Андрей Денисов

«Кто есть человек, – возглашающу пророку, – иже поживет и не узрит смерти?»[76] Кто от Адама рожденных «земля еси и в землю паки пойдеши»[77] Адаму реченных избежати возможет? Кто смертных страшнаго сего смертнаго таинства восприяти не воздолженствует? Ельма¹⁷³ убо, о, боголюбивая чада пустынная, потаися от нас церковнаго благолепия торжественник; скрыся от нашею очию любезный боголюбия ревнитель; покрыся смертными облаки братская красота; умолча язык, сладость слова Божия точащий; затворишася уста, молитвы соборныя к Богу и святым его мироюхающая¹⁷⁴; зайде сладкий нашего зрения свет; скрыся от очию нашею любезная свеща; взяся в горкия сия дни пустынное утешение; скончася в скорбное сие время раб Божий Петр, бодрый служитель церковный. Чесо ради никто зде от боголюбных возможе сие разлучение понести без жалостнаго сердца, никто без скорбныя души, никто без плачевнаго лица. Вси же жалостными уязвившеся сердцы: старейшии возскорбеша, церковнии восплакаша, общежители возслезиша, скитяне возрыдаша, сироты восхлипаша; вси же возтужиша таковаго усерднаго красителя¹⁷⁵ церковнаго, таковаго разженнаго¹⁷⁶ слову Божию служителя, таковаго ревнителна к Божию делу тщателя и в скорбных случаех вселюбовна утешителя, и в напастех скора молитвами вооружителя, и тепла всех к молитвам возбудителя.

Темже убо неправедно нам мнится быти таковаго слову красителя без слова гробу отдати, и якоже в земли тело, сице в молчании жизнь его скутати¹⁷⁷, и ниже любви духовныя, ниже сродственныя воспомнити, и лишити себе же и прочия любовныя сладкаго того изображения, и якоже незрим есть телесно, не зрети его душевными очима оставити. ¹⁷⁸Аще бо грубейшии от поселян умерший своя частыми воспоминании повествуют, и поселянская его дела, елика или в ратайстве дивна, или в ловительстве чюдна, или в домостройстве им мнится добра, та вся высоковещают и друг другу проповедают и, на гроб приходяще и друг другу любовнаго своего показующе, дела его и словеса возвышают, много себе теми повестми утешение устрояюще, – не много ли паче нам мужа сего, в духовных подвизех от юности усердно подвизавшагося и многия сладости и любви духовныя нам виновнаго, словом изобразити должно есть; не яко да он воспочтится, не требует бо сего смиренная она душа, но да мы словом изображена его, яко жива зряще, утешаемся и, поскольку возможно, ползы наслаждаемся и, воспоминающе любовно любовнаго нашего любви точителя, любовно на поминание души его воздвигнемся; чесого у нас ныне якоже саморучным его писанием[78] сице душею его просит и желает и любезно приемлет¹⁷⁸. Убо, всежалостная чада церковная, понеже любовными вашими пламы скорбите и желаете достойнаго желанию сего мужа зрети же и беседовати с ним, приидите ныне, отрем слезы от очию нашею и жалость от сердца нашего и с повестию сею походим с ним умныма очима, и воспомним краткостию слова пребывание его с нами, и поне¹⁷⁹ сице сотворим утешение себе от многия жалости.

Бе бо сей раб Божий от юны версты¹⁸⁰ научен красоты благочестия и от преятия родитель¹⁸¹ взгромажден ведением древняго благоверия, якоже и отечество его и вся поморская страна яко велие прародителное наследие святых отец древнее благочестие преятием¹⁸² друг от друга лобызаша, и отцы сыном и тии же своим чадом преподаша ведение же и слышание святоотеческаго православия, с киим поучением и просвещением сей Божий раб воспитовашеся. Не от невежд же неких и слова не причастных древлецерковное благочестие всеросийское в сей поморской стране в нынешняя времена смущенная проповедася и уяснися. Сице и рождение сего от прародителей и родителей, от нихже последованием благоверие восприят, не неведущих Писания, производится, якоже слово ниже хощет показати.

Егда бо грех ради наших Никоном патриархом премена благочестивых святоотеческих уставов учинися[79] и светлое светлейших святых отец чиносодержание отлагашеся¹⁸³, своя же его уставоположения утвержахуся, и знаменующийся крестным знамением по святых отец Божиим уставом, тии проклинахуся, и по старопечатным и старописанным святым святоцерковным и царственным и архиереосвидетелствованным¹⁸⁴ книгам содержателие благочестиа, знаменоносцы¹⁸⁵ же и чести достойнии отцы, яко злодеи тогда прогоняхуся, вязахуся и мучении тяжкими искушахуся. И тма тяжка гонителна покры тогда Росию, мечь и огнь поядающ села и домы и пустынная места за содержание древняго святоотеческаго благочестия. От лет же сие смущение седмыя тысящи сто шестьдесят втораго году,[80] с Никонова патриаршества, просыпася.

Оттогда противящийся Никонову новопреданию и опасный хранитель святоотеческих древниих содержаний, священный архиерей и Божий человек Павел, епископ Коломенский,[81] за имя Божие и за свидетельство Исус Христово, за древлецерковное православие, муж свят и достойный чести, с бесчестием послан бяше в заточение в поморскую нашу страну, во Олонецкой уезд, в Палеостровской монастырь; паче же рещи, яко некий Моисей и Аарон[82] Божиим изволением на утвержение новаго Израиля беззлобивых и богобоязнивых поморских людей прислан бяше. Идеже несколько время пребыв, свободно поучая народы, утвержая жити в святоотеческом благочестии, нововыниклых¹⁸⁶ уставов Никоновых соблюдатися наказуя. Коего учения и благословения архиерейскаго страны сея жители, вкупе же и родители сего раба Божия Петра, слышатели же и видетели зело бяху.

По сих же явися ин муж свят и благочестив, игумен Досифей с Тифины с Николы Беседнаго монастыря,[83] благочестия ради крыяйся, старостию и добродетельми украшенный, иже часто прибегая в пустынной некоей Куржетской обители, в строении преподобнаго некоего старца Евфросина[84] в нейже и святыя церкви бяху. В них же собирался со многими отцы, великими постники и знаменоносцы, иже от многих стран и от Соловецкия обители исшедшии, яко аггели некии земнии и небеснии человецы, службу Богови за весь мир приношаху и житием добродетелным просвещаху. И бяху мнози в них разумом Божественнаго писания обогащени и безстрастия светом просвещени, священнаго же и иноческаго чина знаменоносцы¹⁸⁷. Откуду тогда в зиму гонения лютаго на благочестие весна сияше пресветла от оных знаменоносцев благоверия.

Тогда мнози от знаемых и от сродных сего раба Божия во ону обитель прихождаху и просвещахуся, исповедовахуся и святых безсмертных Таин причащахуся. Аще и послежде защитницы Никоновы и ненавистницы древлесодержателнаго благочестия, архиерейсти посланнии с Новаграда (оле, плача и жалости!) не токмо распудиша¹⁸⁸ стадо Христово (по реченному апостолом: «Вси хотящий благочестно пожити о Христе Исусе гоними будут»[85]), но и святыя церкви тыя в Куржетской обители огнем пожгоша. Обаче одушевленныя церкви благодатныя, по апостолу: «Вы есте церкви Бога жива»,[86] старожитнии они отци, осталци Соловецкия и прочих обителей, крыяхуся по пустыням поморским около Онега езера, паче же около отечества сего поминаемаго нами Петра – Повенца[87] именуемаго. И тако древлеправославное благочестие храняшеся и проповедовашеся, и в домех благочестивых богобоязнивых мужей светяшеся, и пустынная места благочестивыми от гонения наполневахуся. И сей раб Божий Петр, от младенчества благочестивыми повестьми питаем, со сродники своими возрастааше.[88] И тако не токмо от издревле сие наше православие евангельскими, апостольскими и соборными догматами украшено есть и священными книгами засвидетелствовано, но и в смущенныя сия дни архиереиским и священных мужей благословением и проповедию насаждено и страдалческою кровию утвержено есть, в немже сей раб Божий, в юны версты слышанием просвещаем, возрасте. Тако же и от прародителей и родителей, наученных святым книгам сущих и вероятельства¹⁸⁹ достойных, восприя последованием уставы древлецерковныя.

Прадеда бо его отец бяше рода князей Мышетских[89] с Новгородский области, именуем Борис Александрович, муж благ и благочестив и добродетелен, якоже последованием родителей ведение даже до нас дойде. Той во время смущения Руския земли, егда от шветов и поляков волновашеся Росия и мнози принуждаеми бываху крест целовати за чужестранных кралей, сей же благородный князь не восхоте в том учинити поползновения, но якоже крепок во благочестии, сице своим природным государем вернейший явися, не поддадеся чужестранным иноверным кралем, не восхоте креста за них целовати. А понеже велие налегание¹⁹⁰ тогда от противных бяше и бедствоваше Росия конечным бедством, остави сей отечество свое и поместья и вотчины и преселник бывает в Заонежской пятины, аки в пустыни некоей, в лесожителнем сельце, Пудо<ж>ская гора именуема[90] в немже, во иноческом чину Боголеп преименованный, благочестно преставися.

Сын же его Иван Борисович священства и иночества чином назнаменован, Иона во иночестве именуем, упокойся. Того же дети Порфирий священник и Евстафий преселники на место, Повенец именуемо, быста,[91] незнатно и убого тогда суще. Яко бы послежде от них и рода их тое место населися, и из рубища нищеты и неволи очистися, и знатно в сих странах учинися.

Сего бо Евстафия дети Ияков[92] иже и дед бяше сего поминаемаго Петра, муж в сих странах знаменит и разумен, в гражданстве же словый и от великих государей самолично многажды милосердие гражданству же и сему Повенцу получивый; а наипаче во время воеводства на Олонце князя Терентия Василиевича Мышетскаго,[93] от негоже по любви и милосердию благородия сродственнаго велие милосердие тогда получи. Такоже и братия сего[94] вси Священному Писанию научени и церковными древними уставы просвещени, и в гражданстве в странах сих знаменити бяху. От них же Дионисий не токмо в мире правдою и добродетелию поживе, но и, оставив мир, пустынное житие лобызав, добре Богу девятолетно потрудися.[95] Свидетели житию и словесем его братства сего старожители суть.

Помяновеннаго же Иякова сын Прокопий, произнесый¹⁹¹ сию добрую отрасль, в мирстем¹⁹² житии умре. Мати же сего добляго Евфросиния, во иночестве Екатерина, зело боголюбива и благочестива бяше, яко многия ея ради веры и любви к Богу единочадых своих, сего Петра и дщерь едину[96] и вся мирския покои не пожале во время гонения веры оставити, да благочестно во благочестии скончается.

От таковых прародителей и родителей сей наш Петр происшедый и от младенчества священным книгам и древнему благочестию научен бяше, в девятоенадесять лето возраста сего мира и мирскую прелесть оставляет: «Возжада бо, – рече со пророком, – душа моя к Богу крепкому и живому».[97] Услышав глас евангельский – и поревнова, ощутив пресладкаго Владыки глагол – и возусердствова, почюв реченное: «Аще бо кто оставит отца и матерь, жену и чада, села и имения, сторицею приимет и живот вечный наследит»,[98] – и теплым тщанием исполнитель сему учинися: отбеже покоев телесных, отскочи красоты славы сластей, яже тогда преизбольствоваху, и населник <с> сверстники и сродники некими своими пустынных мест бывает, с Псалмопевцем ревнуя и вопия: «Се удалихся бегая, и водворихся в пустыни, чаях Бога, спасающаго мя».[99] Тепл бо бяше верою и разжен¹⁹³ усердием, глаголаше бо: «Аще ми и гладом умрети в пустынных местех, но лучши произволяю терпети Христовы ради любви в прародительском церковном благоверии, „нежели жити в селех грешничих”¹⁹⁴ [100] в смущении о благочестии, в мятежех и молвах и гресех мира сего».

Егда же приложися пустынным недром, не лености и дряхлости вдадеся, не сну и унынию послужи, не своевольству и безвременному скитанию себе вручи, но весь всего себе всеусердно Богови на службу отдаде. Церковную службу исполнити в келиях по уставу возусердствова, ейже от младенчества научен бяше. Правило же келейное[101] по благословению отец усердно исправляше. Чтению же Священных Писаний, яко райския сладости, по дни и по нощи выну¹⁹⁵ наслаждатися не преста, читая, преписуя, каталоги устраяя¹⁹⁶, даже до смерти в сих упраждняяся. В посте же и трудех пустынных юность свою смиряаше, усердно многи пустынныя труды подъемля, в нихже не оставляаше молитвеннаго правила и Священных Писаний пропитания. Тепл бо бяше и усерден, и во всех делех остатися не хотяше, яко рещи, усердному делателю многая дела уступают. О чистоте же, тако телесней, яко и душевней, велие прилежание имеяше, поминая рекшаго: «Блажени чистии сердцем, яко тии Бога узрят»[102], размышляя же о нехранении чистоты беду немалу, апостолу глаголющу: кроме тоя никтоже узрит Господа.[103] Прочее рещи, ¹⁹⁷о всех добродетелех подвизаашеся, ко всем ревноваше: ову творяше, другой поучашеся, о иной ревноваше, иная слезами и моленьми наполневаше и во всех добрых делех не последнии хотяше быти¹⁹⁷. Часто же о сих поучашеся и отеческая словеса, о чистоте и смирении умнем поучающая, выну прочиташе и о смертней памяти и Суде страшней всегда наказовашеся. О службе же церковней и о уставе тоя зело прилежание от младенческих ногот¹⁹⁸ имеяше, не токмо что от родителей и от отец древнейших научен бяше, но уставы древлецерковныя и обиходники[104] монастырьския прочиташе и с них в едино некое краткособрание преписоваше: попечение бо велие имеяше, да вся по отеческим уставом богоугодне исправлена будут. Чесо ради многаго его тщания и искуства достоин явися еклисиарх[105] церковныя службы, и украситель торжественный, и всебратственный пользодатель, и многий помощник <в> строении общежительству, тако Богоявленскаго, яко Крестнаго девическаго[106].

¹⁹⁹Откуду же общежительство сие начало прият и како устройся, нужда нам вкратце объявити зде: да, скажуще о нем, еклисиарха тоя покажем, еклесиарха же повествующе, общежительство явим, да неведущии ведением, ведущии же памятованием обновят своя слуха¹⁹⁹. Ибо малая сия речка, или, кто како об нем помыслит, общежительство сие, глаголю, истече от источника великаго, Соловецкия, глаголю, преподобных отец и мирских молитвенников Зосимы и Саватия обители,[107] яко благословением, тако чином и уставом, образом сицевым.

Егда бо древлесоловецкия отци не приимаху новых уставов Никона патриарха[108] древлесодержания же церковнаго нимало уступати дерзаху, бяху же в них тогда мужи честни и святи от многолетных подвигов постных, просвещени и разумом Божественнаго Писания озарени. В нихже два прочих превосходяща в премудрости и разуме и во всем ведении Священных Писаний: един Герасим Фирсов[109] именовашеся, егоже премудрость и разум каков бяше, является от списания его, еже писа о знаменовании креста на лицах своих; вторый же черный диякон Игнатий,[110] муж святолепен и подвижник велий, и Божественнаго Писания вельми читатель и внешняго наказания²⁰⁰ искусен.

Бяху же тогда в Соловецкой обители мнози отци святоподвижнаго их ради жития прозорливым даром и знамении и чюдесы облагодатствовани. В нихже бе некий отец, Гурий именуемый,[111] яки благоуродствуя, пребываніе, многая прорицания тогда предвещаше. Егда еще Никон, митрополитом бывый, по мощи святаго Филиппа посылаем бяше,[112] тогда той святый старец приезд его и яже об нем прежде прорече, и ина многа памяти достойна, глаголаху отци, той прорицаше; молитвенник бо велий и постник бяше многолетен и чистоты ради умныя ²⁰¹предвидяше далняя, яко близ сущая²⁰¹. Той великий отец часто помяновенному Игнатию отцу повелеваше изыти из обители Соловецкия: «Бог тебе, – глаголя, – повелевает отсюду изыти». Чесо ради стужившу²⁰² отцу Игнатию и некогда молящу святаго сего старца: «Почто убо, о, святче Божий, аки мя непотребнаго уда²⁰³ от обещания²⁰⁴ своего, от обители преподобных, изгоняеш?» Святый же той старец: «Иди, иди, Игнатие, – рече, – не имея сумнения, хощет бо Бог состроити²⁰⁵ тобою велию обитель в славу его». Обители же Соловецкой разорение предрече, яже послежде зелным страданием древлесоловетстии отци за древнее благочестие скончани Быша.

Помяновенный же Игнатий изыде из Соловецкия обители по глаголу святаго старца и по благословению отец и, Богом подвизаем, прииде в сия поморския пустыни, пребываше близ Повенца, отечества помяновеннаго Петра, и часто в дом родителей его прихождаше, якоже и прочий отци соловецкия, и благословения сподоблеваху²⁰⁶. Пребываше же сей отец Игнатий во многих вышеестественных подвизех и в вышепомяновенной Куржетской обители с священноигуменом Досифеем и прочими отци схождашеся и единоумно о благочестии усердствоваху. ²⁰⁷Бе бо добродетелнаго ради жития и премудрости всеми знаем и именит; еще же живый в пустыни сей чистоты ради его сердечныя и безстрастнаго жития прозорливый дар от Бога имеяше: иже видяхуся добродетелны быти, ихже провиде он последи отпасти благодатнаго жития и предрече о них; иным наказаньи быти за прегрешения объяви, другия, зело ревнители являющася, от очию своею отгна, преступники быти предсказа; вся же сия по предречению отца сего збывахуся²⁰⁷. Многи же сей отец священный просвети учением, научи благоверию, наказа добродетелем, на подвиг возстави²⁰⁸, чесого ради многи прицепившеся к нему и моляху его с ним пребывати и предводительством его спасеным быти, еже и сотвори боголюбная она душа, памятуя проречение и повеление святаго старца соловецкаго Гурия. И нача в сей в пустыни общее житие не токмо же по благословению отец соловецких, но и благословением помяновеннаго игумена Досифея, бяше бо ему отец духовный, иже повеле ему женеск пол особь²⁰⁹ в пустыни от братии отстран<и>вати и велиим²¹⁰ опаством целомудренное наблюдати житие, иже и велиим опаством по Священным Писанием общежителнии же и целомудреннии уставы предводительствоваше.

Сему отцу ученик и сообещник бывает кроткий, аще ин кто таков, Даниил,[113] благословением священнаго отца игумена Досифея, бяше бо ему сын духовный и стаинник²¹¹ благочестия. Молящу же Даниилу священнаго сего игумена, да благословит и научит, у какова искусна отца в наказании быти. Священная же она глава, аки Богом подвизаем, «иди, – рече, – и в ваших поморских странах пребывающа соловецкаго старца Игнатиа послушай: сей бо мощен²¹² тя наставити на путь спасения». Еже и сотвори Даниил. Бысть ему сын и сообщник общежителства его и несколко время терпяше с ним и братиею многи скорби пустынныя и гонителная волнения. По сих же отцу Игнатию многи душы во благочестии и добродетелех научившу и направившу, и скончавшуся о Христе. Осталец же онаго общежителства Даниил смиренный, скитаяся по пустыням с некоими братиею, место от места пременяя многаго ради тогда гонительнаго волнения и многое попечение имеяше, аки некий велий долг, да общежителное обещание по благословению отец во общежителных святых уставех исполнит.

Бяше же тогда, в пустыни сей живя, священный отец, предревний великаго жития подвижник авва Корнилий староскитский,[114] Ниловы пустыни древлеобещник²¹³, знаемый еще древле и яже любимь добродетелнаго ради жития святейшему патриарху Филарету[115] и несколко время у него жил бяше. Той, аки ангел некий, в вышеестественных подвизех просвещаше пустынная сия недра и всем нам отец духовный и сладостный наказатель бяше, Даниилу же и поминаемому нами Петру. Бяху же и инни отци: древлесоловецкий отец Генадий, Качалов по роду именуемый,[116] Иосиф Сухой Соловецкий[117] же и ины отци и пустынножители, с малою дружиною²¹⁴ живуще, молитвами своими дебри сия освещающе.

Даниил же, в малом общежителстве живя, древлесоловецких отец благословение, аки искру во угле или аки благовонное миро в алавастре,[118] носяй, соблюдая. Усердствуя же он о общежителстве, возусердьствоваша же и прочая братия, возревноваша же и отци, благословляюще и повелевающе о нем пещися; ՙякоже и нас с приснопамятным Петром моленми, отеческими благословении, советов принуждении принудиша общежителнаго не жития точию, но и попечения и тяготы его вкусити²¹⁵.

²¹⁶Разразсуждающе бо тое тогда, да обдержанием общежительства в пустыни сей благочинное житие утвержается, всякое же бесчиние изничтожается и да не попустится своеволным злым людем место пустынное жительство быти, якоже и бысть, ибо тогда воровских людей терние, в лесах сих вкоренятися наченшееся, благодатию Христовою обдержанием общежительства сего изничтожися.²¹⁶ И мирно, и благопокорно, и ведомо житие сие тако царскому величеству, яко властем градодержательным общежителством сим исходатайствовася,[119] яве бо по Христовым и апостольским преданием, повелевающим Бога боятися и царя почитати[120] и Божия Богови и кесарю кесарева отдаяти.[121] Сия вся, Богу помогающу²¹⁷, благое от Божиих Писаний и благопокорное разсуждение общежителство сие источает.

И тако сие общежительство, якоже рехом, от Соловецкия обители проистекшее есть, чином же и благословением соловецких отец вкорененное и священноигумена Досифеа благословением насажденное, к сим же и староскитскаго отца Корнилиа и прочих отец пустынных молитвами и благословениемь утверженное, исперва место из места пременяя гонителных ради случаев бяше. Со священным отцем Игнатием близ Пурнозерских езер прежде водворяшеся. Пренесе же ся на Сароозеро, идеже после отца Игнатия соблюдашеся. По сих близ Боровскаго скита при малом езерки крыяшеся, идеже мы благодатию Божиею совокупихомся и живяхом по благословению священнаго отца Корнилия и прочих отец пустынных и соловецких отец Генадиа и Иосифа.

Таже Богу изволшу, преселихомся к Выгу реце, идеже не токмо древнейшии отци Корнилий и Виталий[122] благословением и присещением²¹⁸ многажды нам присутьствоваху, но и Соловецкия обители священник Пафнутий[123] и пустынножителный старец поживе во общежителстве лет седмь, всерадостно благословляше устав общежителства и церковныя службы и возвещая вся благочестивыя уставы же и обычаи Соловецкаго монастыря и сладостно ²¹⁹прилагашеся сего общежительства уставу²¹⁹. К сим же и древний старый священник Феодосий,[124] страдавый многолетно за благоверие, той прилучився быти в общежителстве сем, усердно похваляя и благословляя чины вся, и Бога благодарствуя о уставе общежительства сего, и сам желаше сообщежитель и служитель быти.

Сице убо сие общежительство от пустынных и освященных отец первозачатием проистече, толиких же и таковых священных мужей благословением строительствовано бяше; егоже еклисиарх и состроитель и многоусердный ползователь²²⁰ бяше поминаемый раб Божий Петр.

Но не таково бяше сие общежитие и особноскитьское пребывание[125] тогда, егда снидохомся²²¹, якоже ныне зрится. Бе бо тогда стадо Христово в сих поморских пустынях, аки в нощи бурней и темней, в гонителных волнениих и от бесчинных людей во обуреваниих, по пустыням и по местом страдалчески без чина и паствы скитающюся. И рещи по Григорию Богослову,[126] яко смокву[127] в пустыни обретохом Израиля, и яко зерно едино или второе зрело в безгодне грозде²²² благословением Господним убо соблюдено и начаток освящен, обаче мало и скудно и не напольняя уста идущему, и яко стяг на холме, и яко древо ядреное²²³ на горе, или ²²⁴аще ино что от единаких же и немножайшим видом²²⁴.

Егда же благодатию Божиею и благословением отец совокупихомся в сие общежительство в таковых пустых хлебонеродных местех, в толиких бурях и волнах неисчисленных, в толиких ратех и напастех беспрестанных, о, коликих трудов и потов в строителство сего общежительства воздолженствовало! О, коликих подвигов бедовметных²²⁵ и попечений многопечалных востребовало: телесное житие состроити и душевное спасение устроити, в неплодных местех прекормление примыслити²²⁶ и душевную трапезу (да не гладомь помрут) всегда уготовити, нивы лесораслыя²²⁷ с трудами пахати, да и терновидныя²²⁸ нравы со многими поты истерзати²²⁹, одеждами в нищих местех одеяти и общежительными святых отец обычаи ненавыкших людей украсити. Горы своевольныя поравняти, чащи миролюбных обычаев искореняти, сено со огнем разделити,[128] воды страстныя застановити²³⁰, возгорения похотная и яростная загасити, волны многочисленныя утишати, противо ратей премножайших ополчатися. Колицы же и какови противности и злодыхателни рати на Церковь же и братство сие Быша и суть! От диаволскаго злорыкания, от бесовския зависти, от гонителей рютия²³¹, от раздорников лукавьствия, от июдоподражателных злодыхателства,[129] от бесчинных свирепьства, от своевольных шатания, от злообычных роптания, от гладных случаев,[130] от нужды потребных, отвне и отвнутрь, от невежества и от предприятия²³², мнится сие, от самыя преисподния геены волны сия на корабль благоверия гремеша и гремят и от самых челюстей чермнаго змия бурливыя воды сия на церковное благочестие восклокташа. О, с коликою ужастию прешедшыя рати тыя помыслити! О, с коликим жалостным плачем о оных пророчески возопити: «Яко аще не бы Господь в нас (помогая нам), внегда востати человеком и бесом на ны, убо живы пожерли Быша нас; внегда прогневатися ярости их на ны, убо вода потопила бы нас».[131]

Во всех же сих нужных братских строениих и ратех, от диавола наносимых бесчисленных, велий бяше ревнитель, и усердный подвижник, и теплый молитвенник, и духовный ратоборец²³³, и теплейший советник, и помощник правителствовати братство²³⁴, и боголюбный учитель, и украситель церковный сей наш церковныя службы еклисиарх. Многолетныя же его всебратьственныя и всецерковныя подвиги и труды не сего краткаго времене и не моего грубаго ума подробну представити пред ваша боголюбных очеса. Аще и потребно нам сицевая слышати, да воздвизаемся на таковое усердие; аще и должно трудами его память нам поновляти, да незабвенно имеюще толикия его всебратьственныя и всецерковныя подвиги, долг любви помяновением души его любовно отдати возусердьствуем, но краткости ради сия вся молчанием минуем.

Обаче не премолкнут²³⁵ нивы и горы древния труды его возвещати, идеже он братства ради и сирот ово в сечении лесов, ово же во обирании и пожигании древия усердно потрудися[132]. Не помолчат путие, дебри и блата крошен и кереж хлебов ношения[133] его, в нужная времена да братство пропитается. ²³⁶Не потаят горы и холми в трудех его древних молитвеннаго славословия и праздников торжествия, по местам путем и лесом отсылаемых²³⁶.[134]

Жалостне возглаголют древлетрудники братския и сироты, насладившыяся в нуждах и трудех словес духовных и праздньственых торжествий утешения духовнаго. Не потаят и древлемолитвенных храмов всебратьственное строение, идеже не советомь токмо и усердиемь, но и сечением древия и на себе вожением в нужныя²³⁷ случаи потрудися. Явит трапеза братская нужных сламосмесных хлебов благодарное его со утешением прочих ядение.[135] Возглаголют мимошедшая²³⁸ времена усердное его в таковы нужды и труды к Писанию, славословию и молитвам тщание и к сохранению благочиния прилежание. Воспроповедят в сих местех праздники празднователя, торжества – торжественника, молитвенныя храмы – украсителя, книги – читателя, цветники[136] – собирателя; уставы, обиходники – недреманнаго усерднаго церковнаго ревнителя; по местам и путем крестов святых водружение – теплу к распятому Владыце любовь и рать²³⁹ и подвиги его на диавола. Возъявит во обою общежителству и скитах церковныя службы чин тщателна чиноправителя. Не потаят церковницы обучителя, псалмопевцы и четцы – наставителя, читатели книжныя – собеседника, настоятели – сподвижника, братия – обучителя, сироты – утешителя, общежительства – благочинию заступника, благовернии – благочестию проповедника, вси сих стран благовернии – в напастех и бедах тепла на молитвы возбудителя и неленостна Спасу и Пречистей Богородице и всем святым всецерковна и келейна молитвенника.

Мы же, ²⁴⁰вся сия молчанием паче, неже повествованием прешедше²⁴⁰, оставляем боголюбивым душам, ведущым таковая, друг другу повествовати и от сих в подражание благих цветы добродетелей собирати. Нас же понуждает слово к концу усердныя жизни его приити, с каковыми усердными подвиги и с каковою светлостию ревности и слезными потоки вечер живота своего сконча, нам образ изряден попечения смертнаго всем живописа.

Егда же приспеша лета, являюща к Богу отшествие его посещением немощей, посети его Господь Бог, аки к вящим²⁴¹ подвигом и усердием возбуждение подая ему. За четверолетное бо время зело изнеможе телесными уды, но душевною ревностию паче распалися, паче подвижеся во всех подвизех церковных и келейных и всебратьственных. И бе видети апостольское слово: «Егда немоществую, тогда силен есмь»,[137] – яве в нем изобразующееся: не толико бо можааше здравый кто тяготу всебратьственную понести, елико сей немощный теломь, великодушный же в ревности понести возможе.

Прилучися в тое время, яко вси вы веете²⁴², коликая страдати Христове Церкви от июдоподражателных наветников и злодыхателных на Церковь Божию клеветников.[138] В кое время сей раб Божий колико немощным теломь подвижеся молитвы Богу и Пречистей его Матери и всем святым творити всецерковне и келейне, повседневно молебьствуя, часто же и не единова днем, со многими слезами прося Господа Бога и Пречистую Богоматерь, архаггельския соборы и всех святых лики о разрешении всецерковных злых и о избавлении напаствуемых церковных удов²⁴³, не оставляя же церковныя службы по уставу исполнити. Аще не можаше когда стояти, седением отраду немощным удом дея, обаче службу церковную исправляше.

К сим же и келейное правило и каноны тогда не оставляше, не токмо же, но и всебратьственное правление окормлевааше, в расходе²⁴⁴ нам сущим,[139] нужда многим сражениям, попечениям же и трудностям, яже весть общежительство имети, на него приити: церковное и трапезное благочиние и целомудрия хранение, нарядников, казначеев, келарев[140] управление, преслушных и ропотных исправление²⁴⁵. Аще и вся правления братская – подвига потреба и усердны души, а еже противности исправляти и заступати²⁴⁶ чин, святыми преданный, велия подвига и терпеливодушны мужестьвенны души потреба, понеже чрез своевольства и ропоты диавол тщится вся поколебати и весь святых чин разрушити. ²⁴⁷С сими же сражатися обличением, наказанием, отлучением есть борба горка и тяжка и печалных случаев носительна и аки противу самого диавола ратоватися надлежаща.²⁴⁷

Сей же наш теплейший рачитель²⁴⁸ и законов церковных ревнителный любитель с ревнителем огнеколесничным глаголаше: «Ревнуя, поревновах по Господе Бозе Вседержители».[141] И с царьственным пророком вопияше: «Печаль прият мя от грешник, оставляющих закон твой».[142]

Темже усердно в немощне теле подвизаашеся, уча, наказуя, вопия, запрещая, да церковныя и всебратьственныя Божия законы не разоряемы будут. И в толицей немощи и печалех не оставляше усердия в строениих братственных: свидетель попечения и трудов его столовая братская, ограда окрест преставльшихся отцев и братии, бревна на новый молитвенный храм, самого его з братиею подвизание и немощнымь телом сих древ сечение.

²⁴⁹В сих же всех подвизех его всескорбнейшая жалость Церкви убодаше душю его, якоже выше рехом: напастное Церкви возгорение и удов церковных, и всежалостных братству, и ему любовных, расхищение, овому страждущу, иным за нь подвизающимся,[143] иным зде и онде, аки бурею некоею, расхищенным.²⁴⁹ Чесо ради молитвы к молитвам прилагаше, молебны к молебнам пояше, поминовения к помяновениям страдалцем Христовым и всем православным творяше. Вся святыя на заступление призываше, реки слезныя изливаше, плачася и моля всещедраго Бога и Пречистую Богоматерь и вся святыя, да море напастей утишится, расточенныя да соберутся, ратоборная возгорения да погасятся.

И понеже зело немощен бяше, моляшеся о сем милосердому Богу, да не возмет души его от тела в таковое печалное расхищение, но да милостивно соберет уды церковныя. «И тогда, якоже хощеши, – рече, – всемилостивый Владыко, со мною, понеже раб Твой есмь и сын рабы твоея,[144] буди воля твоя[145]». О, колико сей раб Божий о сем слезы излия, колики молитвенныя струи источи с прочими боголюбивыми! И не преста, Дóндеже всемилостиваго Владыки милость получи; не отступи от молитвы, Дóндеже пророчески вкупе со всем братством возопи: «Внегда возвратит Господь плен Сионь, быхом яко утешени. Тогда исполнишася радости уста наша и язык наш веселия.[146] Терпя, потерпех Господа, и внят ми и услыши молитву мою, и возведе мя от рова страстей и от тимения глубины[147]». И радостне восклицаше: «Исповедайтеся Господеви, яко благ, яко ввек милость его[148] яко избави нища от силна и убога, емуже не бе помощника.[149] Седящия во тме и сени смертней, окованных нищетою и железом[150] и изведе их ис тмы и сени смертныя, и узы их растерза,[151] да исповедятся Господеви милости его и чюдеса его сыновом человеческим[152]».

Сим убо сице бывающим, и нам всем оттуду и отсюду в пустынная недра совокупившимся, и всежалостней матери Церкви утробе утешившейся, и удом ея от печалных пелынь оградившимся²⁵⁰,[153] сладкое благодарение всещедрому Богу всецерковне возсылающим, и сему нашему сладчайшему красителю церковному от пресладкаго Богу благодарения в немощнем теле юнеющуся²⁵¹, приспе время, от Божиих всепремудрых судеб ему определенное, приближися година, Богом уставленная²⁵², еже тому долг естественный отдати. ²⁵³Устроишася дни сия, самого Владыки милосердием тако утишенныя, тако собранием удов церковных украшенныя, тако его, раба Божия, о сем у Владыки прошенныя.²⁵³ Уже бо он за многое время ощущаше себе к смертным дверем приближившася; всегда себе предуготовляше в вечный он и страшный путь пойти. И гроб себе в земли-матери предуготова²⁵⁴, к немуже повсявременно²⁵⁵ приходя, слезными потоки омываше душю свою, в страх Божий и память смертную разжигаше помышления своя.

Во время же святаго Великаго поста, в лето сие от мироздания 7227 (1719)-е, добре священныя душеочистительныя сия дни сей раб Божий в посте и молитвах препроводи. В преосвященную страстей Господних седмицу[154] у отца духовнаго покаянием поновися,[155] еже и выну²⁵⁶ пред благостию Божиею слезно каяся. В преболшую прочих субот суботу[156] сподобляется великаго великих даров дара, от отец древних у него восприятаго и с великим говением соблюдаемаго.[157] Просвящает душю свою священно священною Христовою благодатию и тако, светел душею и радостен смыслом²⁵⁷, ко всерадостному торжеству всеторжественнаго праздником праздника – великаго Пасхи дня уготовися, в теле немощнем своем мужественую бодрость показуя, усветляя Церковь, расчиняя церковники²⁵⁸, разряжая²⁵⁹ всекрасный краснаго торжества чин. Сам со умиленною душею поя и моляся и благодаря Спаса Христа за неизреченное его к нам милосердие, изволившаго страдати за грешныя ны и недостойныя рабы.

В вечер же Великия сея суботы певшим нам канон на боготелесное Спаса Христа погребение, якоже обычай имать святая Божия кафолическая Церковь, на нем же ирмос девятыя песни к преблагословенней Божии Матери утешителен от лица страждущаго Сына ея и Божия и Бога поется: «Не рыдай мене, Мати»,[158] той ирмос пропев раб Божий со многим умилением и слезами и поклон до земли вкупе с нами к Божией Матери с великим желанием сотвори, якоже сам последи сказа нам, тогда знамение смертнаго позвания, аки от Царицы Небесныя посланное, ощути в себе. Аки некоею студеною одеждею тогда одеяся во всем теле и вящше изнемогая телесными уды, обаче мужествова душею своею, прослуша вся деяния священных богопроповедник[159] и ՚чтущих, до колика кому читати, чинно пределяя²⁶⁰. И пресладчайшее всекраснаго торжества славословие все исполни, со многими слезами благодарно поя Владычне милосердие. Егда бо воспевше «Воскресение Твое, Христе Спасе, аггели поют на небесех, и нас на земли сподоби чистыми сердцы тебе славити»,[160] весь слезами тогда облияся, всежеланну любовь к пресладкому Христу источая. Всему же утренему тогда славословию исполнившуся и целование святым иконам по обычаем церковным исполни и со отцы и братнею ликуя, «Христос воскресе» вопия и «Воистинну воскрес Христос» приглашая²⁶¹, любезно со всеми нами целовавшеся, аки в путь далечайший к вечному воскресению отити спешашеся.

По скончании же утренняго краснаго славословия утрудився телесне, красуяся душею и светлея лицеи, и тако от церковнаго пения церковный краситель в красный и светозарный в царский день к Царю Небесному к вечному воскресению позван, конечно²⁶² изыде. В келии своей зело занемоществова телесно, душею же лепотствуя; светозарную седмицу[161] на одре препроводи, молитву творя и з братиею и сродники прощаяся и прощая всех. И понеже он в житии своем моляшеся во псалмоглаголании и в молитве Исусу пресладкому вопияше: «Скажи ми, Господи, кончину мою и число дний моих кое есть», темже и не презрен бысть от исполняющаго моления раб своих, восприя известие прежде смерти о смерти своей, не токмо что немощными случаи и совестными разсуждении близсмертный исход возвещающими, но и за два дни пред смертию такова гласа сподобися, извещающаго по дву днех отсюду отшествие, якоже он сам нам, братолюбный, тогда не скры. Яже тако и збыстся по глаголу его и по проречению гласа онаго. Прешедшей убо светозарней седмице и по дву днех проречения того нощеденьствию наставшу, во нь же священная Церковь обновления день, предвоображение будущаго пресветлаго Воскресения, празднует,[162] сице раб Божий по седмине настоящаго века к всесветлей будущаго века осмине отходит.[163]

Вечернее убо славословие мы отславше и службу вечернюю докончавше, той жизнь свою нача скончавати. Братии и всем любезным, приходящим, прощения просящим и конечное целование отдающим, той вся сладце прощая и любезно у всех прощаяся и, аки никаковы болезни ощущая, осклабляяся²⁶³ лицеи, познавая вся и любезное конечное прощение отдая. Первому нощи часу наставшу²⁶⁴, «Покаяние скитское»[164] святых отец к Богу и Пречистей Богородице и всем святым проговорихом, яже он вся разумно послушая и во всем каяся: «Прости мя, Господи», – на вся умиленно глаголя. По сем и некия молитвы пропевше, сподобляется священно священных Святынь в теплоте веры и в боголюбнем усердии.

И тако в той час нощи на исходе его, молитву творя и шепча, отходит тихим и кротким преставлением; преставися, яко успе; отиде, яко усну. Отцем и братии и всем нам прилежно за нь молящимся, и любезно любезнаго жалеющим, и слезы многи изливающим, и канон на исход души[165] пропевшим, и кажение творящим, и ²⁶⁵рукою его крестное знамение на лице его воображающим²⁶⁵, тако засну сном вечный, тако отиде вечным отхождением, лицу его любезному любезно светящуся благолепием и всему телу его, аки живу, красоту сличную²⁶⁶ подавающу. Оле, нашего плача тогда! ²⁶⁷Оле, каково внезапно пострадахом разлучение!²⁶⁷ Каковыми жалостными стрелами уязвихомся тогда, каковыми печалными язвами уранихомся! Ельма убо сей раб Божий в житии своем имеяше попечение о исходе смерти своея, о прошествии воздушных на мытарствах истязателей, о явлении к страшному паче всех царей земных царьствующим Царю. Сице предуготовися смиренная она и боголюбная душа, во время смерти своея и ныне саморучными его умиленнейшими писании вся благоверныя моляше, ко всем со умиленными глаголы же и слезами припадаше. У всех прощения прошаше, взаимно же всем вселюбное прощение изливаше; вся церковныя люди, вся любовныя и сродственныя лица, плачаше, на молитву Богу за себе воздвизаше. Иныне и тогда нами и чрез нас вас убо, о, священное совокупление, умилно молит, и слезоточително просит, и вечное любовное целование деет:

«Здрави будите, – глаголя, [166]– здрави, любезнии отцы, здрави, сладчайшая дружино, здрави, единоревнителнии друзи, любовнии сродственники, церковная чада, богособранныя сироты. Здрави, вси боголюбезнии и сладчайший мои, будите и за мя, воставше, Владыце молитеся, пролейте боголюбныя ваша слезы к царьствующим Царю, возшлите за мя любовная воздыхания всемилостивому Спасу.

Простите мя, простите, священнии отцы, елико согреших Богу и вам, простите мя, любезная дружино, вся богособранная церковная чада, и елико вас кого согрубих, простите ми и за мя помолитеся. Помяните мою к вам любовно худую любовь; помяните, яко о Христе пребывахом, ядохом и лихом, советовахом, усердьствовахом о Бозе с вами, в скорбех утешахомся, в напастех увещавахомся, словом Божиим наказовахомся, церковными торжествы наслаждахомся. И ныне праведным праведнаго и милосердаго Владыки моего судом от вашея сладкия любви един отлучен есмь и не вем, что срящет²⁶⁸ мя; в путь отхожю вечный и не знаю, кое получю пребывание. Аще бо, возлюбленнии мои, и подвизахся худым моим подвизаниемь о убогой моей души и усердьствовах с вами о церковней благочестии, но кто свесть²⁶⁹ и известит мне прежде Владычня правдосудия, прията ли моя убогая дела или отказана, вписана ли в книги животныя[167] или отриновена от лица Божия.

Понеже во многих века сего мятежех, во многих вышесилных попечениих, во многих паче нашея силы братских тяготоношениих или помрачениемь запят бых²⁷⁰, или жестотою окаменихся, или неведением падохся, или моленьми человеческими склонихся, или многими сношеней бурями погрузихся и нелепыми мысльми прогневах моего Владыку, или словесы неугодными милосердию его досадих, или безумными делы противо заповедей его возборствовах и покаянием сих очистити не дойдох. Увы мне, аще сими запят²⁷¹ буду от лукавых мытоимцов²⁷²; горе мне, аще восхвалятся надо мною темнии бесове; ох мне, аще осужден буду в мучителныя руце их.

Аще ли милосердия ради пресладкаго моего Владыки и заступлениемь общия всех християн заступницы всесладчайшия Владычицы и молитвами всех святых небесных сил и всех святых Божиих угодников и наших теплых молитвенников, и ваших ради святых молитв, ваших ради церковных и келейных поминовений, ваших ради теплослезных прошений аще, помилован, пройду темная темных князей воздушная бес пакости мытарства, аще, милосердием Божиим покрыт, дойду в место крова дивна, пресладкаго Владыки моего светосияния, о, колико возрадуюся и возвеселюся, о, колико воспою и возблагодарю моего Владыку, о, колики гласы пророческими воскликну: «Благословен Бог, иже не предаст нас в ловитву зубом их;[168] помощь наша во имя Господне сотворшаго небо и землю!"[169] Колико же должен буду памятьствовати вашю сладчайшую любовь, вашы за мя умиленныя молитвы, ваша любовная убогой моей души поминовения. О, аще бы дал Господь за вашими молитвами моей грешней души отраду, должен бы был возопити за вы ко Владыце; должен бы за сладчайшыя моя други возмолити: „Призри, призри, пресладкий Владыко, на твоя люди, бедствуемыя выну, призри на твой виноград, егоже насади десница твоя»,[170] призри в тяжких мира сего волнах на обуреваемыя твоя рабы, отжени²⁷³ лукаваго диавола от них злобу, защити от бесовских злоковарств, волны утиши, напасти отжени, ратующыя утоли²⁷⁴, в мире мирно сия церковная чада сохрани и Небесному твоему Царствию причастники учини. О, аще бы умилосердился всесладкий наш Владыка и дал бы нам места светла в прекрасных кровех своих и совокупил с вами в вышнем прекраснем Иерусалиме; о, да дал бы с вами вечне нам возрадоватися, вечне в вечности небесней возвеселитися, о, колико бы тогда возрадовалися, колико бы возликовствовали, колико неизреченно возторжествовали бы, иже на земли в воюющей Церкви единодушно его света, в Троицы славимаго Бога, славословихом, да даст нам и в небесней ликующей Церкви благодарно и утешително славити его во вся веки. Аминь.

