28-й день
Преподо́бнаго отца́ на́шего Моисе́я Му́рина
Преподо́бных отце́в Пече́рских, и́хже нетле́нныя мо́щи в Да́льней пеще́ре почива́ют
Преподо́бнаго Са́ввы Кры́пецкаго, и́же во Пско́вских преде́лех
Преподо́бнаго И́ова, игу́мена и чудотво́рца святы́я Ла́вры Поча́евския
Слу́жба о́бщая преподо́бному Пече́рскому еди́ному
Слу́жба о́бщая преподо́бным Пече́рским, двема́ или́ мно́гим
Преподо́бнаго отца́ на́шего Моисе́я Му́рина
НА ВЕЧЕ́РНИ
На Го́споди, воззва́х: стихи́ры, глас 8.
Подо́бен: Му́ченицы Твои́:
Моисе́й многонаро́читый,/ мирско́е украше́ние оста́вль му́дре,/ боле́зньми воздержа́ния кре́пкими/ стра́сти покори́ плотски́я/ и, низложи́в многоко́зненнаго,/ побе́ды вене́ц прия́т./ Того́ моли́твами, Го́споди,/ всем пода́ждь ве́лию ми́лость.
Воздержа́ние изря́дное,/ стоя́ние всено́щное, бде́нное о́ко,/ ум, смотря́ющ Боже́ственныя добро́ты,/ име́л еси́, блаже́нне Моисе́е,/ те́мже исцеле́ний благода́ть прия́л еси́,/ стра́сти цели́ти лю́тыя./ Сего́ ра́ди тя мо́лим:/ испроси́, о́тче, всем ве́лию ми́лость.
Де́монския ко́зни, и стреля́ния, и ловле́ния,/ Боже́ственною покрыва́емь, Моисе́е, дла́нию,/ о́тче, проше́л еси́ невре́дно/ и, безстра́стием украша́емь,/ всем преподо́бным приче́лся еси́./ Моли́ дарова́ти ве́рою чту́щим тя ве́лию ми́лость.
Сла́ва, и ны́не, Богоро́дичен:
Помышле́ния нечи́ста и устны́ льсти́вы,/ дела́ же моя́ вся оскве́рнена,/ и что сотворю́? Ка́ко усря́щу Судию́?/ Влады́чице Де́во,/ моли́ Сы́на Твоего́, и Зижди́теля, и Го́спода,/ я́ко да в покая́нии прии́мет дух мой,/ я́ко еди́н Благоутро́бен.
Крестобогоро́дичен:
Не терплю́, Ча́до, ви́дящи Тя на Дре́ве усну́вша,/ бо́дрость всем подаю́щаго,/ я́ко да и́же дре́вле преступле́ния плодо́м/ сном поги́бельным усну́вшим/ Боже́ственную и спаси́тельную бо́дрость пода́си,–/ Де́ва глаго́лаше, пла́чущися, Ю́же велича́ем.
На стихо́вне Окто́иха.
Сла́ва, и ны́не, Богоро́дичен.
Тропа́рь, глас 1:
Пусты́нный жи́тель, и в телеси́ А́нгел,/ и чудотво́рец яви́лся еси́, Богоно́се о́тче наш Моисе́е:/ посто́м, бде́нием, моли́твою Небе́сная дарова́ния прии́м,/ исцеля́еши неду́жныя и ду́ши ве́рою приходя́щих ти./ Сла́ва Да́вшему тебе́ кре́пость,/ сла́ва Венча́вшему тя,/ сла́ва Де́йствующему тобо́ю всем исцеле́ния.
НА У́ТРЕНИ
О́ба кано́на Окто́иха и свята́го на 4, глас 8.
Песнь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Грызе́нием грехо́вным помраче́нное се́рдце мое́/ убели́, о́тче, покая́ния ту́чами, моли́твами твои́ми.
Стра́ху Влады́чню плоть пригвозди́в,/ вся́ко помышле́ние стра́стное от се́рдца, Богоно́се преблаже́нне, изсуши́л еси́.
В бразда́х мы́сленных скрыв Сло́ва, о́тче, се́мена,/ возде́лал еси́ пшени́цу, в сокро́вищах неистоща́емых соблю́дшему.
Богоро́дичен: Всего́ мя спаса́ет Сло́во Пребоже́ственное бла́гостию,/ восхоте́в из чре́ва Твоего́ воплоти́тися, Чи́стая Ма́ти Де́во.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Ду́хом дви́жимь, духо́вными, му́дре, дея́нии,/ терпя́, лука́вствия покори́л еси́ ду́хи.
Си́лою укрепля́емь Богонача́льною, Моисе́е преподо́бне,/ кре́пкаго, я́ко безпло́тен, смири́л еси́ зми́я.
Ту́чами слез твои́х, о́гненное опале́ние страсте́й угаси́л еси́/ и река́ яви́лся еси́ дарова́ний, наполня́ема Ду́хом.
Богоро́дичен: Име́я Тя по́мощь, враго́в стремле́ния, Чи́стая, не убою́ся:/ име́я Тя Предста́тельницу, тех побежда́ю полки́.
Седа́лен, глас 3.
Подо́бен: Боже́ственныя ве́ры:
Боже́ственными сия́нии разбогате́в, и тьму́ разруши́л еси́ страсте́й, всеблаже́нне,/ и бо́дрыми моли́твами твои́ми увяди́л еси́ пло́ти возвыша́емая мудрова́ния,/ и к Го́рнему преше́л еси́ кра́йнему гра́ду./ О́тче преподо́бне, Христа́ Бо́га моли́ дарова́ти нам ве́лию ми́лость.
Сла́ва, и ны́не, Богоро́дичен:
Боже́ственнаго естества́ не отлу́чся, плоть быв во чре́ве Твое́м,/ но Бог вочелове́чся и пребы́сть,/ И́же по Рождестве́ Ма́терь Тя Де́ву, я́ко пре́жде рождества́, сохрани́в Всенепоро́чну, еди́н Госпо́дь./ Того́ приле́жно моли́ дарова́ти нам ве́лию ми́лость.
Крестобогоро́дичен:
Нескве́рная А́гница Сло́ва, Нетле́нная Де́ва Ма́ти,/ на Кресте́ зря́щи пове́шена из Ней без боле́зни Прозя́бшаго,/ ма́терски подо́бно рыда́ющи, вопия́ше:/ увы́ Мне, Ча́до Мое́, ка́ко стра́ждеши во́лею,/ хотя́ изба́вити от страсте́й безче́стия челове́ка?
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Любопло́тнаго де́мона непреста́нными, о́тче, мольба́ми и боле́зней придая́ньми/ от души́, преблаже́нне, отгна́л еси́.
Преложи́в помышле́ние к су́щим па́че ума́ же и сло́ва, преподо́бне,/ воздержа́ния зной, я́коже Боже́ственную ро́су, терпе́л еси́.
Ве́трилом воскрили́вся нестяжа́ния,/ легко́ преплы́л еси́ жите́йское, о́тче, мо́ре,/ ко приста́нищу ти́хому направля́емь.
Богоро́дичен: Де́вства сосу́де и невмести́маго естества́ селе́ние,/ ду́шу мою́ просвети́ омраче́нную, Богоневе́сто.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́, ино́го не ве́мы.
У́глем разжига́емь, блаже́нне, безстра́стия,/ ве́щь удобопальную страсте́й попали́л еси́.
Звезда́ воздержа́ния, высота́ми сия́я, яви́лся еси́,/ ду́ши на́ша просвеща́я, пресла́вне.
На высоту́ доброде́телей возше́л еси́/ и во о́стров дости́гл еси́ Небе́сный,/ о́тче Моисе́е досточу́дне.
Богоро́дичен: Де́ву по рождестве́ пое́м Тя, Богоро́дице:/ Ты бо Бо́га Сло́ва пло́тию ми́ру родила́ еси́.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Но́щию мя грехо́вною и сласте́й омраче́нием окруже́на,/ и́же в тебе́ духо́вными сия́нии всего́ просвети́,/ всего́ ко приста́нищу спасе́ния, о́тче, напра́ви.
Я́коже пчела́ трудолюби́вая, со́том ума́ твоего́ цве́ты доброде́телей собра́в,/ источи́л еси́ сла́дость безсме́ртную,/ го́ресть, о́тче, де́монскую отгоня́щую.
В пусты́нях претерпева́я, Вы́шний град насле́довал еси́,/ плоть порабоща́я поще́ньми, чу́дне,/ к пи́щи неоскуде́ваемей и к ра́йским селе́нием отше́л еси́.
Богоро́дичен: Свяще́ние у́мное и неприкоснове́нное очисти́лище,/ свети́льник златови́ден и трапе́зу одушевле́нну, Хлеб носи́вшую жи́зни, Де́во,/ ве́рнии, Тя имену́ем.
Конда́к, глас 4:
Му́рины зауши́в и лица́ де́монов поплева́в,/ мы́сленно просия́л еси́,/ я́коже со́лнце све́тлое,/ све́том жития́ твоего́/ и уче́нием наставля́я ду́ши на́ша.
Песнь 7
Ирмо́с: О́троцы евре́йстии в пещи́/ попра́ша пла́мень дерзнове́нно/ и на ро́су о́гнь преложи́ша, вопию́ще:/ благослове́н еси́, Го́споди Бо́же, во ве́ки.
Ка́ла страсте́й очище́н, духо́вными блиста́яся сия́ньми,/ к Све́ту вои́стинну невеще́ственному преста́вился еси́,/ иде́же ли́цы, блаже́нне, по́стников во ве́ки.
Вся́кия избе́гл еси́ зло́бы,/ присво́ився же до́брым преложе́нием и до́брым жела́нием,/ невеще́ственно примеси́лся еси́, вопия́, блаже́нне:/ Бо́же, благослове́н еси́.
Боле́зньми воздержа́ния безме́рными/ боле́зненный изсуши́л еси́ грех, Богоно́се,/ те́мже безболе́зненное обре́л еси́ благи́х наслажде́ние,/ благословя́ твоего́ Влады́ку.
Богоро́дичен: Се, Ю́же рече́ Де́ву Ду́хом вели́кий Иса́ия,/ во утро́бе Бо́га зача́т и ражда́ет, Ему́же пое́м:/ благослове́н Бог оте́ц на́ших.
Песнь 8
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сии́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Моли́твами вжиля́емь, смире́нием возвыша́емь, пра́вдою ду́шу облиста́я,/ любо́вию украша́емь, к доброде́телей соверше́нию,/ к явле́нней, о́тче, восте́кл еси́ высоте́, зовы́й Влады́це:/ свяще́нницы, благослови́те, лю́дие, превозноси́те во вся ве́ки.
Черн сый те́лом, ду́шу же светле́йшу со́лнечных сия́ний стяжа́в,/ де́монов очерни́ омраче́нная ли́ца,/ ве́рных же просвеща́ет сердца́ свои́м подо́бием, те́пле пою́щих:/ лю́дие, превозноси́те Христа́ во ве́ки.
Смире́нием всю́ду огражде́н,/ убежа́л еси́, о́тче, ефио́пов мы́сленных стреля́ния,/ о́браз же был еси́ мона́хом к боре́нию враго́в, де́лы же и словесы́, с ни́ми взыва́я:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Богоро́дичен: Па́че естества́ зача́ла еси́,/ па́че сло́ва родила́ еси́ Соде́теля челове́ческаго естества́,/ бы́вша Челове́ка, Отцу́ неразлу́чна, Влады́чице Чи́стая,/ Ему́же пое́т вся тва́рь:/ о́троцы, благослови́те, свяще́нницы, воспо́йте,/ лю́дие, превозноси́те во вся ве́ки.
Песнь 9
Ирмо́с: Устраши́ся всяк слух/ неизрече́нна Бо́жия снизхожде́ния,/ я́ко Вы́шний во́лею сни́де да́же и до пло́ти,/ от деви́ческаго чре́ва быв Челове́к./ Те́мже Пречи́стую Богоро́дицу, ве́рнии, велича́ем.
В де́лех вои́стинну благи́х жи́знь сконча́в,/ пости́гл еси́ благи́х исто́чник и твоего́ жела́ния коне́ц прия́л еси́,/ пра́зднующих же иде́же глас с хвале́нием, ра́дуяся, всели́лся еси́,/ досточу́дне Моисе́е, о́тче преподо́бне.
Иска́пают, о́тче, сла́дость по́льзы по́тове боле́зней твои́х/ и го́ресть на́шу стра́стную отго́нят,/ источа́ют нам исцеле́ния мо́щи,/ и гное́ния зол и душ скве́рну очища́ют.
Венцы́ венча́ Христо́с неувяда́ющими твою́ главу́, чу́дне,/ победи́вша тве́рдо полки́ мироде́ржца,/ и преподо́бных ли́ком преподо́бно приче́лся еси́,/ с ни́миже моли́ся изба́витися напа́стей чту́щим тя.
Богоро́дичен: Уста́вила еси́ еди́на в жена́х кля́тву первозда́нных, Богоневе́сто,/ Неопи́саннаго пло́тию ро́ждши опису́ема,/ обнови́ла еси́ зако́ны естества́, Нескве́рная,/ разстоя́щая пе́рвее, пресла́вным хода́тайством Твои́м соединила еси́.
Преподобный Моисей Мурин жил в IV веке в Египте. Он был эфиоп, лицом был черен и поэтому назван «мурин». В молодости он был рабом знатного человека, но после того, как совершил убийство, Господин прогнал его, и он пристал к шайке разбойников. За суровый нрав и большую физическую силу его выбрали главарем. Моисей вместе с шайкой совершил много злодеяний – убийств, грабежей, так что все боялись даже его имени. Несколько лет пробыл в такой греховной жизни разбойник Моисей, но по великой милости Божией раскаялся, оставил шайку разбойников и ушел в одну из пустынных обителей. Здесь он долго плакал, прося принять его в число братии. Монахи не поверили этому искреннему покаянию, но бывший разбойник до тех пор умолял не отгонять его, пока братия не согласились. В монастыре преподобный Моисей находился в полном послушании у игумена и братии, он проливал много слез, оплакивая свою греховную жизнь. Через некоторое время преподобный Моисей ушел в уединенную келлию, где проводил в молитве и строжайшем посте суровую жизнь. Однажды на келлию преподобного Моисея напали 4 разбойника из его бывшей шайки, но он, не утративший огромной физической силы, связал их всех и, подняв на плечи, принес в монастырь, спрашивая у старцев, как поступить с пленниками. Старцы велели отпустить их. Разбойники, узнав, что попали к своему бывшему предводителю, а он их пощадил, последовали его примеру, покаялись и стали монахами. Когда остальные разбойники услышали о покаянии преподобного Моисея, то оставили разбой и стали усердными иноками.
Преподобный Моисей не скоро освободился от страстей. Он часто приходил к игумену монастыря авве Исидору, прося совета, как избавиться от блудной страсти. Опытный в духовной брани старец учил его никогда не пресыщаться пищей, пребывать впроголодь, соблюдая строжайшее воздержание. Страсть не оставляла преподобного Моисея в сонных видениях. Тогда авва Исидор научил его всенощным бдениям. Преподобный простаивал все ночи на молитве, не преклоняя колен, чтобы не заснуть. От длительной борьбы преподобный Моисей пришел в уныние и, когда у него возник помысл оставить пустынную келлию, авва Исидор подкрепил дух ученика. Он показал ему в видении много демонов на западе, готовящихся к борьбе, а на востоке еще большее количество святых Ангелов, также приготовлявшихся к битве. Авва Исидор обнадежил преподобного Моисея, что сила Ангелов превосходит силу бесов, а долгая борьба со страстями нужна ему, чтобы совершенно очиститься от прежних грехов.
Преподобный Моисей предпринял новый подвиг. Обходя по ночам пустынные келлии, он приносил каждому брату воду из колодца. Особенно он старался для старцев, которые жили далеко от колодца и были не в силах принести себе воды. Однажды, наклонясь над колодцем, преподобный Моисей почувствовал сильный удар в спину и замертво упал у колодца, пролежав в таком положении до рассвета. Так бесы мстили преподобному за победу на ними. Утром братия принесла его в келлию, и он пролежал целый год в расслаблении. Поправившись, преподобный с твердой решимостью исповедал игумену, что он будет продолжать подвизаться. Но Господь Сам положил предел этой многолетней борьбе: авва Исидор благословил ученика и сказал ему, что блудная страсть уже оставила его. Старец велел ему причаститься Святых Таин и с миром идти в свою келлию. С тех пор преподобный Моисей получил от Господа власть над бесами.
Слава о его подвигах распространилась среди иноков и за пределами пустыни. Правитель страны захотел увидеть святого. Узнав об этом, преподобный Моисей решил скрыться от посетителей и ушел из своей келлии. По дороге он встретил слуг правителя, которые спросили его, как пройти к келлии пустынника Моисея. Преподобный ответил им: «Не стоит ходить к этому лживому, недостойному монаху». Слуги возвратились в монастырь, где их ждал правитель, и передали ему слова повстречавшегося старца. Братия, по описанию наружности старца, единодушно признали в нем самого преподобного Моисея.
Проведя много лет в иноческих подвигах, преподобный Моисей был рукоположен во диакона. Епископ облек его в белую одежду и сказал: «Авва Моисей ныне весь бел». Святой ответил: «Владыко, что делает чистым – внешнее или внутреннее?» По смирению преподобный считал себя внутренне недостойным принять сан диакона. Однажды епископ решил испытать его и велел клирикам гнать диакона из алтаря, ругая его недостойным мурином. С полным смирением преподобный принимал бесчестие. Испытав его, епископ посвятил преподобного во пресвитера. В этом сане преподобный Моисей подвизался 15 лет и собрал вокруг себя 75 учеников.
Когда преподобному исполнилось 75 лет, он предупредил своих иноков, что вскоре на скит нападут разбойники и умертвят всех насельников. Святой благословил иноков уйти заблаговременно, чтобы избежать насильственной смерти. Ученики стали просить преподобного уйти вместе с ними, но он ответил: «Я уже много лет ожидаю времени, когда на мне исполнится слово Владыки моего, Господа Иисуса Христа, сказавшего: ”Вси, приимшии нож, ножом погибнут"» (Мф.26:52). Тогда с преподобным остались 7 братьев, из которых один, при приближении разбойников, спрятался неподалеку. Разбойники убили преподобного Моисея и оставшихся с ним шесть иноков. Кончина их последовала около 400 года.
Преподо́бных отце́в Пече́рских, и́хже нетле́нныя мо́щи в Да́льней пеще́ре почива́ют
ВЕ́ЧЕР
Блаже́н муж: 1-й антифо́н. На Го́споди, воззва́х: стихи́ры, глас 8.
Подо́бен: О, пресла́внаго чудесе́:
Небе́снаго Царя́ воево́да, Феодо́сий Богому́дрый,/ полк во́инов духо́вных, преподо́бных оте́ц, собра́,/ и́хже по́двиги ублажа́юще,/ пе́сненныя похвалы́ им принесе́м и возопии́м, глаго́люще:/ я́ко иму́щим дерзнове́ние ко Влады́це всех и Бо́гу,/ проси́те душа́м на́шим ве́лия ми́лости/ и ми́ру всему́ умире́ния.
Ви́дение у́мным очесе́м зри́тся чуде́сно:/ пламеноно́снеи криле́ иму́ще, во́ини духо́внии,/ от Небе́с прихо́дят отцы́ всеблаже́ннии/ и в по́мощь на́шу ускоря́ют, на мироде́ржца ополча́ющеся./ К ни́мже припаде́м, зову́ще:/ вас призыва́ем, неусы́пнии засту́пницы на́ши,/ потщи́теся изба́вити нас от находя́щих враго́в на́ших/ и да́ти нам от скорбе́й избавле́ние.
Разруши́ нападе́ния вра́жия, преподо́бне о́тче наш Феодо́сие,/ ста́до твое́ огражда́я во́и Небе́сными,/ при́сно бо сове́туют нахожде́нии злы́ми разори́ти е,/ но ты, я́ко скор сый в по́мощь,/ да́ждь заступле́ние к тебе́ притека́ющим/ и прося́щим твоего́ избавле́ния/ и не отщети́ в печа́лех посеще́ния.
Сла́ва, глас то́йже:
Престо́лу Трисо́лнечнаго Божества́ предстоя́щии/ и бога́тно осиява́еми непристу́пными светлостьми́,/ отцы́ на́ши всеблаже́ннии,/ и́же на земли́ любе́зно предстоя́щих/ и собо́р ваш дне́сь гла́сы воспева́ющих/ страсте́й и бед свободи́те,/ я́ко при́снии к Бо́гу хода́таи/ и моли́твенницы о душа́х на́ших.
И ны́не, Богоро́дичен: Ца́рь Небе́сный:
Вход. Проки́мен дне. И чте́ния три преподо́бническая (зри день сей ни́же).
На стихо́вне стихи́ры, глас 2.
Подо́бен: До́ме Евфра́фов:
Богоизбра́ннии де́лателие,/ преподо́бнии отцы́ на́ши Пече́рстии,/ мы́сленный доброде́телей на земли́ виногра́д насади́сте,/ от него́же возрасте́ вам/ досто́йный плод ве́чнаго живота́.
Стих: Восхва́лятся преподо́бнии во сла́ве/ и возра́дуются на ло́жах свои́х.
Посе́ясте в горе́ сле́зы,/ да плод дово́льный,/ ра́дость во дво́рех Госпо́дних, процвете́т;/ ея́же вы наслажда́ющеся во ве́ки,/ моли́теся за ны ко Го́споду.
Стих: Блаже́ни вси боя́щиися Го́спода,/ ходя́щий в путе́х его́.
Молв жите́йских изба́витися жела́юще,/ всели́стеся в пеще́ру,/ иде́же трудолю́бие пожи́вше,/ в ве́чный поко́й внидо́сте;/ моли́теся та́мо за ны Влады́це Христу́.
Сла́ва, глас 1:
Волнобу́рныя молвы́ жития́ избе́гше,/ ко оти́шию же пеще́ры святы́я дости́гше/ и та́мо трудолю́бне Го́сподеви угоди́вше,/ ны́не Вы́шняго Сио́на есте́ гра́ждане,/ и, Ца́рствия Бо́жия су́ще сы́нове,/ моли́теся, отцы́ Богоно́снии,/ прича́стие сла́вы ва́шея улучи́ти/ при́сно собо́р ваш любо́вию почита́ющим.
И ны́не, Богоро́дичен: Небе́сных чино́в ра́дование: (зри 2-е приложе́ние).
Тропа́рь, глас 4:
Мы́сленное со́лнце и све́тлую луну́,/ первонача́льных Пече́рских,/ со всем собо́ром преподо́бных дне́сь почти́м,/ ти́и бо, церко́вную тве́рдь озаря́юще,/ просвеща́ют во тьме́ страсте́й бе́дствующих,/ и подаю́т от Христа́ Бо́га моли́твами свои́ми по́мощь во всех ско́рбех,/ и душа́м на́шим про́сят избавле́ния.
Сла́ва, и ны́не, Богоро́дичен: Е́же от ве́ка утае́ное:
НА У́ТРЕНИ
На Бог Госпо́дь: тропа́рь преподо́бных два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4.
Подо́бен: Яви́лся еси́:
Мно́гими скорбьми́ пу́ть жи́зни сея́ преидо́сте и, дости́гше кра́я у́мнаго жела́ния,/ в Черто́г Боже́ственный сла́вы всели́стеся;/ и ны́не, ра́дующеся со всех Царе́м и Бо́гом,/ моли́теся, я́ко да и мы ва́шего весе́лия прича́стницы бу́дем,/ ваш собо́р почита́ющим, отцы́ всеблаже́ннии.
Сла́ва, и ны́не, Богоро́дичен:
Обра́дованная, хода́тайствуй Твои́ми моли́твами/ и испроси́ душа́м на́шим мно́жество щедро́т и очище́ние прегреше́ний,/ всем пою́щим Тя, Чи́стую Ма́терь и Де́ву.
По 2-м стихосло́вии седа́лен, глас 3:
Брак А́гнчий в Черто́зе Небе́снем услы́шавше,/ и зва́нию Царя́ Вы́шняго ко всем бы́вшу,/ вся мирска́я пристра́стия оста́висте, отцы́ Богоно́снии,/ и, сле́зными струя́ми ри́зы своя́ испра́вивше, чи́сти внидо́сте в трапе́зу Христа́ Бо́га;/ но, пре́жде да́же не затворя́тся две́ри того́ вхо́да,/ моли́теся, я́ко да и мы, покая́нием вше́дше, вам прича́стницы бу́дем.
Сла́ва, и ны́не, Богоро́дичен:
Черто́г, присносу́щною сла́вою укра́шен, ви́дяще вы́ну,/ жела́ние и́мамы совни́ти в о́нь,/ но, оде́жды не иму́ще, стыди́мся,/ да не свя́зани от А́нгел и изве́ржени бу́дем./ Ты, су́щи оде́жда наги́х дерзнове́ния, Де́во Мари́е, украси́ ны/ и введи́ вну́трь Ца́рствия Христо́ва.
Велича́ние:
Велича́ем вас,/ преподо́бнии отцы́ на́ши Пече́рстии,/ и чтим святу́ю па́мять ва́шу,/ вы бо моли́те о нас/ Христа́, Бо́га на́шего.
Стих 1: Ра́дуйтеся, пра́веднии, о Го́споде, пра́вым подоба́ет похвала́. Стих 2: Се́ющии слеза́ми ра́достию по́жнут. Стих 3: Восхва́лятся преподо́бнии во сла́ве и возра́дуются на ло́жах свои́х. Стих 4: Весели́теся о Го́споде и ра́дуйтеся, пра́веднии, и хвали́теся, вси пра́вии се́рдцем.
По полиеле́и седа́лен, глас 8.
Подо́бен: Прему́дрости:
Зва́нию Го́спода своего́ после́дующе,/ крест, а́ки жезл, в ру́це восприе́мше, не убоя́стеся стра́ха, предстоя́щаго во тьме́,/ но упова́нием преидо́сте к безбе́дному приста́нищу/ и, по́двигов свои́х обре́тше воздая́ние, весели́теся во Све́те непристу́пнем;/ те́мже вас почита́ем, отцы́ всеблаже́ннии,/ я́ко при́сно моля́щих Христа́ Бо́га согреше́ний оставле́ние дарова́ти/ пра́зднующим любо́вию святу́ю па́мять ва́шу.
Сла́ва, и ны́не, Богоро́дичен:
Я́ко еди́ну в жена́х Благослове́нную и де́вам похвалу́ и украше́ние,/ в бране́х непребори́мую по́мощь, немощны́м утвержде́ние/ и ско́рое посеще́ние в печа́ли су́щим иму́ще Тя, Богоневе́стная Де́во,/ дне́сь в пречестне́м Твое́м хра́ме припа́даем и мольбы́ на́ша к Тебе́ прино́сим,/ я́ко да мо́лиши Христа́ Бо́га согреше́ний оставле́ние дарова́ти/ благоче́стно покланя́ющимся Пресвято́му Рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 8: Престо́лу Трисо́лнечнаго Божества́: (зри сла́вник на Го́споди, воззва́х:)
Кано́н Богоро́дицы со ирмосо́м на 6, и преподо́бных на 8, глас 8.
Песнь 1
Ирмо́с: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:/ Изба́вителю и Бо́гу на́шему пои́м.
Во́ду преходи́ти пе́сненных слове́с в па́мять ва́шу, Богоно́снии отцы́, хотя́ща мя,/ в тишине́ у́мней всегда́ испра́вите/ и от бу́рных страсте́й удержи́те,/ да в ва́шем хвале́нии с пе́снию возвели́чу И́мя Бо́га моего́.
Изше́д на зла́чное по́ле мы́сленнаго рая́ пеще́ры святы́я,/ услажда́юся благово́нными арома́ты, я́же источа́ют мо́щи ва́ша, преподо́бнии отцы́,/ и ве́село Созда́телю Бо́гу пе́снь умо́м возсыла́ю.
Вертогра́д заключе́н ты еси́, пеще́ро свята́я,/ в тебе́ бо Сади́тель Вы́шний насади́ мно́жество древе́с,/ богоно́сных оте́ц, а́ки ке́дров лива́нских, и́же досяго́ша Небе́с высото́ю,/ и́мже удивля́яся, пою́ пе́снь Бо́гу моему́.
Стра́жу неусы́пне, Лонгине вра́тарю,/ дар име́вый прозира́ти мы́сли входя́щих,/ обреты́й по́чести Вы́шняго зва́ния,/ вни́ди и обыми́ хвалы́ богоно́сных оте́ц,/ в и́хже па́мяти пе́снь Бо́гу на́шему пое́м.
Игна́тие, па́стырю и́ночествующих и цели́телю боля́щих,/ в неду́зех на́ших посо́бствуй тя почита́ющим,/ да в па́мяти твое́й пе́снь хвалы́ Бо́гу на́шему принесе́м.
Силуа́не преподо́бне, чистоты́ рачи́телю и храни́телю садо́вий,/ та́тей чу́вственных и мы́сленных, плоды́ обоя́ окрасти́ хотя́щих, моли́твою связа́вый,/ от тех нападе́ний и нас спаси́, мо́лимся.
Богоро́дичен: Мно́гими та́ти обстои́мь, не чу́вствую всегда́,/ и окрада́ют ми врази́ покая́ния плоды́,/ но бо́дренною Твое́ю моли́твою и неисче́тною благосты́нею, Ма́ти Бо́жия,/ изба́ви мя, молю́ся.
Песнь 3
Ирмо́с: Небе́снаго кру́га Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,/ Еди́не Человеколю́бче.
Небе́снаго и земна́го кру́га Созда́тель созда́ ме́сто сие́/ и вас, до́брыя гра́жданы, в нем поста́ви, треблаже́ннии отцы́,/ причти́те нас в сожи́тие ва́ше нетле́нное/ и жела́емаго кра́я ми́лости дости́гнути моли́теся, мо́лим вас.
Агафо́не блаже́нне, бла́гости веща́ния имени́те,/ по́стником красото́, проро́че нело́жный и цели́телю неду́жных,/ скажи́ нам, нечу́вственным, а́ще пу́ть беззако́ния есть в нас,/ и ты наста́ви ны моли́твами твои́ми на пу́ть ве́чен.
Пое́м ди́внаго Зинона, сия́ющаго посто́м,/ и Мака́рия, блаже́нству тезоимени́та,/ сих двои́х ра́ди отце́в, мо́лимтися, Влады́ко,/ изми́ нас душе́вных и теле́сных страсте́й, Еди́не Человеколю́бче.
Сла́вим Ахи́лу, служи́теля же́ртвы,/ и я́ко и́стиннаго по́стника приво́дим Ти, Христе́, в моли́тву,/ его́же ра́ди изми́ нас от порабоще́ния чре́вных страсте́й/ и воздержа́нию того́ научи́ ны, Еди́не Человеколю́бче.
Ипа́тие, служи́телю немощны́м,/ я́ко име́яй дар больны́х цели́ти возложе́нием руку́, тя мо́лим,/ посети́ свы́ше нас, душе́вными неду́ги обдержи́мых,/ и спаси́ моли́твами твои́ми.
