Погребение

Вопро́с: От дре́вняго пре́даннаго обы́чая, погреба́ются мо́щи правосла́вных в це́рквах на́ших по страна́м: ищу́ у́бо уве́дати, а́ще е́сть сие́ безгре́шно;

Отве́т: Ра́знство вели́ко е́сть церкве́й, посвящённых обновленми, отверзенми, пома́занием же ми́ра свята́го, и положе́нием святы́х моще́й му́ченических, и не та́ко освяще́нных, и моли́твенная ме́ста держа́щих.

Те́мже во о́ных у́бо, в ни́хже я́ве мученические мо́щи сокровствовашася, и свята́го ми́ра пома́зание сре́дства, челове́ческия мо́щи яковы́ялибо не погреба́ются, по второ́й глави́зне первого ти́тла, пя́тыя кни́ги ца́рских, глаго́лющей: никто́же в це́ркви да погреба́ет ме́ртва, и по вне́шнему его́ лежа́щему зако́ну дре́внему, глаго́лющему: неле́по е́сть погреба́ти кого́ в це́ркви, а́ще я́ве му́ченическое та́мо те́ло лежи́т. А по и́же не та́ко посвяще́нных святы́х доме́х, имену́емых моли́твенных, безбе́дно погреба́ются мо́щи.

Сконча́вшуся кому́ от правосла́вных, а́бие призыва́ют сро́дницы его́ свяще́нника, и́же прише́д в дом, в не́мже мо́щи усо́пшаго лежа́т, и возложи́в епитрахи́ль, и вложи́в фимиа́м в кади́льницу, кади́т те́ло ме́ртваго, и предстоя́щих, и начина́ет обы́чно:

Благослове́н Бог наш: И начина́ют сопредстоя́щии: Святы́й Бо́же: Пресвята́я Тро́ице: И О́тче наш: Я́ко Твое́ е́сть Ца́рство:

И а́бие пою́т тропари́ сия́, глас 4:

Со ду́хи пра́ведных сконча́вшихся, ду́шу раба́ Твоего́ (или́ рабы́ Твоея́) Спа́се упоко́й, сохраня́я ю̀ во блаже́нной жи́зни, я́же у тебе́ Человеколю́бче.

В поко́ищи Твое́м Го́споди, иде́же вси святи́и Твои́ упокоева́ются, упоко́й и ду́шу раба́ Твоего́ (или́ рабы́ Твоея́), я́ко Еди́н еси́ Человеколю́бец.

Сла́ва: Ты еси́ Бог соше́дый во ад, и у́зы окова́нных разреши́вый, Сам и ду́шу раба́ Твоего́ (или́ рабы́ Твоея́) упоко́й.

И ны́не: Еди́на чи́стая и непоро́чная Де́во, Бо́га без се́мене ро́ждшая, моли́ спасти́ся души́ его́ (или́ ея́). Диа́кон глаго́лет: Поми́луй нас Бо́же, по вели́цей ми́лости Твое́й, мо́лимтися, услы́ши и поми́луй. Го́споди поми́луй, три́жды. Еще́ мо́лимся о упокое́нии души́ усо́пшаго раба́ Бо́жия (или́ усопшея рабы́ Бо́жия), и́мярек, и о е́же про́ститися ему́ (или́ ей) вся́кому прегреше́нию, во́льному же и нево́льному. Го́споди поми́луй, три́жды. Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются. Го́споди поми́луй, три́жды. Ми́лости Бо́жия, Ца́рства Небе́снаго и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди. Диа́кон: Го́споду помо́лимся. Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый; Сам Го́споди, упоко́й ду́шу усо́пшаго раба́ Твоего́ (или́ усо́пшия рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние; вся́кое согреше́ние, соде́янное им (или́ е́ю) сло́вом, или́ де́лом, или́ помышле́нием, я́ко благи́й Человеколю́бец Бог про́сти , я́ко не́сть челове́к, и́же жив бу́дет, и не согреши́т. Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с:Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Диа́кон: Прему́дрость.

Лик: Честне́йшую херуви́м: и про́чее.

И а́бие быва́ет от свяще́нника сицевы́й отпу́ст:

Воскресы́й из ме́ртвых Христо́с и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х свои́х, ду́шу от нас преста́вльшагося раба́ Своего́ (или́ преста́вльшияся рабы́ Своея́), и́мярек, в селе́ниих святы́х всели́т, и с пра́ведными причте́т, и нас поми́лует, я́ко Благ и Человеколю́бец.

И а́ще у́бо гото́ва су́ть вся, я́же ко исхо́ду:

Твори́т па́ки свяще́нник нача́ло: Благослове́н Бог наш: и начина́ет пе́ти: Святы́й Бо́же: со стра́хом, и вся́ким умиле́нием. И взе́мше мо́щи усо́пшаго, отхо́дим в храм, предъиду́щым свяще́нником с лампа́ды, диа́кону с кади́льницею.

Егда́ же прии́дут в храм, мо́щи у́бо полага́ются в па́перти, (или́ во хра́ме, я́коже зде в вели́цей Росси́и обы́че), и начина́ют:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́ и Прибе́жище мое́, Бог мой, и упова́ю на Него́. Я́ко Той изба́вит тя от се́ти ло́вчи, и от словесе́ мяте́жна; Плещма́ Свои́ма осени́т тя, и под криле́ Его́ наде́ешися: ору́жием обы́дет тя и́стина Его́. Не убои́шися от стра́ха нощна́го, от стре́лы летя́щия во дни, от ве́щи во тме преходя́щия, от сря́ща, и бе́са полу́деннаго. Паде́т от страны́ твоея́ ты́сяща, и тма одесну́ю тебе́, к тебе́ же не прибли́жится, оба́че очи́ма твои́ма смо́триши, и воздая́ние гре́шников у́зриши. Я́ко Ты Го́споди упова́ние мое́, Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́. Я́ко А́нгелом Свои́м запове́сть о тебе́, сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́, на а́спида и васили́ска насту́пиши, и попере́ши льва́ и зми́я; Я́ко на Мя упова́, и изба́влю ѝ: покры́ю ѝ, я́ко позна́ и́мя Мое́. Воззове́т ко Мне, и услы́шу его́: с ним е́смь в ско́рби, изму́ его́, и просла́влю его́; Долгото́ю дней испо́лню его́, и явлю́ ему́ спасе́ние Мое́.

И посе́м вы́шшим гла́сом пою́т:

Благослове́н еси́ Го́споди, научи́ мя оправда́нием Твои́м.

Непоро́чнии в пу́ть:

И пое́тся пе́рвая статия́ непоро́чных, во глас 6. В концы́ же коего́ждо стиха́ пое́м: Аллилу́иа.

Блаже́ни непоро́чнии в пу́ть, ходя́щии в зако́не Госпо́дни. Аллилу́иа.

Блаже́ни испыта́ющии свиде́ния Его́, всем се́рдцем взы́щут Его́. Аллилу́иа.

Не де́лающии бо беззако́ния, в путе́х Его́ ходи́ша. Аллилу́иа.

Ты запове́дал еси́ за́поведи Твоя́ сохрани́ти зело́. Аллилу́иа.

Дабы́ испра́вилися путие́ мои́, сохрани́ти оправда́ния Твоя́. Аллилу́иа.

Тогда́ не постыжу́ся, внегда́ призре́ти ми на вся за́поведи Твоя́. Аллилу́иа.

Испове́мся Тебе́ в пра́вости се́рдца, внегда́ научи́ти ми ся судьба́м пра́вды Твоея́. Аллилу́иа.

Оправда́ния Твоя́ сохраню́, не оста́ви мене́ до зела́. Аллилу́иа.

В чесо́м испра́вит юне́йший пу́ть свой, внегда́ сохрани́ти словеса́ Твоя́. Аллилу́иа.

Всем се́рдцем мои́м взыска́х Тебе́, не отри́ни мене́ от за́поведей Твои́х. Аллилу́иа.

В се́рдце мое́м скрых словеса́ Твоя́, я́ко да не согрешу́ Тебе́. Аллилу́иа.

благослове́н еси́, Го́споди: научи́ мя оправда́нием Твои́м. Аллилу́иа.

Устна́ма мои́ма возвести́х вся судьбы́ уст Твои́х. Аллилу́иа.

На пути́ свиде́ний Твои́х наслади́хся, я́ко о вся́ком бога́тстве. Аллилу́иа.

В за́поведех Твои́х поглумлю́ся, и уразуме́ю пути́ Твоя́. Аллилу́иа.

Во оправда́ниих Твои́х поучу́ся, не забу́ду слове́с Твои́х. Аллилу́иа.

Возда́ждь рабу́ Твоему́: живи́ мя, и сохраню́ словеса́ Твоя́. Аллилу́иа.

Откры́й о́чи мои́, и уразуме́ю чудеса́ от зако́на Твоего́. Аллилу́иа.

Пришле́ц аз е́смь на земли́: не скрый от Мене́ за́поведи Твоя́.

Возлюби́ душа́ моя́ возжела́ти судьбы́ Твоя́ на вся́кое вре́мя. Аллилу́иа.

Запрети́л еси́ го́рдым: про́кляти уклоня́ющиися от за́поведей Твои́х. Аллилу́иа.

Отими́ от Мене́ поно́с и уничиже́ние, я́ко свиде́ний Твои́х взыска́х. Аллилу́иа.

И́бо седо́ша кня́зи, и на мя клевета́ху; раб же Твой глумля́шеся во оправда́ниих Твои́х. Аллилу́иа.

И́бо свиде́ния Твоя́ поуче́ние мое́ е́сть, и сове́ти мои́ оправда́ния Твоя́. Аллилу́иа.

Прильпе́ земли́ душа́ моя́: живи́ мя по словеси́ Твоему́. Аллилу́иа.

Пути́ моя́ возвести́х, и услы́шал мя еси́, научи́ мя оправда́нием Твои́м. Аллилу́иа.

Пу́ть оправда́ний Твои́х вразуми́ ми, и поглумлю́ся в чудесе́х Твои́х. Аллилу́иа.

Воздрема́ душа́ моя́ от уны́ния, утверди́ мя в словесе́х Твои́х. Аллилу́иа.

Пу́ть непра́вды отста́ви от Мене́, и зако́ном Твои́м поми́луй мя. Аллилу́иа.

Пу́ть и́стины изво́лих, и судьбы́ Твоя́ не забы́х. Аллилу́иа.

Прилепи́хся свиде́нием Твои́м, Го́споди, не посрами́ мене́. Аллилу́иа.

Пу́ть за́поведей Твои́х теко́х, егда́ расшири́л еси́ се́рдце мое́. Аллилу́иа.

Законоположи́ мне, Го́споди, пу́ть оправда́ний Твои́х, и взыщу́ и вы́ну. Аллилу́иа.

Вразуми́ мя, и испыта́ю зако́н Твой, и сохраню́ и всем се́рдцем мои́м. Аллилу́иа.

Наста́ви мя на стезю́ за́поведей Твои́х, я́ко ту́ю восхоте́х. Аллилу́иа.

Приклони́ се́рдце мое́ во свиде́ния Твоя́, а не в лихои́мство. Аллилу́иа.

Отврати́ о́чи мои́, е́же не ви́дети суеты́, в пути́ Твое́м живи́ мя. Аллилу́иа.

Поста́ви рабу́ Твоему́ сло́во Твое́ в страх Твой. Аллилу́иа.

Отыми́ поноше́ние мое́, е́же непщева́х, я́ко судьбы́ Твоя́ бла́ги. Аллилу́иа.

Се возжела́х за́поведи Твоя́, в пра́вде Твое́й живи́ мя. Аллилу́иа.

И да прии́дет на мя ми́лость Твоя́ Го́споди, спасе́ние Твое́ по словеси́ Твоему́. Аллилу́иа.

И отвеща́ю поноша́ющым ми сло́во: я́ко упова́х на словеса́ Твоя́. Аллилу́иа.

И не отыми́ от уст мои́х словесе́ и́стинна до зела́, я́ко на судьбы́ Твоя́ упова́х. Аллилу́иа.

И сохраню́ зако́н Твой вы́ну, в век и в век ве́ка. Аллилу́иа.

И хожда́х в широте́, я́ко за́поведи Твоя́ взыска́х. Аллилу́иа.

И глаго́лах о свиде́ниих Твои́х пред цари́, и не стыдя́хся. Аллилу́иа.

И поуча́хся в за́поведех Твои́х, я́же возлюби́х зело́. Аллилу́иа.

И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х. Аллилу́иа.

Помяни́ словеса́ Твоя́ рабу́ Твоему́, и́хже упова́ние дал ми еси́. Аллилу́иа.

То мя уте́ши во смире́нии мое́м, я́ко сло́во Твое́ жи́ви мя. Аллилу́иа.

Го́рдии законопреступова́ху до зела́: от зако́на же Твоего́ не уклони́хся. Аллилу́иа.

Помяну́х судьбы́ Твоя́ от ве́ка, Го́споди, и уте́шихся. Аллилу́иа.

Печа́ль прия́т мя от гре́шник, оставля́ющих зако́н Твой. Аллилу́иа.

Пе́та бя́ху мне оправда́ния Твоя́, на ме́сте прише́льствия моего́. Аллилу́иа.

Помяну́х в но́щи И́мя Твое́ Го́споди, и сохрани́х зако́н Твой. Аллилу́иа.

Сей бы́сть мне, я́ко оправда́ний Твои́х взыска́х. Аллилу́иа.

Ча́сть моя́ еси́, Го́споди, рех сохрани́ти зако́н Твой. Аллилу́иа.

Помоли́хся лицу́ Твоему́ всем се́рдцем мои́м, поми́луй мя по словеси́ Твоему́. Аллилу́иа.

Помы́слих пути́ Твоя́, и возврати́х но́зе мои́ во свиде́ния Твоя́. Аллилу́иа.

Угото́вихся и не смути́хся сохрани́ти за́поведи Твоя́. Аллилу́иа.

У́жя гре́шник обяза́шася мне, и зако́на Твоего́ не забы́х. Аллилу́иа.

Полу́нощи воста́х, испове́датися Тебе́ о судьба́х пра́вды Твоея́. Аллилу́иа.

Прича́стник аз е́смь всем боя́щымся Тебе́, и храня́щым за́поведи Твоя́. Аллилу́иа.

Ми́лости Твоея́, Го́споди, испо́лнь земля́, оправда́нием Твои́м научи́ мя. Аллилу́иа.

Бла́гость сотвори́л еси́ с рабо́м Твои́м Го́споди, по словеси́ Твоему́. Аллилу́иа.

Бла́гости, и наказа́нию и ра́зуму научи́ мя, я́ко за́поведем Твои́м ве́ровах. Аллилу́иа.

Пре́жде да́же не смири́ти ми ся, аз прегреши́х, сего́ ра́ди сло́во Твое́ сохрани́х. Аллилу́иа.

Благ еси́ Ты Го́споди, и бла́гостию Твое́ю научи́ мя оправда́нием Твои́м. Аллилу́иа.

Умно́жися на мя непра́вда го́рдых; аз же всем се́рдцем мои́м испыта́ю за́поведи Твоя́. Аллилу́иа.

Усыри́ся я́ко млеко́ се́рдце их; аз же зако́ну Твоему́ поучи́хся. Аллилу́иа.

Бла́го мне, я́ко смири́л мя еси́, я́ко да научу́ся оправда́нием Твои́м. Аллилу́иа.

Благ мне зако́н уст Твои́х, па́че ты́сящ зла́та и сребра́. Аллилу́иа. Сла́ва: Аллилу́иа. И ны́не: Аллилу́иа.

Диа́кон: Па́ки и па́ки ми́ром Го́споду помо́лимся.

Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди. Диа́кон: Го́споду помо́лимся. Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый: Сам Го́споди, упоко́й ду́шу усо́пшаго раба́ Твоего́ (или́ усо́пшей рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне: отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им (или́ е́ю) сло́вом или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Та́же свяще́нник глаго́лет:

Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́) и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

И посе́м начина́ем втору́ю статию́ на глас 5: на ко́емждо же конце́ стиха́ глаго́лем:

Поми́луй раба́ Твоего́ (или́ рабу́ Твою́).

Лик начина́ет: За́поведи Твоя́:

Поми́луй раба́ Твоего́ (или́ рабу́ Твою́):

Па́ки то́йже лик

Ру́це Твои́ сотвори́сте мя: и созда́сте мя, вразуми́ мя, и научу́ся за́поведем Твои́м. Поми́луй раба́ Твоего́ (или́ рабу́ Твою́).

Боя́щиися Тебе́ у́зрят мя, и возвеселя́тся, я́ко на словеса́ твоя́ упова́х. Поми́луй раба́ Твоего́ (или́ рабу́ Твою́).

Разуме́х Го́споди, я́ко пра́вда судьбы́ Твоя́, и вои́стинну смири́л мя еси́. Поми́луй раба́ Твоего́ (или́ рабу́ Твою́).

Бу́ди же ми́лость Твоя́, да уте́шит мя по словеси́ Твоему́ рабу́ Твоему́. Поми́луй раба́ Твоего́ (или́ рабу́ Твою́).

Да прии́дут мне щедро́ты Твоя́, и жив бу́ду, я́ко зако́н Твой поуче́ние мое́ е́сть. Поми́луй раба́ Твоего́ (или́ рабу́ Твою́).

Да постыдя́тся го́рдии, я́ко непра́ведно беззако́нноваша на мя, аз же поглумлю́ся в за́поведех Твои́х. Поми́луй раба́ Твоего́ (или́ рабу́ Твою́).

Да обратя́т мя боя́щиися Тебе́, и ве́дящии свиде́ния Твоя́.

Бу́ди се́рдце мое́ непоро́чно во оправда́ниих Твои́х, я́ко да не постыжу́ся.

Исчеза́ет во спасе́ние Твое́ душа́ моя́, на словеса́ Твоя́ упова́х.

Исчезо́ша о́чи мои́ в сло́во Твое́, глаго́люще: когда́ уте́шиши мя;

Зане́ бых я́ко мех на сла́не: оправда́ний Твои́х не забы́х.

Коли́ко е́сть дней раба́ Твоего́; Когда́ сотвори́ши ми от гоня́щих мя суд;

Пове́даша мне законопресту́пницы глумле́ния, но не я́ко зако́н Твой, Го́споди.

Вся за́поведи Твоя́ и́стина: непра́ведно погна́ша мя, помози́ ми.

Вма́ле не сконча́ша мене́ на земли́; аз же не оста́вих за́поведей Твои́х.

По ми́лости Твое́й жи́ви мя, и сохраню́ свиде́ния уст Твои́х.

Во век, Го́споди, сло́во Твое́ пребыва́ет на Небеси́.

В род и род и́стина Твоя́, основа́л еси́ зе́млю, и пребыва́ет.

Учине́нием Твои́м пребыва́ет де́нь, я́ко вся́ческая рабо́тна Тебе́.

Я́ко а́ще бы не зако́н Твой поуче́ние мое́ был, тогда́ у́бо поги́бл бых во смире́нии мое́м.

Во век не забу́ду оправда́ний Твои́х, я́ко в них оживи́л мя еси́.

Твой е́смь аз, спаси́ мя, я́ко оправда́ний Твои́х взыска́х.

Мене́ жда́ша гре́шницы погуби́ти мя, свиде́ния Твоя́ разуме́х.

Вся́кия кончи́ны ви́дех коне́ц; широка́ за́поведь Твоя́ зело́.

Ко́ль возлюби́х зако́н Твой, Го́споди, ве́сь де́нь поуче́ние мое́ е́сть.

Па́че враг мои́х умудри́л мя еси́ за́поведию Твое́ю, я́ко в век моя́ е́сть.

Па́че всех уча́щих мя разуме́х, я́ко свиде́ния Твоя́ поуче́ние мое́ е́сть.

Па́че ста́рец разуме́х, я́ко за́поведи Твоя́ взыска́х.

От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́.

От суде́б Твои́х не уклони́хся, я́ко Ты законоположи́л ми еси́.

Ко́ль сладка́ горта́ни моему́ словеса́ Твоя́, па́че ме́да усто́м мои́м.

От за́поведей Твои́х разуме́х, сего́ ра́ди возненави́дех всяк пу́ть непра́вды.

Свети́льник нога́ма мои́ма зако́н Твой, и свет стезя́м мои́м.

Кля́хся и поста́вих сохрани́ти судьбы́ пра́вды Твоея́.

Смири́хся до зела́, Го́споди, живи́ мя по словеси́ Твоему́.

Во́льная уст мои́х благоволи́ же, Го́споди, и судьба́м Твои́м научи́ мя.

Душа́ моя́ в руку́ Твое́ю вы́ну, и зако́на Твоего́ не забы́х.

Положи́ша гре́шницы се́ть мне, и от за́поведей Твои́х не заблуди́х.

Насле́довах свиде́ния Твоя́ в век, я́ко ра́дование се́рдца моего́ су́ть.

Приклони́х се́рдце мое́ сотвори́ти оправда́ния Твоя́ в век за воздая́ние.

Законопресту́пныя возненави́дех, зако́н же Твой возлюби́х.

Помо́щник мой и Засту́пник мой еси́ Ты, на словеса́ Твоя́ упова́х.

Уклони́теся от Мене́ лука́внующии, и испыта́ю за́поведи Бо́га моего́.

Заступи́ мя по словеси́ Твоему́, и жив бу́ду, и не посрами́ мене́ от ча́яния моего́.

Помози́ ми, и спасу́ся, и поучу́ся во оправда́ниих Твои́х вы́ну.

Уничижи́л еси́ вся отступа́ющия от оправда́ний Твои́х, я́ко непра́ведно помышле́ние их.

Преступающия непщева́х вся гре́шныя земли́, сего́ ра́ди возлюби́х свиде́ния Твоя́.

Пригвозди́ стра́ху Твоему́ пло́ти моя́, от суде́б бо Твои́х убоя́хся.

Сотвори́х суд и пра́вду, не преда́ждь мене́ оби́дящым мя.

Восприими́ раба́ Твоего́ во бла́го, да не оклевета́ют мене́ го́рдии.

О́чи мои́ исчезо́сте во спасе́ние Твое́, и в сло́во пра́вды Твоея́.

Сотвори́ с рабо́м Твои́м по ми́лости Твое́й, и оправда́нием Твои́м научи́ мя.

Раб Твой е́смь аз, вразуми́ мя, и уве́м свиде́ния Твоя́.

Вре́мя сотвори́ти Го́сподеви, разори́ша зако́н Твой.

Сего́ ра́ди возлюби́х за́поведи Твоя́ па́че зла́та и топа́зия.

Сего́ ра́ди ко всем за́поведем Твои́м направля́хся, всяк пу́ть непра́вды возненави́дех.

Ди́вна свиде́ния Твоя́, сего́ ра́ди испыта́ я̀ душа́ моя́.

Явле́ние слове́с Твои́х просвеща́ет, и вразумля́ет младе́нцы.

Уста́ моя́ отверзо́х, и привлеко́х дух, я́ко за́поведей Твои́х жела́х.

Сла́ва: Поми́луй раба́ Твоего́ (или́ рабу́ Твою́).

И ны́не: Поми́луй раба́ Твоего́ (или́ рабу́ Твою́).

Диа́кон: Па́ки и па́ки ми́ром Го́споду помо́лимся.

Лик: Го́споди поми́луй.

Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Лик: Го́споди поми́луй.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются.

Лик: Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Лик: Пода́й Го́споди. Диа́кон: Го́споду помо́лимся. Лик: Го́споди поми́луй.

И свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ усо́пшей рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне; отню́дуже отбеже́ боле́знь, печа́ль и воздыха́ние; вся́кое согреше́ние соде́янное им (или́ е́ю), сло́вом, или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Та́же свяще́нник глаго́лет:

Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

И па́ки начина́ем тре́тию статию́ на глас тре́тий:

И́мя Твое́: Аллилу́иа.

Па́ки то́йже лик пое́т:

При́зри на мя, и поми́луй мя, по суду́ лю́бящих и́мя Твое́. Аллилу́иа.

Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. Аллилу́иа.

Изба́ви мя от клеветы́ челове́ческия, и сохраню́ за́поведи Твоя́. Аллилу́иа.

Лице́ Твое́ просвети́ на раба́ Твоего́, и научи́ мя оправда́нием Твои́м. Аллилу́иа.

Исхо́дища водна́я изведо́сте о́чи мои́, поне́же не сохрани́х зако́на Твоего́. Аллилу́иа.

Пра́веден еси́, Го́споди, и пра́ви суди́ Твои́. Аллилу́иа.

Запове́дал еси́ пра́вду свиде́ния Твоя́, и и́стину зело́. Аллилу́иа.

Иста́яла мя е́сть ре́вность Твоя́, я́ко забы́ша словеса́ Твоя́ врази́ мои́. Аллилу́иа.

Разжже́но сло́во Твое́ зело́, и раб Твой возлюби́ ѐ. Аллилу́иа.

Юне́йший аз е́смь и уничиже́н, оправда́ний Твои́х не забы́х. Аллилу́иа.

Пра́вда Твоя́ пра́вда во век, и зако́н Твой и́стина. Аллилу́иа.

Ско́рби и ну́жды обрето́ша мя, за́поведи Твоя́ поуче́ние мое́. Аллилу́иа.

Пра́вда свиде́ния Твоя́ в век, вразуми́ мя, и жив бу́ду. Аллилу́иа.

Воззва́х всем се́рдцем мои́м, услы́ши мя, Го́споди, оправда́ния Твоя́ взыщу́. Аллилу́иа.

Воззва́х Ти, спаси́ мя, и сохраню́ свиде́ния Твоя́. Аллилу́иа.

Предвари́х в безго́дии и воззва́х, на словеса́ Твоя́ упова́х. Аллилу́иа.

Предвари́сте о́чи мои́ ко у́тру, поучи́тися словесе́м Твои́м. Аллилу́иа.

Глас мой услы́ши, Го́споди, по ми́лости Твое́й, по судьбе́ Твое́й живи́ мя. Аллилу́иа.

Прибли́жишася гоня́щии мя беззако́нием, от зако́на же Твоего́ удали́шася. Аллилу́иа.

Близ еси́ Ты, Го́споди, и вси путие́ Твои́ и́стина. Аллилу́иа.

Испе́рва позна́х от свиде́ний Твои́х, я́ко в век основа́л я еси́. Аллилу́иа.

Ви́ждь смире́ние мое́ и изми́ мя, я́ко зако́на Твоего́ не забы́х. Аллилу́иа.

Суди́ суд мой и изба́ви мя, словесе́ ра́ди Твоего́ живи́ мя. Аллилу́иа.

Дале́че от гре́шник спасе́ние, я́ко оправда́ний Твои́х не взыска́ша. Аллилу́иа.

Щедро́ты Твоя́ мно́ги, Го́споди, по судьбе́ Твое́й живи́ мя. Аллилу́иа.

Мно́зи изгоня́щии мя и стужа́ющии ми, от свиде́ний Твои́х не уклони́хся. Аллилу́иа.

Ви́дех неразумева́ющыя и иста́ях, я́ко слове́с Твои́х не сохрани́ша. Аллилу́иа.

Ви́ждь, я́ко за́поведи Твоя́ возлюби́х Го́споди, по ми́лости Твое́й живи́ мя. Аллилу́иа.

Нача́ло слове́с Твои́х и́стина, и во век вся судьбы́ пра́вды Твоея́. Аллилу́иа.

Кня́зи погна́ша мя ту́не, и от слове́с Твои́х убоя́ся се́рдце мое́. Аллилу́иа.

Возра́дуюся аз о словесе́х Твои́х, я́ко обрета́яй коры́сть мно́гу. Аллилу́иа.

Непра́вду возненави́дех и омерзи́х, зако́н же Твой возлюби́х. Аллилу́иа.

Седмери́цею днем хвали́х Тя о судьба́х пра́вды Твоея́. Аллилу́иа.

Мир мног лю́бящым зако́н Твой, и не́сть им собла́зна. Аллилу́иа.

Ча́ях спасе́ния Твоего́ Го́споди, и за́поведи Твоя́ возлюби́х. Аллилу́иа.

Сохрани́ душа́ моя́ свиде́ния Твоя́ и возлюби́ я̀ зело́. Аллилу́иа.

Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди. Аллилу́иа.

Да прибли́жится моле́ние мое́ пред Тя Го́споди, по словеси́ Твоему́ вразуми́ мя. Аллилу́иа.

Да вни́дет проше́ние мое́ пред Тя, Го́споди, по словеси́ Твоему́ изба́ви мя. Аллилу́иа.

Отры́гнут устне́ мои́ пе́ние, егда́ научи́ши мя оправда́нием Твои́м. Аллилу́иа.

Провеща́ет язы́к мой словеса́ Твоя́, я́ко вся за́поведи Твоя́ пра́вда. Аллилу́иа.

Да бу́дет рука́ Твоя́ е́же спасти́ мя, я́ко за́поведи Твоя́ изво́лих. Аллилу́иа.

Возжела́х спасе́ние Твое́, Го́споди, и зако́н Твой поуче́ние мое́ е́сть. Аллилу́иа.

Жива́ бу́дет душа́ моя́ и восхва́лит Тя, и судьбы́ Твоя́ помо́гут мне. Аллилу́иа.

Заблуди́х, я́ко овча́ поги́бшее, взыщи́ раба́ Твоего́, я́ко за́поведей Твои́х не забы́х. Аллилу́иа.

И а́бие: Благослове́н еси́ Го́споди, научи́ мя оправда́нием Твои́м.

Святы́х лик обре́те исто́чник жи́зни, и две́рь ра́йскую; да обря́щу и аз пу́ть покая́нием, поги́бшее овча́ аз е́смь, воззови́ мя спа́се, и спаси́ мя.

Благослове́н еси́ Го́споди:

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей, святи́и, и присносу́щней преста́вльшеся, Того́ приле́жно му́ченицы моли́те, долго́в разреше́ние нам дарова́ти

Благослове́н еси́ Го́споди:

В пу́ть у́зкий хо́ждшии приско́рбный, вси в житии́ крест я́ко яре́м взе́мшии, и Мне после́довавшии ве́рою, прииди́те наслади́теся, и́хже угото́вах вам по́честей, и венцо́в небе́сных.

Благослове́н еси́ Го́споди:

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний; уще́дри Твое́ созда́ние Влады́ко, и очи́сти Твои́м благоутро́бием, и возжеле́нное оте́чество пода́ждь ми, рая́ па́ки жи́теля мя сотворя́я.

Благослове́н еси́ Го́споди:

Дре́вле у́бо от не су́щих созда́вый мя, и о́бразом Твои́м Боже́ственным почты́й, преступле́нием же за́поведи, па́ки мя возврати́вый в зе́млю, от нея́же взят бых, на е́же по подо́бию возведи́, дре́внею добро́тою возъобрази́тися.

Благослове́н еси́ Го́споди:

Упоко́й Бо́же раба́ Твоего́ (или́ рабу́ Твою́), и учини́ его́ (или́ ю̀) в раи́, иде́же ли́цы святы́х Го́споди, и пра́ведницы сия́ют я́ко свети́ла, усо́пшаго раба́ Твоего́ (или́ рабу́ Твою́) упоко́й, презира́я его́ (или́ ея́) вся согреше́ния.

Сла́ва: Трисия́тельное еди́наго Божества́, благоче́стно пое́м вопию́ще: свят еси́ О́тче безнача́льный, собезнача́льный Сы́не, и Боже́ственный Ду́ше, просвети́ нас ве́рою Тебе́ служа́щих, и ве́чнаго огня́ исхити́.

И ны́не: Ра́дуйся чи́стая, Бо́га пло́тию ро́ждшая во спасе́ние всех, е́юже род челове́ческий обре́те спасе́ние, Тобо́ю да обря́щем рай, Богоро́дице чи́стая благослове́нная. Аллилу́иа, три́жды.

Та́же диа́кон: Па́ки и па́ки ми́ром Го́споду помо́лимся. Го́споди поми́луй. Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди.

Диа́кон: Го́споду помо́лимся. Го́споди поми́луй.

Свяще́нник чтет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ усо́пшей рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне; отню́дуже отбеже́ боле́знь, печа́ль и воздыха́ние; вся́кое согреше́ние соде́янное им (или́ е́ю), сло́вом, или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглаша́ет: Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

И по возгла́се пое́м настоя́щыя тропари́, глас 5:

Поко́й Спа́се наш с пра́ведными раба́ Твоего́, и сего́ (или́ рабу́ Твою́, и сию́) всели́ во дворы́ Твоя́, я́коже е́сть пи́сано, презира́я я́ко благ прегреше́ния его́ (или́ ея́), во́льная и нево́льная, и вся я́же в ве́дении и не в ве́дении, Человеколю́бче.

Сла́ва, коне́ц: И вся я́же в ве́дении, и не в ве́дении, Человеколю́бче.

И ны́не, Богоро́дичен:

От Де́вы возсия́вый ми́ру Христе́ Бо́же, Сы́ны све́та то́ю показа́вый, поми́луй нас.

Та́же псало́м 50. И кано́н, его́же краестро́чие:

Шесто́е припева́ю отше́дшему сладкопе́ние. Феофа́ново. Глас 6.

Пе́снь 1. Ирмо́с: Я́ко по су́ху:

В небе́сных черто́зех вы́ну до́блии му́ченицы мо́лят Тебе́ Христе́, его́же (или́ ю́же) от земли́ преста́вил еси́ ве́рнаго (или́ ве́рную), ве́чных благ получи́ти сподо́би.

Украси́вый вся, живо́тное смешеное, посреде́ мя челове́ка, смире́ния же вку́пе и вели́чества, созда́л еси́; те́мже раба́ Твоего́ (или́ рабы́ Твоея́) ду́шу Спа́се, упоко́й.

Ра́йска жи́теля, и земледе́лателя в нача́ле мя учини́л еси́, престу́пльша же Твою́ за́поведь изгна́л еси́; те́мже раба́ Твоего́ ду́шу спа́се, упоко́й.

Богоро́дичен: От ре́бра созда́вый Е́ву пе́рвее на́шу прама́терь, из пречи́стаго Твоего́ чре́ва в пло́ть облача́ется, е́юже сме́рти кре́пость, Чи́стая, разруши́.