Темже, духовная моя братия, и друзи любезнии, и спостници, и знаемии, не забудите мене, егда молитеся. Но видяще мой гроб, поминайте мою любовь и молитеся Христу, да учинит дух мой со праведными՚».

Сия убо и такова и вящше сих раб Божий Петр, в жизни сей жив, изобразил словесы же и делы образ полезен нам попечения души. Сицевыя умиленныя гласы и вещи²⁷⁵, словесы же и писанми во исходе души своея и ныне нам возглашаше и возглашает. Сицевыми любовными пламы²⁷⁶ вся боголюбивыя души объемлет, сицевым нестерпимым вечный рачителством²⁷⁷ сердца наши убодает.

Тем, боголюбное пустынное сочленение, христолюбнии отцы и благоверная дружино и вся усердная чада церковная, воспомним любовь любовнаго благочестия рачителя; воспомним, люди церковнии, церковнаго усерднаго красителя; воспомним, любители благоверия, о благоверной житии всетщателно попекшагося; воспомним, вси благочестивии, всем нам многаго утешения духовнаго и ползы виновнаго. Возопием молебно Владыце всяческих, возмолим всеусердно Творца небу и земли, воскликнем к нему: Небесный Отче Вседержителю и Сыне единородне и Душе Святый исходяй, презри²⁷⁸ умершаго согрешения, и иже зде в Церкви тебе послужившаго, в Церкви первенец[171] сотвори его радоватися и славити тя со всеми угождьшими тебе.

Помолим християном теплую заступницу, преславную Богородицу: Царице Мати милосердия, милосердо помилуй твоего раба, часто тебе «О, всепетая Мати»[172] воспевающаго и «Радуйся, Невесто неневестная»[173] зде возглашающаго, тамо со всеми святыми умоли пресладкаго Владыку душю его упокоити в небесных селениих. Помолим архаггельский собор и всех святых лики: О, архаггели и аггели, всесветлейший соборе, Михаиле и Гаврииле со всем воинством бесплотным, помозите Божию и вашему рабу, иже в здешнем житии памяти и службы вам усердно торжествовавшаго и на помощь себе призывавшаго, в тамошнем пребывании любовни и милостиви предстатели ему будите. Велиции апостоли Петре и Павле и Иоанне Богослове со всеми апостолы, будите тепли пособники теплому вашему молителю.

Всисвятии Божии угодници, угодити вам службами потщившагося милостиво заступите. Теплый наш молитвенниче святителю Николо, усерднаго вашего служителя, яко отец милосердый, приими в защищение. Преподобнии отци наши и всего мира молитвенници Зосимо и Саватие, Сергие и Варлааме[174] не презрите вашего торжественника. Вси российстии чюдотворци, не оставите ваши праздники любовно творившаго.

Пострадавшие за благочестие страдалцы российстии, приимите любовно срачительствующаго²⁷⁹ во благоверии и поминавшаго вас рачително. Соловецкия отцы и исповедницы благоверия, любящему вы любовь воздадите. Сладчайший Мемноне,[175] церковный и наш подвижниче, обими любовно твоего и нашего срачителя. Дионисие старче и братства подвижниче, приими любезно любезнаго своего сердоболя²⁸⁰. Екатерино[176] боголюбивая, восприими свое чадо, егоже Божия ради любви оставила младша. Вси преставльшиися и милость Божию получившии отци пустыннии и братския обещники²⁸¹, приимите любовно усердно вы зде поминавшаго. Всидуси²⁸² праведных, утешите вашим утешением от скорби сея грядущаго вашего рачителя.

Отсюду, отци пустыннии и любезное братьство, с поминанием провождайте – тамо, отшедшее спасшееся братство, любовно приимайте; отсюду, любезнии сродници и други, с моленми и слезы отпустивше, помяновением сердобольствуйте – тамо, любовнии ему спасшийся дуси праведных, радостно в радость прияти Владыку умоляйте. Всиже вкупе тако в небесней, яко в земней Церкви, славяще, прославим и, благодаряще, возблагодарим Христа Сына Божия, искуплыпаго ны честною своею кровию от пленения диаволя, и смертию смерть поправшаго, и тридневно воскресшаго, и всем правоверно в него верующым вечное пресветлое воскресение даровавшаго, с безначалным его Отцем и с Пресвятым истинным животворящимь Духом во вся веки. Аминь.

«Оружие извлекоша грешницы, напрягоша лук свой состреляти убога и нища, заклати правыя сердцем. Оружие их внидет в сердца их, и луцы их сокрушатся».[177] Псалом 36.

Выну²⁸³злых злоба их истребляет, и еже на праведныя изливают свою злобу, на их главы многогубо²⁸⁴ обращается. И досаждаемии от них праведнии пресветло венчеваеми бывают благодатными венцы. Тии же сами злии за злобу свою испивают отмщения чашу ярости Божия. Уби Каин Авеля, оного убо светлейша показа, сам же, стоня и трясыйся, праведне Божиим отмщаем гневом бяше.[178] Восташа на кроткаго Давыда неправеднии мнози – и Саул, и Авесалом,[179] извлекоша на нь оружия своя, но «оружие их внидет в сердца их»,[180] и «исчезающе, яко дым, исчезоша».[181] Той же, просвещенный душею, усердне к Богу вопияше: «По множеству болезний моих в сердцы моем, утешения твоя возвеселиша душу мою».[182] Тако убо в древнем, яко в новем законе обретахуся злии, праведным злодеюще, изобретающе некое время, в неже возмогают обидети благих, еже им на болшее осуждение и на презелное²⁸⁵ отмщение злобы их от Божиих судеб попущается, по псаломскому речению: «Егда прозябóша грешницы, яко трава, и проникоша вси делающии беззаконие, яко да потребятся в век века».[183]

Сие, еже слышахом древле деющееся, ныне очи наши видят, яже вашему боголюбию, о, священное совокупление, поведати усердствуем. Иже в нас беша благочестием воскормленнии – и благочестию врази учинишася; иже ²⁸⁶на добродетель показуемии – в возмездие злопредательство излияша²⁸⁶; иже от злых дел отлучаемии – за добродеяние злодыхательство воздаша. Архипов сын Леонтий, иже второму Июде[184] ссоветник и другому Каину стоварищ, новая предателя в християнстве Христу учинишася[185] злодыхательством дышуще, за благая злая и за доброполезная злобная изблеваша; первие отступление, увы, дерзнувше, и хулники и клеветники пресветлому благочестию сотворишася. Предавше на мучительство, злии, благаго ревнителя благочестию, яко звери агньца беззлобиваго и яко ядовитии змии птенца пустыннаго. Той к ним тамо яко безлобивый вседушевно прилежаше – она же злодышущая, приходяще к нему, целованиа любовна, яко Июда Христу, дающе и тем самем предавающе. ՚Послежде той Архипов и прочия богорадныя²⁸⁷ грабяше, научая приставов[186] и инех архиерейских,[187] и второму, и третиему сие сотвори.[188] И не удоволися²⁸⁸ в Новеграде тако злодея, и при царственном сем граде[189] таковая дерзну, подговоря некоих Тита Захарьева[190] ограбити, и на инех грозя много и неукротимо рыкая. Откуду жалоба на нь во уши правительствующих господов дойде, откуду праведне неправеднаго яти повелеша, зелне же и грозне заповедаша таковыя злодея имати.

²⁸⁹Но кто б медведя, в лесе взыскав, на копия и прочая ловитвенная на нь привести, аще бы не неправедное его лакомство скотских телес привело²⁸⁹. Тако и онаго свое безумие и злоба в узилище приведе и страдалческое страдание показни и его злопредательство, опутав, связа. Абие ищай инех неправедне, сам праведне пойман бысть и приведен в судебную полату, посажен же и прикован по кратком спросе в седмую пудовую цепь, еюже сличен²⁹⁰, лежаше.

Некто приказной,[191] аки посланной обличитель, сляченному рече: «Видиши ли, как Бог неповинную кровь тебе отмщает? Что вам зло зделал или иному кому Семен Денисьевичь, егоже вы на мучительство предали? Сам ныне терпи и почювай, каково терпеть». По сем бедный на трех опросах жестоко биен, в грабежах винися, тако Титовым,[192] яко прочих наших скитян, яже в Новеграде. Велеша приказнии и о Семенове поимании подать на них прошение, еже бы ему тяжчайшее было истязание. Но мы сего не похотехом: доволно ему будет и от своих дел терпети, нежели от нашего поискания²⁹¹. Но мы по силе нашей елико помиловати тщалися. Нарочно от нас Иван бил челом властем,[193] да отраднее и милостивее ему происходят. Но они тяжчайшим судом облагают его и веcма об нем бить челом отказывают. «Достоин, – глаголют, – пытан быти в ынех воровствах да на каторгу».

Тако своя его, Леоньтья, злоба таковыми тяжкими юзы связа, сице злопредательства их такова им чаша еще зде наливается. Что же ли будет, егда со Июдою и сатаною в пепельном²⁹² огни возмездие за труд свой приимати будут июдоподражателие сицевыя. Ибо и древле многим злоделателем таковым не стерпе Божие правдосудие, но еще в земных отмщение восприяша в наказание других, да убоятся Божия наказания. Иже предатель Христов Июда удавление и разседение²⁹³ пострада.[194] Каин же братоубийца трясение и трепет восприят. Блудолюбивии же старцы и клеветници целомудренныя Сусаны, ищуще ея неповинно убити, сами праведне убиени Быша.[195] Ирод и Иродияда, не стерпевшии праведнаго Предотечи обличения и неправедно праведнаго умертвивший, праведне послежде, Божиим гневом пожаты, исчезнуша.[196] Тако мнози в жидовском роде, не стерпевшии Божиих пророков обличения, злотворивше пророком, зле и горце, различными казньми казнени, погибоша.

Что же ли наши Каины и Июды и Ироды не тою же ли злобою и гневом, яко древнии, тако они дышуще, злотворят нам? Не за ино что гневаются, но яко в пустыню им пришедшим, поучают их жити добродетелно, злотворити не попущают, бесчинствовати воли не дают, всеми сими на добродетелное житие наставливают, они же, не терпяще добраго наказания, за благочестие предательствуют. Ратники благоверия и врази церковнии, яко змии гневливии и ехидни всезлобныя, яд злобы изливают на неповинныя и ничем им досадившим, паче же благотворившим и добротворцем им или сродником его.

О сем бо и пророческое оно являет вещание: «Уловят на душю праведничю и кровь неповиную осудят.[197] И воздаст им Господь беззаконие их, и по лукавствию их погубит их Господь Бог».[198] О таковых бо предателех и оно псаломское пророковещание беседует: «Да не будет ему заступника, ниже будет, иже ущедрит сироты его.[199] Да воспомянется беззаконие отец его пред Господем, и грех матере его да не очистится[200] и да потребится от земли память их.[201] Занеже не помяну сотворити милость и погна человека нища и убога и смирена сердцем умертвити. И возлюби клятву, и приидет ему, и не восхоте благословения, и удалится от него. И облечеся в клятву, яко в ризу, и вниде, яко вода, во утробу его и, яко елей, в кости его».[202] И паки гонимая и оскорбляемая от них Церковь на злотворцы вопиет: «Да постыдятся и посрамятся ищущии душю мою.[203] Да будут яко прах пред лицем ветра, и ангел Господень оскорбляя их.[204] Яко всуе скрыта ми пагубу сети своея, всуе поносиша души моей. Да приидет ему сеть, юже не свесть, и ловитва, юже скры, да обимет и, и в сеть да впадется в ню».[205]

Аще же в настоящих таковии предателие тяжким гневом Божиим казнями осуждаются, колми паче во огненней геенской матице²⁹⁴ возревут в горести тяжких мук, по гласу пророк Божиих и по самого Господа о предатели словеси: «Горе же человеку тому, имже сын человеческий предастся: добро бы было ему, аще ся не бы родил человек той».[206]

Темже, юнная и легкомысленная чета, слышавше Божие страшное прещение²⁹⁵, да возбоятся ратовати на Церковь и правду Божию, да устрашатся быти ропотники[207] и клеветники благочестию, да престанут шепты²⁹⁶ и поймы²⁹⁷ бесоигрателныя творити, на иже наказующыя их на полезныя стези и отводящыя их от злоделателств, противных Божией и человеческой правде, да накажутся же не быти сревнители и ссоветники и потаковники тяжкосердым предателем, боящеся прещения Божия, глаголющаго: уклоняющыя же ся в развращение поведет Господь с творящими беззаконие,[208] да не пожрутся в гневе Божии, яко древнии ропотницы Дафан и Авирон, не токмо они, но и с сонмом своим.[209] Были в них, чаю, иннии, немного им притакивали²⁹⁸, а с ними вкупе земными челюстьми до ада пожрошася. Сих ради да внимают себе таковии, да не искусятся необратным²⁹⁹ Божиим гневом.

Вы же, красное церковное сочленение, прелюбезное христопокорное братоболительство, понеже ваши слезы и молитвы христорадне страждущим помогают и ратующыя попаляют³⁰⁰, помолите же ся и о их обращении, да в чювство своего заблуждения приидут и к покаянию притекут. Аще же и в страдании есмы, но благодарим Бога, яко не по стезям их, но евангельски, христорадне и за благочестие, по речению Господню, «аще кто исповесть мя пред человеки, исповем его и Аз пред Отцем моим Небесным и пред ангелы Божиими»,[210] и «претерпевый до конца, той и спасется»,[211] тем за Него, аще в страдании надежно³⁰¹, аще ли избавление получим прерадостно.

Вся же сия буди о Христе и со Христом. Аминь. 1713-го.

«Аз же, внегда они стужаху ми, облачахся во вретище и смирях постом душу мою, и молитва моя в недра моя возвратится».[212] Псалом 34.

В боголюбнем вашем пустынносовокуплении, в благочестнем христорачителнем сочленении, боголюбивейшии отци и братие, со инеми святейшими обычаи и сие дивнейшее дело имеете: ³⁰²егоже камо отпущаете, молитвами боголюбными онаго провождаете и, кого где впадша в напасти, услышите, о сем паки теплейшия молитвы Богу возсылаете³⁰², паки слезныя источники ко Владыце источаете, паки множайшая прошения Господеви о помощи и избавлении воздаваете.[213] Колико же и милосердыя всемилостиваго Владыки помощи и заступления наслаждаетеся елико в гладех, нуждах, безпрестанных наветах от бесов и человек избавления, сами вещи³⁰³ светлейше гласа вопиют;[214] елико во всякой нужды прешедшия случаи разгревают к пресладкому Божией помощи пристанищу прибегати, елико тепло понуждают премилостиваго Спаса и Пречистую Богородицу и всех святых во всякой нужды о помощи всенадежно³⁰⁴ просити.

Лютостное же диавола безпрестанно есть на ны нахождение, иже выну греховными востании ратует, иже безпрестанными напастьми и гонении наветует, иже толико вооружи настоящаго на ны озлобителя[215] и который да возможет ны обидети, продолженно³⁰⁵ наветование стяжа, необратно³⁰⁶ обидство возиме. Иже видится не евангельскими прекроткими разсуждении усветлеваемь, но ³⁰⁷неупокойными гордомнении обносимь, таковая и мнит, и обуревает³⁰⁷. «Не попущу, – рече,[216] – от руку моею избыти не отлучающагося староцерковных преданий, но преодолею веру того темничными озлоблении, попру³⁰⁸ усердие его долговременным томительством, смерти немилостней предати потщуся, ³⁰⁹не попущу слышанию быти, яко избы от руку моею³⁰⁹. ³¹⁰Не годно мне обезславитися, яко указом от Мене взят; не годно понизитися, яко заведох обидети и не возмогох³¹⁰. Потщуся всеми образы наветовати, вооружу вся на оны, елицы мя послушают; страхом великим я обложу, клеветами сия обгажду, вся люди немилосерды им сотворю, ³¹¹грозна и непреодолеема всем себе прославлю³¹¹». И той убо тако дыхати не престает.

Ваше же боголюбие противу сего, слезы к слезам изливающе, молитвы к молитвам прилагающе, слезне вопиюще: «Воскресни, Господи, помози нам и избави нас имени твоего ради.[217] Воздвигни силу твою и прииди спасти нас.[218] Скоро да предварят ны щедроты твоя, Господи, яко обнищахом зело.[219] Да внидет пред тя воздыхание окованных[220]». И паки от лица страждущую:[221] «Помилуй мя, Боже, яко попра мя человек; весь день боря, стужи ми.[222] Изми мя от враг моих, Боже, и от востающих на мя избави мя».[223] И еще продолженныя³¹² ради напасти умиленнейше утрудихся зовый: «Измолче гортань мой, исчезосте очи мои, уповающу ми на Бога моего».[224] И страждущыя из темницы восклицающа: «Изведи ис темницы душу мою исповедатися (в пустыни) имени твоему».[225] Велика борба, велико сражение: оттуду обидети смышляти не престают, отсюду Господеви со слезами восклицати не умолчевают, и дело не о малом, но о великом благочестии.

Воста древле зело на израилтяны войск ассирийских военачалник Олоферн,[226] яростию дыша, не обидевшыя его люди пожрети. Но той военный человек сый и варварин безмилостивен и на грады, богатством кипящыя, завистию и лихоимным оком пореваемь³¹³ бяше. Сей же, смиренным архиерейства чином одеваяся и духовный властелин именуяйся, воста телесне обидети человека пустынножителя, человека смиренна и убога, не богатством кипяща, не кого обижающа, ³¹⁴ни в каком злотворении ятаго³¹⁴, ни какими клеветами обойденаго, но Христов, апостольский и отеческий закон боголюбно соблюдати ревнующа, с ним же и прочия убогия пустынножителя ослезити³¹⁵ потщася. Но онии тогда израилтяне молитвами и постом неоружнии противу многооружнаго возпротивитися потщашася,[227] еже и ныне у вашего боголюбия и со страждущими видимо есть, иже молитвами с постом защищаетеся, теплыми к Богу вопитии обороняетеся, слезами и плачем молитвенным вооружаетеся.

Дивно бяше во многи времена израилтян случаи видети. Егда брань на них крепка востаяше, егда напасти необычныя обимаху, егда супостаты непреборимии востаяху, егда мечь над главою висящь видяху, тогда они прилежнейший в молитвах плачь составляху, тогда с женами и детми слезными потоки землю мочаху, тогда постами и пепелом и чистым покаянием пред благодатию Божиею себе смиреваху. Не менше дивно и ныне есть зрети: на человеки пустынножители, убожеством и нищетою конечною дышущыя, от человек незаступаемыя, от всех безпомощныя, воста человек непростый, в гневе жестокий, в нраве неумягченный, коварством многий, в подручных немалый, многим и мало не всем благородным клевеща, многи подвизая³¹⁶, многи вооружая, многим противяся; сими не токмо пойманныя пожрети мысля, но и на всех мечь нещаден и разорение немилостивно нанести желая, и не о телесных, но о благочестии отеческом бедствовати ны вооружися. И понеже вящше онех на ны напаствование есть, вящше, о, боголюбивейшии, долженствуем учинити наше ополчение: вси со старыми и немощнейшими, вси с болничными и юнейшими к слезам слезы и к молитвам молитвы и к посту пост, и к покаянию покаяние пред благостию Божиею боголюбно составляти потребствуем.

Аще бы ратуяй на ны о телесных единех или от невеждества и ярости в некоем времени обидети ны потщался, ныне же о отеческом благочестии рать состави, ведый, яко закон Божий о вере мучити и неволити не повелевает,[228] презирает. Слыша в Писании, яко святии архиереи древнии за веру не мучиша, но сами мнози мучими беша[229] сему не внимает. Зная во историах, яко кия токмо еретики архиереи и прочий безбожнии тии за веру гнаша и мучиша благочестивыя,[230] о сих не срамляется³¹⁷. К сим от пойманною не обещещен словом безумным, не осрамлен глаголом каким дерзостным, но кроткоувещателными ответы увещаваем и разумнейшими прошении умоляем, на милость не скланяется и, от градских³¹⁸ властей молим и уведомляем, о сих не примиревается. Явно, яко предизволенно, зло имея и о боголюбной благочестном житии завидуя и от диявола поощряем, тако зелно, тако неумягченно вооружися. Ибо и древле от диявола вооружаемии безмилостивны благочестивым, ничтоже им зла сотворшим, бяху. Кое зло Авель Каину сотвори, иже от него убиен бысть?[231] Кое зло Иосиф братии сотвори, но от них в ров ввержен и продан язычником?[232] Кую злобу Христос жидовом учини, но архиереи жидовстии безмилостивно вопияху на нь: «Возми, возми, распни его!»?[233] Ничтоже апостоли им злотворяху, но выну от них обижаеми и в темницы вметаеми бяху.[234] Ничтоже Петр верховный архиереом жидовским злотвори, но они, в темницу ввергше, жестоко оковаша, но молитва прилежна, бывающая от Церкве, избави Петра от темницы.[235] О, братолюбия Христовых ученик! Состраждут страждущему, сосвязани связанному, плачют о юзнике, молят Бога о темничнике. О, какова сила общеусердныя молитвы, яже верховнаго избави[236] юже друга Божия от челюстей убийственных восхити![237]

Тако понуждает ны и повесть сия, и страдание удов церковных ко умиленней жалости и молитве прилежнейшей. Елико безмилостивно они востают, елико безмилостивно на связаною³¹⁹ наветуют, грозят, претят³²⁰, заключают³²¹, елико же и страждущая в среды безмилостных напастей, в руку безжалостных сердец, умиленна и плачевна, день от дни смерть или тяжчайше смерти ожидающа, яко агньца на заколение блюдома, яко трость усушенна и обледенна³²², толико боголюбная сердца братолюбная жалость восприемлют, толико паче со слезными источники о помощи к Господеви вопиют, толико вящше немолчными гласы с плачем и постом всемилостиваго Владыку о избавлении помолят, толико теплаго Пречистыя Богоматере заступления возплачют, толико всех святых о заступлении со плачем умолят.

И праведно³²³. Аще бы не помощ человеколюбнаго Владыки, аще бы не заступление Пречистыя Богоматере и всех святых, како бы страждущий в толицей безмилостивных ярости доныне соблюден был, како бы в руках смерти его и мучения желающих сохранен был? Иже клевещуще, смерти и мучительства на его улучити искаху, како бы того соблюденна держаху? Но яве всемогущаго Владыки помощию и в наветующих руках Сохраняема еста³²⁴. Яве бо сеяние молитвенное и плод благодатнаго соблюдения толик показуется быти.

Сие убо закон евангельский свойство учеником Христовым поведает имети, еже гонимым быти, еже в темницы вметаемым, еже от всех ненавидимым имене Его ради. Тако объявленно и противоратующих свойство: «Аще, – рече, – мир вас ненавидит, ведите, яко Мене прежде вас возненавиде; аще от мира бысте были, мир убо свое любил бы, якоже от мира несте, но Аз избрах вы от мира, сего ради ненавидит вас мир».[238] И паки: «И будете ненавидими от всех имени Моего ради, и влас главы вашея не погибнет, в терпении вашем стяжите душя вашя».[239] И паки поучает в находящих таковых злых: «Внемлете же себе, да не когда отягчают сердца ваша объядением и пиянством и печальми житейскими, и найдет на вы внезапу день той.[240] Бдите убо на всяко время молящеся, да сподобитеся убежати всех сих хотящих быти и стати пред Сыном человеческим».[241] И паки: «Молитеся, да не внидете в напасть».[242] И по Ипполиту священному,[243] в пустынях от гонения крыемии³²⁵ будут во многих молитвах и плачех бесчисленных, благий же Господь, рече, покрыет их, яко отец чадолюбив.[244]

И понеже всещедрый Владыка посылает на ны напасти и в тех бесчисленно помогает, посылает скорби и теми от греха скверны очищает, попущает гонения и теми веры исповедание светлейшо творит, попущает за веру терпети темничная и мучителная озлобления и теми венца и Царствия светлости сподоблевая. Попущает напастная разгорения³²⁶ и в тех заступает и теми нам устрояет, убивает теми грех, изгоняет страсти, помыслы очищает, от греховнаго сна возбуждает³²⁷, от леностнаго одра возставляет³²⁸, ³²⁹от разволеннаго многосуетия спрятает³²⁹, от миролюбнаго желания отводит; приводит в Божий страх, собирает мысли в боголюбие, наставляет к покаянию, научает к посту, согревает, понуждает к молитвам, помощника и заступника Бога держатися показует. Егда, рече, убиваше их, тогда взыскаху его и утреневаху³³⁰ к Богу: и кто сии жестоковыйнии и необрезаннии сердцем,[245] иже и тии ползу в наказаниих приемляху.

Колми паче боголюбивии восприемлют вящшу духовную теплоту, вящшее к Богу молитвенное приближение, болшее слезное приношение и заступления получение. В скорби, рече, призвах Господа, и услыша мя.[246] И паки: «Призови мя, – рече, – в день печали твоея и избавлю тя и прославиши мя».[247] Верно слово и всякаго приятия достойно: всемощный Господь всемощная деет. Иже попустивый Иосифа в варварския руки продана и в темницу ввержена быти, тамо соблюде и оттуду со славою свободи.[248] Иже Даниила, ввержена в ров, от лвов снедения соблюде и оттуду изведе[249] Иже триех отрок от огня избави и славою вечною венча.[250] Иже Иова многострадалнаго во многи скорби попусти, и паки преславное показа.[251] Иже исповедником в страдании помогает и мученических и исповеднических венцев сподоблевает. Иже послушники отеческих ради молитв от зверей неснедаемых, от вод непотопляемых, от злодышущих человек навета избавляемы показует, и вся спасающыяся различными пути в премирное пресветлое свое Царство приводит. В ресноту³³¹ священный церковный глас воспевает: надеющиися на Господа ³³²врагом страшни и всем дивни³³², горе³³³ бо зрят, ибо Господь «волю боящихся его сотворит и молитву их услышит и спасет их»,[252] – рече пророк.

И понеже убо сия тако суть, благо же, благо буди вам, боголюбезнейшии отци и братие и всецерковное сионских чад совокупление, иже не за злодейство, но за церковное благочестие страждете; иже без вины враждующих имеете и молитвою на сия ополчаетеся; иже удов ваших и церковных, в среду³³⁴ разженных напастей преданных, сболезнуете. О сих плачете, о сих молитеся и сих Божия ради благодати и в страшных волнах ясно исповедающих благочестие восприемлете, и тыя помощи ради Господни в злодышущих руках сохраняемы почюваете³³⁵. И враждующий убо враждовати не престают, вы же молитися и плакати ко Владыце не престаете. И тии убо плод злодыхательства своего – гнев Божий – и зде, и в будущих улучают³³⁶. Вы же всюду всенадежно помощи Божией наслаждатися сподоблеваетеся³³⁷. И елико убо продолженну вражду тии составляют, толико продолженных ради молитв продолженныя мзды сподобляетеся. В сих напастех венца и Царствия за благочестие улучити возможете, в сих житие и совесть свою разсуждати упремудряемся. Сими боголюбивейшии в невходимое страстным безстрастие приходят. Сими мы, грешнии, с ниневиты[253] к покаянию приходим, в сих обещание свое к Богу учюем. Сими, яко страждущий, разволенное слабое житие отставити упремудримся. Отсюду ко Господу тепло прибегати научимся. Сими всенадежную его помощ стяжавати вразумимся.

Тако, добрии подвижницы, тако, православна заступници, потщимся, возревнуем, возусердствуем, возополчим³³⁸ заповедми Божиими благочестно стадособрание. Вооружим сия молитвами, постом и покаянием утвердим, милосердием и братолюбием сочленим³³⁹, целомудренными уставы остеним³⁴⁰, в смирении, послушании и терпении непобедимы устроим. Согреем сердца наша теплотою веры, любви и надежды Божией. Услышим, учюем, вонмем выну Небеснаго Владыку к нам беседующа: «Аще Быша людие мои послушали мене и Израиль аще бы в пути моя ходил, ни о чесом же убо враги его смирил бы, и на стужающая им возложил бы руку мою».[254] Сице, боголюбивии, благочествующе внимателно³⁴¹, Божия помощи выну насладимся. Сице мирное и в напастех христозащитное житие зде поживем. Сице премирное пресветлое Царствие Божие получити возможем, еже да даст нам премирный Царь славы Исус Христос, Сын Божий, емуже слава и покланяние с безначалным его Отцем и со Святым истинным животворящим Духом ныне и во вся веки. Аминь.

В мире скорбь имети будете,[255] о мне возвеселитеся».[256] Евангелие.

³⁴²Вем, яко с духовною сроднокровная спрягшися любовь, кипящия пламы, наипаче в печальных случаех подают сердцу, наипаче – паче вам, мню – продолженная печаль³⁴², о, любезейший П<етр> П<рокопьеви>чь[257] и любоболезненая сестрицо С<оломония> Д<ионисье>вна[258] с прочими единосродными[259] и единолюбовными и зболезнующими. Разумею клокочющее печалными помыслы сердце, чюю многоскорбными волнении томящуюся утробу, внимаю плачевными точении окропляющееся лице. Но что скорблю и скорбим? Что, сердце, мятешися, что, ум, смущаешися? «Вскую прискорбна еси, душе моя, Вскую смущаеши мя? Уповай на Бога, яко исповемся ему, спасение лицу моему и Бог мой».[260]

Припомним, любезнейшии, апостольский глас: «Аще наказание терпите, яко сыновом вам обретается Бог».[261] Возникнем³⁴³ мало, вознесем горе очи наши, возразумеем, яко любезнейший наш братец служит за Церковь, избран всяко от Царя Небеснаго, страждет за имя Божие и за свидетельство Исус Христово. Аще и отлучен от нас телом, но с нами духом; у них в пленении, а в Церкви с нами исповеданием.

Ниже.[262]

Не за воровство³⁴⁴ пойман, не за злодейство держится, но за избранную всесветлейшую веру, но за превысокия небесныя догматы. «Блажени, – рече Господь, – не гонители, но изгнани правды ради».[263] Коликая светлость, колико величество! Глаголю бо вам, другом моим, рече Господь, «не убойтеся от убивающих тело».[264] И аще кто исповесть мя пред человеки, исповем его и Аз пред Отцем моим[265].

Ниже.

Вкратце многоскорбный скорбящим чрез сие писанейце любезное целование, поклонение же и прощение посылаю, помощи молитвеныя просим. И всем поклонитися от Мене возвестите.

Пространнее же во общем писме, в скорби оставшися, написах. Буди милость Божия с вами и за вашими молитвами и с нами. Аминь.[266]

Всекраснейшия солнцеоблеченныя жены,[267] возлюбленныя пресветлейшаго жениха невесты, сладчайшыя матере нашея православныя Церкве, Церкве, не от нововымышленных раздоров, не от еретичествующих сонмищь составленныя, но древлеправославием отеческим сияющыя, но постоятельством в старожитности Святых отец евангельским и апостольским благочестием сияющыя, Церкви не обижающия, а обиды отвсюду терпящия, Церкве, в гонении цветущия, в скорби чада раждающия, в болезнех доящыя, в крови южники изводящыя и небесней вечной светлости сподобляющыя, – чадом того пресветлаго Сиона, чадом многоскорбным, чадом плачевным, чадом, в крови агньчей убеляющым своя ризы;[268] людем не обижающим, а обидимым, не досаждающим, а досаждаемым, не враждующим, а враждуемым, не злодеющим, а злодеемым; человеком, не мощию человеков спасаемым, но Божиим промыслом руководствуемым, не богатствы цветущим, но благочестием светлеющимся, ²⁴⁵не пространством трапезным другов водящим, но словесы божественными угощевающим своя пиряны³⁴⁵; рабом Царя, по плоти распятаго, учеником учителя, не гонителством к себе приводящаго, но самого всегда в жизни плотьстей гонимаго; овцам пастыря, не мучителством пасуща, но за стадо смерть претерпевшаго, – вам, благочестному сословию, пасущим и пасомым, тако общне, яко особне живущим, людем христоименитым о Христе Исусе вечней надежде радоватися.

Мир возрадуется, вы же восплачете,[269] – тако в тленней сей жизни подражателем евангельским Спас предрече, яже премудрыми своими всестроителными судбами в скорбех очищая, в слезолитиих убеляя, в напастех просвещая, в терпении вечней светлости сподоблевая. Откуду и рать³⁴⁶ есть житие се, святыя книги прорекоша: не точию с плотию, с дияволом и со грехом, но <с> человеки, гонити и наветовати за благочестие дмящимися³⁴⁷. Дивна же сия брань и многаго чюда исполнена, аще и скорбию боголюбезных и братоболителных сердец помазана.

Пастырие, в мире сем славнии, богатьством кипящии, трапезами доволнии, обладающий градами, народами и странами многими, поимавше единаго человека – человека не злодея, не хищника, не досадителя, но смиренна и кротка, человека подражателя Исус Христова, яко агньца, впреки³⁴⁸ укорами не вещающа, но в смиреномудрой кротости закон Божий, в немже пребывает, извещавающа; человека, не богатствы кипящаго, не рабы окружаема, доходов их и славы века сего ничего себе не отлучившаго³⁴⁹, но единаго уединенаго, богорадне нищаго, с нищими пребывающаго, в посте и молитвах и смирении премудростию Божиею уста и ум помазаны имущаго (якоже сами извещевают, постится и молится много и премудр зело), того человека, иже от младенства лобызающаго пустыню, иже в древнем святых отец благочестии согласно со святыми пребывающаго, на онаго люто воставше, яро возгремевше, безмилостивно вооружившеся, коварными вопросами, лукавыми стязании яти³⁵⁰ часто покушающеся. Но егда сими не яша, якоже сами глаголют: «Такой ведущей и коварной³⁵¹ не бывал еще от староверцев», – тогда иною проповедию их подвизающеся: грозами, прещением, оковами, уготовляюще жестокия темницы, претящее³⁵² изобилием мук. Тако востающе, часты и зелны рати на ничтоже им зла сотворшаго творяще, всеми сими принуждающе от благочестия, в немже уповает спастися, отстати, а в новосостроимое согласие, в коем он ненадежен спастися, неволею, чрез³⁵³ упование и совесть, пристати. На что наш доблий многажды чрез писма и словеса к прочим словесем глаголаше: «Что творите, о, архиерею, не увещав, принуждаете; известно³⁵⁴не показав, приневоливаете? Или велите мне солгати и неистинно вера извещати, что веруемое –· рещи „не верую»? А яже мне неизвестно и не веруется, тако солгати от неволи и рещи, яко „верую»? И како и вам, и мне от сего будет спасение?»

Паки они: «В чем тебе наше неизвестно³⁵⁵, объяви». На сия пустынное воспитание на писме о пяти статиях: 1-е – ՚премена о знамении честнаго креста рукосложенными персты на лица своя воображаем; 2-е – яже они чрез³⁵⁶ древнее предание благословляют; 3-е – о трисоставном кресте; 4-е – о аллилуии; 5-е – о имени Исусове[270] – яже на целой тетрати по изрядству³⁵⁷ свидетелствы краткопоказателне положи. «³⁵⁸А о прочих, – рече, – пременах требует показати не неволна, но свободна времене, и места, и книгостяжания³⁵⁸». Сия же показа, на сия проси у них возразителнаго показания на писме от свидетелств книжных явити, аще по новопечатным книгам, издревле в Росию от греков предашася, от киих и когда сия пременишася и коими святыми новопреданное утверждается. На сия от них ответ не учинися и показание никое не состроися, но новосложенныя их книги и Димитрия Ростовскаго[271] со лжеклеветами сложение во уверение чести ему предадеся³⁵⁹, от киих вящьше показася, коль крепко основание свидетельств их.

По сих паки прещение, паки ярость, паки цепи удвоение, темниц темных уготовление, посуление³⁶⁰ отдать к царьскому суду под огнь и мучение без милости. По сих изволением Божиим от началников указом к суду приказан в царствующий град. Они же тогда и отдать к суду не похотеша, иже коварствовати обыкшии. Бысть же самому архиерею приезд, бысть же и от господоначалствующих крепок ему приказ, да привезется староверец поиманой. С Новаграда привезен убо,[272] но у его архиерея[273]* во объятиих, аще и свободнее новгородскаго, держася, обаче востание³⁶¹ люто от архиерея, люто прещение, грозы безмилостивны, облоги³⁶² и клеветы коварны, с господоначалствующими рать и наговоры на них[274] самому государю. Откуду мняхуся архиерейстии яко воскрилени³⁶³, проповедающе не точию связанному от них безмилостивное мучение и смерть, но и всем пустынножителным без пощады разхищение. Часто же юзнику прещение и приневоление тогда, когда и положи Бог самому государю юзника свидетелствовати. И по разглагольстве никоея ярости, ниже кое прещение смиреннейшему государь учини, но и последи на желание мучения архиерейская и прочих государь возрази и отказа, и отпущена от своего величества учини и вины на нем быти никакой не сказа. От архиерейских износится: государь «от мене, – рече, – отпущен», – и мучити не повеле, а от архиерея уверяти воли не отъя.

Обаче по государеве отезде архиерей ³⁶⁴c господоначалствующими воспретися³⁶⁴ и на прошение их о юзнике овогда уже и недоуменно, овогда же инако. Обаче Богу попустившу, майя в 25 день сам поеха и повезе с собою в Новград гордый смиреннаго, немилостивый агньца кроткаго, от священных законов осужденный неосужденнаго (архиерей бо бия верна или неверна, да извержется от сана, священная правила осуждают[275]). Той же и привозил бе с Новаграда по его промыслу и злобе, яко агньца на заколение незлобиваго, яко злодея на различная мучения и томления, иже и готовяшеся, и промышляше, овогда на каторгу отдати, иногда же мучителному томлению³⁶⁵ и огню. Но возбрани его злобе всемогущий Божий промысл. Не возможе бо, яко иный Каияфа взыскати подобна Пилата[276] еще же и претяху³⁶⁶ многажды: «Аще же не повинешися, Агапово дело[277] на вас воздвигнем и всех вас разорим». Лжесвидетели, яко на Исуса моего, на христоподражателнаго злодышущии представити тщахуся. ³⁶⁷Но на вся сия и вящше сих о Церкви многа стязания Божия благодать отвещавати помогаше ему³⁶⁷.

Но что конец тризнищу³⁶⁸ сему будет, о, Боже мой, что довершение попустителныя борбы и наказания нашего, о, всещедрый Владыко! Оскуде человеческая защита, да не оскудеет твоя всемогущая помощь. Ослабе началническое за нищаго раба твоего поможение, да не оставит его всехранителное всемилостивное твое призрение. Ей, Владыко, ей, человеколюбче, помоги страдателне борющемуся единому с бе<с>числеными, нищему с великобогатыми, странному с великозаступными³⁶⁹, юннобеззлобивому со обетшалыми³⁷⁰ в лукавстве, связанному со связующими, избави нища от силна и убога, емуже не бе помощника,[278] да всенадежно церковная чада воспевают: «С нами Бог, разумейте (и паки: Аще бо паки возможете и паки побеждени будете), яко с нами Бог».[279]

Вы же, о, всеблагочестное церковное соединение, боголюбное любоплачевное сочленение, всекрасное христоподражательное совокупление, иже продолжившуюся имеете печаль, иже долговремянно чрез уда³⁷¹ церковнаго стяжаете страдание (по реченному: аще страждет един уд, состраждут с ним и вси[280]), иже елицы любовными и любоцерковными жалобы оскорблены имеюще сердца, ихже от повестей сих "негли обновишася печали³⁷², ихже негли востопишася братоболителне печалныя жалобы, ихже паки и паки потекоша слезныя быстрины, но не будите отчаянии, иже самем Богом устрояеми, ՚не воздряхлствуйте чрез меру³⁷³ печалми, иже всемогущим Владычним промыслом охраняеми. Аще ли же и отечески наказуеми, благодарно приимем, да не с миром осудимся. Возмыслим, яко еще не пленен наш любезнейший, но в Церкве стоя, со святыми единогласно проповедуя; не отлучен от стада, но за стадо боряся; не ухвачен от Церкве, но за Церковь подвизаяся; не отрезан от церковных уд, но стражда за вся церковныя уды, возражая³⁷⁴ клеветы, пресекая коварная плетение; образом, словом, житием, прослытием³⁷⁵ являя богорадное христорадных людей свойство. Не оставлен еще от Бога, но всемощною его помощию и во злодышущих руках всюду помогаем и сохраняем. Но понеже скорбит мати Церковь, доньдеже в житии сем гонимых своих чад повивает³⁷⁶, убо в великой бури и волнах боязнь потопления, в нихже и верховный апостол, усумневся, погрязаше, о немже, толико от Христа укрепленнем[281], послежде связаннем³⁷⁷, молитва от Церкве прилежна бываше.[282]

Сими убо, сими молитв поможеньми помощи страждущему, о, церковное благосоветие, потщитеся, попросите неослабно от Господа со слезами помощи, укрепления и избавления за вся ны напаствуемому, проповедите тако общежителным, яко во особноскитех молитвенную с постом и слезами жертву всемилостивому Спасу и Пречистей Богородице и всем святым приносите. Не останите, боголюбезнейшии, толцати³⁷⁸ о уде церковнем в небесныя двери, Дóндеже Божиим промыслом докончается сие борение. Помяните, яко общий наш уд о общем благочестии за всех истязуется. Помяните, яко на вся злохитры клеветы за вся ны един ответует. Уразумейте, аще бы под царской гнев единаго его коварствами привели, всех ны воспалити яростию возшумели бы. Помыслите, аще едину свещу сию погасят, вся ны помрачити потекут³⁷⁹. Аще ветвь сию отломят, все древо исторгнути³⁸⁰ возгордят. Аще око сие избодут³⁸¹, на все тело яко победители возъярятся. Помяните отцелюбезне и братолюбне соживущаго и соболезнующаго в юностнем цвете с вами. Помяните посланное от вас чадо церковное, еже юзами неправедно обложенное, еже страшилищи мучителными выну наветуемое, еже злохитрыми за вся ны коварствы стязуемое. Воспомните в милости вашего юннаго подвижника, иже единаго страждуща, а прочия защищающа, не нанесша зазору³⁸² на отеческия седины, но и наводимыя зазоры отражающа, не наведше злослышания³⁸³ на церковное стадо, но и примышляемыя клеветы растающи, не остритися помазавше чюжемудренных языков, но и поощряющая на Божие церковное стадо притуплена показующа. И сие Божиею помощию и за вашими святыми молитвами, о чем юнный подвижник плачет, о том к вашему боголюбию от заключения вопиет, всех вас молит и во всем припадает, у всех прощения просит и всем прощение посылает и ко всем вам от юз взывает: «Помолитеся, помолитеся ко Господу Богу и Пречистей Богородице и святым небесным силам и всем святым о мне, грешнем и непотребней вашем служебнике³⁸⁴, восхищенном в чюжди руце и отлученном от ваших отеческих недр, Дóндеже како и что Вышний устроит о мне».

Вкупе же и мы, сосвязаннии многоскорбнии ваши служебники, прощения и молитвенныя помощи просим, просим, дабы Господь Бог не попустил немощным нам над силу³⁸⁵ искуситися и помощь свою нам даровал, и связаннаго избавил, и нас соизбавил, емуже слава во веки. Аминь.

Не скорби, не тужи, юзниче Христов, о долговременном твоем заточении, ниже тоскуй, страдалче Господень, о многомесячном твоем оземствии³⁸⁶. Ни вменяй оставлена быти себе и отриновена от милости Господни, яко попусти тебе надолзе во озлоблении быти в руках законопреступник, в руках безстудных³⁸⁷ и лукавых людей, рыкающих, яко скимнов³⁸⁸, кровь чистую пролияти; в руках неправедных, ищущих праведнаго убити и трупия Божиих рабов брашно птицам небесным положити, паче же тщащихся со душею и телом в жертву отцу своему Аввадону[283] придобыти. Но паче призре на тя всемилосердое всевидящее Око, ведая тя всеоружствы божествеными вооружена, испусти тя победити силою того и помощию возвышенную многоглавную самомнивую³⁸⁹ прелесть, уготовляя тебе за маловременну скорбь вечную радость, за скоропрестающия болезни бесконечный покой во блаженней оной жизни, в немерцающем свете, идеже глас радости и веселия[284] выну лико<в>ствующих, идеже око тленно не виде, ни ухо землено слыша, ни на сердце человека перстна³⁹⁰ взыде никогдаже, яже Он уготовал есть любящим его[285] и терпящим его ради страдания и скорби.

