Повесть о Марфе и Марии

Сказание о явлении чудотворного Креста Господня, иже есть в Муромском уезде. Списано по благословению Моисея, архиепископа Рязанского и Муромского

Благослови, отче!

Понеже убо³⁴⁸ мнози слышавше, нецыи же ведуще и зряще³⁴⁹ о чудотворном Кресте Господне, иже из древних лет и до днесь пребывает во области града Мурома, многа содевая³⁵⁰ преславная чудеса и исцеления, сего ради мнози от них, воспалившеся желанием и верою влекоми, ищут уведети³⁵¹, откуду и како обретеся³⁵² той бесценный бисер³⁵³, и вопрошаху самих служителей того чудотворного креста. Они же о сем ничтоже известно рекоша³⁵⁴, зане убо многим летом претекшим, еще же и многа ради иноплеменных нашествия на страну ону, паки же и частого ради татарского распленения древняя изгибоша писания, в кия лета и при коих содержателех³⁵⁵ Быша сия, но токмо на малей хартице³⁵⁶ просторечием, якоже поселяне³⁵⁷ написано, держаху памяти ради.

Сице убо от многих лиц о том бываху иереем тем истязания³⁵⁸ на многа времена. И тако тии служителие стуживше зазреша себе о сем, абие припадают³⁵⁹ ко архиерею града своего, просяще молитвы от него и благословения изыскати на дело сие, еже и бысть да негли како обрящут мужа, могуща повесть сию о чудотворнем Кресте Господне благохитростне преписати³⁶⁰, аки некую златотканную пленицу³⁶¹ словесне украсити, елико возможно, Богу ему поспешествующу.

И тако убо не вем, что ради сим изволися оставити мнозех премудрейших на дело сие и достойнейших³⁶², якоже негде речеся, «оставльше источников, к суху потоку приидоша, и, оставльше главу, к ногам беседовати изволиша». Сице убо понуждают мое недостоинство, не ведуща ни десна, ниже шуя³⁶³, но токмо греху присно³⁶⁴ прилежаща, еще же и мирскими всячески суетами оплетшася, груба³⁶⁵ суща и витийския беседы ничтоже сведуща. Мне убо, грешному, исперва много отрицающуся толикия дерзости делу сему прикоснутися, понеже убо выше силы и сана моего, еще же и за немощь и недостаточества ума моего. Сии же многорачительне не преслушати ми ся прилежаху³⁶⁶ и Честного Креста оного самого силу в помощь на се быти ми предглаголаху. Аз же, окаянный, от обою содержим бех, страхом и радостию, понеже бо страх за недостоинство претит ми глаголати, радость же и любы влечет мя вещати. Но обаче³⁶⁷ возложих надежду на Бога, рекшего «Просите и приимите, толцыте и отверзется³⁶⁸ вам», всяк бо, рече, – «просяй – приимет и ищай – обретает»³⁶⁹, и паки рек, яко «Не можете без мене творити ничесоже». И тако убо к сему со воздыханием припадая, рекох сице «Милосерд буди ми, Владыко, и прости мою дерзость о нихже хощу глаголати, недостойны устне имый и мысль непотребну». Рекох от сердца «Ты убо, наставниче премудрости и смыслу давче, немудрым наказателю и нищим защитителю, утверди и вразуми сердце мое, Владыко! Ты даждь ми слово во отверзение уст моих, иже Отчее единородное Слово, и содействуй ми силою Креста Твоего, якоже некогда немому повеле глаголати и глухому слышати». И тако прострох греходельную мою руку и яхся³⁷⁰ по дело сие, о немже нам слово. Но убо небщую, аще и слово небытию покрывшу того славу, иже от лет прием помощь, якоже преже рех, к неведению препущаше недобре и многие пользы отщетеваше ны³⁷¹. Аще убо маргаритом от своих скал не производимом, кому тех добра познавается?³⁷² И злату во своих флевах³⁷³ лежащу, киим очесем того блистание будет? Тако и мы, изряднее ныне от глубины забвения и молчания восторгшеся, мало нечто о явлении чудотворивого того Креста хощем побеседовати, елико возможно есть, а о летех и о временех, якоже преди рекох, да не зазрит ваша святыни, не обретшу ми, но едино се, иже суть ни от человек, ни человеки, но самем Тем, изволившем распятися спасения ради человеческого, послася сице.

