Мл҃твы в̾ нача́лѣ поста̀ ст҃ы́ѧ четыредесѧ́тницы

Яже архиерей или́ священник своим пасомым к понедельник первый Святаго Великаго поста, или́ во ины́й день первыя по́стныя седмицы, в церкви по утрени, или́ по часе́х, взем на себе́ епитрахиль, архиерей же и омофор малый и мантию, чтет молитвы сия со всяким умилением.

Моли́тва а҃

Гдⷵꙋ помо́лимсѧ.

Надѣ́ѧнїе всѣ̑мъ концє́мъ землѝ, и҆ сꙋ́щымъ въ мо́ри дале́че, бж҃е, пронарекі́й ст҃ы́ѧ дни̑ сїѧ̑ пѡ́стныѧ зако́номъ и҆ прⷪ҇ро́ки, и҆ є҆ѵⷢ҇лі́сты, сподо́би всѣ́хъ въ чистотѣ̀ тече́нїе по́стное прейтѝ, вѣ́рꙋ неразлꙋ́чнꙋ соблюстѝ, и҆ за́пѡвѣди твоѧ̑ сохрани́ти во всѧ̑ дни̑ живота̀ на́шегѡ. Агг҃лꙋ ми́рнꙋ заповѣ́ждь соблюда́ти вхо́ды на́шѧ и҆ и҆сходы на всѧ́кос дѣ́ло бл҃го́е и҆ спослꙋ́шающꙋ, и҆ соꙋгожда́ющꙋ къ соверше́нномꙋ причаще́нїю пречи́стых твои́хъ та̑инъ. Прїими́ жѐ влⷣко, колѣ́нное поклоне́нїе и҆ по́стъ рабѡ́въ твои́хъ подаѧ̀ имъ бл҃гослове́нїе дх҃о́вное, и҆ всѣ́мъ на́мъ, ѡ҆ хрⷵтѣ̀ і҆и҃сѣ гдⷵѣ на́шемъ: съ ни́мже блгословенъ є҆сѝ, съ прест҃ы́мъ, и҆ бл҃ги́мъ и҆ животворѧ́щимъ твои́мъ дх҃омх, ны́нѣ и҆ приснѡ и҆ во вѣ́ки вѣкѡ́въ. А҆ми́нь.

Моли́тва в҃

Гдⷵꙋ помо́лимсѧ.

