Указания при обращении в православие иноверцев

Подоба́ет от иуде́ов приступа́ющу христианствовати, пре́жде яви́ти, и обличи́ти вся́кое зако́нное иуде́йское начина́ние, и отсю́ду показа́ти, я́ко от всея́ души́ и се́рдца и ве́ры и́стинныя христианствовати восхоте́, и отрица́тися у́бо я́ве в це́ркви, вся́каго иуде́йскаго служе́ния, и дре́вних зако́нных всех, проклина́ти же последи́ примышле́ния, кроме́ мы́сли Бо́жия начина́ния и обы́чаи; и та́ко сочетава́тися Христу́ Бо́гу и ве́ре христиа́нстей.

Свяще́ннику пре́жде глаго́лющу, и о́ному отвеща́ющу, или́ восприемнику его́, а́ще е́сть отроча́, или́ иноязычен креща́емый.

Аз, и́мярек, и́же от евре́ев дне́сь приступа́ю к ве́ре христиа́нстей, не за не́кое насильство, или́ ну́жду, или́ уби́йство, или́ искуше́ние, или́ убо́жество, или́ долг, или́ согреше́ние на мя дви́жимое, или́ за че́сть мирску́ю, или́ за благодея́ния не́кая, или́ стяжа́ния, или́ пе́нязи от не́коего обещаемыя, или́ за ку́юлибо по́льзу, или́ предста́тельство челове́ческое, или́ за ра́спрю, или́ любопре́ние к не́коему единоплеме́нных и единове́рных мои́х, или́ я́ко хотя́ отсю́ду отмсти́ти христиа́ном, я́ко ревни́тель у́бо зако́на; но я́ко от всея́ души́ и се́рдца Христа́ возлюби́в, и его́ ве́ру, отрица́юся вся́каго евре́йскаго служе́ния и зако́нных всех, и обре́зания, и опресно́ков, и иуде́йския па́схи, и же́ртвы а́гнца, и пра́здника седми́чных дней, и о́ных иовилея, и мерил, и очище́ния, и скинопигии, си́есть кущеводружений, и про́чих всех пра́здников евре́йских, со же́ртвами их, и моли́твами, и окропленми и очищенми, и освященми, и посты́ их и суббо́ты, и новоме́сячии, и бра́шны их, и питаями, и про́сто отрица́юся вся́каго иуде́йскаго зако́ннаго, и обы́чая, и начина́ния. И над си́ми проклинаю вся, я́же от иуде́ов е́реси, и еретики́, саддуке́и, и́же на Ду́ха Свята́го ху́лят, и ме́ртвых воскресе́ния отрица́ются, и про́чих отмета́ют фарисе́ов отлуче́нных; и́же в понеде́льник и пято́к постя́тся, и де́вство во времена́ подсудяще, не́сть лицемерствующе, по сих же разреша́ют вся́кое воздержа́ние блу́дное и несы́тное; сла́вят же и щастие и во звездословии упраждня́ются, нассареи погубители, и́же о же́ртвах не прие́млют Моисе́йскаго зако́на, и сего́ ра́ди одушевле́нных освеняются, и весьма́ не жрут. Хусеи безстуднейшыя, и́же писа́ния ина́я кроме́ зако́на употребля́юще, и вя́щшыя проро́ки отмета́ют, учи́теля своего́ и́мут челове́ка не́коего, Алексаин нарица́емаго, си́есть си́лу покровенную; и Марато и Марадани, я́же от ро́да их производи́мыя, я́же я́ко боги́ни почита́ют. Иродианове, и́же иноплеме́нника царя́ иуде́йскаго И́рода червоснедна, я́ко Христа́ сла́вят. Дневнокрестители, и́же та́яжде му́дрствуют с фарисе́и, и еще́ по приложению у́чат, е́же не мо́щи челове́ку спасти́ся, а́ще не на вся́кий де́нь умывается арома́ты, и не хотя́т по зако́ну жи́ти, но изобильствовати их черпалами и ча́ши, и блюды, и ины́ми сосу́ды прили́чными умове́нием, и пастию руки́ умыва́ти, и устрое́нием умыва́ти помышля́ют; и про́сто своя́ преда́ния мно́гая зако́ну приложше, повторения сия́ нарица́ют, си́есть, втора́я Бо́жия законоположе́ния. И пе́рвое у́бо ло́жно возно́сят претолкующе в Моисе́а; второ́е же в равви́ Акикана; и третье, я́коже глаго́лют, во А́нну и Иу́ду; четве́ртое же сы́нове Нассамонеове, и́же и суббо́ты во бране́х отверго́шася. Сия́ у́бо иуде́йския е́реси вся проклинаю, и ересенача́льники их, и повторители, и повторения Талмудова. С ни́миже проклинаю и соверша́ющыя пра́здник глаго́лемаго Мардохея, по пе́рвой суббо́те христиа́нских посто́в; к дре́ву бо А́гнца пригвожда́юще, та́же смешающе тем зна́мением креста́, и сожига́ют приглаголюще не́кая шепта́ния, пе́пел же о́наго держа́т во отгна́ние, я́коже мнят, трясави́цы, и вся́кия ины́я не́мощи. Еще́ проклинаю и и́же Иу́лия ме́сяца воспомина́ние пра́зднующыя, глаго́лемых у них ско́рбных; си́есть, плене́ния Иерусали́мова от Ти́та, пе́рсть на главы́ своя́ сыплющыя, и гладии пребыва́ющыя во всенощедействие о́ное, и тма́ми рыданми приглашающыя себе́: увы́, увы́! Еще́ проклинаю вся ча́ющыя прише́ствие Илименово, па́че же антихристово, и́же и трапе́зу им угото́вит преве́лию, и преложи́т во бра́шно, жиза, и мекхемофа, и левиафана. Бы́ти же глаго́лют, жизу у́бо птенцу некоемому живо́тному, мекхемофу же четвероножному, и левиафану глаго́лют бы́ти морско́му; я́ко преве́лия и мно́жайшая плотми, я́коже довле́ти коему́ждо в пи́щу тмам челове́ком безме́рным. Еще́ проклинаю вся́кия евре́йския обы́чаи, и начина́ние не пре́данное от Моисе́а, и вся́кое их чародеяние, и шептание, и ключеволхвование, и