Беша убо в прежняя времена две девы, сестре сущи, дщеря некоего мужа благочестива от дворянска рода; имя единой Марфа и имя вторей Мария. По времени же возраста ею даны беша на брак благоверным мужем от пресловущих³⁷⁴ градов, еже есть Рязани и Мурома:Марфа убо мужу некоему от честна³⁷⁵ рода рязанские земли, именем Иван, но зело небогату; Мария же мужу от племяни нарочита³⁷⁶ земли муромския, именем Логвин, богатством же преизобилующу, аще и не зело велика суща рода. О отечествии же имен ею и прослытия роду³⁷⁷ не поведано ми бысть.

Та же по некоем времени Ивану и Логвину случися има снитися³⁷⁸ к сродникам жену своею. Егда же приспе время вечери быти, бысть между има пря³⁷⁹ о седении места:Иван убо хотящу первосидения честного ради отечествия своего, такожде и Логвин желающу богатства ради своего. И такового ради начинания и гордости своея – вина³⁸⁰ бысть разлучитися има от себе, не помянуша бо реченного Господем «Егда зван будеши ким на брак и на вечерю, шед не сяди на преднем месте» и прочая, и паки «Иже хотяй в вас болий быти, да будет последний» и прочая. И апостолу глаголющу «Иже высоко в человецех, мерзость есть пред Богом». И за сию убо вину не токмо сии едини разлучастася друг от друга, но и женама своима между себе до смерти своея изволиша ни писании³⁸¹ ссылатися.

По неколицех же летех, якоже последи рекоша, случися Божиим судом преставитися Ивану и Логвину во един день и во един час. Женама убо ею³⁸², Марфе не сведомо бысть про Логвинову смерть, Марии же про Иванову смерть. Тогда же убо по лишании мужу своею встужившемася има сестра по сестре. И рече большая сестра Марфа к себе сице: «Шед, посещу аз зятя своего Логвина и поклонюся ему и сестру свою да вижду. И, аще будет зять мой призрит³⁸³ на мое смирение, аз же потщуся в дому его и пребывати. Аще ли презрит³⁸⁴, аз же, токмо с сестрою си созревся³⁸⁵ и прощения получивши, восвоя возвращуся». Такожде и меньшая сестра Мария рече в себе «Иду к зятю Ивану. Поклонившася ему, с сестрою ся узрю. И аще зять мой приятельствен ми явится, и аз от имения своего удоволю его, и он такоже, яко и муж мой, богат и славен будет по своему достоинству». И тако поидоста сестра к сестре.

И по Божию изволению снидостася на пути близ града Мурома и сташа каяждо к себе³⁸⁶. Тогда послав меньшая сестра слугу своего известно испытати, кто есть ста ту «Егда ли будет кая, рече, жена, и мы вкупе снидемся. Аще ли будет мужеск пол, и мы вдале отидем». И шед слуга ея и вопроси тех «Кто сим путем грядет?» И отвещаша ему «Идет вдова к сестре своей». И, пришед, слуга возвести сия госпоже своей. И госпожа его рече «Добре убо нама снитися вкупе!» И тако сошедшеся и поклоншемася друга друзе, в лицех же своих не познастася, яко беша сестре. И восхотевшима вопроситися има между себе о отечествии и сродстве своем. И рече большая сестра к Марии «Госпоже моя! Кто ты и откуду еси?» И отвещавше Мария к сестре своей Марфе «Аз многогрешная, имя ми есть Мария. Еду к сестре своей Марфе». Сице же вопроси и Мария Марфы «А ты, госпоже моя, кто и откуду еси и что ти есть имя?» И отвеща Марфа к Марии: «Аз же многогрешная Марфа. Еду к сестре своей Марии». И тако познастася во отечествии, яко сестре беша, такоже и о смерти мужу своею известистася. Тогда начаша сии между себе лобзанием любезным целоватися, якоже обычай им бе, и плакатися о мужу своею, зане же жиста не в совете между себе, по смерть свою ни съезжахуся, еще же ни писанием изволиша ссылатися. И елико бо по мужу своею плачущеся, сугубейши сего³⁸⁷ ради себе за многовременное между себе незрение и бессоветие. И едва мало от плача преставше, порадовашася о Бозе и благодариста того, яко не лиши ею спребывания³⁸⁸ на кончине века ею. И ту представити повелеста себе трапезу и ядше пиша³⁸⁹ в славу Божию и веселистася. И по вечери сей успоша на месте том.

