24-й день

Свята́го му́ченика Са́ввы Стратила́та

Мученик Савва

Преподо́бных Са́ввы и Алекси́я затво́рника, в Бли́жних пеще́рах почива́ющих

Преподобный Савва Печерский

Преподобный Алексий, затворник Печерский

На Го́споди, воззва́х: стихи́ры, глас 4.

Подо́бен: Я́ко до́бля:

Воево́да непобеди́мый,/ страда́лец хра́брый/ и свети́льник всеми́рный был еси́,/ восто́ки по́двиг твои́х просвеща́я концы́/ и отгоня́ мрак де́монский тя́жкий,/ Са́вво вели́кий,/ удобре́ние му́чеников,/ сограждани́не святы́х безпло́тных/ и моли́твенниче о душа́х на́ших.

И в темни́цах затворя́емь,/ и огне́м сожига́емь,/ и мно́гими му́ками томи́м,/ и на дре́ве растяга́емь,/ и зимо́ю оскорбля́емь,/ и ра́нами ча́стыми непреста́нно бие́мь,/ и в вода́х блаже́нный коне́ц,/ страстоте́рпче, прие́мля усе́рдно,/ непоколеби́м пребы́л еси́.

Красе́н ты был еси́/ ю́ноша, пребога́те,/ от всех всегда́ удивля́емь,/ и отлучи́лся еси́ ко трудо́м/ страда́ний небоя́зненно,/ на вся враги́ воздви́гл еси́ побе́ды/ вели́кими святы́ми твои́ми по́двиги./ Сего́ ра́ди во хвале́нии тя чтим/ ра́достно, досточу́дне.

Сла́ва, и ны́не, Богоро́дичен:

Ту́чами Ду́ха Пресвята́го, Пречи́стая,/ мою́ мысль ороси́,/ Я́же ка́плю ро́ждшая, Христа́,/ неисче́тно безме́рная беззако́ния челове́ков/ щедро́тами измы́вшую;/ изсуши́ исто́чник страсте́й мои́х/ и пото́ка мя сподо́би пи́щи живы́я при́сно/ моли́твами Твои́ми.

Крестобогоро́дичен:

А́гнца и Па́стыря Тя/ на Дре́ве я́ко ви́де,/ А́гница ро́ждшая рыда́ше/ и ма́терски Ти веща́ше:/ Сы́не возжеле́нне,/ я́ко на дре́ве Кре́стнем пове́шен еси́, Долготерпели́ве?/ Ка́ко ру́це и но́зе Твои́, Сло́ве,/ пригвозди́шася от беззако́нных,/ и кровь Твою́ излия́л еси́, Влады́ко?

Тропа́рь, глас 4: Му́ченик Твой, Го́споди:

Или́ сей, глас 5:

Земна́го са́на по́яс оста́вив и по́чести, страда́льче,/ пред мучи́телем, льсти́вым царе́м/ Христа́, Бо́га су́ща, испове́дал еси́/ и Того́ ра́ди мно́га страда́ния подъя́л еси́, сла́вне./ Тем прекра́сным побе́ды венце́м увя́злся еси́/ от Царя́ всех ца́рствующаго,/ с Небе́сными во́и све́тло преукра́шен./ Предстоя́ Тому́, Са́вво,/ моли́, да спасе́т ду́ши на́ша.

Кано́н, глас 2.

Песнь 1

Ирмо́с: Гряди́те, лю́дие,/ пои́м песнь Христу́ Бо́гу,/ разде́льшему мо́ре и наста́вльшему лю́ди,/ я́же изведе́ из рабо́ты еги́петския,/ я́ко просла́вися.

Ты на́ше, Го́споди, от а́довых врат естество́ изба́вль,/ того́ затвори́л еси́ в темни́цах ве́чных/ и, смерть умертви́в, жизнь источи́л еси́.

И́же на земли́, сла́вне, во́инство оста́вль,/ Небе́сным чино́м и во́инством труды́ Боже́ственными/ сла́вно приче́лся еси́, Са́вво, сла́вя Христа́.

Си́лою, му́дре, свы́ше оде́ян на враги́,/ неподви́жим и непобеди́м яви́лся еси́,/ сих побежда́я до́блественно брань, пресла́вне.

Присносия́нен озари́лся еси́ в преле́стней но́щи свети́льник,/ Христа́ со́лнца пропове́дуя всем пра́ведно/ и отгоня́ тьму безбо́жия.

Богоро́дичен: От земли́ преиспо́дния нас исхити/ из Тебе́ роди́выйся Сын Бо́жий, я́ко милосе́рд,/ Свои́м воскресе́нием к жи́зни ве́чней, при́сно пою́щия Тя.

