Последования и молитвы в бедствиях

Иере́ю ре́кшу: Благослове́н Бог наш: Чтец: Царю́ небе́сный: Трисвято́е. О́тче наш: Иере́й же: Я́ко Твое́ е́сть ца́рство: Чтец: Го́споди поми́луй, 12. Прииди́те, поклони́мся, три́жды, и псало́м 68: Спаси́, мя, Бо́же, я́ко внидо́ша во́ды до души́ моея́: По сконча́нии же псалма́, диа́кон глаго́лет ектению́ вели́кую: Ми́ром Го́споду помо́лимся. И про́чая да́же до О пла́вающих: и а́бие глаголит сия́:

О е́же не в гне́ве преще́ния Своего́ ума́лити нас, грех ра́ди и беззако́ний на́ших; но ми́лости и щедро́ты Своя́ от ве́ка су́щия помяну́ти, и поми́ловати нас, Го́споду помо́лимся.

О е́же помяну́ти заве́т Свой, и́же к Но́ю, и не растли́ти безго́дною мокро́тою, и мра́чным злорастворным возду́хом, и те́мною мгло́ю зе́млю, и ни́щих люде́й Свои́х; но ми́лостивно пощади́ти достоя́ние Свое́, и со́лнцу плодоносными луча́ми и мерною теплото́ю возсия́ти на земли́ повеле́ти, Го́споду помо́лимся.

О е́же повеле́ти о́блаком преста́ти от безгоднаго дождя́, и мра́ком разитися, све́тлости же со́лнечней возсия́ти, Го́споду помо́лимся.

О е́же пощади́ти лю́ди, и скоты́, и всю зе́млю сию́, и не растли́ти ю̀ безгодным дожде́вным лия́нием, Го́споду помо́лимся.

О е́же пода́ти благорастворенное ве́дро достоя́нию Своему́, и умно́жити плоды́ земны́я, Го́споду помо́лимся.

О е́же не по грехо́м на́шим возда́ти нам, и казни́ти нас; но по вели́цей ми́лости Свое́й и по мно́гим щедро́там Свои́м, яви́ти на нас ско́рое Свое́ человеколю́бие и бла́гость, Го́споду помо́лимся.

О е́же не растли́ти плоды́ и се́мена земна́я, грех ра́ди на́ших, безгодным дожде́вным лия́нием; но во́льным ведром пощади́ти, и угобзи́ти я̀ ни́щих ра́ди люде́й Свои́х, Го́споду помо́лимся.

О е́же благоприя́тным бы́ти моли́твам на́шим, и изба́вити нас от гла́да, губи́тельства, тру́са, пото́па, огня́, гра́да, меча́, наше́ствия иноплеме́нник, междоусо́бныя бра́ни и вся́кия смертоно́сныя ра́ны, Го́споду помо́лимся.

О е́же изба́витися нам: Заступи́, спаси́: Пресвяту́ю, Пречи́стую:

Возгла́с: Я́ко подоба́ет Тебе́ вся́кая сла́ва, че́сть и поклоне́ние: Бог Господь, и явмся нам:

На глас 2.

Тропа́рь, глас то́йже:

При́зри ми́лостивно Бо́же, на лю́ди согре́шшыя и не пре́зри в покая́нии к Тебе́ припа́дающих, но я́ко Благ поми́луй, и вско́ре пра́веднаго Твоего́ изба́ви преще́ния моли́твами Богоро́дицы, Еди́не Человеколю́бче.

Два́жды. Сла́ва, И ны́не, Богоро́дичен: Ско́рая ми́ру Помо́щнице, Де́во Богоро́дице, Твоего́ предста́тельства и кре́пкаго заступле́ния то́щно про́сим, умилосе́рдися на скорбя́щыя лю́ди, и умоли́ ми́лостиваго Сы́на Твоего́ и Бо́га от належа́щия нас изба́вити беды́, и пра́веднаго Своего́ преще́ния, еди́на в жена́х Благослове́нная.

Та́же псало́м 50: Поми́луй мя, Бо́же:

По сконча́нии же псалма́ а́бие певцы́ пою́т кано́н, глас 6.

Пе́снь 1. Ирмо́с:

Я́ко по су́ху пешеше́ствовав Изра́иль:

Припе́в: Поми́луй ны Го́споди, лю́ди согре́шшия.

Тропа́рь: Прииди́те ве́рнии, пе́снь но́ву воспои́м Влады́це Бо́гу, глаго́люще: умилосе́рдися я́ко щедр, и поми́луй безме́рно согре́шшия.

Сла́ва: Приими́ моли́твы и сле́зы Христе́ Бо́же, моля́щихся Тебе́ ны́не нас рабо́в Твои́х, и пода́ждь времена́ ведренна к плодоноше́нию земли́.

И ны́не: Ускори́ Влады́чице Мари́е, пречи́стеи Свои́ ру́це ми́лостивно возде́ти к Сы́ну Твоему́ и Бо́гу, е́же пода́ти ве́дро, и пи́щу ве́рным рабо́м Свои́м.

Катава́сия по вся́кой пе́сни: Изба́ви от бед рабы́ Твоя́, Ми́лостиве, я́ко мы уседно к Тебе́ прибега́ем, к ми́лостивому Изба́вителю, всех Влады́це Го́споду Иису́су.

Спаси́ от бед рабы́ Твоя́, Пресвята́я Богоро́дице Де́во, я́ко мы вси по Бо́зе к Тебе́ прибега́ем, я́ко к неруши́мей стене́ и предста́тельнице.

Пе́снь 3. Ирмо́с: Не́сть свят я́коже Ты:

Не я́ростию Твое́ю обличи́ нас Го́споди, я́коже проро́к вопие́т, ни гне́вом Твои́м накажи́ нас; моли́твами Пречи́стыя Твоея́ Ма́тере, изле́й на ны оби́льно ми́лости Твоя́.

Сла́ва: Новозванный язы́к со слеза́ми вопие́т Ти Влады́ко: умилосе́рдися я́ко щедр, и пода́ждь нам ве́дро и возду́хи благорастворны, оби́лие же и ве́лию ми́лость.

И ны́не, Богоро́дичен: Не пре́зри слез на́ших, Богоро́дице Влады́чице, и не ме́рзко Ти бу́ди воздыха́ние на́ше; но моли́ Сы́на Твоего́ приле́жно, пода́ти ве́дро земли́, и лю́дем Твои́м ве́лию ми́лость.

Катава́сия: Изба́ви от бед рабы́ Твоя́:

Диа́кон ектению́ вели́кую: Поми́луй нас Бо́же, по вели́цей ми́лости Твое́й:

Досто́йная ка́знем сотвори́хом, и пра́веден суд Твой пости́же нас Го́споди; но пощади́, пощади́ лю́ди согре́шшия, и отврати́ гнев Твой пра́ведно на ны дви́жимый, в покая́нии к Тебе́ припа́даем, и смире́нно мо́лим Тя, услы́ши и поми́луй.

Да не потопи́т нас Го́споди, бу́ря водна́я, и да не растли́ши зе́млю, и гла́дом умори́ши нас люде́й Твои́х; но я́ко благ, уста́ви водно́е лия́ние, и теплоте́ солнечной возсия́ти на земли́ я́ко си́лен повели́, приле́жно мо́лимтися Царю́ Пресвяты́й, услы́ши и поми́луй.

Ни́щих ра́ди люде́й Твои́х и скот, мра́чному возду́ху, и те́мной мгле разитися, и луча́ми со́лнечным возсия́ти повели́ Всеще́дрый Го́споди, да не безго́дно сконча́емся, мо́лимтися, ско́ро услы́ши и поми́луй.

Спаси́ нас от бре́ния Го́споди, и от тиме́ния глубины́, и от глубо́ких вод, да не исче́знут в суете́ дни́е на́ши, и ле́та на́шя в воздыха́ниих; но помяни́ заве́т Твой, и́же к Но́ю, и сотвори́ с на́ми по ми́лости Твое́й, сокруше́нным се́рдцем мо́лимтися, услы́ши и поми́луй.

В ско́рби и печа́ли на́шей, и смутной тузе́, к Тебе́ Го́споду Бо́гу на́шему умиле́нно вопие́м: да прии́дет к Тебе́ моли́тва на́шя, и да изы́дет из истле́ния живо́т наш, да не безго́дно исче́знет, ми́лостивно услы́ши глас ни́щих люде́й Твои́х, и человеколю́бно поми́луй.

Не на дугу́, ю́же в зна́мение заве́та на о́блацех поста́вил еси́ Го́споди, но на Твоя́ щедро́ты взира́ем, и Твою́ ми́лость привлещи́ и́щем, к Тебе́ бога́тому в ми́лости и безме́рному в щедро́тах се́рдцем сокруше́нным мо́лимтися: пода́ждь нам ме́рное и плодоно́сное ве́дро с благорастворенными возду́хи, и ско́ро я́ко Щедр услы́ши и поми́луй.

Иере́й возглаша́ет: Услы́ши ны, Бо́же Спаси́телю наш:

Седа́лен, глас 5: К Тебе́ Спа́се наш Иису́се Преве́чный Бо́же, прибега́ем гре́шнии раби́ Твои́, и со слеза́ми в покая́нии припа́дающе вопие́м Ти: пощади́, пощади́ Ще́дре, лю́ди безотве́тныя, и не растли́ нас безгодным дожде́вным лия́нием, и злорастворением возду́шным; но пода́ждь ве́дро, и умно́жи плоды́ земны́я, я́ко Человеколю́бец.

Сла́ва, И ны́не, Богоро́дичен:

Святе́йшую Херуви́мов, и вы́шшую небе́с, Препе́тая Богоро́дице, Тя вои́стинну испове́дующе, и́мамы гре́шнии Засту́пницу, и обрета́ем во вре́мя спасе́ние; тем не преста́й за ны моля́щи, Держа́во и Прибежице душа́м на́шим.

Пе́снь 4. Ирмо́с: Христо́с моя́ си́ла:

В ру́ку Твое́ю Влады́ко Христе́, содержи́ши превы́шше небе́сныя и поднебе́сныя во́ды и теплоту́ со́лнечную; те́мже мо́лим Тя: обое́ по ме́ре тре́бования да́руй на по́льзу рабо́м Твои́м.

Сла́ва: Испове́дающим Твое́ влады́чество, Строи́телю всея́ тва́ри Христе́, содержа́й ски́петро небе́сное, и окормля́яй всю тва́рь, пода́ждь благорастворныя возду́хи и оби́лие земли́, моли́твами Пречи́стыя Твоея́ Ма́тере.

И ны́не, Богоро́дичен: Вели́кое дерзнове́ние и́маши к Ро́ждшемуся из Тебе́, я́ко никто́же ин; тем, Влады́чице, моли́ся о рабе́х Твои́х, изба́витися нам от гла́да и от наше́ствия иноплеме́нник.

Пе́снь 5. Ирмо́с: Бо́жиим све́том Твои́м:

Пла́вающих пристанице и наде́ждо ненаде́жных Христе́, князе́й утвержде́ние, и всех христиа́н в беда́х ско́рый Послу́шателю, услы́ши и нас ны́не, и пода́ждь ве́дро к плодоноше́нию земли́.

Сла́ва: Врачу́ боля́щих, и скорбя́щих Уте́шителю, небе́сный Царю́ Христе́, при́зри с высоты́ свята́го Твоего́ жили́ща, и услы́ши пла́чь и стена́ние рабо́в Твои́х, и я́ко Щедр пода́ждь ве́дро к плодоноше́нию земли́.

И ны́не, Богоро́дичен: Ско́ро приими́ Госпоже́, моли́тву рабо́в Твои́х, не помина́ющи на́шя безчи́сленная зла́я; и испроси́ нам Де́во, ве́дро на по́льзу, к плодоноше́нию земли́.

Пе́снь 6. Ирмо́с: Жите́йское мо́ре:

Моле́нием проро́ка Твоего́ Го́споди, затвори́л еси́ небеса́ три ле́та и ме́сяцей ше́сть, к позна́нию и покая́нию проти́вных, его́же ны́не о нас, Го́споди, не истязуй, но ми́лостию Твое́ю уще́дри ны.

Сла́ва: Прии́мый разбо́йничо покая́ние Христе́, и того́ еди́нем часо́м спасы́й вопию́ща: помяни́ мя Спа́се, во Ца́рствии. И нас, ны́не в покая́нии Ти припа́дающих, пощади́ и поми́луй.

И ны́не, Богоро́дичен: Помоли́ся о нас Влады́чице к Сы́ну Твоему́ и Бо́гу, да не я́коже при Но́и лия́нием водны́м, грех ра́ди на́ших растли́т нас, но я́коже ниневи́тяны пока́явшыяся поми́лует.

Диа́кон ектению́ ма́лую обы́чную, иере́й возгла́с:

Я́ко Ты еси́ ца́рь ми́ра: И по возгла́се конда́к, глас 2:

Не отри́ни до конца́ согре́шшия лю́ди Твоя́, Влады́ко, ниже́ оста́ви ми́лости и щедро́ты Твоя́ о нас, но я́ко бе́здна сый щедро́т и милосе́рдия пучи́на, приими́ мольбы́ на́шя, и изба́ви нас от належа́щия беды́ и ну́жды: еди́н бо еси́ Благоуве́тлив.

Та́же, степе́нна, антифо́н 1, глас 6:

На Не́бо о́чи мои́ возвожу́ к Тебе́, Сло́ве, уще́дри мя, да жи́ву Тебе́.

Поми́луй нас уничиже́нных, устроя́я благопотре́бныя Твоя́ сосу́ды Сло́ве.

Свято́му Ду́ху, вся́кая всеспаси́тельная вина́, а́ще ко́ему сей по достоя́нию дхнет, ско́ро взе́млет от земны́х, восперя́ет, возраща́ет, устроя́ет горе́.

Та́же проки́мен, глас 4: Спаси́ мя, Бо́же, я́ко внидо́ша во́ды до души́ моея́.

Стих: Углебо́х в тиме́нии глубины́, и не́сть постоя́ния.

Та́же: Вся́кое дыха́ние:

От Матфе́я свята́го Ева́нгелиа чте́ние. Зача́ло 20.

Рече́ Госпо́дь: проси́те, и да́стся вам; ищи́те, и обря́щете: толцы́те, и отве́рзется вам. Всяк бо прося́й, прие́млет, и ища́й обрета́ет, и толку́щему отве́рзется. Или́ кто е́сть от вас челове́к, его́же а́ще воспросит сын его́ хле́ба, еда́ ка́мень пода́ст ему́? Или́ а́ще ры́бы про́сит, еда́ змию́ пода́ст ему́? А́ще у́бо вы, лука́ви су́ще, уме́ете дая́ния бла́га дая́ти ча́дом ва́шим, кольми́ па́че Оте́ц ваш Небе́сный, даст бла́га прося́щим у Него́.

Та́же, Сла́ва: О́тче, Сло́ве и Душе́, Тро́ице Свята́я, очи́сти мно́жество грехо́в на́ших.

И ны́не: Моли́твами Богоро́дицы, Ми́лостиве, очи́сти мно́жество согреше́ний на́ших.

Поми́луй мя Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Та́же пою́т стихи́ру сию́, глас 6:

Стра́шен еси́ Го́споди, и кто стерпи́т пра́ведный Твой гнев? Или́ кто Тебе́ умо́лит, Благи́й, о лю́дех согре́шших и отча́явшихся? То́кмо небе́снии а́нгели, нача́ла и вла́сти, престо́ли и госпо́дьствия, херуви́ми и серафи́ми, непреста́нно Тебе́ вопию́щии: свят, свят, свят еси́ Го́споди. Тем, Пресвяты́й Влады́ко, дела́ ру́ку Твое́ю не пре́зри, но за милосе́рдие Твоея́ ми́лости, спаси́ лю́ди Твоя́, и град погиба́ющий.

Сла́ва, И ны́не, Богоро́дичен:

Никто́же притека́яй к Тебе́ посра́млен от Тебе́ исхо́дит, Чи́стая Де́во Богоро́дице, но про́сит благода́ти, и прие́млет дарова́ние, к по́льзе проше́ния. Иере́й: Спаси́, Бо́же, лю́ди Твоя́: Лик: Го́споди поми́луй, 15. Возгла́с: Ми́лостию и щедро́тами:

Пе́снь 7. Ирмо́с: Росода́тельну у́бо пе́щь:

Никогда́же отлуча́йся нас Спа́се ще́дрый, я́ко па́стырь ове́ц Свои́х, но при́сно с на́ми неотсту́пно пребыва́я, от вся́ких бед свободи́ ве́рно Ти от се́рдца вопию́щих: благослове́н еси́ Бо́же, и препросла́вленный.

Сла́ва: Ты, Бо́же Всеси́льный и Царю́ Пресвяты́й, пропны́й Не́бо, я́ко ко́жу, и мо́ре песко́м огради́вый, посли́ нам теплоту́ со́лнечную, и благорастворе́нны возду́хи, ве́рно Ти вопию́щим: благослове́н еси́, Бо́же, и препросла́вленный.

И ны́не, Богоро́дичен: Научи́ Влады́чице, язы́к мой глаго́лати поле́зная, наде́жде всем конце́м земли́; и моли́ся Сы́ну Своему́ и Бо́гу, пода́ти ве́дро на земли́, и уще́дрити Христу́ вопию́щих: благослове́н еси́, Бо́же, и препросла́вленный.

Пе́снь 8 Ирмо́с: Из пла́мене преподо́бным:

Чии раби́ и созда́ние есмы́, не Твои́ ли, Преве́чный Бо́же? Услы́ши у́бо на́шя моли́твы худы́я, и испусти́ ве́дро на земли́, и ро́су поле́зную; да Тя превозно́сим во вся ве́ки.

Сла́ва: Рекл еси́ ми́лостивый Влады́ко, наказу́я нас к покая́нию: ищи́те, и обря́щете; толцы́те, и отве́рзется вам; проси́те, и прии́мете. Те́мже к Тебе́ припа́даем, и приле́жно мо́лим: пощади́ нас, Ми́лостиве, превознося́щих Тя во вся ве́ки.

И ны́не, Богоро́дичен: Чи́стая Влады́чице Богоро́дице, изба́ви моли́твами си́ лю́ди Своя́ от стра́сти и бра́ни вся́кия, подаю́щи оби́льныя ми́лости, и плоды́ на пи́щу чту́щим Тя, и превознося́щим во вся ве́ки.

Пе́снь 9. Ирмо́с: Бо́га челове́ком:

Па́вел пока́явся от гонительства, сосу́д избра́нен бы́сть Тебе́ Влады́це и Бо́гу всех; и мы гре́шнии наде́ющеся Твоему́ милосе́рдию в покая́нии Тебе́ вопие́м: про́сти вся согреше́ния на́шя, и посли́ ве́дро земли́, и ро́су благу́ю и поле́зную, моли́твами Пречи́стыя Твоея́ Ма́тере.

Сла́ва: Верхо́вный учени́к Твой Петр, три́жды отве́ргся Тебе́, пла́чем го́рьким обре́те у тебе́ Милосе́рде Христе́, проще́ние; и мы того́ ревну́юще покая́нию, Тебе́ во умиле́нии со слеза́ми вопие́м: согреши́хом, про́сти Милосе́рде, и изба́ви нас от вся́каго зла, моли́твами Пречи́стыя Твоея́ Ма́тере.

И ны́не, Богоро́дичен: Изба́ви ны, Пречи́стая от вся́каго зла́го обстоя́ния, и от безгоднаго лия́ния дожде́внаго, наше́дшаго ны́не на ны; и испроси́ свы́ше у Сы́на Ти (Твоего́?) и Бо́га, пода́ти благовре́менное ве́дро рабо́м Свои́м, и изоби́льный плод земны́й на пи́щу лю́дем, да Тя непреста́нно велича́ем.

Катава́сия: Та́же, Досто́йно е́сть: Трисвято́е. По О́тче наш: Тропа́рь: Поми́луй нас, Го́споди поми́луй нас: Сла́ва: Го́споди поми́луй нас: И ны́не: Милосе́рдия две́ри отве́рзи нам:

По сих же диа́кон глаго́лет ектению́ сию́:

Поми́луй нас, Бо́же, по вели́цей ми́лости Твое́й:

Еще́ мо́лимся о Благочести́вейшем, и про́чая.

Еще́ мо́лимся о Супру́ге Его́, и про́чая.

Еще́ мо́лимся о Святе́йшем прави́тельствующем Сино́де:

Еще́ мо́лимся, о е́же отврати́ти от нас всяк гнев Свой, пра́ведно дви́жимый на ны, и про́сти ти нам вся́кое согреше́ние, во́льное же и нево́льное, и поми́ловати нас, недосто́йных рабо́в Свои́х, в се́рдце сокруше́нном рцем вси: Го́споди, услы́ши и поми́луй.

Еще́ мо́лимся о е́же услы́шати Го́споду Бо́гу глас моли́твы на́шея, и поми́ловати нас, и посла́ти благовре́менное ве́дро на земли́, и уте́шити нас, ско́рбных рабо́в Свои́х, рцем вси со слеза́ми: услы́ши, Ми́лостиве, и поми́луй.

Собира́й во́ды во о́блацех от коне́ц земны́х, повеле́нием Твои́м удержи́ я̀, и пусти́ ве́дро на земли́, со умиле́нием мо́лимтися Всеще́дрый Влады́ко, услы́ши и ми́лостивно поми́луй.

Призыва́яй во́ду морску́ю, и сию́ па́ки всемогу́щею си́лою Твое́ю удержа́ти моги́й, и просвети́ти поднебе́сную, в покая́нии мо́лимтися Всеми́лостиве Го́споди, услы́ши и человеколю́бно поми́луй.

Ве́дро во́льное пусти́ Го́споди, на земли́, и от истле́ния ско́ро изба́ви нас, боле́зненным се́рдцем мо́лимтися, услы́ши и щедротно поми́луй.

Посеща́яй зе́млю и умножа́яй жи́та ея́; прозяба́яй же па́жить ското́м, и траву́ на слу́жбу челове́ком; поми́луй челове́ки и скоты́, и запрети́ безгодному дождевному лия́нию, со́лнцу же благовре́менно возсия́ти на земли́, и умно́жити плоды́ ея́ повели́; мо́лимтися Благоутро́бне Го́споди, услы́ши и я́ко Благ поми́луй.

Я́ко о́чи раб в ру́ку госпо́дий свои́х, та́ко о́чи на́ши к Тебе́ Бо́же наш, ве́рою взира́ют, до́ндеже уще́дриши ны; те́мже не погуби́ нас безме́рною мокро́тою, но ми́лостивно при́зри на ны ведром, и щедротно поми́луй.

Осиява́яй со́лнце на злы́я и благи́я, и подава́яй ве́дро, и ро́су благоплодоносну, и благорастворныя возду́хи на по́льзу созда́нию Твоему́, не я́ростию Твое́ю накажи́ нас; но ми́лостивно умно́жи се́мена земна́я и плоды́ ея́, в покая́нии мо́лимтися, Человеколю́бче Го́споди, услы́ши и я́ко Щедр поми́луй.

Одея́йся све́том я́ко ри́зою, возсия́й свет со́лнечный на земли́ на́шей, и изсуши́ изли́шнюю мокроту́ ея́, ко изобильному плодоноше́нию, моли́тися, услы́ши и ми́лостивно поми́луй.

Не помяни́ беззако́ний на́ших Влады́ко, а́ще бо беззако́ния на́зриши, никто́же постои́т пред Тобо́ю; но ско́ро да предваря́т ны щедро́ты Твоя́ Го́споди, я́ко обнища́хом зело́. Да не растли́т нас безведрие, и до конца́ да не погуби́т, мо́лимтися, ско́ро услы́ши и ми́лостивно поми́луй.

Упова́ние и спасе́ние правосла́вно в Тя ве́рующих Го́споди, изба́ви град сей (а́ще в монастыре́, глаго́ли сие́:) оби́тель сию́, (а́ще же в гра́де, сие́:) град сей, и всяк град и страну́, (а́ще же на селе́, сие́:) ве́сь сию́, от гла́да, губи́тельства, тру́са, пото́па, огня́, меча́, наше́ствия иноплеме́нных, и междоусо́бныя бра́ни, и вся́кия сметроносныя ра́ны, и ми́лостив, и тих, и благоуве́тлив бу́ди, Человеколю́бче, о гресе́х на́ших, и поми́луй нас; и отврати́ ве́сь гнев Твой пра́ведно дви́жимый на ны, и изба́ви нас належа́щаго пра́веднаго преще́ния Твоего́, и просвети́ благода́тию Твое́ю всю поднебе́сную к плодоноше́нию земли́, и ко окормлению жития́ на́шего, рцем вси со слеза́ми: Го́споди Святы́й, ско́ро услы́ши и ми́лостивно поми́луй.

И пою́т вси: Го́споди поми́луй, три́жды.

Иере́ю же не возгласи́вшу, диа́кон глаго́лет:

Со умиле́нием вси коле́на прекло́нше, Го́споду помо́лимся.

