Молитва в субботу по Заутрени преподобнаго Кирилла священноинока.

Тебе¹ единому благому и человеколюбцу Отцу щедрот, Богу всесильному единому милостиву, имеющему всяку власть и послушающему на всяком месте молящих Ти ся, и подавая всяко прошение рабом Твоим, еже к спасению: услыши мя грешнаго раба Твоего (имя рек), молящаго Ти ся в сокрушении сердца и просяща очищения грехов от Твоея благости; исправи путь мой в след Твоих повелений ходити ми, бежати ми от всякого пути лукаваго. Ей Владыко мой Боже, Творче небесе и земли, безначальне, невидиме, неодержиме, неисписанне, неизменне², Отче Господа нашего Исуса Христа! молю Ти ся Твоей воли быти на мне, да не, яко сверепо животно, пасыйся особе, от злохитраго врага удобь уловлен буду. Пастуше добрый! не отлучи мене от ограды избранных Твоих овець, но, яко благ, покрый мя Твоим заступлением, и вся уды телесе моего честным крестом Твоим утверди; сердце чисто созижди во мне, Боже, и дух прав обнови во утробе моей; наполни радости уста моя, соблюди душю мою от крамолы льстиваго во вся дни живота моего, да зрета зеници мои света судеб Твоих, да не углебну в тине злых дел. Веде бо Господи, яко не токмо дела, но и словеса и мысли к Тебе приносятся; тем ужасаюся и трепещу праведнаго Ти испытания, яко несть ничтоже утаено от лица очию Твоею, но того ради дерзаю, понеже Сам рече пророком своим: повеждь ты первие грехы своя, да оправдишися. Но откуду начну глаголати моих грехов множество? Кое ли начало исповедания обрящу? О чем ли первие прощение испросити дерзну? И несть ниединыя злобы, ни безакония, егоже аз окаянный не съдеях; но надеюся на Твое великое и неизследимое³ милосердие: молю Тя, пришедшаго на взыскание погыбшаго и възвращение заблужших. Пострадавый за мя недостойнаго, не за мое недостояние, но за Твою великую милость, закон дасть съгрешающим, пророкы прислав⁴, апостолы посла, вся призывая в жизнь вечную: Тя молю единого блага и благопослушливаго, от Святыа Девы воплощьшагося, и сообразен быв телеси смирения нашего, да ны сообразны славы Своея сътвориши, под законом быв и пожив в мире закону Творець и всей твари Господь и обративый ны от идольския льсти. Ей Господи мой, Господи! Помяни Святую кровь, юже излия за ны грешныя и не предай же мене в радость ненавидящим мене, ни истяжи мене словесы⁵ в день испытания. Приими⁶ молящуюся за ны Пречистую Свою Матерь, Владычицу нашу Богородицу, и славнаго Предотечю Крестителя Иоанна, и вся ны помилуй и мене молящаго Ти ся не уничижи о всех и за вся. Помяни Господи архиепискупы и епискупы (имя рек) со иереи и дияконы, и четца и всякаго чина церковнаго, яже постави пастухи словеснаго Ти стада. Приими Господи приносимыя Ти от них молитвы за мир и за вся хрестьяны. Помяни Господи цари Православныя и князи. Помилуй Господи князя нашего (имя рек) в здравии и спасении, и державу его миромь огради, и на супостаты укрепи его, и землю угобзи, и людие в благочестии умножи, плененыя възврати в своя си. Глаголи в сердци его благая о церкви Твоей и о иереех и дияконех и о всяком иноческом чину. Помяни Господи всех любящих нас⁷, посли им стократное Твое въздание и даждь им в земных место небесная⁸ и умножи Господи на них милость Свою. Помяни Господи множеством щедрот Твоих всякаго инока, и игумены, икономы, и служащая мнихы, и всякаго черноризца, иже в монастырех и особных местех, на лици всея земли и в островех морьскых и в пустынях и пещерах и в вертепех и в столпех и в затворех. Облегчи Господи тяготу их и утеши скорбь их, избави от насилья диявола и съблюди в чистоте вся дни живота их и молитвами их очисти съгрешения моя. Помяни Господи живущая в девстве и пощении и в воздержании. Помяни Господи вся християны: юноты и старцы, и вдовица, и рабы и свободныя, нищая и сироты и сущая в болезнех и печали и в узах и темницах и иже в оклеветании озлобленыа и томимы по гневу. Помяни Господи, яко благый человеколюбець, и мене недостоинаго раба Твоего (имя рек): отпусти ми Господи всяко прегрешение вольное и невольное. И еще молю Тя, Господи Владыко Пресвятый, избави град сий и ограду сию монастырскую, в нейже пребываемь, от всякаго зла и огня и потопа и от напрасныя смерти и от глада и усобныя брани⁹. Помяни Господи рабы Своя (имя рек их же хощеши) о здравии и спасении, не посрами ниединаго же нас и подайжь нам всяко прошение душевное и телесное, ни отврати лица Твоего от молениа моего, но вся ны введи в Царство Небесное. Помяни Господи преставльшаяся отца и братью нашю и всякого возраста мужеска полу и женьска, о уповании въскресениа жизни вечныя; покой я, идеже вси праведнии почивають и неомерзи въздыханиа убогия ми душа безочьствующа пред Тобою, и дайждь ми до последняго издыхания Тебе предстоящи просити отпуста грехов моих, и в страшный день пред Святым престолом стати одесную, молитвами Пречистыя Матере, Владычицы нашеа Богородица, и силою честнаго креста и святых небесных сил Михáила и Гавриила и святаго Крестителя Твоего и Предотечи Иоанна, и святых Преподобных Отець наших, поручник нашего спасения, святаго Василиа, Богопустнаго источника, напоившаго весь мир Спаса нашего учениа, и святаго Григория Богослова, небесных таин сказателя, и святаго Николы великаго чюдотворца, и святаго Иоанна Златоустаго, емуже на языце Дух Святый, яко на Херувими почиваше, и святаго преподобнаго отца Феодосия, всея Руси светильника, обещавшагося за нас слово отдати на страшном Твоем суде, на немъже, Господи, и мене неосуженна съхрани, и в мире управи жизнь мою, молитвами Его и всех Святых от века угождших Ти честных Пророк и святых Апостол, прехвальных Мученик и Преподобных черноризець, их же ради, Владыко Пресвятый, приими молитву мою и спаси мя от всякаго зла. Яко Ты еси Бог мой и, к Тебе прпадая, молюся и Тебе славу всылаю, Пресвятей Троице, Отцю безначальному всемогущему, Вседержителю, безсмертну, непрестанну, невидиму, веком Творцу, единому Премудрому Богу, землю на водах основавшему и человека от земля създавшему, и Спасу всесильному, пресвятому Слову, небеси Творцу, присносущному начальнону Свету, животному хлебу, обновителю миру, благому пастырю, преже век рожену, Исусу Христу, спасшему человеческый род и Святому Духу, Господу, Самовластьну, быстрообразну, огненосну, безо́бразну тонку¹⁰, невидиму, безначальну¹¹, животворящему, всеначальнику безплотным Силам и неразлучну от Божиа существа, почивающему на верных, Емуже покланяние и славословие и молитвы всылаемь, Отцу и Сыну и Святому Духу, ныне и присно, и в векы веком. Аминь.

