Чи́нъ вели́кагѡ ѡ҆сщ҃е́нїѧ воды̀ ст҃ы́хъ бг҃оѧвле́нїй

По е́же рещи́ свяще́ннику заамво́нную моли́тву, исхо́дим вси ко крестильнице, предъиду́щым свещеносцем, по них же диаконом и священником, со Евангелием и кадилом, братии поющым настоящыя тропари:

Глас 8: Глас Госпо́день на вода́х вопие́т, глаго́ля: прииди́те, приими́те вси Ду́ха прему́дрости, Ду́ха ра́зума, Ду́ха стра́ха Бо́жия, я́вльшагося Христа́. [Трижды.]

Днесь вод освяща́ется естество́, и разделя́ется Иорда́н, и свои́х вод возвращае́т струи́, Влады́ку зря креща́ема. [Дважды.]

Яко челове́к на реку́ прише́л еси́, Христе́ Царю́, и ра́бское креще́ние прия́ти тщи́шися, Бла́же, от Предте́чеву руку́, грех ра́ди на́ших, Человеколю́бче. [Дважды.]

Слава, и ныне, глас тойже:

Ко гла́су вопию́щаго в пусты́ни: угото́вайте путъ Госпо́день, прише́л еси́, Го́споди, зрак ра́бий прии́м, креще́ния прося́, не ве́дый греха́. Ви́деша Тя во́ды, и убоя́шася. Тре́тетен бысть Предте́ча и возопи́ глаго́ля: ка́ко просвети́т свети́льник Све́та? Ка́ко ру́ку положи́т раб на Влады́ку? Освяти́ мене́ и во́ды, Спа́се, взе́мляй ми́ра грех.

И абие, став у крестильницы, глаголет протодиакон: Прему́дрость. И чтец: Проро́чества Иса́иина чте́ние [глава 35]. Та́ко глаго́лет Госпо́дь: да возвесели́тся пусты́ня жа́ждущая: Конец: и весе́лие пости́гнет их, отбеже́ боле́знь и печа́ль, и воздыха́ние.

Проро́чество Иса́иина чте́ние [глава 55]. Та́ко глаго́лет Госпо́дь: жа́ждущии, на воду́ иди́те: Конец: и бу́дет Госпо́дь во и́мя и в зна́мение ве́чное, и не оскуде́ет.

Проро́чества Иса́иина чте́ние [глава 12]. Та́ко глаголет Госпо́дь: почерпи́те во́ду с весе́лием от исто́чник спасе́ния: Конец: Яко вознесе́ся Святы́й Изра́илев посреде́ его.

Протодиакон: Прему́дрость.

Чтец: Проки́мен, глас 3: Госпо́дь просве́щение мое и Спаситель мой. Кого́ убоюся?

Стих: Госпо́дь Защи́титель живота́ моего́. От кого́ устрашу́ся?

апостол к коринфяном [зачало 143, от полу)

Братие, не хощу́ вас не ве́дети, я́ко отцы́ на́ши вси под о́блаком бы́ша, и вси сквозе́ мо́ре проидо́ша. И вси в Моисе́а крсети́шася, во о́блаце и в мо́ри. И вси то́жде бра́шно духо́вное ядо́ша. И вси то́жде пи́во духо́вное пи́ша: пи́яху бо от духо́внаго после́дующаго ка́мене, ка́мень же бе Христо́с.

Аллилуиа, глас 4.

Стих: Глас Госпо́день на вода́х, Бог сла́вы возгреме́, Госпо́дь на вода́х мно́гих.

Евангелие от Марка [зачало 2

Во вре́мя о́но, прии́де Иису́с от Назаре́та Галиле́йскаго и крести́ся от Иоа́нна во Иорда́не. И а́бие восходя́ от воды́, ви́де разводя́щася небеса́, и Дух я́ко го́лубь сходя́щь Нань. И глас бысть с Небесе́: Ты еси́ Сын Мой Возлю́бленный, о Не́мже благоволи́х.

Протодиакон же глаголет ектению:

Ми́ром Го́споду помо́лимся.

О свы́шнем ми́ре:

О ми́ре всего ми́ра:

О святе́м хра́ме сем:

О Вели́ком Господи́не:

О Богохрани́мей стра́не на́шей, власте́х и во́инстве ея́:

О граде сем: [а́ще в монастыри́: О святе́й оби́тели сей]:

О благорастворе́нии возду́хов:

О пла́вающих, путеше́ствующих:

О е́же освяти́тися вода́м сим си́лою и де́йствием, и наи́тием Свята́го Ду́ха Го́споду помо́лимся.