Бл҃гослове́нъ є҆сѝ, гдⷵи вседержи́телю, бж҃е ѻ҆ц҃ъ на́шихъ а҆враа́мовъ и҆ і҆саа́ковъ и҆ і҆а́кѡвль, сотвори́вый не́бо и҆ зе́млю, мо́ре и҆ всѧ̑ сꙋ̑щаѧ въ ни́хъ, положи́вый человѣ́кѡмъ покаѧ́нїе во спасе́нїе, и҆ презира́ѧй ихъ прегрѣшє́нїѧ: прїимы́й сле́зы раба̀ твоегѡ̀ дв҃да проро́ка, и҆ да́вый є҆мꙋ̀ ѡ҆ставле́нїе грѣхѡ́въ ка́ющемꙋсѧ: манассі́ю ѹзами желѣ́зными свѧ́заннаго, покаѧ́нїемъ же и҆сповѣ́давшагѡса тебѣ̀ моли́твꙋ прїимы́й, и҆ грѣхѝ є҆гѡ̀ ѡ҆ста́вивый: блꙋдни́цꙋ позна́вшꙋю ми́лость твою̀, и҆ схо́дники прїи́мшꙋю, и҆ съ ми́ромъ пꙋсти́вшꙋю, спасы́й: ѹ҆слы́ши ны́нѣ моле́нїе менє̀ недосто́йнагѡ раба̀ твоегѡ̀, и҆ пре́зри всѧ̑ согрѣшє́нїѧ си́хъ рабѡ́въ твои́хъ, въ покаѧ́нїи къ тебѣ̀ прибѣга́ющихъ: и҆ да́ждь имъ серде́чное сокрꙋше́нїе, и҆ болѣ́знь ѡ҆ грѣсѣ́хъ, имиже тебѐ творца̀ своего̀ прогнѣ́ваша, могꙋ́щꙋю ихъ ѿ грѣхѡ́въ ѡ҆чи́стити. Да́ждь имъ бл҃года́ть твою̀, ꙗкѡ да то́ю возбꙋжда́еми и҆ подкрѣплѧ́еми, въ па́мѧть ѕла̑ѧ своѧ̑ дѣла̀ приведꙋ́тъ, и҆ сїѧ̑ всѧ̑ во стра́сѣ твое́мъ дꙋхо́вномꙋ своемꙋ̀ ѻ҆тцꙋ̀, ѿ тебє́ же ѹ҆ста́вленномꙋ сꙋдїѝ, истиннѡ и҆сповѣ́дѧтъ: и҆ са́ми на себѐ ꙗкѡ на ви́нныхъ въ се́рдцѣ сокрꙋше́нномъ и҆ смире́нномъ пои́мствовати, и҆ ка́ѧтисѧ, и҆ жалѣ́ти себѐ ѡ҆ ни́хъ, и҆ соверше́ннагѡ проще́нїѧ, и҆ ѿ ни́хъ разрѣше́нїѧ твои́мъ млⷵрдїемъ чрез̾ ихъ дꙋовника̀, твоего́ же сꙋдїю̀, по нело́жномꙋ твоемꙋ̀ ѡ҆бѣща́нїю сподо́би. Ты́ бо ре́клъ є҆сѝ: єже аще разрѣши́те на землѝ, бꙋ́детъ разрѣше́но на нб҃сѣ́хъ. Ей, влⷣко гдⷵи і҆и҃се хрⷵтѐ бж҃е на́шъ, прїимѝ рабы̑ твоѧ̑, ка́ющыѧсѧ ѡ҆ свои́хъ грѣсѣ́хъ вѣ́домыхъ и҆ невѣ́домыхъ, во́льныхъ и҆ нево́льныхъ: и҆ сїѧ̑ и҆сповѣ́дати по твоемꙋ̀ повелѣ́нїю предложи́вшихъ, и҆ твое́ю си́лою и҆ бл҃года́тїю прїе́мъ ихъ млⷵтивнѡ, ѹ҆крѣпѝ, єже ктомꙋ̀ не возврати́тисѧ имъ ко грѣхꙋ̀, и҆ къ ѕлы̑мъ и҆ неподѡ́бнымъ дѣлѡ́мъ, въ ни́хже мно́гажды впадо́ша: но воздви́гни и҆ застꙋпѝ ихъ ѿ ко́зней дїа́вольскихъ, и҆ ѿ всѣ́хъ сѣ́тей непрїѧзненныхъ: ꙗкѡ да без̾ препѧ́тїѧ послꙋ́жатъ тѝ въ преподо́бїи и҆ правдѣ во всѧ̑ дни̑ живота̀ своегѡ̀. Ты́ бо є҆сѝ бг҃ъ на́шъ, въ мі́ръ прише́дый, не првⷣныхъ призва́ти, но грѣ́шныхъ на покаѧ́нїе: и҆ се́дмьдесѧтъ кра́тъ седмеери́цею впа́дающымъ во грѣ́хъ ѡ҆ставлѧ́ти согрѣшє́нїѧ повелѣ́вый. Ꙗкоже ѹбѡ женꙋ̀ въ прелюбодѣѧ́нїи ꙗтꙋю, фарїсе́йми и҆скꙋша́ющими тѧ̀ приведе́ннꙋю не ѡ҆сꙋди́лъ є҆сѝ, но млⷵтивнѡ ре́клъ є҆сѝ: и҆дѝ, и҆ ѿсе́лѣ ктомꙋ̀ не согрѣша́й: и҆ си́хъ не ѡ҆сꙋжда́й, но чл҃вѣколю́бнѡ поми́лꙋй. И҆ ꙗкоже и҆ дрꙋгꙋ́ю блꙋдни́цꙋ пла́чꙋщꙋюсѧ, и҆ слеза́ми но́зѣ твоѝ ѡ҆мы́вшꙋю, и҆ главы̀ сбоеѧ̀ власы̀ ѡ҆те́ршꙋю, поми́ловалъ є҆сѝ млⷵти твоеѧ̀ ра́ди, пода́ждь и҆ си̑мъ рабѡ́мъ твои̑мъ невозбра̑нныѧ и҆ тє́плыѧ во истииномъ покаѧ́нїи сле́зы. Ѹ҆твердѝ ихъ ѹмъ и҆ се́рдце, зна́ти тебѐ є҆ди́наго истиннаго сн҃а бж҃їѧ, взе́млющаго грѣхѝ мі́ра. Прїимѝ ихъ ꙗкоже петра ѿве́ргшагосѧ тебє̀ и҆ покаѧ́нїемъ и҆ го́рькими слеза́ми ѡ҆бра́щшагосѧ, прїѧ́лъ є҆сѝ: прострѝ десни́цꙋ твою̀, и҆ прїимѝ ихъ, ꙗкоже того̀ въ мо́ри ѹ҆топа́ющаго прїѧ́лъ є҆сѝ, и҆ ѹ҆крѣпѝ ихъ на борю́щаго ихъ дїа́вола: ѡ҆чи́сти ихъ дꙋ́шꙋ и҆ тѣ́ло ѿ всѧ́кїѧ скве́рны. Са́мъ бо ре́клъ є҆сѝ, бл҃гі́й гдⷵи, не тре́бовати здра̑вымъ врача̀, но болѧ́щымъ: и҆ прише́лъ є҆сѝ не сп҃са́емыхъ сп҃стѝ, но погиба́ющихъ. Да́ждь ѹбо, гдⷵи і҆и҃се хрⷵтѐ бж҃е на́шъ, рабѡ́мъ твои̑мъ си̑мъ, сконча́ти без̾ поро́ка нача́тый се́й ст҃ы́й по́стъ, и҆ въ не́мъ твоѧ̑ за́пѡвѣди и҆сполнѧ́ти, въ мл҃твахъ же прилежа́ти и҆ всѣ́ми добродѣ́тельми тебѣ̀ во всѧ̑ днѝ живота̀ своегѡ̀ бл҃гоꙋгожда́ти: ꙗкѡ да въ чи́стой со́вѣсти причасти́тисѧ неѡсꙋжде́ннѡ твоемꙋ̀ бж҃е́ственномꙋ тѣ́лꙋ, и҆ животворѧ́щей кро́ви и҆злїѧ́нной за ве́сь мі́ръ во ѡ҆ставле́нїе грѣхѡ́въ, сподо́бѧтсѧ, и҆ да побѣдѧ́тъ и҆ посра́мѧтъ дїа́вола на ни́хъ вою́ющаго. Ты́ бо є҆сѝ, бж҃е, бг҃ъ ка́ющихсѧ, не хотѧ́й сме́ртн грѣ́шнагѡ, но єже ѡ҆брати́тисѧ, и҆ жи́вꙋ бы́ти є҆мꙋ̀. Не хо́щеши бо, влⷣко, созда́нїе твои́хъ рꙋ́къ погꙋби́ти, нижѐ бл҃говоли́ши ѡ҆ поги́бели человѣ́честѣй: но хо́щеши всѣ̑мъ сп҃сти́сѧ, и҆ въ ра́зꙋмъ истинный прїитѝ. тѣ́мже и҆ ны́нѣ, влⷣко, не ѿвратѝ лица̀ твоегѡ̀ ѿ ра̑бъ твои́хъ си́хъ, но да́ждь имъ истинное ѿ грѣхѡ́въ къ тебѣ̀ ѡ҆браще́нїе, и҆ ѿ всѣ́хъ дѣ́лъ лꙋка́выхъ и҆збавле́нїе: и҆ сподо́би всѣ́хъ на́съ