И отпе́вше три́жды, Го́споди поми́луй, преклоня́ют коле́на.

Иере́й же чтет моли́тву сию́ велегла́сно:

Влады́ко Го́споди Бо́же наш, дре́вле ревни́теля Илию́ проро́ка Твоего́ мольбу́ послу́шавый, и е́же на вре́мя до́ждь удержа́ти изво́ливый; и ны́не человеколюби́вый Тво́рче, и ми́лостивый Го́споди, при́зри и на нас смире́нных и недосто́йных рабо́в Твои́х смире́нныя мольбы́, и я́ко щедр пре́зри на́шя прегреше́ния, и умоле́н быв от сама́го Твоего́ человеколю́бия, пода́ждь ве́дро достоя́нию Твоему́, и со́лнце просвети́ на тре́бующия и прося́щия от Тебе́ ми́лости. Возвесели́ лице́ земли́ ни́щих ра́ди люде́й Твои́х, младе́нцев же и скот, и ины́х всех живо́тных, и́хже насыща́еши Твои́м благоволе́нием, и дае́ши пи́щу им во бла́го вре́мя. Ей, Го́споди Бо́же наш, не отри́ни вотще́ мольбу́ на́шу, ниже́ посрами́ нас от ча́яния на́шего, но пощади́ нас по ми́лости Твое́й, и посети́ щедро́тами Твои́ми; исчеза́ют бо всу́е дни́е на́ши, и оскудева́ет в боле́зни живо́т наш. Не погуби́ у́бо нас беззако́ний ра́ди на́ших, и́миже негодова́ние и я́рость Твою́ на себе́ привлеко́хом; но сотвори́ с на́ми по ти́хости Твое́й, и по мно́жеству ми́лости Твоея́. Се бо душе́ю сокруше́нною и ду́хом смире́нным пред Тобо́ю припа́даем, и я́ко раби́ непотре́бнии, па́че же бо́льшия ка́зни досто́йни, в покая́нии умиле́нно Тебе́ вопие́м: согреши́хом и беззако́нновахом, и прегреши́хом во всем, за́поведи Твоя́ преступающе, и сего́ ра́ди вся, я́же наво́диши на ны, и́стиною и судо́м наво́диши. Но не до конца́ тле́нию, гла́ду же и поги́бели преда́ждь нас, ниже́ да потопи́т нас бу́ря водна́я; но во гне́ве ми́лости помяни́, и ту́не щедро́т Твои́х ра́ди уми́лостивися, и Твое́ созда́ние и де́ло рук Твои́х я́ко Благ поми́луй, и от вся́каго зла ско́ро изба́ви.

Возгла́с: Твое́ бо е́сть е́же ми́ловати и спаса́ти нас Бо́же наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Диа́кон: Прему́дрость. Иере́й же или́ архиере́й: твори́т отпу́ст обы́чный дне, или́ пра́зднику.

О Христе́! Земли́ колеба́ние уста́ви вско́ре.

Глас 6. Пе́снь 1. Ирмо́с:

Я́ко по су́ху, пешеше́ствовав Изра́иль:

Ко́ль стра́шен гнев Твой, от него́же нас изба́ви Го́споди; не потреби́ в земли́ все воста́ние на́ше, я́ко благода́рно Тя при́сно сла́вим.

Ра́дуяся на́шему вы́ну всесовершенному исправле́нию Влады́ко, я́коже лист худ, сотрясаеши всю зе́млю, во стра́се Твое́м ве́рных утвержда́я Го́споди.

Изба́ви тру́са тяжча́йшаго всех нас, и не да́ждь Го́споди, поги́бнути до конца́ насле́дию Твоему́, мно́гими прогневающему злы́ми Тебе́ долготерпели́ваго.

И ны́не, Богоро́дичен: Ра́бски Тебе́ вопие́м, Ма́ти Бо́жия: обы́чныя утро́бы твоя́ на град и лю́ди ми́лостивно показу́ющи, тру́са тяжча́йшаго и тли всех свободи́.

Пе́снь 2. Ирмо́с: Ви́дите, ви́дите:

Стрясый призре́нием Твои́м всю зе́млю Всецарю́, ввел еси́ в страх на́шя помышле́ния; но осла́би Влады́ко Ще́дрый, гнев Твой, и не да́ждь во всеконе́чную поги́бель Твоя́ лю́ди.

Кто умо́лит Тя о лю́дех, разли́чными студа́ до́лги при́сно покрыва́емых, и поги́бнути ча́ющих твои́м гне́вом? От него́же нас Христе́, Твое́ю ми́лостию изми́.

Сла́ва:Яви́л еси́ страх Твой ны́не Христе́, стра́шным Твои́м прозре́нием, стрясый земли́ основа́ния; но обы́чно покажи́ па́ки, Ми́лостиве, ми́лость Твою́, да не поги́бнем лю́те.

И ны́не:

Кто кроме́ Тебе́ еди́ныя мо́жет, пренепоро́чная, чи́стая, Бо́га негодующаго на нас премени́ти? Те́мже моли́ся Пресвята́я, уста́вити ско́ро колеба́ние земли́, раждающе па́губу нам.

Пе́снь 3. Ирмо́с: Не́сть Свят, я́коже Ты:

Земля́ уязвля́ется, нам зле пребыва́ющим, и при́сно гнев Твой подвизающим на ны, Ще́дре Всецарю́, но пощади́, Влады́ко, рабы́ Твоя́.

Стрясый Го́споди, зе́млю, утверди́л еси́ па́ки; наказу́яй, обраща́яй неможе́ние на́ше, утверди́тися в Твое́м Боже́ственном стра́се хотя́, Преблаги́й.

Сла́ва: Ражда́ющих го́рькую сме́рть, и тру́сы тяжча́йшыя, и я́звы неисце́льныя грехо́в, бра́тие, убежи́м, и Бо́гу покая́ния о́бразы пока́жем.

И ны́не: Еди́на су́щая Блага́я, Преблаго́е Сло́во приле́жно умоли́, настоя́щаго тру́са и гне́ва изба́витися нам, Богоро́дице Чи́стая, мо́лимся.

Пе́снь 4. Ирмо́с: Христо́с моя́ си́ла:

Коле́блеши Го́споди зе́млю, хотя́ утвержде́нием и́стинным всем нам Влады́ко утвержда́тися, коле́блемым прило́ги льсти́ваго бори́теля.

Боже́ственным манове́нием Твои́м коле́блеши вся́ческая, и дви́жеши се́рдца на земли́ живу́щих Влады́ко; пра́веднаго у́бо Твоего́ гне́ва осла́би Го́споди, во́лны.

Сла́ва: Ниже́ отню́д иму́щым во уме́ страх Твой, устраша́еши колеба́нием всю зе́млю, еди́не благоутро́бне; но обы́чно на нас ми́лости Твоя́ удиви́.

И ны́не, Богоро́дичен: Храм тя, Влады́чице, Бо́жий ве́дуще, во святе́м хра́ме Твое́м руки́ уми́льно воздвиза́ем на моли́тву: ви́ждь озлобле́ние на́ше, и пода́ждь по́мощь.

Пе́снь 5. Ирмо́с: Бо́жиим све́том Твои́м:

И ты, се́рдце стрясися ны́не, зря́щи Бо́жие преще́ние надлежа́щее, и возопи́й: пощади́ лю́ди Твоя́ Влады́ко Го́споди, и уста́ви пра́ведный гнев Твой, Благоутро́бне.

Лю́ди и град, я́же стяжа́л еси́ Твое́ю кро́вию Иису́се, не преда́ждь в поги́бель, внегда́ смуща́еши зе́млю тру́сом стра́шным, лик апо́стольский мо́лит Тя.

Сла́ва: От путе́й Твои́х Влады́ко, пра́вых мы́слию укло́ншеся развращенною, в негодова́ние обраща́ем Тя, ми́лостиваго и непамятозло́бнаго; но ми́лостив и щедр бу́ди рабо́м Твои́м.

И ны́не: Ны́не по́мощи вре́мя прии́де, ны́не примире́нию потре́ба Чи́стая, к Сы́ну Твоему́ и Го́споду; я́ко да уще́дрит прирази́вшыяся ны, и належа́щаго гне́ва изба́вит.

Пе́снь 6. Ирмо́с: Жите́йское мо́ре:

Не иму́ще Влады́ко, дерзнове́ния моли́ти смире́ннии, высоту́ Твое́ю, избра́нныя Твоя́ а́нгелы на те́плое дви́жим моле́ние; те́ми гне́ва Твоего́ изми́ нас.

Ны́не позна́хом Го́споди, я́ко поми́ловал еси́ нас, и ника́коже спогребл еси́ под зе́млю паде́нием лю́тым, многосогреши́вшыя; те́мже Тебе́ благода́рно покланя́емся Христе́.

Сла́ва: Повелева́еши колеба́тися основа́нием земли́, я́ко да мы преста́нем смире́ннии колеба́тися доброде́телей, лу́чшаго стоя́ния, и стра́хом Твои́м Сло́ве, утверди́мся.

И ны́не: Свята́я Богоневе́сто, недоумевающыяся Твоя́ лю́ди ны́не уще́дри, и ма́терними Твои́ми мольба́ми, е́же на ны Бо́жие негодова́ние претвори́ вско́ре, мо́лим Тя.

Пе́снь 7. Ирмо́с: Росода́тельну у́бо пе́щь:

Препе́тый еси́ Го́споди, долготерпели́ве, я́ко не умертви́л еси́ рабы́ Твоя́ стрясением и колеба́нием стра́шным земли́; но устраши́л еси́ ищя́, е́же обрати́тися от зол, и жи́ти всем нам.

Стена́ние от се́рдца возсле́м, и сле́зы пролие́м, я́ко да ми́лостива Влады́ку возъимем Христа́, сокруши́ти тру́сом всех нас, умноже́ния ра́ди грехо́в претя́ща лю́те.

Увы́, воззове́м, и ру́це воздвижем к Бо́гу Вы́шнему, и преста́нем про́чее твори́ти лука́вая; и́бо Спас негоду́я, коле́блет всю зе́млю, утверди́ти хотя́ нас.

Богоро́дичен: Сотвори́ Пречи́стая, спасти́ся моли́твами Твои́ми, поги́бнути иму́щым гне́вом Бо́жиим, и я́ростию вели́кою и стра́шною, ны́не наше́дшаго преще́ния, мно́жества ра́ди мно́гих грехо́в на́ших.

Пе́снь 8. Ирмо́с: Из пла́мене преподо́бным:

Пра́ведному Твоему́ сему́ гне́ву Человеколю́бче, наше́дшу внеза́пу, смути́хомся и отча́янием всеконе́чным содержи́мы есмы́, негодующа Тя зря́ще на нас.

Воздеждем руки́ ве́рнии, и о́чи к еди́ному Влады́це, спаса́ти могу́щему, зову́ще: Христе́, я́рость Твою́ отврати́ от нас вско́ре, Человеколю́бец сый.

Ты́сящи а́нгелов, му́чеников собра́ние, проро́ков, апо́столов, преподо́бных, святи́телей святы́й лик мо́лит Тя, Влады́ко: пощади́ лю́ди Твоя́ смире́нныя.

Сла́ва: Ве́дый Ще́дре, неможе́ние на́ше, и удобопоползновение все, и неиспра́вленное, осла́би гнев, и смуще́ние утоли́, и Твое́ю ми́лостию уще́дри Ще́дре.

И ны́не, Богоро́дичен: Ми́лостивая Богоро́дице, благосе́рдаго ро́ждшая Спа́са, ви́ждь озлобле́ние и воздыха́ние люде́й Твои́х; и ускори́ е́же умоли́ти, нам ущедритися.

Пе́снь 9. Ирмо́с: Бо́га челове́ком:

Се вси мы согреши́хом, и стра́шно земля́, ничто́же погрешньшая му́чится: наказу́я бо нас, Человеколю́бец всю сию́ коле́блет, прии́мем чу́вство и о спасе́нии свое́м попеце́мся.

Часово́м и ле́том сый Госпо́дь, еди́ным мгнове́нием восхоте́л еси́ сокруши́ти рабы́ Твоя́; от мно́гаго же благоутро́бия Твоего́ Влады́ко возбрани́лся еси́. Благодари́м Тя мы безотве́тнии, еди́не Человеколю́бче.

От тру́са, меча́, го́рькаго плене́ния, и язы́ческаго Христе́ наше́ствия, и нападе́ния, и гла́да, и озлобле́ния, Влады́ко, вся́каго ина́го, Ще́дре, изба́ви, и град Твой, вся́ку же страну́ ве́рно песносло́вящую Тя.

Сла́ва: Земля́ безъязычно вопие́т, стеня́щи: что мя злы́ми мно́гими оскверня́ете вси челове́цы, и вас Влады́ка щадя́, еди́ну мя уязвля́ет? Приими́те чу́вство и с покая́нием Бо́га уми́лостивите.

И ны́не, Богоро́дичен: Тли в рождестве́ не претерпе́вшая, тле́ния Де́во, изми́ нас всех, и тру́са тяжча́йшаго и ско́рби, утоля́ющи Влады́чнее негодова́ние, Твои́ми ма́терними примире́нии, Богоблагода́тная.

Стихи́ры тру́са, глас 1. Подо́бен: Небе́сных чино́в:

Основа́ния всея́ земли́ подвиза́яй Бо́же, смуща́яй eдин морску́ю глубину́, я́ко созда́тель всех, изба́ви нас стра́шнаго тру́са преще́ния, от Твоего́ благоутро́бия вы́ну умоля́ем Человеколю́бче.

Я́ко Многоми́лостив еди́н, и всеси́лен Христе́ Спа́се сый, Богоро́дицею и все́ми святы́ми, спаса́й при́сно от гла́да и губи́тельства, тру́са, огня́, меча́, и язы́ков потопле́ния, сла́вящий Тя град ве́рно.

Ны́не пра́ведному Твоему́ гне́ву Человеколю́бче, внеза́пу наше́дшу, не спогреби ще́дре, ниже́ разори́, ниже́ я́ростию гне́ва твоего́ накажи́ ны; но смуще́ние утоли́ тру́са, и лю́ди Твоя́ уще́дри.

Ины́я стихи́ры тру́са, глас 2, самогла́сны:

Земли́ смуща́емый гне́ва Твоего́ стра́хом, хо́лми и го́ры сотрясаются Го́споди; но благоутро́бия о́ком на нас призре́вый, не я́ростию Твое́ю прогне́вайся на ны, но умилосе́рдися на дела́ ру́ку Твое́ю; стра́шнаго тру́са преще́ния нас свободи́, я́ко Благ и Человеколю́бец.

Глас 6: Ниневи́тяне прегрешенми тру́сом преще́ния погребе́ние слы́шаху, в ходатайственном же зна́мении ки́та, Ио́ною воста́ние, покая́ние умоли́; но я́коже о́нех во́пль люде́й Твои́х, со младе́нцы и скоты́ уще́дрив, прия́л еси́; и нас наказу́емыя, тридне́вным воскресе́нием пощади́ и поми́луй.

Стра́шен еси́ Го́споди, и кто постои́т пра́ведному Твоему́ гне́ву? Или́ кто Тебе́ умо́лит, или́ кто упросит, Благи́й, о лю́дех согре́шших и отча́явшихся? Небе́снии чи́нове, а́нгели, нача́ла и вла́сти, престо́ли, госпо́дьства, херуви́ми и серафи́ми, от нас Тебе́ вопию́щии: свят, свят, свят еси́ Го́споди, дела́ ру́ку Твое́ю не пре́зри Бла́же, благоутро́бия ра́ди ми́лости, спаса́й град бе́дствующий.

Сла́ва, и ны́не, глас 6:

Настоя́щий же тропа́рь пое́тся на вся́кую лити́ю:

Небе́сный Царю́, Человеколю́бче Го́споди, долготерпели́ве и многоми́лостиве, при́зри от свята́го жили́ща Твоего́, ви́ждь смире́ние на́ше, ви́ждь и озлобле́ние на́ше, и не я́ростию Твое́ю обличи́ ны, ниже́ гне́вом Твои́м накажи́ ны; не преда́ждь нас в наше́ствие язы́ков, или́ в руки́ ва́рваров, или́ в про́пасть поги́бнути, да не когда́ реку́т язы́цы: где е́сть Бог их? Мы же лю́дие Твои́, и о́вцы па́жити Твоея́, и и́мя Твое́ призыва́ем. И́маши есте́ственную бла́гость Твою́, покры́й град сей; и́маши моли́твенницу Богоро́дицу, ро́ждшую Тя Сло́ве, лик апо́столов, и мно́жество му́чеников и преподо́бных, приими́ моле́ния о лю́дех согре́шших и отча́янных, и спаси́ Незло́биве достоя́ние Твое́.

Моли́твы в преще́ние тру́са.

Бо́же вели́кий и стра́шный и ди́вный, вели́кий и и́стинный, творя́й вся и претворя́яй, и призира́яй на зе́млю, и творя́й ю̀ трясти́ся; прикаса́яйся гора́м, и дымя́тся; стрясуяй поднебесное от основа́ний, и столпы́ ея́ не дви́жутся; основа́ния земна́я подвиза́яй, и сия́ утвержда́яй Свои́м ма́нием, его́же вся боя́тся, и трепе́щут от Лица́ си́лы Твоея́, я́ко нестерпи́мый гнев, и́же на нас, гре́шных, преще́ния Твоего́, неизчетна же и неизсле́дованна ми́лость обще́ния Твоего́. Ты Сам помяни́ щедро́ты Твоя́, Го́споди, и ми́лости Твоя́ да́ждь нам, я́ко от ве́ка су́ть: утверди́ тва́рь, укрепи́ зе́млю, уста́ви колеба́ние ея́, утверди́ поколеба́вшуюся вселе́нную, и не погуби́ нас со беззако́ньми на́шими; ниже́ осуди́ нас со греха́ми на́шими в преиспо́дния земли́. Я́ко Ты еси́ Бог наш, Бог, е́же ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва ина́я в преще́ние тру́са.

Царю́ Святы́й, Человеколю́бче Влады́ко, долготерпели́ве Го́споди, всея́ чу́вственныя и у́мныя тва́ри Соде́телю, вся́ческая нося́й глаго́лом неизрече́нныя си́лы Твоея́, и еди́н име́яй живота́ и сме́рти вла́сть; наказу́яй пра́ведне, и Человеколю́бче па́ки исцеля́яй, вре́менный наш живо́т, всему́дрым Свои́м про́мыслом окормля́яй, и отовсю́ду спасе́ние на́ше поле́зно устроя́яй. Ве́мы, я́ко мно́гих ра́ди на́ших грехо́в стрясл еси́ зе́млю, и смути́л еси́ ю̀, и страх и тре́пет прии́де на ны от Лица́ гне́ва Твоего́ долготерпели́ве: се́рдце на́ше смутится уязвляемей той, и боя́знь сме́ртная нападе́ на ны, сей колеблемей, да не когда́ похи́тит я́ко лев души́ на́шя, и не́сть избавля́яй, да не когда́ поглоти́т нас, и тля нас покры́ет, не су́щу избавля́ющу, ниже́ спаса́ющу. Сего́ ра́ди Тебе́ милися де́ем, и Тебе́ мо́лим еди́наго беззлобиваго Бо́га: не помяни́ на́ших беззако́ний, пе́рвых же и ны́нешних: ниже́ возме́ри тя́жесть грехо́в на́ших подо́бному воздая́нию; а́ще бо вни́деши в суд с ро́дом на́шим сим, никто́же пред Тобо́ю оправди́тся, но поги́бнет вся́чески от земли́ всех нас па́мять. Помяни́ долготерпели́ве, от ве́ка щедро́ты Твоя́, и ми́лости Твоя́, и и́же ко отце́м на́шим и́стинный заве́т Твой, и да не поглоти́т нас глубина́ земна́я, ниже́ да пожру́т нас уста́ ея́; но уще́дри нас сокруше́нных, и поми́луй смире́нных, и от стра́шнаго преще́ния тру́са смуща́емыя, и тре́петом мно́гим, и стра́хом одержи́мыя посети́. А́ще ли где и не́ции су́ть посреде́ нас боя́щиися и́мени Твоего́, и храня́щии Твоя́ повеле́ния, ма́ла не́кая избра́нная ча́сть, се́мя благослове́нное, сокро́вище сокрове́нно, Тебе́ еди́ному ве́домо и соблюда́емо, и о́ныя я́ко Благ услы́ши о нас недосто́йных, моля́щих Благодея́ние и Ми́лость Твою́; и приими́ сих моле́ние о лю́дях согреши́х, приноси́мая Тебе́ Человеколюбце Влады́ко, я́коже Авраа́ма о Содомлянех, я́коже Дании́ла и Иереми́ю, Боже́ственныя Твоя́ проро́ки о Изра́или, в плене́нии Твою́ умоливших благосты́ню, я́ко да от ро́да в род сла́вится Твоего́ Человеколю́бия и долготерпе́ния неизсле́дованная пучи́на. И мы принесе́м Тебе́ дар благода́рственный, на́ше обраще́ние и покая́ние, держа́вною Твое́ю руко́ю укрепля́еми; моли́твами и моле́нием Всепричистыя Твоея́ Ма́тери и всех от ве́ка святы́х угоди́вших Тебе́, ами́нь.

Моли́тва ина́я в преще́нии тру́са.

Влады́ко Го́споди Иису́се Христе́ Бо́же наш, щедро́т неисчерпа́емый исто́чниче, человечеколюбия неизсле́димая пучи́но, безме́рныя бе́здно долготерпе́ния и благосты́ни, и́же и по ро́ду находя́щыя ро́ду челове́ческому я́звы же и ра́ны поле́зно человеколю́бия ра́ди превосхожде́ния нанося́й, да е́же ко греху́ на́ше неудержа́нное и скороте́чное, я́коже не́коею уздо́ю, Боже́ственным Твои́м содержи́ши стра́хом, да не безчи́нно дви́жется на Боже́ственный о́браз; ниже́ душе́вному благоро́дию зле досажда́ет, уста́ви, мо́лимся, стра́шное земли́ колеба́ние, и необычное сие́ ноше́ние, е́же ны́не пра́ведно на ны дви́гатися сей повеле́л еси́, в воспомина́ние е́же ко вся́кому греху́ чрез естество́ на́шего стремле́ния, и Твоего́ сего́ ра́ди, е́же от нас пра́веднаго обраще́ния. А́ще бо бы́хом мы Твоя́ повеле́ния сохрани́ли, и вну́трь свои́х преде́л стали, не бы земля́ Твоему́ всеси́льному повеле́нию повину́ющися, на ны двизалася [бы] ны́не естественного недвижения изступивши, и через естество́ сея́ движе́нием поглоти́ти нас иму́щи. И пра́ведно, о пра́ведне Го́споди! Не бо твори́м повеле́ния ца́рствия Твоего́, и не творя́щим, не бои́мся пра́веднаго Твоего́ гне́ва на ны Влады́ко; но лука́вое твори́м пред Твои́ма очи́ма, ненави́дяще другъдру́га, завиствующе другъдру́гу, гне́вающеся друг на дру́га, любо́вь отринухом, братолю́бие отверго́хом, ми́лостыню отложихом и сребролю́бие возлюби́хом: любостяжа́ние облобызахом, и нестяжа́ние возненавидехом; чревообъяде́ние и сластолю́бие возлюби́хом, пост же и воздержа́ние не возжелахом; и про́сто рещи́, вся́кую Твою́ за́поведь отринухом Го́споди, и вся́кий грех содева́ем; сих бо ра́ди [я́коже Писа́ние глаго́лет] гнев Бо́жий гряде́т на сы́ны непокори́выя. Сия́ зло́бы на́шея изводства, сие́ лука́вых и нечи́стых на́ших дея́ний, е́же к другъдру́гу сбытие́; сия́ не́нависти и го́рдости, и сокрове́нне и я́ве быва́емых беззако́ний на́ших лю́тая исправле́ния, смертоно́сныя и зде я́звы наводя́щая, колеба́ния земли́, и тру́сы, и гла́ды, и губи́тельства, и супоста́т нахожде́ния, и по сих нестерпи́мое о́ное и безконе́чное муче́ние. Но не преда́ждь нас до конца́, и́мени ра́ди Твоего́ Свята́го, и да не пожре́т нас живы́х земля́, грех ра́ди на́ших: да не покая́ния и обраще́ния отщети́мся вре́мене окояннии; а́ще бо и многожды покая́ние обеща́хом, и многожды Тебе́ Бо́гу на́шему солга́хом. Тем же и посече́нию непло́дныя смоко́вницы осуди́л еси́, земли́ це́ло повеле́л покры́ти нас. Но еще́ и ны́не долготерпи́, о Человеколюби́вый Земледе́льче! Не хотя́й сме́рти гре́шнаго, но е́же обрати́теся и жи́ву бы́ти ему́; и́же семьдесят крат седмери́цею проща́ти бра́тиям повелева́яй грехи́, не погуби́ ма́лое Твое́ ста́до сие́, стра́хом сокруше́нное и пла́чем смире́нное, и земли́ колеба́нием смятенное, и недоуме́нное отсю́ду. Но помяни́ долготерпели́ве, щедро́ты Твоя́ и ми́лости Твоя́; помяни́ я́ко приле́жно надлежи́т помышле́ние челове́ка на лука́вая от ю́ности его́, и никто́же чист е́сть от скве́рны пред Тобо́ю, да и ны́не неизрече́нную благосты́ню восприе́млюще, благодари́м о всех сла́вных и стра́шных де́лех твои́х, я́же сотвори́л еси́ и твори́ши с недосто́йными на́ми, по неизследимой пучи́не человеколю́бия Твоего́; благода́тию Безначального Твоего́ Отца́, и Животворя́щаго Твоего́ Ду́ха, моли́твами и моле́ньми Пречи́стыя Твоея́ Ма́тере, и всех Святы́х Твои́х, ами́нь.