О е́же снизходи́ти на во́ды сия́ очисти́тельному Пресу́щныя Тро́ицы де́йству Го́споду помо́лимся.

О е́же дарова́тися им благода́ти избавле́ния, благослове́нию Иорда́нову си́лою и де́йством, и наи́тием Свята́го Ду́ха Го́споду помо́лимся.

О е́же сокруши́тися сатане́ под нога́ма на́шима вско́ре и разори́тися вся́кому сове́ту лука́вому, дви́жимому на ны, Го́споду помо́лимся.

Яко да Госпо́дь Бог и́змет нас от вся́каго наве́та и искуше́ния сопроти́вннка и досто́йны соде́лает обеща́нных благ Го́споду помо́лимся.

О е́же просвети́тися нам просвеще́нием ра́зума и благоче́стия наи́тием Свята́го Ду́ха Го́споду помо́лимся.

О е́же низпосла́ти Го́споду Бо́гу благослове́ние Иорда́ново и освяти́ти во́ды сия́ Го́споду помо́лимся.

О е́же бы́ти воде́ сей освяще́ния да́ру, грехо́в избавле́нию, во исцеле́ние души́ и те́ла и на вся́кую по́льзу изря́дную Го́споду помо́лимся.

О е́же бы́ти воде́ сей приводя́щей в жизнь ве́чную Го́споду помо́лимся.

О е́же яви́тися сей отгна́нию вся́каго наве́та ви́димых и неви́димых враг Го́споду помо́лимся.

О че́рплющих и е́млющих ю́ во освяще́ние домо́в Го́споду помо́лимся.

О е́же бы́ти сей во очище́ние душ и теле́с, всем ве́рою че́рплющым же и причаща́ющымся от нея́ Го́споду помо́лимся.

О е́же сподо́битися нам испо́лнитися освяще́ния вод сих причаще́нием, неви́димым явле́нием Свята́го Ду́ха Го́споду помо́лимся.

О е́же услы́шати Го́споду Бо́гу глас моле́ния нас, гре́шных, и поми́ловати нас Го́споду помо́лимся.

О изба́витися нам от вся́кия ско́рби:

Заступи́, спаси́, поми́луй:

Пресвяту́ю, Пречи́стую, Преблагослове́нную:

Сим глаголемым, архиерей тайно молитву сию глаголет:

Гдⷵи і҆и҃се хрⷵтѐ, є҆диноро́дный сн҃е, сы́й въ нѣ́дрѣ ѻч҃и, истинный бж҃е, и҆сто́чниче жи́зни и҆ безсме́ртїѧ, свѣ́те ѿ свѣ́та, прише́дый въ мі́ръ, єже просвѣти́ти є҆го̀! Ѡ҆зарѝ на́шꙋ мы́сль ст҃ы́мъ твои́мъ дх҃омъ, и҆ прїимѝ на́съ, вели́чество и҆ бл҃годаре́нїе тебѣ̀ приносѧ́щихъ, ѡ҆ ꙗже ѿ вѣ́ка ди́вныхъ твои́хъ великодѣ́йствїихъ, и҆ єже въ послѣ̑днїѧ вѣ́ки сп҃си́тельномъ твое́мъ смотре́нїи, въ не́мже въ на́ше немощно́е и҆ ни́щее ѡ҆дѣ́ѧвсѧ смѣше́нїе, и҆ рабѡ́тнымъ мѣ́рамъ снизше́дый, иже всѣ́хъ цр҃ю̀, є҆щѐ и҆ ра́бскою рꙋко́ю во і҆орда́нѣ крести́тисѧ претерпѣ́лъ є҆сѝ, да водно́е є҆стество̀ ѡ҆ст҃и́въ, безгрѣ́шне, пꙋтесотвори́ши на́мъ єже водо́ю и҆ дх҃омъ па́ки рожде́нїе, и҆ къ пе́рвомꙋ на́съ ѹ҆стро́иши свобожде́нїю. Е҆гѡ́же бж҃е́ственнагѡ та́инства воспомина́нїе пра́зднꙋюще, мо́лимсѧ тебѣ̀, влⷣко чл҃вѣколю́бче: воскропѝ и҆ на ны̀ недостѡ́йныѧ рабы̑ твоѧ̑, по бж҃е́ственномꙋ твоемꙋ̀ ѡ҆бѣща́нїю, во́дꙋ чи́стꙋ, твоегѡ̀ ̆бл҃госе́рдїѧ̆ да́ръ, во єже над̾ водо́ю се́ю проте́нїю на́съ грѣ́шныхъ бл҃гопрїѧ́тнꙋ бы́ти твое́ю бл҃гостїю, и҆ бл҃гослове́нїю твоемꙋ̀ єй на́мъ же и҆ всѣ̑мъ вѣ̑рнымъ лю́демъ твои̑мъ дарова́тисѧ, во сла́вꙋ ст҃а́гѡ и҆ покланѧ́емагѡ твоегѡ̀ имене. Ꙗкѡ подоба́етъ тебѣ̀ всѧ́клѧ сла́ва, че́сть и҆ поклоне́нїе, со безнача́льнымъ твои́мъ ѻ҆це́мъ, и҆ прест҃ы́мъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