Темже возмогай и укрепляйся, подвижниче и воине Царя Христа, разсецай мечем – Божиим глаголом[286] – темномудрых суемудреная веления и растерзай паучинотканная лукавых ухищрения. И стой и подвизайся доблемудрене в лютый сей день настоящаго века, да по скончании его от Подвигоположника[287] венец неувядаемый[288] восприимеши: претерпевый бо до конца, той спасется.[289] Не убойся востания многих врагов и лютости их и свирепства не устрашайся, ратоборче Христов. Постражди за божественное имя его.[290] Приими маловременную смерть за победное царское знамение, разорившее адово преисподнее царьство,[291] вечное тебе безсмертие ходатайствующую. Приими кровавыя раны на тленнем теле своем ныне за свою честную и святую Матерь, родившую тя и воспитавшую и светлаго тя сына в мире сем показавшую, аще и распуженную³⁹¹ ныне и разоренную и бегающую, но обаче честную и пресветлую невесту Царя Небеснаго,[292] вечно с ним царствовати имущу со своими чады. Аще и ныне гонима змием и того отроды, аще и кровию своих возлюбленных чад обливается, болезнует люте. Но вскоре темных сих ратник помраченная година разорится и область их престанет³⁹² и возсияет бесконечное Царство безсмертнаго Царя, в немже прославится и возвеселится со своими чады гонимая ныне Мати наша, Небеснаго Царя пречистая невеста. Гонящий же ю сии ратницы яко дым исчезнут[293] или яко прах от лица земли[294] и в нынешнем веце, якоже и прежний Никоновы отроды, в будущем же праведным судом Божиим праведная своему деланию восприимут.

Ты же, рабе Христов, подвизайся и крепися и юзы, и раны, и муки, и глад, и всякую нужду, конечное³⁹³ же и смерть с любовию приемли Христа ради и вечныя ради благия надежды. Возведи умное око и виждь пострадавших Христа ради, како ныне радуются, како веселятся в Царствии Небеснем, гонящий же сих и мучившии погибоша и беспамятни Быша³⁹⁴; како прейде мучительная лютость и конец восприят маловременная их слава и яко трава исше[295] и яко цвет отпаде[296] и в точило вечное ярости Божия вложени Быша,[297] како и крови своя пролиявшии за Христа радуются, в местех покойных водворяеми, и превечно веселитися будут в нетленнем царствии Христа Царя славы, за негоже и пострадаша. Не сугубо же и они в веце сем насладившеся и безсмертне братию свою избивше и истребивше, но паче скоро судом Божиим пожати бывше, вечному осуждению подпадоша, сим же исходатаиша превечное блаженство, аще и неблагоразумным произволением. Сице же и о сих будет, и конец вскоре лютость их восприимет.

Ты же добре постражди, страдалче Христов, и претерпевай до конца вся лютая привпадшая³⁹⁵ тебе, на конец взирая подвига своего, неослабно подвизайся за будущее мздовоздаяние. Се бо и сам Христос Бог наш любезно призирает на твой подвиг и помощь тебе подавает свыше, и аггели окружают тя, за Христа терпящаго, и мученицы посещают тя, склеврета своего, темницу и узы претерпевающаго за Христов крест.

Мы же вси радуемся, слышаще мужественое терпение твое и страдание за древнее благочестие (аще и скорбим о разлучении твоем) и Господа Бога молим, недостойнии, да до конца подаст тебе помощь и крепость стояти и свободна тя и жива исповедника своего дарует нам, Церкви своей помощника и заступника, аще и разореной и распуженой³⁹⁶ ныне, в последних сих временех. Настанет убо иное время, егда возвеселится скорбящая и изгнанная невеста Христова со своими возлюбленными чады, егда врази ея вси истреблени будут и ненавидящий ю потребятся³⁹⁷. Сего чаем, сего ожидаем не медлено быти. Ей, Господи Боже, даждь нам милости своея ради. День убо к вечеру приходит, и солнце к западу достизает, или воистину рещи, нощь мимо ходит³⁹⁸, день же приближается[298] Вси щурове³⁹⁹ воспевают, и тма обдержныя⁴⁰⁰ сея нощи вскоре отгнана будет, и возсияет невечерний⁴⁰¹ день и да неспящих нас обрящет, и нощы и тмы дела отложших[299] да возрадуемся возсиявшу праведному Солнцу, емуже слава во веки. Аминь.

Писавый, о, с коликою верою и любовию покланяется и молитв и благословения зело требует. Августа в последних числех.

«Бог же не имать ли сотворити отмщение избранных своих, вопиющих к нему день и нощь, и долготерпит о них? Глаголю вам, яко сотворит отмщение их вскоре».[300] Словеса сия самого Христа, в Евангелии у Луки в главе 18 написанная.

Велие благо дадеся от Господа Бога християнскому роду – молитва; велия, глаголю, и неизреченная доброта сия излияся благочестивым людем, великая же и несказанная дела издревле и доныне священная молитва действоваше и действует. Что Моисея аммаликопобедителя показа?[301] – Молитва. Что фараона мучителя победи и мучительствованнаго Израиля от руки его свободи?[302] – Молитва. Что от Навуходоносорова мучительства три отроки свободи и огнь в росу преложи?[303] – Молитва. Что львом уста загради и молящася пророка от рва и львов избави?[304] – Молитва. Что Иону во чреве китове соблюде⁴⁰²?[305] – Молитва. Что верховнаго Петра от темницы и юз свободи?[306] – Молитва. «Молитва же бе прилежна, – глаголет благовестник, – бываема от Церкве Богу о нем».[307]

Но и вашея священныя молитвы, о, священное совокупление, ныне ясне действо показася, избавляющее, яко Иосифа ис темницы,[308] яко Иону ис кита, яко Даниила от лвов, яко верховнаго[309] ис темницы (яже от народнаго прослытия⁴⁰³ услышахом). Темже и мы, страстнии, яко из лавиринфа⁴⁰⁴ некоего мрачнаго, от юзилища тмострастнаго радостныма очима к сияющему свету вашего молитвеннаго просвещения отсюду зряще, краткоблагодарное слово сухим пером ума нашего на возбуждение усердия боголюбнаго вашего о настоящем сем деле возусердствовахом за вашими молитвами вам принести. Аще что и сух и едва текущь ручеек, но в боголюбное море вашего братолюбия любезно и сия приимите.

«Несть наша брань к крови и плоти, – глаголет апостол, – но к началом и властем»,[310] и прочая. Бывает и брань в человецех по мере: егда равный со равным борется или аще неравнии, но равными оружии брань деют, или о чем брань имеют, аще кий преодолит, невечно сия стяжет, аще кий обиженный вечною смертию за сия не умрет.

Зде же нами повествуемая брань дивна зело и плотьскому слуху невместимая. Восташа бо многосилнии на безсилныя, славнейшии – на малослышанныя, вооруженнии – на безоружныя, многшими рабы и ласкатели⁴⁰⁵ окружаемии – на саморабственныя и убогшыя, премногим богатьством и славою дышущия – на нищайшыя и безименшыя⁴⁰⁶ люди, многотрапезнии – на постящыяся, силногордостнии – на смиреншыя, мучительствующии – на богомолитвенники, обидети могущий – на человеки, никогоже обидевшыя, ни обидети хотящыя.

Такови высокославнии, в могутстве⁴⁰⁷ нестерпимии, в гордости непреодолеемии восхитиша от убогих единаго убогаго, нищаго от нищих, смиреншаго от смиренных, безоружейнаго, невоеннаго, не досадника и никогоже обидевшаго, ни обидети ведящаго. И тии убо лвояростнии на сего беззлобнаго, от них плененнаго, скованнаго, в юзилище, аки в лавиринф темный, оземствованнаго, тмами надходяще⁴⁰⁸ – той же благочестием обороняшеся. И тии гневающеся – той смиренне моляше; тии озлобляюще – той благодаряше; и тии стращающе – той Бога призываше; и тии различными приказными коварствы стязующе⁴⁰⁹ – той благочестия словесы охраняшеся; и тии смерти его искаху – той промыслу Божию себе отдаяше.

И понеже тии всегневно на безвиннаго воставше, безмилостно разорвати агньца беззлобнаго возшаташася⁴¹⁰, что тогда отцелюбнии и матеролюбнии ваши утробы, что братолюбная и церквосоюзная сердца? Толико безвинно обидимы себе зряще, толико же жалостне церковнаго уда без милости терзаема, что творите, что подвизаетеся? По обыкности вам, ко всемилостивому Владыце прибегаете, прилежными молитвами за обидящаго вооружаетеся, частыми к Богу приношении за связаннаго ополчаетеся, ибо брань велия и браней дивнейшая. И противнии убо гневом надымающеся – вы же кроткими воздыхании умиляющеся; тыя грозами нестерпимыми ярящеся – вы же смиренныя вопития⁴¹¹ к Богу посылающе; тии связаннаго растерзати гремяще – вы же ис пустыни в юзилищи молитвами охраняюще; и тии различными клеветами смерти безвиннаго предати коварствующе – вы же слезными источники Бога в помощь неповинному призывающе. И молитв ради ваших бе Бог с рабом своим: в зубах имуще, а кусати не могуще; в железах связана держаще, а растерзати связаннаго не могуще; в юзилищи содержаху, а преодолети⁴¹² юзника не можаху. И велико, мняще, еже у себе в юзилищи содержати, и, тем гордящеся, глаголаху, яко «никогда от рук наших изыти может».

И сие чесо ради тако возъярившеся, чесо ради толико гневно на агньца сего вооружишася? Еда⁴¹³ имения их отъят? – Но никакоже. Еда честей их лиши? – Ниже сего. Еда обыкновенных им пространных трапез и напоев⁴¹⁴ отлучи? – Никогда сему возревнова. Еда укорением обесчести я? – Но не весть смиренший укоряти. Еда о вотчинах их тяжбу имея, якоже им обычно? – Но сей Бога ради вся остави, о сих не печашеся. Но чесо ради тако на нь вооружишася, чесо ради тако ополчишася? – Понеже древлеправославное благочестие соблюдаше, понеже по старопечатным книгам Богу моляшеся, понеже согласно святым крестным знамением знаменовашеся, понеже святых благочестие храняше и житие благочестивое прохождаше и Бога моляше и вечных благих пустынным боголюбным житием искаше.

И тии убо толико на нь потщашася⁴¹⁵, толико вооружишася лвояростно, яко ино ничтоже толико лютейшо себе мняху, елико еже оному от рук их избыти. Их же жестокости не умягчиша царския указы, давшыя свободность служити по старопечатным книгам.[311] Не умилиша⁴¹⁶ каменносердечия их честньших камандиров о оном писания. Не умилостивиша честнейших персон за оного прошения. Не приведоша в благоутробие его умиленная и смиренная прошения. Не склониша в милосердие многшая честных честная заступления[312] Не умилишася, оскорбляюще недосадившаго их и никого. Не устыдешася апостольских запрещений, повелевающих не нуждею пасти, но волею.[313] Не устрамишася Христовых законов, мучительствовати о вере запрещающих.[314] Но вся деяху и вся творяху, клеветы на клеветы сшиваху, лжи ко лжам слагаху, воеже не токмо не спущену⁴¹⁷ быти, но дабы, яко злодея, неповиннаго смерти предати.

И тии убо тако жестоко дышуще бяху, той же толико себе Богу и благочестию предаяше, яко всего себе в волю Божию отдаяше, Бога моляше, на Бога надеяшеся, к Богу с пророком вопияше: «Аще пойду посреде сеней смертных, не убоюся зла, яко ты со мною еси».[315] И с Павлом восклицаніе: «Аще Бог по нас, кто на ны»[316]. И лучши изволи смерть претерпети, нежели благочестия уступити. И паки часто к Богу вопияше: «Помилуй мя, Боже, яко попра мя человек; весь день боря, стужи ми.[317] И яко мнози борющий мя и обышедше, обыдоша мя и именем Господним противляхся им».[318] И Павлово размышляше, яко недостойна страдания нынешняго времене к хотящей славе явитися.[319] И связание желез выю и нозе его угнетаху, вера же его не вязашеся; и юзилище темнообразное его оскорбляше, но вера его не ослабляшеся. Частая страшилища, яко стрелы, на нь посылахуся, но усердие его о благочестии не стреляшеся. Клопы, вши, блохи премножайше оскорбляху, но надежда вечных благих страждущаго упокоеваше.

И той убо в юзилищи, яко в гробе, затворен, тако подвизашеся, вы же в пустынных пещерах како и колико подвизастеся, колико молитв Богу возсласте, колико слезы пролиясте, колико сердечная вопития на небо воспустисте, колико о страждущем Бога молисте, Бога в помощь призываете, от Бога избавления просисте. Пречистую и премилосердную Богородицу в помощь и заступление призывающе, часто ей «Взбранной Воеводе»[320] воспевающе; к Богородице прилежно вопием, всесоборне восклицающе: «Не остави нас в человеческое предстояние»,[321] – умилно взывающе и «Избави нас от враг наших»,[322] – со слезами вопиюще. И великому Предотечи[323] о заступлении молящеся, великим воеводам небесных сил и всем архангелом и ангелом о помощи плачющеся; верховныя и вся апостолы моляще, вся святыя в помощь призывающе, теплаго заступника Николу[324] часто моляще и преподобных отец и мирских молитвенников Зосима и Саватия[325] умоляюще и вся российский чюдотворцы слезне о заступлении призывающе.

Сице молитвою ополчающеся, сице страждущаго ограждающе, сице со обидящими борющеся. Что же по сих последствующее деяшеся? Протяжеся время сия борбы во дволетие и вящьше, и началнейший обидитель о благочестии страждущаго смертною косою пожинашеся.[326] Иже рняшеся⁴¹⁸ умертвити неповиннаго – сам мертв, бездушен лежаше; иже узами вязаше за праотеческое благочестие – сам смертными юзами связан, не дышаше; иже в мрачном юзилищи затворяше – сам в мрачном и темном гробе заключашеся; иже блохам, клопам и вшам и прочему юзилищному страданию предаяше невиннаго – сам смрадному гробному тлению и телоядцем червем предан бывааше; иже яростно гремяше: «Не попущю, – глаголя, – спущену быти, не стерплю, аще не погублю, не понесу, аще не сожгу», – се сам внезаапу к Божию нелицеприятному суду взят бяше. А со страждущим за благочестие за вашими молитвами Бог беяше и его соблюдаше; аще и во юзилищи, но богохраним пребываше.

Что же творят ученицы умершаго пастыря, что деют, иже домом и приказом его владеющии? Еда о смерти его умилишася? – Но никакоже. Еда о души пастыря своего в том попекошася, да, свободивши обиденнаго от него безвинно, отраду души его учинят? – Но зелнейше гнев на гнев и клеветы на клеветы налагающе и нимало свободитися безвинному попущающе[327].

И тии убо злобу на злобу сшивающе – вы же молитвы к молитвам прилагающе. И тии убо, надеющеся могутствам⁴¹⁹ и коварствам своим, никогдаже от рук их свободитися страждущему гордящеся – вы же, уповающе на Господа, молящеся ему, времене избавления бесте ожидающе. Что и мы, страстнии, с вашими и за вашими молитвами умилно и жалостно четверолетное се время от Бога избавления чающе, когда, когда избавитель речет: «Иже во юзах, изыдите, и иже во тме, открыйтеся»;[328] когда четверолетному юзнику, яко Лазарю четверодневному, возгласит: «Лазаре, гряди вон».[329]

И се ныне, аще и от народнаго слышания, но понеже не едини глаголют, мним не ложь быти: ваших боголюбных молитв действо произыде, ваша моления в збытие произыдоша⁴²⁰. В нощь, в нюже вы Рожество Пречистыя Богородицы славословисте⁴²¹, Пречистая тогда свобождение заключевному⁴²² произведе.[330] Когда вы возглашаете: «Дохнуша ветри, спасения провозвестницы»,[331] – тогда спасение заключевному от юзилища, не вем како, устройся. Внегда вы «Сий день Господень, веселитеся, людие»[332] воспеваете, тогда от плачевнаго лавиринфа на радостную свободу юзилищник, неведомо како, заступлением Пречистыя проистече. Егда вы часто поясте⁴²³ «Адам же и Евва от тли смертныя свободистася, Пречистая, рожеством твоим»,[333] тогда защищением Пречистыя страждующий от тлемрачнаго юзилища свобождается. И аще не вемы, где обретается,[334] но обаче на заступление Пречистыя Богоматери надежны⁴²⁴: яже бо возмогла избавити, тая силна сохранити и соблюсти.

Темже, о, священное совокупление, приимите благоутешныя плоды слезнаго вашего сеяния. О, теплейшии молитвенники, приимите благодатное воздаяние молитвеннаго вашего прошения. Приимите созревший плод от сеяния ваших молитв – боготворное совершение. Приимите веры вашея плод, воеже выну верно веровати, яко возможна суть вся от Бога. Приимите надежду воскрилену, понеже «надеющийся на Господа, яко гора Сион, не подвижится во веки».[335] Приимите любовь, теплотою восперену, яко любящему Бога вся поспешествуют во благое.[336]

Соберитеся, соберитеся, о, вся церковная чада, возблагодарим Царя славы всемилостиваго Бога, иже избави нища из руки силна, и убога, емуже не бе помощника[337]. Воспоем всепетую Богородицу, всеутешителное Христианом прибежище, «яко избавльшеся от злых, благодарственная восписуем ти, раби твои, Богородице».[338] Прославим заступника великаго Предотечю, возвеличим архангелы и ангелы, теплыя наши предстатели. Благодарим апостолы, наши молитвенники. Вся святыя прославим, яко «святым, иже суть на земли его, удивил Господь вся хотения своя в них».[339] Теплаго молитвенника Николу воспоем, яко тепле молящася о нас; великая чюдотворца и милосердая наша заступника Зосиму и Саватия песньми почтем, яко милосердейшая к Спасу ходатая наша.

Сице благодаряще, сице воспевающа, плод благодатный молитв ваших восприемлите. Песненныя рукояти⁴²⁵ ваши пресладко облагоюхайте, частых молитв благоароматствуйте духовныя благодати, выну и во всех нахождениих⁴²⁶ крепко и непоколебимо прибежище имеюще. Сице и с сицевою надеждею борющих нас видимых и невидимых враг надежно убежим. ⁴²⁷Тако борющыя ны и наветующыя противу остру остну борющеся покажутся⁴²⁷. Тако в вере, любви и надежди Бога выну имеюще, с Богом пребывающе, Бога моляще, о Бозе нашем сотворим силу, емуже слава, емуже славословие, емуже благодарение всегда и ныне и присно и во вся веки. Аминь.

Принесеся в общебрат<ство> ноября 23 през стародубцы[340].

«Ядый хлеб мой возвеличил есть на мя лесть».[341] Псалом 40.

Понеже исконный враг диавол, иже выну гневом дышет на Божия рабы, иже ярость свою злодышет на люди Божия, иже различными прелестьми и греховными коварствы коегождо душу растерзати тщится и от вечныя светлости отлучити подвизается и в жилище огня вечнаго несветимаго ввести покушается; противу же его злоковарств стоящыя и хранением Божиих заповедей на него борющыя различными и многоковарными напастьми оскорбити тщится, еже апостол поминает, глаголя: «Всихотящий благочестно жити о Христе Исусе гоними будут»,[342] сего ради многажды он змий лукавый употребляет себе ко оскорблению рабов Христовых орудие некое, от него прельщенное, сосуда злобна, его ядом скверны, лукавства, лжи напоеннаго, якова Каина противу Явеля,[343] яковы дафаны и авироны противу Моисею и Аарону,[344] яковы лжепророцы противу пророком,[345] якова Июду вооружи на самого Христа.[346]

Якоже и ныне слышно, употреби диявол некоего себе сосуда, клеветника злаго,[347] лжесловца июдоподражателнаго, не Каина токмо братоубийцу, но произволением его злым и лжесоставством⁴²⁸ не на единаго отца и матерь, но на многи соживущия благочестно разорителныя сети простирающаго. И клевещет убо злый на благия, осужденный на свободныя Божия рабы, недостойный земли на достойныя Небеснаго Царствия, яковы ваше преподобие: в ненаселенных насельницы, в богорадных нуждах и в водных пустынных страданиих христорачителне терпящий и, яко агньцы незлобивии, никогоже никогдаже обидяще. На тыя прекроткия овцы зле злый неведомо какия яд клевет изливает, егоже язык, по пророку, «яко бритва изощренна»,[348] егоже «гроб отверст гортань»[349] и яд аспиден под устнами его,[350] иже, бяше слышася, удостойся за житие свое смертнаго обвешения⁴²⁹, при нем же окупати⁴³⁰ некия дни жизни возлукавствова, и клеветами заборонити свое осуждение⁴³¹, и разорением инех часы жизни пробавити⁴³². И ⁴³³не возсме на ответныя⁴³³, но дерзну на смирившияся в горах и пещерах, идеже отец его и мати, идеже сестры и сродники, идеже отцы и братия. Не сожале разорения, не устыдеся напраснаго кровопролития, не разсуждая, каково таковым клеветником злым зловозмездие и зде и в будущем отдаватися возмездевает Господь Бог.

Но (оле моея жалости!) мы и его безумия жалеем, и скорбнаго соскорбим. Того же язык толико понуди клеветами, якоже нам аще и неясно⁴³⁴ известися, уже смиреннейший и прекроткий Д<аниил> караулом обимается, уже воинство нечаянно на смиренныя овцы отпущается. О, каково тамо напужаннии они заяцы постраждут бегство же и смятение, каковыми скорбми возскорбят, каковыми кровавыми слезы восплачют, каковаго страннаго⁴³⁵ слышания в нынешния годы услышавше, и самое камение в жалостный плачь претворяются. Но, о, Владыко Господи, о, Боже человеколюбивый, прибежище скорбящих и спасение неначаемых⁴³⁶, призри с небесе святыя славы твоея на виноград твой, «егоже насади десница твоя»,[351] призри и помози людем твоим смиренным. Помоги молитвенником твоим. Помози вопиющим пред тобою день и нощь. Помози многоскорбным твоим сиротам, ⁴³⁷ты бо рекл еси пророком⁴³⁷: «Призови мя в день печали твоея, и избавлю тя, и прославити мя».[352] Ты, всемилостивый Царю царей, попустил еси целомудренней Сусане оклеветанней быти от блудною старцу⁴³⁸ – ты вскоре и избавил еси.[353] Ты попустил еси Даниилу в ров ввержену быти – ты сохранил и избавил еси его.[354] Ты и ныне бедствуемыя твоя рабы помилуй, ты и Даниила прекроткаго свободи и спаси и помилуй. Ты нам помози, на тебе ся надеем и тобою ся хвалим, твои бо есмы раби, да ся не постыдим.[355]

Вы же, о, преподобное пустынное население, христорачителное совокупление, богосовокупленное сочленение, христорадное терпение, иже выну Богу молящий, вы же и страждущий; иже всегда в преподобных подвизех пребывающий, вы же зельне и наветуемии, верою воскормлении, надеждею возрастити, любовию воспитаннии; иже от иссохшаго терния, злаго клеветника, ныне страждущий, не вем, что рещи. Не распужаннии ли вси по дебрем, не разгнаннии ли по круговинам и пещерам, яко агньцы напужаннии, умиленне друг по друзе блекотающе; яко ластовици, жалостными гласы щебегчюще; яко горлици, со слезами плачевне вопиющей; не ниспадосте ли до конца, не отпаяете ли ся, не восплакасте ли со Иовом: «Увы мне, мати моя, почто мя роди?»[356] Не возглаголали ли с древним Сионом, яко «забы мя Бог».[357] Но востаните, о, боголюбивии, от печали уныния, востаните, услышите, что пророком глаголет Господь: «Аще оставит жена отрождение свое, но Аз не оставлю вы»,[358] – глаголет Господь. И: «ополчится ангел Господень окрест боящихся его и избавит их».[359] Отци и братие, воздвигнитеся во имя Исус Христово, не ослабейте во время скорбей церковных, не дадите плещи супостату во время наветов его. Но подвигнитеся молитвами и вопитием беспрестанным к Богу и Пречистей Богородице и всем святым, и прочими боголюбными добродетельми умилостивляюще премилостиваго Спаса, любовию и утешением святым друг друга утешающе, не покидающе матере страждущей. Не в радости чада, а в печали предатели; не в благоденствии содышущии, а в скорбех чюждесердечнии, но яко чада церковная возлюбленная, всеусердно подвизающеся и Бога моляще, и великому государю биюще челом, и господоначалным плачющеся, и в послушании не ослабевающе, помняще писаннаго: «Подвигу наставшу, не подобает ослабевати».[360] И Божие наказание, яко дети отца любезна, любезно приимем; не в ропот, но во исправление, помысливше кождо, аще каковы имеем неисправления, исправимся, всяку греховную страсть отженем⁴³⁹, всяк грех покаянием очистим: аще зависть, аще гордость, аще своевольство, самолюбие, леность, непокорение, роптание, похотолюбие, невоздержание и прочия мерския грехи, Богу досадныя, сия от души отринувше, покаянием очистимся. И любовию и усердием всемилостивому Спасу возопием, молящеся, кротостию и послушанием угождающе ему: «На кого бо, – рече, – призрю, но на кроткаго и молчаливаго»,[361] в Божиих заповедех Бога почитающе, о помощи просяще всемилостивую его благость.

И Он, всемогущий Владыка, силен сеть сокрушити и лукавнующаго клеветника потребити⁴⁴⁰, по пророческому гласу, яко «ликовнующии потребятся, терпящий же Господа тии наследят землю»[362] о Христе Исусе Господе нашем, емуже слава со Отцем и со Святым Духом ныне и во вся веки. Аминь.

⁴⁴¹Безместно видится[363] яже вводят новии мудрецы, утвержающе неизвестными доводы новопредания своя и басни, неже истинну, слагающе на древния отцы и на безчестие прародителныя персти многая глаголати ухищряюще⁴⁴¹. Глаголют, яко вново неправыя церковныя догматы древнии отцы в Церковь в России введоша (а наипаче явственныя), еже на просфирах печать[364] трисоставнаго креста имети, еже аллилуиа сугубую пети на псалмоглаголаниих, аки бы богомерско и удвоение Троицы, еже двома перстома знаменатися, сие аки бы со армейскою и несторианскою ересию,[365] и Пречистаго Владыку Исусомь без "иты’[366] аки неправо певаху, и прочая ина, яже от них глаголемая. ⁴⁴²Еже кто отцелюбный стерпит без жалостнаго сердца, кто понесет без скорбныя утробы, кто без плачевнаго ока? А понеже глаголы их никоея при истине крепости имут, но готова извержена быти от любоистинствующих мысли, отсюду удобно явится⁴⁴².

⁴⁴³Вново, глаголют, новины в Церковь древле прияша,[367] и прияша таковыя богомерския ереси и многия неправыя чины, и держаша вси россияне единогласно и в книгах старопечатных имеша тыя⁴⁴³. Да покажют же тако глаголющий явственно, в кое время тыя ереси и новыя чины росияне прияша, при коем князе или царе и архиереох, и кто от еретик таковыя предаде и научи, и кто о сем от святых явственно писанием показует. ⁴⁴⁴А понеже, много потящеся, показати не имеют, но от сердца своего самосмышленныя басни слагающе, не утвержающе слово свое, но паче теми лжею быти показующе⁴⁴⁴.

⁴⁴⁵Ибо нововнесенныя от еретиков ереси явственно Церковь и времена, в ня же новоучинишася, и лица, кто умысли, возвещает⁴⁴⁵. А наипаче бы сия, яже в едином языце российском под едиными самодержцы и архиереи пребывающе и греческим архиереом часто Россию посещающим, якоже являют истории российстии, и о явственных тако церковных всенародне ведомых догматех и чинех. Аще бы ереси внове от кого когда внесены Быша, како неописаны и неявлены Быша? – ⁴⁴⁶Ложь сия, яве ложь на отец солганая, яже древле попираемая, ныне яве всенародствует⁴⁴⁶.

⁴⁴⁷Но аще по-их ересь в Россию внесеся,[368] а времене и лица не является, и хотят, да попустится им тая речь, аки бы без описания ересь тайно привниде, аще и не мощно тако быти. Но како аще таким ересем и новым чином святопротивным, от кого нововводимым в церковь, и како архиереи и иереи вново служити в церквах, яко вместе с простыми народы знаменоватися (по-их, по-еретически), преучиваны вси Быша были?⁴⁴⁷ Како не явишася тому спорницы⁴⁴⁸ и обличители тако от духовнаго, яко от мирскаго чина? Како умолчаша самодержцы? Како без описания уступиша синклит? Како архиереи и иереи не возобличиша? Како по монастырем святоживущии не супротивишася? Како всероссийское множество тако молча в ересь вступи? Како святии вси российстии, по времени друг по друзе бывший, до царя Иоанна Васильевича[369] и послежде, о том не воспроповедаша? Какоже и гречестии архиереи, часто в Россию приезжающе, без научения⁴⁴⁹ о таких ересех россиян оставити, а наипаче о явных вещех, яже тако на российском, яко на греческом языце равнопоказателне пребывают: еже есть о сложении перст на знамение честнаго креста, о печати на просфирах, о имени Исусове, о аллилуии, о церковном околохождении и о прочих явственно на обою языку⁴⁵⁰ показатися могущих. Како, аще Быша противны Богу и Церкви и ереси нововводимы были, тако просто умолчаша? Како исправления о том не учиниша? Не верна суть сия, не верна и всякаго вероятельства⁴⁵¹ не суть достойна.

՚Но негли и недостоверное их слово,[370] еще усилствуют вероятелно быти⁴⁵², яко пастыри российстии – аки вси пиянии, – молчаще прельстишася⁴⁵³, россияне – аки бы во сне нощию – ереси прияша и забыша, в кое время и от кого прияша; гречестии архиереи – аки бы слепи и без очес – в Россию прихождаху, с пастырьми российскими вместе служаще и их рукополагающе, а ересей не увидеша.

՚Но како мощно в толиком множестве российском – аще бы вново впадшым в ереси и в новопротивныя чины – не остатися некиим, тако духовным, яко мирским, в первых православных обычаех и в старом греческом предании, и тое – аще бо было старое согласие и книги – не удержати в тайне во градех или в селех или в пустынях и не довести содержанием даже до Никона⁴⁵⁴. [371] Якоже от ариан[372] и от иконоборцов[373] и при таких их насилных гонениях оставашася мнози православнохранителие, тако во отступлении римлян Антоний,[374] иже в Новград на камени чюдесне принесен, с прочими иноки отлучившеся гонения, крышася в пустыни; тако Восточная церковь от них отлучися,[375] якоже и белорусцы отлучишася от отступников своих архиереов,[376] еже и мы ныне, блюдущеся новопредания Никонова, храняще древнее святых согласие, явствуем. "Како тако могла бы ересь правоверие покрыти без ведения?⁴⁵⁵ Како без обличителей, како без осталцев благочестия? Како врата адова тако Церкви одолеша[377] и весма бес правомудрствующих учиниша? Невозможна сия, невозможна тако быти, и ложь сия место не может имети при истине.

⁴⁵⁶Но еще ли и чрез сия возглаголют[378] и хотят и сему, чему невозможно быти⁴⁵⁶, яко тако ересь молчащи вниде, тако всех без остатка без обличения повреди, тако врата адова российскую Церковь теми ересьми без противящихся одолеша и греческое православие, яже сначала приемше, тое послежде не возимеша. ⁴⁵⁷Да рекут иже тако дерзающий, аще от писания времене тому и лиц определенных уже показати не могут, аще от явствования летописцев не взыщут, аще от последования не покажут, без которых сие слово стати не может. Но поне своемнением в кое время возмнят новомненным их ересем во всероссийское множество внити, ибо последователне друг другу архиереи и святии, от Бога прославленнии, в России бяху.⁴⁵⁷

До Петра[379] ли чюдотворца великаго, московскаго митрополита, время тому отдают, но кто беснуяйся дерзнет рещи в ересех быти Петра, Алексея,[380] Иону[381] и Филиппа,[382] великих светил всероссиийских, московских митрополитов, и Гурия[383] и Варсонофия[384] Казанских, со всею их боголюбивою всероссийскою паствою, со многими великопрославленными святыми, меж теми времены бывшими – Сергием[385] и Никоном[386] Радонежскими, Стефаном,[387] пермским просветителем, Кирилома Белозерским[388] и Новозерским,[389] Зосимою[390] и Саватием Соловецкима[391] и Александром Свирским[392] и прочими многочислеными чюдотворцы, яко пресветлыми звезды украшающими оного времене всероссийскую Церковь.

⁴⁵⁸Аще ли же до тех святых помышляти неудобно, то когда право возмнят быти⁴⁵⁸: по Петре ли? – но вскоре великое светило Алексий возсия; по Алексие ли? – но абие Иона преславный явися. По Ионе ли? – но пресветлейший Филипп и Гурий и Варсанофий Казанская, пречюднии всероссийстии просветителие и от Бога прославленнии чюдотворци Быша. По Филиппе ли и Гурии и Варсонофии? – но ясне сие лжемнение обличает священный Собор всероссийских священных боголюбивых архиереов,[393] при царе Иоанне Васильевиче бывший, прежде архиерейства сих трех светил, на котором согласно старопечатным книгам знаменоватися повелено и "а небрегущих о сем⁴⁵⁹ написано: аще кто не знаменуется двема персты[394], яко Христос, да будет проклят; и аллилуиа тройственная с четвертоприглашением[395] названа латинская ересь. Тако в сем соборном согласии рукоположение прияша святии Филипп и Гурий и Варсонофий, тако архиерействоваша и паству свою добре к Богу управиша, и от Бога чюдно прославлени Быша.

Тако тое старое согласие и после России архиереи и до Никона соблюдоша. Тако и вселенстии Иеремий Цареградский и Феофан Иерусалимский патриарси,[396] бывший в России, российскому благочестию согласовашася, якоже о них повесть являет. Тако в старопечатных московских книгах, якоже и в белорусских, двема перстома знаменоватися велено. Сице и на святых древних всюду иконах назнаменовано⁴⁶⁰. ⁴⁶¹Откуду тако твердо, тако явственно, тако силно не дает ни времене, ни места своемнительствовати хотящим, аки бы по их новым ересем всенародне россияном новонаучитися и новоприяти после греческаго научения, веема сие лжемнение обличает, весма отмещет, весма изничтожает и весма, еже имеша патриарси московстии по старопечатным книгам согласие, старогреческое предание имеша, являет⁴⁶¹.

⁴⁶²Но понеже в сих слово их стати не может и показати свидетельств, доводящих до их разума, не имут, остается им едино свое премудрое разсмотрение показати, яко Никон, глаголют, добре разсмотри, обрете ереси и противенства в древнем согласии, сия изничтожи и подобающее исправление учини. Но кое подобающее дело, еже дерзати святых всех общее согласие преправляти?⁴⁶² Кая правда над всем древним православием возноситися? Каковая премудрость всем древним православным и святым архиереом воспротивится? Что за великое чюдо, что за страшное диво? Кто отцелюбный сын стерпит таковая? Кто хотяй святых части в Царствии Небесном сподобитися, святых согласия отстати восхощет? Кто, веруя, яко «дивен Бог во святых своих»,[397] безбожныя ереси во всесогласии святых помыслит? Кто (молюся) благоразумный отлучит себе от толь пресветлаго полка святых отец и вверит свое спасение Никоновой дерзости? Кто ли православно в Писании воспитанный попустит ему или прочим ясныя церковныя догматы, всесогласно у святых бывшия и до нас последованием дошедшия, ⁴⁶³стязовати и о них мечтати и пременяти, а наипаче толь крепкими святых воспрещении, иже прибавляющыя или убавляющыя от церковнаго предания клятве предаша.⁴⁶³

Темже веема чюжде истинны еже дерзати наипаче ясная церковная предания и у святых бывшая пременяти. Но дерзнет ли кто никонолюбный, а не отцепоследователный чрез⁴⁶⁴ всяко церковное согласие, чрез церковныя клятвы, чрез отеческая запрещения попустити⁴⁶⁵ Никону, аки всех святых превосшедшему, всех святейшему, всех премудрейшему, всем бы паче ползу изобрести могущему, древлецерковная предания преправляти.

Но размотри (молюся), всяк благоразумный, кую пользу новопременами учини Никон. Сие ли, еже крест Христов трисоставный изничтожи от просфиромисания? Которую ересь во оной печати обрете? Кую противность возглаголют в трисоставнем Христове кресте? Разве понеже он диаволу противный и бесом страшный, церковное просвещение и всем христианом оружие непобедимое? Паки еже персты слагати по-древнему на знаменование честнаго креста, в нихже добре и отцепреданне оба превеликая таинства – Троицы глаголю, и смотрения – исповедоваются; сие истиное богословие он армейскою и несторианскою ересию оклевета и от знаменования изничтожи. Кое зло, разсуди (молюся), еже Церкви исповедовати о богословии в трех составех едино Божество, о вочеловечении же Спасове – два естества и един состав? Которая истинная богословия вся ереси тако о богословии, яко о смотрении Спасове неправомудрствующих обличает. Сице армены и безглавныя,[398] иже едино естество в вочеловечыпемся Спасе мудрствуют, изничтожает; несторианы, иже во дву Спасову естеству два состава зломудрствоваху, отражает; не хотящих по свойству антихристову[399] (якоже рече апостол) исповедовати Исуса Христа в плоть пришедша, сих убивает. ⁴⁶⁶Како сия толь истинная богословия сице дерзостне ересию зломудрствующих оклеветовати?⁴⁶⁶

О, дерзости свирепыя, о, хулы злочестивыя! О, крайнаго в тацем⁴⁶⁷ зломудровании безумия! Паки двойственное аллилуиа с приглашением, ересию оклеветавше, отринуша, которое староцерковное славословие, от греков древних засвидетельствованное, от святаго Евфросина Псковскаго[400] в старых грецех и России обысканное⁴⁶⁸, явлением Пресвятыя Богоматере утверженное и соборне на вышепомянутом при царе Иоанне Васильевиче соборе извещеное, а всеми сими кое тройственое аллилуиа с четвертоприглашением пение отринутое и злою ересию обяснене показаное. Кая полза сие восприяти, богоненавистное вместо боголюбнаго, ересоточителное вместо благочестиваго, церквоосужденое вместо православнаго?

⁴⁶⁹Таже и прочия чины и уставы[401] древлецерковныя многочисленыя смяте и испремени и всю Россию возволнова, вся души поколеба, междоусобное многое кровопролитие, яко бурю зелну, возвея и ненависть презелну друг на друга россияном вместо глубокаго мира воздела. Еже явне дело его несть полза, несть, но душевная пагуба и чаемое гнева Божия восприятие. Темже, иже на древних отец новоприятие ересей глаголющий, показати же места во истинных доводех нигде не имеющии, ясно показуются, яко ложь суть глаголющий. Православие же церковное, еже древле у греков от соборов, от апостол и от Христа приятое, от них же у наших древних россиан возприятое, и другоприемно согласие оно соблюдено даже до Никона непрерваное, яве от истиннаго слова показуется надежно истинное⁴⁶⁹; в нем же да сохранит нас (помолимся) Христос Бог даже до смерти, да, согласно со святыми правоверующе, части их в вечной Царствии да сподобимся, по обетованию псаломскому: вселити Господу единомысленныя в дом,[402] ему же слава ныне и во вся веки. Аминь.

«Праведный от веры жив будет».[403] Аввакум, глава 2.

⁴⁷⁰Многих и неизреченных человеком благ добродетели виновны бывают, ибо тех ради стяжавший я безсмертною славою ублажаются. Каяждо бо добродетель истинно лобзавшаго ю неисповедимою красотою венчавает и паче маргаритовь белоблистающих украшавает.⁴⁷⁰ Терпением бо прославляет<ся> Иов многострадалный.[404] Страннолюбием же сияет Авраам,[405] недростяжатель⁴⁷¹ райский[406]. Всюду превопиет⁴⁷² целомудрие Иосифово[407] и Сусаннино.[408] Кротостию светится Давыд,[409] царственный псалмопевец. Ревностию горяй, огненый колесничник Илия[410] удивляем⁴⁷³. Даниил же муж желаний духовных[411] проповедается. Тако в Ветхом, яко и в Новом завете различными добродетелей маргариты блистает Церковь.[412] Но аще и многи звезды блистают, едино же небо сих стяжавает.[413] ⁴⁷⁴Аще высокоустроенный дом красновидно усмехается, но основания крепостию весь утвержается.⁴⁷⁴ Тако Церковь аще многими светоблистает⁴⁷⁵ добродетельми,[414] но единою веры православныя красотою светлеется.[415] Многа строения духовная, но едино основание – вера православнокафолическая. Ибо Павел, сосуд избранный, вопиет: «Кроме же веры невозможно есть угодити Богу».[416] О той пророк велегласно взывает: «Праведный от веры жив будет».[417]

С сим пророческим гласом желаю аз, грубый, за молитв ваших желаю словодатне прийти к вашему церковному сословию, не яко доволен⁴⁷⁶, но желание много имый украсити боголюбное и братолюбное ваше совокупление не сребром, не златом, не белостию⁴⁷⁷ маргаритов, не блещанием камений драгих, не инеми от тленных, имиже мир любокрасится⁴⁷⁸, но теми, киими вы услаждаетеся: сими, о нихже веселитеся, которыми просвещени и просвещаетеся, еже есть животною верою, еяже ради странствуете и различно страждете, еюже животворитеся, о нейже и глаголати, и слышати усердствовати присно долженствуем. «Есть же вера, – по апостолу Павлу, – уповаемым извещение, вещем обличение невидимым»:[418] Бога невидимаго,[419] поскольку мощно, человеческое познавание, Творца твари[420] от твари ведение, извещение Божия к человеком повеления. Вера – Божиих тако на земли древних дел,[421] яко на небеси невидимых светлостей несуменное показание. Вера – вочеловечения Сына Божия известьнейшее явление.[422] Вера – апостольскаго учения нелестное послушание,[423] отеческих преданий невлаемое⁴⁷⁹ хранение, православнокафолическия Церкви неколеблемое основание. Вера – по согласию со святыми благодатей Божиих тако на небеси, яко на земли неошибное⁴⁸⁰ получение.[424]

О, дивность православныя веры! О, богоданныя нам светлости ея! Едина к единому Богу, единем православия светомь, но различными лучами блистает вера. ՚Яже не видим, известнейше еже видим – веруем.⁴⁸¹ Не видим Бога – веруем во единаго Бога. Не видим, ни видети можем трех ипостасей в едином божестве – веруем во единосущественную трисоставную Троицу. Не видехом видимую и невидимую тварь сотворшаго Бога – веруем, яко вся Тем Быша и без Него ничтоже бысть, еже бысть.[425] Не видехом вочеловечьшася Божия Слова, на земли плотию поживша, крестившася,[426] распята,[427] воскресша, учеником заповедавша учити Его заповеди и крестити, пред ними же вознесшася плотию на небо, но веруем несуменно всему яже о нас человеколюбному смотрению⁴⁸² Его. Не видехом тако в Древнем, яко в Новом Завете спасителныя заповеди, Бога заповедающа нам творити, – веруем и не сумневаемся. Веруем во святую соборную апостольскую Церковь[428] и не истязуем⁴⁸³. Веруем яже Христом и Церковию Его тайны Новаго Завета, преданныя во спасение нам, и с любовию приемлем. ⁴⁸⁴През яже видим, безмерно яже не видим, – веруем⁴⁸⁴. В воде православном крещении веруем, еже не видим, Духа Святаго сшествие,[429] имже первороднаго и прочих грехов очищение, во Христа облечение, и прочая православным крещением нам подаемая. В хлебе и вине в православнодействуемом причащении[430] веруем, еже не видим, самое тело и самую кровь Христову быти. ⁴⁸⁵И чрез прочая видимая тайнодействия церковная невидимыя благодати приятие веруем⁴⁸⁵. Тако крест Христов тричастный[431] видим мал видением – веруем и исповедаем распятаго ради на нем Христа, небес ширши⁴⁸⁶ быти силою Его. По преданию церковному, веруем тайнодействам[432] совершатися и прочим, на нихже знаменуется, освящатися, и всему добрыя веры таинству в знаменовании его исповедоватися веруем таинственне.