Песнь 3

Ирмо́с: Утверди́ нас в Тебе́, Го́споди,/ Дре́вом умерщвле́й грех,/ и страх Твой всади́/ в сердца́ нас, пою́щих Тя.

Силу́ Христо́с борца́ и держа́ву низло́ж сме́рти,/ оживи́ естество́ на́ше Свои́м Воскресе́нием и укрепи́.

Те́плая, прему́дре, Христо́ва любы́, тя боже́ственно разже́гши,/ земны́х и тле́нных всех отлучи́/ и пре́лести супоста́та показа́.

Позна́в Творца́, еди́наго Го́спода,/ да́вшаго Себе́ избавле́ние челове́ком,/ твою́ кровь дал еси́ за Него́, Са́вво,/ бу́дущаго ра́ди воздая́ния.

Богоро́дичен: Преста́ мучи́тельство сме́ртное, Пречи́стая,/ и а́дова сокро́вища упраздни́шася воста́нием Ро́ждшагося из Тебе́,/ и жи́зни сокро́вища напо́лнишася.

Седа́лен, глас 4.

Подо́бен: Вознесы́йся:

Неподви́жим я́влься воево́да, ва́рварския ко́зни победи́л еси́/ и, пострада́в, сла́вне, кре́пко, полки́ пребори́л еси́ враг неви́димых./ Отону́дуже венце́м увя́злся еси́ побе́дным,/ о нас моли́ приле́жно, Са́вво преблаже́нне, ве́рою пою́щих тя.

Богоро́дичен:

По Бо́зе во Твой, Богоро́дице,/ прибега́ю, смире́нный, покро́в Боже́ственный, припа́дая, молю́ся:/ поми́луй, Пречи́стая, я́ко превзыдо́ша главу́ мою́ греси́,/ и бою́ся, Влады́чице, му́ки, и трепе́щу./ Моле́ние сотвори́, Чи́стая, к Сы́ну Твоему́/ от сих изба́вити мя.

Крестобогоро́дичен:

И́же от Безнача́льнаго Отца́ рожде́ннаго/ напосле́док Тя пло́тию ро́ждшая,/ на Кресте́ ви́сяща, зря́щи, Христе́:/ увы́ Мне, любе́знейший Иису́се,– вопия́ше,–/ ка́ко сла́вимый я́ко Бог от А́нгел,/ от беззако́нных ны́не челове́к, Сы́не, хотя́, распина́ешися?/ Пою́ Тя, Долготерпели́ве.

Песнь 4

Ирмо́с: Услы́шах, Го́споди,/ слух Твоего́ смотре́ния/ и просла́вих Тя,/ еди́не Человеколю́бче.

Ноже́м отсе́кл еси́ и́стинных глаго́л твои́х/ лжи сплете́ния до́блественне, Са́вво пресла́вне.

Цвету́щая телесе́ красота́ в тебе́ и́стинно яви́, страстоте́рпче,/ души́ твоея́ Боже́ственное благоле́пие.

Расту́щим сла́вне, душе́вным му́жеством/ дре́вняго страда́ньми победи́л еси́ борца́.

Богоро́дичен: Я́ко от зве́ря, челове́ка Твой Сын исхити́в сме́ртна,/ к животу́, Де́во, сего́ преста́ви.

Песнь 5

Ирмо́с: Све́та Пода́телю/ и веко́в Тво́рче, Го́споди,/ во све́те Твои́х повеле́ний наста́ви нас,/ ра́зве бо Тебе́, ино́го бо́га не зна́ем.

Ты погребе́нием пло́ти борца́ на́шего погре́бл еси́/ и, я́ко Бог, истощи́в а́да, воскреси́ ме́ртвыя Свои́м Воскресе́нием, Христе́,/ Тя просла́вльшия.

Укра́шене, му́дре, тва́рей добро́те, позна́л еси́ всех Влады́ку,/ те́мже Его́ ра́ди, Са́вво, пострада́в, венце́в сподо́бился еси́.

Та́йных получи́в дарова́ний Христо́вых, сла́вне,/ и Того́ незави́стным сия́нием боже́ственно уясни́вся,/ свети́льник показа́лся еси́ в ми́ре, сла́вне.

Богоро́дичен: Исто́чник жи́зни, из Тебе́ вопло́щся,/ воскре́с, источи́ земноро́дных естество́, Богоро́дице,/ и сие́ я́ко Бог безсме́ртия напои́ вода́ми.

Песнь 6

Ирмо́с: В бе́здне грехо́вней валя́яся,/ неизсле́дную милосе́рдия Твоего́ призыва́ю бе́здну:/ от тли, Бо́же, мя возведи́.

