Житие Юлиании Лазаревской

Месяца генваря во 2-й день. Успение святыя праведныя Ульянии, муромские чудотворицы

Во дни благоверного царя и великого князя Иоанна Васильевича всея Руси от его царского двора бе муж благоверен и нищелюбив, именем Иустин, пореклом Недюрев, саном ключник, имея жену, такову же боголюбиву и нищелюбиву, именем Стефаниду, Григориеву дщерь Лукина, от града Мурома. И живяста во всяком благоверии и чистоте, и имяста сыны и дщери, и много богатства, и раб множество. От нею же родися сия блаженная Улияния.

Бывши же ей 6 лет, умре мати ея, и поят ю²⁸⁸ в пределы муромские баба ея, матери ея мать, вдова Анастасия, Никифора Дубенского тщи, и воспитающе во всяком благоверии и чистоте 6 же лет. И умре баба ея, и по заповеди ея поят ю к себе тетка ея Наталия, Путилова жена Арапова.

Сия же блаженная Улияния от младых ногтей Бога возлюби и Пречистую его Матерь, помногу чтяше тетку свою и дщери ея, и имея во всем послушание и смирение, и молитве и посту прилежаше. И того ради от тетки много сварима бе²⁸⁹, а от дщерей ея посмехаема. И глаголаху ей «О безумная! Что в толицей младости плоть свою изнуряеши и красоту девственую погубиши?» И нуждаху ю рано ясти и пити. Она же не вдаяшеся воли их, но все со благодарением приимаше и с молчанием отхождаше, послушание имея ко всякому человеку. Бе бо измлада кротка и молчалива, небуява²⁹⁰, невеличава и от смеха и всякия игры отгребашеся, аще и многажды на игры и на песни пустошные от сверстниц нудима бе²⁹¹. Она же не приставаше к совету их, недоумение на ся возлагаше²⁹², и тем потаити хотя своя добродетели. Точию в прядивном и в пяличном деле²⁹³ прилежание велие имяше, «и не угасаше свеща ея вся нощи». А иже сироты и вдовы немощныя в веси²⁹⁴ той бяху, и всех обшиваше, и всех нужных²⁹⁵ и больных всяцем добром назираше²⁹⁶, яко всем дивитися разуму ея и благоверию. И вселися в ню страх Божий, не бе бо в веси той церкви близ, но яко два поприща. И не лучися ей в девичестем возрасте в церковь приходити, ни слышати словес Божиих почитаемых, ни учителя учаща на спасение николиже, но смыслом бо Господним наставляема нраву добродетельному.

Егда же достиже 6-го на 10 лета²⁹⁷, выдана бысть мужу добродетельну и богату, именем Георгию, прореклом Осорьину, и веньчани Быша от сущего ту попа, именем Потапия, в церкви праведного Лазаря в селе мужа ея. Сей поучив их по правилом святым закону Божию, она же послуша учения и наказания²⁹⁸ внятно и делом исполняше. Еще бо свекру и свекрови ея в животе сущим, иже видевше ю возрастом и всею добротою исполнену и разумну, и повелеста ей все домовное строение правити²⁹⁹. Она же со смирением послушание имяше к ним, ни в чем не ослушася, ни вопреки глагола, но почиташе я³⁰⁰ и вся повеленная ими непреткновенно³⁰¹ совершаше, яко всем дивитися о ней и многим искушающим ю в речах и во ответех. Она же ко всякому вопросу благочинен и смыслен ответ даяше, и вси дивляхуся разуму ея и славяху Бога. По вся же вечеры довольно Богу моляшеся и коленопреклонения по 100 и множае, и, вставая рано, по вся утра такоже творяше и с мужем своим.

Егда же мужу ея на царских службах бывающу лето или два, иногда же по три лета во Астрахани, она же в та времена по вся нощи без сна пребывающи, в мольбах и в рукоделии, в прядиве и в пяличном деле. И то продав, нищим цену³⁰² даяше и на церковное строение; многу же милостыню отай³⁰³ творяше в нощи, в день же домовное строение правяше. Вдовами и сироты, аки истовая мать, печашеся, своими руками омывая, и кормя, и напаяя. Рабы же и рабыни удовляше³⁰⁴ пищею и одеждою, и дело по силе полагаше, и никого простым именем назваше, и не требоваше воды ей на омовение рук подающаго, ни сапог разрешающа³⁰⁵, но все сама собою творяше. А неразумныя рабы и рабыни смирением и кротостию наказуя и исправляше, и на ся вину отлагаше, и никого не оклеветаше, но всю надежду на Бога и на Пречистую Богородицу возлагаше и великого чудотворца Николу на помощь призываше, от негоже помощь приимаше.