Апо́стол во вре́мя трясе́ния земли́.

Проки́мен, глас 8: Го́споди, да не я́ростию Твое́ю обличи́ши мене́:

Стих: Не отврати́ Лица́ Твоего́ от о́трока Твоего́:

Апо́стол к Евре́ем, зача́ло 331 от полу́.

Бра́тие, его́же лю́бит Госпо́дь, наказу́ет, бие́т же вся́каго сы́на, его́же прие́млет. А́ще наказа́ние терпите́, я́коже сыново́м обрета́ется вам Бог; кото́рый бо е́сть Сын, Его́же не наказу́ет Оте́ц? А́ще же без наказа́ния есте́ ему́же прича́стницы бы́ша вси, у́бо прелюбоде́йчищи есте́, а не сы́нове. В сим, пло́ти на́шей отца́ име́хом наказа́теля, и срамляхомся; не мно́го ли па́че повине́мся Отцу́ Духово́м, и жи́ви бу́дем? Они́ бо в ма́ло дней, я́коже го́де им бе, нака́зоваху нас; а сей на по́льзу, да причасти́мся святы́ни его́. Вся́кое бо наказа́ние в настоя́щее вре́мя не мни́тся ра́дость бы́ти, но печа́ль; последи́ же плод ми́рен наученым тем воздае́т пра́вды. Те́мже осла́бленныя руки́, и осла́бленная коле́на испра́вите; и стези́ пра́вы сотвори́те нога́ми ва́шими, да не хромое совратится, но па́че да исцеле́ет.

Аллилуия. Стих: Бо́же, отри́нул ны еси́:

Во вре́мя трясе́ния Ева́нгелие от Матфе́я зача́ло 27.

Во вре́мя о́но, вле́зшу Иису́су в кора́бль, по Нем идо́ша ученицы́ Его́. И се трус вели́к бы́сть в мо́ри, я́коже кораблю́ покрыва́тися волна́ми; Той же спа́ше. И прише́дше ученицы́ его́ возбуди́ша его́, глаго́люще: Го́споди, спаси́ ны, погиба́ем. И глаго́ла им: что страшли́ви есте́, маловери? Тогда́ воста́в запрети́ ве́тром и мо́рю, и бы́сть тишина́ ве́лия. Челове́цы же чудишася, глаго́люще: кто е́сть сей, я́ко и ве́три и мо́ре послу́шают его́?

И по чи́ну боже́ственная литурги́я. Кинони́к:

Призира́й на зе́млю, и творя́й ю̀ трясти́ся.

Пе́снь 1. глас 8. Ирмо́с: Колесницегони́теля фарао́ня погрузи́:

Вседе́тельная, и Срасленая, и Сопресто́льная, и Единоси́льная, и Трисве́тлая Сла́во, О́тче Непостижи́ме, Сы́не и Душе́ Святы́й, лю́тыя боле́зни рабы́ Твоя́ свободи́, я́ко да благода́рственно Тя сла́вим.

Грехо́в бу́ря изри́ну мя в глубину́ не́мощи, и ча́стыя боле́зни, я́коже треволне́ние мя обурева́ют окая́ннаго; Единоси́льная Держа́во, Тро́ице Свята́я, умилосе́рдися, спаси́ мя, лю́те погиба́юща.

Сла́ва: От содержа́щаго греха́ изба́ви Тро́ице неразде́льная, нас Твоя́ рабы́, росо́ю ми́лости Твоея́ угаша́ющи зной лю́тых мои́х боле́зней, и здра́вие подаю́щи, я́ко да правосла́вно воспева́ем Тя.

И ны́не, Богоро́дичен: Изба́вителя и Вседе́теля и Го́спода во чре́ве носи́вшая, на́шя неду́ги, Всечи́стая, поне́сшаго; Того́ у́бо моли́, лю́тыя не́мощи твоя́ рабы́ изба́вити, еди́на челове́ков По́моще.

Пе́снь 3 Ирмо́с: Небе́снаго кру́га Верхотво́рче:

Небе́сныя у́мове, а́нгельстии чи́нове, престо́ли, и нача́ла, и си́лы, и госпо́дьства, мо́лят Тя, Блага́го и Спа́са: губи́тельнаго свободи́ неду́га рабы́ Твоя́.

Да человеколю́бия на мно́зе Влады́ко, Твоего́ пока́жеши бе́здну, Всеси́льне; неду́га свободи́ смертоно́снаго, и боле́зней лю́тых рабы́ Твоя́, еди́не Долготерпели́ве.

Сла́ва: Я́ко Бо́жии предстоя́тели, служе́бнии ду́си, а́нгели и арха́нгели, Сего́ моли́те, утоли́ти неду́г, разори́ти печа́ль, смертоно́сныя же ча́сти изба́вити.

И ны́не: Исцеле́ний исто́чника Тя благи́х показа́, бе́здна из Тебе́ проше́дшая, Христо́с Госпо́дь, Отрокови́це Пренепоро́чная; те́мже рабы́ Твоя́ изба́ви не́мощи бу́рею потопля́емых.

Пе́снь 4 Ирмо́с: Ты моя́ кре́пость, Го́споди:

Ны́не се́нь вои́стину сме́ртная обы́де, и ко а́довым врата́м прибли́жи, но Ты, Спа́се, я́ко Си́лен нас возста́вивый, удиви́ ми́лости Твоя́, спаса́яй в ве́ре несумне́нной вопию́щих: си́ле Твое́й сла́ва, Человеколю́бче.

Христо́вы таи́нницы, самови́дцы и пропове́дницы, прии́мшии дар исцеле́ния, и вра́чеве су́ще душе́внии, апо́столи, изба́вите нас oт угрожающего неду́га, Иису́са моля́ще Влады́ку, и Изба́вителя, и Го́спода.

Сла́ва: Грехо́в бу́ря ны́не нас пости́же, не́мощи во́лны обурева́ют, боле́зни погружа́ют ча́стыя, ско́рби бо и боле́зни нас окая́нных обрето́ша; апо́столи Госпо́дни, ва́шими мольба́ми по́мощи ру́ку пода́йте.

И ны́не, Богоро́дичен: Боле́зньми лю́тыми и ча́стыми ударяеми, Де́во, вси Тебе́ припа́даем, держа́вным покро́вом Твои́м Чи́стая, спаси́ нас всех; уще́дри, Богоневе́стная, изба́ви мо́ра и лю́тыя не́мощи, и боле́зни исцели́, Влады́чице.

Пе́снь 5. Ирмо́с: Вску́ю мя отри́нул еси́:

Мо́ря пре́лести, медото́чными ва́шими моле́ньми, свяще́ннии проро́цы, потопи́вше, ны́не преложи́те го́ресть всю губи́тельныя ны́нешния не́мощи на боже́ственную благомо́щия сла́дость.

Пронзени бы́хом стрела́ми не́мощи, повеле́нием Твои́м, Го́споди, и утверди́ся на нас рука́ Твоя́, Всеси́льне; я́ко Бог Ще́дрый, уще́дри всех Твое́ю ми́лостию, моли́твами святы́х му́чеников Твои́х.

Сла́ва: Сы́на я́коже дре́вле вдови́ча возста́вил еси́ Твои́м повеле́нием, умерщвле́на Сло́ве, лю́тыя не́мощи рабы́ Твоя́, я́ко еди́н Благ и Ми́лостив, изба́вивый, оживотвори́, еди́не Человеколю́бче.

И ны́не, Богоро́дичен: В но́щи жите́йстей бу́ря пости́же вся́каго озлобле́ния, покрыло мя Де́во, не́мощи омраче́ние; но возсия́й ми прохлажде́ния Пречи́стая свет, и к све́ту благомо́щия наста́ви.

Пе́снь 6. Ирмо́с: Очи́сти мя, Спа́се:

В пучи́не про́пасти и не́мощей облежим, и губи́тельныя напа́сти обурева́ют во́лны, Прави́телю Го́споди, по́мощи ру́ку просте́р ны́не спаси́.

Разсла́бленнаго я́коже дре́вле стягну́л еси́, Боже́ственным ма́нием от неду́га боле́зненнаго, и одра́ озлобле́ния, и неду́га тяжча́йшаго, уще́дрив да́ждь здра́вие Многоми́лостиве.

Проро́ческий лик, апо́столов собра́ние, полк страда́льцев ны́не мо́лят Тя, еди́не Многоми́лостиве, о лю́дех Твои́х, Бла́же, сих уще́дри.

И ны́не, Богоро́дичен: Мари́е, чи́стое де́вства Сокро́вище, Ты очи́сти нас, и неду́гов и скорбе́й, и содержа́щия ны́не не́мощи изба́ви, да ве́рою Тя просла́вим.

Та́же конда́к. Подо́бен: Яви́лся еси́:

Предста́тельство необори́мое оскорбля́емых, и моли́тва гото́вая наде́ющихся на Тя: от бед изба́ви, и не пре́зри, всех заступле́ние.

Пе́снь 7. Ирмо́с: Бо́жия снизхожде́ния:

Опаля́ет пе́щь безме́рных боле́зней, и сжига́ет мя огне́вицы губи́тельныя пла́мень непреста́нно безсту́днейший, но росо́ю ми́лости Твоея́ Спа́се, прохлади́ пою́ща: благослове́н, Бог оте́ц на́ших.

Проро́цы, апо́столи, му́чеников собо́ри, боже́ственнии учи́телие, боле́зни неду́гующих нас мольба́ми укроти́те, и здра́вие да́руйте пою́щим: благослове́н Бог оте́ц на́ших.

Сло́вом Ла́заря воскреси́вый, ны́не я́ко из гро́ба от лю́той не́мощи возста́вивый, оживи́ Го́споди, да вопие́м пе́снь благода́рственную: благослове́н Бог оте́ц на́ших.

Богоро́дичен: Ще́дра су́щая и Ма́ти Всеще́драго, уще́дривши изба́ви Твоя́ лю́ди, призыва́ющыя ми́лости Твоя́ Де́во, и пою́щыя: благослове́н Бог оте́ц на́ших.

Пе́снь 8. Ирмо́с: Седмери́цею пе́щь:

Боле́зненно стенем от одра́ боле́зни на́шея, и от губи́тельныя не́мощи вопие́м к Тебе́ Человеколю́бцу, серде́чныя о́чи ны́не простира́юще, здра́вия про́сим: Посети́ нас Спа́се, и возста́ви пе́ти, лю́дие превозноси́те во вся ве́ки.

В на́шу не́мощь ми́лостивне облеки́йся, и уподо́битися челове́ком изво́ливый, моли́твами преподо́бных Твои́х, отча́янных спаси́ нас, воздви́гни из гро́ба отча́яния пе́ти: о́троцы благослови́те, свяще́нницы по́йте, лю́дие превозноси́те во вся ве́ки.

Соде́телю естества́, Пода́телю исцеле́ния, утро́бы щедро́т и благоутро́бия пучи́ну я́ко име́яй, Долготерпели́ве, посеще́нием посети́ от губи́тельныя не́мощи лю́ди Твоя́, и оживи́ вопи́ти: свяще́нницы благослови́те, лю́дие превозноси́те во вся ве́ки.

Богоро́дичен: Кре́пкая По́моще, и изве́стное Заступле́ние, отча́явшихся Наде́жде, Пренепоро́чная, посети́ стра́ждущыя боле́зненно рабы́ Твоя́: облегчи́ тя́жесть го́рькия не́мощи: отжени́ неду́г губи́тельная ну́жди, и спаси́ рабы́ Твоя́, Де́во Богоро́дице.

Пе́снь 9. Ирмо́с: Ужасе́ся о сем Не́бо:

Чудеса́ ве́лия, и́хже не́сть числа́, сотвори́вый Безсме́ртне, на рабы́ Твоя́, ми́лости Твоя́ Бо́же, я́ко Ми́лостив покажи́, и содержа́щая нас ны́не свободи́ боле́зни, моле́ньми ро́ждшия Тя, и ли́ка страстоте́рпцев Твои́х.

А́нгелов, арха́нгелов и проро́ков, апо́столов, му́чеников, преподо́бных же, иера́рхов, священному́чеников Твои́х моли́твами, плач рабо́в Твои́х обрати́, Всеси́льне, в ра́дость; исцели́ боле́знь, облегчи́ неду́ги, и здра́вие нам да́руй.

Душ же и теле́с Врача́, в ми́лости бога́таго Го́спода, Тебе́ молю́: исцели́ стра́сти моя́ мно́гия, боле́зней измени́, и ско́рбных мя я́ко Благ и еди́н Благоде́тель, и спаса́й ве́рою чи́стою Тя велича́ющих.

Богоро́дичен: Ще́драго ро́ждшая и Ми́лостиваго, и Влады́ку, и Созда́теля, и Го́спода, ны́не на мне покажи́ Твоя́ обы́чно щедро́ты, и лю́таго мя изба́ви неду́га, изнуряющего ду́шу мою́, Де́во Богоро́дице, и пода́ждь ми здра́вие, я́ко да непреста́нно велича́ю Тя.

Моли́тва в я́зву мо́ра, творе́ние святе́йшего патриа́рха Филофея.

Го́споду помо́лимся. Го́споди поми́луй.

Влады́ко Го́споди Бо́же наш, неисчерпа́емый исто́чниче щедро́т, человеколю́бия неисследованная пучи́но, безме́рная бе́здно долготерпе́ния и бла́гости; И́же и разли́чны находимыя ро́ду челове́ческому ра́ны же и я́звы, поле́зно ра́ди безме́рнаго человеколю́бия наносиши, я́ко да е́же ко греху́ на́ше неуде́ржное и скороте́чное, я́ко не́коею уздо́ю боже́ственным Твои́м содержи́ши стра́хом, да не безчи́нно дви́жется на боже́ственный о́браз, ниже́ душе́вному благоро́дию зле досажда́ет. Уста́ви, мо́лимся, е́же на естество́ на́ше носи́мое о́строе и безго́дное сие́ сме́ртное ору́жие, да не ума́лены нас па́че всех язы́к сотвори́ши, ниже́ у́мным и чу́вственным враго́м на́шым преда́си нас в поноше́ние; и запустеша гра́ди, и потреби́шася торги; свяще́нная бо торжества́, и слу́жбы, и боже́ственных песний составле́ния, множа́йшею ча́стию умолко́ша, хра́мы до́брии и вели́цыи по писа́нию потреби́шася, и не́сть живу́щаго в них; страх и тре́пет прии́де на ны, и тма мра́чна стра́шныя сия́ сме́рти всех покры́. Не успеваем Влады́ко, и о сконча́вшихся я́коже обы́чай рыда́ти сро́дниках, и коне́ц наш приспевает, и ины́х и́щем рыда́ющих, и о́бщему гро́бу предае́мся; ниже́ живу́ще и явля́еми, жи́ти уже́ непщу́ем; от стра́ха стра́шныя сея́ я́звы ма́ло и саме́м себе́ ве́руем, сме́рти зна́мение и я́зву ки́йждо име́ти в себе́ мня́ся, и пре́жде сме́рти, стра́хом сме́рти лю́те умира́я. Сия́ зло́бы на́шея су́ть по́чести; сие́ е́сть лука́вых и нечи́стых на́ших дея́ний взамное навершение; сия́ и скве́рны и непра́вды, и клятвопреступле́ния на́шего лю́тая исправле́ния. Си́це треглавный змий, го́рькия нам зубы́ вонзив, тле́ние и сме́рть си́лою наведе́; сих бо ра́ди, глаго́лет, гряде́т гнев Бо́жий на сы́ны непокорения. Те́мже ниже́ у́мныя о́чи возвести́, ниже́ моли́тися чи́сто, или́ ми́лость привлещи́ мо́жем, тя́гостию совестною я́коже не́кими око́вы желе́зными сля́чен е́сть ки́йждо. Но не преда́ждь нас до конца́, и́мене Твоего́ ра́ди, ниже́ разори́ заве́т Твой, ниже́ покая́ния и обраще́ния да отщети́мся вре́мени стра́стнии; те́мже и я́зву сме́ртную сию́ человеколю́бне наве́л еси́. Ве́мы, я́ко мно́гащи покая́ние обеща́вше, и мно́гащи солгавше, посече́нию по непло́дней о́ной смоко́внице осуди́хомся; но еще́ и еще́ долготерпи́, человеколюби́вый Де́лателю, не хотя́й сме́рти гре́шнаго, но е́же обрати́тися ему́, и жи́ву бы́ти. Се́дмьдесят седмери́цею проща́ти бра́тий повеле́вый грехи́, моги́й от жесто́каго и непло́днаго ка́мене воздви́гнути ча́да Авраа́му. Тебе́ бо еди́ному вся возмо́жна, я́же от челове́к невозмо́жна су́ть, Человеколю́бче Влады́ко; да и от нас в ро́ды и ро́ды просла́вится пресвято́е Твое́ и́мя, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Моли́тва ина́я в я́зву мо́ра.

Го́споду помо́лимся. Го́споди поми́луй.

Согреши́хом, беззако́нновахом непра́вдовахом пред Тобо́ю Преблаги́й Влады́ко; преступи́х спаси́тельныя Твоя́ за́поведи и свяще́нныя обе́ты моя́, я́же во свято́м креще́нии пред вели́ким Твои́м же́ртвенником, пред а́нгелы же и челове́ки сотвори́хом, отверго́хомся стра́шныя кро́ве заве́та, е́юже освяти́хомся, о́бщую непщева́вше, и Ду́ха Благода́ти досади́вше, и стра́шное и преесте́ственное сыноположе́ние небрегшу, вся́кое писа́ние и Боже́ственный зако́н, и уче́ние богодухнове́нное, звук тщетный, и глаго́лы де́тельныя пу́сты в нас вмени́шася, и́менем то́кмо и словесы́ честно́е Ева́нгелие и и́стинное христиа́нство окая́ннии обносим. Ру́це на́ши ко вся́кому хище́нию, и лихои́мству бы́ша приле́жны; но́ги же ско́ры и де́рзостны ко вся́кой непра́вде и злотечению, гото́вы ча́сть бра́тнюю наступа́ти и попира́ти, и снеда́ти убо́гих. Уста́, свяще́нных моли́тв же и слов орга́н су́щая, вся́кия студности, и буесло́вия, и клятвопреступле́ния, и оболгания сотвори́хом орга́н; о́чи на́шя, и вся на́шя чу́вствия, блужде́ния и вся́кия нечистоты́ попремно́гу испо́лнихом. В нас ца́рствующий ум боже́ственное о́ное се́мя попра́вше, и у́ды тебе́ Христа́, блудни́чи у́ды сотво́рше, и вме́сто хра́ма Бо́жия, тли и нечистоты́ храни́лища бы́вше. Сего́ ра́ди Преблаги́й Влады́ко, мно́гое Твое́ человеколю́бие к негодова́нию обрати́хом окая́ннии; мно́жество Твои́х благодея́ний, в ка́зни безу́мне мы преложи́хом; и поне́же ниже́ на́шими благи́ми, ниже́ боле́зньми бли́жних лучшю бы́хом, пра́ведне на себе́ са́ми Твоего́ пра́веднаго наказа́ния, и я́звы подвиго́хом, но не я́ростию Твое́ю обличи́ нас, ниже́ гне́вом Твои́м накажи́ нас Го́споди. Тебе́ еди́ному согреши́хом, но и Тебе́ еди́ному покланя́емся, и сокруше́нным се́рдцем, я́ко же́ртву чи́сту, испове́дание Тебе́ прино́сим: осла́би, оста́ви, Человеколю́бче Влады́ко, уста́ви на ны пра́ведне наноси́мую ра́ну, да победи́т мно́жество щедро́т Твои́х грехо́в на́ших лука́вое собра́ние, Твоея́ безме́рныя благосты́ни пучи́на да покры́ет зло́бы на́шея го́рькое мо́ре. И́мамы Твоего́ человеколю́бия о́бразы вели́кия: разбо́йники, и блудни́цы, мытари́, и блу́днаго сы́на, и́же нас окая́нных благоиску́сствуют, и в Небе́сное Ца́рство предваря́ют; с си́ми и нас испове́дающихся, и припа́дающих Тебе́ приими́ Влады́ко. А́ще же и тех обраще́ния, и и́стиннаго покая́ния вя́щшаго оскуде́хом, недоста́вшее да испо́лнит безме́рная Твоя́ бла́гость, па́че же и все, поне́же и всего́ вся́чески оскудеваем. И́маши у́бо благоутро́бие и ми́лость моля́щую Тя: крест и во́льную сме́рть, и́же о нас неблагода́рных претерпе́л еси́; по́двиги апо́столов, преподо́бных по́ты, и му́чеников кро́ви; пред все́ми же о́бщую всех наде́жду и спасе́ние, па́че сло́ва без се́мени ро́ждшую Тя Богоро́дицу. И́хже мольбы́ человеколю́бно прии́м, настоя́щих ско́рбных, и бу́дущия ве́чныя му́ки свободи́ благода́тию и человеколю́бием безнача́льнаго Твоего́ Отца́; с Ни́мже благослове́н еси́, с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Глава́ 84. Моли́тва ина́я в губи́тельный неду́г

Го́споду помо́лимся. Го́споди поми́луй.