Пе́снь 3. Ирмо́с: Не́сть свят я́коже Ты:

Зако́нно страдальчествоваша му́ченицы Твои́ жизнода́вче, и венце́м побе́ды украси́вшеся, приле́жно преста́вльшемуся ве́рному (или́ преста́вльшейся ве́рней) ве́чное избавле́ние подаю́т.

Наказа́в пре́жде мно́гими чудесы́ и зна́менми мене́ заблу́ждшаго (или́ заблу́ждшую), в после́дняя Себе́ истощи́вый, я́ко ми́лостив, и взыска́в обре́л и спасл еси́.

От теку́щих непостоятельнаго тле́ния, к Тебе́ преше́дшаго (или́ преше́дшую), в селе́ниих ве́чных всели́тися ра́достно сподо́би Бла́же, оправда́в ве́рою же и благода́тию.

Богоро́дичен:Не́сть непоро́чна, я́коже Ты Пречи́стая Богома́ти, еди́на бо от ве́ка Бо́га и́стиннаго зачала́ еси́ во чре́ве, сме́рти разруши́вшаго си́лу. Диа́кон: Па́ки и па́ки ми́ром Го́споду помо́лимся. Го́споди поми́луй. Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди. Диа́кон: Го́споду помо́лимся. Го́споди поми́луй.

Свяще́нник чтет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ усо́пшей рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне; отню́дуже отбеже́ боле́знь, печа́ль и воздыха́ние; вся́кое согреше́ние соде́янное им (или́ е́ю), сло́вом, или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглаша́ет: Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Седа́лен, глас 6: Вои́стинну суета́ вся́ческая, житие́ же се́нь, и со́ние: и́бо всу́е мяте́тся всяк земноро́дный, я́коже рече́ писа́ние: егда́ мир приобря́щем. Тогда́ во гроб всели́мся, иде́же вку́пе ца́рие и ни́щии; те́мже Христе́ Бо́же, преста́вльшагося раба́ Твоего́ (или́ преста́вльшуюся рабу́ Твою́) упоко́й, я́ко Человеколю́бец.

Сла́ва, И ны́не, Богоро́дичен: Всесвята́я Богоро́дице, во вре́мя живота́ моего́ не оста́ви мене́, челове́ческому предста́тельству не вве́ри мя; но сама́ заступи́, и поми́луй мя.

Пе́снь 4. Ирмо́с: Христо́с моя́ си́ла, Бог и Госпо́дь:

Прему́дрости бо́льшее явля́я позна́ние, и е́же о даре́х, многосоверше́нныя Влады́ко, благосты́ни, му́ченическия ли́ки а́нгелов сочета́л еси́.

Неизрече́нныя сла́вы Твоея́ получи́ти сподо́би, к Тебе́ преста́вльшагося (или́ преста́вльшуюся), иде́же Христе́ веселя́щихся е́сть жили́ще, и глас чи́стаго ра́дования.

Пою́ща (или́ пою́щу) приими́ Боже́ственную держа́ву Твою́, его́же (или́ ю́же) от земли́ прия́л еси́, ча́до све́та сего́ (или́ сию́) соде́ловая, грехо́вную мглу очища́я многоми́лостиве.

Богоро́дичен: Прия́телище Пречи́стое, храм всенепоро́чный, ковче́г всесвяты́й, де́вственное ме́сто свяще́ния, Тебе́ добро́ту Иа́ковлю Влады́ка избра́л е́сть.

Пе́снь 5. Ирмо́с: Бо́жиим све́том Твои́м:

Я́ко всепло́дие свяще́нное, и я́ко нача́ток челове́ческаго естества́, му́ченицы, просла́вленному прине́сшеся бо́гови, нам спасе́ние при́сно хода́тайствуют.

Небе́снаго пребыва́ния, раздая́ния дарова́ний сподо́би Го́споди, пре́жде усо́пшаго ве́рнаго раба́ Твоего́ (или́ пре́жде усо́пшую ве́рную рабу́ Твою́), подая́ прегреше́ний избавле́ние.

И́же Еди́н естество́м Животво́рец, и́же бла́гости вои́стинну неизсле́димая пучи́на, сконча́вшагося (или́ скончавшуюся), Ца́рствия Твоего́ сподо́би Ще́дре, Еди́не безсме́ртне.

Богоро́дичен: Кре́пость и пе́ние, из Тебе́ Влады́чице ми́ру рожде́йся, и спасе́ние быв поги́бшым, И́же от а́довых врат избавля́яй, ве́рою Тебе́ блажа́щыя.

Пе́снь 6. Ирмо́с: Жите́йское мо́ре:

На кресте́ пригвожда́емь, му́ченическия ли́ки к Тебе́ собра́л еси́, подража́ющыя стра́сть Твою́ Бла́же. Те́мже Тя мо́лим: к Тебе́ преста́вльшагося (или́ преста́вльшуюся) ны́не упоко́й.

Неизрече́нною сла́вою Твое́ю, егда́ прии́деши стра́шно суди́ти ми́ру всему́, на о́блацех, благоволи́ изба́вителю све́тло сре́сти Тебе́, его́же (или́ ю́же) от земли́ прия́л еси́ ве́рнаго раба́ Твоего́ (или́ ве́рную рабу́ Твою́).

Исто́чник жи́зни еси́ Влады́ко, в му́жестве Боже́ственнем, окованнаго (или́ окова́нную) изводя́й, раба́ Твоего́ (или́ рабу́ Твое́ю) к Тебе́ ве́рно отше́дшаго (или́ отше́дшую) в сла́дости ра́йстей всели́.

Богоро́дичен: В зе́млю возврати́хомся, преступи́вше Бо́жию за́поведь Боже́ственную, Тобо́ю же Де́во, на Не́бо от земли́ вознесо́хомся, тлю сме́ртную оттря́сше.

Диа́кон: Па́ки и па́ки ми́ром Го́споду помо́лимся.

Го́споди поми́луй.

Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди. Диа́кон: Го́споду помо́лимся. Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ усо́пшей рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне; отню́дуже отбеже́ боле́знь, печа́ль и воздыха́ние; вся́кое согреше́ние соде́янное им (или́ е́ю), сло́вом, или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Конда́к, глас 8: Со святы́ми упоко́й Христе́, ду́шу раба́ Твоего́ (или́ рабы́ Твоея́), иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Сам еди́н еси́ безсме́ртный, сотвори́вый и созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́ созда́вый мя и реки́й ми: я́ко земля́ еси́, и в зе́млю оти́деши, а́може вси челове́цы по́йдем, надгро́бное рыда́ние творя́ще пе́снь: аллилу́иа.

И па́ки: Со святы́ми упоко́й Христе́:

Пе́снь 7. Ирмо́с: Росода́тельну у́бо пе́щь:

Изба́вльшиися Твое́ю кро́вию му́ченицы пе́рваго преступле́ния, окропи́вшеся же свое́ю кро́вию, прообразу́ют я́ве Твое́ заколе́ние: благослове́н еси́ Бо́же оте́ц на́ших.

Свире́пеющую сме́рть умертви́л еси́ Сло́ве Живонача́льнейший, в ве́ре же Твое́й усо́пшаго (или́ усо́пшую) приими́, пою́щаго, и глаго́лющаго (или́ пою́щую, и глаго́лющую): Христе́, благослове́н еси́ Бо́же оте́ц на́ших.

Воодуши́вый мя челове́ка вдохнове́нием Боже́ственным богонача́льнейший Влады́ко, преста́вленнаго (или́ преставленную) Ца́рствия Твоего́ сподо́би, пе́ти Тебе́ Спа́се: благослове́н еси́ Бо́же оте́ц на́ших.

Богоро́дичен: Превы́шши вся́кия тва́ри пренепоро́чная была́ еси́, заче́нши Бо́га, сокруши́вшаго сме́ртная врата́, и вереи́ сте́ршаго. Те́мже Тя чи́стая песносло́вим ве́рнии, я́ко Богома́терь.

Пе́снь 8. Ирмо́с: Из пла́мене преподо́бным ро́су:

Кре́пко по́двиги показа́вше, побе́ды венце́м украси́стеся му́ченицы Христо́вы страстоте́рпцы, зову́ще: Тя превозно́сим Христе́ во ве́ки.

Свяще́нне житие́ оста́вльшыя ве́рныя, и к Тебе́ Влады́це преше́дшыя приими́, кро́тце упокоева́я, я́ко благоутро́бен, Тя превознося́щыя во вся ве́ки.

Ны́не в земли́ кро́тких всех, водворя́тися пре́жде усо́пшыя, Спа́се благоволи́, ве́рою я́же в Тя оправда́в и благода́тию, Тя превознося́щыя во вся ве́ки.

Богоро́дичен: Блажи́м вси Тя всеблаже́нная, ро́ждшую сло́ва вои́стинну су́щаго Блаже́ннаго, пло́ть нас ра́ди бы́вша: Его́же превозно́сим во вся ве́ки.

Пе́снь 9. Ирмо́с: Бо́га челове́ком:

Наде́жда му́чеников ли́ки укрепи́, и к Твое́й любви́ распале́нне впери́, бу́дущих сим предвообрази́вши непоколеби́мый вои́стинну поко́й: ему́же преста́вльшагося Бла́же ве́рнаго (или́ преста́вльшуюся Бла́же ве́рную) сподо́би.

Све́тлаго и Боже́ственнаго получи́ти сия́ния Твоего́ Христе́, ве́рою преста́вльшагося (или́ преста́вльшуюся) благоволи́ в не́дрех Авраа́мовых упокое́ние, я́ко еди́н ми́лостив, сему́ (или́ сей) да́руяй, и ве́чнаго сподобля́яй блаже́нства.

Сый естество́м благ и благоутро́бен, и воли́тель ми́лости, и благоутро́бия бе́здна, его́же (или́ ю́же) от ме́ста сего́ озлобле́ния и се́ни сме́ртныя Спа́се преста́вил еси́, иде́же сия́ет Твой свет, сего́ (или́ сию́) учини́.

Богоро́дичен:Се́нь святу́ю чи́стая ве́мы Тя, и ковче́г, и скрижа́ль зако́на благода́ти: Тобо́ю бо оставле́ние дарова́ся, оправда́нным кро́вию воплоще́ннаго из Твоего́ чре́ва, всенепоро́чная.

Диа́кон: Па́ки и па́ки ми́ром Го́споду помо́лимся.

Го́споди поми́луй.

Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Го́споди поми́луй, три́жды.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются.

Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди. Диа́кон: Го́споду помо́лимся. Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ усо́пшей рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне; отню́дуже отбеже́ боле́знь, печа́ль и воздыха́ние; вся́кое согреше́ние соде́янное им (или́ е́ю), сло́вом, или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ воскресе́ние и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Начина́ем самогла́сны Иоа́нна мона́ха.

Глас 1: Ка́я жите́йская сла́дость пребыва́ет печа́ли неприча́стна; ка́я ли сла́ва стои́т на земли́ непрело́жна; вся се́ни немощне́йша, вся со́ний преле́стнейша; еди́нем мгнове́нием, и сия́ вся сме́рть прие́млет. Но во све́те Христе́ Лица́ Твоего́, и в наслажде́нии Твоея́ красоты́, его́же (или́ ю́же) избра́л еси́, упоко́й, я́ко человеколю́бец.

Глас 2: Увы́ мне, яковы́й по́двиг и́мать душа́ разлуча́ющися от телесе́! увы́, тогда́ коли́ко слези́т, и не́сть поми́луяй ю̀! Ко а́нгелом о́чи возводя́щи, безде́льно мо́лится: к челове́ком ру́це простира́ющи, не и́мать помога́ющаго. Те́мже возлю́бленнии мои́ бра́тие, помы́сливше на́шу кра́ткую жи́знь, преста́вленному (или́ преставленной) упокое́ния от Христа́ про́сим, и душа́м на́шым ве́лию ми́лость.

Глас 3: Вся суета́ челове́ческая, ели́ка не пребыва́ет по сме́рти, не пребыва́ет бога́тство, ни сше́ствует сла́ва; прише́дши бо сме́рти, сия́ вся потреби́шася. Те́мже Христу́ безсме́ртному возопии́м: преста́вленнаго (или́ преставленную) от нас упоко́й, иде́же всех е́сть веселя́щихся жили́ще.

Глас 4: Где е́сть мирско́е пристра́стие; Где е́сть привре́менных мечта́ние; Где е́сть зла́то и сребро́; Где е́сть рабо́в мно́жество и молва́; Вся пе́рсть, вся пе́пел, вся се́нь. Но прииди́те возопии́м безсме́ртному Царю́: Го́споди ве́чных Твои́х благ сподо́би (или́ преста́вльшуюся) от нас, упокоя́я его́ (или́ ю̀) в нестаре́ющемся блаже́нстве Твое́м.

Глас 5: Помяну́х проро́ка вопию́ща: аз е́смь земля́ и пе́пел. И па́ки разсмотри́х во гробе́х, и ви́дех ко́сти обнаже́ны, и рех: у́бо кто е́сть ца́рь, или́ во́ин, или́ бога́т, или́ убо́г, или́ пра́ведник, или́ гре́шник; Но упоко́й Го́споди, с пра́ведными раба́ Твоего́ (или́ рабу́ Твою́).

Глас 6: Нача́ток мне и соста́в зижди́тельное Твое́ бы́сть повеле́ние; восхоте́в бо от неви́димаго же и ви́димаго, жи́ва мя соста́вити естества́, от земли́ те́ло мое́ созда́л еси́, дал же ми еси́ ду́шу Боже́ственным Твои́м и животворя́щим вдохнове́нием. Те́мже Христе́ раба́ Твоего́ (или́ рабу́ Твою́) во стране́ живу́щих, и в селе́ниих пра́ведных упоко́й.

Глас 7: По о́бразу Твоему́ и по подо́бию созда́вый в нача́ле челове́ка, в раи́ поста́вил еси́ владе́ти Твои́ми тва́рьми; за́вистию же диа́волею прельсти́вся, сне́ди причасти́ся, за́поведей Твои́х престу́пник быв. Те́мже па́ки в зе́млю, от нея́же взят бы́сть, осуди́л еси́ возврати́тися Го́споди, и испроси́ти упокое́ние.

Глас 8: Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безобразну, безсла́вну, не иму́щую ви́да. О чудесе́! Что сие́ е́же о нас бы́сть та́инство; Ка́ко преда́хомся тле́нию; Ка́ко сопряго́хомся сме́рти; Вои́стинну Бо́га повеле́нием, я́коже пи́сано е́сть, подаю́щаго преста́вльшемуся (или́ преста́вльшейся) упокое́ние.

Блаже́нна, глас 6:

Во Ца́рствии Твое́м, егда́ прии́деши помяни́ нас Го́споди.

Блаже́ни ни́щии ду́хом, я́ко тех е́сть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тцыи, я́ко ти́и насле́дят зе́млю.

Блаже́ни а́лчущии, и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Разбо́йника рая́ Христе́ жи́теля, на кресте́ Тебе́ возопи́вша, помяни́ мя, предсоде́ял еси́ покая́нием его́, и мене́ сподо́би недосто́йнаго.

Блаже́ни чи́стии се́рдцем, я́ко ти́и Бо́га у́зрят.

Живото́м Госпо́дствуяй и сме́ртию, во дво́рех святы́х упоко́й, его́же (или́ ю́же) прия́л еси́ от привре́менных: и помяни́ мя, егда́ прии́деши во Ца́рствии Твое́м.

Блаже́ни миротво́рцы, я́ко ти́и сы́нове Бо́жии нареку́тся.

Душа́ми влады́чествуяй и телеса́ми, его́же в ру́це дыха́ние на́ше, оскорбля́емых утеше́ние, упоко́й во стране́ пра́ведных, его́же (или́ ю́же) преста́вил еси́ раба́ Твоего́.

Блаже́ни изгна́ни пра́вды ра́ди:

Христо́с тя упоко́ит во стране́ живу́щих, и врата́ ра́йская да отве́рзет ти, и Ца́рствия пока́жет жи́теля, и оставле́ние тебе́ даст, о ни́хже согреши́л еси́ (или́ согреши́ла еси́) в житии́, Христолю́бче (или́ Христолюбице).

Блаже́ни есте́, егда́ поно́сят вам:

Изы́дем и у́зрим во гробе́х, я́ко на́ги ко́сти челове́к, черве́й сне́дь, и смрад, и позна́ем что бога́тство, добро́та, кре́пость, благоле́пие;

Ра́дуйтеся и весели́теся:

Услы́шим, что зове́т Вседержи́тель: увы́ и́щущым зре́ти стра́шный де́нь Госпо́день! сей бо е́сть тьма́: огне́м бо искуша́ются вся́ческая.

Сла́ва: Безнача́льным и рожде́нием же и происхожде́нием, Отцу́ покланя́юся роди́вшему, Сы́на сла́влю рожде́ннаго, пою́ сопросия́вшаго Отцу́ же и Сы́ну, Ду́ха Свята́го.

И ны́не, Богоро́дичен: Ка́ко от сосцу́ Твоего́ млеко́ то́чиши Де́во, ка́ко пита́еши Пита́теля тва́ри; Я́коже ве́сть, Источи́вый во́ду от ка́мене, жи́лы водны́я жа́ждущым лю́дем, я́коже писа́ся.

Посе́м диа́кон глаго́лет: Во́нмем. Свяще́нник: Мир всем. Чтец: И ду́хови твоему́. Лик пое́т проки́мен, глас 6: Блаже́н пу́ть, во́ньже и́деши дне́сь душе́, я́ко угото́вася тебе́ ме́сто упокое́ния. Стих: К Тебе́ Го́споди воззову́: Диа́кон: Прему́дрость. Чтец же глаго́лет: К солу́няном посла́ния свята́го апо́стола Па́вла чте́ние. Диа́кон: Во́нмем. Зача́ло 270:

Бра́тие, не хощу́ вас не ве́дети о уме́рших, да не скорби́те, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршыя о Иису́се, приведе́т с Ним. Сие́ бо вам глаго́лем сло́вом Госпо́дним: я́ко мы живу́щии оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии во гла́се арха́нгелове, и в трубе́ Бо́жии сни́дет с Небесе́, и ме́ртвии о Христе́ воскре́снут пе́рвее; пото́м же мы живу́щии оста́вшии, ку́пно с ни́ми восхище́ни бу́дем на о́блацех, в сре́тение Госпо́дне на возду́се, и та́ко всегда́ с Го́сподем бу́дем.

Свяще́нник: Мир ти. Чтец: И ду́хови твоему́.

Псало́м Дави́дов. Аллилу́иа. Глас 6:

Блаже́н, его́же избра́л и прия́л еси́, Го́споди.

Диа́кон: Прему́дрость, про́сти , услы́шим свята́го Ева́нгелиа. От Иоа́нна свята́го Ева́нгелиа чте́ние. Диа́кон: Во́нмем. Зача́ло 16:

Рече́ Госпо́дь ко прише́дшым к Нему́ иуде́ем: ами́нь ами́нь глаго́лю вам, я́ко слу́шаяй словесе́ Моего́ и ве́руяй посла́вшему Мя, и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь ами́нь глаго́лю вам: я́ко гряде́т час, и ны́не е́сть, егда́ ме́ртвии услы́шат глас Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́; И о́бласть даст Ему́ и суд твори́ти. Я́ко Сын челове́чь е́сть, не диви́теся сему́; Я́ко гряде́т час, в о́ньже вси су́щии во гробе́х, услы́шат глас Сы́на Бо́жия; И изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же: я́коже слы́шу, сужду́; и суд Мой пра́веден е́сть; я́ко не ищу́ во́ли Моея́, но во́ли посла́вшаго Мя Отца́.

Диа́кон: Поми́луй нас Бо́же, по вели́цей ми́лости Твое́й, мо́лимтися услы́ши и поми́луй. Го́споди поми́луй, три́жды.

Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Го́споди поми́луй, три́жды.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются.

Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим.

Пода́й Го́споди.

Диа́кон: Го́споду помо́лимся. Го́споди поми́луй.

И по исполне́нии сего́ глаго́лет пе́рвый от свяще́нников, или́ архиере́й прилучи́вся, моли́тву: Бо́же духо́в: велегла́сно, прише́д близ уме́ршаго. Та́кожде и настоя́щии свяще́нницы вси. Ве́домо же бу́ди, я́ко глаго́лему коему́ждо проше́нию от диа́кона, во ели́ко глаго́лется проше́ние от него́, глаго́лет вышерече́нную моли́тву, ки́йждо свяще́нник, по чи́ну своему́ та́йно близ уме́ршаго. И возглаша́ет: Я́ко Ты еси́ воскресе́ние: Ны́не же от пе́рваго свяще́нника, или́ архиере́а, глаго́лется велегла́сно моли́тва: Бо́же духо́в: я́коже вы́ше рече́ся. По возгла́се же быва́ет целова́ние. И пое́м настоя́щыя стихи́ры. Подо́бны, глас 2: Егда́ от дре́ва:

Прииди́те, после́днее целова́ние дади́м бра́тие уме́ршему (или́ уме́ршей), благодаря́ще Бо́га: сей (или́ сия́) бо оскуде́ от сро́дства своего́, и ко гро́бу тщи́тся не ктому́ пеки́йся (или́ пеку́щися) о су́етных, и о многостра́стной пло́ти. Где ны́не сро́дницы же и дру́зи; Се разлуча́емся; его́же (или́ ю́же) упоко́ити, Го́споду помо́лимся.

Ко́е разлуче́ние, о бра́тие; Кий пла́чь; Ко́е рыда́ние в настоя́щем часе́; Прииди́те у́бо целу́йте бы́вшаго (или́ бы́вшую) вма́ле с на́ми; предае́тся бо гро́бу, ка́менем покрыва́ется, во тьму́ вселя́ется, с ме́ртвыми погреба́ется, и всех сро́дников и друго́в ны́не разлуча́ется; его́же (или́ ю́же) упоко́ити, Го́споду помо́лимся.

Ны́не жите́йское лука́вое разруша́ется торжество́ суеты́. Дух бо оскуде́ от селе́ния, бре́ние очерни́ся, сосу́д раздра́ся, безгла́сен, нечу́ствен, ме́ртвен, недви́жимь; его́же (или́ ю́же) посыла́юще гро́бу, Го́споду помо́лимся, да́ти сему́ (или́ сей) во ве́ки упокое́ние.

Яко́в живо́т наш е́сть; Цвет, и дым, и роса́ у́тренняя вои́стинну. Прииди́те у́бо, у́зрим на гробе́х я́сно, где добро́та теле́сная; Где ю́ность; Где су́ть очеса́, и зрак плотски́й; Вся увядо́ша я́ко трава́, вся потреби́шася. Прииди́те, ко Христу́ припаде́м со слеза́ми.

Ве́лий пла́чь и рыда́ние, ве́лие воздыха́ние, и ну́жда, разлуче́ние души́, ад и поги́бель; привре́менный живо́т, се́нь непостоя́нная, сон преле́стный, безвременномечта́нен труд жития́ земна́го. Дале́че отбежи́м мирска́го вся́каго греха́, да небе́сная насле́дим.

Ви́дяще предлежа́ща ме́ртва, о́браз восприи́мем вси коне́чнаго часа́; сей бо отхо́дит я́ко дым от земли́, я́ко цвет отцвете́, я́ко трава́ посече́ся, вре́тищем повива́емь, земле́ю покрыва́емь; его́же неви́дима оста́вивше, Христу́ помо́лимся, да́ти сему́ (или́ сей) во ве́ки упокое́ние.

Прииди́те вну́цы Ада́мовы, уви́дим на земли́ пове́рженнаго, по о́бразу на́шему, все благоле́пие отлага́юща, разруше́на во гро́бе гно́ем, червьми́, тьмо́ю иждива́ема; земле́ю покрыва́ема; его́же неви́дима оста́вльше, Христу́ помо́лимся, да́ти во ве́ки сему́ (или́ сей) упокое́ние.

Егда́ душа́ от те́ла и́мать ну́ждею восхи́титися стра́шными а́нгелы, всех забыва́ет сро́дников и зна́емых, и пече́тся о бу́дущих суди́лищей стоя́нии, я́же суеты́, и многотру́дныя пло́ти разреше́нии: тогда́ судию́ моля́ще, вси помо́лимся, да про́сти т Госпо́дь, я́же соде́ла.

Прииди́те бра́тие, во гро́бе у́зрим пе́пел и пе́рсть, из нея́же созда́хомся. Ка́мо ны́не и́дем; Что же бы́хом; Кий убо́г, или́ бога́т; Или́ кий Влады́ка; Кий же свобо́дь; И не вси ли пе́пел; Добро́та лица́ согни́, и ю́ности ве́сь цвет увяди́ сме́рть.

Вои́стинну суета́ и тле́ние, вся жите́йская, ви́ды, и безсла́вная; вси бо исчеза́ем, вси у́мрем, ца́рие же и кня́зи, судии́ и наси́льницы, бога́тии и убо́зии, и все естество́ челове́ческое; ны́не бо, и́же иногда́ в житии́, во гро́бы верга́ются, и́хже да упоко́ит Госпо́дь, помо́лимся.

Вси теле́снии ны́не орга́ны пра́здни зря́тся, и́же пре́жде ма́ла дви́жими бя́ху, вси недействи́тельни, ме́ртви, нечу́вственни; о́чи бо заидо́ша, связа́стеся но́зе, ру́це безмо́лвствуете, и слух с ни́ми; язы́к молча́нием заключи́ся, гро́бу предае́тся. Вои́стинну суета́ вся челове́ческая.

Спаса́й наде́ющыяся на Тя, Ма́ти незаходи́маго Со́лнца Богороди́тельнице: умоли́ моли́твами Твои́ми преблага́го Бо́га, упоко́ити, мо́лимся, ны́не преста́вльшагося, иде́же упокоева́ются пра́ведных ду́си: Боже́ственных благ насле́дника покажи́, во дво́рех пра́ведных, в па́мять, Всенепоро́чная, ве́чную.

Сла́ва, глас 6:

Зря́ще мя безгла́сна, и бездыха́нна предлежа́ща, воспла́чите о мне бра́тие и дру́зи, сро́дницы и зна́емии; вчера́шний бо де́нь бесе́довах с ва́ми, и внеза́пу на́йде на мя стра́шный час сме́ртный; но прииди́те вси лю́бящии мя, и целу́йте мя после́дним целова́нием: не ктому́ бо с ва́ми похожду́, или́ собесе́дую про́чее; к судии́ бо отхожду́, иде́же не́сть лицеприя́тия. Раб бо и влады́ка вку́пе предстоя́т, ца́рь и во́ин, бога́тый и убо́гий в ра́внем досто́инстве; ки́йждо бо от свои́х дел, или́ просла́вится, или́ постыди́тся. Но прошу́ всех и молю́, непреста́нно о мне моли́теся Христу́ Бо́гу, да не низведе́н бу́ду по грехо́м мои́м, на ме́сто муче́ния: но да вчини́т мя, иде́же свет живо́тный.

И ны́не, Богоро́дичен, глас то́йже.

Моли́твами ро́ждшия Тя Христе́, и Предте́чи Твоего́, апо́столов, проро́ков, иера́рхов, преподо́бных, и пра́ведных, и всех святы́х, усо́пшаго раба́ Твоего́ упоко́й. Та́же: Трисвято́е. Пресвята́я Тро́ице: О́тче наш: Свяще́нник: Я́ко Твое́ е́сть Ца́рство: Та́же: Со ду́хи пра́ведных: и про́чее. Проше́ние от диа́кона: Поми́луй нас Бо́же, по вели́цей ми́лости Твое́й, мо́лимтися услы́ши и поми́луй. Го́споди поми́луй, три́жды. Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному. Го́споди поми́луй, три́жды.Я́ко да Госпо́дь Бог учини́т ду́шу его́ (или́ ея́), иде́же пра́веднии упокоя́ются.

Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́), у Христа́ безсме́ртнаго Царя́ и Бо́га на́шего про́сим. Пода́й Го́споди. Диа́кон: Го́споду помо́лимся. Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый; Сам Го́споди, упоко́й ду́шу усо́пшаго раба́ Твоего́ (или́ усо́пшия рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние; вся́кое согреше́ние, соде́янное им (или́ е́ю) сло́вом, или́ де́лом, или́ помышле́нием, я́ко благи́й Человеколю́бец Бог про́сти , я́ко не́сть челове́к, и́же жив бу́дет, и не согреши́т. Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ Воскресе́ние и Живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

По возгла́се же, Сла́ва, и ны́не. И отпу́ст:

Воскресы́й из ме́ртвых Христо́с и́стинный Бог наш, моли́твами Пречи́стыя Своея́ Ма́тере, преподо́бных и богоно́сных оте́ц на́ших, и всех святы́х свои́х, ду́шу от нас преста́вльшагося раба́ Своего́ (или́ преста́вльшияся рабы́ Своея́), и́мярек, в селе́ниих святы́х всели́т, и с пра́ведными причте́т, и нас поми́лует, я́ко благ и Человеколю́бец. Ами́нь.

Архиере́й же или́ нача́льствуяй иере́й сам глаго́лет три́жды сие́:

Ве́чная твоя́ па́мять, достоблаже́нне и приснопа́мятне бра́те наш, три́жды. Та́же певцы́ пою́т три́жды: Ве́чная па́мять. А́бие же архиере́й, а́ще приключи́тся та́мо бы́ти, или́ иере́й чтет моли́тву проща́льную велегла́сно:

Госпо́дь Иису́с Христо́с Бог наш, И́же Боже́ственная за́поведи святы́м Свои́м ученико́м и апо́столом да́вый, во е́же вяза́ти и реши́ти па́дших грехи́, и от о́ных па́ки мы прие́мше вины́ то́йже твори́ти, да про́сти т тебе́, ча́до духо́вное, а́ще что соде́лал еси́ в ны́нешнем ве́це, во́льное или́ нево́льное, ны́не и при́сно, и во ве́ки веко́в, ами́нь.

И та́ко взе́мше мо́щи отхо́дим ко гро́бу после́дующым всем лю́дем, предидущым же свяще́нником, и пою́щым: Святы́й Бо́же: Пресвята́я Тро́ице: О́тче наш: И про́чая. И полага́ются мо́щи во гроб. Архиере́й же, или́ свяще́нник, взем пе́рсть лопа́тою, крестови́дно ме́щет верху́ моще́й, глаго́ля: Госпо́дня земля́, и исполне́ние ея́ вселе́нная, и вси живу́щии на ней. И посе́м налива́ет верху́ моще́й еле́й от канди́ла, или́ сы́плют пе́пел от кади́льницы, и та́ко покрыва́ют я́ко обы́чно гроб, приглаго́лемым тропаре́м: Со ду́хи пра́ведных: и про́чым всем. И отпу́ст.

Егда́ кто от мона́хов ко Го́споду оти́дет, поне́же не подоба́ет омыватися те́лу его́, ниже́ ви́детися отню́д на́гу; на сие́ учине́нный мона́х гу́бою отира́ет мо́щи его́ те́плою водо́ю, творя́ пре́жде гу́бою крест на челе́ сконча́вшагося, на пе́рсех, на рука́х, и на нога́х, и на коле́нах, вя́щше же ничто́же. Пото́м же прино́сит чи́стую ри́зу, и облачи́т его́, отемшейся пе́рвее ве́тсей, ника́коже наготу́ его́ ви́дев. И по внегда́ облещи́ его́, возлага́ет на него́ кукуль. А́ще вели́каго о́браза е́сть, обложи́в шле́мом свы́ше главы́, и свесив и да́же до брады, я́коже не ви́детися лицу́ моще́й его́. Та́же облага́ет на него́ аналав по чи́ну его́ и палии, и опоясует его́ по́ясом усмяным, и обувает в сандалия но́выя. (А́ще же ма́лаго о́браза е́сть, то́чию во власяни́цу и ря́су, и на главе́ его́ подкапок, и камилавха возлага́ется). Та́же простира́ется мандия его́ косвенне, и поднесши мо́щи с рогози́ны, простира́ют ю̀ под мо́щи от ног да́же до главы́, и та́ко над погребанием вчиненый мона́х ноже́м обрезав край мандии́, и́же по обои́х кра́ех, свив же мо́щи мандиею, укро́ем вку́пе свя́занным обвива́ет мо́щи. Наче́н же от главы́ соверша́ет кресты́ три, еди́н у главы́, вторы́й у персий, тре́тий у коле́н, оста́вшею же ча́стию двои́х укроев связу́ет но́зе его́.

По сих же призыва́ется свяще́нник чредны́й, и́же возложи́в на ся епитрахи́ль и фимиа́м в кади́льницу, твори́т нача́ло обы́чное: Благослове́н Бог наш: И начина́ем: Трисвято́е. Пресвята́я Тро́ице: О́тче наш: Я́ко Твое́ е́сть Ца́рство:

И обы́чныя тропари́, си́есть:

Со ду́хи пра́ведных сконча́вшихся, ду́шу раба́ Твоего́ (или́ рабы́ Твоея́), Спа́се, упоко́й, сохраня́я ю̀ во блаже́нной жи́зни, я́же у тебе́, Человеколю́бче.

В поко́ищи Твое́м, Го́споди, иде́же вси святи́и Твои́ упокоева́ются, упоко́й и ду́шу раба́ Твоего́ (или́ рабы́ Твоея́), я́ко Еди́н еси́ Человеколю́бец.

Сла́ва: Ты еси́ Бог, Соше́дый во ад и у́зы окова́нных Разреши́вый, Сам и ду́шу раба́ Твоего́ (или́ рабы́ Твоея́) упоко́й.

И ны́не: Еди́на Чи́стая и Непоро́чная Де́во, Бо́га без се́мене ро́ждшая, моли́ спасти́ся души́ его́ (или́ ея́).

Та́же диа́кон: Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй.

Го́споди, поми́луй, три́жды.

Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному.

Го́споди, поми́луй, три́жды.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоева́ются.

Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́) у Христа́ Безсме́ртнаго Царя́ и Бо́га на́шего про́сим.

Пода́й, Го́споди. Диа́кон: Го́споду помо́лимся. Го́споди, поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый; Сам Го́споди, упоко́й ду́шу усо́пшаго раба́ Твоего́ (или́ рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им (или́ е́ю), сло́вом, или́ де́лом, или́ помышле́нием, я́ко Благи́й Человеколю́бец Бог про́сти . Я́ко не́сть челове́к, и́же жив бу́дет, и не согреши́т; Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ воскресе́ние, и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

И отпу́ст.