служе́ния, и хранителища. Еще́ проклинаю вся́каго ребы, и рабы́, кроме́ Моисе́йскаго зако́на учивша, или́ уча́ща, и вся глаго́лемыя от них началоферекиты, или́ началорабиты и учи́тели, и́хже уче́ния оте́ческая нарица́ют. Проклинаю к дре́вним началорабитом учившыя кроме́ зако́на, и но́выя иуде́йския учи́тели, Ла́заря глаго́лю, беззако́нный пра́здник изобретша, глаго́лемый от него́ единоножный, и Илию́ не ме́нша его́ в нече́стии, Вениами́на же и Зеведе́а, Авра́миа и Симпликиа, и про́чыя. И над все́ми си́ми проклинаю и низлагаю от иуде́ов ча́емаго а́ки Христа́ приити́ месси́ю, си́есть Илимена, наипа́че же анти́христа оного бы́ти испове́даю, и отрица́юся его́. Отрицаяйся же иуде́йских вся́ких се́нных и преше́дших, сочетаюся и́стинному Бо́гу и еди́ному Христу́; и ве́рую во Отца́, и Сы́на, и Свята́го Ду́ха, Святу́ю единосу́щную и неразде́льную Тро́ицу, и воплоще́нное смотре́ние, и к челове́ком прише́ствие испове́дую Святы́я Тро́ицы еди́наго единоро́днаго Сы́на и Сло́ва Бо́жия, и́же от Отца́ пре́жде всех век ро́ждшагося, И́мже вся бы́ша. Того́ бы́ти ве́рую от зако́на и проро́ков предпроповеданнаго месси́ю, Его́же и уже́ прише́дшаго на зе́млю извещаваю за спасе́ние ро́да челове́ческаго, и бы́ти вои́стинну челове́ка не отсту́пльша Своего́ Божества́. И бы́ти Того́ Бо́га и́стинно, и челове́ка и́стинно, неслия́нно, непрело́жно и неизме́нно, во еди́ной Ипоста́си, и двою́ есте́ств, во́лею вся пострада́ти, и распя́тися пло́тию, Божеству́ безстра́стну пребывшему; и погребе́ну бы́вшу, и тридне́вно воскре́сшу, и на небеса́ вознесе́ну; и прии́дет со сла́вою суди́ти живы́м и ме́ртвым. И по пло́ти Сего́ ро́ждшую, Святу́ю Де́ву Мари́ю, и пребы́вшую по рожестве Де́ву, госпо́дьственне и и́стинно Богоро́дицу ве́рую и глаго́лю, я́ко вои́стинну Ма́терь Бо́га вочелове́чшагося, и сего́ ра́ди Госпожу́ и Влады́чицу бы́вшую всея́ тва́ри. Покланя́юся и почита́ю, и и́же у христиа́н священнодействуемому, хле́бу и вину́, его́же в боже́ственных тайнодействиях причаща́ются. Покаряюся, и испове́дую, и ве́рую, пло́ть и кро́вь вои́стинну бы́ти Го́спода Иису́са Христа́, прелага́ему О́наго боже́ственною си́лою, па́че вся́кия есте́ственныя мы́сли. Я́коже ве́сть еди́н Сам. И та́ко и аз причасти́тися сих та́инств слагаюся, во освяще́ние души́ же и те́ла, и в жи́знь ве́чную, и в Ца́рства Небе́снаго насле́дие, да́руется от тех та́инств, ве́рою соверше́нною причаща́ющихся. И свято́е Христо́во креще́ние, с чи́стою и нелестною душе́ю и се́рдцем, и ве́рою и́стинною тому́ у́мному, и отъятию пра́отца греха́, и па́ки рожде́нию души́ же и те́ла; и честно́му же кресту́ Того́же и́стиннаго Христа́, и Бо́га на́шего, я́ко не ктому́ тли орга́ну и кля́тве, но свобожде́нию, и жи́зни ве́чныя, и зна́мению е́же на сме́рть, и диа́волю побе́ду. Еще́ же и честны́я ико́ны, е́же с пло́тию к челове́ком явле́ния Бо́га Сло́ва, и неизрече́нно Того́ ро́ждшия чи́стыя Де́вы и Богоро́дицы, и богови́дных а́нгелов, и всех святы́х, я́ко зна́мения первообра́зных, и прие́млю и почита́ю, и любе́зно покланя́юся и лобыза́ю. Те́хже свяще́нных а́нгелов, и святы́х всех, не то́кмо пра́отцев, и проро́ков; но и апо́столов, и му́чеников, и испове́дников, и учи́телей и преподо́бных, и про́сто всех, и́же прише́дшему уже́ Христу́ Бо́гу благоугоди́вших, я́ко рабо́в Его́ и ве́рных уго́дников почита́ю и благоговею, за е́же ко о́ному че́сть; и вои́стинну от всея́ души́ и се́рдца, и произволе́ния и́стиннаго, приступа́ю па́ки роди́тися, благода́тию Свята́го Ду́ха, и христианствовати хощу́ с верой и любо́вию мно́гою, отлагаяй ве́тхаго челове́ка тле́емаго, и облеки́йся в но́ваго, па́ки обновля́емаго ба́нею пакибытия́. А́ще же с лицеме́рием и ле́стию сия́ глаго́лю, а не от ве́ры истнная и вседуше́внаго се́рдца, прише́дшаго уже́ Христа́ возлюблю́; но я́ко хотя́й отмсти́ти христиа́ном, отсю́ду я́ко ревни́тель ве́тхаго зако́на, ны́не у́бо притворяюся христиа́нин, последи́ де восхощу́ отрица́тися, и ко иуде́йскому обрати́тися па́ки служе́нию, или́ обря́щуся яды́й со иуде́и, или́ спразднствуяй, или́ собеседуяй им вта́йне, и христанство низлага́яй, или́ к со́нмом их и моли́твам поюходя, или́ приклоня́яйся, или́ присвояяй их, а не наипа́че я́ве облича́яй я̀, и их дея́ния, и отмета́яй су́етную ве́ру их, и служе́ние, да прии́дут на мя вся кля́твы, я́же во второзако́нии Моисе́й писа́, и тре́пет Ка́инов и прока́за Гиези́ева. Еще́ же и муче́нием гражда́нских зако́нов, бы́ти мне повинному неотреченно; в бу́дущем же ве́це бу́ди мне ана́фема, и душа́ моя́ да сочтется с сатано́ю, и лука́выми бе́сы во огни́ неугасимом, и тме кроме́шней.