Вседержи́телю Влады́ко, долготерпели́ве, многоми́лостиве, благопримирительне, человеколюбиве, всеблаги́й, преблаги́й, всеси́льне Христе́ Бо́же наш, Ты от небытия́ во е́же бы́ти еди́наго ра́ди бла́гости бога́тства, на́ше естество́ приве́л еси́; Ты у́мную ду́шу и ра́зум вдохну́в в нас, и о́бразом Твои́м поче́т, пи́щи ра́йския, и богови́днаго жи́тельства, и бесе́ды боже́ственныя преесте́ственне сподо́бивый. Ты за́поведь Твою́ отри́нувших, и кова́рством и пре́лестию де́монскою окраденных, и Твоея́ сла́вы отпа́дших, и на сме́рть пременших живо́т и ца́рство, в рабо́ту сра́мную, и не презре́в еси́, неизрече́нныя ра́ди пучи́ны долготерпе́ния и бла́гости, но посети́л еси́ многообра́зне отцы́ и проро́ки. Ты зако́н нам в писа́ниих ко обраще́нию и наставле́нию дал еси́; а́нгелы приста́вил еси́ наста́вники же и храни́тели уча́щия и наставля́ющыя в пра́вду, к приобре́тению лу́чшаго. Но поне́же вся сия́ тще́тна и су́етна показа́хом на́шим е́же к зло́бе безме́рным преклоне́нием; Ты Сам второ́е естества́ на́шего соде́тельство же и обновле́ние, неизрече́нне на коне́ц веко́в соде́лал еси́, и всего́ на́шего челове́ка стра́шне соедини́в всему́ Твоему́ Божеству́, и пло́тию пло́ть, душе́ю же ду́шу освяти́в, и сме́ртию и страстьми́ чрезъесте́ственных страсте́й и сме́рти нас измени́в, и соблюде́нием Боже́ственных Твои́х за́поведей, безсме́ртнаго живота́ сподо́бил еси́. Но и па́ки мы Боже́ственныя Твоя́ за́поведи сия́ престу́пльше, и в след вожделе́ний на́ших и во́ль ходи́вше, всяк грех на ки́йждо де́нь приле́жно соделоваем: оглаго́лание, хулу́, памятозло́бие, клятвопреступле́ние, лжесловие, срамосло́вие, ле́сть, рве́ние, за́висть, и вся́кое неподо́бно студодея́ние, есте́ственное же и чрезъестественное; и е́же ниже́ в безслове́сных живо́тных обрета́ется, сие́ нечестивейше но́во умышляем. Исчезо́ша в суете́ дни́е на́ши, по́мощи Твоея́ обнажи́хомся, наруга́ние и смех су́щым о́крест нас бы́хом; и́мени Твоему́ пресвято́му и покланя́емому, на́ми хулитися во язы́цех сотвори́хом, зло́бою обетшавше, и на стезя́х безу́мне охромевше; вси уклони́хомся, вку́пе непотре́бни бы́хом, не́сть разумева́яй, не́сть до еди́наго; свяще́нницы и лю́дие отступи́хом вку́пе. Сих у́бо ра́ди судо́м пра́ведным отринове́ни бы́хом от Тебе́, и отве́ржени есмы́ от вели́каго Твоего́ заступле́ния, и мно́гое Твое́ человеколю́бие на негодова́ние обрати́хом окая́ннии; губи́тельство и плене́ние, и теснота́, и нищета́, и сме́рти разли́чныя и ча́стыя, треокаянных нас раздели́ша, я́ко да сцевыми бичми́, к себе́ и нехотя́щих привлещи́ Человеколю́бче; но ниже́ та́ко что мно́жае бы́сть от нас. Пре́дал еси́ нас в рабо́ту язы́ком, и в плене́ние, и закла́ние, и расхище́ние беззако́нным; и ниже́ та́ко уразуме́хом, ниже́ лука́вств на́ших, и беззако́ний на́ших отступи́хом. Ма́ло от рабо́ты извле́кл еси́ пресла́вно, и от нечести́вых па́че вся́кия наде́жди свободи́л еси́; и еще́ па́че приложихом беззако́ние к беззако́нию, и о благодея́нии напыщшеся, и свобо́ду и отра́ду зле употреби́вше. Сих ра́ди, Преблаги́й Влады́ко, я́ко ниже́ ско́рбными и лю́тыми уцеломудряемыя, ниже́ Твои́ми благодеянми и благодатми лу́чшыя быва́емыя, судо́м пра́ведным осуди́л еси́ нас, и поги́бели и всепагубне и исчезнове́нию всеконе́чному пре́дал еси́; я́ве у́бо е́сть, я́ко коне́чнее сотресенным бы́ти, и исче́знути осуди́хомся. О ни́хже си́це неща́дно насле́дие ро́да преждевременное пожа́л еси́, я́ко ниже́ ко́рени, ниже́ се́мени Изра́илю оста́тися, по пи́санному; но бы́ти нам я́коже Содому, и я́коже Гомо́рру. И и́хже пото́п вку́пе дре́вле растли́, с са́мыми коренми и с са́мыми ве́твьми исчезнувших; ниже́ бо неду́г напа́дши пома́лу в ме́ру изно́сит уме́рших, но я́коже закалателю ту су́щу, и коему́ждо те́лу мече́м ра́ну нанося́щу, та́ко вку́пе и ра́ну и зна́мение сме́рти напра́сно прия́ша мно́зи, и вку́пе всех внеза́пу тма покры́ла е́сть и сме́рть, я́ко то́кмо ре́кшым, я́ко уранихомся, при но́гу а́бие после́довати сме́рти; я́коже по двема́ и трема́ износитися от еди́наго и того́жде до́му, и к погребе́нию прокожденным быва́ти, я́ко на купе на еди́ном ло́жи лежа́щым, и ниже́ довле́ти оста́вльшымся взаконенным сподо́битися я́коже досто́ит; ниже́ име́ти к кому́ пе́рвее от сро́дник пойти́, всем про́сте вку́пе окая́нне растлеваемым, и ко а́ду отсыла́емым; но недоуме́нием и недовольством отвсю́ду стягнутым су́щим, ниже́ изобрести что от злоключающихся. Рыда́ти па́че подоба́ет безго́дныя ли сме́рти, или́ е́же внеза́пу та́ко похищенным быва́ти; или́ пре́жде отше́дших, или́ посе́м издыхающих, или́ по ма́ле сие́ пострада́ти хотя́щих; или́ еще́ бы́ти мня́щихся, и вы́шших неду́га. О всех же и наипа́че наста́ рыда́ти и слези́ти, я́ко не оста́влена е́сть ни еди́на наде́жда, во е́же и са́мым вма́ле не вчислятися с ме́ртвыми, без наде́жды отвсю́ду предлежим, я́коже ста́да заколе́ния ожида́юще; дне́сь обстои́т отце́в и ма́терей лик дете́й, лик вну́ков, и лик ины́х сро́дников и друго́в, я́коже стеснятися домо́м мно́жеством сбираемых мно́жицею, по сро́дству и дру́жеству, у́тре же безча́дии, пусти́, окаянни, повержени; и я́коже ископившиися отню́д со всем, и отню́д наде́жду всю отложи́вше, и живота́, и ста́рости, и насле́дия хотя́щаго бы́ти ро́да и всех вку́пе есте́ственных и люби́мых, и ну́жных друго́в лиша́еми. Устраше́ни у́бо есмы́, Человеколю́бче Влады́ко, вели́чеством нестерпи́мым сея́ напа́сти и бича, и вма́ле не отчаяхом саме́х себе́, и недоуме́ние, и неудо́бство обдержи́т нас, и страх и тре́пет неисповеди́м прии́де на ны, и покры́ нас се́нь сме́ртная, и недоумевахомся, и отча́яхомся вся́чески; ниже́ бо в живы́х себе́ бы́ти помышля́ем, ниже́ в постоя́нии ума́ есмы́, но ки́йждо ра́ну и зна́мение на себе́ име́ти мечта́я, ча́сто удо́м каса́яся, на ки́йждо час во удивле́ние прихо́дит. И а́ще и кома́р на́йдет, или́ живо́тное ко́е укусит, па́губе приити́ непщу́ет, и от стра́ха же и пре́жде сме́рти умерщвлятися мнит; отнюду же и обходим вси, я́коже и́сполу ме́ртви, и расслаблени, и отвсю́ду недоуменни, и ни еди́но прибе́жище обрета́ем. И что го́ршее, ниже́ о́чи на́ши на Не́бо возвести́, ниже́ отве́рсти уст на́ших, и помоли́тися пред Тобо́ю сме́ем окая́ннии, остно́м со́вести убодаеми, дела́ бо на́шя лука́вая, и вся́кия скве́рны испо́лненая пред очи́ма иму́ще, студо́м лица́ покры́вше, недосто́йных себе́ Твоея́ по́мощи и Твоего́ заступле́ния бы́ти су́дим. Сие́ то́кмо сокруше́ннии, и смире́ннии, посра́млени вопие́м к Тебе́ Благо́му Бо́гу: Пра́веден еси́ Го́споди, и пра́веден суд Твой о всех, и́хже наве́л еси́ на ны, па́че же не по беззако́нием на́шым сотвори́л еси́ нам, ниже́ по грехо́м на́шым возда́л еси́ нам. Но и сей на ны наносимый бич человеколюби́вый мно́жае, не́жели пра́ведный бы́ти испове́дуем; вся́кий бо бич и ра́на, и всегуби́тельство на ны наносимое, оскудно е́сть и ма́ло, проти́во мно́гому мно́жеству на́ших беззако́ний. Мно́жество у́бо ра́ди грехо́в на́ших, ниже́ дерза́ти мо́жем, Правосу́де Го́споди, да Твою́ умо́лим бла́гость, разреше́ние стра́шнаго сего́ обрести́ преще́ния; превеличество же Твоего́ благоутро́бия, и Твои́х щедро́т бе́здна, многоми́лостиве Влады́ко, дерза́ти нас понужда́ет, и я́же па́че на́шего досто́инства иска́ти. Отню́дуже, Бо́же Преблаги́й, и Го́споди ми́лости, мо́лимся ти́хости Твое́й; уста́ви на ны толи́кий наносимый о́стрый и безгодный сей сме́ртный меч, и не я́ростию Твое́ю обличи́ нас, ниже́ преда́ждь нас до конца́ поги́бнути, и́мене Твоего́ ра́ди Свята́го; ниже́ отста́ви ми́лость Твою́ от нас Человеколю́бче; ниже́ разори́ заве́т Твой, ниже́ завеща́л еси́ отце́м на́шим; ниже́ ума́леных нас сотвори́ па́че всех язы́к, но проти́ву на́ших зол мно́жеству положи́ бе́здну Твои́х щедро́т. Тебе́ еди́ному согреши́хом, Го́споди, но и Тебе́ еди́ному слу́жим, ра́зве Тебе́ ино́го Бо́га не зна́ем. Тебе́ еди́ному сокруше́нным и смире́нным се́рдцем предстои́м, и слезя́ще вопие́м: Го́споди поми́луй. Приими́ Человеколю́бче, о́бщее сие́ сокруше́ние на́ше и серде́чную боле́знь, я́коже прия́л еси́ сле́зы Езеки́ины в ско́рби се́рдца его́, и от сме́рти сего́ изба́вил еси́, и вре́мя живота́ дарова́л еси́ па́че преде́ла кончи́ны его́. Обрати́ бо [глаго́лет Писа́ние,] Езекия лице́ свое́ к стене́ и пла́кася; и а́бие Человеколю́бец Влады́ка, проро́ка посла́л еси́, глаго́люща ему́: услы́шах моли́тву твою́, и ви́дех сле́зы твоя́, и приложу́ к лета́м твои́м лет пятьна́десять. Сам у́бо, незло́бив Го́споди, реки́й: не хощу́ сме́рти гре́шнаго, но е́же обрати́тися и жи́ву бы́ти ему́, умилосе́рдися и на нас недосто́йных, и отврати́ я́рость Твою́ пра́веднейшу от нас, и да не в ве́ки прогне́ваешися на ны. Видеши, Влады́ко, я́ко ума́лихомся, и оскуде́хом достоя́ние Твое́, и язы́к свят Твой, и исполне́ние всея́ земли́, его́же се́нь и го́ры объя́т. Помяни́, Человеколю́бче, Крест и сме́рть, и во́льную стра́сть Твою́, ю́же за ны осужде́нныя претерпе́л еси́, и да не похи́тит я́ко лев ду́шы на́шя, не су́щу избавля́ющу, ниже́ спаса́ющу; ве́си, Долготерпели́ве, я́ко ни еди́на ра́на нечу́вственных еги́птян та́ко косну́ся, я́коже первенцев тля и поги́бель; на нас же неисповеди́ма е́сть напа́сть, и неисце́льна лю́тость всех вку́пе, и пе́рвым, и сре́дним, и после́дним, пре́жде часа́ си́це восхищаемым внеза́пу. Умилосе́рдися у́бо благопримирительне Го́споди, на сле́зы, и плач младе́нцев и де́тищ, проста́го вся́каго, и недоспевшаго во́зраста, и уста́ви, е́же на ны пра́ведное Твое́ негодова́ние; и да преста́нет се́ча, Многоми́лостиве Го́споди. Я́зву бо и зна́мение сме́ртное младе́нцы прии́мше, и в чу́встве зла и тли бы́вше, к нам зияют, и все́ми очесы́ взира́ют, и ру́це подаю́т, и слеза́ми, и немованми, и вопиенми нея́сными, и и́миже и́мут движе́нми, и закла́ние показу́ют, губи́тельства рыда́ют, и к по́мощи себе́ все́ми о́бразы нас привлещи́ понужда́ются. Мы же ниотку́дуже могу́ще ру́ку по́мощи сим пода́ти, к Тебе́ вся могу́щему прибега́ем, и от Тебе́ еди́наго по́мощи и разреше́ния лю́тых про́сим; Тебе́ бо еди́ному возмо́жна су́ть вся, я́же у челове́к невозмо́жна бы́ти мо́гут; я́ко благослове́н еси́ во ве́ки веко́в, ами́нь.

Глава́ 85. Моли́тва ина́я, к Бо́гу глаго́лемая, во вре́мя губи́тельства и гла́да, творе́ние святе́йшего патриа́рха Ка́ллиста

Го́споду помо́лимся. Го́споди поми́луй.

Го́споди Бо́же наш, ви́димую сию́ тва́рь содетельным Твои́м повеле́нием от несу́щих в бытие́ приведы́й; та́же и челове́ка свои́ми рука́ми созда́вый, кра́йнею Твое́ю благостью; и пе́рвее у́бо все ему́ уготовле́ние неизнуря́емое и отра́дное соверши́в в сне́дь и питие́; вку́пе же преступле́нием за́поведи лиши́в его́ нетле́нныя пи́щи о́ныя, и друго́е пребыва́ние ему́ притру́дное пода́вый поле́зно; я́коже плоды́ износи́ти повеле́вый земли́ в пи́щу на́шу, и са́мым безслове́сным живо́тным многови́дно и разли́чно; и о́вем у́бо от саме́х се́мен земны́х подая́й я́же на потре́бу, о́вем же и́нако, по промысленней Твое́й си́ле, е́юже и на ры́бы морски́я призира́еши Твое́ю бла́гостию, отверзающейся десни́це Твое́й, и исполня́ющей вся́кое живо́тно благоволе́ния, вели́кая и чу́дная зна́мения соде́лавый в ве́тсем же и но́вом; услы́ши мя гре́шнаго и недосто́йнаго раба́ Твоего́, и я́коже иногда́ Ио́сифом о́нем, нося́щим о́браз единочаднаго сы́на Твоего́, вся изра́ильтеския о́ны изоби́льно препита́л еси́ лю́ди; си́це и ны́не единоро́дным Твои́м Сыно́м, и́стинным Бо́гом на́шим, пода́ждь я́же к пи́щи и упокое́нию на́шему, и ско́рбных всех измене́ние нам да́руй, гла́да и губи́тельства, ча́емыя ну́жды и беды́ изба́вивый нас; да просла́вится пресвято́е и́мя Тебе́ безнача́льнаго Отца́, и единоро́днаго Твоего́ Сы́на, и Пресвята́го и животворя́щаго Твоего́ Ду́ха, ны́не и при́сно, и во ве́ки веко́в, ами́нь.

Моли́тва ина́я подо́бна, того́жде Ка́ллиста.

Го́споду помо́лимся. Го́споди поми́луй.

Бо́же чуде́сных, И́же вели́кая и чу́дная соде́лавый, дре́вняго Изра́иля Моисе́ом свободи́вый го́рькия рабо́ты фарао́новы, руко́ю Твое́ю десно́ю сего́ наста́вив, и невреди́ма соблю́д к земли́ обетованной; и пе́рвее у́бо пти́цами о́ными в сы́тость напита́вый многочи́сленныя лю́ди в пусты́ни зело́ сухой, пото́м одожди́вый ма́нну я́коже во́ду от исто́чника приснотеку́щаго; и́же несеко́мый ка́мень исто́чники вод одожди́ти устро́ивый, и всех удовли́вый проли́тием во́ды жа́ждею изнуряемых. Си́це и ны́не нас напита́й обы́чным Твои́м человеколю́бием и бла́гостию, пода́ждь нам потре́бная, и удовли́ к служе́нию и пи́щи на́шей; покажи́ и в нас вели́кая Твоя́ и чу́дная, и напита́й нас в сы́тость благословлением Твоея́ бла́гости; вся бо возмо́жна Тебе́, но не возмо́жно же тебе́ ничто́же. Ей Го́споди Бо́же наш, напита́вый тма́ми лю́ди ма́лыми хле́бы в пусты́ни, напита́й и нас ны́не неизрече́нным Твои́м благоутро́бием, и не пре́зри моле́ния нас гре́шных и недосто́йных раб Твои́х. Да просла́вится пресвято́е и́мя Твое́, Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Глава́ 86. Моли́тва на преще́ние гро́мов и мо́лний

Го́споду помо́лимся. Го́споди поми́луй.

Па́ки Тебе́ Го́споди Человеколю́бца Влады́ки, па́мять наказа́ния, па́ки рабо́в неключи́мых проще́ния, моле́ния ве́дущих, я́ко ели́ко превосхо́дит мно́жество грехо́в, толи́ко вя́щши и того́ превосхо́диши, непамятозлобным Твои́м благоутро́бием. Те́мже, и мо́лимся Тебе́: отврати́ я́рость Твою́ от нас, я́ко да не в век прогне́ваешися на нас, но в ми́лости Твое́й оживши ны щедро́тами Твои́ми. Го́споди Бо́же наш, утвержда́яй гром, и претворяй мо́лнию, и вся де́яй ко спасе́нию дел ру́ку Твое́ю, при́зри Твои́м Человеколю́бием, и изба́ви нас от вся́кия ско́рби, гне́ва и ну́жды, и настящаго преще́ния. Возгреме́л бо еси́ с небеси́ Го́споди, и мо́лнию умно́жил еси́, и смути́л еси́ нас. Примири́ся Благоутро́бне, к Тебе́ прибега́ем, и бога́тыя щедро́ты Твоя́ низпосли́ на ны, и поми́луй рабы́ Твоя́, я́ко Благ и Человеколю́бец; да не попали́т нас огонь я́рости Твоея́, ниже́ да снеда́ет нас я́рость мо́лний и гро́мов Твои́х; но обы́чное Твое́ употреби́вый благоутро́бие, укроти́ гнев Твой, и в Благоти́шие возду́х преложи́, и со́лнечными луча́ми належа́щий мрак разсеки, и мглу в тишину́ претвори́.

Я́ко Бог ми́лости, щедро́т и человеколю́бия еси́, и Тебе́ сла́ву воссылаем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Влады́ко Го́споди Бо́же наш, И́же ипоста́сным и безнача́льным Твои́м Сло́вом, и животворя́щим, и единоче́стным Твои́м Ду́хом, от не су́щих, во е́же бы́ти, вся́ческая приве́л еси́; положи́вый мо́рю преде́л песо́к, и поста́вивый го́ры и до́лы пра́вилом; пя́дию изме́ривый Не́бо, и го́рстию содержа́й зе́млю; ме́ры и пра́вила, преде́лы и составле́ния, и чи́ны ви́димей и чу́вственней сей да́вый тва́ри, и време́н измене́ния, и возвраты со́лнечныя, и растворе́ния стихи́и ма́нием Твои́м содержа́й неизрече́нно, и к безстрастному же и нерушимому окормля́яй. Сам Всеблаги́й Царю́, есте́ственное и обы́чное Твое́ человеколю́бие и бла́гость и па́ки употреби́вый к нам, посети́ Твое́ю ру́ку дела́, и не отста́ви от нас ми́лостей Твои́х, и щедро́т Твои́х, ниже́ разори́ заве́т Твой, по о́бразу Твоему́ созда́вый неизрече́нно нас; И́же единоро́днаго Сы́на Твоего́ избавле́ние за ны да́вый, и Ду́ха неизрече́нным приобще́нием Своего́ Божества́ препода́вый, оста́ви грехо́в мно́жество, мо́лимся, превосхожде́нием мно́жества щедро́т Твои́х. Кресто́м и кро́вию Сы́на Твоего́ грех омы́вый ро́да на́шего, возведи́ Твою́ тва́рь к есте́ственному составле́нию, и чи́ну, чрез естество́ окая́нно обрати́вшуюся, безчи́ния ра́ди чрез естество́, и некрасоты́ беззако́ннаго и зла́го жи́тельства на́шего; покажи́ нам обы́чную вели́кия сея́ пучи́ны тишину́, и належа́щую бу́рю, и смяте́ние возду́ха разсеки. Запове́ждь ве́тром, вре́менное и согла́сное дыха́ние да́ти; запрети́ волне́нию морско́му, и чрез естество́ ве́тров движе́нием, да ста́нет дух бу́рный, и к тишине́ мяте́жная да приложи́тся; я́ко да Твоя́ дела́, и чудеса́, и па́ки ви́дят сходя́щии на мо́ре в корабле́х, и творя́щии де́лания в вода́х мно́гих. Устро́й ѐ, человеколю́бче Влады́ко, Твои́м неприкладным человеколю́бием; И́же единогоднаго Твоего́ Сы́на и Го́спода на́шего Иису́са Христа́, благоволе́нием Твои́м, и соде́йствием Свята́го Твоего́ Ду́ха, изво́ливый бы́ти челове́ка, и сплавати святы́м Твои́м ученико́м и апо́столом, и запрети́ти бу́ри ве́тров, и морски́м ути́шитися волна́м повеле́вый. Сам и ны́не вся́кий сопроти́вный ветр успи́, и во́лны укроти́, и бу́рю утоли́, и воздви́гни наро́читая и благоключимая времена́ и ве́тры, Прави́тель и Помо́щник везде́ быв рабо́м Твои́м, наставля́яй я̀ во приста́нище спасе́ния; и́же Твое́ то́чию ве́дающе и́мя, и не зна́юще ра́зве Тебе́ Бо́га ино́го, и к Твое́й по́мощи вы́ну призирающе, моли́твами и моле́нми Преблагослове́нныя Богоро́дицы, богови́дных а́нгелов, и всех святы́х, благоволе́нием и бла́гостию единоро́днаго Твоего́ Сы́на, с Ни́мже благослове́н еси́, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Го́споди, еди́не в ми́лости бога́тый, и утро́бами бла́гости преклоня́яйся к моле́нием нас гре́шных и недосто́йных раб Твои́х, вся на́шя поле́зно стро́яй и правля́яй, прему́дрым Твои́м про́мыслом житие́ на́ше провожда́яй, и вся́ким о́бразом спасе́ния на́шего жела́яй, естество́м долготерпели́в сый и многоми́лостив; наказу́яй, и па́ки исцеля́яй, и наказа́ние простира́яй бла́гостне же и человеколю́бне, не во е́же погуби́ти созда́ние рук твои́х, но па́че е́же к нача́льной добро́те па́ки привести́, и к пе́рвому о́ному благоро́дию, его́же погуби́хом простото́ю ума́, и сове́том окая́ннейшаго, па́ки возвести́ хотя́, и все́ми о́бразы смотря́яй, е́же па́ки спасти́ оскуде́вшее от паде́жа о́наго. Сам Влады́ко Вседержи́телю, при́зри на ны, и вонми́ моле́нием нас гре́шных; мно́жество бо беззако́ний на́ших недерзнове́нны нас сотвори́, и ниже́ сме́ти отню́д проси́ти проще́ния о прегреше́ниих. Но ве́дуще Твое́ человеколю́бие, благоутро́бие, мно́гую ми́лость, долготерпе́ние, беззло́бие и премно́гую бла́гость, дерза́юще на глубину́ сих, и на пучи́ну бла́гости Твоея́, возде́ем ру́це, и приле́жно вопие́м Ти: согреши́хом, беззако́нновахом, нече́ствовахом, я́ко забы́хом за́поведи Твоя́, и в след мы́сли на́шея лука́выя ходи́хом, и я́ко недосто́йно зва́нию и Ева́нгелию Христа́ твоего́ жи́тельствовахом, и святы́м его́ страсте́м, и е́же о нас истоща́нию, я́ко бы́хом поноше́ние возлю́бленному Твоему́. Свяще́нницы и лю́дие твои́ изступи́хом, вку́пе вси уклони́хомся, непотре́бни бы́хом; не́сть творя́й суд и пра́вду, не́сть до еди́наго, затвори́хом щедро́ты Твоя́, и человеколю́бие Твое́, и утро́бы ми́лости Бо́га на́шего, зло́бы ра́ди на́шея, и лука́вства начина́ний, с ни́миже пожи́хом. Ты благ еси́, но мы беззако́нновахом; Ты долготерпели́в, но мы язв досто́йни. Ве́мы Твою́ бла́гость, а́ще и неразу́миви есмы́; ма́ло, о ни́хже согреши́хом, бие́ни бы́хом. Ты стра́шен еси́, и кто противоста́нет Ти? Тре́пет прии́мут от Тебе́ го́ры, и вели́честву мы́шцы Твоея́ кто противорече́т? А́ще заключи́ши Не́бо, кто отве́рзет? И а́ще заключи́ши хля́би Твоя́, кто постои́т? Легко́ е́сть пред очи́ма Твои́ма и оубо́жити и обогати́ти, оживи́ти и умертви́ти, порази́ти и исцели́ти; е́же хоте́ти Тебе́, дея́ние е́сть соверше́нное. Ты разгне́вался еси́, мы же согреши́хом, глаго́лет не́кто от дре́вних, испове́даяся. Нам же и сопроти́в вре́мя е́сть рещи́: мы согреши́хом, Ты же разгне́вался еси́, сего́ ра́ди бы́хом поноше́ние сосе́дом на́шым; отврати́л еси́ лице́ Твое́, и нече́стия испо́лнихомся. Но преста́ни Го́споди от гне́ва, осла́би Го́споди, уми́лостивися Го́споди, и не преда́ждь нас до конца́ беззако́ний ра́ди на́ших, ниже́ на́шими ра́нами да нака́жеши ины́х. Да́ждь нам муче́нием ины́х уцелому́дритися; ки́их сих? Язы́ков неве́дущих Тя и царств не повину́вшихся держа́ве Твое́й; мы же лю́дие твои́, и жезл насле́дия Твоего́. Сего́ ра́ди накажи́ ны, оба́че в бла́гости, а не с я́ростию Твое́ю, да не ума́леных нас сотвори́ши, и па́че всех живу́щих на земли́ во уничиже́ние бу́дем; ми́лость бо Твоя́ неизрече́нна, и человеколю́бие Твое́ непобеди́мо, и бога́тство бла́гости Твоея́ неизсле́димо, на ня́же и дерза́юще мо́лимся, и милися де́ем прекланя́юще коле́на серде́ц на́ших; преста́ни от се́чи гне́ва Твоего́, мо́лим приле́жно, я́коже при Дави́де дре́вле о и́же на лю́дех Твои́х, а́ще и неподо́бное покая́ние показу́ем; но я́ко преблаги́й уста́ви гнев Твой, укроти́ я́рость твою́ пра́ведную, и да́ждь стра́ждущым здра́вие, немощству́ющым кре́пость, здра́выя же соблюди́, всяк неду́г, и вся́кую я́зю отжени́ от люде́й Твои́х; всех от сего́ ча́яния свободи́, соблюда́яй безнаве́тны по бы́вшей боле́зни, и сохраня́яй вседержи́тельною Твое́ю руко́ю неприкоснове́нны от лю́таго сего́ озлобле́ния, и губи́тельнаго сокруше́ния. Вои́стинну бо поколеба́ всех, и смути́ я́рость гне́ва Твоего́. А́ще у́бо и не обраща́емся вся́ко от лука́вств на́ших, но ты сам изба́ви от лука́выя со́вести всех нас, и да́ждь во вся́ком благодея́нии благоугоди́ти Тебе́; моли́твами неискусому́жно Тебе́ ро́ждшия, чи́стыя Богома́тере, Присноде́вы Мари́и; предста́тельствы святы́х и богови́дных а́нгел, и всех святы́х я́ко Ты еси́ ми́лости исто́чник, и благоутро́бия неизсле́димая пучи́на, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Го́споди Бо́же наш, седя́й на херуви́мех, возста́вивый си́лу Твоего́ Сы́на Го́спода на́шего Иису́са Христа́, да спасе́т мир Кресто́м и погребе́нием и воскресе́нием Свои́м, и прише́дше во Иерусали́м на во́льную стра́сть, лю́дие седя́щии во тме и се́ни сме́ртней, прие́мше воскресе́ния зна́мения, ве́тви древе́с, и ваия фи́ник, воскресе́ние возвращающе; Сам Влады́ко, и нас по подража́нию о́нех в предпра́зднственный сей де́нь, ваия и ве́тви древе́с, в рука́х нося́щих, соблюди́ и сохрани́; я́коже о́нии нарожди и де́ти оса́нна Тебе́ приноша́ху, сохрани́ и нас, я́ко да в пе́снех и пе́ниих духо́вных сподо́бимся животворя́щаго и тридне́внаго воскресе́ния дости́гнути, во Христе́ Иису́се Го́споде на́шем, с Ни́мже благослове́н еси́, с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Го́споду помо́лимся. Го́споди поми́луй.