Темже веры имя тое есть: еже, по апостолу, извещение уповаемым, невидимым обличение.[433] ⁴⁸⁷Егоже чювствами телесными не познаваем, но извещением умным уповаем. егоже чювственныма очима не зрим, но душевным оком светло разумеваем⁴⁸⁷. егоже пред собою не чювствуем, не осязаем – оно чрез умное постижение[434] надежно лобзаем, любовию объемлем, сердечно услаждаемся. ⁴⁸⁸Но аще тако великая, тако неудержимая вера, откуду правая в нас вливается, откуду невидимая в невидимей души известно всаждается⁴⁸⁸? Павел, учитель языков: «Вера, – рече, – от слуха, слух же глаголом Божиим».[435] А понеже глагол Божий в Церкви Его, аще от апостол, аще от святых отец реченный, – Духом Святым реченный,[436] темже от Бога есть.[437] Убо вера, от Бога в нас известная, глаголом Его творится, ибо и в создании словесной души даде Бог силу веры,[438] воеже мощи⁴⁸⁹ веровати в Него, невидимаго сущаго и непостизаемаго, верою единою познаваемаго; глаголом же Его и ныне назидает, и просвещает, и <и>звестнейшю в нас творит.

Темже не в теле, ни в телесных чювствах, ни в телесных доброделаниих веры доброта, но в самой словесной души раждается.[439] ⁴⁹⁰Аще и телесными детельми помогаема и показуема, или аще не такова объявляема, но обаче духовна добродетель сия, невидима сущи, в невидимей души состоится.[440] С прочими же союзство добродетелми таково имать, яко без нея каяждо добродетель богоугодна быти не может⁴⁹⁰; с нею надежда и любовь красуется[441], о ней воздержание, смирение, терпение утвержаются; пост, целомудрие, милосердие при той светлеется. Ибо тако душевнии, яко телеснии добродетели, с верою совокуплени, добродетели богоугодни сице бывают.[442] ⁴⁹¹Не токмо же в сопряжении прочих добродетелей⁴⁹¹, но и «мати всех благих».[443] По божественному Златоусту, вера есть: тая, егда к Богу будет теплая присная, раждает любовь, творит надежду, насаждает молитву,[444] милосердие; терпение, пост соделовает; созиждает целомудрие; уражает⁴⁹² воздержание и смирение. Тая приемлет блудницу и творит вселенней покаяния плод.[445] Приемлет гонителя и творит вселенней благовестника.[446] Приемлет чадолюбиваго отца и творит боголюбивейша веры делателя, презирающа естества пределы, воююща на свое чадо.[447] Приемлет грешники и творит праведники.[448] Приемлет чревообъястники⁴⁹³, пияницы и творит воздержники, постники и водопийцы.[449] Приемлет своеволнаго, лениваго и творит послушнаго тщателя⁴⁹⁴ и ревнителя трудолюбнаго: «По елику бо вера цветет в сердцы,.. по толику и тело спешит на службу»,[450] – рече Лествичный небесошественник. Темже вера, ⁴⁹⁵егда будет напаяема словом Божиим⁴⁹⁵, егда к Богу возженная теплая, егда несуменная⁴⁹⁶, егда со святыми согласная, тогда последствовати⁴⁹⁷ ей будут вся добродетели,[451] тогда уступают страсти, бегают грехи, фараон-томитель в мори безстрастия утопает, злость безстудная египтян умолчавает;[452] Израиль, ум зряй⁴⁹⁸ Бога, верою от всех злых египетских свобождается, поет сладкия победныя Богу песни, ударяя в тимпан безстрастия; «иго благо и бремя легко Владычнее»[453] – и глаголет, и помышляет.

⁴⁹⁹Но тако вседейственная вера недейственна от несоюзных тоя бывает. Егда бо излишная многоиспытная стязания и словопрения наведеши души, тогда она скутовается.[454] Егда несогласно со святыми мудрование нанесеши, она в души нелепа стается. Егда ереси и противства привнесеши, тая тогда неправая и неправославная у тебе соделовается. Егда сомнение помысла привнесеши, тая тогда малая творится⁴⁹⁹.[455] Егда грехи, страсти, похоти лукавыя родиши, тогда тую студеную и мертвую устрояеши.[456] ⁵⁰⁰Якоже, облаком мрачным аер застановившим, земля солнечных сладких луч лишается, тако, несоюзная вере душа приемши, лишается окаянная благодатных веры действ. Но иже смеющии противным тако мудрованием, яко делотворением святей вере досаждати, пагубе вечней злочастнии предаваются⁵⁰⁰. Ибо тако еретики,[457] яко расколники и раздорники, противно мудрствующе святей Церкви и несогласно со святыми учаще и творяще, клятве и смерти вечней повинных себе учиниша и, мнящеся веровати⁵⁰¹, святей вере досадники учинишася.[458] Аще бо «праведный, – по пророку, – от веры жив будет»,[459] они не сподобишася вечнаго с Церковию живота, яве, яко противны вере святей, чрез какое свое неправомудрствование сташася. Понеже «еретик есть и еретическим законом подлежит, аще и мало что уклоняется от православныя веры».[460] У святых сице написано, и Златоустый в беседах на реченное Павлом анафематисание⁵⁰² толкует, глаголя: «И не рече: аще противная возвестят или превратят все, но: аще и мало нечто благовествуют, паче еже благовестихом; аще и худое что подвигнут, анафема да будут».[461]

⁵⁰³Ельма убо сице силна вера противящияся и недостойне ей действующия осуждавати, убо и добре говейно стяжавающия ю могуща прославляти⁵⁰³,[462] и равно тако в богатших, яко и в нищайших действующая;[463] равно лучи благодатныя яко в багрянице на престоле седящему, сице на гноищи в рубища одеянному изливающа, и равно никому кроме Бога не подвластна,[464] но над всеми царствующа и владеюща: тако над простейшими невежды, якоже над наивышшими архиереи. Якоже вышний Бог лица к суду не приемлет,[465] сице она лицу славных не стыдится и ⁵⁰⁴последних говейно об ней прилежащих не обещещевает⁵⁰⁴. Ибо во архиереох и иереох пребывает, и походит в них, и украшает и украшается с ними, но егда и тии достойная той согласно со святыми и мудрствуют, и учат.[466] Егда же ли и тии презрят тоя величество,[467] чрез достоинство ея противно святым новоучити и новодействовати начнут, тогда она, уничиживши⁵⁰⁵ их, благодати лучи своя спрятовши, общения их удаляется.[468] Тако бо Павел велегласно вопиет: «Аще мы или аггел с небесе благовестит вам, паче еже благовестихом, анафема да есть».[469]

Аще же и нерукополагаемии[470] достойно в вере и с верою жительствуют, тогда она в них украшается и их украшает. Сице Мелетий патриарх Александрийский в послании до белорусцев, отступивших от архиереов, повредившихся в вере, похвално глаголет, называя их православия заступниками, овчатами⁵⁰⁶ христоименитыми, светом, тмою не поврежденным; ангелми земными, столпами недвижимыми. Удивляютчися их наипаче, еже восприяша пастырскую ревность, со злыми пастырьми не отпадоша, но пребыша крепце во отцепреданном благочестии.[471] ⁵⁰⁷Тако достойне ю держащия человеки просветлевает, якоже и место, в честь Богу и ей сотворенная, пресветла творит, иже местом необъемлемая⁵⁰⁷. Храмы прославляет чюдны, церкве достойни, иконами святыми украшены, многи раками телесы святых прославлены, ликами чинами светлоукрашенными сияюще, блистающе ризами златозарными⁵⁰⁸, песнеными сладостьми и ⁵⁰⁸читателною красотою медокаплющею⁵⁰⁹, звонами светлогромными чинно временно⁵¹⁰ шумяще, народами православными, яко звезды пресветлы собираемы,[472] наипаче таинствы священными и самем телом и кровию Христовою, яко солнца втории, пресветло сияюще, великолепотная зрителища небесе подобящаяся,[473] бывают.

Но аще вера, со святыми согласная, в них неповрежденно соблюдается, тогда тако бывает, аще ли же новинами, и ересьми, и раздорми[474] святая вера в них досаждается⁵¹¹ (увы, жалости!), не терпит в таких светлых храмех жити досаждаема, но отлучающися многажды, со страждущими в темницах за Христа и за законы Его страждет, с бегающими богорадне бегает,[475] со странствующими Бога ради странствует, в скровных⁵¹² домех страха ради гонителей скрывается, в ненаселенных местех пустых поселяема бывает. (По объявлению тайнозрителнаго Богослова, ведевша солнцеоблеченную жену, бежащу в пустыню, и змия, гоняща за нею.[476]) Во всех сих с теми, иже достойне тую почитающими, содержится. ⁵¹³Но тако в нужду по случаю, кроме священников, кроме видимых церквей, кроме литоргии⁵¹³,[477] тако с Феклою равноапостольною в страдании и в пустыни,[478] сице с Галахтионом и Епистимиею в мире, и в пустыни, и в страдании,[479] сице и со инеми многшими святыми, в Писании поведаемыми, тако с Павлом Фивейским, от гонения скрывшимся в пустыни, егоже душю виде великий Антоний на небо со многою славою возносиму.[480]

Тако в прообразователном Новому в Ветхом законе выну вера со святыми и в нужных случаех бе: сице со Иосифом во Египте[481] и со Ионою во чреве китове,[482] с Манасиею в воле медяне,[483] с пленеными израильтяны в Вавилоне,[484] кроме жертв, кроме видимых церквей. Тако с Даниилом в рове[485] и с треми отроки в пещи,[486] иже тако с верою к Богу вопиющими: «Яко, Владыко, умалихомся паче всех язык и есмы смирени во всей земли днесь, грех ради наших».[487] И несть во время се князя, ни пророка, ни вожда, ни всесожжения, ни жертвы, ни приношения, ни кадила, ни ⁵¹⁴места пожрети пред Тобою и изобрести милость⁵¹⁴, но душею сокрушенною и духом смиренном да прияти будем. И ниже: яко несть студа⁵¹⁵ уповающим на Тя.[488] Тем в ресноту пророк глаголет: «Праведный от веры жив будет».[489]

Аще же кроме Церкви (глаголет Писание) несть спасения,[490] Златоуст же глаголет: «Церковь есть не стены и покров, но вера и житие»,[491] – убо с верою правою и добрым житием во всяко время и место всякому есть спасение. Архиереи жидовстии, по распятии Христове во церкви Святая святых кроме веры собирающеся, не услышаеми бяху от Бога.[492] Петру, от них связану в темнице, молитва от Церкви, кроме видимей Церкви, но в дому заключенном, прилежно бываемая, разрешенна учини Петра, осужденных показа архиереов.[493]

В Риме старом, егда папы развращение в вере дерзнуша,[494] от гонения их Антоний со мнихи крыяхуся в пустыни. Но егда гонение к гонению приложивше, тыя разгнаша, Антоний един тогда бывает каменноселенный житель,[495] безхрамный⁵¹⁶ обитатель, гонимый веры святыя исповедник, без гласа гласа светлыпий папежскаго развращения обличитель. И папа убо в каменнотворных и златосияющих храмех с высокими архиерейства их чинми в церквах их, идеже безчисленная украшения, но паче всех красот священнейшая тела преславную вселенней светилу Петра и Павла опочивающа,[496] тамо со звоны и происхожденми⁵¹⁷ высокими и всенародными собрании службы и молбы творяще, Антоний же един к единому на едином камене правоверною верою службу молитвенную приношаше; разстояние и ⁵¹⁷ борба бяше видимое дело⁵¹⁸. Боряшеся един со многими, простый со архиерейми, невежда противо хитроплетенных языков, немощный и бегун противо тмы народов. Но что творит «Живый на высоких и на смиренныя призираяй»[497]! Обличает неправоверие премногих со архиерейми, прославляет с правою верою единаго страдалца: повелевает возшумети морю чрез естество⁵¹⁹, да паче гласа шум его обличитель латаном будет. Помовает⁵²⁰ волнам восклокотати зелне, да зелны⁵²¹ помощники правоверному борцу будут. ⁵²²Претворяет каменя тяжкое существо легчайши корабля, послушнее словесных нечювственное показуя. Подлатает хребет море, подъемлет каменя, яко корабля. Вскачет на нь камень, яко пернатый. Подъемлет на себе человека паче человека. Воскипевающе скоростию волны скачюще, друга до другой камень реюще⁵²². Чюдно видение: ангел некий легчайш орла, каменноплаватель бывает: преносят моря, реки Нева, Волхов с радостию воспящают⁵²³ свои струи, отдают Новуграду преестественна благовестника, обличителя латинскаго кривоверства, уяснителя и показателя росийскаго правоверия.

Тако вера славящих ю прославляет, тако уничижающих тую безчестных творит. Тако не к чинам высоким, ни к местам пресветлым, но к произволению благому⁵²⁴ привязана,[498] и к правым законом церковным припряжена⁵²⁵, и в души словесной нетрудно вмещаема,[499] по речению сосуда избранного: «Вы есте церкви Бога жива, якоже рече Бог: яко вселюся в них и похожу».[500] Сего ради вера при прочих добродетелех дивна и преславна. Аще и болше тоя и прочих любовь, по Павлу апостолу, благовествуется ради неотстатия тоя и в будущем веце,[501] но вера мати всем добродетелем и начало прочим есть.[502]

И толико подобает быти в нас велика,[503] яко да будет согласна со апостолы, не отторжена от пророков, единомудрственна со святыми соборы, единопроповедателна со духи всеми праведными. ⁵²⁶И толико опасно хранима, яко несообщателна противоверным, отлучителна от раздорных и тоя непокорных, отгребателна же от мерзских дел беззаконных⁵²⁶.[504] Понеже вера без добрых дел мертва есть.[505] Не тая соборная, иже во всех святых присно жива пребывающая, но, отлучившися от оноя ради скверных вожделении, тоя души вера мертва бывает.

Темже и толико нужная нам правая вера, яко без нея нам спастися, по Святому Писанию, невозможно.[506] Якоже солнце, вознесшися на высоту в весненое время, всю вселенную ⁵²⁷обзирает зрачнейше⁵²⁷. зиму прогоняет, мразовы изничтожает, землю беззрачну и безплодну, яко жену стару, и прекорчену снежными грудами паки младообразну и благоплодну показует, цветы изукрашену, плодами обогащену; отдаст воды удолиям⁵²⁸, быстрины рекам, корабли морю, плаватели водам, земледелатели нивам, тако вера, аще где в высоту небесную взыдет и на небо вознесется[507] и, яко второе равноденствие, равносогласие со святыми покажет, тогда зловерия зимное безчиние проженется⁵²⁹, мразове ересей изничтожаются, снеги грехов и беззаконий от луч светлости тоя истают, души правоверныя красотою боговидения возцветут и плодами добродетелей обогащени покажутся.[508]

Тем понеже праведный от веры жив будет,[509] а вера без дел мертва есть,[510] – нужда правоверному в правоверии правоверная дела делати, да от правоверия правовернодетелей праведный покажется и от правды живаго правоверия жив будет безсмертно. ⁵³⁰Аще ли же понеже вера добрая, доброе же завидимо, завидимое же ратуется, ратуемое же с терпением хранится. Не того ради верному, понеже терпети, веры добрыя отставати: аще не хощет безверный или зловерный быти⁵³⁰,[511] ибо Спас во Евангелии, на сие нас, правоверных, избирая, рече: «Нужно Царствие Небесное, и нужницы восхищают е».[512] Аще бо погании язы́цы⁵³¹ о безбожных и мерзских своих верах тако стоят, тако от законов своих отстати не хотят, тако вне красоты⁵³² безбожия валятися нудятся, яко ини ратовати на християн со многими нуждми и ратными скорбьми и смертьми понуждаваются, якоже моамефяне, угождающе сквернопреданию Моамефа, творят:[513] инии же, яко зверие дивии⁵³³ посреде зверей нужно⁵³⁴ живуще, безсловесствуют, якоже самоядцы, вотяки, вогуличи и прочий степнии татарове,[514] бедственную жизнь живут, и живут, да вечно, окаяннии, в преисподней тмы бедно бедствуют, тако и от еретик прельщении християне, в новопреданных их развратах толико укрепляются, яко мняти проповедают кождо их свое согласие паче всех законов на земли добрейше быти. То кольми паче нам, християном правоверным, не за скверныя языческия законы, не за еретическая новодерзостная предания, но за чистую веру православную, веру евангельскую, веру апостольскую, соборную, отеческую; веру, святыми содержиму и до нас обычаем и писанием дошедшую;[515] веру, держащих ю соблюдателно спасающую и живота вечнаго сподобляющую, должно мужественно стояти, и стояти не телеса чуждая низлагати, но самем в терпении и нуждах богорадных себе не ослабевати, вражия бесовския советы попирати,[516] страстная похотения побеждати, грехи изничтожати, не радоватися в пространствах, в покои, в богатстве кроме веры⁵³⁵, не низпадати⁵³⁶ в нищете, в скорбех, гонениих с верою православною.

Сице убо, о, православное сословие, слово показует, како праведный от веры жив будет, согласно сему многа наказания, многи образы во святых книгах имеем. Слышавше же, возрадуемся о славе веры, возвеселимся о богатстве ея,[517] возторжествуем о тоя силы непобедимой, о красоте величества ея возусердствуем. Возлюбим с нею быти и в ней, яже нищих безсмертнаго богатьства сподобляющую[518] и безродных небеснаго благородия достойных быти творящую. Покажем всяко тщание, да придержимся православнаго тоя благолепия. Стяжем в сердцы нашем присно к Богу сию веру теплую, веру, на небеси у Христа пребывающую; веру, в вышнем Иеросалиме по улицам града небеснаго выну ликующую,[519] веру, со святыми согласную. Согреваем тую присно писанием и молитвами и песньми церковными. Совокупим к ней надежду, любовь, от нея никогда не отлучающийся. Украсим и теплу ю творим добродетельною светлостию. Не обесчестим злыми делы тоя благородия, в гневе зависти и во мнении⁵³⁷ не помрачим душ своих. Излишными стязаньми и испытаньми не сволнуемся⁵³⁸, раздорами и спорами не раздерем благоверия соединения.[520] Не променяем славы тоя вечныя на временную славу, светлости тоя бесконечныя – на тленную красоту, богатьства того неоценяемаго – на малоценное гниющее богатство, сладости ея небесныя – на скверныя похоти. Но в мире, и любве, и соединении, и во отеческих преданиих пребудем, в посте и молитвах терпяще, чистотою, воздержанием и смирением украшающеся, благостию, милосердием, безгневием и благотворением благолепотствующе, в гонениих, и нуждах, и скорбех терпением текуще,[521] взирающе на началника и совершителя Исуса. Емуже Христу, истинному Сыну Божию, слава со Отцем и со Святым Духом во вся веки. Аминь.

⁵³⁹Многий плачь обыче и чюждыя на жалость скланяти и слышание скорбей и далных сердца умягчавати, ближнии же от жалостных повестей многою любовию уязвляются и жалостно к состраданию сподвизаются⁵³⁹. Предивнейшия же всесветлыя Царицы, всекрасныя Невесты пресветлейшаго Жениха Христа, безчисленныя скорби, премножайшия страдания, неисчисленныя жалости которое жесточайшее сердце или кую каменнейшую утробу на жалость преклони и на сострадание подвигнути не могут! Юже⁵⁴⁰ богословный Тайнозритель провиде женою страждущею и болящею родити,[522] о ейже многоболезненной жалости богословци прописаша, глаголюще: «Восплачются Церкви Божия плачем великим».[523] Откуду и аз, многопечалный, премногожалостным матеролюбным чадом всежалостное питие от животекущих тех источник худым ведром ума моего почерпнути возусердствовах, желая, да утешатся многостраждущая сердца ревнительная, к состраданию да притекут: ленивейших же – к возбуждению, и нечювьствующих – ко усердию, немирных – к примирению, и своевольных – к матерну послушанию⁵⁴¹, всех же – к жалости и подражанию ²матеролепнаго страдания⁵⁴² да усердствуют. Приимите же, о, боголюбивейшии, вместо избранна словеси желание и вместо добросчинения⁵⁴³ усердие, ⁵⁴⁴не нищеты худотрапезия позазрите, но непожаление и последних моих крупиц отеческими утробами любезно рукоприятствуйте⁵⁴⁴. Имать же изображение словес сих сице символически изъявляющее.

Странник некто преходя путь некий жестокий, путь, тернием и острым камением постланный⁵⁴⁵, путь, ратей и страстей изнаполненый⁵⁴⁶. ⁵⁴⁷Отсюду змии зияюще, отонюду звери пожирающе; отинуду разбойници разбивающе, отсюду наветници безчинующе, идеже татие подкопывающе, идеже пленующии пленяюще и невнимающыя в темная адская жилища заносящей⁵⁴⁷. О, путь нужный⁵⁴⁸ и прискорбный! О, путь жестокий и печалный, о немже пророк глаголет: «Путие его тернием зарастут»![524]

⁵⁴⁹По оному пути в боязни мнозе и трепете идый плачевный оный и многоратуемый странник, иже естествено принужденый сей путь преходите и повеленный от толико ратуемых неповрежденно прехождение стяжати, иже утешаемый светлостию некончаемою Града, во нь же грядяше, и ужасаемый пропастьми геенскими, в няже от многонаветников пленяемь бываше⁵⁴⁹.

⁵⁵⁰Преходя же некое поприще пустынное, узре во отишии дубравне жену некую претруждену и дивну, жалостными виды умилену и старостою благородною цветущу, яже многожалостный плачь деяше, яже многоплачевное рыдание творяше⁵⁵⁰. Паче сказания языкомь рыдаше и паче обычая человеча стеняше, седины своя терзающи и благородное лице дерущи, главу пепеломь посыпающи и от плача и стенания престати не терпящи. К ней же приступив, ужасен⁵⁵¹: «О, многожалостная благородная старице, – рече странник, – что толико неутешно плачеши, что толико многоскорбно стенеши? Рцы ми, велелепная мати, откуду и кто еси и что вина скитания и плача твоего? Видение благородия твоего удивляет мя, необычный же образ плача ужасает. Повеждь ми, странному и многопечалному, многоплачевная госпоже».

«Иди, иди, странниче, – отвеща многоплачющая старица. – Иди путем своим и не пытай вины плача моего, иди и не стужай⁵⁵² многоскорбней моей утробе, ибо плачь мой неизреченен и печаль моя несказанна есть. Отъиди от Мене и не досаждай ми. Еда⁵⁵³ и ты от тех еси, иже словесы мя лобызают, а делы разграбляют, к благородию моему притекают, а дом благородия моего злодействы своими обесчещают, иже, приобщившеся священней моей пастве, свински виноград мой последний поядают, иже сады моя вся истребляют, иже богатство благодатное мое потребляют, иже безместну мя и скитающуся от их безумия в пустынных сих местех сотвориша, иже, узнавше мою благородную славу, сынове и рабы притворяющеся мне быти и, паки обращьшеся⁵⁵⁴, врази злейшии и супостата мне бывают. Отиди от Мене, отиди, преходниче, и последняго утешения – слез моих – не возбраняй ми».

«О, благороднейшая и всекраснейшая мати, – рече преходник, – многожалостная утроба и всежеланная родителнице, молю та ся: не отрицай⁵⁵⁵ мя от твоего благородия; припадая, прошю: повеждь ми велелепное твое великородие и вину неутешнаго плача, яви ми, истинно желающу навыкнути⁵⁵⁶ прелюбезныя твоя повести, яви ми, да послужю прекрасной седине твоей, да некую отраду печалей твоим учиню и себе, претружденнаго и утомленнаго, соутешю⁵⁵⁷».

«Что мне и тебе, о, преходниче, – рече благодатная она, – что ми толико стужаеши, стужаемей отвсюду? Ты убо от Мене, вопрошая, не отходиши, аз же от плача моего престати не хощу. И ты убо притужаеши⁵⁵⁸ мя вопрошении твоими, аз же, от лжеговения⁵⁵⁹ многих озлобляема и претружденна, явити благородие мое не могу. Иже славы ради благородия моего притекают и плотскаго ради их самоугодия приемше сию, безчестно безчестнии попирают и мене убо, безумнии, во многи скорби влагают, себе же, злочастнии, безсмертныя славы лишают и вечнаго гнева повинни ся устрояют. Сих безчинием оскорбляема без числа, не могу, не могу от плача моего престати, ниже поведати, ибо разумеваяй во время оно да умолкнет, – рекоша пророческая уста. Иди, иди путем своим, преходниче, и безполезно не стужай ми».

«О, всежеланная и благороднейшая госпоже, – рече преходник, – молю ти ся, ближайшая, престани мало от твоея печали, устави⁵⁶⁰ слезныя потоки, установи плачевная твоя стенания и излей милость твою на раба твоего. Яви ми всекрасную славу твою, открый и не потай⁵⁶¹ всежалостныя твоя болезни, всежеланно и нелестно прошю сладчайшими твоими повестьми усладити огорченное мое сердьце».

«Не могу, не могу, о, преходниче, – рече благороднейшая, – открыти ти всю славу и скорби моя, на сие бо ни время, ни вещи не попущают мя; разве отчасти открыю ти за желание твое. И малое мое поведание аще благоразумно и благодарно приимеши, велицей ползе сподобишися; аще от потока сладости моея пиеши, безсмертно усладишися. Аще послушен ми будеши, вечно прославишися.

Аз убо, о, преходниче, великаго и славнаго благородия есмь, возлюбленная невеста пресветлейшаго Царя Христа. Сия, юже виде богословный Тайнозритель в велицей славе небесней, провиде же и прописа моя болезни и скорби безчисленны с болезнеными моими чады. Провозвести же ми в пустыни бегати от чермнаго⁵⁶² змиа и от испускаемыя от него воды потопляемой быти, но не потопленной.[525] Всиже, елицы сподобишася и сохраниша быти моя чада, тии пресветлейшии улучиша быти беземертнии граждане небеснаго Иеросалима. Скорби же мои и болезни суть несказанни, поскольку бы могл кто мою бывшую в послушных моих чадех и во усерднейших заступницех пресветлую славу познати, потолику бы возмогл без тех ныне тяжкия моя и нестерпимыя болезни поразумети⁵⁶³. Ибо от врагов есмь ненавидима и от своих презираема, отинуду есмь гонима и отинуду стязаема⁵⁶⁴, ⁵⁶⁵от страны мучителствуема, от другия лукавством подкоповаема⁵⁶⁵, оттуду разграбляема, отсюду раздираема, отвне наветуема и отвнутрь досаждаема, отвне расхищаема и отвнутрь окрадуема, от чюждих безмилостивно повлачима⁵⁶⁶ и от своих безумия злослышания сподобляема.

Оставлю бесчисленныя мои скорби поведати, мину расхищение мое всесодеянное объявляти, премолчю всюду моего благочестия терзание воспоминати, сокращю о яже вернейшии мои служители Ездра, Иеремий и прочий неисчисленно мой плачь изобразиша,[526] прейду, яже премудрейший мой таинник Максим, ероглифически и исторически моего благородия всеплачевное расхищение изобразив, воспроповеда.[527] Ниже бо сих аз ти объявляю, ниже ты мне в сих что можеши помощи, но она моя скорбная токмо мало открыю, яже ми внутрь тяжкое расхищение содевают, да не и ты в та впаднеши, негли же возусердствуеши тем советник благ быти, да не прилагают к прочим моим скорбем тяжчайших досад таковии, иже внутрь священнаго села соводворившеся, священному житию противодетельствуют, иже вчера обещавшеся, днесь слабостию пленяются: едва узреша пустыню – на мирская обращаются, едва услышаша о подвизех – хребет обратиша⁵⁶⁷, едва почюша рати – покоряй врагу явишася, иже бесчинии своими благородие мое обесчещают, иже своевольствы их терние и волчец благоговейный бывают, иже бесчестными их целы досаду ми зелну чинят, противством же и роптании утробу ми терзают, иже на благочестная моя чада злослышания зазоры наносят, иже советующим полезне непокорни ропотницы, и наказующим темнообразнии наветницы, и пекущимся о их, обличающим их нецыи июдоподражателни предателие устрояются злейшии, имже не токмо себе самех губяще, но и прочим моим сревнителем печалем и скорбем вина бывающе и священней моей славе расхищение и укоризну безумии своими устрояюще.

К сим многим моим и несказанным скорбем своемнителнии нецыи, мене ради мняще приити, сами мне досажают, глаголюще о мне радети, безмилостно мя малоумием своим терзают, не могуще грубомнением и несмирением их со священными моими законы согласитися, стязании и распрями и хулами безмилостивны ропотницы и хулницы о преданиих моих бывают. И в скорбех моих не помощники, но наветники, не сплачющии, но лукавно подкоповающии, не сострадующии, но укорити и хулити подсмотревающии, посреде моих посельшеся, моим досадники бывают. От киих вышеназнаменованных како кто в крайнюю ненависть, вражду и зависть пришед и, ссырен⁵⁶⁸ от различных злоб, мнителный нрав стяжав, помрачився совестию, не о скитских благочиния благих, не о пустынных мирноустроениях, ни о чесом сих попечется: не о благоговении, не о смирении, не о согласии любви, не о страсе Божии, не о ревности благочестия, не о хранении священных правил и о ползе душям порадеет, не о братолюбии, не споболении⁵⁶⁹ друг по друзе поскорбети чесому же приобщится, но, ополчаяся окрест, яко змий или скорпий, воздвиг жало, смотряя места, где разсеяти клевета, како примыслити лжа⁵⁷⁰, когда вместити хула, помышляя на добродетелных и добрословущих приложити злобу, обгадити слышанием злым, учинити всем ненавистных, да сам, лукавством спокрываяся⁵⁷¹, и лицемеруя неведущым, и сходя слабейшим⁵⁷², милование от них приимет, трапезы всех пожрет, ниже приходит во общая попечения, ниже в градская, ниже в духовная, како благочестие вопрошающим объяснено показати, како властей о мирноустроении умолити, како християном мирноспасително житие произвести, но о общих безделен, беспотен, несмешен⁵⁷³, не ведя⁵⁷⁴ благодати, ни дружбы, ниже чесого иного, яже человек мерный⁵⁷⁵ весть. Но с ими же живописателие неверныя пишут во аде, сей с сими клятвою, и с хулою, и завистию, и крамолою, и любопрением⁵⁷⁶ обходит, еже по Ездры святаго пророчеству рещи: «И от соседних градов востанут мнози на боящыяся Бога»,[528] и паки от лица Божия: «Тогда явится искушение избранных Моих, яко злато в горниле».[529] Откуду от таковых чюждых и своих бесчиний и наветов печалная стиснения выну и выну умножаются, Возбранити же таковая бесчиния и мне помощи кия поистинне обрящу согласны ревнители, иже болше устыдятся тех, нежели мене; болше не восхотят с теми остудитися⁵⁷⁷, нежели со мною; болше пострашатся тех ропоту, нежели священных моих законов; вящше безстыдно порнятся⁵⁷⁸ за свои малыя обиды, нежели поревнуют за мои великия досады; вящше возлицемерят другим с бесчинными остужатися, нежели им за мене ревности ради Божия постаратися. Еже таковое мое расхищение и беспоможение провиде, богогласный Исаиа, рече: «Оставлена будет дщи Сионя, якоже сень в винограде, и якоже овощное хранилище в вертограде, и яко град обстоимь».[530]

Прочее, преходниче, не удивляйся необычному плачю моему, необычныя познавая болезни моя, и буди внимателен себе и спасению своему, и елико возмогл еси болезни и скорби мои уразумети, толико потщися спострадателен, а не наветник мне быти. Елико познал еси расхищающыя мя нравы своевольства, толико возусердствуй блюстися богоненавистнаго обычая самовольства. ⁵⁷⁹Колико видиши мя оскорблену и расхищаему от бесчинных злотворения⁵⁷⁹, толико ревнителен буди удалятися нравов бесчестнаго сквернения. Рцы же и тем, иже обещавшеся пустынножители быти, пустынным христоподражателным житием да жительствуют, иже посреде богообещнаго села населницы Быша, по заповедем Бога Царя и пустынным отеческим уставом да пребывают, да возблюдутся же и возненавидят всякия бесчинныя обычаи и бесчестьныя скверныя дела, богоненавистныя мерзския грехи, имиже прогневаем бывает всяческих Содетель Господь Бог, якоже Анастасию Цареградскому патриарху, плачющемуся пред Ним по взятии от турок Царяграда, сам Бог объяви, еже вяшше досаждают и гневают его, Пречистаго Владыку, християн согрешения и преступления святых его заповедей, неже языков неверных, не знающих Бога.[531] Тако же и по богоносных отец гласу: вящше Бог гневается на пустынныя, неже на мирския грехи.[532] Откуду отвсюду да устрашатся досаждающыя мя бесчинныя нравы, да возбоятся досаждати ми преступлением заповедей Божиих, да воньмут же гласа, часто певаема у Мене: „Ненавидящии Сиона посрамятся от Господа, яко трава огнем иссохшая"».[533]

К сим удивлен и устрашен быв: «О, пресветлейшая царице, – рече преходник, – всекраснейшая невесто царствующих Царя, аз раб твой и служебник твоей державы, тебе покаряю всю волю мою, аще что-любо твоей власти не покорих, то все ныне, припадая к ногам твоим, покаряю и повиную вся советы моя. Тебе да покарятся еще со мною вся спасающихся доброхотения, воли и нравы и да исповедят, яко ничесоже стяжаша, не покорившеся тебе. Не скорби прочее, но похваляйся, всех благочестивых самодержице и спасающихся преславная Владычице, зане⁵⁸⁰ кая злоба есть, юже бы ты не победила, ныне кая злость есть, яже бы силам твоим одолела. Еда⁵⁸¹ непреподобное безстудство человеков, во всяком беззаконии поглащенных? – но низлагаеши е чистыми твоими законы. Еда развращенная учения гордодмящихся, слабоумныя пленяющыя? – но обличаеши и отгоняеши я священными повелении. Гонителей ли суровство? – но побеждаеши я. Бесовския ли тмочисленная нахождения? – но разгоняеши я. Еретическая ли злоковарственная учения? – но растерзаеши я. Грешных ли своеволная бесчиния? – но наказуеши я. Беззаконных ли множества и непокорных твоей истинне? – но отлучаеши я от дивныя светлости твоея, и осуждаеши, и отгониши в темность вечную. Бесчисленныя ли скорби и наветы от бесов же и человек твоим чадом? – но гонителей твоих чад низлагаеши в езеро огненое и жупелное, чад же своих отпущаеши в вечную светлость и дивную славу Сионскую.

Востани прочее, священнейшая мати, от скорби твоея и утешися о дивней славе твоей, утеши скорбь твою настоящую вечною светлостию чад твоих, плачь твой всежалостный взятием сынов твоих в предивный свет всекраснаго безсмертия, болезни твоя всетеплейшия всесладчайшим торжеством служителей твоих в прекрасней радости небесней. Утеши ся, многоболезнейшая всекраснейшая мати, тако просветившимися вечною добротою, яко еще просвещающимися твоими чады, тако дошедшими во светлость Сионскую, яко многоскорбне идущими в митрополию ону небесную, тако сохраньшими и возвестившими твоя священныя законы, яко единомудрено с ними лобызающими и хранящими святейшыя твоя уставы. Воздвигни благодатныя твоя крыла, матеролюбная кокош⁵⁸², обими многостраждущия твоя птенци внутрь священных законов, напитай нас от сосцу благодатных твоих учений, накормляй пищею безсмертною небесныя сладости. Малоразумныя научи, слабейшыя утверди, заблуждшия собери, раздирающаяся совокупи, несмиренныя примири, непослушныя послушанию, согрешающыя покаянию научи, печалныя утеши, малодушствующыя укрепи, паствы богоукрашенны устави, пастыри святопросвещенны упремудри. Христоименитое стадо священными уставы украси, вся благочествующыя в премирное Небесное Царьство управи о Христе Исусе, Господе нашем, емуже слава».

Понеже убо ваше боголюбное сословие возжелесте церкволюбным усердием украсити всежеланный Спаса Христа образ[534] и яко пречестен дар прекрасному Владыки во краснейший торжества день принести украшенный киот, – добре сие и праздниколюбне возусердствовасте, боголюбивии, яко и с пророком вам соревностно глаголати: «Господи, возлюбих благолепие дому твоего»,[535] – и нас от лености нашея горчестию вашего тщания возбужати, скоровременно довершение благозачатому⁵⁸³ показати. Но понеже время и вещи вельми изуграфов удержаша, тако яко ни приникнути ко оному делу в скоршем сем времени возможно, обаче не лепо есть нам тщим⁵⁸⁴ быти в таковый пресветлый торжества день, не лепо не совнести к вашему празднолюбному рачительству соусердия, но должно вкупе потщатися украшати праздник украсившаго нелепоту нашего естества, должно любодаровито почести⁵⁸⁵ почестшаго нас преестественною светлостию, должно всеусердно прославляти возблиставшаго нам днесь премирно светлость славы своея.

И мы убо краткословесное воспоминание о празднице вашему усердию приношаем. Вы же, священое сословие, праздничными маргариты и торжественными златоблещании торжество украшающе, приимите к дражайшему вас приношению грубословное нас совнесение, и, ⁵⁸⁵усердно праздника же и праздничных даров навыкше⁵⁸⁶, вкупе восторжествуем лепотне⁵⁸⁷ же и богоугодне. Ельма убо вина есть желаемому нам торжеству: оный день благоизволи воплощенный Христос Бог явити на Фаворе[536] славу Божества своего, о чем, предварив, рече: «Суть нецыи от зде стоящих, иже не имут видети смерти, доньдеже видят Царствие Божие».[537] Ибо якоже она великоблистательная божественная светлость, показанная в преображении апостолом, вышеестественно тогда возсия,[538] тако Царствие Божие, уготованное любящим его,[539] неизреченною светлостию сияюще есть, в немже, по Христову словеси, «праведнии просветятся якоже солнце».[540] Тое премирное Царьствие сей праздник ясно показует, тую прекрасную светлость пред очима нашима светло представляет, юже присномысленныма очима зрети и наслаждатися тоя выну⁵⁸⁸ нам подобает и дарователя тоя светлости Христа Бога всежеланно благодарствовати и праздник сей в славу велелепоты⁵⁸⁹ его честнейшими приношении усветлевати и пресветлыми дарми украшати всеусердно долженствуем.

Сие же бывает, егда угождение ему приносим «во псалмех и пениих и песнех духовных»,[541] по апостолу, в молитвах же и во чтении Божественных Писаний, златозарною сияюще верою, благоухающе сладостию любве и надежды, приносяще в церковное сословие предрагоценная украшения: дражайшее камение девственныя доброты, светлыя маргарита⁵⁹⁰ вдовственныя чистоты, преценныя златосияющия сосуды: любве, смирения, терпения и воздержания, в правду, в кротости и безгневие и прочия добродетели, яко в прекрасныя одежды, одевающеся. Тако праздник пресветел и богоугоден, тако торжество всекрасно и ангелом любезное составляти можем.

Не лепо же есть мрачными вещьми и скаредными сложении⁵⁹¹ помрачити светлость торжества. Сице бо творят, иже в пиянствах и бесовских играниях чрезденьствующе⁵⁹², иже с гневом и сваром, неправдами же и завистьми, лихоимствы и грабленьми приходяще к торжеству; тако з блудными скаредотворении⁵⁹³ примешающиися, сице с клеветами и осуждением, крамолными же лжами и прочими грехотвореньми совокупляющийся, яко сажами и смолами, почерневающии празднество. Чесого ради, елицы есмы во гресех окалянии⁵⁹⁴, нуждествуем⁵⁹⁵ умилитися и возусердствовати, зрящи на показанный праздником всесветлый Царствия Божия свет, да не отгнани будем таковыя светлости, покаяния мылом омывшеся,[542] тако со обращенным и покаянным разумом потщимся лобызати торжество: ведяще известно, яко нечестивых и непокаянных жертва мерзость есть пред Богом.[543]

⁵⁹⁶Якоже царю с победною славою приходящу, елицы от любочестных с дражайшими дары, златом, сребром и ценными каменми, сретающе, честей и похвал и милости от царя сподобляются; аще ли же кия, обезумившеся, сретиша бы с сосуды скаредными, прахом и грязию смешенными псов и свиней исчезнувших, и тех злосмрадных в дары принесоша бы, коликого гнева и ярости улучиша бы сицевии от царя себе быти⁵⁹⁶.

Сице размышляй кто от празднолюбных о празднственных дарех, аще и высочайшими должни есмы царьствующих Царя почтити, не с грехами скверными, но добродетельными дарми любочествовати. Тако Бог издревле еще объяви праведне и не тако жертвы ему приносящих: «Бысть, – рече, – по днех принесе Каин от плодов земных жертву Богови. И Авель принесе, и той от первородных овец своих и от тука их. И призре Бог на Авеля и на дары его, на Каина же и на дары его не внят».[544] Того ради и псалмопевец пети Богу Царю разумно заповедает и, объявляя, глаголет: «Жертва Богу дух сокрушен».[545] Се же есть – приношение Богу благоразумно и благопокорно подобает.

Сия убо, понеже тако суть, от сих малых словес и от многих Божественных Писаний яве показуется, еже ведяще и ныне слышим, о, священное правоверных сословие и красное празднолюбных торжество, праздника величества воньмем и во всекрасную светлость его возрим, почтем почтенными дары день и красными приношении украсим торжество, многоусердным тщанием в молитвенныя соборы приходим и с любовными пламы песненное славословие Владыце приносим, добродетельными светлостьми, яко звезды пресветлыми, храм украшающе и благодатными церквопокорными нравы торжество прославляюще: ов девственную доброту возблиставая, другий же вдовственную чистоту украшая; ин молитвенныя ароматы благоухая, ин же благодарственное терпение в дары приношая; и ов учительства Божественных Писаний слово усердно изливая, друзии же неленостное послушание желательно дающе.

Вси веру, любовь, надежду, вси правду, смирение, кротость и безгневие, вси благочестие, воздержание с ревностию боголюбною праздничному торжеству принесем. Елицы же греху уязвеннии, негли⁵⁹⁷ наветом злохитрости дияволи, не лишим себе и мы праздничныя благодати, не удалимся от пресладкаго свет-Христова милосердия, но омыем скверну греховную чистотою покаяния и с престатием⁵⁹⁸ греха и благоволением в прочее⁵⁹⁹ добродетелей усердно и боголюбно примесим себе⁶⁰⁰ торжеству. Вси мерзости греховныя возгнушаемся, вси добродетелною светлостию усладимся и з добрыми делесы⁶⁰¹ и благопокорным покаянным разумом возблагодарствуем пресладкаго нашего Владыку, иже обогащьшаго нас вечною славою, всея видимыя славы высочайшею. Сице разумно празднующе и христолюбне торжествующе, духовныя благодати и пресладкаго Божия заступления в настоящем веце насладимся и будущия пресветлыя, показанныя преображением Спасовым славы насладитися сподобимся, яже буди всем нам получити благодатию и человеколюбием Господа нашего Исуса Христа, с ним же Отцу слава купно со Святым Духом ныне и присно и во веки веком. Аминь.

Боголюбным пустыннаго Боровскаго скита усердным молебнаго Пречистыя Богоматере дому строителем Иосифу Григорьевичю,[546] Григорью Ивановичю[547] со всеми единоревнители о Христе Исусе радоватися.

Дойде до нас вашего боголюбия любовнодышущее писание, показующее церковных вас чад церковолюбное усердие и теплоту к Пречистей Божии Матери, всего мира християнстей теплейшей заступнице, и усердное ваших боголюбных и братолюбных душ к нашей худости прошение.[548] Но что сотворим? Желаем ваше доброрачителное желание исполнити – и удежаваемся нуждами неминучими⁶⁰²; желаем общеусердно с вами молити Божию Матерь – и краткости ради времене между праздникома невозможно нам исполнити;[549] желаем, да начатки молитвенныя⁶⁰³ с вами принесем в новостроенном Богородицыне доме – и празднества и строительства общежительств[550] в такое краткое время не спустят нас.