По вседушном же испове́дании сем, креща́ется и́же от иуде́ов.

си́есть туре́цкаго злове́рнаго нече́стия, по вопросом и отве́том

Святи́тель вопроша́ет, глаго́ля: В пе́рвых вопроша́ю тя: а́ще отрица́ешися всея́ богопроти́вныя турецкия ве́ры, и всего́ их скве́рнаго мудрова́ния, и а́ще проклинаеши я̀?

Отвеща́ет: Отрица́юся всея́ богопроти́вныя турецкия ве́ры, и всего́ их скве́рнаго мудрова́ния, и проклинаю я̀.

Святи́тель вопроша́ет: Отрица́ешися ли Мехмета, его́же турцы я́ко Бо́жияго апо́стола и проро́ка чтут, и проклинаеши ли его́, я́ко диа́вольскаго, а не Бо́жияго слугу́, и лжи́ваго проро́ка?

Отвеща́ет: Отрица́юся Мехмета, и я́ко диа́вольскаго слуги́, и лжи́ваго проро́ка, и проклинаю его́.

Святи́тель вопроша́ет: Отрицаешилися Ресулла и Алия, Зятя Мехметова, и Хасана и Гусейна, сыно́в его́, и Абубекира, и Умара, и Талхана, и Абупакрина, и Садукина, и Маиея, и Зупиира, и Аделляна, и Зеита, и Изита, и Саита, и Уфмана, и про́чих всех стаинников, и сдейственников, и восприемников Мехметовых? И па́ки лжи́вых учи́телей, и богопроти́вных диа́вольских слуг, проклинаеши ли их?

Отвеща́ет: Отрица́юся сих всех богоху́льных турецких лжи́вых учи́телей, и я́ко диа́вольских служи́телей проклинаю их.

Святи́тель вопроша́ет: Отрицаешилися, и проклинаеши ли Задизе, и Ансе, и Зеннен, Имкелфиму, пе́рвыя и сквернейшыя от жен Мехметовых, и Фатману дще́рь его́?

Отвеща́ет: Отрица́юся сих всех, и я́ко богопроти́вныя сквернодейцы проклинаю я̀.

Святи́тель вопроша́ет: Отрицаешилися всего́ богохульнаго писа́ния проклятаго Мехмета, е́же нарица́ется алкоран, и всех уче́ний и законоположе́ний, и преда́ний, и хул его́, и я́ко богопротивна и душегубна су́ща, проклинаеши ли я̀?

Отвеща́ет: Отрица́юся алкорана, и всего́ писа́ния, и уче́ния проклятаго Мехмета, и я́ко богопротивна и ху́льна су́ща, и душегубна, проклинаю я̀.

Святи́тель вопроша́ет: Отрицаешилися всех льсти́вых и ху́льных учи́телей турецких, и всех богоху́льных и блядивых ба́сней мехметовых, и по нем бы́вших всех, я́же су́ть о бо́зе не́коем всекованном, о раи́ же, и о ско́тском в нем и скверном их по воскресе́нии житии́, и е́же о брацех и бра́чных разрешениих, и всех о жена́х и наложницах нечи́стых, и сим подо́бных его́, и восприемников его́ скве́рных повеле́ний, и уста́вов, и я́ко богомерзка проклинаеши ли я̀?

Отвеща́ет: Всех сих отрица́юся, и я́ко богомерзка су́ща, проклинаю я̀.

Святи́тель вопроша́ет: Отрицаешилися всех мехметовых, я́же о Христе́ Го́споде на́шем, и Пречи́стой Его́ Ма́тери, и о христиа́нех ху́льных блядословий, и проклинаеши ли я̀?

Отвеща́ет: Отрица́юся всех сих, и проклинаю я̀.

Святи́тель вопроша́ет: Отрицаешилися всех скве́рных, е́же о моли́твах мехметовых уставлений, и я́же в мехи поклонений, и я́же в нем моли́твеннаго до́му, и того́ сама́го ме́ста нарица́емаго меха, и всего́ обдержа́ния его́, и всех собра́ний, и моли́твенных обы́чаев турецких, и проклинаеши ли я̀?

Отвеща́ет: Отрица́юся сих всех, и проклинаю я̀.

Святи́тель вопроша́ет: Отре́клся ли еси́ скве́рныя и богопроти́вныя ве́ры турецкия, и богохульнаго их учи́теля Мехмета, и его́ всех восприемников, и всего́ ху́льнаго уче́ния их, и проклинаеши ли их, и плюеши ли на ня?

Отвеща́ет: Отреко́хся скве́рныя и богопроти́вныя ве́ры турецкия, и богохульнаго их учи́теля Мехмета, и всех его́ восприемников, и всего́ ху́льнаго уче́ния их, и проклинаю я̀, и плюю на ня.