Посе́м же взе́мше бра́тия мо́щи уме́ршаго отно́сят в це́рковь, и а́ще у́бо свяще́нник е́сть отше́дый брат, полага́ются мо́щи его́ посреде́ хра́ма; а́ще же просте́ц, в притво́ре. Егда́ же прии́дет вре́мя пе́ти исхо́дное пе́ние над лежа́щим, и́дет кандиловжига́тель, и ударя́ет в тя́жкая желе́за, творя́ статии́ три, и та́ко собира́ются вся бра́тия, и раздае́т им свещы́ сосудохранитель, и возже́гше я̀.

И диа́кону возгласи́вшу: Благослови́, влады́ко.

Свяще́нник же обы́чно начина́ет: Благослове́н Бог наш:

И начина́ем псало́м 90:

Живы́й в по́мощи Вы́шняго, в кро́ве Бо́га Небе́снаго водвори́тся. Рече́т Го́сподеви: Засту́пник мой еси́, и Прибе́жище мое́, Бог мой и упова́ю на Него́. Я́ко Той изба́вит тя от се́ти ло́вчи и от словесе́ мяте́жна; плещма́ Свои́ма осени́т тя, и под криле́ Его́ наде́ешися; ору́жием обы́дет тя и́стина Его́. Не убои́шися от стра́ха нощна́го, от стре́лы летя́щия во дни, от ве́щи во тьме́ преходя́щия, от сря́ща и бе́са полу́деннаго. Паде́т от страны́ твоея́ ты́сяща, и тьма́ одесну́ю тебе́, к тебе́ же не прибли́жится. Оба́че очи́ма твои́ма смо́триши, и воздая́ние гре́шников у́зриши. Я́ко Ты, Го́споди, упова́ние мое́; Вы́шняго положи́л еси́ прибе́жище твое́. Не прии́дет к тебе́ зло, и ра́на не прибли́жится телеси́ твоему́. Я́ко а́нгелом Свои́м запове́сть о тебе́ сохрани́ти тя во всех путе́х твои́х. На рука́х во́змут тя, да не когда́ преткне́ши о ка́мень но́гу твою́. На а́спида и васили́ска насту́пиши, и попере́ши льва́ и зми́я. Я́ко на Мя упова́, и изба́влю и, покры́ю ѝ, я́ко позна́ и́мя Мое́. Воззове́т ко Мне, и услы́шу его́, с ним е́смь в ско́рби, изму́ его́, и просла́влю его́. Долгото́ю дней испо́лню его́, и явлю́ ему́ спасе́ние Мое́.

И пою́т бра́тия: Аллилу́иа, во глас 8.

Стих 1: Блаже́н, его́же избра́л и прия́л еси́, Го́споди.

Стих 2: Па́мять его́ в род и род.

Тропа́рь, глас то́йже: Глубино́ю му́дрости, человеколю́бно вся стро́яй, и поле́зное всем подава́яй, Еди́не Соде́телю, упоко́й, Го́споди, ду́шы раб Твои́х, на Тя бо упова́ние возложи́ша, Творца́ и Зижди́теля и Бо́га на́шего.

Сла́ва, то́йже. И ны́не: Тя Сте́ну и Приста́нище и́мамы, и Моли́твенницу благоприя́тну к Бо́гу, Его́же родила́ еси́, Богоро́дице Безневе́стная, ве́рных спасе́ние.

И а́бие: Благослове́н еси́, Го́споди, научи́ мя оправда́нием Твои́м.

Непоро́чнии в пу́ть: Благослове́н еси́, Го́споди:

И стихосло́вится пе́рвая статия́ непоро́чных, да́же до Твой е́смь аз: На две бо статии́ пою́тся непоро́чны зде, в ко́емждо же конце́ стиха́ пе́рвыя статии́ приглаголем: Благослове́н еси́, Го́споди: Егда́ же прии́дут в коне́чный стих, си́есть: Во век не забу́ду оправда́ний Твои́х: пою́т его́ три́жды, к коему́ждо припева́юще: Благослове́н еси́, Го́споди: И а́бие ектениа́ от диа́кона; и моли́тва втай от свяще́нника, и возгла́с. Посе́м начина́ем втору́ю статию́ си́це: Оправда́ний Твои́х взыска́х: Твой е́смь аз, спаси́ мя. И на конце́ коего́ждо стиха́: Твой е́смь аз, спаси́ мя. Егда́ же начне́м: При́зри на мя, и поми́луй мя: пое́м псало́м сей третиим гла́сом, на конце́ же коего́ждо стиха́ приглаголем: Во Ца́рствии Твое́м, Го́споди, помяни́ раба́ Твоего́ (или́ рабу́ Твою́). Коне́чный же стих, си́есть: Жи́ва бу́дет душа́ моя́: пое́м три́жды, припева́юще к коему́ждо:

Во Ца́рствии Твое́м, Го́споди, помяни́ раба́ Твоего́ (или́ рабу́ Твою́). Непоро́чнии в пу́ть: Благослове́н еси́, Го́споди:

Блаже́ни непоро́чнии в пу́ть, ходя́щии в зако́не Госпо́дни. Благослове́н еси́, Го́споди:

Блаже́ни испыта́ющии свиде́ния Его́, всем се́рдцем взы́щут Его́. Благослове́н еси́, Го́споди:

Не де́лающии бо беззако́ния, в путе́х Его́ ходи́ша. Благослове́н еси́, Го́споди:

Ты запове́дал еси́ за́поведи Твоя́ сохрани́ти зело́. Благослове́н еси́, Го́споди:

Дабы́ испра́вилися путие́ мои́, сохрани́ти оправда́ния Твоя́. Благослове́н еси́, Го́споди:

Тогда́ не постыжу́ся, внегда́ призре́ти ми на вся за́поведи Твоя́. Благослове́н еси́, Го́споди:

Испове́мся Тебе́ в пра́вости се́рдца, внегда́ научитимися судьба́м пра́вды Твоея́. Благослове́н еси́, Го́споди:

Оправда́ния Твоя́ сохраню́, не оста́ви мене́ до зела́. Благослове́н еси́, Го́споди:

В чесо́м испра́вит юне́йший пу́ть свой; Внегда́ сохрани́ти словеса́ Твоя́. Благослове́н еси́, Го́споди:

Всем се́рдцем мои́м взыска́х Тебе́, не отри́ни мене́ от за́поведей Твои́х. Благослове́н еси́, Го́споди:

В се́рдце мое́м скрых словеса́ Твоя́, я́ко да не согрешу́ Тебе́. Благослове́н еси́, Го́споди:

Благослове́н еси́, Го́споди, научи́ мя оправда́нием Твои́м. Благослове́н еси́, Го́споди:

Устна́ма мои́ма возвести́х вся судьбы́ уст Твои́х. Благослове́н еси́, Го́споди:

На пути́ свиде́ний Твои́х наслади́хся, я́ко о вся́ком бога́тстве. Благослове́н еси́, Го́споди:

В за́поведех Твои́х поглумлю́ся, и уразуме́ю пути́ Твоя́. Благослове́н еси́, Го́споди:

Во оправда́ниих Твои́х поучу́ся, не забу́ду слове́с Твои́х. Благослове́н еси́, Го́споди:

Возда́ждь рабу́ Твоему́, живи́ мя, и сохраню́ словеса́ Твоя́. Благослове́н еси́, Го́споди:

Откры́й о́чи мои́, и уразуме́ю чудеса́ от зако́на Твоего́. Благослове́н еси́, Го́споди:

Пришле́ц аз е́смь на земли́, не скрый от Мене́ за́поведи Твоя́. Благослове́н еси́, Го́споди:

Возлюби́ душа́ моя́ возжела́ти судьбы́ Твоя́ на вся́кое вре́мя. Благослове́н еси́, Го́споди:

Запрети́л еси́ го́рдым, про́кляти уклоня́ющиися от за́поведей Твои́х. Благослове́н еси́, Го́споди:

Отими́ от Мене́ поно́с и уничиже́ние, я́ко свиде́ний Твои́х взыска́х. Благослове́н еси́, Го́споди:

И́бо седо́ша кня́зи, и на мя клевета́ху, раб же Твой глумля́шеся во оправда́ниих Твои́х. Благослове́н еси́, Го́споди:

И́бо свиде́ния Твоя́ поуче́ние мое́ е́сть, и сове́ти мои́ оправда́ния Твоя́. Благослове́н еси́, Го́споди:

Прильпе́ земли́ душа́ моя́, живи́ мя по словеси́ Твоему́. Благослове́н еси́, Го́споди:

Пути́ моя́ возвести́х, и услы́шал мя еси́, научи́ мя оправда́нием Твои́м. Благослове́н еси́, Го́споди:

Пу́ть оправда́ний Твои́х вразуми́ ми, и поглумлю́ся в чудесе́х Твои́х. Благослове́н еси́, Го́споди:

Воздрема́ душа́ моя́ от уны́ния, утверди́ мя в словесе́х Твои́х. Благослове́н еси́, Го́споди:

Пу́ть непра́вды отста́ви от Мене́, и зако́ном Твои́м поми́луй мя. Благослове́н еси́, Го́споди:

Пу́ть и́стины изво́лих, и судьбы́ Твоя́ не забы́х. Благослове́н еси́, Го́споди:

Прилепи́хся свиде́нием Твои́м, Го́споди, не посрами́ мене́. Благослове́н еси́, Го́споди:

Пу́ть за́поведей Твои́х теко́х, егда́ расшири́л еси́ се́рдце мое́. Благослове́н еси́, Го́споди:

Законоположи́ мне, Го́споди, пу́ть оправда́ний Твои́х, и взыщу́ и вы́ну. Благослове́н еси́, Го́споди:

Вразуми́ мя, и испыта́ю зако́н Твой, и сохраню́ и всем се́рдцем мои́м. Благослове́н еси́, Го́споди:

Наста́ви мя на стезю́ за́поведей Твои́х, я́ко ту́ю восхоте́х. Благослове́н еси́, Го́споди:

Приклони́ се́рдце мое́ во свиде́ния Твоя́, а не в лихои́мство. Благослове́н еси́, Го́споди:

Отврати́ о́чи мои́, е́же не ви́дети суеты́, в пути́ Твое́м живи́ мя. Благослове́н еси́, Го́споди:

Поста́ви рабу́ Твоему́ сло́во Твое́ в страх Твой. Благослове́н еси́, Го́споди:

Отими́ поноше́ние мое́, е́же непщева́х: я́ко судьбы́ Твоя́ бла́ги. Благослове́н еси́, Го́споди:

Се возжела́х за́поведи Твоя́, в пра́вде Твое́й живи́ мя. Благослове́н еси́, Го́споди:

И да прии́дет на мя ми́лость Твоя́, Го́споди, спасе́ние Твое́ по словеси́ Твоему́. Благослове́н еси́, Го́споди:

И отвеща́ю поноша́ющым ми сло́во: я́ко упова́х на словеса́ Твоя́. Благослове́н еси́, Го́споди:

И не отими́ от уст мои́х словесе́ и́стинна до зела́, я́ко на судьбы́ Твоя́ упова́х. Благослове́н еси́, Го́споди:

И сохраню́ зако́н Твой вы́ну, в век и в век ве́ка. Благослове́н еси́, Го́споди:

И хожда́х в широте́, я́ко за́поведи Твоя́ взыска́х. Благослове́н еси́, Го́споди:

И глаго́лах о свиде́ниих Твои́х пред цари́, и не стыдя́хся. Благослове́н еси́, Го́споди:

И поуча́хся в за́поведех Твои́х, я́же возлюби́х зело́. Благослове́н еси́, Го́споди:

И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х. Благослове́н еси́, Го́споди:

Помяни́ словеса́ Твоя́ рабу́ Твоему́, и́хже упова́ние дал ми еси́. Благослове́н еси́, Го́споди:

То мя уте́ши во смире́нии мое́м, я́ко сло́во Твое́ живи́ мя. Благослове́н еси́, Го́споди:

Го́рдии законопреступова́ху до зела́: от зако́на же Твоего́ не уклони́хся. Благослове́н еси́, Го́споди:

Помяну́х судьбы́ Твоя́ от ве́ка, Го́споди, и уте́шихся. Благослове́н еси́, Го́споди:

Печа́ль прия́т мя от гре́шник, оставля́ющих зако́н Твой. Благослове́н еси́, Го́споди:

Пе́та бя́ху мне оправда́ния Твоя́, на ме́сте прише́льствия моего́. Благослове́н еси́, Го́споди:

Помяну́х в нощи́ и́мя Твое́, Го́споди, и сохрани́х зако́н Твой. Благослове́н еси́, Го́споди:

Сей бы́сть мне, я́ко оправда́ний Твои́х взыска́х. Благослове́н еси́, Го́споди:

Ча́сть моя́ еси́ Го́споди, рех сохрани́ти зако́н Твой. Благослове́н еси́, Го́споди:

Помоли́хся лицу́ Твоему́ всем се́рдцем мои́м, поми́луй мя по словеси́ Твоему́. Благослове́н еси́, Го́споди:

Помы́слих пути́ Твоя́, и возврати́х но́зе мои́ во свиде́ния Твоя́. Благослове́н еси́, Го́споди:

Угото́вихся и не смути́хся сохрани́ти за́поведи Твоя́. Благослове́н еси́, Го́споди:

У́жя гре́шник обяза́шася мне, и зако́на Твоего́ не забы́х. Благослове́н еси́, Го́споди:

Полу́нощи воста́х, испове́датися Тебе́ о судьба́х пра́вды Твоея́. Благослове́н еси́, Го́споди:

Прича́стник аз е́смь всем боя́щымся Тебе́, и храня́щым за́поведи Твоя́. Благослове́н еси́, Го́споди:

Ми́лости Твоея́ Го́споди испо́лнь земля́, оправда́нием Твои́м научи́ мя. Благослове́н еси́, Го́споди:

Бла́гость сотвори́л еси́ с рабо́м Твои́м, Го́споди, по словеси́ Твоему́. Благослове́н еси́, Го́споди:

Бла́гости и наказа́нию, и ра́зуму научи́ мя, я́ко за́поведем Твои́м ве́ровах. Благослове́н еси́, Го́споди:

Пре́жде да́же не смири́ти ми ся, аз прегреши́х, сего́ ра́ди сло́во Твое́ сохрани́х. Благослове́н еси́, Го́споди:

Благ еси́ Ты, Го́споди, и бла́гостию Твое́ю научи́ мя оправда́нием Твои́м. Благослове́н еси́, Го́споди:

Умно́жися на мя непра́вда го́рдых, аз же всем се́рдцем мои́м испыта́ю за́поведи Твоя́. Благослове́н еси́, Го́споди:

Усыри́ся я́ко млеко́ се́рдце их, аз же зако́ну Твоему́ поучи́хся. Благослове́н еси́, Го́споди:

Бла́го мне, я́ко смири́л мя еси́, я́ко да научу́ся оправда́нием Твои́м. Благослове́н еси́, Го́споди:

Благ мне зако́н уст Твои́х, па́че ты́сящ зла́та и сребра́. Благослове́н еси́, Го́споди:

Ру́це Твои́ сотвори́сте мя, и созда́сте мя; вразуми́ мя, и научу́ся за́поведем Твои́м. Благослове́н еси́, Го́споди:

Боя́щиися Тебе́ у́зрят мя, и возвеселя́тся, я́ко на словеса́ Твоя́ упова́х. Благослове́н еси́, Го́споди:

Разуме́х Го́споди, я́ко пра́вда судьбы́ Твоя́, и вои́стинну смири́л мя еси́. Благослове́н еси́, Го́споди:

Бу́ди же ми́лость Твоя́, да уте́шит мя по словеси́ Твоему́ рабу́ Твоему́. Благослове́н еси́, Го́споди:

Да прии́дут мне щедро́ты Твоя́, и жив бу́ду, я́ко зако́н Твой поуче́ние мое́ е́сть. Благослове́н еси́, Го́споди:

Да постыдя́тся го́рдии, я́ко непра́ведно беззако́нноваша на мя, аз же поглумлю́ся в за́поведех Твои́х. Благослове́н еси́, Го́споди:

Да обратя́т мя боя́щиися Тебе́, и ве́дящии свиде́ния Твоя́. Благослове́н еси́, Го́споди:

Бу́ди се́рдце мое́ непоро́чно во оправда́ниих Твои́х, я́ко да не постыжу́ся. Благослове́н еси́, Го́споди:

Исчеза́ет во спасе́ние Твое́ душа́ моя́, на словеса́ Твоя́ упова́х. Благослове́н еси́, Го́споди:

Исчезо́ша о́чи мои́ в сло́во Твое́, глаго́люще: когда́ уте́шиши мя; Благослове́н еси́, Го́споди:

Зане́ бых я́ко мех на сла́не, оправда́ний Твои́х не забы́х. Благослове́н еси́, Го́споди:

Коли́ко е́сть дней раба́ Твоего́, когда́ сотвори́ши ми от гоня́щих мя суд; Благослове́н еси́, Го́споди:

Пове́даша мне законопресту́пницы глумле́ния, но не я́ко зако́н Твой, Го́споди. Благослове́н еси́, Го́споди:

Вся за́поведи Твоя́ и́стина, непра́ведно погна́ша мя, помози́ ми. Благослове́н еси́, Го́споди:

Вма́ле не сконча́ша мене́ на земли́: аз же не оста́вих за́поведей Твои́х. Благослове́н еси́, Го́споди:

По ми́лости Твое́й живи́ мя, и сохраню́ свиде́ния уст Твои́х. Благослове́н еси́, Го́споди:

Во век, Го́споди, сло́во Твое́ пребыва́ет на небеси́. Благослове́н еси́, Го́споди:

В род и род и́стина Твоя́, основа́л еси́ зе́млю, и пребыва́ет. Благослове́н еси́, Го́споди:

Учине́нием Твои́м пребыва́ет де́нь, я́ко вся́ческая рабо́тна Тебе́. Благослове́н еси́, Го́споди:

Я́ко а́ще бы не зако́н Твой поуче́ние мое́ был, тогда́ у́бо поги́бл бых во смире́нии мое́м. Благослове́н еси́, Го́споди:

Во век не забу́ду оправда́ний Твои́х, я́ко в них оживи́л мя еси́. Благослове́н еси́, Го́споди:

Диа́кон: Па́ки и па́ки ми́ром Го́споду помо́лимся. Го́споди, поми́луй. Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному. Го́споди, поми́луй, три́жды.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоева́ются.

Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́) у Христа́ Безсме́ртнаго Царя́ и Бо́га на́шего про́сим. Пода́й, Го́споди. Диа́кон: Го́споду помо́лимся. Го́споди, поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый; Сам Го́споди, упоко́й ду́шу усо́пшаго раба́ Твоего́ (или́ рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им (или́ е́ю), сло́вом, или́ де́лом, или́ помышле́нием, я́ко Благи́й Человеколю́бец Бог про́сти . Я́ко не́сть челове́к, и́же жив бу́дет, и не согреши́т; Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ воскресе́ние, и живо́т, и поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

И начина́ем втору́ю статию́ си́це: Оправда́ний Твои́х взыска́х: Твой е́смь аз, спаси́ мя.

Твой е́смь аз, спаси́ мя, я́ко оправда́ний Твои́х взыска́х. Твой е́смь аз, спаси́ мя.

Мене́ жда́ша гре́шницы погуби́ти мя, свиде́ния Твоя́ разуме́х. Твой е́смь аз, спаси́ мя.

Вся́кия кончи́ны ви́дех коне́ц, широка́ за́поведь Твоя́ зело́. Твой е́смь аз, спаси́ мя.

Ко́ль возлюби́х зако́н Твой, Го́споди, ве́сь де́нь поуче́ние мое́ е́сть. Твой е́смь аз, спаси́ мя.

Па́че враг мои́х умудри́л мя еси́ за́поведию Твое́ю, я́ко в век моя́ е́сть. Твой е́смь аз, спаси́ мя.

Па́че всех уча́щих мя разуме́х, я́ко свиде́ния Твоя́ поуче́ние мое́ е́сть. Твой е́смь аз, спаси́ мя.

Па́че ста́рец разуме́х, я́ко за́поведи Твоя́ взыска́х. Твой е́смь аз, спаси́ мя.

От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́. Твой е́смь аз, спаси́ мя.

От суде́б Твои́х не уклони́хся, я́ко Ты законоположи́л ми еси́. Твой е́смь аз, спаси́ мя.

Ко́ль сладка́ горта́ни моему́ словеса́ Твоя́, па́че ме́да усто́м мои́м. Твой е́смь аз, спаси́ мя.

От за́поведей Твои́х разуме́х, сего́ ра́ди возненави́дех всяк пу́ть непра́вды. Твой е́смь аз, спаси́ мя.

Свети́льник нога́ма мои́ма зако́н Твой, и свет стезя́м мои́м. Твой е́смь аз, спаси́ мя.

Кля́хся, и поста́вих сохрани́ти судьбы́ пра́вды Твоея́. Твой е́смь аз, спаси́ мя.

Смири́хся до зела́, Го́споди, живи́ мя по словеси́ Твоему́. Твой е́смь аз, спаси́ мя.

Во́льная уст мои́х благоволи́ же, Го́споди, и судьба́м Твои́м научи́ мя. Твой е́смь аз, спаси́ мя.

Душа́ моя́ в руку́ Твое́ю вы́ну, и зако́на Твоего́ не забы́х. Твой е́смь аз, спаси́ мя.

Положи́ша гре́шницы се́ть мне, и от за́поведей Твои́х не заблуди́х. Твой е́смь аз, спаси́ мя.

Насле́довах свиде́ния Твоя́ во век, я́ко ра́дование се́рдца моего́ су́ть. Твой е́смь аз, спаси́ мя.

Приклони́х се́рдце мое́ сотвори́ти оправда́ния Твоя́ в век за воздая́ние. Твой е́смь аз, спаси́ мя.

Законопресту́пныя возненави́дех, зако́н же Твой возлюби́х. Твой е́смь аз, спаси́ мя.

Помо́щник мой и Засту́пник мой еси́ Ты, на словеса́ Твоя́ упова́х. Твой е́смь аз, спаси́ мя.

Уклони́теся от Мене́ лука́внующии, и испыта́ю за́поведи Бо́га моего́. Твой е́смь аз, спаси́ мя.

Заступи́ мя по словеси́ Твоему́, и жив бу́ду, и не посрами́ мене́ от ча́яния моего́. Твой е́смь аз, спаси́ мя.

Помози́ ми, и спасу́ся, и поучу́ся во оправда́ниих Твои́х вы́ну. Твой е́смь аз, спаси́ мя.

Уничижи́л еси́ вся отступа́ющыя от оправда́ний Твои́х, я́ко непра́ведно помышле́ние их. Твой е́смь аз, спаси́ мя.

Преступа́ющыя непщева́х вся гре́шныя земли́, сего́ ра́ди возлюби́х свиде́ния Твоя́. Твой е́смь аз, спаси́ мя.

Пригвозди́ стра́ху Твоему́ пло́ти моя́, от суде́б бо Твои́х убоя́хся. Твой е́смь аз, спаси́ мя.

Сотвори́х суд и пра́вду, не преда́ждь мене́ оби́дящым мя. Твой е́смь аз, спаси́ мя.

Восприими́ раба́ Твоего́ во бла́го, да не оклевета́ют мене́ го́рдии. Твой е́смь аз, спаси́ мя.

О́чи мои́ исчезо́сте во спасе́ние Твое́, и в сло́во пра́вды Твоея́. Твой е́смь аз, спаси́ мя.

Сотвори́ с рабо́м Твои́м по ми́лости Твое́й, и оправда́нием Твои́м научи́ мя. Твой е́смь аз, спаси́ мя.

Раб Твой е́смь аз, вразуми́ мя, и уве́м свиде́ния Твоя́. Твой е́смь аз, спаси́ мя.

Вре́мя сотвори́ти Го́сподеви, разори́ша зако́н Твой. Твой е́смь аз, спаси́ мя.

Сего́ ра́ди возлюби́х за́поведи Твоя́ па́че зла́та и топа́зия. Твой е́смь аз, спаси́ мя.

Сего́ ра́ди ко всем за́поведем Твои́м направля́хся, всяк пу́ть непра́вды возненави́дех. Твой е́смь аз, спаси́ мя.

Ди́вна свиде́ния Твоя́, сего́ ра́ди испыта́ я душа́ моя́. Твой е́смь аз, спаси́ мя.

Явле́ние слове́с Твои́х просвеща́ет, и вразумля́ет младе́нцы. Твой е́смь аз, спаси́ мя.

Уста́ моя́ отверзо́х, и привлеко́х дух, я́ко за́поведей Твои́х жела́х. Твой е́смь аз, спаси́ мя.

При́зри на мя и поми́луй мя, по суду́ лю́бящих и́мя Твое́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́). Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Изба́ви мя от клеветы́ челове́ческия, и сохраню́ за́поведи Твоя́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Лице́ Твое́ просвети́ на раба́ Твоего́, и научи́ мя оправда́нием Твои́м. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Исхо́дища водна́я изведо́сте о́чи мои́, поне́же не сохрани́х зако́на Твоего́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Пра́веден еси́, Го́споди, и пра́ви суди́ Твои́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Запове́дал еси́ пра́вду свиде́ния Твоя́, и и́стину зело́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Иста́яла мя е́сть ре́вность Твоя́, я́ко забы́ша словеса́ Твоя́ врази́ мои́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Разжже́но сло́во Твое́ зело́, и раб Твой возлюби́ е. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Юне́йший аз е́смь и уничиже́н, оправда́ний Твои́х не забы́х. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Пра́вда Твоя́ пра́вда во век, и зако́н Твой и́стина. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Ско́рби и ну́жды обрето́ша мя, за́поведи Твоя́ поуче́ние мое́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Пра́вда свиде́ния Твоя́ в век, вразуми́ мя, и жив бу́ду. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Воззва́х всем се́рдцем мои́м, услы́ши мя, Го́споди, оправда́ния Твоя́ взыщу́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Воззва́х Ти, спаси́ мя, и сохраню́ свиде́ния Твоя́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Предвари́х в безго́дии и воззва́х, на словеса́ Твоя́ упова́х. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Предвари́сте о́чи мои́ ко у́тру, поучи́тися словесе́м Твои́м. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Глас мой услы́ши, Го́споди, по ми́лости Твое́й, по судьбе́ Твое́й живи́ мя. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Прибли́жишася гоня́щии мя беззако́нием, от зако́на же Твоего́ удали́шася. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Близ еси́ Ты, Го́споди, и вси путие́ Твои́ и́стина. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Испе́рва позна́х от свиде́ний Твои́х, я́ко в век основа́л я̀ еси́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Ви́ждь смире́ние мое́, и изми́ мя, я́ко зако́на Твоего́ не забы́х. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Суди́ суд мой, и изба́ви мя, словесе́ ра́ди Твоего́ живи́ мя. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Дале́че от гре́шник спасе́ние, я́ко оправда́ний Твои́х не взыска́ша. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Щедро́ты Твоя́ мно́ги, Го́споди, по судьбе́ Твое́й живи́ мя. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Мно́зи изгоня́щии мя, и стужа́ющии ми, от свиде́ний Твои́х не уклони́хся. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Ви́дех неразумева́ющыя, и иста́ях, я́ко слове́с Твои́х не сохрани́ша. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Ви́ждь, я́ко за́поведи Твоя́ возлюби́х, Го́споди, по ми́лости Твое́й живи́ мя. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Нача́ло слове́с Твои́х и́стина, и во век вся судьбы́ пра́вды Твоея́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Кня́зи погна́ша мя ту́не, и от слове́с Твои́х убоя́ся се́рдце мое́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Возра́дуюся аз о словесе́х Твои́х, я́ко обрета́яй коры́сть мно́гу. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Непра́вду возненави́дех и омерзи́х, зако́н же Твой возлюби́х. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Седмери́цею днем хвали́х Тя о судьба́х пра́вды Твоея́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Мир мног лю́бящым зако́н Твой, и не́сть им собла́зна. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Ча́ях спасе́ния Твоего́, Го́споди, и за́поведи Твоя́ возлюби́х. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Сохрани́ душа́ моя́ свиде́ния Твоя́ и возлюби́ я̀ зело́. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Да прибли́жится моле́ние мое́ пред Тя, Го́споди, по словеси́ Твоему́ вразуми́ мя. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

да вни́дет проше́ние мое́ пред Тя, Го́споди, по словеси́ Твоему́ изба́ви мя. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Отры́гнут устне́ мои́ пе́ние, егда́ научи́ши мя оправда́нием Твои́м. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Провеща́ет язы́к мой словеса́ Твоя́, я́ко вся за́поведи Твоя́ пра́вда. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Да бу́дет рука́ Твоя́, е́же спасти́ мя, я́ко за́поведи Твоя́ изво́лих. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Возжела́х спасе́ние Твое́, Го́споди, и зако́н Твой поуче́ние мое́ е́сть. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Жива́ бу́дет душа́ моя́, и восхва́лит Тя, и судьбы́ Твоя́ помо́гут мне. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

Заблуди́х, я́ко овча́ поги́бшее, взыщи́ раба́ Твоего́, я́ко за́поведей Твои́х не забы́х. Во Ца́рствии Твое́м, Го́споди, помяни́ раба́ Твоего́ (или́ рабу́ Твою́).

И а́бие: Благослове́н еси́ Го́споди, научи́ мя оправда́нием Твои́м.

Святы́х лик обре́те исто́чник жи́зни, и две́рь ра́йскую, да обря́щу и аз пу́ть покая́нием; поги́бшее овча́ аз е́смь, воззови́ мя, Спа́се, и спаси́ мя. Благослове́н еси́, Го́споди:

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и, и присносу́щней преста́вльшеся, Того́ приле́жно му́ченицы моли́те, долго́в разреше́ние нам дарова́ти. Благослове́н еси́, Го́споди:

В пу́ть у́зкий хо́ждшии приско́рбный, вси в житии́ крест я́ко яре́м взе́мшии, и Мне после́довавшии ве́рою, прииди́те наслади́теся, и́хже угото́вах вам по́честей, и венцо́в небе́сных. Благослове́н еси́, Го́споди:

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний, уще́дри Твое́ созда́ние, Влады́ко, и очи́сти Твои́м благоутро́бием, и возжделенное оте́чество пода́ждь ми, рая́ па́ки жи́теля мя сотворя́я. Благослове́н еси́ Го́споди:

Дре́вле у́бо от не су́щих Созда́вый мя, и о́бразом Твои́м Боже́ственным почты́й, преступле́нием же за́поведи, па́ки мя Возврати́вый в зе́млю, от нея́же взят бых, на е́же по подо́бию возведи́, дре́внею добро́тою возобразитися. Благослове́н еси́, Го́споди:

Упоко́й, Бо́же, рабы́ Твоя́, и учини́ я в раи́, иде́же ли́цы святы́х, Го́споди, и пра́ведницы сия́ют я́ко свети́ла, усо́пшыя рабы́ Твоя́ упоко́й, презира́я их вся согреше́ния.

Сла́ва: Трисия́тельное Еди́наго Божества́ благоче́стно пое́м, вопию́ще: свят еси́, О́тче Безнача́льный, Собезнача́льный Сы́не, и Боже́ственный Ду́ше, просвети́ нас, ве́рою Тебе́ служа́щих, и ве́чнаго огня́ исхити́.

И ны́не: Ра́дуйся, Чи́стая, Бо́га пло́тию ро́ждшая во спасе́ние всех, Е́юже род челове́ческий обре́те спасе́ние; Тобо́ю да обря́щем рай, Богоро́дице Чи́стая, Благослове́нная.

Аллилу́иа, три́жды и ектениа́ та́кожде от диа́кона; и моли́тва я́коже вы́ше рече́ся от свяще́нника.

И по возгла́се, тропа́рь, глас 5:

Поко́й Спа́се наш, с пра́ведными рабы́ Твоя́, и сия́ всели́ во дворы́ Твоя́, я́коже е́сть пи́сано, презира́я я́ко Благ прегреше́ния их, во́льная и нево́льная, и вся я́же в ве́дении и не в ве́дении, Человеколю́бче.

Сла́ва, И ны́не, Богоро́дичен:

От Де́вы возсия́вый ми́ру, Христе́ Бо́же, сы́ны све́та То́ю показа́вый, поми́луй нас.

По богоро́дичне же чте́тся псало́м 50:

Поми́луй мя, Бо́же:

И та́ко начина́ем антифо́ны сия́:

Антифо́н 1, глас 1:

Внегда́ скорбе́ти ми, услы́ши моя́ боле́зни, Го́споди, Тебе́ зову́.

Пусты́нным непреста́нное боже́ственное жела́ние быва́ет, ми́ра су́щым су́етнаго кроме́.

Сла́ва: Свято́му Ду́ху че́сть и сла́ва, я́коже Отцу́ подоба́ет, ку́пно же и Сы́ну; сего́ ра́ди да пои́м Тро́ице единодержа́вие.

И ны́не, то́йже.

Та́же стихи́ры свята́го Феофа́на, глас 1.

Подо́бен: Прехва́льнии му́ченицы:

Тебе́, Спа́се, мо́лимся, Твоего́ сла́дкаго прича́стия преста́вльшагося сподо́би, и всели́ в ски́ниях пра́ведных, во оби́телех святы́х Твои́х, в небе́сных селе́ниих, благоутро́бием Твои́м презира́я его́ прегреше́ния, и подая́ ему́ упокое́ние.

Никто́же безгре́шен, никто́же от челове́к бы́сть, то́кмо Ты Еди́не Безсме́ртне; тем раба́ Твоего́, Бо́же Ще́дрый, во све́те учини́, с ликостоя́нии а́нгел Твои́х, благоутро́бием Твои́м презира́я беззако́ния, и подая́ ему́ упокое́ние.

Па́че ви́димых су́ть Твоя́, Спа́се, обеща́ния, я́же о́ко не ви́де, и у́хо не слы́ша, и на се́рдце не взы́де, Влады́ко; и́хже сладча́йшаго прича́стия получи́ти благоволи́, к Тебе́ преста́вльшемуся (или́ преста́вльшейся), и пода́ждь ему́ (или́ ей) жи́знь ве́чную.

