Разные молитвы

Влады́ко Го́споди Бо́же наш, Твоя́ от Твои́х приноси́ти Тебе́ по предложе́нию кому́ждо повеле́вый, и ве́чных Твои́х благ воздая́ние сим да́руяй, И́же вдовы́ по си́ле приноше́ние благоуго́дно прие́мый, приими́ и ны́не принесе́ная от раба́ Твоего́ и́мярек, и в ве́чных Твои́х сокро́вищах возложи́тися сим сподо́би; да́руй ему́ и мирски́х Твои́х благ оби́льное восприя́тие, со все́ми поле́зными ему́.

Я́ко благослови́ся Твое́ и́мя, и просла́вися Твое́ Ца́рство, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Го́споди Бо́же наш, Исто́чниче благи́х, повеле́вый земли́ извести́ плод, благоутро́бия ра́ди Твоего́ и бла́гости, благослови́ и умно́жи и гумно́ сие́, и плодоноше́ние рабо́в Твои́х; испо́лни сокро́вища их вся́каго блага́го плода́, пшени́цы, вина́ и еле́а, и сохрани́ их от вся́каго искуше́ния со все́ми су́щими у них, и просвети́ их в позна́нии Твое́м; да благоуго́дни тебе́ бы́вше, сподо́бятся ве́чных Твои́х благ.

Я́ко благослови́ся Твое́ и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Вся соверши́вый Сло́вом Твои́м Го́споди, и повеле́вый земли́ многоразли́чныя прозяба́ти плоды́, в наслажде́ние и пи́щу на́шу, И́же се́менми три о́троки и Дании́ла су́щия в Вавило́не, сластнопита́нных светлшия показа́вый; Сам всеблаги́й Царю́, и се́мена сия́ с разли́чными плоды́ благослови́, от них вкушающия освяти́, я́ко в сла́ву Твою́, и в че́сть свята́го, и́мярек, сия́ предложи́шася от Твои́х рабо́в, и в па́мять во благочести́вой ве́ре сконча́вшихся. Пода́ждь же Бла́же, благоукрасившим сия́, и па́мять соверша́ющим, вся я́же ко спасе́нию проше́ния, и ве́чных Твои́х благ наслажде́ние; моли́твами Пречи́стыя Влады́чицы на́шея Богоро́дицы и Присноде́вы Мари́и, и свята́го, и́мярек, его́же и па́мять соверша́ем, и всех святы́х Твои́х.

Я́ко Ты еси́ благословля́яй и освяща́яй вся́ческая Бо́же наш, и Тебе́ сла́ву возсыла́ем, безнача́льному Отцу́, со единоро́дным Твои́м Сы́ном, и Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

Влады́ко Го́споди Бо́же наш, Единоро́дный Сы́не и Сло́во О́тчее, И́же всяк соу́з грех на́ших Твое́ю стра́стию растерза́вый, И́же ду́нувый на ли́ца Твои́м апо́столом и рек им: приими́те Ду́ха Свята́го, и и́хже а́ще оста́вите грехи́, оста́вятся им, и и́хже а́ще держи́те, удержа́тся. Ты Сам, Влады́ко, святы́ми Твои́ми апо́столы дарова́л еси́ по вре́мени священнодействующым во святе́й Твое́й Це́ркви на земле́ оставля́ти грехи́, и вяза́ти и реши́ти вся́кий соу́з непра́вды. Мо́лимся у́бо и ны́не о бра́те на́шем, и́мярек, предстоя́щем пред Тобо́ю, пода́ждь ему́ Твою́ ми́лость, растерзай его́ соу́з грехо́вный, а́ще что в неве́дении, или́ небреже́нии глаго́ла, или́ от малоду́шия соде́ла; ве́дый челове́ческую не́мощь, я́ко Человеколю́бец и Благ, Влады́ка, вся во́льныя и нево́льныя грехи́ про́сти ему́. Я́ко Ты еси́ ми́луяй окова́нныя, возставля́яй низве́рженныя, наде́жде ненаде́ющихся, упокое́ние па́дших, и раба́ Твоего́ сего́ свободи́ от соу́за грехо́внаго.

Я́ко просла́вися Твое́ всесвято́е и́мя, со Безнача́льным Твои́м Отце́м, и Святы́м Ду́хом, ны́не и при́сно, и во ве́ки веко́в, ами́нь.

Многопе́тый Го́споди, нетле́ние, несквернение, Еди́не безгре́шне, очи́сти мя раба́ Твоего́ от вся́кия скве́рны пло́ти и ду́ха и нескве́рна покажи́ благода́тию Христа́ Твоего́; и освяти́ мя наи́тием Свята́го Твоего́ Ду́ха, да воспряну́в от мглы нечи́стых мечта́ний диа́волих, и вся́каго искуше́ния, сподо́блюся во вре́мя благопотре́бно приступи́ти и вкуси́ти ужа́сных Твои́х и стра́шных Та́инств.

Я́ко Ты еси́ благословля́яй и освяща́яй вся́ческая, Бо́же наш, и Тебе́ сла́ву возсыла́ем, со единоро́дным Твои́м Сыно́м, и Пресвяты́м Ду́хом, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Бо́же сил, исцеля́яй всяк неду́г, и вся́кую я́зю в лю́дех, очи́сти рабы́ Твоя́, и не да́ждь челове́ку и де́мону приобще́ния; запрети́ нечи́стым ду́хом, сокруши́ сатану́ под но́ги рабо́в Твои́х, обнови́ я̀ Святы́м Твои́м Ду́хом, соедини́ я̀ свято́й Твое́й це́ркви, и вся́каго де́йства противолежащаго изба́вивый, предста́ви свято́му Твоему́ же́ртвеннику, и небе́сных Твои́х и животворя́щих Та́ин сподо́би.

Я́ко Ты еси́ Бог наш, Бог ка́ющихся, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва ина́я подо́бна.

Го́споду помо́лимся. Го́споди поми́луй.

Го́споди Бо́же пра́вды, Кре́посте моя́ и По́моще, и Прибе́жище мое́ в де́нь злый, Ты спаса́еши во вре́мя ско́рби, спаси́ мя, я́ко внидо́ша во́ды до души́ моея́, углебо́х в тиме́нии глубины́, и не́сть постоя́ния, от лица́ врага́ насильствующа; я́ко погна́ ду́шу мою́, попра́ в зе́млю живо́т мой, во всю но́щь поборя оскорби́ ми. Благоволи́ Го́споди, е́же изба́вити мя от руки́ беззако́ннующа, и обидяща, я́ко да не согрешу́ Тебе́; зане́ страх сме́ртный нападе́ на мя, и покры́ мя тьма́. Доко́ле воззову́ Го́споди, и не услы́шиши? Возопию́ к Тебе́ оби́димь, и не спасе́ши? При́зри с Небесе́ Го́споди, и ви́ждь от до́му свята́го Твоего́, и сла́вы Твоея́: где е́сть мно́жество щедро́т Твои́х, по ми́лости Твое́й, я́ко претерпе́л еси́ нас? Го́споди, суди́ оби́дящия мя, не бу́ди я́ко челове́к спяй, и я́ко муж не моги́й спаса́ти.

Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Благоутро́бне Го́споди, Бла́же и Человеколю́бче, И́же Твои́х ра́ди щедро́т низпосла́вый единоро́днаго Твоего́ Сы́на в мир, да расто́ргнет е́же на ны рукописа́ние согреше́ний, и разреши́т у́зы, и́же от греха́ связу́емых, и пропове́сть плене́нным оставле́ние; Ты Влады́ко, и раба́ Твоего́ (или́ рабу́ Твою́), и́мярек, Твое́ю бла́гостию свободи́ належа́щаго ему́ (или́ ей) у́за, и да́руй ему́ (или́ ей) безгре́шно на вся́ко вре́мя и ме́сто приступа́ти к Твоему́ Вели́честву со дерзнове́нием, и чи́стою со́вестию проси́ти, е́же от Тебе́ бога́тыя ми́лости.

Я́ко ми́лостив, и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Бо́же и О́тче Го́спода на́шего Иису́са Христа́, И́же челове́ческаго естества́ удобоемлемое и немощно́е ве́дый, и я́же предприя́тий на́ших помышле́ния я́ве позна́вый, от де́рзости нам быва́емыя мы́сли, незло́бивый сый презре́ти сподо́би, и привзятием кля́твы содержи́мыя про́сти ; Ты бо ве́си та́йная серде́ц на́ших; мо́лимся у́бо, проще́ние и́мже и нам твоея́ ра́ди неизрече́нныя бла́гости пода́ждь.

Я́ко Благослови́ся Твое́ и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Влады́ко Го́споди Бо́же наш, И́же в вы́шних живы́й, и на смире́нныя призира́яй; И́же во святы́х почива́яй, Хвало́ Изра́илева, приклони́ у́хо Твое́, и услы́ши нас моля́щихся Тебе́; и пода́ждь проще́ние Твоему́ рабу́ (или́ Твое́й ра́бе), и́мярек, скве́рно я́дшему и вку́сшему (или́ я́дшей и вку́сшей) мяс, или́ каковы́хлюбо бра́шен не чи́стых, и́хже сне́ди отре́кл еси́ в зако́не святе́м Твое́м, сих же нево́лею причасти́вшагося (или́ причасти́вшуюся) про́сти: и сподо́би его́ (или́ ю̀) неосужде́нно причасти́тися стра́шных Та́инств, честна́го Те́ла же и Кро́ве Христа́ Твоего́, я́ко да изба́вится про́чее вся́каго нечи́стаго восприя́тия и дея́ния, я́ко да напитова́яся Боже́ственными твои́ми Та́инствы, и наслажда́яся святы́я Твоея́ и та́йныя трапе́зы, и безсме́ртных та́инств, и сохраня́емый с на́ми, во святе́й Твое́й це́ркви, восхва́лит и просла́вит и́мя Твое́ вы́шнее во вся дни живота́ своего́.

Я́ко Твое́ е́сть Ца́рство, и си́ла, и сла́ва, Отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Влады́ко Го́споди Бо́же мой, Его́же в рука́х жре́бий мой, заступи́ мя по ми́лости Твое́й, и не оста́ви мя поги́бнути со беззако́ниями мои́ми, ниже́ во́ли после́довати похотствующия пло́ти на дух. Созда́ние Твое́ е́смь, не пре́зри де́ло ру́ку Твое́ю, не отврати́ся, уще́дри, но не уничижи́; не пре́зри мя Го́споди, я́ко не́мощен е́смь, я́ко к Тебе́ прибего́х Покрови́телю моему́ Бо́гу, исцели́ ду́шу мою́, я́ко согреши́х Тебе́. Спаси́ мя ра́ди ми́лости Твоея́, я́ко к Тебе́ приве́ржен е́смь от ю́ности моея́, да посра́мятся и́щущии отри́нути от Тебе́ дея́нми нечи́стыми, помышле́нми неле́пыми, воспомина́ньми неполе́зными. Отгони́ от Мене́ вся́кую скве́рну, зло́бы изли́шество; я́ко Ты еси́ еди́н свят, еди́н кре́пкий, еди́н безсме́ртный, во всех име́яй могу́щество безприкла́дное, и Тобо́ю дае́тся всем я́же на диа́вола и его́ во́инства кре́пость.

Я́ко подоба́ет Тебе́ вся́кая сла́ва, че́сть и поклоне́ние Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Бо́же Спаси́телю наш, И́же проро́ком Твои́м Нафа́ном пока́явшемуся Дави́ду о свои́х согреше́ниих оставле́ние дарова́вый, и Манасси́ину в покая́нии моли́тву прие́мый, Сам и раба́ Твоего́ (или́ рабу́ Твою́), и́мярек, ка́ющагося (или́ ка́ющуюся) о ни́хже соде́ла согреше́ниих, приими́ обы́чным Твои́м человеколю́бием, презира́яй ему́ (или́ ей) вся соде́янная, оставля́яй непра́вды, и превосходя́й беззако́ния. Ты бо рекл еси́, Го́споди: хоте́нием не хощу́ сме́рти гре́шника, но я́ко е́же обрати́тися, и жи́ву бы́ти ему́ (или́ ей) и я́ко се́дмьдесят седмери́цею оставля́ти грехи́, поне́же я́ко вели́чество Твое́ безприкла́дное, и ми́лость Твоя́ безме́рная, а́ще бо беззако́ния на́зриши, кто постои́т?

Я́ко Ты еси́ Бог ка́ющихся, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Ами́нь.

Ина́я моли́тва.

Го́споди Иису́се Христе́, Сы́не Бо́га Жива́го, па́стырю и а́гнче, взе́мляй грех ми́ра, И́же заимова́ния дарова́вый двема́ должнико́ма, и гре́шнице да́вый оставле́ние грехо́в ея́; Сам, Влады́ко, осла́би, оста́ви, про́сти грехи́, беззако́ния, согреше́ния во́льная и нево́льная, я́же в ве́дении и не в ве́дении, я́же в преступле́нии и преслуша́нии бы́вшая от рабо́в Твои́х сих. И а́ще что я́ко челове́цы пло́ть нося́ще, и в ми́ре живу́ще от диа́вола прельсти́шася, а́ще же в сло́ве, или́ в де́ле, или́ в ве́дении, или́ в неве́дении, или́ сло́во свяще́нническое попра́ша, или́ под кля́твою свяще́нническою бы́ша, или́ под свою́ ана́фему падо́ша, или́ под кля́тву ведо́шася; Сам я́ко Благ и незло́бивый Влады́ко, сия́ рабы́ Твоя́ сло́вом разреши́тися благоволи́, проща́яй им и свою́ их ана́фему, и кля́тву, по вели́цей Твое́й ми́лости. Ей, Влады́ко Человеколю́бче Го́споди, услы́ши нас, моля́щихся Твое́й бла́гости о рабе́х Твои́х сих, и пре́зри я́ко многоми́лостив прегреше́ния их вся, измени́ их ве́чныя му́ки. Ты бо рекл еси́ Влады́ко: ели́ка а́ще свя́жете на земли́, бу́дут свя́зана на небеси́; и ели́ка а́ще разреши́те на земли́, бу́дут разреше́на на небеси́.

Я́ко Ты еси́ Еди́н безгре́шен, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Госпо́дь Иису́с Христо́с Бог наш, И́же боже́ственныя за́поведи святы́м свои́м ученико́м и апо́столом да́вый, во е́же вяза́ти и реша́ти па́дших грехи́, и от о́ных па́ки мы прие́мше вины́ то́жде твори́ти; да про́сти т тебе́, ча́до духо́вное, а́ще что соде́лал еси́ в ны́нешнем ве́це, во́льное или́ нево́льное, ны́не и при́сно, во ве́ки веко́в, ами́нь.

Влады́ко Вседержи́телю, врачу́ душ и теле́с, смиря́яй и вознося́й, наказу́яй и па́ки исцеля́яй, бра́та на́шего и́мярек, немощству́юща посети́ ми́лостию Твое́ю: простри́ мы́шцу Твою́ испо́лнену исцеле́ния и врачбы́; и исцели́ его́, возставля́яй от одра́ и не́мощи. Запрети́ ду́ху не́мощи, отста́ви от него́ вся́ку я́зву, вся́ку боле́знь, вся́ку ра́ну, вся́ку огне́вицу и тряса́вицу; и а́ще е́сть в нем согреше́ние, или́ беззако́ние, осла́би, оста́ви, про́сти Твоего́ ра́ди человеколю́бия. Ей Го́споди, пощади́ созда́ние Твое́ во Христе́ Иису́се Го́споде на́шем, с ни́мже благослове́н еси́, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споди Бо́же наш Вседержи́телю, и всеси́льне, творя́й вся, и претворя́яй то́чию е́же хоте́ти; И́же в непрохо́дных прохо́д обрета́яй неизрече́нною и непостижи́мою му́дростию; И́же от суха́го ка́мене водны́м пода́вый тещи́ пото́ком, и жа́ждущыя лю́ди Твоя́ насы́тивый; Сам и ны́не Влады́ко всех, услы́ши моле́ние нас недосто́йных рабо́в Твои́х, и да́руй нам во́ду на сем ме́сте, сла́дкую же и вку́сну, дово́льну у́бо к потре́бе, невреди́тельную же ко прия́тию. Я́ко да и в сем сла́вим пресвято́е и великоле́пое и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Го́споди Иису́се Христе́, И́же лоза́ сый и́стинная, и Оте́ц Твой де́латель, Ты и апо́столы наре́кл еси́ рождиями; Ты Изра́иля ра́ди изгна́л язы́ки, и насади́л еси́ его́; та́ко и ны́не, Влады́ко, прииди́ на ло́зу сию́, и насади́, воглуби ми́лость Твою́ на ню. Да́ждь ей храни́теля, по́мощь Твою́, огради́ вхо́ды и исхо́ды ея́ Твои́м Про́мыслом; изба́ви ю̀ от вся́каго обстоя́ния ея́, от гра́да же, сне́га, мра́за, от голоти ну́жно носи́мыя, от гро́зныя зимы́, и ве́тров сожже́ния, от бу́ри и де́монов; и про́сто рещи́, от вся́каго нахожде́ния, ви́димых же и неви́димых враго́в. При́зри и посети́ виногра́д сей, его́же насади́ десни́ца Твоя́, да возда́ст во вре́мя плоды́ своя́; и да сподо́бимся и мы Твое́ю благода́тию объимати его́, и принести́ Тебе́ от него́, во е́же претвори́тися в кро́вь Пречи́стаго Те́ла Твоего́. Тебе́ бо подоба́ет вся́ка сла́ва, че́сть и поклоне́ние, со Безнача́льным Твои́м Отце́м, и с Пресвяты́м и Благи́м и Животворя́щим Твои́м Ду́хом, ны́не и при́сно.

Бо́же Спаси́телю наш, благоволи́вый лозою нарещи́ся Единоро́дному Твоему́ Сы́ну, Го́споду на́шему Иису́су Христу́, и плод ея́ безсме́ртия вино́вен показа́вый, Ду́ха Твоего́ благода́тию; Сам и ны́не Влады́ко, и сей ло́зный плод благослови́, и да́ждь всем причащающимся от него́ освяще́ние, и преспе́яние души́; Создавшего же нас и́стинныя лозы́ прича́стника сотвори́ вы́ну, и невреди́м живо́т его́ сохрани́, ве́чными Твои́ми и неотъемлимыми дарми́ украша́яй, благода́тию, человеколю́бием Единоро́днаго Твоего́ Сы́на, с Ним же благослове́н еси́, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споди Бо́же наш, Благи́й и Человеколюби́вый, при́зри на вино́ сие́ и на причаща́ющияся от него́, и благослови́ ѐ, я́коже благослови́л еси́ студене́ц Иа́ковль, и купе́ль Силоа́мскую, и ча́шу святы́х Твои́х апо́стол; прише́дый в Ка́ну Галиле́йскую, благослови́вый ше́сть водоносов, и во́ду в вино́ преложи́вый, и сла́ву Твою́ яви́вый святы́м Твои́м ученико́м и апо́столом, Сам и ны́не низпосли́ Го́споди, Свята́го Твоего́ Ду́ха на вино́ сие́, и благослови́ ѐ во и́мя Твое́ Свято́е. Я́ко Ты еси́ благословля́яй, и освяща́яй, и умножай вся́ческая, Христе́ Бо́же наш, и Тебе́ сла́ву возсыла́ем со Отце́м, и Святы́м Ду́хом, ны́не и при́сно, и во ве́ки веко́в, ами́нь.

Подоба́ет бы́ти литурги́и и вжига́ти канди́ло свята́го Три́фона, или́ свята́го Евста́фиа, или́ свята́го Иулиа́на Ливи́йскаго, или́ и обои́х. По Боже́ственней литурги́и взя́ти еле́й от канди́л, и во́ду святы́х богоявле́ний, и кропля́яй крестови́дно свяще́нник на ни́ву, или́ виногра́д, или́ вертогра́д, глаго́ля моли́твы сия́.

Го́споду помо́лимся.

Го́споди Бо́же наш, в нача́ле созда́ния Твоего́ сотвори́вый Не́бо и зе́млю; и Не́бо у́бо украси́вый вели́кими свети́лы, е́же просвеща́ти на земли́, и чуди́тися те́ми Тебе́ Еди́ному Соде́телю и Влады́це тва́ри; зе́млю же украси́вый зла́ком и траво́ю, и разли́чием се́мен се́емых по ро́ду, и всю цве́ты вообрази́в в благоукраше́ние благослови́л еси́ ю̀; Сам и ны́не Влады́ко, при́зри от свята́го жили́ща Твоего́ на стяжа́ние сие́, и благослови́ ѐ. Сохрани́ ѐ неврежде́нно от вся́каго чарова́ния и обая́ния, и вся́каго зла, опла́знства же лука́ваго, и кова́рства лука́вых челове́к; и да́ждь ему́ приноси́ти плоды́ во вре́мя, испо́лнены благослове́ния Твоего́, и вся́каго зве́ря и га́да, че́рвь же и му́хи, и ржу, зной и вар, и безго́дныя ве́тры, вред нанося́щыя, отжени́ от него́. Я́ко освяти́ся и просла́вися пречестно́е и великоле́пое и́мя Твое́, Отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Заклина́ние свята́го му́ченика Три́фона. Ве́ждь же, о иере́ю! я́ко не вся живо́тная зде именова́нная прочести́ досто́ит, но то́чию тогда́ врежда́ющыя.

Заклина́ю вас многови́днии зве́рие, че́рвие, гу́сеницы, хрущи́ и пру́зи, мы́ши, щу́ры и кри́тицы, и разли́чныя ро́ды мух, и му́шиц, и мо́лий, и мра́вий, о́вадов же и ос, и многоно́жиц, и многообра́зныя ро́ды по́лзающих по земли́ живо́тных, и лета́ющих птиц, вред и тщету́ ни́вам, виногра́дом, са́дом же и вертогра́дом нанося́щыя, Бо́гом Отце́м безнача́льным, и Сыно́м Его́ собезнача́льным и единосу́щным, и Ду́хом его́ Пресвяты́м, Отцу́ и Сы́ну единосу́щным, и животворя́щим. Заклина́ю вас вочелове́чением единоро́днаго Сы́на Бо́жия, Го́спода на́шего Иису́са Христа́, и пожи́тием его́ на земли́ с челове́ки, стра́стию же Его́ спаси́тельною, и животворя́щею его́ сме́ртию, и тридне́вным Его́ воскресе́нием, и на небеса́ вознесе́нием, и всем его́ Боже́ственным спаси́тельным смотре́нием. Заклина́ю вас и святы́ми многоочи́тыми херуви́мы, шестокрила́тыми серафи́мы лета́ющими о́крест Престо́ла, и зову́щими: свят, свят, свят, Госпо́дь Савао́ф. Заклина́ю вас святы́ми а́нгелы, и все́ю си́лою, и ты́сящами ты́сящ, и тьма́ми тем, стра́хом мно́гим стоя́щими пред сла́вою Госпо́днею, да не оби́дите виногра́д, ниже́ ни́ву, ниже́ вертогра́д, древе́с же и зе́лий раба́ Бо́жия, и́мярек, но отиди́те на ди́вия го́ры, на непло́дная древеса́, на ни́хже дарова́л е́сть Бог вам повседне́вную пи́щу. Заклина́ю вас и честны́м Те́лом и Кро́вию Го́спода на́шего Иису́са Христа́, и́стиннаго Бо́га и Спа́са на́шего, и́мже и спасе́ние даде́ся нам и избавле́ние, за Его́же и́мя и́мамы умре́ти, да не оби́дите ниже́ ни́ву, ниже́ виногра́д, ниже́ вертогра́д, ниже́ вся́кое дре́во плодови́тое, и безпло́дное; и ниже́ лист зе́лий да не оби́дите от окруже́ния преде́ла, и ме́ста раба́ Бо́жия, и́мярек. А́ще же преслуша́ете мене́, и преступите́ кля́тву, е́юже заклина́х вас, не и́мате ко мне смире́нному и мале́йшему Три́фону, но к Бо́гу Авраа́ма, и Исаа́ка, и Иа́кова, гряду́щему суди́ти живы́м, и ме́ртвым; те́мже я́коже предре́х вам, иди́те на ди́вия го́ры, на безпло́дная дре́ва. А́ще же не послу́шаете мене́, моли́ти и́мам Человеколю́бца Бо́га, е́же посла́ти а́нгела своего́, и́же над зверьми́, и желе́зом и свинцо́м свя́жет вас, и убие́т, зане́ клятв и моли́тв мене́ смире́ннаго отверго́стеся Три́фона; но и пти́цы посыла́емыя мое́ю моли́твою да снедя́т вас. Еще́ заклина́ю вас вели́ким и́менем, на ка́мени напи́санным, и не носи́вшем, но разсе́дшемся я́ко воск от лица́ огня́: изыди́те от мест на́ших на ме́ста, я́же предре́х вам, непроходи́мая и безво́дная, и непло́дная. Изыди́те от ме́ста и о́крест преде́л рабо́в Бо́жиих, и мене́ призыва́ющих в по́мощь свою́, и заступле́ние, и спасе́ние, да и в сих сла́вится пресвято́е и́мя Отца́, и Сы́на, и Свята́го Ду́ха, и моли́твы и проше́ния, смире́ннаго Три́фона да испо́лнятся, я́ко Бо́гу подоба́ет сла́ва и держа́ва во ве́ки веко́в, ами́нь.

Свяще́нник: Мир всем. И ду́хови твоему́.

Свяще́нник: Главы́ ва́шя Го́сподеви приклони́те. Лик: Тебе́ Го́споди.