Святи́тель вопроша́ет: Счетаваешилися и́стинно, кроме́ вся́каго усумне́ния и лицеме́рия, от всея́ души́ твоея́, и от всего́ се́рдца твоего́, еди́ному и́стинному Го́споду и Бо́гу на́шему Иису́су Христу́? И ве́руеши ли в Него́, я́ко вои́стинну су́щаго Сы́на Бо́га жива́го?

Отвеща́ет: Счетаваюся и́стинно, кроме́ вся́каго усумне́ния и лицеме́рия, от всего́ се́рдца, и от всея́ души́ моея́, еди́ному и́стинному Го́споду и Бо́гу Иису́су Христу́, и ве́рую в Него́, я́ко вои́стинну су́щаго Сы́на Бо́га жива́го.

И по отрицании сем креща́ется и́же от ага́рян.

Во пе́рвых у́бо от святи́теля, или́ от него́ вла́сть сию́ иму́щаго, пре́жде всего́, ка́яйся да бу́дет испы́тан во мнениих его́ и в чистоте́ наме́рения его́.

Посе́м в наказа́нии и ве́ре правосла́вной да научи́т и утверди́т его́.

Соверши́в же изве́стно испыта́ние и наказа́ние со вся́ким опасе́нием, да повели́т ему́ испове́дати вся грехи́ своя́, ели́ка от ю́ности своея́ памятствует.

Разреше́ния же грехо́в а́бие да не подае́т ему́; но по испове́дании и наказа́нии да и́дет с ним к це́ркви, и да поста́вит его́ пред дверми́ церко́вными от вне.

Святи́тель же оде́ян в епитрахи́ль и омофо́р и ми́тру, име́я в шу́ице жезл свой па́стырский, на свое́й ка́федре ся́дет; (а́ще же свяще́нник, от епи́скопа на сие́ име́яй вла́сть, соверша́ет, в епитрахи́ль и фело́нь оде́ян сый, ста́нет в церко́вных две́рех), и повеле́в к правосла́вной ве́ре обращшемуся коле́на преклони́ти, вопроша́ет его́ глаго́ля:

Хо́щеши ли бы́ти и жи́ти в соедине́нии ве́ры правосла́вно-кафоли́ческия; Он же отвеща́ет: Хощу́.

Святи́тель же воста́в, зна́менует его́ десни́цею, глаго́ля: Во и́мя Отца́, и Сы́на, и Свята́го Ду́ха, ами́нь.

И возложи́в ру́ку на главу́ его́, глаго́лет моли́тву сию́.

Диа́кону ре́кшу: Го́споду помо́лимся. Клир: Го́споди поми́луй.

О и́мени Твое́м, Го́споди Бо́же и́стины, и единоро́днаго Твоего́ Сы́на, и Свята́го Твоего́ Ду́ха, при́зри на раба́ Твоего́ (или́ рабу́ Твою́), и́мярек, сподо́бльшася (или́ сподо́бльшуюся) прибе́гнути ко святе́й правосла́вной Твое́й це́ркви, и под кро́вом криле́ я сохрани́тися. Испо́лни его́ (или́ ю̀) е́же в Тя и́стинныя ве́ры и наде́жды и любве́: да́ждь ему́ (или́ ей) во всех за́поведех Твои́х ходи́ти, и уго́дная Тебе́ твори́ти, я́ко а́ще сотвори́т сия́ челове́к, жив бу́дет в них; напиши́ его́ (или́ ю̀) в кни́зе жи́зни Твоея́, соедини́ его́ (или́ ю̀) ста́ду насле́дия Твоего́, да просла́вится и́мя Твое́ свято́е в нем (или́ в ней), и возлю́бленнаго Твоего́ Сы́на, Го́спода на́шего Иису́са Христа́, и животворя́щаго Твоего́ Ду́ха. Да бу́дут о́чи Твои́ взира́юще на него́ (или́ на ню) ми́лостию вы́ну, и у́ши Твои́, е́же слы́шати глас моле́ния его́ (или́ ея́); возвесели́ его́ (или́ ю̀) в де́лех ру́ку его́ (или́ ея́) да испове́стся Тебе́ покланя́яся и сла́вя и́мя Твое́ вели́кое и вы́шнее, и восхва́лит Тя вы́ну вся дни живота́ своего́.

Возгла́с:

Тя бо пою́т вся си́лы небе́сныя, и Твоя́ е́сть сла́ва Отца́, и Сы́на, и Свята́го Ду́ха, ны́не и при́сно и во ве́ки веко́в, ами́нь.

Посе́м глаго́лет святи́тель, или́ иере́й, к приходя́щему: Жела́еши ли соедини́тися правосла́вной Греко-Росси́йской Це́ркви?

Он же отвеща́ет: Жела́ю от всего́ се́рдца.

Святи́тель же вопроша́ет: Ве́руеши ли во еди́наго Бо́га, в Тро́ице Святе́й сла́вимаго и покланя́емаго, Отца́, и Сы́на, и Свята́го Ду́ха, и покланяешилися ему́ я́ко царю́ и Бо́гу?

Он же отвеща́ет: Ве́рую во еди́наго Бо́га, в Тро́ице сла́вимаго и покланя́емаго, Отца́, и Сы́на, и Свята́го Ду́ха, и я́ко царю́ и Бо́гу покланя́юся.

И а́бие твори́т поклоне́ние еди́но до земли́, и чтет Симво́л ве́ры: Ве́рую во еди́наго Бо́га отца́ Вседержи́теля:

Святи́тель глаго́лет:

Благослове́н Бог, просвеща́яй вся́каго челове́ка гряду́щаго в мир.

Святи́тель па́ки вопроша́ет: Рцы нам о про́чих правосла́вныя Це́ркви на́шея догма́тех, преданиях и установле́ниях, ка́ко содержи́ши;

Он же отвеща́ет:

Апо́стольская и церко́вная узаконе́ния, на святы́х седми́ вселе́нских и поме́стных собо́рех утвержде́нная, и про́чыя восто́чныя греко-росси́йския це́ркви преда́ния, уста́вы же и расположе́ния прие́млю и испове́даю; такжде свято́е Писа́ние, по разуме́нию, е́же содержа́ла и содержи́т це́рковь свята́я восто́чная, ма́ти на́ша, приима́ти и разумева́ти бу́ду.

