7-й день

Свята́го преподобному́ченика Домети́я

Преподо́бнаго Пи́мена Многоболе́зненнаго, в Бли́жних пеще́рах почива́ющаго

Обре́тение моще́й святи́теля Митрофа́на, епи́скопа Воро́нежскаго

Святи́теля Мерку́рия, епи́скопа Смоле́нскаго, в Бли́жних пеще́рах почива́ющаго

Преподо́бнаго Пи́мена, по́стника Пече́рскаго, в Да́льних пеще́рах почива́ющаго

НА ВЕЧЕ́РНИ

На Го́споди, воззва́х: стихи́ры пра́здника 3, глас 4.

Подо́бен: Зва́нный свы́ше:

Пре́жде Честна́го Креста́ Твоего́ и страда́ния,/ пое́мь, и́хже проразсуди́л еси́, от свяще́нных учени́к,/ на Фаво́рскую, Влады́ко, возше́л еси́ го́ру,/ показа́ти восхоте́в сим сла́ву Твою́,/ и́же и ви́девше Тя преобрази́вшася/ и па́че со́лнца просия́вша,/ ни́цы па́дше,/ си́ле Твое́й удиви́шася, взыва́юще:/ Ты безле́тен Свет еси́, Христе́,/ и сия́ние О́тчее,/ а́ще и во́лею плоть яви́лся еси́, Неизме́нне.

И́же пре́жде век Сый Бог Сло́во,/ И́же Све́том, я́ко ри́зою, одева́яйся,/ преобразу́ющийся пред ученики́ Твои́ми,/ па́че со́лнца, Сло́ве, проси́ял еси́,/ Моисе́й же и Илия́ Тебе́ предста́ша,/ ме́ртвым и живы́м Тя, Го́спода, пове́дающе/ и Твое́ сла́вяще неизрече́нное смотре́ние, и ми́лость,/ и мно́гое милосе́рдие,/ и́мже спасл еси́ мир,/ грехо́м погиба́ющий.

От Деви́ческаго о́блака Тя рожде́нна,/ и плоть бы́вша,/ и на горе́ Фаво́рстей преобразу́ющася, Го́споди,/ и о́блаком све́тлым Тя окружа́ема,/ глас Роди́телев возлю́бленнаго Тя Сы́на,/ ученико́м предстоя́щим Тебе́, я́ве ска́зоваше,/ я́ко Единосу́щна и Единопресто́льна./ Те́мже Петр, удивля́яся,–/ добро́ есть зде бы́ти,– глаго́лаше,/ не ве́дый, е́же глаго́лаше,/ Благоде́телю Многоми́лостиве.

И́ны стихи́ры свята́го, глас 6.

Подо́бен: Всю отложи́вше:

Все отложи́в волше́бное обая́ние,/ и пе́рсское скверне́ние, и ме́рзкая служе́ния,/ Бо́гу прите́кл еси́, му́дрым промышле́нием/ окормля́ющему челове́чество,/ Его́же и́менем апо́стольски исцели́л еси́/ безслове́сных неду́ги и челове́ческия боле́зни,/ притека́ющих усе́рдно к тебе́, уго́дниче Христо́в./ Его́же со дерзнове́нием моли́/ о душа́х на́ших.

Весь возложи́л еси́ твой живо́т Го́споду/ и те́пле отлучи́лся еси́/ к по́стному тече́нию, преподо́бне,/ моли́тву несумне́нну, бде́ние всено́щное,/ пе́ние непреста́нное/ и житие́ непоро́чное и А́нгельское показу́я./ Отсю́ду де́йствием чуде́с обогати́лся еси́:/ весть бо сла́вити Госпо́дь рабы́ Своя́,/ Его́же со дерзнове́нием моли́/ о душа́х на́ших.

Весь оде́явся Кре́стным всеору́жием/ и неразруши́мым щито́м ве́ры обложи́вся,/ стра́шен был еси́/ супроти́вным де́монским ополче́нием,/ и́хже и отгна́л еси́,/ ра́ною ве́ры пома́зався/ и Боже́ственными призыва́нии,/ и в путь ше́ствующия спасл еси́ вре́да о́нех,/ Домети́е, уго́дниче Христо́в./ Его́же со дерзнове́нием моли́/ о душа́х на́ших.

Сла́ва, и ны́не, глас 6:

Прообразу́я воскресе́ние Твое́, Христе́ Бо́же,/ тогда́ поя́т три Твоя́ ученики́,/ Петра́, и Иа́кова, и Иоа́нна,/ на Фаво́р возше́л еси́./ Тебе́ же, Спа́се, преобразу́ющуся,/ Фаво́рская гора́ Све́том покрыва́шеся,/ ученицы́ Твои́, Сло́ве,/ поверго́ша себе́ до́лу на земли́,/ не терпя́ще зре́ти неви́димаго зра́ка,/ А́нгели служа́ху стра́хом и тре́петом,/ Небеса́ убоя́шася,/ земля́ вострепета́,/ ви́дяще на земли́ сла́вы Го́спода.

Вход. Проки́мен, глас 7:

Бог наш на Небеси́ и на земли́,/ вся, ели́ка восхоте́, сотвори́.

Стих: Во исхо́де Изра́илеве от Еги́пта, до́му Иа́ковля из люде́й ва́рвар,/ бысть Иуде́я святы́ня Его́, Изра́иль о́бласть Его́.

Стих: Мо́ре ви́де и побеже́,/ Иорда́н возврати́ся вспять.

Стих: Что ти есть, мо́ре, я́ко побе́гло еси́?/ И тебе́, Иорда́не, я́ко возврати́лся еси́ вспять?

Та́же ектения́.

* * *

А́ще случи́тся пра́здник сей в суббо́ту: В пято́к ве́чера пое́м проки́мен вели́кий: Бог наш на Небеси́ и на земли́: со стихи́ его́. В субботу же ве́чера в пра́здник пое́м проки́мен: Госпо́дь воцари́ся: А́ще случи́тся пра́здник сей в Неде́лю: Поем в суббо́ту ве́чера проки́мен: Госпо́дь воцари́ся: со стихи́ его́. В Неде́лю же ве́чера пое́м проки́мен вели́кий: Бог наш на Небеси́ и на земли́: со стихи́ его́.

На стихо́вне стихи́ры, глас 6.

Подо́бен: Тридне́вен:

Вообра́жся за милосе́рдие, Христе́,/ во Ада́ма, пе́рваго челове́ка, от Де́вы,/ яви́лся еси́ вторы́й Адам,/ на горе́ же, Спа́се мой, Фаво́рстей преобрази́лся еси́,/ обнажа́я Божество́ Твое́.

Стих: Твоя́ суть небеса́,/ и Твоя́ есть земля́.

Удиви́шася, зря́ще, Твоея́ благода́ти лу́чшии зако́на,/ преображе́ния, Христе́, на горе́ святе́й,/ с ни́миже покланя́емся Тебе́/ со Отце́м и Боже́ственным Ду́хом.

Стих: Фаво́р и Ермо́н/ о И́мени Твое́м возра́дуетася.

Просвеща́ется тварь я́сно/ Твои́м преображе́нием, Христе́,/ е́же Боже́ственным апо́столом на Фаво́ре,/ Моисе́ю же и Илии́, показа́л еси́, Бог Сый,/ неизрече́нно проси́яв па́че со́лнца.

Сла́ва, и ны́не, глас 5:

Прииди́те, взы́дем на го́ру Госпо́дню/ и в дом Бо́га на́шего/ и у́зрим сла́ву преображе́ния Его́/ сла́ву я́ко Единоро́днаго от Отца́,/ све́том прии́мем Свет/ и, возвы́шени бы́вше ду́хом,/ Тро́ицу Единосу́щную воспои́м во ве́ки.

Тропа́рь, глас 4:

По́стнически предподвиза́вся на горе́,/ у́мная враго́в ополче́ния/ всеору́жием Креста́ погуби́л еси́, всеблаже́нне./ Па́ки же ко страда́льчеству му́жески обле́клся еси́,/ уби́в Копрони́ма мече́м ве́ры,/ и обои́х ра́ди венча́лся еси́ от Бо́га,/ преподобному́чениче Домети́е приснопа́мятне.

Сла́ва, и ны́не, пра́здника, глас 7:

Преобрази́лся еси́ на горе́, Христе́ Бо́же,/ показа́вый ученико́м Твои́м сла́ву Твою́,/ я́коже можа́ху,/ да возсия́ет и нам, гре́шным,/ Свет Твой присносу́щный/ моли́твами Богоро́дицы,/ Светода́вче, сла́ва Тебе́.

На повече́рии конда́к пра́здника и до отда́ния.

НА У́ТРЕНИ

По 1-й стихоло́гии седа́лен, глас 4.

Подо́бен: Яви́лся еси́ днесь:

Пра́здник пресве́тел Влады́чень прии́де:/ прииди́те вси, на го́ру, у́мно предочи́стившеся, взы́дем Фаво́рскую,/ Христа́ ви́дети.

Сла́ва, и ны́не, то́йже.

По 2-й стихоло́гии седа́лен, глас 4.

Подо́бен: Удиви́ся Ио́сиф:

На горе́ Фаво́рстей преобрази́лся еси́, Бо́же,/ посреди́ Илии́ и Моисе́я прему́дрых, со Иа́ковом, и Си́моном, и Иоа́нном./ Петр же, сый ту, сия́ Тебе́ глаго́лаше:/ добро́ есть зде сотвори́ти три се́ни,/ еди́ну Моисе́ю, и еди́ну Илии́, и еди́ну Тебе́, Влады́це Христу́./ И́же тогда́ сим Свет Твой возсия́вый, просвети́ ду́ши на́ша.

Сла́ва, и ны́не, то́йже.

Кано́н пра́здника со ирмосо́м на 8. Кир Космы, глас 4.

Песнь 1

Ирмо́с: Ли́цы изра́ильтестии,/ невла́жными стопа́ми/ понт Чермны́й и вла́жную глубину́ прогна́вше,/ вса́дники триста́ты враги́ ви́дяще в ней погруже́ны,/ с весе́лием поя́ху:/ пои́м Бо́гу на́шему, я́ко просла́вися.

Глаго́лы живо́тныя друго́м Христо́с/ и о Боже́ственнем наказу́я Ца́рствии, рече́:/ во Мне Отца́ позна́йте;/ Све́том я́ко облиста́я непристу́пным, в ра́дости пою́ще:/ пои́м Бо́гу на́шему, я́ко просла́вися.

Си́лою язы́к облече́теся, дру́зи ученицы́,/ чу́дни же бу́дете в бога́тстве их, я́ко сла́вы напо́лнитеся,/ я́ко явлю́ся светле́е со́лнца, облиста́я в ра́дости пою́щих:/ пои́м Бо́гу на́шему, я́ко просла́вися.