Благослови́ Го́споди, плод сей ло́зный но́вый, (и́же) благорастворе́нием возду́шным, и ка́плями дожде́вными, и тишино́ю вре́менною, в сей зре́лейший приити́ час благоволи́вый, да бу́дет в нас от того́ рожде́ния ло́знаго причаща́ющихся, в весе́лие, и приноси́ти Тебе́ дар во очище́ние грехо́в, свяще́нным и святы́м Те́лом Христа́ Твоего́; с Ни́мже благослове́н еси́, со Пресвяты́м, и благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

Глава́ 91. После́дование моле́бнаго пе́ния ко Го́споду Бо́гу, пева́емаго во вре́мя бра́ни проти́в супоста́тов, находя́щих на ны

Благослови́вшу иере́ю, начина́ем: Сла́ва Тебе́ Бо́же наш, сла́ва Тебе́. Царю́ Небе́сный: Трисвято́е, и О́тче наш:

Иере́й глаго́лет: Я́ко Твое́ е́сть Ца́рство:

Чтец же, псало́м: Го́споди, услы́ши моли́тву мою́, внуши́ моле́ние мое́:

Сла́ва, И ны́не: Аллилу́иа, аллилу́иа, аллилу́иа, сла́ва Тебе́ Бо́же, три́жды.

Посе́м, Бог Госпо́дь, и яви́ся нам: со стихи́, на глас 1.

Тропа́рь:

Спаси́ Го́споди лю́ди Твоя́, и благослови́ достоя́ние Твое́, побе́ды Благове́рному ИМПЕРА́ТОРУ на́шему АЛЕКСА́НДРУ АЛЕКСА́НДРОВИЧУ на сопроти́вныя да́руя, и Твое́ сохраня́я Кресто́м Твои́м жи́тельство.

Сла́ва, и ны́не, Богоро́дичен:

Предста́тельство стра́шное и непосты́дное, не пре́зри Блага́я моли́тв на́ших, всепе́тая Богоро́дице; утверди́ правосла́вное жи́тельство, спаси́ Благове́рнаго ИМПЕРА́ТОРА на́шего АЛЕКСА́НДРА АЛЕКСА́НДРОВИЧА, Ему́ же повеле́ла еси́ ца́рствовати, и пода́ждь Ему́ с Небесе́ побе́ду, зане́ родила́ еси́ Бо́га, еди́на Благослове́нная.

Начина́ем кано́н без ирмосо́в, глас 8. Пе́снь 1. Ирмо́с:

Колесницегони́теля фарао́ня погрузи́, чудотворя́й иногда́ Моисе́йский жезл крестообра́зно порази́в, и раздели́в мо́ре; Изра́иля же, беглеца́, пешехо́дца спа́се, пе́снь Бо́гови воспева́юща.

Припе́в: Многоми́лостиве Го́споди, сокруши́ враги́ под но́ги на́шя.

Грех ра́ди на́ших и беззако́ний попусти́л еси́, Правосу́де, врага́м на́шим озло́бити нас; но милосе́рдия ра́ди Твоего́, Человеколю́бче, отврати́ от нас пра́ведный гнев Твой и поми́луй нас.

Я́коже дре́вле на Амали́ка побе́ду уго́днику Твоему́ Моисе́ю дарова́л еси́, Ми́лостиве Бо́же; та́ко и ны́не, мо́лим Тя, побе́ду на враги́ Держа́вному ИМПЕРА́ТОРУ на́шему да́руй.

Сла́ва:

Крестообра́зно просте́ртыми рука́ми Моисеовыми Амали́кову си́лу низложи́л, еси́, Всеси́льне; и ны́не мо́лим Тя, пода́ждь крестоно́сному ИМПЕРА́ТОРУ на́шему си́лу на сокруше́ние и попра́ние возстаю́щих на ны.

И ны́не:

Си́лою неизрече́нною Твое́ю, Многоми́лостиве Христе́, защити́ лю́ди Твоя́ от вся́кая напа́сти, побе́ду да́руя на враги́ Правосла́вному Импера́тору на́шему, ра́ди Пречи́стыя Твоея́ Ма́тере и всех святы́х.

Пе́снь 3. Ирмо́с:

Небе́снаго кру́га Верхотво́рче Го́споди, и Це́ркве Зижди́телю, Ты мене́ утверди́ в любви́ Твое́й; жела́ний Кра́ю, ве́рных Утвержде́ние, еди́не Человеколю́бче.

Неизрече́нным милосе́рдием Твои́м защити́, Христе́, лю́ди Твоя́, и низложи́ де́рзость враго́в на́ших.

Я́коже дре́вле пре́дал еси́, Бо́же, иноплеме́нников ве́рному рабу́ Твоему́ Иису́су Нави́ну; та́ко и ны́не, Многоми́лостиве, преда́ждь сопроти́вныя по́лчища в руки́ ве́рному рабу́ Твоему́ ИМПЕРА́ТОРУ на́шему.

Сла́ва:

Не преда́ждь нас, Влады́ко, грех ра́ди на́ших и беззако́ний в руки́ враго́в, но преложи́ пра́ведный гнев Твой на ми́лость, и пода́ждь утеше́ние раба́м Твои́м.

И ны́не:

Ма́ти Бо́жия, сохрани́ под кро́вом Твои́м христолюби́вых во́инов и ца́рство всеросси́йское, и Свои́м предста́тельством у Сы́на Своего́ Христа́ Бо́га на́шего, испроси́ нам побе́ду на враги́ и супоста́ты на́шя.

Изба́ви от бед рабы́ Твоя́, Ми́лостиве, я́ко мы усе́рдно к Тебе́ прибега́ем, к Ми́лостивому Изба́вителю, всех Влады́це, Го́споду Иису́су.

Ектения́:

Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй.

Еще́ мо́лимся о Благочести́вейшем, Самодержа́внейшем, вели́ком Госуда́ре ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, о держа́ве, побе́де, пребыва́нии, ми́ре, здра́вии, спасе́нии Его́, и Го́споду Бо́гу на́шему, наипа́че поспеши́ти и пособи́ти Ему́ во всех, и покори́ти под но́зе Его́ вся́каго врага́ и супоста́та.

Еще́ мо́лимся о Супру́ге Его́, Благочести́вейшей ГОСУДА́РЫНЕ ИМПЕРАТРИ́ЦЕ МАРИ́И ФЕО́ДОРОВНЕ, Го́споду помо́лимся.

Еще́ мо́лимся о Насле́днике Его́, Благове́рном Госуда́ре Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ, и о всем Ца́рствующем До́ме, Го́споду помо́лимся.

Еще́ мо́лимся о Святе́йшем Прави́тельствующем Сино́де, и о преосвяще́нном, и́мярек, и всей о Христе́ бра́тии на́шей.

Еще́ мо́лимся о всем Их христолюби́вом во́инстве.

Не на лук наш упова́ем, ни ору́жие на́ше спасе́т нас, Го́споди, но Твоея́ всемогущия по́мощи про́сим, и на Твою́ си́лу дерза́юще, на враги́ на́шя ополча́емся, и и́мя Твое́ ве́рно призыва́ем: со умиле́нием мо́лимтися, Всемоги́й Го́споди, ми́лостивно услы́ши и поми́луй.

Во ве́ки пребыва́яй, Милосе́рде Го́споди, запрети́ языкам, в достоя́ние Твое́ приходя́щым, и оскверняющым Це́рковь Святу́ю Твою́, пожени́ их бу́рею Твое́ю, и гне́вом Твои́м смути́ их; испо́лни лица́ их безче́стия, да постыдя́тся и смяту́тся в век ве́ка, да посра́мятся, и си́лою суде́б Твои́х го́рдость их да сокруши́тся; и́мя же Твое́ Свято́е да просла́вится в нас, приле́жно мо́лимтися, услы́ши и поми́луй.

О е́же необори́му и победи́тельну всегда́ над враги́ бы́ти Благочести́вейшему, Самодержа́внейшему, Вели́кому Госуда́рю ИМПЕРА́ТОРУ АЛЕКСА́НДРУ АЛЕКСА́НДРОВИЧУ всея́ Росси́и, и правове́рному Его́ во́инству, и мир и сла́ву утверди́ти в земли́ на́шей, приле́жно мо́лимтися, Го́споди, услы́ши и поми́луй.

О е́же услы́шати от Це́ркве Святы́я Своея́ во́пль и воздыха́ние единове́рных на́ших, и от враго́в и супоста́т порабоще́нных рабо́в Свои́х, в печа́ли и ско́рби свое́й к Тебе́ вопию́щих, и извести́ от тли живо́т их, приле́жно мо́лимтися, Го́споди, услы́ши и поми́луй.

Возгла́с: Я́ко ми́лостив и Человеколю́бец Бог еси́:

Седа́лен:

Це́рковь вопие́т Ти, Христе́ Бо́же: си́лою Креста́ Твоего́ укрепи́ ве́рнаго раба́ Твоего́ ИМПЕРА́ТОРА на́шего, и пода́ждь Ему́ побе́ды на сопроти́вныя.

Богоро́дичен:

Богоро́дице Де́во, ско́рая ми́ру Помо́щнице, Твоего́ предста́тельства и заступле́ния про́сим: умоли́ Милостивого Сы́на Твоего́ и Бо́га, от належа́щих бед изба́вити ны.

Пе́снь 4. Ирмо́с:

Ты моя́ кре́пость, Го́споди, Ты моя́ и си́ла, Ты мой Бог, Ты мое́ ра́дование, не оста́вль не́дра О́тча, и на́шу нищету́ посети́в. Тем с проро́ком Авваку́мом зову́ Ти: си́ле Твое́й сла́ва, Человеколю́бче.

Влады́ко Бо́же, милосе́рдием щадя́й лю́ди Твоя́, напа́стьми же и скорбьми́ обраща́яй их па́ки к Себе́, отврати́ гнев Твой, и преложи́ ско́рбь на́шу на ра́дость, побе́ду на сопроти́вных да́руя.

Не вни́ди в суд с рабы́ Твои́ми, Правосу́де, зане́ никто́же постои́т пред Тобо́ю: но призира́я ми́лостивно на смире́ние на́ше, поми́луй нас, и пода́ждь нам утеше́ние.

Сла́ва:

Влады́ко Го́споди, руко́ю Твое́ю всеси́льною во глубине́ погрузи́вый фарао́на, Ты и ны́не де́рзость супоста́тов на́ших си́лою Креста́ Твоего́ низложи́, презира́я согреше́ния на́шя, я́ко еди́н Благоутро́бен.

И ны́не:

Вели́кое дерзнове́ние и́маши к Ро́ждшемуся из Тебе́, я́ко никто́же ин; те́мже, Влады́чице, мо́лимся о рабе́х Твои́х, изба́витися нам от наше́ствия иноплеме́нников.

Пе́снь 5. Ирмо́с:

Вску́ю мя отри́нул еси́ от Лица́ Твоего́, Све́те незаходи́мый, и покры́ла мя е́сть чужда́я тьма́, окая́ннаго; но обрати́ мя, и к све́ту за́поведей Твои́х пути́ моя́ напра́ви, молю́ся.

Не помина́й Влады́ко, безчи́сленныя собла́зны на́шя; но вско́ре преложи́в гнев Твой на милосе́рдие, низложи́ враги́ на́шя и люде́й Твои́х сохрани́ ми́лостию Твое́ю.

При́зри, Ми́лостиве, на лю́ди Твоя́, су́щыя в ско́рбях, и пода́ждь нам свы́ше по́мощь Твою́ на одоле́ние враго́в на́ших.

Сла́ва:

Укрепи́вый дре́вле на го́рдаго Голиа́фа мы́шцу кро́ткаго Дави́да, и ны́не, Влады́ко, укрепи́ благове́рнаго ИМПЕРА́ТОРА на́шего, побе́ду дая́ Ему́ на супоста́ты.

И ны́не:

Тя еди́ну Пречи́стую Засту́пницу и́мамы непобеди́мую, и на Тя упова́юще вопие́м Ти: изба́ви нас, Влады́чице, от всех бед и зол.

Пе́снь 6. Ирмо́с:

Очи́сти мя, Спа́се, мно́га бо беззако́ния моя́, и из глубины́ зол возведи́, молю́ся; к Тебе́ бо возопи́х, и услы́ши мя, Бо́же спасе́ния моего́.

Избавле́й, Влады́ко, в ско́рби су́щыя лю́ди евре́йския, и Сампсо́ну пода́вый кре́пость Твое́ю си́лою; Ты и ны́не, Ми́лостиве, изба́ви люде́й Твои́х от сопроти́вных, и побори́ борю́щыя ны.

Ди́вен еси́, Бо́же, Твое́ю всеси́льною десни́цею спаса́яй упова́ющия на Тя: вся бо рука́ Твоя́ мо́жет. Те́мже и ны́не мо́лим Тя, изба́ви нас от враго́в на́ших.

Сла́ва:

О́ком Твои́м всеви́дящим ви́дя насле́дие Твое́, Бо́же, от сопроти́вных озлобляемо, умилосе́рдися, Влады́ко, на лю́ди Твоя́, и низложи́ вра́жию де́рзость.

И ны́не:

Под Твое́ благоутро́бие прибега́ем, Богоро́дице Де́во, моле́ния на́шя не пре́зри во обстоя́нии; но от бед изба́ви ны, еди́на Чи́стая и Благослове́нная.

Конда́к, глас 4:

Вознесы́йся на Крест во́лею, тезоимени́тому Твоему́ но́вому жи́тельству щедро́ты Твоя́ да́руй, Христе́ Бо́же: возвесели́ си́лою Твое́ю Благове́рнаго ИМПЕРА́ТОРА на́шего Алекса́ндра АЛЕКСА́НДРОВИЧА, побе́ды дая́ Ему́ на супоста́ты, посо́бие иму́щу Твое́ ору́жие ми́ра, непобеди́мую побе́ду.

Проки́мен, глас 6:

Госпо́дь кре́пость лю́дем Свои́м даст, Госпо́дь благослови́т лю́ди Своя́ ми́ром.

Посе́м: Апо́стол ко Евреям, зача́ло 329.

Бра́тие, не доста́нет ми повеству́ющу вре́мени, о Гедеоне, Вараце же и Сампсо́не, и Иеффаи, о Дави́де же и Самуи́ле, и о други́х проро́цех; и́же ве́рою победи́ша ца́рствия, соде́яша пра́вду, получи́ша обетова́ния, загради́ша уста́ льво́в. Угаси́ша си́лу о́гненную; избего́ша острея меча́, возмого́ша от не́мощи, бы́ша кре́пцы во бране́х, обрати́ша в бе́гство полки́ чужди́х. Те́мже у́бо и мы, толи́к иму́ще облежащ нас о́блак свиде́телей, го́рдость вся́ку отло́жше, и удо́бь обстоя́тельный грех, терпе́нием да тече́м на предлежа́щий нам по́двиг; Взира́юще на нача́льника ве́ры, и Соверши́теля Иису́са.

Иере́й: Мир ти. Чтец: И ду́хови твоему́.

Диа́кон: Прему́дрость, про́сти услы́шим Свята́го Ева́нгелиа.

Иере́й: Мир всем. Лик: И ду́хови твоему́.

Иере́й: От Матфе́я Свята́го Ева́нгелиа чте́ние.

Лик: Сла́ва Тебе́, Го́споди, сла́ва Тебе́. Диа́кон: Во́нмем.

Иере́й чтет Ева́нгелие от Матфе́я, зача́ло 20:

Рече́ Госпо́дь: проси́те и да́стся вам; ищи́те и обря́щете; толцы́те, и отве́рзется вам. Всяк бо прося́й, прие́млет, и ищя́й обрета́ет, и толку́щему отве́рзется. Или́ кто е́сть от вас челове́к, его́же а́ще воспросит сын его́ хле́ба, еда́ ка́мень пода́ст ему́? Или́ а́ще ры́бы про́сит, еда́ змию́ пода́ст ему́? А́ще у́бо вы лука́ви су́ще, уме́ете дая́ния бла́га дая́ти ча́дом ва́шим: кольми́ па́че Оте́ц ваш Небе́сный даст бла́га прося́щим у Него́.

Лик: Сла́ва Тебе́, Го́споди, сла́ва Тебе́.

Сла́ва, глас 6: О́тче, Сло́ве, и Душе́, Тро́ице Свята́я, очи́сти мно́жества согреше́ний на́ших.

И ны́не: Моли́твами Богоро́дицы, Ми́лостиве, очи́сти мно́жества согреше́ний на́ших.

Поми́луй мя Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́.

Стихи́ра, глас 4:

Пособи́вый, Го́споди, кро́ткому Дави́ду победи́ти иноплеме́нника, и ве́рному рабу́ Твоему́ ИМПЕРА́ТОРУ на́шему АЛЕКСА́НДРУ АЛЕКСА́НДРОВИЧУ спосо́бствуй ору́жием Креста́ низложи́ти враги́ на́шя: покажи́, Милосе́рде, на нас дре́вния Твоя́ ми́лости, да разуме́ют вои́стинну, я́ко Ты еси́ Бог наш, и Тя призыва́юще побежда́ем.

Иере́й: Спаси́, Бо́же, лю́ди Твоя́, и благослови́ достоя́ние Твое́:

Возгла́с: Ми́лостию и щедро́тами:

Пе́снь 7. Ирмо́с:

Бо́жия снисхожде́ния о́гнь устыде́ся в Вавило́не иногда́, сего́ ра́ди о́троцы в пещи́ ра́дованною ного́ю, я́ко во цве́тнице лику́юще, поя́ху: благослове́н еси́ Бо́же оте́ц на́ших.

Преста́ни от гне́ва, и при́зри ми́лостивно на ско́рбь на́шу, и не преда́ждь нас враго́м на́шым, отце́в Бо́же.

Согреши́хом, Го́споди, пред Тобо́ю; но ве́мы, я́ко не́сть грех, побежда́ющь милосе́рдие Твое́, и сего́ ра́ди во умиле́нии взыва́ем к Тебе́: поми́луй нас, отце́в Бо́же.

Сла́ва: Ве́мы Го́споди, я́ко наказу́еши нас, я́ко оте́ц сыно́в, да скорбьми́ обрати́ши ны к Тебе́. Те́мже в покая́нии зове́м Ти: оста́ви нам до́лги на́шя, и изба́ви нас от враг на́ших, отце́в Бо́же.

И ны́не: Подви́гни, Влады́чице, а́нгелы и арха́нгелы, ли́ки же проро́ков, апо́стол и му́ченик, согла́сно умоли́ти Сы́на Твоего́ и Бо́га, да изба́вит нас от всех вра́жеских наве́тов и нахожде́ний.

Пе́снь 8. Ирмо́с:

Седмери́цею пе́щь халде́йский мучи́тель богочести́вым неи́стовно разжже́, си́лою же лу́чшею спасе́ны сия́ ви́дев, Творцу́ и изба́вителю вопия́ше: о́троцы благослови́те, свяще́нницы воспо́йте, лю́дие превозноси́те во вся ве́ки.

Кто изочте́т, Христе́, неизрече́нныя Твоя́ ми́лости? Презира́еши бо грехи́ ка́ющихся, боле́зни же исцеля́еши, и бра́ни вся отвраща́еши, и безу́мныя укроща́еши стра́сти. Те́мже мо́лимся Тебе́, Человеколю́бче Го́споди, обрати́ гнев Твой на милосе́рдие к нам.

Раждени враги́ на́ши руко́ю Твое́ю, Го́споди, и защити́ нас лю́ди Твоя́. Побе́ду, я́коже дре́вле Дави́ду и Иису́су Нави́ну на иноплеме́нников, подая́ ны́не Держа́вному (Тобо́ю венчаному) ИМПЕРА́ТОРУ на́шему, на вся возстаю́щыя на ны супоста́ты.

Сла́ва: Проро́цы со апо́столы, му́ченицы со святи́тели, и преподо́бнии отцы́ со все́ми святы́ми, моли́тву твори́те ко Христу́ за нас приле́жно: да преложи́т гнев на ми́лость, побе́ду подая́ нам на сопроти́вныя враги́.

И ны́не: Богоро́дице всепе́тая, Ты вся мо́жеши у Преве́чнаго Сы́на Твоего́; моли́ у́бо Его́, я́ко Милосе́рдия Ма́ти, изба́вити ны от всех зол, да Тя непреста́нно велича́ем.

Пе́снь 9. Ирмо́с:

Ужасе́ся о сем Не́бо, и земли́ удиви́шася концы́, я́ко Бог яви́ся челове́ком пло́тски, и чре́во Твое́ бы́сть простра́ннейшее небе́с; тем Тя Богоро́дицу а́нгелов и челове́к чинонача́лия велича́ют.

Удиви́шася Христе́, щедро́ты Твоя́, я́же на согре́шшия Тебе́ показа́л еси́ испе́рва оби́льно; на ня́же упова́юще, и мы гре́шнии припа́даем Ти и мо́лимся: и нам ны́не яви́ благоутро́бие и щедро́ты Твоя́, да Тя непреста́нно велича́ем.

При́зри ми́лостивно, Го́споди, на смире́нныя рабы́ Твоя́, ко Твоему́ благоутро́бию припа́дающих, и на Тя еди́наго все упова́ние возлага́ющыя, и пода́ждь ИМПЕРА́ТОРУ на́шему си́лу и кре́пость на одоле́ние всех враго́в на́ших, да Тя Всеси́льнаго Помо́щника, непреста́нно велича́ем.

Сла́ва: Я́ко о́чи рабо́в в ру́ку госпо́дий свои́х: та́ко всегда́ о́чи на́ши к Тебе́, Многоми́лостиве Го́споди Бо́же наш: при́зри у́бо ми́лостивно на ны, и низложи́ си́лою Твое́ю горды́ню враго́в на́ших, и под но́зе Импера́тору на́шему тех покори́, да Тя непреста́нно велича́ем.

И ны́не: Ма́ти Бо́жия, принеси́ усе́рдныя моли́твы на́ши Сы́ну Твоему́ и Бо́гу на́шему, да спасе́т ны Тобо́ю от всех враго́в на́ших.

Досто́йно е́сть: Трисвято́е. По О́тче наш:

Иере́й: Я́ко Твое́ е́сть Ца́рство:

Тропари́: Поми́луй нас, Го́споди поми́луй нас; вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Сла́ва: Го́споди поми́луй нас, на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враго́в на́ших: Ты бо еси́ Бог наш, и мы лю́дие Твои́, вси дела́ ру́ку Твое́ю, и и́мя Твое́ призыва́ем.

И ны́не: Милосе́рдия две́ри отве́рзи нам, благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед; Ты бо еси́ спасе́ние ро́да христиа́нскаго.