Погуби́в сме́ртию смерть,/ И́же нас ра́ди во́лею мертв вмени́лся еси́, Христе́,/ ме́ртвыя оживи́л еси́ и сея́ уз изба́вил еси́.

Окропи́вся Христа́ Боже́ственною кро́вию,/ и́дольских треб оскверне́ния отступи́л еси́, Са́вво сла́вне,/ и све́том оде́явся благода́ти.

Зимы́ пре́лести отбе́гл еси́/ и к ти́хой весне́ дости́гл еси́ Христо́вым позна́нием,/ и́мже и озари́лся еси́, пресла́вне.

Богоро́дичен: Истле́вшия ны прегреше́ньми,/ Сын Твой, Пречи́стая, Воскресе́нием Свои́м обнови́, и онебеси́,/ и бо́ги соде́ла благода́тию.

Конда́к, глас 4.

Подо́бен: Вознесы́йся:

Непобеди́мый я́влься стратила́т,/ ва́рварския ко́зни победи́л еси́/ и, страда́льчествовав, сла́вне, тверде́йши,/ мно́жество враго́в неви́димых побори́л еси́,/ те́мже вене́ц испле́л еси́ побе́ды./ О нас моли́ Христа́, Са́вво всеблаже́нне,/ ве́рою почита́ющих тя.

Песнь 7

Ирмо́с: О́бразу злато́му, на по́ле Деи́ре служи́му,/ три́е Твои́ о́троцы небрего́ша безбо́жнаго веле́ния,/ посреде́ же огня́ вве́ржени, ороша́еми, поя́ху:/ благослове́н еси́, Бо́же оте́ц на́ших.

Усну́в Христо́с во́лею я́ко мертв, пло́тию во гро́бе,/ ме́ртвыя, и́же во а́де спя́щия, от ве́ка возбуди́/ и живоно́сным воста́нием сих воскреси́, пою́щия:/ благослове́н Бог оте́ц на́ших.

Ору́жие, му́дре, Боже́ственных слове́с, я́ко нож держа́в,/ в сердца́ сих вонзи́л еси́ нече́ствующих,/ и уязви́л еси́ сопроти́вных ло́жная беззако́ния, и взыва́л еси́:/ благослове́н Бог оте́ц на́ших.

Запе́н быв от враг,/ не поколеба́л еси́ души́, ни низложе́н был еси́,/ Христа́ бо име́я, назира́юща и укрепля́юща тя непоколеби́ма./ Ему́же и взыва́л, Са́вво, и благода́рно воспева́л еси́:/ благослове́н Бог оте́ц на́ших.

Ме́ртва врага́ подложи́ под но́ги твои́, страда́льче,/ я́коже коры́сть сего́ взял еси́ прельще́ныя/ и дал еси́ сих Влады́це всех, позна́нием зову́щия:/ благослове́н Бог оте́ц на́ших.

Богоро́дичен: В кре́пость держа́вную оде́явся, челове́ческое немощно́е естество́,/ Де́во Пресла́вная, в во́стании Рождества́ Твоего́,/ и, вооруже́но му́жески на смерть, сла́вит Тя,/ безсме́ртия и жи́зни Ма́терь Чи́стую.

Песнь 8

Ирмо́с: В пещь о́гненную ко отроко́м евре́йским снизше́дшаго/ и пла́мень в ро́су прело́жшаго Бо́га,/ по́йте, дела́, я́ко Го́спода/ и превозноси́те во вся ве́ки.

Сме́рти обрета́теля, сме́ртию твое́ю плотско́ю уби́в, Ще́дре,/ сего́ всем показа́л еси́ челове́ком ве́чную смерть:/ Ты превозно́сим, Животе́ и Нетле́ние.

Тиме́ния всего́ очи́щся безбо́жнаго/ и служе́ния и́дольскаго ба́нею, страстоте́рпче, креще́ния,/ Зижди́телю чи́сте приступи́л еси́, Са́вво,/ в по́двизех терпя́ до́блественне.

Медото́чным сло́вом, му́дре, и взо́ром сла́дким удивля́я мучи́теля,/ де́лы победи́тельныя на них поста́вил еси́ и взыва́л:/ Тя превозно́сим, Го́спода, во ве́ки.

Богоро́дичен: Живота́ моего́ Нача́льник,/ к сме́рти пло́тию приступи́в, умертви́ сию́./ Оживи́, Де́во, любо́вию пою́щия Тя/ и превознося́щия Того́ во ве́ки.