Днесь Христо́с, на горе́ Фаво́рстей проси́яв я́сно Боже́ственною заре́ю,/ я́коже обеща́ся, ученико́м обнажи́ зрак,/ светоно́сный же напо́лнившеся Боже́ственныя зари́, в ра́дости поя́ху:/ пои́м Бо́гу на́шему, я́ко просла́вися.

Кано́н свята́го, на 4. Творе́ние Феофа́ново, глас 6.

Песнь 1

Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную песнь пои́м, вопия́ше.

К Бо́гу отше́д, му́ченическою сия́я благода́тию,/ пою́щим тя ве́рно светоно́сную вдохни́ зарю́, моля́ Христа́, Богоблаже́нне.

Расто́рг мре́жи пре́лести, и́стинно Христу́ прите́кл еси́,/ мы́слию чи́стою пе́рсская служе́ния оста́вль/ и волше́бнаго избе́г безбо́жия.

Хи́тре усмотри́л еси́, я́ко не бог, я́ко созда́нное со́лнце,/ но ни еди́наго от ви́димых над неви́димаго Бо́га, наста́влен был еси́,/ по́мыслом му́дрым объе́мся.

Богоро́дичен: Тя, Всесвята́я Де́во, Сы́на Бо́жия ро́ждшую,/ бы́вшаго по нам ра́ди нас,/ пропове́дуем Чи́стую Богома́терь, ве́рнии, и ублажа́ем.

Песнь 3

Ирмо́с: Лук си́льных изнемо́же,/ и немощству́ющии препоя́сашася си́лою,/ сего́ ра́ди утверди́ся в Го́споде се́рдце мое́.

Во всего́ Ада́ма обле́кся, Христе́,/ очерне́вшее, измени́в, просвети́л еси́ дре́вле естество́/ и измене́нием зра́ка Твоего́ богосоде́лал еси́.

Столпо́м огнезра́чным и о́блаком дре́вле/ И́же в пусты́ни Изра́иля веды́й,/ днесь на горе́ Фаво́рстей неизрече́нно во све́те Христо́с проси́я.

Ин

Ирмо́с: Несть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.

Изве́стною ве́рою утве́рждься, я́коже непрекло́нен столп, непрело́жен яви́лся еси́,/ ни словесы́ волше́бными, ни ра́зумом пе́рсскаго бая́ния прельще́н.

Я́да душегу́бнаго бежа́л еси́, е́же тва́ри служи́ти и со́лнце почита́ти,/ су́щаго же вои́стинну Бо́га, я́ко всех Зижди́теля,/ благоче́стия любо́вию взыска́л еси́.

Вода́м Боже́ственным прича́щся па́ки бытия́, ду́шу озари́л еси́/ и был еси́ вои́стинну сын благода́ти Бо́жия,/ насле́дник Боже́ственных наслажде́ний.

Богоро́дичен: Прему́дрость храм себе́ созда́ Боже́ствен па́че ума́ же и сло́ва,/ все́льшися в чи́стую утро́бу Твою́,/ ю́же че́стне очи́щши Ду́хом, Всенепоро́чная.

Конда́к, глас 6:

Я́ко преоби́дев тле́нная и до́лу влеку́щая мудрова́ния,/ преподобному́чениче Домети́е,/ вели́к наста́вник мона́хом показа́лся еси́,/ не устраши́вся я́рости царя́, не хотя́ща чти́ти Христа́, и́стиннаго Бо́га./ Сего́ ра́ди и сконча́лся еси́, воспева́я песнь:/ Бог есть со мно́ю, и никто́же на мя.

Седа́лен, глас 8.

Подо́бен: Прему́дрости:

Пе́рсское служе́ние оста́вль, ко Влады́це прише́л еси́,/ ба́нею Креще́ния, сла́вне, просве́щся мы́слию, и, мона́шествовав преподо́бно,/ посто́м умертви́л еси́ плотски́я стра́сти, Богому́дре Домети́е./ Те́мже пострада́в и пре́лесть победи́в, сугуб вене́ц побе́ды восприя́л еси́./ Сего́ ра́ди вопие́м тебе́:/ моли́ Христа́ Бо́га грехо́в оставле́ние пода́ти/ чту́щим любо́вию святу́ю па́мять твою́.

Сла́ва, и ны́не, глас то́йже.

Подо́бен: Повеле́нное:

Сокрове́нную мо́лнию под пло́тию существа́ Твоего́, Христе́,/ и Боже́ственнаго благоле́пия на святе́й показа́л еси́ горе́, Благоде́телю,/ проси́яв су́щим с Тобо́ю ученико́м/ и, разуме́вше нестерпи́му су́щу сла́ву Твою́,– Свят еси́,– возопи́ша,/ я́ко неприступе́н Сый, ви́ден был еси́ пло́тию ми́рови,/ Еди́не Человеколю́бче.

Песнь 4

Ирмо́с: Услы́шах сла́вное смотре́ние Твое́, Христе́ Бо́же,/ я́ко роди́лся еси́ от Де́вы,/ да от ле́сти изба́виши зову́щия:/ сла́ва си́ле Твое́й, Го́споди.

Зако́н в Сина́и писа́нием вообража́я, Христе́ Бо́же,/ во о́блаце, и огни́, и мра́це, и в ви́хре яви́лся еси́ носи́м:/ сла́ва си́ле Твое́й, Го́споди.

Да уве́риши сла́вное строе́ние Твое́, Христе́ Бо́же,/ я́ко Сый пре́жде век и То́йже на о́блаце восхожде́ние положи́вый,/ на Фаво́ре неизрече́нно проси́ял еси́.

Соглаго́люще, предстоя́ху раболе́пно Тебе́, Влады́це Христу́,/ к ни́мже па́рою огня́ и мра́ка и то́нким хла́дом бесе́довал еси́:/ сла́ва си́ле Твое́й, Го́споди.

Возвеща́ху сла́вное Креста́ ра́ди Твоего́, на Фаво́р прише́дше,/ и́же во огни́ Тя и купине́ дре́вле предви́девый Моисе́й/ и взя́тый на колесни́це о́гненней Илия́, Христе́.

Ин

Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.

Позна́л еси́, сла́вне, естество́м Неве́домаго,/ слове́сно взы́скал еси́ и, обре́т Сего́, возжела́в,/ поклони́лся еси́, ра́дуяся, Того́ вели́чествию.

Ли́ку целому́дрому те́пле прите́кл еси́ мона́шествующих святы́х/ и, доброде́телей ре́вностию распала́емь,/ пожи́л еси́ чи́сте в посте́х и моли́твах.

Удо́бь разреши́ соу́зы естества́ богому́дренное твое́ жела́ние, о́тче,/ и страсте́й угаси́ пещь росода́тельным просвеще́нием Свята́го Ду́ха.

Богоро́дичен: Кре́пость моя́ есть Бог и Госпо́дь, Богоро́дице Де́во,/ вопло́щшееся Сло́во Пребоже́ственное из нетле́ннаго Твоего́ чре́ва/ и живо́т нам дарова́вшее.

Песнь 5

Ирмо́с: От све́та пресеки́й перворо́дный свет,/ я́ко во све́те дела́ поют Тя, Христе́, Соде́теля,/ во све́те Твое́м пути́ на́ша напра́ви.

Пред лице́м Твои́м го́ры уклони́шася,/ свет бо и пред нога́ми неботе́чныя лучи́, Христе́, со́лнца прии́де,/ зрак зе́млен я́ко прия́ти благоволи́л еси́.

Се Спас,–/ вопия́ху Моисе́й и Илия́ ученико́м,/ на горе́ святе́й Фаво́рстей оглаша́емым,–/ Христо́с, Его́же дре́вле провозвести́хом Су́щаго Бо́га.

Неизме́нное естество́, челове́ческому приме́шся,/ оби́льно невеще́ственнаго Божества́ Свет/ изобнажи́в апо́столом, неизрече́нно возсия́.

Тя, присносу́щное сия́ние, во Оте́честей сла́ве/ ученицы́ я́ко ви́девше возсия́вша, Христе́, Тебе́ вопия́ху:/ во све́те Твое́м пути́ на́ша напра́ви.

Ин

Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.

Ра́зумом Боже́ственным сия́я, блаже́нне,/ ви́димым всем предразсуди́л еси́ неви́димых присносу́ществие,/ сия́нием чи́стоты просвеща́емь.

Боже́ственныя вкуси́в доброде́тели, безмо́лвия и отше́льствия,/ утверди́л еси́ мысль нему́тну,/ устрое́ние храня́, о́тче Домети́е.

Я́ко вои́стинну ве́лие и чу́дно,/ е́же к лу́чшему преложе́ние твое́ и всему́дрый разум,/ Вы́шняго бо руки́ изме́на и благода́ти Боже́ственныя де́ло бысть.

Богоро́дичен: Де́ва пребыла́ еси́ без вре́да/ и ма́терская показу́еши, Всенепоро́чная Влады́чице:/ де́вству бо рождество́ счета́ла еси́ и носи́ши обои́х сво́йства.

Песнь 6

Ирмо́с: Внегда́ скорбе́ти ми,/ возопи́х ко Го́споду,/ и услы́ша мя Бог спасе́ния моего́.

Сия́ния па́че со́лнца Свет ясне́йший, Спас, проси́яв на Фаво́ре,/ нас просвети́л есть.

Возше́д на го́ру Фаво́рскую, преобрази́лся еси́, Христе́,/ и, лесть всю омрачи́в, нас просвети́л еси́.

Тя Бо́га позна́вше сла́внии апо́столи,/ на Фаво́ре же, Христе́, уди́вльшеся, коле́на преклони́ша.

Ин

Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопи́ю Ти:/ возведи́ от тли живо́т мой,/ Многоми́лостиве.

Тве́рдо наноси́мое врага́ и супоста́та искуше́ние претерпе́л еси́/ и, разли́чно, преблаже́нне, искуше́н быв,/ за́вистию бори́м, победи́тель яви́лся еси́, достосла́вне.

Житие́ твое́ Боже́ственное, жизнь богови́дна и светоно́сна бысть:/ ми́ра бо кра́сная оста́вль,/ Боже́ственное благоле́пие уплоди́л еси́, Богому́дре, и красоту́.

Зна́мения и чудеса́ сподо́бился еси́ соверша́ти па́че естества́, сла́вне,/ си́лою Боже́ственною воору́жся,/ и́мый свы́ше споспешеству́ющую тебе́ благода́ть, достосла́вне.

Богоро́дичен: Све́та жили́ще, и черто́г боголе́пен па́че ума́ воплоще́ния всех, Де́во, Соде́теля:/ Ты бо еди́на яви́лася еси́ достоблаже́нное Тому́ поко́ище.