Молитва в суботу по Заутрени всем святым¹².

Честнейши Херувим и славнейши без сравнения Серафим, Госпоже Владычице Богородице, рождьши Христа Бога нашего: в день печали моея услыши мя и помози ми грешному и окаянному! Святии Ангели н Архангели, Херувими и Серафими, Престоли, Господства, Начала, Власти и Силы, Михáиле, Гавриле, Уриле, Рафаиле: подвигните с собою вся небесныя Силы и молите Бога за мя грешнаго, дабы милостив был в час скорби моея. Святый и великий пророче Иоанне, Предотече и Крестителю Господень – в день беды моея помози ми скверному и безаконному. Святии первии праведници и велиции пророцы Еноше, Ное, Мелхиседече, Авраяме, Исаяче, Иякове, Иосифе с единонадесять Патриархы, Моисею, аяроне, Исаие, Давыде, Илиа, Самоиле, Даниле, Иеремею, Иоиле, Захарие, Науме, Софоние, Аввакуме, Гедеоне, Иосие, Михею, Захарие, Авдию, Малахие, Елисею, Аммосе, Иезекиилю, Анание, Азарие, Мисаиле, Иона, Аггею, со всеми пророкы молитеся за мое окаяньство и помилуйте мою душю, осквернившююся многыми злыми делы. Святии верховьнии велиции Апостоли, избраннии Божии, Петре и Павле, Иоанне, Иякове, Аньдрею, Филиппе, Матфею, Луко, Марко, Фомо, Варфоломие, Иякове Алфеев, Иуда Ияковлю, Симоне Зилот, Варнава, Ияков, брат Господень, Прохор, Стефан Архидиякон, Тимофей: подвигнете с собою все седмьдесят ученик Христовых и молитеся за мя грешнаго и непотребнаго раба своего к милостивому Владыце и Господу Исусу Христу. Святии страстотерпци и велиции мученицы и исповедницы и безсребренници и чюдотворци и младенци Георгие, Дмитрие, Фео́доре Тирон, Никито, Фео́доре Стратилат, Гурие, Самоне, Авиве, Прокопие, Евстратие, Меркурие, Арефо, Мино, Акакие, Андрею Стратилат, Христофоре, Прове, Тараше, святии 40 [четыредесять] мученик в Севастии, Александре, Сергие и Вакше, Борисе, Глебе, Михáиле княже, Феодоре, воеводо Трифоне, Нестере, Флоре, Лавре, Михáиле балгарин, еже есть святое детя, Козмо, Дамиане, Ермолае, Пантелеймоне, Кире, Иоане, Кириче трилетный, Мамонте, Саво Готфине, Галактионе, Хрисанфе, Стратонниче, Василиско, Кондрате, Ко́ноне, Димитрие, иже в Даоде и вси святии мученици, лик страстотерпець, помолитеся Богу за мя лукаваго и лживаго к Богу и человеком, помилуйте мя грешнаго раба своего, избавите мя греховныя скорби. Святии Святители и учители вселенней, столпи неподвижимии, утвержениа церковная: Деонисие Ареопагите, Иерофие, Игнатие, Лазаре, Климянтие, Василей Кесарийский, Григорей Богослов, Иоанне Златоуст, Нико́лае, Силиверсте, Спиридоне, Григорие Митиленский, Петре Александрьский, Григорие Арменьский, Кирил Александрьский, Афонасей, Евстафие, Антиох, Анфиме, Амъфилохие, Григорие чюдотворче, Поликарпе, Ипполит папа Римский, Леонтий Ростовьский, Иона Митрополит новый чудотворець – подвигните с собою вся святыя Святители и весь лик богоносных отец, молите Бога Спаса за мя недостойнаго и лениваго, разрешите мя от грех моих великых и тяжкых. Святии преподобнии Отци и постници и велицыи пустынници, земнии ангели и небеснии человецы Антоние, Феодосие, Феодоре Студийской, Пимине, Сисое, Арсение, Иоанне Колов, Венедикте, Максиме, Ефреме, Ануфрие, Макарие Египтянин, Павле Фивской, Даниле Скитский, Паисие Священный, Павел подруг его, Макарие