и вене́ц взя и честь, твои́х по́двиг досто́йну.

Всесвято́е те́ло Иси́дора, всечу́дная,/ му́жески взя́вши и погре́бши,/ и, я́ко обогати́вшися,/ неосра́мленно, све́тлая, в страсте́х вошла́ еси́ в ров стра́сти,/ прекрасному́ченице Миропи́е,/ Иси́дор же предста́ тебе́ в темни́це ме́рзцей,/ Боже́ственный мир дарова́.

Соверша́ющих па́мять твою́/ и стра́сти хва́лящих/ защити́, сохрани́ моли́твами твои́ми благоприя́тными ко Го́споду,/ Миропи́е всехва́льная, прекрасному́ченица Христа́,/ страстоте́рпице непобеди́мая и пресла́вная,/ от вся́каго зла, напа́стей, губи́тельства,/ враг наше́ствия изба́ви.

Сла́ва, глас 8:

Я́ко звезда́ приведе́ волхвы́,/ несу́щия да́ры Тебе́,/ Мы́сленному Пра́ведному Со́лнцу, Христе́ Бо́же,/ ра́ди нас рожде́нному,/ та́ко и свет Боже́ственнаго зако́на/ де́ву Миропи́ю приведе́,/ да́ры прине́сшу:/ лива́н – све́тлость де́вства,/ ми́ро – доброде́тели,/ сми́рну – во́льную смерть/ ко Влады́це, одесну́ю седя́щему Отца́,/ ея́же благоприя́тными моли́твами/ и нас сподо́би сохрани́ти спаси́тельныя Твоя́ за́поведи/ и спаси́ нас, я́ко Благ и Человеколю́бец.

И ны́не, Богоро́дичен.

НА ЛИТУРГИ́И

Слу́жба жена́м му́ченицам.

Святая мученица Миропия

Святая мученица Миропия пострадала за Христа около 251 года на острове Хиосе. Она родилась в городе Ефесе (Малая Азия) в начале III века и была воспитана в христианской семье. Святая получила имя Миропия, потому что отличалась сострадательностью к больным и лечила их миром от мощей святой мученицы Ермионии († ок.117; память 4 сентября), дочери апостола Филиппа, и других мучеников. После смерти отца святая Миропия с матерью, спасаясь от гонителя христиан императора Декия (249–251), переселилась в свое имение на острове Хиосе. Через некоторое время там был замучен доблестный христианин-воин Исидор († 251; память 14 мая). Тело его бросили на съедение зверям. Была приставлена стража, чтобы христиане не могли взять его и похоронить. Но, когда воины заснули, дева Миропия смело взяла тело мученика Исидора и с молитвой предала его земле. Стражам угрожала смертная казнь. Узнав об этом, святая Миропия сжалилась над воинами и сама рассказала им о своем поступке. Приведенная на суд к жестокому правителю, она исповедала себя христианкой. После истязаний ее бросили в темницу. Ночью к ней явился в несказанном свете мученик Исидор в окружении святых Ангелов и принял душу святой Миропии.

Преподо́бнаго Афана́сия затво́рника, в Да́льних пеще́рах почива́ющаго

Тропа́рь, глас 7:

По и́мени своему́ за труды́ ве́лия/ и всегда́шнее зде умерщвле́ние пло́ти в затво́ре/ безсме́ртную ны́не на Небеси́/ жизнь насле́довавый,/ мо́лим тя приле́жно:/ моли́ся о нас,/ я́ко да и мы тоя́жде сподо́бимся получи́ти.

Конда́к, глас 1:

Ве́дый ми́ра сего́ суету́ бы́ти тще́тну,/ отврати́лся еси́ ея,/ не ктому́ сами́ма очи́ма,/ но и всего́ себе́ всеконе́чне, преподо́бне, отврати́в,/ затвори́лся еси́ в те́мней пеще́ре,/ в не́йже в моли́твах и слеза́х многовре́менне потру́ждся/ и обре́т на Небеси́ безконе́чную ра́дость,/ моли́ся непреста́нно за ду́ши на́ша.