Конда́к пра́здника, глас 7, самогла́сен:

На горе́ преобрази́лся еси́,/ и я́коже вмеща́ху ученицы́ Твои́,/ сла́ву Твою́, Христе́ Бо́же, ви́деша,/ да егда́ Тя у́зрят распина́ема,/ страда́ние у́бо уразуме́ют во́льное,/ ми́рови же пропове́дят,/ я́ко Ты еси́ вои́стинну О́тчее сия́ние.

И́кос:

Воста́ните, лени́вии, и́же всегда́ ни́зу пони́кшии в зе́млю души́ моея́ по́мыслы,/ возми́теся и возвы́ситеся на высоту́ Боже́ственнаго восхожде́ния./ Притеце́м к Петру́ и к Зеведе́евым/ и вку́пе со о́неми Фаво́рскую го́ру дости́гнем,/ да ви́дим с ни́ми сла́ву Бо́га на́шего, глас же услы́шим,/ его́же свы́ше слы́шаша и пропове́даша О́тчее сия́ние.

Песнь 7

Ирмо́с: Авраа́мстии иногда́ в Вавило́не о́троцы/ пе́щный пла́мень попра́ша,/ пе́сньми взыва́юще:/ оте́ц на́ших Бо́же, благослове́н еси́.

Облиста́вшеся Све́том непристу́пныя сла́вы на Фаво́рстей горе́,/ апо́столи Христу́ вопия́ху:/ оте́ц на́ших Бо́же, благослове́н еси́.

Сия́нием Боже́ственнаго шу́ма, и росода́тельным о́блаком, Христе́,/ и заре́ю Твое́ю наслажда́еми, апо́столи поя́ху:/ оте́ц на́ших Бо́же, благослове́н еси́.

В непристу́пном Све́те, я́ко ви́де Тя Петр,/ на Фаво́рстей горе́ облиста́вша, Христе́, возопи́:/ оте́ц на́ших Бо́же, благослове́н еси́.

С Нача́льником жи́зни Христо́м су́ще, де́ти Зеведе́евы,/ я́ко испусти́ зра́ка Свет, возгреме́ша:/ оте́ц на́ших Бо́же, благослове́н еси́.

Ин

Ирмо́с: Росода́тельну у́бо пещь/ соде́ла А́нгел/ преподо́бным отроко́м,/ халде́и же опаля́ющее./ Веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.

На тебе́, о́тче, пресве́тлая Ду́ха благода́ть почи́/ и де́йствия пресла́вна показа́ тебе́, вопию́щему и пою́щему ве́рно:/ благослове́н еси́, Бо́же оте́ц на́ших.

Тве́рдым умо́м проше́л еси́ стезю́ поще́ния/ и при кончи́не подвиго́в му́ченик и́стинен был еси́, зовы́й Христу́:/ благослове́н еси́, Бо́же оте́ц на́ших.

Я́ко ро́ждшеся моли́твами твои́ми, де́ти тебе́, отцу́, сподвиза́шася/ и, в пеще́ре терпя́ще, страда́ша с тобо́ю, согла́сно зову́ще Христу́:/ благослове́н еси́, Бо́же оте́ц на́ших.

Богоро́дичен: Спасе́ния приста́нище Тя стяжа́вше, от бу́ри спаса́емся/ и, наде́жду, ю́же к Тебе́, я́ко основа́ние душ держа́ще, зове́м Христу́:/ благослове́н еси́, Бо́же оте́ц на́ших.

Песнь 8

Ирмо́с: В Вавило́не о́троцы,/ Боже́ственною распала́еми ре́вностию,/ мучи́теля и пла́мене преще́ние му́жески попра́ша/ и, посреде́ огня́ вве́ржени, ороша́еми, поя́ху:/ благослови́те, вся дела́ Госпо́дня, Го́спода.

Манове́нием вся нося́й, нога́ми пречи́стыми на го́ру взы́де Фаво́рскую Христо́с,/ на не́йже па́че со́лнечныя лучи́ облиста́ лице́м,/ и́же зако́ну старе́йшия и благода́ти показа́ пою́щия:/ благослови́те, вся дела́ Госпо́дня, Го́спода.

Непристу́пною сла́вою на горе́ я́влься неизрече́нно Фаво́рстей,/ неодержи́мый и незаходи́мый Свет, О́тчее сия́ние,/ тварь уясни́в, челове́ки обожи́, пою́щия:/ благослови́те, вся дела́ Госпо́дня, Го́спода.

Священноле́пно стоя́ще Моисе́й же и Илия́ на горе́ Фаво́ре,/ Боже́ственныя начерта́ние я́сно ипоста́си ви́девше,/ Христа́, во Оте́честей облиста́вша сла́ве, воспева́ху:/ благослови́те, вся дела́ Госпо́дня, Го́спода.

И́же во зра́це Боже́ственнаго ра́ди явле́ния лице́ просла́вися иногда́ Моисе́ово,/ Христо́с же, я́ко ри́зою, Све́том и сла́вою одева́ется,/ Све́та бо самоде́телен Сый, озаря́ет пою́щия:/ благослови́те, вся дела́ Госпо́дня, Го́спода.

От светоро́дна о́блака Христа́ ученицы́ объя́та зря́ще на Фаво́ре/ и ни́цы на зе́млю па́дше, ум просве́щше,/ со Отце́м Сего́ поя́ху и Ду́хом:/ благослови́те, вся дела́ Госпо́дня, Го́спода.

Ин

Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти,/ Тя превозно́сим во вся ве́ки.

Снеда́емь любо́вию, о́тче, Зижди́теля,/ зда́ний отри́нул еси́ вся́кое пристра́стие, Ду́хом Бо́жиим я́ве направля́емь,/ Его́же превозно́сим во вся ве́ки.

Земна́я попече́ния оттря́с, Небе́сными наде́ждами, о́тче, обогати́лся еси́/ и е́же о Христе́ блаже́нством,/ Его́же ны́не наслажда́ешися во вся ве́ки.

Светолу́чныя зари́, о́тче, прие́м, Свята́го и Боже́ственнаго, прему́дре, Ду́ха,/ очи́ма я́ве Сего́, блаже́нне, ви́дел еси́,/ Боже́ственных та́ин стра́шно науча́юща тя.

Богоро́дичен: Боговеща́нная цевни́ца Твоего́ пра́отца/ ковче́г Тя свят прообрази́, нося́щ Бо́га, в плоть обле́кшася,/ Его́же превозно́сим во вся ве́ки.

Песнь 9

Ирмо́с: Рождество́ Твое́ нетле́нно яви́ся:/ Бог из боку́ Твое́ю про́йде,/ я́ко Плотоно́сец яви́ся на земли́/ и с челове́ки поживе́./ Тя, Богоро́дице, тем вси велича́ем.

Ужа́сни но́вым светоли́тием внеза́пу ученицы́ осве́щшеся, друг дру́га зря́ху,/ уди́вльшеся же и к земли́ прекло́ньшеся,/ Тебе́, Влады́це всех, поклони́шася.

Шум из о́блака посыла́шеся богогла́сен, известву́я чу́до:/ Оте́ц бо Све́тов,– Сей есть Сын Мой возлю́бленный,– апо́столом вопия́ше:/ Того́ послу́шайте.

Но́вая ви́девше и пресла́вная, глас Оте́ческий внуши́вше,/ на Фаво́ре Словесе́ слуги́, изображе́ние Первоо́бразнаго,/ Сей есть,– вопия́ху,– Спас наш.

О́бразе непреме́нный Су́щаго, недви́жиме, печа́ть неизме́нна,/ Сы́не, Сло́ве, му́дросте и мы́шце, десни́це Вы́шняго, Си́ло,/ Тя воспева́ем со Отце́м же и Ду́хом.

Ин

Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни А́нгельстии взира́ти,/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.

Све́том невеще́ственным озаря́емь, светови́ден досто́йно, Богоно́се, был еси́,/ житие́ непоро́чно стяжа́в, о́тче, и всесвя́то,/ ны́не же предстои́ши моли́твенник Влады́це и Бо́гу о ста́де твое́м.

Твои́ по́двизи воздержа́ния му́ченическими по́двиги по достоя́нию венча́шася,/ и сугу́бо страда́ние показа́л еси́ благому́жеством, и́хже прия́л еси́,/ и ве́чных благ обре́л еси́ наслажде́ние.

Укре́плься си́лою Боже́ственною и благода́тию,/ я́влься всем благоче́стия учи́тель, показа́лся еси́, чудесы́ украша́емь,/ вся утвержда́я, вся исцеля́я, приходя́щия к тебе́ ве́рно, Богоблаже́нне.

Богоро́дичен: В Тебе́ соде́яся вы́ше челове́ка, па́че естества́, Де́во Богоро́дице, та́инство:/ Бо́жия бо была еси́ Роди́тельница,/ нося́щи на объя́тиих и пита́ющи Небе́сными во́инствы песносло́вимаго.

Свети́лен:

Све́те неизме́нный, Сло́ве, Све́та Отца́ нерожде́нна, во явле́ннем све́те Твое́м,/ днесь на Фаво́ре Свет ви́дехом Отца́, Свет и Ду́ха,/ Све́том наставля́ющаго всю тварь.

Сла́ва, и ны́не, то́йже.

На стихо́вне стихи́ры, глас 6.

Подо́бен: А́нгельския:

Возсия́в па́че ума́/ от Де́вы Пресвяты́я, Сло́ве Бо́жий,/ во Ада́ма весь обле́кся,/ И́же пре́жде омрачи́вшееся естество́ все просвети́л еси́,/ Боже́ственным зра́ка Твоего́ измене́нием,/ преобра́жся на горе́ Фаво́рстей, Влады́ко,/ пре́жде Честна́го Твоего́ Креста́, Христе́ Бо́же наш.

Стих: Твоя́ суть небеса́,/ и Твоя́ есть земля́.

Светоро́дным осия́ема о́блаком ви́дяще Христа́/ на Фаво́ре Боже́ственнии ученицы́,/ ни́цы со стра́хом на зе́млю прекло́ньшеся,/ ум же и се́рдце просве́щше,/ с Моисе́ом и Илие́ю зря́ще я́сно,/ воспева́ху Сего́, я́ко Бо́га,/ со Отце́м и Ду́хом.

Стих: Фаво́р и Ермо́н/ о И́мени Твое́м возра́дуетася.

Гора́, я́же иногда́ бя́ше мра́чна и ды́мна,/ се ны́не честна́ и свята́ есть./ И́же пе́рвее у́бо Изра́иля наста́вивый,/ я́коже пи́шет, столпо́м огнезра́чным и о́блаком,/ днесь просия́ неизрече́нно/ па́че со́лнца Христо́с на сей,/ я́ко Бог просвети́в вся́ческая.