Во едину же нощь, востав по обычаю на молитву без мужа, беси же страх и ужас велик напущаху ей. Она же, млада еще и неискусна тому, убояся и ляже на постели, усну крепко. Увиде много бесы, пришедша на ню со оружием, хотяще ю убити, рекуще «Аще не престанешь таковаго начинания, абие³⁰⁶ погубим тя!» Она же помолися Богу и Пречистой Богородице и святому Николе. И явися ей святый Никола, держа книгу велику, и разгна бесы, яко дым бо изчезоша. И воздвиг десницу³⁰⁷ свою, благослови ю, глаголя «Дщи моя, мужайся и крепися и не бойся бесовского прещения³⁰⁸ Христос бо мне повеле тебе соблюдати от бесов и злых человек!» Она же, абие от сна возбнув³⁰⁹, увиде яве мужа, из храмины дверьми изшедша скоро, аки молнию. И востав, скоро иде вослед его, и абие невидим бысть, но и притвор³¹⁰ храмины тоя крепко заперт бяше. Она же оттоле, извещение приемши, возрадовася, славя Бога, и паче первого добрых дел прилежаше.

Помале же Божию гневу Русскую землю постигшу за грехи наши гладу велику зело бывшу, и мнози от глада того помираху. Она же многу милостыню отай творяше, взимаше пищу у свекрови на утренее и на полденное ядение и все нищим гладным даяше. Свекры же глагола ей «Как ты свой нрав премени! Егда бе хлебу изобилие, тогда не могох тя к раннему и полуденному ядению принудити. А ныне, егда оскудение пищи, и ты раннее и полдневное ядение взимаешь». Она же, хотя утаитися, отвеща ей «Егда не родих детей, не хотяше ми ся ясти. И егда начах дети родити, обессилех и не могу не ясти. Не точию³¹¹ в день, но и нощию множицею хощет ми ся ясти, но срамляюся у тебе просити». Свекры же, се слышав, рада бысть и посылаше ей пищу довольну не точию в день, но и в нощь, бе бо у них в дому всего обильно, хлеба и всех потреб. Она же, от свекрови пищу приимая сама, а не ядяше, гладным все раздаяше. И егда кто умираше, она же наймаше омывати, и погребальное даяше, и на погребение сребреники даяше. А егда в селе их погребахут мертвых кого ни буди, о всяком моляся о отпущении грех.

Помале же мор бысть на люди силен, и мнози умираху пострелом³¹², и оттого мнози в домех запирахуся, и уязвенных пострелом в дом не пущаху, и ризам не прикасахуся. Она же, отай свекра и свекрови язвенных многих своима рукама в бани омывая, целяше и о исцелении Бога моляше. И аще кто умираше, она же, многи сироты своими руками омыв и погребальная возлож, погребати наймая и сорокоуст даяше.

Свекру же и свекрови ея в глубоцей старости во иноцех умершим, она же погребе их честно. Многу милостыню и сорокоусты по них разда, и повеле служити по них Литургию, и в дому своем покой мнихом и нищим поставляше во всю 40-цу по вся дни, и в темницы³¹³ милостыни посылаше. Мужу бо ея в то время на службе во Астрахани три лета и боле бывшу, она же по них много имения в милостыню истроши, не точию в те дни, но и по вся лета творя память умершим.

И тако пожив с мужем лета довольна во мнозе добродетели и чистоте по закону Божию, и роди сыны и дщери. Ненавидяй же добра враг тщашеся спону³¹⁴ ей сотворити, часты брани воздвизашася в детех и рабех. Она же, вся смыслено и разумно рассуждая, смиряше. Враг же наусти³¹⁵ раба их – и уби сына их старейшего. Потом и другого на службе убиша. Она же вмале аще и оскорбися³¹⁶, но о душах их, а не о смерти, но почти их пением, и молитвою, и милостынею.