Свяще́нник же чтет моли́тву сию́ велегла́сно:

Влады́ко Го́споди Бо́же наш, плотски́м Твои́м смотре́нием благослови́вый Вифлее́м, и Гефсима́нию, и иногда́ дом Иа́ковль, И́же и благослове́н быв Изра́иль преименова́ся; И́же и дом Аведа́риин и Дави́дов благослови́вый, Сам благослови́ и стяжа́ние сие́, и сотвори́ ѐ о благослове́нии плодоноси́ти; моли́твами Пречи́стыя Влады́чицы на́шея Богоро́дицы, и Присноде́вы Мари́и; си́лою Честна́го и Животворя́щаго Креста́; честна́го, сла́внаго Проро́ка, Предте́чи и Крести́теля Иоа́нна, святы́х сла́вных и всехва́льных апо́стол; святы́х добропобе́дных му́ченик; святы́х сла́вных великому́ченик, Три́фона, Евста́фиа и Иулиа́на; и свята́го, и́мярек, его́же дне́сь па́мять соверша́ем, и всех Твои́х святы́х. Я́ко Ты еси́ благословля́яй и освяща́яй вся́ческая, и Тебе́ сла́ву возсыла́ем, со безнача́льным Твои́м Отце́м и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споди Бо́же наш, от пречи́стыя и пребога́тыя дла́ни Твоея́, предлежа́щее пред очи́ма Твои́ма, се́мен подая́ние принесо́хом Влады́ко, и сему́ Тебе́ вручи́тися мо́лимся; не бо сме́яхом в безду́шных земли́ не́дрех заключи́ти сия́, а́ще не воззри́м на повеле́ние Твоего́ Вели́чества, повелева́ющее роди́ти, и прозяба́ти земли́, и да́ти се́мена се́ющему, и хлеб в сне́дь. И ны́не мо́лимся Тебе́ Бо́же наш, услы́ши ны моля́щыяся Тебе́ и отве́рзи нам сокро́вище Твое́ вели́кое, и благо́е, и небе́сное; и изле́й благослове́ние Твое́, доне́леже удовли́мся по нело́жным Твои́м обеща́нием. И отжени́ от нас вся снеда́ющая плод наш земны́й, и вся́кое наказа́ние, пра́ведно наводи́мое на ны, грех ра́ди на́ших; и бога́тыя твоя́ щедро́ты низпосли́ на вся лю́ди Твоя́, благода́тию и человеколю́бием единоро́днаго Твоего́ Сы́на, с ни́мже благослове́н еси́, и с Пресвяты́м и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споди Иису́се Христе́ Бо́же наш, от пяти́ хле́бов и двою́ ры́бу, пя́ть ты́сящь насы́тивый, и от избы́ток мно́жество укру́хов собра́ти устро́ивый; Сам Влады́ко всеси́льный, и предлежа́щыя мре́жи благослови́, моли́твами преблагослове́нныя, сла́вныя Влады́чицы на́шея Богоро́дицы, и Присноде́вы Мари́и; свята́го сла́внаго и всехва́льнаго апо́стола, и первоверхо́внаго апо́столов Петра́; и и́же от них причаща́ющыяся рыб, в ми́ре и здра́вии душе́вном и теле́сном сохрани́.

Я́ко Ты еси́ Пода́тель всех благи́х, и Тебе́ сла́ву возсыла́ем со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споди Бо́же оте́ц на́ших, запове́давый Но́ю рабу́ Твоему́ устро́ити киво́т ко спасе́нию ми́ра, от мно́гих древе́с благоволи́вый ему́ еди́но дре́во бы́ти и сочини́тися; Сам у́бо Влады́ко всех, благоволи́вый безду́шными древесы́ пра́вити, и кре́пкою Твое́ю руко́ю род челове́ческий спаса́яй, Сам и ны́не Влады́ко, и сей кора́бль соблюди́, и да́ждь ему́ а́нгела бла́га, ми́рна; хотя́щыя плы́ти в нем сохрани́, да́ждь им во своя́ отити́ здра́вым, моли́твами пресвяты́я Влады́чицы на́шея Богоро́дицы, и Присноде́вы Мари́и; си́лою Честна́го и Животворя́щаго Креста́; честны́х, небе́сных, у́мных сил безпло́тных; свята́го сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́стол, и свята́го, и́мярек, и всех святы́х Твои́х. Я́ко Ты еси́ окромляяй и освяща́яй вся́ческая, Бо́же наш, и Тебе́ сла́ву, и благодаре́ние, и поклоне́ние возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Бо́же вели́кий, хва́льный и непостижи́мый, и неисповеди́мый, созда́вый челове́ка руко́ю Твое́ю, пе́рсть взем от земли́ и о́бразом Твои́м почти́вый его́, Иису́се Христе́, прежела́емое и́мя, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, яви́ся на ра́бе Твое́м (или́ ра́бе Твое́й), и́мярек, и посети́ его́ (или́ ю̀) душе́ю и те́лом, умоля́емь от пресла́вныя Влады́чицы на́шея Богоро́дицы, и Присноде́вы Мари́и; святы́х небе́сных сил безпло́тных; и честна́го сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́столов; и́же во святы́х оте́ц на́ших, и вселе́нских учи́телей, Васи́лиа Вели́каго, Григо́риа Богосло́ва, Иоа́нна Златоу́стаго; Афана́сиа и Кири́лла, Никола́а и́же в Ми́рех, Спиридо́на Чудотво́рца, и всех святы́х священнонача́льников; свята́го апо́стола первому́ченика и архидиа́кона Стефа́на; святы́х сла́вных и великому́чеников, Гео́ргиа Победоно́сца, Дими́триа Мирото́чца, Фео́дора Стратила́та, и всех святы́х му́чеников; преподо́бных и богоно́сных оте́ц на́ших, Анто́ниа, Евфи́миа, Са́ввы Освяще́ннаго, Феодо́сиа о́бщаго жития́ нача́льника, Ону́фриа, Арсе́ниа, Афана́сиа Афо́нскаго, и всех Преподо́бных; святы́х и исцели́телей, безсре́бренников Космы́ и Дамиа́на, Ки́ра и Иоа́нна, Пантелеи́мона и Ермола́а, Сампсо́на и Диоми́да, Фалале́а и Три́фона, и про́чих; свята́го, и́мярек, и всех Твои́х святы́х. И да́ждь ему́ сон упокое́ния, сон теле́сный здра́вия и спасе́ния и живота́, и кре́пость душе́вную и теле́сную; я́коже посети́л еси́ иногда́ Авимеле́ха уго́дника Твоего́, во хра́ме агри́ппове, и дал еси́ ему́ сон утеше́ния, е́же не ви́дети паде́ния Иерусали́мова; и сего́ успи́вый сном пита́тельным, и па́ки сего́ воскреси́вый во еди́ном мгнове́нии вре́мени, в сла́ву Твоея́ бла́гости. Но и святы́я Твоя́ сла́вныя се́дмь о́троки, испове́дники и свиде́тели Твоего́ явле́ния показа́вый, во дни Декиа царя́ и отсту́пника; и сия́ успи́вый в верте́пе на ле́та 372, я́ко младе́нцы согрева́емыя в ложесна́х ма́тере своея́, и ника́коже претерпе́вшыя тле́ния, в похвалу́ и сла́ву человеколю́бия Твоего́, и в показа́ние, и извеще́ние на́шего пакибытия́, и воскресе́ния всех. Сам у́бо Человеколю́бче Царю́, предста́ни и ны́не наи́тием Свята́го Твоего́ Ду́ха, и посети́ раба́ Твоего́ (или́ рабу́ Твою́), и́мярек, да́руй ему́ (или́ ей) здра́вие, кре́пость и благомо́щие, Твое́ю бла́гостию, я́ко от Тебе́ е́сть вся́ко дая́ние бла́го, и всяк дар соверше́н. Ты бо еси́ вра́чь душ на́ших, и Тебе́ сла́ву, и благодаре́ние и поклоне́ние возсыла́ем, со безнача́льным Твои́м Отце́м и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Бо́же Спаси́телю наш, прише́дый во Иерихо́н при Елиссе́и Проро́це, и вре́дныя во́ды со́лию исцели́вый; Сам благослови́ и со́ль сию́, и преложи́ ю̀ в же́ртву ра́дования. Ты бо еси́ Бог наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Стои́т хотя́й па́ки роди́тися сын, или́ дще́рь от вну́трь двере́й свята́го же́ртвенника, и прие́мник от вне. О́ба свещы́ держа́ще возжже́нныя.

Свяще́нник нося́ свяще́нническую оде́жду, твори́т: Благослове́н Бог наш: Трисвято́е. Пресвята́я Тро́ице: О́тче наш: Я́ко Твое́ е́сть ца́рство: Отпусти́тельный тропа́рь дне. Конда́к свята́го оби́тели. Та́же свяще́нник моли́тву.

Го́споду помо́лимся. Го́споди поми́луй.

Го́споди Бо́же наш, И́же возлю́бленным Твои́м Отроко́м, Го́сподем же на́шим Иису́сом Христо́м ча́да назвавый ны Бо́жия, сыноположе́нием и благода́тию Всеси́льнаго и Свята́го Твоего́ Ду́ха, реки́й: Аз бу́ду Ему́ во Отца́, и Той бу́дет Мне в Сы́на. Сам, Человеколю́бче Царю́, при́зри от свята́го Жили́ща Твоего́ на рабы́ Твоя́ сия́; и и́хже естество́, по пло́ти разстоя́щя друг от дру́га ро́ди, сию́ Сам во отца́ и сы́на, соедини́ Святы́м Твои́м Ду́хом; утверди́ я̀ в любви́ Твое́й; свяжи́ я̀ благослове́нием Твои́м: благослови́ я̀ в сла́ве Твое́й; укрепи́ я̀ в ве́ре Твое́й, сохраня́яй вы́ну, и не отверга́тися исходя́щих от усте́н е́ю; и бу́ди Хода́тай обеща́нию е́ю, да не расторжену да́же до конца́ живота́ е́ю любо́вь, ю́же о Тебе́ испове́даша, и нело́жну соблюду́т, в Тебе́ живу́ще еди́нем живу́щем и и́стиннем Бо́зе на́шем; и сподо́би я̀ насле́дники ца́рствия Твоего́. Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Ми́р все́м. Главы́ ва́шя Го́сподеви приклони́те

Свяще́нник мо́лится:

Влады́ко влады́ко, И́же всея́ тва́ри соде́телю, И́же в пе́рвом Ада́ме, по пло́ти есте́ственное связа́вый сро́дство, во Христе́ же Иису́се, возлю́бленнем Сы́не Твое́м и Бо́зе на́шем, благода́тию и нас сро́дники Твоя́ показа́вый, Тебе́ еди́ному ве́дущему вся и пре́жде бытия́, я́ко раби́ Твои́ си́и главы́ приклоня́ют, е́же о Тебе́ благослове́ния прося́ще. И е́же в Тебе́ соу́зом, во Отца́ и Сы́на, другъдру́га напису́юще, да получа́т и́хже оуповают. И е́же себе́ до́лжное постояние, и в Тебе́ сыноположе́ние досто́йне жи́тельствующе соблюда́ти бу́дут. Да я́коже во всех, и в сем просла́вится Твое́ и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

И прие́млет оте́ц сы́на от же́ртвенника, сын же па́дает к нога́ма отца́, и попира́ет его́ оте́ц в вы́ю, глаго́ля: Дне́сь сын мой еси́ ты, аз дне́сь роди́х тя.

И возставля́ет его́ та́же целуют друг дру́га. Свяще́нник же твори́т о́тпуст, и благословля́ет я, и у́чит я.

Возлю́бленнии бра́тия моя́ и прежелаемии! Собра́вшеся во святе́й Бо́жией це́ркви, во е́же служи́ти Бо́гу Живу́щему в преподо́бстве и пра́вде, и святы́х пречи́стых и безсме́ртных, стра́шных Та́инств Христо́вых, со стра́хом причасти́тися, услы́шите мене́ смире́ннаго и недосто́йнаго. Не бо аз е́смь глаго́ля и уча́ вас, но благода́ть Пресвята́го и Животворя́щаго Ду́ха; не бо от себе́ глаго́лю, но я́коже научи́хся от боже́ственных пра́вил, и богоно́сных оте́ц; я́коже прия́т Це́рковь от богому́дрых и боже́ственных апо́столов, та́ко у́бо сам глаго́лю аз смире́нный, и всех мале́йший. Дея́ний ва́ших не зна́ю, начина́ний не разуме́ю, и сего́ ра́ди Бо́га боя́йся завещава́ю, еди́ному кому́ждо от вас, муже́м же и жена́м, ма́лым же и вели́ким: никто́же от вас пови́нен греха́ сый, от своея́ оглаголаемь со́вести, пре́жде пока́ятися и испове́датися, да де́рзнет презирательне приступа́ти, и прикаса́тися боже́ственному сему́ огню́, Бог бо наш о́гнь пояда́яй е́сть. И и́же у́бо ве́рою и стра́хом приступа́ющыя к Бо́гу и Царю́, и Судии́ всех нас, пали́т и жжет грехи́ их, ду́шы же просвеща́ет и освяща́ет, неве́рныя же и со студо́м приступа́ющыя пали́т, и жжет ду́шы их и телеса́. Сего́ ра́ди в вас мно́зи немощни́и и недужливии спят, си́речь умира́ют мно́зи неисповедани и непокаянни. И про́чее, бра́тия моя́, молю́ вас и глаго́лю: никто́же клены́йся, или́ клятвопресту́пник, или́ ло́жь, или́ оглаго́льник, или́ блудни́к, или́ прелюбоде́й, или́ мужеложник, или́ хи́щник, или́ пия́ница, или́ ху́льник, или́ не́нависть име́яй на бра́та, или́ уби́йство сотвори́вый, или́ волхв, или́ чароде́й, или́ обавник, или́ восколиятель, или́ разбо́йник, или́ манихей неисповедан и негото́в да присту́пит стра́шным Христо́вым Та́йнам, или́ прикосну́тися, или́ прибли́житися, стра́шно бо е́сть впа́сти в ру́це Бо́га Жива́го: острейше бо е́сть Сло́во Бо́жие па́че меча́ обою́ду остра́, достигающее до сочленения, и мозго́в, и косте́й, и помышле́ний, и серде́ц. Ви́дите у́бо бра́тия моя́, никто́же нераскаян, или́ негото́в, или́ недосто́йный присту́пль, да причасти́тся стра́шных и пречи́стых Его́ Та́инств. Сам бо глаго́лет: Аз е́смь, и не́сть Бог ра́зве Мене́, Аз убию́, и жи́ти сотворю́, и не́сть и́же и́змет вас от ру́ку Мое́ю: Сам бо е́смь Ца́рь веко́в. Ему́же подоба́ет вся́кая сла́ва, че́сть, и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

А́ще кто благочести́в, и боголюби́в, да наслади́тся сего́ до́браго и све́тлаго торжества́. А́ще кто раб благоразу́мный, да вни́дет, ра́дуяся, в ра́дость Го́спода своего́. А́ще кто потруди́ся постя́ся, да восприи́мет ны́не дина́рий. А́ще кто от пе́рваго часа́ де́лал е́сть, да прии́мет дне́сь пра́ведный долг. А́ще кто по тре́тием часе́ прии́де, благодаря́ да пра́зднует. А́ще кто по шесто́м часе́ дости́же, ничто́же да сумни́тся, и́бо ничи́мже отщетевается. А́ще кто лиши́ся и девя́таго часа́, да присту́пит, ничто́же сумня́ся, ничто́же боя́ся. А́ще кто то́чию дости́же и во единонадеся́тый час, да не устраши́тся замедле́ния: любочести́в бо сый Влады́ка, прие́млет после́дняго я́коже и пе́рваго: упокоева́ет во единонадеся́тый час прише́дшаго, я́коже де́лавшаго от пе́рваго часа́; и после́дняго ми́лует, и пе́рвому угожда́ет, и о́ному дае́т, и сему́ да́рствует, и дела́ прие́млет, и наме́рение целу́ет; и дея́ние почита́ет, и предложе́ние хва́лит. Те́мже у́бо вни́дите вси в ра́дость Го́спода своего́. И пе́рвии и втори́и, мзду приими́те. Бога́тии и убо́зии, друг со друго́м лику́йте. Возде́ржницы и лени́вии, де́нь почти́те. Пости́вшиися и непости́вшиися, возвесели́теся дне́сь. Трапе́за испо́лнена, наслади́теся вси; теле́ц упита́нный, никто́же да изы́дет а́лчай, вси наслади́теся пи́ра ве́ры; вси восприими́те бога́тство бла́гости; никто́же да рыда́ет убо́жества, явибося о́бщее ца́рство. Никто́же да пла́чет прегреше́ний, проще́ние бо от гро́ба возсия́. Никто́же да убои́тся сме́рти, свободи́ бо нас Спа́сова сме́рть; угаси́ ю̀, И́же от нея́ держи́мый, плени́ а́да, Соше́дый во ад; огорчи́ его́ вкуси́вша пло́ти Его́. И сие́ предприе́мый Иса́иа возопи́: ад, глаго́лет, огорчи́ся, срет Тя до́ле. Огорчи́ся, и́бо упраздни́ся, огорчи́ся, и́бо пору́ган бы́сть. Огорчи́ся, и́бо умертви́ся. Огорчи́ся, и́бо низложи́ся: огорчи́ся, и́бо связа́ся. Прия́т те́ло, и Бо́гу прирази́ся. Прия́т зе́млю, и сре́те Не́бо. Прия́т е́же ви́дяше, и впаде́ во е́же не ви́дяше. Где твое́, сме́рте, жа́ло? Где твоя́, а́де, побе́да? Воскре́се Христо́с, и ты низве́ржеся. Воскре́се Христо́с, и падо́ша де́мони. Воскре́се Христо́с, и ра́дуются а́нгели. Воскре́се Христо́с, и жи́знь жи́тельствует. Воскре́се Христо́с, и ме́ртвый ниеди́н во гро́бе. Христо́с бо, воста́в от ме́ртвых, Нача́ток усо́пших бы́сть. Тому́ сла́ва и держа́ва во ве́ки веко́в, ами́нь.

Твори́т свяще́нник: Благослове́н Бог наш: Христо́с воскре́се: три́жды.

Та́же, Го́споду помо́лимся. Го́споди поми́луй.

При́зри Го́споди Иису́се Христе́, (Бо́же наш,) на бра́шна мяс, и освяти́ я̀, я́коже освяти́л еси́ овна́, его́же тебе́ приведе́ ве́рный Авраа́м, и а́гнца, его́же тебе́ А́вель во всепло́дие принесе́; подо́бне и тельца́ упита́ннаго, его́же жре́ти повеле́л еси́ сы́нови Твоему́ заблу́ждшему, и па́ки к Тебе́ возвра́щшемуся; да я́коже той сподо́бися Твоея́ бла́гости наслади́тися, си́це и освяще́нных от Тебе́, и благослове́нных, наслади́мся в пи́щу всех нас.

Ты бо еси́ и́стинная пи́ща, и пода́тель благи́х, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Влады́ко Го́споди Бо́же наш, Зижди́телю и Соде́телю всех, благослови́ млеко́ огусте́вшее, с ни́мже и я́ица, и нас соблюди́ во бла́гости Твое́й: я́ко да причаща́ющеся их, Твои́х незави́стно пода́тельных даро́в испо́лнимся и неизглаго́ланныя Твоея́ бла́гости. Я́ко Твоя́ держа́ва, и Твое́ е́сть Ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Го́споди Бо́же спасе́ния на́шего, Сы́не Бо́га жива́го, на херуви́мех носи́мый, превы́ше сый вся́каго нача́ла, и вла́сти, и си́лы, и госпо́дьства; Ты еси́ ве́лий и стра́шный над все́ми су́щими о́крест Тебе́; Ты еси́ поста́вивый Не́бо, я́ко кама́ру; Ты еси́ сотвори́вый зе́млю в кре́пости Твое́й, и испра́вивый вселе́нную в прему́дрости Твое́й; трясы́й поднебе́сную от основа́ний, столпы́ же ея́ неподви́жны; глаго́ляй со́лнцу, и не возсия́ет, зве́зды же запечатле́яй; запреща́яй мо́рю, и изсуша́яй ѐ; его́же я́рость та́ет нача́ла и вла́сти, и ка́мение сотро́шася от Тебе́. Врата́ ме́дная стерл еси́, и вереи́ желе́зныя сломи́л еси́; кре́пкаго связа́л еси́, и сосу́ды его́ раздра́л еси́; мучи́теля Кресто́м Твои́м низложи́л еси́, и зми́я у́дицею вочелове́чения Твоего́ привле́кл еси́, и у́зами мра́ка в та́ртаре посади́в связа́л еси́. Сам у́бо Го́споди, Утвержде́ние на Тя наде́жду возлага́ющих, кре́пкая Стено́ на Тя упова́ющих, отступи́ти сотвори́, отжени́, и в бе́гство претвори́ вся́кое диа́вольское де́йство, и вся́кое сатани́нское нахожде́ние, вся́кий наве́т сопроти́вныя и належа́щия си́лы от кро́ва сего́, и от одержи́мых от него́, и от обходя́щих под ним, зна́мение стра́шныя на де́монов побе́ды Креста́ Твоего́ нося́щих, и призыва́ющих и́мя Твое́ благо́е. Ей Го́споди, легео́на де́монов отгна́вый, и глухо́му и немо́му де́мону и нечи́стому ду́ху удержа́вшемуся, от челове́ка изы́ти и исхо́ду невозвра́тну бы́ти повеле́вый; все ополче́ние неви́димых враго́в на́ших потреби́вый, ве́рныя же и позна́вшыя Тебе́ умудри́вый: се даю́ вам вла́сть, е́же попра́ти верху́ змие́в и скорпи́ев, и на всю си́лу вра́жию. Сам Влады́ко, вы́шши вся́каго вре́да и искуше́ния, вся су́щыя в до́му сем сохрани́, избавля́я их от стра́ха нощна́го, и стре́лы летя́щия во дни, от ве́щи во тьме́ преходя́щия, от сря́ща и де́мона полу́деннаго; да Твои́ раби́, Твоя́ рабы́ни, и младе́нцы, Твоея́ наслажда́ющеся по́мощи, и а́нгельским во́инством храни́ми, я́ко еди́н вси во единомы́слии ве́рно пою́т: Госпо́дь мне помо́щник, и не убою́ся, что сотвори́т мне челове́к? И па́ки: не убою́ся зла, я́ко Ты со мно́ю еси́. Я́ко ты еси́ Бо́же Утвержде́ние мое́, кре́пкий Облада́тель, Кня́зь ми́ра, Оте́ц бу́дущаго ве́ка, и Ца́рство Твое́ Ца́рство ве́чное; и Тебе́ еди́наго е́сть Ца́рство, и си́ла, и сла́ва, со Отце́м и Святы́м Ду́хом, ны́не и при́сно, и во ве́ки веко́в, ами́нь.

Твори́т свяще́нник освяще́ние во́ды ма́лое.

По освяще́нии же глаго́лет моли́твы:

Го́споду помо́лимся.

Бо́же ве́чный, И́же се́дмь седмери́цею разжже́нную пе́щь, и пла́мень и́же в Вавило́не на ро́су преложи́л еси́, и вве́рженныя в ню от царя́ Навуходоно́сора, святы́я три о́троки, Ана́нию, Азарию и Мисаи́ла, це́лы сохрани́вый; Сам благослови́ и пе́щь сию́ вели́кия ра́ди Твоея́ ми́лости, и благослови́ в ней дела́ рук рабо́в Твои́х, и благопоспеши́ я̀ благодея́нием Твои́м, и испра́ви я̀ по мно́жеству щедро́т Твои́х; моли́твами Пречи́стыя Влады́чицы на́шея Богоро́дицы, и Присноде́вы Мари́и; си́лою Честна́го и Животворя́щаго Креста́: предста́тельством превели́ких чинонача́льник Михаи́ла и Гаврии́ла, и всех небе́сных сил безпло́тных; честна́го сла́внаго Проро́ка, Предте́чи и Крести́теля Иоа́нна: святы́х сла́вных и всехва́льных апо́стол; свята́го священному́ченика Киприа́на; и́же во святы́х отца́ на́шего Никола́а, архиепи́скопа Мирлики́йскаго чудотво́рца, и всех святы́х.

Я́ко Ты еси́ благословля́яй, и освяща́яй вся́ческая Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в, ами́нь.

Моли́тва ина́я:

Влады́ко Го́споди Бо́же наш, И́же в высо́ких живы́й, и на смире́нныя призира́яй: благослови́вый дом Лава́нов вхо́дом Иа́ковлим, и дом Пентефриин вхо́дом Ио́сифовым; благослови́вый дом Ави́дов вхо́дом ковче́га; И́же вочелове́чением Христа́ твоего́, спасе́ние быв до́му Закхе́ову; Сам благослови́ пе́щь сию́ и де́йствующыя ю̀, Твои́м стра́хом соблюди́, и невреди́мы их от сопротиволежа́щих сохрани́, и Твое́ благослове́ние с высоты́ жили́ща Твоего́ низпосли́ им, и благослови́, и умно́жи дела́ рук их. Да всегда́ благода́рно сла́вим всесвято́е и́мя Твое́, Отца́, и Сы́на и Свята́го Ду́ха, ны́не и при́сно, и во ве́ки веко́в, ами́нь.

Та́же глаго́лет проше́ние:

Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй.

Го́споди поми́луй, три́жды.

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии грехо́в рабо́в Твои́х, и́мярек, и о е́же благослови́тися и умно́житися де́лом рук тружда́ющихся о пещи́ сей, мо́лимтися Го́споди, услы́ши и поми́луй.

Го́споди поми́луй, три́жды.

Услы́ши ны Бо́же Спаси́телю наш, упова́ние всех конце́в земли́, и су́щих в мо́ри дале́че, и ми́лостив, ми́лостив бу́ди Влады́ко о гресе́х на́ших, и поми́луй ны. Ми́лостив бо и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И окропля́ет пе́щь и су́щыя та́мо.