Ве́рую и испове́дую седм бы́ти та́ин Но́ваго Заве́та, си́есть: креще́ние, миропома́зание, евхари́стию, покая́ние, свяще́нство, супру́жество и елеосвяще́ние, от Христа́ Го́спода и це́ркве Его́ установле́нных к волучению де́йствием и прия́тием их вы́шния благода́ти.

Ве́рую и испове́дую, я́ко в боже́ственней литурги́и под та́инственными ви́дами хле́ба и вина́ причаща́ются ве́рнии те́ла и кро́ве Го́спода на́шего Иису́са Христа́, во оставле́ние грехо́в и в жи́знь ве́чную.

Ве́рую и испове́дую, я́ко святы́х со Христо́м на небеси́ ца́рствующих, по ра́зуму святы́я восто́чныя це́ркви, почита́ти и призыва́ти досто́ит, и я́ко их моли́твы и предста́тельства де́йствуют у благоутро́бнаго Бо́га во спасе́ние на́ше. Та́кожде нетле́нием просла́вленныя мо́щи их я́ко драгоце́нныя доброде́тели их оста́нки чествова́ти благоуго́дно е́сть.

Признаю́, я́ко ико́ны Христа́ Спаси́теля, и Присноде́вы Мари́и, и про́чих святы́х досто́инств име́ти и чествова́ти, не к боготворению, но да взира́нием на о́ныя возбужда́емся ко благоче́стию, и к подража́нию дел пра́ведных, святы́ми ико́нами представля́емых.

Испове́дую, я́ко ве́рных к Бо́гу возвыша́емыя моли́твы о спасе́ни в весе преста́вльшихся, от милосе́рдия Бо́жия прие́млются во благо́е.

Ве́рую и испове́дую от Христа́ Спаси́теля да́нную бы́ти вла́сть в це́ркви православнокафоли́ческой е́же вяза́ти и реши́ти; и я́ко, е́же а́ще то́ю вла́стию свя́жется, или́ разреши́тся на земли́, свя́зано, или́ разреше́но бу́дет и на небеси́.

Ве́рую и испове́дую, я́ко це́ркви святы́я православнокафолическия основа́ние, глава́ и наивышший архиере́й и архипа́стырь е́сть Госпо́дь наш Иису́с Христо́с, от Него́же архиере́е, па́стырие и учи́телие к правлению це́ркви уставлении су́ть; и я́ко сея́ це́ркви прави́тель и ко́рмчий е́сть Дух Святы́й.

Сию́ у́бо Це́рковь неве́сту Христо́ву бы́ти испове́дую, и в ней бы́ти и́стинное спасе́ние.

Святе́йшему Прави́тельствующему Всеросси́йскому Сино́ду (а́ще в епа́рхии, то и епархиа́льнаго архиере́а воспомина́ет), я́ко па́стырем Росси́йския це́ркве и от них постановле́нным иере́ом, и́стинное да́же до кончи́ны живота́ моего́ послуша́ние отдавать обеща́юся.

Посе́м святи́тель подае́т ему́ коне́ц омофора (а́ще же свяще́нник сие́ де́йствует, коне́ц епитрахи́ля), в десни́цу, глаго́ля:

Вни́ди в Це́рковь Бо́жию, и чти Го́спода Бо́га Отца́ Вседержи́теля, Иису́са Христа́ Сы́на Его́ и Ду́ха Свята́го, еди́наго жива́го и и́стиннаго Бо́га, Святу́ю Тро́ицу единосу́щную и неразде́льную.

Изре́к сия́, вво́дит его́ в це́рковь держа́щася конца́ омофора (или́ епитрахи́ля), и поста́вит его́ пред амво́ном, иде́же на столе́ свято́е Ева́нгелие положе́но е́сть; он же став, а́бие изпуща́ет коне́ц омофора с руки́, иду́щым же им в це́рковь, клир чтет псало́м 66:

Бо́же, уще́дри ны, и благослови́ ны; просвети́ лице́ Твое́ на ны, и поми́луй ны; Позна́ти на земли́ пу́ть Твой, во всех язы́цех спасе́ние Твое́. Да испове́дятся Тебе́ лю́дие Бо́же, да испове́дятся Тебе́ лю́дие вси. Да возвеселя́тся и да возра́дуются язы́цы: я́ко су́диши лю́дем правото́ю, и язы́ки на земли́ наста́виши. Да испове́дятся Тебе́ лю́дие, Бо́же, да испове́дятся Тебе́ лю́дие вси. Земля́ даде́ плод свой; благослови́ ны, Бо́же, Бо́же наш, благослови́ ны, Бо́же; и да убоя́тся его́ вси концы́ земли́.

По сконча́нии же псалма́ повелева́ет ему́ святи́тель коле́на пред святы́м Ева́нгелием преклони́ти, сему́ же бы́вшу, глаго́лет святи́тель стихи́ сия́:

Посли́ Дух Твой, и сози́ждутся, и обнови́ши лице́ земли́.

Обрати́ся Го́споди, доко́ле? И умоле́н бу́ди на раба́ Твоего́.

Бу́дут стро́потная в пра́вая, и острая в пути́ гла́дки.

Спаси́ раба́ Твоего́ Бо́же мой, упова́ющаго на Тя.

Бу́ди ему́ Го́споди, столп кре́пости от лица́ вра́жия.

Ничто́же да успе́ет враг на него́, и сын беззако́ния да не приложи́т озло́бити его́.

Го́споди, услы́ши моли́тву мою́, и во́пль мой к Тебе́ да прии́дет.