Сла́ва, И ны́не: Христа́ умоли́, Твое́ рожде́ние, Ма́ти Де́во, прегреше́ний проще́ние да́ти рабу́ Твоему́ (или́ ра́бе Твое́й), Тя Богоро́дицу благоче́стно проповедавшему, и сло́вом и́стинным извести́вшему, и све́тлости святы́х, и весе́лия сподо́бити во Ца́рствии Свое́м.

Антифо́н 2, глас 2:

На Не́бо о́чи пуща́ю моего́ се́рдца, к Тебе́, Спа́се, спаси́ мя Твои́м осия́нием.

Поми́луй нас, согреша́ющих Тебе́ мно́го на вся́кий час, о Христе́ мой, и да́ждь о́браз пре́жде конца́ пока́ятися Тебе́.

Сла́ва: Свято́му Ду́ху, е́же ца́рствовати подоба́ет, освяща́ти, подвиза́ти тва́рь; Бог бо е́сть единосу́щен Отцу́ и Сло́ву.

И ны́не, то́йже. Стихи́ры, глас 2. Подо́бен: Егда́ от дре́ва:

Стремле́ние сме́ртное и тлю Твое́ю живоно́сною сме́ртию низложи́л еси́, Влады́ко, всем же источи́л еси́ живо́т ве́чный, и ме́ртвых воскресе́ние сме́ртным дарова́л еси́. Те́мже Тебе́ мо́лимся, Спа́се, упоко́й ве́рою к Тебе́ преста́вльшагося (или́ преста́вльшуюся), и сладча́йшия Твоея́ добро́ты сего́ (или́ сию́) сподо́би, Человеколю́бче.

Да челове́ки о́бщники Боже́ственнаго Ца́рствия соде́лаеши, Крест претерпе́л еси́, сме́рть во́льную восприи́м; сего́ ра́ди мо́лимся Твоему́ благоутро́бию: прича́стника (или́ прича́стницу) яви́ Ца́рствия Твоего́ ве́рою к Тебе́ преста́вльшагося (или́ преста́вльшуюся), и сладча́йшия Твоея́ добро́ты сего́ (или́ сию́) сподо́би, Человеколю́бче.

Тре́петом ужа́сным и стра́шным, суди́лищу Твоему́ предстоя́ще от ве́ка ме́ртвии, отве́та ожида́ют пра́веднаго Твоего́, Спа́се, и боже́ственнаго ча́ют правосу́дия; тогда́ пощади́, Влады́ко Спа́се, раба́ Твоего́ (или́ рабу́ Твою́), ве́рою к Тебе́ преста́вльшагося (или́ преста́вльшуюся), и присносу́щнаго наслажде́ния Твоего́ и блаже́нства сподо́би.

Сла́ва, И ны́не, Богоро́дичен:

Е́вы прама́тере, Чи́стая, Ты долг, заче́нши Бо́га, отдала́ еси́, нетле́ние же и воскресе́ние ве́рным да́рующа, и безсме́ртия сла́вою венча́юща Тя велича́ющыя; Его́же ны́не моля́щи не преста́й, сего́ (или́ сию́) во све́те вчини́ти Своея́ све́тлости, Богоневе́стная.

Антифо́н 3, глас 3:

Плен Сио́нь Ты изъя́л еси́ от Вавило́на, и мене́ от страсте́й к животу́ привлецы́, Сло́ве.

В юг се́ющии слеза́ми боже́ственными, жнут кла́сы ра́достию присноживо́тия.

Сла́ва: Свято́му Ду́ху вся́кое благода́рие, я́коже Отцу́ и Сы́ну сооблиста́ет, в Не́мже вся живу́т, и дви́жутся.

И ны́не, то́йже. Стихи́ры, глас 3. Подо́бен: О́бразу Креста́:

Сла́влю Крест Твой Честны́й, и́мже живо́т дарова́ся, и пи́щи восприя́тие, ве́рою и любо́вию Тя пою́щым, Еди́не Многоми́лостиве. Те́мже вопие́м Ти, Христе́ Бо́же: преста́вльшагося (или́ преста́вльшуюся) от нас упоко́й, иде́же всех е́сть веселя́щихся жили́ще в Тебе́, е́же сла́вити Твое́ Божество́.

Еди́не Ми́лостиве и Благоутро́бне, име́я непостижи́мую бла́гости пучи́ну, и ве́дый естество́ челове́ческое, е́же соде́лал еси́, Тебе́ мо́лим, Христе́ Бо́же: преста́вльшагося (или́ преста́вльшуюся) от нас упоко́й, иде́же всех е́сть веселя́щихся жили́ще в Тебе́, е́же сла́вити Твое́ Божество́.

Усну́вый во гро́бе я́ко челове́к, си́лою непобеди́мою Твое́ю, я́ко Бог воскреси́л еси́ во гробе́х спя́щыя, немо́лчно пе́снь Ти принося́щыя. Тем вопие́м Ти, Христе́ Бо́же: преста́вльшагося (или́ преста́вльшуюся) от нас упоко́й, иде́же всех е́сть веселя́щихся жили́ще в Тебе́, е́же сла́вити Твое́ Божество́.

Сла́ва, И ны́не: Свещу́ у́мную Тя, нося́щую свет Божества́, совокупльшийся дебельству́ челове́ческаго существа́, Богоро́дице, вси све́мы; тем Твоего́ моли́ Сы́на и Бо́га, преста́вльшагося (или́ преста́вльшуюся) в сла́дости упоко́ити, иде́же всех е́сть веселя́щихся жили́ще, Чи́стая, е́же сла́вити Тя, Всенепоро́чную.

Антифо́н 4, глас 4:

От ю́ности моея́ мно́зи бо́рют мя стра́сти; но Сам мя заступи́, и спаси́, Спа́се мой.

Ненави́дящии Сио́на посрами́теся от Го́спода; я́ко трава́ бо огне́м бу́дете изсо́хше.

Сла́ва: Святы́м Ду́хом вся́ка душа́ живи́тся, и чистото́ю возвыша́ется, светле́ется Тро́ическим Еди́нством, священнота́йне.

И ны́не, то́йже. Стихи́ры, глас 4. Подо́бен: Дал еси́ зна́мение:

Вои́стинну стра́шно е́сть сме́ртное та́инство, ка́ко душа́ от те́ла ну́ждею разлуча́ется, от счинения и сочета́ния естественнейший соу́з Бо́жиим хоте́нием отсека́ется. Те́мже Тя мо́лим: преста́вльшагося (или́ преста́вльшуюся) упоко́й в селе́ниих пра́ведных Твои́х, Жизнода́вче Человеколю́бче.

Сон явля́ется ве́рующым сме́рть, Тебе́ положе́ну во Гро́бе, все́ми Влады́чествующему, и сме́ртную держа́ву Разруши́вшему, и Упраздни́вшему ея́ наси́лие многоле́тное. Те́мже Тя мо́лим: преста́вльшагося (или́ преста́вльшуюся) вчини́ в селе́ниих святы́х Твои́х, в пра́ведных све́тлостех.

Ты пра́вда же и освяще́ние нам был еси́, и душа́м избавле́ние; Отцу́ бо приве́л еси́ опра́вданы и изба́влены, восприи́м на́ше до́лжное запреще́ние. И ны́не мо́лим Тя, преста́вльшагося (или́ преста́вльшуюся) упоко́й в ра́дости и све́тлости святы́х, Благоде́телю Спа́се наш.

Сла́ва, И ны́не, Богоро́дичен: Словесе́м после́дующе богоглаго́ливых, Всенепоро́чная, Богоро́дицу Тя му́дрствуем: Бо́га бо родила́ еси́ воплоти́вшагося недомы́сленно, изба́вльшаго нас плене́нных прегреше́ньми. Те́мже ны́не мо́лим Тя: преста́вльшагося раба́ Твоего́ (или́ рабу́ Твою́) свои́ми сия́ньми просвети́, Пречи́стая.

Антифо́н 5, глас 5:

Внегда́ скорбе́ти мне, Дави́дски пою́ Тебе́, Спа́се мой: изба́ви ду́шу мою́ от язы́ка льсти́ваго.

Пусты́нным живо́т блаже́н е́сть, боже́ственным раче́нием воскриля́ющымся.

Сла́ва: Святы́м Ду́хом одержа́тся вся ви́димая же с неви́димыми; Самодержа́вен бо сый, Тро́ицы Еди́н е́сть нело́жно.

И ны́не, то́йже. Стихи́ры, глас 5. Подо́бен: Ра́дуйся, по́стником:

Заре́ю Лица́ Твоего́, Христе́, преста́вльшагося (или́ преста́вльшуюся) я́ко Щедр озари́, вселя́я его́ (или́ ю̀) в ме́сто зла́чно, на вода́х Твоего́ чи́стаго и боже́ственнаго поко́я, в жела́нных не́дрех Авраа́ма пра́отца, иде́же свет Твой чи́стый явля́ется, и пролива́ются исто́чницы благосты́ни, иде́же лику́ют я́сно веселя́щеся пра́ведных ли́цы о Твое́й благосты́ни; с ни́миже учини́ раба́ Твоего́ (или́ рабу́ Твою́), подая́й ве́лию ми́лость.

Пе́ти всесли́чным гла́сом, славословящаго (или́ славосло́вящую) Твою́ держа́ву благослови́, Ще́дре, преста́вльшагося (или́ преста́вльшуюся) от привре́менных к Тебе́ Влады́це всех и Человеколю́бцу, дая́ ему́ (или́ ей) красото́ю Твоея́ добро́ты освящатися, и сла́дкаго и кра́снаго прича́стия Твоего́ восприя́ти же и наслажда́тися, чистши, иде́же о́крест Престо́ла Твоего́ лику́ют а́нгели, и святы́х собо́ри ра́достно обстоя́т; с ни́миже рабу́ Твоему́ (или́ ра́бе Твое́й) упокое́ние пода́ждь, и ве́лию ми́лость.

Иде́же проро́ков лик, апо́столов и му́чеников чи́нове, и всех от ве́ка оправдавшихся Твое́ю спаси́тельною Стра́стию и Кро́вию, е́юже искупи́л еси́ плене́ннаго челове́ка, та́мо ве́рою усо́пшаго (или́ усо́пшую) упоко́й, я́ко Человеколю́бец, проща́яй и прегреше́ния, Еди́н бо Безгре́шен на земли́ пожи́л еси́, Свят вои́стинну, и Еди́н в ме́ртвых Свобо́дь. Те́мже Твоему́ рабу́ (или́ Твое́й ра́бе) упокое́ние пода́ждь, и ве́лию ми́лость.

Сла́ва, И ны́не, Богоро́дичен:

Зако́ном грехо́вным нас порабоще́нных свободи́ла еси́, Влады́чице, во утро́бе Законоположи́теля и Царя́ Христа́ заче́ншая, Еди́на Ма́ти Де́во, И́мже оправда́емся, да́ром же и благода́тию; Его́же ны́не моли́, ду́шы пою́щих Тя Богома́терь, учини́ти в кни́зе живо́тней, я́ко да хода́тайством Твои́м спа́сшеся, Всенепоро́чная, Сы́на Твоего́ жела́емое получи́м избавле́ние, Тому́ покланя́ющеся, подаю́щему ми́рови ве́лию ми́лость.

Антифо́н 6, глас 6:

На Не́бо о́чи мои́ возвожу́ к Тебе́, Сло́ве: уще́дри мя, да жи́ву Тебе́.

Поми́луй нас уничиже́нных, устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху, вся́кая всеспаси́тельная вина́, а́ще ко́ему Сей по достоя́нию дхнет, ско́ро взе́млет от земны́х, восперя́ет, возраща́ет, устроя́ет горе́.

И ны́не, то́йже. Стихи́ры, глас 6. Подо́бен: Всю отло́жше:

Име́яй непостижи́мое е́же к нам благоутро́бие, и исто́чник неистощи́мый боже́ственныя благосты́ни, Многоми́лостиве, к Тебе́, Влады́ко, прише́дшаго (или́ прише́дшую) в земли́ живы́х всели́, селе́ний возлю́бленных и жела́емых одержа́ние да́руя, всегда́ пребыва́ющее, Ты бо за всех излия́л еси́ Кро́вь Твою́, Христе́, и живоно́сною цено́ю мир свободи́л еси́.

Умерщвле́ние претерпе́л еси́ животворя́щее во́лею, и живо́т источи́л еси́, и наслажде́ние присносу́щное ве́рным дал еси́, в не́мже учини́ усо́пшаго (или́ усо́пшую) о наде́жди воскресе́ния, сего́ (или́ сея́) прегреше́ния вся проща́я бла́гостию, я́ко Еди́н Безгре́шен, Еди́н Благ и Человеколю́бец, да все́ми пое́тся и́мя Твое́, Христе́, и спасе́ннии сла́вим человеколю́бие Твое́.

Живы́ми облада́ющаго, богонача́льною вла́стию, и ме́ртвыми влады́чествующаго, Тебе́, Христе́, зна́юще мо́лим: ве́рнаго раба́ Твоего́ (или́ ве́рную рабу́ Твою́), к Тебе́ Еди́ному Благода́телю отше́дшаго, того́ (или́ отше́дшую, ту) упоко́й со избра́нными Твои́ми, Человеколю́бче, в ме́сте прохлажде́ния, во святы́х све́тлостех, Воли́тель бо ми́лости еси́ и спаса́еши я́ко Бог, и́хже по о́бразу Твоему́ созда́л еси́, Еди́не Многоми́лостиве.

Сла́ва, И ны́не, Богоро́дичен: Яви́лася еси́ пребыва́ние боголе́пное, Пресвята́я, Бо́га бо вмести́ла еси́, и Бо́га родила́ еси́, Неискусобра́чная, во двою́ существу́, во еди́ной же Ипоста́си; Того́ моли́ Единоро́днаго и Пе́рвенца, Тя Де́ву Непоро́чную и по рождестве́ сохра́ньшаго, ду́шу упоко́ити ве́рою усо́пшаго (или́ усо́пшия) во све́те, в нетле́нной све́тлости и блаже́нстве.

Антифо́н 7, глас 7:

Плен Сио́нь от ле́сти обрати́в, и мене́, Спа́се, оживи́, изима́я рабо́тныя стра́сти.

В юг се́яй ско́рби по́стныя со слеза́ми, сей ра́достныя по́жнет рукоя́ти присноживопита́ния.

Сла́ва: Святы́м Ду́хом, исто́чник боже́ственных сокро́вищ, от Него́же прему́дрость, ра́зум, страх, Тому́ хвала́, и сла́ва, че́сть и держа́ва.

И ны́не, то́йже.

Стихи́ры, глас 7. Подо́бен: О всех небре́гше:

Умерщвле́н ви́ден был еси́ на Кресте́, Еди́не Безсме́ртне, и во гро́бе я́ко сме́ртен положи́лся еси́, умерщвле́ния и тли и сме́рти челове́ки избавля́я, но я́ко пучи́на благоутро́бия сый неистощи́мая, и исто́чник бла́гости, ду́шу раба́ Твоего́ преста́вльшагося (или́ рабы́ Твоея́ преста́вльшияся) от нас упоко́й.

Нетле́нною Твое́ю добро́тою и сла́достию, Твоея́ красоты́ луча́ми просвеща́тися к Тебе́ преста́вльшагося (или́ преста́вльшуюся), Бла́же, сподо́би, в невеще́ственнем светоли́тии светоявле́ния Твоего́, со а́нгелы ликовствующ (или́ ликовству́ющу) о Тебе́ Влады́це, и Царе́ Сла́вы, и Го́споде.

Я́ко неиждива́емое име́яй даро́в великоле́пие, я́ко сокро́вище неоску́дное бога́тыя благосты́ни, к Тебе́ преста́вльшагося (или́ преста́вльшуюся) я́ко Бог всели́ во стране́ избра́нных Твои́х, на ме́сте осла́бы, в дому́ сла́вы Твоея́, в наслажде́нии ра́йстем, в де́вственнем черто́зе, я́ко Благоутро́бен.

Сла́ва, И ны́не, Богоро́дичен: Зако́на исполне́ние ражда́еши, Изба́вителя, пло́ть бы́вшаго, не бо бы́сть су́щым пре́жде в зако́не оправда́ние, но нас Христо́с ны́не распе́нся оправда́. Я́ко у́бо иму́щая дерзнове́ние, я́ко Ма́ти, моли́ Сы́на твоего́ Благоутро́бнаго, ду́шу упоко́ити благоче́стно преста́вльшагося (или́ преста́вльшуюся), Всепе́тая.

Антифо́н 8, глас 8:

От ю́ности моея́ враг мя искуша́ет, сластьми́ пали́т мя, аз же наде́яся на Тя, Го́споди, побежда́ю сего́.

Ненави́дящии Сио́на да бу́дут у́бо пре́жде исторже́ния я́ко трава́, ссече́т бо Христо́с вы́я их усече́нием мук.

Сла́ва: Святы́м Ду́хом, е́же жи́ти вся́ческим, Свет от Све́та, Бог вели́к, со Отце́м пое́м Ему́ и Сло́вом.

И ны́не, то́йже. Стихи́ры, глас 8. Подо́бен: О пресла́внаго чудесе́!

Ца́рски мне подписа́л еси́ свобожде́ние, ша́ры червленными пе́рсты Твоя́ окровави́в, Влады́ко, и обагри́в Твое́ю Кро́вию, и ны́не Тя ве́рою мо́лим, с перворо́дными Твои́ми причти́, и пра́ведных Твои́х ра́дости сподо́би улучи́ти преше́дшаго (или́ преше́дшую) к Тебе́ Благоутро́бному.

Священноначальствовав я́ко челове́к, закла́в Себе́, приноше́ние прине́сл еси́ Отцу́, челове́ка от тли изима́я; преста́вльшагося (или́ преста́вльшуюся) у́бо я́ко Человеколю́бец, во стране́ живу́щих учини́, иде́же пото́цы наслажде́ния пролива́ются, иде́же исто́чницы присносущнии истека́ют.

Глубино́ю неизрече́нныя Твоея́ му́дрости, определяеши живо́т, и прови́диши сме́рть, и к житию́ ино́му преселя́еши челове́ка; тем его́же (или́ ю́же) прия́л еси́ ны́не, учини́ на вода́х упокое́ния, в све́тлости святы́х Твои́х све́тов, иде́же глас ра́дования и хвале́ния.

Сла́ва, И ны́не, Богоро́дичен: Я́ко заче́ншая Безнача́льнаго Сло́ва Бо́жия и Бо́га, Ма́терним Твои́м дерзнове́нием приле́жно моли́, учини́ти раба́ Твоего́ (или́ рабу́ Твою́), иде́же ликова́ние неразрушимое веселя́щихся, и хва́лящих Тя, иде́же све́тлости вечнующыя, и сла́дкий глас пра́зднующих, Богороди́тельнице.

Диа́кон: Па́ки и па́ки: и про́чее я́ко обы́чно. И по возгла́се конда́к, глас 8: Со святы́ми упоко́й, Христе́, ду́шу раба́ Твоего́ (или́ рабы́ Твоея́), иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос: Сам Еди́н еси́ Безсме́ртный, Сотвори́вый и Созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, Созда́вый мя, и Реки́й ми: я́ко земля́ еси́, и в зе́млю оти́деши, а́може вси челове́цы по́йдем, надгро́бное рыда́ние творя́ще пе́снь: аллилу́иа. И па́ки: Со святы́ми упоко́й:

И а́бие блаже́нна, глас 2:

Во Ца́рствии Твое́м, егда́ прии́деши, помяни́ нас, Го́споди.

Блаже́ни ни́щии ду́хом, я́ко тех е́сть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тции, я́ко ти́и насле́дят зе́млю.

Блаже́ни а́лчущии и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Помяни́, Благоутро́бне, и нас, я́коже помяну́л еси́ разбо́йника, во Ца́рствии Небе́снем.

Блаже́ни чи́стии се́рдцем, я́ко ти́и Бо́га у́зрят.

Вси боя́щиися Бо́га та́мо возвеселя́тся о Нем во Ца́рствии Небе́снем.

Блаже́ни миротво́рцы, я́ко ти́и сы́нове Бо́жии нареку́тся.

По́стничеством работавшаго (или́ рабо́тавшую) Тебе́, Христе́, и правосла́вием на земли́, просла́ви, Спа́се, на Небесе́х.

Блаже́ни изгна́ни пра́вды ра́ди, я́ко тех е́сть Ца́рство Небе́сное.

Ве́рою и наде́ждою боголе́пно, и любо́вию пожи́вшаго (или́ пожи́вшую) на земли́, просла́ви, Спа́се, на Небесе́х.

Блаже́ни есте́, егда́ поно́сят вам, и изжену́т, и реку́т всяк зол глаго́л, на вы лжу́ще Мене́ ра́ди.

Упоко́й раба́ Твоего́ (или́ рабу́ Твою́), Бо́же, со святы́ми я́ко Благ, во Ца́рствии Небе́снем.

Ра́дуйтеся и весели́теся, я́ко мзда ва́ша мно́га на Небесе́х.

Мир оста́вльшаго (или́ оставльшую) и в честне́м жи́тельстве пожи́вшаго (или́ пожи́вшую) благоче́стно, просла́ви, Спа́се, на Небесе́х.

Сла́ва: Еди́но Богонача́лие, благочести́вии иму́ще ве́ры, в Трех Ли́цех сла́вим благогове́йно.

И ны́не, Богоро́дичен: Вси ублажа́ем Тя, Чи́стая, безсе́менно бо родила́ еси́ пло́тию Бо́га, и Царя́ Небе́снаго.

По сих возглаша́ет диа́кон: Во́нмем.

Свяще́нник: Мир всем.

Чтец: И ду́хови твоему́.

Диа́кон: Прему́дрость, во́нмем. Чтец: Проки́мен, глас 6: Блаже́н пу́ть, во́ньже и́деши, бра́те, дне́сь, я́ко угото́вася тебе́ ме́сто поко́я. Стих: Обрати́ся, душе́ моя́, в поко́й твой, я́ко Госпо́дь благоде́йствова тя. Диа́кон: Прему́дрость.

Чтец: К Солу́няном Посла́ния свята́го апо́стола Па́вла чте́ние.

Диа́кон: Во́нмем. Чтец чтет Апо́стол. Зача́ло 270:

Бра́тие, не хощу́ вас не ве́дети о уме́рших, да не скорби́те, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршыя о Иису́се приведе́т с Ним. Сие́ бо вам глаго́лем сло́вом Госпо́дним, я́ко мы живу́щии оста́вшии в прише́ствие Госпо́дне, не и́мамы предвари́ти уме́рших. Я́ко Сам Госпо́дь в повеле́нии, во гла́се Арха́нгелове, и в трубе́ Бо́жии сни́дет с Небесе́, и ме́ртвии о Христе́ воскре́снут пе́рвее, пото́м же мы живу́щии оста́вшии ку́пно с ни́ми восхище́ни бу́дем на о́блацех, в сре́тение Госпо́дне на возду́се, и та́ко всегда́ с Го́сподем бу́дем.

Свяще́нник: Мир ти. Чтец: И ду́хови твоему́.

Чтец, псалом Давидов. Аллилу́иа, глас 6:

Блаже́н, его́же избра́л и прия́л еси́, Го́споди.

Диа́кон: Прему́дрость, про́сти , услы́шим Свята́го Ева́нгелиа.

От Иоа́нна Свята́го Ева́нгелиа чте́ние. Диа́кон: Во́нмем. Зача́ло 16:

Рече́ Госпо́дь ко прише́дшим к Нему́ иуде́ом: ами́нь ами́нь глаго́лю вам, я́ко слу́шаяй словесе́ Моего́ и ве́руяй Посла́вшему Мя, и́мать живо́т ве́чный, и на суд не прии́дет, но прии́дет от сме́рти в живо́т. Ами́нь ами́нь глаго́лю вам, я́ко гряде́т час, и ны́не е́сть, егда́ ме́ртвии услы́шат глас Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́. И о́бласть даст Ему́ и Суд твори́ти; я́ко Сын Челове́чь е́сть, не диви́теся сему́. Я́ко гряде́т час, во́ньже вси су́щии во гробе́х услы́шат глас Сы́на Бо́жия. И изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же, я́коже слы́шу, сужду́, и Суд Мой пра́веден е́сть, я́ко не ищу́ во́ли Моея́, но во́ли посла́вшаго Мя Отца́.

По Ева́нгелии же бра́тия пою́т: Сла́ва Тебе́, Го́споди, сла́ва Тебе́. Диа́кон же: Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй. Го́споди, поми́луй, три́жды. Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному. Го́споди, поми́луй, три́жды.

Я́ко да Госпо́дь Бог учини́т ду́шу его́ (или́ ея́), иде́же пра́веднии упокоева́ются.

Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ (или́ ея́) у Христа́ Безсме́ртнаго Царя́ и Бо́га на́шего про́сим.

Пода́й, Го́споди. Диа́кон: Го́споду помо́лимся. Го́споди, поми́луй.

Та́же моли́тва от свяще́нника велегла́сно глаго́лется:

Бо́же духо́в и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им (или́ е́ю), сло́вом, или́ де́лом, или́ помышле́нием, я́ко Благи́й Человеколю́бец Бог про́сти , я́ко не́сть челове́к, и́же жив бу́дет, и не согреши́т, Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ Воскресе́ние, и Живо́т, и Поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Посе́м быва́ет целова́ние по чи́ну, и пою́тся настоя́щыя стихи́ры, глас 2. Подо́бен: Егда́ от дре́ва:

Прииди́те, после́днее целова́ние дади́м, бра́тие, уме́ршему (или́ уме́ршей), благодаря́ще Бо́га, сей бо (или́ сия́ бо) оскуде́ от сро́дства своего́, и ко гро́бу тщи́тся, не ктому́ пеки́йся (или пекущи)о су́етных, и о многостра́стной пло́ти. Где ны́не сро́дницы же и дру́зи; Се разлуча́емся; его́же (или́ ю́же) упоко́ити, Го́споду помо́лимся.

Ко́е разлуче́ние, о бра́тие, ко́е рыда́ние в настоя́щем часе́, прииди́те у́бо, целу́йте бы́вшаго (или́ бы́вшую) вма́ле с на́ми, предае́тся бо гро́бу, ка́мением покрыва́ется, во тьму́ вселя́ется, с ме́ртвыми погреба́ется, и всех сро́дников и друго́в ны́не разлуча́ется. его́же (или́ ю́же) упоко́ити, Го́споду помо́лимся.

Ны́не жите́йское лука́вое разруша́ется торжество́ суеты́: дух бо оскуде́ от селе́ния, бре́ние очерни́ся, сосу́д раздра́ся, безгла́сен, нечу́вствен, ме́ртвен, недви́жимь; его́же (или́ ю́же) посыла́юще гро́бу, Го́споду помо́лимся да́ти сему́ (или́ сей) во ве́ки упокое́ние.

Яко́в живо́т наш е́сть: цвет, и дым, и роса́ у́тренняя вои́стинну. Прииди́те у́бо, у́зрим на гробе́х я́сно, где добро́та теле́сная, где ю́ность, где су́ть очеса́ и зрак плотски́й; Вся увядо́ша я́ко трава́, вся потреби́шася. Прииди́те, ко Христу́ припаде́м со слеза́ми.

Вси теле́снии ны́не орга́ны пра́здны зря́тся, и́же пре́жде ма́ла дви́жими бя́ху, вси недействи́тельни, ме́ртви, нечу́вственни, о́чи бо заидо́ша, связа́стеся но́зе, ру́це безмо́лвствуете, и слух с ни́ми, язы́к молча́нием заключи́ся, гро́бу предае́тся, вои́стинну суета́ вся челове́ческая.

Сла́ва, И ны́не, Богоро́дичен:

Спаса́й наде́ющыяся на Тя, Ма́ти незаходи́маго Со́лнца Богороди́тельнице, умоли́ моли́твами Твои́ми Преблага́го Бо́га, упоко́ити, мо́лимся, ны́не преста́вльшагося (или́ преста́вльшуюся), иде́же упокоева́ются пра́ведных ду́си, боже́ственных благ насле́дника (или́ насле́дницу) покажи́, во дво́рех пра́ведных, в па́мять, Всенепоро́чная, ве́чную.

Глас 8: Присномяте́жное мо́ре жития́ прете́к, к Твоему́ приста́нищу притече́ ве́рою преста́вивыйся, но во Твое́й ти́хости и присноживо́тней сла́дости со святы́ми наставля́яй его́ (или́ ю̀), упоко́й, Христе́, ду́шу раба́ Твоего́ (или́ рабы́ Твоея́).

Самогла́сен. Глас 4:

Приснопева́емый глас боже́ственнаго Дави́да дне́сь исполня́ется, глаго́лющий: челове́к я́ко трава́, дни́е его́ я́ко цвет се́льный, та́ко оцвете́т. Его́же бо пре́жде вма́ле ви́дехом жи́ва, и глаго́люща: се предлежи́т мертв, недви́жим, бездыха́нен, изы́де и оти́де от зде́шних та́мо, иде́же мзда о де́лех е́сть, та́мо, иде́же ра́дость всех святы́х. С ни́миже упоко́й усо́пшаго (или́ усо́пшую), Бо́же, я́ко Ми́лостив и Человеколю́бец.

Глас 8: Вседержи́телю Го́споди, ду́шу раба́ Твоего́ (или́ рабы́ Твоея́), Спа́се, упоко́й в селе́ниих пра́ведных, иде́же свет Твой сия́ет всем досто́йным, Еди́не Многоми́лостиве.

Исчезо́х сро́дства моего́, и оста́вих про́чее живота́ моего́, и к Тебе́ прибего́х, Го́споди, спаси́ мя.

Умири́ моли́твами Богоро́дицы житие́ нас, вопию́щих Ти: Живода́вче, сла́ва Тебе́.

И повнегда́ бы́ти целова́нию, глаго́лем тропари́ сия́:

Со ду́хи пра́ведных сконча́вшихся, ду́шу раба́ Твоего́ (или́ рабы́ Твоея́), Спа́се, упоко́й, сохраня́я ю̀ во блаже́нной жи́зни, я́же у тебе́, Человеколю́бче.

В поко́ищи Твое́м, Го́споди, иде́же вси святи́и Твои́ упокоева́ются, упоко́й и ду́шу раба́ Твоего́ (или́ рабы́ Твоея́), я́ко Еди́н еси́ Человеколю́бец.

Сла́ва: Ты еси́ Бог Соше́дый во ад и у́зы окова́нных Разреши́вый, Сам и ду́шу раба́ Твоего́ (или́ рабы́ Твоея́) упоко́й.

И ны́не: Еди́на Чи́стая и Непоро́чная Де́во, Бо́га без се́мене ро́ждшая, моли́ спасти́ся души́ его́ (или́ ея́).

Диа́кон глаго́лет: Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй. Го́споди, поми́луй, три́жды. Еще́ мо́лимся о упокое́нии души́ усо́пшаго раба́ Бо́жия (или́ усо́пшия рабы́ Бо́жия), и́мярек, и о е́же про́сти тися ему́ (или́ ей) вся́кому прегреше́нию, во́льному же и нево́льному. Го́споди, поми́луй, три́жды. Я́ко да Госпо́дь Бог учини́т ду́шу его́ (или́ ея́), иде́же пра́веднии упокоева́ются. Го́споди, поми́луй, три́жды. Ми́лости Бо́жия, Ца́рства Небе́снаго, и оставле́ния грехо́в его́ (или́ ея́) у Христа́ Безсме́ртнаго Царя́ и Бо́га на́шего про́сим. Пода́й, Го́споди. Диа́кон: Го́споду помо́лимся. Го́споди, поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́ (или́ рабы́ Твоея́), и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние соде́янное им (или́ е́ю) сло́вом, или́ де́лом, или́ помышле́нием, я́ко Благи́й Человеколю́бец Бог про́сти , я́ко не́сть челове́к, и́же жив бу́дет, и не согреши́т, Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ Воскресе́ние, и Живо́т, и Поко́й усо́пшаго раба́ Твоего́ (или́ усо́пшия рабы́ Твоея́), и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

И быва́ет отпу́ст.

По отпу́сте же духовни́к или́ наста́вник чтет моли́тву проща́льную:

Госпо́дь Иису́с Христо́с Бог наш, И́же боже́ственныя за́поведи святы́м Свои́м ученико́м и апо́столом да́вый, во е́же вяза́ти и реши́ти па́дших грехи́, и от о́ных, па́ки мы прие́мше вины́ то́жде твори́ти, да про́сти т тебе́, ча́до духо́вное, а́ще что соде́лал (или́ соде́лала) еси́ в ны́нешнем ве́це, во́льное или́ нево́льное, ны́не и при́сно, и во ве́ки веко́в, ами́нь.

Та́же взе́мше одр с моща́ми, отхо́дим во усыпальницу, пою́ще стихи́ры самогла́сны, я́же су́ть сия́.

Глас 1:

Ка́я жите́йская сла́дость пребыва́ет печа́ли неприча́стна, ка́я ли сла́ва стои́т на земли́ непрело́жна; Вся се́ни немощне́йша, вся со́ний преле́стнейша: еди́нем мгнове́нием, и сия́ вся сме́рть прие́млет, но во све́те, Христе́, Лица́ Твоего́, и в наслажде́нии Твоея́ красоты́, его́же (или́ ю́же) избра́л еси́, упоко́й, я́ко Человеколю́бец.

Глас 2:

Увы́ мне, яковы́й по́двиг и́мать душа́, разлуча́ющися от телесе́; Увы́ тогда́ коли́ко слези́т, и не́сть поми́луяй ю̀. Ко а́нгелом о́чи возводя́щи, безде́льно мо́лится, к челове́ком ру́це простира́ющи, не и́мать помога́ющаго. Те́мже, возлю́бленнии мои́ бра́тие, помы́сливше на́шу кра́ткую жи́знь, преста́вленному (или́ преставленной) упокое́ния от Христа́ про́сим, и душа́м на́шым ве́лию ми́лость.

Глас 3:

Вся суета́ челове́ческая, ели́ка не пребыва́ют по сме́рти, не пребыва́ет бога́тство, ни сше́ствует сла́ва, прише́дши бо сме́рти, сия́ вся потреби́шася. Те́мже Христу́ Безсме́ртному возопии́м: преста́вленнаго (или́ преставленную) от нас упоко́й, иде́же всех е́сть веселя́щихся жили́ще.