Та́же твори́т отпу́ст.

Благослове́н Бог наш: И чтец: Царю́ небе́сный: Трисвято́е. Пресвята́я Тро́ице: О́тче наш: Го́споди поми́луй, 12. Сла́ва, И ны́не: Прииди́те поклони́мся: три́жды. И псало́м 33: Благословлю́ Го́спода во вся́кое вре́мя: Сла́ва, И ны́не: Аллилуия, три́жды. И ектения́: Ми́ром Го́споду помо́лимся. О свы́шнем ми́ре: О ми́ре всего́ ми́ра: О святе́м хра́ме сем и про́чая.

И прилага́ется сия́:

О е́же низпосла́ти на отроча́ сие́ ду́ха прему́дрости и ра́зума, и отве́рзти ум и уста́, и просвети́ти се́рдце его́ к прия́тию наказа́ния до́брых уче́ний, Го́споду помо́лимся.

О е́же всади́ти в се́рдце его́ нача́ло прему́дрости страх Свой Боже́ственный и тем бу́есть ю́ности отгна́ти от се́рдца его́, и просвети́ти ум его́, е́же уклони́тися от зла и твори́ти благо́е, Го́споду помо́лимся.

О е́же отве́рзти ум его́, е́же прия́ти и разуме́ти, и па́мятствовати вся до́брая и душеполе́зная уче́ния, Го́споду помо́лимся.

О е́же пода́ти ему́ приседя́щую Престо́лу Его́ прему́дрость, и всади́ти ю̀ в се́рдце его́, я́ко да научи́т его́, что е́сть благоуго́дное пред Ним, Го́споду помо́лимся.

О е́же преспеяти ему́ прему́дростию и во́зрастом в сла́ву Бо́жию, Го́споду помо́лимся.

О е́же бы́ти ему́ прему́дростию, и доброде́тельным житие́м, и благостоя́нием в правосла́вней ве́ре, ра́дость и утеше́ние роди́телем свои́м, и це́ркви Правосла́вно-кафоли́честей утвержде́ние, Го́споду помо́лимся.

О е́же изба́витися ему́ и нам от вся́кия ско́рби:

Заступи́, спаси́, поми́луй и сохрани́ нас, Бо́же:

Пресвяту́ю, Пречи́стую:

И возглаша́ет: Я́ко подоба́ет: Посе́м чтец тропари́ сия́, глас 5: Я́ко посреде́ ученико́в: Безкни́жныя ученики́: Сла́ва: Язы́ки иноро́дными: И ны́не: Милосе́рдия две́ри: По сих же глаго́лет: Прему́дрость про́сти , услы́шим свята́го Ева́нгелиа. Мир всем.

От Ма́рка свята́го Ева́нгелиа чте́ние. От главы́ 10. Зача́ло 44.

Во вре́мя о́но приноша́ху ко Исусови де́ти, да ко́снется их. Ученицы́ же преща́ху принося́щым. Ви́дев же Иису́с, негодова́, и рече́ им: оста́вите дете́й приходи́ти ко Мне и не брани́те им, таце́х бо е́сть ца́рствие Бо́жие. Ами́нь глаго́лю вам: и́же а́ще не прии́мет ца́рствия Бо́жия я́ко отроча́, не и́мать вни́ти в не. И объе́мь их, возло́жь ру́це на них, благословля́ше их.

Лик: Сла́ва Тебе́, Го́споди, сла́ва Тебе́.

И возложи́в на него́ ру́це, глаго́лет:

Си́ла слове́с Боже́ственнаго Ева́нгелиа да просвети́т ум твой све́том своего́ богоразу́мия, и отве́рзет се́рдце и уста́ твоя́, е́же прия́ти и разуме́ти Боже́ственная писа́ния, и вся душеполе́зная уче́ния; и да сни́дет на тя благослове́ние небе́сное.

Десницей же благословля́я главу́ его́, глаго́лет:

Во и́мя Отца́, и Сы́на, и Свята́го Ду́ха, ами́нь.

Та́же глаго́лет ектению́ сию́:

Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй.

Лик: Го́споди поми́луй, три́жды.

Еще́ мо́лимся Го́споду Бо́гу на́шему, о е́же призре́ти ми́лостивно на отроча́ сие́, и́мярек, и низпосла́ти в се́рдце, во ум, и во уста́ его́ Ду́ха прему́дрости, ра́зума же и благоче́стия, и стра́ха Своего́, и просвети́ти его́ све́том Своего́ богоразу́мия, и пода́ти ему́ си́лу и кре́пость, во е́же ско́ро прия́ти, и спе́шно навы́кнути Боже́ственнаго зако́на Его́ наказа́ние, и вся до́брая и поле́зная уче́ния; и е́же преуспева́ти ему́ прему́дростию и ра́зумом, и все́ми доброде́тельми, и исполне́ние за́поведей Его́, в сла́ву Пресвята́го Своего́ и́мени; и дарова́ти ему́ здра́вие, и долголетна сотвори́ти его́, к созида́нию и украше́нию Це́ркве Своея́ святы́я; рцем вси: Го́споди, услы́ши и ми́лостивно поми́луй.

Лик: Го́споди поми́луй, 12.

Иере́й же возглаша́ет: Услы́ши ны, Бо́же, Спаси́телю наш:

Посе́м чтет моли́тву:

Бо́же, Бо́же наш, И́же о́бразом Твои́м почты́й нас челове́ки, и самовла́стною оде́явый во́лею; во храм вше́дый преполови́вшуся пра́зднику, и учи́вый лю́ди, чудя́щымся наро́дом, и глаго́лющым: отку́ду Сей ве́сть Писа́ния, не научи́вся? Дави́д же, прииди́те ча́да, просвети́теся, глаго́лет, послу́шайте мене́, стра́ху Госпо́дню научу́ вас. И́же Соломо́на прему́дрости научи́вый Бо́же всех, Сло́ве Всецарю́, отве́рзи ду́шу и се́рдце, уста́ и ум, раба́ Твоего́ (или́ рабы́ Твое́й), и́мярек, во е́же разуме́ти, и прия́ти, и твори́ти во́лю Твою́; и изба́ви его́ (или́ ея́)от вся́каго искуше́ния диа́вольскаго, соблюда́я его́ (или́ ю̀) вся дни живота́ его́ (или́ ея́), и да преспева́яй (или́ преспева́ющи) бу́дет во всех за́поведех Твои́х вы́ну, моли́твами Пречи́стыя Твоея́ Ма́тере, и всех святы́х Твои́х. Я́ко Ты еси́ Посети́тель душ и теле́с на́ших, Христе́ Бо́же наш, и Тебе́ сла́ву возсыла́ем, со Отце́м, и Святы́м Ду́хом, ны́не и при́сно, и во ве́ки веко́в, ами́нь.

И по отпу́сте дае́т целова́ти крест, и кропи́т свяще́нною водо́й, и вруча́ет кни́гу, глаго́ля:

Приими́ ча́до, наказа́ние, и страх Бо́жий да всели́тся в се́рдце твое́: Той бо е́сть нача́ло прему́дрости, и Сей просвети́т ум и се́рдце твое́, е́же разуме́ти и зна́ти Го́спода, и твори́ти во́лю Его́ на вся́кое вре́мя; во и́мя Отца́, и Сы́на, и Свята́го Ду́ха, ами́нь.

После́дование о о́троцех неудобоучащихся. Благослови́вшу свяще́ннику: Трисвято́е: Пресвята́я Тро́ице: О́тче наш: Я́ко Твое́ е́сть ца́рство:

И тропари́ сия́:

Я́ко посреде́ ученико́в Твои́х прише́л еси́, Спа́се, мир дая́ им, прииди́ и к нам, и спаси́ нас.

Безкни́жныя ученики́ Дух Твой Святы́й наказа́тели показа́, Христе́ Бо́же, и многовеща́нным сличеством язы́к пре́лести ума́ли, я́ко всеси́лен.

Язы́ки иноро́дными обнови́л еси́ Христе́, Твоя́ ученики́, да те́ми Тя пропове́дят Сло́ва и Бо́га, подаю́щаго душа́м на́шим ве́лию ми́лость.

Царю́ Небе́сный, Уте́шителю, Душе́ И́стины, И́же везде́ сый, и вся исполня́яй, сокро́вище Благи́х и жи́зни пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, души́ на́шя.

Богоро́дичен: Милосе́рдия две́ри отве́рзи нам, Благослове́нная Богоро́дице, наде́ющиися на Тя, да не поги́бнем, но да изба́вимся Тобо́ю от бед, Ты бо еси́ спасе́ние ро́да христиа́нскаго.

Та́же глаго́лет свяще́нник моли́твы над головой отроча́те:

Го́споду помо́лимся. Го́споди поми́луй.

Го́споди Иису́се Христе́ Бо́же наш, всели́выйся в се́рдца двуна́десятих апо́столов нелицеме́рно, благода́тию Всесвята́го Ду́ха, соше́дшаго в ви́де о́гненных язы́к, и сих устне́ отве́рзый, и нача́ша глаго́лати ины́ми язы́ки. Сам Го́споди Иису́се Христе́ Бо́же наш, ниспосли́ Того́ Ду́ха Твоего́ Свята́го на отроча́ сие́, и́мярек, и насади́ во ушеса́ се́рдца его́ Свяще́нныя Писа́ния, я́же рука́ Твоя́ пречи́стая на скрижа́лех начерта́ законополо́жнику Моисе́ю, ны́не и при́сно и во ве́ки веко́в, ами́нь.

Моли́тва ина́я.

Го́споду помо́лимся. Г поми́луй.

Го́споди, Иису́се Христе́, Бо́же наш, всели́выйся и просвети́вый се́рдца два́десяти четы́рех ста́рцев, и святы́х Твои́х ученико́в и апо́столов, и святы́х апо́столов и евангели́стов Твои́х Иоа́нна, Матфе́я, Ма́рка и Луки́, научи́вый и просвети́вый святого первому́ченика Стефа́на; Сам и ны́не Го́споди, просвети́ се́рдце раба́ Твоего́ (или́ рабы́ Твоея́), и́мярек, моли́твами Преблагослове́нныя Влады́чицы на́шея Богоро́дицы и Присноде́вы Мари́и; си́лою честного и Животворя́щаго Креста́, честна́го, славного Проро́ка, Предте́чи и Крести́теля Иоа́нна; святы́х сла́вных и всехва́льных апо́стол, свята́го апо́стола Матфи́я; святы́х му́ченик Агапия, Прокопия и Филита и всех святы́х. Я́ко Ты еси́ просвеще́ние душ и теле́с на́ших, и Тебе́ сла́ву возсыла́ем, со Безнача́льным Твои́м Отце́м и с Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в, ами́нь.

Ста́нем до́бре, ста́нем со стра́хом Бо́жиим: ами́нь.

Та́же, ектениа́: Поми́луй нас Бо́же: И отпу́ст.

Благослови́т свяще́нник и по Трисвято́м,

Го́споди услы́ши моли́тву мою́: Гспо́дь пасе́т мя: Госпо́дь просвеще́ние мое́: Да воскре́снет Бог и расточа́тся врази́ Его́: Псало́м 50. Та́же, Не вве́ри мя:

По сих свяще́нник: Ми́лостию и щедро́тами:

Та́же кано́н моле́бный ко Го́споду на́шему Иису́су Христу́, ко Пресвято́й Богоро́дице, ко безпло́тным, ко апостолам, и ко всем святы́м.

Глас 2. Пе́снь 1. Ирмо́с:

Гряди́те лю́дие, пои́м пе́снь Христу́ Бо́гу, разде́льшему мо́ре, и наста́вльшему лю́ди, я́же изведе́ из рабо́ты еги́петския, я́ко просла́вися.

Припе́в: Изба́ви от бед, Спа́се, раба́ Твоего́, я́ко милосе́рд.

Тво́рче и изба́вителю мой и Го́споди, ве́рных по́моще, ускори́ изба́ви мя от настоя́щия беды́, раб Твой (или́ раба́ Твоя́) вопие́т Тебе́ Еди́не Человеколю́бче.

На́ше еди́н ве́дый неможе́ние, от настоя́щия ско́рби, и содержа́щий па́губы предвари́в исхити́, и спаси́ Спа́се, раба́ Твоего́ (или́ рабу́ Твою́).

Сла́ва: А́нгельстии чи́нове невеще́ственных сил, со апо́столы и му́ченики, умоли́те всех Влады́ку, от беды́ тяжча́йшия изба́вити раба́ Твоего́ (или́ рабу́ Твою́).

И ны́не: Ве́рных прибе́жище Присноде́во, Держа́вная По́моще, нас рабо́в твои́х, настоя́щия ну́жды раба́ твоего́ (или́ рабу́ твою́) моли́твами изба́ви, Влады́чице.

Пе́снь 3. Ирмо́с:

Утверди́ нас в Тебе́, Го́споди, дре́вом умерщвле́й грех, и страх Твой всади́ в се́рдца нас пою́щих Тя.

Я́коже дре́вле Иа́кова, Твоего́ уго́дника, изба́вил еси́ Исавова наважде́ния, та́ко изба́ви раба́ Твоего́ (или́ рабу́ Твою́) от настоя́щия ну́жды, я́ко Человеколю́бец.

Человеколю́бче Спа́се, призыва́ю Тя в ско́рби сый и печа́ли, не пре́зри мя, раба́ Твоего́: но потщи́ся и изба́ви мя, я́ко благоутро́бен.

Сла́ва: Еди́не бла́же, еди́не благоутро́бне, еди́не ще́дре, и ми́лостиве, моли́твами святы́х Твои́х, Твоего́ раба́ (или́ Твою́ рабу́) уще́дрив свободи́.

И ны́не: Бо́га, его́же родила́ еси́ Чи́стая, моли́ со все́ми а́нгелы и апо́столы, со проро́ки же и му́ченики, от бед раба́ твоего́ (или́ рабу́ твою́) изба́вити.

Та́же Ирмо́с: Утверди́ нас в Тебе́ Го́споди:

Та́же помина́ет немощна́го. Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй.

Предстоя́щии же: Го́споди поми́луй, три́жды.

Свяще́нник: Еще́ мо́лимся Го́споду Бо́гу на́шему, о е́же услы́шати глас моли́твы на́шея, и пощади́ти и поми́ловати раба́ Своего́ (или́ рабу́ Свою́), и показа́ти на нем (или́ на ней) вели́кую Свою́ ми́лость, и отврати́ти всяк гнев Свой, пра́ведно дви́жимый на́нь (или́ на ню), про́сти ти ему́ (или́ ей) все мно́жество согреше́ний, и изба́вити его́ (или́ ю̀) от вся́каго обстоя́ния и озлобле́ния, наси́лия же и мучи́тельства лука́ваго диа́вола, и прогнати от него́ (или́ от нея́) вселестное сатани́нское мечта́ние, привиде́ние же и страхова́ние, и всю его́ мучи́тельскую си́лу обдержа́щую его́ (или́ ю̀), здра́вие же душе́вное и теле́сное ско́ро пода́ти ему́ (или́ ей) бла́гостию Твое́ю, и поми́ловати его́ (или́ ю̀) и нас всех, рцем вси: Го́споди услы́ши и поми́луй.

Предстоящие же пою́т с умиле́нием:

Го́споди поми́луй, 40. Свяще́нник возглаша́ет: Услы́ши ны Бо́же Спаси́телю наш, упова́ние всех конце́й земли́:

И прочие предстоя́щии: Ами́нь.

Та́же: Моле́ние те́плое, и Стена́ необори́мая, ми́лости Исто́чниче, ми́рови Прибе́жище, приле́жно вопие́м Ти: Богоро́дице Влады́чице, предвари́ и от бед изба́ви раба́ Твоего́ (или́ рабу́ Твою́), еди́но вско́ре предста́тельствующая.

Пе́снь 4. Ирмо́с:

Прише́л еси́ от Де́вы, не хода́тай ни а́нгел, но сам Го́споди вопло́щся, и спасл еси́ всего́ мя челове́ка. Тем зову́ Ти: сла́ва си́ле Твое́й, Го́споди.

Бу́рею бед лю́те коле́блемаго Твоего́ раба́ (или́ Твою́ рабу́) Влады́ко, и пучи́ною скорбе́й ны́не обурева́емаго (или́ обурева́емую), к тиша́йшему приста́нищу наста́ви.

Оскорбляющй Твоего́ раба́ (или́ Твою́ рабу́), Христе́, умно́жишася, и язы́к изостриша я́коже обою́ду о́стрый ме́чь; ви́ждь у́бо Человеколю́бче, и от непра́ведныя сме́рти изба́ви Твоего́ раба́ (или́ Твою́ рабу́).

Сла́ва: Арха́нгели, вла́сти, си́лы, и а́нгели, апо́столи, му́ченицы, преподо́бнии, проро́цы и пра́веднии вси, моли́теся о ны́не всеоокаяннобедствующем (или́ всеоокаяннобедствующей).

И ны́не: Всепе́тая челове́ком гото́вая по́моще, ди́вия волне́ния искуше́ний укроти́, и под кров твой прибега́ющаго раба́ твоего́ (или́ рабу́ твою́) спаси́, Влады́чице.

Пе́снь 5. Ирмо́с:

Све́та пода́телю, и веко́в тво́рче Го́споди, во све́те Твои́х повеле́ний наста́ви; ра́зве бо Тебе́ ино́го Бо́га не зна́ем.

Езеки́ины иногда́ моли́твы испо́лнивый Го́споди, и мою́ испо́лни вско́ре еди́не Бла́же, и спаси́ раба́ Твоего́ (или́ рабу́ Твою́) от вся́каго озлобле́ния.

А́нгельскими рука́ми верхо́внаго ученика́ Го́споди, из темни́цы Боже́ственною си́лою иногда́ изведы́й, изба́ви Твоего́ раба́ (или́ Твою́ рабу́), лю́те бе́дствующа (или́ бе́дствующу).

Сла́ва: А́нгельская во́инства, апо́столов, проро́ков, собо́р же всесла́вных му́ченик, преподо́бных, о су́щем (или́ су́щей) в лю́тых, ку́пно моли́тву сотвори́те.

И ны́не: Ма́ти Христа́ Бо́га, ускори́ изба́вити ве́рнаго (или́ ве́рную) раба́ твоего́ (или́ рабу́ твою́) от лю́тыя ну́жды и беды́, ны́не наше́дшия, да тя сла́вит се́рдцем и усты́.

Пе́снь 6. Ирмо́с:

В бе́здне грехо́вней валя́яся, неизсле́дную милосе́рдия Твоего́ призыва́ю бе́здну: от тли Бо́же мя возведи́.

Ки́това чре́ва изба́вивый дре́вле проро́ка Твоего́, Влады́ко Го́споди, и Твоего́ раба́ (или́ Твою́ рабу́) изба́ви, да ве́рою и любо́вию сла́вит Тя.

Дании́ла я́коже изба́вил еси́ от льво́в Христе́, изба́ви от бесо́в лука́вых ны́не и мене́, Твоего́ раба́ (или́ Твою́ рабу́), Влады́ко, и от истле́ния и сме́рти возведи́.

Сла́ва: Бе́дствующа (или́ бе́дствующу) спаси́ раба́ Твоего́ (или́ рабу́ Твою́), Спа́се, святы́х а́нгел моли́твами, проро́ков, му́чеников же и прему́дрых ученико́в Твои́х моле́нми.

И ны́не: Не пре́зри лю́те обурева́емаго (или́ обурева́емую), и недоуме́нием одержи́маго (или́ одержи́мую), отрокови́це, твоего́ раба́ (или́ твою́ рабу́), но обы́чне изба́ви, прибега́ющаго (или́ прибега́ющую) под кров твой, Пречи́стая.

Та́же ирмо́с. Та́же помина́ет немощна́го.

Па́ки и па́ки ми́ром Го́споду помо́лимся. Лик: Го́споди поми́луй. Свяще́нник: О избавле́нии и свобожде́нии раба́ Его́ (или́ рабы́ни Его́), и́мярек, от наси́лия и обстоя́ния диа́вольскаго, и вселука́ваго его́ кова́рства. Лик: Го́споди поми́луй. Заступи́, спаси́, поми́луй и сохрани́ его́ (или́ ю̀), и нас Бо́же Твое́ю благода́тию.

Лик: Го́споди поми́луй. Иере́й: Пресвяту́ю, Пречи́стую, Преблагослове́нную: Лик: Тебе́ Го́споди. Иере́й: Я́ко ты еси́ Ца́рь ми́ра: Лик: Ами́нь.

Та́же глаго́лет Богоро́дичен:

К Богоро́дице приле́жно ны́не притеце́м гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́ на ны милосе́рдовавши, потщи́ся погиба́ем от мно́жества прегреше́ний, не отврати́ Твоя́ рабы́ тщы; Тя бо и еди́ну наде́жду и́мамы.

Пе́снь 7. Ирмо́с:

Те́лу злато́му прему́дрыя де́ти не послужи́ша, и в пла́мень са́ми поидо́ша, и бо́ги их обруга́ша, среди́ пла́мене возопи́ша, и ороси́ я̀ а́нгел: услы́шася уже́ уст ва́ших моли́тва.

Я́коже дре́вле трие́х о́трок от пещи́ о́гненныя изба́вил еси́, изба́ви ще́дре раба́ Твоего́ (или́ рабу́ Твою́), я́ко благ, мо́лим Тя, находя́щия ну́жды и жже́ния, Влады́ко, нестерпи́мых искуше́ний, я́ко да сла́вит Тя.

Еди́не ве́дый не́мощь, Христе́, челове́ческую, показа́вый в ско́рбех утеше́ния Человеколю́бче, изба́ви настоя́щия беды́ и раба́ Твоего́ (или́ рабу́ Твою́) пою́щаго (или́ пою́щую): благослове́н Бог Оте́ц на́ших.

Сла́ва: А́нгелов мно́жество, апо́столов, проро́ков, му́чеников боже́ственных, и пра́отец боже́ственное собра́ние, Блага́го моли́те ны́не, плач обрати́ти в ра́дость взыва́ющаго (или́ взыва́ющия); благослове́н еси́ Бо́же Оте́ц на́ших.

И ны́не: Еди́на наде́жда и по́мощи ве́рных Богороди́тельнице, потшися помози́ рабу́ Твоему́ (или́ ра́бе Твое́й), обурева́емому (или́ обурева́емей) скорбьми́ отвсю́ду, и недоумевающему (или́ недоумева́ющей), и в боле́зни су́щему (или́ су́щей), и к Тебе́ прибега́ющему (или́ прибегающей) в наде́жде душе́вной.

Пе́снь 8. Ирмо́с:

В пе́щь о́гненную ко отроко́м евре́йским снизше́дшаго, и пла́мень в ро́су прело́жшаго Бо́га, по́йте дела́ я́ко Го́спода, и превозноси́те во вся ве́ки.

Па́вла и Си́лы моли́твы я́коже прия́л еси́, и от уз тех изба́вил еси́: и нас милостеве недосто́йных ны́не вопию́щих гла́сы услы́ши, и изба́ви раба́ Твоего́ (или́ рабу́ Твою́) от тле́ния же и сме́рти.

Не отврати́ от Мене́ раба́ Твоего́ (или́ рабы́ Твоея́), Христе́, лице́ Твое́, я́ко скорблю́, ско́ро услы́ши мя Спа́се, и изба́ви настоя́щия бу́ри: на́ми вопие́т Тебе́ раб Твой (или́ раба́ Твоя́) Ще́дре.

Сла́ва: Моли́твами Бо́же, невеще́ственных служи́телей и апо́стол, и му́ченик лико́в, и свяще́нных проро́к, преподо́бных, и пра́ведных всех, изба́ви Твоего́ раба́ (или́ Твою́ рабу́) от лю́тыя беды́.

И ны́не: Пребежище христиа́н, помо́щнице в лю́тых обурева́емым, Всесвята́я Де́во, не пре́зри твоего́ раба́ (или́ твою́ рабу́), беда́ми потопля́емаго (или́ потопля́емую), и к держа́вному твоему́ прибегающего (или́ прибега́ющую) ны́не покро́ву.

Пе́снь 9. Ирмо́с:

От Бо́га Бо́га Сло́ва, неизрече́нною му́дростию преше́дшаго обнови́ти Ада́ма, я́дию в тле́ние па́дшаго лю́те; от святы́я Де́вы неизрече́нно воплоти́вшагося нас ра́ди, ве́рни единому́дренно пе́сньми велича́ем.

Ско́рбная Твоего́ раба́ (или́ Твоея́ рабы́) настоя́щия беды́, обурева́ние мно́гое и лю́тое претвори́, Влады́ко, и преврати́ сего́ (или́ сея́) плач в ра́дость всегда́шнюю: да ве́рою и любо́вию непреста́нно велича́ет Тя.

Твоего́ мно́гаго благоутро́бия да не победи́т Ще́дре, мно́жество безме́рных мои́х зол, но обы́чною Твое́ю ми́лостию, на́ми Тебе́ взыва́ет раб Твой (или́ раба́ Твоя́), спаси́ и изба́ви мя, Христе́, от вре́да вся́ческаго, еди́не Многоми́лостиве.

Сла́ва: Пощади́ мене́, Го́споди, пощади́, егда́ суди́ти ми и́маши, и не осуди́ мене́ во о́гнь, ни я́ростию Твое́ю обличи́ мене́, мо́лит Тя Де́ва Тебе́ ро́ждшая, Христе́, а́нгел мно́жество, и му́чеников собра́ние.

И ны́не, Богоро́дичен: Пресвята́я Де́во, со безпло́тными служи́тели, и святы́ми а́нгелы, апо́столы, проро́ки, му́ченики, и преподо́бными все́ми, еди́наго преблага́го Бо́га моли́те изба́вится от озлобле́ния рабу́ Твоему́ (или́ ра́бе Твое́й).