Потом моли мужа отпустити ю в монастырь, и не отпусти. Но совещавшеся вкупе жити, а плотного совокупления не имети. И устрои ему обычную постелю, сама же с вечера по мнозе молитве возлегаше на пещи без постели, точию дрова острыми странами к телу подстилаше, и ключи железны под ребра своя подлагаше, и на тех мало сна приимаше, дóндеже³¹⁷ рабы ея усыпаху. И по том вставаше на молитву во всю нощь и до света. И потом в церковь вхожаше к заутрени и к Литургии, и потом ручному делу прилежаше и дом свой богоугодно строяше. Рабы своя довольно пищею и одеянием удовляше и дело комуждо по силе задаваше, вдовами и сироты печашеся и бедным во всем помагаше.

И пожив с мужем 10 лет по разлучении плотне, и мужу ея преставльшуся, она же погребе и³¹⁸ честно и почти пением и молитвами, и сорокоусты, и милостынею. И паче мирская отверже, и печашеся о душе, как угодити Богу, ревнуя прежним святым женам, моляся Богу, и постяся, и милостыню безмерну творя, яко многажды не остати у нея ни единой сребреницы, и займая даяше нищим милостыню, и в церковь по вся дни хождаше к пению. Егда же прихождаше зима, взимаше у детей своих сребреники, чим устроити одежду, и то раздая нищим. Сама же без теплыя одежды в зиму хождаше, в сапоги же босыма ногама обувашеся, точию под нозе свое ореховы скорлупы и чрепие³¹⁹ острые вместо стелек подкладаше и тело томяше.

Во едино же время зима бе студена зело, яко земли расседатися от мраза. Она же неколико время к церкви не хождаше, но в дому моляся Богу. Во едино же время зело рано попу церкви тоя пришедшу единому в церковь, и бысть ему глас от иконы Богородичны «Шед, рцы милостивой Ульянеи, что в церковь не ходит на молитву? И домовная ея молитва богоприятна, но не яко церковная. Вы же почитайте ю, уже бо она не меньши 60 лет, и Дух Святый на ней почиет». Поп же, в велицем ужасе быв, абие прииде к ней, пад при ногу ея, прося прощения, и сказа ей видение. Она же тяжко внят³²⁰, еже он поведа пред многими, и рече: «Соблазнился еси³²¹, егда о себе глаголеши. Кто есмь аз, грешница, да буду достойна сего нарицания». И закля его³²² не поведати никому. Сама же иде в церковь и, с теплыми слезами молебная совершив, целова икону Богородицыну. И оттоле боле подвизася к Богу, ходя к церкви.

По вся вечеры моляшеся Богу во отходной храмине³²³. Бе же ту икона Богородицына и святого Николы. Во един же вечер вниде в ню по обычаю на молитву, и абие бысть храмина полна бесов со всяким оружием, хотяху убити ю. Она же помолися Богу со слезами, и явися ей святый Никола, имея палицу, и прогна их от нея, яко дым исчезоша. Единого же беса поймав, мучаше. Святую же благослови крестом и абие невидим бысть. Бес же плачя вопияше «Аз ти многу спону творях по вся дни воздвизах брань в детех и в рабех. К самой же не смеях приближитися ради милостыни, и смирения, и молитвы». Она бо, беспрестани в руках имея четки, глаголя Иисусову молитву. Аще ядяше и пияше или что делая, непрестанно молитву глаголаше. Егда бо и почиваше, уста ея движастася и утроба подвизастася³²⁴ на славословие Божие. Многажды видехом ю спящу, а рука ея четки отдвигаше. Бес же бежа от нея, вопияше «Многу беду ныне приях тебе ради, но сотворю ти спону на старость начнеши гладом измирати, не чужих кормити». Она же знаменася крестом – и исчезе бес от нея. Она же к нам прииде ужасна вельми³²⁵ и лицем пременися. Мы же, видехом ю смущену, вопрашахом, – и не поведа ничтоже. Непомнозе³²⁶ же сказа нам тайно и заповеда не рещи никому.

И пожив во вдовстве 9 лет, многу добродетель показа ко всем, и много имения в милостыню расточи, точию нужные потребы домовные оставляше, и пищу точию год до года расчиташе, а избыток вся требующим растакаше³²⁷. И продолжися живот ея до царя Бориса. В то же время бысть глад крепок во всей Русстей земли, яко многим от нужды скверных мяс и человеческих плотей вкушати, и множество человек неисчетно гладом изомроша. В дому же ея велика скудость пищи бысть и всех потребных, яко отнюдъ не прорасте из земли всееное жита ея. Кони же и скоты изомроша. Она же моляше дети и рабы своя, еже отнюдь ничему чужу и татьбе³²⁸ не коснутися, но елико оставшия – скоты, и ризы, и сосуды – вся распрода на жито, и от того челядь кормяше, и милостыню довольну даяше, и в нищете обычныя милостыни не расстася, и ни единого от просящих не отпусти тща³²⁹. Дойде же в последнюю нищету, яко ни единому зерну остатися в дому ея. И о том не смятеся, но все упование на Бога возложи.