И в тонце сне явися има ангел Господень, глаголя Марфе и Марии коейждо особь на имя «Господь посла к тебе злато по вере твоей к нему», тако же и другой «сребро». Злато же убо даде Марфе, сребро же Марии. И повеле в злате Крест Господень устроити, в сребре же ковчег³⁹⁰ Кресту сковати. Вдати же оно повеле има, иже заутра преже идущим человеком путем сим³⁹¹. Слышаста же сия, аки наяве мнящемася, вземше и ввивше³⁹² каяждо злато и сребро в зарукавие си. И егда же има возбнувшима³⁹³ от сна, исповеда Марфа сестре си Марии виденное, такожде и Мария Марфе возвести от ангела явльшееся има вкупе единако. Тогда восхотеста си уверити видение, аще истинна суть, и абие обретосте в зарукавие си Марфа убо злато, Мария же сребро. И возрадовастася о предивном том видении, паче же Божии даровании, и слезы от радости испустивше, Богу благодать воздаяху, и печастеся³⁹⁴ о сем, како бы има повеленное от Бога сотворити.

Во утрии же день узревше грядущих мимо путем тем триех мужей во образе инок и возвасте к себе сих и возвестисте им вся о себе бывшая, еже от ангела има во сне видение и како приясте от него во сне злато, соделати Крест Господень, сребро же сотворити кресту ковчег, отдати же сия во устроение человеком, заутра первошествующим путем сим. Слышавше же чаемии³⁹⁵ иноцы от нею глаголы сия и рекоша к нима «Не скорбите о сем, мы сего ради дела к ваю приидохом!» Тогда Марфа и Мария отдасте старцем тем в злате слити Крест Господень, в сребре же Кресту ковчег устроити. И тако мнимии иноцы, вземше от рук сестру злато и сребро, отидоша от очию их. Сестрома же Марфе и Марии дошедшема града Мурома и ту обитаста в дому си.

Слышавше же ближницы³⁹⁶ и сродственницы пришествие ею, сошедшеся к нима, начаша о преже бывших има и мужию их и скорбети и сетовати. Еще же и самема плачущемася за бессоветное и несогласное между себе житие, паче же вдовства и сиротства. Та же возвестиста о себе сродником своим, како подвигшимася коейждо от себе в путь к сестре си, не согласившимася, ниже сославшимася³⁹⁷, и како сретостася на пути, идеже и преславное оно видение ото ангела видеша во сне, дающа има злато – сотворити Крест Господень, сребро же – устроити ковчег Кресту, и заутра прежешествующим человеком, еже и отдаша има на пути, и все по ряду, еже преже написася. Слышавше же сия, ужики³⁹⁸ ею вознегодоваша и реша к нима «То како сицево сокровище, паче же Божие дарование, с небрежением отдаста, а не весте³⁹⁹ кому! Или не чаясте зде обрести златаря⁴⁰⁰, в сем велицем и многонароднем граде, на устроение Божия делеси!⁴⁰¹». Сице истязующе ею⁴⁰². Онема же отвещавшема к ним «Иже явився и давый нама злато и сребро, имже повеле отдати сотворити дело Божие, отдахом».

Бе же тогда собравшеся к нима не едины сродницы ею, но и от нарочитых града, бояр же и дворян, вопросиша о месте том, идеже явися чудное видение то, и злато и сребро обретеся има, да идут тамо. Та же собравшеся множество людей и совещавшеся убо тамо итти.

Поемше же с собою Марфу и Марию и приидоша на место оно. И совет сотвориша твердо со тщанием и всякою быстротою послати на все страны по путем и малым стезям коегождо господина с чужим рабом и раба с чужим господином на взыскание старцев онех да аще кии от них тех старцев со златом и сребром обрящут, и ничтоже скрыто или утаено от сих сотворят. Сице убо им урядившем и уже хотяху вскоре тещи⁴⁰³ на взыскание инок тех.

И абие⁴⁰⁴ узревше нецыи юноши трех инок, несуще Крест Господень, в злате устроен, и ковчег, в сребре сотворен, и вложи юношам тем в сердце искони ненавистный Сатана восхитити от рук старчих богодарованное сокровище сие, и уже окаяннии коснутися хотящу, старцы же рекоша им «Человецы, отидите, отнюду⁴⁰⁵ же приидосте». Тогда же в той час узревше со онема сестрама Марфою и Мариею муромстии градожителие триех старцев, грядущих и несущих Крест Господень, и возбраниша неистовству отрок онех, сами же устремишася на стретение Честного Креста, несомого от старцев, да с честию великою приимут его.