Глас 4:

Где е́сть мирско́е пристра́стие, где е́сть привре́менных мечта́ние, где е́сть зла́то и сребро́, где е́сть рабо́в мно́жество и молва́; Вся пе́рсть, вся пе́пел, вся се́нь; но прииди́те, возопии́м Безсме́ртному Царю́: Го́споди, ве́чных Твои́х благ сподо́би преста́вльшагося (или́ преста́вльшуюся) от нас, упокоя́я его́ (или́ ю̀) в нестаре́ющемся блаже́нстве Твое́м.

Глас 5:

Помяну́х проро́ка, вопию́ща: аз е́смь земля́ и пе́пел; и па́ки разсмотри́х во гробе́х и ви́дех ко́сти обнаже́ны, и рех: у́бо кто е́сть ца́рь, или́ во́ин, или́ бога́т, или́ убо́г, или́ пра́ведник, или́ гре́шник; Но упоко́й, Го́споди, с пра́ведными раба́ Твоего́ (или́ рабу́ Твою́).

Глас 6:

Нача́ток мне и соста́в, зижди́тельное Твое́ бы́сть повеле́ние, восхоте́в бо от неви́димаго же и ви́димаго жи́ва мя соста́вити естества́, от земли́ те́ло мое́ созда́л еси́, дал же ми еси́ ду́шу, боже́ственным Твои́м и животворя́щим вдохнове́нием; те́мже, Христе́, раба́ Твоего́ (или́ рабу́ Твою́) в стране́ живу́щих, и в селе́ниих пра́ведных упоко́й.

Глас 7:

По о́бразу Твоему́ и по подо́бию созда́вый в нача́ле челове́ка, в раи́ поста́вил еси́ владе́ти Твои́ми тва́рьми, за́вистию же диа́волею прельсти́вся, сне́ди причасти́ся, за́поведей Твои́х престу́пник быв. Те́мже па́ки в зе́млю, от нея́же взят бы́сть, осуди́л еси́ возврати́тися, Го́споди, и испроси́ти упокое́ния.

Глас 8:

Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безобразну, безсла́вну, не иму́щу ви́да. О чудесе́! Что сие́ е́же о нас бы́сть та́инство, ка́ко преда́хомся тле́нию и припряго́хомся сме́рти; Вои́стинну Бо́га повеле́нием, я́коже пи́сано е́сть, подаю́щаго преста́вльшемуся (или́ преста́вльшейся) упокое́ние.

Полага́ются же мо́щи, до́ндеже прии́дем во усыпальницу, три́жды. И быва́ет ектениа́, и моли́тва; дости́гше же гро́ба, полага́ются у́бо мо́щи во гро́бе. Свяще́нник же пе́рсть взем лопа́тою, ме́щет на мо́щи крестови́дно, глаго́ля: Госпо́дня земля́ и исполне́ние ея́, вселе́нная и вси живу́щии на ней.

И влива́ет и еле́й, глаго́ля настоя́щий тропа́рь:

О́бразом Креста́ Твоего́, Человеколю́бче, сме́рть умертви́ся, и ад плени́ся, и дре́вле уме́ршии воста́вше, пе́снь Тебе́ принесо́ша. Те́мже вопие́м Ти, Христе́ Бо́же: преста́вльшагося (или́ преста́вльшуюся) от нас упоко́й, иде́же всех е́сть веселя́щихся жили́ще в Тебе́, е́же сла́вити Твое́ Божество́.

И та́ко покрыва́ют я́ко обы́чно гроб, глаго́люще тропари́ сия́, глас 8:

Земле́ зи́нувши, приими́ от Тебе́ созда́ннаго (или́ созда́нную) руко́ю Бо́жиею пре́жде, па́ки же возвращшася к тебе́ ро́ждшей, е́же бо по о́бразу Созда́тель прия́т, ты же приими́ те́ло Твое́.

Я́коже рекл еси́, Го́споди, Ма́рфе: Аз е́смь Воскресе́ние, де́лом сло́во испо́лнил еси́, из а́да призва́в Ла́заря; си́це и раба́ Твоего́ от а́да воздви́гни, Человеколю́бче.

Духо́внии мои́ бра́тие и спо́стницы, не забу́дите мене́, егда́ моли́теся, но зря́ще мой гроб, помина́йте мою́ любо́вь, и моли́те Христа́, да учини́т дух мой с пра́ведными.

Диа́кон же глаго́лет ектению́: Поми́луй нас, Бо́же: и про́чая по чи́ну. Свяще́нник же моли́тву: Бо́же духо́в и вся́кия пло́ти: По возгла́се же, Сла́ва, И ны́не: и отпу́ст. Твори́м же и покло́нов 12 за усо́пшаго бра́та на́шего, ели́цы обрета́емся при погребе́нии, глаго́люще: Упоко́й, Го́споди, ду́шу раба́ Твоего́. И та́ко отхо́дим в ке́ллии на́шя, сла́вяще Бо́га.

Ве́дати подоба́ет, я́ко а́ще кто преста́вится на святу́ю Па́сху, или́ в кото́рый ли́бо де́нь све́тлыя неде́ли до неде́ли фомины́, ма́ло что от обы́чнаго усо́пших пе́ния пое́тся, вели́чества ра́ди и че́сти весе́лаго пра́здника воскресе́ния; весе́лия бо и ра́дости, а не се́тования е́сть пра́здник; я́ко вси о Христе́ воскре́сшем в наде́жде воскресе́ния и жи́зни ве́чныя умира́ющии, Христо́вым воскресе́нием от печа́льных ми́ра сего́ на весе́лая и ра́достная преставля́ются, воскре́сным пе́нием над усо́пшим це́рковь возвеща́ет. Ма́лым же не́киим пе́нием, ектениа́ми же и моли́твою усо́пшым прили́чными известву́емся, я́ко в покая́нии уме́рый, а́ще и не у довлесотвори́л е́сть о свои́х согреше́ниих, моли́твами церко́вными оставля́ются ему́, и от удержа́ния свободи́тся.

Прише́д у́бо свяще́нник с кли́рики свои́ми в дом, в не́мже уме́ршаго те́ло лежи́т, взем на ся епитрахи́ль и фело́нь, и покади́в мо́щи, обы́чно начина́ет: Благослове́н Бог наш: Клир же пое́т: Христо́с воскре́се: на глас 5. Свяще́нник же глаго́лет обы́чныя стихи́, си́есть: Да воскре́снет Бог: и про́чая вся. Пою́щым же сия́ свяще́нник кропи́т свяще́нною водо́ю те́ло уме́ршаго, и ковче́г его́ извне́ и извну́трь, и а́бие влага́ют ѐ в нем. Сконча́ну же пе́нию, глаго́лет диа́кон ектении́ обы́чныя усо́пшым. Свяще́нник же чтет моли́тву та́йно, си́есть: Бо́же духо́в: По возгла́се же чтут: Воскресе́ние Христо́во ви́девше: И взе́мше мо́щи усо́пшаго, отхо́дят к це́ркви предыду́щым свяще́нником, диа́коном и всему́ кли́ру, ми́ряном же после́дующым. Иду́ще же кли́рицы и певцы́ пою́т кано́н па́сце, си́есть: Воскресе́ния де́нь: по ряду́, на ели́ко восхо́щут, да́же до це́ркви. В це́ркви же поста́вивше мо́щи, допева́ют нача́тый кано́н кадя́щым свяще́нником по чи́ну обы́чно. На четве́ртой же пе́сни, диа́конства усо́пших обы́чная с моли́твою. И возглаша́ет: Я́ко Ты еси́ Воскресе́ние, и Живо́т: Та́же: Предвари́вшыя у́тро: И посе́м пое́тся 4-я пе́снь по ряду́. По шесто́й же пе́сни, диа́конства усо́пших обы́чная с моли́твою. И возглаша́ет: Я́ко Ты еси́ Воскресе́ние, и Живо́т: Та́же, конда́к: Со святы́ми упоко́й: И и́кос: Сам еди́н еси́ безсме́ртный: Вме́сто же трисвята́го: Ели́цы во Христа́ крести́стеся: Апо́стол в дея́ниих, в той де́нь бы́вший. Аллилу́иа, на глас 2. Ева́нгелие воскре́сное пе́рвое. И посе́м: Воскресе́ние Христо́во ви́девше, поклони́мся: и про́чыя пе́сни кано́на.По соверше́нии же кано́на чте́тся, или́ пое́тся ексапостила́рий: Пло́тию усну́в: два́жды. По сих пое́м: Благослове́н еси́ Го́споди, научи́ мя оправда́нием Твои́м. А́нгельский собо́р удиви́ся: Та́же, стихи́ры па́сце, со стихи́ их. Сла́ва, И ны́не: Воскресе́ния де́нь: И Христо́с воскре́се: три́жды. Пое́мым же сим стихи́рам, быва́ет обы́чное целова́ние усо́пшаго, глаго́люще: Христо́с воскре́се: По стихи́рах же, диа́конства обы́чная усо́пших, с моли́твою, я́же велегла́сно от архиере́а, или́ свяще́нника, чте́тся близ моще́й. И возглаша́ет: Я́ко Ты еси́ Воскресе́ние и Живо́т: И быва́ет отпу́ст обы́чный. Та́же моли́тва проща́льная: Госпо́дь Иису́с Христо́с Бог наш: И отхо́дим ко гро́бу, нося́ще те́ло усо́пшаго на погребе́ние. Свяще́нник же со всем кли́ром предъиды́й моще́м, пою́т: Христо́с воскре́се: Земле́, зи́нувши приими́ от Тебе́ созда́нное:

Коне́ц после́дованию погребе́ния усо́пших во дни све́тлыя неде́ли.

Егда́ кто от мирски́х свяще́нников оти́дет ко Го́споду, прихо́дят три свяще́нницы, и сне́млют его́ со одра́, и полага́ют на земли́ на рогози́нице. И поне́же не подоба́ет измове́ну бы́ти, обнаже́ну от свяще́нников, отира́ют его́ со еле́ем чи́стым. Та́же одева́ют его́ обы́чными его́ оде́ждами, пото́м же во всю свяще́нническую оде́жду, и покрыва́ют лице́ его́ возду́хом, и полага́ют свято́е Ева́нгелие над ним. Та́же прихо́дят свяще́нницы облаче́ны во свяще́нническия оде́жды.

Предстоя́тель же твори́т: Благослове́н Бог наш: И начина́ют сопредстоя́щии: Святы́й Бо́же: Пресвята́я Тро́ице: И О́тче наш: Я́ко Твое́ е́сть Ца́рство:

И а́бие пою́т тропари́ сия́, глас 4:

Со ду́хи пра́ведных сконча́вшихся, ду́шу раба́ Твоего́, Спа́се, упоко́й, сохраня́я ю̀ во блаже́нной жи́зни, я́же у тебе́, Человеколю́бче.

В поко́ищи Твое́м, Го́споди, иде́же вси святи́и Твои́ упокоева́ются, упоко́й и ду́шу раба́ Твоего́, я́ко Еди́н еси́ Человеколю́бец.

Сла́ва: Ты еси́ Бог Соше́дый во ад и у́зы окова́нных Разреши́вый, Сам и ду́шу раба́ Твоего́ упоко́й.

И ны́не: Еди́на Чи́стая и Непоро́чная Де́во, Бо́га без се́мене ро́ждшая, моли́ спасти́ся души́ его́.

Диа́кон глаго́лет: Поми́луй нас, Бо́же, по вели́цей ми́лости Твое́й, мо́лимтися, услы́ши и поми́луй.

Го́споди, поми́луй, три́жды.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же про́сти тися ему́ вся́кому прегреше́нию, во́льному же и нево́льному.

Го́споди, поми́луй, три́жды.

Я́ко да Госпо́дь Бог учини́т ду́шу его́, иде́же пра́веднии упокоева́ются.

Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ у Христа́ Безсме́ртнаго Царя́ и Бо́га на́шего про́сим.

Пода́й, Го́споди.

Диа́кон: Го́споду помо́лимся. Го́споди, поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́, и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние соде́янное им сло́вом, или́ де́лом, или́ помышле́нием, я́ко Благи́й Человеколю́бец Бог про́сти , я́ко не́сть челове́к, и́же жив бу́дет, и не согреши́т, Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возгла́с: Я́ко Ты еси́ Воскресе́ние, и Живо́т, и Поко́й усо́пшаго раба́ Твоего́, и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

И а́бие во́зьмут свяще́нницы мо́щи, и прино́сят я̀ в па́перть хра́ма, и полага́ют свято́е Ева́нгелие верху́ его́, я́коже предре́хом, и подсве́щники крестови́дно со свеща́ми, и начина́ет певе́ц: Непоро́чнии в пу́ть: Аллилу́иа, во глас 6. Таже:

Блаже́ни непоро́чнии в пу́ть, ходя́щии в зако́не Госпо́дни. Аллилу́иа.

Блаже́ни испыта́ющии свиде́ния Его́, всем се́рдцем взы́щут Его́. Аллилу́иа.

Не де́лающии бо беззако́ния, в путе́х Его́ ходи́ша. Аллилу́иа.

Ты запове́дал еси́ за́поведи Твоя́ сохрани́ти зело́. Аллилу́иа.

Дабы́ испра́вилися путие́ мои́, сохрани́ти оправда́ния Твоя́. Аллилу́иа.

Тогда́ не постыжу́ся, внегда́ призре́ти ми на вся за́поведи Твоя́. Аллилу́иа.

Испове́мся Тебе́ в пра́вости се́рдца, внегда́ научитимися судьба́м пра́вды Твоея́. Аллилу́иа.

Оправда́ния Твоя́ сохраню́, не оста́ви мене́ до зела́. Аллилу́иа.

В чесо́м испра́вит юне́йший пу́ть свой; Внегда́ сохрани́ти словеса́ Твоя́. Аллилу́иа.

Всем се́рдцем мои́м взыска́х Тебе́, не отри́ни мене́ от за́поведей Твои́х. Аллилу́иа.

В се́рдце мое́м скрых словеса́ Твоя́, я́ко да не согрешу́ Тебе́. Аллилу́иа.

Благослове́н еси́, Го́споди, научи́ мя оправда́нием Твои́м. Аллилу́иа.

Устна́ма мои́ма возвести́х вся судьбы́ уст Твои́х. Аллилу́иа.

На пути́ свиде́ний Твои́х наслади́хся, я́ко о вся́ком бога́тстве. Аллилу́иа.

В за́поведех Твои́х поглумлю́ся, и уразуме́ю пути́ Твоя́. Аллилу́иа.

Во оправда́ниих Твои́х поучу́ся, не забу́ду слове́с Твои́х. Аллилу́иа.

Возда́ждь рабу́ Твоему́, живи́ мя, и сохраню́ словеса́ Твоя́. Аллилу́иа.

Откры́й о́чи мои́, и уразуме́ю чудеса́ от зако́на Твоего́. Аллилу́иа.

Пришле́ц аз е́смь на земли́, не скрый от Мене́ за́поведи Твоя́. Аллилу́иа.

Возлюби́ душа́ моя́ возжела́ти судьбы́ Твоя́ на вся́кое вре́мя. Аллилу́иа.

Запрети́л еси́ го́рдым, про́кляти уклоня́ющиися от за́поведей Твои́х. Аллилу́иа.

Отими́ от Мене́ поно́с и уничиже́ние, я́ко свиде́ний Твои́х взыска́х. Аллилу́иа.

И́бо седо́ша кня́зи, и на мя клевета́ху, раб же Твой глумля́шеся во оправда́ниих Твои́х. Аллилу́иа.

И́бо свиде́ния Твоя́ поуче́ние мое́ е́сть, и сове́ти мои́ оправда́ния Твоя́. Аллилу́иа.

Прильпе́ земли́ душа́ моя́, живи́ мя по словеси́ Твоему́. Аллилу́иа.

Пути́ моя́ возвести́х, и услы́шал мя еси́, научи́ мя оправда́нием Твои́м. Аллилу́иа.

Пу́ть оправда́ний Твои́х вразуми́ ми, и поглумлю́ся в чудесе́х Твои́х. Аллилу́иа.

Воздрема́ душа́ моя́ от уны́ния, утверди́ мя в словесе́х Твои́х. Аллилу́иа.

Пу́ть непра́вды отста́ви от Мене́, и зако́ном Твои́м поми́луй мя. Аллилу́иа.

Пу́ть и́стины изво́лих, и судьбы́ Твоя́ не забы́х. Аллилу́иа.

Прилепи́хся свиде́нием Твои́м, Го́споди, не посрами́ мене́. Аллилу́иа.

Пу́ть за́поведей Твои́х теко́х, егда́ расшири́л еси́ се́рдце мое́. Аллилу́иа.

Законоположи́ мне, Го́споди, пу́ть оправда́ний Твои́х, и взыщу́ и вы́ну. Аллилу́иа.

Вразуми́ мя, и испыта́ю зако́н Твой, и сохраню́ и всем се́рдцем мои́м. Аллилу́иа.

Наста́ви мя на стезю́ за́поведей Твои́х, я́ко ту́ю восхоте́х. Аллилу́иа.

Приклони́ се́рдце мое́ во свиде́ния Твоя́, а не в лихои́мство. Аллилу́иа.

Обрати́ о́чи мои́, е́же не ви́дети суеты́, в пути́ Твое́м живи́ мя. Аллилу́иа.

Поста́ви рабу́ Твоему́ сло́во Твое́ в страх Твой. Аллилу́иа.

Отими́ поноше́ние мое́, е́же непщева́х: я́ко судьбы́ Твоя́ бла́ги. Аллилу́иа.

Се возжела́х за́поведи Твоя́, в пра́вде Твое́й живи́ мя. Аллилу́иа.

И да прии́дет на мя ми́лость Твоя́, Го́споди, спасе́ние Твое́ по словеси́ Твоему́. Аллилу́иа.

И отвеща́ю поноша́ющым ми сло́во: я́ко упова́х на словеса́ Твоя́. Аллилу́иа.

И не отими́ от уст мои́х словесе́ и́стинна до зела́, я́ко на судьбы́ Твоя́ упова́х. Аллилу́иа.

И сохраню́ зако́н Твой вы́ну, в век и в век ве́ка. Аллилу́иа.

И хожда́х в широте́, я́ко за́поведи Твоя́ взыска́х. Аллилу́иа.

И глаго́лах о свиде́ниих Твои́х пред цари́, и не стыдя́хся. Аллилу́иа.

И поуча́хся в за́поведех Твои́х, я́же возлюби́х зело́. Аллилу́иа.

И воздвиго́х ру́це мои́ к за́поведем Твои́м, я́же возлюби́х, и глумля́хся во оправда́ниих Твои́х. Аллилу́иа.

Помяни́ словеса́ Твоя́ рабу́ Твоему́, и́хже упова́ние дал ми еси́. Аллилу́иа.

То мя уте́ши во смире́нии мое́м, я́ко сло́во Твое́ живи́ мя. Аллилу́иа.

Го́рдии законопреступова́ху до зела́: от зако́на же Твоего́ не уклони́хся. Аллилу́иа.

Помяну́х судьбы́ Твоя́ от ве́ка, Го́споди, и уте́шихся. Аллилу́иа.

Печа́ль прия́т мя от гре́шник, оставля́ющих зако́н Твой. Аллилу́иа.

Пе́та бя́ху мне оправда́ния Твоя́, на ме́сте прише́льствия моего́. Аллилу́иа.

Помяну́х в но́щи и́мя Твое́, Го́споди, и сохрани́х зако́н Твой. Аллилу́иа.

Сей бы́сть мне, я́ко оправда́ний Твои́х взыска́х. Аллилу́иа.

Ча́сть моя́ еси́ Го́споди, рех сохрани́ти зако́н Твой. Аллилу́иа.

Помоли́хся лицу́ Твоему́ всем се́рдцем мои́м, поми́луй мя по словеси́ Твоему́. Аллилу́иа.

Помы́слих пути́ Твоя́, и возврати́х но́зе мои́ во свиде́ния Твоя́. Аллилу́иа.

Угото́вихся и не смути́хся сохрани́ти за́поведи Твоя́. Аллилу́иа.

У́жя гре́шник обяза́шася мне, и зако́на Твоего́ не забы́х. Аллилу́иа.

Полу́нощи воста́х, испове́датися Тебе́ о судьба́х пра́вды Твоея́. Аллилу́иа.

Прича́стник аз е́смь всем боя́щымся Тебе́, и храня́щым за́поведи Твоя́. Аллилу́иа.

Ми́лости Твоея́ Го́споди испо́лнь земля́, оправда́нием Твои́м научи́ мя. Аллилу́иа.

Бла́гость сотвори́л еси́ с рабо́м Твои́м, Го́споди, по словеси́ Твоему́. Аллилу́иа.

Бла́гости и наказа́нию, и ра́зуму научи́ мя, я́ко за́поведем Твои́м ве́ровах. Аллилу́иа.

Пре́жде да́же не смири́ти ми ся, аз прегреши́х, сего́ ра́ди сло́во Твое́ сохрани́х. Аллилу́иа.

Благ еси́ Ты, Го́споди, и бла́гостию Твое́ю научи́ мя оправда́нием Твои́м. Аллилу́иа.

Умно́жися на мя непра́вда го́рдых, аз же всем се́рдцем мои́м испыта́ю за́поведи Твоя́. Аллилу́иа.

Усыри́ся я́ко млеко́ се́рдце их, аз же зако́ну Твоему́ поучи́хся. Аллилу́иа.

Бла́го мне, я́ко смири́л мя еси́, я́ко да научу́ся оправда́нием Твои́м. Аллилу́иа.

Благ мне зако́н уст Твои́х, па́че ты́сящ зла́та и сребра́. Аллилу́иа.

Сла́ва: аллилу́иа. И ны́не: аллилу́иа.

Диа́кон: Па́ки и па́ки ми́ром Го́споду помо́лимся.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же про́сти тися ему́ вся́кому прегреше́нию, во́льному же и нево́льному.

Я́ко да Госпо́дь Бог учини́т ду́шу его́, иде́же пра́веднии упокоя́ются.

Ми́лости Бо́жия, Ца́рства Небе́снаго, и оставле́ния грехо́в его́, у Христа́ безсме́ртнаго Царя́ и Бо́га на́шего про́сим.

Пода́й Го́споди.

Диа́кон: Го́споду помо́лимся. Го́споди поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый: Сам Го́споди, упоко́й ду́шу усо́пшаго раба́ Твоего́, и́мярек, в ме́сте све́тле, в ме́сте зла́чне, в ме́сте поко́йне: отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им, сло́вом или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Та́же свяще́нник глаго́лет:

Я́ко Ты еси́ воскресе́ние и живо́т, и поко́й усо́пшаго раба́ Твоего́, и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Ами́нь.

Посе́м начина́ем втору́ю статию́, на глас 5, на ко́емждо же конце́ стиха́ глаго́лем:

Поми́луй раба́ Твоего́.

Лик начина́ет: За́поведи Твоя́: Поми́луй раба́ Твоего́.

Па́ки то́йже Лик:

Ру́це Твои́ сотвори́сте мя: и созда́сте мя, вразуми́ мя, и научу́ся за́поведем Твои́м. Поми́луй раба́ Твоего́.

Боя́щиися Тебе́ у́зрят мя, и возвеселя́тся, я́ко на словеса́ Твоя́ упова́х. Поми́луй раба́ Твоего́.

Разуме́х Го́споди, я́ко пра́вда судьбы́ Твоя́, и вои́стинну смири́л мя еси́. Поми́луй раба́ Твоего́.

Бу́ди же ми́лость Твоя́, да уте́шит мя по словеси́ Твоему́ рабу́ Твоему́. Поми́луй раба́ Твоего́.

Да прии́дут мне щедро́ты Твоя́, и жив бу́ду, я́ко зако́н Твой поуче́ние мое́ е́сть. Поми́луй раба́ Твоего́.

Да постыдя́тся го́рдии, я́ко непра́ведно беззако́нноваша на мя, аз же поглумлю́ся в за́поведех Твои́х. Поми́луй раба́ Твоего́.

Да обратя́т мя боя́щиися Тебе́, и ве́дящии свиде́ния Твоя́.

Бу́ди се́рдце мое́ непоро́чно во оправда́ниих Твои́х, я́ко да не постыжу́ся.

Исчеза́ет во спасе́ние Твое́ душа́ моя́, на словеса́ Твоя́ упова́х.

Исчезо́ша о́чи мои́ в сло́во Твое́, глаго́люще: когда́ уте́шиши мя;

Зане́ бых я́ко мех на сла́не: оправда́ний Твои́х не забы́х.

Коли́ко е́сть дней раба́ Твоего́; Когда́ сотвори́ши ми от гоня́щих мя суд;

Пове́даша мне законопресту́пницы глумле́ния, но не я́ко зако́н Твой, Го́споди.

Вся за́поведи Твоя́ и́стина: непра́ведно погна́ша мя, помози́ ми.

Вма́ле не сконча́ша мене́ на земли́; аз же не оста́вих за́поведей Твои́х.

По ми́лости Твое́й жи́ви мя, и сохраню́ свиде́ния уст Твои́х.

Во век, Го́споди, сло́во Твое́ пребыва́ет на Небеси́.

В род и род и́стина Твоя́, основа́л еси́ зе́млю, и пребыва́ет.

Учине́нием Твои́м пребыва́ет де́нь, я́ко вся́ческая рабо́тна Тебе́.

Я́ко а́ще бы не зако́н Твой поуче́ние мое́ был, тогда́ у́бо поги́бл бых во смире́нии мое́м.

Во век не забу́ду оправда́ний Твои́х, я́ко в них оживи́л мя еси́.

Твой е́смь аз, спаси́ мя, я́ко оправда́ний Твои́х взыска́х.

Мене́ жда́ша гре́шницы погуби́ти мя, свиде́ния Твоя́ разуме́х.

Вся́кия кончи́ны ви́дех коне́ц; широка́ за́поведь Твоя́ зело́.

Ко́ль возлюби́х зако́н Твой, Го́споди, ве́сь де́нь поуче́ние мое́ е́сть.

Па́че враг мои́х умудри́л мя еси́ за́поведию Твое́ю, я́ко в век моя́ е́сть.

Па́че всех уча́щих мя разуме́х, я́ко свиде́ния Твоя́ поуче́ние мое́ е́сть.

Па́че ста́рец разуме́х, я́ко за́поведи Твоя́ взыска́х.

От вся́каго пути́ лука́ва возбрани́х нога́м мои́м, я́ко да сохраню́ словеса́ Твоя́.

От суде́б Твои́х не уклони́хся, я́ко Ты законоположи́л ми еси́.

Ко́ль сладка́ горта́ни моему́ словеса́ Твоя́, па́че ме́да усто́м мои́м.

От за́поведей Твои́х разуме́х, сего́ ра́ди возненави́дех всяк пу́ть непра́вды.

Свети́льник нога́ма мои́ма зако́н Твой, и свет стезя́м мои́м.

Кля́хся и поста́вих сохрани́ти судьбы́ пра́вды Твоея́.

Смири́хся до зела́, Го́споди, жи́ви мя по словеси́ Твоему́.

Во́льная уст мои́х благоволи́ же, Го́споди, и судьба́м Твои́м научи́ мя.

Душа́ моя́ в ру́ку Твое́ю вы́ну, и зако́на Твоего́ не забы́х.

Положи́ша гре́шницы се́ть мне, и от за́поведей Твои́х не заблуди́х.

Насле́довах свиде́ния Твоя́ в век, я́ко ра́дование се́рдца моего́ су́ть.

Приклони́х се́рдце мое́ сотвори́ти оправда́ния Твоя́ в век за воздая́ние.

Законопресту́пныя возненави́дех, зако́н же Твой возлюби́х.

Помо́щник мой и Засту́пник мой еси́ Ты, на словеса́ Твоя́ упова́х.

Уклони́теся от Мене́ лука́внующии, и испыта́ю за́поведи Бо́га моего́.

Заступи́ мя по словеси́ Твоему́, и жив бу́ду, и не посрами́ мене́ от ча́яния моего́.

Помози́ ми, и спасу́ся, и поучу́ся во оправда́ниих Твои́х вы́ну.

Уничижи́л еси́ вся отступа́ющия от оправда́ний Твои́х, я́ко непра́ведно помышле́ние их.

Преступающия непщева́х вся гре́шныя земли́, сего́ ра́ди возлюби́х свиде́ния Твоя́.

Пригвозди́ стра́ху Твоему́ пло́ти моя́, от суде́б бо Твои́х убоя́хся.

Сотвори́х суд и пра́вду, не преда́ждь мене́ оби́дящым мя.

Восприими́ раба́ Твоего́ во бла́го, да не оклевета́ют мене́ го́рдии.

О́чи мои́ исчезо́сте во спасе́ние Твое́, и в сло́во пра́вды Твоея́.

Сотвори́ с рабо́м Твои́м по ми́лости Твое́й, и оправда́нием Твои́м научи́ мя.

Раб Твой е́смь аз, вразуми́ мя, и уве́м свиде́ния Твоя́.

Вре́мя сотвори́ти Го́сподеви, разори́ша зако́н Твой.

Сего́ ра́ди возлюби́х за́поведи Твоя́ па́че зла́та и топа́зия.

Сего́ ра́ди ко всем за́поведем Твои́м направля́хся, всяк пу́ть непра́вды возненави́дех.

Ди́вна свиде́ния Твоя́, сего́ ра́ди испыта́ я̀ душа́ моя́.

Явле́ние слове́с Твои́х просвеща́ет, и вразумля́ет младе́нцы.

Уста́ моя́ отверзо́х, и привлеко́х дух, я́ко за́поведей Твои́х жела́х.

Сла́ва: Поми́луй раба́ Твоего́.

И ны́не: Поми́луй раба́ Твоего́.

Диа́кон: Па́ки и па́ки ми́ром Го́споду помо́лимся.

Го́споди поми́луй.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же про́сти тися ему́ вся́кому прегреше́нию, во́льному же и нево́льному.

Го́споди поми́луй, три́жды.

Я́ко да Госпо́дь Бог учини́т ду́шу его́, иде́же пра́веднии упокоя́ются.

Го́споди поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́, у Христа́ безсме́ртнаго Царя́ и Бо́га на́шего про́сим.

Пода́й Го́споди.

Диа́кон: Го́споду помо́лимся. Го́споди поми́луй.

И свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый, Сам Го́споди, упоко́й ду́шу усо́пшаго раба́ Твоего́, и́мярек, в ме́сте све́тле, в ме́сте зла́чне, в ме́сте поко́йне; отню́дуже отбеже́ боле́знь, печа́ль и воздыха́ние; вся́кое согреше́ние соде́янное им, сло́вом, или́ де́лом, или́ помышле́нием, я́ко благи́й человеколю́бец Бог про́сти , я́ко не́сть челове́к, и́же жив бу́дет, и не согреши́т; Ты бо еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Та́же свяще́нник глаго́лет:

Я́ко Ты еси́ воскресе́ние и живо́т, и поко́й усо́пшаго раба́ Твоего́, и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и Благи́м и животворя́щим Твои́м Ду́хом, ны́не и при́сно, и во ве́ки веко́в, ами́нь.

И па́ки начина́ет тре́тию статию́, на глас 3:

И́мя Твое́. Аллилу́иа.

Па́ки то́йже лик пое́т:

При́зри на мя, и поми́луй мя, по суду́ лю́бящих и́мя Твое́. Аллилу́иа.

Стопы́ моя́ напра́ви по словеси́ Твоему́, и да не облада́ет мно́ю вся́кое беззако́ние. Аллилу́иа.

Изба́ви мя от клеветы́ челове́ческия, и сохраню́ за́поведи Твоя́. Аллилу́иа.

Лице́ Твое́ просвети́ на раба́ Твоего́, и научи́ мя оправда́нием Твои́м. Аллилу́иа.

Исхо́дища водна́я изведо́сте о́чи мои́, поне́же не сохрани́х зако́на Твоего́. Аллилу́иа.

Пра́веден еси́, Го́споди, и пра́ви суди́ Твои́. Аллилу́иа.

Запове́дал еси́ пра́вду свиде́ния Твоя́, и и́стину зело́. Аллилу́иа.

Иста́яла мя е́сть ре́вность Твоя́, я́ко забы́ша словеса́ Твоя́ врази́ мои́. Аллилу́иа.

Разжже́но сло́во Твое́ зело́, и раб Твой возлюби́ ѐ. Аллилу́иа.

Юне́йший аз е́смь и уничиже́н, оправда́ний Твои́х не забы́х. Аллилу́иа.

Пра́вда Твоя́ пра́вда во век, и зако́н Твой и́стина. Аллилу́иа.

Ско́рби и ну́жды обрето́ша мя, за́поведи Твоя́ поуче́ние мое́. Аллилу́иа.

Пра́вда свиде́ния Твоя́ в век, вразуми́ мя, и жив бу́ду. Аллилу́иа.

Воззва́х всем се́рдцем мои́м, услы́ши мя, Го́споди, оправда́ния Твоя́ взыщу́. Аллилу́иа.

Воззва́х Ти, спаси́ мя, и сохраню́ свиде́ния Твоя́. Аллилу́иа.

Предвари́х в безго́дии и воззва́х, на словеса́ Твоя́ упова́х. Аллилу́иа.

Предвари́сте о́чи мои́ ко у́тру, поучи́тися словесе́м Твои́м. Аллилу́иа.

Глас мой услы́ши, Го́споди, по ми́лости Твое́й, по судьбе́ Твое́й живи́ мя. Аллилу́иа.

Прибли́жишася гоня́щии мя беззако́нием, от зако́на же Твоего́ удали́шася. Аллилу́иа.

Близ еси́ Ты, Го́споди, и вси путие́ Твои́ и́стина. Аллилу́иа.

Испе́рва позна́х от свиде́ний Твои́х, я́ко в век основа́л я̀ еси́. Аллилу́иа.

Ви́ждь смире́ние мое́ и изми́ мя, я́ко зако́на Твоего́ не забы́х. Аллилу́иа.

Суди́ суд мой и изба́ви мя, словесе́ ра́ди Твоего́ живи́ мя. Аллилу́иа.

Дале́че от гре́шник спасе́ние, я́ко оправда́ний Твои́х не взыска́ша. Аллилу́иа.