Нужда нам единоусердно тако сотворити: вам велерачительно тамо, а нам усердно зде в праздник ея, Божия Матере,[551] аще и местом, и телом разны, но единоусердным велерачительством едину пресвятейшую Царицу, едину христианскую заступницу всеторжественно молити и праздновати. Елико же можем от крылошских служителей сь общежительства на обновления молитвы храма Богоматере отпустити, усердствуем.[552] Вы же убо, о, боголюбное церковное совокупление, пустынное богообещание, чистообещная сионская чада,[553] почтите всеусердно державнейшую неба и земли Царицу, почтите храм ея всекрасным обновлением, принесите вси любезнейшия дары всекраснейшей Владычице, вси угодная Богородицы приношения принесите вкупе с фимианом благоуханным и со светлыми свещами, принесите вси светлое душ озарение, совестей мироуханное очищение, залогов сердечных к Богу и Пречистей Богоматери всеверное присвоение, вси богомерския грехи, аки кальное богогневное посмражение⁶⁰⁴, возненавидевше, вси чистолюбное благоуханное добродетельное житие возлюбивше.

Принесем дары благоуханны, дары светлосияющи во украшение храма: девственицы – непреложно девство, вдовствующий – чистолюбно целомудрие, вси богообещнии пустыннороднии – пустыннолюбную чистоту, молитвы умиленны, воздержание честно, смирение христоподражательно, любовь нелицемерну, братолюбие нелестно, милостыню благоуханну. Всеми добродетельми украсите храм Божия Матере: приемлет бо сия и любит Владычица и соблюдати чистолюбныя Пречистая усердствует, ея же, всемилосердныя Богородицы, молитвами да даст вам Господь Бог украшенно священными молитвами и дароприношеньми украсити торжество и сподобитися в вышних нерукотворенных храмех всерадостно вечно ликовствовати во вся веки. Аминь.

При сем пишай сие многогрешный с общежительства Андрей Денисов боголюбезному вашему совокуплению всесмиренно и всепокорно любезно кланяюся в 22-и сего июния.

«Фавор и Ермон о имени твоем возрадуетася».[554] Словеса сия псаломская суть.

Вем убо, вем, о, боголюбивии празднолюбцы и всеусерднии Спаса Христа служителие, яко возсия всесветлое Преображения Христова торжество, воскипе всекраснейшее просвещения Спасова празднество. И скит Боровский весь торжеством сим весельствует, и вси скитяне на честь праздника предуготовляются, и храм молитвенный Спаса Христа свещным светом, яко звездным сиянием, воскипевает, и всещедраго Спаса Христа чюдотворителный образ[555] всемилостивым видением утешает празднолюбныя, и вси празднолюбнии всеверными сердцы к Спасу Христу молитвенныя дары приносят, и просвещеннии верою служителие песненное хвалоприношение бряцати усердствуют, и вселюбовное к нам звание от любовных сердец источается.

Но что сотворю к просвещенному сему торжеству? Пойду ли на любовное звание сие? – Но удержаваюся всебратственным торжеством.[556] Остану ли во общежительстве? – Но верное звание убеждает. Что убо? Потеку ли? –Но удержаваюся. Удержуся ли? – Но вашею любовию побеждаюся. Тем ⁶⁰⁵во обою сею, яко остны, бодом⁶⁰⁵, притекаю к общецерковному совету. Откуду и ваше торжество общежительными служители посещаем и с вашею вкупе любовию зде и тамо единосвященное празднество единеми священными пении, единеми единоверными сердцы и усты вкупе восторжествуем.

К сим же и малым моим сим начертанием вашему священному торжеству, яко лицевидно⁶⁰⁶, приобщаяся, совношю усердие и словесными маргариты почитаю священное празднество. Ибо в светлоторжественный сей день Фаворская гора[557] возблиста, воздух просветися, земля осветися, пустыни возвесельствоваша, горы дата⁶⁰⁷ глас радости, реки восплескаша руками, облацы радостная воскликнуша, пророцы восторжествоваша, Моисей и Илия неизреченная навыкнуша⁶⁰⁸;[558] апостоли преславная видеша;[559] свет паче сего света узревше,[560] устрашишася; земля вся страшных и неизреченных тайн исполнися, небеса искапают земным сладость; ангели с небес возвещают радость. Отечь глас возгреме земнородным, Сына единосущнаго славити и послушати завещавает.[561] Сын Божий возсиянием всесветлых Преображения луч просвети християнский род и на вечное светлейшество воззывает верная церковная чада. О, преславных Божиих таинств, о, неизреченных Спасовых дарований! Возблистати благоизволи в преображении, яко солнце, и всем праведным дарствует одеятися солнечным светом.[562] Тогда рече: «Праведнии возсияют, яко солнце, в Царствии Отца их».[563]

Преобразися страшным преображением на горе Фаворстей и во вся времена просвещает светом благодатным верныя боголюбныя празднолюбцы. Дивно бяше на горе Синайстей, егда Моисей от славы божественныя просветися лицем видимым, на его же лице израильтяне взирати не можаху.[564] А не дивно ли сие просвещение, егда кая верная чада всеверно в славу праздньственную Преображения Христова входят, наслаждаются лучезарнаго света Спасова, утешаются обетованием вечным, просвещаются благодатию Христовою, возгараются ревностию божественною, возтеплятся, возусердствуют вечным светом небесныя светлости, от их же просвещеннаго лица душевнаго отбегнут скверныя страсти, отступят греховныя нечистоты, удалятся темная демонская полчища, не могуще терпети просветившихся душ сиянием благодати праздньственныя.

⁶⁰⁹Якоже железо, егда положено будет в горящий горнец, наполнится и само огненных искр и не прикасаемо бывает вещем, от огня палимым, понеже палит нещадно огненным пламенем⁶⁰⁹, сице умиленная душа, верою приходящи к праздньственному свету, наслаждается торжества, утешается песненным бряцанием, просвещается таинственным навыканием⁶¹⁰, насыщается небесныя премудрости, научается о вечной Царствии Божии, оставляет маловременную суету, возревнует о вечнем всекрасном Царствии Небесном, возгарается благодатию, возтеплеет усердием, возкипит верою, испустит из себе горящыя искры боголюбныя. Тогда, тогда в боголюбней ревности опаляет страсти, сожигает грехи, жжет демоны, палит беззакония, и вся тогда в божественней ревности не емлема бывает адовыми челюстьми. Яко и пророческим гласом насмеяватися аду возгремети: «Где ти, смерте жало, где ти, аде победа?»[565]

Сицева есть праздника божественнаго божественная светлость, сицевыми благодатными дары обогащаются боголюбивии празднолюбцы, таковым всесветлым светом просвещаются иже боголюбно празднующий и верным тщанием учения церковнаго послушающии.

Темже, о, боголюбивии празднолюбци, Преображения Спасова любовнии торжественници, праздньственное торжество возревнуйте, возкликните всеверными душами торжественная, украсите торжество, возсветлите Божию любовь, удивите ангелы, утешите небесныя жители, устрашите демоны, отжените⁶¹¹ греховныя черноты, на гору Фаворскую взыдите, преображением Спасовым просветитеся. Вси боголюбцы, вси единодушии, вси небесных ищуще, вси праздньственным светом просвещающеся, вси воскипевающе от сердец благодатная: престарелии – боголюбие, юннии – благоверие, здравии – целомудрие, немощнии – терпение, доволнии – милосердие, нищии – благодарение, девственнии – целомудренную светлость, вдовствующии – чистолюбную ясность, грешнии – умиленное покаяние, молитвенници – мироюханное моление, читатели – книжное поучение, певцы – сладкопесненное бряцание, пастыри – тщательное пасение, христоименитое стадо – усердное послушание. Вси в мире, вси в любви, вси в боголюбии, вси украшающе торжество, вси вкупе прославим преобразившагося Спаса Христа с безначалным его Отцем и со Святым Духом во вся веки. Аминь.

Писавый многогрешный Андрей Д<енисов> чрез сей лист усердно вам кланяюся. И молитв ваших боголюбных за мене к Спасу всеусердно датися прошаю.

Боголюбивый Соборе, христоподражателный соньме, высокопраздньственнии торжественници, желаю к вашему боголюбию всекраснейшаго ради торжества совнести кратко слово, ⁶¹²но таинства величеством воспящаем⁶¹². Усердствую всесладким благоуханием Христова Воскресения усладити ваше торжество, ⁶¹³но, грубостию содержим, здержаваюся⁶¹³. ⁶¹⁴Ревную, но недоумеваю⁶¹⁴. Хощу, но изоумеваюся⁶¹⁵. Понеже вся тварь Христовым Воскресением обновися, вся Воставшаго из гроба светом просветися: и Адам, первый началовождь мужей, яко орел, обновися,[566] и Евва, первородница всех жен, яко луна, паки родися, и праотци ис темнаго ада изведошася, и пророчицы от горкаго тирона⁶¹⁶ свободишася, и праведнии возвеселишася, и преподобнии возрадовашася, и грешнии в рай вселишася, и вси веровавшии светом божественным просветишася.

О, преславных чюдес, о, всяк ум превосходящих вещей! Воззрим мало к таинству и узрим, како адския темницы испровергошася, како преисподняя мучительства низложишася, како горкая смерть умертвися, како адский мучитель связася, како мучителнии диаволи заключишася. И се из юзилища праотцы востекоша, се праведнии ис темниц адских избыша, се полцы правоверных из смертных дверей воздвигнушася⁶¹⁷, се сонмы предревних боголюбивых, из адских челюстей избывше, возрадовашася.

О, безчисленнаго твоего милосердия, Христе, иже адовыми содержими беша узами, к невечернему свету всерадостно востекоша веселыми ногами, Пасху хваляще вечную.[567] Паки рай отверзеся, паки едем даровася, паки всекрасная селения наполнишася, паки райскаго веселия праотцы сподобишася, паки бесчисленнии роди святых в прекрасную породу произведошася. Кто не возрадуется, яко рай отверзеся⁶¹⁸? Кто не восторжествует, яко вышний Иерусалим[568] верным даровася? Кто не воспоет Воскресшаго, от ада избавившаго и небо даровавшаго? Кто не прославит смерть поправшаго, от мучительства свободившаго и вечною свободою почтившаго?

Темже христоименитое торжество, всекраснаго празднества краснейшии позаратаи⁶¹⁹, всевернейшая чада церковная, всерадостне восторжествуем, всевесельствуя, воспразднуем, всеторжественно возхвалословим, радостно возникнем, усердно воспоем, песнено возбряцаем, красно же и сладостно, боголюбиво же и всежелателно, благоговейно же и всерадостно возлико<в>ствуем и гласословим:[569] «Воскресения день, просветимся, людие, Пасха, Господня Пасха, от смерти убо к жизни и от земли на небо Христос Бог нас превел есть, победную поюще».[570] И всяку вражду разрушивше, всяк гнев отринувше, всяк грех возненавидевше, свято же и целомудренно, вселюбовно же и христожелателно, друг друга целующе, друг пред другом восклицающе: «Христос воскресе!» – и паки оглашая, утвержающе: «Воистину воскресе Христос!»[571]

Убо и аз, недостойный, вашему боголюбивых христожелателному торжеству приобщаюся и, не сый с вами телесне, вселюбовно же с вами сердцедостизателне⁶²⁰ вся вы, верная чада церковная, целую, вся христолюбивыя любовно лобызаю, ко всем вопию, пред всеми возглашаю: «Христос воскресе, радость наша! Христос воскресе, утешение наше! Христос воскресе, избавитель наш!» И паки пред всеми приглашаю, проповедаю и не молчю, возглашаю и не таю, аще и беси ненавидят, аще и дияволи ярятся⁶²¹, аще и жидовский соньм неистовствует, но с вами, христолюбивыми, а вселюбезными ми христоподражатели, немолчно вопию: «Востину воскресе Христос!» Тому слава во веки. Аминь.

Вашего христолюбнаго всекраснаго торжества всеусердный сослужитель недостойный Андрей Денисов вселюбезно вашему боголюбию кланяюся.

Ниже саморучно подписывает:

Господину боголюбивому Даниилу Викуличю с прочими христоподражателными торжественники.

«Праведник, яко финик, процветет и, яко кедр, иже в Ливане, умножится».[572] Словеса сия царьственнаго пророка, во псалме 91 написанная суть.

Якоже нецыи путешественницы, шествующе по пустыни безплодней, по пустыни дикой и терновитой, по пустыни каменистой, безводней и неутешней, обретающе по местам финики доброплодныи, ⁶²²ри исходищих вод пресладких источник доброрастуща⁶²², вельми тогда возрадовавшеся, утешительное упокоение приемлют, от пресладких фиников плодов наслаждаются и насыщаются и от источников пресладкими водами жажду утоляют и ⁶²³многу крепость и усерьдие к путешествию паки восприемлют⁶²³; тако мы, века сего последняго плачевнии путешественницы, века бурливаго и сварливаго; века, тернием греховным и страстным исполненаго; века, острым и непроходным камением злых нравов, вражд, клевет, гонений, ратей преумноженнаго. О, по какой мы непроходней и плачевней пустыни шествие творим! О, по какой гладной и безводней дебри и зверей злоядовитых исполненней скитаемся!

Но имеем по временом праздники святых Божиих, паче источников вод нас словесы благодатными питающия и утешающыя и паче фиников всесладостным их житием и подвиги нас услаждающыя и насыщающыя. Се ныне, плачевным сим временем шествующе, доидохом до всесветлаго и любезнаго нам праздника великаго во отцех Саватии, егоже празднство, вем, о, святых любящий торжественницы, торжествовати усердно стичетеся⁶²⁴. Но приимите, молю вы, к многоплодному сему финику и мене, утружденнаго многоскорбнаго путешественника, приимите к вашему боголюбезному торжеству со убогою сею хартиею к вам приходящаго, и обще усердно насладимся благодатных плодов воспоминанием святейшаго пользодательнаго жития священнаго сего отца.

Сей бо богоносный отец Саватий последняго рода светилник всесветлый, послушания и целомудрия цвет прекрасный, смирения и кротости мироуханный сосуд, любви и благоутробия всесладкое пиво⁶²⁵, молчания и благоговения сладчайший кратир⁶²⁶, молитвенных и постных подвигов преобогащенный корабль, вседобродетелных плодов прекрасный и сладчайший рай, в победах на диявола силный и непреодолеемый Сампсон,[573] в сожитии к человеком кроткое и незлобивое агня⁶²⁷ и всесладкое благонравное утешение, Кириловы обители благонравным житием просветитель всесветлый, Валамской киновии пользотворитель всеутешителный, Соловецкому отоку насадитель всеблагодатный,[574] поморьских и обонежских стран всесияющее просвещение,[575] плавающим в мори теплейшее поможение,[576] последняго рода к Богу молитвенник и заступник светлейший.

Кто в тогдашнее время во обителех Кириловы и Валамской многославим бе в добродетелех? – Преподобный Саватий. Кто многосладостен в послушании и смирении бе? – Преподобный Саватий. Кто многоутешителен в любви и благоутробии⁶²⁸ бе? – Преподобный Саватий. Кто в великих подвизех яко безплотен ангел подвижник бе? – Преподобный Саватий. ⁶²⁹Кто в пустый Соловецкий оток прииде и нежителнаго многожительна молитвами сотвори и просвети?⁶²⁹ – Преподобный Саватий. Вопроси, кто в северном и полунощном мори обуреваемым⁶³⁰ християном скорый помощник. – Саватий с Зосимою.[577] Поищи, кто потопляемый от смерти молитвами избавляет. – Саватий с Зосимою. Взыщи, кто в последний сия дни чад своея обители в благочестии укрепи. – Преподобнии Зосима и Саватии. Чии ученики сияют страдалческим венцем и чия обитель украшается преподобноисповедническою кровию?[578] – Преподобных Зосимы и Саватия. Кто учениками своими Выгорецкое общежительство насади и молитвами своими помогает и заступает?[579] – Преподобнии Зосима и Саватий. Кто вся скиты, вся пустыни в благочестии научает и молитвами защищает? – Преподобнии Зосима и Саватий. Кто в темницах страждущим за благоверие помогает и посещает? – Преподобнии Зосима и Саватий. Кто в далечайших странах плененыя християны от плена избавляет? – Преподобнии Зосима и Саватий. Чиим чиноукрашением красуются и просвещаются общежители выгорецстии и скитяне?[580] – Преподобных Зосимы и Саватия.

О, какова великопользодательнаго отца праздник празднуем днесь! О, какова великаго просветителя торжествуем торжество! Но не глаголи ми, яко сей священный отец не производит в рождении своем града великаго, рода светлаго, богатых родителей. Не в академиих премудрости учися, не с философами, не с риторы совоспитася⁶³¹, сего ради от Никона[581] и последующих ему чин его презираемы,[582] уставосодержания его небрегома суть. Но познавай сего великаго отца, земнаго ангела, гражданина небеснаго, древняго святых, православия звезду пресветлую, Духом Святым просвещеннаго, в небесных обителех со святыми ликоствующаго.

Кого, рцы ми, молю тя, вси христоименйтии граждане и поселнии⁶³² на молитву к Богу призывают – Никона ли или Саватия Соловецкаго отца? Но вемы известно, яко Никон от всех презирается, священный же Саватие всеустно⁶³³ с теплою верою призывается. Чий день всенародно празднуют и самого его ко Владыце всеговейно в заступление призывают – Никона ли или Саватия? Ей, речеши: Никон от всех не знается, преподобный же Саватий от всех христоименитых всесветло величается и торжествуется⁶³⁴ и всеверно в заступление призывается. Кого Бог знамении и чюдесы прослави – Никона ли или преподобнаго Саватия? Сей пречюдный отец, яко солнце всесветлое во всей России знамении и чюдесы сияет и прославляется. Тем⁶³⁵ и Павел, сосуд избранный, глаголет: «Видите бо звание ваше, братие: яко не мнози ли премудрии по плоти, не мнози ли силни, не мнози ли благородии. Но буяя мира избра Бог, да премудрыя посрамит; и немощная мира избра Бог, да посрамит крепкая; и худородная мира и уничиженная избра Бог и несущая, да сущая упразднит»[583] (Кор<инфом> 1, глава 1).

Откуду и от дел, и от вещей⁶³⁶, и от апостольских священных глагол Никон от всея превысокия богосвидетельствованныя чести изгоняется; преподобный же Саватий отвсюду нам светел и богопрославлен и вселюбезен показуется, яко самем Богом избранный, яко знамении и чюдесы светлопрославленный, яко небесных обителей яснейший⁶³⁷ житель, яко древлероссийскаго благочестия светозарный незазорный свидетель, яко хранящим древнее святоотеческое благоверие всекрепкое утвержение, яко всем верным християном всеяснейшее солнце пресветлое, яко многопроцветший финик всесладостный и многоплодный, наслаждающий и насыщающий вся верныя християны. В палестинских пустынях мнози от пустынножителей кий обрящет финик в пустыни, иже на всяк месяц во весь год приносит пресладкия плоды, при оном финице живя и насыщайся и наслаждайся от плодов его, благодарствоваше Бога, повсегда утвержаяся и утешался, христолюбныя подвиги исполните.[584]

Воньмем и мы, пустынножителнии христиане, притецем в пустыни сей к сему благоцветущему всеблагодатному финику, священному отцу Саватию, и не токмо притецем, но и житие свое при нем утвердим и кущи⁶³⁸ наша при благодатных плодех его водрузим, насладимся и насытимся усердно всесладкаго финика сего: подает бо неистощаемыя всесладкия плоды и насытит и усладит коегождо душу алчющую. Вонми всяк и содержи в своих памятных руках житие священнаго сего отца и повыну наслаждатися будеши пользы духовныя. Послушания ли, смирения и кротости хощеши научитися, воззри сего преподобнаго, в двою обителю[585] послушанием, смирением и кротостию труждающася и сих ради, яко ангела Божия, пред всеми просвещенна, любима и утешена, и тако желание свое возбудити к просвещенным сим добродетелем. Чистоте ли, молитвам и посту хощеши обучитися, сия в преподобнем преизобилно обрящеши и насладишися. Любви ли или благоутробия, терпения ли и молчания, умиления ли и плача духовнаго, веры ли, любви и надежды и прочих всех добродетелей научитися желаеши, сия в священнем сем отце, яко в преизобилном источнице, неоскудно почерпнеши. В вере ли православней утвержен и от многих развратов незыблем быти восхощеши, подражай священных сих светил Зосиму и Саватии и Филиппа[586] и их учеников, пострадавших за благочестие, сохраняя неблазнено⁶³⁹ их православное содержание святоотеческое, и будеши яко гора Сион,[587] не движущаяся никамо от противных ветров. В морьских ли волнах обуреваеми плаваем, к молитвам и заступлению Саватиеву и Зосимину прибегаем. Диявольскими ли ветры когда ратуеми бываем, сею святою молитвою победу на противныя прията возможем. Напасти ли кия безмерно возбурятся⁶⁴⁰ когда, слезными прошении нашими пошлем к Небесному Царю сих всесвятейших ходатаев и узриши вскоре молитв ради преподобных многобурливое море в тишину прелагаемо.

Темже, боголюбивии празднолюбцы и всеусерднии преподобнаго отца торжественницы, вселюбезным сим празднеством и всеутешителною памятию священнаго Саватия утешившеся и пользовавшеся довольно, от сердец наших умилно возопием к нему: «О, всесветлый светилниче, всемирьский молитвенниче и всем нам, многоскорбным, теплейший заступниче, преподобие отче Саватие! Спаси нас от всех належащих на нас бед, оборони от ратующих нас бесов же и человек, воздвигни с собою к пречистому Владыце на моление за ны стаинников⁶⁴¹ своих и постников Зосиму и Филиппа и прочих российских чюдотворцов и умолите Господа Бога за ны, немощныя и многонаветуемыя бедственники, грехом нашим прощение испросите, рати утолите, бури уставите⁶⁴², наветующыя изжените⁶⁴³, добротворящим нам возмездите⁶⁴⁴, братьство утвердите, брацких родителей укрепите и сохраните, послушников ваших и брацких соблюдите, ленивыя воставите⁶⁴⁵, страстьми раненыя исцелите, помраченныя исцелите, всему братству и скитяном спасение невлаемое⁶⁴⁶ произведите, да священными вашими молитвами настоящее житие тихостию препловем и будущих нетленных благ причастники сподобимся быти о Христе Исусе Господе нашем, ему же подобает слава и поклонение со Отцем и со Святым Духом ныне и во вся веки. Аминь».

«Уведите, яко удиви⁶⁴⁷ Господь преподобнаго своего».[588] Словеса сия священнаго Давыда, глаголаная во псалме 4-м.

Что ваше всекрасное днесь празднолюбное собрание, люботоржествении празднолюбцы, что толь многожеланное любезное совокупление, что таковое люборазжженное стечение, что толико многотщательное приседение⁶⁴⁸, толико огнепалное усердие, яко сице всежелателными сердцами, разгарающимися душами всетщательно стекостеся? Не инаго чесого ради, мню, не инаго, токмо яко да настоящаго небеснаго и нашего предивнаго венечника ⁶⁴⁹на всепраздньственое натрижнения позорище⁶⁴⁹, на многосветлое духовныя радости пиршество, на всекрасное ликования веселия, всеторжествено предложена, сладостно увидите: Саватия, глаголю, великаго и превзятаго⁶⁵⁰ отца, Саватия – всекрасное и многоценное добродетелей сокровище, всесладчайший евангельскаго жития сот, всепречюдный иноческаго пребывания образ; Саватия – киновийское преславное украшение, постническую многозарную⁶⁵¹ доброту, пустынное всесветлое солнце; Саватия – послушником правейшее⁶⁵² правило, молчалником незыблемый степень⁶⁵³, отшелником всеизряднаго верха; Саватия – соловецкое озарение, поморское осияние, всероссийскаго светилника. И что много глаголати, Саватия – небеснаго предивнаго человека и земнаго великаго ангела, егоже ныне всепраздньственое светлоносие, боголепное торжество всеосвященная озаряет память.

⁶⁵⁴Таковаго убо мужа, тако великаго и толь высокаго во святыни, елико всежелательно похвалити усердствую, толико недоумением препобеждаюся, украсити всеторжественое собрание желаю и недостоиньством воспящаюся; между толикими убо стеснении, толикими <и> таковыми угнетений нуждами, еда возглаголю или умолчю, ужасен веема недоумею: отсюду ревность жилу глаголания отверзает, природою словоглаголивая, отонюду же боязнь стесняет, страх одержит и ставляет мя⁶⁵⁴.

Обаче вашего любопраздньства всеизряднымь желаниемь и к великому отцу разжженою⁶⁵⁵ любовию препобежден, начинаю вышесильная, вхожду в невходимая завесы, в преестественая, глаголю, и предивная великаго великая добродетелей богатьства, не вся оная, не вся предлагая (не бо море горестию⁶⁵⁶ мерити, ниже капли дождевныя, ниже песка количество навыкох исчислити ), но некая малая от преславных и неизреченных онаго хранилищ, грубословне на грубоплетенном словосочинения блюде представляю, могущая украсити веселия ликование, уяснити любопраздньственый позор⁶⁵⁷, усладити люботоржественых душы и на высоту всеизряднаго веледушия благосочетанно восперити⁶⁵⁸. И кое хощете, кое желаете видети предивнаго отца богатьство: преславное ли мира отвержение, малыми или никим от святых совершаемое, созерцати – всеизрядне преподобным измечтано⁶⁵⁹ узрите. Послушания ли прехвальное величество соглядати желаете – в того пребогатых сокровищах усмотрите. Святаго ли смирения всеблагодатную высоту показати – преизобилне и всесветле во оном изъявится. Конечнаго ли и верховнаго святыни, безмолвнаго уединения неописаную красоту и предивную на диявола победу узрети – пребогато от онаго пучин пребогато возблистает.

Гряди прочее⁶⁶⁰ на пресловущее⁶⁶¹ того добродетелей позорище, на предивное зрения преизмечтание⁶⁶², смотри прилежно преестественное мироотвержение, како мир презре, како родителей остави, како страсти отверже, како сласти оплева, дивно есть воистину слышати, дивнейши же сия зрети. Елма не токмо мира отбеже, но и страстей его отвержеся, и не токмо страстей, но и сродников и родителей, и не токмо самех родителей остави, но и имена их чюдному гробу забвения предаде, и не сия токмо, но и град и отечество всекрасною молчания глубиною покры,[589] елико далним и незнаемым неявлена, толико единожителным и сонравным⁶⁶³ неведома и всякому слуху человечю неизвестна, сия веледушно остави.

О, произволения дивнаго! О, вещи преестественныя! О, соделания неуслышаннаго когда! Кто тако мира отвержеся? Кто тако своя родителя безименна остави? Кто свое отечество землею безвестия погребе? – Воистинну никтоже. Един предивный наш началоторжественник⁶⁶⁴, един сей новый Мельхиседек,[590] без отца, без матере, без присвоения рода,[591] отечества не имея, града и веси не имея, странник странный на странней земли странно пребывая и якоже вся сия за любовь пресладчайшую Божию, вся, презрев, остави, вся во глубине благодатнаго безстрастия предивно погрузи, тако вящьшая и превысочайшая неизреченно приобрете: за тленный и вещественный мир – нетленный и приснопребывающий, за плотьскаго отца – небеснаго всемилостиваго Бога, за матерь плотьскую – небесный Иерусалим, матерь Павлову;[592] за сродники телесныя – святыя небесныя ангелы, за отечество земное – всекрасное отечество небесное приобрете. «Сей род ищущих Господа, сей род ищущих лице Бога Ияковля»[593] (Псалом 23).

Таково убо того пречюдное мира отвержение, таковыми преестествеными олимпийскими победоносии всесветло сияющее. Каково же преподобное послушание, многотрудное и великострадательное? Еда не преестествеными кипит благодатьми, еда не вышше земных разумом прелетает, еда не великаго удивления есть преисполнено? Егда бо святый в киновию вниде, егда начатки обета Богови отдаде, тогда тогда всю плотьскую волю, вся телесная хотения, яко гнусное рубище совлек, поверже и, ⁶⁶⁵яко железо ковачю, аще на жжение, аще на млатобиение, аще на преломление, во вся благопокорно повинуется⁶⁶⁵.

Тако блаженный сей страдалец настоящему во вся тяжчайшия труды, во вся нуждныя случаи готовейший бяше послушник. Кто убо в киновии дрова сечаше? – Саватий. Кто воду на плещу⁶⁶⁶ нося, варение⁶⁶⁷ братии устрояше? – Саватий. Кто жерновы кругообращая⁶⁶⁸, на братьство хлебы печаше? – Саватий. Кто тяжчайшия и великотрудныя службы исполняше? – Саватий. Яже бо иным неудобоносна и печальна, сия блаженному удобна и всерадостна бяху, и тамо водворяшеся, идеже множайшии труди и подвизи; и оттамо избегаше, идеже упокоение и легкость. Негли в начале токмо, негли новоначалный[594] сия содеваше? – Никакоже, но и утружденный и совершенный инок.[595] И в другую киновию вшед, такова же добропослушнаго страдальчества, тех же многотрудных подвигов держашеся.[596] Аможе⁶⁶⁹, яко новопришедшу, ити повелевашеся, древие ли сещи и нивы уготовляти потребно бяше, Саватиеви повелеваху; бразду ли прочертати и семена сеяти время приспеет, Саватия посылаху; рыбы ли уловляти на братию нуждно случится, Саватия понуждаху.

И всюду и всегда и во всех случающихся потребах дивный сей благотрудник, яко многотрудный снузнец⁶⁷⁰, повиновениемь украшашеся; яко твердый адамант, долготерпениемь блисташе; яко высокопарный орел, юностию обновляшеся.[597] Коль трудами богатея, великоподвижными поты изобильствуя, многострадательным послушаниемь всекрасно благотрудствуя, толь и разжженым уеердием цветяше и всеспасительным веселием радостно просвещашеся, пресладчайшему Владыце Христу, всежеланно сообразуяся, «послушливу бывшу до смерти, смерти же крестныя»,[598] рекшему причистыми си усты: «Снидох с небесе, не да творю волю мою, но волю пославшаго мя Отца» (Иоанн, 16).[599]

Пречюден ли позор великаго послушания всеблаженнаго отца показася, позаратаев⁶⁷¹ удивляя очеса, пречюднейши зрелище всесвятаго смирения онаго возявится, услаждая любопраздньственых сердца, егда бо зрим великаго сего мужа, безчестие, яко мед сладок, пиюща; безславия, яко высоты⁶⁷², ищуща; худость последнюю, яко сокровище многоценно, носяща; странничеством, яко княжением, украшающася; и тамо живуща, тамо водворяющася, идеже незнаемство⁶⁷³ и странство⁶⁷⁴, идеже худость и безчестие, идеже последния нищеты и безславия пространьство. Сице дивный сей венечник безчестие лобызаше, сице славы ненавидяше, и не точию ненавидяше, но и яко мерзостию гнушашеся, и не гнушашеся точию, но и многотщательно бегаше, место от места пременяя,[600] и тако бегаше чести, тако утекаше, яко от зверя ядовита.

Оле, чюдесе! Елико инии многотрудно подвизаются чести и славы всежелательно искати, толико пречюдный сей мужь многоподвижно потится⁶⁷⁵, еже от сея убежати. Еда не велик, еда не предивен отсюду святый показуется? Ей, предивен и велик! ⁶⁷⁶Аще бо высоких есть, еже доблествене понести досаду, святых же – еже без вреда пренести души хвалу, колико пресвятых есть – еже славы и чести гнушатися и бегати⁶⁷⁶. Якоже великий сей блаженник всяку хвалу и честь, всякое почтение красными ногама[601] поправ, поверже, сице всеблагодатным и многодобродетельным смирением преблаголепно удобрися. Не тако богатии сребром украшаются, яко сей смиреномудрием; не тако благороднии князи златыми гривнами выю украшают, яко сей странничеством незнания; не тако самодержцы порфирою и диадимою прославляются, якоже сей последнею худостию убожества всесветле вознесеся. Сие себе сокровище, сие богатьство, сие огорлие⁶⁷⁷ злато и венец славы себе вменяше, еже всех последнейшу, всех смиреннейшу и быти, и именоватися, Христа моего великое смирение всеусердне и пресветле собою и в себе изобразуя, рекшаго: «Научитеся от Мене, яко кроток есмь и смирен сердцем»[602] (Матф.).

Но доколе убо цветы пресладчайших плодов святаго на пиршество всекраснаго торжества представляем, доколе меньшая сокровища неизреченных богатств отверзаем, доколе началная великих того исправлении⁶⁷⁸ зрителем объявляем. Гряди убо, о, зрителю, гряди: се самое великое и великоценное того богатств сокровище отверзается; се самый овощник⁶⁷⁹ мироуханных плодов показуется, се на тризну позорищнаго ликования предлагаются совершеннаго мужа всесовершенная великая действия. Кая же сия? – Совершенное бежание от человек, преславное отшельствие от мира, и не от мира токмо, но и от всея вселенныя конечное уединение,[603] многосокровищное добродетелей безмолвие, предивная храбрость, паче же преславная победа на духи лукавствия.

Аще убо предъявленая исправления мироотвержения, послушания и трудов велия и пречюдна суть, но нашему великоподвижнику, совершенному страдалцу, мала сия показашася, темже⁶⁸⁰ на лучьшая и высочайшая натрижнения⁶⁸¹ исходит и, якоже храбрый и многосильный воин, еже со инеми борити и побеждати сопостаты малая вменяя, ищет единоборствия, желает един самоборьствием⁶⁸² свою храбрость, свое непреодоленное мужество показати, тако великий сей и всехрабрый подвижник всеми иноческими подвиги со инеми ратуя и побеждая диавола, руце обучив на брань и персты на ополчение, прочее яко всесовершен самоборец на единоборное самоборствие исшед, един на диавола и на все воиньство его наступи и тако ратовав, тако победив, тако прогнав, яко не токмо самого преподобнаго отца, но и имене его врагом трепетати, свидетельствует святый святаго гроб, прогоняяй бьсы; свидетельствуют избавльшиися призыванием имене святаго от бесовскаго мучения.[604] Кто же изочтет того подвиги, кто изглаголет повседневныя брани, кто испишет присная натрижнения, яже преподобный творяше: како наступаше на диавола, како брань сострояше, како ратоваше, како самого врага побеждаше, како воиньство его гоняше и ⁶⁸³паки наступающа обращаше и безстудствующа прогоняше⁶⁸³, яко з богопесньцем глаголати святому: «Пожену враги моя и постигну я. Оскорблю их, и не возмогут стати, падут под ногама моима»[605] (Псалом).

Велико убо есть, еже единому единаго в самоборьстве победити, далеко⁶⁸⁴ величайше есть единому многия сопостаты ратовавшу побеждати. Колико превысочайши святаго победа возсияет, иже в вещественней плоти толикия враги, толикия невещественныя сопостаты, повседневными сражении всехрабро одолевая, побеждаше; и не яко Саул с тысящами, не яко Давыд со тмами воюя,[606] мужествоваше, но един на тысящи и тмы дерзаше, един тысящи и тмы безплотных врагов, побеждая, прогоняше, Дóндеже истни⁶⁸⁵ их, яко прах, и, яко брение, пути поглади⁶⁸⁶ их. Се нашего венечника великая храбрость, се препохвальное натрижнение, се многоудивляемое победоноство, еже не человеки точию удивляет, не плотныя точию позаратаи на чюдозрения созывает, но и самыя небесныя силы, самыя безплотныя ангелы преудивительно ликовствовати, всерадостно торжествовати и небесными увязении⁶⁸⁷ главу подвижника венчати прежелательно подвизает.

Оставляю прочая того великих натрижнении, оставляю премножество бдений, пренеисчетное многоблагоуханных молитв, недоведомое⁶⁸⁸ коленокланяний. Прехожду алкании⁶⁸⁹ величество, слез пучину, плачев и рыданий источники. Мимохожду⁶⁹⁰ очищений богатьство, осияний множество, боговидений сокровища, яже елико наедине един ко единому приношаше, толико един от единаго единствене услаждашеся. Частне⁶⁹¹ убо на земли живый, больши же ныне на небесех пребывая, совершеннее же наслаждатися и осияватися по воскресении будет, славу Божию откровене лице к лицу созерцая.

Видесте ли, о, люботоржественницы, великаго и предивнаго сего мужа великая и предивная исправления⁶⁹²? Видесте ли пребогатаго отца всебогатая безчисленых добродетелей сокровища? Видесте ли всекраснаго небеснаго венечника всехрабрых натрижнений всесветлая победоносия, толикими предивными чюдоносии, толикими прекраснейшими озарении, толикими светозарными блистании сияющая. ⁶⁹³Сия украшают торжество, сия наслаждают позаратаи, сия просвещают празднолюбных души, вся на чюдное пречюднаго венечника ликовательное красование всекрасне собирающе⁶⁹³.

Прииди и ты, Соловецкий оточе⁶⁹⁴, окропленый святыми святаго слезами, освященый преосвящеными того трудоподвизании, воструби ныне новомесячною трубою в благознаменное торжество твоего и нашего веселия, елико открывая неисчетное добродетелей богатство предивнаго отца, толико окропляя благодатными цветы всекрасное сие любопраздньствования позорище. Острови и брези морстии и пристанища, всесладчайшими свирельми велегласно возглашайте, яко праздньственое ликование украшающе, тако прехвальная святаго чюдеса изъявляюще. Великий окиане, даждь преясный глас свой. Волны, возвысите шумения своя. Реки, восплещите руками. Струи, воскликните гласом радости, проповедающе преизрядная чюдеса преподобнаго, бывшая в мори, и дивная знамения в водах многих.[607] Преславная Выг-реко, освятившаяся того успением,[608] обрати стремления⁶⁹⁵, возврати, яко Йордан, струи своя,[609] возглашающи во гласе вод многих преестествена дивеса⁶⁹⁶ на преставлении святаго[610] и по успении чюдеса велика. Над всеми же и пред всеми и во всех священный и чюдотворный гробе, благодатное святаго мощей хранилище,[611] всекрасный ковчеже священия, премногоценное святости сокровище, отверзи всеблагодатных ти хранительниц затворы, источи благоуханных аромат источники, тако предивное праздньствования торжество облагоухая, яко всесвятаго отца великое добродетелей богатство нам всесветле объявляя.

Да веселится прочее всерадостно земля, возрастившая таковый пречюдный небесный плод, возсиявши сицеваго пресветлаго светильника. Да радуется, ликуя, превысочайшее небо, приявши к себе толь пресвятаго жителя и дивнаго небесогражданина. Да восхвалят вси ангели Божии земнаго великаго ангела и небеснаго пречюднаго человека, удивляющеся того преестественному подвизанию, восхваляюще преславное на диавола победоносие. Да приемлет благодатно превечный Царь, всеблагий Господь Бог своего всехрабраго победоносца, венцем нетления и царьствием веселия украшая неизреченно, по реченному: «И приимут царствие благолепия и венец доброты от руки Господни»[612] (Премудрость, глава 5).

Мы же, о, всежелательнии люботоржественицы, вселюбезнии великих натрижнений великаго отца позаратаи, насладившийся того благодатными и святыми подвиги, почтем праздника светлость, взыграем праздньственая, возвысим торжество ликования, возвеличим всесветлый позор, уясним всекрасную собрания доброту. Восхвалим великаго отца нашего добродетелей богатьство, вознесем преславную преславных натрижнений храбрость, воспоем великих чюдоделий превзятое величество. Воспоем, возвеличим, прославим елико словоустными благодарения песнопении, толико всеусердными душевными благодарении, принесем отцу нашему честная и всесветлая дарования, дароносим всеспасительнейшая исполнения, дароносим настоятельствующии – прилежное и спасительное о пастве попечение, пустыннии – всеусердное мира и страстей и своея воли отвержение, послушнии – безотсловное⁶⁹⁷ блаженное послушание, могущий⁶⁹⁸ – всекрасное и благодатное смирение, немощнии – великомужественное терпение, богатии – евангельское благомилосердие, нищии – боголюбезное благодарение, труждающиися – безленостное подвизание, церковнии – всеусердное славословие, молитвопредстоящии – помыслов очищение, безмолвницы – блаженное молчание, отшелницы – всесвятое безстрастие. Принесем и, грешнии, покаяние, сердце сокрушеное и многослезное, от страстей удаление – страстнии, боголюбие вседушное – похотолюбнии, целомудрие – невоздержнии; и вси люботоржествении празднолюбцы всякаго имства⁶⁹⁹, возраста, чина и степени – превозжеленную, чистую и всеусердную похваления любовь отцу нашему всеверне принесем, всежелательно и всеблагодарствено поклонимся. Сицевыми краснейшими цветопролитии всесветлейшаго ликования торжество усветлим, сицевыми предивными увязении⁷⁰⁰ главу великопобедоноснаго отца венчаем. Сицевыми златоплетении, сицевыми багры⁷⁰¹ того украсим, таковыми благодатными хвалословии того ублажим, воспоем и восхвалим, яко да и зде теплаго его заступления и молитв насладимся и тамо всеблаженнаго наследия и вечнаго упокоения сподобимся ходатайством его получити о Христе Исусе во вся веки неисчетныя. Аминь.

Слово на память преподобных отец Зосимы и Саватия, соловецких чюдотворцов

«Праведницы во веки живут».[613]

Якоже на тверди небесней два светила великая, солнце и луна, всемудраго Бога премудрым повелением сотворенная и на просвещение мира предивно поставленная, всю поднебесную озаряют, весь мир обходят, всю землю назирают, весь воздух всекрасно просвещают, человеки на радость, животная на веселие, всю тварь на радостное играние подвизают, тако в нашей северней стране два великая и пречюдная отца Зосима и Саватий, дивно от благодати Божия российскому роду дарованная, вся чюдес зарями просвещают, вся преславными знаменьми удивляют, вся светом благодати лучезарно освещают, болящия исцеляют, бесы изгоняют, слепыя просвещают, мертвыя воскрешают, утопающия в мори спасают, плененныя свобождают и всю Россию таковыми преславными чюдесы украшают. Темже вси к мощем их с верою и любовию притекают, вси к ракам их со усердием припадают, ближнии и далнии, малии и велицыи, богатии и нищии, старии и юнии, мужие и жены, и вси от гробов их, яко от источников, исцеления воды богатно почерпают.

Сих убо великих и преславных чюдотворцев светлую и всечестную днесь совершаем память, сих прекрасный праздник празднуем. О сих и аз, недостойный, вашему благочестию краткое от малаго ми разума предлагаю слово, моля вы нестужително послушати глаголемых. Аще бо и не имам во устех моих златоструйныя реки медвенных словес, воеже похвалити богоугодную жизнь толиких мужей, аще мужи сия нарицати достоит, но добродетельная и чюдная дела преблаженных наших отец, аще и кратким и нехитроречивым словом предложатся, могут и сладости, вкупе и радости и пользы духовныя исполнити послушающих.

Якоже бо прекрасное злато не требует внешния красоты, не требует посторонния утвари, зане⁷⁰² само от себе дивную имеет красоту и естественная того утварь побеждает художеством сотворенную, тако преподобных отец наших богоданныя таланты не украшаются утварьми и цветы риторьскими, аще бы и ангельский язык похвалити тыя риторственно и велеречиво имел, занеже не суть добра, но самая чюдная доброта; не суть цветна, но самый цвет живый; не суть красна, но самая красота неувядаемая.

Но, о, Боже превечный, верше⁷⁰³ доброт и источниче благих, подаждь ми твою благодать с небесе, да возмогу рещи слово о сих великих и равноангельных мужех. Вы же, сынове церковнии, дадите ми слухи своя⁷⁰⁴, хотящу глаголати о толиких и таковых воинех Царя Небеснаго.

«Праведницы во веки живут». О, чюдесе преславнаго! О, дивства великаго! О, неизреченныя благодати твоея, великий и дивный во святых Боже наш. Человецы худороднии и безславнии, немудрии и нехитрословеснии, твоею благодатию просвещеннии и утверженнии, вечную обретоша жизнь и славу присноцветущую. Где бо отечество сих пресветлых граждан вышняго Иерусалима[614]? Не оваго ли слышим в Толвуи[615] рождьшася и воспитавшася. Вемы же, до коих мест дойде имя Толвуи, на коликих же поприщах и слава ея основася. Другому же кто весть отечество, кто слыша имя отчеименное[616]? И не оба ли беста худородна и безславна, не оба ли далече пожиста⁷⁰⁵ всякия чести и славы мирския? Кия саны, кая достоинства иместа? Что же речем о мудрости ею⁷⁰⁶? Аще бы кий из нею по обычаю любомудрых вопрошен был, что есть писмя⁷⁰⁷ или что есть человек, кий ответ сотворил бы?