Я́ко в житии́ сем любве́ свя́зани сою́зом,/ по сме́рти же в еди́нем гро́бе су́ще положе́ни,/ та́ко и в нетле́нней жи́зни ны́не вку́пе живу́ще, Паи́сие и Мерку́рие,/ хода́тайством ва́шим к Бо́гу в единомы́слии и любви́ утверди́те ны, мо́лимся.
Лавре́нтие, по́стником свети́ло, и Моисе́е крестоно́сне,/ в тьме́ страсте́й нас су́щих и ходя́щих освети́те и моли́твами ва́шими наста́вите,/ да и мы в крестоноше́нии на́шем не преткне́м о ка́мень собла́зна ног на́ших.
Богоро́дичен: Тьма́ страсте́й объя́т ны,/ и в пути́ сласте́й уклони́хомся непрохо́дны,/ све́та и справле́ния не ви́дим./ Наста́внице, наста́ви нас и свет покая́ния возсия́й нам,/ Ты бо еси́ всем многосве́тлое свети́ло, просвеща́ющее ду́ши на́ша.
Седа́лен, глас 2:
Поще́нием просия́вших и све́тлыми по́двиги/ преподо́бных оте́ц Пече́рских чи́стое житие́ и труды́ кто восхвали́ти мо́щен?/ Оба́че от любве́, я́же к ним, пе́сненныя да́ры прино́сим,/ ти́и бо, со А́нгелы предстоя́ще, при́сно мо́лятся Го́сподеви о всех нас.
Сла́ва, и ны́не, Богоро́дичен:
Милосе́рдия су́щи исто́чник, ми́лости сподо́би нас, Богоро́дице,/ при́зри на лю́ди согреши́вшия,/ яви́, я́ко при́сно, си́лу Твою́,/ на Тя бо упова́юще: ра́дуйся,– вопие́м Ти,/ я́коже иногда́ Гаврии́л, безпло́тных Архистрати́г.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Дре́вних оте́ц стопа́м после́дующе,/ не уклони́стеся ни ма́ло от их трудо́в,/ те́мже ра́вный дина́рь ве́чныя жи́зни от Христа́ прие́мше,/ со А́нгелы сла́вит е преве́чное Того́ Божество́.
Илларио́н ди́вный, вели́каго о́браза чин име́вый/ и, по чи́ну своему́ ревну́я житию́ преподо́бнаго Феодо́сия,/ еди́ною всегда́ в седми́це яды́й, кре́пок бе во славосло́вии пе́ти:/ сла́ва си́ле Твое́й, Го́споди.
По́стническое стече́ся во́инство,/ в не́мже просия́ све́тлая звезда́, Диони́сий,/ и́же ны́не сия́ет во сла́ве святы́х и сла́вит Еди́но Божество́.
Трудолю́бцем о́браз изве́стный, Арсе́ний, му́жеству тезоимени́тый,/ в труде́х день и но́щь живы́й,/ прия́т возме́здие, дар чудотворе́ния,/ от него́же подае́т тре́бующим всем неоску́дно.
Пи́мене, по́стником единонра́вне,/ кровопо́тными труды́ труди́выйся в послуша́нии вы́ну,/ дрова́ нося́, в же́рновех меля́,/ на вся́ку же но́щь непреста́нно поя́ Бо́га и Того́ Еди́но Божество́.
Сто́лпе непоколеби́ме, Афана́сие затво́рниче,/ водруже́н сый в затво́ре, не тре́бовал еси́ све́тлости чу́вственныя,/ поне́же тебе́ мы́сленная светя́ше,/ то́ю моли́, блаже́нне, просвети́тися тя почита́ющим.
Тро́ичен: Сла́ва Тебе́, Тро́ице Пресвята́я,/ я́ко просла́вила еси́ ме́сто земно́е, Небе́сному гра́жданы подо́бное,/ в и́хже па́мяти приноси́мым от нас пе́нием/ Тя, О́тче, и Сы́не, и Ду́ше Святы́й, с раболепным поклоне́нием, гре́шнии, сла́вим/ и Твое́ Еди́но Божество́ превозно́сим.
Богоро́дичен: Сла́ва Тебе́, правосла́вных сла́во, Чи́стая,/ Тя бо сла́вит со А́нгелы род челове́ческий и, припа́дая, вопие́т:/ сла́ва бо Твоя́, Богоро́дице, всем простре́ся во спасе́ние.
Песнь 5
Ирмо́с: Просвети́ нас повеле́нии Твои́ми, Го́споди,/ и мы́шцею Твое́ю высо́кою/ Твой мир пода́ждь нам,/ Человеколю́бче.
Просвети́ша всю Росси́йскую зе́млю да́нною им благода́тию отцы́ всеблаже́ннии,/ и тьма́ уже́ злове́рия вконе́ц поги́бе./ Ты́я лучи́ простри́ на ны моле́ния их ра́ди,/ мо́лимтися, Еди́не Человеколю́бче.
Сисо́е чу́дне и Григо́рие, и́мя от бо́дрости име́вый,/ о́ба посто́м обуздавший своя́ стра́сти,/ свире́пеющую по́хоть и на́шея пло́ти смири́те,/ вам бо дана́ есть благода́ть в страсте́х нам посо́бствовати.
Воздержа́ния рачи́телю, Па́вле блаже́нне, со двема́ канона́рхома,/ простри́те о нас мольбы́ ко Влады́це,/ да Того́ благода́тию от чре́вняго несы́тства уде́ржимся/ и вам в воздержа́нии насле́дницы бу́дем.
Сло́во Бо́жие, вразумля́ющее челове́ки,/ не кни́жныя му́дрости научи́ тя, Не́сторе свя́те, но Вы́шния,/ е́юже зрел еси́ при моли́твах А́нгелы и кончи́ну свою́ предви́дел еси́./ Той и нас прича́стники сотвори́, мо́лим тя,/ па́мять твою́ почита́юще.
Ти́те всему́жественне, во́инствующу ти иногда́,/ поби́ша сопроти́внии ору́жием главу́ твою́,/ и бы́сть я́зва вино́ю, я́ко прише́л еси́ в Пече́рскую го́ру/ и та́мо пла́кал еси́ о гресе́х свои́х,/ о и́хже проще́нии извеще́ние прие́м,/ ра́достно отше́л еси́ к Го́рним селе́нием Небе́сным, преподо́бне.
Па́мву послушли́ваго почита́ти дерза́ю и удивля́юся:/ той бо в послуша́нии от неве́рных и ве́ры ра́ди во у́зах претерпе́ мно́го,/ оба́че, от А́нгел восхище́н и пренесе́н, в ке́ллии свое́й обре́теся,/ и сбы́стся на нем, я́ко послуша́ние от сме́рти избавля́ет.
Тро́ичен: Впадо́х в ру́ки враго́в мы́сленных/ и око́ван е́смь от них тя́жкими пу́ты, от ни́хже брат не изба́вит./ Ты, Тро́ице Пресвята́я, я́ко Ми́лостивая, созда́ние Твое́ поми́луй/ и бла́гостию Твое́ю от уз сме́ртных свободи́.
Богоро́дичен: Свя́зан е́смь мно́гими плени́цами страсте́й,/ и не́сть ми разреше́ния наде́жды,/ но Ты поми́луй мя, я́ко Ма́ти Бо́га Вы́шняго,/ и разреши́ мя от них,/ Ты бо Еди́на си́льна еси́ по Бо́зе грехо́вныя плени́цы разреши́ти.
Песнь 6
Ирмо́с: Моли́тву пролию́ ко Го́споду/ и Тому́ возвещу́ печа́ли моя́,/ я́ко зол душа́ моя́ испо́лнися,/ и живо́т мой а́ду прибли́жися,/ и молю́ся, я́ко Ио́на:/ от тли, Бо́же, возведи́ мя.
Моли́твы на́ша прино́сим вам, о Богоно́снии отцы́,/ вы бо есте́ моли́твенницы о нас к Бо́гу и хода́таи,/ хода́тайством у́бо ва́шим от тли грехо́вныя изба́вите/ честны́й ваш собо́р почита́ющих.
Неусы́пне серде́чное виде́ние иму́ще к Бо́гу,/ бы́сте незло́бивии, а́ки младе́нцы,/ но яро о́ко име́ете на бе́сы, я́ко и и́мене ва́шего им трепета́ти./ Мо́лим вас, моли́теся,/ да и от нас нападе́ния вра́жия со студо́м возвратя́тся.
Заха́рие, па́мяти Госпо́дней тезоимени́те,/ по и́мени твоему́ и житие́ стяжа́вый,/ та́ко бо на враги́ посто́м му́жески вооружи́влся еси́,/ я́ко во всем житии́ твое́м зе́лием пита́яся, дово́лен был еси́,/ тем и́мене твоего́ боя́хуся бе́си;/ от сих у́бо злоде́йства избавля́я, ускори́ на по́мощь на́шу,/ смире́нно мо́лимтися.
Фео́доре блаже́нне,/ сла́ву благоро́дства своего́ в пе́рсть всели́вый,/ измени́в княже́ние на и́ноческий о́браз,/ в не́мже Влады́це своему́ до́бре угоди́вый/ и ны́не со А́нгелы в Небе́сных живы́й,/ моли́ся о нас, да сла́вы неги́бнущия прича́стницы бу́дем.
Софро́ние преподо́бне, в те́мнем ме́сте себе́ затвори́вый,/ непреста́нно во псалме́х пел еси́ Бо́гу;/ и ны́не в простра́нней селе́нии Го́рнем наслажда́лся а́нгельских пе́ний,/ моли́ся, да и мы та́я слы́шати сподо́бимся.
В преподо́бии и пра́вде свяще́нствуя Вы́шнему, Панкра́тие чу́дне,/ чудотво́рными да́ры обогати́вся,/ от сих подава́л еси́ неоску́дно тре́бующим;/ пода́ждь у́бо сия́ и нам, в боле́знех к тебе́ усе́рдно приходя́щим.
Тро́ичен: Сла́вы ра́ди И́мене Твоего́, Пресу́щественная Тро́ице,/ просла́вила еси́ пра́ведных Твои́х и ме́сто сие́;/ бла́гостию у́бо Твое́ю пода́ждь и нам, Бла́же, сла́ву святы́х во сла́ве Твое́й зре́ти/ и с ни́ми Тебе́ сла́вит и, в трие́х Ипоста́сех Еди́наго Бо́га.
Богоро́дичен: И́же Тя не просла́вит, Пресвята́я Де́во,/ той да не ви́дит сла́вы жи́зни ве́чныя;/ нам же да́ждь ви́дети ту́ю,/ и́бо зна́ем Тя, сла́виму от всех сил Небе́сных, и сие́ прино́сим Ти:/ ра́дуйся, ве́рным изве́стная похвало́.
Конда́к, глас 8:
Избра́ннии от родо́в уго́дницы Бо́жии,/ святи́и преподо́бнии Пече́рстии,/ на сих гора́х доброде́тельми просия́вшии,/ вас земля́ не потаи́ла есть,/ но Не́бо отве́рзеся вам и ра́йское селе́ние./ Те́мже мы похва́льныя пе́сни Бо́гу, просла́вльшему вас,/ в па́мяти ва́шей прино́сим;/ вы же, я́ко иму́щии дерзнове́ние,/ ваш собо́р почита́ющих от всех бед моли́твами ва́шими заступа́йте,/ я́ко засту́пницы на́ши и к Бо́гу хода́таи.
И́кос:
Восхвали́ти по еди́ному кто возмо́жет святы́я Твоя́, Бла́же:/ изочту́ их, и па́че песка́ умно́жатся,/ но Сам, Влады́ко Христе́, исчита́яй мно́жество звезд и всем имена́ нарица́яй,/ приими́ всех их мольбы́ о нас и яви́ щедро́ты Твоя́ на лю́дех Твои́х;/ ве́мы бо, я́ко мно́го и́мут дерзнове́ние к вели́честву Твоему́ и хода́тайствуют к Тебе́,/ я́ко при́сно моли́твенницы о душа́х на́ших.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
Ту́чная еси́ и усыре́нная, Пече́рская горо́,/ в твои́х бо гра́жданех изво́ли Вы́шний селе́ние Свое́ полжи́ти,/ те́мже и мы с ни́ми пое́м:/ оте́ц на́ших Бо́же, благослове́н еси́.
Сми́рны испо́лнена и хо́лму Лива́нскому подо́бна еси́, Пече́рская горо́,/ ка́плющая ми́ры Богоно́сных оте́ц на исцеле́ние боле́зней тлетво́рных,/ и́хже мы благоуха́ние прие́млюще, пое́м:/ оте́ц на́ших Бо́же, благослове́н еси́.
Аммо́не и Марда́рие, подви́жный супру́г45,/ бы́вше нищеты́ рачи́телие,/ ны́не же бога́тство неги́блющее стяжа́вшии,/ моли́теся и нам то́ежде стяжа́ти в Вы́шних, иде́же пою́т:/ Бо́же, благослове́н еси́.
Пое́м Ру́фа, по́стником и трудолюбцем зерца́ло, с Вениами́ном Блаже́нным,/ и́же все свое́ име́ние отдаде́ ни́щим,/ да еди́н би́сер Христа́ стя́жет,/ Ему́же ревни́телие да бу́дем, пою́ще:/ Бо́же, благослове́н еси́.
Фео́филе, иера́рхом удобре́ние, Нова́града престо́л содержа́вый/ и Сама́го Го́спода ви́девый,/ умоли́ Того́ бла́гость, да и мы Лице́ его́ у́зрим с тобо́ю и воспое́м:/ оте́ц на́ших Бо́же, благослове́н еси́.
В диа́конех свети́ло и в трудолю́бцех о́бразе, Марти́рие, чистоты́ рачи́телю,/ дар име́вый прогоня́ти от челове́к лука́выя ду́хи и не́мощи цели́ти,/ ду́ха зло́бы и вся́кия ле́сти отжени́ от нас, да чи́сто воспое́м:/ Бо́же, благослове́н еси́.
Тро́ичен: Прославля́ющия святы́х Твои́х просла́ви, Преблага́я Тро́ице, сла́вою,/ ю́же угото́вала еси́ от ве́ка рабо́м Твои́м, и сподо́би пе́ти:/ оте́ц на́ших Бо́же, благослове́н еси́.
Богоро́дичен: Прера́дованная Ма́ти и Цари́це,/ ра́достная Тебе́ принося́щих ра́дости ве́чныя сподо́би/ и отве́рзи ра́йския две́ри христиа́нскому всему́ ро́ду, при́сно Тебе́ пою́щему:/ Богоро́дице, благослове́нна еси́.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.
Цари́цы Небе́сныя селе́ние еси́, Святопече́рская горо́,/ ю́же си́льных мно́жество преподо́бных оте́ц окружа́ют,/ вси ору́жия изощре́нна иму́ще, моли́твы проти́ву мироде́ржца, пою́т пе́снь Бо́гу:/ пое́м и превозно́сим его́ во ве́ки.
Восто́к и за́пад, юг и се́вер/ ви́дит во огра́де твое́й, Пече́рская горо́, исто́чник,/ кипя́щий ми́ры чуде́с Богоно́сных оте́ц, излива́ющийся всем изоби́льно,/ и́же пою́т и превозно́сят Го́спода во ве́ки.
Ко́е хвале́ние вам принесе́м, о Богоно́снии отцы́,/ ка́ко испове́мы труды́ и по́двиги ва́ша тупогру́бым язы́ком, не ве́мы./ Но ты, свя́те Евфи́мие молчали́ве, научи́ ны,/ да с тобо́ю пое́м Го́спода во ве́ки.
По́стником и трудолюбцем сия́ние, Кассиа́не и Пио́ре блаже́нне,/ о́ба светя́щийся житие́м, а́ки небе́сная свети́ла,/ све́тлостию благода́ти, да́нныя вам, озари́те ны,/ да сподо́бимся с ва́ми пе́ти Го́спода во вся ве́ки.
Пла́чущих помина́я блаже́нство, Пафну́тие преподо́бне, всегда́ пла́кал еси́,/ ны́не же ра́достная насле́див ме́ста,/ моли́ся та́мо и нам во кров безплаче́вный всели́тися,/ да с тобо́ю превозно́сим Го́спода во ве́ки.
Со Ио́сифом чу́дным ва́шу, вси святи́и, па́мять почита́ем,/ посто́м и труды́ до́бре Бо́гу угоди́вшии, и мо́лим,/ да от всех бед заступле́ние ва́ми обря́щем/ и сподо́бимся Го́спода превозноси́ти во ве́ки.
Во огра́де пеще́ры святы́я проходя́ще умо́м,/ зрим на тве́рди ея́ мно́жество, а́ки звезд, оте́ц преподо́бных,/ и́хже исчи́слити невозмо́жно./ Тем о всех возда́вше хвалу́ Бо́гу, мо́лим,/ да даст нам с ни́ми превозноси́ти его́ во ве́ки.
Богоро́дичен: Гони́м сый зми́ем миролюбным,/ к Твое́й огра́де прибего́х, Чи́стая:/ кро́вом у́бо ми́лости Твое́й защити́ мя и того́ зубо́в изба́ви,/ я́ко да спасе́н, превозношу Тя, Ма́терь Бо́жию, во ве́ки.
Песнь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с безпло́тными ли́ки Тя велича́юще.
Вои́стинну пре́жде юдо́ль бе плаче́вная и верте́п разбо́йником гора́ сия́ Свята́я,/ ны́не же дом Бо́жий есть,/ и живу́щии в нем блаже́нни, я́ко ва́ми освяти́ся, Богоно́снии отцы́:/ сего́ ра́ди всех вас велича́ем.
Глас ра́дования и шум празднолю́бных стека́ется восхвали́ти собо́р ваш, отцы́ Пече́рстии;/ тех у́бо хвале́ния прие́мше,/ от всех скорбе́й и печа́лей спаса́йте,/ да всегда́ вас велича́ем.
Ра́достною душе́ю взе́мше кре́стное и́го/ и ра́лом трудо́в го́ру сию́ возде́лавше,/ насади́сте сады́ по́тов ва́ших, Богоно́снии отцы́, мы́сленных,/ и́хже плоды́ объе́мше, увеселя́ем ду́ши на́ша и всех вас велича́ем.
Во еди́н пу́ть за́поведей Госпо́дних ходя́ще, разли́чная се́мена се́ясте,/ ов чистоту́, ов послуша́ние, ин пост,/ други́й нищету́, труды́ и сле́зы./ Оба́че вси ра́вно ра́дости рукоя́ти пожинаете,/ от ни́хже и нам да́рствуйте, да вы́ну вас всех велича́ем.
Госпо́дь пасе́т вас ны́не на ме́сте зла́чне, преблаже́ннии отцы́,/ и ко́е уже́ вас лиша́ет бла́го?/ Пото́к бо сла́дости вас напая́ет,/ от него́же поне́ каплею еди́ною жития́ на́шего го́ресть, мо́лимся, услади́те,/ да ра́достно Бо́гу на́шему воспое́м.
От ме́ста плаче́внаго на безплаче́вное преше́дших, мо́лим вас, отцы́ преблаже́ннии,/ нас, па́мять ва́шу вку́пе почита́ющих, вся́кия ско́рби избавля́йте,/ да вси вас велича́ем.
Тро́ичен: Сла́ва Ты еси́, Тро́ице, преподо́бных оте́ц ли́ку, и неги́блющее весе́лие,/ о Тебе́ бо мир и плоть с неви́димым враго́м победи́вше, прия́ша венцы́/ и ра́дуются со А́нгелы, Тя всегда́ велича́юще.
Богоро́дичен: Сла́вим Тя, пресла́вный гра́де Бо́жий,/ Тебе́ бо Сам основа́ Вы́шний/ и даде́ в прибе́жище всем от лица́ вра́жия бежа́щим./ И нам бу́ди в приста́нище, да Тя вы́ну велича́ем.
Свети́лен:
Ца́рское свяще́ние, ро́де избра́нный,/ иера́рси святи́и, свяще́нницы, мона́си, де́вственницы, чудотво́рцы/ и все по́стническое сосло́вие преподо́бных оте́ц Пече́рских,/ собери́теся дне́сь на моли́тву,/ да вас ра́ди Ца́рь сла́вы спасе́т правосла́вныя лю́ди,/ благоче́стно собо́р ваш почита́ющих.
Сла́ва, и ны́не, Богоро́дичен:
Святы́х Святе́йшую Тя сла́вим, Чи́стая Де́во,/ и велича́ем от Тебе́ рожде́нное Сло́во,/ Ты же приими́ и от нас славосло́вие сие́, и да́ждь сла́вити и Тя,/ иде́же вси святи́и Ма́терь Тя Бо́жию сла́вят.
На хвали́тех стихи́ры, глас 4.
Подо́бен: Дал еси́ зна́мение:
Плотско́е мудрова́ние,/ покоре́нием ума́ плени́сте в послуша́ние Христо́во,/ отцы́ преблаже́ннии,/ и, стра́стное мо́ре преплы́вше,/ достиго́сте кра́йняго жела́ния,/ тем дарова́ вам по́чести зва́ния Вы́шняго/ Иису́с Человеколю́бец/ и Спас душ на́ших.
Угаси́сте пе́щь мирски́х пристра́стий/ и самохо́тныя молвы́,/ сле́зными пото́ки и коне́чною нището́ю,/ отцы́ преподо́бнии,/ и, я́ко в черто́зе све́тле,/ в те́мных пребы́сте пеще́рах,/ а́нгельски славосло́вяще Иису́са Человеколю́бца/ и Спа́са душ на́ших.
От бре́нныя страсте́й глубины́,/ скорбе́й и попече́ний жите́йских/ ум очи́стивше, отцы́ Богоно́снии,/ упова́нием бу́дущия жи́зни вся тле́нная презре́сте./ И ны́не, в нетле́нней жи́зни су́ще,/ моли́те за ны Иису́са Человеколю́бца/ и Спа́са душ на́ших.
Сла́ва, глас 6:
Блаже́нства непоро́чных вожделе́вше,/ в пу́ть за́поведей Госпо́дних теко́сте/ и, свиде́ния во́ли Бо́жией взыску́юще,/ в го́ры, в верте́пы и в те́мныя пеще́ры всели́стеся,/ мир с похотьми́ распя́сте/ и, бесо́вския полки́ победи́вше,/ ны́не жи́знь и сла́ву безконе́чную насле́дисте./ Моли́теся за ны, мо́лим вас, отцы́ преподо́бнии,/ улучи́ти прича́стие с ва́ми Вы́шняго Иерусали́ма/ и спасе́ние душа́м на́шим.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, со святы́ми апо́столы и со все́ми святы́ми/ спасти́ся душа́м на́шим.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на, пе́сни 3-я и 6-я. Проки́мен, глас 7: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Апо́стол к Гала́том, зача́ло 213. Аллилу́ия, глас 6: Блаже́н муж, боя́йся Го́спода, в за́поведех Его́ восхо́щет зело́. Стих: Си́льно на земли́ бу́дет се́мя его́. Ева́нгелие от Матфе́я, зача́ло 43, или́ от Луки́, зача́ло 24. Прича́стен: В па́мять ве́чную бу́дет пра́ведник:
Слу́жбы о́бщии преподо́бным Пече́рским зри: еди́ному (день сей ни́же), двема́ или́ мно́гим (день сей ни́же).
Собор преподобных отцов Киево-Печерских, в Дальних пещерах почивающих. Колыбель русской иноческой жизни, Киево-Печерская Лавра, основанная в 1051 году преподобными Антонием и Феодосием Печерскими, распространяла сияние великих духовных подвигов по всей земле Русской. Монахи Киево-Печерского монастыря стали первыми тружениками Русского иноческого подвижничества. Их молитвенные подвиги воодушевили последующие поколения на великие духовные труды.
Эта обитель, по словам Киево-Печерского Патерика, была поставлена «слезами, пощением, молитвою́, бдением». Преподобный Антоний, говорит один из авторов Патерика, «не имел ни золота, ни серебра, да приобрел все слезами и постом». В бытность преподобного Феодосия игуменом Лавра жила милостыней, которую в изобилии получала от князя и от мирян, привлекаемых благочестием и святостью жизни монашеской общины.
Приняв монастырь на свое попечение по благословению преподобного Антония преподобный Феодосий усугубил в нем воздержание, «великое пощение и молитвы со слезами»; когда же число братии превысило 100 человек, он стал искать подходящий монастырский устав для устроения внутренней жизни монастыря. Преподобный Феодосий избрал Студийский устав, который в дальнейшем. Был заимствован у Киево-Печерской Лавры другими русскими монастырями.
В условиях строгой монастырской жизни и каждодневных аскетических подвигов иноки Киево-Печерской обители, как «светила сияли на Руси». «Одни были крепкие постники, другие подвизались в бдении, иные на земных поклонах; иные постились по дню и по два, иные ели хлеб с водою, иные одну вареную зелень, или одну сырую»,– свидетельствует Киево-Печерский Патерик.
Большое внимание уделялось в обители послушанию: «Меньшие покорялись старшим и не смели говорить перед ними; но все делали с покорностью и с великим послушанием».
В обители царила истинно христианская любовь в отношениях между братией. В Патерике особо отмечается взаимная забота иноков друг о друге, попечение о младших со стороны старших насельников, которые «научали меньших и утешали, как детей возлюбленных. Если брат впадал в какое-нибудь прегрешение, другие утешали его и по великой любви своей епитимию разделяли трое или четверо... Если который-нибудь брат уходил из монастыря, вся братия сильно почалилась о том; посылали за ушедшим и, призвав его в монастырь, шли к игумену, кланялись, просили за него и принимали в монастырь с радостью. «Такие то были любящие, воздержные постники!» – восклицает инок Киево-Печерской обители преподобный Нестор Летописец.
Живя милостыней мира, монастырь и сам стремился помогать от своих избытков сирым, голодным и неимущим людям. Неподалеку от Киево-Печерской Лавры преподобным Феодосием был построен странноприимный дом для нищих и больных, которым оказывалась всемерная помощь. Каждую субботу монастырь отправлял в город воз хлеба, предназначенного для заключенных в тюрьмах. Бывали случаи, когда милостыня оказывалась даже пойманным на попытке ограбления монастыря разбойникам, против которых в духе великой христианской любви не возбуждалось никакого преследования.
Из всех аскетических подвигов особое распространение среди иноков Киево-Печерской Лавры получило затворничество. Претерпевая великие искушения, подвижники выходили из них победителями благодаря глубочайшей вере, многотерпению, беспредельной верности Богу, усердной непрестанной молитве и суровому посту. Среди преподобных отцов Киево-Печерских, почивающих в Дальних пещерах, память которых Церковь празднует 28 августа, более половины прославились затворничеством и великим постничеством.
В число этих преподобных отцов входят иноки, совершавшие свой духовный подвиг в разные периоды времени – с XI по XV век. О каждом из них не сохранилось подробных житийных сведений, за исключением имени, времени несения подвига и указания о том, на какой стезе тот или иной инок нес духовные труды и подвиги. В общем списке празднуемых 28 августа преподобных отцов Киево-Печерских Церковь чтит память следующих подвижников: преподобный Феодосий Великоименитый (†1074; память 3 мая, 14 августа и 2 сентября); Моисей, чудотворец (XIII-ХIV; память 28 июля); Лаврентий, Затворник (XIII-ХIV; память 20 января); Иларион Схимник (†1066; память 21 октября); Пафнутий Затворник (XIII; память 15 февраля); Мартирий Диакон (ХIV; память 25 октября); Феодор, князь Острожский (†ок. 1483; память 11 августа); Афанасий Затворник (XIII; память 2 декабря); Дионисий иеромонах, Затворник (XV, память 3 октября); Феофил, епископ Новгородский (†ок. 1482; память 26 октября); Зинон Постник (ХIV; память 30 января); Григорий чудотворец (ХIV; память 8 января); Ипатий Целебник (XIV; память 31 марта); священномученик Лукиан (†1243; память 15 октября); Иосиф Многоболезненный (XIV; память 14 апреля); Павел Послушливый (XIII; память 10 сентября); Сисой Схимник (XIII; память 6 июля); Нестор Некнижный (XIV; память 27 октября); Памва Затворник (†1241; память 18 июля); Феодор Молчальник (XIII; память 17 февраля); Софроний Затворник (XIII; память 11 марта); Панкратий иеромонах, Затворник (ХIIІ; память 9 февраля); Анатолий Затворник (ХIII; память 3 июля); Аммон Затворник (XIII; память 4 октября); Мардарий Затворник (XIII; память 13 декабря); Пиор Затворник (ХIIІ; память 4 октября); Мартирий Затворник (XIII-ХIV; память 25 октября); Руф Затворник (ХГѴ; память 8 апреля); Вениамин Затворник (XIV; память 13 октября); Кассиан Затворник (ХІII-ХIV; память 8 мая); Арсений Трудолюбивый (ХIV; память 8 мая); Евфимий Схимник (XIV; память 20 января); Тит Воин (XIV; память 27 февраля); Ахила Диакон (ХIV; память 4 января); Паисий (ХIV; память 19 июля); Меркурий Постник (ХIV; память 24 ноября); Макарий диакон (XIII-ХIV; память 19 января); Пимен Постник (XII; память 8 мая); Леонтий (память 18 июня) и Геронтий, Канонархи (ХIV; память 1 апреля); Захария Постник (XIII-ХIV; память 24 марта); Силуан Схимник (XIII-XIV; память 10 июня); Агафон чудотворец (ХIII – ХIV; память 20 февраля); Игнатий архимандрит (†1435; память 20 декабря); Лонгин Вратарь (XIII-XIV; память 16 октября).
Литература:
1. Киево-Печерский Патерик. Киев, 1870.
2. Словарь исторический о святы́х, прославленных в Российской Церкви. СПб., 1862.
3. Книга, глаголемая описание о Российских святых. Дополненная графом М. В. Толстым. Б. г.
4. Игнатий (Малышев), архимандрит. Краткие жизнеописания Русских святых. X-ХIV вв. СПб., 1875.
Преподо́бнаго Са́ввы Кры́пецкаго, и́же во Пско́вских преде́лех
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 5.
Подо́бен: Ра́дуйся, Живоно́сный Крсте́:
Все свое́ душе́вное жела́ние/ те́пле от ю́ности свое́й возне́с ко Го́споду,/ ду́шу с те́лом посто́м очи́стил еси́,/ Бо́жия же ра́зума вода́ми напая́емь,/ плод благоуха́нен яви́лся еси́ житие́м свои́м,/ о́тче Са́вво преподо́бне./ А́ще и челове́к естество́м был еси́,/ но а́нгельски на земли́ пожи́л еси́,/ страх Бо́жий возлюби́в/ и за́поведем его́ при́сно поуча́яся,/ всем же тих и уте́шителен/ словесы́ показа́лся еси́,/ ми́лостив же и кро́ток был еси́/ и ны́не сам бла́гости ве́чныя/ от Го́спода своего́ сподо́бился еси́,/ Ему́же приле́жно моли́ся/ дарова́ти душа́м на́шим мир и ве́лию ми́лость.