Ектения́: Поми́луй нас, Бо́же, по вели́цей ми́лости Твое́й, мо́лимся Ти, услы́ши и поми́луй.

Еще́ мо́лимся, о е́же сохрани́тися ца́рству Всеросси́йскому от гла́да, губи́тельства, тру́са, пото́па, огня́, меча́, наше́ствия иноплеме́нников и междоусо́бныя бра́ни; о е́же ми́лостиву и благоуве́тливу бы́ти благо́му и человеколюби́вому Бо́гу на́шему, отврати́ти вся́кий гнев на ны дви́жимый, и изба́вити ны от належа́щаго и пра́веднаго Своего́ преще́ния, и поми́ловати нас.

Возгла́с: Услы́ши ны, Бо́же Спаси́телю наш, упова́ние всех конце́в земли́, и су́щих в мо́ре дале́че. И ми́лостив, ми́лостив бу́ди, Влады́ко, о гресе́х на́ших и поми́луй ны; Ми́лостив бо и человеколю́бец, Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Диа́кон: Во́нмем, и во умиле́нии се́рдца коле́на душ и теле́с на́ших прекло́ньше, Го́споду помо́лимся.

Иере́й чтет моли́тву:

Го́споди Бо́же сил, Бо́же спасе́ния на́шего, Бо́же, творя́й чудеса́ еди́н, при́зри в ми́лости и щедро́тах на смире́нныя рабы́ Твоя́, и человеколю́бно услы́ши и поми́луй нас; се бо врази́ на́ша собра́шася на ны, во е́же погуби́ти нас, и разори́ти святы́ни на́шя. Ты же вся ве́дый, ве́си, я́ко непра́ведно воста́ша на ны, и я́ко не возмо́жем мы противоста́ти мно́жеству их, а́ще не Ты яви́ши по́мощь нам. Те́мже гре́шнии и недосто́йнии в покая́нии со слеза́ми мо́лимся Ти: помози́ нам Бо́же Спаси́телю наш, и изба́ви нас сла́вы ра́ди И́мени Твоего́, да не когда́ реку́т врази́ на́ши: Бог оста́вил е́сть их, и не́сть избавля́яй и спаса́яй их: но да уве́дят вси язы́цы, я́ко Ты Бог наш, и мы лю́дие Твои́, под Держа́вою Твое́ю всегда́ храни́мии. Яви́ нам Го́споди ми́лость Твою́, и да приложа́тся к нам словеса́, рече́нная Моисе́ем к лю́дем Изра́ильским: дерза́йте, сто́йте, и у́зрите спасе́ние от Го́спода, Госпо́дь бо побо́рет по нас. Сотвори́ с на́ми зна́мение во бла́го, я́ко да ви́дят ненави́дящии нас и Правосла́вную Ве́ру на́шу, и посра́мятся и смиря́тся. Ей, Го́споди Бо́же, Спаси́телю наш, Кре́посте, и Упова́ние, и Заступле́ние на́ше, не помяни́ беззако́ний и непра́вд люде́й Твои́х, и не отврати́ся от нас гне́вом Свои́м, но в ми́лости и щедро́тах Твои́х посети́ смире́нныя рабы́ Твоя́, ко Твоему́ благоутро́бию припа́дающыя; возвесели́ се́рдце Ве́рнаго Раба́ Твоего́, ИМПЕРА́ТОРА на́шего, о ми́лости Твое́й, и укрепи́ ЕГО́ си́лою Твое́ю; возстани в по́мощь на́шу и разруши́ лука́выя сове́ты мы́слящих нам зла́я; суди́ оби́дящыя и побори́ борю́щыя ны, и обрати́ нечести́вое дерзнове́ние их в страх и бе́гство; правосла́вному же во́инству на́шему, на Тя упова́ющему, пода́ждь во мно́зем дерзнове́нии и му́жестве погнати и пости́гнути их, и о и́мени Твое́м победи́ти; а и́мже суди́л еси́ положи́ти на бра́ни ду́шы своя́ за Ве́ру, Царя́ и Оте́чество, тем про́сти согреше́ния их, и в де́нь пра́веднаго воздая́ния Твоего́ возда́й венцы́ нетле́ния. Ты бо еси́ заступле́ние, и побе́да, и Спасе́ние упова́ющим на Тя, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не, и при́сно, и во ве́ки веко́в, ами́нь.

И отпу́ст.

Го́споду помо́лимся. Го́споди поми́луй.

Го́споди Бо́же наш, и́же в прему́дрости вся едыным сло́вом соде́лавый, и от несу́щих во е́же бы́ти сия́ приведы́й, и во еди́но совокупи́вый, и собра́вый неизрече́нною Твое́ю си́лою и де́йством; вся бо возмо́жна Тебе́, не мо́жет же Тебе́ ничто́же; и сего́ ра́ди времена́ и ле́та Твои́м хоте́нием совокупи́вый и сочини́вый, украси́вый сей ви́димый мир; И́же Не́бо простры́й и ушаривый, я́коже и ски́нию о́ную Моисе́ем, и мно́жество о́но, и тмочи́сленный род иуде́йский укроти́вый в чи́не и единомы́слии, и Моисе́а над ни́ми Твое́ю десни́цею и мы́шцею кре́пкою, народоводи́теля поста́вивый, и еди́но нача́ло им да́вый, и соблюды́й я̀ невреди́мы в Твое́м покро́ве, и кре́пкой ру́це; И́же со́лнцу положи́вый во свет дне, и луну́ в нача́ле но́щи; И́же мно́жество звезд на тве́рди участивый густостию, и приснодви́жимое да́вый им движе́ние, и в чи́не положи́вый сия́, Твои́м повеле́нием храни́ти преде́л свой, я́коже весьма́ нас не вреди́ти; но тече́нием и движе́нием тещи́ неле́ностно по Твоему́ хоте́нию; и́же зе́млю неви́диму су́щу пре́жде и те́мну откры́вый, и в добро́ту ю̀ возобразивый, естества́ ра́ди челове́ческаго; И́же Авраа́му о́ному иногда́ спустительствовавый Боже́ственной Твое́ю си́лою, и враги́ его́ преда́вый подру́чники ему́; И́же Гедео́на укрепи́вый, сопроти́вныя всепагубно сокруши́вый и погуби́вый; И́же царю́ и проро́ку Дави́ду кре́пость да́вый на скве́рнаго о́наго Голиа́фа, и вконе́ц его́ погуби́вый; И́же уго́дником Твои́м Моисе́ем род евре́йский свободи́вый от го́рькия рабо́ты, и фарао́на необори́мою Твое́ю си́лою, и кре́пкой Твое́ю руко́ю со всево́инством потопи́вый, и отсла́вый его́ глубине́ морсте́й, и столп све́та наста́вник им показа́вый, да не преткнутся но́зе их. Сам и ны́не Святы́й Царю́ сла́вы, низпосли́ от свята́го жили́ща Твоего́, от престо́ла сла́вы ца́рствия Твоего́, столп светови́дный и пресве́тлый, в наставле́ние и побе́ду на враги́ ви́димыя и неви́димыя, Держа́внейшаго и свята́го моего́ Самоде́ржца, и укрепи́ ЕГО́ десно́ю Твое́ю руко́ю, и я́же с НИМ иду́щыя верные рабы́ Твоя́ и слуги́; и пода́ждь ЕМУ́ ми́рное и немяте́жное ца́рство, и вся́кия ра́спри и междоусо́бныя бра́ни вы́шши. Ей, Го́споди Бо́же ми́лости, услы́ши мя смире́ннаго и недосто́йнаго раба́ Твоего́ в час сей, и укрепи́ у́бо ЕГО́ непобори́мою Твое́ю и непобеди́мою си́лою: во́инства же СЕГО́ укрепи́ везде́, и разруши́ вражды́ и ра́спри востаю́щих на держа́ву ЕГО́. Совокупи́ я̀ во единомы́слии и покоре́нии пра́ведном, и мир глубо́кий и нераспрителен на земли́ же и на мо́ри ЕМУ́ да́руй, и вся я́же к по́льзе пода́ждь; да воздвиза́емыя бра́ни и мяте́жи отрясше, еди́ными усты́, и еди́ным се́рдцем просла́вим тя чуде́с Бо́га. Ты бо еди́н еси́ Ца́рь ми́ра, и Спас душ на́ших, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Го́споди Бо́же наш, И́же тва́рь еди́ным Сло́вом созда́вый, и во е́же бы́ти предве́дый, неизрече́нными же словесы́ разли́чно сию́ изобрази́вый; И́же наносимый на ню Твой дух спрятавый, и со́лнечный сей свет на ню излия́вый ко обновле́нию сея́; И́же уго́днику Твоему́ Моисе́ю вдохну́вый хвалу́ не́кую изря́дну, приложи́ти добре́йшему Твоему́ созда́нию, и рещи́, ви́дети Тебе́ свет я́ко до́брый, и де́нь нарещи́ сей. И́же у́бо и мы ви́дяще, и светле́йшее сие́ со́лнцу обновля́ющее на всяк де́нь тва́рь, Тя вои́стинну дне сла́вим Со́лнце и свет Твой невече́рний; И́же Сыно́м Твои́м нам запове́давый обнови́тися на́шему естеству́, Святы́м Твои́м Ду́хом, я́коже и да́ром сим пра́ведным возсия́ти я́ко со́лнцу; Тебе́ мо́лимся и Тебе́ милися де́ем, Отцу́ Сло́ва, Го́споду и Бо́гу на́шему. Поне́же неизрече́нным Твои́м человеколю́бием, и безме́рною Твое́ю ми́лостию, тва́рь обновле́ние прия́т, и дре́вний зако́н во о́браз но́ваго заве́та, в Твое́м боговиде́нии у Сина́йския го́ры, и в купине́ о́ной ди́вной, и в се́ни свиде́ния, и в предо́брейшем хра́ме Соломо́на о́наго, ми́лостивым о́ком при́зри на ны гре́шныя и недосто́йныя рабы́ Твоя́, живу́щыя в сем до́му небесошироком, вселе́нныя похвале́, же́ртвеннице и́стинном неизрече́нныя твоея́ сла́вы. И низпосли́ Пресвята́го Твоего́ Ду́ха на ны, и на насле́дие Твое́, и по боже́ственному Дави́ду обнови́ в сердца́х на́ших дух пра́вый, и ду́хом влады́чним утверди́ нас, и цырем у́бо на́шим победи́тельная, и побе́ды на ви́димыя и неви́димыя враги́ да́руй, нам же единомы́слие и мир; сотво́ршим же тща́тельно созда́ние сие́, и хра́ма обновле́ние раче́нием бо́жиим, оставле́ние согреше́ний пода́ждь. Да́руй им я́же ко спасе́нию проше́ния, воздви́гни я̀ к де́ланию за́поведей Твои́х, да́руй им обновле́ние да́ра Свята́го Твоего́ Ду́ха: Да неосужде́нно покло́нятся Тебе́, еди́ному и́стинному Бо́гу, и Его́же посла́л еси́ Иису́са Христа́, моли́твами Богоро́дицы, и всех святы́х Твои́х, ами́нь.

Моли́тва втора́я того́жде, во обновле́ние хра́ма.

Преве́чный Сло́ве и Сы́не единоро́дный Бо́жий, Бо́же и́стинный, соде́телю всея́ тва́ри, чу́вственныя же и у́мныя, И́же сию́ тва́рь прему́дро украси́вый; И́же верху́ земли́ мо́крое и разливаемое водно́е естество́ во еди́но собра́ние ве́дый, и боже́ственным Твои́м Ду́хом верху́ во́ды наноси́мым зе́млю всю украси́вый, и мир ве́сь обнови́вый; И́же се́нь о́ную свиде́ния хи́тро устро́ивый Моисе́ем, и Ду́хом Твои́м Святы́м обнови́вый ю̀; И́же прему́дрому Соломо́ну повеле́вый созда́ти дом святы́й и сла́вный, Твоея́ неизрече́нныя и неисповеди́мыя сла́вы, и сего́ обнови́вый Ду́хом Твои́м Святы́м, и накрывающыя его́ тогда́ сла́вы и благода́ти Свята́го Твоего́ Ду́ха, и вся старе́йшинства о́наго иуде́ев, зри́тели бы́ти устро́ивый. Тебе́ мо́лимся и милися де́ем, безнача́льне Сло́ве и Сы́не безнача́льнаго Отца́, да и нам в час сей низпослеши благода́ть Пресвята́го Твоего́ Ду́ха, и ны́нешний воздвигшийся храм, во Твое́ славосло́вие и хвалу́, утверди́ши и укрепи́ши, сохраня́я ѝ до сконча́ния веко́в, и Ду́хом Твои́м Святы́м сего́ обнови́ши; я́коже в нем безкро́вныя же́ртвы принося́ще Тебе́, прича́стницы бу́дем Свята́го Ду́ха, обновившагося во утро́бах на́ших, и мы́сли на́шея влады́чество утвержда́юща, и подаю́ща та́йно у́мныя же́ртвы очище́нием хра́ма, приноси́ти Тебе́ Влады́це Бо́гу, в сла́ву и че́сть безнача́льнаго и безсме́ртнаго Тебе́ Отца́, и единоро́днаго Твоего́ Сы́на, и Пресвята́го и блага́го и животворя́щаго Твоего́ Ду́ха, ны́не и при́сно, и во ве́ки веко́в, ами́нь.

Творе́ние Феостири́кта мона́ха. Благослови́вшу свяще́ннику, начина́ем: Го́споди, услы́ши моли́тву мою́: Сла́ва, и ны́не, аллилу́иа. Бог Госпо́дь, и яви́ся нам: со стихи́.

Та́же тропа́рь Богоро́дице:

К Богоро́дице приле́жно ны́не притеце́м гре́шнии и смире́ннии, и припаде́м, в покая́нии зову́ще из глубины́ души́: Влады́чице, помози́, на ны милосе́рдовавши, потщи́ся, погиба́ем от мно́жества прегреше́ний. Не отврати́ Твоя́ рабы́ тщи, Тя бо и еди́ну наде́жду и́мамы, два́жды.

Не умолчи́м никогда́ Богоро́дице, си́лы Твоя́ глаго́лати, недосто́йнии; а́ще бо Ты не бы предстоя́ла моля́щи, кто бы нас изба́вил от толи́ких бед? Кто же бы сохрани́л до ны́не свобо́дны? Не отсту́пим, Влады́чице, от Тебе́, Твоя́ бо рабы́ спаса́еши при́сно от вся́ких лю́тых. Еди́ножды.

Та́же псало́м 50. И по псалме́ начина́ем кано́н Пресвяты́я Богоро́дицы без ирмосо́в. Глас 8.

Пе́снь 1 Ирмо́с: Во́ду проше́д: Пресвята́я Богоро́дице, спаси́ нас.

Мно́гими содержи́мь напа́стьми, к Тебе́ прибега́ю спасе́ния иски́й; О Ма́ти Сло́ва и Де́во, от тя́жких и лю́тых мя спаси́.

Страсте́й мя смуща́ют прило́зи мно́гаго уны́ния испо́лнити мою́ ду́шу; умири́ Отрокови́це, тишино́ю Сы́на и Бо́га Твоего́ Всенепоро́чная.

Сла́ва: Спа́са ро́ждшую Тя и Бо́га, молю́ Де́во изба́витися ми лю́тых; к Тебе́ бо ны́не прибега́я, простира́ю и ду́шу и помышле́ние.

И ны́не: Неду́гующа те́лом и душе́ю, посеще́ния Боже́ственнаго и промышле́ния от Тебе́ сподо́би еди́на Богома́ти, я́ко блага́я, Блага́го же Роди́тельнице.

Пе́снь 3. Ирмо́с: Небе́снаго кру́га:

Предста́тельство и покро́в жи́зни моея́ полага́ю Тя, Богороди́тельнице Де́во, Ты мя окорми́ ко приста́нищу Твоему́, благи́х вино́вна, ве́рных Утвержде́ние, еди́на Всепе́тая.

Молю́ Де́во, душе́вное смуще́ние, и печа́ли моея́ бу́рю разори́ти; Ты бо Богоневе́стная, Нача́льника тишины́ Христа́ родила́ еси́, еди́на Пречи́стая.

Сла́ва: Благоде́теля ро́ждши до́брых вино́внаго, благодея́ния бога́тство всем источи́; вся бо мо́жеши, я́ко си́льнаго в кре́пости Христа́ ро́ждши, Богоблаже́нная.

И ны́не: Лю́тыми неду́ги, и боле́зненными страстьми́ истяза́ему, Де́во, Ты ми помози́: исцеле́ний бо неоску́дное Тя зна́ю Сокро́вище Пренепоро́чная, неиждива́емое.

Сие́ глаго́ли по 3-й и по 6-й пе́сни то́кмо:

Спаси́ от бед рабы́ Твоя́, Богоро́дице, я́ко вси по Бо́зе к Тебе́ прибега́ем, я́ко неруши́мей Стене́ и Предста́тельству.

При́зри благосе́рдием всепе́тая Богоро́дице, на мое́ лю́тое телесе́ озлобле́ние, и исцели́ души́ моея́ боле́знь.

Та́же помина́ет свяще́нник, о ни́хже моле́бен быва́ет, и пое́м:

Го́споди поми́луй, 15. Свяще́нник глаго́лет: Я́ко ми́лостив:

И а́бие глаго́лем тропа́рь, глас 2:

Моле́ние те́плое, и Стена́ необори́мая, ми́лости исто́чниче, ми́рови Прибе́жище, приле́жно вопие́м Ти: Богоро́дице Влады́чице, предвари́, и от бед изба́ви нас, еди́на вско́ре предста́тельствующая.

Пе́снь 4. Ирмо́с: Услы́шах, Го́споди:

Страсте́й мои́х смуще́ние, Ко́рмчию ро́ждшая Го́спода, и бу́рю утиши́ мои́х прегреше́ний, Богоневе́стная.

Милосе́рдия Твоего́ бе́здну призыва́ющу пода́ждь ми, Я́же Благосе́рдаго ро́ждшая, и Спа́са всех пою́щих Тя.

Наслажда́ющеся, Пречи́стая, Твои́х дарова́ний, благода́рственное воспева́ем пе́ние, ве́дуще Тя Богома́терь.

Сла́ва: На одре́ боле́зни моея́ и не́мощи низлежа́щу ми, я́ко Боголюби́ва, помози́, Богоро́дице, еди́на Присноде́во.

И ны́не:

Наде́жду и утвержде́ние, и спасе́ния Сте́ну недви́жиму, иму́ще Тя, Всепе́тая, неудо́бства вся́каго избавля́емся.

Пе́снь 5. Ирмо́с: Просвети́ нас повеле́нии Твои́ми, Го́споди:

Испо́лни, Чи́стая, весе́лия се́рдце мое́, Твою́ нетле́нную даю́щи ра́дость, весе́лия ро́ждшая Вино́внаго.

Изба́ви нас от бед, Богоро́дице Чи́стая, ве́чное ро́ждши Избавле́ние, и Мир всяк ум преиму́щий.

Сла́ва: Разреши́ мглу прегреше́ний мои́х, Богоневе́сто, просвеще́нием Твоея́ све́тлости, Свет ро́ждшая Боже́ственный и преве́чный.

И ны́не: Исцели́, Чи́стая, души́ моея́ неможе́ние, посеще́ния Твоего́ сподо́бльшая, и здра́вие моли́твами Твои́ми пода́ждь ми.

Пе́снь 6. Ирмо́с: Моли́тву пролию́ ко Го́споду:

Сме́рти и тли я́ко спасл е́сть, Сам Ся изда́в сме́рти, тле́нием и сме́ртию мое́ естество́ я́то бы́вшее, Де́во, моли́ Го́спода и Сы́на Твоего́, враго́в злоде́йствия мя изба́вити.

Предста́тельницу Тя живота́ вем, и Храни́тельницу тве́рду Де́во, и напа́стей реша́щу молвы́, и нало́ги бесо́в отгоня́ющу; и молю́ся всегда́, от тли страсте́й мои́х изба́вити мя.

Сла́ва:

Я́ко сте́ну прибе́жища стяжа́хом, и душ всесоверше́нное спасе́ние, и простра́нство в ско́рбех, Отрокови́це, и просвеще́нием Твои́м при́сно ра́дуемся. О Влады́чице, и ны́не нас от страсте́й и бед спаси́.

И ны́не: На одре́ ны́не немощству́яй лежу́, и не́сть исцеле́ния пло́ти мое́й; но Бо́га и Спа́са ми́ру, и Изба́вителя неду́гов ро́ждшая, Тебе́ молю́ся Благо́й: от тли неду́г возста́ви мя.

И свяще́нник помина́ет, я́коже изъяви́ся, и по возгла́се а́бие конда́к, глас 6:

Предста́тельство христиа́н непосты́дное, Хода́тайство ко Творцу́ непрело́жное, не пре́зри гре́шных моле́ний гла́сы, но предвари́ я́ко Блага́я на по́мощь нас, ве́рно зову́щих Ти: ускори́ на моли́тву, и потщи́ся на умоле́ние, предста́тельствующи при́сно Богоро́дице, чту́щих Тя.

И а́бие проки́мен: Помяну́ и́мя Твое́ во вся́ком ро́де и ро́де.

Стих: Слы́ши дщи, и ви́ждь, и приклони́ у́хо Твое́.

Свяще́нник: И о сподо́битися нам слы́шанию Свята́го Ева́нгелиа Го́спода Бо́га мо́лим.

Прему́дрость, прости́ услы́шим Свята́го Ева́нгелиа. Мир всем.

От Луки́ Свята́го Ева́нгелиа чте́ние.

Во дни о́ны, воста́вши Мариа́м и́де в го́рняя со тща́нием, во град Иу́дов; И вни́де в дом Заха́риин, и целова́ Елисаве́т. И бы́сть я́ко услы́ша Елисаве́т целова́ние Мари́ино, взыгра́ся младе́нец во чре́ве ея́, и испо́лнися Ду́ха Свя́та Елисаве́т. И возопи́ гла́сом ве́лиим, и рече́: благослове́на Ты в жена́х, и благослове́н плод чре́ва Твоего́. И отку́ду мне сие́, да прии́дет Ма́ти Го́спода моего́ ко мне? Се бо, я́ко бы́сть глас целова́ния Твоего́ во у́шию мое́ю, взыгра́ся младе́нец ра́дощами во чре́ве мое́м; И блаже́нна ве́ровавшая, я́ко бу́дет соверше́ние глаго́ланным ей от Го́спода. И рече́ Мариа́м: вели́чит душа́ Моя́ Го́спода, и возра́довася Дух Мой о Бо́зе Спа́се Мое́м; я́ко призре́ на смире́ние рабы́ Своея́; се бо, отны́не ублажа́т Мя вси ро́ди. Я́ко сотвори́ Мне вели́чие Си́льный, и свя́то и́мя его́. Пребы́сть же Мариа́м с не́ю я́ко три ме́сяцы и возврати́ся в дом свой.

И а́бие, Сла́ва, глас 6:

Моли́твами Богоро́дицы, Ми́лостиве, очи́сти мно́жества согреше́ний на́ших.

И ны́не, то́йжде. Та́же: Поми́луй мя Бо́же, по вели́цей ми́лости Твое́й и по мно́жеству щедро́т Твои́х, очи́сти беззако́ние мое́.

Глас 6:

Не вве́ри мя челове́ческому предста́тельству, Пресвята́я Влады́чице, но приими́ моле́ние раба́ Твоего́; ско́рбь бо обдержи́т мя, терпе́ти не могу́ де́монскаго стреля́ния, покро́ва не и́мам, ниже́ где прибе́гну окая́нный, всегда́ побежда́ем, и утеше́ния не и́мам, ра́зве Тебе́, Влады́чице ми́ра; упова́ние и предста́тельство ве́рных, не пре́зри моле́ние мое́, поле́зно сотвори́.

Свяще́нник: Спаси́ Го́споди лю́ди Твоя́, и благослови́ достоя́ние Твое́:

Го́споди поми́луй, 12.

Ми́лостию и щедро́тами и человеколю́бием: И про́чая.

Пе́снь 7. Ирмо́с: От Иуде́и доше́дше о́троцы:

На́ше спасе́ние я́коже восхоте́л еси́ Спа́се устро́ити, во утро́бу Де́выя всели́лся еси́, Ю́же ми́ру Предста́тельницу показа́л еси́; оте́ц на́ших Бо́же, благослове́н еси́.

Воли́теля ми́лости, Его́же родила́ еси́ Ма́ти Чи́стая, умоли́ изба́витися от прегреше́ний и душе́вных скверн ве́рою зову́щим: оте́ц на́ших Бо́же, благослове́н еси́.

Сла́ва: Сокро́вище спасе́ния, и исто́чник нетле́ния Тя ро́ждшую, и столп утвержде́ния, и две́рь покая́ния, зову́щим показа́л еси́; оте́ц на́ших Бо́же, благослове́н еси́.