В то бо лето преселися во ино село в пределы нижеградския, и не бе ту церкви, но яко два поприща. Она же, старостию и нищетою одержима, не хождаше к церкви, но в дому молящися. И о том немалу печаль имяше, но поминая святого Корнилия, яко не вреди его и домовная молитва, и иных святых. Велице же скудости умножшися в дому ея. Она же распусти рабы на волю, да не изнурятся гладом. От них же доброрассуднии обещахуся с нею терпети, а инии отидоша. Она же со благословением и молитвою отпусти я, не держа гнева нимало. И повеле оставшим рабом собирати лебеду и кору древяную, и в том хлеб сотворити. И от того сама с детьми и рабы питашеся, и молитвою ея бысть хлеб сладок. От того же нищим даяше и никого тща не отпусти, в то бо время без числа нищих бе. Соседи же ея глаголаху нищим «Что ради в Ульянин дом ходите? Она бо и сама гладом измирает». Они же поведаша им «Многи села обходим и чист хлеб вземлем, а тако в сладость не ядохом, яко сладок хлеб вдовы сея». Мнози бо имени ея не ведаху. Соседи же, изобильни хлебом, посылаху в дом ея просити хлеба, искушающе ю. И такоже свидетельствующа, яко вельми хлеб ея сладок. И дивися человеку к себе «Горазди рабы ея печь хлебов!» И не разумеюще, яко молитвою ея хлеб сладок. Потерпе же в той нищете два лета, не опечалися, ни смутися, ни поропта, и «не согреши ни во устах своих, и не даст безумия Богу»³³⁰. И не изнеможе нищетою, но паче первых лет весела бе.

Егда же приближися честное ея преставление, и разболеся декабря в 26-й день, и лежа 6 дней. В день лежа моляшеся, а в нощи, воставая, моляшеся Богу, особь³³¹ стояше, никем поддержима, глаголаша бо «И у больного Бог истязует³³² молитвы духовныя».

Генваря в 2-й день, светающу дню³³³, призва отца духовного и причастися Святых ТаИн.И седь, призва дети и рабы своя и поучая о любви, и о молитве, и о милостыни, и о прочих добродетелях. Прирече же и се «Желанием возжелах ангельского образа иноческого, не сподобихся грех моих, нищеты ради, понеже³³⁴ недостойна бых, грешница сый убогая. Богу так извольшу, слава праведному суду его». И тут повеле уготовити кадило и фимиам положити, и целова вся сущая ту³³⁵, и всем мир и прощение даст, возлеже и прекрестися 3-жды, обвив четки около руки своея, последнее слово рече «Слава Богу всех ради. «В руце твои, Господи, предаю дух мой». Аминь». И предаст душу свою в руце Божии, егоже возлюби. И вси видевше около главы ея круг злат, якоже на иконах около глав святых пишется. И омывше, положше ю в клете, и в ту нощь видеша свет, и свеща горяща, и благоухание велие повеваше из клети тоя. И вложше ю во гроб дубовый, везоша в пределы муромския, и погребше у церкви праведного Лазаря подле мужа ея, в селе Лазареве за четыре версты от града, в лета 7112-го (1604) генваря в 10 день.