Щедро́ты Твоя́ мно́ги, Го́споди, по судьбе́ Твое́й живи́ мя. Аллилу́иа.

Мно́зи изгоня́щии мя и стужа́ющии ми, от свиде́ний Твои́х не уклони́хся. Аллилу́иа.

Ви́дех неразумева́ющыя и иста́ях, я́ко слове́с Твои́х не сохрани́ша. Аллилу́иа.

Ви́ждь, я́ко за́поведи Твоя́ возлюби́х Го́споди, по ми́лости Твое́й живи́ мя. Аллилу́иа.

Нача́ло слове́с Твои́х и́стина, и во век вся судьбы́ пра́вды Твоея́. Аллилу́иа.

Кня́зи погна́ша мя ту́не, и от слове́с Твои́х убоя́ся се́рдце мое́. Аллилу́иа.

Возра́дуюся аз о словесе́х Твои́х, я́ко обрета́яй коры́сть мно́гу. Аллилу́иа.

Непра́вду возненави́дех и омерзи́х, зако́н же Твой возлюби́х. Аллилу́иа.

Седмери́цею днем хвали́х Тя о судьба́х пра́вды Твоея́. Аллилу́иа.

Мир мног лю́бящым зако́н Твой, и не́сть им собла́зна. Аллилу́иа.

Ча́ях спасе́ния Твоего́ Го́споди, и за́поведи Твоя́ возлюби́х. Аллилу́иа.

Сохрани́ душа́ моя́ свиде́ния Твоя́ и возлюби́ я̀ зело́. Аллилу́иа.

Сохрани́х за́поведи Твоя́ и свиде́ния Твоя́, я́ко вси путие́ мои́ пред Тобо́ю, Го́споди. Аллилу́иа.

Да прибли́жится моле́ние мое́ пред Тя Го́споди, по словеси́ Твоему́ вразуми́ мя. Аллилу́иа.

Да вни́дет проше́ние мое́ пред Тя, Го́споди, по словеси́ Твоему́ изба́ви мя. Аллилу́иа.

Отры́гнут устне́ мои́ пе́ние, егда́ научи́ши мя оправда́нием Твои́м. Аллилу́иа.

Провеща́ет язы́к мой словеса́ Твоя́, я́ко вся за́поведи Твоя́ пра́вда. Аллилу́иа.

Да бу́дет рука́ Твоя́ е́же спасти́ мя, я́ко за́поведи Твоя́ изво́лих. Аллилу́иа.

Возжела́х спасе́ние Твое́, Го́споди, и зако́н Твой поуче́ние мое́ е́сть. Аллилу́иа.

Жива́ бу́дет душа́ моя́ и восхва́лит Тя, и судьбы́ Твоя́ помо́гут мне. Аллилу́иа.

Заблуди́х, я́ко овча́ поги́бшее, взыщи́ раба́ Твоего́, я́ко за́поведей Твои́х не забы́х. Аллилу́иа.

И а́бие: Благослове́н еси́ Го́споди, научи́ мя оправда́нием Твои́м.

Святы́х лик обре́те исто́чник жи́зни, и две́рь ра́йскую, да обря́щу и аз пу́ть покая́нием; поги́бшее овча́ аз е́смь, воззови́ мя, Спа́се, и спаси́ мя. Благослове́н еси́, Го́споди:

А́гнца Бо́жия пропове́давше, и закла́ни бы́вше я́коже а́гнцы, и к жи́зни нестаре́емей святи́и, и присносу́щней преста́вльшеся, Того́ приле́жно му́ченицы моли́те, долго́в разреше́ние нам дарова́ти. Благослове́н еси́, Го́споди:

В пу́ть у́зкий хо́ждшии приско́рбный, вси в житии́ крест я́ко яре́м взе́мшии, и Мне после́довавшии ве́рою, прииди́те наслади́теся, и́хже угото́вах вам по́честей, и венцо́в небе́сных. Благослове́н еси́, Го́споди:

О́браз е́смь неизрече́нныя Твоея́ сла́вы, а́ще и я́звы ношу́ прегреше́ний, уще́дри Твое́ созда́ние, Влады́ко, и очи́сти Твои́м благоутро́бием, и вожделе́нное оте́чество пода́ждь ми, рая́ па́ки жи́теля мя сотворя́я. Благослове́н еси́ Го́споди:

Дре́вле у́бо от не су́щих Созда́вый мя, и о́бразом Твои́м Боже́ственным почты́й, преступле́нием же за́поведи, па́ки мя Возврати́вый в зе́млю, от нея́же взят бых, на е́же по подо́бию возведи́, дре́внею добро́тою возобразитися. Благослове́н еси́, Го́споди:

Упоко́й, Бо́же, раба́ Твоего́, и учини́ его́ в раи́, иде́же ли́цы святы́х, Го́споди, и пра́ведницы сия́ют я́ко свети́ла, усо́пшыя рабы́ Твоя́ упоко́й, презира́я их вся согреше́ния.

Сла́ва: Трисия́тельное Еди́наго Божества́ благоче́стно пое́м, вопию́ще: свят еси́, О́тче Безнача́льный, Собезнача́льный Сы́не, и Боже́ственный Ду́ше, просвети́ нас, ве́рою Тебе́ служа́щих, и ве́чнаго огня́ исхити́.

И ны́не: Ра́дуйся, Чи́стая, Бо́га пло́тию ро́ждшая во спасе́ние всех, Е́юже род челове́ческий обре́те спасе́ние; Тобо́ю да обря́щем рай, Богоро́дице Чи́стая, Благослове́нная.

Аллилу́иа, три́жды. Та́же диа́кон: Па́ки и па́ки ми́ром Го́споду помо́лимся.

Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же про́сти тися ему́ вся́кому прегреше́нию, во́льному же и нево́льному.

Го́споди, поми́луй, три́жды.

Я́ко да Госпо́дь Бог учини́т ду́шу его́, иде́же пра́веднии упокоева́ются.

Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ у Христа́ Безсме́ртнаго Царя́ и Бо́га на́шего про́сим.

Пода́й, Го́споди.

Диа́кон: Го́споду помо́лимся. Го́споди, поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый; Сам Го́споди, упоко́й ду́шу усо́пшаго раба́ Твоего́, и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им, сло́вом, или́ де́лом, или́ помышле́нием, я́ко Благи́й Человеколю́бец Бог про́сти . Я́ко не́сть челове́к, и́же жив бу́дет, и не согреши́т; Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглаша́ет: Я́ко Ты еси́ воскресе́ние, и живо́т, и поко́й усо́пшаго раба́ Твоего́, и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Та́же тропа́рь, глас 5: Поко́й Спа́се наш с пра́ведными раба́ Твоего́, и сего́ всели́ во дворы́ Твоя́, я́коже е́сть пи́сано, презира́я я́ко благ прегреше́ния его́, во́льная и нево́льная, и вся я́же в ве́дении и не в ве́дении, Человеколю́бче.

Сла́ва, И ны́не: От Де́вы возсия́вый ми́ру Христе́ Бо́же, сы́ны све́та то́ю показа́вый, поми́луй нас.

Та́же степе́нны, глас 6: На Не́бо о́чи мои́ возвожу́ к Тебе́ Сло́ве: уще́дри мя, да жи́ву Тебе́.

Поми́луй нас уничиже́нных, устроя́я благопотре́бныя Твоя́ сосу́ды, Сло́ве.

Сла́ва: Свято́му Ду́ху, вся́кая всеспаси́тельная вина́, а́ще ко́ему сей по достоя́нию дхнет, ско́ро взе́млет от земны́х, восперя́ет, возраща́ет, устроя́ет горѐ.

И ны́не, то́йже. Та́же проки́мен, глас 6:

Блаже́н пу́ть, во́ньже и́деши дне́сь душе́, я́ко угото́вася тебе́ ме́сто упокое́ния.

Стих: Обрати́ся душе́ моя́ в поко́й твой, я́ко Госпо́дь бла́го сотвори́ тебе́.

К Солу́няном посла́ния свята́го апо́стола Па́вла чте́ние. Зача́ло 270:

Бра́тие, не хощу́ вас не ве́дети о уме́рших, да не скорби́те, я́коже и про́чии не иму́щии упова́ния. А́ще бо ве́руем, я́ко Иису́с у́мре и воскре́се, та́ко и Бог уме́ршыя о Иису́се приведе́т с ним. Сие́ бо вам глаго́лем сло́вом Госпо́дним, я́ко мы живу́щии оста́вшии в прише́ствие Госпо́дне, не и́мамы предвари́ти уме́рших. Я́ко сам Госпо́дь в повеле́нии во гла́се арха́нгелове, и в трубе́ Бо́жии сни́дет с Небесе́, и ме́ртвии о Христе́ воскре́снут пе́рвее. Пото́м же мы живу́щии оста́вшии, ку́пно с ни́ми восхище́ни бу́дем на о́блацех, в сре́тение Госпо́дне на возду́се: и та́ко всегда́ с Го́сподем бу́дем.

Свяще́нник: Мир ти. Чтец: И ду́хови твоему́.

Чтец, псало́м Дави́дов. Аллилу́иа.

Глас 8: Блаже́н, его́же избра́л и прия́л еси́ Го́споди.

Диа́кон: Прему́дрость, про́сти услы́шим свята́го Ева́нгелиа.

Свяще́нник: От Иоа́нна свята́го Ева́нгелиа чте́ние. Зача́ло 16:

Рече́ Госпо́дь ко прише́дшым к Нему́ иуде́ем: ами́нь ами́нь глаго́лю вам, я́ко слу́шаяй словесе́ Моего́ и ве́руяй посла́вшему Мя, и́мать живо́т ве́чный, и на суд не прии́дет, но пре́йдет от сме́рти в живо́т. Ами́нь ами́нь глаго́лю вам: я́ко гряде́т час, и ны́не е́сть, егда́ ме́ртвии услы́шат глас Сы́на Бо́жия, и услы́шавше оживу́т. Я́коже бо Оте́ц и́мать живо́т в Себе́, та́ко даст и Сы́нови живо́т име́ти в Себе́; И о́бласть даст Ему́ и суд твори́ти. Я́ко Сын челове́чь е́сть, не диви́теся сему́; Я́ко гряде́т час, в о́ньже вси су́щии во гробе́х, услы́шат глас Сы́на Бо́жия; И изы́дут сотво́ршии блага́я в воскреше́ние живота́, а сотво́ршии зла́я в воскреше́ние суда́. Не могу́ Аз о Себе́ твори́ти ничесо́же: я́коже слы́шу, сужду́; и суд Мой пра́веден е́сть; я́ко не ищу́ во́ли Моея́, но во́ли посла́вшаго Мя Отца́.

Та́же диа́кон:

Го́споду помо́лимся. Лик: Го́споди поми́луй.

И свяще́нник моли́тву:

Влады́ко Го́споди Бо́же наш, Еди́не име́яй безсме́ртие, во све́те живы́й непристу́пном; убива́яй и оживотворя́яй, низводя́й во ад и возводя́й. Ты прему́дростию созда́л еси́ челове́ка, и па́ки в зе́млю того́ возвраща́еши, душе́вный долг истязу́яй; Тебе́ мо́лим, приими́ ду́шу раба́ Твоего́, и упоко́й его́ в не́дрех Авраа́ма, и Исаа́ка, и Иа́кова. И да́ждь ему́ вене́ц пра́вды Твоея́, ча́сть спаса́емых, в сла́ву избра́нных Твои́х; да о ни́хже труди́ся в ми́ре сем и́мене Твоего́ ра́ди, прии́мет бога́тное воздая́ние во оби́телех святы́х Твои́х благода́тию и щедро́тами, и человеколю́бием единоро́днаго Сы́на Твоего́, Го́спода на́шего Иису́са Христа́, ами́нь.

Седа́лен, глас 2: Дне́сь разлуча́юся от сро́дства, и к Тебе́ прибега́ю еди́ному безгре́шному: в селе́ниих пра́ведных со избра́нными Твои́ми упоко́й.

Та́же глаго́лет псало́м 22: Госпо́дь пасе́т мя, и ничто́же мя лиши́т. Аллилу́иа, аллилу́иа, аллилу́иа, повторя́юще и про́чая псалма́, на ки́йждо стих аллилу́иа.

Та́же настоя́щий тропа́рь, глас 2: Поне́же вси к то́йже ну́димся оби́тели, и под то́йжде по́йдем ка́мень, и са́ми прах пома́ле бу́дем, преста́вльшемуся поко́я от Христа́ про́сим. Сицево́е бо на́ше житие́, бра́тие, сие́ на земли́ игра́лище, не су́щым бы́ти, и бы́вшым растле́тися; со́ние есмы́ непостоя́нное, дунове́нием неодержи́мое, паре́ние птенца́ преходя́щаго, кора́бль на мо́ри сле́да не имы́й. Те́мже возопии́м к безсме́ртному Царю́: Го́споди, безконе́чнаго твоего́ блаже́нства сподо́би его́.

Проки́мен, глас 6:

Блаже́н, его́же избра́л и прия́л еси́ Го́споди.

Стих: Тебе́ подоба́ет пе́снь Бо́же в Сио́не.

Апо́стол. К Ри́мляном посла́ния свята́го апо́стола Па́вла чте́ние. Зача́ло 89:

Бра́тие, я́коже еди́нем челове́ком грех в мир вни́де, и грехо́м сме́рть; и та́ко сме́рть во вся челове́ки вни́де, в не́мже вси согреши́ша. До зако́на бо грех бе в ми́ре; грех же не вменя́шеся, не су́щу зако́ну. Но ца́рствова сме́рть от Ада́ма да́же до Моисе́а, и над несогре́шшими, по подо́бию преступле́ния Ада́мова, и́же е́сть о́браз бу́дущаго. Но не я́коже прегреше́ние, та́ко и дар. А́ще бо прегреше́нием еди́наго мно́зи умро́ша: мно́жае па́че благода́ть Бо́жия, и дар благода́тию еди́наго челове́ка Иису́са Христа́, во мно́гих преизли́шествова. И не я́коже еди́нем согре́шшим, дарова́ние: грех бо из еди́наго бо осужде́ние, дар же от мно́гих прегреше́ний во оправда́ние. А́ще бо еди́наго прегреше́нием, сме́рть ца́рствова еди́нем: мно́жае па́че избы́ток благода́ти, и дар пра́вды прие́млюще, в жи́зни воцаря́тся еди́нем Иису́с Христо́м. Те́мже у́бо, я́коже еди́наго прегреше́нием во вся челове́ки вни́де осужде́ние: та́коже и еди́наго оправда́нием во вся челове́ки вни́де оправда́ние жи́зни. Я́коже бо ослуша́нием еди́наго челове́ка гре́шни бы́ша мно́зи: си́це и послуша́нием еди́наго пра́ведни бу́дут мно́зи. Зако́н же привни́де, да умно́жится прегреше́ние: иде́же бо умно́жися грех, преизбы́точествова благода́ть. Да я́коже ца́рствова грех во сме́рть: та́коже и благода́ть воцари́тся пра́вдою в жи́знь ве́чную Иису́с Христо́м Го́сподем на́шим.

Аллилу́иа, глас 6:

Стих: Блаже́н, его́же избра́л и прия́л еси́ Го́споди.

Ева́нгелие от Иоа́нна, зача́ло 15:

Рече́ Госпо́дь ко прише́дшым к нему́ иуде́ем: Оте́ц мой досе́ле де́лает и Аз де́лаю. Сего́ же ра́ди па́че иска́ху его́ иуде́е уби́ти, я́ко не то́кмо разоря́ше суббо́ту, но и Отца́ своего́ глаго́лаше Бо́га, ра́вен Ся творя́ Бо́гу. Отвеща́в же Иису́с, и рече́ им: ами́нь ами́нь глаго́лю вам: не мо́жет Сын твори́ти о себе́ ничесо́же, а́ще не е́же ви́дит Отца́ творя́ща: я́же бо Он твори́т, сия́ и Сын та́кожде твори́т. Оте́ц бо лю́бит Сы́на, и вся показу́ет Ему́, я́же сам твори́т; и бо́льша сих пока́жет ему́ дела́, да вы чуди́теся. Я́коже бо Оте́ц воскреша́ет ме́ртвыя и живи́т: та́ко и Сын, и́хже хо́щет, живи́т. Оте́ц бо не су́дит никому́же, но суд ве́сь даст Сы́нови; Да вси чтут Сы́на, я́коже чтут Отца́; а и́же не чтит Сы́на, не чтит Отца́ посла́вшаго его́. Ами́нь ами́нь глаго́лю вам: я́ко слу́шаяй словесе́ Моего́ и ве́руяй посла́вшему Мя, и́мать живо́т ве́чный, и на суд не прии́дет; но пре́йдет от сме́рти в живо́т.

Та́же диа́кон: Го́споду помо́лимся.

И свяще́нник:

Благодари́м Тя Го́споди Бо́же наш, я́ко Твое́ то́чию е́сть е́же жи́ти безсме́ртне, и сла́ва непостижи́ма, и человеколю́бие неизрече́нно, и Ца́рство непрее́мно, и лицеме́рия не́сть у тебе́; всем бо челове́ком о́бщии жития́ счини́л еси́ преде́л, житию́ испо́лншуся. Те́мже Тя про́сим Го́споди: раба́ Твоего́, и сослужи́теля на́шего бы́вшаго, и́мярек, в наде́жде воскресе́ния жи́зни ве́чныя усо́пшаго, в не́дрех Авраа́ма, и Исаа́ка, и Иа́кова упоко́й, я́коже на земли́ в це́ркви служи́теля того́ поста́вил еси́, та́ко и в небе́сном Твое́м же́ртвеннице покажи́ Го́споди; поне́же в челове́цех духо́вных досто́инством сего́ украси́л еси́, и во а́нгельскую сла́ву не осужде́нна того́ приими́; Сам на земли́ жи́знь его́ просла́вил еси́, Сам же и исхо́д жития́ его́ во вхо́де святы́х Твои́х пра́ведных вчини́, дух его́ со все́ми от ве́ка Тебе́ благоугоди́вшими счисли́. Я́ко Ты еси́ воскресе́ние, и живо́т, и поко́й усо́пшаго раба́ Твоего́, и́мярек, Христе́ Бо́же наш; и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Антифо́н 2: А́ще не Госпо́дь бы был в нас, никто́же от нас проти́ву возмо́гл бы вра́жиим бра́нем одоле́ти: побежда́ющии бо от зде возно́сятся.

Зубы́ их да не я́та бу́дет душа́ моя́, я́ко птене́ц сло́ве; увы́ мне, ка́ко и́мам от врага́ избы́ти грехолюби́в сый;

Сла́ва:

Святы́м Ду́хом обоже́ние всем, благоволе́ние, ра́зум, мир и благослове́ние; равноде́тельный бо е́сть Отцу́ и Сло́ву.

И ны́не, то́йже.

Госпо́дня земля́ и исполне́ние ея́. Аллилу́иа, три́жды, повторя́юще и про́чая псалма́. Сла́ва: Аллилу́иа: И ны́не: Аллилу́иа.

Тропа́рь, глас 2:

В ве́ре, и наде́жде, и любви́, и кро́тости, и чистоте́, и в свяще́нническом досто́инстве, благоче́стно пожи́л еси́, приснопа́мятне. Те́мже тя преве́чный Бог, Ему́же и рабо́тал еси́, Сам вчини́т дух твой, в ме́сте све́тле и кра́сне, иде́же пра́веднии упокоева́ются, и получи́ши на суде́ Христо́ве оставле́ние, и ве́лию ми́лость.

Седа́лен, глас 5:

Ве́си Бо́же наш, я́ко во гресе́х роди́хомся; те́мже Тя мо́лим, преста́вльшагося от нас упоко́й, презира́я я́ко Благ согреше́ния, я́же я́ко челове́к сме́ртный в житии́ соде́я, моли́твами Богоро́дицы, Еди́не Человеколю́бче.

Проки́мен, глас 6:

Блаже́н, его́же избра́л и прия́л еси́ Го́споди.

Стих: Па́мять его́ в род и род.

Апо́стол. К Кори́нфяном посла́ния свята́го апо́стола Па́вла чте́ние. Зача́ло 158:

Бра́тие, сказу́ю вам благовествова́ние, е́же благовести́х вам, е́же и прия́сте, в не́мже и стоите́, И́мже и спаса́етеся, ка́цем сло́вом благовести́х вам, а́ще содержите́, ра́зве а́ще не всу́е ве́ровасте. Преда́х бо вам испе́рва, е́же и прия́х, я́ко Христо́с у́мре грех на́ших ра́ди, по писа́нием; И я́ко погребе́н бы́сть, и я́ко воста́ в тре́тий де́нь, по писа́нием; И я́ко яви́ся Ки́фе, та́же единона́десятим. Пото́м же яви́ся боле́ пяти́ сот бра́тиям еди́ною, от ни́хже мно́жайшии пребыва́ют досе́ле, не́цыи же и почи́ша. Пото́м же яви́ся Иа́кову; та́же апо́столом всем. Последи́ же всех, я́ко не́коему и́звергу, яви́ся и мне. Аз бо е́смь мний апо́столов, и́же не́смь досто́ин нарещи́ся апо́стол, зане́ гони́х це́рковь Бо́жию. Благода́тию же Бо́жиею е́смь, е́же е́смь; и благода́ть Его́, я́же во мне, не тща бы́сть, но па́че всех их потруди́хся; не аз же, но благода́ть Бо́жия я́же со мно́ю. А́ще у́бо аз, а́ще ли они́, та́ко пропове́дуем, и та́ко ве́ровасте.

Аллилу́иа.

Стих: Блаже́н, его́же избра́л и прия́л еси́ Го́споди.

Ева́нгелие от Иоа́нна, зача́ло 21:

Рече́ Госпо́дь ко прише́дшым к нему́ иуде́ом: Аз е́смь хлеб живо́тный; гряды́й ко мне, не и́мать взалка́тися; и ве́руяй в Мя, не и́мать вжажда́тися никогда́же. Но рех вам, я́ко и ви́десте Мя, и не ве́руете. Все е́же даст мне Оте́ц, ко мне прии́дет; и гряду́щаго ко Мне не изжену́ вон. Я́ко снидо́х с Небесе́, не да творю́ во́лю Мою́, но во́лю посла́вшаго Мя Отца́; Се же е́сть во́ля посла́вшаго Мя Отца́, да все, е́же даст Ми, не погублю́ от Него́, но воскрешу́ ѐ в после́дний де́нь.

Та́же диа́кон: Го́споду помо́лимся. И свяще́нник моли́тву сию́:

Го́споди сил, скорбя́щих ра́досте, и пла́чущих утеше́ние, и всех в малоду́шии су́щих заступле́ние сый; пла́чем усо́пшаго содержи́мыя, Твои́м благоутро́бием уте́шив, вся́кую боле́знь, слежа́щую в сердца́х их, исцели́, и раба́ Твоего́, и́мярек, в наде́жде воскресе́ния жи́зни ве́чныя усо́пшаго, в не́дрех Авраа́млих упоко́й. Я́ко Ты еси́ воскресе́ние, живо́т и упокое́ние раба́ Твоего́, и́мярек, Христе́ Бо́же наш, и Тебе́ сла́ву возсыла́ем, со безнача́льным Твои́м Отце́м, и Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в, ами́нь.

Антифо́н 3: Наде́ющиися на Го́спода враго́м стра́шни, и всем ди́вни, горѐ бо зрят.

В беззако́ния рук свои́х, пра́ведных жре́бий, помо́щника Тя име́яй Спа́се, не простира́ет.

Сла́ва: Свята́го Ду́ха держа́ва на всех; Ему́же вы́шняя во́инства покланя́ются, со вся́ким дыха́нием до́льним.

И ны́не, то́йже: Ко́ль возлю́бленна селе́ния Твоя́ Го́споди сил:

Аллилу́иа, три́жды, повторя́юще по чи́ну и про́чая псалма́.

Та́же тропа́рь, глас 6:

Бра́тие мои́ возлю́бленнии, не забыва́йте мя, егда́ пое́те Го́спода, но помина́йте и бра́тство, и моли́те Бо́га, да упоко́ит мя с пра́ведными Госпо́дь.

Тропа́рь, глас 6: Напра́сная наста́ на мя сме́рть, и разлучи́ла мя е́сть от свои́х мои́х дне́сь; но преста́вивый мя Христе́, в ме́стех прохла́дных упоко́й.

Поми́луй нас Го́споди, поми́луй нас; вся́каго бо отве́та недоуме́юще, сию́ Ти моли́тву я́ко Влады́це гре́шнии прино́сим: поми́луй нас.

Сла́ва: Го́споди, поми́луй нас, на Тя бо упова́хом, не прогне́вайся на ны зело́, ниже́ помяни́ беззако́ний на́ших; но при́зри и ны́не я́ко благоутро́бен, и изба́ви ны от враг на́ших. Ты бо еси́ Бог наш, и мы лю́дие Твои́, вси дела́ ру́ку Твое́ю, и и́мя Твое́ призыва́ем.

И ны́не, Богоро́дичен: Милосе́рдия две́ри отве́рзи нам благослове́нная Богоро́дице, наде́ющиися на Тя да не поги́бнем, но да изба́вимся Тобо́ю от бед: Ты бо еси́ спасе́ние ро́да Христиа́нскаго.

Проки́мен, глас 6: Душа́ его́ во благи́х водвори́тся.

Стих: К Тебе́ Го́споди воззову́:

Апо́стол. К Кори́нфяном посла́ния свята́го апо́стола Па́вла чте́ние. Зача́ло 160:

Бра́тие, Христо́с воста́ от ме́ртвых нача́ток уме́ршым бы́сть; Поне́же бо челове́ком сме́рть бы́сть, и челове́ком воскресе́ние ме́ртвых. Я́коже бо о Ада́ме вси умира́ют, та́кожде и о Христе́ вси оживу́т. Ко́ждо же во свое́м чи́ну: нача́ток Христо́с, пото́м же Христу́ ве́ровавшии в прише́ствии Его́. Та́же кончи́на, егда́ преда́ст Ца́рство Бо́гу и отцу́, егда́ испраздни́т вся́ко нача́льство, и вся́ку вла́сть и си́лу. Подоба́ет бо Ему́ ца́рствовати, до́ндеже положи́т вся враги́ под нога́ма Свои́ма. После́дний же враг испраздни́тся, сме́рть; Вся бо покори́ под но́зе Его́. Внегда́ же рещи́, я́ко вся покоре́на су́ть Ему́, я́ве, я́ко ра́зве поко́ршаго ему́ вся. Егда́ же покори́т ему́ вся́ческая, тогда́ и сам Сын покори́тся поко́ршему Ему́ вся́ческая; да бу́дет Бог вся́ческая во всех.

Аллилу́иа. Блаже́н муж боя́йся Го́спода.

Стих: Си́льно на земли́ бу́дет се́мя его́.

Ева́нгелие от Иоа́нна, зача́ло 22:

Рече́ Госпо́дь ко прише́дшым к нему́ иуде́ом: се е́сть во́ля Посла́вшаго Мя, да всяк ви́дяй Сы́на, и ве́руяй в Него́, и́мать живо́т ве́чный; и воскрешу́ его́ Аз в после́дний де́нь. Ропта́ху у́бо иуде́е о Нем, я́ко рече́: аз е́смь хлеб сше́дый с Небесе́: И глаго́лаху: не сей ли е́сть Иису́с сын Ио́сифов, ему́же мы зна́ем отца́ и ма́терь; Ка́ко у́бо глаго́лет Сей, я́ко с Небесе́ снидо́х; Отвеща́ у́бо Иису́с, и рече́ им: не ропщи́те между́ собо́ю; Никто́же мо́жет приити́ ко Мне, а́ще не Оте́ц посла́вый Мя привлече́т его́, и Аз воскрешу́ его́ в после́дний де́нь.

Та́же блаже́нны, во глас 2:

Во Ца́рствии Твое́м, помяни́ нас Го́споди, егда́ прии́деши во Ца́рствии Твое́м.

Блаже́ни ни́щии ду́хом, я́ко тех е́сть Ца́рство Небе́сное.

Блаже́ни пла́чущии, я́ко ти́и уте́шатся.

Блаже́ни кро́тцыи, я́ко ти́и насле́дят зе́млю.

Блаже́ни а́лчущии, и жа́ждущии пра́вды, я́ко ти́и насы́тятся.

Блаже́ни ми́лостивии, я́ко ти́и поми́ловани бу́дут.

Дре́вле у́бо Ада́м, вкуси́вый дре́ва сне́днаго, из рая́ изгна́н бы́сть, разбо́йник же на кресте́ пове́шен, Бо́га Тя испове́дав, в рай всели́ся. И мы спа́сшиися стра́стию Твое́ю Влады́ко, разбо́йника подража́юще, ве́рою вопие́м: помяни́ и нас, егда́ прии́деши во Ца́рствии Твое́м.

Блаже́ни чи́стии се́рдцем, я́ко ти́и Бо́га у́зрят.

Пе́рсть взем от земли́ Созда́вый мя, те́ло мое́ созда́л е́сть Боже́ственным хоте́нием, ду́шу же живоно́сным дунове́нием вдохну́в, вложи́ повеле́нием святы́м; Отню́дуже тле́нию грехо́вному зле подведе́на мя воззва́л еси́ Человеколю́бче, за кра́йнее благоутро́бие. Но упоко́й Бо́же, его́же прия́л еси́, со святы́ми Твои́ми.

Блаже́ни миротво́рцы, я́ко ти́и сы́нове Бо́жии нареку́тся.

Егда́ душа́ от те́ла разлуча́ется, ужа́сное та́инство, и стра́шное всем: душа́ у́бо плаче́вно отхо́дит, те́ло же покрыва́ется земли́ пре́дано. Те́мже и мы, позна́вше коне́чный исхо́д, ко Спа́су предвари́м, со слеза́ми вопию́ще: помяни́ и нас, егда́ прии́деши во Ца́рствии Твое́м.

Блаже́ни изгна́ни пра́вды ра́ди, я́ко тех е́сть Ца́рство Небе́сное.

Почто́ мене́ рыда́ете лю́то, о челове́цы; Почто́ всу́е мяте́теся; Преста́вленный всем провещава́ет. Сме́рть бо е́сть всем упокое́ние; Отню́дуже глас И́ова услы́шим глаго́люще: сме́рть му́жу поко́й е́сть. Но упоко́й Бо́же, его́же прия́л еси́, со святы́ми Твои́ми.

Блаже́ни есте́, егда́ поно́сят вам, и изжену́т, и реку́т всяк зол глаго́л, на вы лжу́ще Мене́ ра́ди.

Всему́дрый Па́вел предрече́ я́ве преставле́ние, всех науча́яй, я́ко ме́ртвии воста́нут нетле́нни, мы же измени́мся Бо́жиим повеле́нием: тем стра́шно и труба́ о́ная возгласи́т, от ве́ка спя́щыя от сна возста́вит. Но упоко́й Бо́же, его́же прия́л еси́, со святы́ми Твои́ми.

Ра́дуйтеся и весели́теся, я́ко мзда ва́ша мно́га на Небесе́х.

Преста́вленный, и во гро́бе лежа́й ме́ртвый, благопримири́тельный всем вопие́т: прииди́те земноро́днии ко мне, у́зрите добро́ту теле́сную очерне́вшу. Те́мже от нея́ позна́вше бра́тие исхо́д, ко Спа́су предвари́м со слеза́ми вопию́ще: упоко́й того́ Бо́же, его́же прия́л еси́, со святы́ми Твои́ми.

Сла́ва И ны́не, Богоро́дичен:

Преесте́ственне во чре́ве Твое́м Влады́чице безсе́менно зачала́ еси́ Бо́га преве́чнаго, и пло́тию Того́ родила́ еси́ Бо́га же и челове́ка, непрело́жно и неслия́нно. отню́дуже и мы Богоро́дицу Тя при́сно зна́юще, ро́ждшемуся из Тебе́ Бо́гу ве́рою вопие́м: помяни́ и нас во Ца́рствии Твое́м.

Проки́мен, глас 6: Блаже́н, его́же избра́л и прия́л еси́ Го́споди.

Стих: Душа́ его́ во благи́х водвори́тся.

Апо́стол. К Ри́мляном посла́ния свята́го апо́стола Па́вла чте́ние. Зача́ло 113:

Бра́тие, му́дрствуяй де́нь, Го́сподеви му́дрствует; и не му́дрствуяй де́нь, Го́сподеви не му́дрствует. Яды́й, Го́сподеви яст, благодари́т бо Бо́га; и не яды́й, Го́сподеви не яст, и благодари́т Бо́га. Никто́же бо нас себе́ живе́т, и никто́же себе́ умира́ет. А́ще у́бо живе́м, Го́сподеви живе́м; а́ще же умира́ем, Го́сподеви умира́ем; а́ще у́бо живе́м, а́ще умира́ем, Госпо́дни есмы́. На сие́ бо Христо́с и у́мре, и воскре́се и оживе́, да и ме́ртвыми и живы́ми облада́ет.

Аллилу́иа, глас 6: Блаже́н, его́же избра́л и прия́л еси́, Го́споди.

Стих: Душа́ его́ во благи́х водвори́тся.

Ева́нгелие от Иоа́нна, зача́ло 23:

Рече́ Госпо́дь ко прише́дшым к нему́ иуде́ом: Аз е́смь хлеб живо́тный; Отцы́ ва́ши ядо́ша ма́нну в пусты́ни, и умро́ша; Сей е́сть хлеб сходя́й с Небесе́, да а́ще кто от него́ яст, не у́мрет. Аз е́смь хлеб живо́тный, И́же сше́дый с Небесе́: а́ще кто сне́сть от хле́ба сего́, жив бу́дет во ве́ки; и хлеб его́же Аз дам, пло́ть моя́ е́сть, ю́же Аз дам за живо́т ми́ра. Пря́хуся же между́ собо́ю жи́дове, глаго́люще: ка́ко мо́жет сей нам да́ти пло́ть свою́ я́сти; Рече́ же им Иису́с: ами́нь ами́нь глаго́лю вам, а́ще не сне́сте пло́ти Сы́на челове́ческаго, ни пие́те кро́ве Его́, живота́ не и́мате в себе́. Яды́й мою́ пло́ть, и пия́й мою́ кро́вь, и́мать живо́т ве́чный; и Аз воскрешу́ его́ в после́дний де́нь.