Сла́ва, и ны́не, глас 5:

Зако́на и проро́ков/ Тя, Христе́, Творца́ и Испо́лнителя свиде́тельствоваша,/ зря́ще во о́блаце,/ Моисе́й Богови́дец и Илия́ огнеколесни́чник/ и неопа́льный небоше́ственник/ в преображе́нии Твое́м./ С ни́миже и нас Твоего́ просвеще́ния сподо́би, Влады́ко,/ пе́ти Тя во ве́ки.

На Литурги́и: Блаже́нны пра́здника, песнь 1-я, обои́х кано́нов со ирмосо́м на 6. Проки́мен пра́здника, и свята́го, глас 7: Честна́ пред Го́сподем/ смерть преподо́бных Его́. Стих: Что воздам Го́сподеви о всех, я́же воздаде́ ми? Апо́стол ко Ефесе́ем, зача́ло 233. Аллилу́ия, глас 4: Пра́ведник, я́ко фи́никс, процвете́т: Ева́нгелие от Иоа́нна, зача́ло 52. Прича́стен пра́здника и свята́го: В па́мять ве́чную:

* * *

А́ще ли случи́тся попра́зднство Преображе́ния Христо́ва в суббо́ту:

Тогда в пяток на Го́споди, воззва́х: Сла́ва, пра́здника. И ны́не, Богоро́дичен пе́рвый настоя́щего гласа.

* * *

А́ще ли случи́тся попра́зднство Преображе́ния Христо́ва в неде́лю:

В суббо́ту на ма́лой вече́рни стихи́ры воскре́сны и Богоро́дицы, по обы́чаю.

На вели́цей вече́рни, по обы́чной кафи́зме на Го́споди, воззва́х: стихи́ры воскре́сны 3, и Анато́лиев еди́н и пра́здника 3, того́ дне, и свята́го Мине́и 3. А́ще ли пое́тся святы́й на 6, или́ ему́же и полиеле́й, пое́м стихи́ры воскре́сны три, и пра́здника 3, и свята́го 4. Сла́ва, свята́го. А́ще же ни, Сла́ва, пра́здника. И ны́не, Богоро́дичен пе́рвый, гласа.

На лити́и стихи́ры пра́здника того́ дне рядовы́я стихо́вныя. Сла́ва, и ны́не, пра́здника, пи́сан на у́трени на стихо́вне. А́ще ли и́мать святы́й сла́вник, Сла́ва, свята́го. И ны́не, пра́здника.

На стихо́вне стихи́ры воскре́сны. Сла́ва, свята́го, а́ще есть. И ны́не, пра́здника. А́ще ли ни, Сла́ва, и ны́не, пра́здника. На благослове́нии хле́бов тропа́рь Богоро́дице Де́во: два́жды, и пра́здника, еди́ножды.

На у́трени, на Бог Госпо́дь: тропа́рь воскре́сный, два́жды. Сла́ва, свята́го, а́ще есть. И ны́не, пра́здника. А́ще ли ни, Сла́ва, и ны́не, пра́здника. По кафи́змах седа́льны воскре́сны с Богоро́дичны их, и чте́ние во Ева́нгелии толково́м, и непоро́чны с тропари́. Ипакои́ гла́са. Степе́нна, и проки́мен гласа. И Вся́кое дыхание: Ева́нгелие воскре́сно, и стихи́ра воскре́сна. Кано́н воскре́сный со ирмосо́м на 4, и Богоро́дицы на 2, и пра́здника на 4, и свята́го на 4. Катава́сия: Ли́цы изра́ильтестии: А́ще полиеле́й или́ славосло́вие, пое́м кано́н воскре́сный со ирмосо́м на 4, и пра́здника на 4, и свята́го на 6. По 3-й песни конда́к пра́здника, и свята́го, а́ще и́мать, и и́кос, и седа́лен свята́го. Сла́ва, и ны́не, пра́здника и чте́ние. По 6-й песни конда́к воскре́сный, и и́кос, и проло́г. На 9-й песни пое́м Честне́йшую: Свети́лен воскре́сный. Сла́ва, свята́го, а́ще и́мать. А́ще ли ни, Сла́ва, и ны́не, пра́здника.

На хвали́тех стихи́ры воскре́сны 4 и свята́го, а́ще и́мать, подо́бны 3 и самогла́сен, и́же на Сла́ву, пое́м с припе́вы его́. А́ще ли не и́мать святы́й хвали́тны, пое́м воскре́сны 4 и пра́здника на 4, того́ дне, стихо́вныя у́трени с припе́вы пра́здника. Сла́ва, стихи́ра ева́нгельская. И ны́не, Преблагослове́нна еси́: Славосло́вие вели́кое. По трисвято́м тропа́рь воскре́сный то́чию, ектении́, и отпу́ст, и оглаше́ние, и обы́чное исхожде́ние в притво́р. Та́же час пе́рвый.

На 1-м часе́ тропа́рь воскресный. Сла́ва пра́здника. И ны́не, Богоро́дичен часо́в. По О́тче наш: конда́к пра́здника. Та́кожде и в про́чия часы́ глаго́лем конда́к пра́здника и воскре́сный, пременя́юще, а́ще полиеле́й, и свята́го.

На Литурги́и: Блаже́нны гла́са на 6, и пра́здника песнь рядова́я на 4. А́ще ли и́мать святы́й песнь: и Блаже́нны воскре́сны на 4, и пра́здника песнь рядова́я на 4, и свята́го песнь 6-я на 4. По вхо́де тропа́рь воскре́сный и пра́здника, та́же хра́ма и свята́го, а́ще и́мать. Сла́ва, конда́к свята́го. И ны́не, пра́здника. А́ще ли не и́мать святы́й тропаря́ и конда́ка, Сла́ва, воскре́сный. И ны́не, пра́здника. Проки́мен воскре́сный гла́са и пра́здника. Апо́стол и Ева́нгелие дне. Прича́стен: Хвали́те Го́спода с Небе́с: и пра́здника. А́ще и́мать святы́й Апо́стол и Ева́нгелие, тогда́ пое́м проки́мен воскре́сный гла́са, и свята́го. Апо́стол и Ева́нгелие дне, и свята́го. Прича́стен: Хвали́те Го́спода с Небе́с: и свята́го.

Преподобномученик Дометий Персиянин

Преподобномученик Дометий Персиянин жил в IV веке и родом был перс. Еще в молодости он был обращен в христианство неким христианином Уаром. Покинув Персию, он пришел в пограничный город Низибию (в Мессопотамии), где принял крещение и иноческий постриг в одном из монастырей. По наветам лукавого беса братия монастыря возненавидели святого Дометия, который удалился в монастырь святых Сергия и Вакха в городе Феодосиополе. Здесь он подражал житию архимандрита Нурвела, великого подвижника, о котором повествуется, что в течение 60 лет он не вкушал вареной пищи, не ложился для сна, а отдыхал стоя, опираясь на свой жезл. В этом монастыре преподобный Дометий был рукоположен в сан диакона. За неуклонное исполнение всех предписаний обители и усердное изучение Святого Евангелия архимандрит Нурвел пожелал возвести Дометия в сан пресвитера. Считая себя недостойным священнического служения, преподобный Дометий со смирением удалился в горы за Евфрат, в пределы Кирра (в Сирии).

Там он жил под открытым небом, терпя долгое время зной и холод, а впоследствии стал жить в пещере вместе с двумя учениками. Постепенно известие о его подвигах и святости жизни распространилось среди окрестных жителей. К нему стали приходить за исцелениями и помощью. Многих язычников святой Дометий обратил к вере во Христа.

Император Юлиан Отступник (361–363), отправляясь на войну с персами, прибыл в местность, где подвизался святой. Здесь он увидел перед пещерой подвижника множество народа, ожидавшего исцеления. Разгневанный император приказал воинам побить святого Дометия вместе с учениками камнями.

Преподобный Дометий с учениками приняли мученическую кончину около 363 года. Их святые мощи более двух лет лежали в пещере, заваленные камнями. Однажды у проезжавшего мимо пещеры купца верблюд сломал свои передние ноги. Случайно ступив ногою в пещеру, он был исцелен. Благодаря этому вспомнили о святых и с честью вынесли их мощи из пещеры.

НА ВЕЧЕ́РНИ

Блаже́н муж: 1-й антифо́н. На Го́споди, воззва́х: стихи́ры, глас 1.

Подо́бен: Небе́сных чино́в:

И́же Предве́дый тя от утро́бы ма́тере в блаже́нство,/ смотре́нием Свои́м пода́л есть о́браз спасе́ния,/ И́овлю попусти́ на тя боле́знь,/ да то́ю искуси́шися, я́ко зла́то в горни́ле,/ те́ло твое́ уязви́в многоболе́зненне./ И ны́не в неболе́зненнем сый поко́и,/ помяни́ нас, душе́вными боле́знующих страстьми́,/ Пи́мене, о́тче всеблаже́нне.

И́же мир возненави́дев, преподо́бне,/ жизнь, наслажде́нием плотски́м до́лу влеку́щую,/ на многоле́тную боле́знь премени́ти/ себе́ у Го́спода проси́л еси́,/ в не́йже благоду́шествуя,/ Бо́гови благода́рственная вы́ну возсыла́л еси́,/ псало́мнически реки́й:/ прильпе́ по Тебе́ душа́ моя́,/ я́ко да прии́мет мя, Христе́, десни́ца Твоя́,/ наставля́ющая на путь прав и живо́т ве́чный.

Тебе́, преподо́бне о́тче Пи́мене,/ по мно́жеству боле́зненных искуше́ний,/ я́же те́лом все любе́зно подъя́л еси́,/ утеше́ния ны́не в Све́те непристу́пнем увеселя́ют ду́шу,/ предстои́ши бо со а́нгельскими чи́ны Престо́лу Влады́чню,/ иде́же и о нас помоли́ся/ улучи́ти свы́ше мир и от страсте́й свобожде́ние.

Сла́ва, глас 5:

Прииди́те, и́ночествующих ли́цы,/ восхва́лим Пи́мена преподо́бнаго,/ подо́бника бы́вша Вели́кому Анто́нию:/ я́коже бо той от А́нгела прия́т и́ноческое одея́ние,/ та́ко и сей от а́нгельския руки́ сподо́бися во и́ночество облещи́ся,/ с ни́миже ны́не нетле́нныя нося́ ри́зы,/ с пра́ведными весели́тся,/ с преподо́бными ликовству́ет/ и мо́лит с ни́ми Христа́ Бо́га о душа́х на́ших.

И ны́не, пра́здника.

Вход. Проки́мен дне. И чте́ния 3 преподо́бническая .