Мнимии же старцы дошедше к сестрам и рекоша «Марфо и Мария! Иже убо в видении от ангела данное вама злато и сребро, еже вдасте нам во устроение Креста Господня и ковчега ему, се по вере ваю⁴⁰⁶, паче же повелением Божиим в том злате сей животворящий Крест Господень сотворен, в сребре же ковчег кресту соделан. Прииместа си на спасение и на благоденствие, миру же всему на исцеление недугом и разрешение страстем и бесом на прогнание». Та же сродницы тою и вси пришедшии с нима на взыскание тех инок вопросиша их «Где убо, отцы святии, бысте и откуду приидосте семо?» Мнимии же иноцы рекоша «Во Цареграде быхом». И паки вопросиша их «Господие, колико время идосте от царствующего града, еже есть из Костантинополя?» Сим же рекшим «Се убо третий есть час отнележе⁴⁰⁷ изыдохом». Слышавше же сия, удивишася вси, тогда сущии ту, начаша молити их, да причастятся брашну от трапезы их. Отвещаша же им непщуемии⁴⁰⁸ старцы «Несмь бо ядущии, ниже пьющии⁴⁰⁹, но убо вам благоволи Бог в славу свою питатися от сих». И, се рекше, невидими Быша от них. Тогда убо познавше Марфа и Мария с сродники своими и со градоначальники, яко и тии, от Бога посланнии во образе инок, ангели суть. И воздаша хвалу Богу, творящему дивная и преславная чудеса.

По сих же убо восхотевшима сестрама Марфе и Марии совет сотворити и совопроситися со ужиками и с сродники своими о сем, да где убо има поставить той святый животворящий Крест Господень молитися в дому ли си, или в церкви Господне. И бысть има видение от чудотворного Креста Господня во сне, глаголя «Поставите мя во святилище Божии в церкви архистратига Михаила честного его Собора на погосте, иже есть вмале отстоящ от пути места сего, яко с поприще едино». Марфа же и Мария возрадовастеся о видении, яко не презре Господь желания ею. Тогда дошедше со тщанием церкви тоя и поставиша той святый и животворящий Крест Господень в предиреченней церкви архистратига Михаила и прочих небесных сил бесплотных честного их Собора, иже бе во уезде града Мурома, яко двадесяти и пяти поприщ⁴¹⁰ града не достигши, пребывание имея во Унжеском стану на реке Унже, идеже подает благодатию Христовою бесчисленная чудеса и исцеления приходящим к нему с верою.

По сих же убо оныя благочестивыя две жене, Марфа и Мария, начасте к чудотворному оному целбоносному⁴¹¹ кресту притичуще⁴¹². И не сии убо едини, но и всего града Мурома всенародное множество с великою верою прибегая; паче же различными болезньми одержимии прикасахуся, вскоре исцеление приемлюще, благодаряще Бога, в домы своя отхождаху.

Прохождаше повсюду слава о нем, любит бо таковая сих с дерзостию притицати и скорее крилатых обносится, еже и до царствующего града Москвы самодержцем в слухи внидоша, и сердца тех к Честному оному Кресту верою воспалистася и, с желанием приемлюще сего, целоваху. Сего ради обыкоша и служители тоя церкви даже и доднесь по вся лета приносити того в царствующий град Москву к державным и в благочестии сияющим царем и святителем и всему православному христианству на освящение душам и на отгнание страстем и на исцеление телесем от различных недуг.

Тем же мы, братие, возрадуемся о явлении Креста Господня, днесь и веселуемся о обретении Креста Христова, днесь Владычен Крест от небесных вестник приносится, днесь бо Крест не рукотворенный, но богосоделанный человеком даровася. Сего приятию, радующеся, празнуем. Сего обретению мы, веселящеся, торжествуем днесь бо паче солнца многоразличными чудесы в Муромстем граде осия и всю Русскую землю просвети, днесь святая церкви, аки гривною, златым крестом Господним украшается. Людие же, с верою и любовию сего целующе, душами и телесы вкупе освящаются. Како убо мы, убозии, исполнени греха суще, возможем по достоинству Кресту Господню похвалу принести или похвалити? Но токмо с верою и сердечною любовию вопити «О великия Креста силы, коликих благ сподобихомся, яко от толикия мерзости и тьмы заблуждения род человеческий призва, и от смерти на живот возведе, и от тля на нетление приведе! Не к тому бо очи мысленнии неведения мраком покрываются, но Креста ради светом разумным просвещаются, сия Креста ради исправления, сия нам Креста ради дарования. Кое ли исцеление не Креста ради содеяся? Креста бо ради благочествовати навыкохом⁴¹³ и благодать Духа Святого прияти сподобихомся. Что убо креста честнейши, что же ли сего душам нашим полезнейши? Да не убо постыдимся, Крест Господень именующе, но со всяцем дерзновением той исповедающе, имже и звани быхом во спасение и в вечную жизнь, еяже буди получити всем нам о Христе Иисусе, Господе нашем, емуже слава со Отцем и с Пресвятым, Благим и Животворящим Духом ныне и присно и во веки веком. Аминь».