Богому́дре Са́вво, о́тче преподо́бне,/ пра́выми свои́ми стопа́ми/ тече́ние до́блественно к воздержа́нию просте́рл еси́/ и, ми́ра оша́явся,/ в пусты́ню дости́гл еси́ ра́достно,/ иде́же пе́рвее сам в себе́ Ду́ха Бо́жия водвори́л еси́,/ та́же храм из пусты́ни Бо́гу воздви́гл еси́,/ к нему́же и и́нок мно́жество собра́л еси́,/ с ни́миже а́нгельски на земли́ пожи́в/ и доброде́тельми сих просвети́в, возве́л еси́,/ иде́же свет невече́рний,/ иде́же а́нгельское предстоя́ние,/ с ни́миже приле́жно моли́ Христа́ Бо́га/ дарова́ти душа́м на́шим мир и ве́лию ми́лость.
Преподо́бне Са́вво, о́тче наш,/ в пусты́ни еди́н жи́тельствуя,/ еди́ному Бо́гу себе́ возложи́л еси́,/ от ми́ра те́сный пу́ть ше́ствовав,/ на широту́ пути́ ве́чнаго возше́л еси́,/ ду́шу безстра́стием украси́в,/ ре́вностнейших сподви́жников одушеви́л еси́,/ неви́димаго врага́ победи́в,/ ви́димо его́ изгоня́л еси́,/ сам и́нок и́стинен быв,/ тьмы́ и́нок воспита́л еси́,/ с ни́миже в Небе́сней оби́тели ны́не лику́я,/ предстои́ши Престо́лу всех Царя́, Христа́ Бо́га,/ Ему́же за ны приле́жно моли́ся/ дарова́ти душа́м на́шим мир и ве́лию ми́лость.
Сла́ва, глас 2:
Прииди́те, празднолю́бцы всех конце́в земли́,/ дне́сь благоче́стно восхва́лим псалмы́ и пе́сньми/ свято́е и честно́е преставле́ние блаже́ннаго отца́ Са́ввы,/ па́че ми́ра пусты́нную добро́ту возлюби́вшаго,/ вождя́ слепотству́ющим, по́стником украше́ние,/ исто́чника чуде́с, к Бо́гу моли́твенника непосты́дна./ Соше́дшеся у́бо, о празднолю́бцы,/ единогла́сно пе́сньми похва́льными воспои́м, глаго́люще:/ ра́дуйся, и́ноческаго жития́ пра́вило,/ о́бразе и вождю́ ко спасе́нию изве́стие,/ ра́дуйся, свети́льниче наш пресве́тлый,/ озаря́яй нам пути́ стро́потны46 светлостьми́ жития́ твоего́,/ ра́дуйся, и́же в беда́х и напа́стех нам вели́кое утеше́ние/ и те́плый предста́телю рабо́м твои́м./ Со дерзнове́нием у́бо ны́не предстоя́ Христу́ Бо́гу,/ моли́ Его́ о и́же ве́рою и любо́вию почита́ющих/ святу́ю па́мять твою́.
И ны́не, Богоро́дичен, глас то́йже:
Никто́же, притека́яй к Тебе́, посра́млен от Тебе́ исхо́дит,/ Пречи́стая Богоро́дице Де́во,/ но про́сит благода́ти/ и прие́млет дарова́ние к поле́зному проше́нию.
На стихо́вне стихи́ры, глас 2.
Подо́бен: До́ме Евфра́фов:
От земны́х к Небе́сным оби́телем,/ пресла́вне Са́вво о́тче, преше́л еси́/ и та́мо святы́х че́сти сподо́бился еси́,/ с ни́миже моли́ся/ спасти́ся душа́м на́шим.
Стих: Честна́ пред Го́сподем/ сме́рть преподо́бных Его́.
Ны́не собо́р и́ночествующих/ тебе́, Са́вво о́тче, предста́,/ заря́ми луче́й святы́ни твоея́,/ я́ко со́лнцем, све́тло облиста́емь,/ прославля́ет све́тлость твоея́ души́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Соше́дшеся, ли́цы оте́ц,/ к свяще́нному ковче́гу моще́й Са́ввы,/ блаже́ннаго отца́ на́шего,/ почти́м любо́вию святу́ю па́мять его́,/ сла́вяще Го́спода.
Сла́ва, глас 5:
Преподо́бне о́тче,/ не дал еси́ сна свои́ма очи́ма,/ ни ве́ждома дрема́ния,/ до́ндеже, ду́шу и те́ло от страсте́й свободи́в,/ себе́ угото́вал еси́ в дом и жили́ще Бо́гу,/ пусты́ню же свою́ во оби́тель бра́тии,/ в не́йже совоку́пно с ни́ми сла́вил еси́/ Отца́, и Сы́на, и Свята́го Ду́ха,/ Тро́ицу Единосу́щную,/ Ю́же моли́ и ны́не, о́тче наш,/ о е́же спасти́ся душа́м на́шим.
И ны́не, глас то́йже:
Обра́дованная, хода́тайствуй/ Твои́ми моли́твами/ и испроси́ душа́м на́шим мно́жество щедро́т/ и очище́ние прегреше́ний, мо́лимся.
Тропа́рь пи́сан на вели́цей вече́рни.
Сла́ва, и ны́не, Богоро́дичен.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры на 8, глас 6.
Подо́бен: Все отло́жше:
Ми́ра возненави́дев,/ Христа́ же возлюби́в,/ Сио́на духо́внаго жи́тель/ показа́лся еси́, о́тче Са́вво,/ наставле́нием учи́теля своего́,/ преподо́бнаго Евфроси́на,/ соверше́ннаго смиренному́дрия дости́гл еси́,/ та́же и други́я к смиренному́дрию сам приве́л еси́,/ мно́га же искуше́ния претерпе́в/ и Боже́ственным Ду́хом себе́ вооружи́в,/ мно́гим искуша́емым помо́гл еси́,/ с ни́миже и лука́ваго победи́л еси́/ си́лою И́же от Де́вы возсия́вшаго/ Христа́ Бо́га на́шего,/ Ему́же со дерзнове́нием моли́ся/ при́сно о душа́х на́ших.
Все свое́ жела́ние серде́чное ко Влады́це Христу́,/ о́тче Богому́дре Са́вво, впери́л еси́,/ и, вся мирска́я вмени́в за уме́ты,/ пусты́ню ми́ру предпоче́л еси́,/ ю́же пречестны́м хра́мом/ в сла́ву Иоа́нна Богосло́ва украси́л еси́,/ и мно́жество и́нок себе́ привле́кл еси́,/ и доброде́телем научи́л еси́,/ и вся к лицу́ Небе́снаго Царя́ приве́л еси́,/ иде́же свет невече́рний,/ иде́же А́нгел ликостоя́ние./ С ни́миже предстоя́, преподо́бне,/ и нас помина́й, чад свои́х,/ со дерзнове́нием моля́ Христа́ Бо́га/ при́сно о душа́х на́ших.
Преподо́бне о́тче Са́вво,/ ты, Госпо́дним жела́нием распали́вся,/ от чужди́х стран взыска́ти Го́спода прише́л еси́/ и па́че в стране́ пусты́нней его́ обре́л еси́,/ иде́же, стра́сти мирски́я воздержа́нием оттря́с,/ сам и́нныя47 наста́вил еси́/ и мно́жество сподви́жников и смоли́твенников/ в сла́ву Христо́ву собра́л еси́,/ те́мже и Госпо́дь тя просла́ви/ луча́ми чуде́с твои́х,/ Его́же со дерзнове́нием моли́/ спасти́ся душа́м на́шим.
Сла́ва, глас 8:
Рачи́тель быв Небе́снаго жития́/ и равностоя́тель Безпло́тных сил,/ о́тче Са́вво, преблаже́нне чудотво́рче,/ церко́вное утвержде́ние,/ богохрани́мому гра́ду Пско́ву свети́льниче,/ и́ночеству удобре́ние,/ при́зри ны́не на нас, пра́зднующих пречестну́ю па́мять твою́,/ мы бо, ча́да твоя́ и о́вцы слове́сных твои́х па́житей,/ я́коже ко отцу́ и па́стырю на́шему,/ к тебе́ ны́не стеко́хомся,/ приими́ ми́лостивно на́ше ма́лое моле́ние/ и испроси́ нам у Христа́ мир и ве́лию ми́лость.
И ны́не, Богоро́дичен: Ца́рь Небе́сный:
Проки́мен дне. И чте́ния 3 преподо́бническая.
Прему́дрости Соломо́новы чте́ние (главы́́ 5 и 6):
Пра́ведницы во ве́ки живу́т, и в Го́споде мзда их,/ и попече́ние их у Вы́шняго./ Сего́ ра́ди прии́мут ца́рствие благоле́пия/ и вене́ц добро́ты от руки́ Госпо́дни,/ зане́ десни́цею покры́ет я и мы́шцею защити́т их./ Прии́мет всеору́жие рве́ние свое́/ и вооружи́в тва́рь в ме́сть враго́м./ Облече́тся в броня́ пра́вды/ и возложи́т шлем суд нелицеме́рен./ Прии́мет щит непобеди́мый преподо́бне,/ поостри́т же напра́сный гнев во ору́жие,/ спобо́рет же с ним мир на безу́мныя./ По́йдут праволу́чныя стре́лы мо́лниины/ и, я́ко от благокру́гла лука́ облако́в, на наме́рение полетя́т,/ и от каменоме́тныя я́рости испо́лнь паду́т гра́ды./ Вознегоду́ет на них вода́ морска́я,/ ре́ки же потопя́т я на́гло./ Сопроти́в ста́нет им дух си́лы/ и, я́ко ви́хор, разве́ет их,/ и опустоши́т всю зе́млю беззако́ние,/ и злоде́йство преврати́т престо́лы си́льных./ Слы́шите у́бо, ца́рие, и разуме́йте,/ навы́кните, судии́ конце́в земли́./ Внуши́те держа́щии мно́жества/ и гордя́щимся о наро́дех язы́к,/ я́ко дана́ есть от Го́спода держа́ва вам/ и си́ла от Вы́шняго.
Прему́дрости Соломо́ни чте́ние (глава́ 3):
Пра́ведных ду́ши в руце́ Бо́жией,/ и не прико́снется их му́ка./ Непщева́ни бы́ша во очесе́х безу́мных умре́ти,/ и вмени́ся озлобле́ние исхо́д их,/ и е́же от нас ше́ствие – сокруше́ние,/ они́ же су́ть в ми́ре./ И́бо пред лице́м челове́ческим а́ще и му́ку прии́мут,/ упова́ние их безсме́ртия испо́лнено./ И вма́ле нака́зани бы́вше, вели́кими благоде́тельствовани бу́дут,/ я́ко Бог искуси́ я и обре́те их досто́йны Себе́./ Я́ко зла́то в горни́ле, искуси́ их/ и, я́ко всепло́дие же́ртвенное, прия́т я./ И во вре́мя посеще́ния их возсия́ют/ и, я́ко и́скры по сте́блию, потеку́т./ Су́дят язы́ком и облада́ют людьми́,/ и воцари́тся Госпо́дь в них во ве́ки./ Наде́ющиися На́нь разуме́ют и́стину/ и ве́рнии в любви́ пребу́дут ему́,/ я́ко благода́ть и ми́лость в преподо́бных Его́/ и посеще́ние во избра́нных Его́.
Прему́дрости Соломо́ни чте́ние (глава́ 4):
Пра́ведник а́ще пости́гнет сконча́тися, в поко́и бу́дет./ Ста́рость бо честна́ не многоле́тна,/ ниже́ в числе́ лет исчита́ется./ Седи́на же есть му́дрость челове́ком,/ и во́зраст ста́рости житие́ нескве́рное./ Благоуго́ден Бо́гови быв, возлю́блен бы́сть/ и живы́й посреде́ гре́шник преста́влен бы́сть./ Восхище́н бы́сть, да не зло́ба измени́т ра́зума его́/ или́ ле́сть прельсти́т ду́шу его́./ Раче́ние бо зло́бы помрача́ет до́брая/ и паре́ние по́хоти пременя́ет ум незло́бив./ Сконча́вся вма́ле, испо́лни ле́та до́лга,/ уго́дна бо бе Го́сподеви душа́ его́,/ сего́ ра́ди потща́ся от среды́ лука́вствия./ Лю́дие же ви́девше и не разуме́вше,/ ниже́ поло́жше в помышле́нии таково́е,/ я́ко благода́ть и ми́лость в преподо́бных Его́/ и посеще́ние во избра́нных Его́.
На лити́и стихи́ры, глас 4:
Егда́ Боже́ственное жела́ние на́йде на тя,/ преподо́бне о́тче Са́вво,/ тогда́, мирска́я вся возненави́дев,/ ко Христу́ еди́ному еди́н прихо́диши/ и, Того́ яре́м взем,/ а́ще и по стопа́м Евфроси́на ходи́ти изво́лиши,/ оба́че сам быв про́чим о́браз воздержа́ния,/ моли́твами же подо́бник своему́ отцу́ и учи́телю./ Мы же мо́лим тя, о́тче наш:/ моли́ся Го́споду Бо́гу/ о е́же спасти́ и просвети́ти ду́ши на́ша.
Егда́ Боже́ственное раче́ние распали́ тя,/ блаже́нне о́тче Са́вво,/ тогда́, зре́ти жела́я Боже́ственную све́тлость жития́ отше́льнаго,/ житие́ вожделе́л еси́ безмо́лвное,/ и, во пло́ти быв, я́ко безпло́тный,/ в безлю́дную и безпло́дную пусты́ню всели́лся еси́,/ ю́же слеза́ми свои́ми оплодотвори́л еси́,/ и, я́ко ма́слина, сам в ней возра́сл еси́/ жела́нием улучи́ти Влады́це своему́ предстоя́ние./ Ны́не же, священноле́пно ду́хом предстоя́ Бо́гу,/ со А́нгелы ликовству́еши,/ мы же мо́лим тя:/ моли́ся, преподо́бне о́тче наш, Бо́гу/ о е́же спасти́ и просвети́ти ду́ши на́ша.
Егда́ Боже́ственное просвеще́ние озари́ тя, о́тче Са́вво,/ тогда́ свет твой не утаи́ся и в пусты́ни/ и от тьмы грехо́вныя привлече́ к тебе́ мно́гия,/ и́мже благода́тную оби́тель созда́л еси́,/ в необурева́емое приста́нище и душа́м во спасе́ние,/ Пода́телю же благода́ти Бо́гу/ и в че́сть благода́тных уго́дников его́/ благоле́пны хра́мы на славосло́вие воздви́гл еси́,/ в ни́хже и сам до́бре подвиза́вся,/ по преставле́нии твое́м почи́л еси́./ Ны́не же со святы́ми сожи́тельствуя,/ моли́ Бо́га о е́же спасти́ и просвети́ти ду́ши на́ша.
Сла́ва, глас 5:
До́бре тече́ние свое́ соверши́в,/ Са́вво преподо́бне,/ ду́хом ко Христу́ восхожде́ние получи́л еси́,/ честны́я же твоя́ мо́щи по святе́м преставле́нии/ оби́тели и бра́тии твое́й оста́вил еси́ под земле́ю,/ я́же, я́ко ни́ва, до́бре возде́ланная,/ в не́дра своя́ прия́вши сие́ се́мя тле́ния,/ произрасти́ нетле́ние/ и яви́ тя, а́ки цвет, благоуха́нием благода́ти,/ и а́ки дре́во, плодоно́сием чуде́с удивля́юще,/ я́ко и пе́рсть, облежа́вшая свяще́нныя мо́щи, и гроб твой,/ Боже́ственною се́ю си́лою напита́вшиися,/ то́чат ве́рным многоразли́чныя да́ры,/ на освяще́ние душа́м же и телесе́м/ всех к тебе́ вопию́щих:/ моли́ Христа́ Бо́га/ дарова́ти нам ве́лию и бога́тую ми́лость.
И ны́не, Богоро́дичен: Храм и две́рь еси́:
На стихо́вне стихи́ры, глас 8.
Подо́бен: О, пресла́внаго чудесе́:
О пресла́вное чу́до!/ Я́ко звезда́ от чужди́х стран,/ полно́щней стране́ на́шей,/ Са́вво, провозсия́л еси́/ и просвети́л еси́ всех/ луча́ми доброде́телей твои́х,/ быв и́ноком утвержде́ние,/ по́стником пра́вило./ Те́мже, соше́дшеся ны́не в па́мять твою́,/ Христа́ возвелича́ем,/ прославля́юща Своя́ уго́дники.
Стих: Честна́ пред Го́сподем/ сме́рть преподо́бных Его́.
О пресла́вное чу́до!/ Са́вва оте́ц во пло́ти,/ Креста́ си́лою вооружи́вся,/ я́ко кре́пкий во́ин,/ победи́ безпло́тных враго́в ополче́ния,/ совле́кся же пло́ти,/ со А́нгелы водворя́ется./ Те́мже, пра́зднующе па́мять его́, воспое́м:/ того́ моли́твами, Христе́ Бо́же,/ спаси́ ду́ши на́ша, я́ко Милосе́рд.
Стих: Блаже́н муж, боя́йся Го́спода,/ в за́поведех Его́ восхо́щет зело́.
О пресла́вное чу́до!/ В после́дняя времена́ па́че пе́рвых/ яви́ся до́бльственник ве́ры и доброде́телей,/ и при ве́чере веко́в, я́ко у́тренняя заря́,/ облиста́ полно́щныя страны́,/ и с челове́ки я́ко А́нгел на земли́ поживе́,/ изобража́я в себе́ добро́ту Боже́ственную./ Те́мже, па́мять его́ пра́зднующе, воспои́м:/ того́ моли́твами, Христе́ Бо́же,/ спаси́ ду́ши на́ша.
Сла́ва, глас 5:
Преблаже́нне Са́вво, о́тче наш,/ всех су́щих с тобо́ю учи́л еси́, глаго́ля:/ ча́да, ели́ка си́ла есть, подвиза́йтеся о свое́м спасе́нии/ и терпи́те тесноту́ настоя́щую,/ да полу́чите простра́нство бу́дущее./ Никто́же бо, в ле́ности пребыва́я,/ получи́т плоды́ трудо́в,/ и то́чию зде законностра́ждущии/ та́мо зако́нно венча́ются от Христа́ Бо́га/ неувяда́емыми венцы́.
И ны́не, Богоро́дичен: Утоли́ боле́зни:
На благослове́нии хле́бов тропа́рь преподо́бнаго, два́жды, и Богоро́дице, Де́во, ра́дуйся: еди́ножды.
Тропа́рь преподо́бнаго, глас 8:
Пусты́ни яви́лся еси́ до́брое насажде́ние, преподо́бне,/ от ю́ности бо и в ми́ре изво́лил еси́ чи́стое житие́;/ ревну́я же бо́льшему, и дом оте́ческий оста́вил еси́,/ и, вся кра́сная ми́ра сего́ презре́в,/ от чужды́х стран прише́л еси́/ во оби́тели Богоспаса́емаго гра́да Пско́ва,/ и послуша́нию преподо́бнаго Евфроси́на преда́лся еси́;/ та́же простира́лся умо́м еще́ к вя́щшему,/ всели́лся еси́ в пусты́ню,/ в не́йже оби́тель прече́стну воздви́гл еси́,/ и мно́жество и́нок собра́л еси́,/ и их наста́вил еси́ на пу́ть и́стинный./ Те́мже и Христо́с, Ему́же в же́ртву себе́ прине́сл еси́,/ ви́дев твоя́ благи́я труды́,/ я́ко пресве́тла тя свети́льника,/ и по преставле́нии чудесы́ обогати́, Са́вво, о́тче наш./ Моли́ся у́бо при́сно ему́ о стране́ на́шей,/ е́же дарова́тися ей на враги́ побе́дам,/ ста́ду же твоему́ от враг ненаве́тну пребы́ти,/ и всем нам спасти́ся.
Ин тропа́рь, глас 7:
От мирска́го жития́ изше́д,/ отверже́нием же ми́ра Христу́ после́довал еси́/ и, в пусты́ни все́лься,/ равноа́нгельное житие́ пожи́л еси́,/ отону́дуже, веселя́ся, преше́л еси́ к Небе́сным черто́гом,/ и ны́не, со А́нгелы Влады́чню Престо́лу предстоя́,/ помина́й нас, чад свои́х,/ я́же собра́л еси́, Богому́дре,/ да ра́достию от души́ вопие́м:/ ра́дуйся, Са́вво,/ о́тче преблаже́ннейший.
НА У́ТРЕНИ
На Бог Госпо́дь: тропа́рь преподо́бнаго, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 4:
Зако́нно устро́ив свою́ жи́знь,/ стра́стная взыгра́ния до конца́ укроти́л еси́,/ над ни́миже и побе́дный вене́ц прия́в, Са́вво, о́тче наш,/ моли́ спасти́ся душа́м на́шим.
Сла́ва, и ны́не, Богоро́дичен:
Под кров Твой, Пречи́стая Де́во, нас, прибега́ющих, моли́тву прии́мши,/ не преста́й моля́щи Человеколю́бца Бо́га/ спасти́ся душа́м на́шим.
По 2-м стихосло́вии седа́лен, глас 1:
Смири́л еси́ страсте́й свои́х воста́ния умерщвле́нием пло́ти, преподо́бне о́тче Са́вво,/ и жи́знь безстра́стную по сме́рти прия́л еси́./ Те́мже дне́сь Христо́ва Це́рковь пра́зднует твою́ святу́ю па́мять/ и пое́т тя, всем преподо́бным украше́ние.
Сла́ва, и ны́не, Богоро́дичен:
Наста́ви ны на пу́ть покая́ния,/ уклоня́ющийся при́сно к злым безпу́тием/ и Преблага́го прогне́вающия Го́спода, Неискусобра́чная Благослове́нная Мари́е,/ прибе́жище отча́янных челове́ков, Бо́жие обита́лище.
По полиеле́и седа́лен, глас 8:
Влады́це Христу́ во всем, о́тче Са́вво, после́довал еси́/ и по стезя́м его́ Ца́рствия насле́дник соде́лался еси́,/ нам же по блаже́ннем преставле́нии честны́я твоя́ мо́щи в насле́дие оста́вил еси́, точа́щия исцеле́ния разли́чна./ Те́мже ти вопие́м:/ моли́ Христа́ Бо́га и боле́зней душе́вных исцеле́ние подава́й/ чту́щим любо́вию святу́ю па́мять твою́.
Сла́ва, и ны́не, Богоро́дичен:
Вся́каго преще́ния и озлобле́ния челове́к спаси́ нас, Пречи́стая Де́во,/ Тебе́ бо и́мамы покро́в и заступле́ние прибега́ющим к Тебе́, Богома́ти,/ и рожде́ннаго из Тебе́ Бо́га на́шего,/ Его́же моли́ изба́витися рабо́м Твои́м.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Вся́кое дыха́ние: Ева́нгелие от Матфе́я, зача́ло 43.
По 50-м псалме́ стихи́ра, глас 3:
Ра́дуйся, преподо́бне о́тче Са́вво,/ пусты́нный граждани́не,/ до́бре наста́вниче отше́льником, му́дре./ Сам бо зако́н Госпо́день до́бре извы́к/ и ве́ру соблю́д непоколеби́му,/ о́браз яви́лся еси́ ста́ду/ и при́сно о спасе́нии его́ хода́тай ко Христу́ Бо́гу,/ не оставля́я их и по святе́м преставле́нии свое́м,/ промышля́я же всегда́ о ча́дех свои́х поле́зная./ Не преста́й у́бо моли́тися Влады́це Христу́,/ е́же не оскуде́ти твое́й оби́тели,/ ю́же соста́вил еси́ мно́гими по́ты и труды́,/ пода́ждь и земли́ плодоро́дие на пропита́ние нам,/ всем же мир и спасе́ние душа́м.
Кано́н Богоро́дице, со ирмосо́м на 6, глас 6: Прича́щшися Е́ва са́ду: зри в Окто́ихе в Неде́лю на у́трени и кано́н преподо́бному Са́вве на 8, глас то́йже.
Песнь 1
Ирмо́с: Я́ко по су́ху, пешеше́ствовав Изра́иль/ по бе́здне стопа́ми,/ гони́теля фарао́на/ ви́дя потопля́ема,/ Бо́гу побе́дную пе́снь пои́м, вопия́ше.
Наста́ви мя, Го́споди Бо́же мой,/ да возмогу́ благоче́стно уго́дника Твоего́, преподо́бнаго Са́ввы,/ сла́вное и честно́е восхвали́ти успе́ние.
Му́жески подвиза́вся во пло́ти, преподо́бне о́тче Са́вво,/ и быстроту́ духо́вную восприи́м,/ взя́лся еси́ на высоте́ Небе́сней, иде́же ны́не со А́нгелы прославля́ешися./ Та́мо и нас помина́й.
На высоте́ Небе́сней сый, преподо́бне,/ нам испроси́ от Бо́га благода́ть, и ми́лость,/ и согреше́нием оставле́ние.
Зако́ны Боже́ственныя соблюда́я,/ сам бра́тии твое́й законополо́жник был еси́/ и, победи́в ко́зни лука́ваго, то́йжде побе́де их научи́л еси́./ Моли́твами твои́ми защити́ и нас от наве́тов сего́.
Богоро́дичен: Пресу́щное Сло́во, естество́ плотско́е прии́м от чи́стых крове́й Твои́х,/ плотска́го тле́ния нас изба́ви, Чи́стая./ Сего́ ра́ди Тя при́сно сла́вим.
Катава́сия: Крест начерта́в, Моисе́й:
Пе́снь 3
Ирмо́с: Не́сть свят,/ я́коже Ты, Го́споди Бо́же мой,/ вознесы́й рог ве́рных Твои́х, Бла́же,/ и утверди́вый нас на ка́мени/ испове́дания Твоего́.
Вы́спреннею моли́твою, о́тче Са́вво,/ я́ко крила́ми, возлете́л еси́ к преми́рному наслажде́нию с ли́ки оте́ц,/ с ни́миже водворя́ешися в неизрече́нней ра́дости Го́спода своего́,/ нам же от честны́й свое́й ра́ки чуде́с сия́ния, а́ки луча́, излива́я,/ сердца́ восхища́еши зову́щих:/ ра́дуйся, светоно́сне о́тче наш.
Вои́стинну блаже́нныя жи́зни сподо́бился еси́, преподо́бне о́тче Са́вво,/ целому́дрием и поще́нием освяти́в ду́шу и плоть свою́,/ нас же к славосло́вию тя дви́жеши, зову́щих:/ ра́дуйся, светоно́сне о́тче наш.
Я́коже честны́й би́сер твоя́ мо́щи, гроб и честна́я пе́рсть твоя́ нам обрето́шася, Са́вво о́тче преподо́бне,/ шестьдеся́т бо лет пребы́вше сокрове́ни,/ ны́не все́ми ви́димы предлежа́т,/ разли́чна исцеле́ния неоску́дно подаю́ще./ Те́мже вопие́м ти:/ ра́дуйся, светоно́сне о́тче наш.
Богоро́дичен: Из ложе́сн Твои́х, Пречи́стая, пра́вды Со́лнце, Христо́с, возсия́,/ Его́же Боже́ственными заря́ми и мое́ окая́нство просвети́, омраче́нное грехи́.
Катава́сия: Жезл во о́браз та́йны прие́млется:
Седа́лен, глас 3:
Боже́ственным жела́нием к безсме́ртию воспаря́я, о́тче Са́вво,/ кресто́м Христо́вым умерщвле́нное те́ло свое́ обрати́л еси́ в нетле́ние,/ пусты́ню же свою́ град Небе́сный сотвори́л еси́/ и, пло́тяных бра́тий собра́в, во ангелоподо́бных претвори́л еси́,/ с ни́миже сла́вя в Трех Ипоста́сех Единосу́щную и Нераздели́мую Тро́ицу, сам просла́вился еси́./ Мы же тя моли́твенника те́пла стяжа́хом к Бо́гу.
Сла́ва, и ны́не, Богоро́дичен:
Ми́лости исто́чниче, чистоты́ храни́лище, еди́на Пречи́стая Ма́ти Де́во,/ чистото́ю А́нгелы превосходя́щи, очи́сти мене́, па́че всех оскве́рнена плотски́ми прегреше́нии,/ и вку́пе с преподо́бным отце́м на́шим Са́ввою пода́ждь ми сле́зы умиле́ния,/ да омы́юся и́ми, стра́стный,/ и сподо́блюся Твоея́ ве́лия ми́лости.
Песнь 4
Ирмо́с: Христо́с моя́ си́ла,/ Бог и Госпо́дь,/ честна́я Це́рковь/ боголе́пно пое́т, взыва́ющи,/ от смы́сла чи́ста о Го́споде пра́зднующи.
Безме́рное смире́ние восприи́м, к Боже́ственней высоте́ возне́слся еси́,/ и ны́не, в ра́йских селе́ниих водворя́лся, о́тче Са́вво,/ помина́й и нас в моли́твах твои́х.
Благоуха́нный сосу́д яви́лся еси́ Боже́ственному Ду́ху/ и всех сердца́ услажда́еши Боже́ственными арома́ты доброде́телей твои́х./ Ны́не же, в ра́йских селе́ниих водворя́лся,/ помина́й и нас в моли́твах твои́х.
Ста́до твое́, преподо́бне, му́дре упра́вил еси́/ и от жи́зни сей к Небеси́ упа́сл еси́ благоче́стно./ Ны́не же, в ра́йских селе́ниих с ним водворя́лся,/ помина́й и нас в моли́твах твои́х.
Богоро́дичен: Чистоты́ селе́ние, жили́ще Влады́ки всех,/ Хода́таице о всех ми́лостивная, Богора́дованная Де́во Ма́ти Мари́е,/ пою́щия Тя уще́дри.
Катава́сия: Услы́шах, Го́споди:
Песнь 5
Ирмо́с: Бо́жиим све́том Твои́м, Бла́же,/ у́тренюющих Ти ду́ши любо́вию озари́, молю́ся,/ Тя ве́дети, Сло́ве Бо́жий,/ и́стиннаго Бо́га,/ от мра́ка грехо́внаго взыва́юща.
Бо́дренными бде́нии и ча́стыми воздыха́нии/ благода́ть Ду́ха возрасте́ в тебе́, о́тче наш Са́вво,/ те́мже сла́вна тя показа́ и по преставле́нии.
Благода́ть целе́ния от Бо́га прии́м, о́тче Са́вво,/ хотя́ща челове́ка я́звою умре́ти и жи́зни отча́явшася,/ моли́твами ученико́в твои́х к тебе́ о нем/ и водо́ю с честны́я твоея́ пе́рсти вско́ре исцели́л еси́.
Боле́зньми зубными, и тряса́вицею, и огневи́цею,/ и бесно́вании, и ра́нами стра́ждущих,/ я́ко врач преесте́ственный, мгнове́ние врачева́л еси́,/ исцеля́я и ду́ши от я́звы грехо́вныя.
