Беседа отца с сыном о женской злобе

Сказание и беседа премудра и чадолюбива отца, предание и поучение к сыну, снискательна от различных писаний богомудрых отец и премудрого Соломона и Исуса Сирахова и от многих философ и искусных мужей о женстей злобе

«Послушай, сыне мой, приклони уши свои, внуши словеса уст моих, да скажу ти исперва сотвори Бог человека единого от всех стихий и нарече имя ему Адам, и потом успе Адам, и взят Бог ребро его и сотвори ему жену. И Адам не прельстися, но жена его прельстися советом змииным, и тоя ради вины все отъято самовластие у жены. И рече Бог ко Еве «Отныне буди ты покорена мужу своему во всем и повинуйся ему и не буди тебе ни единыя власти над ним, той глава тебе и господин, да владеет тобою во всем, преступила бо еси повеление мое и не восхотела еси свободна быти».

Зри же, сыне мой, яко отъя Бог у жены самовластие, да не вопреки глаголют мужу своему. Единою бо поучи Ева Адама и всему миру клятву наведе, и запрещение прият прабаба наша в печалех родити чада».

Рече сын ко отцу своему «Отче, обоим сим вещем Писание свидетельствует быти истинне. Благовествуя бо Бог ко своему созданию, посла архангела своего Гавриила к деве Марии, вместо древние печали Еве – радость Богородице принесе, рече «Радуйся, благодатная, Господь с тобою и благословенна ты в женах!» Сия радость сопротивна печали и благословение сопротивно клятвы, и вместо Адама – новый Адам – Христос, и вместо Евы – благословенная Богородица Мария. И без болезни Адама породи, той же чистоте девичести лицы ревнующе и жены по Христе мучившеся, на уди рассекаеми, и ко Христу приведошася, того ради вся нова бысть, и женское племя благословися, и яко жена добра мужа своего и по смерти спасет, и дому строительница бывает, и венец похвалы на главу мужу своему сплетши полагает, и яко сладкия воды от уст ея истекают, и горесть сердечную мужу своему услаждает, милосерда, чадолюбива детем своим бывает, и дом свой всякими добродетельми наполняет; бескровных покрывает, беспомощным помогает, бедных призирает, нагих одевает, алчных и жадных накормляет, больных и в темницах посещает. И по писанному, всего сильнее жена бывает жена и царей породи и одеяние им сотвори, ибо всяк человек от жены рождается и сосцами ее питается. И прирече «Не суть зло естество женское».

Рече отец сыну своему «Сыне, аще бы не благоволил Бог от жены родитися и водою креститися и на кресте распятися, то уже приближися весь род ко вратом адовым. О сем, сыне, известно буди тебе в нынешних летех едина жена от тысящи такова, якоже ты глаголеши, обрящется. А сия в Бытии глаголется «Позна Адам жену свою и роди от нея сына». Не Ева роди, но Адам роди. И во Евангелии глаголет «Авраам роди Исаака». Слыши, сыне, не Сарра роди, но Авраам. Но аще и сосцами питаемся, но множицею от них кровию венчаемся; от жен бо многи крови пролияшася, и царства разоришася, и царие от живота гонзнули¹³⁶⁶, села и домы раскопаша¹³⁶⁷.

Горе граду тому, в немже властелинствует жена! Горе, горе дому тому, имже владеет жена! Зло и мужу тому, иже слушает жены! В нынешних вецех мнози человецы грады многими владеют, а женам своим работают. Извыкли бо жены их в зерцало призирати и вапами¹³⁶⁸ лица помазовати, и вежда свои возвышати, и черновидно лица воображати, и многим себе уряжением украшати; и многих очеса на видение красоты своея превращати украшают бо телеса своя, а не душу. Уды своя связали шелком, лбы своя подтягнули жемчугом, ушеса своя позавесили драгими серезами¹³⁶⁹, да не слышат гласа Божия, ни святых книг писания, ни отец своих духовных учения. Жены бо познали путь заблуждения, мужие же возлюбили на женах своих многая украшения, а сами восприяли убогое одеяние на себе носити, все для жен своих украшения. О, мужие! От кого есть прияли сия обычаи, иже многая полагают на женах своих украшения? От сего вам несть пользы, только лише вам злое погубление, ибо женское украшение – всегдашняя мужу сухота и приводит его до острого меча. Много бо сего бывает, еже в великия долги себе влагают и от того вечно погибают, понеже своего не имут, а жен украшают.