Песнь 9

Ирмо́с: От Бо́га Бо́га Сло́ва,/ неизрече́нною му́дростию прише́дшаго обнови́ти Ада́ма,/ я́дию в тле́ние па́дшаго лю́те,/ от Святы́я Де́вы неизрече́нно воплоти́вшагося нас ра́ди,/ ве́рнии, единому́дренно пе́сньми велича́ем.

Ты, утро́бу а́дову расто́рг, Ще́дре, истощи́л еси́ того́, я́ко си́лен,/ и небе́сный оскуде́вший напо́лнил еси́ мир,/ воздви́г и оживи́в ме́ртвыя,/ и челове́ки вся возне́сл еси́ разуме́нием Твои́м.

Восте́к на высоту́ у́мно, страстоте́рпче, Боже́ственнаго позна́ния Христо́ва,/ пре́лесть, до́лу влеку́щую, оста́вил еси́/ и крилы́ страда́ния к Сему́ возне́слся еси́,/ приле́жно велича́я и сла́вя Его́ я́ко Пребла́га.

Стре́лы младе́нец вменя́я стреля́ния мучи́телей,/ си́лою отража́я тех Христо́вою, Са́вво пресла́вне,/ спобо́рника име́л еси́ Того́ и помога́юща ти при́сно,/ Его́же ве́рою и любо́вию непреста́нно велича́л еси́.

Богоро́дичен: Облиста́, Де́во, Сын и Бог Твой, от гро́ба воста́в,/ Боже́ственныя зари́ и сла́вы испо́лни вселе́нную/ и сия́нием нетле́ния и́же ве́рою све́тел Тя о́блак сла́вящия просвети́л есть.

Мученик Савва происходил из готфского племени. Своей храбростью он достиг высокого чина воеводы стратилата и служил при императоре Аврелиане (270–275). С юности святой Савва был христианином и усердно следовал заповедям Христа, помогал неимущим, посещал в темницах заключенных христиан. За чистую и добродетельную жизнь святой получил от Господа дар чудотворения и Именем Христа исцелял больных, изгонял бесов. Когда император узнал, что святой Савва христианин, он потребовал от него отречения. Мученик сбросил воинский пояс и подтвердил, что не оставит свою веру. Его били, опаляли свечами, бросили в котел со смолой, но мученик оставался невредимым. Видя его мучения, уверовали во Христа 70 воинов, которых тут же усекли мечом. Святого Савву бросили в темницу. В полночь во время молитвы мученику явился Христос и осиял его светом Своей Славы. Спаситель повелел ему не бояться, но дерзать. Укрепленный, мученик Савва перенес наутро новые мучения и был утоплен в реке († 272).

Тропа́рь, глас 3:

Преблаже́ннии и Богоно́снии отцы́ на́ши Са́вво и Алекси́е,/ я́ко стяжа́вшии дерзнове́ние ко Го́споду/ равноа́нгельным свои́м житие́м,/ его́же ра́ди обогати́ Христо́с/ нетле́нием и чудесы́ мо́щи ва́ша,/ мо́лим вас приле́жно:/ испроси́те душа́м на́шим очище́ние/ и ве́лию и бога́тую ми́лость.

Конда́к, глас 4:

Бога́тство благода́ти и сыноположе́ния стяжа́сте/ мно́гими по́двиги и доброде́тельми,/ ихже ра́ди Христо́с всели́ ду́ши ва́ша/ в Небе́сныя селе́ния Своя́,/ дарова́в благода́ть нетле́ния/ и чуде́с моще́м ва́шим,/ сего́ ра́ди вопие́м вам:/ ра́дуйтеся, Са́вво и Алекси́е,/ ли́ков и́ноческих похвало́ и украше́ние.

Преподобный Савва Печерский подвизался в Ближних пещерах в Киево-Печерском монастыре не позднее середины ХIII века. В рукописных святцах, в «Книге о святых» и в каноне службы преподобным отцам Киево-Печерским он называется чудотворцем. Память преподобного Саввы совершается также в день памяти преподобных отцов Ближних пещер, 28 сентября, и в день памяти всех Киево-Печерских чудотворцев, в Неделю 2-ю Великого поста. 24 апреля память преподобного празднуется ради тезоименитства со святым мучеником Саввой Стратилатом.

Преподобный Алексий, затворник Печерский подвизался в Ближних пещерах Киево-Печерского монастыря в XIII веке. Мощи святого были обретены после 1675 года. Память преподобного Алексия празднуется также в день памяти преподобных отцов Ближних пещер, 28 сентября, и в день памяти всех Киево-Печерских чудотворцев, в Неделю 2-ю Великого поста. Святые мощи преподобного Алексия почивают рядом с мощами преподобного Саввы Печерского.