Богоро́дичен: По рождестве́ Боже́ственнем пребыла́ еси́, Де́во, я́коже пре́жде,/ Бог бо, Тобо́ю рожде́йся, сохрани́ Тя непоро́чну./ Те́мже: ра́дуйся, Де́во Неневе́стная,– взыва́ем Ти.
Катава́сия: О треблаже́нное Дре́во:
Песнь 6
Ирмо́с: Жите́йское мо́ре,/ воздвиза́емое зря напа́стей бу́рею,/ к ти́хому приста́нищу Твоему́ прите́к, вопию́ Ти:/ возведи́ от тли живо́т мой, Многоми́лостиве.
По́двиги твои́ми духо́вную и теле́сную ни́ву в пусты́ни твое́й возде́лал еси́/ и в насыще́ние душ и теле́с бра́тии твое́й кла́сы многопло́дны возрасти́л еси́,/ и́миже и пита́еши благоче́стно восхваля́ющих тя/ и по твое́м отше́ствии к Бо́гу, Са́вво, преподо́бне о́тче наш.
Не́когда, преподо́бне о́тче Са́вво, по преставле́нии твое́м/ приидо́ша разбо́йницы но́щию ко оби́тели твое́й,/ хотя́ще озло́бити ученики́ твоя́ и мня́ще восхи́тити сокро́вище некра́домое,/ ты же еди́ным явле́нием свои́м устраши́л еси́ их/ и сокро́вище спасе́ния покая́нием им дарова́л еси́ ту́не.
Ка́плями по́тов твои́х, преподо́бне, пусты́ню ороси́л еси́,/ от ни́хже сий процвете́ кри́ны благоуха́нными,/ услаждающими населя́ющия и посеща́ющия ю́/ и сла́вящия тя при́сно.
Честна́ сме́рть яви́ся пред Тобо́ю блаже́ннаго отца́ Са́ввы, Го́споди вся́ческих,/ просла́вил бо еси́ его́ пред А́нгелы и челове́ки/ и оста́нки моще́й его́ исто́чник исцеле́ний ми́ру яви́л еси́.
Богоро́дичен: Преблага́я Влады́чице, Я́же Всеблага́го Бо́га пло́тию ро́ждшая,/ тле́нное страстьми́ мое́ се́рдце изреши́ сете́й,/ да ве́рою и любо́вию пою́ и велича́ю Тя.
Катава́сия: Во́днаго зве́ря во утро́бе/ дла́ни Ио́на крестови́дно распросте́р:
Конда́к, глас 1:
Возсия́ от пусты́ни сла́вному гра́ду Пско́ву/ но́вое све́тлое со́лнце,/ чуде́с луча́ми всех озаря́ющее/ и благода́тне согрева́ющее,/ тьму́ же вся́ких искуше́ний и наве́тов/ и хлад грехо́вный отженя́ющее./ Прииди́те у́бо, пра́зднующе Блаже́нную па́мять/ сего́ свети́льника на́шего, воспои́м:/ сла́ва Бо́гу, та́ко промышляющему о нас,/ сла́ва уго́днику его́, сохраня́ющу нас!/ Ты же, преподо́бне о́тче Са́вво,/ о и́же твою́ при́сно па́мять почита́ющих/ моли́ Христа́ Бо́га,/ я́ко да ми́лостив бу́дет нам и в день су́дный.
И́кос:
Всеси́льное Ду́ха Свята́го де́йство и бу́яя ми́ра избира́ет, да прему́дрый посрами́т,/ и немощна́я ми́ра, да посрами́т кре́пкая,/ и худоро́дная ми́ра, и уничиже́нная, и не су́щая, да су́щая упраздни́т,/ я́ко да не похва́лится вся́ка плоть пред Бо́гом, рече́ апо́стол./ Си́це Блаже́нный наш оте́ц Са́вва,/ не велему́дрствуя, мудре́ц яви́ся мудре́йший ве́ка сего́,/ немощству́яй, посрами́ кре́пкая,/ неведо́мый ро́дом, превзы́де сла́вою благоро́дных,/ уничиже́н, превознесе́ся па́че го́рдых/ и, я́ко ничто́же сый в ми́ре, покори́ себе́ су́щая,/ оста́вив сро́дники своя́ по пло́ти, сниска́ мно́жайшия по ду́ху,/ покори́вся науче́нию преподо́бнаго Евфроси́на, сам сравни́ся ему́ во учи́тельстве,/ удали́вся от ми́ра, весь мир привлече́ к себе́,/ и безпло́дная пусты́ня его́ произрасти́ оби́льную жа́тву спасе́ния всем./ Те́мже пра́зднующе дне́сь пресла́вную па́мять его́,/ бра́тия и ученицы́, соше́дшеся, возопие́м ему́:/ о́тче и наста́вниче наш, преподо́бне Са́вво,/ спаса́й нас при́сно и моли́ Христа́ Бо́га,/ я́ко да ми́лостив бу́дет нам и в день су́дный.
Песнь 7
Ирмо́с: Росода́тельну у́бо пе́щь/ соде́ла А́нгел/ преподо́бным отроко́м,/ халде́и же опаля́ющее/ веле́ние Бо́жие мучи́теля увеща́ вопи́ти:/ благослове́н еси́, Бо́же оте́ц на́ших.
К све́ту незаходи́мому заше́л еси́, блаже́нне,/ лучеза́рне же па́ки возше́д, озари́л еси́, я́ко со́лнце, зе́млю Росси́йскую и град Псков./ Те́мже прославля́юще Бо́га, тобо́ю нас просвети́вшаго,/ при́сно пое́м, я́коже и ты сам воспева́л еси́:/ благослове́н Бог оте́ц на́ших.
Чу́дным житие́м, преподо́бне, благода́ть Боже́ственнаго Ду́ха стяжа́л еси́/ и, блаже́н быв в животе́ свое́м,/ Блаже́нную кончи́ну прия́л еси́ о Христе́,/ к Нему́же, ра́дующеся о тебе́, тебе́ же подража́юще, взыва́ем:/ оте́ц на́ших Бо́же, благослове́н еси́.
Неконча́емым блаже́нством с ли́ки святы́х ны́не наслажда́лся,/ блажи́ши и нас, преподо́бне, то́ками исцеле́ний от честна́го гро́ба и пе́рсти твое́й./ Те́мже, тебе́ я́коже Боже́ственное сокро́вище стяжа́вше,/ до́ндеже в животе́ есмы́, тебе́ же подража́юще, при́сно вопие́м:/ благослове́н Бог оте́ц на́ших.
Богоро́дичен: Пресвята́я Де́во, Све́та Незаходи́маго, Бо́га ро́ждшая,/ пою́щия Тя прича́стники покажи́ све́та и вся́каго вре́да изба́ви,/ моля́щися о нас со отце́м на́шим, при́сно воспева́вшим:/ благослове́н Бог оте́ц на́ших.
Катава́сия: Безу́мное веле́ние:
Песнь 8
Ирмо́с: Из пла́мене преподо́бным ро́су источи́л еси́/ и пра́веднаго же́ртву водо́ю попали́л еси́:/ вся бо твори́ши, Христе́, то́кмо е́же хоте́ти./ Тя превозно́сим во вся ве́ки.
Стра́сти душе́вныя и боле́зни теле́сныя врачу́еши, о́тче Са́вво,/ приступа́ющих к тебе́ от всей души́,/ исцели́ и на́ша неду́ги душ и теле́с,/ да, тобо́ю сохрани́еми, тя превозно́сим во вся ве́ки.
Мирска́го и пусты́ннаго диа́вола посрами́вый и победи́вый,/ огражда́й и нас при́сно от наве́тов его́ и искуше́ний,/ да, тобо́ю сохраня́еми, тя превозно́сим во вся ве́ки.
Чистоты́ и целому́дрия наста́вниче,/ не обину́лся еси́ воспрети́ти вход и княги́не во оби́тель твою́,/ сохрани́ и нас несобла́знены в чистоте́ и целому́дрии,/ да, тобо́ю сохраня́еми, тя превозно́сим во вся ве́ки.
Нельсти́вый пропове́дниче покая́ния,/ жесто́це облича́л еси́ от ми́ра в пусты́ню к тебе́ приходя́щия,/ наказу́й обличи́тельне и на́ше жестокосе́рдие,/ да, тобо́ю к покая́нию обраща́еми,/ тя превозно́сим во вся ве́ки.
Богоро́дичен: Изба́вльшеся пе́рвыя кля́твы рождество́м Твои́м,/ Всеблагослове́нная Отрокови́це Богора́дованная, мо́лим:/ изба́ви нас и ве́чнаго осужде́ния,/ да, Тобо́ю избавля́еми, Тя превозно́сим во вся ве́ки.
Катава́сия: Благослови́те, о́троцы:
Песнь 9
Ирмо́с: Бо́га/ челове́ком невозмо́жно ви́дети,/ на Него́же не сме́ют чи́ни а́нгельстии взира́ти;/ Тобо́ю бо, Всечи́стая, яви́ся челове́ком/ Сло́во воплоще́нно,/ Его́же велича́юще,/ с Небе́сными во́и Тя ублажа́ем.
Сам в пусты́ни посто́м изнури́вый плоть свою́/ и пе́рвее я́годинами, во И́мя Святы́я Тро́ицы дарова́нными тебе́, пита́выйся,/ научи́ и нас посту́ твоему́, блаже́нне,/ па́че же насыща́й нас духо́вныя пи́щи.
Спасы́й оби́тель свою́ от нахожде́ния враго́в,/ испроси́ от Го́спода правосла́вным лю́дем кре́пость на проти́вныя,/ па́стырем же му́дрость и сове́т проти́ву всех наве́тов вну́тренних.
Смертоно́сную я́зву теле́сную притека́ющих к свяще́нней ра́це твое́й/ еди́ным прикоснове́нием и пе́рстию гро́ба твоего́ исцели́вый,/ уврачу́й смертоно́снейшую я́зву душ на́ших моли́твами твои́ми.
Разбо́йников, зломы́сливших на оби́тель твою́, пощади́вый,/ и к покая́нию обрати́вый, и спасы́й,/ пощади́ и нас, припа́дающих ти ве́рою и любо́вию,/ обрати́в и на́ша ду́ши к покая́нию,/ и спаси́ моли́твами твои́ми.
Богоро́дичен: Све́том Твои́м мя, Богора́дованная в жена́х Де́во, просвети́, молю́ся,/ и огня́ ве́чнаго изба́ви,/ я́ко да велича́ю Тя и по до́лгу воспою́ вели́чия Твоя́.
Катава́сия: Та́ин еси́, Богоро́дице, раи́:
Свети́лен:
Поревнова́в, блаже́нне, преподо́бному Евфроси́ну/ и от него́же наста́влен быв на духо́вныя по́двиги,/ с ним во свя́тости сравни́лся еси́/ и, мно́го лет в пусты́ни Кры́петстей потруди́вся в безмо́лвии, посте́, воздержа́нии и в злострада́ниих,/ ны́не, во све́те Святы́я Тро́ицы водворя́лся, блаже́нствуеши.
Сла́ва, и ны́не, Богоро́дичен:
Тя пе́сньми немо́лчными ублажа́ем, Де́во,/ я́ко от Тро́ицы Еди́наго родила́ еси́, Богоро́дице,/ и носи́ла еси́ на ру́ку Боже́ственное Сло́во,/ Его́же пе́сньми досто́йно с Тобо́ю сла́вим.
На хвали́тех стихи́ры, глас 8.
Подо́бен: О, пресла́внаго чудесе́:
Преподо́бне о́тче Са́вво,/ ты в пусты́ни а́нгельское сожи́тельство обре́л еси́/ и, ми́ра отчужди́вся,/ мир душе́вный стяжа́л еси́,/ возненави́дев му́дрость ве́ка сего́,/ Небе́сною просвети́лся еси́,/ отженя́я пе́рвее притека́вшия к тебе́,/ из них по сих лик ангелоподо́бных бра́тий соста́вил еси́/ и пусты́ню во град Небе́сный/ претвори́л еси́.
Преподо́бне о́тче Са́вво,/ похва́л и че́сти во оби́телех оша́явся,/ в пусты́ни па́че просла́влен был еси́,/ искуше́ний же го́рдости/ от мирска́го диа́вола устраня́яся,/ в безмо́лвии пусты́нным диа́волом/ зле́е искуше́н был еси́,/ но побежда́ющего мир диа́вола/ во уедине́нии смире́нием/ посрами́л и победи́л еси́.
Преподо́бне о́тче Са́вво,/ сам сый храм Ду́ха Бо́жия нерукотворе́нный,/ рукотворе́нныя хра́мы Бо́гу воздви́гл еси́,/ чистоты́ и целому́дрия учи́тель,/ де́вственному напе́рснику Христо́ву/ оби́тель твою́ посвяти́л еси́,/ наста́вник бра́тии,/ ино́му жезл правле́ния вручи́л еси́,/ ду́хом вознесы́йся к Бо́гу,/ нам неотлу́чно мо́щи твоя́ оста́вил еси́,/ и́мже предстои́ще ны́не, пра́зднующий твое́ успе́ние,/ я́ко при́сно с на́ми живу́ща тя и́мамы,/ почерпа́юще от них всегда́ то́ки исцеле́ний.
Сла́ва, глас 6:
Са́вво, о́тче преподо́бне,/ ки́ими досто́йными венцы́ увязе́м тя/ или́ что нарече́м тя?/ Отца́ ли?/ Но ты па́че отце́в возлюби́л еси́ нас./ Учи́теля ли?/ Но ты сам па́че всех/ в зако́не Госпо́дни день и но́щь поуча́лся еси́./ Па́стыря ли?/ Но ты не от ста́да пита́лся еси́/ и па́че сам ове́ц свои́х пита́л еси́./ Нача́льника ли?/ Но ты всем послужи́л еси́./ Бра́та ли?/ Но ты всех старе́йший был еси́./ Сла́вим у́бо тя я́ко А́нгела на́шего храни́теля,/ уте́шителя ско́рбным, врача́ боля́щим,/ защи́тителя наве́туемым, предста́теля всех у Бо́га/ и при́сно моли́твенника о душа́х на́ших.
И ны́не, Богоро́дичен, глас то́йже:
Богоро́дице, Ты еси́ лоза́ и́стинная,/ возрасти́вшая нам Плод живота́,/ Тебе́ мо́лимся:/ моли́ся, Влады́чице, с преподо́бным отце́м Са́ввою,/ поми́ловатися душа́м на́шим.
Славосло́вие вели́кое. Ектении́. И отпу́ст.
На Литурги́и слу́жба преподо́бническая.
Моли́тва
О преподо́бне о́тче Са́вво, пусты́нный подви́жниче, в телеси́ А́нгеле, во́ине Христо́в до́блественне, ве́ры пра́вило, Це́ркви утвержде́ние, благоче́стия о́бразе, доброде́телей свети́ло, трудо́в, поста́, воздержа́ния, чистоты́ и целому́дрия предводи́телю, помо́щниче всем нужда́ющимся, стра́нствующим вождю́, пла́вающим ко́рмчию, обурева́емым приста́нище, ослабева́ющим по́моще, оби́димым заступле́ние, печа́льным утеше́ние, вдови́цам и си́рым покро́ве, а́лчущим пита́ние, наги́м одея́ние, пла́чущим утеше́ние, боля́щим исцеле́ние, ненаде́ющимся наде́яние, христиа́н всех хода́тайство, предста́тельство и защище́ние! При́зри ми́лостивно на ны, припа́дающия к святы́м моще́м твои́м, внемли́ моли́твам на́шим и пода́ждь коему́ждо от нас благопотре́бная, проси́мая от Тебе́. Ве́мы, свя́тче Бо́жий, я́ко и́маши дерзнове́ние ко Влады́це Христу́ Бо́гу, и, ели́ка а́ще воспроси́ши у Него́, да́стся нам. А́ще же и недосто́йни есмы́ благода́ти его́, оба́че твоя́ же моли́тва да сотвори́т ны ея́ досто́йны, мно́го бо мо́жет приле́жная моли́тва пра́веднаго, я́коже рече́ апо́стол. Сам у́бо ты воздви́гни нас из глубины́ грехо́вныя, неве́рныя просвети́, еретики́ обрати́, заблужде́ния в нас от Правосла́вия к позна́нию и́стинныя ве́ры наста́ви, всей же Це́ркви исхода́тайствуй мир и святы́ню, единомы́слие в ве́ре, умо́в благопостоя́ние, соревнова́ние в благоче́стии, единоду́шие в братолю́бии, ве́рность к оте́честву, пре́данность предержа́щей вла́сти, нача́льствующим пра́вду и суд, подчине́нным же безро́потное повинове́ние, госпо́дствующим кро́тость и человеколю́бие, рабо́м же нестропти́вость, роди́телем благопопече́ние о ча́дех, ча́дом же страх и послуша́ние, де́вствующим чистоту́ и целому́дрие, бра́чным же ве́рность и непоро́чность ло́жа; всем же гре́шным покая́ние, ка́ющимся проще́ние, в злоключе́ниих же терпе́ние и упова́ние, в наде́жде же спасе́ние да́руй. Изба́ви же всех нас от гла́да, губи́тельства, от тру́са и пото́па, от огня́ и меча́, от нахожде́ния иноплеме́нных и междоусо́бныя бра́ни, и от нападе́ния вра́жия, и от тлетво́рных ветр, и от смертоно́сныя я́звы, и от напра́сныя сме́рти, и от вся́каго зла, да, та́ко вси тобо́ю просвеща́еми, наставля́еми, утеша́еми, утвержда́емы и сохраня́емы, сла́вим просла́вившаго тя Бо́га, Отца́, и Сы́на, и Свята́го Ду́ха, и твое́ предста́тельство, всегда́, ны́не, и при́сно, и во ве́ки веко́в. Ами́нь.
Преподобный Савва Крыпецкий был пострижен на Афоне, откуда прибыл в Псков. Он начал подвизаться на Снетной горе в Богородичной обители, близ Пскова, затем перешел в более уединенное место на речку Толву, в обитель преподобного Евфросина (память 15 мая). Наконец, он удалился на совершенное безмолвие в Крыпецкую пустынь, за 15 верст от Толвы, и поселился один при небольшом озере в непроходимом лесу. Пищею отшельника были хлеб и вода, а в среду и пятницу он ничего не вкушал. В отшельнической жизни много он претерпел от нечистых духов, но всегда побеждал их молитвой. Спустя несколько лет уединенной жизни к преподобному Савве стали собираться ревнители пустынной жизни. Они упросили его учредить обитель и построить храм в честь апостола Иоанна Богослова. Преподобный отказался быть игуменом обители и поручил управление иноку Кассиану. К строгому старцу приходили многие из Пскова, которых он исцелял и увещевал, но ни от кого не принимал даров.
Однажды Псковский князь Ярослав Васильевич Оболенский, который часто посещал обитель, приехал к святому вместе с больной супругой. Преподобный Савва послал сказать ему́: «Старец, грешный Савва, говорит тебе, князь, не вступай в обитель с княгинею; у нас здесь такое правило – жены не должны входить в обитель; если преступишь отеческую заповедь, княгиня твоя не получит исцеления». Князь просил прощения, что по незнанию хотел нарушить устав. Преподобный Савва вместе с братией вышел за ворота и отслужил молебен. Княгиня исцелела. По ходатайству князя в 1487 году Псков получил грамоту на землю для обители.
Мирян преподобный учил соблюдать чистоту, напоминая о суде Апостольском против сквернителей тела. Богатым и судьям говорил, чтобы не кормились за счет бедных и соблюдали правду. Часто напоминал всем уклоняться от ссор и вражды, сохранять любовь и мир и покрывать ошибки других снисхождением, дабы и нас простили. В обители с самого начала было введено строгое общежитие. И тогда, когда собралось довольно братии и средств, в келье преподобного не было ничего, кроме двух икон, мантии и рогожки, на которую он ложился отдыхать. Той же нищете он обучал братию. Преподобный заповедал им возделывать землю своими руками. Он говорил: «К чему называем мы древних подвижников своими отцами, когда не живем их жизнью, как следует детям. Они бездомные, нищие, проводили время в вертепах, в пустынях и для Господа со всей твердостью покоряли свою плоть духу, не знали покоя ни днем, ни ночью. Возлюбим, дети, благого Господа, не звуками только и одеждою будем показывать любовь нашу к нему́, а делами: любовью друг ко другу, слезами, постом, всяким воздержанием, как совершали это древние отцы».
Благодарный князь построил через мхи и болота мост к обители длиною в 1400 сажен. После своей кончины (†28 августа 1495) преподобный Савва не оставил обители, а много раз оказывал защиту. Однажды ночью к монастырю подошли разбойники. Но они увидели благолепного старца с жезлом в руке, который грозно велел им покаяться. Наутро узнали, что в монастыре такого старца не было, и поняли, что это являлся сам преподобный Савва. Предводитель разбойников покаялся игумену и остался жить в монастыре.
Преподобный Савва был высок ростом, с бородой седой, как снег, круглою, густою и не очень долгою. В таком виде он явился в середине XVI века иноку Исаии, указав, где находятся его нетленные мощи. Тогда же, в 1555 году, по просьбе Крыпецкой братии, псковский священник Василий написал житие преподобного Саввы и ему́ было установлено празднование.
Преподо́бнаго И́ова, игу́мена и чудотво́рца святы́я Ла́вры Поча́евския
НА МА́ЛОЙ ВЕЧЕ́РНИ
На Го́споди, воззва́х: стихи́ры на 4, глас 7:
Яви́ся день благоволе́ния Бо́жия/ и пра́здник весе́лия,/ стеце́мся у́бо, ве́рнии, на го́ру Поча́евскую/ и воспои́м всеблаже́ннаго И́ова,/ честну́ю па́мять того́ соверша́юще.
Дрема́ния ве́ждома,/ ниже́ сна очи́ма твои́ма дал еси́, преподо́бне,/ бо́дренными моли́твами/ и по́стническим житие́м Го́сподеви угожда́я,/ те́мже ра́достно соверша́ем па́мять твою́, всече́стне.
Прииди́те, ве́рнии, на святу́ю го́ру Поча́евскую,/ иде́же уго́дник Бо́жий подвиза́ся в житии́ свое́м/ и от си́лы в си́лу восхожда́ше,/ и тому́ ны́не помо́лимся,/ да, во оби́телех Небе́сных водворя́лся,/ мо́лится ко Го́споду/ о спасе́нии душ на́ших.
Не мо́жет град укры́тися, верху́ го́ры стоя́,/ ты же, преподо́бне,/ а́ще и в те́мней ка́менней пеще́ре/ почива́еши нетле́нным те́лом твои́м,/ оба́че всех призыва́еши на го́ру Поча́евскую,/ све́тлаго ра́ди пра́здника твоего́,/ моля́ Христа́ Бо́га/ спасти́ся душа́м на́шим.
Сла́ва, и ны́не, глас 6:
Всесвята́я Богоро́дице,/ во вре́мя живота́ моего́ не оста́ви мене́,/ челове́ческому предста́тельству не вве́ри мя,/ но Сама́ заступи́ и поми́луй мя.
На стихо́вне стихи́ры, глас 6:
Па́мять твою́ дне́сь пра́зднующе,/ преподо́бне о́тче наш И́ове, вопие́м ти:/ со А́нгелы предстоя́ в дерзнове́нии мно́зе,/ о всех нас, о́тче, моли́ся ко Влады́це Христу́.
Стих: Блаже́н муж, боя́йся Го́спода,/ в за́поведех Его́ восхо́щет зело́.
У́тро и день све́тел/ твой пра́здник яви́ся,/ просвеща́я на́ша сердца ́,/ ве́рою хва́лящих честны́я твоя́ по́двиги,/ о́тче наш И́ове.
Стих: Честна́ пред Го́сподем/ сме́рть преподо́бных Его́.
Я́ко со́лнце на земли́/ обре́т всечестну́ю ико́ну Бо́жия Ма́тере/ на горе́ Поча́евстей,/ всесве́тлая звезда́ той показа́лся еси́,/ те́мже и нас, тя пою́щих,/ све́том богоразу́мия озари́,/ моли́твами Богоро́дицы, И́ове, о́тче наш.
Сла́ва, и ны́не, глас то́йже:
Все упова́ние мое́ на Тя возлага́ю,/ Ма́ти Бо́жия,/ сохрани́ мя под кро́вом Твои́м.
Тропа́рь, глас 4: Возло́жь на ся и́го Христо́во: зри на вели́цей вече́рни.
НА ВЕЛИ́ЦЕЙ ВЕЧЕ́РНИ
Блаже́н муж: 1-й антифо́н. На Го́споди, воззва́х: стихи́ры, глас 8.
Подо́бен: О, пресла́внаго чудесе́:
О́тче преподо́бне И́ове!/ Ты, измла́да возлюби́в Христа́/ и к нему́ жела́ние невозвра́тно имы́й,/ десятоле́тен сый, уклони́лся еси́ от о́чию люби́мых ти роди́телей/ и во оби́тели све́тлаго Преображе́ния Госпо́дня Уго́рницстей всели́лся еси́,/ равноа́нгельнаго жития́ иски́й,/ и по́чести Вы́шняго зва́ния,/ и гра́да Небе́снаго гряду́щаго./ Отону́дуже призира́я ны́не на чту́щих па́мять твою́,/ моли́ Христа́ Бо́га/ дарова́ти нам по́мысл до́брый о спасе́нии/ и ве́лию ми́лость.
О́тче преподо́бне И́ове!/ Ты, от ю́ности возлюби́в Христа́ Бо́га/ и ду́шу твою́ хотя́ украси́ти чи́стых помышле́ний и жела́ний бога́тством,/ вся кра́сная ми́ра сего́ во уме́ты вмени́л еси́,/ сего́ ра́ди по двою́ ле́ту/ кро́ткаго и трудолю́бнаго послуша́ния во оби́тели/ а́нгельский чин восприя́л еси́,/ и́менем древлезако́ннаго И́ова нарече́нный;/ моли́ Христа́ Бо́га/ дарова́ти и нам жела́ние нераска́янное ве́чныя жи́зни/ и ве́лию ми́лость.
О́тче преподо́бне И́ове!/ Многотру́дный пу́ть жи́зни твое́й теки́й/ и к све́ту невече́рнему устремля́я духо́вныя о́чи твоя́,/ вели́кий а́нгельский о́браз восприя́ти на ся изво́лил еси́/ и, я́коже пре́жде в Креще́нии твое́м,/ та́ко и ны́не и́менем Крести́теля и Предте́чи Христо́ва Иоа́нна/ па́ки нарече́н был еси́,/ с ни́мже Христа́ Бо́га моли́/ дарова́ти нам благода́ть спасе́ния/ и ве́лию ми́лость.
И́ны стихи́ры преподо́бнаго, глас 2.
Подо́бен: Ки́и похва́льными венцы́:
Ки́ими похва́льными венцы́/ увязе́м преподо́бнаго,/ мона́хов сла́ву, де́вственных целому́дрие,/ схимона́хов украше́ние и всех учи́теля?/ Еще́ бо су́щу ему́ во оби́тели Уго́рницстей,/ мно́зи нача́ша приходи́ти к нему́ по́льзы ра́ди душе́вныя,/ благочести́вый же Остро́жский кня́зь Константи́н/ испроси́ его́ во игу́мена оби́тели Кре́стныя на о́строве Ду́бенстем,/ да пока́жет о́браз и́стиннаго богоуго́днаго житии́ в Волынстей земли́,/ в не́йже тогда́ во́лцы тя́жцыи расхища́ху правосла́вное ста́до Христо́во,/ в лати́нское соедине́ние совращающе,/ и да научи́т всех в еди́ней и́стинней Кафоли́честей Правосла́вней ве́ре/ пребыва́ти о Го́споде,/ прося́ у Него́ ми́ра ми́рови/ и спасе́ния душа́м на́шим.
Ки́ими похва́льными пе́сньми/ ублажи́м преподо́бнаго?/ Прия́в бо жезл правле́ния игу́менскаго во оби́тели Ду́бенстей,/ неле́ностно подвиза́шеся проти́ву клевре́тов инове́рия,/ свои́х и́ноков во благоче́стии и ве́ре утвержда́я/ и тех подвиза́я писа́ти кни́ги Боже́ственныя/ в защище́ние Це́ркве и ве́ры Правосла́вныя,/ я́коже и сам писа́нием о́нех упражня́шеся,/ ку́пно же и кня́зя Константи́на/ ко изда́нию первопеча́тныя слове́нския Би́блии,/ я́ко оте́ц его́ духо́вный,/ к назида́нию и утеше́нию ве́рных подви́же,/ и ны́не мо́лит Го́спода пода́ти мир ми́рови/ и спасе́ние душа́м на́шим.
Ки́ими похвала́ми возвели́чим преподо́бнаго,/ его́же сла́вою и че́стию венча́ Сам Госпо́дь и Ца́рь сла́вы,/ я́ко не мощи́ ему́ утаи́тися от совреме́нник свои́х?/ Те́мже, вре́менныя че́сти избежа́ти хотя́,/ ку́пно же и озлобле́ний от клевре́тов инове́рия/ за любо́вь к Правосла́вию,/ умы́сли оста́вити нача́льство,/ е́же вя́щши два́десяти лет исправля́ше на о́строве Ду́бенстем,/ и о́тай во о́бразе проста́го и́нока востече́ на го́ру Поча́евскую,/ неви́димою благода́тию Ду́ха Бо́жия води́мь,/ да назида́ет и просла́вит ди́вным житие́м свои́м и оби́тель Поча́евскую,/ прося́ у Христа́ Бо́га ми́ра ми́рови/ и спасе́ния душа́м на́шим.
Сла́ва, глас 5:
Дави́дски дне́сь воспои́м в па́мяти твое́й,/ всеблаже́нне о́тче наш И́ове:/ насажде́н был еси́ вои́стинну в дому́ Госпо́дни на горе́ Поча́евстей/ и, я́ко дре́во благосенноли́ственное,/ процве́л еси́ во дворе́ При́сно де́вы Богома́тере/ при исто́чнице цельбоно́сныя стопы́ Ея́./ Отону́дуже плоды́ прие́млюще многоразли́чных дарова́ний,/ прославля́ем просла́вльшаго тя Го́спода,/ Его́же моли́ дарова́ти нам/ мир и ве́лию ми́лость.
И ны́не, Богоро́дичен: В Чермне́м мо́ри:
Вход. Проки́мен дне. И чте́ния 3 преподо́бническая (зри день сей вы́ше).
На лити́и стихи́ры самогла́сны, глас 3:
О́бщаго жития́ мона́шескаго нача́льнику в Росси́йстей земли́ подо́бяся,/ преподо́бному Феодо́сию Пече́рскому,/ был еси́ первонача́льник о́бщих жити́й на горе́ Поча́евстей,/ преподо́бне о́тче наш И́ове;/ но и пусты́ннаго Анто́ниева боголюбе́знаго жития́ не уклоня́лся,/ в те́сней и те́мней пеще́ре ка́менней,/ богомы́слия ра́ди и моли́твы,/ многокра́тно заключа́лся еси́/ и, та́ко подвиза́лся,/ сугу́бо дости́гл еси́ доброде́телей соверше́нства,/ и́миже украша́ема оби́тель твоя́/ а́бие вели́кое и́мя Ла́вры восприя́т,/ Ла́вре Киевопече́рстей, ма́тери свое́й, после́дующи,/ ея́же и́ноки дре́вле основа́ся;/ и ны́не, всеблаже́нне,/ наставля́й нас ко све́ту богоразу́мия/ и моли́ Христа́ Бо́га спасти́ ду́ши на́ша.