Аще же кто хотения ея не исполнит, тогда она зельне воздыхает, слезит и шепчет, ни худа, ни добра не глаголет, очи свои изменяет, нос потупит и зубы своими скрегчет, и что речет муж ея, и она, что меденица¹³⁷⁰ пыхнет и пред ним плачет день и нощь и мужу своему покоя не дает, гнев имеет, и муж ея от нея покоя не имат. И она глаголет «Оных мужей жены ходят красно, и вси их чтут, аз же бедная, в женах возненавиденая, и всеми незнаема и от всех укоряема. Почто ты мне ныне муж? Дабы аз тебе не знала! Аз была дочь богатого отца и матери добрыя и племени славного и таковых бы родителей дщерь, а только б аз была девицею, был бы мне муж отца богатого и была бы есмь госпожа добру многу, и везде бы честна, и хвальна, и почитаема от всех людей!»

Хочет убо жена, дабы ея вси хвалили и любили и почитали, аще ли иную похвалят, то она возненавидит и вменяет не в дружбу, и чужую похвалу в студ влагает. Аще ли муж ея угодити восхощет, то всех ему любити, ихже она любит, тако и всех сих в ненависти имети, ихже она возненавидит. И всегда хощет большину имети и никому не хощет покоритися, ни послушати. Всегда хощет повелевати и всего хощет ведати, и поучати, и умети, аще и не умеет и не знает, а глаголет «Умею и знаю». Аще будет прекрасна и лепа, многи очи имут на ню зрети. Якоже бо в луже вода семо и овамо преходя погибает, такоже и женский разум, яко храмина непокровенна¹³⁷¹ и яко ветрило на верх гор скорообразно вертящеся. К таковым женам мнози человецы прельщаются ов добролепием жен, ов разумом, а ин смехотворными утехами, ин краснословием и дарованием и прочими лестьми прельщаются. Яко речено есть «Лучше купите коня или вола, или ризу, нежели злую жену понятии», понеже не мощно познати, какова обычаем аще и недобролепна или буя, или больна, или блядлива, или горда, или гневлива или иным пороком повреждена и к тому невозможно иныя за себя поняти, доколе она жива. Аще хощеши, сыне мой, без печали жити, то лучше не женитися и опосле не тужити».

Рече сын ко отцу своему «Отче, во Евангелии речено «Сего ради оставит человек отца своего и матерь и прилепится жене своей и будета оба в плоть едину». Бог же ми даст жену добронравну, всякими добродетельми украшенну смирением, молчанием, послушанием, доброумием, пощением и нищелюбием, рукоделием, нескверноложием. Таковыя жены у Бога милости просят о мужех своих, и когда в дому будут и доброй жене возрадуются и о делех ее, чужей же радости не зазрю, но всегда радость в дому моем будет».

Рече отец к сыну своему «Сыне, аще будет тебе тако, якоже рекл еси, блажен еси и добро тебе будет, жена твоя, яко лоза плодовита, аще же грех ради житие зле проводиши и такову жену не обрящеши, якоже хощеши, всегда о ней сердцем скорбиши и в горести сердца речешь «Блажен той, иже девством живет, да сицевыя жены не обрящет». И ты, сыне, последи злонравную жену не возлюбишь, и в раскаяние придешь, и ничто тебе успеет¹³⁷². Аще ли сицевую обрящеши:пронырливу, льстиву, лукаву, крадливу, блядливу, злоязычну, обавницу¹³⁷³, еретицу, медведицу, львицу, змию, скорпию, василиску аспидну».