Прему́дрости Соломо́ни чте́ние (главы́ 5 и 6):

Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут Ца́рствие благоле́пия и вене́ц добро́ты от руки́ Госпо́дни,/ зане́ десни́цею покры́ет я́ и мы́шцею защити́т их./ Прии́мет всеору́жие – рве́ние свое́/ и вооружи́т тварь в месть враго́м./ Облече́тся в броня́ пра́вды и возложи́т шлем – суд нелицеме́рен./ Прии́мет щит непобеди́мый – преподо́бие./ Поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лу́ка, облако́в на наме́рение полетя́т./ И от каменоме́тныя я́рости испо́лнь паду́т гра́ды,/ вознегоду́ет на них вода́ морска́я,/ ре́ки же потопя́т я́ на́гло./ Сопроти́в ста́нет им дух си́лы и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те, держа́щии мно́жества и гордя́щиися о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.

Прему́дрости Соломо́ни чте́ние (глава́ 3):

Пра́ведных ду́ши в руце́ Бо́жией, и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние, они же суть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я́ и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я́./ И во вре́мя посеще́ния их возсия́ют,/ и, я́ко и́скры по сте́блию, потеку́т./ Су́дят язы́ком и облада́ют людьми́, и воцари́тся Госпо́дь в них во ве́ки./ Наде́ющиися Нань разуме́ют и́стину/ и ве́рнии в любви́ пребу́дут Ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.

Прему́дрости Соломо́ни чте́ние (глава́ 4):

Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна, ниже́ в числе́ лет исчита́ется./ Седи́на же есть му́дрость челове́ком, и во́зраст ста́рости – житие́ нескве́рное./ Благоуго́ден Бо́гови быв, возлю́блен бысть,/ и живы́й посреде́ гре́шник преста́влен бысть,/ восхище́н бысть, да не зло́ба измени́т ра́зума его́/ или лесть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.

На стихо́вне стихи́ры, глас 1, самогла́сны:

Свеща́, тебе́ от А́нгелов да́нная,/ прообразова́ше све́тлость души́ твоея́, преподо́бне о́тче,/ тем и житие́ твое́ нескве́рно/ просвети́ся искуше́нием пред челове́ки./ Е́же мы, чту́ще, велича́ем/ и сла́вим Отца́ Небе́снаго,/ с Сы́ном и Святы́м Ду́хом.

Стих: Честна́ пред Го́сподем/ сме́рть преподо́бных Его́.

Жела́ние се́рдца твоего́/ и любо́вь, я́же к Го́рним, ви́дев, Царь Превы́шний/ посла́ А́нгелы Своя́ к тебе́, о́тче,/ облекти́ тя во и́ноческий о́браз/ и наслади́ти Вы́шняго пе́ния,/ я́ко да сла́дце терпе́нием боле́зненныя жи́зни сея́/ го́ресть наверши́ши/ и боле́зньми стя́жеши поко́й безболе́зненный.

Стих: Блаже́н муж, боя́йся Го́спода,/ в за́поведех Его́ восхо́щет зело́.

Ми́ра отверже́ние,/ нищета́ изво́льная и де́вство непоро́чное,/ безме́рное же терпе́ние и любо́вь соверше́нна к Бо́гу/ вои́стинну вели́кия суть доброде́тели,/ и́миже, а́ки скороше́ственною колесни́цею, восте́кл еси́ к Го́рним/ и предста́л Творцу́ всех и Бо́гу./ Ему́же и о нас моли́ся, преподо́бне,/ тече́ние нам без собла́зн соверши́ти/ и улучи́ти ми́лость в День су́дный.

Сла́ва, глас 8:

Мона́хов мно́жества,/ притека́ем к ра́це твое́й, о́тче,/ покланя́емся нетле́нным моще́м твои́м,/ почерпа́ем исцеле́ния боле́знем,/ прие́млем кре́пость на борю́щия ны враги́/ и обрета́ем на стра́сти побе́ду,/ получа́ем оставле́ние грехо́в/ и сподобля́емся ми́лости Госпо́дни моли́твами твои́ми.

И ны́не, пра́здника.

Тропа́рь, глас 5:

Богоно́снаго Анто́ния смиренному́дрием подража́я,/ терпе́нием И́ову подо́бяся,/ не исцеле́ния от боле́зни, но па́че протяже́ния тоя́/ жела́л еси́ себе́, терпеливоду́шне Пи́мене,/ да не ка́ко, здрав быв/ и от ме́ста сего́ роди́тельми исто́ржен,/ сожи́тия преподо́бных и чи́на их лиши́шися,/ тем па́че наде́жды от сами́х А́нгел постриже́н был еси́,/ с ни́миже моли́ Христа́ Бо́га/ спасти́ся душа́м на́шим.

Сла́ва, и ны́не, пра́здника.

НА У́ТРЕНИ

На Бог Госпо́дь: тропа́рь пра́здника, два́жды. Сла́ва, преподо́бнаго. И ны́не, пра́здника.

По 1-м стихосло́вии седа́лен, глас 5.

Подо́бен: Собезнача́льное Сло́во:

И́овле терпе́ние име́л еси́, о́тче,/ на одре́ бо боле́зни лежа́ дово́льна ле́та,/ стру́пы от главы́ до ног обложе́н,/ благодари́л еси́ Бо́га, изволя́я в жи́зни сей весь согни́ти,/ да в о́ной без истле́ния бу́деши,/ и смра́да обоня́ние терпе́ти, да благоуха́ние Христо́во яви́шися./ Сотвори́ у́бо и нас терпели́вы моли́твами твои́ми.

Сла́ва, и ны́не, пра́здника или́ Богоро́дичен:

Боле́зни а́довы обыдо́ша мя, и низлежу́ на ло́жи злых дея́ний мои́х,/ но, Я́же без боле́зни ро́ждшая, уврачу́й неду́ги моя́ и воздви́гни мя к доброде́телем,/ сотворя́ющи мя це́ла моли́твами Твои́ми.

По 2-м стихосло́вии седа́лен, глас 4.

Подо́бен: Ско́ро предвари́:

Ско́ро услы́ша тя Бог, моля́щася, блаже́нне, и испо́лни жела́ние се́рдца твоего́,/ посла́в А́нгелы Своя́ во а́нгельский о́браз облещи́ тя./ Те́мже и ты ско́рый нам в по́мощь бу́ди и жела́ние се́рдца на́шего исполня́й,/ моля́ а́нгельскаго Влады́ку облещи́ ны свы́ше ми́лостию Свое́ю.

Сла́ва, и ны́не, пра́здника или́ Богоро́дичен:

Ско́ро услы́ши моле́ния раб Твои́х, Влады́чице,/ и предвари́ покры́ти ны кро́вом крилу́ Твое́ю,/ да́же не порабо́тимся греху́ до конца́,/ но да порабо́таим усе́рдно Сы́ну Твоему́, Го́сподеви на́шему,/ да́рующему нам ве́лию ми́лость.

По полиеле́и седа́лен, глас 8.

Подо́бен: Прему́дрости возле́г:

Мно́гия боле́зни твоя́, блаже́нне Пи́мене, мно́гим здра́вия вино́вны бы́ша:/ сам боля́, боля́щия исцеля́л еси́,/ сам слежа́ в неду́зе, неду́жныя возставля́л еси́, сло́вом отгоня́л еси́ вся́ку не́мощь./ Те́мже, ны́не притека́юще к нетле́нным моще́м твои́м, мо́лим тя:/ источа́й телесе́м здра́вие и душа́м пода́ждь цельбу́,/ моля́ Христа́ Бо́га грехо́в оставле́ние дарова́ти/ чту́щим любо́вию святу́ю па́мять твою́.

Сла́ва, и ны́не, пра́здника.

Степе́нна, 1-й антифо́н 4-го гла́са. Проки́мен, глас 4: Восхва́лятся преподо́бнии во сла́ве/ и возра́дуются на ло́жах свои́х. Стих: По́йте Го́сподеви, преподо́бнии его́. Вся́кое дыха́ние: Ева́нгелие от Матфе́я, зача́ло 43.

По 50-м псалме́ стихи́ра, глас 5: Прииди́те, и́ночествующих ли́цы: зри Сла́вник на Го́споди, воззва́х:

Кано́н преподо́бнаго, глас 2.

Песнь 1

Ирмо́с: Во глубине́ постла́ иногда́/ фараони́тское всево́инство преоруже́нная си́ла,/ вопло́щшееся же Сло́во всезло́бный грех потреби́ло есть:/ препросла́вленный Госпо́дь, сла́вно бо просла́вися.

Глубино́ю недоуме́ния содержи́м, молю́ Тя, прему́дрости глубино́, Иису́се:/ возведи́ ум мой и подви́гни язы́к/ восхвали́ти уго́дника Твоего́, Пи́мена, вели́кое терпе́ние.

Во глубине́ безстра́стия стра́сти, преподо́бне, потопи́в,/ преше́л еси́ мо́ре ми́ра немо́крыми нога́ми,/ я́ко ни ум твой тиме́нию грехо́вному не прикосну́ся,/ от него́же и мене́ сохрани́ моли́твами твои́ми.

Во глубине́ слез твои́х потопи́л еси́ мы́сленнаго фарао́на,/ ны́не же в приста́нищи небе́снем пое́ши песнь побе́дную,/ иде́же и о мне, преподо́бне, моли́ся.

Богоро́дичен: Во глубине́ зол потопля́ему ми, Влады́чице,/ пода́ждь ру́ку по́мощи, я́коже Сын Твой Петро́ви,/ и приведи́ к приста́нищу спасе́ния.

Песнь 3

Ирмо́с: Процвела́ есть пусты́ня, я́ко крин, Го́споди,/ язы́ческая неплодя́щая, Це́рковь/ прише́ствием Твои́м,/ в не́йже утверди́ся мое́ се́рдце.

Процвела́ есть оби́тель Пече́рская преподо́бными отцы́,/ я́коже вертогра́д благово́нными кри́ны,/ посреде́ же их и ты, преподо́бне, в житии́ святы́нею,/ по преставле́нии же нетле́нием кра́сно процве́л еси́.

Процве́л еси́ богоуго́дным твои́м житие́м, я́коже цвет по́льный, преподо́бне,/ ны́не же святы́я твоя́ мо́щи в пеще́ре издаю́т благоуха́ние, я́ко крин удо́льный,/ и источа́ют благода́ть с ве́рою притека́ющим.

Крин в те́рнии, Пи́мен в терпе́нии боле́зней процвете́ чи́стотою,/ и́же, в ра́йския пресажде́н вертогра́ды,/ облагоуха́ет нас ны́не моли́твами свои́ми.

Богоро́дичен: Цве́те благово́нный, Пречи́стая Де́во,/ отжени́ смрад греха́ моего́/ и яви́ мя благоуха́ние Христо́во моли́твами Твои́ми.