По сих же а́бие диа́кон глаго́лет: Го́споду помо́лимся.

Клир: Го́споди поми́луй.

Святи́тель же чтет со вся́ким умиле́нием моли́тву сию́:

Го́споди Бо́же Вседержи́телю, еди́не Свя́те, и во святы́х почива́яй, вели́кия ра́ди и неисче́тныя Твоея́ к челове́ком любве́ согреша́ющым, разли́чныя о́бразы покая́ния всегда́ предлагаяй, и заблу́ждшым от и́стины пу́ть пра́вый к позна́нию Тебе́ еди́наго и́стиннаго в Тро́ице сла́вимаго и покланямаго Бо́га показу́яй, во е́же ни еди́ному от них поги́бнути, но всем спасти́ся, и в ра́зум и́стины приити́. Благодари́м Тя, сла́вим и велича́ем, я́ко и ны́не сему́ слове́сному созда́нию Твоему́, и́мярек, возсия́л еси́ в се́рдце его́ свет позна́ния и́стины Твоея́, и ко святе́й Твое́й апо́стольской православнокафоли́ческой це́ркви прибе́гнути сподо́бил еси́ его́. Возсия́й у́бо Влады́ко, смире́нно мо́лим Тя, соверше́нно в се́рдце его́ свет благода́ти Свята́го Твоего́ Ду́ха, у просвеще́нию ра́зума и́стины свята́го Ева́нгелиа Твоего́; да́ждь ему́ нелицеме́рно, невозвра́тно, и неле́стно соедини́тися святе́й Твое́й собо́рной це́ркви, и́стинно же прия́ти и испове́дати православнокафолическую ве́ру. Спричти его́ избра́нному твоему́ ста́ду, и соедини́ его́ те́лу це́ркви Твоея́ святы́я; сотвори́ его́ сосу́д че́стен, и жили́ще Свята́го Твоего́ Ду́ха. Я́ко да тем всегда́ окормля́емь и наставля́емь, свасительныя за́поведи Твоя́ соблюде́т, и творя́ во́лю Твою́ благу́ю, благоуго́дную же и соверше́нную, сподо́бится и воспрятия небе́сных Твои́х благи́х, со все́ми благоугоди́вшими Тебе́. Ты бо еси́ Бог ми́лости и щедро́т, и человеколю́бия, и всем челове́ком хо́щеши спасти́ся, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Клир: Ами́нь.

По моли́тве же святи́тель повелева́ет ему́ воста́ти, глаго́ля: Воста́ни и ста́ни до́бре; ста́ни со стра́хом.

Он же воста́в, глаго́лет:

Сию́ и́стинную правосла́вную грекороссийския це́ркве ве́ру, ю́же ны́не доброво́льно испове́дую и и́стинно содержу́, ту́южде це́лу и невреди́му да́же до коне́чнаго моего́ издыха́ния тве́рдо, Бо́гу помога́ющу, содержа́ти и испове́дати, и о́ную учи́ти и пропове́дати, ели́ко мо́щно бу́дет, и до́лжности ея́ радетельно и с ра́достию исполня́ти, тща́тися бу́ду, соблюда́я в доброде́тели и непоро́чности се́рдце мое́; и во увере́ние сего́ моего́ и́стиннаго и чистосердечнаго испове́дания, целу́ю сло́ва и крест Спаси́теля моего́. Ами́нь.

Посе́м святи́тель подае́т ему́ к лобызанию свято́е Ева́нгелие и крест, по лобза́нии же глаго́лет:

Благослове́н Бог, хотя́й всем челове́ком спасти́ся, и в ра́зум и́стины приити́, сый благослове́н во ве́ки. Клир: Ами́нь.

Посе́м глаго́лет к нему́:

Преклони́ коле́на твоя́ пред Го́сподем Бо́гом, Его́же испове́дал еси́, и прии́меши оставле́ние грехо́в твои́х.

Он же преклоня́ет коле́на и главу́ свою́, зря до́лу. Святи́тель же (или́ на сие́ вла́сть от него́ имы́й) разреша́ет его́ си́це: о́браз разреша́ти та́ко та́ко приступа́ющаго от грехо́в, и сопричести́ его́ це́ркви свято́й кафоли́ческой:

Госпо́дь и Бог наш Иису́с Христо́с, ключи́ Ца́рствия Небе́снаго апо́столом Свои́м вручи́вый, и да́вый им всю вла́сть свое́ю благода́тию, е́же вяза́ти и реши́ти от грехо́в на земли́. Той Сам неизрече́нныя ра́ди ми́лости Своея́ да прости́т и разреши́т тя. И аз всеси́льною Его́ вла́стию чрез святы́я Его́ апо́столы, и их приемники, мне а́ще и недосто́йному архиере́ю (или́ иере́ю) да́нною, проща́ю и разреша́ю тя ча́до, и́мярек, от всех грехо́в твои́х, и соедине́нию ве́рных, и те́лу це́ркви Христо́вы совокупля́ю, и боже́ственным та́йнам церко́вным приобщаю тя, во и́мя Отца́, и Сы́на, и Свята́го Ду́ха, ами́нь.

Сему́ же бы́вшу, святи́тель глаго́лет к нему́:

Воста́ни бра́те, и я́ко ве́рный Иису́с Христо́в раб, помоли́ся Ему́ с на́ми, я́ко сподо́бит тя, в пома́зании свята́го ми́ра, прия́ти благода́ть Свята́го Ду́ха.

Он же а́бие воста́в со вся́ким умиле́нием стои́т.

По соверше́нии предположеннаго чи́на, еди́н от иере́й, или́ протодиа́кон (а́ще святи́тель сам соверша́ет сие́), взем сосу́д со святы́м ми́ром, и гу́бу, и суче́ц, и в ма́лом сосу́де во́ду те́плую, ко е́же гу́бу омочи́вши, ме́ста ми́ром пома́занныя отира́ти, полага́ет я̀ на угото́ванном столе́, на не́мже положе́но да бу́дет свято́е Ева́нгелие и животворя́щий крест, к сему́ же и две свещы́ зажженныя на свети́льницех да поста́вятся.