Рече сын ко отцу своему «Отче, не могу разумети словес твоих, скажи ми известно».

Рече отец к сыну своему «Слыши, сыне мой, про льстивую и пронырливую. Сия рукоделия делати не хощет, а как муж ея придет, и она лежит – шипит, стонет, востает – охает, и муж ея сия речет «Жено, что и о чем скорбиши и ни о чем нерадиши?». И она хотя и здрава, а речет «Не могу». Сия не строительница дому своему и мужу своему не помощница, и нужного одеяния не сотворит. Аще что муж ея припасет, и она пронырством все изнурит¹³⁷⁴.

Слыши, сыне мой, про сварливую и злоязычную имеет язык, яко бритву изощренну, на всякого человека наскачет, аки лев, всех злословит и укоряет, и осуждает, и на всех яд своего языка испущает.

Слыши, сыне мой, про лукавую и крадливую. Лукавство женское сице имеет ум остр, пред мужем своим показует, и никако же муж ея не может лукавства женского разумети, ибо с мужем живет аки бы единодушно, а в сердцы своем мыслит «Аще муж мой умрет, а живота своего мне не прикажет, и мне за иного мужа поити не с чем и никто меня убогую за себя не возьмет». И се глаголя, мыслит «Ныне есми всему добру госпожа, учиню себе сокровище тайное». И начнет у мужа своего красти, а он того не ведает и сице к ней речет «Жено, что обнищахом и в велицей скудости дом наш сотворися?» Она речет «А то, господине, грех ради наших». Сия ли не крадливая, иже все имение мужа своего погубит и оба обнищают?

Слыши, сыне мой, про льстивую и блядливую. Таковая жена мужу своему во стретение¹³⁷⁵ изыдет, ланитами склабящися¹³⁷⁶ и нравом уничижающися, и за руце мужа принимающе, и одеяние совлачающе; словесы льстящи, усты лобызающи, сице глаголющи «Пойди, государю мой, свет очей моих, сладость гортани моему, зрети я без тебя, света моего, не могу, и ни единого слова проглаголати. Лице мое потекло, и сердце мое окаменело, и егда возрю на тя, света моего, тогда зело возрадуюся составы мои расступаются и вси уди тела моего трепещутся и руце мои ослабевают. Брак ты мой любезный, всегда пред очима моима есть, егда услышу сладкая твоя словеса, тогда не смею что отвещати не отверзутся ми уста, огнь в сердцы моем горит и лице мое палит и все составы мои греются». И аще будет юн муж, и она его вскоре обольстит; и аще в дому его не прилучится, и она близ оконца приседит, семо и овамо колеблющися, а со смирением не сидит скачет, пляшет и всем телом движется, сандалиями стучит, руками плещет и пляшет, яко прельстившаяся блудница Иродиада бедрами трясет, хребтом вихляет и главою кивает, голосом поет, языком глаголет бесовская, ризы многи пременяет и в оконцо часто призирает, подобно Иродиаде чинится и многим юнным угодит, и всякого к себе льстит.

Слыши, сыне мой, про обавницу и еретицу. Из детска начнет у проклятых баб обавничества навыкать и еретичества искать и вопрошати будет многих, как бы ей замуж выйти и как бы ей мужа обавить на первом ложе и в первой бане. И взыщет обавников и обавниц и волшебств сатанинских, и над ествою будет шепты ухищряти, и под нозе подсыпати, и возглавие и в постелю вшивати, и в порты резаючи, и над челом втыкаючи, и всякия прилутшихся к тому промышляти и корением, и травами примещати, и все над мужем чарует. Сердце его высосет, тело его иссушит, красоты в лице не оставит, и во очесех светлость погубит, и разум отымет, и всякому в поношение вложит его. Сицева сотворит мужа своего и тако его возненавидит, юных же возлюбит и умерщвляющее зелие сыщет, и подобно время обрящет, и смертным вкусом мужа своего покусит, якоже клас прежде времени исторгнет.