Седа́лен, глас 2:

Сильне́е бе моли́тва твоя́, свя́те, к Бо́гу,/ егда́ отцы́ Пече́рстии о исцеле́нии твое́м моля́хуся,/ ты же приложе́ния боле́зней себе́ у Го́спода проси́л еси́/ и преодолева́ше моле́ние твое́ еди́наго всех мольбы./ Ве́руем у́бо, я́ко и ны́не мно́го мо́гут святы́я твоя́ моли́твы.

Сла́ва, и ны́не, Богоро́дичен:

Мно́го может моли́тва Ма́терняя на умоле́ние Влады́ки,/ моли́ у́бо Его́ о нас, Де́во Ма́ти, и печа́ль нашу возвести́ Ему́,/ да, послу́шав Тя, ми́лостив нам бу́дет/ и, печа́ль в ра́дость претвори́в, пода́ст живо́т ве́чный.

Песнь 4

Ирмо́с: Пою́ Тя, слу́хом бо, Го́споди, услы́шах и ужасо́хся:/ до мене́ бо и́деши, мене́ ища́, заблу́ждшаго./ Тем мно́гое Твое́ снизхожде́ние, е́же на мя,/ прославля́ю, Многоми́лостиве.

Пе́ти и сла́вити Бо́га досто́йно пода́ждь нам, о́тче преподо́бне, моли́твами твои́ми,/ да всегда́ ублажа́ем тя.

Пе́ния а́нгельская в полу́нощи слы́шаша близ су́щии отцы́,/ егда́ в ри́зу тя спасе́ния облека́ху./ И нас у́бо а́нгельских пе́ний наслажда́тися сподо́би хода́тайством твои́м, блаже́нне.

Пою́ тебе́, о́тче, усе́рдно,/ ублажа́ю преподо́бие твое́,/ велича́ю незло́бие и кро́тость твою́,/ хвалю́ терпе́ние, удивля́юся нетле́нию твоему́/ и покланя́юся целе́бным моще́м твои́м.

Богоро́дичен: Певцы́ Твоя́ спаси́, о Всепе́тая Ма́ти, пла́ча ве́чнаго избавля́ющи,/ ми́лостию Твое́ю отри́ вся́ку сле́зу от о́чию мое́ю/ и ра́дости ве́чныя сподо́би.

Песнь 5

Ирмо́с: Хода́тай Бо́гу и челове́ком был еси́, Христе́ Бо́же,/ Тобо́ю бо, Влады́ко, к Светонача́льнику, Отцу́ Твоему́,/ от но́щи неве́дения/ приведе́ние и́мамы.

Хода́тайством твои́м, свя́те, от вся́каго наве́та вра́жия соблюда́й оби́тель,/ в не́йже сам богоуго́дне пожи́л еси́,/ и и́ночествующим помо́щник бу́ди,/ на твоя́ бо моли́твы упова́ем.

Хода́тай бу́ди мне к Пра́ведному Судии́, блаже́нне:/ есмь бо неради́в, я́коже о́ный схи́мник,/ его́же бра́тии при кончи́не свое́й показа́л еси́,/ и́же о́браз вели́к име́яше, де́ла же ни ма́ла./ Сего́ ра́ди схи́ма его́ нетле́нна на обличе́ние и осужде́ние ему́ блюде́тся.

Хода́тайствуй ми спасе́ние отча́янному, блаже́нне,/ наста́ви на покая́ние гре́шнаго, преподо́бне,/ пода́ждь исправле́ние развраще́нному, о́тче,/ да не постыжду́ся, наде́яся на твоя́ моли́твы.

Богоро́дичен: Хода́таице ко Творцу́, Пречи́стая Де́во,/ всего́ мя, грехми́ оскверне́ннаго, очи́сти моли́твами Твои́ми,/ на Тя бо все упова́ние мое́ возлага́я, не постыжду́ся во век.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

В бе́здне злых весь мир лежи́т,/ сего́ ра́ди отве́рглся еси́ его́, да Благо́му благоугожда́еши Бо́гу;/ Ему́же благоугоди́ти и мене́ сподо́би, уго́дниче Бо́жий.

В бе́здне боле́зней тя́жких лежа́,/ мно́гажды от служа́щих небрего́мый и оставля́емый быв,/ Бо́га то́чию посеща́ющаго тя име́л еси́;/ не оста́ви нас, о́тче, присеще́нием моли́тв твои́х,/ я́ко вы́ну боле́знуем.

В бе́здну а́дскую мно́жества ра́ди грехо́в мои́х да не осужде́н бу́ду,/ ты, о́тче, Пра́ведному Судии́ предста́ни и умоли́ Его́,/ да изба́вит мя пра́веднаго суда́ Своего́.

Богоро́дичен: Я́ко бе́здну ми́лости ро́ждшая,/ от бе́здны безме́рных беззако́ний мои́х исхи́ти мя,/ милосе́рдия Ма́ти, молю́ся Ти.

Конда́к, глас 6:

Долговре́менную боле́знь благода́рне претерпе́вшаго,/ прииди́те, соше́дшеся, восхва́лим Пи́мена многотерпели́ваго,/ и́же бо иногда́ за смрад в боле́зни бе гнуша́емь,/ сей ны́не благоуха́ние испуща́ет/ с ве́рою к ра́це моще́й его́ приходя́щим/ и прого́нит злосмра́дие страсте́й от вопию́щих:/ прииди́, Пи́мене, к нам, и ничто́же успе́ет враг на ны́.

И́кос:

Вси, и́же разли́чными боле́зньми и страстьми́ одержи́мии,/ соше́дшеся к многоболе́зненному Пи́мену, почуди́теся терпе́нию его́:/ той бо, мно́гажды гла́ден и жа́жден пребы́в,/ не поскорбе́ на служа́щих ему́,/ но с ра́достию вся терпя́ше, благодаря́ Бо́га;/ два́десять же лет в страда́нии свое́м препроводи́в,/ я́ко зла́то в горни́ле искуси́ся, и обре́теся досто́ин Бо́гови,/ и прия́т от Него́ дар цели́ти неду́ги и прогоня́ти стра́сти от притека́ющих к нему́ с ве́рою./ К тому́ у́бо и мы притеце́м и того́ призове́м, вопию́ще:/ прииди́, Пи́мене, к нам, и ничто́же успе́ет враг на ны.

Песнь 7

Ирмо́с: Богопроти́вное веле́ние беззако́ннующаго мучи́теля/ высо́к пла́мень вознесло́ есть./ Христо́с же простре́ Богочести́вым отроко́м ро́су духо́вную,/ Сый благослове́н и препросла́влен.

Богопроти́внаго ми́ра возненави́дел еси́, о́тче, ве́дый Глаго́лющаго:/ хотяй бы́ти ми́ру друг, враг Бо́жий быва́ет./ Пода́ждь у́бо и нам бе́гати ми́ра и всех его́ по́хотей.

Богопроти́вный зако́н зла́то моего́ обы́чая ну́ждею влече́т мя на дела́ зла́я,/ и не е́же хощу́, сие́ творю, но е́же не хощу́, сие́ содева́ю./ Ты у́бо, преподо́бне, моли́твами твои́ми от того́ мя зла свободи́.

Богопроти́вное веле́ние ца́рствующаго греха́ во удесе́х мои́х/ принужда́ет мя ча́сто прогне́вати Бо́га,/ к тебе́ прибегаю, о́тче, от ну́ждных мя грехо́в изба́ви.

Богоро́дичен: Бо́га ро́ждшая, Де́во,/ даждь нам испо́лнити повеле́ния Сы́на Твоего́,/ и да ни в чем же проти́вни Ему́ обря́щемся по́мощию Твое́ю.

Песнь 8

Ирмо́с: Пещь иногда́ о́гненная в Вавило́не де́йства разделя́ше,/ Бо́жиим веле́нием халде́и опаля́ющая,/ ве́рныя же ороша́ющая, пою́щия:/ благослови́те, вся дела́ Госпо́дня, Го́спода.

Пещь страсте́й да угаси́ши, о́тче,/ умноже́ния боле́зней от Бо́га проси́л еси́,/ в ни́хже прохла́да тебе́ бысть, о́тче, чистота́ душе́вная и теле́сная,/ ю́же и нам храни́ти моли́твами твои́ми даждь,/ да с тобо́ю Пречи́стому Бо́гу пое́м:/ благослови́те, вся дела́ Госпо́дня, Го́спода.

Пещь многоле́тных боле́зней а́ще опаля́ше ти те́ло,/ но святы́я души́ твоея́ ничи́мже вреди́ти можа́ше:/ во все́х бо сих приклю́чшихся не согреши́л еси́,/ но посреде́ искуше́ний, а́ки посреде́ пла́мене, неопали́м пребыва́я, со о́троки воспева́л еси́:/ благослови́те, вся дела́ Госпо́дня, Го́спода.

А́ки в пещи́, в пло́ти мое́й возжего́х огнь по́хотей/ и умно́жих нечистоты́ пла́мень невоздержа́нием мои́м;/ Ты, огнь пояда́яй, Бо́же,/ прохлади́ пла́мень, угаси́ огнь и ороси́ пещь страсте́й мои́х моли́твами уго́дника Твоего́, Пи́мена,/ да с ним Тебе́, в Тро́ице сла́вимому Бо́гу, пою́:/ благослови́те, вся дела́ Госпо́дня, Го́спода.

Богоро́дичен: Пещь иногда́ о́гненная, отроко́в неопали́вшая,/ прообрази́ рождество́ Твое́, Пречи́стая:/ Огнь бо заче́нши Боже́ственный, пребыла́ еси́ неопали́ма,/ и аз у́бо молю́ Тя, о Влады́чице,/ неопали́ма мя соблюди́ от огня́ сопроти́внаго, да, ра́дуяся, пою́ Ти:/ вся дела́ Госпо́дня, Госпожу́ Богоро́дицу по́йте/ и превозноси́те, прославля́юще пресвято́е и́мя Ея́ во ве́ки.

Песнь 9

Ирмо́с: Безнача́льна Роди́теля Сын, Бог и Госпо́дь,/ вопло́щся от Де́вы, нам яви́ся,/ омраче́нная просвети́ти, собра́ти расточе́нная./ Тем Всепе́тую Богоро́дицу велича́ем.

Безнача́льне Роди́телю, приво́дим Ти в моли́тву уго́дника Твоего́ Пи́мена,/ и́же от нача́ла и́ночества своего́ все́ю душе́ю возлюби́ Тя/ и все́ю кре́постию порабо́та Тебе́;/ при́зри на его́ по́двиги, и тех ра́ди послу́шай о нас его́ моле́ния,/ и благи́й коне́ц да́руй нам.

Собезнача́льный Отцу́ и Ду́ху, Сы́не,/ представля́ем Ти в моли́тву блага́го и ве́рнаго раба́ Твоего́ Пи́мена;/ при́зри на его́ многоле́тныя и тя́жкия боле́зни,/ и тех ра́ди послу́шай о нас его́ моле́ния, и ми́лостив нам бу́ди.