Александрийский, Павле простый, Агафон, Висарионе, Пахоме, Пафнутие, Авраямие, Василие Новый, Григорие ученик его, Акакие, иже в Лествице, Архип, Агриколае, Ефросине, Филимоне отшельниче, Антоние, Феодосие Печерьский, Варламе Новгородский, со всеми преподобными снемшася подвигнитеся, молитеся за мене грешьнаго и худаго смиренаго многыми грехы. Святыя праведныя и преподобныя жены и мученицы все вкупе: Анна, Еласавета, Мариа, Фекло равноапостолом, Анно, Анастасие, Фетиное, Ирино, Елено, Марино, Марие, Евфимие, Евгение, Федоро, Пелагие, Таисие, Февроние, Евпраксие, Евдокие, Екатерино, Парасковие, Евфросиние, Матрено, Сусано, Домнико, Анфусо, Анастасие, Иулияние, Христино и Улито, Наталие, Епистимие, Зиновие, Агафие, подвигните с собою вся святыя жены избранныя преподобныя и мученицы и преже закона благоверно жившая, весь лик святых жен и с мироносицами молите Бога за мое окаяньство и недостоиньство, да бых вашими молитвами избыл мукы вечныя и огня вечнаго негасимаго. Вси святии Божии, преподобнии и праведьнии иже от створениа миру подвигом великим угоди(ша) Богу, и трудом многым победи(ша) дьявола и попрали нивочтоже створьше со всеми бесы его! Аз грешный раб Божий припадаю к вам всем Святым, приимите мя грешнаго и сквернаго и сохраните мя во вся дни и нощи и на всяк час на пути и в дому и в всяком месте, и во исход душа моея на въздусе; помозите ми в день судный, молитеся за окаянную ми душю Богу Вседержителю, Ему же слава, честь и поклоняние Отцу и Сыну и Святому Духу, всегда ныне и присно, и в векы веком. Аминь.

Молитва в суботу по часех преподобнаго Кирила.

На множество щедрот Твоих надеюся, припадаю Ти, Христе Спасе, и на величество чюдес Твоих взираю выну, прошу милости Твоея великыя! Но не отверзи мене от Твоего лица за множество грехов моих; зане же прогневах святое имя Твое. Рех бо съхранити закон Твой и не съхраних; и того ради чюжь бых всякаго добра. Украдено ми бысть духовное богатство, а душа моя, аки пленница, люте уничижена есть. И ныне паки к Тебе възвращаюся и отданиа прошу многых ми прегрешений: веде бо Твое человеколюбие. Аще хощеши, можеши мя очистити: понеже разслабленаго онаго, егоже¹³ в суботу стропом¹⁴ низвесивше с великою верою положиша и того словом въстави и грехы отпусти. Ей, Господи Боже мой! и мене, разслаблена суща многыми грехы, отинудь¹⁵ недвижима нечаянием, Твоею милостию въстави. Едине премудре, врачю душам и телом, иже словом запретив волнам морскым! Устави бурю страстей моих и волны утиши нечистых ми помышлений, запрети бесу, всегда стужающему ми, да отступит от моея немощи, да, яже нечювственно изгубих, сиа паки покаяием приобрящу, поминая блуднаго и блудницу, и разбойника и мытаря, хульника и отметника, их же приснопамятны показа покаяния ради, да и мене кающася не презри. Ты бо съвеси безумие мое и греси мои от Тебе не утаишася. Якоже бо велико величество Твое, тако и милост Твоя бесчислена есть. Господи! прости, отдай, яже Ти съгреших; очисти, избави мя от всякаго зла молитвами Пречистыа Владычица нашеа Богородица¹⁶, и всех Святых, иже от века Тебе угодивших. Яко Ты еси Бог мой и Тебе славу и молитву всылаем Отцу и Сыну и Святому Духу, ныне и присно, и в векы веком, Аминь.