И ны́не: Теле́сныя сла́бости, и душе́вныя неду́ги Богороди́тельнице, любо́вию приступа́ющих к кро́ву Твоему́ Де́во, исцели́ти сподо́би, Спа́са Христа́ нам ро́ждшая.

Пе́снь 8. Ирмо́с: Царя́ Небе́снаго:

По́мощи я́же от Тебе́ тре́бующия, не пре́зри, Де́во, пою́щия и превознося́щия Тя во ве́ки.

Неможе́ние души́ моея́ исцеля́еши, и теле́сныя боле́зни, Де́во, да Тя просла́влю, Чи́стая, во ве́ки.

Сла́ва: Исцеле́ний бога́тство излива́еши ве́рно пою́щим Тя Де́во, и превознося́щим неизрече́нное Твое́ Рождество́.

И ны́не: Напа́стей Ты прило́ги отгоня́еши, и страсте́й нахо́ды Де́во; те́мже Тя пое́м во вся ве́ки.

Пе́снь 9. Ирмо́с: Вои́стинну Богоро́дицу:

То́ка слез мои́х не отврати́ся, Я́же от вся́каго лица́ вся́ку сле́зу отъе́мшаго, Де́во, Христа́ ро́ждшая.

Ра́дости мое́ се́рдце испо́лни, Де́во, Я́же ра́дости прие́мшая исполне́ние, грехо́вную печа́ль потребля́ющи.

Приста́нище и предста́тельство к Тебе́ прибега́ющих бу́ди Де́во, и Стена́ неруши́мая, прибе́жище же и покро́в и весе́лие.

Сла́ва: Све́та Твоего́ заря́ми просвети́, Де́во, мрак неве́дения отгоня́ющи, благове́рно Богоро́дицу Тя испове́дающих.

И ны́не: На ме́сте озлобле́ния не́мощи, смири́вшагося, Де́во, исцели́, из нездра́вия во здра́вие претворя́ющи.

И а́бие, Досто́йно е́сть я́ко вои́стинну:

И кади́т свяще́нник же́ртвенник и лю́ди. И мы пое́м настоя́щыя Богоро́дичны.

Вы́сшую небе́с и чи́стшую све́тлостей со́лнечных, изба́вльшую нас от кля́твы, Влады́чицу ми́ра пе́сньми почти́м.

От мно́гих мои́х грехо́в, немощству́ет те́ло, немощству́ет и душа́ моя́; к Тебе́ прибега́ю, Благода́тней, наде́ждо ненаде́жных, Ты ми помози́.

Влады́чице и Ма́ти Изба́вителя, приими́ моле́ние недосто́йных раб Твои́х, да хода́тайствуеши к Ро́ждшемуся от Тебе́. О, Влады́чице ми́ра, бу́ди Хода́таица!

Пое́м приле́жно Тебе́ пе́снь ны́не, всепе́той Богоро́дице, ра́достно со Предте́чею и все́ми святы́ми: моли́, Богоро́дице, е́же уще́дрити ны.

Вся А́нгелов во́инства, Предте́че Госпо́день, апо́столов двоенадеся́тице, святи́и вси с Богоро́дицею, сотвори́те моли́тву, во е́же спасти́ся нам.

Та́же, Трисвято́е. Пресвята́я Тро́ице: О́тче наш: Свяще́нник: Я́ко Твое́ е́сть Ца́рство:

И тропари́ сия́, глас 6:

Поми́луй нас Го́споди, поми́луй нас: вся́каго бо отве́та:

Сла́ва: Го́споди поми́луй нас, на Тя бо:

И ны́не: Милосе́рдия две́ри отве́рзи нам:

Свяще́нник: Поми́луй нас Бо́же, по вели́цей ми́лости:

Лик: Го́споди поми́луй, три́жды.

Еще́ мо́лимся, о ми́лости, жи́зни, ми́ре, здра́вии, спасе́нии, посеще́нии, проще́нии, благопоспеше́нии, окормле́нии раба́ Бо́жия, и́мярек, и о е́же сохрани́тися святе́й оби́тели сей:

и про́чая. И отпу́ст.

К хотя́щему у́бо отити́, пое́тся пе́рвее моле́бен, а́ще хо́щет, а́ще же ни, твори́т свяще́нник: Благослове́н Бог: Та́же, Трисвято́е. Пресвята́я Тро́ице: О́тче наш: Я́ко твое́ е́сть ца́рство:

Та́же умили́тельныя тропари́:

Поми́луй нас Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Сла́ва: Го́споди поми́луй нас, на Тя бо упова́хом, не прогне́вайся на ны зело́, ниже́ помяни́ беззако́ний на́ших, но при́зри и ны́не я́ко благоутро́бен, и изба́ви ны от враго́в на́ших; Ты бо еси́ Бог наш, и мы лю́дие Твои́, вси дела́ ру́ку Твое́ю, и и́мя Твое́ призыва́ем.

И ны́не: Милосе́рдия две́ри отве́рзи нам благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да Христиа́нскаго.

Го́споди поми́луй, 12. Прииди́те поклони́мся: три́жды. И псало́м 50. Та́же, Ве́рую во еди́наго Бо́га: Осла́би, оста́ви: О́тче наш: Я́ко Твое́ е́сть Ца́рство: И настоя́щия богоро́дичны тропари́:

Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя; но Сама́ заступи́, и поми́луй мя.

Аз, Де́во Свята́я Богоро́дице, к покро́ву Твоему́ притека́я, вем, я́ко получу́ спасе́ние: мо́жеши бо Чи́стая, по́мощи ми.

Никто́же притека́яй к Тебе́ посра́млен от Тебе́ исхо́дит, Чи́стая Де́во Богоро́дице, но про́сит благода́ти, и прие́млет дарова́ние, к по́льзе проше́ния.

Ки́йждо иде́же спаса́ется, та́мо пра́ведно и притека́ет; и ко́е ино́е таково́е прибе́жище, я́ко Ты, Богоро́дице, покрыва́ющее души́ на́ша.

Сла́ва И ны́не, Богоро́дичен: При́зри на моле́ния Твои́х раб Всенепоро́чная, утоля́ющи лю́тая на ны воста́ния, вся́кия ско́рби нас изменя́ющи; Тя бо Еди́ну Тве́рдое и изве́стное Утвержде́ние и́мамы, и Твое́ предста́тельство стяжа́хом, да не постыди́мся Влады́чице, Тя призыва́ющии. Потщи́ся на умоле́ние, Тебе́ ве́рно вопию́щих: ра́дуйся Влады́чице, всех По́моще, Ра́досте и Покро́ве, и спасе́ние душ на́ших.

Всем предста́тельствуеши, Блага́я, прибега́ющым ве́рою к держа́вному Твоему́ покро́ву; ино́го бо не и́мамы гре́шнии к Бо́гу в беда́х и ско́рбех при́сно хода́тайство, сляцаемии от прегреше́ний мно́гих, Ма́ти Бо́га Вы́шняго. Те́мже Тебе́ припа́даем: изба́ви вся́каго обстоя́ния рабы́ Твоя́.

И возвыша́ет панагию, глаго́ля:

Вели́ко и́мя Святы́я Тро́ицы.

Пресвята́я Влады́чице Богоро́дице, помога́й рабу́ Твоему́, и́мярек.

Тоя́ моли́твами, Бо́же поми́луй и спаси́ нас.

Та́же: Бы́сть чре́во Твое́ Свята́я трапе́за, иму́щая Небе́снаго Хле́ба, Христа́ Бо́га на́шего, от Него́же всяк яды́й не умира́ет, я́коже рече́ всех, Богороди́тельнице Пита́тель.

Твои́х дарова́ний досто́йны сотвори́ ны Богоро́дице Де́во, презира́ющи прегреше́ния на́ша, и подаю́щи исцеле́ния, ве́рою прие́млющым благослове́ние Твое́, Пречи́стая.

И посе́м:

Досто́йно е́сть я́ко вои́стину блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Сла́ва и ны́не, Богоро́дичен:

О Тебе́ ра́дуется Благода́тная, вся́кая тва́рь, а́нгельский собо́р и челове́ческий род, освяще́нный хра́ме и раю́ слове́сный, Де́вственная похвало́, из нея́же Бог воплоти́ся и Младе́нец бы́сть, пре́жде век сый Бог наш; ложесна́ бо Твоя́ Престо́л сотвори́, и чре́во Твое́ простра́ннее Небе́с соде́ла; о Тебе́ ра́дуется Благода́тная, вся́кая тва́рь, сла́ва Тебе́.

Конда́к, глас 8:

Взбра́нной Воево́де победи́тельная, я́ко изба́вльшеся от злых, благода́рственная воспису́ем Ти раби́ Твои́ Богоро́дице; но я́ко иму́щая держа́ву непобеди́мую, от вся́ких нас бед свободи́, да зове́м Ти: Ра́дуйся Неве́сто Неневе́стная.

Все упова́ние на Тя возлага́ю Ма́ти Бо́жия, сохрани́ мя под кро́вом Твои́м.

Иму́ще Тя Богоро́дице, упова́ние и предста́тельство, вра́жиих наве́тов не убои́мся, я́ко спаса́еши души́ на́ша.

Сла́ва и ны́не:

Влады́чице, приими́ моли́твы раба́ Твоего́:

И отпу́ст. А́ще же е́сть предстоя́й хотя́й пу́ть ше́ствовати, не быва́ет отпу́ст, но глаго́лет свяще́нник: Го́споду помо́лимся.

И моли́тву:

Бо́же, Бо́же наш, И́же и́стинный и живы́й пу́ть, спутствовавший уго́днику Твоему́ Ио́сифу, спутствуй Влады́ко и рабу́ Твоему́, и́мярек, и изба́ви его́ от искуше́ний, и вся́каго обурева́ния и наве́та; мир и благоздра́вие устро́й, пра́вды вся́кия промышле́ние творя́щу по за́поведем Твои́м, и испо́лнена жите́йских и небе́сных благ бы́вша, па́ки возврати́тися благоволи́. Я́ко Твое́ е́сть ца́рство, и си́ла, и сла́ва Отца́, и Сы́на, и Свята́го Ду́ха, ны́не и при́сно, и во ве́ки веко́в, ами́нь.

Ина́я моли́тва над хотя́щим пла́вати:

Влады́ко Го́споди, изво́ливый сплавати святы́м ученико́м и апо́столом Твои́м, и запрети́вый бу́ри ве́тров, и мо́рю утиши́ти во́лны повеле́вый, спла́вай и отходя́щим в корабли́ сем, вся́кий проти́вный ветр укрощай; воздви́гни же нарочитыя ве́тры, окорми́тель им везде́ бы́вый, вся́кий искуше́ний от него́ отвраща́й наве́т, и ра́достным им к ра́дующымся нам зде возврати́тися благоволи́; преподо́бно, и по предложе́нию де́ющым наро́читая от них, благода́ть Твою́ да́руй во всех дела́х их, спаси́тельное и благоути́шное приста́нище сый пла́вающим, и в корабли́ обрета́ющымся.

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Глас 6. Ирмо́с: Я́ко по су́ху пешеше́ствовав Изра́иль:

Ка́ко воспла́чу житие́ мое́ скве́рное и мно́жества, Влады́чице, безме́рных мои́х зол? Что же да возвещу́ Ти, Чи́стая, недоумева́ю и бою́ся, но помози́ ми.

Отку́ду начну́ глаго́лати лука́вая и лю́тая моя́ прегреше́ния окая́нный аз? Увы́ мне, что бу́ду про́чее? Но, Влады́чице, и мене́ пре́жде конца́ уще́дри.

Вся́кий пу́ть преходив грехо́в, Пречи́стая, спаси́тельную стезю́ ника́коже обрето́х; но к Тебе́ притека́ю, Блага́я, не пре́зри от души́ ка́ющагося мене́.

Сме́рти у́бо час вы́ну помышля́ю, Всепречи́стая, и Суди́ще Стра́шное, обы́чаем же весьма́ зол прельща́юся лю́те; но помози́ ми.

Благи́х тли́тель ны́не мя зря на́га отвоеванна, и дале́че от Бо́га бы́вша Боже́ственных доброде́телей, пожре́ти мя устремля́ется; Влады́чице, предвари́.

Пе́снь 3. Ирмо́с: Не́сть свят, я́коже Ты, Го́споди Бо́же мой:

Ду́шу оскверни́х сту́дно, Влады́чице Богоро́дице, от безме́рных прегреше́ний окая́нный аз; и ка́мо про́чее пойду́, отча́янием ве́сь содержи́м?

Е́же по о́бразу Твоему́, Чи́стая, оскверни́х, увы́ мне, высокому́дренною мы́слию окая́нный аз; и ка́мо про́чее пойду́? Но потщи́ся, Де́во, помози́ ми.

Не́сть весьма́ в челове́цех, и́же беззако́нная соде́яв нечистоты́ лю́тыя, рожде́йся в житии́, я́коже аз, Блага́я; Боже́ственное бо креще́ние оскверни́х.

В коне́ц достиго́х зол, Пречи́стая Де́во, Ты помози́ вско́ре; и́бо Не́бо и земля́ вопию́т го́рько безме́рных дея́ний безве́стная (безме́стная?).

Пе́снь 4. Ирмо́с: Христо́с моя́ си́ла:

А́нгельстии чи́нове и во́инства, Небе́сныя Си́лы Твоего́ Сы́на ужаса́ются держа́вы, Чи́стая, ны́не же аз отча́явся безстра́шием обдержуся.

Удиви́ся вся земля́ и ужасе́ся, зря́щи лю́то же и лука́во де́юща безме́стная, и Сы́на Твоего́ мно́гому благоутро́бию удивляющагося.

Храм оскверни́х зле теле́сный и храм Госпо́день, в о́ньже челове́цы трепе́щуще вхо́дят, аз же, увы́ мне, безсту́дно вхожду́, блу́дный.

Да не пока́жеши, Влады́чице, да не пока́жеши стра́нна мя, устрани́вшагося от покро́ва Твоего́ Сы́на весьма́, и недосто́йна; но омы́й мене́ от скве́рны прегреше́ний мои́х.

Пе́снь 5. Ирмо́с: Бо́жиим све́том Твои́м, Бла́же:

Ада́м преступи́ у́бо за́поведь еди́ну Твоего́, Де́во, Сы́на и изгнанию подпаде́; ка́ко же воспла́чу мои́х прегреше́ний бе́здну аз, отсту́пник и престу́пник Бо́жий?

Тли́тель у́бо дре́вле яви́вся и братоуби́йца Ка́ин, пре́жде от Бо́га прокля́ся; что же сотворю́ и аз, вседе́рзый? Ду́шу бо уби́вый ны́не не стыжу́ся.

Иса́ву поревнова́в лю́тому во чревобе́сии и сла́дости, ду́шу и те́ло оскверни́х пианством, и нечистото́ю окалявый житие́ мое́; и кто про́чее не воспла́чет мене́ окая́ннаго?

Боже́ственным Твои́м све́том Блага́я, исцели́ стра́сти души́ моея́, я́же тли́тель мне возсея. Изба́ви мя сего́ плене́ния го́рькаго: смее́тся бо, ви́дя мя ны́не не предстательствуема.

Пе́снь 6. Ирмо́с: Жите́йское мо́ре:

Житие́ мое́ блу́дное, душа́ моя́ скве́рная и живо́т всеокая́нный, те́ло же мое́ все в злых лю́то оскверни́х; те́мже потщи́ся, Де́во, и помози́ ми.

Коне́ц наста́, и не терплю́, Блага́я, со́весть облича́ет мя: представля́ет бо мне дея́ния лука́вая, и житие́ непостоя́нное, и Суди́ща бою́ся Сы́на Твоего́, Чи́стая.

Пло́ти моея́ ослепле́ние, река́ о́гненная стра́шная и негаси́мая ожида́ет, Пречи́стая, вои́стину и че́рвь неусыпа́емый; но изба́ви мя сих моли́твами Твои́ми.

С тре́петом содержу́ся, и бою́ся Блага́я лука́ваго кова́рств; пре́жде конца́ бо скрежещет на мя тли́тель зубы́, держа́й мя я́ко пле́нника су́ща, и на́га доброде́телей.

Пе́снь 7. Ирмо́с: Росода́тельну у́бо пе́щь:

Седмери́чный пла́мень мне разжже́ страсте́й льсте́ц, прелюбодеяньми же се́рдце все умерщвля́ет; но напо́й струя́ми мои́х слез, Ма́ти Бо́жия, и не отри́ни мя.

Содавляема пропастию прегреше́ний мои́х, не оста́ви мя, Влады́чице; и́бо ви́дя мя во отча́янии су́ща, Блага́я, смее́тся вселука́вый враг; но Ты кре́пкою Твое́ю руко́ю воскреси́.

Стра́шное у́бо Суди́лище, окая́нная душе́ моя́ и нечу́вственная, и му́ка безконе́чная же и ужа́сная; но оба́че ны́не припади́ к Ма́тери Судии́ Твоего́ и Бо́га, и что отчаяла еси́ Себе́?

На Тя все, Влады́чице, упова́ние мое́ возложи́х, блу́дный, не отврати́ от Мене́ лица́ Твоего́ ны́не, ни утро́бы, Человеколюбице Твоея́ да заключи́ши мне, Ма́ти Бо́жия; но помози́ ми.

Омрачи́хся окая́нный, Всепречи́стая, мно́жеством безме́рных зол и изменихся душе́вным о́ком и умо́м, те́мже мя све́та Твоего́ заря́ми к безстра́стия наслажде́нию ско́ро введи́.

Пе́снь 8. Ирмо́с: Из пла́мене преподо́бным:

От Тро́ицы Еди́наго Бо́га ро́ждшая, и объя́тиями носи́вшая Ма́ти Де́во, угаси́ страсте́й огнепалимую пе́щь и слез струя́ми омы́й ду́шу мою́.

Прише́ствия сме́рти ужаса́юся, Всепречи́стая, и Суда́ о́наго весьма́ бою́ся, де́яти же зла ника́коже престаю́; уще́дри и спаси́ моли́твами Твои́ми пре́жде конца́.

Воздыха́ния немо́лчная, Влады́чице да́руй, и слез мои́х исто́чник, да омы́ю моя́ прегреше́ния мно́гая, и неисце́льныя я́звы; я́ко да получу́ живота́ ве́чнаго.

Зол мои́х мно́жества Тебе́ испове́дах, я́ко никто́же бо в ми́ре ин прогне́вах Влады́чице Бо́га, Сы́на Твоего́ и Го́спода; к Сему́ мя вско́ре примири́ моли́твами Твои́ми.

Не поста́ви мя в час Влады́ко, Суда́ со осужденными, естество́м благоутро́бен; но Твоея́ Ма́тере моли́твами поми́луй, и десны́м Твои́м сочини́ мя овца́м.

Пе́снь 9. Ирмо́с: Бо́га челове́ком:

Се приступа́ю к Тебе́, Всепречи́стая, стра́хом мно́гим и любо́вию, кре́пость ве́дый мно́гия моли́твы раб Твой; преве́лие бо мо́жет, О Всеблагослове́нная, моле́ние Ма́тернее к Сы́ну; утро́бами бо преклоня́ется.

Ли́ки предлагай арха́нгелов же, и мно́жество го́рних во́инств, и Предте́чи, апо́столов собо́р, и проро́ки же, му́ченики преподо́бныя, священному́ченики, и моли́тву сотвори́, Чи́стая, о мне к Бо́гу.

И ны́не и тогда́ Твою́ по́мощь да обря́щу Чи́стая, в о́ньже егда́ исче́знет дух мой, от де́монов ско́ро избавля́ющи мя, изба́ви мучи́тельства их, Всепречи́стая, и не оста́ви мене́, Блага́я, преда́тися им.

Судию́ Ще́драго и Человеколю́бца, Твоего́ Сы́на ожида́ю, Чи́стая, не пре́зри мене́; но Того́ мне сотвори́ благоуве́тлива, поста́вити одесну́ю мя тогда́, Всепе́тая, пречи́стаго Суди́ща Своего́: на Тя бо упова́х.

Нача́ла, арха́нгели, госпо́дства и серафи́ми, си́лы, вла́сти, а́нгели, престо́ли, многоочи́тии херуви́ми, ны́не препросла́вленное рождество́ Твое́ почита́юще, Тя, Богома́ти, благогове́йно при́сно сла́вят.

Та́же, Досто́йно е́сть: и а́бие: И о сподо́битися нам слы́шания Свята́го Ева́нгелиа.

Ева́нгелие от Ма́рка, зача́ло 51:

Рече́ Госпо́дь свои́м ученико́м: име́йте ве́ру Бо́жию. Ами́нь бо глаго́лю вам, я́ко, и́же а́ще рече́т горе́ сей: дви́гнися, и ве́рзися в мо́ре: и не размыслит в се́рдце свое́м, но ве́ру и́мет, я́ко е́же глаго́лет, быва́ет: бу́дет ему́, е́же а́ще рече́т. Сего́ ра́ди глаго́лю вам: вся ели́ка а́ще моля́щеся проси́те, ве́руйте, я́ко прие́млете, и бу́дет вам. И егда́ стоите́ моля́щеся, отпущайте, а́ще что и́мате на кого́; да и Оте́ц ваш, и́же е́сть на Небесе́х, отпу́стит вам согреше́ния ва́ша. А́ще ли же вы не отпуща́ете, ни Оте́ц ваш, и́же е́сть на Небесе́х, отпу́стит вам согреше́ний ва́ших.

Та́же: Поми́луй нас Бо́же, по вели́цей ми́лости Твое́й, мо́лимтися услы́ши и поми́луй.

Го́споди поми́луй, три́жды.

Еще́ мо́лимся о ми́лости, жи́зни, ми́ре: И о е́же прости́тися ему́ вся́кому согреше́нию, во́льному и нево́льному.

И про́чее, возгла́с: Я́ко ми́лостив и человеколю́бец Бог еси́, и Тебе́ сла́ву возсыла́ем:

И моли́тва преподо́бнаго отца́ на́шего Иоа́нна Дамаски́на.

Го́споду помо́лимся.

Влады́ко Го́споди Иису́се Христе́ Бо́же наш, еди́н име́яй вла́сть оставля́ти грехи́, я́ко Бог и Человеколю́бец, при́зри вся, я́же в ве́дении и не в ве́дении согреше́ния, во́льная и нево́льная, я́же в де́ле, и сло́ве, и помышле́нии, и неосужде́нно раба́ Твоего́ сподо́би причасти́тися Боже́ственных, Святы́х, Пречи́стых Твои́х и бессмертных та́инств, и не в тяготу́ и му́ку и приложе́ние грехо́в, но во освяще́ние, во просвеще́ние, во очище́ние, во утвержде́ние, во обруче́ние живота́ ве́чнаго, и Небе́снаго Твоего́ ца́рствия, в сте́ну и по́мощь, и отгна́ние вся́каго сопроти́внаго, во очище́ние его́ согреше́ний, и сла́ву держа́вы Твоея́, моли́твами Пресвяты́я Влады́чицы на́шея Богоро́дицы, честны́х небе́сных у́мных невеще́ственных сил безпло́тных, и всех святы́х, от ве́ка Тебе́ благоугоди́вших, ами́нь.

А́ще у́бо отроча́ взя́тся, и отве́ржеся или́ стра́хом, и неве́дением, и неучением: сицевы́й да прие́млет очисти́тельныя моли́твы на се́дмь дней, и во осьмы́й да оты́мется. И от ба́ни ле́нтием препоя́сався, да помазу́ется ми́ром, я́коже креща́емый, и да е́млет ри́зы но́выя по о́бразу креща́емых.

А́ще же ю́ноши су́ть, ли старейшии, или́ ста́рии, соверше́нии су́ще во́зрастом, а́ще у́бо от мук отверго́шася, да получа́т человеколю́бие; оба́че да постя́тся две черыредесятницы, упражня́ющеся в моли́твах, и соверша́юще коленопреклоне́ния, и частые моли́твы. Приближающужеся исполне́нию дву 40-цу святы́х дней, да приемлит па́ки очисти́тельныя моли́твы, и да глаголит на вся́кий де́нь: Го́споди поми́луй, сто. И посе́м да омыва́ются, и помазу́ются ми́ром, с предрече́нным уста́вом. И бываемей литурги́и, да сподо́бятся святы́нь, упражня́ющеся я́коже крещаемии в це́ркви и литурги́и в святы́е дни. А́ще же не́ции от произволе́ния самодерзнуша ко отверже́нию, обраща́ющыяся у́бо сия́ прие́млем; боже́ственных же та́инств не причаща́ются, то́кмо в конце́ живота́ их, по 73-му пра́вилу Вели́каго Васи́лия, глаго́лющу: И́же Христа́ отве́ргся, и преступи́в спасе́ния танство, во все вре́мя живота́ своего́ пла́кати до́лженствует и испведатися; во вре́мя же, в не́мже исхо́дит от жития́, святы́ни сподобля́яйся ве́рою Божьего человеколю́бия.

Го́споду помо́лимся, Го́споди поми́луй.