Потом над нею поставиша церковь теплую³³⁶ во имя архистратига Михаила. Над гробом ея лучися пещи быти³³⁷. Земля же возрасташе над нею по вся лета. И бысть в лето 7122-го (1614) августа в 8 день преставися сын ея Георгий. И начаша в церкви копати ему могилу в притворе между церковию и пещию, бе бо притвор той без моста³³⁸, и обретше гроб ея на верху земли цел, не врежден ничем. И недоумеваху, чей есть, яко от многих лет не бе ту погребаемого. Того же месяца в 10 день погребше сына ея Георгия подле гроба ея и поидоша в дом его учредити погребателей. Жены же, бывшыя на погребении, открыша гроб и видеша полн мира благовонна, и в той час от ужасти не поведаша ничтоже, по отшествии же гостей сказаша бывшая. Мы же, слышав, удивихомся и, открывше гроб, видехом так, яко и жены реша³³⁹ от ужасти, начерпахом мал сосудец мира того и отвезохом во град Муром в соборную церковь. И бе видети в день, аки квас свекольный, в нощи же сгустевашеся, аки масло богряновидно. Телеси же ея до конца от ужасти не смеяхом досматрети, точию видехом нозе ея и бедры целы суща, главы же ея не видехом того деля, понеже на конце гроба бревно пещное налегаше. От гроба же под пещь бяше скважня³⁴⁰, еюже гроб той из подпещья идяше на восток с сажень, дóндеже, пришед, ста у стены церковныя. В ту же нощь мнози слышаху у церкви тоя звон и мнеша пожар и, прибегше, не видеша ничтоже, точию благоухание исхождаше. И мнози слышавше, и прихождаху, и мазахуся миром тем, и облегчение от различных недуг приимаху. Егда же миро то раздано бысть, нача подле гроба исходити персть³⁴¹, аки песок. И приходят болящии различными недуги, и обтираются песком тем, и облегчение приемлют и до сего дня. Мы же сего не смеяхом писати, яко не бе свидетельство³⁴².

И прииде от града Мурома человек именем Иеремий Червев с женою. И приведе с собою двое детей – сына именем Андрея и дщерь девицу. Оба больна из рук и из ног кровь течаше, и из голень и из ручных локтей. И пев молебен и панихиду, и от гроба святыя песком отре. И абие в той час облегчися болезнь их. Егда же принесе их в дом свой, нападе на ня сон, и спаху день да нощъ. И воставше от сна, начаша рукама своима креститися, а преже того не можаху и ко устом донести боле двою лет. Язвы же их исцелеша единою неделею. А инии мнози исцелевшеи тоят чудеса, боящеса осуждения. Всего же боле от тресавиц³⁴³ исцеление приемлют.

И оградихом гроб той досками окол его меньши пяди на все страны. Иногда видехом к правой стране приклонився верх гроба того, а иногда – к левой. И о сем дивихомся, последи же разумехом, яко возрасташе земля под гробом тем и тако помалу кверху подвизашеся. И бяше вода приходя около гроба ея, и о сем ужасохомся, яко место бе высоко. И явися блаженная во граде Муроме в девичье монастыре дщери своей иноке Феодосие, повеле выняти ся из земли. Она же пришед, подня гроб ея мало и подложи под него доску дубову. Оттоле же и доныне вода не приходит. Человек именем Иосиф деревни Макаровы, боляше зубы, яко многи дни ему не ясти, ни спати. И хотя от велия болезни удавитися. И глагола ему жена ити к раце блаженныя Ульянеи. Он же послуша ю, прииде един в полдня и помолився, отре песком болящыя зубы. И абие ощути облегчение, и пришед в дом свой, усну. И убудився ничем не врежден, и пойде на дело сено сещи.

Во едину же нощь загореся село то. И обьят огнь 4 двора средния, беша бо соломою крыты. И воста буря велия, и уже огню к церкви приближающуся. Аз же едва возмог от зноя вскочити в церковь и похватив перьсти от гроба ея обема рукама. И явися в руках моих аки вода, и ввергох во огнь против ветра, такоже и с другия страны пожара. И абие ветр возвратися вспять и нача свиватися кругом, и две храмины, сущыя от края, угасихом. А по обе стране по 4 двора, такоже вкупе соломою покрыты, соблюде Бог от огня невреждены молитвою святыя.

Соборныя церкви попа Михаила поподия лежа в болезни 5 месяц. И отпев молебен и панихиду, и воду святив, и пив, и отреся песком от гроба святыя. И абие бысть здрава, аки не болев николиже.

Деревни Пансыревы человек именем Иосиф разболеся, и боляше горло, и не можаше глаголати, но едва перстом указываше. И даша ему воды с мощей святыя Ульянии, и абие в той час здрав бысть и нача глаголати ясно, яко николиже болев.

Села Лазарева христианка Фекла бесом одержима много время. И приведоша ю к раце святыя, и молебен певше. И бысть здрава и смыслена.