Та́же и 50 псало́м, и кано́н, глас 6:

Пе́снь 1. Ирмо́с: Волно́ю морско́ю:

Припе́в: Упоко́й Го́споди ду́шу усо́пшаго раба́ Твоего́.

Тебе́ Благоде́телю, и всех Влады́це Христу́ припа́даем со слеза́ми те́пле, надгро́бную сию́ с пла́чем взыва́юще пе́снь: ве́рнаго раба́ Твоего́ упоко́й, я́ко благоутро́бен.

Е́же одесну́ю Тебе́ сподо́би Сло́ве, свята́го стоя́ния со избра́нными Твои́ми, в наде́жде воскресе́ния уме́ршаго, Человеколю́бче, приле́жно мо́лимся со гла́сом хвале́ния.

В небе́сном честно́м Ца́рствии Твоего́ избра́ннаго раба́, све́тло ра́доватися, от земли́ преста́вльшагося сподо́би Человеколю́бче, презира́яй, я́ко Благоутро́бен, душе́вныя согреше́ния.

Сла́ва: Увы́ мне, я́ко трава́ жите́йская сла́ва, вку́пе прозябе́, и а́бие у́сше. Где во гро́бе сан; Где зрак, или́ добро́та та́мо; Те́мже пощади́, Го́споди, раба́ Твоего́, я́ко Благоутро́бен.

И ны́не, Богоро́дичен: По до́лгу вси любо́вию воспева́ем Тя Де́во Пречи́стая, Мари́е ма́ти Бо́жия, я́ко неусыпа́емое и́маши моли́твы Твоея́ о́ко при́сно, от прегреше́ний изба́ви ны́не и суда́ сме́ртнаго нас.

Пе́снь 3. Ирмо́с: Не́сть свят, я́коже Ты Го́споди Бо́же:

Не́сть челове́к на земли́, и́же не согреши́ Сло́ве; те́мже моле́ние приими́, на́ми смире́нными, но осла́би, оста́ви Спа́се, Твоего́ раба́ вся согреше́ния.

И кто человеколю́бец я́коже Ты Го́споди ми́лостив, проща́яй грехи́ и живы́м и ме́ртвым вла́стию мно́гою; Те́мже то́ю спаси́ и раба́ Твоего́.

Сла́ва: Го́рняго зва́ния Спа́се, ве́рно преста́вльшагося покажи́ снасле́дника, прие́мля того́ коне́чную моли́тву сле́зную, Еди́не Безгре́шне.

И ны́не, Богоро́дичен: Су́щая Влады́чица на́шя, всесвята́я Де́во, моля́щи не преста́й, Его́же родила́ еси́ Бо́га, преста́вльшагося ве́рно, Ца́рствия своего́ сподо́бити.

Седа́лен, глас 6: Вои́стинну суета́ вся́ческая, житие́ же се́нь и со́ние е́сть; и́бо всу́е мяте́тся всяк земноро́дный, я́коже рече́ писа́ние: егда́ мир приобря́щем, тогда́ во гроб всели́мся, иде́же ку́пно ца́рие и ни́щии. Те́мже Христе́, раба́ Твоего́ во стране́ живы́х, в селе́ниих пра́ведных упоко́й.

Пе́снь 4. Ирмо́с: На кресте́ Твое́ Боже́ственное:

Я́ко суд нестерпи́мый е́сть стра́шнаго преще́ния о́наго дне; преста́вльшемуся в ве́ре и наде́жде воскресе́ния, оставле́ние всех согреше́ний приле́жно у Христа́ про́сим.

Я́коже покая́нием возже́гшаго Тебе́ свещу́ Христе́ све́тло, пре́жде сме́рти, раба́ Влады́ко благоутро́бне Спа́се, черто́га Твоего́ сего́ све́тло сподо́би.

Сла́ва: Егда́ обнажи́ши сокрове́нная вся, и обличи́ши Христе́ на́шя грехи́, его́же прия́л еси́ Го́споди, пощади́ Благи́й, его́ помина́яй испове́дание.

И ны́не, Богоро́дичен: Не забыва́й вопию́щих Ти с пла́чем приле́жно свята́я Богоро́дице, всех упокое́ние, обрести́ блага́я ве́рному Твоему́ рабу́, от нас преста́вльшемуся.

Пе́снь 5. Ирмо́с: Богоявле́ния Твоего́ Христе́:

В лице́ избра́нных, и в сла́дости ще́дре ра́йской, его́же в ве́ре о нас преста́вил еси́, упоко́й; Ты бо положи́л еси́ всем, Спа́се наш, согреша́ющым челове́ком покая́ние Боже́ственное, я́ко Влады́ка, и сего́ Ца́рствия Твоего́ сподо́би.

По вла́сти я́ко Бог, Влады́чне ми́луеши Твое́ созда́ние, его́же зако́ну челове́ческому покори́выйся Го́споди, Еди́не Человеколю́бче; те́мже осла́би, оста́ви Спа́се, ве́рою преста́вльшемуся согреше́ния, и сего́ Ца́рствия Твоего́ сподо́би.

Сла́ва: Никто́же убе́гнет та́мо стра́шнаго суда́ Твоего́ Престо́ла, ца́рие си́льнии, вси с рабы́ вку́пе предста́нут, и глас судии́ стра́шный согреши́вших люде́й на суд гее́нны отшле́т; от нея́же Христе́, изба́ви раба́ Твоего́.

И ны́не, Богоро́дичен: Из Тебе́ рожде́йся Изба́витель преесте́ственне по естеству́ челове́ческому, Его́же Де́во неневе́стная приле́жно моли́, изба́вити всех мук, и лю́тых и стра́шных а́дских муче́ний; спаси́ и́же от нас ны́не преста́вльшагося ве́рно.

Пе́снь 6. Ирмо́с: Бе́здна после́дняя:

Сме́рть и гроб, и суд нас ожида́ет, облича́ющий дела́ вся, от него́же раба́ Твоего́ изба́ви Человеколю́бче, его́же преста́вил еси́.

Отве́рзи Спа́се мой, преста́вльшемуся, мо́лимся Тебе́, ми́лости Твоея́ Христе́ две́рь, да ликовству́ет в сла́ве причаща́яйся весе́лия держа́вы Твоея́.

Сла́ва: Изба́ви прегреше́ний Твое́ю ми́лостию Спа́се Твоего́ раба́, его́же ны́не в ве́ре преста́вил еси́; я́ко никто́же оправда́ется от дел челове́ческих, Человеколю́бче.

И ны́не, Богоро́дичен: Сме́рти умерщвле́ние, и кля́твы отя́тие Созда́тель, пло́тию роди́ся Богороди́тельнице, и всех в ве́ре уме́рших спаса́ет, я́ко Благ и Человеколю́бец.

Та́же, ектениа́ обы́чная: Па́ки и па́ки: Еще́ мо́лимся о упокое́нии души́ усо́пшаго: Я́ко да Госпо́дь Бог: Ми́лости Бо́жия:

Го́споду помо́лимся.

Моли́тва: Бо́же духо́в:

Конда́к, глас 8: Со святы́ми упоко́й Христе́, ду́шу раба́ Твоего́, иде́же не́сть боле́знь, ни печа́ль, ни воздыха́ние, но жи́знь безконе́чная.

И́кос:

Сам Еди́н еси́ безсме́ртный, сотвори́вый и созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя, и реки́й ми: я́ко земля́ еси́, и в зе́млю оти́деши, а́може вси челове́цы по́йдем, надгро́бное рыда́ние, творя́ще пе́снь:

Аллилу́иа.

Мы́сленно молю́: услы́шите, с труды́ бо сия́ и веща́ю: вас бо ра́ди сотвори́х рыда́ние, не́гли име́ти кому́ в по́льзе. Но егда́ сия́ пе́ти и́мате, помина́йте мя иногда́ зна́емаго, мно́гажды бо вку́пе снидо́хомся, и в до́му Бо́жии вку́пе поя́хом:

Аллилу́иа.

Воста́вше у́бо вси собери́теся, и се́дше сло́во услы́шите: стра́шное, бра́тие, суди́ще, иде́же и́мамы вси предста́ти: не́сть та́мо раб, ниже́ свобо́ден; ниже́ е́сть та́мо ма́лый, ниже́ вели́кий, но вси на́зи предста́нем. Сего́ ра́ди добро́ е́сть вопи́ти ча́сто псало́м:

Аллилу́иа.

Облии́мся вси слеза́ми, егда́ ви́дим мо́щи лежа́щыя, и прибли́жившеся вси целова́ти, ра́вне же и сия́ привещава́ти: се оста́вил еси́ лю́бящыя тя, не глаго́леши с на́ми про́чее, о дру́же! чесо́ ра́ди не глаго́леши, я́коже глаго́лал еси́ нам; но си́це молчи́ши, е́же глаго́лати с на́ми:

Аллилу́иа.

Что го́рькия умира́ющих глаго́лы, бра́тие, я́же веща́ют, егда́ отхо́дят: бра́тий разлуча́юся, друго́в оставля́ю всех, и отхожду́; Ка́мо у́бо иду́, не вем: или́ ка́ко и́мам бы́ти та́мо, не вем, то́чию Бог призва́вый мя. Но па́мять твори́те с пе́снию:

Аллилу́иа.

Ка́мо у́бо ду́шы ны́не и́дут; Ка́ко у́бо ны́не та́мо пребыва́ют; Жела́х ве́дати та́инство, но никто́же дово́лен пове́дати; еда́ и они́ помина́ют своя́, я́коже и мы о́ныя, или́ они́ про́чее забы́ша пла́чущыя их, и творя́щыя пе́снь:

Аллилу́иа.

Провожда́йте дру́зи уме́ршыя, и со тща́нием ко гро́бу дости́гните, и та́мо внима́тельне взира́йте, и но́ги ва́шя угото́вите: вся́кая ю́ность та́мо растли́ся, всяк во́зраст та́мо увяде́; та́мо прах и пе́пел и че́рвие; та́мо вся́кое молча́ние, и никто́же глаго́ляй:

Аллилу́иа.

Се ны́не ви́дим лежа́ща, но нам ктому́ не предлежа́ща; се уже́ и язы́к умолче́; се уже́ и устне́ преста́ша; здра́вствуйте дру́зи, ча́да; спаса́йтеся бра́тие, спаса́йтеся зна́емии, аз бо в пу́ть мой ше́ствую; но па́мять твори́те о мне, с пе́снию:

Аллилу́иа.

Никто́же бо та́мошних па́ки оживе́, да рече́т нам, ка́ко пребыва́ют, и́же иногда́ бра́тия и вну́цы та́мо предвари́вше ко Го́споду. Те́мже мно́жицею при́сно глаго́лем: еда́ е́сть та́мо ви́дети друг дру́га; Еда́ е́сть та́мо ви́дети бра́тию; Еда́ е́сть та́мо вку́пе рещи́ псало́м:

Аллилу́иа.

И́дем путе́м ве́чным предстоя́ще я́коже осужде́ны, до́ле маа́юще вси ли́цами, где тогда́ добро́та; Где пе́нязи; Где сла́ва тогда́ жития́ сего́; Ничто́же сих та́мо помо́жет нам, то́кмо глаго́лати ча́сто псало́м:

Аллилу́иа.

Что мяте́шися безвре́менно, о челове́че; Еди́н час, и вся прехо́дят; не́сть бо во а́де покая́ния, не́сть та́мо про́чее осла́бы. Та́мо че́рвь неусыпа́емый, та́мо земля́ темна́ и помраче́на вся, иде́же и́мам аз осуди́тися; не бо потща́хся весьма́ глаго́лати ча́сто псало́м:

Аллилу́иа.

Ничто́же си́це е́сть удобозабыва́емое, я́ко челове́ку от челове́ка разлуча́ему; а́ще бо и ма́ло вре́мя помина́ем, но а́бие сме́рть забыва́ем, я́ко не уме́рша сего́ иму́ще; и роди́телие бо ча́да вся́чески забыва́ют, я́же от утро́б ро́ждше воспита́ша, и испусти́ша сле́зы с пе́снию:

Аллилу́иа.

Воспомина́ю вам, бра́тие мои́, и ча́да, и дру́зи мои́, не забыва́йте мя, егда́ моли́теся ко Го́споду; молю́, прошу́, и ми́лся де́ю, навыка́йте сим в па́мять, и пла́чите мене́ де́нь и но́щь. Я́коже И́ов к друго́м реку́ к вам: седи́те па́ки рещи́:

Аллилу́иа.

Вся оста́вльше и́дем, и на́зи и ско́рбни предста́нем, добро́та бо я́ко трава́ увяда́ет, но то́кмо прельща́емся челове́цы; наг роди́лся еси́, о окая́нне, наг и та́мо и́маши предста́ти вся́ко. Не мечта́йся челове́че в житии́ когда́, но то́кмо всегда́ стени́ с пла́чем:

Аллилу́иа.

А́ще поми́ловал еси́ челове́че челове́ка, той и́мать та́мо поми́ловати тя; и а́ще кото́рому сироте́ сострада́л еси́, той изба́вит тя та́мо от ну́жды; а́ще в житии́ на́га покры́л еси́, той и́мать та́мо покры́ти тя, и пе́ти псало́м:

Аллилу́иа.

Лука́вый пу́ть, и́мже отхожду́, и́мже никогда́же си́це ходи́х, и страна́ она́ незна́ема, иде́же никто́же ника́коже познава́ет мя, ужа́сно е́сть ви́дети водя́щыя стра́шно, призва́вшаго мя живото́м и сме́ртию влады́чествующа, и зову́ща нас, егда́ хо́щет, та́мо:

Аллилу́иа.

А́ще от страны́ не́кия иду́ще, водя́щыя не́кия тре́буем, что сотвори́м, а́може и́дем во страну́, иде́же не познава́ем; мно́гих тебе́ тогда́ води́телей потре́ба; мно́гих тебе́ моли́тв спутеше́ствующих, спасти́ ду́шу окая́нную, до́ндеже дости́гнути ко Христу́, и рещи́ к нему́:

Аллилу́иа.

Веще́ственным страсте́м подлежа́щии, та́мо осла́бы ника́коже и́мут; та́мо у́бо обличи́телие стра́шнии, та́мо же и кни́ги отверза́ются; где о́крест у́зриши тогда́ челове́че; Или́ кто и́мать та́мо по́мощи тебе́ тогда́; Ра́зве живы́й благо́е что сотвори́л еси́, и добро́ ни́щым что сотвори́л еси́, поя́:

Аллилу́иа.

Ю́ность и добро́та теле́сная во вре́мя сме́рти увяда́ет, и язы́к лю́те тогда́ опаля́ется, и горта́нь изсуши́вся воспаля́ется; оче́с добро́та тогда́ угаса́ет, добро́та лица́ изменя́ется вся, добро́та вы́и сокруша́ется, и про́чее безмо́лвствует глаго́лати ча́сто:

Аллилу́иа.

Безмо́лвствуйте у́бо, безмо́лвствуйте лежа́щему, про́чее умолчи́те, и вели́кое та́инство у́зрите; стра́шный бо час, умолчи́те, да с ми́ром душа́ оти́дет; в по́двизе бо вели́цем содержи́тся, и во стра́се мно́зе мо́лит Бо́га:

Аллилу́иа.

Аз у́бо ви́дех младе́нца умира́юща, и живо́т мой опла́ках, возмяте́ся бо весьма́ и трепета́ше, и егда́ прии́де час, возопи́: о́тче, помози́ ми, ма́ти, спаси́ мя, и никто́же дово́лен тогда́ по́мощи ему́, то́кмо ви́дяще увяда́ют, и во гро́бе пла́чут его́:

Аллилу́иа.

Коли́цы у́бо внеза́пу восхи́тишася от саме́х сосце́в во гроб, и спряго́шася спряжа́нием ве́чным, и сотвори́ша пла́чь неиждиви́мый, и от черто́га не воста́ша; но вку́пе брак, вку́пе гроб, вку́пе спряже́ние, вку́пе и распряже́ние, вку́пе смех, вку́пе и пла́чь, вку́пе и псало́м:

Аллилу́иа.

Разжига́емся то́кмо слы́шаще, я́ко е́сть та́мо свет ве́чный, та́мо исто́чник живота́ на́шего, и та́мо наслажде́ние ве́чное; та́мо е́сть рай, о не́мже вся́кая душа́ пра́ведных ра́дуется. Сни́демся вси во Христе́ и мы, да си́це возопии́м вси Бо́гу:

Аллилу́иа. Богоро́дичен. Всесвята́я Де́во безневе́стная, ро́ждшая свет непристу́пный, молю́, ми́лся де́ю и прошу́, моля́щи не преста́й Го́спода о усо́пшем ра́бе Твое́м, Пречи́стая, я́ко да обря́щет та́мо оставле́ние прегреше́ний в де́нь су́дный, всечи́стая. Дерзнове́ние бо и́маши я́ко Влады́чица, моли́ти Сы́на Твоего́ всегда́:

Аллилу́иа.

Та́же па́ки конда́к: Со святы́ми упоко́й:

Пе́снь 7. Ирмо́с: Неизрече́нное чу́до:

Огня́ гее́нскаго, и стра́шнаго изрече́ния, я́ко щедр изба́ви Христе́, его́же в ве́ре от ны́не прия́л еси́ раба́ Твоего́, и пе́ти тебе́ пода́ждь Твоему́ рабу́: изба́вителю Бо́же, благослове́н еси́.

В земли́ кро́тких, и в ра́йском наслажде́нии, усо́пшаго Раба́ Твоего́ ве́рно, в ме́сте селе́ния сла́вы ди́вныя Бо́же сподо́бивый, пода́ждь пе́ти Тебе́: изба́вителю Бо́же, благослове́н еси́.

Сла́ва: Вели́к суд, ну́жда же неисповеди́мая гее́нны е́сть, бра́тие; та́мо бо ду́шы гре́шных с те́лом у́бо паля́тся, и с боле́знию слезя́т, не могу́ще вопи́ти: изба́вителю Бо́же, благослове́н еси́.

И ны́не: Несумне́нно Бо́жию ма́терь, пою́щыя Тя, Богоро́дице пренепоро́чная, и живу́щыя при́сно огражда́й моли́твами твои́ми, преста́вльшыяся, го́рьких муче́ний изба́ви, да с Тобо́ю Христу́ вопию́т: изба́вителю Бо́же благослове́н еси́.

Пе́снь 8. Ирмо́с: Ужасни́ся боя́йся Не́бо:

О кий час стра́шный согреша́ющих ожида́ет, бра́тие! О кий страх тогда́! О́гнь поя́ст гее́нский, и ве́чно му́чити бу́дет. Те́мже Христе́ ще́дрый Влады́ко, от нас преста́вленнаго ны́не стра́шнаго преще́ния изба́ви, гее́нскаго муче́ния исхити́ во ве́ки.

О ра́дости пра́ведных, ю́же прие́млют, егда́ прии́дет судия́! та́мо бо черто́г угото́вася и рай, и все Христо́во Ца́рство; в не́мже Твоя́ рабы́ веселя́щыяся покажи́ со святы́ми Христе́, во ве́ки.

Сла́ва: Кто постои́т Христе́, прише́ствия Твоего́ стра́шному преще́нию; Та́мо Не́бо свие́тся я́коже сви́ток стра́шно, и паду́т зве́зды, стра́хом поколе́блется вся тва́рь, и свет измени́тся; но тогда́ пощади́ сло́ве, от нас преста́вльшагося.

И ны́не, Богоро́дичен: Его́же воплоти́ла еси́ Сы́на, па́че естества́ чи́стая, сей е́сть судия́ и живы́х и ме́ртвых, и судя́й всей земли́, и спаса́ет от муче́ний, и́хже хо́щет; па́че же любо́вию покланя́ющихся во изображениих Тому́, и Тя воспева́ющих Богоро́дицу во вся ве́ки.

Пе́снь 9. Ирмо́с: Не рыда́й мене́ ма́ти:

Не рыда́йте вси, и́же в ве́ре уме́ршии, я́ко Христо́с о нас претерпе́ пло́тию и крест и погребе́ние, безсме́ртия сы́ны соде́ла вся, вопию́щыя к Нему́: не вни́ди в суд с рабо́м Твои́м.

Я́ко в ве́ре и наде́жде воскресе́ния усо́пшаго бра́та, во оби́телех святы́х вчини́ти, Христо́ви усе́рдно помо́лимся ве́рнии: суд бо та́мо гро́зный, и испыта́ние стра́шное, и никто́же сам себе́ по́мощи мо́жет, ра́зве блага́я дела́, и о́бщая ве́рных моли́тва, и возопии́м: не вни́ди в суд Го́споди, с рабо́м Твои́м.

Сла́ва: В нестаре́емей Твое́й сла́ве, и сла́дости ра́йской, от нас преста́вльшагося ны́не вчини́ Бла́же, я́ко правосла́вием и покая́нием прите́кшаго к Тебе́ в ве́ре, и сотвори́ его́ избра́нна предста́теля Ца́рствия Твоего́.

И ны́не, Богоро́дичен: Тя я́ко Ма́терь жи́зни па́че естества́ су́щую Богоро́дице Де́во, благоче́стно воспева́ем ве́рнии: Тобо́ю бо мы уме́ршии пре́жде обезсме́ртившеся, обрето́хом живо́т, и се Тебе́ пе́снь исполня́ем.

Диа́кон: Па́ки и па́ки ми́ром Го́споду помо́лимся. Го́споди, поми́луй.

Еще́ мо́лимся о упокое́нии души́ усо́пшаго раба́ Бо́жия, и́мярек, и о е́же про́сти тися ему́ вся́кому прегреше́нию, во́льному же и нево́льному.

Го́споди, поми́луй, три́жды.

Я́ко да Госпо́дь Бог учини́т ду́шу его́, иде́же пра́веднии упокоева́ются.

Го́споди, поми́луй, три́жды.

Ми́лости Бо́жия, Ца́рства Небе́снаго, и оставле́ния грехо́в его́ у Христа́ Безсме́ртнаго Царя́ и Бо́га на́шего про́сим.

Пода́й, Го́споди.

Диа́кон: Го́споду помо́лимся. Го́споди, поми́луй.

Свяще́нник глаго́лет моли́тву сию́:

Бо́же духо́в, и вся́кия пло́ти, сме́рть попра́вый, и диа́вола упраздни́вый, и живо́т ми́ру Твоему́ дарова́вый; Сам Го́споди, упоко́й ду́шу усо́пшаго раба́ Твоего́, и́мярек, в ме́сте све́тле, в ме́сте зла́чне, в ме́сте поко́йне, отню́дуже отбеже́ боле́знь, печа́ль и воздыха́ние, вся́кое согреше́ние, соде́янное им, сло́вом, или́ де́лом, или́ помышле́нием, я́ко Благи́й Человеколю́бец Бог про́сти . Я́ко не́сть челове́к, и́же жив бу́дет, и не согреши́т; Ты бо Еди́н кроме́ греха́, пра́вда Твоя́ пра́вда во ве́ки, и сло́во Твое́ и́стина.

Возглаша́ет: Я́ко Ты еси́ воскресе́ние, и живо́т, и поко́й усо́пшаго раба́ Твоего́, и́мярек, Христе́ Бо́же наш, и Тебе́ сла́ву возсыла́ем, со Безнача́льным Твои́м Отце́м, и Пресвяты́м, и Благи́м, и Животворя́щим Твои́м Ду́хом, ны́не и при́сно, и во ве́ки веко́в, ами́нь.

Ексапостила́рий: Ны́не упоко́ихся, и обрето́х осла́бу мно́гу, я́ко преста́вихся от истле́ния, и преложи́хся к животу́: Го́споди сла́ва Тебе́.

И лю́дие то́йжде.

Стих: Челове́к я́ко трава́, дни́е его́ я́ко цвет се́льный:

Стих 2: Я́ко дух про́йде в нем, и не бу́дет.

Стих 3: И и́стина Госпо́дня пребыва́ет во век.

И на ки́йждо стих ексапостила́рий. Та́же, Сла́ва, И ны́не:

Ны́не избра́х Богома́терь отрокови́цу, я́ко роди́ся из нея́ Христо́с изба́витель всех; Го́споди сла́ва Тебе́.

И а́бие: Хвали́те Го́спода с небе́с:

Та́же стихи́ры, глас 6. Подо́бен: Отча́янная жития́ ра́ди:

Обоготворе́н в преставле́нии животворя́щим Твои́м Христе́ ны́не та́инством, к Тебе́ пре́йде Боже́ственный служи́тель Твой; приими́ в ру́це Твои́ ду́шу его́ я́ко птенца́, учини́ его́ во дво́рех Твои́х и во а́нгельская ликостоя́ния, и упоко́й, его́же прия́л еси́ повеле́нием Твои́м Го́споди, вели́кия ра́ди Твоея́ ми́лости.

Стра́нное сме́рти та́инство: надхо́дит бо всем в безго́дии, естество́ растлева́ется ну́ждею, ста́рцы взима́ет, игу́мены, кни́жники, учи́тели су́етная му́дрствующыя тлит, епи́скопы, па́стыри. Но воззове́м со слеза́ми: повеле́нием Твои́м Го́споди, его́же прия́л еси́, упоко́й вели́кия ра́ди Твоея́ ми́лости.

Жи́тельствовав во благоче́стии, и укра́шен свяще́нник Твой Христе́, жрец и приноси́тель Боже́ственных та́инств, Твои́м Боже́ственным повеле́нием пре́йде от жите́йских молв к Тебе́; его́же я́ко свяще́нника Спа́се прии́м спаси́, и с пра́ведными упоко́й, его́же прия́л еси́, вели́кия ра́ди Твоея́ ми́лости.

Сла́ва, И ны́не, Богоро́дичен: Бо́га из Тебе́ вопло́щшагося позна́хом богоро́дице Де́во; Того́ моли́, спасти́ся душа́м на́шым.

Та́же глаго́лют: Сла́ва в вы́шних: И по е́же, Сподо́би Го́споди: глаго́лет настоя́щыя стихи́ры, самогла́сны дамаски́новы, глас 1:

Ка́я жите́йская сла́дость пребыва́ет печа́ли неприча́стна; Ка́я ли сла́ва стои́т на земли́ непрело́жна; Вся се́ни немощне́йша, вся со́ний преле́стнейша; еди́нем мгнове́нием, и сия́ вся сме́рть прие́млет. Но во све́те Христе́ Лица́ Твоего́, и в наслажде́нии Твоея́ красоты́, его́же избра́л еси́ упоко́й, я́ко Человеколю́бец.

Стих: Госпо́дь пасе́т мя, и ничто́же мя лиши́т.

Де́лом Спа́се мой показу́еши, я́ко Ты еси́ всех воскресе́ние, сло́вом Сло́ве Ла́заря из ме́ртвых воскреси́л еси́; тогда́ вереи́ сотро́шася, врата́ же а́дова смути́шася; тогда́ сон сме́рть показа́ся челове́ческая. Но во е́же спасти́ Твое́ созда́ние, а не во е́же осуди́ти прише́дый, его́же избра́л еси́, упоко́й я́ко Человеколю́бец.

Сла́ва, И ны́не, Богоро́дичен: Всем предста́тельница те́плая показа́лася еси́ Богороди́тельнице, всех покро́ве, держа́ва же от Бо́га прибега́ющым к Тебе́: в ну́ждах су́щым помо́щница. Пле́нным ско́рое избавле́ние. Тебе́ бо Христо́с на ва́рвары положи́л е́сть мсти́тельницу, и Засту́пницу, и сте́ну неразруши́мую, и немощны́м кре́пость непребори́мую, и ми́ра пода́тельницу душа́м на́шым.

Стихи́ры, глас 2: Увы́ мне, яковы́й по́двиг и́мать душа́, разлуча́ющися от телесе́! Увы́, тогда́ коли́ко слези́т, и не́сть поми́луяй ю̀! Ко а́нгелом о́чи возводя́щи, безде́льно мо́лится; к челове́ком ру́це простира́ющи, не и́мать помога́ющаго. Те́мже возлю́бленнии мои́ бра́тие, помы́сливше на́шу кра́ткую жи́знь, преста́вленному упокое́ния от Христа́ про́сим, и душа́м на́шым ве́лию ми́лость.

Стих: Ко Го́споду, внегда́ скорбе́ти ми, воззва́х, и услы́ша мя.

Прииди́те, у́зрим вси чу́до па́че ума́, и́же вчера́ с на́ми сый, ны́не лежи́т мертв; прииди́те, позна́ем, я́ко пома́ле в погреба́льная пови́ты и мы сконча́емся. И́же ми́ры помазу́ющиися благоуха́нными, лежа́т смра́дни; ка́ко зла́том крася́щиися, не укра́шени лежа́т и безобразни. Те́мже, возлю́бленнии мои́ бра́тие, разуме́вше на́шу кра́ткую жи́знь, преста́вленному упокое́ния у Христа́ про́сим, и душа́м на́шым ве́лию ми́лость.

Стих: Го́споди, изба́ви ду́шу мою́ от усте́н непра́ведных.

Спаса́йся су́етный животе́, спаса́йтеся вси дру́зи, сро́дницы же и ча́да; в пу́ть бо иду́, и́мже никогда́же ше́ствовах. Но прииди́те помяну́вше мою́ к вам любо́вь, после́дуйте, и гро́бу предади́те бре́ние мое́ сие́, и иму́щаго суди́ти смире́нную мою́ ду́шу, со слеза́ми Христа́ моли́те, я́ко да огня́ и́змет мя неугаси́маго.

Сла́ва, И ны́не, Богоро́дичен: Непроходи́мая врата́, та́йно запеча́тствованная, благослове́нная Богоро́дице Де́во, приими́ моле́ния на́шя, и принеси́ Твоему́ Сы́ну и Бо́гу, да спасе́т Тобо́ю ду́шы на́шя.

Стихи́ры самогла́сны, глас 3:

Се лежу́ возлю́бленнии мои́ бра́тие, посреде́ всех молчали́в и безгла́сен; уста́ упраздни́шася, язы́к преста́, и устне́ препя́шася, ру́це связа́стеся, и но́зе сплето́стеся, зрак измени́ся, о́чи угасо́сте, и не ви́дят рыда́ющих, слух не прие́млет печа́лующих во́пль, нос не уха́ет кади́льнаго благово́ния; и́стинная же любо́вь николи́же умерщвля́ется. Те́мже молю́ всех зна́емых, и друго́в мои́х, помяни́те мя пред Го́сподем, я́ко да в де́нь су́дный обря́щу ми́лость на суди́щи о́ном стра́шном.

Стих: Возведо́х о́чи мои́ в го́ры, отню́дуже прии́дет по́мощь моя́.

Вся суета́ челове́ческая, ели́ка не пребыва́ют по сме́рти; не пребыва́ет бога́тство, ни сше́ствует сла́ва; прише́дши бо сме́рти, сия́ вся потреби́шася. Те́мже Христу́ безсме́ртному возопии́м: преста́вленнаго от нас упоко́й, иде́же всех е́сть веселя́щихся жили́ще.

Стих: Госпо́дь сохрани́т вхожде́ние твое́ и исхожде́ние твое́ от ны́не и до ве́ка.

Челове́цы, что всу́е мяте́мся; Тече́ние ско́рое и жесто́кое е́сть, и́мже тече́м; дым е́сть житие́, па́ра, и пе́пел, и прах по ма́ле бу́дем, и я́ко цвет увяда́ем. Те́мже Христу́ безсме́ртному возопии́м: преста́вльшагося от нас упоко́й, иде́же всех е́сть веселя́щихся жили́ще.

Сла́ва, И ны́не, Богоро́дичен:

Приста́нище Тя спасе́ния и́мамы Богоро́дице Де́во, в пучи́не жития́ обурева́емии. те́мже моли́ от Тебе́ безсе́менно вопло́щшагося Бо́га, и неизрече́нно вочелове́чшагося, спасти́ ду́шы на́шя.

Стихи́ры, глас 4: Где е́сть мирско́е пристра́стие; Где е́сть привре́менных мечта́ние; Где е́сть зла́то и сребро́; Где е́сть рабо́в мно́жество и молва́; Вся пе́рсть, вся пе́пел, вся се́нь. Но прииди́те, возопии́м безсме́ртному Царю́: Го́споди, ве́чных Твои́х благ сподо́би преста́вльшагося от нас, упокоя́я его́ в нестаре́ющемся блаже́нстве Твое́м.

Стих: Возвесели́хся о ре́кших мне, в дом Госпо́день по́йдем.

На́йде сме́рть я́ко хи́щник, на́йде тли́тель и низложи́ мя, на́йде и не су́ща мя показа́, на́йде, и земля́ сый, я́ко не сый лежу́. Вои́стинну со́ние, вои́стинну привиде́ние есмы́ челове́цы; но прииди́те, возопии́м безсме́ртному Царю́: Го́споди, ве́чных Твои́х благ сподо́би преста́вльшагося от нас, упокоя́я его́ в нестаре́емей жи́зни.

Сла́ва, И ны́не, Богоро́дичен:

Еди́на чи́стая и непоро́чная Де́во, Бо́га безсе́менно ро́ждшая, моли́ спасти́ся душа́м на́шым.

Стихи́ры, глас 5: Помяну́х проро́ка вопию́ща: аз е́смь земля́ и пе́пел. И па́ки разсмотри́х во гробе́х, и ви́дех ко́сти обнаже́ны, и рех: у́бо кто е́сть ца́рь, или́ во́ин, или́ бога́т, или́ убо́г, или́ пра́ведник, или́ гре́шник, но упоко́й Го́споди, с пра́ведными раба́ Твоего́.

Стих: Стоя́ще бя́ху но́ги на́шя во дво́рех Твои́х, Иерусали́ме.

Ты рекл еси́, ве́руяй в Тя Христе́, сме́рти не у́зрит; но я́коже Аз от све́та во свет, Свет е́смь, та́ко просвети́теся и во Мне в сла́ве мое́й; и́стинный бо Бог сый приидо́х спасти́, и́же во и́стинном правосла́вии чту́щих мя Еди́наго Го́спода Бо́га, сугу́ба естество́ма пло́ти и Божества́, Еди́наго же Ипоста́сию. Тем си́це Тя испове́давшаго ве́рнаго Твоего́ раба́, во све́те Лица́ Твоего́ со святы́ми упоко́й, я́ко Человеколю́бец.