Соприсносу́щный Отцу́ и Сы́ну, Ду́ше Святы́й,/ предлага́ем Ти усе́рдныя моли́твы Пи́мена блаже́ннаго,/ того́ послу́шай и нас, его́ ра́ди, поми́луй.

Богоро́дичен: Ма́ти Бо́жия,/ с блаже́нным Пи́меном и со все́ми преподо́бными отцы́ Пече́рскими, Бо́гу угоди́вшими,/ моли́ Пресвяту́ю и Неразде́льную Тро́ицу поми́ловати рабы́ Своя́,/ Тя при́сно сла́вящия.

Свети́лен:

Черто́г Спа́сов отве́рст тебе́, преподо́бне Пи́мене,/ и́маши бо бра́чну а́нгельскаго о́браза от А́нгел на тя возложе́нную оде́жду,/ в не́йже вшед на брак А́гнчий,/ не забу́ди нас, тя почита́ющих.

Сла́ва, и ны́не, пра́здника или́ Богоро́дичен:

Черто́же нескве́рный, Пречи́стая Де́во,/ нас, одея́ния бра́чнаго неиму́щих, покры́й честно́ю ри́зою Твое́ю/ и введи́ в Черто́г Небе́сный.

На хвали́тех стихи́ры, глас 8.

Подо́бен: О, пресла́внаго чудесе́:

О, пресла́внаго чудесе́!/ О, ди́внаго на тебе́ де́йства Ду́ха Свята́го,/ де́йствующаго в немощне́й пло́ти твое́й, преподо́бне!/ Ты бо сам, немощству́я, и́ных исцеля́л еси́/ и ко исправле́нию терпе́нием твои́м приводи́л еси́./ Тем хва́лящим тя, о́тче, яви́ ми́лость твою́/ и испроси́ от Христа́ Бо́га в не́мощех на́ших исцеле́ние/ любо́вию свято́е твое́ преставле́ние почита́ющим.

О́тче Богому́дре Пи́мене,/ ты изде́тска моли́твою боле́знем преда́лся еси́/ и лю́тыми страда́нии те́ло свое́ изнури́л еси́,/ я́ко да чистоту́ пло́ти соблюде́ши/ и ду́шу непоро́чну Бо́гови предста́виши./ Ему́же в неболе́зненней жи́зни предстоя́,/ я́ко моли́твою свое́ю мо́щен посо́бствовати,/ о нас при́сно моли́ся,/ ве́рою пою́щих свято́е твое́ успе́ние.

О́тче преподо́бне Пи́мене,/ всяк боля́й в жи́зни сей многомяте́жней/ да навы́кнет терпе́нию твоему́ ревнова́ти/ и благода́рственная возсыла́ти Бо́гови,/ от Него́же в наказа́ние прие́млем искуше́ние/ ко исправле́нию душе́вныя боле́зни./ Но о всех, притека́ющих к ра́це моще́й твои́х, засту́пник бу́ди/ и испроси́ от Христа́ Бо́га/ душе́вныя и теле́сныя не́мощи свобожде́ние.

Сла́ва, глас 2:

Ми́ро вои́стинну та́инственное/ ко исцеле́нию боля́щим/ источа́ет ра́ка от святы́х твои́х моще́й/ и облагоуха́ет ве́рою приходя́щих,/ подаю́щи тем в ну́ждах посо́бие;/ пода́ждь у́бо и нам, о́тче всеблаже́нне,/ от при́снотеку́щаго исто́чника твоея́ любве́/ душе́вных и теле́сных боле́зней свобожде́ние,/ я́ко пе́сненными добро́тами/ честно́е твое́ успе́ние восхваляем.

И ны́не, пра́здника или́ Богоро́дичен:

Спаси́ от бед рабы́ Твоя́, Богоро́дице Де́во,/ я́ко вcи́ по Бо́зе к Тебе́ прибега́ем,/ я́ко неруши́мей стене́ и предста́тельству.

Славосло́вие вели́кое. Ектении́. И отпу́ст.

На Литурги́и слу́жба вся преподо́бному.

Преподобный Пимен Многоболезненный

Преподобный Пимен Многоболезненный (XII в.) путем тяжкой болезни достиг Царствия Небесного. Родился и вырос этот русский подвижник больным. Он долго просил родителей отнести его в Киево-Печерский монастырь. Когда они принесли сына в прославленную обитель, то стали просить в молитвах о его выздоровлении. Но сам страдалец, сознавая высокую ценность страданий, просил Господа о продолжении болезни, а также о пострижении его в иночество. И вот Ангелы в виде иноков совершили над ним чин пострижения. Некоторые из братии слышали звуки пения и, придя к преподобному Пимену, нашли его облаченным в монашеские одежды. В руке он держал горящую свечу, а постригальные волосы его оказались в раке преподобного Феодосия. Много лет провел преподобный Пимен в тяжелой болезни, так что прислуживающие тяготились им и часто оставляли без хлеба и воды, но он терпел все с радостью. Жалея братию, преподобный Пимен исцелил одного такого же расслабленного брата, взяв с него слово, служить больным до самой смерти. Но брат стал лениться, и его постигла прежняя болезнь. Преподобный Пимен вновь исцелил его с поучением, что больной и служащий больному получают равную награду. Двадцать лет провел преподобный Пимен в тяжелом страдании. За три дня перед смертью, как и предсказывал раньше Ангел, он стал здоров. В церкви преподобный простился со всей братией и причастился Святых Таин. Затем, поклонившись гробу аввы Антония, преподобный Пимен указал место для своего погребения и сам отнес к нему заранее приготовленный гроб. Он указал там на погребенных друг против друга иноков и предрек, что братия найдет погребенного в схиме без нее, так как инок вел жизнь недостойную ее; тот же инок, что был погребен без схимы, облекся в нее по смерти, так как много желал этого при жизни и был достоин. После кончины преподобного братия убедилась в прозорливости его слов. В день преставления преподобного Пимена было явление трех огненных столпов над трапезою, перешедших на верх церкви. Подобное событие описано в летописи под 11 февраля 1110 года (память святителя Феоктиста Черниговского; †6 августа 1123, совершается 5 августа). Днем кончины преподобного Пимена предполагается 11 февраля 1110 года, совпавшее с небесным знамением.

Мощи преподобного Пимена почивают в Антониевой пещере.

Вторично память святого празднуется 28 сентября с Собором преподобных Ближних пещер.

(Слу́жбу зри 23 ноября)

Тропа́рь, глас 4:

Пра́вило ве́ры и о́браз кро́тости/ сло́вом и житие́м па́стве твое́й, о́тче смиренному́дре Митрофа́не, был еси́./ Те́мже и во све́тлостех святы́х/ со́лнца светле́йше возсия́л еси́,/ венце́м нетле́ния и сла́вы украша́емь,/ моли́ Христа́ Бо́га/ стране́ на́шей и гра́ду твоему́ в ми́ре спасти́ся.

Конда́к, глас 8:

Воздержа́нием те́ло ду́ху порабо́тив,/ ду́шу же равноа́нгельну сотвори́в,/ святи́тельскою оде́ялся еси́ оде́ждею, я́ко вене́ц свяще́нства,/ и ны́не, всех Влады́це предстоя́,/ моли́, всеблаже́нне Митрофа́не, умири́ти и спасти́ ду́ши на́ша.

Моли́тва о́бщая святи́телем Христо́вым Митрофа́ну и Ти́хону, Воро́нежским чу́дотво́рцем

О вели́цыи уго́дницы Бо́жии, кре́пцыи на́ши засту́пницы и моли́твенницы, всехва́льнии святи́телие Христо́ви и чудотво́рцы Митрофа́не и Ти́хоне! Услы́шите нас, к вам припа́дающих и с ве́рою вас призыва́ющих. Помина́йте нас у Престо́ла Вседержи́теля и моли́теся о нас непреста́нно ко Христу́, Бо́гу на́шему, даде́ся бо вам благода́ть моли́тися за ны. Умоли́те предста́тельством ва́шим Всеми́лостиваго Бо́га на́шего, да пода́ст Он Це́ркви Святе́й мир, па́стырем ея́ – си́лу и ре́вность подвиза́тися о спасе́нии людей и всем нам – дар, коему́ждо потре́бен: ве́ру и́стинную, наде́жду тве́рдую и любо́вь неоскудева́ющую, да сохрани́т нас от гла́да, губи́тельства, тру́са, пото́па, огня́, меча́, на́шествия иноплеме́нных, междоусо́бныя бра́ни, смертоно́сныя я́звы, внеза́пныя сме́рти и от вся́каго зла; ю́ным и младе́нцем да да́рует в ве́ре возраста́ние, ста́рым и немощны́м – утеше́ние и подкрепле́ние, боля́щим – исцеле́ние, сирота́м и вдови́цам – ми́лость и заступле́ние, заблу́ждшим – исправле́ние, бе́дствующим – благовре́менную по́мощь. Не посрами́те нас во упова́нии на́шем, споспешеству́йте, я́ко отцы́ чадолюби́вии, и нам понести́ и́го Христо́во во благоду́шии и терпе́нии, и всех упра́вите в ми́ре и покая́нии непосты́дно сконча́ти живо́т свой и Ца́рствия Небе́снаго сподо́битися, иде́же вы ны́не водворя́етеся со А́нгелы и все́ми святы́ми, прославля́юще Бо́га, в Тро́ице сла́вимаго, Отца́ и Сы́на и Свята́го Ду́ха. Ами́нь.

Святитель Митрофан, епископ Воронежский

Святитель Митрофан, первый епископ Воронежский, родился 6 ноября 1623 года во Владимирской земле, по предположению, в семье священника. Мирское имя будущего святителя было Михаил. Половину своей жизни святой прожил в миру, был женат и имел детей. Сохранились сведения о заботливости святого Митрофана по воспитанию своего сына Ивана. Будущий епископ был некоторое время священником в селе Сидоровском Суздальской епархии. На 40-м году жизни он овдовел и решил посвятить свою жизнь Богу. Своим местожительством он избрал Золотниковский Успенский монастырь недалеко от Суздаля, где и был пострижен в иночество с именем Митрофан.

Здесь угодник Божий начал иноческое подвижничество, отличаясь глубоким смирением. О его строгой иноческой жизни стало известно в монашеской среде. Через три года после вступления в Золотниковскую обитель братия соседнего Яхромского Космина монастыря, не имевшего в ту пору настоятеля, стали просить местное духовное начальство о поставлении им в игумены Митрофана. Просьба была исполнена. Вначале подвижник был рукоположен в иерейский сан, затем, несмотря на нежелание, был возведен в игумены Яхромской обители.