Молитва в суботу по Вечерни преподобнаго Кирила Туровскаго.

Господи Исусе Христе, Сыне Божий, многомилостиве человеколюбче, не хотяй смерти нам грешником, но всякыми образы ведый ны к спасению, презря¹⁷ грехы, покаяниа ожидая, егоже¹⁸ на мне долготерпел еси, снабдя мя по вся дни живота моего и все благодеяние подая моему недостоянию: милостив бо еси человеколюбець плоти нашеа обещник¹⁹, в нюже одеявся, человекы обожи, и на первое достояние позва, нас ради, за наше спасение, на кресте распятся, и в гробе полежав, и въскресе в третий день, свободив праведных душа, держимыа в аде! Призри, Господи, на смирение мое и приими вечера сего моление, еже недостойне всылаю Ти! Яко голубь неразумием поучаюся, или яко вран неподобно зовый, не хитростию словесе возвышая глас, но горестию душа из глубины сердца въздыша, Тебе преклоняю сердце²⁰, Тебе на колену припадаю и руце простираю. Ты бо съвеси безумие и грехы мои от Тебе не утаишася. Веси бо немощь естества моего, Зижителю мой! Да что принесу²¹ на угожение Твое, иди что въздам вечныя жизни подателю? Но ничтоже имам, на негоже благоволит Дух Твой. Но не прогневайся на мя, много²² бо глаголю пред Тобою; ниже отрини мене от Твоего лица, не опасивь язык имуща, ни удержи щедрот Твоих оть раба Твоего: без Твоея помощи не могу ничтоже творити. Дерзаю умом Тебе безпрестано молитися и, мыслью раслабев, ни часа молитве оставих, духом желаю Тебе предстояти день и нощь, и телом низпадаю в тине злодеяний моих. Но Господи Господи мой! от небытия сътворивый мя, от юности же и до сего дне снабдевый мя, и ныне помилуй мя, избави душю мою от сети²³ вражия и помыслы, смущающая ²⁴ от сердца моего потреби; утверди нозе мои на недвижимемь основании, на твердемь веры Твоея камени, да не поразить буря греховная телесныя ми храмины; но буди ми стена твердая от лица вражиа. Положи страх Твой посреде сердца²⁵ моего, да отражу долу влекущую мя похоть плотьскыми²⁶ помыслы. Укрепи мя, Господи, всемощною десницею Твоею на невидимыя и видимыя враги и дайждь ми последний час дне сего богобоязненно преити и на темнаго искусителя вооружитися. Дажь ми честнаго и животворящаго креста знамение, его же вся толпы²⁷ бесовьскыя трепещуть и тающеся²⁸ отбегают. И дажь телу моему ложе покойно и очима моима легок сон. И да не уснет, ни въздремлеть храняй мене ангел, – да тем наставляемь, полунощьныя и заутреняя молитвы въздам Тебе просвещенным разумом, умом неуклонным²⁹, и на всяк день Тебе угожаю со всеми любящими Тя въистину. С ними же сподоби мя одесную Тебе стати, молитвами Пречистыа Ти Матере, Владычица нашеа Богородица; и силою честнаго и животворящаго креста и святаго³⁰ въскресениа Твоего³¹, егоже неосуженно мя сподоби видети³², милостию и человеколюбием безначалънаго Ти Отца, с Ним же благословен еси с Пресвятым, благим и животворящим Ти Духом, всегда и ныне и присно, и в векы веком. Аминь.

Молитва в суботу по Вечерни³³.