Деревни Гороховы некая жена слепа бе много время, не видя отнюдъ нимало. И приведена бысть к раце святыя, и пев молебен – в той час прозре, аки николиже болев, отиде в дом свой, славя Бога.

Деревни Коледина человек именем Климент боляше ногою:бысть язва, зовомая пострел, еюже мнози умираху, бе бо в то время на скоты поветрие велико. И бысть недуг той к смерти. Он же, слышав чудеса преподобныя Ульянии, отчаявся живота и повеле вести ко гробу ея. И молебная совершив, отре песком и вскоре получи здравие, очистися от язвы.

Села Корочарова человек именем Селивестр бысть расслаблен³⁴⁴ три лета. И привезен бысть в село Лазарево, и, совершив молебная, отреся песком, и вскоре исцеление получи, и отиде радуяся.

Деревни Подболотья человек именем Андрей бе расслаблен и горбат, не мог всклонитися два лета. И прииде к праведной Ульянии и, совершив молебное, отреся песком и святою водою окропися, – вскоре исцеление получив, прослави Бога.

Града Мурома с посаду Матфея Черкасова раба именем Мария бе слепа, не видя нимало. И приведьше ю к раце святыя Ульянии, и совершив молебная и панихиду, и абие вскоре исцеление получи, отиде в дом свой, радуяся о себе, и на пути нача ягоды и грибы брати, аки николи болев.

Некий отрок млад, яко 10 лет, слеп и расслаблен, немощно и на другую страну обратитися ему; принесен бысть к церкви Архангела Михаила, и, совершив молебная, абие прозре и узре свеща горяща. И болезнь его облегчися, и по мале дний воста здрав, прослави Бога и святую.

Села Лазарева церкви Архангела Михаила клирик именем Феодор, и лучися болезнь жене его Агафии десная рука отъяся, и не може ею двигнути нимало. И явися ей во сне блаженная Ульяния, глагола «Иди в церковь Архангела Михаила и приложися ко иконе праведныя Ульянии. И есть у тебе во оном месте две сребреници». И показа ей место, где лежат, и повеле ей дати попу, да приложит ко образу ея. Она же сотвори тако, и слушав молебна и панихиды, пив святую воду и отреся песком, и абие в той час исцеле, и прослави Бога и святую Ульянию, отиде радуяся.

Села Лазарева некая жена именем Фекла, Артемьева жена Мартьянова, боляше очима зело. И приведьше ю в церковь, и совершив молебная, и омыся святою водою и вскоре, исцеление получив, прослави Бога и святую Ульянию.

Сын боярский именем Феодор, прореклом Пансырев, лежя в болезни боле года водным трудом³⁴⁵ и чревом, понос беспрестани афендроном³⁴⁶ идяше. И привезоша к нему песку от гроба святыя Улиянии и святыя воды. И егда испи святыя воды и треся песком, абие в той час оток отпаде и понос закрепися.

Сын его именем Симеон ума исступи много время и, пришед, сверши молебная, абие в свой ум возвратися и бысть здрав до сего дня.

Муромец дворянин Стефан Скрыпин, обе руце его больны беста, не владе ими много время. И приехав к мощам святыя Улиянии, и молебная совершив. И егда священник прочте Евангелие, он же приложився, получи исцеление, нача креститися и отиде здрав, радуяся и славя Бога.

Московский дворянин Иосиф Ковков разболеся великою болезнию, яко живота отчаятися. И присла слугу своего Аникия, и совершив молебная, и взем святые воды и песку, и пив ю, и омывся, и песком отреся – абие здрав бысть. И получив исцеление, прииде пеш своима ногама, и приложи ризы поповския к церкви той, славя Бога.

154-го (1645), сентября в 1-й день. Исцели Бог Михаила Яковлева сына Мельникова, одержим бяше бесным недугом³⁴⁷.

155-го (1646), октября в 19 день. Прикладныя копейки позлащеные тати покрали от образа и на улице изронили. Все целы, только не объяви Бог, кто крал.

157-го (1649), маия во 8-й день. Везниковския области жена некая именем Елена, прозвищем Васильева, во младых летех была слепа год и ко многим прощам и святым местам приходила молитися. И впади ей во уме о праведной Ульянии итти в село Лазарево приложитися ко гробу ея и молебная совершити. И в том часе начат видети. И прииде к преподобней здрава, яко николиже болев. И пребысть в Муроме два лета, приходя на память ея и погребение, молебная исправляя.