Сим же си́це приуготовленным святи́тель (или́ иере́й) покланя́ется три́жды к восто́ку со все́ми предстоя́щими.

Диа́кону ре́кшу: Благослови́ влады́ко. Иере́й глаго́лет: Благослове́но ца́рство Отца́ и Сы́на и Святого Ду́ха. Клир: Ами́нь.

И а́бие пою́т стихи́ру, глас 6:

Царю́ Небе́сный, Уте́шителю, Душе́ и́стины, И́же везде́ сый, и вся исполня́яй, Сокро́вище благи́х, и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́ Бла́же, души́ на́ша.

По сконча́нии же пе́ния, диа́кон а́бие глаго́лет ектению́ свята́го миропома́зания:

Ми́ром Го́споду помо́лимся. Лик: Го́споди поми́луй.

О свы́шнем ми́ре и спасе́нии душ на́ших Го́споду помо́лимся.

О ми́ре всего́ ми́ра, благостоя́нии святы́х Божьих церкве́й, и соедине́нии всех, Го́споду помо́лимся.

О Святе́йшем Прави́тельствующем Сино́де, и о преосвяще́нном архиепи́скопе, или́ епи́скопе на́шем митрополи́те на́шем, и́мярек, честне́м пресви́терстве, во Христе́ диа́констве, о всем при́тче, и лю́дех, Го́споду помо́лимся.

О Благочести́вейшем, Самодержа́внейшем, вели́ком Госуда́ре на́шем Импера́торе АЛЕКСА́НДРЕ АЛЕКСА́НДРОВИЧЕ всея́ Росси́и, и о Супру́ге Его́, Благочести́вейшей Госуда́рыне ИМПЕРАТРИ́ЦЕ МАРИ́И ФЕО́ДОРОВНЕ.

О Насле́днике Его́, Благове́рном Госуда́ре, Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ, и о всей Пала́те и во́инстве Их, Го́споду помо́лимся.

О е́же пома́занием всесвята́го, благодетельнаго, и всесоверши́тельнаго ми́ра, пода́тися си́ле боже́ственной, ны́не це́ркви святе́й собо́рней совокупленному рабу́ Бо́жию, и́мярек, в побежде́ние и попра́ние всех сопроти́вных диа́вольских ко́зней, от пло́ти же и от ми́ра находя́щих бра́ней, Го́споду помо́лимся.

О е́же бы́ти ему́ храбру и победоно́сну во́ину Христа́ Бо́га на́шего, си́лою, де́йством, благода́ти и прише́ствием Свята́го Ду́ха, пома́занием всесвята́го ми́ра, Го́споду помо́лимся.

О е́же тве́рдым, и кре́пким и непоколеби́мым в правосла́вной ве́ре, любви́ же и наде́жде, пома́занием всесвята́го ми́ра бы́ти ему́ во вся дни живота́ его́, Го́споду помо́лимся.

О е́же пода́тися ему́ благода́ти, пома́занием всесвята́го ми́ра е́же со дерзнове́нием без стра́ха непосты́дно испове́дати пред все́ми и́мя Христа́ Бо́га на́шего, и того́ ра́ди страда́ти и умре́ти любо́вно всегда́ изво́лити, Го́споду помо́лимся.

О е́же возраста́ти ему́ во всех доброде́телех, и преспева́ти в за́поведех Христа́ Бо́га на́шего пома́занием всесвята́го ми́ра, Го́споду помо́лимся.

О е́же святительным стра́хом в чистоте́ и пра́вде ду́шу его́ соблюсти́, пома́занием всесвята́го ми́ра, Го́споду помо́лимся.

О е́же доспе́ти ему́ в му́жа соверше́нна, в ме́ру во́зраста исполне́ния Христо́ва, си́лою, де́йством, благода́тию и наше́ствием Пресвята́го Ду́ха, пома́занием всесвята́го и всесоверше́ннаго ми́ра, Го́споду помо́лимся.

О е́же изба́витися ему́ и нам вся́кия ско́рби, гне́ва и ну́жды, и дости́гнути всем нам в соедине́ние ве́ры и ра́зума Сы́на Бо́жия, Го́споду помо́лимся.

Заступи́, спаси́, поми́луй и сохрани́ нас, Бо́же, Твое́ю благода́тию.

Пресвяту́ю, Пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и другъдру́га и ве́сь живо́т наш Христу́ Бо́гу предади́м.

Лик: Тебе́ Го́споди.

Иере́й возгла́с:

Я́ко подоба́ет Тебе́ вся́кая сла́ва, че́сть и поклоне́ние, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

По сконча́нии же ектении́, ре́кшу диа́кону: Го́споду помо́лимся.

И ли́ку: Го́споди поми́луй.

Святи́тель глаго́лет моли́тву сию́ со вся́ким внима́нием велегла́сно:

Благослове́н еси́ Го́споди Бо́же Вседержи́телю, Исто́чниче благи́х, со́лнце пра́вды, возсия́вый су́щым во тме свет спасе́ния, явле́нием единоро́днаго Твоего́ Сы́на, и Бо́га на́шего, и дарова́вый нам недосто́йным блаже́нное очище́ние во святе́й воде́, и боже́ственное освяще́ние в животворя́щем пома́зании; И́же и ны́не благоволи́л еси́ рабу́ Твоему́ сему́, и́мярек, позна́ти Твою́ и́стину, и в покая́нии прибе́гнути ко Твоему́ благоутро́бию, и соедини́тися свято́му Твоему́ избра́нному ста́ду, и оставле́ние грехо́в, мно́ю, недосто́йным рабо́м Твои́м, тому́ дарова́вый. Сам Влады́ко всех Царю́ благоутро́бне, да́руй ему́ печа́ть да́ра Свята́го всеси́льнаго и покланя́емаго Твоего́ Ду́ха, и причаще́ние свята́го Те́ла и честны́я Кро́ве Иису́са Христа́ Твоего́; Сохрани́ его́ в Твое́м освяще́нии, утверди́ в правосла́вной ве́ре, изми́ от лука́ваго, и всех ко́зней его́, и спаси́тельным Твои́м стра́хом в чистоте́ и пра́вде ду́шу его́ соблюди́; Я́ко да во вся́ком де́ле и сло́ве благоугожда́я Тебе́, сын и насле́дник бу́дут Пренебе́снаго Твоего́ Ца́рствия. Я́ко Ты еси́ Бог наш, Бог е́же ми́ловати и спаса́ти, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