Хвалю Тя Господи Боже мой, пою и величаю Тя Господи и славлю Твою благостыню, благославлю и превозношю Тя Пресвятый и хвалю Твое человеколюбие и поклоняюся, славословлю Твое тредневное воскресение! Яко от брениа рукою мя создав и оживил мя еси Духом Своим, господина всей земли постави мя и яко отець заповеда ми чистоту хранити бескверну: окраден бых советом змииным, не радих Христе закона Твоего, срамляюся моего обожения ³⁴. Яко праведен сый, и предал еси во тление земли разрушитися, от нея же зачахся, и возрастити земли повелел еси терние от сот впечали мне; распространихся и в безакониих моих причтыхся скотем несмысленым. Но вся плоть потопив в водах, мое обличая нечестие, ненаказа мене ярость гнева Твоего и не почюх гневающаго Тя, но греха моего безумием возрастих и безаконие мое умножих, и Твое святое имя Господи в твари предах, Твое отвергох божество и бездушней твари послужих, и Твое имя святое прогневах Владыко. Но Ты пакы щедротами Твоими преклоняяся, велик в милосердии еси, не терпе зрети созданиа своего от дьявола мучима, но преклонь небеса человеколюбно, мене ради быв человек от Девы чистыя, якоже писаше в законе Моисей и пророци, оплеван быв и поруган, долготерпеливе, и заушен и на смерть осужен, и на кресте пригвоздитися изволил еси и въкуси смерть, безсмерътный, и воскресе тредневно. Господи, воздвигни мене осуженнаго на славословие, и очисти мя от соблазн моих. И сына славы Твоея сотворил мя еси, и Отца Тя нарицати сподобил мя еси: по пакы преступих заповедь Твою и грехови раб бых. Тыже, Господи, даровал ми еси покоянию время и пакы да слезами моими омыю я. Приими, Спасе, мое (покаяние) и очисти мя от скверн соблазн моих и поток слезами подаждь ми, да угашю огнь вечный, рыдание и покаяние подаждь ми, да избегну будущаго плача; воздыхание и обращение посли ми, да зде плачюся и каюся оного мучениа, и в первое одеание одежи мя, Христе, и в чертог Твой приими мя, идеже глас Ангел Твоих и праведных лицы радуются. О, Пресвятая Троице Единосущная! от славы Твоея не отверзи мя грешнаго. Ты бо божественая Троице: чту и поклоняютися и Тебе угожю всем сердцем моим, ныне и присно и в веки веком. Аминь.

Молитва в суботу же по Вечерни.

Сподоби мя, Господи, сия заря и само то солнце видети и без греха сохранену ми быти Твоим заступлением, Владыко, и дайждь похвалити непобедимую силу Твою! Яко вельми красну тварь помыслил еси быти, на службу нас ради грешных, да и аз (буду) сподоблен света сего. Молютися, Господи, дайждь ми, милостиве, немерцающий, безконечьный нетленный свет лица Твоего некогда видети. Ныне же, помощию Твоею понуждаем, о милости Твоей радуася вопию глаголя: слава Ти, Святая, Единосущная и Неразделимая и Животворящая честная Троице, Отца и Сына и Святаго Духа, и ныне и присно и в веки веком. Аминь.

Примечания:

При издании молитв св. Кирилла, были использованы:

Три рукописи Соловецкой библиотеки

а) сборник под № 802, состоящий из статей разнаго содержания, написанных в XV и XVI в., в 4-ю долю, на 202 стр; здесь помещены 21 молитва св. Кирилла на л. 171–201: все молитвы названы именем Кирилла Туровскаго, или Кирилла преподобнаго, Кирилла священноинока;

б) Большой Требник дачи Новгор. Митроп. Макария под № 1085, написаный в 1505 г., в лист, на 712 листах: молитвы св. Кирилла, в числе 21, занимают здесь 684–712 стр;

в) Следованная Псалтырь, принадлежавшая св. Филиппу Митрополиту, написанная в XVI в. в 4 долю на 547 стр: здесь помещены четыре молитвы св. Кирилла: по одной молитве после каждаго молебнаго канона Святой Троице, св. Крестителю, св. Апостолам и всем Святым;

Две рукописи Волоколамскаго Монастыря

г) Сборник под № 109, состоящий из разных молитв и написанный в конце XV или начале XVI в., в 4 долю, на 258 стр: здесь, на стр. 46–138, находится 50 молитв, которыя названы именем Кирилла грешнаго, мниха недостойнаго, кроме 8 молитв, не означенных ни чьим именем;

д) Сборник под № 413, написанный в XVI в, в 4-ю долю, на 788 стр: здесь помещено 12 молитв с именем преподобнаго Кирилла или Кирилла священноинока, на стр. 648–686. За основание текста молитв мы принимаем список их в сборн. Солов. № 802, как более исправный сравнительно с другими списками и будем указывать на замечательныя разности, заключающияся как в этих списках, так и в печатном издании (см. статью «От издателя»). Молитвы же, не находящияся в этом списке, будут напечатаны по рукописи Волокол. № 109.

глас 5

Песнь 1.

Ирмос: Моисейскую поминающе, о душе, десницю, бежи грехолюбиваго Iегипта и разумнаго фараона отверзися работы, да крестную приимеши палицю и страстное пройдеши море смереньем, вопьющи: поим Господеви, славно бо прославися.

Аз есмь обличитель сущих во мне зол деяний, имиже прогневах Христа, вся Того преступив заповеди, и вся ныне писанью предах помыслы моя, словеса же и делеса, скверны вся и беззаконья на слышанье всему миру.