И рек в себе: А҆ми́нь.

Протодиакону же исполньшу ектению, начинает архиерей велегласно молитву сию:

Ве́лїй є҆сѝ, гдⷵи, и҆ чꙋ̑дна дѣла̀ твоѧ̑, и҆ ни є҆ди́но же сло́во дово́льно бꙋ́детъ къ пѣ́нїю чꙋде́съ твои́хъ. Трижды.

Ты́ бо, хотѣ́нїемъ ѿ не сꙋ́щихъ во єже бы́ти приведы́й всѧ́чєскаѧ, твое́ю держа́вою содержи́ши тва́рь, и҆ твои́мъ про́мысломъ стро́иши мі́ръ. Ты̀, ѿ четы́рехъ стїхі́й тва́рь сочини́вый, четы́рьми времены̀ крꙋ́гъ лѣ́та вѣнча́лъ є҆сѝ. Тебє̀ трепе́щꙋтъ ѹмныѧ всѧ̑ си̑лы: тебѐ пое́тъ со́лнце, тебѐ сла́витъ лꙋна̀, тебѣ̀ присꙋ́тствꙋютъ ѕвѣ́зды: тебѐ слꙋ́шаетъ свѣ́тъ, тебє̀ трепе́щꙋтъ бє́здны, тебѣ̀ рабо́таютъ и҆сто́чницы. Ты̀ просте́рлъ є҆сѝ не́бо ꙗкѡ ко́жꙋ: ты̀ ѹ҆тверди́лъ є҆сѝ зе́млю на вода́хъ: ты̀ ѡ҆гради́лъ є҆сѝ мо́ре песко́мъ: ты̀ ко ѿдыха́нїєм̾ воздꙋ́хъ и҆злїѧ́лъ є҆сѝ. Агг҃льскїѧ си̑лы тебѣ̀ слꙋ́жатъ, а҆рха́гг҃льстїи ли́цы тебѣ̀ кла́нѧютсѧ: многоѻчи́тїи херꙋві́ми и҆ шестокрила́тїи серафі́ми, ѡкрестъ стоѧ́ще и҆ ѡ҆блета́юще, стра́хомъ непристꙋ́пныѧ сла́вы твоеѧ̀ покрыва́ютсѧ. Ты̀ бо, бг҃ъ сы́й неѡпи́санный, безнача́льный же и҆ неизглаго́ланный, прише́лъ є҆сѝ на зе́млю, зра́къ раба̀ прїи́мъ, въ подо́бїи человѣ́честѣмъ бы́въ: не бо̀ терпѣ́лъ є҆сѝ, влⷣко, милосе́рдїѧ ра́ди млⷵти твоеѧ̀, зрѣ́ти ѿ дїа́вола мꙋ́чима ро́да человѣ́ча, но прише́лъ є҆сѝ и҆ сп҃слъ є҆сѝ на́съ. И҆сповѣ́дꙋемъ бл҃года́ть, проповѣ́дꙋемъ млⷵть, не таи́мъ бл҃годѣѧ́нїѧ: є҆стества̀ на́шегѡ ро́ды свободи́лъ є҆сѝ, дѣ́вственнꙋю ѡ҆ст҃и́лъ є҆сѝ ѹ҆тро́бꙋ ржⷵтво́мъ твои́мъ: всѧ̀ тва́рь воспѣва́етъ тѧ̀ ꙗвльшагосѧ. Ты́ бо бг҃ъ на́шъ, на землѝ ꙗ҆ви́лсѧ є҆сй и҆ съ человѣ̑ки пожи́лъ є҆сѝ: ты̀ и҆ і҆орда̑нскїѧ стрꙋи̑ ѡ҆ст҃и́лъ є҆сѝ, съ нб҃сѐ низпосла́вый ст҃а́го твоего̀ дх҃а, и҆ главы̑ та́мѡ гнѣздѧ́щихсѧ сокрꙋши́лъ є҆сѝ ѕмїє́въ.