Глас 4: Вседержи́тельною десни́цею укрепля́емь,/ но́вым по́двигом духо́вным вдал еси́ себе́, Богоблаже́нне,/ и, к све́ту незаходи́мому простира́лся,/ укрепля́емь был еси́ благода́тию свы́ше/ и сия́нием све́та неизрече́ннаго от ико́ны Пречи́стыя/ в твое́й пеще́ре озаря́емь,/ те́мже, я́коже дре́вле Се́ргий преподо́бный Ра́донежский/ от лица́ Са́мыя Бо́жия Ма́тере,/ и, преукраше́нный благода́тию Боже́ственною,/ оби́тель твою́ просла́вил еси́,/ и ны́не ве́рных се́рдца просвеща́еши,/ чту́щих любо́вию па́мять твою́.
Глас 7: Кий ра́зум или́ язы́к возмо́жет изрещи́ или́ похвали́ти/ по достоя́нию житие́ твое́, уго́дниче Бо́жий?/ Ре́вностию бо распаля́емь втора́го Илии́,/ Предте́чи и Крести́теля Христо́ва,/ пле́велы инове́рия и собла́зны челове́ческих мудрова́ний отрева́л еси́/ и, благове́рному вели́кому кня́зю Алекса́ндру Не́вскому подража́я,/ уче́ния лати́нская презре́в,/ и пре́лесть их обличи́в, и сами́х укори́в,/ и де́рзость их, и вся неи́стовая шата́ния/ проти́ву тебе́ и оби́тели твое́й нивочто́же вмени́л еси́./ Те́мже правосла́внии вси,/ я́ко опло́т кре́пкий праоте́честей ве́ре в тебе́ иму́ще,/ оби́тели Поча́евстей вели́кое зва́ние Ла́вры усво́иша;/ отону́дуже четы́ри Ла́вры во оте́чествии на́шем,/ я́коже четы́ри вели́кая свети́ла, возсия́ша:/ южная свята́я Ла́вра Пече́рская во Ки́еве,/ Тро́ице-Се́ргиева на восто́цех,/ Александроне́вская же на се́вере, во гра́де свята́го Петра́,/ и Поча́евская на за́паде –/ в просвеще́ние всем конце́м Росси́йския земли́ и в прославле́ние Бо́га,/ да́рующаго нам ве́лию ми́лость.
Сла́ва, глас 1:
Не и́менем то́кмо, но и са́мою ве́щию/ многоболе́зненному о́ному в ве́тсем зако́не И́ову,/ блаже́ннейший о́тче наш И́ове, уподо́бился еси́/ и во всех жития́ проти́вностех и искуше́ниих Бо́гу Еди́ному тебе́ вдава́л еси́./ Те́мже и нас му́жеству и терпе́нию,/ смире́нию же и стра́ху Бо́жию научи́,/ да в напа́стех и ско́рбех взыва́ем о Го́споде непреста́нно:/, я́коже Го́сподеви изво́лися, та́ко бы́сть./ Бу́ди И́мя Госпо́дне благослове́но во ве́ки.
И ны́не, Богоро́дичен, глас то́йже:
Ди́вный прорече́ Иса́ия,/ я́ко бу́дет в после́дния дни явле́на гора́ Госпо́дня/ и дом Бо́жий верху́ го́ры./ И се, я́коже дре́вле на горе́ Сио́ни,/ на горе́ святе́й Бо́жией,/ изво́ли яви́тися Госпо́дь,/ та́ко и в после́дния дни благоволи́ о нас,/ да от гор Ки́евских освяти́ши нас благода́тию Твое́ю, Пренепоро́чная Ма́ти!/ Ты бо напра́вила еси́ стопы́ пече́рских и́нок,/ да, от зла́го наше́ствия Баты́ева спаса́ющеся,/ утвердя́тся на избра́нней Тобо́ю горе́ Поча́евстей,/ иде́же и оби́тель честну́ю во и́мя Твое́/ о́нем благомо́щне устро́ити изво́лила еси́./ Те́мже ве́село ны́не на святе́й горе́ Твое́й пра́зднующе,/ со Арха́нгелом вопие́м Ти:/ Благода́тная, ра́дуйся, с Тобо́ю Госпо́дь,/ подая́й Тобо́ю ми́рови ве́лию ми́лость.
На стихо́вне стихи́ры, глас 4.
Подо́бен: Дал еси́ зна́мение:
Дал еси́ вои́стинну Боже́ственное зна́мение/ твоего́ благоче́стия и благоугожде́ния Го́сподеви, преподо́бне о́тче,/ егда́ в конце́ столе́тния жи́зни твоея́/ толи́кия прозорли́вости сподо́бился еси́,/ я́ко день и час отше́ствия твоего́/ пре́жде седми́цы предре́кл еси́,/ и та́ко во урече́нный час, по Боже́ственней литурги́и,/ тобо́ю сами́м соверше́нней,/ а́бие кроме́ вся́кия боле́зни ми́рно отше́л еси́ ко Го́споду,/ науча́я всех зва́ти тебе́:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Стих: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится.
Дал еси́ вои́стинну несумне́нное зна́мение/ твоего́ Небе́снаго прославле́ния, преподо́бне,/ егда́ чрез се́дмь лет по успе́нии твое́м/ све́тлость от гро́ба твоего́ исхожда́ше./ Недоумева́ху же вси,/ отку́ду и ко́ея ра́ди вины́ луча́ сия́ исхожда́ше,/ до́ндеже сам яви́лся еси́ в со́ннем виде́нии/ Ки́евскому митрополи́ту Диони́сию,/ известву́я, я́ко хо́щет Бог чрез него́ откры́ти мо́щи твоя́,/ е́же слы́шавше, вси вопия́ху тебе́:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Стих: Я́ко не оста́виши ду́ши мое́й во а́де,/ ниже́ да́си преподо́бному твоему́ ви́дети истле́ния.
Дал еси́ вои́стинну непрело́жное зна́мение/ пренебе́снаго е́же о тебе́ промышле́ния Бо́жия, преподо́бне,/ егда́ благочести́вый митрополи́т,/ прите́к а́бие со всем кли́ром на го́ру Поча́евскую/ и испыта́в приле́жно о богоуго́днем житии́ твое́м,/ повеле́ откры́ти гроб,/ в не́мже обре́те честны́я мо́щи твоя́/ кроме́ вся́каго тле́ния,/ благоуха́ния несказа́ннаго испо́лнены,/ и та́ко внесе́ ты́я в це́рковь для всенаро́днаго поклоне́ния,/ ублажа́я тя и поя́ ти ра́достно:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Сла́ва, глас 8:
Дне́сь гора́ Поча́евская,/ я́ко сокро́вище неоцене́нное,/ я́ко би́сер многоце́нный/ иму́щи святы́я и многоцеле́бныя мо́щи твоя́, всеблаже́нне,/ духо́вно ра́дуется,/ и земли́ Волы́нская, засту́пника тя при́снаго себе́ иму́щи,/ ве́село торжеству́ет,/ и пеще́ра, в не́йже Богому́дренно подвиза́лся еси́,/ о тебе́ красу́ется,/ пресве́тлая же оби́тель Поча́евская,/ па́мять твою́ пра́зднующи,/ торже́ственная возсыла́ет Го́сподеви,/ тебе́ в сте́ну неразори́му ей да́вшему./ Мы же, ча́да твоя́,/ ко всечестне́й ра́це твое́й припа́дающе, мо́лимтися:/ моли́ спасти́ся душа́м на́шим.
И ны́не, Богоро́дичен, глас то́йже:
Сра́дуются с на́ми у́мная вся чинонача́лия,/ духо́вно совоку́пльше чу́вственный лик,/ ви́дяще Цари́цу и Влады́чицу всех,/ многоиме́нне в цельбоно́сней ея́ стопе́ и ико́не Поча́евстей/ ве́рными сла́виму,/ ра́дуются же и ду́си пра́ведных,/ су́щии зри́телие виде́ния на возду́се,/ зря́ще моле́бно простира́ющу всечестне́и Свои́ ру́це/ над оби́телию Поча́евскою/ и вскрай Ея́ стоя́щаго на о́блацех небе́сных,/ во све́тлости необы́чней, И́ова, чудотво́рца Поча́евскаго,/ моля́щася, да не преда́ст в ру́це враго́в оби́тели,/ прося́ща умире́ния ми́рови,/ Це́ркви укрепле́ния/ и спасе́ния душа́м на́шим.
На благослове́нии хле́бов тропа́рь преподо́бнаго, два́жды. И Богоро́дице, Де́во: еди́ножды.
Тропа́рь, глас 4:
Возло́жь на ся и́го Христо́во от ю́ности,/ преподо́бне о́тче И́ове,/ многоле́тне свя́то подвиза́лся еси́/ на по́прище благоче́стия во оби́тели Уго́рницстей и на о́строве Ду́бенстем,/ и, прише́д к горе́ Поча́евстей,/ зна́менанней цельбоно́сною стопо́ю Пресвяты́я Богоро́дицы,/ в те́сней пеще́ре ка́менней/ богомы́слия ра́ди и моли́твы многокра́тно заключа́лся еси́,/ и, благода́тию Бо́жиею укрепля́яся,/ му́жественно потруди́лся еси́/ на по́льзу Це́ркве Христо́вы и оби́тели твоея́,/ ку́пно же и проти́ву враго́в Правосла́вия и благоче́стия христиа́нскаго,/ и, наста́вив сицево́му ополче́нию и́ночествующих,/ победи́тели тех предста́вил еси́ Влады́це и Бо́гу./ Того́ моли́ спасти́ся душа́м на́шим.
НА У́ТРЕНИ
На Бог Госпо́дь: тропа́рь свята́го, два́жды. Сла́ва, и ны́не, Богоро́дичен, глас 4: Предста́тельство христиа́н непосты́дное:
По 1-м стихосло́вии седа́лен, глас 5:
Дне́сь весели́тся Не́бо свы́ше, и оби́тель Поча́евская све́тло ра́дуется,/ свята́я же Це́рковь Бо́жия, я́ко пресве́тлыми луча́ми,/ мно́гими чуде́с светлостьми́ от всечестны́я ра́ки преподо́бнаго озаря́ема, торжеству́ет,/ вся страны́ и всяк язы́к созыва́ющи ублажи́ти вели́каго уго́дника Бо́жия./ Те́мже соше́дшеся вси, того́ сла́вную па́мять в пе́снех и пе́ниих почти́м,/ прося́ще у Христа́ Бо́га на́шего моли́твами его́ ми́ра ми́рови и ве́лия ми́лости.
Сла́ва, и ны́не, Богоро́дичен:
У́треневаху иногда́ пред ико́ною Твое́ю, Пречи́стая,/ и́ноцы Поча́евстии и про́чии Поча́евстии лю́дие,/ от тата́р во оби́тели Твое́й обложе́ннии, Твое́й по́мощи прося́ще,/ и, явле́нием Твои́м и Твоего́ уго́дника, преподо́бнаго отца́ на́шего И́ова,/ благопоспе́шно от враго́в спаса́емии, вопии́ху Тебе́:/ ра́зве Тебе́ и всеблаже́ннаго засту́пника на́шего ины́я по́мощи не ве́мы.
По 2-м стихосло́вии седа́лен, глас 2:
Недоуме́ет всяк язы́к инове́рных благореши́ти по достоя́нию,/ ка́ко, яви́в пренебе́сную сла́ву твою́ в откры́тии моще́й твои́х, преподо́бне,/ на ло́не святы́я Це́ркве Правосла́вныя,/ а́ще по́слежде ты́я в ру́це инославных преда́ти и соизво́лил еси́,/ оба́че па́ки о́ныя правосла́вным возврати́ти сотвори́л еси́./ Мы же ве́руем и испове́дуем, я́ко сие́ та́ко устро́ил еси́/ вя́щшаго ра́ди прославле́ния своего́ и оби́тели своея́ Поча́евския,/ я́ко и от латиноуни́тов благогове́йно почита́емь был еси́,/ да яви́ши всем несказа́нно,/ я́ко вои́стинну еди́на есть свята́я Це́рковь на́ша Правосла́вная,/ в не́йже Бог прославля́ет святы́я Своя́,/ подая́й нам моли́твами их мир и ве́лию ми́лость.
Сла́ва, и ны́не, Богоро́дичен:
У́тренююще, Всепе́тая, вопие́м Ти:/ спаса́й и нас моли́твами отца́ на́шего И́ова,/ я́коже изба́вила еси́ ку́пно с ним оби́тель Твою́ от влады́чества инове́рнаго./ Ты бо еси́ Еди́на Засту́пница на́ша усе́рдная,/ ра́зве Тебе́ ины́я не ве́мы.
Велича́ние и псало́м избра́нный о́бщии преподо́бным.
По полиеле́и седа́лен, глас 4:
Прииди́те, празднолю́бцы, духо́вный настро́ивше слух,/ прииди́те, собери́теся вси в пеще́ре всеблаже́ннаго отца́ на́шего,/ иде́же почива́ет нетле́нное те́ло его́,/ и, то́е благогове́йно обстоя́ще, услы́шим, что возопие́т пеще́ра сия́,/ а́ки пти́ца, от среды́ ка́мения даю́щи глас свой:/ ка́ко иногда́ чрез три дни, овогда́ же чрез це́лую седми́цу,/ еди́н в ней затворе́нный и ничи́мже, то́чию слеза́ми, от чи́ста се́рдца излива́емыми, пита́выйся,/ о благостоя́нии ми́ра, во зле лежа́щаго, моля́шеся./ Того́ моли́твами пощади́, Го́споди, ду́ши на́ша.
Сла́ва, и ны́не, Богоро́дичен:
Весели́ся, Волы́нская земле́, и вся страны́ Росси́йския,/ го́ры и хо́лми Поча́евстии, восплещи́те рука́ми,/ се бо Цари́ца и Влады́чица от Престо́ла Небе́снаго гряде́т со А́нгелы во спасе́ние оби́тели Свое́й от наше́ствия ага́рянскаго,/ иму́щи одесну́ю Себе́ всеблаже́ннаго уго́дника Своего́ и чудотво́рца Поча́евскаго И́ова,/ и та́ко разгна́ вся полки́ проти́вных,/ Поча́евстей же оби́тели и спаса́емому при́сно наро́ду Росси́йскому изба́ву и безсме́ртную сла́ву соде́ла.
Степе́нна, 1-й антифо́н 4-го гла́са. Проки́мен, глас 4: Восхва́лятся преподо́бнии во сла́ве/ и возра́дуются на ло́жах свои́х. Стих: Я́ко не оста́виши души́ мое́й во а́де, ниже́ да́си преподо́бному Твоему́ ви́дети истле́ния. Ева́нгелие от Матфе́я, зача́ло 24. Коне́ц: Бе бо уча́ их, я́ко вла́сть име́я, и не я́ко кни́жницы и фарисе́е.
По 50-м псалме́ стихи́ра, глас 6:
Желе́зом имену́емь по благоро́дию пло́ти,/ преподо́бне о́тче наш И́ове,/ тверде́е вся́каго адама́нта несокруши́маго/ оста́вил еси́ нам всечестно́е нетле́нное те́ло твое́;/ те́мже дне́сь соше́дшеся в пеще́ре твое́й,/ архиере́и с чи́ны свяще́нников, и и́ночествующих сосло́вие, и благове́рных наро́ди,/ и к ра́це многоцеле́бных моще́й твои́х припа́дающе, мо́лим тя,/ уго́дниче Бо́жий, не забу́ди нас,/ предстоя́ ду́хом Влады́це и его́ Пречи́стей Ма́тери на Небеси́,/ но всегда́ пребыва́й с на́ми,/ да, твое́ю по́мощию и заступле́нием при́сно огражда́емы,/ спаса́еми и избавля́емы от всех зол, ви́димых и неви́димых,/ вопие́м ти до сконча́ния ве́ка:/ ра́дуйся, дре́во, насажде́нное при исто́чнице/ цельбоно́сныя во́ды от стопы́ Бо́жия Ма́тере,/ да вси жа́ждущии от Тебе́ питие́ жи́зни почерпа́ют;/ ра́дуйся, пра́ведниче, по сло́ву псало́мскому,/ а́ки фи́никс, процветы́й на горе́ Поча́евстей,/ да а́лчущих пра́вды и вся́кия благосты́ни и́стиною и благонра́вием напита́еши;/ ра́дуйся, у́зы разруше́ния пе́рстнаго/ в нетле́нии твое́м благода́тию Бо́жиею расто́ргнувый,/ да от вся́ких губи́тельных неду́гов/ стра́ждущим врачевство́ и исцеле́ние пода́еши./ Ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Кано́н Богоро́дицы со ирмосо́м на 6 и преподо́бнаго на 8, глас 8.
Песнь 1
Ирмо́с: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко Еди́н сла́вно просла́вися.
Посли́ ми от Го́спода, о́тче всеблаже́ннейший, оставле́ние мно́гих мои́х согреше́ний/ и сло́во ми да́руй, да по достоя́нию воспою́ похва́льная тебе́,/ в его́же па́мяти и прославле́нии Госпо́дь, я́ко Еди́н, сла́вно просла́вися.
Роди́лся еси́, уго́дниче Бо́жий, от роди́телей правове́рных и христолюби́вых,/ тве́рдо и неизме́нно благоче́стия и́стиннаго держа́щихся,/ в бы́вшей иногда́ Правосла́вней стране́ Га́личстей;/ но, я́ко предви́дя ду́хом иму́щую объя́ти ю́/ и обдержа́щую да́же до дне́шняго дне пре́лесть латиноуни́тскаго омраче́ния,/ зва́нию Остро́жскаго кня́зя Богому́дренно после́довавый,/ прише́л еси́ в преде́лы Волы́нския земли́,/ иде́же о Го́споде сла́вно прославля́ешися.
Богоро́дичен: О Тебе́ ра́дуется, Благода́тная, вся́кая тва́рь,/ гора́ же Поча́евская изря́днее торжеству́ет ны́не,/ соверша́ющи па́мять всеблаже́ннаго уго́дника Твоего́ И́ова,/ в не́мже со стопо́ю цельбоно́сною и чудотво́рною ико́ною Твое́ю,/ я́же во оби́тели Поча́евстей, от лет дре́вних, Пречи́стая, сла́вно просла́вилася еси́.
Песнь 3
Ирмо́с: Ты еси́ утвержде́ние/ притека́ющих к Тебе́, Го́споди,/ Ты еси́ Свет омраче́нных,/ и пое́т Тя дух мой.
Ты еси́ вои́стинну утвержде́ние всех притека́ющих к тебе́, о́тче всеблаже́ннейший,/ зерца́лом доброде́телей твои́х омраче́нныя ду́ши ко све́ту благоче́стия направля́я;/ кто у́бо не восхо́щет подража́ти тебе́,/ я́ко был еси́ зело́ братолюби́в, смире́н, кро́ток, ми́лостив и толи́ко молчали́в,/ я́ко тя́жце бы́ло и́но что слы́шати от Тебе́,/ то́кмо при ко́емждо де́ле и движе́нии, а́ки реку́, моли́тву сию́, из уст твои́х исходя́щую:/ Го́споди Иису́се Христе́, Сы́не Бо́жий, поми́луй мя./ Те́мже ве́село пое́т тя дух мой.
Оби́тель твоя́ Поча́евская/ мно́гими ле́ты окормля́ется плоды́ честны́х трудо́в твои́х, уго́дниче Бо́жий,/ я́ко безпреста́нно рукоде́лии многоразли́чными упражня́лся еси́,/ си́есть насажде́нием древе́с садо́вных,/ управле́нием и благоукраше́нием вертогра́дов, сы́панием гре́блей,/ я́же и до дне́сь и́стинствуют на горе́ Поча́евстей,/ и я́же созерца́я, в ра́довании се́рдца пое́т тя дух мой.
Богоро́дичен: И́же от ве́ка сый утвержде́ние притека́ющих и Свет омраче́нных,/ яви́ Тя нам на горе́ Поча́евстей прибе́жище,/ непосты́дную наде́жду, покро́в и огражде́ние от враг ви́димых и неви́димых.
Седа́лен, глас 3:
Возсия́л еси́, я́ко заря́,/ не от восто́ка, но от за́пада Росси́йскаго восходя́щая, уго́дниче Бо́жий,/ егда́ нужд ра́ди церко́вных от обдержа́щия у́нии/ был еси́ в богоспаса́емем гра́де Ки́еве на собо́ре святы́х оте́ц,/ иде́же, во святе́й Киевопече́рстей Ла́вре,/ ея́же преподо́бными отцы́, от зла́го наше́ствия Баты́ева спаса́вшимися,/ и оби́тель Поча́евская дре́вле основа́ся,/ кля́твенно обеща́лся еси́ ку́пно со ины́ми в ве́ре Правосла́вней, оте́честей, кре́пко и неизме́нно стоя́ти,/ николи́же и ника́коже о отступле́нии в инове́рие не мы́слити/ и к сему́ всеросси́йский наро́д увещева́ти, да слы́шиши от всех:/ ра́дуйся, я́сное зерца́ло апо́стольских преда́ний;/ ра́дуйся, живоприи́мный исто́чниче и́стинных Кафоли́ческих пра́вил;/ ра́дуйся, ерети́ческих басносло́вий прему́дрый истреби́телю;/ ра́дуйся, глубины́ Правосла́вных догма́тов иску́сный изме́рителю:/ ра́дуйся, Боже́ственный орга́не, возшуме́вший нам уче́ние спаси́тельное;/ ра́дуйся, И́ове, пресла́вный уго́дниче Бо́жий и оби́тели Поча́евския украше́ние.
Сла́ва, и ны́не, Богоро́дичен:
Просла́вим, ве́рнии, Цари́цу и Влады́чицу Поча́евскую,/ па́че же во усте́х и сердца́х на́ших и́мамы всегда́ свято́е и благослове́нное и́мя Ея́,/ непреста́нно притека́юще к цельбоно́сней стопе́ Ея́ и Пречи́стей ико́не,/ ку́пно же и к моще́м уго́дника ея́ на горе́ Поча́евстей,/ те́ми бо обрета́ем я́же на земли́ блага́я и поле́зная/ и су́щих на Небеси́ сокро́вищ сподобля́емся, вопию́ще Благода́тней:/ ра́дуйся, похвало́ Поча́евская,/ спаси́ ны, моля́щияся Тебе́,/ наде́ждо на́ша и утеше́ние.
Песнь 4
Ирмо́с: Услы́шах, Го́споди,/ смотре́ния Твоего́ та́инство,/ разуме́х дела́ Твоя́/ и просла́вих Твое́ Божество́.
Е́же о тебе́ смотре́ние Свое́ Боже́ственное исполня́я,/ Госпо́дь благомо́щне возврати́, по моли́твам твои́м,/ во оби́тель твою́ пречестну́ю ико́ну Своея́ Ма́тере,/ от безбо́жнаго вельмо́жи, ку́пно со ины́ми монасты́рскими вещьми́, из Поча́ева похи́щенную,/ да разуме́ют вси де́йство си́лы Бо́га Жива́го в тебе́/ и просла́вят его́ Божество́.
Ра́дости несказа́нныя испо́лнися богоблаже́нное се́рдце твое́, преподо́бне,/ егда́ ви́дел еси́ и́нока во оби́тели твое́й,/ и́же, от тата́рина обезгла́вленный, взят а́бие главу́ свою́ отсе́ченную/ и сию́ пред чудотво́рною ико́ною Пречи́стыя положи́;/ и та́ко уразуме́в, Богому́дре, от Го́спода бы́ти де́ло сие́,/ просла́вил еси́ его́ Божество́.
Богоро́дичен: Е́же, ра́дуйся, от А́нгела с Небеси́ прие́мшая,/ обра́довала еси́ несказа́нно всеблаже́ннаго уго́дника Твоего́,/ егда́ све́том неизрече́нным озари́ла еси́ пеще́ру его́ от пречестны́я ико́ны Твоея́,/ явля́ющи е́же о нем благода́тное смотре́ния Своего́ та́инство,/ в прославле́ние Божества́ Сы́на Твоего́,/ такову́ю вла́сть, я́ко Ма́тери Свое́й, Тебе́ дарова́вшаго.
Песнь 5
Ирмо́с: У́тренююще, вопие́м Ти:/ Го́споди, спаси́ ны,/ Ты бо еси́ Бог наш,/ ра́зве Тебе́ ино́го не ве́мы.
Имы́й дарова́ния многоразли́чныя от Го́спода, уго́дниче Бо́жий,/ сподо́бился еси́ благода́тию его́ прови́дети пре́жде седми́ дней кончи́ну твою́;/ и та́ко безболе́зненно отше́л еси́ ко преми́рным,/ воспева́я до кончи́ны свое́й о Бо́зе Спа́се твое́м:/ ра́зве Тебе́ ино́го не зна́ю.
Ада́мову ра́йскую жи́знь вои́стинну насле́довал еси́, преподо́бне,/ я́ко душа́ твоя́ не оста́вися во а́де, ниже́ плоть твоя́ ви́де истле́ния,/ но и из спу́да земна́го яви́л еси́ нам нетле́нныя мо́щи твоя́,/ да, благодаря́ще Бо́га, сицеву́ю ми́лость на тебе́ показа́вшаго,/ у́тренююще ны́не, вопие́м ему́ ве́село:/ ра́зве Тебе́ ино́го не ве́мы.
Богоро́дичен: Небе́сных не разлуча́ющися, и земны́х не оставля́еши, Влады́чице,/ я́ко низошла еси́ на го́ру Поча́евскую в столпе́ о́гненнем,/ иде́же и стопу́ Твою́ цельбоно́сную оста́вила еси́,/ ея́же вода́ми напая́емый, уго́дник Твой И́ов Поча́евский/ живо́т ве́чный и нетле́ние насле́дова, воспева́я о Тебе́:/ ра́зве Тебе́, Влады́чице, ины́я не зна́ю.
Песнь 6
Ирмо́с: Ри́зу мне пода́ждь све́тлу,/ одея́йся све́том, я́ко ри́зою,/ Многоми́лостиве Христе́ Бо́же наш.
Досифе́я, ученика́ и списа́теля твоего́ жития́,/ чуде́сно исцели́л еси́ от обдержа́щия его́ боле́зни, уго́дниче Бо́жий,/ со А́нгелы святы́ми во све́тлости необы́чней я́влься во хра́ме Поча́евстем/ и плат, ми́ром целе́бным напое́нный, тому́ посла́в,/ да отре́т им те́ло свое́ и а́бие гряде́т в це́рковь на всено́щное бде́ние/ прилучи́вшагося ра́ди све́тлаго пра́здника Всеми́рнаго Воздви́жения Креста́/ Многоми́лостиваго Христа́ Бо́га на́шего.
Многоцеле́бных моще́й, преблаже́нне, си́лою, по да́нней ти свы́ше благода́ти,/ отгоня́еши де́монов от всех с ве́рою к тебе́ притека́ющих,/ науча́я всех прославля́ти иму́щаго держа́ву сме́рти и а́да Го́спода,/ Многоми́лостиваго Христа́ Бо́га на́шего.
Богоро́дичен: Еди́ну в жена́х и́стинным све́том, я́ко ри́зою, оде́явшуюся,/ ви́деша Тебе́, Богома́ти, Поча́евстии лю́дие во вре́мя бра́ни Збара́жския,/ и омофо́ром белоблестя́щимся покрыва́ла еси́ тогда́ оби́тель Твою́,/ науча́ющи всех, ку́пно с предстоя́щим Ти уго́дником Твои́м, прославля́ти дарова́вшаго Тебе́ си́лу такову́ю/ Многоми́лостиваго Христа́ Бо́га на́шего.
Конда́к, глас 8:
Возсия́ от спу́да земна́го сокро́вище нетле́нное моще́й твои́х,/ уго́дниче Бо́жий,/ я́ко, благоче́стно пожи́в в ве́ре Христа́ Бо́га на́шего,/ дости́гл еси́ доброде́телей соверше́нства,/ и, оста́вль сла́дость жития́ преходя́щаго,/ в пеще́ре горы́ Поча́евския в поще́ниих, моли́твах и труде́х свя́то подвиза́лся еси́,/ и те́ми те́ло твое́ увяди́л еси́./ Ны́не же, преше́д к Бо́гу в безмяте́жный и ве́чный поко́й,/ мо́лишися о всех с ве́рою к тебе́ прибега́ющих./ Ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
И́кос:
Пою́ще пресла́вное о тебе́ смотре́ние Бо́жие и чудеса́ твоя́, преподо́бне о́тче,/ мо́лим тя всеусе́рдно, раби́ твои́,/ не забу́ди и нас во вся дни живота́ на́шего,/ но всегда́ пребыва́й с на́ми,/ да, твои́м заступле́нием и по́мощию огражда́еми,/ спаса́еми и избавля́еми от всех зол, ви́димых и неви́димых, вопие́м ти:/ ра́дуйся, де́лателю до́брый,/ от у́тра до ве́чера столе́тния твоея́ жи́зни де́лавый благоче́стно в вертогра́де духо́внем;/ ра́дуйся, тяготу́ и вар многотру́днаго жития́ твоего́ ра́ди Го́спода охо́тно понесы́й;/ ра́дуйся, я́ко к животу́ нетле́нному и приста́нищу Боже́ственному дости́гл еси́;/ ра́дуйся, благи́й ра́бе и ве́рный, вше́дый в ра́дость Го́спода твоего́;/ ра́дуйся, свети́льниче ве́ры, просвеща́яй ду́ши благогове́йно па́мять твою́ соверша́ющих;/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Песнь 7
Ирмо́с: От Иуде́и доше́дше, о́троцы/ в Вавило́не иногда́/ ве́рою Тро́ическою пла́мень пе́щный попра́ша, пою́ще:/ отце́в Бо́же, благослове́н еси́.
И́же от ве́ры оте́ческия в ри́мское соедине́ние доше́дшия инове́рныя латиноуни́ты иногда́/ ве́рою Тро́ическою Правосла́вною вразуми́л еси́, преподо́бне,/ егда́ попуще́нием Бо́жиим оби́тель Поча́евская бя́ше во вла́сти их,/ науча́я их судо́м тя́жким и ве́дении многоразли́чными и чудесы́,/ да и си́и, я́коже и мы, правосла́внии, чтут тя любе́зно,/ я́ко и́стиннаго слугу́ Го́спода, Еди́наго отце́в Бо́га благослове́ннаго.
Христо́с тя устро́и в ли́це святы́х Свои́х,/ Христо́с тя и в попра́ние инове́рным не даде́, о́тче богоно́сный,/ па́ки возврати́в оби́тель Поча́евскую во одержа́ние правосла́вным/ и с не́ю ку́пно святы́я мо́щи твоя́,/ во е́же всем с ве́рою припа́дающим и моля́щимся пред ни́ми/ прославля́ти его́ Еди́наго, отце́в Бо́га благослове́ннаго.