Не первое ли их учение Псалтырь, второе же Апостол и третие Евангелие? Не вся ли высокая Лествица⁷⁰⁸ наук в сих трех священных книгах и мняшеся, и содержашеся у них? И воистинну сия есть высокая пренебеснаго учения Лествица, ибо отсюду родися има всекрасная философия о безсмертной жизни, о славе святых, о Царствии Небеснем, о пищи нетленней, о благих, «ихже око не виде и ухо не слыша» и сердце человеческое разумети и ум земнородных помыслити не может, «яже уготова Бог любящим его».[617] Не видим ли како «буее Божие мудрее человек есть»[618]? Не видим ли, како не ведущии алфы[619] определити превзыдоша высотою премудрости и Сократа[620] премудраго, и Платона[621] хитрословеснаго, и Аристотеля,[622] отца философов, и Омира[623] творцев⁷⁰⁹ начальника?

Кое училище преславных наших философов Зосимы и Саватия? – Весь четвероконечный мир, в немже, аки в зерцале, ясно видится всевиновная⁷¹⁰ премудрость, всемогущая сила и неизреченная доброта присносущнаго и невидимаго Бога. Кто тем учитель? – Источник премудрости и разума Дух Святый, иже и слепцы умудряет и безсловесным слово дает. Кое сих чюдное любомудрие? – Еже долняя презирати и горних желати, еже земная оставляти и небесная искати, еже временная пометати и вечная гонити⁷¹¹. Кий сладчайший плод вышния премудрости? – Слово Божие, еже пророцы и апостоли проповедаша, сии на скрижалех сердец своих написаша; учение богословское, еже учителие пролияша, аки воду, тии тщательно собраша в души своя, якоже собирают пчелы сладость медвенную⁷¹². Кое многоценное имство⁷¹³ толиких философов? – Стяжаша премудрость, аки прекрасное злато; разум же, аки сребро искушено⁷¹⁴ [624]?

Что же дело их достохвальное? Егда приспе им время жены пояти и чада сотворити и домы строити и богатьство собирати и благих века сего наслаждатися, тогда они ино дело обретоша, дело великое и преславное, дело, безсмертныя похвалы достойное, еже мира отрещися, волю свою попрати, страсти своя умертвити, крест взяти и Христу последовати. И толико прилепишася ко Христу любовию, толико разжегошася желанием его, яко богатьство и славу презреша, аки уметы⁷¹⁵,[625] сродников и знаемых отлучишася, вселенныя отбежаша и во оток морский вселишася.

Оле, колико может любовь Христова! Кое пребывание на острове морском, кая тамо жизнь, кая сладость, кое веселие, кая красота, кая пища, кое питие, кое покоище, аще не сам Христос! Како же пожиша на острове, како подвизашася, како невидимыя враги победита, како чюдес действо прияша, како пустое оно место, яко град, сотвориша, не нашего языка есть глаголати, ниже нашего ума помыслити, ниже нашего уха слышати. Ангели Божии, хранившии их и предстоявшии с ними Господеви и послужившии чюдесно требованию их, якоже повесть жития их сказует, тии видеша труды их и подвиги, тии изочтоша⁷¹⁶ и молитвы их, и коленопреклонения, и слезныя потоки, и яже из глубины воздыхания. Тии могут с достойным похвалением достойно исповедати и житие их преестественное, и дела их преславная, и заслуги, достойныя вечных венцев, и победы чюдныя на нечистыя духи.

Мы же что можем рещи или помыслити о толикой высоте жития их святаго? Аще быхом имели и уста многоглаголивая, и язык хитроречивый, и мысль пернатую⁷¹⁷, и ум огненный, откуду могли быхом ведати тех и дела, и словеса, и помышления, бывшая втайне пред единым сердцеведцем Богом? И кто может подробну написати все житие их? Кто бы был толикий скорописец, дабы написал книгу толикую, яже могла бы быти безмернаго величества? Не туне⁷¹⁸ убо нарицаются святии и преподобнии, но понеже свято и преподобно пожиша. Не туне вечный живот обретоша, но понеже делаша дела, достойная толикия мзды. Обретоша славу вечную, понеже временныя отбегоша. Преселишася на небо, понеже землю оставиша. Преложишася в премирная, понеже мира и мирскаго пристрастия удалишася. Со ангелы предстоят Богу, понеже ангельски послужиша ему. Небесное мудрование имеша на земли и Небесное похитиша Царство, небесную славу прияша, небесными венцы увязошася. Жилище их есть вышний Иерусалим, клеврета⁷¹⁹ их – святии ангели и архангели, друзи их – херувими и серафими, братия их – пророцы и апостоли, и праотцы и патриарси, и мученицы, и исповедницы, и преподобнии. Отец их – сам Бог превечный, Царь небесе и земли и всех видимых и невидимых Создатель и Владыка; покоище⁷²⁰ их – недро Авраамово,[626] пища их – манна сокровенная[627] питие – вода животная, исходящая от престола Божия;[628] одежда – ризы позлащенныя, седалище – престол небесный. Красота их не увядает, жизнь их смертию не пресецается, радость их неотъемлема, честь их непрестанна, слава их безконечна, преимущество их неизреченно, доброта неизменна, похвала непремолчна, блаженьство непостижимо, светлость неприступна, сладость недомыслима⁷²¹, веселие неизглаголанно⁷²².

О, колика блага уготова Бог любящим его! О, коликими венцы венчает Царь Небесный похищающыя⁷²³ царство его! О, коликою славою прославляет Владыка рабы своя! Который кесарь в мире сем прият толикую славу? Кий самодержец толикое сокровище благих поне⁷²⁴ во сне видети сподобися? Кому от земных таковая и толикая на сердце взыдоша? Кое сердце не радуется, слыша толь предивныя почести святых? Кая душа не играет, мечтающи⁷²⁵ чюдную ону красоту? Кто нечювственный и окамененный не желает радости тоя и сладости, еяже сподобися преподобная сия двоица отец? Что сего блаженства высочайше? Что сея славы светлейше? Что сего воздаяния больше, еже с Богом быти, и Бога наслаждатися, и Бога имети всещедраго отца и всемилостиваго Владыку, и всесладчайшаго друга, и прежеланнаго клеврета, и пресветлый дом, и всекрасное жилище, и чюдный свет, и безсмертный живот, и присносущную сладость, и нетленное сокровище? Аще бы «лучше есть день един во дворех Божиих, паче тысящ»,[629] колико лучше тамо безсмертное пребывание. «Праведницы бо во веки живут».

Помыслим, яко Зосима и Саватии не сто лет, но вечное житие живут. Помыслим долготу онаго блаженнаго пребывания. Помыслим, яко ниже тысящами лет, ниже тмами,[630] ниже легеонами[631] исчисляется оный век, понеже безконечен есть. О, блаженная жизнь коль сладка, коль всерадостна, коль возжеленна еси! Добрии воистинну купцы беша отцы наши, яко временными труды и подвиги купиша вечный покой и в мертвенном естестве получиша славу. Что убо тыя наречем? Ангелы ли? – Но во плоти пожиша. Человеки ли? – Но ангелом уподобишася. Которыя им принесем хвалы достойныя? Кия сплетем венцы? Где и в коих всекрасных цветниках риторских обрящем словеса, приличная славе их превысокой? Кое чюдное имя равно обрящется чести толикой? Отцы ли тыя себе нарицаем, преподобныя ли мужи, наставники ли иноком, собеседники ли ангелом, чюдотворцы ли преславныя, други ли Божия, угодники ли Христовы, столпы ли благочестия, звезды ли церковныя, светила ли земли российский? Вся имена сия по единому мала суть и неравна чести их и славе, зане вся они суть и все, еже есть честно и многоценно, и дивно и преславно, сие вещество есть похвалы мужей сих. Ибо они суть скорбящим дивнии утешители, плачющим сладкое веселие, по водам плавающим добрии правители⁷²⁶, потопляемым чюднии спасители, нищим сокровище неистощимое, богатым наставницы ко спасению, слепым просветители, хромым врачеве, разслабленным исцелители, бесом прогонители, безпомощным помощницы, ⁷²⁷безнадежным твердое надеяние⁷²⁷, болящим благодатное врачевство, плененным радостное свобождение, грешным к Богу ходатаи, иноком украшение многоценное, пустынножителем слава высокая, послушником похвала немолчная, поморстей стране красота неувядаемая, Соловецкому острову доброта пречюдная, всей российской земли отцы и учители и прибежище во всяких бедах и напастех, Темже, возлюбленнии, таковых великих, таковых преславных и божественных мужей всечестную творяще память и высоте жития их чюдящеся и Царствия Небеснаго ищуще, подвигнемся усердно на труды добродетелныя, имиже Царство Небесное приобретается.

Аще бо временных ради благих много труждаемся и дневныя ради пищи землю орем⁷²⁸, и семена мещем, и нивы ограждаем, и серпы куем, и класы жнем, и снопы собираем, сушим, молотим. Зерна мелем, и мельницы и житницы строим, и пещи разжигаем, и хлеботворение и варение и прочая безчисленная умышляем: скотския дворы, травы сечение, рыбныя ловитвы, по земли далечайшия пути, по водам нужная плавания, в треволнениях морских, в быстринах речных, в разбойнических нападениях, нестерпимыя страхи, непрестанная попечения, премногия поты, лютыя беды и всегдашния противныя случаи. Сия же вся единаго ради чрева и творим, и страждем, и не сие промышляем, еже не умрети (непреложный бо закон есть, и чаша необходимая всем человеком – смерть). Но о сем точию печемся, еже не от глада, ни от жажди, ни от зимы, ни от студени⁷²⁹, ни от разбойников, ни от инаго в своем небрежении случая умрети, но от Божия непременнаго устава во уреченный всепремудрым промыслом его день же и час.

Кольми паче должни есмы тщатися и трудитися и подвизатися о еже Царство Небесное получити, о еже вечный живот наследовати, о еже оная неизреченная благая восприяти.

Что же делати должни есмы, да оный всесладчайший живот и нетленную пищу получим? Учит нас сам вышний Бог Священным своим Писанием, учат и преподобнии отцы Зосима и Саватий самым преславным житием своим, яко подобает уклонитися от зла и сотворити благо, еже и пророк советует всякому хотящему живота: «Уклоните же ся от зла»,[632] – есть дело не малое некое, но и зело многаго труда требующее, сие бо есть еже терние греха от земли сердечныя искоренити, еже лядину⁷³⁰ злобы секирою слова Божия изрещи⁷³¹, сожещи же и испепелити огнем любве Божия, изорати⁷³² землю душевную ралом креста, в негоже не вол, ниже осел, но сам Христос волею впряжеся, хотя⁷³³ жестоту душ наших умягчити. Потом же подобает сеяти небесное семя евангельскаго учения, чистоту, яко пшеницу, любовь же, яко ячмень, и оградити оплотом смирения, да тщеславие, яко вепрь дивий⁷³⁴, не пояст нивы нашея; достоит же просити и дождя свыше сходящия благодати, да не зной страстей изсушит небесное семя.

Таковым тщанием и трудом, аще в нынешнем веце потрудимся делати добродетель, возрастут нам дивныя плоды ея: вечная радость, безсмертный живот⁷³⁵ и нетленная Небеснаго Царствия сладость, яже жати имамы в будущем веце, зане нынешнее время есть сеяния, будущее же – жатвы, якоже апостол располагает⁷³⁶, глаголя: «Доброе творяще, да не стужаем си⁷³⁷, во время бо свое пожнем не ослабеюще».[633]

Хощем ли и иным прикладом⁷³⁸ навыкнути дело спасения, помыслим труд путешествия, глаголет бо апостол: «Тако тецыте, да постигнете».[634] Якоже убо земледелание, тако и путешествие многаго требует труда, непрестаннаго подвига и тщания усерднаго. Хощет ли кто прейти до Рима или до Константинополя, о, коликое имеет попечение и коликий труд полагает! Первее убо путь следует, камо и чрез которая знаменитая места тещи имать, вопрошает долготу пути, поприща[635] исчитает, потребная к путешествию готовит, сребро, хлебы, пищу, ризы, обущи и прочая. Таже течение самое начинает усердно, трудится желательно, ступает со многим потом, вопрошает всегда сретающих⁷³⁹ и живущих при пути, аще той есть, иже ведет во он град; боится и разбойников и оружие носит с собою, и аще сразится с ними, всею силою подвизается на них и клевретов и спутников своих понуждает на подвиг. И егда доволное время потрудится в течении и долготу пути прейдет и желаемаго града достигнет, тогда радостию радуется и сладкий покой приемлет.

Мы же, от земли в Небесное Царство желающе прейти, о, како ленимся, о, коль нерадиво и нежелательно течем! Не подобает ли и нам следовати путь своего течения, вопрошати же прошедших путь сей святых апостолов и учителей, кая распутия на пути сем обретаются и киих заблуждении стрещися⁷⁴⁰ подобает? Аще нападут душеубийственнии разбойницы, имамы оружие креста и стрелы молитв, имиже немощное их шатание тако низложити можем, яко ктому⁷⁴¹ не возмогут стати. Тецем убо усердно путем заповедей Божиих, да достигнем радостно вышняго Иерусалима и в тамошних пресветлых обителех вечное упокоение, неизреченную радость и безсмертное наслаждение обрящем молитвами и заступлением досточюдных отец Зосимы и Саватия, благодатию же и человеколюбием самого Христа Спасителя нашего, яко тому подобает слава, честь и поклонение со безначалным его Отцем и с Пресвятым Духом ныне и присно и в безконечныя веки. Аминь.

Месяца августа 30 дня

Давыд, царственный псалмопевец, поет: «Праведник, яко финик, процветет и, яко кедр, иже в Ливане, умножится»[636] (псалом 91).

Понеже убо многа ваша любовь и усердие к великому светилнику и чюдотворному отцу Александру, о, боголюбивии преподобнаго отца торжественници, чесо ради не токмо молитвенный дом украшаете и всекраснаго торжества исполняете, но и домы своя страннолюбием и нищелюбием благоухати устраяете и всех отвсюду братолюбия неводом к себе притягаете, яко и нас, грубых, понудити на торжество сие приити потщастеся.

Что же убо аз, грубейший, аще и не возмогох и не попустиша ми темнобурнии греховнии нанесшиися по аеру⁷⁴² облацы к вашему празднолюбному совокуплению приити, но обаче сердцем моим и отсюду с вами торжествовати преподобнаго отца единоусердствую. Аще и телесне не приидох, но душевне и чрез сие писание мое совокупляюся торжеству⁷⁴³, почитаю празднество, лобозаю преподобнаго, блажу⁷⁴⁴ торжествующыя, соусердствую празднующим.

Кого же и какова священнаго мужа хощем, о, мои любезнии торжественници, празднеством сим почтити, воздвигнем душевнии очи наши и усмотрим, ибо хощем праздновати торжество великаго в преподобных отца, земнаго ангела, небеснаго человека, всесветлую звезду, солнца всероссийскаго.

Иже от Ояти воздвижеся и великую победу на диавола показа, иже от простых людей породися и всемногоковарное лукавство бесовское растерза, иже от поселян породися и на небесех славен бысть, иже близ Свири реки поселися и во всей России прославися, иже в незнаеме человеком месте водворися и небесным ангелом и человеком преславен учинися, иже в нищете последней поживе и богатством небесным вечным обогатися.[637]

Что же сия всесветлая звезда творил бяше и каковыми преславными делы преславен учинися? Сей храбрый Царя Небеснаго воин и крепкий преподобных полка воевода попра мирская вся возжеления⁷⁴⁵, потопта вся прелести телесныя, поплева страстная похотения, отвержеся мира, вселися в пустыню. Таковый смиренный, таковый нищий, безхрамный⁷⁴⁶, бездомный, простый и невежда (о, чюдеси!) толь храбро, толь мужественно ополчися на диявола, на вся воздушныя князи, на вся полчища бесовская и с толикою смелостию и победою на адския силы наступи, яко до конца низложи и разогна.[638] Смирением гордость диявольскую низложи, постом и терпением похотения его пресече, нищетою и нестяжанием сребролюбный хребет ему сломи, целомудрием и безстрастием страстнаго хотения жилы ему прерва, молитвенным огнем вся стрелы его попали, вседобродетелным в вере, любви и надежди житием его тмоглавныя греховныя главы вседияволскому полчищу отсече.

И толико богоугоден бысть, и толико от Бога любимь бяше, яко живый еще на земли сподобися зритель быти славы Святыя Троицы.[639] О, чюдесе! Чистыя ради его и богорачителныя души бысть яко безплотный херувим и серафим[640] и яко Моисей боговидец, и Илия огнеколесничник, и Авраам, Святыя Троицы странноприятель.[641] Того сподобися видети живый еще во плоти, егоже вся небесныя силы зрети не могут, того трисиянным светом просветися, егоже с трепетом славят херувими и серафими.

Где же сей наш новый боговидец преславных таковых зритель быти сподобися? Еда⁷⁴⁷ во Иерусалиме, земли обетованней? Еда на Синайстей и Хоривстей горах,[642] еда в Риме и в Цареграде или в прочих славою сияющих странах? Ни убо! Но возсия сей великий светилник и сподобися новый боговидец быти в российстей земли, в заонежских и посвирских пустых местех, близ корелскаго простаго народу, прежде от человеков внезнаемем месте, послежде от него прославленнем и просвещеннем и во вся российский концы доныне пресловущем⁷⁴⁸.

Коль же предивен есть и за сие, яко в такое время мужественно возблиста, в неже мрачнии слабостнии обычаи в человецех умножахуся. В тыя дни вышеестественно в преподобии поживе, в кия женчища⁷⁴⁹, по апостолу, человецы слабожителнии по всей земли возрастаху[643] В тое время пресветло, яко солнце, в России возсия, в кое западнии мрачнии облацы от Рима вселенную покрываху. В тую годину трисолнечным Святыя Троицы светом возблиста и всесветлоев России благочестие истинно и Пресвятей Троице угодное показа, яко в том живя, сподобися угодник быти Живоначалней Троице, в которыя годы мрачныя ересныя бури, терзающыя истинное Святыя Троицы богословие, по вселенней возшумеша и многи народы мраком ересей помрачиша.[644] Егда премрачная греховная злоба покорством человеков возвысившися, яко царица возгорде и непреодолеема ни от кого быти возвысися, по Богословному тайнопроповеднику, всегордо воскрича: «Сежу, – рече, – царицею, плача и печали не узрю во веки»,[645] – тогда сей наш прелюбезный полка христиан мужественный воевода и храбрый в добродетелех Пресвятыя Троицы воин в Церкви Российстей, яко силный Сампсон,[646] возхрабрствова на злобу, всю тую растерза, всю низложи, всю попра и немощну и безсилну показа и вся церковная чада ратовати на ню вооружи.

И оттоле и доныне молитвами своими за все православие заступает, за вся християны Святую Троицу умоляет, всем странам российским помогает, всех чюдесы своими удивляет, обонежской и посвирской стране всекрепкий заступник, пустынным и богорадным⁷⁵⁰ людем отец милосердный и стена всетвердая. О таковых бо в преподобии преславных мужех пророческая уста вопиют: «Дивен Бог во святых своих, Бог Израилев».[647] И паки: «Святым, иже суть на земли его, удиви Господь вся похотения своя в них».[648]

Того и такова великаго светилника всепреподобнаго Александра, нашего и всея России теплейшаго молитвенника, празднуем сей день. Темже, о, празднолюбци и вселюбовнии преподобнаго сего светилника торжественници, соберемся не телесы токмо, но и сердцы и душами всеусердно почтим нашего теплейшаго заступника, богоноснаго отца, прославим в песнех прославльшаго его, Спаса Христа, облагоухаем⁷⁵¹ празднество, украсим торжество, отвержем злобы, отринем беззакония, восприимем добродетели, возлюбим спасителный путь, имже преподобный сей шествова, раздерем злобы, яже друг на друга, угасим вражды, ропоты и клеветы утишим. Всецарьствующую любовь к Богу и ближнему всадим в наша сердца, смирением украсимся, молитвами просветимся, чистотою возблистаем, постом и воздержанием утвердимся, верою и надеждею возмужаем, в благочестии преподобнаго отца укрепимся и молитвами и заступлением его оградимся. Свещным светом, яко звездным сиянием, священный священнаго отца образ облистаем⁷⁵², милостынями и страннолюбием священный день сей почтим, всеми добродетелей маргаритами⁷⁵³ возсияем торжество и поучением и слушанием слова Божия возсветлим празднество.

Тако, доблии, тако, возлюбленнии, тако, боголюбивии торжественници, преподобнаго сего отца всетепла себе заступника стяжем⁷⁵⁴ и тако его ради молитв Бога милостива себе получим и в настоящих безпакостно поживем и будущих благ насладитися сподобимся.

Молитвами священнаго отца Александра, Пресвятая Троице, помилуй и спаси нас, и тебе славу возсылаем, триипостасному Божеству, всегда и ныне и присно и во веки. Аминь.

Грубейший А<ндрей> Д<енисов> покорно кланяюся и Богу и преподобному за ся ваших братолюбных молитв прошаю.

Святому апостолу и евангелисту Иоанну Богослову

«Во всю землю изыде вещание их и в концы вселенныя глаголы их»,[649] – словеса сия пророческая в книзе псаломстей написанная суть.

Якоже звезды пресветлыя сияют на тверди небесней, тако священнии апостоли евангельским учением возсияша во всех мира концех, во всех странах тму идолобесия отгнавше и всю землю светом богоразумия просветиша. От них же един всесветлый светилник – празднуемый днесь великий Иоанн Богослов, иже возлегай на перси Христовы[650] и оттуду почерпну неизреченных таинств, иже возлюбленный ученик Христу[651] и превозлюбленный сын и служитель Пресвятыя Богородицы,[652] иже Ассию благочестием просветивый[653] и всю вселенную богословнаго учения исполнивый, иже возгреме богословный глас и вся еретическая полчища посрами, иже неизреченных тайн Тайнозритель и последних времен благочестивым людем наказатель⁷⁵⁵,[654] иже девства священный сосуд и девственнаго благоразумия обучитель,[655] иже любви исполненный кратир⁷⁵⁶ и любви всекрасный проповедник[656] егоже всесветлаго ради торжества предлежит нам о благодатном его светосиянии слово. ⁷⁵⁷И мы убо малейшимь нашимь черпаломь от нилоструйных того благодатных источник вам, празднолюбным того пиряном, худою нашею силою словесною почерпати потщимся⁷⁵⁷. Вы же, любовию святаго вперяеми⁷⁵⁸, приидите, насладимся благодатнаго онаго источника и исполнимся великия пользы духовныя.

Понеже Бог есть начало и вина всех благ, сотворитель и податель всех благодатей, иже есть доброта неисчерьпаемая, величество несконченное, пребывание вечное, власть и держава превышшая, мудрость непостижимая, воля благая и беззлобивая, сила всемогущая и непреборимая, истинна самосущая⁷⁵⁹ и непоколебимая, слава неприступная и неизреченная; того всеблагаго и всех благ подателя Бога сей благословный апостол всему миру проповеда, исповеда превечнаго всемогущаго Отца, иже посла в мир на спасение Сына своего единороднаго. Провозгласи всем превечное Божие слово, глаголя: «В начале бе слово, и слово бе в Бозе, и Бог бе слово. Се бе искони в Бозе. И вся тем Быша. Ибо без него ничтоже бысть, еже бысть».[657] Исповеда всем Духа Святаго, проповедая о нем реченная Христова словеса, глаголя: «Дух истинный, иже от Отца исходит, той вы наставит на всяку истину»[658]

Якоже ангели Божии, невещественнии Божии слуги, выну Божиимь светолитиемь просвещаеми, всегда Божиимь славословием утешаеми, славословяще того неприступное Божество, с великим желанием волю Божию исполняю<ще>, в мир благовествуют Божие хотение, тако сей земный ангел и небесный человек, великий апостол Христов, исполнився Божия любви, исполнився Святаго Духа, исполнився премудрости благодатныя, просветився священным богословиемь, всюду Бога проповеда, всему миру истиное богословие исповеда, всех научи веровати во Святую Троицу, всем заповеди и повеление Божие беззавистно сказа и научи, человеки земныя верою правою ангелы сотвори и ангельски небеснаго Бога богословити и благословити наказа.

Дивно дело, яко на небесех ангели Божии, безчисленнии вои⁷⁶⁰ небеснии, безплотнии господни слуги, светоблистающия вышния силы, молниеноснии пренебеснии народи, выну пред Божиимь светопролитиемь предстоят, всегда неприступны, Божество его славословят и тем славословиемь Божиимь неизреченныя радости и веселия благодатнаго исполняются. А сие не дивно ли дело, яко на земли человецы смертнии, плотию тленною одеянии и телесным тимением⁷⁶¹ и невежеством связуемии, сии, Иоанновымь учениемь просветившеся и небесныя от него богословии научившеся, земное тимение оставивше, на небо восперишася и небесным чином возревновавше, на земли небесное ликостояние учиниша и, невидимаго Бога познавше, ясно богословят и славословят; и вежи, и невежи Сына Божия со Отцем и Святым Духомь проповедают; и старии, и юнии Сына Божия всегда во устех призывающе, имеют.

Колико же добродетельми преудобрен сий священный мужь и сию добродетельную светлость насади в человечестем естестве! Якоже всепресветлое емпирийское небо[659] теплотою духа и светлостию любви к Богу и ближнему возблиста и якоже звездосияющее небо безчисленными светлосияющими добродетельми возблиста, и якоже солнце вселенную озаряет, тако сей святый мужь весь мир добродетельною светлостию украси. ⁷⁶²Не тако небесныя планиты светлостию и действы своими земных пользуют⁷⁶², якоже сей всесветлый светильник научи и научает земныя человеки небеснаго жительства. Показа путь к вечным обителем, мужественны в борениих противу диявола и мира учини и вечных благих наследники быти учини.

Егда бо услыша Спасов глас реченный: «Се Аз посылаю вас яко овцы посреде волков»,[660] оттогда⁷⁶³ святый Иоанн смирение и кротость, яко агнец, восприя и от гонителей, яко от волков, многая гонения, озлобления и муки Христова ради имене претерпе, никому зла за зло воздая. И, яко голубь, целу всегда любовь и беззлобие ко всем имеяше и любве ради за вся умрети производите⁷⁶⁴, да всех ко Христови приведет. Мужеством же души не устрашися безчисленных шумов⁷⁶⁵ гонительных, но, яко лев лисицам, сице он на ельлинская безчисленная множества словеснымь оружиемь наступи и, яко высокопарный орел, проповедию евангельскою вселенную облете, капища идольская низложи, а православную веру всюду насади.[661] И якоже люботрудныя пчелы всюду облетающе, на вся древа вооружаются, вся цветы облизуют, отвсюду собирают пресладкий мед, тако сей люботрудный Христов апостол на вся идоложерцы⁷⁶⁶ устремися, вся страны облете, везде собра пресладкий благочестия мед, вся огорченныя⁷⁶⁷ бесованием страны всесладчайшимь правовериемь услади.

И якоже всекраснейший, многоплодный и доброцветущий виноград, благочестие в человеческих душах насади и возрасти, имже, яко виноградным древам корение крепкое, положи благочестие и смирение, ⁷⁶⁸тема непадателны человеки сохраняющая⁷⁶⁸: столп же – веру, в высоту к Богу возрастающую; лубие⁷⁶⁹ или кожю древес – надежду, от всяких ветров и пострашений диявольских охраняющую; вместо мокроты⁷⁷⁰, древо оживляющия, – любовь, оживляющую и услаждающую душевный виноград; ветви же прекрасных сих древес положи четыре евангельский добродетели: мужество, мудрость, целомудрие и правду; лозы же краснейшия – другия добродетели, от сих исходящия: молитву, воздержание, чистоту, послушание, крототерпение и покаяние и прочия добродетели, яже многоплоден и всесладостен виноград сей показующься; цветы же благоуханныя сих древес – благодати Божия; листвие же – добрая слава, по писанному: «Тако да просветится свет ваш пред человеки, яко да видят ваша добрая дела и прославят Отца вашего, иже на небесех»[662]; всесладчайшее же овощие⁷⁷¹ сего винограда – жизнь вечная, даруемая праведным в Царьствии Божии. О, всекраснаго сего винограда! О, всесладостных сих вечных плодов! О, премудраго сего богословнаго садоделателя! Колику любовь показа к человеческому роду, да их от тмы на свет возведет! Колико претерпе, да их от диавола избавит и к Богу преблагому присвоит!

Ибо огнемь божественныя любви распаляем и ревностию божиею разгараемь, капище Артемидино молитвою испроверже⁷⁷², службы идольския, яко огнь, пожже и испопели⁷⁷³.[663] Грознаго волхва Кинопса в морских водах, яко фараона втораго, погрузи[664] и яко пресладкий зефирь[665] на Ассию повея. И всякое душевное смертоносие прогна и благодатнаго благоухания земныя концы исполни. И терние греховное из земли сердец человеческих искорени. И семя благочестия в души человечи посея и неплодную землю плод приносити во сто и шестьдесять и тридесять устрой. Толико бо бяше суха и неплодна Ассия, яко никогда благодатный дождь орошаше ю. Егда же сей Громов сын[666] явися в ней и источи в ней реки благодатнаго учения и ороси на ню божественныя источники, о, колико тогда просветишася оны страны, о, коликаго благодатнаго светолития исполнишася, омывшеся святым крещением и чада Божия учинишася, по писанному во святем Евангелии его громогласному учению: «Елицы, – рече, – его восприяша, даде им область чадом Божиим быти, верующим во имя Его».[667] Ельма убо такова сосуда избраннаго избра Господь, егоже благодатнаго богословия исполни и тем напои всю вселенную богоразумия. Устрой его яко корабль некий великий, таинств небесных исполненный, в немже бурливое жития сего море и еретических соблазнов волны вси вернии безпакостно преплавают. Учини его пристанище спасительное и неволнуемое⁷⁷⁴, к немуже волнуемии в мире сем, иже верно приплавающе и словес его благодатных наслаждающеся, утишаеми и упокояеми бывают. Содела его яко град крепкий, стенами крепкими богословных словес огражденный, в негоже прибегая, всяк верный от стрел еретических невредим пребывает. Избра и вчини⁷⁷⁵ его священнаго пастыря всем христоименитым овцам, иже я⁷⁷⁶ евангельскою трубою оглашает, апостольскими своими послании научает, апокалипсисным откровенном просвещает и на пажитех спасительных упасает. Такова убо великаго апостола праздник празднуем днесь, такова священнаго богословца и неизреченных Божиих тайн видителя и сказателя торжество торжествуем ныне.

Темже, любителнии святаго празднолюбцы, усердно почтим великаго девственника и наперстника и возлюбленника Христова, апостола и евангелиста Иоанна Богослова, благочестия любители – благочестию проповедника, страждущий за благоверие – благоверию укрепителя, пустыннии – пустыннаго целомудреннаго жития наказателя⁷⁷⁷, общежительнии – братьству украсителя и священныя братьствосодержательныя любви учителя, престарелии – старости обучителя, юннии – юности обуздателя и благоразумию научителя, подвижники – в подвизех утвердителя, малодушнии – терпению учителя, грешнии – покаянию проповедника, послушники смиреннии и вси богорадне терпящий – небесных почестей тайносказательнаго объявителя. Вси апостольскаго учения любители священнаго сего благовестника праздник любезно торжествуем, того священнаго научения в память его насладимся, евангельскаго его благовестия послушаем, апостольских его всесладостных посланий почерпем, апокалипсисных таиньствовиденных священных откровений его напитаемся, всеми сими от земных отступим, на небесная видения возведемся, маловременная презрим, к вечным обителем возвысимся, ихже всеутешительных небесных благ получити потщимся о Христе Исусе, Господе нашем, емуже слава со Отцем и со Святым Духом ныне и присно и во веки веком. Аминь.

Вышняго Иерусалима гражданом,[668] ⁷⁷⁸земнаго красновидения устраненным⁷⁷⁸, в черных⁷⁷⁹ дебрех живущим, в пресветлых селех житие устраяющим, боголюбивейшим отцем и братии о Христе Исусе радоватися.

⁷⁸⁰Обычай есть устраненным друг от друга, братии от братии, детем от отцев, любезным от любезных, желателныя дары же и послания и любезная целования же и поздравления посылати, и толико желателно и слезноумиленно, елико бывает далноразстоятелно и долговременно отлученно⁷⁸⁰. Кия же аз дары отдавшим себе Богови в дары пошлю? Которое же любезное целование любви исполненым воздарствую? Кая же словеса не словесами, но добродетельми богатьствующим принесу? Утешити ли утешением о Христе духовным восхощу, но недоумеваю. Усладити ли питием слова Христовы трудолюбцы потщуся, но нищетою разума содержим есмь. Украсити ли боголюбивое ополчение возжелаю, но, не украшенный безстрастием, украшати не годствую⁷⁸¹. «Не красна бо, – рече Божие слово, – похвала во устех грешничих».[669] Умолчю ли? – но понуждаем желанием. Возглаголю ли? – но обдержим⁷⁸² недоумением.

Убо же церковным любителем церковный глас любезно возглашю: «Пустынным непрестанно божественное желание бывает от мира суетнаго кроме».[670] ⁷⁸³Ибо якоже обдержима землею и блатом вода происходити не может – свободна же кая от сих, сладкою быстриною, речными струями неудержимо проистекает, сице душевное желание, мирскими суетами окруженное и блатом попечений тленных связанное, к Богу востещи не может – свобожденное же пустынных желание мирских сует, развязанное страстных попечений, отлученное скверных тленных любительств, свободно к Богу проистекает⁷⁸³, дивнейшим усердием на небесныя круги возлетает, преславно сладостию божественною воскипевает. ⁵⁸⁴Поищи кто в церковных книгах, и обрящеши пустынножители, паче инех небесными дары обогащенны⁷⁸⁴. Кии⁷⁸⁵ страсти победита и безстрастием усветлишася⁷⁸⁶? – пустынножители. Кии постническими труды прославишася? – пустынножители. Кии молитвенною святостию просияша? – пустынножители. Кия послушания венцы украсишася? – пустынножители. Кия диявола попраша, бесы одолеша, грехи и страсти отгнаша? – пустынножители. Кии в добродетелех вечною славою прославишася? – пустынножители.

Не глаголи ми: тыя пустынножители, иже едва из мира изыдоша и паки мирскими нравы дышут; едва пустынныя труды увидеша – и в мирския сласти обратишася; едва врага увидеша – и хребет ему обратиша⁷⁸⁷; едва пустынножителем примесишася⁷⁸⁸– и своевольствовати восхотеша. Таковии бо бывают страстей жилище, бесом игралище, Церкви досада, пустыни срамота, братии терние, настоятелем остно⁷⁸⁹. Но воззри умныма очима на тыя, иже, мира отставльше, Христа возлюбиша, иже, Богу служити пришедше, Божию волю исполнити тщатся; иже церковным благочестием, яко свет, сияют; молитвами и постом, яко миро, благоухают; милостынею и любовию, яко цветник, цветят; смирением светят, яко христоподражателнии овцы; кротостию дышут, яко незлобивии агньцы; чистотою адаматьствуют⁷⁹⁰, яко рай богонасажденный; послушанием доблествуют⁷⁹¹, яко воини Христовы избранный.

Которая благопослушная церковная чада – Церкви украшение, пустынное светление, благочестию слава, пустынноживущим красота. Тыя смиренныя христолюбныя подвижники не утешит ли Христос вечным утешением, не венчает ли небесными венцы, не прославит ли безсмертною славою, по божественному его гласу, глаголющему: «Славящыя мя прославлю»[671]?

Аще бо царь земный своя воины, за него подвизающияся⁷⁹², светло венчавает и любезными дарми царствует⁷⁹³ и премногою славою прославляет, кольми паче Царь Небесный своя служители воспрославит, иже Его ради мира красная⁷⁹⁴ презревше, сласти поплевавше, сродства домов отлучившеся и своея воли отвергшеся, в смирении и терпении служат Ему усердно, подвизаются неленостно, борются с дияволом неусыпно. Воистину таковии получат тая, яже «око не виде и ухо не слыша и на сердце человеку не взыде»,[672] по священному Спасову гласу: «Идеже есмь Аз, ту и слуга мой будет».[673] Дивно видится и радостно слышати, егда кого царь земный любезно прославит, саном высоким вознесет, всем его, друга и радителя⁷⁹⁵, возвеличит, не паче ли дивнее будет, егда царствующих Царь и архангельский Владыка пред тмы тмами ангел и архангел прославит своего земнаго служителя вечною славою и воззовет его благодатнейшим утешением: «Благий рабе верный, вмале бысть верен, над многими тя поставлю, вниди в радость Господа своего».[674] ⁷⁹⁶Не паче ли превосходителне сие <и>дивнейши есть⁷⁹⁶!

Сих ради блаженно и преблаженно пустынных божественное желание, отлучившихся мира и спасенная дела⁷⁹⁷ разумевающих, отбегших вавилонскаго смешения[675] и вопиющих: «Аще забуду тебе, Иерусалиме, забвена буди десница моя».[676] Сих евангельский глас ублажает, яко «тех Царство Небесное».[677] Сих пророчестии гласи благословят: «Блажени, – рече, – непорочнии, в путь ходящий в законе Господни».[678] И паки: «Блажени живущии в дому Твоем, в век века восхвалят Тя».[679] За сих ангели Божии ополчаются и от ратующих соблюдают: «Ополчится, – рече, – ангел Господень окрест боящихся его и избавит их».[680] Сих заступает и соблюдает Пречистая и Преблагословенная Мати Божия, заступнице (бо рече) христианом непостыдная, ходатаице к Творцу непреложная. Сих сам Бог покрывает: «Живый, – бо рече, – в помощи Вышняго в крове Бога небеснаго водворится»,[681] и «яко той избавит тя от сети ловча и от словесе мятежна, плещма своими осенит»,[682] и «не убоишися от страха нощнаго и от стрелы, летящыя во дне».[683]

Сицевыми благодатьми облагодатствованное Христово стадо, сицевою славою небесною покрываеми есте Христовы подвижницы, в таковых преславных делех обретает<е>ся, таковым превосходящим путем шествие имеете. Темже⁷⁹⁸ тецыте, тецыте, благословеннии Христовы рабы, не ослабевайте, воини Небеснаго Царя; не унывайте, позваннии на пир небеснаго веселия. Радующеся, тецыте друг пред другом в прекрасный чертог вечныя светлости и о нас, волнуемых в бурях мира сего, помолитеся, братолюбцы и чадолюбци благословеннии, да сохранени будем от всеядовитых челюстей всеядца змия и от всех козней его и наветов соблюдени. Да сподобит нас Господь с вами вкупе вещию же и гласом воспети пресладкую песнь: «Пустынным непрестанно божественное бывает от мира суетнаго кроме».[684]

Писавый грешный до земли усердно кланяюся и прощения прошу.

«Покайтеся, приближи бо ся Царство Небесное».[685] Словеса сия во священнем Евангелии написана суть.

Якоже по мрачней и темней нощи сладкий дневный свет возсияет и по бури снежней зимней благоуханная тишина бывающи, многое утешение животным, многую сладость в мори плавающим подавает, тако по мрачнем беззаконии и по обуревании страстнем, егда свет страха Божия в душах возсияет, егда тишина покаяния возблагоухает, тогда благодатная весна возблистает и цветы добродетельныя в таковых возсияют.

Темже о блаженнем и приснопамятнем покаянии должно вкратце вашей любви изъявити.

Ибо и сказуется, аще есть и может быти, покаяние согрешающим по святем крещении показуется истинно, яко есть покаяние, самому пречистому Владыце рекшу во святем Евангелии: «Яко радость бывает на небесех о едином грешнице кающемся».[686] И блуднаго сына Отец Небесный, пришедша на покаяние, с колицем неизреченным милосердием прия и сыновство первое ему дарова.[687] Темже яве есть покаяние по крещении согрешающим.

Что есть покаяние?

Покаяние – во<з>звание крещения, жития исправление, смерти вечней избавление, греха очищение, всех беззаконий исповедание, от дияволи воли исхождение, к Богу присвоение, мук вечных свобождение, Царствия Небеснаго получение.

От чего есть покаяние?

От Бога. Ибо всякое благое от Бога. Покаяние есть благое убо от Бога, Божиими щедротами и помощию и во<з>званием его озаряем, грешный приходит на покаяние и страхом Божиим творит покаяние, по писанному: Страхом Господним уклоняется всяк от зла,[688] и от сокрушенна и смиренна сердца творится покаяние: «Сердце бо сокрушено и смирено Бог не уничижит».[689]

Чесо ради есть?

Того ради есть покаяние, яко Бог повеле грешнику каятися, яко покаяние есть взыскание свободы, приятыя на крещении, еяже чрез грех лишися, яко покаяние от грех очищает, от дияволя мучительства свобождает, мук вечных избавляет, отечества небеснаго наследника быти сподобляет.

Колико есть?

Велико есть спасителное покаяние, понеже великих и тяжких грехов прощения сподобляет, и от тяжкаго ига диявольскаго свобождает, и велико милосердие Божие грешнику каяющемуся источает, и многажды падшаго многажды подъемлет и очищает, по реченному: «Аще грехи ваши оброщени, яко снег убелю я».[690]

Яково есть?

Предивно есть покаяние, яко свет, омраченнаго нощию греха просвещает, яко солнце, освежившагося⁷⁹⁹ беззаконием согревает, яко миро благоуханное, осмрадевшаго калом греха облагоухает, яко мыло перущих,[691] от черноты греховныя убеляет, по писанному: «Омыеши мя, и паче снега убелюся».[692]

Когда есть?

Во всяко время кающихся Господь приемлет, во вся дни покаяние кающихся очищает, изряднее же, по обычаем церковным, во святыя посты тайна покаяния содевается и согрешившии в постныя святыя дни с постом и молитвами покаянием омываются, по священному Евангелию: «Сей род ничимже может изыти, токмо молитвою и постом».[693]

Где есть?

В православней Церкви есть тайна покаяния, на всяком месте пред Божиею благостию каяйся отпущение получает, по реченному: «На всяком месте владычествия его».[694] Заключен в воле медяне, каяйся, призывая Бога, Манасия услышан бысть.[695] На кресте каяся, призва Бога, разбойник рая житель бысть.[696] Темже на всяком месте содеваемое спасителное покаяние спасает кающагося.

Како есть?

Сице бывает спасителное покаяние: кающийся, сокрушенным сердцем и смиренною душею боголюбный благоговением и умиленным обращением о преждесодеянных гресех каяся, исповедается Господу Богу и искусну мужу, яко врачю, показуя язвы греховныя и приемля целбу⁸⁰⁰ спасителную. Тако бывает спасителное покаяние, по писанному: «„Исповем на мя беззаконие мое Господеви», и ты отпустил еси нечестие сердца моего».[697]

С чимь есть?

С прочими добрыми делы украшается, ибо кающийся во очищение грех своих епитимию[698] приемлет, слезы изливает, пост продолжает, молитву умножает[699] милосердие содевает, послушание изливает, братолюбие показует, тяготоношение друг другу исполняет, досады дружния прощает, обидящим долги отпущает, и тако со дерзновением молится: «Остави нам долги наша, якоже и мы оставляем должником нашим».[700] И с прочими добрыми делы спасителное покаяние кающагося очищает и омывает, по священному оному словеси: «Омыйтеся и чисти будите».[701] И по апостолу Иакову: «Верен и праведен, да оставит нам согрешения наша и очистит ны от всякия неправды».[702] Сицево есть пресветлое покаяние, благодатное просвещение, богодарованное очищение, падающих исправление, сокрушенных врачебница, малодушных прибежище, отчаявающих пристанище, раны приемлющих целителница, всех христоименитых корабль упования.

Темже должни вси боголюбивии содержати сие врачевание спасителное, подвижники – привпадающих⁸⁰¹ пороков очищение; постники, молитвеники – нравов вредных омовение; чистии девственники – страстных и пристрастных вредов⁸⁰² исцеление; послушники, трудолюбцы – ропотных почернении врачевание, самолюбнии и малодушнии – ⁸⁰³частых претыканий возставление⁸⁰³, в киихждо гресех оскверньшиися чистителную и спасителную баню благонадежно восприимите и к милосердому милосердо приемлющему Отцу всежеланно притецыте и радость аггелом покаяния ради сотворите о Христе Исусе Господе нашем, емуже слава во веки. Аминь.