И сие убо архиерей глаголя трижды, и воду рукою благословляет на кийждо стих:

Самъ ѹбо, чл҃вѣколю́бче цр҃ю̀, прїидѝ и҆ ны́нѣ наи́тїемъ ст҃а́гѡ твоегѡ̀ дх҃а, и҆ ѡ҆свѧтѝ во́дꙋ сїю̀.

И҆ да́ждь єй бл҃года́ть и҆збавле́нїѧ, бл҃гослове́нїе і҆орда́ново: сотворѝ ю нетлѣ́нїѧ и҆сто́чникъ, ѡ҆сщ҃е́нїѧ да́ръ, грѣхѡ́въ разрѣше́нїе, недꙋ́гѡвъ и҆сцѣле́нїе, де́монѡмъ гꙋби́тельнꙋ, сопроти̑внымъ си́ламъ непристꙋ́пнꙋ, агг҃льскїѧ крѣ́пости и҆спо́лненꙋ: да всѝ почерпа́ющїи и҆ причаща́ющїисѧ и҆мѣ́ютъ ю ко ѡ҆чище́нїю дꙋ́шъ и҆ тѣле́съ, ко и҆сцѣле́нїю страсте́й, ко ѡ҆сщ҃е́нїю домѡ́въ, и҆ ко всѧ́кой по́льзѣ и҆зрѧ́днꙋ. Ты́ бо є҆сѝ бг҃ъ на́шъ, иже водо́ю и҆ дх҃омъ ѡ҆бнови́вый ѡ҆бетша́вшее грѣхо́мъ є҆стество̀ на́ше: ты̀ є҆сѝ бг҃ъ на́шъ, водо́ю потопи́вый при нѡ́и грѣ́хъ: ты̀ є҆сѝ бг҃ъ на́шъ, иже мо́ремъ свободи́вый ѿ рабо́ты фараѡ́ни мѡѷсе́омъ ро́дъ є҆вре́йскїй: ты́ бо є҆сѝ бг҃ъ на́шъ, разрази́вый ка́мень въ пꙋсты́ни, и҆ потеко́ша во́ды, и҆ пото́цы наводни́шасѧ, и҆ жа́ждꙋщыѧ лю́ди твоѧ̑ насы́тивый. ты̀ є҆сѝ бг҃ъ на́шъ, иже водо́ю и҆ ѻ҆гне́мъ премѣни́вый и҆лїе́ю і҆и҃лѧ ѿ пре́лести ваа́ловы.

Са́мъ и҆ ны́нѣ, влⷣко, ѡ҆ст҃ѝ во́дꙋ сїю̀ дх҃омъ твои́мъ ст҃ымъ. Трижды.

Да́ждь же всѣ̑мъ прикасающымсѧ єй и҆ причаща́ющымсѧ и҆ ма́жꙋщымсѧ єю ѡ҆сщ҃е́нїе, здра́вїе, ѡ҆чище́нїе и҆ бл҃гослове́нїе.

Сп҃сѝ, гдⷵи, и҆ поми́лꙋй вели́каго господи́на и҆ ѻ҆ц҃а̀ на́шего, свѧтѣ́йшаго патрїа́рха моско́вскаго и҆ всеѧ̀ рꙋсѝ, преѡсвѧще̑нныѧ митрополі́ты, а҆рхїепі́скопы и҆ є҆пі́скопы правосла̑вныѧ, ве́сь сщ҃нническїй и҆ мона́шескїй чи́нъ и҆ всѧ̑ правосла̑вныѧ хрⷵтїа́ны.