Игуменство его здесь продолжалось десять лет, в течение которых вполне раскрылась любвеобильность святого по отношению к пастве, а также его способности духовного наставника. Памятником его трудов по благоустройству обители стал храм Всемилостивого Спаса, устроенный на месте небольшой старой церкви. Когда о ревности подвижника узнал Патриарх Московский и всея Руси Иоаким (1674–1690), он поручил ему более обширную Унженскую обитель, основанную в XV в. преподобным Макарием Желтоводским в Костромской земле. Здесь будущий святитель настоятельствовал около семи лет, в течение которых монастырь достиг процветания. Был построен храм в честь Благовещения Пресвятой Девы Марии, написано немало замечательных икон. Во время своего настоятельства в Унженском монастыре святитель духовно окормлял также окрестные обители и храмы.

Монастырь игумена Митрофана привлекал внимание не одного Патриарха, но и царя Феодора Алексеевича, который посещал обитель и нередко беседовал с настоятелем. При дворе к святому относились с особым почтением. Когда в 1682 году, по решению Московского Церковного Собора 1681 года, была образована новая Воронежская епархия, царь Феодор первым ее епископом предложил назначить игумена Митрофана. Епископскую хиротонию 2 апреля 1682 года возглавил Патриарх Иоаким.

В том же году, после кончины царя Феодора, святителю Митрофану довелось присутствовать в Москве при венчании на Царство двух братьев – царевичей Иоанна и Петра. Во время торжества 25 июня святитель Митрофан поднес Патриарху на золотом блюде венец для коронования царя Петра, которому было в то время 10 лет.

Святителю Митрофану пришлось быть свидетелем бунта раскольников в июле того же года и присутствовать на «прении о вере» между старообрядцами и православными в Грановитой палате. Это событие произвело на него сильное впечатление и впоследствии сказалось на его архиерейских делах. Святитель Митрофан приобрел известность как обличитель раскола и сподвижник патриотических начинаний царя-реформатора.

Благоустройство Воронежской епархии требовало много трудов от архипастыря. Воронеж был городом на окраине государства, поэтому сюда стекались беглые крестьяне и казаки. Хотя здесь давно уже существовало христианство, многие жители носили языческие имена. Храмов было мало, подчинение законам – слабо, господствовали вольница и самоуправство. Одним из первых деяний святого архипастыря на Воронежской кафедре были послания духовенству, содержащие призыв к истинному служению Богу и пастве. Святитель Митрофан рассматривал духовенство как силу, способную воздействовать на население самым благотворным образом. В самом начале своей деятельности святитель начал сооружать в Воронеже новый каменный храм в честь Благовещения Пресвятой Богородицы. Святитель Митрофан любил церковное благолепие и вкладывал в строительство собора огромные средства. Быт святителя был более чем скромен.

Святитель Митрофан в деле духовного просвещения Воронежского края искал опору прежде всего в монастырях. Нарушения в обиходе иночества побудили святителя вступить в борьбу за чистоту монашеской жизни. Он упорядочивал жизнь обителей, вводил уставную церковную службу, единогласное пение. Святитель Митрофан требовал от иноков ежедневного посещения храма и неопустительного совершения келейного правила, призывал к строгому соблюдению постов, советовал пребывать в монастыре неисходно, насаждал мир и братолюбие. Исключительная доброта и милосердие архипастыря проявились в сооружении им богадельни (дома для нищих и убогих), женской обители в Ельце для монашествующих стариц, а также в личной благотворительности. Дом святителя всегда был готов служить пристанищем для странников и бездомных; угодника Божия можно было часто видеть у постели больного и напутствующим умирающего. Ясностью, глубиной и умилительностью отличались его проповеди, на которые приезжали богомольцы из других городов.

Духовная дружба связывала святителя Митрофана со святителем Питиримом, епископом Тамбовским (память 28 июля). Они поддерживали переписку и несколько раз встречались для душеполезной беседы.

Особую страницу в биографии святителя Митрофана составляют его взаимоотношения с Петром I. Святитель глубоко и сочувственно входил в судьбу молодого царя, старался содействовать возникавшим полезным для Отечества преобразованиям. Он одобрял постройку флота, предпринятую Петром I в Воронеже, и поддержал ее материально. Когда в 1696 году русские войска одержали победу над турками под Азовом, Петр I повелел святителю Митрофану как бы в награду за участие в этой победе именоваться епископом Воронежским и «Азовским». В то же время святитель Митрофан не мог одобрить слишком тесного общения царя с иноземными иноверцами и бездумного восприятия их обычаев. Святитель отказался посетить воронежский дворец царя из-за находившихся в нем языческих статуй. Когда разгневанный Петр стал грозить ему смертью, святитель начал готовиться к ней, предпочитая умереть, нежели одобрить неприемлемые для православного человека языческие ритуалы.

Исповедничество епископа устыдило Петра, в знак согласия с ним он убрал статуи, и мир был восстановлен. На Воронежской кафедре угодник Божий пробыл 20 лет, до самой своей кончины.

Оставшиеся после него записки и сочинения (послание к пастырям, духовное завещание и Синодик) позволяют в какой-то мере воссоздать особенности духовного облика святителя. Судя по ним, восхождение к Богу епископа Митрофана совершалось последовательно и неуклонно. Любимым размышлением святого было памятование о смерти, о загробной жизни, о мытарствах; любимой молитвой – молитва об умерших. Еще при жизни святитель самой глубиной своих помыслов как бы пребывал в мире загробном. Свои назидания святой часто излагал ритмической прозой; о его духовности говорит такое выразительное изречение:

«Память бо смерти узда есть от греха,

Слезы же начало и свершение смирению».

Не будучи знаком с распространенной в XVII в. латинской схоластикой, святитель Митрофан прекрасно знал Священное Писание и святоотеческие труды. В своем «Духовном завещании» святитель Митрофан назидал: «Для всякого человека таково правило мудрых мужей: употреби труд, храни умеренность – богат будешь; воздержно пей, мало ешь – здрав будешь; твори благо, бегай злого – спасен будешь». Преставился к Богу святитель Митрофан в 1703 году в глубокой старости. Незадолго до кончины святитель принял схиму с именем Макарий. Погребен он был в Благовещенском соборе в Воронеже с большими почестями: царь своими руками помогал нести гроб святителя, почитаемого им за «святого старца».

После кончины святителя воронежцы часто выражали свою любовь к нему посещением его гробницы и служением панихид. В 1714 году Благовещенский собор сильно обветшал, потребовалась его основательная перестройка. В 1718 году пришлось перенести гроб с телом святителя в храм Неопалимой Купины – при этом обнаружилось нетление его мощей. В 1735 году, при обратном перенесении, оно подтвердилось. С 1820 года число почитателей молитвенной памяти святителя Митрофана особенно возросло, при соборе начали появляться записи о чудесах на его гробнице. В 1831 году последовало официальное донесение об этом Синоду, по решению которого 7 августа 1832 года состоялось торжественное открытие гроба, а затем последовала канонизация святителя. От его святых мощей по милости Божией происходили многочисленные исцеления страждущих телесными и душевными недугами, одержимых, расслабленных. В 1836 году при Благовещенском соборе в Воронеже был учрежден Благовещенский Митрофанов монастырь.

Церковь празднует память святителя Митрофана 23 ноября – день преставления и 7 августа – день прославления.

Литература:

1. Житие иже во святых отца нашего Митрофана. Воронеж, 1877.

2. Житие святителя Митрофана, Воронежского чудотворца. М., 1895.

3. Святитель и чудотворец Митрофан, первый епископ Воронежский. М., 1900.

4. Поликарпов Н. И. Очерк жизни и деятельности святителя Митрофана, первого епископа Воронежского. Воронеж, 1904.

5. Зверев С., священник. О духовном завещании святителя Митрофана, епископа Воронежского. – Журнал Московской Патриархии, 1983, № 6, с. 89.

6. Воронежской епархии 300 лет. – Там же, с. 10–17.

Тропа́рь, глас 8:

Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш Мерку́рие;/ те́мже вся вра́жия ополче́ния кре́пко посрами́л еси́/ и, я́ко победоно́сец и́стинный,/ возда́яние получи́л еси́ от Христа́ Бо́га./ Тому́ помоли́ся о душа́х на́ших.

Конда́к, глас то́йже:

Любо́вию ко Христу́ уязви́в твою́ ду́шу,/ преподо́бне о́тче наш Мерку́рие,/ в пеще́рнем мра́це свет спасе́ния обре́л еси́/ и, я́ко ча́до избра́нное вели́ких отце́в Пече́рских Анто́ния и Феодо́сия,/ вку́пе с ни́ми оби́тель ра́йскую насле́довал еси́,/ отону́дуже призира́й ны́не на оби́тель земну́ю,/ в не́йже подвиза́лся еси́,/ и моли́ся о чту́щих па́мять твою́.

Преподобный Меркурий, епископ Смоленский

Преподобный Меркурий, епископ Смоленский, был иноком Киево-Печерского монастыря. Время его хиротонии неизвестно. На Смоленской кафедре, вероятно, был преемником епископа Лазаря, так как он испытал со своей паствой ужасы Батыева нашествия. В описании Киево-Печерской Лавры говорится о нем: «Святой Меркурий, епископ Смоленский, убит Батыем в 1247 году». После блаженной кончины его мощи чудесным образом приплыли по Днепру к Киеву. Ныне они почивают в Киево-Печерской Лавре в Антониевых (Ближних) пещерах.

Литература:

1. Димитрий (Самбикин), архиепископ. Месяцеслов святых, всею Русскою Церковью или местночтимых. Вып. 3. Каменец-Подольск, 1894.

2. Барсуков Н. Источники русской агиографии. СПб. 1882.

Тропа́рь, глас 8:

Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш Пи́мене;/ те́мже вся вра́жия ополче́ния кре́пко посрами́л еси́/ и, я́ко победоно́сец и́стинный,/ воздая́ние получи́л еси́ от Христа́ Бо́га./ Тому́ помоли́ся о душа́х на́ших.

Конда́к, глас то́йже:

Пи́мене преподо́бне,/ по́стником единонра́вне,/ послуша́ния о́бразе и трудолю́бия пра́вило,/ во бде́нии и моли́твах неусы́пне,/ не преста́й моля́ся о нас ко Го́споду.

Преподобный Пимен, постник Печерский

Преподобный Пимен, постник Печерский, подвизался в Дальних пещерах. Воздержание его было таково, что он вкушал пищу только раз в день и лишь в самом необходимом количестве. Внешнее пощение было соответственным воздержанию внутреннему от неугодных Богу поступков, мыслей и чувств. Преподобный Пимен был игуменом Киево-Печерского монастыря с 1132 по 1141 год.

Вторично память святого отмечается 28 августа, в Соборе Киево-Печерских святых, в Дальних пещерах почивающих.