«Всяк подвизаяйся от всего воздержится»[703]. Апостол, 1 Кор<инфом>, 2.

Воздержанный Соборе, отлученный⁸⁰⁴ единому Богу сонме, христообещанный девственный полче, иже мира удаленный и небеси соприближный, иже мирожителных сродных и знаемых удаливыйся и светлым небесным Гражданом присочтавыйся⁸⁰⁵, иже земнотлеющих торжеств браков и всемятежей убежавый и небеснаго всесветлаго жениха Христа всесвященному уневещению сподобивыйся, иже игралищ и песней и бесед сатанинских избывый и во всесвященных песнех и повестех духовных наслаждати себе выну получивый, о ихже свойстве пророческая предрекоша уста: «Приведутся, – рече, – девы вслед ея, и искренняя ея приведутся тебе, приведутся в веселие и радость, введутся в церковь цареву».[704] Со оною же добротою девственною заповедает благословляти Господа: «Посреде, – рече, – дев тимпаниц в церквах благословите Бога Господа».[705]

Принеси⁸⁰⁶ днесь вашему христоуневещенному собранию, девственному совокуплению, плачепустынному богообещанию предпошлем гостително вестителство⁸⁰⁷. Предшлем духоутешително брашно, представим чертожницам[706] небесным⁸⁰⁸ в плачевней дебри гостителну трапезу: аще и от нашего грубоумия шлему⁸⁰⁹, но апостольскою благодатию изобретену; аще и нелепотно от нас расчиняему⁸¹⁰, но благодатную сладость от Павлова пчелника[707] подавает неизнуряему⁸¹¹. Есть бо брашно подвизающимся утешително, великодушствующим просвещателно, малодушствующим наказателно, целомудрствующим украшение, воздержным утвержение, невоздержьным ограждение. Великий бо Павел малыми сими глаголы великоблагодатно насыщает христорачителныя душы: «Всяк, – рече, – подвизаяйся от всего воздержится» – всяк, кто во всяком чине вчиненный, началный и подначалный, пасущий и пасомый, учащий и учимый, славный и безславный, богатый и нищий, утешенный и печалный, здравый и болный, старый и юнный, мужеска и женска пола сый. Иже не лежай во тме греховней, но подвизаяйся шествовати к свету небесному; иже не ⁸¹¹в леностне темнице заспавый⁸¹², но подвизаяйся выну подвиг духовный: иже не во отчаяния страстней нощи заблудивый, но в церковнем благонаучении с невидимыми враги присно ратуяся; иже не в долнем мире погрязаяй, но в небесное отечество шествуяй; ратуяйся со дияволом, бесами, миром; боряйся с плотию, обычаем⁸¹³, страстми, помышленми; воинствуяй с гонители, наветники, обидами и нуждами и ⁸¹⁴со многими неисчисленными борбами, всеми тыми тщащуся дияволу возбранити шествие в Царствие Небесное⁸¹⁴.

В сих же подвизаяйся от всего воздержится, от всех злых дел, словес и помышлений, от всякаго вида греховна, от всякаго обычая небогоугодна: от сластей похотений, ярости, гнева, вражды, в благополучии невоздержания, в злострадании неблагодарения, ⁸¹⁵во всяко время и место и случай, яко некое всездравотворное пресладкое целение, воздержание имеяй⁸¹⁵.

Воздержание – ⁸¹⁶всякаго злопошествия себе удержание⁸¹⁶. Воздержание – желателнаго и яростнаго целомудрое содержание. Воздержание – в словесех умерение⁸¹⁷, во зрении целомудрое, в слышании разсудителное. Воздержание – в происхождении⁸¹⁸ обузданное, в сожитии мирное, в сретении⁸¹⁹ благостыдливое. Воздержание – ⁸²⁰в пространстве неразлиянное⁸²⁰, в скорби благодарное, многопищия удержание, малопищия услаждение. Воздержание – в которах⁸²¹ безответное, в роптах молчаливое, в горестех услаждение. Воздержание – прекрасный обычай, благодатная красота, мироюханное⁸²² сожитие, пресладкое совселение⁸²³, всем подвизающимся всетвердая ограда, всеблагодатное стяжание. Которое бо злых злое устремление победити добляго подвижника возможет, стяжавшаго богохранителное воздержание? Многосластное ли брашен лщение⁸²⁴? – но воздержание побеждает. Одеждное ли украшение? – но сие утоляет. Похотей ли скверных востание⁸²⁵? – но удержавает тое. Яростнии ли бури и гневливии ветри? – но оно утишает. Горестныя ли и сварливыя незгоды? – но воздержание услаждает. В благополучии ли надмение⁸²⁶ и в злополучии роптание? – но сие в мерности⁸²⁷ соблюдает. Леностию ли от молитвы отводится? – но воздержанием удержавается. Девственную ли доброту похотения победити возлюбопрятся⁸²⁸? – но воздержание тую соблюдает. Бесчиние ли неудержанное смясти⁸²⁹ вознеистовится? – но воздержание, предоблий казатель⁸³⁰, в благочинии водит своя любители. Которая убо красота паче воздержанныя красоты? Которое богатство паче воздержаннаго богатства?

⁸³¹Воззри же в противостоятелное воздержания⁸³¹ – в томителствующее ны невоздержание, еже любленики своя стыдливыми красты⁸³² окропляет, еже в многопищиих многомятежством и чревообъядением почерневает, еже в малопищиих горестию и ропотом помрачает, в богатстве лихоимными и сластными потоки потопляет, ^83Зв нищете крадливыми и лжеплетенными нравы осмраждает⁸³³, в безмолвии унынием и сном отягощевает, посреде человек многословными бесчинии и смехи смущает, в единоместном пребывании печальми снедает, в происхождениих⁸³⁴ же тмочисленными страстьми наполняет, еже в здравии – похотеньми посмражает, еже в скорбех – роптами и боркотами⁸³⁵ помрачает, еже сна и словес множество творит, еже молитвы и слышания Писаний умаление деет; еже в словесех безстыдное, во обычаех многостроптивое, в делех непостоянное, поста ненавидение, чистоте моровое поветрие, всякому добронравию всетлеющая незгода⁸³⁶.

Прииди же посреде, всекрасное воздержание, яви доброту свою девическому полку, красновоздержанная весно. Ибо от воздержания в пищах чинная мера, в малопищии благодарное услаждение, в словесех сладкомерное свойство, в молчании прекрасный обычай, в единоместии духовно наслаждение, в происхождении целомудрое спрятание⁸³⁷: око спрятанное, слово удержанное, в нуждах благодарное, в пространстве неразливателное, в послушании тихопослушное, в повелевании сладкомерное, в здравии трудолюбивое, в немощех благодарное; во сне и словесех мерное⁸³⁸, в молитвах же и слышании Писания пространное. Воздержание утвержает пост, сохраняет чистоту, обуздавает юность, украшает старость, еже обычай услаждает, еже страсти отгоняет, еже тихостию соборы украшает, еже молчалным краснообразием многолюдныя соньмы услаждает, самую любовь красными мерами украшает, самую Божию ревность лепотным чином уставляет.

Якоже благоцветущая весна, явльшися, изничтожает снеги, отгоняет мразы, уясняет аер⁸³⁹, доброцветием и благоплодием землю обогащевает, тако богонаученное воздержание, пребывающее в киих соборех, отгоняет свары, изничтожает мятежи, уставляет⁸⁴⁰ волны, утишает бури, прекрасною тихостию просветляет, пресветлым миром украшает, священнодевственными обычаи просвещает. К сим в показание воздержанныя доброты введем посреде священнаго вашего собрания украшенную воздержанием постницу, невесту Христову присную, неокрадомое Богу возложение, небесожелателную голубицу, приснощебещущюю⁸⁴¹ молитвами ластовицу, чистолюбную и боголюбную горлицу, юже не возвышает слава, юже не низлагает бесчестие, не огорчевает нужда, не разливает⁸⁴² пространство; яже молчателным благостыдением дышет, яже смиренною кротостию выну мирствует, яже в послушании не противословствует, в началствовании не досаждает, в повиновании не ропщет, наказуема – не огорчевается и наказати повелена – ⁸⁴³благочинным наказанием не обинуется⁸⁴³; яже в делех радетелна, яже в молитвах любителна, яже в посте воздержателна, яже соживущим ползодателна, яже лишесловия⁸⁴⁴ отлучителна, яже прочим в честех не завидит, яже чести не пренебрегает, которая девственными благостыдении украшена, которая всесмиренными нравы улепотствована, ⁸⁴⁵яже за свою досаду не стает⁸⁴⁵, яже за Божие дело боголюбно ревнует, яже благонравия ради со всеми мирна, яже боголюбия ради Господеви приближна, которая выну небесными добротами услаждается, выну божественными словесы утешается, выну в мирноустроении, выну в благоутешении.

Что сея доброты воздержанныя краснейше⁸⁴⁶? Что сея красоты лепотнейше⁸⁴⁷? О которой лепоте пророк глаголет: «Вся слава дщери Цареве внутрь».[708] С которою воздержанною добротою премудрая Июдиф прославися, целомудренная Сусана превозвысися.[709] О той Фекла всехвалная украсися.[710] О той Евпраксия боголюбивая христоугодна явися.[711] О той Устина всеславная храбрая победница на бесы учинися.[712] С тою Фомаида чистолюбная пособница чистоты прославися.[713] С тем святожеланным воздержанием всяк мученический полк венчася, всяк преподобных лик усветлися, всяк праведных чин небесожителен явися. О том Павел, избранный сосуд, вещает: «Всяк подвизаяйся от всего воздержится».[714]

Сию богообещанную вам вашю лепоту краткочертанием сим показати возжелех, да утешитеся святожеланным утешением, да паче возусердствуете небесным рачением, да вящше возревнуете общежителным благозаконием: маловременно воздержащеся в земнотлеющих – безсмертно же приуготовляющеся пространствовати в вечных; страхом Божиим связующе тело в воздержании – пресветлу же душю творяще в боголюбии; утесняюще себе в мирных – распространяюще селения своя в премирных; минующе маловременная утешения – возприемлюще же небесная вечная возвеселения; лишающеся гостительств тлеющих – стяжавающе вечно гостительство в прекрасном вышнем Сионе. Зде удаляющеся человек и человеческих пристрастий, а тамо по улицам вышняго Иеросалима вечно ликующе с небесными красными жители. Зде воздержащеся пустынных плодов, а тамо наслаждающеся в райских селех сладости едемския. Зде смиревающеся пред человеки, а тамо дивно проповедаеми пред аггелы Божиими. Зде чистоты ради воздержащеся и скутовающеся⁸⁴⁸ от человек, а тамо девьственныя ради доброты пресветло со агньцем водворяющеся в невходимых небесных селех. Зде воздержанно молчаще, в Писании же и молитвах добльствующе, а тамо чистоты ради пресладкия песни небесныя могуще пред агньцем пети, вечно веселящеся.

Тако, доблии подвижници, тако, воздержании чертожницы, тако, христоуневещенный полче, потщимся, возревнуем, возусердствуем, и се мало-мало, и минует тленное и отверзется безсмертное. Потаится земленое и покажется небесное; престает маловременно льщение⁸⁴⁹ и объявится вечное Царствие, егоже воздержателнии нужницы восхищают,[715] в немже плачущий богорадне утешатся,[716] в немже отрет Бог всяку слезу чад Сионских,[717] в немже убелившии ризы[718] своя воздержанным терпением вечно возликовствуют в светлости Сионстей. Его же да не лишени будем, невоздержаннаго душетления потщимся убежати, егоже да получим, боголюбным воздержанием себе украсим, о самом Христе Бозе нашем, емуже слава со Отцем и со Святым Духом ныне и во вся веки, аминь.

Боголюбному вашему собору многогрешный с благопослушными братнею А<ндрей> Д<енисов> смиренно поклоняемся, ваших боголюбных молитв, благословения и прощения просим и о страждущих С. Н.[719] молитися молим.

Октября в 27 день. Пишай кланяюся.

Дойде в братство в 9 час нощи.

«Сии суть иже с женами не осквернишася, зане девственници суть». «Сии суть куплени от людии⁸⁵⁰, первенци Богу и Агньцу».[720] Словеса сия писанная во Откровении Иоанна Богослова, глава 14.

Всекраснейшее церковное небо, сияющее различными добродетелей звездами, еже всеславно многоиспестренною красотою, яко царица, украшается, еже предивнейшими виды пресветлейшия доброты многокачественно озаряется, всеславно верою, любовию и надеждею сияет; предивно мужеством, мудростию, целомудрием и правдою светлеет; терпением, благочестием, смиреномудрием, постом и молитвою и прочими добродетельми многовидны и пресветлы лучи испущает. О чем и Давыдское псалмопение царски и пророчески провозглашает; «Предста, – рече, – Царица одесную тебе, в ризах позлащенных одеянна и преиспещренна».[721] Еже по Златоусту, в слове о Предста Царица многозвездное и многоиспещренное различных добродетелей на единей церковней ризе сияющее являет.[722] Меж киими светлейшими звездами добродетелей всекраснейшее девство, яко луна, светло белеется и, яко меж испещренными⁸⁵¹ птицами павлин, многокачественно красуется, еже со всеми добродетельми сочлененно, еже вся добродетели убеляющее; еже прочими добродетельми утвержающееся.

Сию солнцесиятелную добродетель возжелех в показателной словес ризе украшенну представити пред вашими, о, боголюбезное христоневестное сочленение, очесы. И аще бы всебогатшая и всеславнейшая некая царица явилася бы посреде вас, красотою многою сияющая, вас бы любезно украшающая, и многомилостивно венчевающая, и всесладостно приветствующыя, и от всех злых охраняющая, не были вси стекшеся, многожеланно окружающе, вселюбезно и многопочтенно восприяти возусердствовали бы.

Ныне же всекраснейшая царица – девство – в сих показателных словесех приводится от нас, грубых, посреде вашего девическаго собору: солнцесияющыя лучи своя, на вся вы озаряющыя, вся вы вечною славою венчевающая, благодатною славою питающая, в небесный невестник на безсмертную светлость любители своя вземлющая. Приидите на вселюбезнейшее тоя видение, стецытеся на всесладчайшее сея мироюхание, насладитеся всекраснейшия доброты тоя, напитайтеся всесияющия славы ея. Ибо в качествах не есть у человек доброта лепотньшая, не есть лучьшая достоинством и Богу радостнейшая; не есть в церковном жертвоприношении свойственнейшая и превосходно дерзающая, не есть человеком благоговейнейшая и чюднейшая, якоже девство. Понеже вся причетники церковныя девство вчиняет: олтарю служащыя, жертву к Богу за вся приносящыя, девственная чистота достойны показует. Ибо чюдныя послежде в добродетелех возсиявшия, погрешившыя прежде в чистоте, в степени причетническия Церковь не припущает. Девство же своя любители в Церкви превозвышает: фимиам, кадило, свещи, пение всецерковне приносити Богу достойны учинивает. О чем Псалмопевец провозглашает: «Посреде, – рече, – дев тимпаниц в церквах благословите Бога Господа»,[723] чрез девственников церковное Богу любезно приношение назнаменует. И понеже сие превосхождение тако дивно есть, не дивно же ли оно, еже царю Христу в невесты девицы вчиневаются, по оному же Псалмопевцу: «Приведутся, – рече, – царю девы вослед ея, и искреньняя ея приведутся ему, приведутся в веселие и радость, введутся в церковь цареву».[724] Ей, и сие превосхождение велми дивно. Не менше сих дивнейшо, еже провидев Богословный Тайнозритель, рече: «И слышах глас с небесе, яко глас вод мног, и яко глас грома велика, и глас слышах гудец гудущих в гусли своя и поющих яко песнь нову пред престолом и пред четырми животными и старцы, и никтоже можаше навыкнути песни, токмо сии сто и четыредесять и четыре тысящи, искуплени от земля. Сии суть иже с женами не осквернишася, зане девственницы бо суть. Сии последуют агньцу (еже есть Христу), аможе аще пойдет».[725] Апокалипсис, глава 14.

И понеже тако девство в Церкви перьвенствует, тако в небесном невестнике превосходящее невестничество подавает, тако превосходящему пению пред престолом недомыслимым прочим не могущим пети научает и последствовати Агньцу, аможе пойдет, удостоивает, имать быти великаго удивления превосходящая честь и преестественное достоинство девства. Колика же нужда всем нам пресветлейшыя сея добродетели девства и священныя чистоты, яко бесчастницы того, сквернители блудни, вне Царства Небеснаго изгоняются. «Вне бо, – рече Богослов, – псы и чародеи».[726] Апокалипсис, глава 22.

И толико посему нуждно есть девство, колико же нуждно по оному, яко обесчестивший тое скверностию не токмо Царства изгоняются, но и вринутся в вечныя муки: «Скверным, – бо рече, – и убийцам, и блуд творящим» «часть⁸⁵² им во езере, горящем огнем и жупелом⁸⁵³».[727] Апокалипсис, глава 21.

Коль же предивнейшыя плоды священнейшее сие в любителех своих плодоносствует. Ибо девство убивает злобу, пожигает демоны, отгоняет страсти, волны похотей уставляет, в благодатном мире ум управляет, еже учение вкореневает, еже мудрости приятных содевает, еже благодати духовной душю наполняет, еже священному безстрастию сподоблевает, еже благочестие соблюдати утвержает, достоинство свящынным чином подает, Тела и Крови Христовы достойных к приятию творит, угоднейшыя молитвы Богу посылает, монастырем всекраснейшая красота, безмолвником ангельское учреждение, домовом беззазорная честь и окраса благолепная. Сие девам хранит блаженную целость, вдовам священное целомудрие, спряженным священным браком мирное благолепотное устроение. В жизни сей девственники прославляет, в смерти телеса нетлением просвещает, в будущей жизни преестественной вечной славе сподоблевает.

Велика есть в добродетелех и любовь, по речению апостольску: «Пребываяй в любви в Бозе пребывает».[728] Велико есть и милосердие, по словеси Спасову: «Блажени – рече, – милостивии, яко тии помиловани будут».[729] Велики и прочий добродетели, но егда лишени будут девства, лишени чистоты, осквернятся калом нечистоты, непотребни являются. Изгоняется таковый от Церкви, отлучается святыни, изобщается от сочленения. «Аще, – рече апостол, – брат именуемь будет блудник», «ниже ясти с ним».[730] Девственная же светлость превозвышается над всеми, предвземлется над прочими добродетельми; в Церкви воюющей достоинством превосходит, в ликующей Церкви вышеестественно за Агньцем Христом дерзает, превосходително пение поет, недомыслимую славу имеет.

Приемлет же ся Церкви Церковию освященный брак, и ложе нескверно, в немже живущих и прочия добродетели приемлются. Но егда девьство с сим сравнити, превосходит добротою своею, яко дражайшее камение другия, яко злато прочия металлы, яко солнце прочия звезды, по священному апостольскому гласу: «Неоженивыйся печется, како угодити Богу; оженивый же ся, како угодити жене».[731] Кое превосходящее разнство меж Богом и женою! Каковое величайшее разстояние меж угожением Бога и межь угожением жены! Которое лучшее богоугождение девство восхищает, превосходящее богатство девство приемлет, преславнейшим светом девство просвещается.

Разсмотри противостоятелное⁸⁵⁴ девства блудное сквернение – и узриши у плененных сим душю паче кала посмраждену⁸⁵⁵, в тимении⁸⁵⁶ скверном валяющуюся, ⁸⁵⁶словесное не властельствуя чювствы⁸⁵⁷, но само, яко пленник, похотением влачимо: ум не о небесных пекущийся, не к Богу спешащийся, не в вышний Иеросалим усердствующ, но Афродиту[732] скверну в мыслех мечтающ, совесть паче саж почернену, паче смолы потемнену, сердце волнами скверн зыблемо и бурями скверномечтаний волнуемо, тело калом скверны посмражено, прыщи язвены, нечистоты плод и знамя Божия гнева, часто имеющо и смрад скверны, досадный Богу и ангелом, испущающо, в домех свары и в соседствех ропоты⁸⁵⁸, и зазори⁸⁵⁹, и трепетание Каиново,[733] немолчный обличаяй обличник⁸⁶⁰; имением злочастное расточение и домом разорение, не Бога ради, не благодати духовныя, не Царства Небеснаго получения, но, увы, скверны ради нечистоты, послушания дияволя, получения вечныя геены, чад от родителей разлучение, благородия обесчещение. Не порадуются воскормивши таковых детей родители, восплачют возрастших, постыдятся возмужавших: тех же блудных омраченное отчаяние, святыни отлучение, благодати духовныя лишение, конечное всех злых злейшее, ⁸⁶¹страшнаго гнева Божия пострадание⁸⁶¹. О, колика таковых и множая сих плачевная повесть!

Прииде же противо сих, благодатное девство, солнцеобразная красото, светлосияющая доброто, разжени⁸⁶², побеждая красотою твоею, печальную сию повесть, теплотою лучь твоих замерзение нечистое, добротою красоты твоея сквернителное помрачение. Ибо девствующих души благодатию духовно просвещаются, светятся блаженным безстрастием, достойно святынею выну⁸⁶³ освящаются, молитвы благоприступны к Богу имеют, совесть чисту и беззазарну, телеса, яко кристал светлейший, чистотою светящься. Любими таковии Богом, любезни святыми ангелы, возлюбленни небесными жители, в Церкви прекрасная доброта, в домех благодатная лепота, в соседствии повесть сладчайшая, родителем красное слышание, благородию слава беззазорная. Ум девственников, яко алавастр[734] чистый, мудрости благоприятен бывает; сердце жилище Святаго Духа достойно суть, словес Божиих и разсуждения духовнаго наслаждатися приличнейшее есть: всеми благодатными сиянии преизобилственно кипящая священная сия и прекрасейшая девства доброта.

Есть же преславное сие преславнейшим Творителем Богом творимо и соблюдаемо: «Не можете, – бо рече, – без Мене творити ничесоже».[735] Той любезное сие благодатию укрепляет, в ратех помогает, в подвизех утвержает, в нападаниих подкрепляет, законы церковными ограждает, учением возмужевает, Писанием хранению научает, честьми превосходящими воздвизает, дарми недомыслимыми⁸⁶⁴ подвижников утешает. ⁸⁶⁵Для таковыя превосходящия Христовы любви любезно любезнейшее сие девьство девствующии в терпении сохраняют⁸⁶⁵, да не отпадут пресладкия Жениховы любви и чертога, да не в вечныя муки вринутся, да паче в пресветлейший невестник⁸⁶⁶ внидут, да онамо⁸⁶⁷ возмутся⁸⁶⁸, ⁸⁶⁹в няже желают, ангели приникнути⁸⁶⁹, да тамо вечно уневестятся, идеже вечныя светлости пресветлейший жених Христос светлейшия своя невесты любезно приемлет, преславною честию венчевает, неизреченною красотою утешает, недомыслимыми дарми почитает⁸⁷⁰.

Сии благосчастнии и благороднии девственники, иже от младенчества первое⁸⁷¹ Богом и благодатию его сохранении, благоразумными родительми и учители наказуемии и соблюдаемии, яко царское сокровище от татей блюдомо, яко дражайшее камение от крадущих заключаемо⁸⁷², яко светлейшии маргарита⁸⁷³ от безумных в ковчежцех соблюдаеми, сице наказанием и надсмотрением и отъятием воли от скверны соблюдаеми. Возрастше же, прекраснейшее сие с собою возрастиша, любовию благодатною разгревающеся, кал скверны отгоняют, постом подтвержающеся, молитвами просвещающеся, послушанием охраняющеся, трудами мужественно девство творяще, чювства своя целомудренно храняще: очи от страстнаго видения, уши от похотнаго слышания; сладких освенение⁸⁷⁴, вкушения и празднословия воздержание, осязания спрятание⁸⁷⁵; воли своея страхом Божиим и искуснейших началством обуздание, страстныя любве бегание, от зазорных лиц отнюдное⁸⁷⁶ отстояние и отлученное ошаяние⁸⁷⁷. Сицевыми и прочими благодатными свойствы благодатное сие, в страсе Божии руководствуемо и возрастаемо, яко рай, прекрасными крины⁸⁷⁸ процветает, яко виноград пресладкими плоды благоюхает, ⁸⁷⁹неизреченныя благодати искипевает⁸⁷⁹, недомыслимая блаженства получает, несказанными светлостьми возблистовает.

Якоже на небесех ангели Божии, чистии светлии невещественнии Божии слуги, естеством светлости своея огнепални, легцы⁸⁸⁰, скорошественни⁸⁸¹, всяким созданным естеством не одержими, сквозе всяко создание проходяще, Божие на земли скоро повеление исполняюще и скорейше молнии на небесех являющеся, любовию к Богу распаляеми, видением неприступныя Божия славы утешаеми. Тако в церковней небе елици Богом угоднии девственници, преестественно возсиявше чистотою, безстрастием просветивше ум, вземшеся желанием превыше земных, неодержими сквернами всего мира, легко любовными крилы прелетающе на горний мир, телом чистшим, на земли Божия заповеди исполняюще, чистейшим безстрастным умом на выспренняя⁸⁸² скоро вземлющеся, проходяще воздух, минующе облаки, претекающе звезды, на небо являющеся; пресветлыя ангелы созерцающе, светлости Иеросалима Небеснаго удивляющеся, краснейших жителей небесных сияния наслаждающеся, невестника красоте чюдящеся, всесладчайшего Жениха любви радующеся, по возможству⁸⁸³ безстрастия Невидимаго видяще, по Спасову священному гласу: «Блажени чистии сердцем, яко тии Бога узрят».[736] Сея священныя чистоты, прекрасныя доброты удивлялся, пресладкий Ефрем сице о ней провозгласи: «О, чистото, телу удержание и порабощая е и к небесным текущая скоро. О, чистото, родителнице любовная и ангельское жилище!»; «О, чистото, человеки со ангелы ликовствовати⁸⁸⁴ сотворшая!»; «О, чистото, колесница небесная, стяжавшаго тя возводящая на высоту!»; «О, чистото, предотече и совселниче⁸⁸⁵ Святаго Духа! О, чистото, Бога молящая и обетования его приемлющая и всем человеком обретающи благодати».[737] Сию светейшую священныя Лествицы списатель сице похваляет, описует: «Чистота, – рече, – бестелеснаго естества усвоение. Чистота есть дом Христов вожделенный и небо сердцу земное. Чистота есть естества пачеестественное, паче естества отвержение и бестелесным телесе мертвеннаго и тленнаго преславное воистину общение».[738]

О сей дерзновении к Богу Великий Василий рече: «Кадило Господеви есть сущая в телеси святыня».[739] Сие прекраснейшее девство есть шипок⁸⁸⁶ многоцветущий, благоуханный, сладкоароматный, многою красотою сияющий, многую сладость источающий, весь же тернием острым окруженный, жесточайшим камением обложенный. Понеже пресветлейшая сия добродетель, в жизни сей соблюдаема жестокостию жития, прекраснейшими плодами обогащаема от трудов, благодатнейшими даровании сподоблеваема от подвигов, неумовением источает белость⁸⁸⁷, пречернением – светлость, худостию – благоуханную сладость, измождением – прекрасность, недоядением – крепость, немощию – мужество, нищетою – богатство, болезньми – победу, нуждами – Царство, по священному Спасову гласу: «Нужно есть Царство Небесное, и нужници восхищают е».[740] «Сию святейшую чистоту, – глаголет святый Ефрем, – возлюбиша святии. Сию возлюби святый Иоанн евангелист и, сию возлюбль, сподобися на персех возлещи Господу славы».[741] Сею прекрасною прекрасный Иосиф украшен: лучши изволи в темнице озлобитися⁸⁸⁸, нежели петерфииными сквернами осквернится,[742] откуду и земнаго царствия сподобися и небеснаго не лишися блаженьства. Сим просвещена светом, чистолюбная Сусана лучши изволи от старцев оклеветаема быти и смерти предатися, нежели сквернами их чистоту свою осквернити, чесо ради самем Богом зде клеветы и смерти избавлена и вечною славою венчавается.[743] Сего святейшаго девства светом освятися священная дева Иустина: в посте и в молитвах силою крестною вооружившися, преодоле волхования Киприянова, победи находящия на ню страстодвизателныя демоны, попра вся диявольская ухищрения, в целомудренном терпении уязви уязвившаго ю.[744] Еяже чистоту великий Григорий Богослов, похваляя, описует, глаголя: «⁸⁸⁹Невеста Христова присная, доброта щадимая, образ одушевлен, возложение некрадомо, храм непроходим, „вертоград заключен, источник запечатленен», да припевает же что и Соломоново, единому Христу блюдома⁸⁸⁹».[745]

Сим священным девством просветившися, святая девица Иулияния: отвержеся супружества тленнаго ради Жениха Небеснаго, претерпе же жестокая мучения от земнаго жениха, да не лишится невестника вечнаго, откуду от священныя чистоты силу такову прият, связа блазнящаго⁸⁹⁰ ю демона, бияше железы девическима рукама, откуду и диявол биемь кричаше, нехотя проповедаше девства неодолеемую силу, побеждающую бесы, исповедаше зелный⁸⁹¹ огнь девства, пожигающий демоны.[746]

Сие пресветлейшее девство возлюби премудрейшая великая Екатерина, яже в еллинстве еще отвержеся премудро супружества тленнаго.[747] Егда же сподобися святаго крещения, сподобися и такова преславнаго видения: Владыка Христос Пречистей своей Богоматери глаголаше о Екатерине: «Ныне (сиречь по крещении) бысть пресветла и славна яже прежде (еже есть до крещения) бе помраченна⁸⁹² и бесчестна, убогая и неразумная – бысть богатая и премудрая, яже презренная и незнаменита – бысть благородная и прехвалная, и толиких благ и благодатей есть исполнена и толико желаю ю, яко люблю обручити ю за невесту себе нетленну». Богородица же прият десную руку отроковицы и глагола к сынови: «Даждь ей в обручение, чадо мое, перстень и уневести ю себе, да сподобиши ю Царьствия твоего». Тогда Владыка Христос даде ей един перстень краснейший⁸⁹³, глаголя сия: «Се днесь приемлю тя в невесту себе нетленну и вечну и сохрани согласие⁸⁹⁴ сие опасно⁸⁹⁵, да не приимеши отнюд инаго жениха земнаго»?[748]

О, превосходящий чести девства! О, пресветлейшаго достоинства девичества! О, пресвятейшаго и недомыслимаго супружества девственнаго! Кто не возжелеет на девственую почесть? Кто не потечет на женихово, вечнаго Царя, наслаждение? Кто не подивится всяк ум превосходящаго невестничества? Воистинну отечество девства есть небо, дом же есть невестник пресветлейший, родителя имеет самого Бога, по речению евангельскому, иже не от плоти, но от Бога родишася,[749] жениха же имать Спаса Христа, иже любезно девствующих обручает, невестника пресветлаго сподоблевает, честьми превосходящими прославляет. Кое благородие, превосходящее всякого высокородия, которое сродство всяк ум превосходит? Стяжавает преестественное сие, по вышеестественныя чистоты свойству, прелюбезное южичество⁸⁹⁶ с невещественными небесными силами и с прочими краснейшими жители вышняго Иеросалима. Одежды же и венцы имать девство, всекраснейшый свет вечныя светлости. Богатство имеет душю, безстра<с>тием просвяшенну, тело, нетленною чистотою, яко кристаль, светящееся, Христу любимое и ангелом и святым прелюбезнейшее. Кое от земных богатство лучши сего богатства? Которая ли слава паче девственныя славы? Которое же ли благосчастие паче девичества благосчастия? Кая ли красота сравняется вечной девства прекрасности?

Темже понеже превосходящая девства светлость таковою вечною красотою сияющая есть, яже аще телесныма очима невидима, но верный зрением и от малых сих словес познаваема есть. Радующеся, восприимайте в сердцах ваших, о, священное девственное совокупление, любезнейшую вам девственную красоту, утешайтеся о вечной светлости тоя, наслаждайтеся вышестественной прекрасности ея, просвещайтеся небесныя славы оныя. Восприимите пресветлейшее сие разверстыми⁸⁹⁷ вашими сердцы, всежеланно срящите⁸⁹⁸ прекраснейшую царицу – девство. В первых притецыте на радость тоя, иже от рождения соблюдший девственную доброту и иже от святаго крещения сохраньшии целу боготканную одежду. Вселюбезно приимите вводящую вас в чертог небесныя светлости, всеусердно почтите прославляющую вас вечною славою. Споследствуйте же всерачително, вдовственною украшеннии чистотою, напитайтеся пресладкия чистоты, насладитеся благоуханнаго целомудрия, грядите добродетельми в чертог по обещанию и усердию чистаго жития. Усердно же вслед потецыте, елико остастеся⁸⁹⁹, яже светлость сию не соблюдший, яже первым безумием священное сие оскорбивший, приидите поретитеся⁹⁰⁰ со умывшею слезами нозе Владычни,[750] усердно кающеся с Египтянынею,[751] изливающе слезы в покаянии с Феодорою[752] Совлецытеся⁹⁰¹ терпением ветхости мира, притецыте, приидите, поимитеся по всекрасной девственной светлости. Обогащайтеся целомудренный богатством, яже прежде обнищавший, собирайте чистоты сокровище, яже в глупости расточивший. Слышаще пресладкаго Ефрема, глаголющаго: «О, чистото, не токмо в приснодевствующих обретаемая, но и в покающихся стяжимая».[753]

Вси вкупе, елици богообещанием чистоты возусердствовавшии, вкупе всеусердно всекрасное девство почтите, всесветлейшую чистоту в сердцах ваших вкорените, сладчайшее целомудрие во всех чюветвах водрузите. Противостоятелное девства бесчестное своеволное шатание поприте, отрините, оплюйте, не припустите, но прекраснейшия чистоты целомудренными законы оградитеся, постом подтвержающеся, молитвами и словом Божиим освящающеся, послушанием, труды и терпением во умерщвении плоти крепце мужествующе, по реченному апостолом: «Поскольку внешний наш человек изнемогает, потолику внутренний обновляется»[754]. Тако пресветлейшее сие сохраньше, чертога вечныя светлости улучити⁹⁰² да сподобитеся, в прекраснейший невестник с превосходящею славою да внидете, всекраснейшаго и всесладчайшаго Жениха Христа пресладкия любви да насладитеся, славяще и благодаряще пребесчисленное милосердие его с безначалным его Отцем и с Пресвятым Духом ныне и во вся веки. Аминь.

О краткости времене

Что убо изъявляют повествователи, что написуют предивныя памяти достойное? Написуют о Ксерксе, монарсе персидстем, дело изряднаго удивления: иже на Елладу хотя воевати, толь многая воинства яко землепохотных⁹⁰³, <тако> водопутных⁹⁰⁴ собрав, на видение оных сам изыде. И видев толикая множества храбрых, толикое собрание воинства, толикия бесчиленныя полки, в толико дивнем уряжении⁹⁰⁵ стоящыя, елико земли покрыватися от множества ратных, различная шары зрения[755] подлагающи смотрящим. Море же корабльми и прочими сосудами исполнятися толико, елико вод пучинам не являтися от множества корабленаго. Сицевая видения многочислена, таковая уряжения преславна, преславную и безчислену сладость монарха сердцу подаваху. Но той вся толикая воинства обозрев, что содевает, что преславное показует? Абие⁹⁰⁶ величайшею печалию и множайшим плачем поражен, быстротечныя источники слез от очию свождаше. Которому внезапному рыданию, киим слезам монарха началник воев удивися, вкупе и устрашився, кая вина того необычнаго плача, монарха вопрошаше. Отвеща: «О, коль есть краткое житие человеческое! Яко от толь многочисленнаго воинства, от толика премножества людей, ихже ныне вижду. егда сто лет времене прейдет, ни единаго человека в живых не будет. И како не плачю, како не обрыдаю многослезное время скоротекущаго пребывания!»[756]

Таковым убо правым языческаго монарха изречением кто не сложится⁹⁰⁷, кто не почюдится, кто не разсмотрит разсмотрительно краткости кратчайшаго жития, сну и сени весма подобна, по реченному царепророком: «Дние его, яко сень, преходят».[757] Псалом.

Слышах убо в некоем велицем и многочеловечнем граде человека единаго, конечною нищетою и последним неимением поражена толико, елико ниже своего дома имети и не токмо дома, но ниже прибежища главу подклонити, и не прибежища токмо, но ниже нуждных одежд к покровению, и не сих токмо, но ниже укруха⁹⁰⁸ хлеба, глад плоти утолити могуща, приобретати. Иже вне жилищ, вне домов на улицах града гладомь и хладом томим, на единой рогозине нуждный⁹⁰⁹ сон (аще и сном нарещи леть есть) и покой приимаше, слезами и воздыханьми паче, неже хлебом, питаяся. Сей некогда в соннем мечтании виде себе премногое множество злата обретша, и тако обогатевша, тако прославившася, яко полаты прекрасны, чертоги пресветлы, двокровны⁹¹⁰ и трикровны⁹¹¹ имети, села велика и многа, благоплодием изобилующа, сады и вертограды многоцветны и благоуханны, премножеством овощей кипящия, стяжания⁹¹² безчислена, богатьства неудобь исчисляема: кони многи златоуздны⁹¹³ и драгоценны, ризы предраги, пищей текущее изобилие. К сим служащих множества предстоящих лики⁹¹⁴, дароносящих и кланяющихся многочислие, и прочими, яже богатым и славным века сего присвойствена, всеми кипяща, всеми пребогато изобильствующа мняшеся зрети. Чесо ради и великим веселием, радостию невестною⁹¹⁵, сладостию несказанною исполнена себе зрети мечташеся. Но егда возбудився, вся прелестная мечтания, вся оная привидения абие, яко сень, преидоша и, яко дым, без вести Быша.[758] Токмо един рогоз⁹¹⁶, на немже пространьствоваше⁹¹⁷, обрете оставлен. О, коликия печали, о, коликаго слезнаго рыдания исполняшеся! Укоряше себе, поношаше себе, прелести сна толь последовавшу удобно. Такова есть краткость человеческаго временожития и ничим же разньствена! Но по всему подобна нищаго оного прелестнаго мечтанию, яко привидение, яко сон, скоропреходящая, по речению церковнаго дивнаго песнопевца: «Временное сие житие – сень непостоянная, сон прелестный». Святаго Иоанна Дамаскина стихера на погребение.[759]

Что убо есть от сотвореных пера легчайши, что же от пребывателных времене кратчайши? – Воистину, ничтоже. Перо бо, удобовземшися от ветра⁹¹⁸ на воздух, ктому⁹¹⁹ не является, и сие претекши скоробежания предел, назад не возвращается. Воды речныя елико быстрейши сотворяют течение, толико борзейши озостряют стремление, и время коль скорши движение течение показует, толь кратчайши краткость свою изъявляет. И оныя убо вещи, по себе пловущыя быстро, носяще вкупе с собою в пучине моря преносят. Время же человеки, в нем живущия, скорейши движущи, во иный век собою абие преводит. Трава, зелено возрастши и цветами прекрасно процветши, коль пресладкое зрение смотрящим очесем подавает, но абие увядши и иссохши, ктому не зрится. И время, показавшися, честными благополучии вмале услаждает, но внезапу пресекшися, вся красная и веселая тако, яко и жители в небытие устрояет, по всепремудрому Псаломнику: «Человек яко трава, дние его, яко цвет селный, тако отцветет».[760] Псалом.

Воззри прилежно на время жития сего и виждь, яко есть коло⁹²⁰ некое непостоянное, толико непрестанно быстротекущее, толико присновертящееся⁹²¹, стояти никогдаже, опретися⁹²² никогдаже могущее. Како убо постоит, ног не имея? Како опретися, рук не имея? Како усмотрит вредная, очес не имеющи? Чесо ради не точию краткая, но и слепая жизнь и есть, и нарицатися достойна, яже без рук вся объемлет, без крил быстролетает, кроме⁹²³ ног скорошествует, кроме очес прельщая преводит. И толь скоро сотворяет течение, толь быстро являет стремление, толь очесное соделовается мгновение. И тако кратка, яко и дивный философ к вопросившим о количестве ея дивным изображением предивне показа: обратився лицем, паче скорейши вспять отвратися, зело краткую краткость времене сим изъявляя.[761]

Не туне⁹²⁴ убо древнии мужие и дивнии, ⁹²⁴ови святостию и разумом препохвални суще, ови⁹²⁵ премудростию естественною красносияюще, кратковременное и малодневное жизни окаявающе⁹²⁶, зело оплаковаху, еже показует праведный и непорочный мужь, сетовалне глаголя: «Человек бо рожден от жены малолетен⁹²⁷, исполнь гнева или яко цвет процветый отпаде, отбежа же яко стень и не постоит. Время краткожизния нашего скороотпадающему цвету, скоромимотекущей⁹²⁸ и непостоянней сени премудре уподобляя, приглашаше: никогдаже стояти, но присно тещи удобное». Тожде и премудрый стихотворец, стихотворски витийствуя, возглашает:

«Красота добро кратко, подшедши под лета, малеет и своего лишается цвета».

И паки:

«Сей лучь, иже на юных ланитех блистает, Единым мгновением и вдруг исчезает». Апофегмата, книга 1.[762]

Краткожизненое и скороисчезательное времене сим объявляя, но явственнейши сего и светлейши другий стихотворец, представляя, глаголет:

«Часы пловут, в которых скоро стареемся, Дни бегут, удержати не надеемся.

И паки:

Ни вода збежавшая назад возратится, Ни час, иже миновал, напреди явится. И паки:

Время непрестанно бежит движением, Аки реки быстрыя стремлением, Подобно времена в равен⁹²⁹ уплывают, И новости вседневны тому подражают».[763]

И что ми много глаголати о сем, что древняя привносите словеса? Не есть ли обыкновенное в человецех изрядное речение, не обносится ли сицевое пословие: «День наш есть век наш».[764] Еже толико добре, толико полезне проглашается, елико праведно и истинно показует нашего пребывания краткоприжизненое. Но еще сего и светлейши и изряднейши другое добрословие благолепне провещавается: «Житие наше сие часовое⁹³⁰ есть».[765] Сия вопиют младенцы, сия возглашают мужие, сия старцы взывают, сия жены и девы и всяк возраст немолчными языки проповедают, веема краткое, веема борзотекущее пребывания нашего изъявляюще, не веком, ниже летом⁹³¹, ниже временем или месяцем, но днем, паче же кратчайшим часцем прекраткое маловременьство краткожития нашего опевающе, нарицают, еже не точию малодневными измереньми сокращается, но и скорейшими течении пребегает. И не токмо скороминутне скончевается, но и нечаянно пресецается. И тако быстро и внезапно исчезает, яко повсемственный и общенародный всем высоце звенит глас: «Помышление человеков за морем, смерть же за хребтом».[766]

Не сия ли и непременное изречение самое, всекрепкое уложение самое, правдосудительный указ самый самого великаго и непостижимаго Бога елико велегласно, толико всезаконно к человеку первому возгремевш, коль всеистинно, коль преясно кратчайшее и скоропреходящее времене изъявляет, рекий: «Земля еси и в землю паки пойдеши».[767] Бытия, глава. Еже нечто ино знаменует токмо удоботленное, сокращенное и удоборазширительное маловременное нашего пребывания, естеством плоти подобно траве из земли изникшее⁹³² и в землю паки отходящее.

Пойди мыслию, обтецы помышлением, прелетай крилома⁹³³ разума во вся преждния роды, во вся бывшая времена, по всем вселенныя местом, от начала века даже доныне и узриши непременнаго Божия завещания всемощное постановление, самым делом неущербне исполняемое, толико бо несказанное множество народов, толико неисчетное число человеков, иже в толико многотысящных летех народившеся Быша, где ныне суть? Не вси ли преидоша, не

вси ли умроша, не вси ли в персть обратишася, по речению к преблаженному Богу блаженнаго пророка: «Отимеши духи их, и исчезнут и в персть свою возвратятся».[768] Псалом 103.