И҆ сохранѝ ихъ под̾ кро́вомъ твои́мъ въ ми́рѣ, да́рꙋй имъ всѧ̑ ꙗже ко сп҃се́нїю прошє́нїѧ и҆ жи́знь вѣ́чнꙋю: да и҆ стїхі́ами, и҆ человѣ̑ки, и҆ агг҃лы, и҆ ви́димыми и҆ неви́димыми, сла́витсѧ твоѐ прест҃о́е имѧ, со ѻ҆ц҃е́мъ и҆ ст҃ы́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Лик: Ами́нь. Архиерей: Мі́ръ всѣ̑мъ.

Лик: И ду́хови твоему́.

Протодиакон: Главы́ ва́шя Го́сподеви приклони́те.

Лик: Тебе, Го́споди.

Архиерей, приклонься, молится:

Приклонѝ, гдⷵи, ѹхо твоѐ, и҆ ѹ҆слы́ши ны̀, иже во і҆орда́нѣ крести́тисѧ и҆зво́ливый и҆ ѡ҆ст҃и́вый во́ды: и҆ бл҃гословѝ всѣ́хъ на́съ, иже преклоне́нїемъ своеѧ̀ вы́и назна́менающихъ рабо́тное воѡбраже́нїе: и҆ сподо́би на́съ и҆спо́лнитисѧ ѡ҆сщ҃е́нїѧ твоегѡ̀, воды̀ сеѧ̀ причаще́нїемъ: и҆ да бꙋ́детъ на́мъ, гдⷵи, во здра́вїе дꙋшѝ и҆ тѣ́ла.

Возглашсние: Ты́ бо є҆сѝ ѡ҆сщ҃е́нїе на́ше, и҆ тебѣ̀ сла́вꙋ и҆ бл҃годаре́нїе и҆ поклоне́нїе возсыла́емъ, со безнача́льнымъ твои́мъ ѻ҆ц҃е́мъ, и҆ прест҃ымъ и҆ бл҃ги́мъ и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ.

Лик: Ами́нь.

И абие благословляя воду крестовидно Честны́м Крестом, погружает и́ архиерей право (прямо), низводя в воду и возводя, держа его обема рукама, поя настояіций тропарь, во глас 1:

Во Иорда́не креща́ющуся Тебе́, Го́споди, Тро́ическое яви́ся поклоне́ние: Роди́телев бо глас свиде́тельствоваше Тебе́, Возлю́бленнаго Тя Сы́на имену́я, и Дух в ви́де голуби́не изве́ствоваше Словесе́ утвержде́ние. Явле́йся, Христе́ Бо́же, и мир просвсще́й, сла́ва Тебе́. Певце́м то́жде поющым.

Паки второе такожде Крестом знаменует воды.

И третие такожде.

И взем архиерей священную воду на блюдо, обратится на запад лицем, в левой руце держа Крест, в правой же васильки́. И приходят, целующе Честный Крест, и знаменует их архиерей или священник по лицу васильком со священною водою.

Поется же тогда тропарь: Во Иорда́не креща́ющся Тебе, Господи: мно́гащи, до́ндеже освятятся вся братия водны́м кроплением.

И абие входим во храм, поюще самогласен, глас 6: Воспои́м, ве́рнии, е́же о нас Бо́жия благодея́ния вели́чество: о на́шем бо прегреше́нии быв Челове́к, на́шим очище́нием очища́ется во Иорда́не, Еди́н Чи́стый и Нетле́нный, освяща́яй мене́ и во́ды, и главы́ змие́в сокруша́яй в воде́. Почерпе́м у́бо во́ду с весе́лием, бра́тие: благода́ть бо Ду́ха ве́рно почерпа́ющым неви́димо подава́ется от Христа́ Бо́га и Спа́са душ на́ших.

Таже: Бу́ди и́мя Госпо́дне благослове́но: [трижды], и псалом 33: Благословлю́ Го́спода на вся́кое время:

И прежде пивше освященную воду, вземлем от священника анти́дор.

И бываст совершенный отпу́ст:

Иже во Иорда́не крести́тися изво́ливый от Иоа́нна на́шего ра́ди спасе́ния Христо́с, и́стинный Бог наш, моли́твами Пречи́стыя Своея́ Ма́тере и всех святы́х, поми́лует и спасе́т нас, я́ко благ и Человеколю́бец.