Сла́ва, И ны́не, Богоро́дичен: Тебе́ мо́лимся, я́ко Бо́жии Ма́тери, Благослове́нная, моли́ спасти́ся нам.

Стихи́ры, глас 6:

Нача́ток мне и соста́в, зижди́тельное Твое́ бы́сть повеле́ние; восхоте́в бо от неви́димаго же и ви́димаго жи́ва мя соста́вити естества́, от земли́ те́ло мое́ созда́л еси́; дал же ми еси́ ду́шу Боже́ственным Твои́м и животворя́щим вдохнове́нием. Те́мже Христе́ раба́ Твоего́ в стране́ живу́щих, в селе́ниих пра́ведных упоко́й.

Стих: К Тебе́ возведо́х о́чи мои́ живу́щему на небеси́.

Поче́л еси́ о́бразом Твои́м, рук Твои́х Сло́ве созда́ние, живописа́в бо в веще́ственном зра́це, у́мнаго существа́ подо́бие; его́же и прича́стника мя поста́вил еси́, положи́в на земли́ нача́льствовати тва́рем самовла́стием. Те́мже Спа́се, раба́ Твоего́ во стране́ живы́х и в ски́ниях пра́ведных упоко́й.

Сла́ва, И ны́не, Богоро́дичен:

Бо́га из Тебе́ вопло́щшагося позна́хом Богоро́дице Де́во: Того́ моли́ спасти́ся душа́м на́шым.

Стихи́ры, глас 7: По о́бразу Твоему́ и по подо́бию созда́вый в нача́ле челове́ка, в раи́ поста́вил еси́ владе́ти Твои́ми тва́рьми; за́вистию же диа́волею прельсти́вся, сне́ди причасти́ся, за́поведей Твои́х престу́пник быв. Те́мже па́ки в зе́млю, от нея́же взят бы́сть, осуди́л еси́ возврати́тися Го́споди, и испроси́ти (у Тебе́) упокое́ния.

Стих: Ко́ль возлю́бленна селе́ния Твоя́, Го́споди сил!

Разреша́ет вся́кую печа́ль сме́рть, пода́нная естеству́ Ада́мову; и́бо тле́нни бы́хом сне́ди причасти́вшеся. Позна́ем у́бо, я́ко созда́вшеся от земли́, па́ки прах и пе́пел бу́дем, я́коже бе́хом пре́жде. Те́мже со гла́сом плаче́вным Созда́теля умо́лим, преста́вльшемуся осла́бу дарова́ти и ми́лость.

Сла́ва, И ны́не, Богоро́дичен:

Тя Богоро́дице, сте́ну неруши́мую и наде́жду ве́рнии и́мамы. Те́мже не преста́й Влады́чице, моли́ти о и́же ве́рою усо́пших Твои́х рабе́х, осла́бе им бы́ти в суде́, егда́ ся́дет Сын Твой и Бог: естество́ бо Ты ве́си, я́ко вся́кими грехи́ ны́не смеси́ся, да Тя вси ублажи́м.

Стихи́ры, глас 8:

Пла́чу и рыда́ю, егда́ помышля́ю сме́рть, и ви́жду во гробе́х лежа́щую, по о́бразу Бо́жию созда́нную на́шу красоту́, безобразну, безсла́вну, не иму́щую ви́да. О чудесе́, что сие́ е́же о нас бы́сть та́инство! Ка́ко преда́хомся тле́нию; Ка́ко сопряго́хомся сме́рти; Вои́стинну Бо́га повеле́нием, я́коже пи́сано е́сть, подаю́щаго преста́вльшемуся упокое́ние.

Тле́нни ка́ко бы́хом, нетле́нный о́браз носи́вше, и дунове́нием Боже́ственным безсме́ртную прие́мше ду́шу, сме́шени бы́вше, я́коже пи́сано е́сть; Ка́ко же преступи́хом Бо́жия повеле́ния; о чудесе́! Ка́ко сне́дь жи́зни оста́вльше, ядо́хом сне́дь, хода́таицу го́рькия сме́рти; Ка́ко прельще́ни лиши́хомся жи́зни Боже́ственныя; Про́чее возопии́м Христу́; Его́же преста́вил еси́, во дво́рех Твои́х всели́.

Сла́ва, И ны́не, Богоро́дичен:

Покро́в Твой Богоро́дице Де́во, врачевство́ е́сть духо́вное; в той бо прибега́юще душе́вных неду́гов избавля́емся.

Стихи́ры, глас 8. Самогла́сны:

Безме́рна е́сть блу́дно живу́щым му́ка, скре́жет зу́бный, и пла́чь неуте́шимый, мрак несвети́мый, и тьма́ кроме́шняя, и че́рвь неусыпа́емый, сле́зы недействи́тельны и суд без ми́лости. Сего́ ра́ди пре́жде конца́ возопии́м, глаго́люще: Влады́ко Христе́, его́же избра́л еси́, со избра́нными Твои́ми упоко́й.

Подо́бен: Возгласи́т труба́, и я́ко от сна ме́ртвии воста́нут, живо́т небе́сный прия́ти жела́юще, наде́яшася на Тя Созда́теля и Го́спода. Не осуди́ у́бо раба́ Твоего́, сме́ртен бо, Безсме́ртне, нас ра́ди был еси́. Сего́ ра́ди пре́жде конца́ возопии́м, глаго́люще: Влады́ко Христе́, его́же избра́л еси́, со избра́нными Твои́ми упоко́й.

Се и стихи́и, Не́бо и земля́ изменя́тся, и вся тва́рь в нетле́ние облече́тся: разруши́тся тле́ние, и поги́бнет тьма́, в прише́ствии Твое́м; и́маши бо па́ки приити́ со сла́вою, я́коже пи́сано е́сть, возда́ти кому́ждо, я́коже соде́ла. Влады́ко Христе́, его́же избра́л еси́, со избра́нными Твои́ми упоко́й.

Сла́ва, глас 6.

Прииди́те и ви́дите вси стра́нное и гро́зное виде́ние всем познава́емое, о́браз ны́не ви́димый, и не ктому́ му́дрствуйте привре́менная; дне́сь душа́ от те́ла разлуча́ется, к ве́чному преставля́ема ми́ру: в пу́ть бо и́дет, и́мже никогда́же ше́ствова, и к судии́ нелицеприе́мному, иде́же предстоя́т а́нгелов чи́ни; стра́шно бо, бра́тие мои́, суди́ще о́но, иде́же вси предста́нем на́зи; о́вии у́бо венчава́еми, о́вии же посрамля́еми. Те́мже возопии́м к безсме́ртному Царю́: егда́ и́маши испыта́ти сокрове́нная челове́ческая, пощади́ раба́ Твоего́, его́же прия́л еси́, Го́споди Человеколю́бче.

И ны́не, Богоро́дичен:

Моли́твами Христе́ ро́ждшия Тя, и Предте́чи Твоего́, апо́столов, проро́ков, иера́рхов, преподо́бных и пра́ведных, и всех святы́х, усо́пшаго раба́ Твоего́ упоко́й.

Та́же: Бла́го е́сть испове́датися Го́сподеви: Ве́сь. Трисвято́е. По О́тче наш:

Поко́й Спа́се наш с пра́ведными раба́ Твоего́, и сего́ всели́ во дворы́ Твоя́, я́коже е́сть пи́сано, презира́я я́ко благ прегреше́ния его́ во́льная и нево́льная, и вся я́же в ве́дении и не в ве́дении, Человеколю́бче.

В поко́ищи Твое́м Го́споди, иде́же вси святи́и Твои́ упокоева́ются, упоко́й и ду́шу раба́ Твоего́, я́ко еди́н еси́ Человеколю́бец.

И про́чая я́коже преднаписа́шася в после́довании мона́хов. Та́же, Сла́ва, глас 6: Зря́ще мя безгла́сна: Отходя́ще же ко гро́бу пою́т свяще́нницы ирмосы́ вели́каго кано́на, си́есть: Помо́щник и покрови́тель: И про́чая. Трисвято́е. По О́тче наш: В поко́ищи Твое́м, Го́споди: Еди́на чи́стая и непоро́чная Де́во: Та́же, Поми́луй нас Бо́же: и про́чее, я́ко обы́чно. Бо́же духо́в: И погреба́ются мо́щи, и быва́ет соверше́нный отпу́ст.

По е́же благослови́ти свяще́ннику, певцы́ пою́т:

Живы́й в по́мощи вы́шняго:

И посе́м, Аллилу́иа, во глас 8.

Стих: Блаже́н, его́же избра́л еси́: Аллилу́иа.

Стих: И па́мять его́ в род и род. Аллилу́иа.

Трисвято́е. И по О́тче наш: Я́ко Твое́ е́сть Ца́рство:

Та́же, Глубино́ю му́дрости человеколю́бно:

Сла́ва: Творца́ и Зижди́теля и Бо́га на́шего:

И ны́не: Тебе́ и сте́ну и приста́нище и́мамы:

Та́же, псало́м 50. И посе́м начина́ет кано́н поко́йный над младе́нцем сконча́вшимся. Глас 8. Пе́снь 1. Ирмо́с: Во́ду проше́д: Припе́в: Го́споди, упоко́й младе́нца.

Пло́тию обнища́вый Сло́ве Бо́жий, и младе́нец бы́ти благоволи́вый кроме́ премене́ния, в не́дрех Авраа́млих, мо́лим, его́же прия́л еси́, сочета́й младе́нца.

Отроча́ ви́ден был еси́, пре́жде всех веко́в сый, и отроча́том я́ко благ Твое́ обеща́л еси́ Ца́рство; тому́ настоя́щаго причти́ младе́нца.

Сла́ва: Пре́жде иску́са земны́х сла́достей, прия́л еси́ Христе́ Спа́се, непоро́чнаго младе́нца, ве́чных сподобля́яй благи́х, я́ко Человеколю́бец.

И ны́не: Прему́дрость и Сло́во О́тчее неизрече́нно ро́ждшая, души́ моея́ лю́тую исцели́ я́зву, и серде́чную боле́знь укроти́.

Пе́снь 3. Ирмо́с:

Небе́снаго кру́га Верхотво́рче Го́споди, и це́ркве Зижди́телю, Ты мене́ утверди́ в любви́ Твое́й, жела́ний кра́ю, ве́рных утвержде́ние, еди́не Человеколю́бче.

Припе́в: Го́споди упоко́й младе́нца.

Пресоверше́нный Сло́ве, Младе́нец яви́выйся соверше́нный, младе́нца несоверше́нна во́зрастом к себе́ преста́вил еси́, его́же упоко́й с пра́ведными все́ми благоугоди́вшими Тебе́, Еди́не Человеколю́бче.

Мирски́х сла́достей не вкуси́вша восхище́на, преми́рных ще́дре благи́х прича́стника покажи́, мо́лимся, нерастле́ннаго младе́нца, его́же преложи́л еси́ Боже́ственным повеле́нием Твои́м.

Сла́ва: Небе́сных черто́гов, и све́тлаго поко́я, и свяще́ннейшаго ли́ка святы́х Го́споди, прича́стника сотвори́ чисте́йшаго младе́нца, его́же я́ко благоволи́л еси́ Спа́се, преста́вил еси́.

И ны́не: Лиши́выйся от всех, к Твоему́ Пречи́стая Влады́чице и еди́ному прибега́ю покро́ву, помози́ ми; мно́гое бо совокупи́х грехо́вное бога́тство, доброде́телей же нището́ю ве́сь испо́лнихся.

Та́же, ирмо́с, и по ирмосе́ свяще́нник глаго́лет ектению́ сию́:

Па́ки и па́ки ми́ром Го́споду помо́лимся. Лик: Го́споди поми́луй.

Еще́ мо́лимся о упокое́нии блаже́ннаго младе́нца, и́мярек, и о е́же по нело́жному Своему́ обеща́нию, небе́сному Своему́ Ца́рствию того́ сподо́бити. Лик: Го́споди поми́луй, три́жды.

Я́ко да Госпо́дь Бог наш учини́т дух его́, иде́же вси пра́веднии почива́ют. Лик: Го́споди поми́луй, три́жды.

Ми́лости Бо́жия, Ца́рства Небе́снаго и со святы́ми упокое́ния, у Христа́ безсме́ртнаго Царя́ и Бо́га на́шего тому́, и са́ми себе́, про́сим.

Лик: Пода́й Го́споди.

Свяще́нник: Го́споду помо́лимся.

Лик: Го́споди поми́луй.

Свяще́нник же, главу́ прикло́нь, та́йно чтет сию́ моли́тву:

Го́споди Иису́се Христе́ Бо́же наш, породи́вшымся от во́ды и ду́ха, и в непоро́чном житии́ к Тебе́ преставля́ющымся Ца́рство Небе́сное да́ти обеща́вый, и реки́й: оста́вите де́ти приходи́ти ко мне, таковы́х бо е́сть Ца́рство Небе́сное. Смире́нно мо́лимся, ны́не от нас преста́вленному рабу́ Твоему́ (или́ ра́бе Твое́й) непоро́чному младе́нцу, и́мярек, по Твоему́ нело́жному обеща́нию, Ца́рствия Твоего́ насле́дие да́руй; нас же безпоро́чное сподо́би прейти́, и Христиа́нское сконча́ти житие́, со все́ми святы́ми Твои́ми, в небе́сных черто́зех водвори́тися.

И возглаша́ет: Я́ко Ты еси́ Воскресе́ние, живо́т и упокое́ние всем рабо́м Твои́м, и ны́не преста́вленному рабу́ Твоему́ (или́ ра́бе Твое́й) младе́нцу, и́мярек, Христе́ Бо́же наш, и Тебе́ сла́ву возсыла́ем со безнача́льным Твои́м Отце́м, и с Пресвяты́м, и благи́м, и животворя́щим Твои́м Ду́хом, ны́не и при́сно, и во ве́ки веко́в. Лик: Ами́нь.

Та́же тропа́рь: Вои́стинну суета́ вся́ческая, житие́ же се́нь и со́ние, и́бо всу́е мяте́тся всяк земноро́дный, я́коже рече́ писа́ние: егда́ мир приобря́щем, тогда́ во гроб всели́мся, иде́же вку́пе ца́рие и ни́щии, ста́рцы и младе́нцы. Те́мже Христе́ Бо́же, преста́вльшагося младе́нца упоко́й, я́ко Человеколю́бец.

Пе́снь 4. Ирмо́с: Услы́шах Го́споди, смотре́ния Твоего́:

Припе́в: Го́споди, упоко́й младе́нца.

Не младе́нцы пла́чем, но са́ми себе́ наипа́че возрыда́им согреша́ющии всегда́, я́ко да гее́нны изба́вимся.

Земны́х лиши́л еси́ Влады́ко младе́нца наслажде́ний, небе́сных благи́х сего́ я́ко Правосу́дец сподо́би.

Сла́ва: Рая́ жи́теля тя показу́ет, блаже́нный вои́стинну младе́нче, и́же от земли́ тя восприи́мый, и лико́м святы́х счиня́ет тя.

И ны́не, Богоро́дичен:

Богоро́дицу Тя всечи́стая просвеще́ннии вси ве́мы, со́лнца бо родила́ еси́ пра́вды, Присноде́во.

Пе́снь 5. Ирмо́с: Вску́ю мя отри́нул еси́, от Лица́ Твоего́:

Припе́в: Го́споди, упоко́й младе́нца.

Пра́ведным Твои́м судо́м, пре́жде прозябе́ния соверше́нне пожа́л еси́, я́коже млады́й злак, его́же преста́вил еси́ Го́споди младе́нца; но сего́ Сло́ве введ в Боже́ственную го́ру благ ве́чных, насади́.

Я́коже мла́до ве́твие, ме́чь наше́д сме́ртный тя посече́, не прии́мшаго иску́са мирски́х сласте́й, о блаже́нне! Но се Христо́с тебе́ небе́сная врата́ отверза́ет, избра́нным сочетава́я тя, я́ко благоутро́бен.

Сла́ва: О мне не рыда́йте, пла́ча бо ничто́же начина́х досто́йное, па́че же сами́х себе́ согреша́ющих пла́чите всегда́, сро́дницы, и дру́зи, уме́рший зове́т младе́нец, я́ко да иску́са не возъи́мете муче́ния.

И ны́не: Сама́го себе́ отчаява́ю, егда́ на мно́жество дел мои́х взира́ю; егда́ же во ум Тя па́че ума́ ро́ждшую Го́спода богома́ти прие́млю, прохлажда́юся наде́ждею; предста́тельство бо Тя еди́но и́мамы.

Пе́снь 6. Ирмо́с: Моли́тву пролию́ ко Го́споду:

Припе́в: Го́споди, упоко́й младе́нца.

Я́ко младе́нец в я́слех положи́лся еси́, и объя́тием вда́лся еси́ ста́рца, младоде́яй во чре́ве младе́нцы, и пре́жде дости́гнути в соверше́нное возраще́ние, преве́л еси́ сего́ к животу́; те́мже Тя благода́рственно сла́вим.

Вопия́л еси́ апо́столом: оста́вите отроча́та ко мне приходи́ти, Сло́ве, Ца́рство бо Мое́ таковы́м су́щым мудрова́нием подава́емо быва́ет; младе́нца у́бо к Тебе́ преста́вленнаго све́та Твоего́ сподо́би.

Сла́ва: Лиши́л еси́ благ земны́х Твоего́ младе́нца, да небе́сных Твои́х благ сего́ прича́стника пока́жеши, не престу́пльшаго Боже́ственное Твое́ повеле́ние; сла́вим Твои́х бла́же, суде́б глубину́ безме́рную.

И ны́не, Богоро́дичен: Я́ко сте́ну прибе́жища и́мамы, и душа́м Тя всесоверше́нное спасе́ние, и простра́нство в ско́рбех отрокови́це; и све́том твои́м при́сно ра́дуемся, и́мже Влады́чице и ны́не нас от страсте́й и бед спаса́й.

Та́же ирмо́с. И по ирмосе́ глаго́лет свяще́нник ектению́ вышепи́санную, и моли́тву. Та́же и́кос:

Сам Еди́н еси́ безсме́ртный, сотвори́вый и созда́вый челове́ка, земни́и у́бо от земли́ созда́хомся, и в зе́млю ту́южде по́йдем, я́коже повеле́л еси́, созда́вый мя и реки́й ми: я́ко земля́ еси́, и в зе́млю оти́деши, а́може вси челове́цы по́йдем, надгро́бное рыда́ние творя́ще пе́снь: аллилу́иа.

И настоя́щыя и́косы:

Ничто́же е́сть ма́тере сострадателишее, ничто́же е́сть отца́ умиле́ншее; утро́бы бо их смуща́ются, егда́ младе́нцы отсю́ду предсыла́ют ве́лию жа́лость, ю́же и́мут се́рдца их, отроча́т ра́ди, наипа́че егда́ су́ть благоглаго́ливая, помина́юще словеса́ их с пе́снию: аллилу́иа.

Мно́гажды бо пред гро́бом сосцы́ бию́т и глаго́лют: О сы́не мой и ча́до сладча́йшее! Не слы́шиши ли ма́тере твоея́, что веща́ет; Се и чре́во носи́вшее тя, чесо́ ра́ди не глаго́леши, я́ко глаго́лал еси́ нам; Но та́ко молчи́ши глаго́лати с на́ми: аллилу́иа.

бо́же Бо́же, призва́вый мя, утеше́ние ны́не бу́ди до́му моему́; пла́чь бо ве́лий случи́ся им, на мя бо взира́ху вси, единоро́дна мя си́и иму́ще. Но Ты рожде́йся от ма́тере Де́вы, ма́тере моея́ утро́бы прохлади́, и ороси́ се́рдце отца́, и́мже: аллилу́иа.

Та́же конда́к, глас 8:

Со святы́ми упоко́й Христе́, ду́шу раба́ Твоего́, иде́же не́сть боле́знь, ни печа́ль, ни воздыха́ние, но жи́знь безконе́чная.

Пе́снь 7. Ирмо́с: О́троцы евре́йстии в пещи́, попра́ша пла́мень:

Припе́в: Го́споди, упоко́й младе́нца.

Напиши́ в кни́зе спаса́емых, я́ко Человеколю́бец ще́дрый, Твоего́ младе́нца, да ра́дуяся вопие́т держа́ве Твоея́ сла́вы: благослове́н еси́.

Све́том Твоего́ Сло́ве Лица́ просвети́ младе́нца Твоего́, ве́рою преста́вльшагося ны́не к Тебе́ незре́лым во́зрастом, и воспе́вшаго Тебе́: Го́споди Бо́же, благослове́н еси́.

Сла́ва: Ско́рби вино́вно показа́ся лю́бящым Тя ны́не разлуче́ние Твое́, но Тебе́ вои́стинну ра́дости и весе́лия хода́тайственно: насле́диши бо младе́нче живо́т во ве́ки.

И ны́не, Богоро́дичен: Ви́ждь ско́рбь мою́ Де́во, ю́же ми наведе́ мно́жество зол мои́х, и пре́жде исхо́да охла́ду ми пода́ждь ма́терними моли́твами, во е́же ми́лостиву ми бы́ти Бо́гу.

Пе́снь 8. Ирмо́с: Седмери́цею пе́щь:

Припе́в: Го́споди, упоко́й младе́нца.

В не́дрех Авраа́млих тя, в селе́ниих поко́я, иде́же ра́дость пра́зднующих всегда́, в ме́стех осла́бы, иде́же е́сть вода́ живу́щая, счини́т тя Христо́с нас ра́ди младе́нствовавый, пою́щих Ему́ непреста́нно: свяще́нницы воспо́йте, лю́дие превозноси́те Его́ во ве́ки.

Печа́ли нам всевино́вное, и слеза́м приснопа́мятное твое́ разлуче́ние вои́стинну бы́сть; пре́жде бо вкуше́ния в житии́ сем красо́тных, оста́вил еси́ зе́млю, и роди́телей не́дра; но у́бо Авраа́мле тя прия́т не́дро я́ко младе́нца, и вся́кия неприча́стна скве́рны.

Сла́ва: Что мя пла́чете младе́нца преста́вльшагося; Лежа́й вопие́т неви́димо, не́смь бо плаче́вный; младе́нцем бо определи́ся пра́ведных всех ра́дость, досто́йная слеза́м не соде́лавшым дела́. Христу́ бо воспева́ют: свяще́ннии по́йте, лю́дие превозноси́те Его́ во ве́ки.

И ны́не, Богоро́дичен: В по́мощь мою́ Богоро́дице, воста́ни, вонми́ моли́тве мое́й, и изба́ви мя лю́таго осужде́ния, тя́жкаго испыта́ния тьмы́ и огня́, и скре́жета зу́бнаго, бесо́вскаго же нало́га, и вся́кия ну́жды, наде́ждо ненаде́жных, животе́ отча́янных.

Пе́снь 9. Ирмо́с:

Ужасе́ся о сем Не́бо, и земли́ удиви́шася концы́; я́ко Бог яви́ся челове́ком пло́тски, и чре́во Твое́ бы́сть простра́ннейшее небе́с. Тем Тя Богоро́дицу а́нгелов и челове́к чинонача́лия велича́ют.

Припе́в: Го́споди, упоко́й младе́нца.

Христе́ младе́нствовавый кроме́ премене́ния, и кресту́ приобщи́выйся во́лею, и на ма́терния боле́зни ро́ждшия Тя воззре́вый, печа́ль облегчи́, и боле́знь лю́тую, младе́нца уме́ршаго ве́рных роди́телей; да сла́вим держа́ву Твою́.

Посла́вый с высоты́ Всецарю́, и прии́мый блаже́ннаго младе́нца, я́ко чи́стую Влады́ко пти́цу в гне́зда небе́сная, спасл еси́ сего́ дух от сете́й многови́дных, и с пра́ведными ду́хи совокупи́, услажда́я Ца́рствия Твоего́.

Сла́ва: Ничто́же сотво́ршым сло́ве Бо́жий, младе́нцем по́дал еси́ селе́ние Небе́сное; си́це бо благоволи́л еси́ бла́же, с те́ми чи́слити созда́ние Твое́, младе́нцу приити́ ны́не к Тебе́; боле́знь роди́телей сам облегчи́, я́ко всеще́дрый и Человеколюби́вый.

И ны́не, Богоро́дичен: О́ком серде́чным вы́ну взира́ю к Тебе́, ма́тернюю иму́щей моли́тву, ко из Тебе́ ро́ждшемуся: Тя бо пою́ всечи́стая, успи́ стра́сти моея́ души́, ко у́тру покая́ния воздви́гни мя отрокови́це, и све́том Твои́м просвети́.

Та́же, ектениа́ ма́лая, и ексапостила́рий:

Ны́не, упоко́ихся, и обрето́х осла́бу мно́гу, я́ко преста́вихся от истле́ния, и преложи́хся к животу́; Го́споди, сла́ва Тебе́.

И лю́дие то́йжде.

Стих: Челове́к я́ко трава́, дни́е его́ я́ко цвет се́льный.

Стих: Я́ко дух про́йде в нем, и не бу́дет.

Стих: И и́стина Госпо́дня пребыва́ет во век.

И на ки́йждо стих ексапостила́рий. Та́же, Сла́ва, И ны́не:

Ны́не избра́х богома́терь отрокови́цу, я́ко роди́ся из нея́ Христо́с, всех Изба́витель; Го́споди, сла́ва Тебе́.

А́бие же свяще́нник возглаша́ет:

Я́ко свят еси́ Бо́же наш, и на святы́х почива́еши, и Тебе́ сла́ву возсыла́ем Отцу́, и Сы́ну, и Свято́му Ду́ху, ны́не и при́сно и во ве́ки веко́в. Лик: Ами́нь. И пою́т: Святы́й Бо́же: обы́чно. Посе́м же диа́кон глаго́лет: Во́нмем. Свяще́нник: Мир всем. Чтец: И ду́хови твоему́.

Проки́мен, глас 6: Певцы́ же пою́т:

Блаже́н пу́ть, в о́ньже по́йдеши душе́:

Стих: Обрати́ся душе́ моя́ в поко́й твой.

Диа́кон: Прему́дрость. Чтец же: К Кори́нфяном посла́ния свята́го апо́стола Па́вла чте́ние. Диа́кон: Во́нмем. Чтец же чтет Апо́стол. Зача́ло 162:

Бра́тие, не вся́ка пло́ть, та́же пло́ть; но и́на у́бо пло́ть челове́ком, и́на же пло́ть ското́м, и́на же ры́бам, и́на же пти́цам. И телеса́ небе́сная, и телеса́ земна́я; но и́на у́бо небе́сным сла́ва, и и́на земны́м. И́на сла́ва Со́лнцу, и и́на сла́ва Луне́, и и́на сла́ва звезда́м: звезда́ бо от зве́зды ра́знствует во сла́ве. Та́кожде и воскресе́ние ме́ртвых: се́ется в тле́ние, востае́т в нетле́нии. Се́ется не в че́сть, востае́т в сла́ве; се́ется в не́мощи, востае́т в си́ле. Се́ется те́ло душе́вное, востае́т те́ло духо́вное; е́сть те́ло душе́вное, и е́сть те́ло духо́вное. Та́ко и пи́сано е́сть: бы́сть пе́рвый челове́к Ада́м в ду́шу жи́ву, после́дний Ада́м в дух животворя́щ.

Иере́й: Мир ти. Чтец, Псало́м Дави́дов, аллилуия.

Стих: Блаже́н, его́же избра́л и прия́л еси́ Го́споди.

Стих: Душа́ его́ во благи́х водвори́тся.

Диа́кон: Прему́дрость, про́сти , услы́шим Свята́го Ева́нгелиа.

Иере́й: От Иоа́нна Свята́го Ева́нгелиа чте́ние. Певцы́ же пою́т: Сла́ва Тебе́ Го́споди:

Иере́й же чтет зача́ло 21:

Рече́ Госпо́дь ко прише́дшым к нему́ иуде́ем: Аз е́смь хлеб живо́тный; гряды́й ко Мне, не и́мать взалка́тися, и ве́руяй в мя, не и́мать вжажда́тися никогда́же. Но рех вам: я́ко и ви́десте Мя, и не ве́руете. Все е́же даст Мне Оте́ц, ко Мне прии́дет; и гряду́щаго ко Мне не изжену́ вон. Я́ко снидо́х с Небесе́, не да творю́ во́лю Мою́, но во́лю посла́вшаго Мя Отца́. Се же е́сть во́ля посла́вшаго Мя Отца́, да все, е́же даст Ми, не погублю́ от него́, но воскре́сшу ѐ в после́дний де́нь.

Лик: Сла́ва Тебе́ Го́споди:

И а́бие быва́ет после́днее целова́ние, певце́м пою́щым стихи́ры сия́. Глас 8. Подо́бен: О пресла́внаго чудесе́!

О кто не воспла́чет, ча́до мое́, е́же от жития́ сего́ плаче́вное твое́ преставле́ние! я́ко младе́нец незре́лый от ма́терних объя́тий, ны́не я́коже птене́ц ско́ро отлете́л еси́, и к Созда́телю всех избе́гл еси́. О ча́до, кто не воспла́чет, зря твое́ я́сное лице́ увяда́емо, е́же пре́жде я́ко крин кра́сный!

О кто не возстене́т, ча́до мое́, и с пла́чем не возопие́т, мно́гое твое́ благоле́пие, и красоту́ жи́тельства твоего́! Я́коже бо кора́бль сле́да не имы́й, си́це заше́л еси́ от о́чию ско́ро. Прииди́те дру́зи мои́, сро́дницы и бли́жнии, вку́пе со мно́ю сего́ целу́ем, ко гро́бу посыла́юще.

Сме́рть младе́нцем осла́ба: жите́йских бо зол неприча́стни яви́шася, и к поко́ю приспе́ша, и ра́достию небе́сною во Авраа́млих не́дрех ра́дуются; и младе́нец святы́х боже́ственным лико́м ны́не свеселя́тся, и ве́рно лику́ют, я́ко от тле́ния грехолю́бнаго чи́сты отидо́ша.

Сла́ва, глас 6: Боле́знь Ада́мова бы́сть дре́ва вкуше́ние дре́вле во еде́ме, егда́ змий яд изблева́, тем бо вни́де сме́рть всеро́дна, снеда́ющая челове́ка; но прише́д Влады́ка, низложи́ зми́я, и упокое́ние нам дарова́. К Нему́ у́бо возопии́м: пощади́ Спа́се, и я́же прия́л еси́, со избра́нными Твои́ми упоко́й.

И ны́не, Богоро́дичен:

Преложе́ние скорбя́щих, свобожде́ние немощству́ющих су́щи Богоро́дице Де́во, спаса́й град и лю́ди, ра́туемых ми́ре, обурева́емых тишино́, еди́но предста́тельство ве́рных.

Та́же, Трисвято́е. Пресвята́я Тро́ице: О́тче наш: Я́ко Твое́ е́сть Ца́рство:

Та́же тропари́: Со ду́хи пра́ведных:

И помина́ет по обы́чаю, глаго́ля ектению́ вышепи́санную, и моли́тву:

Го́споди Иису́се Христе́ Бо́же наш, породи́вшымся от во́ды и ду́ха, и в непоро́чном житии́ к Тебе́ преставля́ющымся Ца́рство Небе́сное да́ти обеща́вый, и реки́й: оста́вите де́ти приходи́ти ко мне, таковы́х бо е́сть Ца́рство Небе́сное. Смире́нно мо́лимся, ны́не от нас преста́вленному рабу́ Твоему́ (или́ ра́бе Твое́й) непоро́чному младе́нцу, и́мярек, по Твоему́ нело́жному обеща́нию, Ца́рствия Твоего́ насле́дие да́руй; нас же безпоро́чное сподо́би прейти́, и Христиа́нское сконча́ти житие́, со все́ми святы́ми Твои́ми, в небе́сных черто́зех водвори́тися.

Та́же, диа́кон: Прему́дрость. Лик: Честне́йшую херуви́м: Сла́ва, И ны́не: Го́споди поми́луй, три́жды. Благослови́.

Иере́й же твори́т отпу́ст сей:

Воскресы́й из ме́ртвых, и живы́ми и ме́ртвыми облада́яй, Христе́ и́стинный Бо́же наш, моли́твами пресвяты́я Твоея́ Ма́тере, и всех святы́х Твои́х, ду́шу от нас преста́вленнаго младе́нца, и́мярек, в ски́ниях святы́х всели́: и с пра́ведными причти́, я́ко Благ и Человеколю́бец.

Лик: Ами́нь.

По отпу́сте же глаго́лет иере́й:

Ве́чная твоя́ па́мять, достоблаже́нне и приснопомина́емый младе́нче, и́мярек. Лик же пое́т, три́жды: Ве́чная па́мять.

Посе́м свяще́нник глаго́лет моли́тву сию́, ре́кшу диа́кону: Го́споду помо́лимся. И певце́м: Го́споди поми́луй.

Храня́й младе́нцы Го́споди, в ны́нешнем житии́, в бу́дущем же ве́це угото́вавый им простра́нство, Авраа́мово ло́но, и по чистоте́ а́нгельская светообра́зная ме́ста, в ни́хже водворя́ются пра́ведных ду́си; Ты Сам Влады́ко Христе́, ду́шу раба́ Твоего́ (или́ рабы́ Твоея́) младе́нца, и́мярек, приими́ с ми́ром. Ты бо рекл еси́: оста́вите де́ти приити́ ко Мне, таковы́х бо е́сть Ца́рство Небе́сное. Тебе́ бо подоба́ет вся́кая сла́ва, че́сть и поклоне́ние, со Отце́м, и Святы́м Ду́хом, ны́не и при́сно, и во ве́ки веко́в, ами́нь.

И взе́мше те́ло, и́дут ко гро́бу предъиду́щым иере́ом и диа́коном и всему́ кли́ру, пою́щым: Святы́й Бо́же:

Вложи́вше же мо́щи во гроб, иере́й нача́льствуяй взем лопа́ту, сы́плет зе́млю во гроб глаго́ля:

Госпо́дня (е́сть) земля́, и исполне́ние ея́, вселе́нная и вси живу́щии на ней.

И отхо́дят благодаря́ще Бо́га.