Богоро́дичен: О́браз Твой честны́й и стопу́ Твою́ цельбоно́сную от инове́рных охраня́ющи,/ утверди́ла еси́ па́ки Правосла́вие на святе́й горе́ Твое́й, Влады́чице;/ те́мже во хра́ме преподо́бнаго уго́дника Твоего́, от нас, правосла́вных, устрое́нием,/ собра́вшеся дне́сь и от него́ плоды́ чуде́с наслажда́ющеся,/ пое́м Тя и Сы́на Твоего́,/ Еди́наго отце́в Бо́га благослове́ннаго.
Песнь 8
Ирмо́с: Царя́ Небе́снаго,/ Его́же пою́т во́и а́нгельстии,/ хвали́те и превозноси́те во вся ве́ки.
И́дем вси в пеще́ру уго́дника Бо́жия и ви́дим,/ ка́ко, возвра́щшейся горе́ Поча́евстей на ло́но Правосла́вия,/ па́ки архиере́йскима рука́ма честны́я мо́щи его́ поставля́ются для всео́бщаго поклоне́ния,/ и, со умиле́нием припа́дающе к ра́це его́,/ правосла́вно просла́вим Царя́ Небе́снаго,/ дарова́вшаго сицеву́ю че́сть избра́нному Своему́,/ хва́ляще и превознося́ще Его́ во ве́ки.
Небе́снаго Царя́ зако́ны духо́вными воспита́ни,/ ца́рие Росси́йстии притека́ху к тебе́, всеблаже́нне,/ и, твоему́ нетле́нному те́лу покланя́ющеся и с любо́вию любыза́юще е́,/ прославля́ху Го́спода, просла́вльшаго тя,/ хва́ляще и превознося́ще Его́ во ве́ки.
Богоро́дичен: Арха́нгельский глас вопие́м Ти, Чи́стая: ра́дуйся!/ Ра́дуйся, избра́вшая го́ру Поча́евскую во одержа́ние Себе́,/ да вси притека́ющии к Тебе́ и Твое́й цельбоно́сней стопе́ и чудотво́рней ико́не припа́дающии/ просла́вят Царя́ Небе́снаго, Единоро́днаго Сы́на Твоего́ и Бо́га на́шего,/ пою́ще и превознося́ще Его́ во ве́ки.
Песнь 9
Ирмо́с: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,/ с Безпло́тными ли́ки Тя велича́юще.
Це́ркве Росси́йския Правосла́вныя и́стинный сын,/ возведи́, Богоблаже́нне, о́крест о́чи твой и ви́ждь:/ се бо приидо́хом к тебе́, ча́да твоя́, от восто́ка, се́вера и ю́га,/ и от за́пада сро́дницы твои́ душе́ю и всем помышле́нием свои́м устремля́ются к тебе́,/ на святу́ю го́ру твою́ Поча́евскую,/ от у́нии к праоте́честей ве́ре возврати́тися жела́юще,/ и́хже в еди́ное вои́стинну свято́е соедине́ние с на́ми призови́,/ да, спаса́емии на ло́не Це́ркве Правосла́вныя о Го́споде,/ еди́неми усты́ и еди́нем се́рдцем испове́дуем Его́ вси,/ с Безпло́тными ли́ки велича́юще.
Кре́пость душе́вную пода́ждь ми, уго́дниче Бо́жий, обнаже́нному до́брых дел,/ в ми́ре же и благоче́стии житие́ мое́ устро́й/ и всем при́сным и зна́емым мои́м/ и всем правосла́вным христиа́ном спасе́ние да́руй моли́твами твои́ми,/ да и мы с тобо́ю предста́нем лицу́ Бо́жию по кончи́не свое́й,/ с Безпло́тными ли́ки велича́юще Го́спода во ве́ки.
Богоро́дичен: И да́ждь кре́пость нам, Богоро́дице,/ иму́щи о нас хода́тая всеблаже́ннаго уго́дника Твоего́ И́ова,/ притека́ющим на святу́ю го́ру Твою́/ и от го́ры Твое́й Тя призыва́ющим, от вся́ких бед и напа́стей свободи́ моли́твами преподо́бнаго,/ да Тя ублажа́ем, я́ко вои́стинну Богоро́дицу,/ с Безпло́тными ли́ки Тя велича́юще.
Свети́лен, глас 8:
Избра́нный от Го́спода, благи́й ра́бе и ве́рный,/ уго́дниче Христо́в, преподо́бне о́тче наш И́ове,/ твои́м заступле́нием и предста́тельством огражда́емы,/ похва́льная воспису́ем ти, пове́дающе благи́я по́двиги и чудеса́ твоя́,/ и благода́рственная возсыла́ем моле́ния просла́вльшему тя Го́споду и Царю́ сла́вы./ Ты же, я́ко име́яй дерзнове́ние ко Го́споду и Пречи́стей его́ Ма́тери, Присноде́ве Богоро́дице,/ от вся́ких нас бед свободи́, зову́щих ти:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Сла́ва, и ны́не, Богоро́дичен:
Взбра́нней Воево́де, избра́вшей го́ру Поча́евскую в ме́сто селе́ния Своего́,/ похва́льная воспису́ем Ти, раби́ Твои́, Богоро́дице,/ я́ко от лет дре́вних просла́вила еси́ ме́сто сие́ явле́нием цельбоно́сныя стопы́ Твоея́/ и Твоего́ Боже́ственнаго о́браза чудоде́йствием./ Те́мже, я́ко изба́вльшая иногда́ оби́тель Твою́ от наше́ствия ага́рянскаго,/ от вся́ких нас бед и напа́стей свобожда́й,/ да всегда́, Твое́ю по́мощию избавля́еми, благодари́в вопие́м Ти:/ ра́дуйся, похвало́ Поча́евская, наде́ждо на́ша и утеше́ние.
На хвали́тех стихи́ры на 6, глас 8.
Подо́бен: Что вас нарече́м, святи́и:
Что тя нарече́м, преподо́бне о́тче наш И́ове?/ А́нгела ли земна́го, во пло́ти су́ща,/ я́ко, равноа́нгельно пожи́в,/ чино́м а́нгельским на Небеси́ приобщи́лся еси́,/ с ни́миже и ви́ден был еси́ над оби́телию Поча́евскою/ во вре́мя бра́ни Збара́жския,/ предстоя́ Цари́це Небе́сней?/ Те́мже пра́зднующе па́мять твою́, ве́село вопие́м ти:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Что тя нарече́м, сла́вне?/ Челове́ка ли Небе́снаго житие́м,/ я́ко, одухотвори́в плоть твою́/ небоше́ственных доброде́телей дея́нии,/ нетле́ния пренебе́снаго свы́ше сподо́бился еси́?/ Те́мже к ра́це честны́х моще́й твои́х припа́дающе,/ ра́достно зове́м:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Что тя провещава́ем, всеблаже́нне?/ Проро́ка ли,/ я́ко прови́дел еси́ Блаже́нную кончи́ну твою́,/ реку́ ли во́ды живо́тныя,/ струи́ многоразли́чных дарова́ний Бо́жиих излива́ющую ве́рным,/ и врача́ всем в боле́знех су́щим и́стинна?/ Те́мже, я́ко ско́рому помо́щнику/ и моли́твеннику о душа́х на́ших,/ к тебе́ прибега́юще, усе́рдно велича́ем тя, зову́ще:/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
И́ны стихи́ры преподо́бнаго, глас 4.
Подо́бен: Зва́нный свы́ше:
Дне́сь в па́мяти твое́й,/ я́ко зва́нный свы́ше уго́дниче Бо́жий,/ Ла́вра Поча́евская весели́тся,/ и́ночествующих же собра́ние честно́е,/ ко гро́бу твоему́ прите́кше,/ во псалме́х и пе́ниих ликовству́ет,/ похваля́юще живу́щаго в Го́рнем гра́де/ и хвали́маго во святы́х Свои́х Бо́га,/ с Ни́мже ны́не живе́ши,/ прие́мля по́честь Го́рняго зва́ния,/ И́ове всеблаже́нне.
На горе́ святе́й,/ иде́же Бо́жия Ма́ти положи́ селе́ние Свое́,/ процве́л еси́, я́ко крин се́льный,/ я́ко кедр, и́же в Лива́не, возвы́сился/ и, я́ко лоза́ благоро́згная, умно́жился еси́, зва́нный свы́ше;/ се́нию у́бо твое́ю осени́ притека́ющих к тебе́,/ заступи́ и сохрани́ от ко́зней враго́в на́ших, борю́щих на ны,/ и вся́каго кова́рства и злоухищре́ния их,/ поста́ви бо тя не всу́е Госпо́дь стра́жа Росси́йстей земли́,/ на кра́йних преде́лех оте́чествия на́шего, во оби́тели твое́й;/ тем, припа́дающе, мо́лимтися:/ держа́ву Росси́йскую в Правосла́вии и ми́ре соблюди́/ и оби́тель твою́, ку́пно со все́ми в ню притека́ющими, до́бре сохрани́/ моли́твами твои́ми, И́ове всеблаже́нне.
Росси́йския вели́кия держа́вы сы́нове,/ ку́пно с живу́щими на Волы́нии/ и в преде́лех Привисля́нских, Лито́вских и Га́лицких,/ напоя́еми струя́ми душеполе́зных веща́ний от хвалы́ преподо́бнаго,/ возвесели́мся духо́вне, скончава́юще пе́снь,/ и к нему́, я́ко вои́стинну свы́ше зва́нному хода́таю/ и засту́пнику на́шему, та́ко рцем:/ ра́дуйся, Преве́чнаго Архиере́я Христа́ ве́рный служи́телю,/ и по сме́ртнем успе́нии точа́й це́ль бы притека́ющим с ве́рою/ и су́щия в ско́рбех лю́ди заступа́яй;/ ра́дуйся, Царя́ Небе́снаго и Влады́ки непобеди́мый ратобо́рче,/ благочести́вейших люде́й на́ших похвало́, кре́посте и утвержде́ние,/ спобо́рниче же и предра́тниче на сопроти́вныя;/ ра́дуйся, моли́твенниче и сопредстои́телю Пресвяты́я Богоро́дицы непреста́нный,/ ку́пно с ико́ною Ея́ честно́ю и стопо́ю цельбоно́сною/ от всех на го́ру Поча́евскую притека́ющих почита́емый;/ ра́дуйся, А́нгелов Бо́жиих и святы́х на Небеси́ купножи́телю преизря́дный;/ ра́дуйся, сто́лпе ве́ры,/ Про́мыслом Бо́жиим на кра́йнем за́паде Росси́йския земли́ водруже́нный,/ да всем от ве́ры и праоте́ческаго благоче́стия отпа́дшим/ сыново́м за́пада инозе́мнаго/ пу́ть до́брый к и́стинному правове́рию показу́еши;/ ра́дуйся, И́ове, пресла́вный уго́дниче Бо́жий/ и оби́тели Поча́евския украше́ние.
Сла́ва, и ны́не, глас 6:
Не умолчи́м никогда́, Богоро́дице,/ си́лы Твой глаго́лати, недосто́йнии,/ но, вели́чеством чуде́с Твои́х,/ и́же на горе́ Поча́евстей, побежда́еми,/ со умиле́нием вопие́м Ти благоче́стно:/ ра́дуйся, моли́твами Твои́ми род челове́ческий спаса́ющая;/ ра́дуйся, всю вселе́нную благода́тию от ико́ны Твое́й заступа́ющая;/ ра́дуйся, всем во вся́кой потре́бе и ну́жде/ водо́ю от стопы́ Твое́й поле́зная подава́ющая;/ ра́дуйся, житие́ на́ше моли́твами уго́дника Твоего́ И́ова Поча́евскаго/ во всех ну́ждах и обстоя́ниих на́ших до́бре устроя́ющая;/ ра́дуйся, похвало́ Поча́евская,/ спаси́ ны, моля́щияся Тебе́, наде́ждо на́ша и утеше́ние.
Славосло́вие вели́кое. Ектении́. И отпу́ст.
НА ЛИТУРГИ́И
Блаже́нны от кано́на пе́сни 3-я и 6-я. Проки́мен, глас 4: Пра́ведник, я́ко фи́никс, процвете́т,/ я́ко кедр, и́же в Лива́не, умно́жится. Стих: Я́ко не оста́виши души́ моея́ во а́де, ни́же да́си преподо́бному Твоему́ ви́дети истле́ния. Апо́стол: Собо́рнаго Посла́ния Иа́ковля, зача́ло 57. Аллилу́ия, глас 6: Ди́вен Бог во святы́х Свои́х, Бог Изра́илев. Стих: Честна́ пред Го́сподем сме́рть преподо́бных Его́. Ева́нгелие от Матфе́я, зача́ло 10. Прича́стен: Ра́дуйтеся, пра́веднии, о Го́споде:
Моли́тва
О всесвяты́й и пресла́вный уго́дниче Бо́жий, преподо́бне о́тче наш И́ове, при́сный о нас ко Го́споду моли́твенниче и те́плый предста́телю о душа́х на́ших, к тебе́ всеумиле́нно ны́не притека́ем и, помина́юще по́двиги и чудеса́ твоя́, я́же сотвори́л еси́ и твори́ши на земли́, про́сим и мо́лим твою́ благосты́ню: я́коже тве́рдо и неизме́нно потруди́лся еси́ в ве́ре Христа́ Бо́га на́шего, и, сию́ до конца́ в себе́ и во всех при́сных твои́х це́лу и невреди́му сохрани́вый от вся́ких прираже́ний вра́жиих и ересе́й тлетво́рных, си́це и нас в Правосла́вии и единомы́слии укрепи́, отгоня́я моли́твами твои́ми вся́кую тьму́ неве́рия и неправомы́слия от серде́ц и помышле́ний на́ших; послужи́вый Го́споду и Бо́гу твоему́ де́лы благи́ми и неизрече́нным самоотверже́нием в труде́х, бде́ниих и поще́ниих, наста́ви нас на пу́ть вся́кия доброде́тели и благосты́ни, избавля́я от искуше́ний и грехо́в, удаля́ющих нас от Бо́га и поверга́ющих в бе́здну зла все житие́ на́ше; яви́выйся иногда́ с Пречи́стою Де́вою Богоро́дицею верху́ го́ры Поча́евския во спасе́ние оби́тели твое́й от наше́ствия и обложе́ния ага́рянскаго, и ны́не ускори́ на по́мощь стране́ на́шей проти́ву всех враго́в на́ших, вне́шних и вну́тренних, утвержда́я мир и тишину́ в земли́ на́шей, да твои́ми моли́твами и предста́тельством ти́хое и безмо́лвное житие́ поживе́м во вся́ком благоче́стии и чистоте́; и всем к тебе́ притека́ющим и припа́дающим к ра́це честны́х и многоцеле́бных моще́й твои́х и твое́й по́мощи и заступле́ния тре́бующим неоску́дныя ми́лости незави́стно подава́яй, не оста́ви и нас, си́рых и безпо́мощных, тебе́ моля́щихся, избавля́я от вся́кия ско́рби, гне́ва и ну́жды, от гла́да, губи́тельства, тру́са, пото́па, огня́, меча́, наше́ствия иноплеме́нник и междоусо́бныя бра́ни. Ей, уго́дниче Бо́жий, при́зри ми́лостивно от Престо́ла Царя́ сла́вы, Ему́же ты ны́не предстои́ши со Арха́нгелы и А́нгелы и со все́ми святы́ми, на оби́тель твою́ Поча́евскую, е́юже ты дре́вле му́дро пра́вил еси́, назда́в ю́ всехва́льным и ди́вным житие́м твои́м, и сохрани́ ю́ моли́твами твои́ми, и вся́кий град, и страну́, и всех отовсю́ду, на мо́ри и на су́ши, в пусты́нях и в заключе́ниих многоразли́чных тебе́ призыва́ющих, от всех зол, ви́димых и неви́димых, да, та́ко твое́ю по́мощию и хода́тайством спаса́еми, в ве́це сем и по сконча́нии живота́ на́шего сподо́бимся ку́пно с тобо́ю сла́вити и воспева́ти всечестно́е И́мя Отца́ и Сы́на и Свята́го Ду́ха во ве́ки веко́в. Ами́нь.
И́на моли́тва, что́мая в Поча́евстей Ла́вре пред моща́ми преподо́бнаго
О всеблаже́нне и Богоно́сне о́тче наш И́ове, и́ноческаго ангелоподо́бнаго жития́ Богому́дрый наста́вниче, ве́ры Правосла́вныя Восточнокафоли́ческия проти́в лжемудрова́ний За́пада непреобори́мый защи́тниче и побо́рниче, богопре́данных уста́вов Це́ркве и преда́ний оте́ческих ве́рный блюсти́телю и стро́гий взыска́телю, свя́тости и чистоты́, целому́дрия и нестяжа́ния, трудолю́бия и богомы́слия, поста́ и бде́ния вели́кий ревни́телю, долготерпе́ния и злострада́ния неутоми́мый и непобеди́мый ратобо́рче, о́бразе кро́тости, зерца́ло смире́ния, приме́ре незло́бия, по́стников удобре́ние, де́вственников похвало́, мона́хов и схимона́хов ра́досте! По и́мени твоему́, преподо́бне о́тче, я́коже и дре́вняго о́наго И́ова, многострада́льна и пра́ведна, и житие́ твое́ бы́сть пра́ведно и непоро́чно от младе́нческих пеле́н, все́ми де́лы благи́ми, я́ко многоце́нным би́сером, благоукраше́нно и благоду́шным терпе́нием чрез мно́га ле́та скорбе́й и боле́зней, па́че зла́та и сребра́, в горни́ле искуше́нных, просия́вше. Еще́ бо сый двана́десяти то́чию лет, восприя́л еси́ на ся и́го Христо́во с вели́ким о́бразом мона́шеским, и да́же до ста́рости и престаре́ния вя́щше девяти́десяти лет благоду́шно и неосла́бно, непоползнове́нно и небла́зненно поне́сл еси́, проше́д всяк пу́ть пра́вды и святы́ни в посте́ и моли́тве, в коленопреклоне́ниих и бде́ниих, и та́ко на высоту́ доброде́телей изря́дну, вспомоществу́емь благода́тию Бо́жиею, по степе́нем возше́л еси́, я́ко всем диви́тися и ублажа́ти тя за премно́гую доброде́тель и любому́дрие твое́, не то́чию в преде́лех оте́чествия твоего́, но и в страна́х, о́крест су́щих; о чесо́м слы́шав боголюби́вый кня́зь Остро́жский и вельми́ возжела́в име́ти тя руководи́теля себе́ на пути́ спасе́ния и Крестовоздви́женстей оби́тели свое́й, я́же на о́строве Ду́бенстем, предстоя́теля и наста́вника, моле́нием любве́ своея́ привлече́ тя, отону́дуже и святе́й оби́тели Поча́евстей, я́ко сокро́вище ве́лие и неоцене́нное, дарова́лся еси́. Те́мже и Пра́ведный Судия́ и Мздовозда́тель Бог, И́же ве́сть су́щия Своя́ пре́жде да́же не бы́ти им, обеща́вый ве́рным рабо́м Свои́м за труды́ и по́двиги их во сла́ву его́ И́мени возда́ти стори́цею, свы́ше призре́ на смире́ние твое́, и вознесе́ тя, и просла́ви тя на земли́ живы́х, дарова́в духоно́сному телеси́ твоему́ дар нетле́ния и благода́ть врачева́ния неду́гов душе́вных и теле́сных для всех с ве́рою и любо́вию ко всечестне́й ра́це твое́й притека́ющих, а моли́тве твое́й си́лу и кре́пость непобеди́мую, враго́в ви́димых и неви́димых устра́шающую и поража́ющую. Егда́ бо иноплеме́нницы о́ны исмасли́тстии, и́хже Госпо́дь Бог еще́ в пра́отце их от ро́да и дому́ Авраа́мля отри́ну, врази́ Креста́ Христо́ва, облего́ша го́ру и оби́тель Поча́евскую, хотя́ще ю́ до конца́ разори́ти, тогда́ ты, о́тче прехва́льне, был еси́ хода́тай святы́ми твои́ми моли́твами ко Всемогу́щему и Всеблаго́му Бо́гу и к Преблагослове́нней Де́ве Мари́и Богоро́дице, и бла́гостию, тебе́ от Бо́га да́нною, и предста́тельством Пресвяты́я Богоро́дицы отгна́л еси́ все безу́мие супоста́тов тех, и, всю я́рость их разруши́в и кре́пость победи́в, сотвори́л еси́ их бежа́ти со стра́хом и тре́петом. При́зри у́бо и ны́не о́ком благоутро́бия твоего́, приле́жно мо́лим тя, обстоя́ще святы́я и многоцеле́бныя мо́щи твоя́ и усе́рдно лобыза́юще я́, при́зри на нас, недосто́йных чад и рабо́в твои́х, вступи́вших в стези́ твоя́, но не могу́щих пра́во по ним ше́ствовати, и на ме́сто сие́, от лет дре́вних богоизбра́нное и чудесы́ просла́вленное, в не́мже и́мя твое́ призыва́ется и его́же ты по́ты трудо́в твои́х богоуго́дных ороси́л и возде́лал еси́, и огради́ его́ и нас моли́твами твои́ми от вся́каго наве́та вра́жия и зла́го обстоя́ния, сохраня́я и соблюда́я всех и ка́ждаго в ми́ре и тишине́, в ве́ре нелицеме́рней и богоуго́днем жи́тельстве. Пода́ждь же, уго́дниче Бо́жий, и всем приходя́щим се́мо и твое́й по́мощи и заступле́ния и́щущим бла́гость и ми́лость от Христа́ Бо́га на́шего и Пречи́стыя его́ Ма́тере, да никто́же изы́дет отсю́ду в туге́ и ско́рби, в печа́ли и се́товании, постыжде́н и посра́млен в наде́янии свое́м, но ки́йждо, по ме́ре ве́ры и любве́ свое́й, да восприи́мет себе́ поне́ не́кую отра́ду и утеше́ние, облегче́ние и подкрепле́ние, защи́ту и по́мощь, во сла́ву Бо́га Трисвята́го, Ему́же подоба́ет вся́кая Сла́ва, че́сть и поклоне́ние, Отцу́ и Сы́ну и Свято́му Ду́ху, ны́не, и при́сно, и во ве́ки веко́в. Ами́нь.
Преподобный Иов Почаевский жил в трудные для православной России годы, когда на западных ее окраинах православный народ Волыни и Галиции подвергся церковным и политическим притеснениям со стороны польско-литовских магнатов. Преподобный Иов был свидетелем Брестской унии 1596 года и последовавшего за ней неудержимого наступления католичества, а также все возраставшего влияния протестантизма. Будучи игуменом монастыря и пользуясь огромным духовным авторитетом, преподобный Иов использовал все свои возможности для борьбы с инославными и еретическими влияниями на народное сознание, для укрепления Православия.
Преподобный Иов (в миру Иоанн) родился в крае, называемом Покутье, лежащем в Галиции между Карпатами и Днестром. Семья его, носившая фамилию Железо, принадлежала к дворянскому роду, хранившему верность Православию. Родителей его звали Иоанном и Агафией. С детства будущий подвижник обнаружил стремление к иноческой жизни. В десятилетнем возрасте мальчик оставил родительский дом и просил игумена ближайшего Угорницкого монастыря позволить ему служить братии. Своим усердием он завоевал вскоре любовь монастырского братства, прозорливый же игумен провидел в нем большие духовные дары. На двенадцатом году жизни Иоанн принял монашеский постриг с именем Иов, на тридцатом, уже после многих иноческих подвигов, он был рукоположен в священнический сан (впоследствии он принял схиму, вернув прежнее имя). Известность о его духовных подвигах широко распространилась по всему краю.
К преподобному Иову начали приходить вельможи, просившие духовного окормления. Он стал пользоваться особым доверием и покровительством известного защитника Православия на Волыни князя Константина Острожского. Князь Константин обратился к игумену Угорницкого монастыря с просьбой отпустить преподобного Иова в его княжеский Дубенский Крестный монастырь. Игумен согласился, и через некоторое время преподобный Иов был поставлен во главе Дубенской братии. В сане игумена он пробыл более двадцати лет, к этому времени относятся заключение Брестской унии (1596) и последовавшие притеснения православных. Князь Константин, под защитой которого находился преподобный Иов, имел огромное влияние на Волыни, пользовался уважением польского короля Сигизмунда III и Папы Римского Климента VIII. Поэтому униаты и иезуиты не решались препятствовать действиям преподобного. Во время пребывания в Дубне святой приступил к распространению православных книг. С этой целью он подвигнул некоторых на переводческую деятельность и переписку книг, по свидетельству жития, преподобный Иов и сам участвовал в этом труде. По благословению святого в 1581–82 гг. князь Константин издал в г. Остроге первопечатную славянскую Библию (Острожская Библия). Заботы и волнения, связанные с издательскими трудами, а также неприязнь латинян отвлекали святого Иова от монашеского делания. Поэтому он решил оставить Дубенский монастырь и около 1604 года поселился в скромной обители неподалеку – на горе Почаевской.
Какой была эта обитель до прихода в нее преподобного Иова? Около 1240 года здесь поселились пустынножители-монахи – выходцы из Киево-Печерского монастыря. Они покинули Киев, спасаясь от нашествия полчищ Батыя. В 1340 году в Почаеве совершилось чудесное явление Божией Матери в огненном столпе. До конца XVI века обитель была пустынной: иноки жили в отдельных пещерах и собирались для молитвы в небольшом храме в честь Успения Божией Матери. В 1597 году в обители появилась великая святыня – чудотворная икона Божией Матери, переданная помещицей Анной Гойской (икону подарил Гойской греческий митрополит Неофит, гостивший в ее доме).
Преподобный Иов искал в Почаевской обители безвестности и свободы для молитвы, но иноки, вскоре почувствовавшие в пришельце духовную силу, единодушно и со слезами просили его стать их игуменом. Святой был вы́нужден уступить – и вскоре его трудами монастырь Почаевский упрочил свое положение и возвысился над прочими западно-русскими обителями. Он стал пользоваться материальной поддержкой местных дворян, избежавших отпадения в унию. Так, в 1649 году на средства помещиков Феодора и Евы Домашевских в обители был построен каменный храм во Имя Пресвятой Троицы, в который был передан запечатленный в камне отпечаток цельбоносной Стопы Божией Матери и Ее чудотворная Почаевская икона. Икона была установлена над царскими вратами, откуда опускалась для верующих, что совершается и доныне. Это был период расцвета монастыря, число иноков в нем сильно возросло. Но вскоре последовали бедствия. В 1607 году на обитель напали татары и, ограбив, убили одного из иноков. В 1620 году внук скончавшейся Гойской, протестант Фирлей, задумал прогнать иноков с Почаевской горы, для чего отобрал у них земельные угодья и, ворвавшись со слугами в монастырь, унес чудотворную икону. После этого дом Фирлея постигли бедствия и болезни, не прекращавшиеся до тех пор, пока икона не была возвращена в монастырь. Эти события побудили преподобного Иова к большим и скорбным трудам. В течение нескольких лет он был принужден сам ездить по судам и конторам, пока, наконец, тяжба с Фирлеем не решилась в пользу монастыря. В результате огромных усилий удалось вырыть на Почаевской горе колодец и тем самым дать обители воду (соседние источники были отобраны Фирлеем).
Особенно важной для укрепления Православия на Волыни была книгоиздательская и литературная деятельность преподобного Иова. В начале XVII века в этом крае осталась всего одна славянская типография – Почаевская. Ее-то и использовал преподобный в целях борьбы с иноверием. Здесь печатались книги обличительного и догматического характера, православные молитвы, послания. Долгие годы (до 1932 года) в Почаевском монастыре хранился труд самого преподобного – «Книга Блаженного Иова Почаевского, властною рукою его писанная», содержащая до 80 бесед, поучений, проповедей, а также выписки из святоотеческих, аскетических и полемических сочинений (издана в 1884 году в Киеве на Русском языке под названием «Пчела Почаевская»). Главной для преподобного была борьба с католиками и протестантскими сектантами, особенно социнианской, проповедующей монотеизм в иудаистской форме. Социниане ставили Моисеевы книги выше Евангелия, отрицали догматы о Святой Троице, Божестве Иисуса Христа, Приснодевстве Марии. Именно поэтому в книге преподобного Иова эти заблуждения рассмотрены особенно подробно. Преподобный присутствовал на Киевском Соборе 1628 года, состоявшемся в связи с возвращением в Православие отпавшего в унию архиепископа Мелетия Смотрицкого. Преподобный Иов писал соборное определение, свидетельствующее о верности восточному Православию.
Вместе с этими трудами проходила и незримая молитвенная жизнь святого. В Почаевской Лавре до сих пор сохраняется пещера, где в течение нескольких суток стоял на молитве преподобный Иов. В одну из ночей во время молитвы святого свидетели видели необычаины й свет, озаривший пещеру. Кроме молитвы и богомыслия, преподобный занимался физическим трудом. Он работал в монастырском саду, при его участии были вырыты два пруда волизи обители. В период военных действий Богдана Хмельницкого против Речи Посполитой преподобный Иов давал многим людям убежище в своем монастыре. Известно также, что преподобного избирали своим духовником многие влиятельные люди того времени. Вплоть до 1649 года игуменствовал преподобный Иов, он назначил себе преемника лишь в девяностовосьмилетнем возрасте, но и после того участвовал в важнейших делах обители. 21 октября 1651 года святой получил откровение о своей близкой кончине. 28 октября он, совершив Божественную Литургию, мирно отошел ко Господу.
Преподобный Иов был погребен близ пещеры, где подвизался. Над его могилой часто видели чудесное сияние. Через семь лет после кончины святой Иов трижды явился во сне митрополиту Киевскому Дионисию (Балабану) и известил о том, что пришло время открыть его святые мощи.
28 августа 1659 года нетленные останки преподобного Иова были перенесены в храм Живоначальной Троицы. От них произошло много чудес, например, получил исцеление смертельно больной Досифей, списатель жития святого. В 1675 году по молитве преподобного Иова Матерь Божия спасла Почаевскую обитель от осадивших ее татар и турок. Пресвятая Богородица явилась над Почаевской горой вместе со святым Иовом; стрелы, направляемые в Нее врагами, возвращались назад и поражали тех, кто их пускал. От ужаса перед чудом мусульмане бежали.
В начале XVIII века Почаевская обитель отошла к униатам. Но чудеса и исцеления от мощей преподобного Иова не прекращались. Униаты уверовали в святость Преподобного, составили ему службу с акафистом и стали просить Папу Римского канонизировать его. Но Папа отказал им по причине ревности святого о Православии.
В 1831 году Почаевская обитель вновь вернулась в ведение Русской Православной Церкви. Чудесные исцеления от мощей преподобного Иова побудили Святейший Синод вторично открыть их, что и было совершено 28 августа 1833 года. В 1858 году на месте пещерной церкви был устроен новый храм во имя преподобного Иова.