По моли́тве же а́бие иере́й помазу́ет новосоединеннаго ми́ром святы́м, творя́ креста́ о́браз на челе́, и очесах, и но́здрех, и усте́х, и обои́х ушесе́х, и пе́рсех, и рука́х, и нога́х, глаго́ля: печа́ть да́ра Ду́ха Свята́го, ами́нь.

Сему́ же соверши́вшуся, глаго́лет моли́тву сию́.

Диа́кону ре́кшу: Го́споду помо́лимся. И кли́ру: Го́споди поми́луй.

Го́споди Бо́же наш, сподо́бивый соверше́нна показа́ти раба́ Твоего́ сего́, и́мярек, ве́рою пра́вою и́же в Тебе́ и печа́тию да́ра Свята́го Ду́ха, во свято́м Твое́м и пренебесном пома́зании, Ты Влады́ко всех, и́стинную ве́ру в нем соблюди́ воспита́й его́ в пра́вде и и́стине, и все́ми дарова́нии твои́ми украси́.

Я́ко Ты еси́ Бог наш, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Взем же а́бие гу́бу и омочи́в в те́плой воде́, отира́ет ме́ста ми́ром пома́занныя, глаго́ля:

Оправда́лся еси́, просвети́лся еси́, освяти́лся еси́ и́менем Го́спода на́шего Иису́са Христа́, и Ду́хом Бо́га на́шего, и ми́ром пома́зался еси́, во и́мя Отца́, и Сы́на, и Свята́го Ду́ха, ны́не и при́сно, и во ве́ки веко́в.

Лик: Ами́нь.

Посе́м святи́тель глаго́лет: Мир всем.

Лик: и ду́хови твоему́.

Диа́кон: Главы́ ва́шя Го́сподеви приклони́те.

Лик: Тебе́ Го́споди.

Всем же главы́ приклоншим, святи́тель глаго́лет вта́йне моли́тву сию́:

Оде́явыйся (или́ одеявшаяся) в Тя Христа́ и Бо́га на́шего, Тебе́ подклони́ с на́ми главу́ свою́, его́же (или́ ю́же) сохрани́ непобеди́ма подви́жника (или́ непобеди́му подви́жницу) пребы́ти, на всу́е вражду́ подвизающих на него́ (или́ на ню) и на ны; Твои́м же нетле́нным венце́м да́же до конца́ победи́тели вся покажи́.

Возгла́с:

Твое́ бо е́сть, е́же ми́ловати и спаса́ти, и Тебе́ сла́ву возсыла́ем, со Безнача́льным Твои́м Отце́м, и Пресвяты́м и благи́м и животворя́щим Твои́м Ду́хом, ны́не и при́сно, и во ве́ки веко́в.

Клир: Ами́нь.

Посе́м ектениа́:

Поми́луй нас Бо́же, по вели́цей ми́лости Твое́й:

Еще́ мо́лимся о Благочести́вейшем, Самодержа́внейшем, Вели́ком Госуда́ре на́шем ИМПЕРА́ТОРЕ АЛЕКСА́НДРЕ АЛЕКСА́НДРОВИЧЕ всея́ Росси́и, и проч.

Еще́ мо́лимся о супру́ге Его́, Благочести́вейшей Госуда́рыне, ИМПЕРАТРИ́ЦЕ МАРИ́И ФЕО́ДОРОВНЕ.

Еще́ мо́лимся о Насле́днике Его́, Благове́рном Госуда́ре, Цесаре́виче и Вели́ком Кня́зе НИКО́ЛАЕ АЛЕКСА́НДРОВИЧЕ и о всем Ца́рствующем До́ме.

Еще́ мо́лимся о Святе́йшем Прави́тельствующем Сино́де.

Еще́ мо́лимся о ми́лости, жи́зни, ми́ре, здра́вии, спасе́нии и оставле́нии грехо́в раба́ Бо́жия, и́мярек, восприе́мника.

Еще́ мо́лимся о новопросвеще́нном ра́бе Бо́жии (или́ о новопросвеще́нной ра́бе Бо́жией), и́мярек, о е́же сохране́ну бы́ти ему́ (или́ сохранене бы́ти ей) в ве́ре чи́стаго испове́дания, во вся́ком благоче́стии же, и исполне́нии за́поведей Христо́вых, во вся дни живота́ его́ (или́ ея́).

Я́ко ми́лостив и человеколю́бец Бог еси́, и Тебе́ сла́ву возсыла́ем, Отцу́, и Сы́ну, и Свято́му Ду́ху, ны́не и при́сно, и во ве́ки веко́в.

Лик: Ами́нь.

Свяще́нник: Сла́ва Тебе́ Христе́ Бо́же, упова́ние на́ше, сла́ва Тебе́. Сла́ва, И ны́не: Го́споди поми́луй, три́жды. Благослови́.

И свяще́нник твори́т отпу́ст.

Миропомазанному же причасти́тися пречи́стым та́йнам Те́ла и Кро́ве Госпо́дней, благословля́ет на литурги́и Боже́ственной. Сия́ бо пред Боже́ственною литурги́ею соверша́ются.