Пра́веден еси́ Го́споди, и пра́ви суди́ Твои́; не бо по грехо́м на́шым сотвори́л еси́ нам, ниже́ по беззако́нием возда́л еси́ нам; престу́пльше по за́поведи Твоя́, са́мых себе́ преда́хом сме́рти. Ты бо я́ко благоутро́бен Влады́ко, ве́дый жи́тельство на́ше я́ко лука́вое, и я́ко пожре́ нас возмо́гши сме́рть, милосе́рдовавый на нас, спасти́ благоволи́л еси́ Твое́ созда́ние; зрак ра́бий прие́м, и сме́рти сопле́тся, воззва́л еси́ Твой о́браз, свободи́вый нас вла́сти сме́ртныя, и наста́вивый нас на пу́ть спасе́ния, пакирождением Свята́го Твоего́ Ду́ха. И спа́сшеся Твое́ю благода́тию, воспева́ем смотре́ние Твое́, и мо́лимся, и милися де́ем, и про́сим: во второ́м Твое́м прише́ствии, в не́мже и́маши суди́ти живы́м и ме́ртвым, и отда́ти кому́ждо по де́лом его́, помяни́ ми́лость, я́ко от ве́ка еси́ Ты, и премину́л еси́ челове́ческая на́ша прегреше́ния и согреше́ния. Пода́ждь нам очище́ние прося́щим Тебе́, и прости́ вся́кое прегреше́ние, во́льное же и нево́льное, в ве́дении же и не в ве́дении; не бо е́сть челове́к, и́же поживе́т, и не согреши́т, ниже́ а́ще еди́н де́нь бы́ло бы житие́ его́ на земли́. Кто бо похва́лится чи́сто име́ти се́рдце свое́? Или́ кто свободоустствует чист бы́ти от греха́? Вси бо согреши́хом в словесе́х и в де́лех пред Тобо́ю, и лиша́емся Твоея́ сла́вы, наде́ющеся оправди́тися на стра́шнем и ужа́снем суди́щи Твое́м, а не от дел пра́вды, не бо сотвори́хом что благо́е на земли́; но от ве́ры и́стинныя, и е́же в Тя испове́дания. Е́же бо позна́ти Тя, всеце́лая пра́вда (еси́), и е́же ве́дати твою́ держа́ву, ко́рень безсме́ртия. И ве́мы, и испове́дуем и ве́руем, я́ко Ты еси́ И́же от небытия́ во е́же бы́ти приведы́й нас, и па́дшия ми́луяй, и согреша́ющыя терпя́, и от сме́рти оживотворя́яй. Мо́лимтися Го́споди Бо́же наш, а́ще что согреши́хом пред Тобо́ю, я́ко пло́ть нося́ще, и в ми́ре сем живу́ще, и не́мощию облежими; а́ще же в де́лех, а́ще же в словесе́х, а́ще же в помышле́ниих, Ты я́ко Благ и Человеколю́бец и ми́лостив Влады́ка, осла́би, оста́ви, пре́зри, и прости́ прегреше́ния на́ша нисповедающим, и не вмени́, ниже́ да вни́деши в суд с рабы́ Твои́ми; я́ко не оправди́тся пред Тобо́ю всяк живы́й. Я́ко Ты еси́ Еди́н безгре́шен, и прие́мляй кающыеся, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва ина́я.

Го́споду помо́лимся, Го́споди поми́луй.

Влады́ко Го́споди Бо́же наш, И́же ключи́ ца́рствия Твоего́ Петру́ верхо́вному апо́столов уве́ривый, и на нем Святу́ю Твою́ це́рковь созда́вый, и да́вый ему́ вла́сть Твое́ю благода́тию, е́же вяза́ти и реша́ти, я́же на земли́; услы́ши и нас недосто́йных призыва́ющих тя ны́не, на очище́ние настоя́щаго раба́ Твоего́, и удиви́ ми́лости Твоя́ на нем, спаса́яй наде́ющыяся на Тя. Ты бо рекл еси́ Го́споди, богоно́сными уста́ми проро́ков Твои́х: обрати́теся ко Мне, и обращу́ся к вам; и е́же хоте́нием не хощу́ сме́рти гре́шника, но е́же обрати́тися и жи́ву бы́ти ему́. Ты у́бо Человеколю́бче, и настоя́щаго раба́ Твоего́ от пре́лести пути́ своего́ обраща́ющагося, и прося́ща у тебе́ очище́ния, да не твратишися; но в ми́лости посети́, и в щедро́тах воззови́. Я́ко Ты еси́ Бо́же, Бог ка́ющихся, и к Тебе́ обраща́ющихся Спас, и Тебе́ сла́ву воссылаем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва ина́я.

Го́споду помо́лимся. Го́споди поми́луй.

Го́споди Бо́же всех Тво́рче, и Влады́ко, Исто́чниче бла́гости, О́тче всех челове́ков, па́че же ве́рных; не презре́вый челове́ка, диавольскою ко́знию во глубину́ поги́бели и пре́лести низведеннаго; но спаси́тельным вочелове́чением единоро́днаго Твоего́ Сы́на Го́спода и Бо́га и Спа́са на́шего Иису́са Христа́, сего́ па́ки взыска́вый, и спасы́й, и к Себе́ возведы́й. Сам Влады́ко Человеколю́бче, и ны́не при́зри на раба́ Твоего́ (или́ рабу́ Твою́), и́мярек, овча́ слове́снаго ста́да Христа́ Твоего́ су́ща (или́ су́щу), его́же (или́ е́юже) изба́вил от плене́ния безбо́жных враго́в, с ни́миже неве́дением де́тским, иди́ наси́льством мучи́тельным, о́ных преле́стныя обы́чаи прохожда́ше; ны́не же сподо́бил еси́ его́ (или́ ю̀) люде́й Твои́х жи́тельству соедини́тися, озари́ его́ (или́ ея́) мы́сли си́лою и де́йствием Свята́го Твоего́ Ду́ха, я́коже лежа́щей в души́ его́ (или́ ея́) и́скре спаси́тельнаго креще́ния, возду́хи благода́ти у́мно разжиза́тися, и назнаменаной в нем (или́ ней) печа́ти, я́сне яви́тися в се́рдце его́ (или́ ея́) и помышле́ниих, знаменова́нием Креста́ Христа́ Твоего́ и поклони́тися Тебе́ еди́ному и́стинному Бо́гу и Отцу́, и единоро́дному Твоему́ Сы́ну, Го́споду на́шему Иису́су Христу́, и Свято́му Твоему́ Ду́ху. Соедини́ его́ (или́ ю̀) Святе́й Твое́й кафоли́ческой и апо́стольской це́ркви. Отста́ви от мы́сли его́ (или́ ея́) вся́кий обы́чай язы́ческаго безбо́жия, иисправи его́ (или́ ю̀) в за́поведех Твои́х, и в повеле́ниих Твои́х досто́йно ходи́ти; и спаси́тельных Твои́х та́инств неосужде́ннаго причаще́ния сподо́би, и в бу́дущей жи́зни небе́снаго Твоего́ Ца́рствия прича́стника (или́ прича́стницу) покажи́. Я́ко Ты еси́ Бо́же наш, Бог е́же ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Моли́тва ина́я.

Го́споду помо́лимся.

Го́споди Бо́же Вседержи́телю, О́тче Го́спода на́шего Иису́са Христа́, хотя́й всем челове́ком спасти́ся, и в ра́зум и́стины приити́, поги́бшаго ра́ди овча́те, единоро́днаго Твоего́ Сы́на посла́вый в мир, Спа́са и Изба́вителя, я́ко да Твой взы́щет, и па́ки спасе́т о́браз; Тебе́ про́сим, и Тебе́ мо́лим, приими́ раба́ Твоего́ сего́ (или́ рабу́ Твою́ сию́), и́мярек, к щедро́там Твои́м прибега́ющаго (или́ прибега́ющую) и получи́вшаго (или́ получившую) у́бо изде́тства правосла́вную ве́ру, я́же к Тебе́, святы́м Твои́м креще́нием; отпа́дшаго (или́ отпадшую) же сея́ младе́нства ра́ди, или́ не́коего ино́го слу́чая, обраща́ющагося (или́ обраща́ющуюся) же ны́не, и покая́нием и позна́нием и к Твое́й па́ки притека́ющаго (или́ притека́ющую) бла́гости, изле́й на него́ (или́ ю̀) Твоего́ человеколю́бия благоутро́бие, приими́ его́ (или́ ю̀) я́ко блу́днаго (или́ блу́дную), к Тебе́ Бо́гу и Отцу́ обращаюшагося (или́ обраща́ющуюся); отжени́ от него́ (или́ нея́) вся́кую пре́лесть и кова́рство вра́жие; сочини́ его́ (или́ ю̀) слове́сных Твои́х ове́ц свято́му ста́ду; украси́ его́ (или́ ю̀) и ны́не сла́вою Пресвята́го и́мени Христа́ Твоего́; прича́стника (или́ прича́стницу) покажи́ со все́ми ве́рными святы́нь Твои́х пречи́стых, во оставле́ние у́бо пре́жде бы́вших прегреше́ний его́ (или́ ея́), во утверже́ние же бу́дущаго, и хране́ние души́ и те́ла; да́ждь ему́ (или́ ей) на вся́кое вре́мя и ме́сто к Тебе́ прибега́ти, упражня́тися в це́рквах Твои́х, и благоуго́дная Тебе́ навершати, да насле́дник (или́ насле́дница) благодея́нием яви́тся Небе́снаго Ца́рствия; его́же и нас сподо́би с ним (или́ не́ю), благода́тию и щедро́тами Христа́ Твоего́, с Ни́мже благослове́н еси́, с Пресвяты́м и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Мир всем. Главы́ на́шя Го́сподеви прикло́ним.

Го́споду помо́лимся.

Го́споди Бо́же наш, приклони́вый небеса́, и сше́дый на спасе́ние ро́да челове́ческаго, и́же Кресто́м Твои́м пра́дедния кля́твы свободи́вый нас, и к блаже́нной жи́зни возведы́й, реки́й быва́ти ра́дости на небеси́ о еди́нем гре́шнице ка́ющемся; приими́ и ны́не поги́бшее Твое́ слове́сное овча́, и ста́ду совокупи́, и восхитившыя во́лки от него́ отжени́, и сподо́би его́ наступа́ти на змии́ и ско́рпии, огражда́ема Кресто́м Твои́м, и соблюда́ема сла́вою покланя́емаго Твоего́ и́мене, призыва́емаго на́ми рабы́ Твои́ми.

Возгла́с: Ты бо еси́ Бог наш, Бог е́же ми́ловати и спаса́ти, и Тебе́ сла́ву возсыла́ем со безнача́льным Твои́м Отце́м, и всесвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

И по ами́не, взем свято́е ми́ро помазу́ет его́ по чи́ну креща́емых, творя́ креста́ о́браз, на челе́ же и очесах, и ноздря́х, и уста́х, и обою́ ушеса́х, и ру́ку, пе́рсех, и междора́мии, и коле́ну, глаго́ля: Печа́ть да́ра Ду́ха Свята́го. И по пома́зании глаго́лет моли́тву сию́, на главе́ его́:

Го́споду помо́лимся. Го́споди поми́луй.

Го́споди Бо́же Вседержи́телю, И́же посла́нием Пресвята́го Твоего́ Ду́ха, благода́ти испо́лнивый ученики́; и раба́ Твоего́ сего́ обрати́вый от преле́стнаго пути́, и на Твою́ ве́ру наста́вивый, и благоуха́ния Свята́го Твоего́ Ду́ха пома́занием ми́ра сего́ сподо́бивый, сохрани́ его́ во Твое́й святы́ни, да́ждь ему́ по во́ли Твое́й ходи́ти, и сподо́би его́ с на́ми в наслажде́нии бы́ти стра́шных Твои́х та́инств, и соблю́дшая же в Тя ве́ру пра́ву, досто́йна яви́тися и Небе́снаго Твоего́ Ца́рствия, благода́тию Христа́ Твоего́, с Ни́мже Тебе́ подоба́ет сла́ва, че́сть и поклоне́ние, с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Сла́ва, И ны́не: и отпу́ст.

По е́же искуси́тися во сне, а́бие востае́т, и сотвори́в нача́ло: Благослове́н Бог наш: Начина́ет: Трисвято́е. И по О́тче наш: Го́споди поми́луй, 12. Сла́ва И ны́не: Прииди́те поклони́мся: три́жды. И псало́м 50. Та́же, Го́споди, услы́ши моли́тву мою́: Бо́же в по́мощь мою́ вонми́: Сла́ва в вы́шних Бо́гу: Ве́рую во Еди́наго Бо́га: Осла́би, оста́ви: И отпусти́тельный тропа́рь, и конда́к дне.

Та́же тропари́ сия́: Согреши́х к Тебе́, Спа́се, я́ко блу́дный сын: приими́ мя, О́тче, ка́ющагося, и поми́луй мя, Бо́же.

Зову́ к Тебе́, Христе́ Спа́се, мытаре́вым гла́сом: очи́сти мя я́коже о́наго и поми́луй мя, Бо́же.

Глас 5: Ско́рый Твой покро́в, и по́мощь, и ми́лость, покажи́ на ра́бе Твое́м, и ны́не во́лны, чи́стая, Ты укроти́ су́етных помышле́ний, и па́дшую мою́ ду́шу возста́ви Богоро́дице; вем бо, вем Де́во, я́ко мо́жеши, ели́ка хо́щеши.

Трисвято́е. Пресвята́я Тро́ице: И по О́тче наш: Я́ко Твое́ е́сть ца́рство:

И ины́я стихи́ры. Глас 7: Я́ко впады́й в разбо́йники и уя́звен, та́ко и аз впадо́х от мои́х грехо́в, и уя́звлена е́сть моя́ душа́; к кому́ прибе́гну пови́нный аз, то́кмо к Тебе́, благоутро́бному душ Врачу́; изле́й на мя, Бо́же, вели́кую Твою́ ми́лость.

Я́ко блу́дный сын, приидо́х и аз Ще́дре; приими́ мя припа́дающа, я́ко еди́наго от нае́мник Твои́х Бо́же, и поми́луй мя.

Глас 8: В разбо́йники мои́х помышле́ний впады́й, окра́ден бых окая́нный умо́м, и лю́те уязви́вся, все́ю мое́ю душе́ю ура́нихся, и отту́ду лежу́ наг доброде́телей в пути́ жития́. Свяще́нник же ви́дев мя я́звою боля́ща, за неисцели́мое презира́яй, не зрит мя; леви́т же па́ки не терпя́ душетле́нную боле́знь, и той ви́дев ми́мо мене́ и́де. Ты же благоволи́вый не от Самари́и, но от Мари́и воплоти́лся Христе́ Бо́же, человеколю́бием Твои́м пода́ждь мне исцеле́ние, излива́яй на мя вели́кую Твою́ ми́лость.

Помышля́ю де́нь стра́шный, и пла́чу моя́ дея́ния лука́вая, ка́ко отвеща́ти и́мам Безсме́ртному Царю́? Ко́им же дерзнове́нием воззрю́ на Судию́ блу́дный аз? Благоутро́бне О́тче, Сы́не Единоро́дне, и Душе́ Святы́й, поми́луй мя.

Во юдо́ле плаче́вне, на ме́сте е́же положи́л еси́, егда́ ся́деши Ми́лостиве, сотвори́ти пра́ведный суд, не обличи́ моя́ сокрове́нная, ниже́ посрами́ мя пред а́нгелы, но пощади́ мя, Бо́же, и поми́луй мя.

Сла́ва: Аз е́смь дре́во непло́дное, Го́споди, умиле́ния плода́ не нося́ отню́д, и посече́ния бою́ся, и огня́ о́наго страшу́ся негаси́маго. Те́мже Тя молю́, пре́жде о́ныя ну́жды обрати́ и спаси́ мя.

И ны́не, Богоро́дичен: Наде́жде ми́ра блага́я Богоро́дице Де́во, Твоего́ и еди́наго стра́шнаго предста́тельства прошу́, умилосе́рдися о мне гре́шнем, и моли́ ми́лостиваго Бо́га, изба́витися мое́й души́ от вся́каго преще́ния, еди́на благослове́нная.

Го́споди поми́луй, 40.

И моли́тва сия́ Ма́рка мона́ха:

Пречи́сте, нескве́рне, Благоутро́бне Го́споди, И́же восприя́тием Твоего́ челове́чества, на́ше естество́ от тли измени́вый и соедине́нием лу́чшаго все освяти́вый, И́же в Тя еди́наго И́стиннаго Бо́га несумне́нно ве́рующим благода́ть Твою́ изоби́льно подая́й и в не́мощи пло́ти, великовыйна посрамля́яй, и ве́тхаго запина́теля. Ты, Благоде́телю Го́споди, и мене́ стра́стнаго и любогрешнаго, во сне мечта́нием оскве́рншася, очи́сти от вся́кия скве́рны пло́ти и ду́ха и не вмени́ мне сие́ в грех, или́ за́вистию доброненавистца и безли́чнаго де́мона сонномечтанием оскверни́хся, или́ небреже́нием и невоздержа́нием вре́дных, или́ обы́чаем лука́вым, и привзятий мучи́тельством. Укрепи́ же мя про́чее на безстыдство его́ и неи́стовство всеси́льною Твое́ю благода́тию и вы́ше того́ разли́чных кова́рств соблюди́, целому́дрия моего́ свети́льник неугаси́мый да́же до конца́ сохраня́яй; да скве́рнаго у́бо вся́каго скоктаний сладостра́стия и вся́кия мра́чныя нощны́х мечта́ний мглы, Твое́ю по́мощию изменяем, о светозарном же зре́нии жела́емых, и па́че ме́да и со́та услаждающих суде́б Твои́х де́нь и но́щь поуча́яйся в чи́стей со́вести, Животворя́щих и Безсме́ртных Твои́х Та́инств причасти́тися сподо́блюся, моли́твами нетле́нно ро́ждшия Тя Пречи́стыя Влады́чицы на́шея Богоро́дицы и Присноде́вы Мари́и, и всех святы́х, ами́нь.

Моли́тва ина́я, Вели́каго Васи́лия:

Многоблагоутро́бне, нескве́рне, пречи́сте, еди́не безгре́шне Го́споди, очи́сти мя, неключи́маго раба́ Твоего́, от вся́кия скве́рны пло́ти и ду́ха, и ны́нешняго невнима́ния моего́ и уны́ния, прибы́вшая мне нечистоты́, со все́ми ины́ми беззаконми мои́ми. И покажи́ мя нескве́рна, благода́тию Христа́ Твоего́, и освяти́ мя наи́тием Свята́го Твоего́ Ду́ха, да возбну́в от мглы нечисто́т мои́х, и мечта́ний диа́вольских, еще́ же и от вся́кия скве́рны диа́вольская, сподо́блюся чи́стой со́вести отве́рсти скве́рная моя́ уста́ и нечи́стая, во е́же воспева́ти Всесвято́е и́мя Твое́, Отца́, и Сы́на, и Свята́го Ду́ха; и та́ко причасти́тися непови́нно и неосужде́нно Пречи́стых, безсме́ртных, Пресвяты́х и животворя́щих Та́инств единоро́днаго Твоего́ Сы́на, Го́спода Бо́га и Спа́са на́шего Иису́са Христа́; с Ни́мже благослове́н еси́, и с Пресвяты́м и Благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

Моли́тва ина́я того́жде; не́ции же глаго́лют бы́ти сей преподо́бнаго отца́ на́шего Мартиниа́на:

Па́ки запя́т бых окая́нный умо́м, лука́вому обы́чаю греха́ рабо́таяй; па́ки тьмы́ кня́зь, и стра́стныя сла́дости роди́тель, плене́на мя поя́т, и я́коже раба́ смире́ннаго свои́м хоте́нием, по́хотем плотски́м рабо́тати понужда́ет мя. И что̀ сотворю́, Го́споди, Го́споди, Изба́вителю, и Защи́тителю наде́ющихся на Тя? К Тебе́ па́ки обращу́ся и воздохну́, и проще́ния испрошу́ соде́янных мно́ю; но бою́ся и трепе́щу, да не всяк де́нь исповедаяйся, и ошаяния злых обещаяй, и на всяк час согреша́яй, и не воздая́й моли́твы моя́ Тебе́ Бо́гу моему́, долготерпе́ние Твое́ воздви́гну к негодова́нию. И кто прете́рпит Го́споди, я́рость Твою́? Ве́дый у́бо мно́жество щедро́т Твои́х, и бе́здну человеколю́бия Твоего́, па́ки возверзаю сама́го себе́ на ми́лости Твоя́, и зову́ Ти: согреши́х, Бо́же, и поми́луй мя па́дшаго, да́ждь мне ру́ку по́мощи, в про́пасть сласте́й погруже́нному, и не оста́ви мя Го́споди, созда́ние Твое́ растли́тися беззаконми и грехи́ мои́ми; но обы́чную Твою́ бла́гость употреби́вый, изба́ви мя от нечистоты́ и скве́рны пло́ти моея́, и стра́стных помышле́ний мои́х, на всяк де́нь оскверня́ющих мою́ окая́нную ду́шу. Се бо Го́споди Бо́же мой, не́сть ме́сто в ней чи́стое, но вся прокаже́на бы́сть, всетеле́сную иму́щи я́зву. Ты у́бо я́ко Врач душ и ми́лости Исто́чник, очи́сти ю̀ слез мои́х очище́нием, сия́ пролива́яй во мне изоби́льно; изле́й человеколю́бие Твое́, исцели́ сокруше́ние ея́, и да́ждь ми исцеле́ние и очище́ние, и не отврати́ Лица́ Твоего́ от Мене́, да и (не?) поя́ст мя отча́яния о́гнь. Но я́коже рекл еси́ нело́жный Бо́же, я́ко ве́лия ра́дость быва́ет о покая́нии гре́шника, сие́ да соде́ется и о мне гре́шнем; и не заключи́ уше́с благоутро́бия Твоего́ в моли́тве покая́ния моего́, но отве́рзи мне сия́, и я́ко кади́ло испра́вится пред Тобо́ю. Ве́си бо не́мощь естества́, Созда́телю, и поползнове́ние ю́ности, и презира́еши грехи́, и покая́ние прие́млеши во и́стине испове́дающихся Тебе́. Я́ко Ты еси́ еди́н безгре́шен, взе́мляй грех ми́ра; и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

И твори́т покло́нов 8, и до́лженствует же глаго́лати на ки́йждо покло́н: Бо́же, очи́сти мя гре́шнаго, и поми́луй мя и́мене ра́ди Твоего́ Свята́го. Или́: Согреши́х Тебе́ Го́споди, прости́ мя блу́днаго. Та́же глаго́лет: И́же на вся́кое вре́мя: Честне́йшую: И́менем Госпо́дним благослови́ О́тче. И моли́тва: Влады́ко Бо́же О́тче Вседержи́телю: Та́же, Трисвято́е. Пресвята́я Тро́ице: О́тче наш: Го́споди поми́луй, 12. Честне́йшую: Взбра́нной Воево́де: и быва́ет отпу́ст.

И а́ще у́бо е́сть мечта́ние от де́монскаго искуше́ния, твори́т свяще́нник то́йже чин, и священноде́йствует, ми́рски же причаща́ется. А́ще же от мно́гаго пития́ бу́дет не прикаса́йся, по четве́ртому пра́вилу Диони́сия, и по вели́кому Афана́сию, в посла́нии ко Аммо́ну; и по Вели́кому Васи́лию в по́стнических, ищи́ сия́ в зако́не, в К, стихи́и, во главе́ 28.

Благодари́м Тя Влады́ко человеколю́бче, Царя́ веко́в, и пода́теля благи́х, разруши́вшаго вражды́ средосте́ния, и мир пода́вшаго ро́ду челове́ческому, дарова́вшаго и ны́не мир рабо́м Твои́м; вкорени́ в них страх Твой, и друг к дру́гу любо́вь утверди́; угаси́ вся́кую ра́спрю, отими́ вся разгла́сия собла́зны. Я́ко Ты еси́ Мир наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в, ами́нь.

Ве́домо бу́ди, я́ко сие́ после́дование, от церко́внаго и ца́рскаго зако́на возбра́нно бы́сть навершатися, сего́ ра́ди и мы зде не изобразихом.

Распе́ншуся Тебе́ Христе́, поги́бе мучи́тельство, попра́на бы́сть си́ла вра́жия; ниже́ бо а́нгел, ниже́ челове́к, но Сам, Го́споди, спасл еси́ нас, сла́ва Тебе́.

Сла́ва: Искупи́л ны еси́ от кля́твы зако́нныя честно́ю Твое́ю кро́вию, на кресте́ пригвозди́вся, и копие́м пробо́дся, безсме́ртие источи́л еси́ челове́ком, Спа́се наш, сла́ва Тебе́.

И ны́не, Богоро́дичен: Копие́м в ре́бра, о Христе́ мой, прободы́йся Твоя́, е́же от ре́бра челове́ческаго созданыя, па́губы всем челове́ком бы́вшия вино́вныя, кля́твы свободи́л еси́.