Поклонение Господу нашему Иисусу Христу

(Святителя Димитрия Ростовского)

Пречистому Образу Твоему поклоняемся, Благий, просяще прощения прегрешений наших, Христе Боже! волею бо благоволил еси плотию взыти на крест, да избавиши, яже создал еси, от работы вражия. Тем благодарственно вопием Ти: радости исполнил еси вся, Спасе наш, пришедый спасти мир.

Приидите, поклонимся Цареви нашему Богу. Приидите, поклонимся и припадем Христу, Цареви нашему Богу! Приидите, поклонимся и припадем к Самому Христу, Цареви и Богу нашему!

Покланяюся Твоему прежде денницы рождению от Отца без матери, и неизреченному еже о нас смотрению, – Сыне Божий.

Покланяюся Твоему тайному снисхождению, и действом Святого Духа во утробе Девической воплощению, рождению и яслях скотских положению, ради нашего спасения, человеколюбче Господи!

Покланяюся и славлю плотское Твое обрезание, смиренное от раба крещение, пресветлое на Фаворе преображение, славное с победою в Иерусалим, на смерть вольную вшествие, вся труды Твоя нас ради подъятые, в них же был еси от юности; постяся и подвизаяся, хотя и труждаяся, уча и проповедуя, исцеляя и воскрешая. Все сие воспоминая, – славлю, величаю, почитаю и любовию облобызаю, и о сих всех благодарю Тя – премилосердого Творца моего!

Поклоняюся Тайной Твоей вечери, Сыне Божий, на ней же Самого Себе дал еси в снедь верным, да тела и крове Твоея причащающися, имам Тя – живота вечного!

Величаю же и смирение Твое глубокое, во умовении ног учеником явленное, и молю Тя – Господа моего: смири вознесенную мою гордыню, смиренномудрию же научи мя!

Поклоняюся пречистому, пресвятому и животворящему Телу Твоему, под видом хлеба за мя ломимому во оставление грехов!

Поклоняюсь пречистой, пресвятой и животворящей Крови Твоей, под видом вина за мя изливаемой во оставление грехов!

Поклоняюся страстем Твоим, Христе! (трижды).

Поклоняюся коленопреклонению Твоему в вертограде идеже моляся, пот кровавый излиял еси, – да мимо идет от Тебе чаша страстей. Молюся же Ти Господу моему: научи мя всегда усердно молиться, и чашею спасения напои мя, да во веки благодарю Тя!

Поклоняюся Тебе, – Господи Боже мой, воспоминая вольная Твоя страдания, лестное от Иуды лобзание, неповинное от беззаконных ятие, связание, и бесчисленные поругания: ударения, оплевания, заушения, досады, биения, терзания, уничижения и вся Твоя, мене ради окаянного и неблагодарного, претерпенные мучения и несчадные крове-излияния. Все сии написую в уме и сердце моем, любовию я лобызаю, жалостию истаиваю, и о всех сих превозношу, и благодарю Тя, – любимого ми Господа, Иже тако мя возлюбил еси, яко и душу свою за мя не пощадил положити!

Поклоняюся неповинному Твоему, Судие мой, на смерть осуждению, болезненному тяжкого Креста ношению. Пречистого Ти Тела на Кресте протяжению, пригвождению, и посреде двою разбойников на Голгофе распятию. Молю же Тя – Господа моего: не осуди мене по делом моим, даждь ми неленостно носити Крест свой, пригвозди в страсе Твоем плоть мою, распни мене миру, со страстьми и похотьми, и даждь ми да не судить ино что видети сердце мое, во вся дни живота моего, точию Тебе, – Иисуса распятого!

Поклоняюся Пречистой и Пресвятой Главе Твоей, мене ради неблагодарного, острым терновым венцем избоденной. Молю же Тя – Господа моего: искорени злая, скверная, блудная, хульная и тщеславная от главы моей!

Поклоняюся Пресвятым ушесам Твоим, мене ради окаянного и неблагодарного, хуления злочестивого исполненным, – и молю Тя – Господа моего: даждь ми не слышати ничтоже не полезно, – послушлива же Твоему велению сотвори!

Поклоняюся Пречистым очесам Твоим, мене ради окаянного и неблагодарного, кровию и слезами залитым, – и молю Тя – Господа моего: призри на мя и помилуй мя! Отврати очи мои не видети суеты!

Поклоняюся Пресвятому Лицу Твоему, еже яко солнце на Фаворе сияше, ныне же от заплевания и ударения потемненно, – и молю Тя – Господа моего: Лице Твое просвети на раба Твоего!

Поклоняюся Пресвятым устам Твоим и языку, жаждою пламенному, вкусившему оцет с желчию, – и молю Тя – Господа моего: обуздай язык мой злый, и положи хранение устом моим!

Поклоняюся пречистой, пресвятой и животворящей язве Твоей, яже в десной Ти руце и молю Тя – Господа моего: сподоби мя одесную Тебе стати!

Поклоняюся пречистой, пресвятой и животворящей язве Твоей, яже в шуией Ти руце и молю Тя – Господа моего: от части шуия мя избави!

Поклоняюся пречистой, пресвятой и животворящей язве Твоей, яже в десной Ти нозе, – и молю Тя – Господа моего: настави мя на путь правый покаяния!

Поклоняюся пречистой, пресвятой и животворящей язве Твоей, яже в шуией Ти нозе, и молю Тя – Господа моего: от всякого пути лукавого возбрани ногам моим!