Преподобный Афанасий, затворник Печерский

Преподобный Афанасий, затворник Печерский, подвизался в Дальних пещерах в XIII веке. Имя его упоминается в 4-й песни общего Канона преподобным отцам Дальних пещер. В «Сказании о житиях святых, в пещере преподобного Феодосия почивающих» говорится, что преподобному Афанасию в затворе не нужна была свеча: его пещеру освещала Небесная светлость.

Господь прославил подвижника благодатным даром исцелений, которые православные христиане получают по молитвам преподобного Афанасия. Память святого совершается также 28 августа и во 2-ю Неделю Великого поста.

Священномученика Влади́мира пресви́тера, Московскаго

Тропа́рь, глас 4:

Но́ваго священному́ченика Влади́мира,/ лю́дие, ны́не почти́м,/ той бо кро́вию свое́ю зе́млю моско́вскую обагри́/ и, я́ко же́ртва жива́я, Христу́ принесе́ся./ Те́мже благодать предста́тельства стяжа́в/ и в со́нме новому́чеников Росси́йских водвори́вся,// мо́лится при́сно о спасении душ наших.

Конда́к, глас 2:

Первосвяти́телю Всеросси́йскому Ти́хону споспе́шник был еси́,/ с ни́мже и ча́шу гоне́ний испи́в,/ Христу́ да́же до сме́рти ве́рен яви́лся еси́./ Сего́ ра́ди Ему́ я́ко Вели́кому Царю́ ны́не предстои́ши,/ о́тче наш Влади́мире,/ и мо́лиши непреста́нно// о чту́щих любо́вию святу́ю па́мять твою́.

Священномученик Владимир, пресвитер Московский

Священномученик Владимир, пресвитер Московский, родился 29 июня 1874 года в Москве в семье священника Александра Проферансова.

Владимир Александрович Проферансов окончил Московскую духовную семинарию и стал работать учителем. Он был талантливым, неутомимым тружеником народных библиотек и приходских школ.

Вскоре его определили псаломщиком храма святого великомученика Георгия на Лубянке, где впоследствии он исполнял обязанности старосты, а после рукоположения служил диаконом и – с 1920 года – священником.

Отец Владимир являлся секретарем святителя Тихона, Патриарха Московского и всея Руси. После кончины Патриарха Тихона отец Владимир исполнял различные церковные поручения заместителя местоблюстителя патриаршего престола митрополита Сергия.

Безбожники, захватившие власть в России, предложили отцу Владимиру быть доносчиком, но он категорически отказался, и никакие угрозы не могли его поколебать. Его арестовали и заключили в Бутырскую тюрьму. На допросе на вопрос, поминает ли он в церкви тех, кто заключен за антиправительственную деятельность, отец Владимир подтвердил, что всегда поминает, когда подают записки о поминовении заключенных. Его обвинили в том, что он является убежденным противником существующей власти и отправили на три года в ссылку в Семипалатинск.

Из ссылки отец Владимир вернулся тяжело больным. Так как ему запретили жить в Москве, он поселился в Можайске. Свой дом в Москве, где жила его жена, он мог посещать только тайно, не задерживаясь в нем более суток.

Безбожники опять попытались сделать отца Владимира доносчиком, обещая назначить его настоятелем храма. Священник отказался, и ему запретили служить.

Через два года его вновь арестовали. 2 декабря 1937 года священник Владимир Проферансов был расстрелян и погребен в неизвестной общей могиле.

Прославлен священномученик Владимир пресвитер, Московский, в 2000 году. Память его празднуется 2 декабря, а также в воскресенье 25 января или ближайшее после 25 января – в Соборе новомучеников и исповедников Российских и в воскресенье перед 26 августа – в Соборе Московских святых.

Тропарь и кондак священномученику Владимиру рассмотрены Синодальной Богослужебной комиссией и утверждены Святейшим Патриархом Московским и всея Руси Алексием II и Священным Синодом Русской Православной Церкви 26 декабря 2001 года.

* * *

прослу́ся – сделалось изве́стным, просла́вилось

1-й день3-й день

Источник: Минея - М. : Издат. совет Русской Православной Церкви, 2002-. 12 том. / Минея декабрь. - 2002. / Ч. 1. – 600; Ч. 2. - 560 с.

Telegram-каналы

Комментарии для сайта Cackle