Доколе вязиши, убогая душе, объята телесными страстьми, обидою и немилосердьем, гордынею и пьянством? Си суть вражья тенета, иже тя живу до ада сведут. Но возпи покаяньем: О Христе мой! Расторгни ми съуз греховьный и спаси мя.

Якоже немолчно славят огнедохновеньными гласы серафимстии полцы Тресвятую Троицю, всея твари Сдетеля, то и я припадаю, прося отпуста многых ми грехов: о милостивый Творче! Поне наконец спаси мя.

Яко уродивыя девы, не имам покаяннаго светильника, ни стяжах масла милостивнаго, но всуе толку затвореном от мене дверем; но, о, Мати Божия, избави от мукы лютыя убогую ми душю.

Песнь 2.

Ирмос: Вонми небо, рече Моиси, втораго написая закона перваго преступльшим, разумей, душе, свое падение; Бог истинен, судяй праведно и въздая комуждо по делом его.

Адамьская помыслив, в бесовская впадох; по законьная емься, в беззаконьная уклонихся; свет възненавидев, во тьме греховней заблудил есмь.

Грехи моя, аки Ламех, пред всеми исповедаю, а своего зла обычая никогда же не остануся. О люте мне, окаяньному, всем мукам повиньному!

Яко Бог многомилостив, приими мя кающася и даждь ми оставление многих ми сгрешений, да в Троици прославлю Тя, Отца и Сына и Святаго Духа.

Яко всех сый грешней, на небо воззрети не смею, но к Тебе припадая, вопью: Мати Божия Пречистая! Умилосердися на мя и избави мя вечнаго мучения.

Песнь 3.

Ирмос: Яко Бог всесилен, изнемогшюю грехми душю мою и сердце, злыми запустевше, доброплодно створи, духом скрушеном молитву Ти принесу.

Аще вспомяну си дела, отинудь отчаюся, яко Божия не сотворих воля, но всю плотьскую похоть, прельщен врагом, сдеях, да кто мене не плачет, погибшаго люте.

Зело горька, о душе, темница и люта верига, яже о тебе злопомненья страсти; и аще сих не останешися, злым себе предаси бесом и теми люте, яко пленница, томима будеши.

Яко человек сгреших; но яко Бог прости мя, Отче, Сыне и Святый Душе. Тобе верою покланяюся и Твоея требую милости и до последняго издыхания.

Явлена от века всех крестьян Заступнице и к Богу Ходатаица Марье, богоизбранная Владычице! Приими мою молитву и подаждь отпуст многих ми прегрешений молитвами Си.

Седален, глас 6.

О, всестрастная душе! Како уязвися, како зле осквернися и како люте неключима бысть! Подтщися, покайся и припади, вопьющи к Богу, негли муки избавит тя.

Суд без милости, о душе, милости не сотворшим, блюди, внимай, Христово слово делом покажи; масло щедрот восприими, и свещю покаянья сблюди неугасающю, побди, ожидающи Жениха, да внидеши в чертог спасеных.

Песнь 4.

Ирмос: Провидя духом Амбакум, еже до моея нищеты Твое, Христе, схоженье, укрепляяся смотрьно вопьяше: яростью напрязи на враги лук Свой, избавляя от плена рабы Своя, немолчно вопьюща: Слава силе Твоей, Господи.

В мал час раб Христов нарекохся, во вся же дни и доныне греховный раб сведеся, делатель быв всякаго беззаконья, всеми нечистотами осквернився и всякой муце повинен быв, окаянный.

Горе, грешная душе, часто каешися и всегда сгрешаеши – почто не бежиши змье, еяже губительство веси? Како не боишися скоропие, смертное жало имущи? Пролей сльзы преже смерти, да ти угаснет вечный огнь.

Яже приях мнасу, и тою купля не творях, но мысльную раскопав землю и леностьным обивь платомь, неверьем душа посыпах. Но Троице Святая! Аще и взя от мене Свое, н в кромешнюю тьму связана не посли мене.

Явленых и неявленых, ведомых и неведомых, и чресъестьственых безаконий яко Бог прости мя молитвами, Богородица, Яже за вся молиться. Христе многомилостиве! Тоя ради възведи мя из пропасти греховныя.

Песнь 5.

Ирмос: Огньный ум Исаия духодвижимо провъзглашаше; утренюя к Богу моляшеся приложити зло нечестивым, понеже истины не створиша на земли; тем взникни, душе моя, от мрака греховнаго и озарися покаянья светом.

Бых подражатель Скариоту Iюде неправеднаго имения ради; лика же апостол отпадох, продав истину на лжу, и бых давим отчаяньем, но не презри мене, Христе Спасе, яко же Петра, плачущася горько.