Поклоняюся пречистой, пресвятой и животворящей язве Твоей, яже в Пречистых ребрах и в прободенном Ти сердце, отнюдуже истече кровь и вода во искупление наше, – и молю Тя – Господа моего: сокруши окаменение мое, порази жестокое сердце мое, сотвори е страхом Твоим, уязви е любовию Твоею, да Тебе – Господа моего возлюблю всем сердцем моим, всею душею, всею мыслию, всею крепостию и всем помышлением моим, и да текут от сокрушенного сердца моего потоки слезные, омывающие греховную мою скверну!

Поклоняюся всецелой плоти Твоей Святой, мене ради окаянного неблагодарного, от ног до главы язвенной и не имущей целости – и молю Тя – Господа моего: всего мя уязвленного грехами исцели!

Поклоняюся наготе Пречистого Тела Твоего, – и молю Тя – Господа моего: покрый студную наготу окаянныя души моея!

Поклоняюся Пресвятой душе Твоей, Богу Отцу в руце преданной, – молю Тя – Господа моего: в час исхода душу мою во Своя Святыя руце приими, и от воздушных духов злобы сохрани!

Поклоняюся снятию со креста Пречистого Тела Твоего и во гробе положению. Молю же Тя – Господа моего: даждь ми, да яко мертв и погребен – живу в мире!

Слава страстем Твоим, Господи! (трижды).

Поклоняюся, славословлю и величаю Твое во ад сошествие, ада пленение, смерти попрание и трехдневное от гроба воскресение. Молю же Тя – Господа моего: душу мою, грехами плененную, в любовь Твою плени, умершую воскреси и от ада избави!

Слава, Господи, Кресту Твоему и Воскресению!

Поклоняюся Твоему с плотию на небеса Вознесению, идеже одесную Бога Отца седяй, зриши мою беду и немощь, слышиши мою грешную молитву, разумееши моя помышления издалече, и веси все мое предложение, – и молю Тя – Господа моего: вознеси ум мой от земного пристрастия к горнему желанию, укрепи неможение мое, исполни недостаточество мое и скудость, исправь молитву мою, и веди мя к доброму концу и спасенному пристанищу, да егда приидеши судити живым и мертвым, не посрамлен и не осужден обрящуся пред Тобою! Господи! не вниди в суд с рабом Твоим, яко не оправдится пред Тобою всяк живый!

Сие падши ниц на землю глаголи:

Достойно есть воистину покланяться Тебе – Господу моему Иисусу Христу, от всех Святых славимому и поклоняемому Богу, о Его же имени всяко колено кланяется: небесных, земных и преисподних! И аз недостойный бесстудно приступаю и молю: спаси мя, Спасе мой, по Твоей благости, а не по моим делом! Ты хощеши мя спасти, Ты веси, коим образом мя спасти: спаси убо мене, яко хощеши, яко можеши, яко веси, имиже веси судьбами спаси мя! Аз на Тя – Господа моего надеюся, и Твоей воле Святой себе вручаю: твори со мною еже хощеши! Аще хощеши – мя имети во свете, буди благословен. Аще мя хощеши имети во тьме, – буди паки благословен. Аще отверзеши ми двери милосердия Твоего: добро убо и благо. Аще затвориши двери милосердия Твоего: благословен еси, затворивый ми в правду. Аще не погубиши мя со беззакониями моими, – слава безмерному милосердию Твоему. Аще погубиши мя со беззакониями моими, – слава праведному суду Твоему. Яко хощеши, – устрой о мне вещь!

Слава Тебе, Христу Богу моему премилосердому, пострадавшему за мя, и претерпевшему заплевания, и раны: тернов вемец и трость, крест, гвоздие и копие, смерть и погребение!

Благодарю Тя, – Спаситель мой, Свете мой, Животе и Воскресение мое, яко возлюбил мя еси, и Себе предал еси за мя! Не остави мя, Создателю мой, ныне и во век будущий. Аминь.

Тебе, Спасителю и Искупителю моему, предаю душу мою и вся чувства и глаголы, – моя, советы и помышления моя, и вся тела и души моея употребления, веру и жительство мое, течение и кончину живота моего, день и час издыхания моего, представление, упокоение, и воскресение души и тела моего, – Тебе вручаю и молю Тя: приими мя в руце Твоего Владычняго защищения, распятыми Твоима дланма благослови, в язвах Твоих сокрый, и избави мя от всякого зла: Кровию Твоею очисти многое множество моих беззаконий: Крестом Твоим, аки копием пронзи, окаянное сердце мое, яко да кроме Тебе – Животодавца моего ничтоже ино возлюбит, и яко да на Тебе – распятого всегда взирает, состраждая и умиляяся, грехом, аки мерзкою блевотиною гнушаясь, волю свою отсецая, и яже о себе на Твой Промысл возлагая, и от туду помощь восприяти уповая. Страстию Твоею умертви ми душетленные страсти телесные, и подаждь исправление злому моему и развращенному житию, и от грядущих грехопадений лютых восхищая, от бесов, страстей и злобы человеческой немощь мою покрывая, и безбедно спасительным путем к Тебе – Пристанищу моему и желаний краю – руководствуя и благословенным Твоим овцам сопричитая, да с ними Тебе – Творца моего, со Отцем и Святым Духом славлю во веки. Аминь.

Поклонение сие обнимает все воплощенное домостроительство спасения нашего, начиная с предвечного Совета о нем и до Вознесения Господня на небо. – Здесь изображается Великий Образ Спасителя нашего, во всей полноте Его, и все главные условия нашего спасения, выполненные Им и требуемые от нас.

Чтобы держаться на высоте и не забывать своего звания, всякому христианину весьма полезно совершать это поклонение, если не ежедневно, то, по крайней мере, в среды и пятки, или же вообще – как можно чаще. Что и советую моим возлюбленным пасомым. 28 Октября 1899 года.