Повесть о купце Григории

Повесть о некоем купце Григории, како хоте его жена с жидовином уморити

Бысть во граде Риме человек купеческий²⁶⁹, именем Григорий, имея богатства много. Прилучи же ся²⁷⁰ ему некогда отплыти на куплю²⁷¹ с кораблем и замедлевшу ему тамо два лета²⁷². Бе же у него жена красна, младостию цветуще. По действу диаволю без него впаде в блуд с некоим жидовином. Той же жидовин, исполнен всякого волхвавания, сотвори, еже не любити ей мужа своего, но возлюбити вельми того жидовина, мужа же своего Григория не хотя и имени слышати.

Некогда же глагола ей жидовин «Аще хощеши мне быти женою, то аз мудростию учиню мужа твоего заочно мертва». Она же глаголаше «Твори, господине, еже хощеши. Аз тебе предаю себе и дом весь, токмо врага моего потщися²⁷³ избыти Григория. Аз бо с тобою вечно хощу жити». Той же окаянный жидовин слия в воску²⁷⁴ образ подобия Григориева и чарова над ним много. И повеле ей принести лук и стрелу, хотя стрелити во образ той.

В то же время прилучися Григорию купцу возвратитися с купли в дом свой и приближися к Риму. И некто, человек незнаемый, ста во сретение²⁷⁵ ему «Радуйся, Григорие, яко возвратился еси с прибытком многим! Но скоро в сий час злою смертию живота лишишися от чародея злого. Аще же хощеши такия смерти избыти, послушай совета моего повели вскоре, да привезут зде тчан²⁷⁶ великий с водою, чтоб тебе вместитися в него».

И скоро устроиша тако. Еще ж той мудрец устроил зерцала великое и много над тою водою мудрствовах. И повеле Григорию во тчан внити и вскоре погрузитися единожды. Он же сотвори тако. Повеле же ему посмотрити в зерцала и рече «Что видиши? Понеже²⁷⁷ узриши в сем зерцале себе смерть и живот». Григорий же, егда погрузися в воду и посмотре в зерцало, рече доброму приятелю своему «Вижу, что в дому моем жидовин взя лук, жена же моя подает ему стрелу. Той жидовин хощет стрелити во образ мой, в воску слиян». И рече мудрец «Зло сие знамение, понеже близ есть смерть твоя. Обаче²⁷⁸ не буди печален, блудися, зря²⁷⁹ в зерцало беспрестанно. Егда неприятель той натянет лук той, в той час вскоре погрузися в воде сей». Григорий же сотвори тако. Посем паки²⁸⁰ в зерцало посмотре. Мудрец же паки вопроси его «Что видеши?» Он же рече «Вижу жидовина печальна, что не попаде во образ мой. И, разъярився, приим у жены моей вторую стрелу и хощет стреляти во образ мой». Мудрец же рече «Твори, якоже тебе аз заповедал». Сотвори же Григорий тако и возре в зерцало. И виде жидовина печальна и рыщуща по палате, много волхвуя, зубы скрежетая²⁸¹ и власы терзающа, яко второе не получи²⁸² желания своего. И взя лук, жена же его подаде ему третию стрелу. И прииде жидовин близ образа Григориева, хощет стреляти в него. Григорий же ужасеся и сказа все, яко «прииде близ образа моего жидовин». Мудрец же рече ему «Зело блюдися сей час. Аще не сохранишися в воду вскоре, то зле умреши!» Григорий же, весь трепетен, стоя и в зерцало непрестанно взирая. Егда же жидовин нача лук натягати, а Григорий весь сохранися в воду. И, егда погружися, посмотре в зерцало, нача смеятися. Мудрец же вопроси его «Что тако радуешися?» Он же отвеща «Вижу, господине мой, что стрелил жидовин во образ мой и не попаде в него, но стрела та прииде в стену и, отскочивши, уязви его самого. Он же зле скончася, жена же моя тело его закопа под мост²⁸³ в палате той». Мудрец же рече «Ныне благодари Бога, здравствуй, иди в дом свой». Григорий же поклонися ему до земли и много надарив его.

И прииде здрав в дом свой, жена же его облечеся в драгия одежды, изыде во стретение ему, радуяся и обнимая его, глаголя «Откуду мне солнце возсия и от печальныя зимы обогрело?» И слезивши много, потом нача радоватися о здравии его, что в добром здравии от пути Бог принес.

Григорий же созва всех и отца духовного, нача им на нея жаловатися, како, согласившися с мужем новым, жидовином, хотя его злой смерти предати и како той жидовин слия в воску образ его «злохитрством своим для смерти моей». И показа им образ той на стене. «И ныне аз не хощу с нею жити, но якоже вы хощете, тако с нею творите. А ныне не имать быти²⁸⁴ мне женою». Она же нача плакати и клятися, что «отнюдь сего не знаю и образ твой того ради сотворила, чтобы мне зрети на него и твою б любовь во всяк час поминати. А ты мене ныне поносиши злодейственными словами! Аз ни зла какого повинного, ни жидовина не знаю». И начаша его сродницы ея обличати «Что неправдою на невинность возлагаеши²⁸⁵, понеже не хощеши ея любити!» Он же много о сем глаголя с ними и како его о сем Бог избавил от тоя горькия смерти. «И аще о том веры мне не имете²⁸⁶, то покажу вам на обличение чудное свидетельство». И повеле Григорий подмост²⁸⁷ разломати и выняти того злодейственного жидовина. Видевши же сие, жена его от страха не ведая, что глаголати, сродницы же такожде постыдешася.

И отдаша ея суду градскому, и тако много мучиша ея и предаша горькой

смерти.