Та́же, Досто́йно е́сть:

И трисвятое. Та́же: Вся а́нгелов во́инства, Предте́че Госпо́день, апо́столов двоенадеся́тице, святи́и вси с Богоро́дицею, сотвори́те моли́тву, вое́же спасти́ся нам.

Влады́чице и Ма́ти Изба́вителя, приими́ моле́ние недосто́йных раб Твои́х, да хода́тайствуеши к ро́ждшемуся от Тебе́. О Влады́чице ми́ра, бу́ди хода́таица!

Та́же помина́ет немощна́го. Та́же е́млет от канди́ла, и помазу́ет немощна́го, и глаго́лет моли́тву:

Го́споду помо́лимся. Го́споди, поми́луй.

О́тче Святы́й, врачу́ душ и теле́с, посла́вый единоро́днаго Твоего́ Сы́на, Го́спода на́шего Иису́са Христа́, вся́кий неду́г исцеля́ющаго и от сме́рти избавля́ющаго, исцели́ и раба́ Твоего́ (или́ рабу́ Твою́), и́мярек, от обдержа́щия его́ (или́ ея́) теле́сныя и душе́вныя не́мощи, и оживотвори́ его́ (или́ ю̀) благода́тию Христа́ Твоего́; моли́твами Пресвяты́я Влады́чицы на́шея Богоро́дицы, и Присноде́вы Мари́и; предста́тельствы честны́х небе́сных сил безпло́тных; си́лою Честна́го и Животворя́щаго Креста́; честна́го сла́внаго Проро́ка, Предте́чи и Крести́теля Иоа́нна; святы́х сла́вных и всехва́льных апо́столов; святы́х сла́вных и добропобе́дных му́чеников; преподо́бных и богоно́сных оте́ц на́ших; святы́х и исцели́телей безсре́бреников Космы́ и Дамиа́на, Ки́ра и Иоа́нна, Пантелеи́мона и Ермола́я, Сампсо́на и Диоми́да, Фокия и Аники́ты; святы́х и пра́ведных богооте́ц Иоаки́ма и А́нны, и всех святы́х. Я́ко Ты еси́ исто́чник исцеле́ний Бо́же наш, и Тебе́ сла́ву возсыла́ем, со единоро́дным Твои́м Сыно́м, и единосу́щным Твои́м Ду́хом, ны́не и при́сно, и во ве́ки веко́в, ами́нь.

Моли́твы, си́есть заклинания Вели́каго Васи́лия, к стра́ждущим от де́монов, и на вся́кую не́мощь.

Го́споду помо́лимся. Го́споди поми́луй.

Бо́же бого́в и Госпо́дь господе́й, о́гненных чино́в соде́телю, и невеще́ственных сил хитродетелю, небе́сных и земны́х хитрче, Его́же никто́же от челове́к ви́де, ниже́ ви́дети мо́жет; Его́же бои́тся и трепе́щет вся тва́рь, И́же вы́ю возвы́сивша иногда́ архистрати́га, и свое́ служе́ние преслуша́нием отве́ргша, низвергий на зе́млю, и отсту́пники с ним а́нгелы, де́моны бы́вшыя, в помраче́ния глубины́ та́ртара преда́вый; да́ждь заклинанию сему́ о стра́шнем и́мени Твое́м совершаемому, стра́ху бы́ти сему́ предводи́телю лука́вствия, и всем полко́м его́ с ним снизпадшым от го́рняго светоношения. И обрати́ его́ в бе́гство, и запрети́ ему́, и де́моном его́ отступи́ти коне́чно, да ничто́же вре́дно зопротивознаменному о́бразу соде́лает; но да прии́мут кре́пость держа́вы си́и запечатле́ннии, во е́же ступа́ти на зми́я и скорпия, и на всю си́лу вра́жию.

Твое́ бо пое́тся и велича́ется от вся́каго дыха́ния со стра́хом сла́вится всесвято́е и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Втора́я моли́тва того́жде.

Го́споду помо́лимся. Го́споди поми́луй.

Заклина́ю тя злонача́льника ху́льнаго, нача́льника сопроти́внаго восстания, и самоде́теля лука́вства, заклина́ю тя низве́рженнаго от го́рняго светоношения, и во тьму́ глубины́ низведеннаго возноше́ния ра́ди. Заклина́ю тя, и всю ниспадшую си́лу последовательную твоего́ произволе́ния; заклина́ю тя, душе́ нечи́стый. Бо́гом Саваофом и всем во́инством а́нгел Бо́жиих, Адонаи́ Элои, Бо́га Вседержи́теля, изы́ди и разлучи́ся от раба́ Бо́жия (или́ рабы́ Бо́жия), и́мярек, заклина́ю тя Бо́гом, Сло́вом вся создавшим, и Го́сподом На́шим Иису́сом Христо́м, единоро́дным Сыно́м Его́, пре́жде век неизрече́нно, и безстра́стно от Него́ рожде́нным, ви́димую же и неви́димую тва́рь соделавшим, по о́бразу Своему́ челове́ка создавшим, зако́ном пе́рвее есте́ственне сея́ детоводившим, и а́нгельским приставлением сохраншим; водо́ю согреше́ние свы́ше потопившим, и поднебе́сныя бе́здны разустившим, и гиганты нечествовавшия растлевшим, и столп скве́рных разстрясшим, и зе́млю Содомом и Гоморров огне́м жупельным испепелившим, его́же свиде́тель дым неугаси́мый курится; жезло́м мо́ре раздельшим, и лю́ди нога́ми немо́крыми проведшим, и мучи́теля фарао́на, и во́инство богоборное, во ве́ки волна́ми нече́стия бра́нь потопившим; в после́дняя от Де́вы чи́стыя воплоти́вшимся неизрече́нно, и це́лы печа́ти чистоты́ сохраншим, омы́ти креще́нием дре́внюю на́шу скве́рну благоизволившим, е́юже мы преступле́нием оскверни́хомся. Заклина́ю тя Крестившимся во Иорда́не, и о́браз нам нетле́ния в воде́ по благода́ти подавшим: его́ же а́нгелы и вся си́лы небе́сныя удиви́шася, воплоще́нна Бо́га смири́вшагося зря́ще, егда́ безнача́льный Оте́ц, безнача́льное рождество́ сыно́внее откры́, и Свята́го Ду́ха схожде́ние, тро́ическое еди́нство свиде́тельствова. Заклина́ю тя о́ным, ве́тру запрети́вшим, и бу́рю морску́ю укротившим, полк де́монский отгнавшим, и зе́ницы о́чныя от утро́бы лишенные, бре́нием слепы́я прозре́ти соде́лавшым и дре́внее ро́да на́шего созда́ние обновившим, и немы́я (е́же) глаго́лати исправившим; стру́пы проказ очистившим, и ме́ртвыя от гробо́в воскреси́вшим, да́же до погребе́ния челове́ком беседовавшим, и ад восстанием пленившим; и все челове́чество необъято сме́ртию устроившим. Заклина́ю тя Бо́гом Вседержи́телем, богодухнове́нным гла́сом челове́ки вдохнувшим, и апо́столом содействовавшим, и всю вселе́нную благоче́стия испо́лнившим; убо́йся, бежи́, бежи́, разлучи́ся демоне нечи́стый и скве́рный, преиспо́дний, глубинный, льсти́вый, безобразный, ви́димый безсту́дия ра́ди, неви́димый лицеме́рия ра́ди, иде́же а́ще еси́, или́ оти́деши, или́ сам еси́ веелзевул, или́ сотряса́яй, или́ змиевидный, или́ звероличный, или́ я́ко па́ра, или́ я́ко пти́ца, или́ ношеглагольник, или́ глухи́й, или́ немы́й, или́ от наше́ствия устраша́яй, или́ растерза́яй, или́ наветуяй, или́ во сне тя́жце, или́ в неду́зе, или́ в я́зве, или́ в смесе скоктаяй, или́ сле́зы любосластныя творя́яй, или́ блу́дный, или́ злосмрадный, или́ похотный, или́ сластотворный, или́ отраволюбивый, или́ любонеистовый, или́ звездоволхвуяй, или́ домоволшебник, или́ безсту́дный, или́ любопрительный, или́ непостоя́нный, или́ с месяцем пременяяйся, или́ вре́менем не́ким сообращаяйся, или́ у́тренний, или́ полуденный, или́ полу́нощный, или́ безгодия не́коего, или́ блиста́ния, или́ по слу́чаю сретился еси́, или́ от кого́ по́слан еси́, или́ наше́л еси́ внеза́пу, или́ в мо́ри, или́ в реце́, или́ от земли́, или́ из кла́дязя, или́ от стремни́ны, или́ от ро́ва, или́ от езе́ра, или́ от тро́сти, или́ от вещества́, или́ от верху́ земли́, или́ от скве́рны, или́ от лу́га, или́ от леса́, или́ от дре́ва, или́ от птиц, или́ от гро́ма, или́ от покро́ва баннаго, или́ от купе́ли водны́я, или́ от гро́ба и́дольскаго, или́ отню́дуже ве́мы, или́ не ве́мы, или́ от зна́емых, или́ от незнаемых, и от непосещаемаго ме́ста, отлучи́ся и преминися, устыди́ся о́браза руко́ю Бо́жиею созда́ннаго, и воображеннаго; убо́йся воплоще́ннаго Бо́га подо́бия, и не сокрыйся в ра́бе Бо́жием (или́ ра́бе Бо́жией), и́мярек, во жезл желе́зный, и пе́щь о́гненныя, и та́ртар, и скре́жет зу́бный, отмще́ние преслуша́ния тебе́ ожида́ет. Убо́йся, умо́лкни, бежи́, не возврати́ся, ни сокрыйся со ине́м лука́вством нечи́стых духо́в; но отиди́ в зе́млю безво́дную, пустую, неде́ланную, на не́йже челове́к не обита́ет; Бог еди́н презира́ет связаяй всех уязвля́ющих, и злосоветующих на о́браз Его́, и вери́гами мра́ка, тартару преда́вый, в до́лгую но́щь и де́нь, тебе́, всех злых искуси́теля и изобретателя диа́вола. Я́ко ве́лий е́сть страх Бо́жий, и ве́лия сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Моли́тва Иоа́нна Златоу́стаго:

Бо́же ве́чный, изба́вивый род челове́ческий от плене́ния диа́вольскаго, изба́ви раба́ Твоего́ (или́ рабу́ Твою́), и́мярек, от вся́каго де́йства духо́в нечи́стых, повели́ лука́вым и нечи́стым ду́хом же и де́моном отступи́ти от ду́шы и от те́ла раба́ Твоего́ (или́ рабы́ Твоея́), и́мярек, и не пребыва́ти, ниже́ сокры́тися в нем, да бежа́т и́менем Твои́м святы́м, и единоро́днаго твоего́ Сы́на, и животворя́щаго твоего́ Ду́ха, от созда́ния рук Твои́х; да очище́н быв от вся́каго искуше́ния диа́вольскаго, преподо́бно, и пра́ведно, и благоче́стно поживает, сподобляем пречи́стых тайн единоро́днаго Сы́на Твоего́ и Бо́га на́шего; с Ни́мже благослове́н еси́, и препросла́вен, с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Моли́тва ина́я того́жде:

Всем нечи́стым духово́м запрети́вый, и си́лою глаго́ла изгна́вый легео́на, яви́ся и ны́не единоро́дным Твои́м Сыно́м на созда́ние, е́же по о́бразу Твоему́ сотвори́л еси́; и изми́ ѐ, насильствованное от сопроти́внаго, да помилованое и очищеное сочинится свято́му Твоему́ ста́ду и сохрани́тся храм одушевле́н Свята́го Ду́ха и Боже́ственных и пречи́стых святыней, благода́тию и щедро́тами и человеколю́бием единоро́днаго Твоего́ Сы́на; с Ни́мже благослове́н еси́, и со Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Моли́тва ина́я того́жде:

Призыва́ем тя, Влады́ко Бо́же Вседержи́телю, вы́шний, неискусимый, ми́рный Царю́; призыва́ем Тя, сотво́ршаго Не́бо и зе́млю, от Тебе́ бо произы́де а́лфа и оме́га, нача́ло и коне́ц, да́вый челове́ком в послуша́ние четвероножная и безслове́сная живо́тная, я́ко Ты покори́л еси́ та, Го́споди; простри́ ру́ку Твою́ кре́пкую, и мы́шцу Твою́ высо́кую и святу́ю, и присеще́нием посети́ созда́ние Твое́ сие́, и низпосли́ ему́ а́нгела ми́рна, а́нгела кре́пка, души́ и те́ла храни́теля, и́же запрети́т и отжене́т от него́ вся́каго лука́ваго и нечи́стаго де́мона. Я́ко Ты Госпо́дь еди́н вы́шний Вседержи́тель, благослове́нный во ве́ки веко́в, ами́нь.

Моли́тва ина́я того́жде:

Боже́ственное же, и свято́е, и вели́кое, и стра́шное и нестерпи́мое именова́ние и призыва́ние твори́м на твое́ прогна́ние отступниче, та́кожде и запреще́ние на твое́ погубле́ние диа́воле. Бог Святы́й, безнача́льный, стра́шный, неви́димый существо́м, неприкладный си́лою, и непостижи́мый божество́м, Ца́рь Сла́вы, и Вседержи́тель Влады́ка, запреща́ет тебе́ диа́воле, от не су́щих, во е́же бы́ти вся благоле́пно сло́вом соста́вивый, ходя́й на крылу ветрени. Запреща́ет тебе́ Госпо́дь, диа́воле, призыва́яй во́ду морску́ю, и излива́яй сию́ на лице́ всея́ земли́, Госпо́дь Сил и́мя Ему́. Запреща́ет тебе́ Госпо́дь, диа́воле, от безчи́сленных небе́сных чино́в о́гненных, стра́хом служи́мый и воспева́емый, и от мно́жества лико́в а́нгельских и арха́нгельских, с тре́петом покланя́емый и сла́вимый. Запреща́ет тебе́ Госпо́дь, диа́воле, окружа́емый от о́крест предстоя́щих сил, и стра́шных шестокрыльных и многоочитых херуви́мов и серафи́мов, лица́ своя́ двема́ крило́ма покрывающих, незри́маго ра́ди Его́ и неизследимаго Божество́, и двема́ крило́ма своя́ но́ги покрывающих, во е́же не опали́тися от неизрече́нныя сла́вы, и недомы́слимаго вели́чества Его́, и двема́ крило́ма лета́ющих, и Не́бо исполняющих от во́пля своего́: свят, свят, свят Госпо́дь Савао́ф, испо́лнь Не́бо и земля́ сла́вы Его́.Запреща́ет тебе́ Госпо́дь, диа́воле, от не́дра О́тча соше́дый с небе́с Бог Сло́во, и от Де́вы Святы́я поклонным неизрече́нным, и пречи́стым воплоще́нием неизглаго́ланно яви́выйся в ми́ре, е́же спасти́ его́, и Влады́чнею Свое́ю си́лою све́ргий тебе́ с небе́с, и отме́тна вся́чески показа́вый. Запреща́ет тебе́ Госпо́дь, диа́воле, реки́й мо́рю, умо́лкни, преста́ни; и повеле́нием а́бие преста́. Запреща́ет тебе́ Госпо́дь, диа́воле, пречи́стым плюнове́нием бре́ние совторивый, и лише́нный уд от рожде́ния слепо́му созда́вый, и свет дарова́вый. Запреща́ет тебе́ Госпо́дь, диа́воле, дще́рь архисинагогову сло́вом оживотвори́вый, и вдови́ча сы́на из уст сме́рти восхити́вый, и свое́й его́ ма́тери це́ла и здра́ва дарова́вый. Запреща́ет тебе́ Госпо́дь, диа́воле, Ла́заря из ме́ртвых четверодне́вна нерастле́нна я́ко не уме́рша и безвре́дна, во удивле́ние мно́гим предста́вивый. Запреща́ет тебе́ Госпо́дь, диа́воле, зауше́нием кля́тву испразднивый, и копие́м пречи́стых ребр Свои́х, ра́йское храня́щее пла́менное ору́жие отставивый. Запреща́ет тебе́ Госпо́дь, диа́воле, заплеванием Честного Своего́ начерта́ния вся́кую сле́зу от вся́каго лица́ оте́рый. Запреща́ет тебе́ Госпо́дь, диа́воле, водрузи́вый Крест во утвержде́ние еди́но и спасе́ние ми́ра, в паде́ние же твое́, и всех под тобо́ю а́нгелов. Запреща́ет тебе́ Госпо́дь, диа́воле, да́вый глас на кресте́ Свое́м, и заве́са хра́ма раздра́ся, и ка́мение разседо́шася, и гро́бы отверзо́шася, и от ве́ка уме́ршия воста́ша. Запреща́ет тебе́ Госпо́дь, диа́воле, сме́ртию сме́рть умертви́вый, и живо́т возста́нием Свои́м челове́ком дарова́вый. Запреща́ет тебе́ Госпо́дь, диа́воле, соше́дый во ад, и гро́бы его́ истрясый, и всех в нем содержи́мых свя́занных свободи́вый, и к Себе́ воззва́вый; Его́же вра́тницы ви́девше ужасо́шася, и подви́жницы а́довы крыющеся исчезо́ша. Запреща́ет тебе́ Госпо́дь, диа́воле, из ме́ртвых воскресы́й, Христе́ Бо́же наш, и всем воскресе́ние Свое́ дарова́вый. Запреща́ет тебе́ Госпо́дь, диа́воле, на Не́бо со сла́вою вознесы́йся ко Отцу́ Своему́, и одесну́ю Вели́чествия на престо́ле сла́вы седя́й. Запреща́ет тебе́ Госпо́дь, диа́воле, па́ки гряды́й со сла́вою на о́блацех небе́сных, со святы́ми а́нгелы Свои́ми суди́ти живы́м и ме́ртвым. Запреща́ет тебе́ Госпо́дь, диа́воле, о́гнь неугаси́мый, и че́рвь неусыпа́емый, и тьму́ кроме́шную угото́вавый тебе́ в ве́чную му́ку. Запреща́ет тебе́ Госпо́дь, диа́воле, Его́ же вся боя́тся и трепе́щут от Лица́ си́лы Его́, я́ко нестерпи́м е́сть гнев, е́же на тебе́ преще́ния Его́. Той запреща́ет тебе́ Госпо́дь, диа́воле, стра́шным свои́м и́менем: устраши́ся, вострепещи́, убо́йся, разлучи́ся, потреби́ся, бежи́, пады́й с Небесе́, и с тобо́ю вси лука́вии ду́си, вся́кий дух лука́вый, дух нечистоты́, дух лука́вства, дух нощны́й и дневны́й, полуденный же и вече́рний, дух полу́нощный, дух мечтанный, дух сретательный, или́ земны́й, или́ водны́й, или́ в дубравах, или́ в тро́сти, или́ в стремни́нах, или́ во двопутиях, и трепутиях, во езерах, или́ река́х, в доме́х, во дво́рех, и в ба́нях преходя́й и вреждаяй, и изменя́яй ум челове́ческий; вско́ре разлучитеся от созда́ния Созда́теля Христа́ Бо́га на́шего, и отлучи́теся от раба́ Бо́жия (или́ рабы́ Бо́жией), и́мярек, от ума́, от души́, от се́рдца, от утро́б, от чувств, и от всех удо́в его́ (или́ ея́), во е́же бы́ти ему́ (или́ ей) здра́ву (или́ здравей) и всеце́лу (или́ всецелей), и свобо́дну (или́ свободней), зна́ющу (или́ знающей) своего́ Влады́ку и Зижди́теля всех Бо́га, собира́юща заблуждающия, и даю́ща им печа́ть спасе́ния, рожде́нием и обновле́нием Боже́ственнаго Креще́ния, во е́же сподо́битися ему́ (или́ ей) Пречи́стых, и Небе́сных, и Стра́шных Его́ Та́инств, и соедини́тися ста́ду Его́ и́стинному, на ме́сте зла́чне вселя́ющуся (или́ вселяющейся), и на воде́ упокое́ния пита́ему (или́ питаемей), и па́лицею креста́ спаси́тельно и изве́стно наставляему (или́ наставляемей), во оставле́ние грехо́в и в жи́знь ве́чную.

Я́ко Тому́ подоба́ет вся́кая сла́ва, че́сть, и поклоне́ние, и великоле́пие, со Безнача́льным Его́ Отце́м, и с Пресвяты́м, и благи́м, и животворя́щим Его́ Ду́хом, ны́не и при́сно, и во ве́ки веко́в, ами́нь.

Твори́т свяще́нник нача́ло: Благослове́н Бог наш: Трисвято́е. Пресвята́я Тро́ице: О́тче наш: Я́ко Твое́ е́сть Ца́рство: Го́споди поми́луй, 12. Прииди́те поклони́мся: три́жды. И настоя́щыя псалмы́: Бо́же, в по́мощь мою́ вонми́: Го́споди, услы́ши моли́тву мою́, внуши́ моле́ние мое́: 50 псало́м. И кано́н глас 6.

Пе́снь 1. Ирмо́с: Я́ко по су́ху пешеше́ствовав:

Прииди́те, собери́теся вси, и́же благоче́стно в житии́ пожи́вшии, и воспла́чите о души́ отчужде́нней сла́вы Бо́жия, и рабо́тавшей сту́дным де́моном вся́ким тща́нием.

Ны́не у́бо вре́мя все моего́ живота́, я́ко дым претече́, и предста́ша про́чее а́нгели по́сланнии от Бо́га, окая́нную мою́ ду́шу и́щуще неми́лостивно.

Сла́ва: Се предста́ша мно́жество лука́вых духо́в, держа́ще мои́х грехо́в написа́ние, и зову́т зело́, и́щуще безсту́дно смире́нныя моея́ души́.

И ны́не: Про́чее к кому́ возопию́? Кто мой пла́чь от боле́зни прии́мет, и се́рдца воздыха́ние? То́кмо ты Пренепоро́чная чи́стая, наде́жда Христиа́н и всех гре́шных.

Пе́снь 3. Ирмо́с: Не́сть свят, я́коже Ты Го́споди:

До́брии мои́ дру́зи и зна́емии, почто́ не пла́чете? Почто́ не рыда́ете, и́же иногда́ люби́маго дру́га и бра́та, ны́не же стра́нна, Бо́га и всех вас?

Возлю́бленная моя́ бра́тия, зря́ще моя́ дея́ния облича́ема ме́рилом пра́ведным, Христа́ всех Бо́га моли́те, ми́лостива бы́ти мне.

Сла́ва: Помяну́вше моея́ возлю́бленнии, е́же к вам дру́жбы, Христа́ моли́те призре́ти на мя злополу́чна, живота́ лиши́вшагося, и му́чима.

И ны́не: Приклони́ у́хо твое́ ко мне, Бо́га моего́ ма́ти, от высоты́ сла́вы мно́гия твоея́ блага́я, услы́ши стена́ние после́днее, и ру́ку пода́ждь ми.

Пе́снь 4. Ирмо́с: Христо́с моя́ си́ла, Бог и Госпо́дь:

Увы́ мне блу́дному (или́ блу́дной), увы́ мне окая́ному (или́ окаяной) я́ко ру́це простира́ю к мои́м друго́м, и сле́зы от о́чию пролива́ю, но никто́же ми́луяй мя.

По́двиг наста́ мне души́ всегуби́телен, и очи́ма взира́яй к Бо́жиим све́тлым а́нгелом, вопию́: ма́ло оста́вите мя пожи́ти, но никто́же послу́шаяй мене́.

Сла́ва: О мне пла́чите, о мне рыда́йте а́нгельстии собо́ри, и челове́цы вси Христолю́бцы: неми́лостивно бо душа́ моя́ от те́ла разлуча́ется.

И ны́не: Влады́чице, Влады́чице, ны́не поми́луй ду́шу недоумева́ющую, и к твоему́ покро́ву еди́ному зря́щую, и не пре́зри блага́я, де́моном отда́ну бы́ти ми.

Пе́снь 5. Ирмо́с: Бо́жиим све́том Твои́м Бла́же:

Свет у́мный возсия́й на мя, да ви́жу тя Христе́, поне́ вма́ле: ктому́ бо не узрю́ Тебе́, о́блак бо де́монов внеза́пу нападе́ на мя, и тьма́ сту́дных мои́х дел покрыва́ет мя.

Спаси́теся вси возлю́бленнии, благоутро́бнии о мне я́вльшеся злоча́стнем и всеокая́ннем: вси бо а́ще еди́нем гла́сом провеща́ли бы́сте к моему́ Влады́це, тьмы́ изба́вили мя бы́сте.

Сла́ва: Спаса́йся вели́кий кня́же Бо́жий Михаи́ле, а́нгелов нача́льниче: ктому́ бо твое́ свято́е и́мя не призову́, е́же по́мощи мне. Молчи́та бо мои́ устне́, и язы́к связа́ся.

И ны́не: Спаса́йся и ты, нескве́рная чи́стая ма́ти Христа́ моего́ и Бо́га: ктому́ бо о́браза твоего́, от мои́х согреше́ний не узрю́ окая́нный (или́ окая́нная), угасе́ бо свет мой, и но́щь покры́ мя.

Пе́снь 6. Ирмо́с: Жите́йское мо́ре:

Приклони́те у́хо ва́ше бра́тия моя́ ко мне, и кро́тко услы́шите умиле́нных глаго́л ма́лое веща́ние, и не преслу́шайте, и мзду от Го́спода вси восприи́мете.

Се ны́не разлуча́ется с боле́знию душа́ от окая́ннаго моего́ телесе́. Не у́бо те́ло мое́ погребе́те в земли́, не́сть бо досто́йно; но извле́кше вон, псом пове́рзите.