Грядем прочее⁹³⁴ на божественная святых словес просвещения, грядем и бодроприлежныма очима ясно увидим, коль пресветло и утвердително о жития кратковременстве нас, осиявающе, просвещают. Что убо дивный царепророк, избранный по сердцу Божию муж, Божиим духом просвещен, к Богу глаголет: «Яко тысяща лет пред очима твоима, Господи, яко день вчерашний, иже мимо иде».[769] И аще по гласу пророка тысяща лет толико мала, толико кратка есть, елико единому дневи приуподоблятися, двадесятая часть тысящи колико кратчайши, колико малейши будет, всякому удобопознано⁹³⁵. Но и того порфироносный сын и престолонаследник, мудрость поглотивый всебогатно, яко воду, толико прекращенное времене нашего премудре окаивает, елико ниже временем, но случаем, и случаем подобоскотским, именуя, паче же суетою нарицает, глаголя: «Яко случай сынов человеческих и случай скотский случай в них: яко смерть сего, тако и смерть сего, и дух во всех, и что излише имать человек паче скота? Ничтоже, яко всяческая суета, вся идут в едино место, вся Быша от персти, и вси в персть возвращаются».[770] Еще же и Исаия, Божий перун⁹³⁶, громогласне возглашая, глаголет: «Всяка плоть сено и всяка слава человеча, яко цвет травный, посше трава – и цвет отпаде».[771] Что же и праведный и святый мужь и Божий брат глаголет: «Кая бо жизнь ваша, пара⁹³⁷ бо есть, яже вмале является, потом же исчезает».[772] Тожде утверждает и всекрасный учитель языков, крилатый небоходец, не токмо скоропреходящее времене, но и неизвестное отшествия и не токмо неизвестное, но и весма неизбежное явствено представляя, глаголет: «А о летех и о временех, братие, не требе есть вам писати, сами бо весте, яко день Господень, якоже тать в нощи, тако грядет. Егда бо рекут „мир и утвержение», тогда внезапу нападет на них всегубительство, якоже и болезнь во чреве имущей, и не имут избежати». 2 Солуняном, глава 5.[773]

Слово о пианстве

Велие зло человеком пианьство содевает, велие неблагополучие тако духовное, яко телесное невоздержное вина и пива упивание источает. Что человека непотребна небу и земли содевает? – Пианство. Что в безстрашие в тимении и сквернах валятися творит? – Пианство. Что человека безстудна и напраснива⁹³⁸, яко пса, содевает? – Пианство. Что язык невоздержен, уста скверноглаголива содевает? – Пианьство. Что без молитвы и без поста и без всякаго благодеяния жити содевает? – Пианьство. Что тако лишение благодати божественней и отлучение святыни творит, якоже пианство? Что безумна и Несмыслена⁹³⁹ человека и скверными блевотинами помазана творит? – Пианство. Что тако ссоры, и вражды, и зазоры⁹⁴⁰, и безчестия содевает, яко пианство. Что убытки и протори⁹⁴¹ и домов разорение тако содевает, якоже невоздержное пианственное питие?

Слово о наказании⁹⁴²

Наказание убо человеку вельми полезно есть и всякаго блага подателно. Ибо наказание ум человека просвещает и от страстей свобождает, душу светлу творит и от грехов избавляет. Наказание вся чювства в благочинии устрояет, добронравия человека научает, ко благоговейнству же и кротости наставляет. Наказание от всякия противности свобождает: путь правый к добродетелем показует, разум истинный во всем являет. Наказание домы во всяком благочинии устрояет, домочадцы всякому благому обычаю научает, рабы во всеблагом смирении водит, дети ⁹⁴³рождьшим я послушны творит⁹⁴³. Наказание состаревшимся жезл и подпора во всяком благопутешествии жития сего бывает: не попущает уклонятися в десная безмерия⁹⁴⁴ и сопротивная оскудения. Наказание юность обуздовает и от всякаго злаго обычая избавляет, всяких благих нравов и совершеннаго разума научает. Наказание младенцы во всяком благом устроении воспитовает и ко всякому доброделанию устрояет. Наказание всем благим человеку ходатай и всякому благому делу изобретник и наставник благ всем бывает. И приемлющии наказание и любящий его велию пользу себе приобретают и всякими благими нравы же и обычаи обогащаются и паче всякаго украшения добронравием украшаются, по реченному: «Приемля наказание, во благих будет».[774] Притч, 16.

Послание Андреево с Москвы в общебратство

Понеже любопотщательни есте яко пчелы, по различным цветником повестей облетаете, от многодейственных цветов пресладкий мудролюбия плод обсысаете, откуду желательно и нам, ленивым, повествовати вам, что новонародное и удивляемо услышим, надеющеся и отсюду возмощи вам татствовати⁹⁴⁵ душепитательный мед. Аще ли же что и младенчески речем, уповаем яко отцелюбно не грубость осудите, но усердие и любовь восприимите.

Бысть убо нынешняго в 3 день октября персидскаго посла со зверми и птицами приезд в Москву,[775] емуже и честнославная стреча⁹⁴⁶ и многонародное зрение⁹⁴⁷, еже, како бысть, вкратце ниже услышите.

К вышепомянутому дню обнощева посол близ Воробьевых гор на загородном Долгорукова дворе[776] (тамо преведен с Володимирскаго пути[777]), заутра же в день той внезапу, яко вода, воскипеша московстии народи: улицы востопташася, слободы пролияшася, переулки протекоша. Мужи и старцы с юнотами⁹⁴⁸ текуще, жены спешащеся, мнози детей на руку носяще, конники колесничники ретящеся, вкупе налияся людьми путь той.[778] Во граде и по Каменному мосту огусте народами Калужский путь.[779] все поле до самого двора на шесть верст многочеловечно возблесне. Лавки и дворы утеснишася, и кровы их от многолюдства востужиша. На тынех, на столпах, на углах (и аще бы мощно висети – на воздусе), всюду везде по оному пути безчисленным кипящим народом. И ниже дождь, бывый того дня, ниже продожившееся до вечера время возможе домом люди отслати, но всем, яко некое диво, ожидающим зрети слона.

Поставлены же во граде по пути тому полцы пеших салдат.[780] Бывшу же полдню,[781] выехаша с Москве конных в строю полка з два, храбро же и мужески шпаги наголе имеюще. Таже потом сановники златоодеяннии московстии на украшенных конех, ихже колесницы златосияющия, каяждо спряжены имея по 6 аргамаков златообкованных и среброуздных. Пред колесницами же и по них и окрест них конница, ⁹⁴⁹красноучрежденная от великоможных домов⁹⁴⁹. По нихже одеждах кипяше злато и сребро, оружие их сияше и кони их во украшении гордо топчашеся. Диво зрящим показующе, с таковым высокоявлением пройдоша, приемше посла с товарищи его на златосияющия колесницы.[782] Прежде же отпущены Быша запасы посольския к Москве на ямских подводах. Посем с вышеявленною славою двигнушася с послом, предшествующим и последствующим конным с военачалники воином, окружающим златоупестреным юношам. Просыпану полю безщислеными народы. Идущим с ними прекрасным с краснейшими провожатаи колесницам, между колесницами же лев и львица на особых койждо телегах, и жар некая небывалая птица, и бабр⁹⁵⁰ многопестрый зверь, и попугаи различными цветы.[783]

Таже по сих что народное шатание, что друг друга поревание⁹⁵¹, что бесщисленное и многоутисненое людей пролитие? Понеже узреся, иже николиже в Москве видеся, и увидеся чюдо не во окиянском, но в московском народном мори, небывалое зрителище – превелий зверь слон.[784] Всадника правяща его на шии имея при нем на нем узрети его аки врабия⁹⁵²: высоту бо зверя сего глаголют и видится быти аршина с полпята.[785] Имея нозе длиною с человека, толсты, аки бревно. Толстотелесен, недолог по высоте, безшерстен, великоглав, черновиден, горбоспинен, задопокляп⁹⁵³, ступанием медведоподобен. От верхняя губы имея (нарещи) нос, или губа, или хобот, яко рукав платна,[786] висящ до земли, имже, аки рукою, брашно и питие приемлет и, согнув, во уста своя отдает. От верхних зубов два зуба велики вне торчат сюду и сюду. Уши имея велики, яко заслоны печныя. Рошки малы, подобны агньчим. Хвост подобен волуему. Седяй арап имеет в руце не узду, но железное орудие согбенное, егоже остротою за главу емля, удерживает и управляет; не от ремения же и побивало, но железо острое, аки чокал⁹⁵⁴.

Сицеву чюду со всадником бредущу, народом же от обою страну, яко быстринам морским, окружающим, насмотретися множайше усердствуют и едва от многоутиснения путь дающим задним, приближнейшим быти ретящимся⁹⁵⁵. Предним же от них близ зверя прибросаемым, отгоняющим их приставником. Овогда же арап оный седяй, аки глумяся, обратяше зверя на народы, и зверь, аки глумяся, скоро поступаяй на десно, или на шуе, или назад, или на людей. Бегству у людей учиняшеся. Диво же бе зрети: ниже бе народи далече убежати могуще, ниже зверь потопта или досади кого, но абие не вредя людей, обратяся водим всадником, в путь свой идяше. Тако сие чюдо народы окружаемо, с покровов⁹⁵⁶ и с высот зримо и удивляемо, в Москву вниде. Сице с славою и честию посол во уготованный ему на Усретенки дом в вечер глубок прииде,[787] народы же расходящеся, носяху кождо во устех видение зверя. И бе слышати, у всех количество и качество слона на языце обносимо.

Но аще кто како о звери чюдится, мы долженствуем и сия в потщание добродетелей и пользу свою повесть восприяти. Аще бо толико усердие показаша народи видети безсловеснаго зверя, не паче ли возусердствуем мы, в торжества и праздники и присно на видение Бога и святых его, в молитвах и слышании Божественнаго Писания дни препровождающе, теми очистившеся невидимаго будем; «Блажени, – рече, – чистии сердцем, яко тии Бога узрят».[788] И аще тако честно подобно и чинно украшенно на славу царствия иноцарственнаго посла приемлюще чиноначальницы с воинствующими, не паче ли в духовных делех и молитвах и торжествах духовнии начальницы и причетники долженствуем благоукрашати и благоговействовати на умоление и приятие самого царствующих Царя и Пречистыя его Богоматере и святых угодников его. И аще толь велий зверь малому при нем всаднику повинуется и водится от малосильнаго многомощное безсловесное диво, сице покорившему всяческая под нозе человека.[789] Создателю повинуется, кольми паче мы, словесная Божия тварь, Создателя своего повеления долженствуем не забывати и озвершияся страсти наша обуздовати. Аще бо безсловесный удержевает ярость воздержати устремление, стяжевает покорение и ласкает питающему, не паче ли нам достоит питающаго нас Бога возлюбити, по его заповеди,[790] паче всех, и возлюбити тако, якоже рече: любяй мя заповеди моя соблюдает,[791] и стяжати доброе послушание и удержати ярость и воздержати безчинное вожделение, да не како похулится нами беззаконий ради наших, но паче да прославится во исправлении добрых дел великолепное Божие имя.

Боголюбивым отцем и братии и всякаго чина, рода же и возраста пустынным Выгорецким жителем, христолюбным плачевным молитвенником о Христе Исусе радоватися.

«Вострубите, – рече божественное во пророцех слово, – трубою в Сионе, освятите пост, проповедите цельбу, соберете люди, освятите церкви и соберете старца, совокупите младенца и ссущая млеко».[792] И паки: «Да воеплачются служащий Господу и рекут: пощади, Господи, люди своя и не даждь части своея на укоризну».[793] Иоиль, глава 2.

Чесо ради издревле сионская церковная чада, во вся времена, в ниже или напастное кое разгорение видяще, или за умножение беззакония гнев Божий настоим⁹⁵⁷ ощущающе, или многими наветы от ратующих бесов же и человеков окружаеми предзряще, тогда умиленными мысльми, сокрушенными сердцы к всемилостивому Богу прибегаху, всенародный пост и молитвы составляху, со многими слезами и усердием покаяние грехов вкупе с постом и молитвами проповедоваху, и тем боголюбным тщаниемь же и усердиемь Божий гнев многажды уставляху⁹⁵⁸, напасти востающыя угашаху, ратующыя утоляху, и премногое Божие милосердие тем себе приобретаху. Якоже ниневиты всенародным постом, и молитвами, и плачем, и престатием от греха Господа Бога умилостивиша,[794] якоже израильтяне во Египте всенародным плачем и молитвами Божию помощь преславну возваша и Птоломея царя, зело возъярившася потребити я от земли, на милость привлекоша и вся своя клеветники и наветники посрамиша.[795] Тако по древним историям церковным гречестии и российски христиане многажды всенародным постом и молитвами милость Божию и заступление Пречистыя Богородицы и всех святых получаху и бесчисленных напастей и бед избываху, елма убо и нас, последних (вси вы весте, о, боголюбивое пустынное совокупление), постигоша, грех ради наших. последних времен сих различныя напасти же и беды: многим враждующим на древлесодержателное благочестие клеветником и наветником многим востающим и властей человеколюбие на гнев на нас, беднейших, воздвизающим. Или не чюем, како плачют нижегородских стран староверцы,[796] или не ощущаем, како ныне в скорбех велицех феодосиева собрания и прочий окрест их живущии согласия их жители?[797] Что же к сим? Аще воззрим умныма очима, бесовским злоковарствам на род человечь колико возярившимся, беззаконием многим умножившимся, грехом бесчисленным разгоревшимся, тернием обычаев злых в безстрашных сердцах зело возрастшим, раздорам и распрениям⁹⁵⁹ церковным во всю вселенную колико воспалившимся. О, кто бы ныне сладкий Иеремия, востав, сладкия источники слез за ны пролиял бы![798] Кто бы Моисей и Аарон и Самуил, в призывающих имя Божие воздвигнувся, умилостивил бы милостиваго Бога[799], от нас прогневана!

Темже должни мы вси, о, пустыннии боголюбивии жителие, по Божию пророческому гласу, всепустынный пост и молитвы совокупити и покаянием Бога умилостивити, и помощь его призвати, и пречистую всего мира заступницу о заступлении молити, и вся святыя на молитвы Богу за вся умоляти. А наипаче еже ныне бысть чюдо дивно и преславно, чюдо, на умиление и слезы самая каменная сердца подвижущо: яже Пречистая Божия Мати пречистым своим образом изволи показати, яже всегда Пресвятая Богородица, рода християнскаго премилостиво жалостьствующая, яже бедам и напастем християнским теплейши состраждущая, яже в скорбех и бедностех наших, яко прещедрая мати, милосердия всемилостиво ущедряющи и Сыну своему и Богу нашему о нас ходатайствующи, и нас от грех и беззаконий наших обращающи.

Благоизволи ныне премилостивая Владычица от священнаго ея образа слезное течение явити. Кий образ древнейший, начертания подобие Тифинския чюдотворныя иконы имеет, мерою штилистовый[800] по изографов размерением. От того Пречистыя пречистаго образа, от премилостиваго тоя воображеннаго очесе слезы многи источишася. О, чюдо дивно, боголюбцы, и преестественно: от суха древа и вап⁹⁶⁰, множайшими леты пресушенных, слезное естество истекает. О, чюдо ужасно и умиления полно: плачет образом своим за наша беззакония всерадостная Царица Богородица, плачет иконою своею за наши грехи и скорби и напасти неба и земли преславная Владычица.

Бысть же сие преславное слез явление от священныя иконы Божия Матере в настоящее сие от мироздания лето 7227-е месяца маия в 28-е число, в четверток первыя недели сего священных апостол поста, в день по обеднем времени узревшыяся и мало не до службы вечерния кротце текущыя.

Содея же ся сие чюдо во обители Крестней и тоя самыя Божия Матере пречистаго Одигитрия образа Тифинскаго девическаго при Лексе реце пустыннаго собрания. Стоящу сему священному образу в сенех столовыя трапезы, при самых дверех входа и исхода во храм молитвенный. Дану сему святому образу прежде сего по прошению постниц от покойнаго церковныя службы уставщика Петра,[801] пред киим священным образом многу веру и усердие имеша молитися плачевныя постницы к Божией Матери, и в скорбех их и печалех, глаголют, многое утешение и облегчение приимаху всеверно приходящия и слезно молящыяся.

Узре же ся сие чюдное слез течение от священныя иконы сея сицевым образом. Молящейся единой от постниц во время окончания трапезнаго и пошедшей в трапезу и бывшей близ святаго сего образа и воззревшей умилно, поклоншейся и рекшей: «О, Царице Владычице, Мати милосердая, спаси мя, грешную, и помилуй». И абие узре на священном сем образе под десным оком кротце катящуюся каплю слез. Она же удивившися и возмне тогда, некогда водою мывша образ сей и от сего оставшийся капли воды течаху. И тако скоро к последней трапезе, заставая⁹⁶¹, отиде. По полуденном же спании другая постница старица прииде пред священным сим образом молитвенное правило творити и узре текущия слезы от очесе пречистаго Пречистыя Богоматере образа. Ужасом одержима необычнаго видения, и ужасшися, надолзе и плачющися. Прииде близ образа и виде многи слезы, истекшыя на дску, на нейже стояше священный образ, и персты дерзну прикоснутися слезным сим священныя иконы струям. Сама же та постница в велицем недоумении и ужасе бывши, плачющи, в себе ужасашеся: «О, что ради, – глаголаше, – плачет Мати милосердия? О, чесо ради испущает слезы Пречистая Владычица?» И тако во ужасе и жалости мнозей изумляяся, желая иным возвестити и оставити ужаснаго чюдеси не можаше: похождаше от ужаса и от жалости возвращашеся, дважды в трапезу вступаше и паки ко образу возвращашеся. Обрете же едину от постниц, возвести сие ужасное чюдо. И та шедши, виде и заста еще слезу, текущу от священнаго образа: уже бо тогда изсякаше слезоструйный священныя иконы источник; обаче и сия сподобися узрети дивнаго сего видения. И тако познавается в четырех или пяти часах бывшее от священныя иконы слезное течение.

Еще же сему чюдеси последовало другое чюдо: на другой день в пяток в той же обители в келии от образа святителя Николы и всемирнаго милостиваго молитвенника, видеша плачении постницы от очию истекшия слезныя струи. О, кто изречет силы твоя, Христе Боже, и Пречистыя Богоматере и святых твоих угодников! О, кто может известити сокровенная суды и таинства всепремудраго всемогущаго Бога! Быша и древле в Российстей земли сицевая чюдная слез течения от образов Пречистыя Божия Матере, якоже поведают истории церковнии. Егда и християнстии народи при сих чюдесех молитвами и моленьми и милостынями Господа Бога и Пречистую Богородицу умоляху тогда прилежно.

В лето 6677 (1169)-е, егда напасть велия Великий Новград обдержаше⁹⁶², суждалцы бо тогда разъярившеся, множайшими воинствы пришедше окрест града, разоряху и самый град восхитити наступающе,[802] тогда архиепископ Иоанн и Божий человек со всеми гражданы во многих молитвах пребывающе, молением и покаянием Бога умилостивляху, и егда вознесше на забрала градная образ Знамения Пречистыя Богородицы, виде святый слезы от иконы, яко некий едемский источник. И тогда разгневася Господь на противныя и разгнани Быша ратницы, новгородцы же избавлени, прославиша Бога и Пречистую Богородицу.

Паки в лето 6845 (1137) в Великом же Новеграде[803] от образа Пресвятыя Богородицы слезы многи истекоша. По двою же лету паки от другаго Пречистыя образа слезное течение бысть. И тогда новоградцы со священными соборы многое моление всенародное Спасу и Пречистей Богородице прилежно творяху.

В лето же 6928 (1420)-е во области Псковской[804] такожде чюдно слезы истекоша от образа Пречистыя Божия Матере, еже тогда всенародное псковское християнство, руце на высоту воздеюще, со слезами «Господи, помилуй» взываху и к Богородице вопияху: «О, Пресвятая Владычице Богородице, не остави нас, помози нам, грешным и недостойным рабом твоим»,[805] и певше со звоны многая молебная хвалословия Пресвятей Богородице, мужие и жены, и многи милостыни тогда сотвориша.

И понеже сия бывшая знамения от образов Божия Матере боголюбивии християне в молитвах, постех и покаяниих и милостынями предпочитаху, тогда милостию Божиею и заступлением Пречистыя Богородицы от напастей избавляеми Быша и мирное житие пожиша, по реченному: «Милость же Господня от века и до века на боящихся его».[806] И по Соломону: «Ходяй праведне помощь обрящет».[807] И паки по Псалмопевцу: «Волю боящихся его сотворит и молитву их услышит и спасет их».[808]

Есть же и иная знамения бывшая, о нихже тогда нецыи презоривии и грехолюбивии вознебрегоша, за сия казнь и гнев Божии подъяша.

Повествует бо ся в царственной Степенной книзе в грани 15 в главе 59. В лето 6979 (1471)-е в Великом Новеграде начата быти многая знамения: ино же знамение страшно и удивлению достойно: в женстем монастыре великомученицы Евфимии от иконы Пречистыя Богородицы многажды слезы, яко струи, от очию исхождаху. Богобоязнивии же людие, видяще сие, плакахуся о сем и Бога моляху. Прочий же жестосердии людие, Бога не боящеся и ни во что же вменяху, но паче во глумление превращаху и не ведуще своея пагубы и грядущаго на них гнева Божия,[809] еже и бысть, порабощени бо и казнени Быша от великаго князя Ивана Васильевича. Послежде же от царя Ивана Васильевича с велиим кровопролитием казнени жестоко и разорении Быша.[810]

Таковы плоды гнева Божия пожинают жестокосердии и непокаяннии грехолюбцы и непокоривии заповедей Божиих презиратаи. Якоже Церковь в молитве Манасии царя глаголет: «Непостоянен гнев на грешники прещения твоего».[811] И паки Псалмопевец вещает: «Одождит на грешники сети, огнь и жупел и дух бурен».[812] И Соломон вопиет: «Клятва Господня в домех беззаконных, домове нечестивых потребятся.[813] И паки Дух Святый Сирахом да свидетелствует: «В соборищи грешных разгорится огнь, лед, глад и смерть, вся сия в месть грешных создана суть».[814]

Сия вся вышереченная познавше и во пророцех прещения⁹⁶³ Божия на грешники слышавше, о, всепустынное совокупление, разумевше же милость Божию и заступление на творящих заповеди его, по реченному самем Богом во Исходе: «Аз бо есмь Господь Бог твой. Творяй же милость в тысящах любящим мя и снабдящим заповеди моя».[815]

Ведуще же понуждение и милосердие Божие обращающимся от грех и кающимся о беззакониих своих, по гласу Божию, во пророцех реченному: «Обратитеся ко мне, и обращуся к вам, глаголет Господь Вседержитель».[816] И паки по премудрому Сираху: «Не медли обратитися ко Господу, не отлагай дне от дне, внезапу бо найдет гнев Господень и во время отмщения погубит».[817] И паки по реченному во Иове словеси: «Аще будут тысяща смертоноснии ангели, един от них не уязвит тя, аще размыслити сердцем обратитися ко Господу»,[818] разумеюще же и во времена напастная молитвам прилежати повеление Божие, по священному Христову евангельскому словеси: «Молитеся, да не внидете в напасть».[819] И паки: «Молитеся, да не будет бегство ваше зиме, ни паки в субботу».[820] И паки по апостольскому заповеданию: «Злостраждет ли кто в вас, да молитву деет».[821]

Слышавше же и нынешнее чюдотворное слез течение от священнаго образа Божия Матере, еще же и от иконы чюдоносиваго отца святителя Николы, к сим же подобия таковых чюдес и молитв прилежание в древних християнех и милость Божию, излиявшуюся за сия, выразумевше⁹⁶⁴, вси вкупе единосоветне во общежителстве и елицы случшиися скитстии жители, восприимше пророческий глас, времени благоключим, сице вещающий: «Вострубите трубою в Сионе, освятите пост, проповедите цельбу, соберете люди, освятите церкви и соберете старца, совокупите младенца и ссущая млеко».[822] И паки: «Да восплачются служащий Господу и рекут: пощади, Господи, люди своя и не даждь части своея на укоризну».[823] И дабы благоизволил всемилостивый Господь Бог и последующаго сим пророческаго гласа и в нас, грешных, исполнитися. Рече бо: «И возревнова Господь о земли своей и пощади люди своя. И отвеща Господь людей и рече: се аз вам послю пшеницу (и прочее), и насытитеся их и не дам вас к сему на поругание в страны».[824]

И тако общесоветне усоветовахом всем пустынножительным людей сия вся известити и возбудити молитвенников на прилежныя молитвы, ленящыяся – ко исправлению⁹⁶⁵ усердия, грехом уязвенныя – ко обращению и покаянию, и всех к заповедей Божиих хранению. И вкупе всем нам составити всепустынный пост и молитвы ко Всемилостивому Спасу и Пречистей Богородице и всем святым. Время же поста определихом имети с нынешняго воскреснаго дня, еже есть июня с 14 числа, на целую седмицу до другаго воскреснаго дни. В пять дний, в понеделник, вторник, среду, четверток, в пяток по единова всем на день ясти постная пища, без рыбы и масла. Поклонов же полагати во вся седмь дний сверх церковнаго и келейнаго правила колико кто имеет: 100 поклонов[825] полагати Всемилостивому Спасу, глаголюще умилно: «Господи Исусе Христе, Сыне Божий, помилуй нас». 100 поклонов полагати Пречистей Богородице, глаголюще с сокрушением: «Пресвятая Госпоже Богородице, спаси нас». 100 поклонов всем святым полагати, вопиюще усердно: «Святии вси, молите Бога о нас».

И сия вся наша общесоборная пустынная присоветования⁹⁶⁶ скитским выборным и книжным учителным братии на нынешний воскресный день, еже есть июня в 14 день: собрати со всех келии и всем прочести явственно и всем велети по всем келиям известити имянно, дабы вси потщалися всеусердно молитв и пост усоветованный со страхом Божиим исполнити. Вемы же, яко богобоязнивии подвижницы и теплии молитвенницы и паче сего могут исполнити, иже и всегда подвизаются. Но обаче дабы никто не был в пустынных жителех непричастен сего постнаго и молитвеннаго установления.

К сим же утвержаем и преждебывшая по священным правилом и святых отец уставом всепустынная усоветования: дабы выборныя и вси боголюбивии пустынножители крепце утвержали, еже в воскресныя дни и праздники господския не тружатися, но молитвам и поучению священных книг прилежати, еже во вся посты, и в среды, и пятки, во весь год по уставом церковным единоядением поститися, еже межтрапезным ядением не ясти коемуждо. Еже грехов и беззаконий соблюдатися и вин таковых сохранятися и молитвами, постом, чистотою и милостынями Господа Бога и Пречистую Богородицу умилостивляти, и коемуждо разсмотрети совесть сердца своего и отринути, аще кто имать кое беззаконие и нравы злыя и грехи, и обратитися ко Господу Богу покаянием и слезами, послушающе Божия гласа, во пророцех к нам глаголюща: «И ныне глаголет Господь Бог наш: обратитеся ко мне от всего сердца вашего, постом и плачем и рыданием, растерзающе сердца ваша, а не ризы ваша, и обратитеся ко Господу Богу вашему, яко милостив и щедр есть, долготерпелив и многомилостив и каяся о злобах».[826]

Тако общесоветный пост и молитвы Богу принесем, и сердца наша покаянием и обращением очистим, тако всепустынным соединением Господа Бога и Пречистую Богоматерь и вся святыя с постом и плачем помолим и на хранение заповедей Божиих себе же и друг друга воздвигнем, да за молитв Пречистыя Богоматере и всех святых милостиво милость всемилостивый Владыка християнству и всему человеческому роду да излиет человеколюбно, небу искапати сладость и земли принести плоды и всем стихиям кротко двизатися на служение нам да повелит. Рати и соблазны, на благочестие востающия, да отженет⁹⁶⁷. Мирское море тихомирными волнами да установит украшатися, рати бесовския от нас, маломощных, да отженет. Междоусобныя друг на друга бурливыя ветры да установит. Спасение вечное душам нашим благодатию его безпакостно да устроит, зломыслящих на ны да укротит и благотворящим благо многосторично⁹⁶⁸ да воздает, в напастех сущая да свободит, и за благочестие страждущыя да избавит, и вся благая зде и в будущем веце да подаст нам, по священному его евангельскому словеси, глаголющему: «Яко аще два от вас совещаета на земли, о всякой вещи, еже аще просита, будет има от Отца моего, иже на небесех»,[827] еже да получим восприяти, потщимся всеусердно единомысленно пость и молитвы с покаянием исполнити, о Христе Исусе Господе нашем, емуже слава со Отцем и Святым Духом во вся веки. Аминь.

Боголюбивым скитяном всякаго чина, рода и возраста о Христе Исусе радоватися.

Понеже ныне по указу императорскаго величества ис Правительствующаго духовнаго Синоду приеха на Петровския заводы учитель иеромонах Неофит, которой нас, пустынножителей, позывает на ответ о наших жительствах и о содержании благочестия и о еже не сообщаемся с ними в духовных их чинодействиих, такоже и от господина лантрата о сем нам на разговоры приити приказывается, что же убо мы, о, беднии пустынножители, на сия чинити будем и о готовом святейшем святоотеческом благочестии какия ответы предуготовляти будем, зане потреба на таковая ответствования риторских языков, филосовскаго знатия, богословскаго предуведения, к сим же и защищения высоких лиц. Мы же вси, якоже сами веете, груби и нищи и беззаступни и простыми душами последствуем готовому святых чиносодержанию. И како нищии с высокими, гонимии и осуждении с грозными владыками стязатися возможем: аще ответствовати отречемся – яко безответни от них осудимся; аще ли ответствовати возусердствуем, то опасство преждебывших збытия, кои староверцы ответства подаша, яко хульницы и досадники изгнашася, инии же и смертию ответы своя запечатлеша.[828] Понеже не с равными себе по плоти стязание стало быти.

Темже, боголюбивейшии пустынножители, в таковых обстояниих должно нам молитися Господу Богу с постом и плачем и сокрушением сердечным, по заповеданию Христову, во Евангелии глаголющему: «Молитеся, да не внидете в напасть».[829] И паки: «Молитеся, да не будет бегство ваше в зиме, ни паки в суботу»[830]. Чесо ради общесоветне в общежительстве скитстии староста и выборнии вкупе зболезновавше. Всем пустынножителем приказываем, дабы с нынешняго воскресения[831] седмицу всю в посте и молитвах пребыли: в пять дней без рыбы и скорому, по единова на день токмо яли; аще бы кто могл, и вящыпе поститися.

Поклонов же да творят вси сверх церковных и келейных по триста. На первом сте глаголати общая молитва: «Господи Исусе Христе, Сыне Божий, помилуй нас». На втором сте на 8 поклонех глаголати: «Спаси, Господи, и помилуй посланныя и зболезнующия за нас». На другое 8 глаголати: «Пресвятая Госпоже Богородице, спаси нас и помози нам». На третием сте на 8 глаголати: «Святии вси, молите Бога о нас». На другое 8: «Святии вси рустии чюдотворцы, молите Бога о нас». И сия вси поклоны не едину седмицу, но до окончения дела полагати. Вси елицы боголюбивии молитвенницы, потщитеся усердно молитися; елицы ленивии – воздвигнемся от лености нашея и возусердствуем; елицы во гресех бывший – потщимся покаянием и плачем Бога милостива учинити и молитися прилежно о помощи Божией в настоящую нужду и истязание. Отложим вси всяко нерадение, боголюбое же усердие восприимем, отложим свары и ненависти друг з другом, прощение же, примирение и любовь восприимем, отвержем невоздержныя нравы и грехолюбныя, восприимем же добродетели и воздержание, по реченному апостолом: «Всяк подвизаяйся от всего воздержится».[832] Но и в смиренных и кротких нравех пребываем, смиренно живем, смиренно да ходим, смиренно глаголати да обучаемся. Такоже и о прибывшем учители и о всем Синоде всяк учтиво и неукорно б говорил, но смиренно б и кротко поступали, [833] якоже и всегда на смирение от святых книг поучаеми бываем, да исполнится писанное пророческое слово: «Яко во смирении нашем помяну ны Господь и избавил ны есть от враг наших».[834] Аминь.

Благоревностным и люборачителным трудоподвизателным тщателем, во асийских частех на Воскресенских заводех[835] труждающымся, нашим вселюбезным о Христе братиям.

Ничтоже тако есть свойственно христианом, но еже всюду благоревностное житие имети. Ничтоже тако прилично, но еже великодушием и терпением украшатися. Ничтоже тако подобно, но еже правдою и истинною светлетися⁹⁶⁹. Ибо ревность христианы на подвиг поостряет⁹⁷⁰, ревность быстроподвижны являет, ревность легки труды им содевает и всякое место, всякое дело и труд удобно к сожитию и пользе являет. Великодушие же и терпение вся неудобства удобно пренести помогает и крепки и мужественны и адаманты оныя преславны показует. Правда же всюду честны, всюду любезны, всем благоприятны тыя всепредивно поставляет.

Откуду и ваше всеусердное тщание благодарствуем и трудоподвижную ревность похваляем, юже благоревностне всепредобрыми благотщании всюду доброприятну показуете. Труды таковы содеваете, подвиги сицевы являете, яже не точию нам и общебратству и сиротству полезны, но и честнейшему нашему господину[836] веема благоприятны и всей Российстей империи изрядную честь и дивную славу во всех странах возвышающий.

Чесо ради ваше о Христе усердие и добрую благопослушания ревность вселюбезно молим и впредь во ономь добротщании благотрудне и всеблаго· ревностне подвизатися, елико вседоброе тщание и всеусердныя труды о взыскании <и> получении всяких всеизряднейших материй минерных⁹⁷¹ всежелательно показовати, толико и правду христианскую в терпении всякомь великодушне изъявляти, не последующе двоедушным разлененыя слабости человеком, не яко наемницы трудящеся, ниже яко раби, пред лицем точию усердие показующе, но яко благодатнии евангельстии послушницы,[837] яко церковнии благоревностнии сынове, всюду дивным усердия радением, всюду всекрасным подвизания тщанием, всерадетельно сердцем, всеблагоподвижно видением ⁹⁷²и пред лицем и особно⁹⁷² правдоистинни, в благоподвизании доброревностни и тщательни изъявляйтеся и бывайте, повинующеся всепредивному апостолу, повелевающу в простоте сердца со страхом и трепетом работати и служити.[838]

Да вашим всеблагоревностным тщанием и подвиги и пресветлым правдожитием Божие святое и превысокое прославится имя и християнское древлеблагочестие всеизрядно прославится и полезная и спасительная и прибыльная всюду всепредивно возсияют и преизобильствуют о Христе Исусе. Аминь.

Боголюбивым и добропослушным чадом церковным о Христе Исусе радоватися.

⁹⁷³Вси убо подвизающийся и трудящийся добре плоды от трудов своих утешения приемлют, ибо и купцы, домы оставльше и чюждия страны преходят, и среброделатели и прочий художники дни и нощи в трудех препровождающе, мзду трудов своих во утешение приемлют⁹⁷³.

И аще от ⁹⁷⁴маловременных подвизающийся⁹⁷⁴ плоды утешения приемлют, кольми паче иже ²⁷⁵о вечных благих трудящийся⁹⁷⁵, иже о спасении души подвизающийся, иже о Небесном Царствии поты проливающий, иже молитвами, воздержанием и девственною чистотою сияющии, иже светлым послушания путем боголюбно в различных трудех шествующий и зде, на земли, благодати утешительныя и помощи Божия и заступления сподобляются, в будущем же превечном Божии Царствии вечную светлость и непрестанное веселие восприимут.

Темже и вы, Божии церковнии и братственнии послушницы, приимите за боголюбныя ваши труды в надежде восприятия вечных благ воспоминательное утешение. Приимите за верное ваше послушание уготованныя послушником венцы в вечной Божии Царствии. Ожидайте за маловременныя поты вечное Царствие, за малое почернение – вечную красоту, за малое терпение – вечное упокоение, за окоптелыя⁹⁷⁶ одежды – пресветлыя багряницы, за всякия богорадныя нужды – места светла, места покойна, отнюду же отбеже всяка болезнь и печаль и воздыхание, но жизнь вечная,[839] но беспрестанное веселие, нескончаемая светлость, непостижимая радость, несказанная сладость, неизреченная красота, всеутешительное красование, всекрасное ликование, всесладчайшее с друг другом превечное весельствование. Идеже день невечерний, весна благоцветущая – никогдаже зима; ветри зефири – никогдаже севери,[840] радость присно – никогдаже печали, тишина безмятежная. Несть тамо гонения, но присновеселие⁹⁷⁷: иноком – аггельское ликостояние, девственником – огненное летание, мучеником – пресветлое светение, изгнанным за правду – Царство Небесное. Ея же блаженныя жизни того благосчастнаго пребывания, того всеблаженнаго торжества да сподобит вы Христос Бог молитвами Пресвятыя Богородицы и всех святых во вся веки. Аминь

С сим писанием непотреб<ный> А<ндрей> Д<енисов> люботрудному вашему.

Доброрадительному братолюбцу и трудолюбному братскаго состояния доброжелателю Никифору С<еменови>чю в боголюбивемь усердии и благополучии богохраниму и всездравствену на многа лета всеусердно быти желаем.

Пресладкаго меда мудрособирающия пчелы, идеже аще летают, пресладкий мед собирают: на лесных местех и садовех витают, тамо медовую сладость приемлют, на полях ли и нивах гостят и оттуду пресладкаго меда приносят, горы ли и удолия посещают и там пресладкий мед собирают, травы ли и цветы целуют, и тамо пресладостный плод облизуют.

Твое же пчелоподражательное братолюбие, идеже аще братоболительно и послушательно витаеши, тамо пресладостный плод многоскорбней своей матери собираеш<и>: европския ли места обходити, оттуду полезная братству приносиши, асийския ли страны обтичеши, откуду богорадному сиротству утешителен плод собираеши; Колыванския ли горы посещаеши, и сии труды во упокоение богораднаго братства приемлеши и молитв и благословения и милосердия Божия за сия благополучно и с прочими ревнители сподоблеваешися.

Темже благо вам буди, любезнии рачители, да поможет вам в доброусердии вашем велелепная всемощная Божия десница, да сохранени будете от варварских зверей и варварски наветующих, и аггел Божий буди погоняя их, и да поражени будут злонаветныя языки от Божия молнии. Вас же, любезных братолюбивых рачителей, да сохранит Господь Бог, яко зеницу ока, и будущих нетленных благ наследники да покажет. Аминь.

При сем желаем от вашея любви известны быти о вашем пребывании и о обстоятельных случаех и о плодствовании Колыванских гор. У нас дал Бог по се время смирно, и обретаемся в живых.

Наскоре в суетех писавый многосуетный А<ндрей> Д<ионисиевич> любезно кланяюся.

1729 декабря 18.

Григорию Евфимовичю, Ивану Наумовичю с прочими боголюбивыми ревнители и братству радители, мир и благословение Божие и от нас, непотребных, любезное поклонение.

Молим вашю любовь, возлюбленнии доброрадителнии служители, Господа ради порадейте в зав<о>дском состоянии и Бога ради и господския ради милости и богораднаго ради сиротства поусер<д>ите в радении сем. За вас всебратствено Бога моля.

Превосходительному господину, господину премилостивому государю нашему Вилиму Ивановичю.[841]

Всездравственнаго многолетня, всерадостнаго благополучия, всесчасливаго господствования убозии пустынножители всеусердно желаем.

Понеже, государь, от всерадостнаго благополучнаго пресветлаго царьскаго величества, всемилостивейшаго нашего великаго государя всерадостным мирнаго благополучнаго состояния со шветскою короною благовещением ваше радостотворное превосходительство озарил еси обонежския страны,[842] утешил еси поморская жительства, возвеселил еси и наше убогое пустынное житие милостивейшим объявлением данныя от царьскаго величества твоему благородию всерадостнейшия и благополучноторжественныя о мирном состоянии грамоты,[843] юже услышавше, пустыннии общежители восторжествоваша; уведевше⁹⁷⁸, особноскитяне возликовствоваша; почювше, вертепники⁹⁷⁹ и безмолвники радостно возблагодарствоваша. Молитвенныя пустынныя храмы исполнишася благодарнаго к Богу песноглашения; келии и вертепы умножишася радостнаго к превышнему Владыце молитвоприношения. Вси общежители и скитяне о благополучии государьском веселимся, по реченному: «Что есть благоденствия царска послушным лучше».[844] Вси о благосчасливей царстей радости утешаемся, по писанному: «Людие Сиони возрадуются о цари своем».[845] Вси о всероссийстей радости Господа Бога благодарствуем, кииждо восклицая: «Благословлю Господа на всяко время, выну хвала его во устех моих».[846] Вси попремногу благодарствуем в победах и в миротворении многопотщавшееся и убогия ны соблюдающее премудрое всемилостивое царское величество, по реченному во пророцех: «Благословят тя людие нищии, и градове человек обидимых благословят тя».[847] Был бо еси всякому граду смирену помощник и скорбящим скудости ради покров. Вси всемолитвенно и всекелейно благодарствуем царское величество, усердно к Богу вопием: «Господи, силою твоею возвеселится царь и о спасении твоем возрадуется зело[848] Господи, спаси царя и услыши ны в оньже день, аще призовем тя».[849] Да даст же, даст всемилосердейший Господь Бог всемилостивому, премудрому, всехраброму, добропобедному царскому величеству со всеми его царскими верными градодержатели, военачалники и воины всездравственну, благополучну и всерадостну на премногия лета быти, быти и быти.

Всеусердно же благодарствуем и ваше радостовестителное благородие, вернейшаго царскому величеству радителя, правдолюбителнаго командира, премудростроителнаго коменданта, многохитраго артилерии полковника, многомилостиваго нашего государя за всемилостивейшее возвещение толико благополучныя государьственныя всероссийския радости. Да даст же всемилостивый Господь Бог вашему государю благополучну, всерадостну и всездравственну на многа лета быти и быти.

Вашего превосходителнаго благородия, всемилостиваго нашего государя всепокорнии слуги, выгопустыннии общаго и скитскаго жития жители благодарно, всепокорно и всерадостно низоземно челом бьем.

1721 октября 12.

Великому и великопочтенному господину пречестнейшему архипастырю всеславнейшему архиепископу Феодосию.[850]

Всеутешительнаго мира, всесладчайшаго здравия, всеблагодатнаго спасения всеусердно желаем и Господа Бога молим и до земныя персти всесмиренно и всепокорно челом бием.

Понеже, государь, апостольскими вещании научаеми есмы воздавати всем должная, емуже честь, честь,[851] прочая, ваше же толикое пречестнейшее архипастырьство, толико многославнейшее архиерейство, таковым многомилостивым прибытием, таковым всеизрядныя кротости приездом изволил посетити Обонежскую сию страну, изволил милостивно прибыти к Марциальным водам,[852] чесо ради мы, убожайшии ваши раби, нищайшее пустынножительное сиротство, всепокорно желаем тебе, многомилостиваго нашего государя, почтити, но недоумеем; всесмиренно и всежеланно толико славнейшему архипастырю усердствуем честь отдати, но не вемы, како и с чим. Како бо и можем по должности почтити толико славнейшаго – убозии, толико пречестнейшаго – грубии, толико превосходительнаго – маломощнии! Обаче якоже убогая вдовица она две лепте усмелися принести Небесному Царю,[853] тако мы, убозии пустыннии сироты, в надежде ваших архипастырских щедрот бием челом тебе, государю нашему, малым харчевым приношением.[854] Многомилостивый государь архиерей, покорно просим вашего архипастырьства, прикажи, государь, малое наше сие харчевое приношение милостивно принять на всездравственое вашего архипастырьства кушание. И не гневатися молим и премолим на наше пустынное богорадство, заеже нам служение к Богу имеющим по старопечатным книгам и по староотеческим обычаем. Понеже сие мы, государь, не за гордость, ниже за упрямку, ниже непокорства ради содержим, свидетеля сему самого Бога предлагаем, но самое вечное душ наших спасение святоотеческим готовым преданием последствуем. И о сем не положи на нас архипастырскаго своего гнева, заеже несть от нас, грубых и боязливых сирот, предстати и лицезрительно поклонитися и молити ваше пречестнейшее архипастырьство,[855] понеже, государь, овы за старость и немощ, овы же за грубость и боязнь, аще и не возмогаем приити, обаче вся вкупе ис пещер и вертепов пустынных всепокорно до земли кланяемся, всесмирено и плачевно милости вашея архипастырския просим. Ради всемилостиваго Бога буди, государь, милостив и человеколюбив до нас, убогих и беззаступных сирот пустынных. Да даст же, даст всемилостивый Господь Бог вашему пречестнейшему архипастырьству добромирну, благополучну, всездравствену и многолетну быти и быти.

Вашего пречестнейшаго архипастырьства, многомилостиваго нашего государя всепокорнии слуги, олонецкий выгопустынныи убожайшии жители.

1722 июля 10