Память преподобного Иова Почаевского празднуется также 28 октября.
Литература:
1. Хойнацкий А. Ф. Жизнь и подвиги Преподобного и Богоносного отца нашего Иова. Почаев, 1882.
2. Иннокентий (Леоферов), иеромонах. Преподобный Иов – борец за святое Православие.–ЖМП, 1949, № 10.
3. Иоанн (Котляревский), иеромонах. Преподобный Иов, игумен Почаевский. – ЖМП, 1955, № 5.
4. Успенская Почаевския Лавра. М., изд. Московской Патриархии, 1983.
5. Хойнацкий А. Ф., протоиерей. Патерик Волыно-Почаевский. Чч. 1–2. М., 1888.
Слу́жба о́бщая преподо́бному Пече́рскому еди́ному
НА ВЕЧЕ́РНИ
На Го́споди, воззва́х: стихи́ры, глас 8.
Подо́бен: О, пресла́внаго чудесе́:
Преподо́бне о́тче (и́мя рек),/ ты в Пече́рстей оби́тели/ Бо́гу до́бре послужи́л еси́,/ в пеще́ре те́мней подвиза́лся еси́/ и досто́йный первонача́льников на́ших учени́к был еси́,/ те́мже тя Христо́с Госпо́дь/ во сла́ве Небе́снаго Ца́рствия вчини́,/ те́ло твое́ многоподви́жное нетле́нием и чудотворе́нием просла́ви,/ Тому́ помоли́ся, преподо́бне, спасти́ ду́ши на́ша.
Преподо́бне о́тче (и́мя рек),/ во всю страну́ Росси́йскую/ изы́де Сла́ва равноа́нгельнаго твоего́ жития́,/ и́мже оби́тель Пече́рскую духо́вно облагоуха́л еси́,/ я́ко крин благово́нен, в пеще́ре насажде́нный/ и водо́ю Бо́жия благода́ти ороше́нный,/ те́мже возра́сл еси́ в дре́во чудото́чное/ Вы́шняго вертогра́да Христо́ва/ и прино́сиши плоды́, вои́стинну спаси́тельныя душа́м на́шим.
Преподо́бне о́тче (и́мя рек),/ твоя́ труды́ и по́двиги,/ бде́ния и поще́ния/ и пеще́рная злострада́ния кто изочте́т?/ В святе́й же па́мяти твое́й/ дне́сь Ла́вра све́тло лику́ет,/ такова́го избра́нника духо́вно возрасти́вши/ и и́стиннаго уго́дника Христа́ Бо́га;/ Тому́ помоли́ся, Богоно́сне, спасти́ ду́ши на́ша.
Сла́ва, глас 6:
И́же по о́бразу Ева́нгелия Христо́ва/ житие́ твое́ поста́вив,/ по́стнически пребыва́л еси́,/ му́жески естество́ пону́див,/ да плоть порабо́тиши ду́ху,/ вся́кое злострада́ние с любо́вию терпе́л еси́,/ я́ко и́стинный учени́к Небе́снаго Учи́теля Христа́,/ и ны́не, на Небеса́ пресели́вся,/ Лице́ Того́ пресве́тлое зри́ши,/ о́тче наш (и́мя рек), и мо́лишися благоприя́тно/ о ве́рою и любо́вию чту́щих святу́ю па́мять твою́.
И ны́не, Богоро́дичен догма́тик: Кто Тебе́ не ублажи́т, Пресвята́я Де́во:
На стихо́вне стихи́ры, глас 2.
Подо́бен: До́ме Евфра́фов:
(И́мя рек), о́тче наш,/ в житии́ подо́бяся Христу́,/ по сме́рти си́лу Того́ воскресе́ния/ нетле́нием те́ла показу́еши,/ моля́ся о душа́х на́ших.
Стих: Честна́ пред Го́сподем/ сме́рть преподо́бных Его́.
Приста́нище немяте́жное/ Пече́рския оби́тели дости́гл еси́,/ послушли́в быв уста́вом/ преподо́бных оте́ц Анто́ния и Феодо́сия./ С ни́миже моли́ся о душа́х на́ших.
Стих: Блаже́н муж, боя́йся Го́спода,/ в за́поведех Его́ восхо́щет зело́.
Глад и жа́жду/ терпели́во поне́сл еси́,/ поко́й теле́сный возненави́дев,/ А́нгел во пло́ти и челове́к Небе́сный быв,/ (и́мя рек), о́тче наш.
Сла́ва, глас 8:
Мона́хов о́браз и пра́вило изве́стное,/ почита́ем тя, о́тче наш (и́мя рек),/ Ла́вры Пече́рския Сла́ва и похвало́./ В не́йже трудолю́бно подвиза́вся,/ Бо́гу до́бре угоди́л еси́,/ А́нгелов собесе́дниче/ и преподо́бных удобре́ние,/ с ни́миже моли́ся Го́сподеви/ поми́ловати ду́ши на́ша.
И ны́не, Богоро́дичен, глас то́йже: Безневе́стная Де́во:
Тропа́рь о́бщий преподо́бному Пече́рскому,
глас 8:
Посто́м ду́шу твою́ просвети́л еси́,/ моли́твами непреста́нными се́рдце твое́ сосу́д Ду́ха Свята́го соде́лал еси́,/ преподо́бне о́тче наш (и́мя рек),/ те́мже вся вра́жия ополче́ния кре́пко посрами́л еси́/ и, я́ко победоно́сец и́стинный, воздая́ния получи́л еси́ от Христа́ Бо́га./ Тому́ помоли́ся о душа́х на́ших.
Сла́ва, и ны́не, Богоро́дичен: И́же нас ра́ди рожде́йся от Де́вы:
Тропа́рь о́бщий затво́рнику Пече́рскому,
глас 2:
Ве́лия ве́ры исправле́ния,/ в пеще́рнем затво́ре, я́ко на воде́ упокое́ния,/ преподо́бне о́тче (и́мя рек), ра́довался еси́,/ огне́м бо любве́ Боже́ственныя распаля́емь,/ бде́нием и моли́твою безстра́стия дости́гл еси́/ и яви́лся еси́ равноа́нгельный на земли́./ Того́ моли́твами, Христе́ Бо́же, спаси́ ду́ши на́ша.
Сла́ва, и ны́не, Богоро́дичен: Вся, па́че смы́сла:
НА У́ТРЕНИ
На Бог Госпо́дь: тропа́рь преподо́бному два́жды. Сла́ва, и ны́не, Богоро́дичен во глас тропаря́.
По 1-м стихосло́вии седа́лен, глас 1:
А́нгельская ликостоя́ния собесе́дника тя и́мут, о́тче Богоно́се (и́мя рек),/ и Сам Влады́ка А́нгел Христо́с Госпо́дь, тобо́ю на земли́ просла́вленный жития́ чистото́ю,/ увенча́ тя венце́м нетле́нным сла́вы Небе́сныя,/ ему́ же со дерзнове́нием мо́лишися о душа́х на́ших.
Сла́ва, и ны́не, Богоро́дичен, глас то́йже:
Глас Гаврии́лов прино́сим Ти, Чи́стая Де́во:/ ра́дуйся, заче́ншая Творца́ всех Бо́га и обно́вльшая обветша́вшее челове́ческое естество́;/ ра́дуйся, я́ко была́ еси́ в рождестве́ Де́ва/ и по рождестве́ па́ки Де́ва пребыва́еши.
По 2-м стихосло́вии седа́лен, глас 4:
Отре́кся пло́ти угожде́ния любве́ ра́ди Христа́ Бо́га, о́тче (и́мя рек),/ в оби́тель Пече́рскую всели́лся еси́/ и копие́м моли́твы непреста́нный главу́ всезло́бнаго зми́я сокруши́л еси́,/ Богоно́сным отце́м Анто́нию и Феодо́сию спо́стник и собесе́дник быв,/ тех стезя́м неукло́нно после́довал еси́,/ с ни́миже Блаже́нство ра́йское обре́т,/ моли́ся Христу́ Бо́гу о чту́щих любо́вию святу́ю па́мять твою́.
Сла́ва, и ны́не, Богоро́дичен, глас то́йже:
Кто досто́йно восхва́лит рождество́ Твое́, Пречи́стая!/ Безсе́менно бо зача́ла еси́ от Ду́ха Свята́го/ и пре́жде век от Отца́ рожде́нное Сло́во в ле́то родила́ еси́,/ тем Тя, я́ко и́стиннаго Бо́га на́шего Ма́терь, в пе́снех чту́ще, пое́м и велича́ем.
Велича́ние и псало́м избра́нный о́бщий преподо́бному.
По полиеле́и седа́лен, глас 8:
Труды́ и по́двиги твоя́ кто испове́сть, преблаже́нне (и́мя рек)?/ Ве́рен бо раб Го́споду своему́ быв и ве́рне Тому́ служа́,/ вве́ренный тебе́ тала́нт умно́жил еси́/ и с благи́ми де́латели дина́рий жи́зни ве́чныя прия́л еси́./ Те́мже, я́ко име́я дерзнове́ние, моли́ Христа́ Бо́га/ согреше́ний оставле́ние дарова́ти/ чту́щим любо́вию святу́ю па́мять твою́.
Сла́ва, и ны́не, Богоро́дичен, глас то́йже:
В ле́ности проводя́ живота́ моего́ вре́мя,/ погуби́х тала́нт, вве́ренный ми от Го́спода моего́,/ и ны́не, лише́н Бо́жия благода́ти, к Тебе́ зову́, Чи́стая:/ Ма́терними Твои́ми моли́твами бу́ди ми Хода́таица бла́га к Человеколю́бцу Бо́гу,/ помяни́ сро́дное Свое́ помышле́ние о рабе́х Твои́х/ и испроси́ согреше́ний проще́ние/ любо́вию чту́щему и благоче́стно поклоня́ющемуся Всесвято́му Рождеству́ Твоему́.
Степе́нна, 1-й антифо́н 4-го гла́са. Проки́мен, глас 4: Честна́ пред Го́сподем/ сме́рть преподо́бных Его́. Стих: Что возда́м Го́сподеви о всех, я́же воздаде́ ми? Ева́нгелие от Матфе́я, зача́ло 43.
По 50-м псалме́ стихи́ра, глас 6:
Свети́льник пресве́тел благоче́стия/ из-под спу́да пеще́рнаго нам дне́сь возсия́./ Прииди́те, ве́рнии,/ того́ сия́ния благода́тнаго наслади́мся,/ рачи́тель бо во Христе́ бы́сть/ и ве́рный исполни́тель его́ за́поведей./ Те́мже, о́тче наш (и́мя рек),/ помина́ющих тя любо́вию/ в день свята́го твоего́ торжества́/ помяни́ в моли́твах твои́х у Престо́ла Спа́сова.
Кано́н, глас 8.
Песнь 1
Ирмо́с: Колесницегони́теля фарао́ня погрузи́/ чудотворя́й иногда́/ Моисе́йский жезл, крестообра́зно порази́в/ и раздели́в мо́ре,/ Изра́иля же беглеца́, пешехо́дца спасе́,/ пе́снь Бо́гови воспева́юща.
Христу́, нас ра́ди смири́вшемуся, во смире́нии подража́л еси́, преподо́бне,/ во убо́зей и те́мней пеще́ре живы́й,/ посто́м, моли́твою и мно́гими слеза́ми ри́зу душе́вную убели́л еси́/ и, чистото́ю сия́я, возше́л еси́ во оби́тели Го́рния,/ ра́достно пе́снь Бо́гови воспева́я.
Я́ко звезда́ богосве́тлая,/ сия́еши на мы́сленнем небеси́ Ла́вры Пече́рския, о́тче наш (и́мя рек),/ и вся ны благода́тно озаря́еши немерца́ющею заре́ю мно́гих чуде́с,/ те́мже, святу́ю па́мять твою́ любо́вию соверша́юще,/ пе́снь Бо́гови воспева́ем.
И́стинный и ве́рный раб Христо́в был еси́, Богоно́сне о́тче (и́мя рек),/ святы́х первонача́льников Пече́рских Анто́ния и Феодо́сия подража́телю и доброде́телей их насле́дниче,/ с ни́миже ны́не во сла́ве невече́рней святы́х пе́снь Бо́гови воспева́еши.
Богоро́дичен: Зако́нов кроме́ есте́ственных родила́ еси́ Законода́вца, Бо́га и Челове́ка,/ Того́, я́ко Бла́га, моли́, Всенепоро́чная, на́ша беззако́ния презре́ти,/ гла́сы хвале́бными пе́снь ему́ воспева́ющих.
Песнь 3
Ирмо́с: Утвержде́н в нача́ле Небеса́ ра́зумом/ и зе́млю на вода́х основа́вый,/ на ка́мени мя, Христе́, за́поведей Твои́х утверди́,/ я́ко не́сть свят па́че Тебе́, Еди́не Человеколю́бче.
Тле́нную плоть неосла́бными труды́ кре́пко изнури́л еси́, о́тче наш (и́мя рек),/ и по кончи́не твое́й в нетле́ние та облече́ся благода́тию Христа́ Бо́га,/ Ему́же в Го́рних оби́телех зове́ши, ра́дуяся:/ не́сть свят, па́че Тебе́, Еди́не Человеколю́бче.
Я́ко ма́слина благопло́дная, на горе́ Пече́рстей возра́сл еси́, преподо́бне (и́мя рек), о́тче наш,/ и еле́ем трудо́в твои́х богоуго́дных се́рдца на́ша благода́тию умаща́еши,/ в ми́ро бо целе́бное сле́зы твоя́ по́стническия претвори́ Христо́с Бог, Ему́же зове́м:/ не́сть свят, па́че Тебе́, Еди́не Человеколю́бче.
Стра́сти душе́вныя мече́м моли́твы непреста́нныя изсе́кл еси́, преподо́бне,/ и кре́пко вооружи́лся еси́ на враги́ неви́димыя,/ и́хже ко́зни в пеще́рных огра́дах разруши́л еси́, зовы́й Подвигополо́жнику Христу́:/ не́сть свят, па́че Тебе́, Еди́не Человеколю́бче.
Богоро́дичен: Херуви́мов и Серафи́мов превы́шши яви́лася еси́, Богоро́дице,/ Ты бо еди́на прия́ла еси́ Невмести́маго Бо́га во чре́ве Твое́м, Всечи́стая,/ те́мже Тя, вси ве́рнии, пе́сньми ублажа́ем.
Седа́лен, глас 8:
Я́ко и́стиннаго по́стника Госпо́дня и ве́рнаго Христо́ва после́дователя/ Ла́вра Пече́рская по до́лгу тя почита́ет, (и́мя рек), о́тче наш,/ в ней бо подвиза́лся еси́ богоуго́дно и сном пра́ведным почи́л еси́,/ и́бо сме́рть уго́дников Бо́жиих вои́стинну сон есть/ и преселе́ние от хуждшия жи́зни на лу́чшую,/ в не́йже со святы́ми пребыва́я, моли́ Христа́ Бо́га спасти́ ду́ши на́ша.
Сла́ва, и ны́не,
Богоро́дичен:
Па́че естества́ заче́ншая и па́че естества́ ро́ждшая Зижди́теля Твоего́ и Бо́га,/ моли́ о нас, при́сно согреша́ющих,/ да, свобожде́ни су́ще, любо́вию воспое́м Тя, Чи́стая Де́во Мари́я.
Песнь 4
Ирмо́с: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра О́тча/ и на́шу нищету́ посети́в./ Тем с проро́ком Авваку́мом зову́ Ти:/ си́ле Твое́й сла́ва, Человеколю́бче.
Ду́ха Свята́го наше́ствием в сосу́де души́ твое́й Богоно́сец был еси́, преподо́бне о́тче,/ оби́тель Пече́рскую чудесы́ твои́ми просла́вил еси́,/ и ны́не со А́нгелы пое́ши во святы́х почива́ющему Бо́гу:/ си́ле Твое́й сла́ва, Человеколю́бче.
Лице́ Христо́во пресве́тлое зре́ти жела́я,/ те́мная ли́ца де́монская кре́пким терпе́нием посрами́л еси́, о́тче наш (и́мя рек),/ в пеще́ре ни́зу живы́й, я́ко град верху́ стоя́, неуязви́мый стрела́ми вра́жиими пребы́л еси́,/ отону́дуже удо́бно преше́л еси́ на го́ру Небе́сную зва́ти в Вы́шних Бо́гу:/ си́ле Твое́й сла́ва, Человеколю́бче.
Благода́ть Бо́жия процвете́ на версе́ твое́м, преподо́бне,/ и яви́ тя чудоде́йственника пресла́вна,/ тобо́ю бо Ла́вра Пече́рская вои́стинну красу́ется,/ стяжа́вши в не́дрех свои́х такова́го избра́нника,/ и́же в Вы́шних селе́ниих лику́ет и зове́т Святы́х Святе́йшему Сло́ву:/ си́ле Твое́й сла́ва, Человеколю́бче.
Богоро́дичен: Очище́ние прегреше́ний на́ших испроси́, Влады́чице,/ ро́ждшая Еди́наго Безгре́шнаго Спа́са всех,/ к Нему́же ма́тернее дерзнове́ние иму́щи,/ не закосни́ ко умоле́нию, Всеблага́я, да, ра́дующеся, Тебе́ зове́м:/ сла́ва Тебе́, Всеси́льная челове́ков Помо́щнице.
Песнь 5
Ирмо́с: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма́, окая́ннаго,/ но обрати́ мя и к све́ту за́поведей Твои́х/ пути́ моя́ напра́ви, молю́ся.
В поще́нии просия́л еси́, преподо́бне,/ хлеб и во́ду ме́рою вкуша́л еси́,/ мно́гажды же дни без пи́щи пребыва́я,/ те́мже пи́щи нетле́нныя ра́йския насыща́тися сподо́бился еси́,/ напра́вив пу́ть твой к Сио́ну Небе́сному.
Ум твой впери́л еси́ к Бо́гу, (и́мя рек), о́тче наш,/ и, на земли́ живы́й, о Небе́сных при́сно промышля́л еси́, псало́мски глаго́ля:/ кто даст ми криле́, я́ко голуби́не,/ и полещу́, и почи́ю в Небе́сных ски́ниях рая́ пресве́тлаго,/ иде́же и нам бы́ти помоли́ся.
Све́тло житие́ твое́ бы́сть, преподо́бне о́тче,/ во вся концы́ земли́ на́шея изы́де Сла́ва доброде́телей твои́х,/ те́мже духо́вно возрасти́вшая тя Ла́вра в па́мяти твое́й святе́й све́тло лику́ет и Христу́ зове́т:/ Светода́вче Благи́й, моли́твами уго́дника Твоего́/ на пу́ть спасе́ния вся ны напра́ви, я́ко Человеколю́бец.
Богоро́дичен: Тя сте́ну иму́ще и заступле́нием Твои́м соблюда́еми,/ Твое́ю Боже́ственною сла́вою хваля́щеся, Тя ублажа́ем,/ Ты бо, Пречи́стая, душа́м на́шим при́сно источа́еши весе́лие и ра́дование.
Песнь 6
Ирмо́с: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся,/ к Тебе́ бо возопи́х, и услы́ши мя,/ Бо́же спасе́ния моего́.
Па́мять твоя́ с похвала́ми, о́тче (и́мя рек),/ и и́мя твое́ свято́е призыва́ется ве́рными,/ и́же ве́дят тя богоно́сна и равноа́нгельна житие́м/ и с упова́нием прибега́ют к моли́твенному твоему́ заступле́нию./ Сих услы́ши, егда́ возопию́т к тебе́ моле́бно,/ и спасе́ния хода́тай бу́ди им вы́ну.
О Христе́ укрепля́емь, жи́знь твою́ до́блестно препроводи́л еси́, преподо́бне,/ безмо́лвием кра́йним, я́ко колесни́цею небовосхо́дною, на Го́рняя восте́кл еси́ и та́мо со А́нгелы лику́еши,/ и́бо услы́ша твоя́ моли́твы Бог спасе́ния твоего́.
Недужная врачу́еши еди́ным прикоснове́нием с ве́рою к святы́м моще́м твои́м, преподо́бне (и́мя рек), о́тче наш,/ и ми́лость мно́гу явля́еши тем,/ и́же по Бо́зе упова́ние на тя возлага́ют и твою́ па́мять соверша́ют,/ я́ко и́стиннаго уго́дника Христо́ва.
Богоро́дичен: весь лик проро́ческий от Бо́га науче́н/ Твоего́ Боже́ственнаго зача́тия провозгласи́ти та́инство, Пречи́стая Ма́ти Де́во,/ Ты бо Свет во открове́ние язы́ков родила́ еси́, Христа́, Царя́ и Бо́га,/ спа́сшаго от поги́бели род челове́ческий.
Конда́к, глас 8:
Христо́вою любо́вию уязви́в ду́шу,/ преподо́бне о́тче наш (и́мя рек),/ в пеще́рнем мра́це свет спасе́ния обре́л еси́/ и, я́ко ча́до избра́нное вели́ких отце́в Пече́рских Анто́ния и Феодо́сия,/ вку́пе с ни́ми оби́тель ра́йскую унасле́довал еси́,/ отону́дуже призира́й ны́не на оби́тель земну́ю, в не́йже подвиза́лся еси́,/ и моли́ся о чту́щих па́мять твою́, да зове́м ти:/ ра́дуйся, (и́мя рек), моли́твенниче о душа́х на́ших.
И́кос:
А́нгелов подража́теля и Безпло́тных сил собесе́дника,/ а́нгельскими язы́ки подоба́ет ублажи́ти тя, преподо́бне,/ оба́че приими́, а́ще и от челове́ческих бре́нных усте́н, сию́ достодо́лжную тебе́ похвалу́:/ ра́дуйся, преподо́бне, во всех за́поведех Госпо́дних пра́во ходи́вый;/ ра́дуйся, Богоно́сне, и́го благо́е и ле́гкое на раменех твои́х носи́вый./ Ра́дуйся, в моли́тве преуспе́вый;/ ра́дуйся, пеще́рною тесното́ю простра́нства Небе́снаго дости́гнувый./ Ра́дуйся, равноа́нгельно во пло́ти пожи́вый;/ ра́дуйся, нетле́нием благода́тным просла́вленный./ Ра́дуйся, чудотворе́ния да́ром обогаще́нный;/ ра́дуйся, целе́бниче вся́ких неду́гов./ Ра́дуйся, помо́щниче в беда́х и напа́стех;/ ра́дуйся, Анто́ния Богоно́снаго подража́телю./ Ра́дуйся, Феодо́сия Богому́драго после́дователю;/ ра́дуйся, (и́мя рек), моли́твенниче о душа́х на́ших.
Песнь 7
Ирмо́с: Бо́жия снизхожде́ния/ о́гнь устыде́ся в Вавило́не иногда́./ Сего́ ра́ди о́троцы в пещи́, ра́дованною ного́ю,/ я́ко во цве́тнице, лику́юще, поя́ху:/ благослове́н еси́, Бо́же оте́ц на́ших.
Ми́ра красоты́ душетле́нныя во уме́ты вмени́л еси́, о́тче преподо́бне (и́мя рек),/ жесто́кое житие́ показа́л еси́/ и неосла́бно в по́двизех жи́знь вре́менную препроводи́л еси́,/ немо́лчно воспева́я Укрепи́телю Иису́су:/ благослове́н еси́, Бо́же оте́ц на́ших.
В ти́хом приста́нищи спасе́ния быв,/ ти́хими ве́тры Ду́ха Свята́го управля́емь, о́тче Богому́дре (и́мя рек),/ дости́гл еси́ жела́ний кра́я, пресве́тлаго Ца́рствия Христо́ва,/ иде́же, со святы́ми почива́я,/ причаща́ешися трапе́зы Безсме́ртнаго Влады́ки Христа́ и зове́ши ему́ ра́достно:/ благослове́н еси́, Бо́же оте́ц на́ших.
Иму́щи тя Ла́вра Пече́рская свети́льника немерца́ющаго Бо́жия благода́ти,/ твоя́ по́двиги пе́нии духо́вными прославля́ет,/ я́ко ма́ти, о ча́де свое́м веселя́щися, о́тче (и́мя рек), мона́хов удобре́ние и по́стников похвало́,/ те́мже и зове́т в па́мяти твое́й боголе́пно:/ благослове́н еси́, Бо́же оте́ц на́ших.
Богоро́дичен: Жезл, из ко́рене Иессе́ева прозя́бший,/ и цвет спаси́тельный, ми́ру процве́тший,/ познава́ем Тя, Пречи́стая Де́во, ро́ждшая Христа́ Жизнода́вца,/ И́мже упраздни́ся и́дольская пре́лесть благода́тию./ Те́мже Тебе́, я́ко глави́зне спасе́ния на́шего, усе́рдно вопие́м:/ благослове́нна еси́ в жена́х, Пренепоро́чная Влады́чице.
Песнь 8
Ирмо́с: Седмери́цею пе́щь/ халде́йский мучи́тель/ Богочести́вым неи́стовно разжже́,/ си́лою же лу́чшею спасе́ны, сия́ ви́дев,/ Творцу́ и Изба́вителю вопия́ше:/ о́троцы, благослови́те,/ свяще́нницы, воспо́йте,/ лю́дие, превозноси́те во вся ве́ки.
Светоли́тия Небе́снаго испо́лнился еси́, преподо́бне,/ егда́, свя́то пожи́в, кончи́ною пра́веднаго преше́л еси́ от земли́ в Го́рняя,/ нам же честны́я мо́щи твоя́, я́ко насле́дие многоце́нное, оста́вил еси́,/ целе́бныя струи́ от них источа́я,/ с ве́рою к тебе́ приходя́щим и Христа́ превознося́щим во вся ве́ки.
Моли́твою твое́ю богоприя́тною, о́тче,/ оби́тель Пече́рскую сохраня́еши от вся́каго зла́го обстоя́ния/ и в ней живу́щия во благоче́стии наставля́еши приме́ром твои́м благи́м,/ ско́рый помо́щник явля́ешися лю́дем правове́рным,/ и́же по Бо́зе и Богоро́дице упова́ние на тя возлага́ют/ и тя просла́вльшаго Христа́ превозно́сят во вся ве́ки.
В поще́ниих неосла́бен, в моли́твах бодр,/ в труде́х терпеливоду́шный показа́лся еси́, о́тче наш (и́мя рек),/ и, я́ко во всех благоиску́сен де́латель вертогра́да Христо́ва,/ мзду бога́тую восприя́л еси́ от Небе́снаго Домовлады́ки,/ в Его́же черто́зе све́тлем упокое́ние блаже́нное обре́л еси́, зовы́й:/ лю́дие, превозноси́те Христа́ во вся ве́ки.
Богоро́дичен: Златоза́рный Тя свети́льник, прие́мшую несказа́нно Свет Непристу́пный,/ И́мже озари́ся мрак па́дшаго челове́ка, воспева́ем Тя, Богоро́дице Де́во,/ Со́лнца о́блаче ле́гкий, Его́же луча́ми озаре́ннии,/ благода́рно пое́м Тя, Чи́стая, во вся ве́ки.
Песнь 9
Ирмо́с: Ужасе́ся о сем Не́бо,/ и земли́ удиви́шася концы́,/ я́ко Бог яви́ся челове́ком пло́тски/ и чре́во Твое́ бы́сть простра́ннейшее Небе́с./ Тем Тя, Богоро́дицу,/ А́нгелов и челове́к чинонача́лия велича́ют.
Вои́стинну тя учи́теля благоче́стия и́мать оби́тель Пече́рская,/ уче́ния духо́вная, ме́да сладча́йшая, излива́юща./ Кто бо не умили́тся, слы́ша твоя́ по́двиги поще́ния, злострада́ния и непреста́нный моли́твы, спасе́ния ра́ди душе́внаго?/ Те́мже тя, о́тче наш (и́мя рек), ве́рою и любо́вию ублажа́ем.
Любо́вию Христо́вою воспламени́в твое́ се́рдце,/ пла́мень нечи́стых страсте́й угаси́л еси́ росо́ю Ду́ха Боже́ственнаго,/ Его́же благода́тию соблюда́емь, о́тче наш (и́мя рек),/ не оскверни́л еси́ чистоты́ души́ твоея́,/ сохрани́л еси́ непоро́чно и те́ло твое́, нетле́нием ны́не почте́нное,/ от него́же цельбы́ подае́ши неду́жным,/ я́ко таи́нник Бо́жия благода́ти.
Живоно́сную си́лу Воскресе́ния Христо́ва нам проявля́еши, преподо́бне,/ в твои́х тле́нию неприча́стных и многоцеле́бных моще́х./ В сем бо вои́стинну позна́хом,/ я́ко, душе́ю живы́й, Престо́лу Госпо́дню со сла́вою предстои́ши,/ иде́же не забу́ди в моли́твах твои́х богоприя́тных град и оби́тель,/ в ни́хже на земли́ подвиза́лся еси́,/ и всех нас, чту́щих любо́вию па́мять твою́.
Богоро́дичен: Псало́мски воспева́ем Тя, Обра́дованная, Чи́стая,/ и со Арха́нгелом, благове́стником ра́дости всеми́рныя, немо́лчно, ра́дуйся, Тебе́ пое́м,/ Ты бо, Влады́чице, вои́стинну всем источи́ла еси́ ра́дование,/ ро́ждши ра́дости вино́вное Сло́во.
Свети́лен:
Процве́л еси́, я́ко фи́никс, о́тче,/ и, я́ко кедр, умно́жил еси́ дарова́ния благода́тная,/ я́же тя сла́вна в Ла́вре Пече́рстей показа́ша./ О нас Христа́ Бо́га моли́, чудоде́йственниче (и́мя рек),/ почита́ющих пречестну́ю па́мять твою́.
Сла́ва, и ны́не, Богоро́дичен:
Ра́дуйся, неора́нная Ни́во, возрасти́вшая Клас несе́янный,/ из Него́же хлеб спаси́тельный ми́ру сотвори́ся;/ сим напита́й ду́ши любо́вию чту́щих непоро́чное зача́тие Твое́, Чи́стая Де́во.
На хвали́тех стихи́ры, глас 2.
Подо́бен: Егда́ от Дре́ва:
Егда́ прии́де на тя зва́ние Боже́ственное,/ преподо́бне о́тче наш (и́мя рек),/ мир оста́вил еси́/ и благоути́шие оби́тели Пече́рския возлюби́л еси́,/ в не́йже трудолю́бно подвиза́лся еси́,/ в пе́ниих, бде́ниих и поще́ниих,/ а́ки безпло́тный, пребыва́я/ и вели́ким отце́м Анто́нию и Феодо́сию во всем подража́я./ Те́мже прия́л еси́ дар исцеле́ния от Христа́ Бо́га/ и сподо́бился еси́ предстоя́ния Престо́лу его́ Небе́сному,/ иде́же помяни́ в моли́твах богоприя́тных/ чту́щих святу́ю па́мять твою́.