Сла́ва: Ка́я бо мне по́льза, души́ мое́й в стра́шныя му́ки вве́ржене бы́ти, те́лу же пе́ту бы́ти от вас? Оста́вите непогребено, я́ко да снедя́т пси се́рдце мое́.

И ны́не: Не́гли мимоходя́щии, стра́ннии, ви́дяще ко́сти от псов влеко́мыя, умили́вшеся воззову́т от души́: помози́ Влады́чице, души́ окая́ннаго сего́ те́ла.

Пе́снь 7. Ирмо́с: Росода́тельну у́бо пе́щь:

Се привле́кше отторго́ша от телесе́ лю́те внеза́пу окая́нную ду́шу, и отво́дят к Судии́ гро́зному и стра́шному; помяну́вше у́бо возлю́бленнии, е́же к вам моея́ бесе́ды, па́мять твори́те мне.

Поми́луйте мя а́нгели всесвяти́и Бо́га Вседержи́теля, и изба́вите мыта́рств всех лука́вых: не и́мам бо дела́ бла́га, возме́рити ме́рилу злых мои́х дея́ний.

Сла́ва: Егда́ взы́дете всесвяти́и мои́ а́нгели предста́ти суди́щу Христо́ву, коле́на прекло́ньше плаче́вно возопи́йте ему́: поми́луй всех Тво́рче, де́ло ру́ку Твое́ю Бла́же и не отри́ни от Тебе́.

И ны́не: Поклоншеся Влады́чице и Пречи́стей ма́тери Бо́га моего́, помоли́теся, я́ко да преклони́тся с ва́ми, и прекло́нит Его́ на ми́лость: ма́ти су́щи и пита́тельница, услы́шана бу́дет.

Пе́снь 8. Ирмо́с: Из пла́мене преподо́бным ро́су источи́л еси́:

Ны́не совоздохни́те вси земни́и концы́ о мне окая́ннем, и спла́чите: прии́де бо лю́тое свы́ше изрече́ние, рука́ма мои́ма связа́тися, и нога́ма изри́нутися.

Недоуме́в о всех, к тебе́ храни́телю окая́ннаго живота́ моего́, стеня́ зову́ го́рько: ви́ждь мои́х уз ве́чных озлобле́ние, и не оскуде́й о мне моля́ся.

Сла́ва: Поне́же бых де́моном изда́н, и во а́дово дно ну́ждею низво́дят, вем, я́ко ны́не вси мене́ забы́ша: ты же помяни́ мене́, о а́нгеле Госпо́день.

И ны́не: Христа́ моего́ ма́ти, ка́ко забы́ла еси́ мене́? Ка́ко не преклони́ла еси́ на милосе́рдие источи́вшаго кро́вь от ре́бра, да спасе́т, я́же созда́? Увы́ мне, ка́ко заключи́ся милосе́рдие Христа́ моего́!

Пе́снь 9. Ирмо́с: Бо́га челове́ком:

Бо́га не ктому́ аз помяну́, не ктому́ бо во а́де помина́ти Го́спода: но во тьме́ лю́те покрыва́емь (или́ покрыва́ема) сежу́, ожида́я воскресе́ния всех челове́к, да суди́вся во о́гнь вве́ргуся.

Бог не ктому́ мене́ помяне́т, ниже́ мно́жество а́нгелов, арха́нгелов собо́р, проро́ков, апо́столов собра́ние, мно́жества же му́чеников, всех же пра́ведных, еди́н (или́ еди́на) у́бо почерплю́ зла́я, я́же собра́х.

Сла́ва: Пла́чите о мне ны́не и рыда́йте, а́дово дно и бе́здна, и че́рвь и та́ртар, му́ки у́бо вся о мне возстони́те: еди́н (или́ еди́на) бо от Христиа́н ведо́хся, вам пре́дан (или́ предана́) бых е́же му́читися го́рько.

И ны́не: Бо́жия ма́ти, ви́ждь в бе́здну, ви́ждь ду́шу му́кам пре́данную му́читися, и коле́на прекло́нши прослези́, да преклони́тся Твои́ми мольба́ми, И́же кро́вь свою́ да́вый за мене́, воззва́ти мя.

Моли́тва о души́ суди́мей:

Го́споду помо́лимся. Го́споди поми́луй.

Влады́ко Го́споди Бо́же наш Вседержи́телю, И́же всем челове́ком хотя́й спасти́ся, и в позна́ние и́стины приити́; не хотя́й сме́рти гре́шника, но обрати́тися и жи́ву бы́ти ему́, мо́лимся Тебе́ и милися де́ем, ду́шу раба́ Твоего́ (или́ рабы́ Твоея́), и́мярек, от вся́каго у́за разреши́, от вся́кия кля́твы свободи́. Я́ко Ты еси́ разреша́яй свя́занныя и исправля́яй низве́рженныя, наде́жде ненаде́емых. Повели́ у́бо Влады́ко, разреши́тися в ми́ре души́ раба́ Твоего́ (или́ рабы́ Твоея́) и поко́итися в ве́чных Твои́х селе́ниих со все́ми святы́ми Твои́ми, единоро́дным Твои́м Сыно́м, с ни́мже благослове́н еси́, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Моли́тва ина́я о долгостра́ждущем умре́ти:

Го́споди Бо́же наш, И́же неизрече́нною Твое́ю му́дростию созда́вый челове́ка, и от пе́рсти сего́ возъобрази́вый, в вид и добро́ту украси́вый, я́ко честно́е и небе́сное стяжа́ние, в славосло́вие и благоле́пие Твоея́ сла́вы и Ца́рства, за е́же по о́бразу и по подо́бию сего́ привести́, но поне́же за́поведь преступи́ Твоего́ повеле́ния, прие́м о́браз и не сохрани́в, и сего́ ра́ди да не зло безсме́ртное бу́дет, человеколю́бно повеле́вый разреше́нию сему́, и неруши́мей сей у́зе, я́ко Бог отце́в, Твои́м Боже́ственным хоте́нием отсещи́ся, и разы́тися, и те́лу у́бо от ни́хже сложи́ся разы́тися, души́ же та́мо пресели́тися, иде́же и е́же бы́ти прия́ла е́сть, да́же до о́бщаго воскре́сния; сего́ ра́ди мо́лимся Тебе́ безнача́льному и безсме́ртному Отцу́, и единоро́дному Твоему́ Сы́ну, и Пресвято́му Твоему́ Ду́ху, да от те́ла разреше́ние, и́мярек, во упокое́ние сотвори́ши. И а́ще что в ве́дении, или́ не в ве́дении прирази́ся твое́й бла́гости: или́ под кля́твою свяще́нническою бы́сть, или́ своя́ роди́тели преогорчи́, или́ кля́тву преступи́, или́ в мечта́ния де́монския и волхвова́ния сту́дная впаде́, за́вистию лука́ваго де́мона, проще́ния от твоея́ неизрече́нныя бла́гости моля́: ей Влады́ко Го́споди Бо́же, услы́ши мене́ гре́шнаго и недосто́йнаго раба́ Твоего́ в час сей, и разреши́ раба́ Твоего́ (или́ рабу́ Твою́), и́мярек, нестерпи́мыя сея́ боле́зни и содержа́щия его́ (или́ ю̀) го́рькия не́мощи, и упоко́й его́ (или́ ю̀) иде́же пра́ведных ду́си.Я́ко Ты еси́ упокое́ние душ и теле́с на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Влады́ко Го́споди Бо́же наш, вла́сть име́яй вся́кия тва́ри, Тебе́ мо́лимся, и Тебе́ про́сим, я́коже благослови́л и умно́жил еси́ ста́да патриа́рха Иа́кова, благослови́ и ста́до ското́в сих раба́ Твоего́ (или́ рабы́ Твоея́), и́мярек, и умно́жи, и укрепи́, и сотвори́ ѐ в ты́сящы, и изба́ви ѐ от наси́лия диа́воля, и от иноплеме́нник, и от вся́каго наве́та враго́в, и возду́ха сме́ртнаго, и губи́тельнаго неду́га; огради́ ѐ святы́ми а́нгелы Твои́ми, вся́кую не́мощь, вся́кую за́висть, и искуше́ние, чаровства́ же и волше́бства, от де́йства находя́щыя диа́вольскаго, отгоня́я от него́. Я́ко Твое́ е́сть Ца́рство, и си́ла, и сла́ва, отца́ и Сы́на, и Свята́го Ду́ха, ны́не и при́сно, и во ве́ки веко́в, ами́нь.

По заамво́нной моли́тве исхо́дит у́бо свяще́нник, я́коже е́сть облече́н, с лампа́дами и кади́льницею вне вели́ких врат хра́ма, лахани умове́ния предъуготовлене от екклисиа́рха; учиненным же бра́тиям двунадесятым, иму́щым умовенным бы́ти от предстоя́теля, в ни́хже ну́жда е́сть бы́ти врата́рю и иконо́му.

Подходим же и мы вси со свяще́нником, пою́ще псало́м 50. И по исполне́нии сего́ глаго́лем от кано́на Вели́каго Четвертка́.

Пе́снь 5 Ирмо́с:

Сою́зом любве́ связу́еми апо́столи влады́чествущему все́ми себе́ Христу́ возло́жше, красны́ но́ги очища́ху, благовеству́юще всем мир.

Неодержи́мую держа́щая, и превы́спреннюю на возду́се во́ду, бе́здны обуздова́ющая и мо́ря востязу́ющая Бо́жия прему́дрость, во́ду во умыва́льницу влива́ет, но́ги же омыва́ет рабо́в Влады́ка.

Ученико́м показу́ет смире́ния о́браз Влады́ка, о́блаки облага́яй Не́бо, препоясу́ется ле́нтием, и преклоня́ет коле́но, рабо́в омы́ти но́ги, в Его́же ру́це дыха́ние всех су́щих.

Та́же пою́тся стихи́ры самогла́сны умове́ния.

Глас 1:Ле́нтием препояса́выйся, и омы́вый но́ги ученико́в Христе́ Бо́же, омы́й души́ на́шея по́мысл, и опоя́ши нас сою́зом духо́вным, е́же твори́ти за́поведи Твоея́ бла́гости.

Глас 2: Вели́кое благоде́тельство прия́ти хотя́ще, ве́рнии, благогове́йно честно́му умове́нию притеце́м, не плотску́ю скве́рну омывающе, но ду́шы же та́йно освяща́юще; Христо́с бо Спас наш, призира́яй на зе́млю, и творя́й ю̀ трясти́ся, приклоня́ет Сама́го Себе́ и следа́м каса́ется бре́нным, на вся́кую сопроти́вную си́лу тве́рдое да́руя нахожде́ние. Тому́ благода́рно возопие́м: изря́дный возвыше́ния пу́ть показа́вый нам смире́ние, спаси́ нас, Бла́же, я́ко Человеколю́бец.

Глас 3: Петр благоговеяше омы́тися нога́м от Пречи́стых рук, и́миже со́здан бы́сть Ада́м. Услы́ша же: А́ще не умы́ю тебе́, не и́маши ча́сти со Мно́ю; тре́петом мно́гим содержи́мь, вопия́ше Тебе́ Го́споди: не то́кмо но́зе мои́ умы́еши, но и ру́це и главу́. От вели́ких Влады́чних даро́в! О́бщники твори́т благода́ти Своея́ ученики́, и ча́сть име́ти с ни́ми обещава́ет в неизрече́нней сла́ве; я́коже и в Та́йной Ча́ши рече́, но́вую сию́ пи́ти с ни́ми в Ца́рствии Небе́снем, ея́же и нас сподо́би, я́ко ми́лостив и Человеколю́бец.

Глас 8: Дне́сь Непристу́пный существо́м де́ло раба́ восприя́т, ле́нтием препоя́сася, одева́яй Не́бо о́блаки, во́ду влива́ет во умыва́льницу, мо́ре Чермно́е пресеки́й, и прикло́нь коле́на, нача́т омыва́ти но́ги ученико́в, и отира́ти ле́нтием, и́мже бе препоя́сан. Егда́ у́бо умы́ но́ги ученико́в, рече́ им: вы чи́сти есте́, но не вси, зна́менуя предаю́щаго Его́.

У́не тебе́ бя́ше, Иу́до, еще́ не бы зачелся еси́ во утро́бе ма́терни; у́не тебе́ бя́ше, предетелю, а́ще не бы роди́лся еси́, отчужденне Сы́на Бо́жия! Тебе́ ра́ди растерза́ся собра́ние учени́к Христо́вых, и и́стинный виногра́д объе́млет разбо́йник распина́емь; тобо́ю пресечеся градеж, и храм нерукотворе́нный разоря́ют беззако́нницы. Да еще́ ми́ро гре́шныя почита́л еси́, я́ко многоце́нное, ка́ко Пра́веднаго кро́вь рука́ма беззако́нных преда́ти не ужасну́лся еси́? У́не ти бя́ше, преда́телю, еще́ не бы роди́лся еси́, отчужде́ние Сы́на Бо́жия.

Сла́ва, И ны́не: Дрема́нием двавольским содержи́мь Иу́да, усну́ в сме́рть. Вре́мя бо́дрствовати, вре́мя трезви́тися; да сте́нет се́рдце, да слезя́т ве́жди, псало́м да пое́тся: Ве́лия бо кре́пость Креста́. Христо́с при две́рех, жремая Па́сха прии́де; Сла́ва Тебе́, Го́споди, сла́ва Тебе́.

Та́же, ектениа́ от свяще́нника, или́ от диа́кона: Ми́ром Го́споду помо́лимся.

О свы́шнем ми́ре, и о спасе́нии душ на́ших, Го́споду помо́лимся. О ми́ре всего́ ми́ра: О святе́м хра́ме сем: О Святе́йшем Прави́тельствующем Сино́де: О Благочести́вейшем: О пособи́ти и покори́ти: О гра́де сем: О благорастворе́нии возду́хов: О пла́вающих, путеше́ствующих: О е́же благослови́тися и освяти́тися умове́нию сему́, си́лою и де́йством и наи́тием Свята́го Ду́ха, Го́споду помо́лимся. О же бы́ти ему́ на омове́ние скве́рны согреше́ний на́ших Го́споду помо́лимся. О изба́витися нам от вся́кия ско́рби, гне́ва и ну́жды, Го́споду помо́лимся.

Заступи́, спаси́, поми́луй, и сохрани́ нас Бо́же, Твое́ю благода́тию.

Пресвяту́ю, Пречи́стую, Преблагослове́нную, Сла́вную:

Возглас:

Я́ко Ты еси́ очище́ние душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

И по ами́не мо́лится велегла́сно свяще́нник моли́твою се́ю:

Бо́же преблаги́й, непристу́пный Божество́м, И́же во зра́це ра́бии служи́теля о́браз восприе́мый, и во изображе́ние спаси́тельнаго смире́ния, ученико́в Твои́х но́ги пречи́стыма рука́ма Твои́ма омы́вый и ле́нтием отры́й; при́зри и ны́не на нас недосто́йных раб Твои́х, толи́каго Твоего́ снизхожде́ния подража́ющих пресла́вное, и сподо́би плотски́х скверн измы́тися нам, и душе́вныя нечистоты́, во́ды сея́ прикоснове́нием. Да́руй нам Пресвята́го Ду́ха неви́димое наи́тие; утверди́ нас от блюдущего на́шу пя́ту зми́я льсти́ваго, да чи́сти бы́вше, послу́жим благоприя́тно Тебе́, верху́ змие́в и скорпи́й и всея́ си́лы вра́жия преходя́ще.

Я́ко подоба́ет Тебе́ вся́кая сла́ва, че́сть и поклоне́ние, ны́не и при́сно, и во ве́ки веко́в.

Мир всем. Главы́ ва́шя Го́сподеви приклони́те.

И мо́лится свяще́нник та́йно:

Го́споди Бо́же наш, показа́вый нам ме́ры смире́ния, в Твое́м и превысо́ком снисхождении, и после́дняго изволе́нием пе́рваго наре́к, облагодати́ нас в служе́нии другъдру́гу. Вознеси́ нас боже́ственным смире́нием, соблюди́ ны нескве́рны, омыва́емыя при́сно слеза́ми, очища́емы просвеще́нием чисти́тельныя Твоея́ благода́ти; да и́стиною к Тебе́ всегда́ припа́дающе, обря́щем ми́лость и щедро́ты на стра́шном Твое́м суди́щи.

Возгла́с: Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

По возгла́се же глаго́лет диа́кон:

О е́же сподо́битися нам слы́шания свята́го Ева́нгелиа, Го́спода Бо́га мо́лим. Седя́т у́бо хотя́щии мы́тися на предъуготовленных скамьях. И начина́ет диа́кон че́сти пе́рвое Ева́нгелие умове́ния. Настоя́тель же, стоя́ от вратаря, рече́т: Прему́дрость, про́сти услы́шим свята́го Ева́нгелиа. Диа́кон: От Иоа́нна свята́го Ева́нгелиа чте́ние. Зача́ло 44.Во вре́мя о́но, пре́жде пра́здника Па́схи: Егда́ у́бо глаго́лет диа́кон: Воста́в с ве́чери и положи́ ри́зы своя́: Отлага́ет Настоя́тель ри́зы своя́. Егда́ же глаго́лет диа́кон: И прие́м ле́нтион, препоя́сася. Тогда́ препоясу́ется настоя́тель убру́сом. Егда́ рече́т: Пото́м же влия́ во́ду во умыва́льницу. Настоя́тель влива́ет свои́ми рука́ми во́ду тёплую в лохань. Егда́ же рече́т диа́кон: И нача́т умыва́ти но́ги ученико́в, и отира́ти ле́нтием, и́мже препоя́сан. Начина́ет предстоя́тель умыва́ти но́ги бра́тиям, наче́н от вратаря, да́же до екклесиарха, или́ до иконо́ма, и умыва́ет двена́дцати, отира́я коему́ждо от умываемых но́ги, и лобза́я их. Егда́ же прии́дет до иконо́ма, глаго́лет диа́кон: Прии́де же к Си́мону Петру́, и глаго́ла Ему́ той: Го́споди, ты ли мои́ умы́еши но́зе?

Предстоя́тель же глаго́лет: Е́же Аз творю́, ты не ве́си ны́не, уразуме́еши же по сих.

Иконо́м же па́ки: Не умы́еши но́гу мое́ю во ве́ки. И па́ки предстоя́тель: А́ще не умы́ю тебе́, не и́маши ча́сти со Мно́ю. Иконо́м же па́ки: Го́споди, не но́зе мои́ то́кмо, но и ру́це и главу́. Предстоя́тель же глаго́лет: Измове́нный не тре́бует, то́кмо но́зе умы́ти, е́сть бо ве́сь чист: и вы чи́сти есте́, но не вси. И про́чее исполня́ет сицево́е Ева́нгелие. И по умове́нии всех настоя́тель снем ле́нтий, препоясу́ется поня́вицею свое́ю, и налага́ет ри́зы своя́. Диа́кон возглаша́ет: О е́же сподо́битися нам слы́шания свята́го Ева́нгелиа:

И отше́д предстоя́тель на ме́сто свое́, чтет сам второ́е Ева́нгелие умове́ния, в слух всем глаго́ля:

От Иоа́нна свята́го Ева́нгелиа чте́ние. Зача́ло 45.

Во вре́мя о́но, егда́ умы́ Иису́с но́зе ученико́м, прия́т ри́зы Своя́.

По Ева́нгелии же глаго́лет во услы́шание всем моли́тву сию́:

Го́споди Бо́же наш, И́же по мнозеи ми́лости Твое́й, истощи́вый Себе́, и зрак раба́ прие́мый, И́же во вре́мя спаси́тельныя и животворщия, и во́льныя Твоея́ стра́сти, вечеря́ти изво́ливый со святы́ми Твои́ми ученики́ и апо́столы; и посе́м ле́нтием препоя́савый Себе́, и омы́вый но́ги ученико́в, о́браз дав им смиренному́дрия и любве́, е́же к другъдру́гу, и реки́й: я́коже сотвори́х вам, та́кожде и вы твори́те другъдру́гу. Сам и ны́не Влады́ко, посреде́ недосто́йных рабо́в Твои́х, и́же Твоему́ о́бразу после́дующих прише́д, омы́й вся́кую скве́рну и нечистоту́ душ на́ших, да отмы́вше прилепи́вшийся нам от согреше́ний прах, и ле́нтием любве́ другъдру́га оте́рше, возмо́жем благоугоди́ти тебе́ вся дни живота́ на́шего, и обрести́ благода́ть пред Тобо́ю.

Я́ко Ты еси́ благословля́яй, и освещаяя вся́ческая Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

По сконча́нии же моли́твы, кропается бра́тия вся от умыва́льницы. Та́же вхо́дим в храм, пою́ще тропа́рь от пя́тыя пе́сни Вели́каго Пятка́.

Глас 6. Умы́вше но́ги, предочистившеся та́йны причаще́нием ны́не Христе́, боже́ственныя Твоея́ служи́тели, от Сио́на на Елео́нстей вели́цей горе́ с Тобо́ю взыдо́ша, пою́ще Тя Человеколю́бче.

Ви́дите, рекл еси́, дру́зи, не смуща́йтеся: ны́не бо прибли́жися час взя́ту бы́ти Мне, убие́ну рука́ми беззако́нных, вси же расточе́ни бу́дете, Мя оста́вльше, я́же соберу́ пропове́дати Мя Человеколю́бца.

Та́же дае́тся по уло́мку хле́ба, и быва́ет отпу́ст, и вхо́дим в трапе́зу пою́ще: Вознесу́ Тя, Бо́же мой:

И причаща́емся вина́ то́чию. Повече́рие же пое́м в ке́ллиах.

В неде́лю святы́я пентико́стии ве́чера, кле́плет ра́но и твори́т нача́ло. И глаго́лем предначина́тельный псало́м. Та́же ектениа́ вели́кая:

Ми́ром Го́споду помо́лимся. О свы́шнем ми́ре: О ми́ре всего́ ми́ра: О святе́м хра́ме сем: О Святе́йшем Прави́тельствующем Сино́де: О Благочести́вейшем, Самодержа́внейшем и про́чая. О пособи́ти и покори́ти: О гра́де сем: О благорастворе́нии возду́хов: О пла́вающих: О предстоя́щих лю́дех и ожида́ющих благода́ти Свята́го Ду́ха, Го́споду помо́лимся.

О приклоня́ющих се́рдца своя́ пред Го́сподем и коле́на, Го́споду помо́лимся.

О е́же укрепи́тися нам к соверше́нию благоуго́дне, Го́споду помо́лимся.

О е́же низпосла́тися бога́тым ми́лостем Его́ на ны, Го́споду помо́лимся.

О е́же прия́ти коленоприклоне́ния на́шя я́ко фимиа́м пред Ним, Го́споду помо́лимся.

О тре́бующих от Него́ по́мощи, Го́споду помо́лимся.

О изба́витися нам: Заступи́, спаси́: Пресвяту́ю, Пречи́стую:

Та́же свяще́нник возгла́с: Я́ко подоба́ет Тебе́:

На Го́споди же воззва́х, поста́вим стихо́в 6. И пое́м стихи́ры самогла́сны, глас 4.

Пресла́вная дне́сь ви́деша вси язы́цы во гра́де Дави́дове, егда́ Дух сни́де Святы́й во о́гненных язы́цех, я́коже богоглаго́ливый Лука́ повеству́ет, глаго́лет бо: собра́нным ученико́м Христо́вым, бы́сть шум, я́коже носи́му дыха́нию бу́рну, и испо́лни дом, иде́же бя́ху седя́ще: и вси нача́ша глаго́лати стра́нными глаго́лы, стра́нными уче́нии, стра́нными повеле́нии Святы́я Тро́ицы, два́жды.

Дух Святы́й бе у́бо при́сно, и е́сть, и бу́дет: ниже́ начина́емь, ниже́ престая́й, но при́сно Отцу́ и Сы́ну счине́н и счисля́емь: Живо́т, и животворя́й, Свет, и све́та пода́тель, самоблаги́й и исто́чник благосты́ни: И́мже Оте́ц познава́ется, и Сын прославля́ется, и от всех познава́ется, еди́на си́ла, еди́но счета́ние, еди́но поклоне́ние Святы́я Тро́ицы, два́жды.

Дух Святы́й Свет и Живо́т, и живы́й исто́чник у́мный; Дух прему́дрости, Дух ра́зума; благи́й, пра́вый, у́мный; облада́яй, очища́яй прегреше́ния; Бог и боготворя́й; О́гнь и от Огня́ происходя́й; глаго́ляй, де́яй, разделя́яй дарова́ния, И́мже проро́цы вси, и боже́ственнии апо́столи с му́ченики венча́шася. Стра́нное слы́шание, стра́нное виде́ние, о́гнь разделя́яйся в подая́ние дарова́ний, два́жды.

Сла́ва, и ны́не, глас 6:

Царю́ Небе́сный, Уте́шителю, Душе́ и́стины, И́же везде́ сый, и вся исполня́яй, Сокро́вище благи́х, и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, души́ на́шя.

По сих вход и Све́те ти́хий:

Проки́мен, глас 7: Кто Бог ве́лий, я́ко Бог наш? Ты еси́ Бог творя́й чудеса́.

Стих 1: Сказа́л еси́ в лю́дех си́лу Твою́.

Стих 2: Помяну́х дела́ Госпо́дня:

Стих 3: И рех: ны́не нача́х, сия́ изме́на десни́цы Вы́шняго. И па́ки: Кто Бог ве́лий:

Та́же возглаша́ет свяще́нник, или́ диа́кон:

Па́ки и па́ки, прикло́ньше коле́на, Го́споду помо́лимся.

Лик же пое́т: Го́споди поми́луй, три́жды.