Не прельщайся глаголющи, о душе, яко просто кающися спасешися; аще не потерпиши преже конца, слезами горько смиряющися, то лукавым подобна будеши бесом, иже ведуще Бога злое деют, и с ними вечно мучена будеши, аще не плачешися ныне.

Иже рече Господь вдовицю обидиму от супернику, в том же граде и судью неправедна: град убо, рече, разумей свое тело, вдовицю же убогую ми душу, обидиму сердечными помыслы, и судью – Слово Божие, Единаго от Троица, ожидающа моего покаяния, и си вся учившиися видят.

Яко всех крестьян Заступниця и Помощница обидимым, Мати Божия Пречистая, к Тобе припадаю моляся, прося отпуста многих ми зол, очисти оскверненую люте убогую ми душю Твоими Богоприятными молитвами.

Песнь 6.

Ирмос: Яко Iона вопью Ти, Христе, в ките зол моих одержим: из глубины возведи мя греховныя, даже не искончается душа моя, в церковь святую твою приими мою молитву.

Аз к Тобе припадаю, Христе Спасе, прося прощения моих грехов, иже от уности и доныне на убогую ми сдеях душю, но яко милостив, дажь ми сльзы покаянья.

Зело милосерд еси, Христе, и смерти не хощеши грешнику, вожьзи Свою великую милость, и Свою обрящи мя драгму, и святыя съзови суседы, и всем створи веселье: ангелом и человеком.

Яко всуе тружаешися, о душе, о собе ищющи спастися, аще не от Бога дастьтися помощь: тем усердно покланяютися, Троице Святая, спаси мя на Тя надеющагося.

Яко всех пребольши земных и небесных чинов, Дево Пречистая Богородице, к Тобе бо припадаю моляся: ходатаи ми буди к Сыну Си и всех Богу отраду ми подати в день судный.

Кондак, глас 8.

Душевнаго падения по вся часы в собе видя и Твое долготерпенье, Слове, преобидя, всех благых лишихъся и всякой муце повинен бых, но възведи мя отчаяна, Богородица ради, Многомилостиве.

Икос: Земная и временная возлюбив, вечных благ лишен бых, приди, душе, и возпи Христу: едине человеколюбче, грешником не отсек надежи, но милость кающимся пролья, и мене кающася не презри; разумею разбойника, исповеданием спасена, и мытаря, милостынею очищена; ту и блудницю помышляю плакавшюся, яко во всех положил еси образ покаяния. Мощен же еси и моя отпустите прегрешения, имиже по крещении осквернихся, и чистоту яко Бог подаждь ми, и спаси мя Богородица ради, Многомилостиве.

Песнь 7.

Ирмос: Ангелом отроки схранив в кипящи пламенем пещи, и мучителя опалив, посрами, яко Бог извествуя силу Свою, Емуже поюще рцем: в векы благословен еси.

Год покаянья, о душе, не отлагай, мысли прочее: еда яко на Настасья оного, гнев Божий скоро варить тя³⁵, и внезапу оставльши все, адьское постигнеши дно.

Феодосья великаго царя бодрое покаяние ты веси, о душе, и чимь своя очисти сгрешенья, да и ты от унынья вспряни, омывающи слезами своя прегрешения.

Яко же чту Бога Отца, тако верую в Сына Христа, единако молю и Духа Святаго, славлю в единстве Троицю, покланяюся единому Богу и прошу грехов отпуста.

Яко едину имам, Богородице, утеху и прибежище, и Тя на помощь призываю, умоли Христа, Его же еси родила, милостивому быти сде ныне и в день судный.

Песнь 8.

Ирмос: Царских детий молитва пещный пламень прохлади и ярость мучителеву победи, и, яко в чертозе поюще, глаголаху: благословите вся тварь.

Без добродетели молящися, о душе, аще и въздух исполниши словес, судит ти Паиел глаголя: пяти слов хощу в молитве с верою, неже тьму словес языком.

Господи многомилостиве, на мя скорбнаго призри, и худую сию приими молитву, не хитростью слагаему, но от горести убогия ми душа о гресех приносиму.

Яко единому Богу в Троици из глубины сердца въпью, и верою молютися глаголя: Отче наш, Иже еси на небесех! Отпусти наша долги, ни въведи в напасть, но от неприязни избави ны.

Яко Заступница сущи верою Тобе молящимся, тем к Тобе ныне припадаю: не презри, но спаси, Богородице, и всякого избави зла Ты, и мою к Богу донеси молитву.

Песнь 9.

Ирмос: Тя по естеству Деву и паче естьства Бога рожьшю Евжину клятву потребивша и Адама от уз избавльшаго, Его же ныне моли подати ми оставление грехов, да Тя, Богородице, радостным сердцем правоверно възвеличим.

Ангели и Архангели, Херовими и Серафими, Власти и Владычьства, Престоли, Господьства и вся чиноначалия горних чинов молят Тя, Христе, Царю всего мира: молитвами небесных сил помилуй мя, грешнаго.