Егда́ изше́л еси́ от ми́ра, о́тче (и́мя рек),/ и в оби́тель Пече́рскую прите́кл еси́,/ тогда́ осени́ тя вседе́тельная благода́ть Ду́ха Свята́го/ и в по́двизех духо́вных му́жественна и терпели́ва тя сотвори́,/ да, я́ко до́брый во́ин Христо́в,/ возмо́жеши бра́тися со враги́ неви́димыми,/ и́хже искуше́ния вся посрами́л еси́/ и, я́ко победоно́сец,/ нетле́нен вене́ц от руки́ Вседержи́теля Бо́га прия́л еси́./ Те́мже тя чтим и ублажа́ем.
Егда́ приспе́ вре́мя отше́ствия твоего́ к Бо́гу,/ преподо́бне о́тче наш (и́мя рек),/ тогда́ А́нгели гірееве́тлии/ приидо́ша взя́ти святу́ю ду́шу твою́,/ я́ко неве́сту чи́сту,/ и Сам Христо́с Госпо́дь, А́нгелов и челове́ков Влады́ка,/ прия́т тя в Небе́сное Свое́ Ца́рство./ Тебе́, си́це просла́вленному горе́/ и нетле́нием чудотво́рным почте́нному на земли́,/ пе́снь хвале́бную прино́сим,/ я́ко засту́пнику на́шему и предста́телю непосты́дному.
Сла́ва, глас 6:
Преподо́бне о́тче (и́мя рек),/ измла́да навы́кнув благоче́стию,/ яре́м Христо́в на ра́мо твое́ возложи́л еси́ трудолю́бно/ и вслед Влады́ки твоего́ поте́кл еси́, ра́дуяся./ Пече́рская оби́тель духо́вно тя воспита́,/ в не́йже те́ло твое́ нетле́нное оста́вил еси́,/ я́ко насле́дие бога́тое,/ дух же твой в селе́ниих Небе́сных упокое́ние получи́,/ иде́же со святы́ми Бо́гу предстоя́,/ проси́ нам спасе́ние и ве́лию ми́лость.
И ны́не, Богоро́дичен, глас то́йже:
К Тебе́, Моли́твеннице Те́плей и неруши́мей стене́,/ всеусе́рдно прибега́ем, Благослове́нная Богоро́дице Де́во,/ по́мощи прося́ще:/ изба́ви нас от бед и скорбе́й безме́рных,/ и́маши бо благода́ть и си́лу/ всем в ну́ждах посо́бствовати.
На литурги́и вся Слу́жба преподо́бному о́бщая.
Слу́жба о́бщая преподо́бным Пече́рским, двема́ или́ мно́гим
НА ВЕЧЕ́РНИ
На Го́споди, воззва́х: стихи́ры, глас 2:
Ки́ими похва́льными венцы́/ увязе́м преподо́бных и достоблаже́нных оте́ц на́ших (и́мя рек),/ житие́ стяжа́вших во пло́ти равноа́нгельное/ и ду́ши своя́ впери́вших в любо́вь Сла́дкаго Иису́са?/ С Ни́мже лику́юще во Све́те Непристу́пнем,/ мо́лят о душа́х на́ших.
Ки́ими пе́сненными пе́нии/ похва́лим Богоно́сных оте́ц на́ших (и́мя рек),/ превели́ких добро́ де́телей ревни́телей/ и за́поведей Бо́жиих соверше́ннейших послушателей?/ И́хже ра́ди улучи́вше Небе́сная селе́ния,/ хода́тайствуют спасти́ся душа́м на́шим.
Ки́ими сла́дкогласными хвале́нии/ воспое́м Богому́дрых оте́ц на́ших (и́мя рек),/ нетле́нными телесы́ свои́ми с на́ми спребыва́ющих,/ душа́ми же торжеству́ющих в селе́ниих Святы́я Тро́ицы,/ от нея́же то́чат благода́ть врачева́ния душа́м на́шим.
Сла́ва, глас 6:
Кто вы досто́йно ублажи́т, Богоно́сныя отцы́,/ или́ кто по достоя́нию воспое́т по́двиги и труды́ ва́ша?/ Обложе́ни бо су́ще ме́ртвенною пло́тию,/ Безпло́тным А́нгелом уподо́бистеся,/ вы́ну бо славосло́вите Го́спода псалмы́ и пе́нии непреста́нными./ Те́мже, пресели́вшеся ко Престо́лу Бо́жия сла́вы,/ иде́же глас чист пра́зднующих,/ не преста́йте прося́ще душа́м на́шим/ мир и ве́лию ми́лость.
И ны́не, Богоро́дичен догма́тик: Кто Тебе́ не ублажи́т, Пресвята́я Де́во:
На стихо́вне стихи́ры, глас 6.
Подо́бен: Тридне́вен:
Прииди́те, о празднолю́бцы,/ возвели́чим Богоно́сныя отцы́,/ Це́ркве сла́вная украше́ния,/ лико́в и́ночествующих похвалу́,/ ми́ру христиа́нскому удобре́ние/ и нам, ве́рным, спасе́ние.
Стих: Ра́дуйтеся, пра́веднии, о Го́споде,/ пра́вым подоба́ет похвала́.
Лику́ет дне́сь Пече́рская оби́тель,/ стяжа́вшая до́брыя гра́жданы (и́мя рек),/ отцы́ достоблаже́нныя,/ весели́тся и пеще́ра, храня́щая мо́щи их/ точа́щая врачева́ния неоску́дно/ с ве́рою и гове́нием к ним притека́ющим.
Стих: Весели́теся о Го́споде/ и ра́дуйтеся, пра́веднии.
Блаже́нства а́лчущих пра́вды возжела́сте,/ притеко́сте ко Хле́бу жи́зни,/ Его́же сла́дкаго раче́ния и любве́ вкуси́вше,/ жи́знь ве́чную восприя́ли есте́,/ ея́же о́бщники покажи́те/ ве́рою и любо́вию па́мять ва́шу соверша́ющих.
Сла́ва, глас 2:
Ле́ствицу ви́дяще отцы́ свяще́ннейшии,/ от го́ры святы́я Пече́рския к небеси́ утвержде́ну,/ на не́йже Бо́жия Ма́ти положи́ Свое́ селе́ние/ и А́нгельския ли́ки со святы́ми по ней к Небе́сней восхожда́ху./ Тех стопа́м после́довали есте́, а́ки безпло́тнии,/ и, возше́дше ве́дением и дея́нием,/ ны́не предстоите́ Святе́й Тро́ице,/ иде́же помяни́те и нас,/ покланя́ющихся моще́м ва́шим, преблаже́ннии.
И ны́не, Богоро́дичен, глас то́йже: О, чудесе́ но́ваго:
Стихи́ра двема́ святы́м. Сла́ва, глас 3:
Ра́дуйся, дво́ице свяще́нная,/ А́нгелов и челове́ков гове́йная,/ (и́мя рек пе́рваго), страх Бо́жий стяжа́вый в се́рдце свое́м и ра́зум духо́вный,/ (и́мя рек втора́го), единомы́сленный и единонра́вный ему́ в доброде́телех и труде́х,/ не преста́йте ку́пно моля́ще Спа́са/ уще́дрити и спасти́ ду́ши на́ша.
И ны́не, Богоро́дичен, глас то́йже:
Прииди́те, богокра́сный ли́че Пече́рских отце́в/ и убо́зии подража́телие их,/ воспо́йте Ма́терь Бо́га на́шего/ и Всемо́щную Храни́тельницу оби́тели сея́,/ из глубины́ души́ прося́ще пред чуде́сным Ея́ о́бразом/ ми́ра и спасе́ния душа́м на́шим.
Тропа́рь, глас 3:
Преблаже́ннии и Богоно́снии отцы́ на́ши (и́мя рек),/ я́ко стяжа́вшии дерзнове́ние ко Го́споду/ равноа́нгельным свои́м житие́м,/ его́же ра́ди обогати́ Христо́с нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.
НА У́ТРЕНИ
На Бог Госпо́дь: тропа́рь преподо́бных, два́жды. Сла́ва, и ны́не, Богоро́дичен.
По 1-м стихосло́вии седа́лен, глас 1:
Мно́гими скорбьми́ пу́ть жи́зни сея́ проидо́сте,/ и, доспе́вше кра́я у́мнаго жела́ния,/ в Черто́г Боже́ственныя сла́вы всели́стеся,/ и, ны́не ра́дующеся со всех Царе́м и Бо́гом,/ моли́теся, я́ко да и мы ва́шего весе́лия прича́стницы бу́дем,/ ва́шу па́мять почита́ющим, отцы́ всеблаже́ннии.
Сла́ва, и ны́не, Богоро́дичен:
Предста́тельнице Святе́й Тро́ице,/ предста́ни нам ско́ро в дне́шний де́нь,/ собра́вшимся в хра́ме Твое́м всечестне́м,/ и да́ждь сла́ву преподо́бных Твои́х зре́ти,/ сла́вящим Тя, Де́во Богоро́дице,/ моли́твами Твои́ми.
По 2-м стихосло́вии седа́лен, глас 3:
Брак А́гнчий в черто́зе Небе́снем услы́шавше,/ и зва́нию Царя́ Вы́шняго ко всем бы́вшу,/ вся мирска́я пристра́стия оста́висте, отцы́ Богоно́снии,/ и, сле́зными струя́ми ри́зы своя́ испра́вше,/ чи́сте внидо́сте в трапе́зу Христа́ Бо́га,/ но, пре́жде да́же не затворя́тся две́ри того́ вхо́да, моли́теся,/ я́ко да и мы, покая́нием вше́дше, вам прича́стницы бу́дем.
Сла́ва, и ны́не, Богоро́дичен:
Черто́г, присносу́щною сла́вою укра́шен, ви́дяще вы́ну,/ жела́ние и́мамы совни́ти в о́нь,/ но, оде́жды не иму́ще, стыди́мся,/ да не свя́зани от А́нгел и изве́ржени бу́дем./ Ты, су́щи оде́жда наги́х дерзнове́ния, Де́во Мари́е,/ украси́ ны и введи́ вну́трь Ца́рствия Христо́ва.
Велича́ние и псало́м избра́нный о́бщии преподо́бным.
По полиеле́и седа́лен,
глас 8:
Зва́нию Го́спода своего́ после́дующе,/ крест, а́ки жезл, в ру́це восприе́мше,/ не убоя́стеся стра́ха, предстоя́щаго во тьме́,/ но упова́нием преидо́сте к безбе́дному приста́нищу/ и, по́двигов свои́х обре́тше воздая́ние,/ всели́стеся во Све́те Непристу́пнем./ Те́мже вас почита́ем, отцы́ всеблаже́ннии,/ я́ко при́сно моля́щих Христа́ Бо́га согреше́ний проще́ние дарова́ти/ пра́зднующим любо́вию святу́ю па́мять ва́шу.
Сла́ва, и ны́не, Богоро́дичен:
Я́ко Еди́ну в жена́х Благослове́нную и де́вам похвалу́ и украше́ние,/ в бране́х непреобори́мую по́мощь,/ немощны́м утвержде́ние и ско́рое посеще́ние в печа́лех су́щим/ иму́ще Тя, Богоневе́стная Де́во,/ дне́сь в Пече́рстем Твое́м хра́ме припа́даем и мольбы́ на́ша к Тебе́ прино́сим,/ я́ко да мо́лиши Христа́ Бо́га согреше́ний проще́ние дарова́ти/ благоче́стно покланя́ющимся Пресвято́му Рождеству́ Твоему́.
По 50-м псалме́ стихи́ра, глас 6:
Возсия́ дне́сь светле́е со́лнца/ всепра́зднственная па́мять Богоно́сных оте́ц/ и озаря́ет пра́зднолюбное сосло́вие/ луча́ми благода́ти многоразли́чных чуде́с./ Те́мже и мы, о всеблаже́ннии, с ве́рою к вам притека́ем/ и припа́даем к моще́м ва́шим,/ прося́ще в ну́ждах на́ших ско́раго ва́шего посеще́ния./ Вы же не пре́зрите моле́ния на́шего,/ но, я́ко иму́ще дерзнове́ние ко Влады́це,/ испроси́те нам ве́лию ми́лость.
Кано́н, глас 4.
Песнь 1
Ирмо́с: Отве́рзу уста́ моя́,/ и напо́лнятся Ду́ха,/ и сло́во отры́гну Цари́це Ма́тери,/ и явлю́ся, све́тло торжеству́я,/ и воспою́, ра́дуяся, Тоя́ чудеса́.
Отве́рзем уста́ на́ша, бра́тие,/ восхвали́ти и воспе́ти па́мять (и́мя рек),/ оте́ц преблаже́нных и духоно́сных.
Прославля́ющия Мя просла́влю, реки́й, Госпо́дь/ дне́сь в па́мяти святы́х и преподо́бных оте́ц (и́мя рек)/ приглаша́ет воспе́ти и восхвали́ти труды́ и по́двиги их.
Жела́ний красне́йший Иису́с Любо́вь привлече́ к Себе́ се́рдца ва́ша и ду́ши ва́ша,/ Его́же сладча́йшей любви́ прилепи́вшеся,/ бога́тство обоже́ния восприя́сте.
И́мже о́бразом жела́ет еле́нь на исто́чники водны́я,/ си́це возжела́сте душа́ми ва́шими вкуси́ти во́ду жи́ву благода́ти,/ точа́щую мед безстра́стия и млеко́ обоже́ния.
Богоро́дичен: Обоже́ние земноро́дных, Богоро́дицу,/ мы́сленный рай, реку́ вод Жи́зни,/ Чи́стую и Пренепоро́чную Де́ву Мари́ю любо́вию восхва́лим.
Песнь 3
Ирмо́с: Твои́ песносло́вцы, Богоро́дице,/ живы́й и незави́стный Исто́чниче,/ лик себе́ совоку́пльшия, духо́вно утверди́,/ в Боже́ственней Твое́й сла́ве/ венце́в сла́вы сподо́би.
В го́ру Бо́жия Ма́тере, во оби́тель Пече́рскую вседу́шно притеко́сте/ и, сочета́вше себе́ ли́ком Пече́рских оте́ц,/ ку́пно с ни́ми бы́сте песносло́вцы и уго́дницы Го́спода и Пречи́стыя Богоро́дицы.
Нача́ло прему́дрости, страх Госпо́день, стяжа́вше в се́рдце свое́м, преблаже́ннии отцы́ на́ши,/ бы́ли есте́ прости́ душе́ю, кро́тцы и незло́биви се́рдцем,/ сего́ ра́ди воспочи́ в вас Преблаги́й Бог.
И́же худоро́дная ми́ра и уничиже́нная избра́вый Бог,/ зря предложе́ние ва́ше и любо́вь се́рдца,/ избра́ вас от земна́го ро́да и приведе́ в монасты́рь Пече́рский/ благоугожда́ти ему́ в и́ночестем, по́стничестем житии́.
Всеозаря́ющий свет бы́ти и́ноческое житие́ уве́девше,/ оста́висте мир, весь лежа́щий во зле,/ и, прите́кше во оби́тель Бо́жия Ма́тере,/ вда́сте телеса́ и ду́ши ва́ша в сниска́ние Боголюбе́зныя чистоты́ се́рдца и смиренному́дрия.
Богоро́дичен: Соедини́ла еси́ Бо́га челове́ком,/ земноро́дных вознесла́ еси́ к Небе́сным,/ обожи́ла еси́ естество́ на́ше,/ сего́ ра́ди блажа́т Тя вси ро́ди челове́честии,/ Богоро́дице Мари́е, Небе́сных умо́в ра́дование.
Седа́лен, глас 4:
Сочета́вше по́двигом и трудо́м теле́сным доброде́тели ду́ха, моли́тву, смиренному́дрие и кро́тость/ и сотвори́вше я тепле́йшею любо́вию,/ Исто́чнику любве́ всесоверше́нне присво́истеся./ Вдохните и в на́ша хла́дная се́рдца о́гнь любве́ Боже́ственныя, да зове́м вам:/ ра́дуйтеся, (и́мя рек), отцы́ всечестни́и,/ ми́ра тепле́йшии засту́пницы и храни́телие.
Сла́ва, и ны́не, Богоро́дичен:
Ми́ру всему́ Ско́рая Помо́щнице и обурева́емым ти́хое приста́нище,/ нас, вла́ющихся самохо́тных страсте́й волна́ми,/ приведи́ в тишину́ ско́рую бла́гости Твое́й/ и изба́ви от бед пою́щих Ти:/ ра́дуйся, всех Ра́досте и Спасе́ние.
Песнь 4
Ирмо́с: Седя́й в сла́ве на Престо́ле Божества́/ во о́блаце ле́гце,/ прии́де Иису́с Пребоже́ственный/ Нетле́нною Дла́нию и спасе́ зову́щия:/ сла́ва, Христе́, си́ле Твое́й.
Потща́стеся мно́гими по́двиги, посто́м и труды́ стяжа́ти бога́тство доброде́телей,/ сего́ ра́ди всели́ся в се́рдца ва́ша Иису́с Пребоже́ственный/ и соде́ла вас свя́ты хра́мы Боже́ственнаго снизхожде́ния Своего́.
И́же некни́жныя ученики́ умудри́вый/ и сотвори́вый я огневеща́тельныя вити́и,/ Сей и в ва́ша се́рдца, блаже́ннии отцы́,/ вдохну́ любо́вь к жизнето́чным словесе́м Свои́м.
Зело́ тружда́ющеся о спасе́нии ду́ши свое́й,/ непреста́нно име́ли есте́ во усте́х свои́х псалмы́ Дави́довы/ и горя́щим се́рдцем воспева́ли есте́:/ сла́ва, Христе́, си́ле Твое́й.
Богоро́дичен: Цевни́цу сладкопе́сневую, гу́сли благозву́чныя,/ псалти́рь, красно́ и предо́бре изглаша́ющий любо́вь Бо́жию к земноро́дным,/ зна́ем Тя, Пресвята́я Де́во,/ и́бо в Тя всели́ся Госпо́дь, обвесели́ челове́ки.
Песнь 5
Ирмо́с: Ужасо́шася вся́ческая/ о Боже́ственней сла́ве Твое́й:/ Ты бо, Неискусобра́чная Де́во,/ име́ла еси́ во утро́бе над все́ми Бо́га/ и родила́ еси́ Безле́тнаго Сы́на,/ всем воспева́ющим Тя/ мир подава́ющая.
Ужасо́шася бра́тия Пече́рская,/ зря́ще ва́ше равноа́нгельное житие́, бде́ние, и поще́ние,/ и всемо́щную любо́вь ко всем, и сла́вляху Бо́га,/ дарова́вшаго вам такову́ю си́лу благода́ти Свое́й.
Из ро́да в род достопа́мятны сла́вная дела́ жития́ ва́шего,/ дивя́тся А́нгели восхожде́нию ва́шему к Небеси́/ и челове́цы сла́вят Бо́га, ди́внаго во святы́х Свои́х.
Жего́ми пла́менем страсте́й и опаля́еми огне́м грехо́вным,/ к вам прибега́ем, отцы́ достоблаже́ннии:/ водо́ю моли́тв угаси́те разжже́ния любогрехо́вная/ и от огня́ гее́нскаго изба́вите притека́ющих к ва́шему заступле́нию.
Богоро́дичен: Вода́ жи́зни еси́ и кла́дязь безсме́ртия,/ Прера́дованная Госпоже́ Влады́чице Богоро́дице,/ иста́явшия ны от лю́тых страсте́й/ напои́, оживи́, и обнови́ струя́ми благода́ти и ми́лости Твое́й.
Песнь 6
Ирмо́с: Боже́ственное сие́ и всечестно́е/ соверша́юще пра́зднество,/ Богому́дрии, Богома́тере,/ прииди́те, рука́ми воспле́щим,/ от Нея́ ро́ждшагося Бо́га сла́вим.
Боже́ственное вои́стинну и всечестно́е соверша́юще пра́зднество в ле́тней па́мяти Богоно́сных оте́ц на́ших,/ прииди́те, Богому́дрии, возра́дуемся се́рдцем и устна́ми,/ велича́юще просла́вившаго их Го́спода.
Всече́стне подвиза́ющеся о Го́споде со вся́ким смиренному́дрием и кро́тостию,/ терпеливоду́шно понесо́сте крест свой,/ и́мже достиго́сте ве́чнаго воздая́ния Христа́ Жизнода́вца.
Я́ко же́ртва чи́стая и всесожже́ние ту́чное,/ принесо́стеся Царю́ сла́вы, достоблаже́ннии отцы́ на́ши,/ моли́твою те́плою и дея́нии честны́ми возше́дше на Небеса́,/ в Ца́рство Христа́ Бо́га на́шего.
Тружда́ющеся со вся́ким благогове́нием и стра́хом Бо́жиим во вруче́ннем вам послуша́нии,/ не измени́ли есте́ по́двига и труда́ духо́внаго,/ и́бо, рука́ми творя́ вруче́нную вам рабо́ту,/ вы́ну приноси́ли есте́ же́ртву хвале́ния Бо́гу,/ плод усте́н, прославля́ющих И́мя его́.
Богоро́дичен: Хлеб живо́тный, сходя́щий с Небесе́ и даю́щий живо́т ми́ру,/ вмести́ла еси́ во утро́бу Твою́, Чи́стая Де́во Ма́ти,/ мо́лим Тя, не лиши́ нас Боже́ственнаго прича́стия Твоего́.
Конда́к, глас 4:
Бога́тство благода́ти и сыноположе́ния стяжа́вше мно́гими по́двиги и доброде́тельми,/ и́хже ра́ди Христо́с всели́ ду́ши ва́ша/ в Небе́сная селе́ния Своя́,/ дарова́в благода́ть нетле́ния и чуде́с моще́м ва́шим./ К ним же притека́юще, вопие́м:/ ра́дуйтеся, (и́мя рек), отцы́ на́ши,/ лико́в и́ночествующих похвало́ и удобре́ние.
И́кос:
Подража́юще нра́вом равноа́нгельных и Богоно́сных оте́ц Анто́ния и Феодо́сия,/ отве́ргшеся ми́ра, притеко́сте в оби́тель Бо́жия Ма́тере,/ иде́же мно́гими по́двиги и смире́нием соверше́нне угоди́вше Бо́гу,/ во оби́тели рая́ пресели́стеся./ Те́мже, ликовству́юще во све́те непристу́пнем,/ не пре́зрите и нас, усе́рдно к вам притека́ющих и ве́село соверша́ющих па́мять ва́шу, (и́мя рек), отцы́ на́ши,/ лико́в и́ночествующих похвало́ и удобре́ние.
Песнь 7
Ирмо́с: Не послужи́ша тва́ри Богому́дрии/ па́че Созда́вшаго,/ но, о́гненное преще́ние му́жески попра́вше,/ ра́довахуся, пою́ще:/ препе́тый отце́в Госпо́дь и Бог, благослове́н еси́.
Не послужи́ша ми́ру и его́ по́хотем, Богому́дрии уго́дницы Твои́, Го́споди,/ но, вся злоухищре́ния врага́ му́жески попра́вше, побе́дныя венцы́ улучи́ша,/ моли́твами и моле́нием их спаси́ ду́ши на́ша, Преблаги́й.
Единомы́сленнии и единонра́внии бы́вше, блаже́ннии отцы́, в моли́тве, в смире́нии и во вруче́ннем вам послуша́нии,/ сего́ ра́ди ку́пно живете́ и ра́дуетеся во оби́телех Святы́я Тро́ицы,/ Е́йже ве́рно послужи́сте в ва́шем житии́.
До́бре и богоуго́дне пожи́сте в оби́тели Пече́рстей,/ мно́гая бо ле́та препроводи́вше чи́сто и непоро́чно,/ соверша́юще свято́е де́ло, бы́сте уго́дницы Го́спода и Пречи́стыя его́ Ма́тере.
Я́ко пшени́ца созре́лая, во вре́мя пожа́тая,/ преидо́сте в жи́тницы Небе́сныя, преста́вльшеся,/ иде́же насыща́етеся лицезре́нием и сла́вою Пресла́дкаго Иису́са,/ Ему́же преда́сте себе́, я́ко же́ртву чи́сту и непоро́чну.
Богоро́дичен: Жи́знь на́шу окорми́, Всеблага́я Богоневе́стная,/ и ду́ши на́ша напра́ви к приста́нищу благоути́шному Ца́рствия Сы́на Твоего́,/ к Тебе́ вопие́м и на Тя наде́жду возлага́ем,/ не отри́ни моле́ния на́шего.
Песнь 8
Ирмо́с: О́троки благочести́выя в пещи́/ Рождество́ Богоро́дичо спасло́ есть;/ тогда́ у́бо образу́емое,/ ны́не же де́йствуемое,/ вселе́нную всю воздвиза́ет пе́ти Тебе́:/ Го́спода по́йте, дела́,/ и превозноси́те Его́ во вся ве́ки.
Тружда́ющеся в послуша́нии ва́шем с ве́рою и смире́нием,/ са́ми себе́ принесо́сте в же́ртву чи́стую, благоприя́тну Го́сподеви,/ Его́же умоли́те дарова́ти душа́м на́шим очище́ние и ве́лию ми́лость.
Не я́ко зерца́лом в гада́ниих, но лице́м к лицу́ зри́сте Сла́дкаго Иису́са,/ Его́же возжела́сте, и Его́же возлюби́сте, и Тому́ преда́сте ду́шу и произволе́ние свое́;/ моли́те о соверша́ющих па́мять ва́шу с любо́вию и гове́нием.
Ва́шими моли́твами, отцы́ достоблаже́ннии, сподо́бите,/ да и мы, притека́ющим к ва́шему покро́ву и заступле́нию,/ досто́йно насы́тимся хле́ба живо́тнаго,/ благода́ти и сла́вы Иису́са Христа́, Го́спода на́шего.
Я́ко цвет, я́ко пар, я́ко се́нь ды́ма расходя́щагося, житие́ на́ше,/ что у́бо всу́е мяте́мся, бра́тие,/ и не притеце́м к цельбоно́сным моще́м оте́ц достоблаже́нных и преподо́бных на́ших (и́мя рек),/ и́хже моли́твами, Христе́, спаси́ ду́ши на́ша.
Богоро́дичен: И́же Ра́дость ми́ру роди́вшая и облагода́тствовавшая естество́ челове́ческое,/ Тя мо́лим и к Тебе́ прибега́ем:/ спаси́ нас, Влады́чице ми́ра и Всенепоро́чная,/ да не пости́гнет нас час сме́ртный негото́вых.
Песнь 9
Ирмо́с: Всяк земноро́дный/ да взыгра́ется, Ду́хом просвеща́емь,/ да торжеству́ет же безпло́тных умо́в естество́,/ почита́ющее свяще́нное торжество́ Богома́тере,/ и да вопие́т:/ ра́дуйся, Всеблаже́нная, Богоро́дице,/ Чи́стая Присноде́во.
Вси земноро́днии,/ стецы́теся усе́рдно к свяще́нному торжеству́ преподо́бных оте́ц на́ших (и́мя рек)/ и припади́те к нетле́нным и цельбоно́сным моще́м их:/ ти́и бо су́ть засту́пницы и хода́таи на́ши пред Бо́гом.
Предстоя́ще Престо́лу Всецаря́ и наслажда́ющеся ликовствова́ния с Го́рними си́лами,/ не забу́дите и нас, отцы́ всеблаже́ннии,/ восхваля́ющих труды́ и по́двиги ва́ша/ и святу́ю па́мять ва́шу любо́вию почита́ющих.
Чи́стыя ду́ши ва́ша бы́ша оби́тели Святы́я Тро́ицы,/ Ю́же не то́кмо в жи́зни, но и по сме́рти испове́дуете,/ и́бо нетле́ние, чудотворе́ния и благоуха́ние моще́й ва́ших/ пропове́дуют и возвеща́ют Тро́ическое поклоне́ние и еди́нство.
Богоро́дичен: Предстоя́щи одесну́ю Престо́ла Сы́на Твоего́, о Богома́ти,/ не забу́ди хода́тайством Твои́м и нас, моли́твенник и певе́ц Твои́х,/ ве́рою и любо́вию при́сно велича́ющих Тя, Чи́стую Ма́терь и Де́ву.
Свети́лен:
Празднолю́бных собо́ри стеко́шася в све́тлей па́мяти (и́мя рек), оте́ц достоблаже́нных и Богоно́сных,/ восхвали́ти труды́ и по́двиги, доброде́тели и чудеса́ их:/ ти́и бо, я́ко име́юще дерзнове́ние ко Го́споду,/ умо́лят его́ спасти́ ду́ши на́ша.
Сла́ва, и ны́не, Богоро́дичен:
Оби́тель, ю́же создала́ еси́ и в не́йже восхоте́ла еси́ жи́ти,/ поддержи́ и сохрани́ Твои́м покро́вом, Всенепоро́чная,/ всем же, живу́щим в ней и притека́ющим в ню на поклоне́ние святы́м моще́м уго́дников Твои́х,/ проле́й вели́кую и бога́тую ми́лость Сы́на Твоего́ и Бо́га на́шего.
На хвали́тех стихи́ры, глас 4:
(И́мя рек) Богому́дрии,/ а́нгельскому житию́ ревну́юще,/ в моли́тве и псалмопе́нии при́сно пребыва́ете,/ сего́ ра́ди бы́сте хра́мы Свята́го Ду́ха,/ И́же обогати́ вас нетле́нием и чудесы́,/ да моли́те о душа́х на́ших.
Челове́цы Бо́жии,/ и́стиннии раби́ Госпо́дни,/ непоро́чнии, пра́веднии, благочести́вии/ Позна́ни бы́сте, всеблаже́ннии отцы́./ Сего́ ра́ди возвели́чи Госпо́дь па́мять ва́шу,/ в не́йже лику́юще, сла́вим Христа́ Бо́га,/ прославля́ющаго святы́я Своя́.
Анто́нию Богоно́сному и Феодо́сию Богому́дрому/ ревну́юще доброде́тельным житие́м,/ в труде́х и по́двизех,/ в моли́твах и бде́ниих/ жи́знь свою́ сконча́сте;/ по блаже́ннем же успе́нии свое́м,/ ку́пно с ни́ми ра́дующеся и веселя́щеся,/ помяни́те и нас, па́мять ва́шу хвала́ми почита́ющих.
Сла́ва, глас 5:
Собери́теся дне́сь, христолюби́вых люде́й мно́жества,/ в све́тлей па́мяти достоблаже́нных оте́ц на́ших (и́мя рек),/ и, восхваля́юще све́тлыя по́двиги их,/ возвели́чим возвели́чнвшаго их Христа́,/ да́рующаго нам моли́твами их/ очище́ние и ве́лию ми́лость.
И ны́не, Богоро́дичен, глас то́йже:
Высоту́ обоже́ния,/ глубину́ Боже́ственнаго снизхожде́ния и любве́,/ широту́ милосе́рдия Тобо́ю стяжа́хом,/ Чи́стая Богоро́дице, Присноде́во./ Тем Тя немо́лчными гла́сы велича́ем.
На Литурги́и слу́жба о́бщая преподо́бным.
* * *
супру́г – па́ра, сподвижники
стро́потны – трудные, неровные
и́нныя – отшельников, иноков