Нам же приклоншим коле́на на земли́, и непокрове́нным су́щим, чтет свяще́нник моли́твы во олтаре́ велегла́сно в слух всех:

Пречи́сте, нескве́рне, безнача́льне, неви́диме, непостижи́ме, неизсле́диме, непреме́нне, непобеди́ме, неизче́тне, незло́биве Го́споди; еди́н име́яй безсме́ртие, во све́те живы́й непристу́пном; сотвори́вый Не́бо и зе́млю, и мо́ре, и вся созда́нная на них; пре́жде е́же проси́ти, всем проше́ния подава́яй, Тебе́ мо́лимся, и Тебе́ про́сим, Влады́ко Человеколю́бче, Отца́ Го́спода и Бо́га и Спа́са на́шего Иису́са Христа́, нас ра́ди челове́ков, и на́шего ра́ди спасе́ния сше́дшаго с небе́с, и воплоти́вшагося от Ду́ха Свята́го и Мари́и Присноде́вы, и Пресла́вныя Богоро́дицы; И́же пе́рвее у́бо словесы́ уча́, последи́ же и де́лы показу́я. Егда́ спаси́тельную стра́сть претерпе́, подаде́ нам подписа́ние смире́нным, и гре́шным, и недосто́йным рабо́м Твои́м, мольбы́ приноси́ти Тебе́, в вы́и и коле́н преклоне́ниих, о свои́х гресе́х, и о людски́х неве́дениих. Сам Многоми́лостиве и Человеколю́бче, услы́ши ны, во́ньже а́ще де́нь призове́м Тя, изря́днее же в де́нь сей пятьдеся́тный, в о́ньже по Вознесе́нии Го́спода на́шего Иису́са Христа́ на небеса́, и седе́нии одесну́ю Тебе́ Бо́га и Отца́, низпосла́ Свята́го Ду́ха на святы́я Своя́ ученики́ и апо́столы, И́же и се́де на еди́ном коего́ждо их, и испо́лнишася вси неистощи́мыя благода́ти Его́, и глаго́лаша язы́ки ины́ми вели́чия Твоя́, и прореко́ша. Ны́не у́бо моля́щихся Тебе́, услы́ши нас, и помяни́ нас, смире́нных и осужде́нных, и возврати́ плене́ние душ на́ших, Твое́ ми́лование име́я о нас моля́щееся. Приими́ нас, припа́дающих Тебе́, и вопию́щих: согреши́хом, к Тебе́ приве́ржени есмы́ от утро́бы, от чре́ва ма́тере на́шея, Ты еси́ Бог наш. Но я́ко исчезо́ша в суете́ дни́е на́ши, обнажи́хомся Твоея́ по́мощи, лиши́хомся вся́каго отве́та; но дерза́юще на щедро́ты Твоя́, зове́м: грехи́ ю́ности на́шея и неве́дения не помяни́, и от та́йных на́ших очи́сти нас, и не отри́ни нас во вре́мя ста́рости, внегда́ оскуде́ти кре́пости на́шей. Не оста́ви нас, пре́жде да́же нам в зе́млю не возврати́тися; сподо́би к Тебе́ возврати́тися, и вонми́ нам благоприя́тием и благода́тию. Возме́ри беззако́ния на́шя щедро́тами Твои́ми; сопроти́в поста́ви бе́здну щедро́т Твои́х мно́жеству согреше́ний на́ших. При́зри с высоты́ святы́я Твоея́ Го́споди, на предстоя́щия лю́ди Твоя́, и чающия е́же от Тебе́ бога́тыя ми́лости. Посети́ нас бла́гостию Твое́ю, изба́ви нас от наси́льства диа́воля. Утверди́ живо́т наш святы́ми Твои́ми и свяще́нными зако́ны. А́нгела, ве́рна храни́теля приста́ви лю́дем Твои́м, всех собери́ в Твое́ Ца́рствие. Да́ждь проще́ние упова́ющим на Тя: оста́ви им и нам грехи́; Очи́сти нас де́йством Свята́го Твоего́ Ду́ха, разруши́ я́же на нас ко́зни вра́жия.

Присовокупля́ет же и сию́ моли́тву:

Благослове́н еси́ Го́споди Влады́ко Вседержи́телю, просвети́вый де́нь све́том со́лнечным, и но́щь уясни́вый заря́ми о́гненными, долготу́ дневну́ю преити́ нам сподо́бивый, и прибли́житися нача́тком но́щи: услы́ши моле́ния на́шя, и всех люде́й Твои́х, и всем нам про́сти в во́льныя и нево́льныя грехи́. Приими́ вече́рняя на́шя моле́ния, и низпосли́ мно́жество ми́лости Твоея́, и щедро́ты Твоя́ на достоя́ние Твое́, остени́ нас святы́ми а́нгелы Твои́ми; вооружи́ нас ору́жием пра́вды Твоея́; огради́ нас и́стиною Твое́ю; соблюди́ нас си́лою Твое́ю; изба́ви нас от вся́каго обстоя́ния, вся́каго наве́та сопротиволежа́щаго; пода́ждь же нам и настоя́щий ве́чер, с приходя́щею но́щию, соверше́н, свят ми́рен, безгре́шен, безсобла́знен, безмечта́нен, и вся дни живота́ на́шего; моли́твами святы́я Богоро́дицы, и всех святы́х от ве́ка Тебе́ благоугоди́вших.

А́бие же глаго́лет диа́кон:

Заступи́, спаси́, поми́луй, возста́ви, и сохрани́ нас Бо́же Твое́ю благода́тию.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́, и друг дру́га, и ве́сь живо́т наш Христу́ Бо́гу предади́м.

Возгла́сно свяще́нник:

Твое́ бо е́сть, е́же ми́ловати, и спаса́ти нас, Го́споди Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно и во ве́ки веко́в.

Лик: Ами́нь.

Диа́кон же глаго́лет сия́:

Рцем вси от всея́ души́, и от всего́ помышле́ния на́шего рцем.

Лик: Го́споди поми́луй.

Диа́кон:

Го́споди Вседержи́телю Бо́же оте́ц на́ших, мо́лимтися, услы́ши и поми́луй.

Лик: Го́споди поми́луй.

Диа́кон: Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй.

Лик: Го́споди поми́луй, три́жды.

Диа́кон:

Еще́ мо́лимся о Благочести́вейшем, Самодержа́внейшем, Вели́ком Госуда́ре на́шем ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, о держа́ве, побе́де, пребыва́нии, ми́ре, здра́вии, спасе́нии Его́, и Го́споду Бо́гу на́шему, наипа́че поспеши́ти и пособи́ти Ему́ во всех, и покори́ти под но́зе Его́ вся́каго врага́ и супоста́та.

Лик: Го́споди поми́луй, три́жды.

Диа́кон:

Еще́ мо́лимся о супру́ге Его́, Благочести́вейшей Госуда́рыне, ИМПЕРАТРИ́ЦЕ МАРИ́И ФЕО́ДОРОВНЕ, Го́споду помо́лимся.

Лик: Го́споди поми́луй, три́жды.

Диа́кон:

Еще́ мо́лимся о Насле́днике Его́, Благове́рном Госуда́ре, Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ и о всем Ца́рствующем До́ме.

Лик: Го́споди поми́луй, три́жды.

Диа́кон:

Еще́ мо́лимся о Святе́йшем Прави́тельствующем Сино́де.

А́ще под митрополи́том:

и о митрополи́те на́шем, и́мярек, его́же о́бласть, и всей во Христе́ бра́тии на́шей.

Лик: Го́споди поми́луй, три́жды.

Диа́кон:

Еще́ мо́лимся о всем Их христолюби́вом во́инстве.

Лик: Го́споди поми́луй, три́жды.

Диа́кон:

Еще́ мо́лимся о блаже́нных и приснопа́мятных созда́телех святы́я оби́тели сея́.

Лик: Го́споди поми́луй, три́жды.

Диа́кон:

Еще́ мо́лимся о ми́лости, жи́зни, ми́ре, здра́вии, спасе́нии, посеще́нии, проще́нии, и оставле́нии грехо́в рабо́в Бо́жиих бра́тии святы́я оби́тели сея́.

Лик: Го́споди поми́луй, три́жды.

Диа́кон:

Еще́ мо́лимся о плодонося́щих, и доброде́ющих, во святе́м и всечестне́м хра́ме сем, тружда́ющихся, пою́щих, и предстоя́щих лю́дех, ожида́ющих от Тебе́ вели́кия и бога́тыя ми́лости.

Та́же свяще́нник, возгла́с:

Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

А́бие же диа́кон глаго́лет:

Па́ки и па́ки прикло́нше коле́на, Го́споду помо́лимся.

Лик пое́т: Го́споди поми́луй, три́жды.

Свяще́нник мо́лится:

Го́споди Иису́се Христе́ Бо́же наш, мир Твой пода́вый челове́ком, и Пресвята́го Ду́ха дар, еще́ в житии́ и с на́ми сый, в насле́дие неотъе́млемое ве́рным при́сно подава́яй; явле́ннейше же сию́ благода́ть Твои́м ученико́м и апо́столом дне́сь низпосла́вый, и сих устне́ о́гненными утверди́вый, язы́ки, и́миже ве́сь род челове́ческий богове́дение свои́м язы́ком в слух у́ха прии́мше, све́том Ду́ха просвети́хомся, и пре́лести я́коже тмы измени́хомся, и чу́вственных и о́гненных язы́к раздая́нием, и преесте́ственным де́йством е́же в Тя ве́ры научи́хомся, и Тебе́ богосло́вити со Отце́м и Святы́м Ду́хом, во еди́ном Божестве́ и си́ле, и вла́сти озари́хомся. Ты у́бо О́тчее сия́ние, существа́ и естества́ Его́ неизме́нное и недви́жимое начерта́ние, исто́чниче прему́дрости и благода́ти, отве́рзи и мне гре́шному устне́, и научи́ мя, ка́ко досто́ит, и о и́хже потре́ба моли́тися; Ты бо еси́ ве́дый мно́гое грехо́в мои́х мно́жество, но Твое́ благоутро́бие победи́т сих безме́рное; Се бо стра́хом предстою́ Ти, в пучи́ну ми́лости Твоея́ отча́яние души́ моея́ пове́рг. Окорми́ живо́т мой, сло́вом всю тва́рь неизрече́нною прему́дрости си́лою управля́яй, ти́хое обурева́емых приста́нище, и скажи́ ми пу́ть, во́ньже пойду́. Дух прему́дрости Твоея́ мои́м пода́ждь помышле́нием, Дух ра́зума безу́мию моему́ да́руяй; Ду́хом стра́ха Твоего́ моя́ осени́ дела́; и Дух Пра́вый обнови́ во утро́бе мое́й, и Ду́хом Влады́чним мы́слей мои́х поползнове́ние утверди́; да на всяк де́нь Ду́хом Твои́м Благи́м к поле́зному наставля́емь, сподо́блюся твори́ти за́поведи Твоя́, и Твое́ при́сно па́мятствовати сла́вное прише́ствие, и истяза́тельное соде́янных на́ми. И да не пре́зриши мя тле́нными сопрельща́тися ми́ра сего́ кра́сными, но бу́дущих восприя́тия жела́ти укрепи́ сокро́вищ. Ты бо рекл еси́ Влады́ко: я́ко ели́ка а́ще кто про́сит о Твое́м и́мени, невозбра́нно прие́млет от Твоего́ присносу́щнаго Бо́га и Отца́. Те́мже и аз гре́шный в прише́ствии Свята́го Твоего́ Ду́ха Твою́ молю́ бла́гость, ели́ка проси́х, возда́ждь ми во спасе́ние. Ей Го́споди, вся́каго благодея́ния бога́тый да́телю, и пода́телю Благи́й, я́ко Ты еси́ подава́яй преизоби́льно и́хже про́сим; Ты еси́ сострада́телен и ми́лостивый, И́же безгре́шно быв пло́ти на́шея о́бщник, и приклоняющим к Тебе́ коле́на, приклоня́яйся любоблагоутро́бне, очище́ние же быв грехо́в на́ших. Да́ждь у́бо Го́споди, лю́дем Твои́м щедро́ты Твоя́; услы́ши нас с Небесе́ свята́го Твоего́: освяти́ нас си́лою спаси́тельныя десни́цы Твоея́; покры́й нас кро́вом крилу́ Твое́ю, да не пре́зриши дел ру́ку Твое́ю. Тебе́ еди́ному согреша́ем, но и Тебе́ еди́ному слу́жим; не ве́мы кла́нятися бо́гу чужде́му, ниже́ простира́ти руки́ на́шя Влады́ко, к бо́гу ино́му. Оста́ви нам согреше́ния, и прии́м на́шя коленопокло́нная моле́ния, простри́ всем нам ру́ку по́мощи, приими́ моли́тву всех я́ко кади́ло прия́тное, восприе́млемое пред Твои́м преблаги́м Ца́рством.

Присовокупля́ет же и сию́:

Го́споди Го́споди, избавле́й нас от вся́кия стре́лы летя́щия во дни. Изба́ви нас и от вся́кия ве́щи во тьме́ преходя́щия. Приими́ же́ртву вече́рнюю рук на́ших воздея́ния. Сподо́би же нас и нощно́е по́прище без поро́ка прейти́, неискуше́ны от злых. И изба́ви нас от вся́каго смуще́ния и боя́зни, я́же от диа́вола нам прибыва́ющия. Да́руй душа́м на́шим умиле́ние, и по́мыслом на́шим попече́ние, е́же на стра́шнем и пра́веднем Твое́м суде́ испыта́ния. Пригвозди́ стра́ху Твоему́ пло́ти на́шя, и умертви́ у́ды на́шя су́щия на земли́. Да и со́нным безмо́лвием просвети́мся, зре́нием суде́б Твои́х. Отыми́ же от нас вся́кое мечта́ние неподо́бное и по́хоть вре́дну. Возста́ви же нас во вре́мя моли́твы утвержде́ны в ве́ре, и преспевающия в за́поведех Твои́х.

Диа́кон же глаго́лет:

Заступи́, спаси́, поми́луй, возста́ви: Пресвяту́ю, Пречи́стую, Преблагослове́нную:

Свяще́нник же возгла́с моли́тве: Благоволе́нием и бла́гостию единоро́днаго Сы́на Твоего́, с Ни́мже благослове́н еси́, с Пресвяты́м, и Благи́м, и Животворя́щим Твои́м Ду́хом, ны́не и при́сно и во ве́ки веко́в, ами́нь.

Та́же: Сподо́би, Го́споди, в ве́чер сей:

Посе́м же глаго́лет диа́кон:

Па́ки и па́ки прикло́нше коле́на, Го́споду помо́лимся.

Свяще́нник моли́тву:

Приснотеку́щий, живо́тный, и просвети́тельный исто́чниче, соприсносу́щная Отцу́ соде́тельная си́ло, все смотре́ние за спасе́ние челове́ческое прекра́сне испо́лнивый, Христе́ Бо́же наш; сме́рти у́зы неразреши́мыя, и закле́пы а́довы расто́ргнувый, лука́вых же духо́в мно́жество попра́вый; приведы́й Себе́ о нас непоро́чное заколе́ние, и те́ло да́вый пречи́стое в же́ртву, вся́каго греха́ неприкоснове́нное же и непрохо́дное: и стра́шным сим, и неисповеди́мым священноде́йствием, живо́т нам ве́чный дарова́вый; во ад сше́дый, и вереи́ ве́чныя сокруши́вый, и во тме седя́щим восхо́д показа́вый, началозло́бнаго же и глуби́ннаго зми́я богому́дростным льще́нием улови́вый, и вери́гами мра́ка связа́вый в та́ртаре и огни́ негаси́мом, и во тме кроме́шней неисчетноси́льною Твое́ю затверди́вый кре́постию, великоимени́тая Прему́дросте О́тчая, напа́ствуемым вели́кий помо́щник яви́выйся, и просвети́вый седя́щия во тме и се́ни сме́ртней; Ты сла́вы присносу́щныя Го́споди, и Отца́ Вы́шняго Сы́не возлю́бленный, присносу́щный Све́те от присносу́щнаго Све́та, Со́лнце пра́вды, услы́ши нас, моля́щихся Тебе́, и упоко́й души́ рабо́в Твои́х, пре́жде усо́пших оте́ц и бра́тий на́ших, и про́чих сро́дник по пло́ти, и всех свои́х в ве́ре, о ни́хже и па́мять твори́м ны́не, я́ко в Тебе́ всех держа́ва, и в ру́це Твое́й содержи́ши вся концы́ земли́. Влады́ко Вседержи́телю, Бо́же оте́ц и Го́споди ми́лости, ро́да сме́ртнаго же и безсме́ртнаго, и вся́каго естества́ челове́ческаго Соде́телю, составля́емаго же, и па́ки разреша́емаго, живота́ же и сконча́ния, е́же зде пребыва́ния, и е́же та́мо преложе́ния; ле́та измеря́яй живы́м, и времена́ уставля́яй сме́рти, низводя́й во ад и возводя́й; связу́яй в не́мощи, и отпуща́яй в си́ле, настоя́щая потре́бне стро́яй, и бу́дущая поле́зно управля́яй, сме́ртным жа́лом уя́звенных воскресе́ния наде́ждами веселя́яй. Сам у́бо Влады́ко всех, Бо́же Спаси́телю наш, наде́ждо всех конце́в земли́, и су́щих в мо́ри дале́че, И́же и в сей после́дний и вели́кий спаси́тельный де́нь Пятдеся́тницы пра́здника та́йну Святы́я и Единосу́щныя, и соприсносу́щныя, и нераздели́мыя и неслия́нныя Тро́ицы показа́вый нам, и наи́тие и прише́ствие Свята́го и животворя́щаго Твоего́ Ду́ха, в ви́де о́гненных язы́ков на святы́я Твоя́ апо́столы излия́вый, и благове́стники тех поста́вивый благочести́выя на́шея ве́ры, и испове́дники и пропове́дники и́стиннаго богосло́вия показа́вый; И́же и в сей всесоверше́нный и спаси́тельный пра́здник, очище́ния у́бо моли́твенная, о и́же во а́де держи́мых сподо́бивый приима́ти, вели́кия же подава́яй нам наде́жды ослабле́ния содержи́мым от содержа́щих я̀ скверн, и утеше́нию Тобо́ю низпосла́тися; услы́ши нас смире́нных, и Твои́х раб моля́щихся, и упоко́й души́ рабо́в Твои́х пре́жде усо́пших, на ме́сте све́тле, на ме́сте зла́чне, на ме́сте прохлажде́ния: отону́дуже отбеже́ вся́кая боле́знь, печа́ль и воздыха́ние, и учини́ ду́хи их в селе́ниях пра́ведных, и ми́ра и ослабле́ния сподо́би их; я́ко не ме́ртвии восхва́лят Тя Го́споди, ниже́ су́щии во а́де испове́дание де́рзнут принести́ Тебе́, но мы живи́и благослови́м Тя и мо́лим, и очисти́тельныя моли́твы и же́ртвы прино́сим Тебе́ о душа́х их.

Присовокупля́ет и сию́:

Бо́же вели́кий, и ве́чный, Святы́й, человеколюби́вый, сподо́бивый нас в сей час ста́ти пред непристу́пною Твое́ю сла́вою, на пе́ние и хвалу́ чуде́с Твои́х, очи́сти ны недосто́йныя рабы́ Твоя́, и пода́ждь благода́ть, е́же сокруше́нным се́рдцем, невозноси́тельно приноси́ти Тебе́ Трисвято́е славосло́вие, и благодаре́ние вели́ких Твои́х даро́в, я́же сотвори́л еси́ к нам, и твори́ши всегда́ в нас. Помяни́ Го́споди, не́мощь на́шу, и да не погуби́ши нас со беззако́нии на́шими, но сотвори́ вели́кую ми́лость со смире́нием на́шим, да грехо́вныя тмы избежа́вше, во дни пра́вды ходи́ти бу́дем, и оде́явшеся ору́жием све́та, ненаве́тно пребу́дем от вся́кия ко́зни лука́ваго, и со дерзнове́нием просла́вим о всех Тебе́ еди́наго и́стиннаго и Человеколю́бца Бо́га. Твое́ бо я́ко вои́стинну и вели́кое вресноту́ та́инство, Влады́ко всех, и Тво́рче, вре́менное реше́ние Твои́х тва́рей, и е́же по сих совокупле́ние, и упокое́ние, е́же во ве́ки, Тебе́ благода́ть о всех испове́дуем, о вхо́дех на́ших, я́же в мир сей, и исхо́дех, наде́жды нам воскресе́ния, и жи́зни нетле́нныя, Твои́м нело́жным обеща́нием предобручают, я́же прии́мем в бу́дущем второ́м прише́ствии Твое́м; Ты бо еси́ и воскресе́ния на́шего Нача́льник, и пожи́вших неумы́тный и человеколюби́вый Судия́, и мздовоздая́ния Влады́ка и Госпо́дь, И́же и приобщи́выйся нам прии́скренно пло́ти и кро́ве, снизхожде́ния ра́ди кра́йняго, и на́шя стра́сти неотме́тныя, внегда́ во́лею во иску́с поста́вити, прии́м за милосе́рдие щедро́т, и в не́мже пострада́л еси́ Сам искуси́вся, искуша́емым нам быв самообеща́нный помо́щник. Те́мже и совозве́л еси́ нас в Твое́ безстра́стие. Приими́ у́бо Влады́ко, мольбы́ и моле́ния на́шя, и упоко́й вся отцы́ коего́ждо, и ма́тери, и ча́да, и бра́тию, и сестры́ единоро́дныя, и купноро́дныя, и вся пре́жде почи́вшия души́, в наде́жди воскресе́ния жи́зни ве́чныя; учини́ ду́хи их, и имена́ в кни́зе живо́тней, в не́дрех Авраа́ма, и Исаа́ка, и Иа́кова, в стране́ живы́х, во Ца́рствии Небе́снем, в раи́ сла́дости, све́тлыми а́нгелы Твои́ми, вводя́ вся во святы́я Твоя́ оби́тели, совоздвиза́яй и телеса́ на́шя в де́нь, в о́ньже определи́л еси́ по святы́м Твои́м и нело́жным обетова́нием. Не́сть у́бо Го́споди, рабо́м Твои́м сме́рть, исходя́щим нам от те́ла, и к Тебе́ Бо́гу на́шему приходя́щим; но преставле́ние от печа́льнейших на поле́знейшая, и сла́достнейшая, и на упокое́ние и ра́дость. А́ще же и что согреши́хом к Тебе́, ми́лостив бу́ди нам же и тем, зане́ ни еди́н е́сть чист пред Тобо́ю от скверн, ниже́ а́ще еди́н де́нь живота́ его́ е́сть; ра́зве Ты то́чию еди́н на земли́ яви́выйся безгре́шный, Госпо́дь наш Иису́с Христо́с, И́мже вси упова́ем ми́лость получи́ти, и оставле́ние грехо́в. Сего́ ра́ди нам же и о́нем, я́ко Благ и Человеколю́бец Бог, осла́би, оста́ви, про́сти грехопаде́ния на́шя, во́льная и нево́льная, я́же в ве́дении и не в ве́дении, предъявле́нная и забыва́емая; я́же в дея́нии, я́же в помышле́нии, я́же в словеси́, я́же во всех на́ших жития́х и движе́ниих. И отше́дшим у́бо свобо́ду и осла́бу да́руй, нас же су́щих зде благослови́; коне́ц благи́й и ми́рный да́руя нам же и всем лю́дем Твои́м, и ми́лости и человеколю́бия утро́бу отверза́яй нам, на стра́шном и ужа́сном Твое́м прише́ствии, и Ца́рствия Твоего́ досто́йных нас сотвори́.

Присовокупля́ет и сию́ моли́тву:

Бо́же вели́кий и вы́шний, еди́не име́яй безсме́ртие, во све́те живы́й непристу́пном, всю тва́рь му́дростию созда́вый, раздели́вый посреде́ све́та, и посреде́ тмы, и со́лнце у́бо положи́вый во о́бласть дне, луну́ же и зве́зды во о́бласть но́щи; сподо́бивый нас, гре́шных, и в настоя́щий де́нь предвари́ти лице́ Твое́ во испове́дании, и вече́рнюю Тебе́ слу́жбу принести́. Сам Человеколю́бче Го́споди, испра́ви моли́тву на́шу, я́ко кади́ло пред Тобо́ю, и приими́ ю̀ в воню́ благоуха́ния; пода́ждь же нам настоя́щий ве́чер и приходя́щую но́щь ми́рну; облецы́ ны ору́жием све́та, изба́ви нас от стра́ха нощна́го, и от вся́кия ве́щи во тме преходя́щия; и да́руй нам сон, его́же во упокое́ние не́мощи на́шей дарова́л еси́, от вся́каго диа́вольскаго мечта́ния измене́н. Ей Влады́ко, всех благи́х пода́телю, я́ко да и на ло́жах на́ших умиля́ющеся, воспомя́нем и в но́щи пресвято́е и́мя Твое́; и поуче́нием Твои́х за́поведей озаря́еми, в ра́дости душе́вной воста́нем к славосло́вию Твоея́ бла́гости, моли́твы и моле́ния Твоему́ благоутро́бию принося́ще о свои́х гресе́х, и о всех лю́дех Твои́х, и́хже моли́твами Пресвяты́я Богоро́дицы, в ми́лости посети́.

Диа́кон: Заступи́, спаси́, поми́луй, возста́ви, и сохрани́ нас:

Пресвяту́ю, Пречи́стую, Преблагослове́нную, Сла́вную Влады́чицу:

Иере́й возглаша́ет:

Ты бо еси́ упокое́ние душ и теле́с на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно: Та́же диа́кон: Испо́лним вече́рнюю моли́тву: Заступи́, спаси́: Ве́чера всего́ соверше́нна: А́нгела ми́рна: Проще́ния и оставле́ния: До́брых и поле́зных: Про́чее вре́мя живота́: Христиа́нския кончи́ны: Пресвяту́ю, Пречи́стую: Свяще́нник возглаша́ет: Я́ко Благ и Человеколю́бец: Свяще́нник: Мир всем. Диа́кон: Главы́ на́шя Го́сподеви приклони́те.