Единому Тобе, Христе, сгреших, и паче всех Тя прогневах, и душю злыми оскверних, но Своею милостию оцисти мя, послушав моленья Божественных Властий, окрест престола стоящих и за весь мир молящихся.

Како хощу осуженный предстати Тобе, Судии всех Богу, обличаем за вся злая моя, яже без ума сгреших, волею себе всего оскверних, но щедротами своими, Христе, помилуй мя осуженаго.

Помилуй мя, Боже, помилуй, егда хощеши ми судити, не осуди мене в огнь, ни обличи мене яростью Си: молить Тя Дева чиста, рожъшия Тя, Христе, и множьство ангел и мученик сбор.

Cветилен: Небо звезд.

На хвалитех, глас 4.

Престол тщеславьем собе поставих, ложным многословиемь на нем възлегох, самохвалениемь вся осужаю, пагубно омрачихся, дым в солнца место держю, с горы закона уклонихся, яко тощь корабль мысленными волнами ум погрузих в мирстем любоименья мори, възлюбих нынешний век и гнусных наполнихся дел: Господи, потопа греховнаго избави мя.

Колесницю уготових си, похотьми греха утворену; акы коня впрягох злую скверну и безаконья, имиже несом по широкому пути стыднаго обычая, в последнее се спасительное крещенье темнаго огня: не презри мене милостию Си, Iисусе, всего мира грехы всприим, и настави мя на путь покаянья, да дело с разумом принесу Ти; яко и кадило, приими молитву мою.

Бежати греха помыслих и скоро многими постижен бых, похоть греха удолжих, и еще мысль прилежат ми на зло, но уподобихся свиньям, радующимся скверне, и поревновах псом, поядающим своя блевотины, и утольстих плоть, и бесом игралище оставих, – и како исповеде по числу, а не сведе моих зол? О Христе мой, Слове! От греховныя мя работы, яко милостив, свободи.

Слава, и ныне: Богородице, о мире молитвенице и Богу нудительнице, человеком спасительнице и бесом лютая томительнице! Хотению Ти, Дево, пресильна сила въследует, токмо въсхощи; не мьне, Владычице, но имени Твоему дажь славу, молютися, милостивая, створи, да буду царь телу своему и господин вредом и естьству приставник, подражатель Сына Ти. От помощи Твоея утешение мое скорое.

На стиховне стихиры, глас 8. Подобен: Что вы.

Еже ми подкопа враг в первую годину храмину, и душевную украде чистоту, понеже в третью годину старости дажь възбнути на покаянье, да не в гресе и нищете скончаюся. Ищете, рекл еси, и просящему дати обещася, и толкущему ми отверзи двьри милости Твоея.

Шатание уности, лицемерье старости – обое без ума притяжах, в лестную одеяхся ризу и всь студа наполнихся; се, яко в зерцало приник дел моих, скверно душа моея узрех, и яко во окрине слез моих омыти подвигнуся, дажь ми время покаянию.

Века сего любовию многа имения желаю, а сам долго жити не могу; покаянию год отлагаю, в старости Богу послужити мышлю, и лениве свою жизнь скончаваю, сластьными ласкосердуя, похотьми побежаемь, горд, и величав, и самомнив, Господи, избави мя от смерти тела моего.

Разумное Утро, Богородице, и Заре безначальнаго Света, Всток сияния славы Отча и чувьственое солнце светомь подарившаго, ангельскый ум разумом кормящаго, сего многоочитии видети не могуще, крилы закрываються, о Мати светлыя чистоты, створи мене сына дни и чадо света!

Блаженны, глас 6.

Ирмос: Разбойник оглагола – разбойник же благослови; сия оба на кресте повешена, но, о Милостиве, яко тому рцы познавшему Тя, Господи, и мне отверзи двьри преславнаго Ти царствия.

Страшен еси, Господи, изливая безчестье на князя, на священникы гнев открывая и судия в плен посылая, по воли сгрешивших и волею не кающихся.

Горе лености моего спасения; людская грехы присно изедаю, просимыя скоро приемля дары; но си праведничю приимуть мьзду, аз же с лицемеры осужен буду. Имже веси судом, Iисусе, спаси мя.

Падший мя ум въздвигни, Господи, да жертву словесну исповедания уст принесу Ти и душевное кадило – сердца воздыхание; послушай моего моления, яко отец своего чада немования, и приими мою молитву, яко мати младенца.

Божьство в Собе сый, Свой имея ум, бе присно ум светел, а ино ничтоже – се единьство не обято мыслью, ни кый же ум достигнеть, ни Сына кто весть, аще не Дух право сроден просветить приглашати: Троице Святая, спаси души наша.

Марие, небесное Кадило! Божественный Угль в Собе имела еси, егоже Моиси в купине, Исаия от Серафим, Езекииль в колесих видети сподобишася, Богородице, пресвятое имя, спаси душа наша.