въ ми́рѣ и҆спо́лненныхъ дѣ́лъ бл҃ги́хъ доитѝ, и҆ поклони́тисѧ сп҃си́тєльнымъ твои̑мъ стрⷵте́мъ, и҆ ст҃о́мꙋ воскрⷵнїю, и҆ на кончи́нѣ живота̀ на́шегѡ ра́дости вѣ́чныѧ со всѣ́ми тебѣ̀ бл҃гоꙋгоди́вшими полꙋчи́ти, въ тебѣ̀ бз҃ѣ и҆ сп҃си́телѣ на́шемъ. Ты́ бо є҆сѝ бг҃ъ млⷵтей и҆ щедро́тъ, и҆ чл҃вѣколю́бїѧ, и҆ тебѣ̀ сла́вꙋ возсыла́емъ, со безнача́льнымъ твои́мъ ѻ҆тце́мъ и҆ съ прест҃ы́мъ и҆ бл҃ги́мъ, и҆ животворѧ́щимъ твои́мъ дх҃омъ, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.

Посем благословляет их десницею, глаголя:

Бл҃гослове́нїе гдⷵне на ва́съ, тогѡ̀ бл҃года́тїю и҆ щедро́тами, и҆ человѣколюбїемъ, всегда̀, ны́нѣ и҆ при́снѡ и҆ во вѣ́ки вѣкѡ́въ. А҆ми́нь.