И свяще́нник мо́лится молитвой обы́чной втай:

Го́споди Бо́же наш, приклони́вый небеса́, и сше́дый на спасе́ние ро́да челове́ческаго, при́зри на рабы́ Твоя́, и на достоя́ние Твое́; Тебе́ бо стра́шному и Человеколю́бцу Судии́, Твои́ раби́ своя́ приклони́ша главы́, и своя́ покори́ша вы́и, не от челове́к ожида́юще по́мощи, но Твоея́ ожида́юще ми́лости, и Твоего́ ча́юще спасе́ния; я́же сохрани́ на вся́кое вре́мя, и в настоя́щем часе́ же и ве́чере, и в приходя́щую но́щь, от вся́каго врага́, от вся́каго сопротиволежа́щаго де́йства диа́вольскаго, помышле́ний су́етных, и воспомина́ний лука́вых.

Та́же возглаша́ет: Бу́ди держа́ва:

Та́же пое́м на стихо́вне стихи́ры самогла́сны, глас 3:

Ны́не в зна́мение всем я́ве язы́цы бы́ша; иуде́и бо, от ни́хже по пло́ти Христо́с, неве́рием неду́говавше, Бо́жия благода́ти отпадо́ша; и Боже́ственнаго све́та су́щии от язы́ков сподо́бихомся, утверди́вшеся словесы́ ученико́в, веща́ющих сла́ву Благоде́теля всех Бо́га, с ни́миже се́рдца с коле́нами прикло́нше, ве́рою поклони́мся Свято́му Ду́ху, утверди́вшеся Спаси́телем душ на́ших.

Стих: Се́рдце чи́сто сози́жди во мне Бо́же, и Дух прав обнови́ во утро́бе мое́й.

Ны́не Уте́шительный Дух на вся́кую пло́ть излия́ся; от апо́стольских бо лико́в наче́нший, от тех по прича́стию ве́рным благода́ть простре́, и уверя́ет Свое́ держа́вное наи́тие во о́гненном ви́де, ученико́м раздая́й язы́ки, в песнопе́ние и сла́ву Бо́жию. Те́мже се́рдцы у́мно просвеща́еми, в ве́ре утверди́вшеся Святы́м Ду́хом, мо́лимся спасти́ся душа́м на́шим.

Стих: Не отве́ржи мене́ от Лица́ Твоего́, и Ду́ха Твоего́ Свята́го не отыми́ от Мене́.

Ны́не облача́тся держа́вою Христо́вы с высоты́ апо́столи; обновля́ет бо их Уте́шитель, в них обновля́яся та́инственным обновле́нием ра́зума; и́же стра́нными гла́сы, и высокоглаго́ливыми пропове́дающе присносу́щное Естество́ же и про́стое, триипоста́сное почита́ти, Благоде́теля всех Бо́га. Те́мже просвети́вшеся о́ных уче́ньми, Отцу́ поклони́мся с Сыно́м и Ду́хом, моля́щеся спасти́ся душа́м на́шим.

Сла́ва, и ны́не, глас 8: Прииди́те лю́дие, триипоста́сному Божеству́ поклони́мся, Сы́ну во Отце́, со Святы́м Ду́хом; Оте́ц бо безле́тно ро́ди Сы́на соприсносу́щна и сопресто́льна; и Дух Святы́й бе во Отце́ с Сыно́м прославля́емь, еди́на си́ла, еди́но существо́, еди́но Божество́. Ему́же покланя́ющеся вси глаго́лем: Святы́й Бо́же, вся соде́явый Сыно́м, соде́йством Свята́го Ду́ха; Святы́й Кре́пкий, И́мже Отца́ позна́хом, и Дух Святы́й прии́де в мир; Святы́й Безсме́ртный, уте́шительный Душе́, от Отца́ исходя́й, и в Сы́не почива́яй: Тро́ице Свята́я, сла́ва Тебе́. Та́же: Ны́не отпуща́еши: Трисвято́е. Пресвята́я Тро́ице: О́тче наш:

Та́же отпусти́тельный тропа́рь пра́здника.

Посе́м свяще́нник твори́т отпу́ст си́це:

И́же от О́тчих и Боже́ственных недр истощи́вый Себе́, и с Небесе́ на зе́млю соше́дый, и на́ше все восприе́мый естество́, и обожи́вый ѐ, по сих же на небеса́ па́ки возше́дый, и одесну́ю седы́й Бо́га и Отца́, Боже́ственнаго же и Свята́го и единосу́щнаго, и единоси́льнаго, и единосла́внаго и соприсносу́щнаго Ду́ха низпосла́вый на святы́я Своя́ ученики́ и апо́столы, и Сим просвети́вый у́бо их, те́ми же всю вселе́нную, Христо́с и́стинный Бог наш, моли́твами Пречи́стыя и Пренепоро́чныя святы́я Своея́ Ма́тере, святы́х сла́вных, прехва́льных богопропове́дников, и духоно́сных апо́столов, и всех святы́х, поми́лует и спасе́т нас, я́ко Благ и Человеколю́бец.

По е́же благослови́ти, начина́ем: Трисвято́е. Пресвята́я Тро́ице: О́тче наш: Я́ко Твое́ е́сть Ца́рство: Го́споди, поми́луй, 12. Прииди́те, поклони́мся: три́жды.

И псало́м 142: Го́споди, услы́ши моли́тву мою́:

И в конце́ пое́тся: Дух Твой благи́й наста́вит мя на зе́млю пра́ву.

Та́же вели́кую ектению́:

Ми́ром Го́споду помо́лимся. О свы́шнем ми́ре: О ми́ре всего́ ми́ра: О святе́м хра́ме: О Святе́йшем Прави́тельствующем Сино́де: О пособи́ти и покори́ти: О святе́й оби́тели: О благорастворе́нии возду́хов: О пла́вающих: О изба́витися нам: Заступи́, спаси́: Пресвяту́ю, Пречи́стую: Я́ко подоба́ет Тебе́ вся́кая сла́ва:

Та́же: Бог Госпо́дь: во глас 6.

И тропари́ сия́, глас то́йже:

Поми́луй нас Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Сла́ва: Го́споди поми́луй нас, на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враго́в на́ших; Ты бо еси́ Бог наш, и мы лю́дие Твои́, вси дела́ ру́ку Твое́ю, и и́мя Твое́ призыва́ем.

И ны́не, Богоро́дичен: Милосе́рдия две́ри отве́рзи нам благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да Христиа́нскаго.

Та́же начина́ем стихосло́вити псалмы́ со сладкопе́нием, во глас 6, пою́ще по стиху́, тропа́рь, глас 6:

Благоутро́бне, Долготерпели́ве и Всеще́дрый Го́споди, низпосли́ ми́лость Твою́ на лю́ди Твоя́. Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́. Поми́луй мя Го́споди, я́ко не́мощен е́смь: исцели́ мя Го́споди, я́ко смято́шася ко́сти моя́. И душа́ моя́ смяте́ся зело́; и Ты, Го́споди, доко́ле; Обрати́ся Го́споди: изба́ви ду́шу мою́, спаси́ мя ра́ди ми́лости Твоея́; Я́ко не́сть в сме́рти помина́яй Тебе́, во а́де же кто испове́стся Тебе́; Утруди́хся воздыха́нием мои́м, измы́ю на вся́ку но́щь ло́же мое́, слеза́ми мои́ми посте́лю мою́ омочу́. Смяте́ся от я́рости о́ко мое́, обетша́х во всех вразе́х мои́х. Отступи́те от Мене́ вси де́лающии беззако́ние, я́ко услы́ша Госпо́дь глас пла́ча моего́: Услы́ша Госпо́дь моле́ние мое́, Госпо́дь моли́тву мою́ прия́т.

Да постыдя́тся и смяту́тся вси врази́ мои́, да возвратя́тся, и устыдя́тся зело́ вско́ре.

Сла́ва: Я́ко Ще́дрый Го́споди, умилосе́рдися на лю́ди Твоя́ и я́ко Долготерпели́в примири́ся, и поми́луй ны.

И ны́не, Богоро́дичен: Пресвята́я Влады́чице Всепе́тая, Благослове́нная, я́ко Благолюби́вая, уте́ши и поми́луй ны.

Та́же глаго́лет пе́рвый свяще́нник еди́ну моли́тву лити́и, (си́речь о чесо́м проше́ние бу́дет, а́ще о ведре или́ о дожде, или́ о про́чих проше́ниих, а́ще случи́тся), та́же ектению́: Па́ки и па́ки ми́ром Го́споду помо́лимся. Заступи́, спаси́: Пресвяту́ю, Пречи́стую: Я́ко Твоя́ держа́ва, и Твое́ е́сть Ца́рство:

И начина́ем втору́ю статию́, во глас 6:

Ми́лостиве, поми́луй, поми́луй, поми́луй нас, Го́споди.

И стихосло́вится псало́м 101, со сладкопе́нием:

Го́споди, услы́ши моли́тву мою́, и во́пль мой к Тебе́ да прии́дет. Не отврати́ Лица́ Твоего́ от Мене́. В о́ньже а́ще де́нь скорблю́, приклони́ ко мне у́хо Твое́; В о́ньже а́ще де́нь призову́ Тя, ско́ро услы́ши мя. Я́ко исчезо́ша я́ко дым дни́е мои́, и ко́сти моя́ я́ко суши́ло сосхо́шася. Уя́звен бых я́ко трава́, и и́зсше се́рдце мое́, я́ко забы́х сне́сти хлеб мой. От гла́са воздыха́ния моего́, прильпе́ ко́сть моя́ пло́ти мое́й. Уподо́бихся нея́сыти пусты́нней, бых я́ко нощны́й вран на ны́рищи. Бдех, и бых я́ко пти́ца, осо́бящаяся на зде. Ве́сь де́нь поноша́ху ми врази́ мои́, и хва́лящии мя мно́ю кленя́хуся; Зане́ пе́пел я́ко хлеб ядя́х, и питие́ мое́ с пла́чем растворя́х. От Лица́ гне́ва Твоего́ и я́рости Твоея́, я́ко возне́с низве́ргл мя еси́. Дни́е мои́ я́ко се́нь уклони́шася, и аз я́ко се́но изсхо́х. Ты же Го́споди, во век пребыва́еши, и па́мять Твоя́ в род и род. Ты воскре́с уще́дриши Сио́на; Я́ко вре́мя уще́дрити его́, я́ко прии́де вре́мя. Я́ко благоволи́ша раби́ Твои́ ка́мение его́, и пе́рсть его́ уще́дрят. И убоя́тся язы́цы и́мене Госпо́дня, и вси ца́рие зе́мстии сла́вы Твоея́; Я́ко сози́ждет Госпо́дь Сио́на, и яви́тся во сла́ве Свое́й. Призре́ на моли́тву смире́нных, и не уничижи́ моле́ния их. Да напи́шется сие́ в род ин, и лю́дие зи́ждемии восхва́лят Го́спода. Я́ко прини́че с высоты́ святы́я Своея́, Госпо́дь с Небесе́ на зе́млю призре́. Услы́шати воздыха́ние окова́нных, разреши́ти сы́ны умерщвле́нных. Возвести́ти в Сио́не и́мя Госпо́дне, и хвалу́ Его́ в Иерусали́ме. Внегда́ собра́тися лю́дем вку́пе, и царе́м е́же рабо́тати Го́сподеви. Отвеща́ Ему́ на пути́ кре́пости Его́, умале́ние дней мои́х возвести́ ми. Не возведи́ мене́ во преполове́ние дней мои́х, в ро́де родо́в ле́та Твоя́. В нача́лех Ты Го́споди, зе́млю основа́л еси́, и дела́ ру́ку Твое́ю су́ть небеса́. Та поги́бнут, Ты же пребыва́еши. И вся я́ко ри́за обетша́ют; И я́ко оде́жду свие́ши я̀, и изменя́тся, Ты же то́йжде еси́, и ле́та Твоя́ не оскуде́ют. Сы́нове раб Твои́х вселя́тся, И се́мя их во век испра́вится.

Сла́ва: Я́ко Ще́дрый Го́споди, умилосе́рдися на лю́ди Твоя́, и я́ко Долготерпели́в, примири́ся, и поми́луй ны.

И ны́не, Богоро́дичен: Пресвята́я Влады́чице Всепе́тая, Благослове́нная, я́ко Благолюби́вая, уте́ши и поми́луй ны.

И вторы́й свяще́нник ину́ю моли́тву. Та́же ектения́ ма́лая: Па́ки и па́ки ми́ром Го́споду помо́лимся. Заступи́, спаси́: Пресвяту́ю, Пречи́стую: Я́ко Благ и Человеколю́бец:

И начина́ем пе́ти тропа́рь, глас 6:

Я́ко Ще́дрый Го́споди, умилосе́рдися на лю́ди Твоя́, я́ко Долготерпели́в примири́ся, и поми́луй ны.

И псало́м со сладкопе́нием:

Бо́же, приидо́ша язы́цы в достоя́ние Твое́. Оскверни́ша храм святы́й Твой. Положи́ша Иерусали́м я́ко ово́щное храни́лище. Положи́ша тру́пия раб Твои́х, бра́шна пти́цам небе́сным; Пло́ти преподо́бных Твои́х звере́м земны́м. Пролия́ша кро́вь их я́ко во́ду, О́крест Иерусали́ма, и не бе погреба́яй. Бы́хом поноше́ние сосе́дом на́шым. Подражне́ние и поруга́ние су́щым о́крест нас. Доко́ле Го́споди, прогне́ваешися до конца́; Разжже́тся я́ко о́гнь рве́ние Твое́; Проли́й гнев Твой на язы́ки незна́ющыя Тебе́; И на ца́рствия, я́же и́мене Твоего́ не призва́ша. Я́ко поядо́ша Иа́кова, и ме́сто его́ опустоши́ша. Не помяни́ на́ших беззако́ний пе́рвых. Ско́ро да предваря́т ны щедро́ты Твоя́ Го́споди, я́ко обнища́хом зело́. Помози́ нам Бо́же спаси́телю наш. Сла́вы ра́ди и́мене Твоего́ Го́споди, изба́ви нас. И очи́сти грехи́ на́шя и́мене ра́ди Твоего́. Да не когда́ реку́т язы́цы, где е́сть Бог их; И да уве́стся во язы́цех пред очи́ма на́шима, Отмще́ние кро́ве раб Твои́х пролиты́я. Да вни́дет пред тя воздыха́ние окова́нных.По вели́чию мы́шцы Твоея́ снабди́ сы́ны умерщвле́нных. Возда́ждь сосе́дом на́шым седмери́цею в не́дро их. Поноше́ние их, и́мже поноси́ша тя, Го́споди. Мы же лю́дие Твои́ и о́вцы па́жити Твоея́. Испове́мыся Тебе́ Бо́же во век. В род и род возвести́м хвалу́ Твою́.

Сла́ва: Я́ко Ще́дрый Го́споди, умилосе́рдися на лю́ди Твоя́ и я́ко Долготерпели́в примири́ся, и поми́луй ны.

И ны́не, Богоро́дичен: Пресвята́я Влады́чице Всепе́тая, Благослове́нная, я́ко Благолюби́вая, уте́ши, и поми́луй ны.

Та́же степе́нны, 1 антифо́н, глас 4:

От ю́ности моея́ мно́зи бо́рют мя стра́сти, но Сам мя заступи́ и спаси́, Спа́се мой, два́жды.

Ненави́дящии Сио́на посрами́теся от Го́спода, я́ко трава́ бо огне́м бу́дете изсо́хше, два́жды.

Сла́ва: Святы́м Ду́хом вся́ка душа́ живи́тся и чистото́ю возвыша́ется, светле́ется Тро́ическим еди́нством священнота́йне.

И ны́не: Святы́м Ду́хом излива́ются благода́тныя струи́, напая́юще вся́ку тва́рь ко оживле́нию.

Та́же: Вся́кое дыха́ние: Ева́нгелие по лити́и, и кано́н по лити́и, си́речь, я́коже предписа́ся по пе́рвом стихосло́вии, о чем проше́ние бу́дет, сицево́ и Ева́нгелие, и кано́н, и моли́тва. Та́же отпу́ст по обы́чаю.

Прокимен глас 4:

Бразды́ земны́я упо́й, и умно́жи жи́та ея́.

Стих: В ка́плях ея́ возвесели́тся возсия́ющи.

Соборного посла́ния Иа́ковля чте́ние.

Бра́тие, долготерпи́те до прише́ствия Госпо́дня; се, земледе́лец ждет честна́го плода́ от земли́, долготерпя́ о нем, до́ндеже прии́мет до́ждь ран и по́зден. Долготерпи́те у́бо и вы, утверди́те се́рдца ва́ша, я́ко прише́ствие Госпо́дне прибли́жися. Не воздыха́йте друг на дру́га, бра́тие, да не осужде́ни бу́дете: се, судия́ пред две́рьми стои́т. Илиа́ челове́к бе подобостра́стен нам, и моли́твою помоли́ся, да не бу́дет до́ждь: и не одожди́ по земли́ ле́та три и ме́сяц ше́сть. И па́ки помоли́ся, и не́бо до́ждь даде́, и земля́ прозябе́ плод свой. Аллиалуия.

Стих 1: Благослови́ши вене́ц ле́та бла́гости Твоея́, и по́ля Твоя́ насы́тятся ту́ка.

Стих 2: Разботе́ют кра́сная пусты́ни, и ра́достию хо́лми препоя́шутся.

Ева́нгелие от Матфе́я.

Во вре́мя о́но, приступи́ша ко Иису́су фарисе́е и саддукее, искуша́юще вопроси́ша Его́ зна́мение с Небесе́ показа́ти им. Он же отвеща́в рече́ им: ве́черу бы́вшу, глаго́лете, ве́дро: чермнуетбося не́бо. И у́тру, дне́сь зима́: чермнуетбося дряселуя не́бо. Лицеме́ри, лице́ у́бо Небесе́ уме́ете разсужда́ти, зна́мений же времено́м не мо́жете искуси́ти. Ами́нь глаго́лю вам, я́ко ни кото́рый проро́к прия́тен е́сть во оте́чествии свое́м. Пои́стинне же глаго́лю вам, мно́ги вдови́цы бе́ша во дни Илиины́ во Изра́или, егда́ заключи́ся не́бо три ле́та и ме́сяц ше́сть, я́ко бы́сть глад вели́к по всей земли́. И ни ко еди́ной их по́слан бы́сть Илиа́, то́кмо в Саре́пту Сидо́нскую к жене́ вдови́це. Ре́ша же ему́ иуде́е: ко́е у́бо ты твори́ши зна́мение, да ви́дим, и ве́ру и́мем Тебе́: что де́лаеши? Отцы́ на́ши ядо́ша ма́нну в пусты́ни, я́коже е́сть пи́сано: хлеб с Небесе́ даст им я́сти. Рече́ у́бо им Иису́с: ами́нь, ами́нь глаго́лю вам, не Моисе́й даде́ вам хлеб с Небесе́, но Оте́ц мой даст вам хле́ба и́стиннаго с Небесе́. Хлеб бо Бо́жий е́сть сходя́й с Небесе́ и дая́й живо́т ми́ру.

Кано́н моле́бен к Человеколю́бцу Го́споду в бездо́ждие, его́же краестро́чие: Да́ждь до́ждь земле́ жа́ждущей, Спа́се.

Пе́снь 1. Ирмо́с: Гряди́те лю́дие:

Приими́ Спа́се моле́ние от недосто́йных на́ших уст, и низпосли́ с Небесе́ земли́ дожди́ плодоно́сны, Человеколю́бец сый и Многоми́лостив.

Очи́сти ны́не Го́споди, грехи́ на́шя, и гнев отврати́, и́же на ны Спа́се, наведен по пра́вде, и пода́ждь с Небесе́ дожди́ водны́я земли́.

Сла́ва: Прииди́те челове́цы, воспла́чем к Бо́гу всех, во умиле́нии зову́ще: про́сти Человеколю́бче, на́шя прегреше́ния, и посли́ с Небесе́ дожди́ жа́ждущей земли́.

И ны́не, Богоро́дичен:

Свет тобо́ю позна́хом, Богороди́тельнице; те́мже Тя мо́лим и милися де́ем, моля́щи не преста́й Творца́ и Сы́на твоего́, посла́ти земли́ до́ждь.

Катава́сия по вся́кой пе́сни:

Изба́ви от бед рабы́: и

Спаси́ от бед рабы́:

Пе́снь 3. Ирмо́с: Утверди́ нас в Тебе́ Го́споди:

Всю тва́рь дла́нию содержа́й Го́споди, услы́ши я́ко Щедр моле́ния рабо́в Твои́х, и низпосли́ во́ду на всю зе́млю.

Сый Благ и Благопремени́тель, я́ко имы́й бе́здну благоутро́бия, не пре́зри моле́ния на́шя, но посли́ нам ми́рный до́ждь.

Сла́ва: Бога́тство, е́же нам дал еси́, иждихом блу́дно: но я́ко име́яй Го́споди, бе́здну благоутро́бия, и Оте́ц благ сый умили́ся, и дожди́ ле́тныя пода́ждь земли́.

И ны́не, Богоро́дичен: Я́ко иму́щая Чи́стая к Человеколю́бцу Сы́ну Твоему́ благоприя́тное дерзнове́ние, умоли́ да́тися земли́ дожде́м плодоносным, хода́тайствы твои́ми.

Пе́снь 4. Ирмо́с: Пою́ Тя, слу́хом бо Го́споди:

Свы́ше при́зри, Бла́же, согре́шшия, и да́руй Го́споди, ми́лость Твою́ по всей земли́, и низпосли́, мо́лимся, бога́тно ми́лости Твоя́, Человеколю́бче.

На́йде на ны Человеколю́бче, согреши́вшия гнев Твой, небеса́ заключи́ не да́ти дожде́в земли́ Твое́й: те́мже мо́лим Тя раби́ Твои́, да не я́ростию Твое́ю, Сло́ве, нака́жеши нас.

Сла́ва: Растворе́ние прелага́яй, Го́споди, возду́ха повеле́нием Твои́м, во́льный да́руй до́ждь нам, приноси́ти плоды́ изобильныя посыла́яй, вся́кое живо́тно насыща́ти благоволе́нием Твои́м.

И ны́не, Богоро́дичен:

Ты, Ма́ти Богоро́дице была́ еси́ (Бо́га) на́шего, те́мже ве́рою вси мо́лим тя, Влады́чице, я́ко иму́щую дерзнове́ние: Того́ моли́ о всех нас, е́же низпосати во́ду по всей земли́.

Пе́снь 5. Ирмо́с: Све́та Пода́телю:

Моли́твами Спа́се безпло́тных, благосе́рдно услы́ши всех нас, при́сно моля́щихся, и да́ждь до́ждь земле́ Твое́й жа́ждущей, я́ко еди́н Человеколю́бец.

Двоенадеся́тице ученико́в, со страда́льцы к Бо́гу моли́тву о нас твори́те, я́ко да изба́вит нас от вся́кия ну́жды, гне́ва же и ско́рби.

Сла́ва: Бу́ди нам Благосе́рдый во вре́мя искуше́ний Го́споди, и преще́ния належа́щаго спаси́ нас и посли́ земли́ Твое́й до́ждь во́лен.

И ны́не, Богоро́дичен:

Вси Хода́таицу Тя ны́не к Бо́гу земноро́днии и́мамы, я́ко вои́стинну; Те́мже мо́лимся, кро́вом Твои́м, Чи́стая, град твой спаса́й от плене́ния.

Пе́снь 6. Ирмо́с: В бе́здне грехо́вней:

Мно́жество му́чеников моли́те, я́ко иму́щии ко Го́споду дерзнове́ние мно́гое, ны́не до́ждь дарова́ти, и плод изоби́лия по всей земли́.

Мо́лимся моли́твами Твои́х ученико́в, осла́би, оста́ви Го́споди, грехи́ на́шя, и гнев отврати́ от нас, и пода́ждь земли́ до́ждь.

Сла́ва: Мо́лим Влады́ко Го́споди Тебе́, я́ко Блага́го Человеколю́бца, любо́вию душе́вною: пощади́в нас, и да́руй дожди́ плодоно́сны жа́ждущей земли́.

И ны́не, Богоро́дичен: Моли́ти не преста́й мо́лимся, Сы́на Твоего́ Пречи́стая Богороди́тельнице, о нас рабе́х Твои́х умири́ти, и спасти́ от вся́каго гне́ва.

Пе́снь 7. Ирмо́с: Те́лу злато́му прему́дрыя де́ти:

Душа́ми Бла́же госпо́дствующа все́ми, Тебе́ ве́дуще мо́лим, пощади́, про́сти , я́ко Благ и Человеколю́бец, и настоя́щаго пра́веднаго преще́ния нас изба́ви, и да́руй я́ко Благ дожди́ жа́ждущей земли́.

Я́коже иногда́ Манасси́ю от живо́тна ме́днаго пока́явшагося Спа́се, изба́вил еси́, и спасл еси́ от смертоно́снаго слу́чая, Благоутро́бне, Ще́дре, пода́ждь и нам ми́лости Твоя́, и сохрани́ нас от губи́тельства и тру́са.

Сла́ва: Умилосе́рдися ны́не на ны я́ко Благ и Ми́лостив, и́бо согреши́хом, беззако́нновахом, и непра́вдовахом вси. Те́мже мо́лим Тя со стра́хом: не гне́вом Твои́м, Человеколю́бче, накажи́ при́чет и лю́ди, но во́ду посли́ земли́.

И ны́не, Богоро́дичен:

Тебе́ вси челове́цы прибе́жище тве́рдое, и ору́жие необори́мое, Богороди́тельнице, ве́мы, и мо́лим рабы́ Твои́: изба́ви преще́ния ва́рварскаго лю́ди и град Твой от гла́да же и губи́тельства, тру́са и вся́кия тли.

Пе́снь 8. Ирмо́с: В пе́щь о́гненную:

Илия́ сло́вом до́ждь держи́т на земли́, и па́ки сло́вом с Небесе́ низво́дит. Тем же мо́лим Тя: того́ моли́твами, Ще́дре, посли́ дожди́ водны́я земли́ с Небесе́.

С безпло́тных ли́ки, апо́столов, проро́ков же и му́чеников, свяще́нников собо́р, и преподо́бных мно́жество, я́ко Созда́теля всех и Го́спода, Тебе́ мо́лит спасти́ пою́щих Тя.

Сла́ва: Я́коже Ио́ну от зве́ря и мо́ря я́ко Бог изба́вил еси́, Дании́ла от ро́ва и звере́й, Бла́же; та́ко и ны́не услы́ши рабы́ Твоя́, и изба́ви от вся́кия ну́жды лю́ди Твоя́.

И ны́не, Богоро́дичен: Тебе́ ро́ждшую Иису́се Богоро́дицу на моли́тву ны́не подвиза́ем, уще́дрити и спасти́ люде́й согреши́вшия лю́ди, и па́ки любо́вию к Тебе́ прибега́ющия и превознося́щия во вся ве́ки.

Пе́снь 9. Ирмо́с: От Бо́га, Бо́га Сло́ва:

Земле́ жа́ждущей Ще́дре, и нам прося́щим Твоего́ человеколю́бия Бла́же, ми́лостив Влады́ко, яви́ся, я́ко Бог Вседержи́тель, и да́руй нам я́ко Благ дожди́ плодоно́сны, и спаси́ души́ на́шя.

Поми́луй, Ми́лостиве, ру́ку Твое́ю де́ло, про́сти нас я́ко Благ, не я́ростию Твое́ю обличи́ люде́й, но приклони́ у́хо Твое́, и вонми́ моли́тве на́шей, и пода́ждь земли́ Твое́й дожди́ водны́я, Го́споди.

Сла́ва: Изба́ви от язы́к и ва́рваров, и вся́каго супоста́та град Твой, и вся лю́ди, и дожди́ нам да́руй плодоно́сны Ще́дре, во изоби́лие всех плодо́в, и спасе́ние низпосли́, Человеколю́бче.

И ны́не, Богоро́дичен: Тебе́ прообразу́ющи халде́йская пе́щь, Богоро́дице, о́троки росо́ю прохлажда́ше, посреде́ пла́мене ликовству́ющыя; ны́не же и нас, я́ко в пещи́ о́гненней горя́щих су́шею, дожде́м прохлади́ Влады́чице, и спаси́ рабы́ Твоя́ Твои́ми моли́твами, Ма́ти Бо́га Человеколю́бца.

После́дование о су́хости бездо́ждия

Ектения́ от диа́кона:

Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй.

Го́споди поми́луй, три́жды.

Не хотя́й сме́рти гре́шнаго, но ожида́яй обраще́ния и покая́ния его́, услы́ши нас Тебе́ моля́щих.

Го́споди поми́луй, три́жды.

Возводя́й о́блаки от после́дних земли́, повели́ тем пода́ти до́ждь ми́рен на ню, мо́лимтися.

Го́споди поми́луй, три́жды.

Призыва́яй во́ду морску́ю, излива́яй ю̀ на лице́ всея́ земли́, низпосли́ благослове́ние Твое́ на ны моля́щияся Тебе́.

Го́споди поми́луй, три́жды.

Одева́яй не́бо о́блаки, и уготовля́яй земли́ до́ждь, низпосли́ нам ми́лости Твоя́, моля́щымся Тебе́.

Го́споди поми́луй, три́жды.

Прозяба́яй траву́ ското́м, и злак на слу́жбу челове́ком, спаси́ челове́ки со скоты́, Тебе́ моля́щыяся.

Го́споди поми́луй, три́жды.

До́ждь во́лен и ту́чу ми́рную пода́ждь земли́, и спаси́ вся́ческая Человеколю́бче, и нас моля́щымся Тебе́.

Го́споди поми́луй, три́жды.

Низпосли́ дожди́ Твоя́ на тре́бующая и прося́щая ме́ста, Человеколю́бче, нам моля́щымся Тебе́.

Го́споди поми́луй, три́жды.

Ще́дре и Ми́лостиве, уще́дри и возвесели́ нас Человеколю́бче, моля́щихся Тебе́.

Го́споди поми́луй, три́жды.

Услы́ши ны Бо́же, я́ко бла́га ми́лость Твоя́, и поми́луй ны Твои́м благоутро́бием, моля́щихся Тебе́.

Го́споди поми́луй, три́жды. Возгла́с:

Я́ко ми́лостив и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Еще́ мо́лимся о е́же сохрани́тися гра́ду сему́, и вся́кому гра́ду и стране́, от гла́да, губи́тельства, тру́са, пото́па, огня́, меча́, пруга, гра́да, наше́ствия иноплеме́нников, и междоусо́бныя бра́ни, и внеза́пныя сме́рти; и о е́же ми́лостиву, благоветливу, и благоприменительну бы́ти Благо́му и Человеколю́бцу Бо́гу о гресе́х на́ших, е́же отврати́ти и расточи́ти вся́кий гнев на ны дви́жимый, и изба́вити нас от належа́щаго пра́веднаго Своего́ преще́ния; и о е́же низпосла́ти нам до́ждь ми́рный, и одожди́ти земли́ до́ждь бла́гости, и поми́ловати нас моля́щихся Ему́.

Го́споди поми́луй, 40.

Услы́ши ны Бо́же Спаси́телю наш, упова́ние всех конце́в земли́, и су́щих в мо́ри дале́че, и ми́лостив ми́лостив бу́ди Влады́ко, о гресе́х на́ших, и поми́луй ны; ми́лостив бо и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в. Лик: Ами́нь.

Моли́тва в бездо́ждие, творе́ние Ка́ллиста, патриа́рха Константинопо́льскаго

Моли́тва пе́рвая.

Го́споду помо́лимся.

Влады́ко Го́споди Бо́же наш, послу́шавый Илию́ Фесви́тянина ре́вности ра́ди его́ к Тебе́, и во вре́мя посыла́емому земли́ дождю́ удержа́тися повеле́вый, та́же па́ки моли́твою его́ до́ждь плодоно́сный ей дарова́вый; Сам, Влады́ко всех, от сама́го Твоего́ благосе́рдия умоля́емь, до́ждь во́лен да́ждь насле́дию Твоему́; и согреше́нная на́ми презре́в, дожди́ Твоя́ низпосли́ на тре́бующая и прося́щая ме́ста. Возвесели́ лице́ земли́, ни́щих ра́ди люде́й Твои́х, и младе́нцев, и ското́в и ины́х всех; зане́ к Тебе́ ча́ют, е́же да́ти пи́щу во бла́го вре́мя.

Ты бо еси́ Бог наш, Бог е́же ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва 2, того́жде.

Го́споду помо́лимся.

Го́споди Бо́же Вседержи́телю, возводя́й о́блаки от после́дних земли́, мо́лнии в до́ждь сотвори́вый, изводя́й ве́тры от сокро́вищ Свои́х, призыва́яй во́ду морску́ю, и пролива́яй сию́ на лице́ всея́ земли́; Тебе́ мо́лимся, и Тебе́ милися де́ем, испове́дающе грехи́ на́шя, и от Тебе́ бога́тыя ми́лости прося́ще: запове́ждь о́блаком е́же одожди́ти до́ждь, уще́дри вся земны́я Твоя́ умилосе́рдися на ста́рцы, и ю́ноты, и младе́нцы ссущия сосцы́, на рабы́ Твоя́, и на рабы́ни, сы́ны и дще́ри, и на вся скоты́ земли́, да изведе́т нам хлеб в сне́дь, и злак скотам. Приими́ моле́ния всех люде́й Твои́х, и не отри́ни воздыха́ния убо́гих, ниже́ я́ростию Твое́ю не обличи́ши нас, ниже́ гне́вом Твои́м нака́жеши нас, ниже́ да растли́ши гла́дом, и жа́ждею лю́ди Твоя́; всех бо о́чи на Тя упова́ют, прия́ти от Тебе́ пи́щу во бла́го вре́мя, на Тя наде́емся, и ра́зве Тебе́ ино́го не ве́мы, от Тебе́ богатые ми́лости ожида́ем. Я́ко Благ и Человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва 3 того́жде.

Го́споду помо́лимся.

Го́споди Бо́же наш, ве́мы, я́ко недосто́йни есмы́ Твои́х щедро́т, и не́смы досто́йни возвести́ о́чи на́ши, и зре́ти на Не́бо, и ста́ти пред Тобо́ю, и проше́ния на́шя глаго́лати к Тебе́; ко́е бо добро́ сотвори́хом, да и проше́ния получи́м? И́бо Твоея́ ра́ди безме́рныя бла́гости, от небытия́ нас во е́же бы́ти приве́д, о́бразом Твои́м поче́л еси́, и тва́рь всю нам покори́л еси́; но мы толи́ко облагоде́тельствовани бы́вше, я́коже врази́ представихомся, и Тебе́ Благоде́теля за́поведи презре́хом, и житие́ порочно, и мы́сль скве́рну и нечи́сту стяжа́хом. И не то́чию Твою́ любо́вь отверго́хом, но и я́коже зве́рие друг на дру́га носимся, и пло́ти друг дру́га снеда́ем лихоимственными о́бразы, и непра́ведным произволе́нием на́шим; ка́ко у́бо досто́йни есмы́ Твои́х благодетельств восприя́ти? Ты бо Пра́веден, мы непра́веднии; Ты лю́биши, мы враждуем; Ты благоутро́бен, мы неблагоутробни; Ты Благоде́тель, мы хи́щницы. Ко́е обще́ние к Тебе́ и́мамы, да и Твои́х благи́х приобщи́мся? Испове́дуем пра́вду Твою́, познава́ем осужде́ние на́ше, пропове́дуем благодея́ния Твоя́, тмам сме́ртей пови́нни есмы́; се под Твое́ю действи́тельною, и вся содержа́щею руко́ю пребыва́ем. Удо́бно е́сть Твое́й всесильной ру́це, я́ко во мгнове́ние о́ка погуби́ти нас; и ели́ко от на́шего наме́рения и жития́, пра́ведно е́сть нам па́губе преда́тися, Пра́веднейший Судие́; но Твое́й непобеди́мей бла́гости, и неизрече́нней благосты́ни, не́сть вся́ко досто́йно, человеколюбнейший Влады́ко. Сего́ ра́ди на неизсле́димое Твое́ милосе́рдие, и непамятозлобную Твою́ утро́бу дерза́юще, приступа́ем к Тебе́ Благоде́телю, неразу́мнии и неблагода́рнии; не преда́ждь нас грех ра́ди на́ших в ру́це су́хости, ниже́ беззако́ний ра́ди на́ших сокруши́ши нас у́зами гла́да, но бла́гости ра́ди Твоея́ пода́ждь земли́, ю́же определи́л еси́, и насле́дию Твоему́, до́ждь во́лен, и испо́лни не́дра земна́я живородными Твои́ми вода́ми. Се бо предлежи́т сия́ я́коже ма́ти, изсуше́ны иму́щая сосцы́, я́коже бо о́ныя сосцы́ млека́ лиша́ющеся, сме́рть прино́сят младе́нцу; си́це и земля́ бразды́ своя́ неприча́стны вла́жности иму́щи, увядание твори́т зла́ку, и растле́ние рождениям свои́м прино́сит, и губи́тельство нам претительное и сме́рть; и́бо от су́хости зной, а́ки не́кая разжигающая огневца, прозябе́ния увяди́вый, поги́бель провозвеща́ет рожде́нием ея́. Но ми́лостью Твое́ю посети́ ю̀, и водны́ми о́блаки возду́х благораствори, и бога́тым Твои́м дожде́м земли́ ороси́, и прозябе́ния ея́ оживи́, и возвеянием добрейших ве́тров плоды́ це́лы и по́лны сотвори́, и умно́жи я̀ благоутрбием Твои́м; те́ми бо определи́л еси́ теле́сный живо́т содержа́ти. А́ще бо не Ты во́льными Твои́ми дожди́ да́си бла́гость, земля́ на́шя не даст плода́ своего́; но мно́жества ра́ди щедро́т Твои́х, услы́ши моле́ние нас недосто́йных рабо́в Твои́х. Ты бо еси́ Исто́чник ми́лости, и благи́х Пода́тель, и Тебе́ сла́ву возсыла́ем, со Безнача́льным Твои́м Отце́м, и с Пресвяты́м, и благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

Моли́тва 4, того́жде.

Го́споди, Го́споди, проро́ком Твои́м Илие́ю разреши́вый сухость, и тече́нием дожде́в лице́ земли́ одожди́вый, и оби́лием плодо́в напита́вый лю́ди Твоя́ бога́тно, Сам и ны́не есте́ственною Твое́ю благосты́нею умоля́ем, да́руй земли́ дожди́ ми́рны, во плодоно́сие ле́тных плодо́в; Ты бо еси́ во́ды в ме́ста их устро́ивый, и зе́млю и́ми покрыва́емую ви́диму сотвори́вый. Ты еси́ повеле́вый ей разли́чные изращати плоды́, в наслажде́ние на́ше. Ты еси́ греха́ ра́ди и́же челове́ков, исто́чники бездн разве́рзый, и хля́би отве́рзый небе́сныя, и лице́ земли́ наводнивый во истребле́ние вся́кия пло́ти. Ты еси́ вода́ми покрыва́яй превы́спренная Твоя́. Ты еси́ о́блаки возвыша́яй, и сим повелева́яй дожде́вныя испуща́ти ка́пли. Ты еси́ возводя́й во́ду морску́ю, и излива́яй на лице́ земли́. Ты еси́ дожди́ определи́вый, и дожди́ во́льныя отлучи́вый, и ре́ки вод наполня́яй, и наполня́яй зе́млю, и упова́яй бразды́ ея́, во умноже́ние кра́сных ея́ плодо́в. Ты еси́ раздели́вый мо́ре, и реку́ проходиму соде́лавый, и во́ду из ка́мене источи́вый, и го́ресть водну́ю в сла́дость преложи́вый; ве́сть водно́е естество́ своего́ Творца́, зна́ет своего́ Влады́ку, не не ве́сть до́лжное свое́ служе́ние. А́ще у́зрит Тебе́ Влады́ку гневающагося на ны, или́ безме́рно дви́жимо, поги́бель соде́ловает, или́ спрятаемое уде́рживается, и сухость вмеще́ние е́млет, и пламенови́дный возду́х быва́ет, и земна́я прозябе́ния увяда́ют, и мы в ру́це беды́ впа́даем; а́ще же па́ки ви́дит Тебе́ человеколю́бца Бо́га, благоуве́тлива, и благопремени́тельна, дожди́ уготовля́ет, и ту́чи на зе́млю низносятся, и возду́х благодышущий быва́ет, и земля́ Твое́ повеле́ние услы́шавши, изобильныя плоды́ от свои́х боко́в прозяба́ет. Тебе́ у́бо Творца́ и Созда́теля всех мо́лим, глаго́люще: поми́луй нас Го́споди поми́луй нас; помяни́, я́ко дела́ ру́ку Твое́ю есмы́. Вонми́ неможе́нию естества́ на́шего, я́ко Ты сотвори́л еси́ нас, ви́ждь птиц стена́ние, ското́в вопиение, младе́нческий плач, ю́нош во́пль, ста́рых окая́нство, сиро́т лише́ние, вдови́ц уедине́ние, убо́гих недоста́точество, и всех люде́й Твои́х моле́бный глас, и посети́ зе́млю, и упо́й ю̀ тучными дожди́; мокроты́ бо лишающися, свои́м у́бо прозябе́нием увядание, челове́ком же и ското́м пагубою прети́т. Водо́ю па́губу навед иногда́, помяну́л еси́ Но́я носимого в ковче́зе, от безме́рных вод о́ных. Помяну́л же еси́ его́ и пти́цы, и скоты́, и зве́ри, и ползающая, и наве́л еси́ дух на зе́млю, и преста́ вода́; и Но́я, и с ним живо́тная я́коже се́мя соблю́л еси́, в бытие́ втора́го ми́ра. И ны́не содержа́щею су́хостию возду́х, гла́дом прещаяй и сме́ртию, помяни́ упова́ющыя на Тя лю́ди; помяни́ и пти́цы, помяни́ и скоты́, и дух росы́ наведи́, и сухость да преста́нет, и се́мена земли́ сотвори́ в воспита́ние челове́ков же и живо́тных, и вся па́ки е́же от Тебе́ про́мысла сподо́би. Ты бо еси́ прозяба́яй траву́ ското́м, злак слу́жбе челове́ков, и Ты еси́ изводя́й хлеб от земли́, и вино́ источа́яй, и еле́ем умощаяй челове́ческая лица́; я́ко да подава́емым от Тебе́ благи́м во изоби́лии причаща́ющеся, в весе́лии се́рдца, просла́вим Твою́ бла́гость, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Моли́тва 5, того́жде.

Влады́ко Го́споди Иису́се Христе́ Бо́же наш, глаго́лом Свои́м все от небытия́ приведы́й, пе́рсть взе́мый от земли́, и созда́вый челове́ка, и душе́ю слове́сною, и о́бразом Твои́м почты́й того́, и реки́й: расти́теся и мно́житеся, и наполня́йте зе́млю. Дая́й ското́м пи́щу, и птенце́м вра́новым; и́же и в вели́цем и спаси́тельном пло́тию прише́ствии Твое́м, пре́жде у́бо седмию́, пото́м же пятию́ хле́бы, ты́сящи насы́тил еси́ мно́гия; сам всеблаги́й Влады́ко, и Твоя́ лю́ди сия́ призыва́ющыя пресвято́е Твое́ и́мя, Твое́ю вседе́тельною и великодарною десни́цею бога́тно препита́й. При́зри Го́споди, на убо́гия лю́ди Твоя́, отверза́яй ру́ку Твою́, и насыща́яй вся́кое живо́тно благоволе́ния, уще́дри всех нас ми́лостивно. Ты бо Влады́ко Человеколю́бче, еди́н еси́ Оте́ц всех нас, и к Тебе́ еди́ному о́чи возводи́м, я́ко отдое́ное на ма́терь свою́; Твое́ е́сть сло́во преблаги́й Влады́ко: проси́те, и да́стся вам; ищи́те и обря́щете. Пода́ждь у́бо прося́щым ны́не Влады́ко, с духо́вною пи́щею, и ну́ждную пло́ти, и препита́й а́лчущыя Твоя́ лю́ди, дожди́ временны, и благорастворе́ние возду́хов, и плодо́в разли́чных изоби́лие земли́ да́руй; в не́мощи и губительстве, и огне́вицы, и неду́зех разли́чных бе́дствующих посети́. Изба́ви Го́споди, и́мя Твое́ призыва́ющий сей град, и вся́кий град и страну́, от гла́да, губи́тельства, тру́са, пото́па, огня́, меча́ и уби́йства; да́руяй нам ми́лости Твоя́, благода́тию безнача́льнаго и единосу́щнаго Твоего́ Отца́, и Пресвята́го и единоче́стнаго Твоего́ Ду́ха; моли́твами и моле́ньми преблагослове́нныя Богоро́дицы, богоглаго́ливых твои́х апо́столов, и всех святы́х Твои́х, ами́нь.

Моли́тва 6, о бездо́ждии.

Го́споди Иису́се Христе́ Бо́же наш, И́же на́шего ра́ди спасе́ния изво́ливый пло́ть носи́ти, да просла́виши чу́дно слове́сное естество́, неизрече́нным Твои́м благоутро́бием и бла́гостию, и и́же во и́стинном позна́нии обраща́ющыяся из глубины́ грехо́вныя про́сти ти обещаяй; егда́ бо к Тебе́ воззря́т со рабьим о́бразом, и и́стинным исполне́нием боже́ственных Твои́х за́поведей, тогда́ и ти́и со дерзнове́нием возмо́гут Тя Бо́га ми́лостиваго и благосе́рдаго име́ти. Ны́не у́бо оста́ви вся беззако́ния на́шя, и приклони́ к нам у́хо Твое́, и услы́ши ны смире́нныя и гре́шныя, я́коже иногда́ Фесви́тянина Илию́ услы́шал еси́, я́коже глаго́лом еди́ным связа́ти не́бо к целому́дрию непокори́вых о́ных люде́й. Та́же тем па́ки обы́чное человеколю́бие употреби́вый, облакам повеле́вый, зе́млю всю напои́л еси́ водо́ю благо́ю; си́це и ны́не па́ки моле́ньми того́ Твоего́ уго́дника, и те́плыми моли́твами пре́зри беззако́ния на́шя и грехи́, и приими́ моли́твы на́шя, и услы́ши нас в час сей те́пле моля́щихся, и разреши́ сухость сию́ земну́ю, испове́данием и во́плем люде́й Твои́х, и низпосли́ на ны до́ждь благи́й, я́ко да насы́тимся во́ды, и земля́ на́шя даст плоды́ во вре́мя благопотре́бно в пи́щу на́шу, и тех я́ве безслове́сных живо́тных. Ей, Го́споди Бо́же, наш, услы́ши ны гре́шныя, и недосто́йныя рабы́ Твоя́, и не пре́зри моле́ния на́шя, ниже́ да победи́т беззако́ние на́ше ми́лость Твою́, но приклони́ Го́споди, у́хо Твое́, и услы́ши ны. Ви́ждь сокруше́ние, и умилосе́рдися, ви́ждь от свята́го Твоего́ жили́ща, ви́ждь воздыха́ние убо́гих. Ви́ждь незре́лый во́зраст младе́нцев, зельнейшею жа́ждею изнуряемый. Ви́ждь незло́бивых младе́нцев озлобле́ние. Ви́ждь утро́бы ма́терни, ви́ждь сосцы́ изсушаемыя убие́нных младе́нцев. Ви́ждь состаре́вшихся и ю́ношы, я́коже вери́ги в руки́ беззако́нных изда́нныя. И пре́зри у́бо согреше́ния на́шя, я́же в ве́дении и не в ве́дении, я́же во уме́ и помышле́нии, и не отри́ни нас до конца́, не бо во́ды еди́ныя жа́ждею таем, но и тьма́ми ины́ми злы́ми, грех на́ших ра́ди; и к Тебе́ зрим, да налиется на нас до́ждь зре́лейший же и изобильнейший. Да и пра́ведный Твой гнев уставиши, лю́таго сего́ плене́ния. Обоя́ у́бо про́сим, и мо́лимся Тебе́, Человеколю́бче, да кла́дязи и се́ла на́шя напо́лниши во́ды, душе́вныя на́шя ни́вы в сы́тость напои́ши, и испо́лниши Твоея́ бла́гости; и кладези, си́речь се́рдца на́шя весе́лием, и неизрече́нною ра́достию и ра́дованием упоиши, и уставиши належа́щее на нас нестерпи́мое стремле́ние безбо́жных ага́рян. Ты бо еси́ Свободи́тель душ и теле́с на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва 7 того́жде Ка́ллиста патриа́рха о бездо́ждии и измене́нии ве́тров.

Го́споду помо́лимся.

Благи́й Человеколю́бче Го́споди, И́же тва́рь еди́ным сло́вом соде́лавый, и из нея́ челове́ка созда́вый, последи́ же неизрече́нным человеколю́бием падшего сего́, и раба́ греху́ бы́вша восприе́мый и освяти́вый, я́ко да не поги́бнет до конца́ де́ло ру́ку Твое́ю, да́вый же сему́ и Своя́ за́поведи в па́мять Твоего́ прише́ствия, и Твои́х повеле́ний, и Боже́ственнаго вочелове́чения. Те́мже труди́лся еси́, и подвиза́лся еси́, и взалка́л и вжадал еси́, испо́лнивый вся нас ра́ди я́ко ле́по челове́ческия, вше́дый же в кора́бль и по мо́рю ходи́вый, и во́лны ди́вия и зельности ве́тров обузда́вый, и вся пострада́ти претерпе́вый, да́же до Креста́ и сме́рти; да в не́мже пострада́л еси́, и искусился еси́, помо́жеши нам немощству́ющим. Сам и ны́не Царю́ Святы́й, е́же на́ше неможе́ние человеколю́бно восприе́мый, умилосе́рдися о нас обурева́емых зело́, и нуждь ску́достию изнуряемых; пода́ждь нам Твою́ бла́гость, упо́й зе́млю на́шу водо́ю чи́стою, к плодоноше́нию ея́ поле́зныя нам возду́хи да́руй. И я́коже иногда́ ученики́ Твоя́ погружа́емыя спасл еси́ от мо́ря и зельности ве́тров; та́коже и ны́не спаси́ ны от содержа́щаго нас обстоя́ния, уста́ви и ны́не морско́е свире́пство, укроти́ сопроти́вныя ду́хи Твои́м повеле́нием Боже́ственным, да́ждь нам тишину́ и упокое́ние от ско́рбных. Ей Го́споди Иису́се Христе́ Бо́же наш, ви́ждь и при́зри от свята́го жили́ща Твоего́ на виногра́д сей, и соверши́ ѝ, его́же насади́ десни́ца Твоя́, и да́ждь Ду́ха пра́ваго к премене́нию находя́щих на нас напа́стей, моли́твами ро́ждшия Тя Ма́тере, и всех святы́х Твои́х, ами́нь.