Слыши, сыне мой, про медведицу и львицу. Якоже от таковых зверей едина, егда узрит человека, тогда главу свою похилит и очи свои посупит в землю и злобою пыхнет, на человека нападет и задушит его вскоре, тако и злая жена главу свою наклонит, и очи посупит, и уста стиснет, даже злобою на мужа своего дыхнет, и на шею его сило¹³⁷⁷ наложит, и гортанное дыхание займет, и зле кончает.

А львица в пустыни на всякого человека и зверя наскачет и затерзает, тако и злая жена, яко львица и домочадец возненавидит, и ризы растерзает, и тело кровию обогряет, и власы искореняет, и на мужа рыкает, и злобою восхищает¹³⁷⁸, не львовы убо зубы ухапает, ни мечем, ниже копием мужа своего заколает, но нравом злее львицы бывает.

Слыши, сыне мой, про змию и скорпию, ибо змиин род вельми в ползающих злобою злейши иных гадов изначала бо велика зла сотвори человеку и проклята от Господа змия, того ради пресмыкаяся по земле чревом своим ходит, того же роду и скорпия, и жаба, и черепаха, аще бьешь, или колишь, или стреляешь – ничто ея не возмет, тощию¹³⁷⁹ разжещи клещи и имати ю и в огни сожещи, а секнутие ея таково зло, скоростию и до смерти приводит, тако и злая жена в человецех инех злейши суть.

Слыши, сыне мой, из куста исходит змия и узрит человека и от него бежит, а злая жена подле человека лежит, а змииным ядом дышет – сеи истинная запазушная змия донележе муж ея по ней ходит и вопреки ничего не глаголет, и она ему терпит, а егда муж чем погрозит или досадит, и она на него, что змия, шипит, и аще ю бьет жезлием или пинанием, или за власы рванием, то злую жену ничто неймет, но точию разжизает¹³⁸⁰, и она злобою своею, что змию, шипит, в сердце его злохитрством секнет, по времени же и сама умрет, аще не покается – во огнь ввергнется да тамо окаянная накажется.

Слыши, сыне мой, про ехидну. Такова суть, ибо своих чад ненавидит, аще хощет родити, подшися¹³⁸¹ их съести. Они же прогрызают у нее утробу и на древо от нея отходят, и она от того умирает. Сей же уподобишася ехидне нынешние девицы многие не бывают мужем жены, а во утробе имеют, а родить же не хощет и помышляет «Егда отроча от чрева моего изыдет, и аз его своими руками удавлю». Ибо аще девическую печать и разорит, а девицею именуется, образ бо, яко девица, а нравом, яко окаянная блудница. Ибо кому прилучится таковою женитися, виждь и разумей, та бо ходит быстро и очима обзорлива, и нравом буя, и всем несчаслива.

Слыши, сыне мой, про змию василиску. Такова суть, ибо зрением убивает человека, где завидит – тамо и побивает. Такова бо есмь змия василиска, стрелами своими смертными люта вельми человека умерщвляет. Такоже и прокудливая¹³⁸² жена нравом злее змия василиска, ибо прехитро себе украшает и опрятни сандалия обувает, и вежда свои ощиплет, и духами учинит, и лице, и шею вапами повапит¹³⁸³ и румяностию, и черностию во очесех себе украсит, и в одеяние червленое себе облачает, и персни на руце возлагает и верх главы своея златом и камением драгим украшает и на лукавыя дела тщится. Егда же и грядет, ступает тихо и выю кротце обращает, и очима невскоре смотряет, и зрением умильно взирает, и устне гладце отверзает и вся составы свои на прелести ухищряет, и многия души огнепальными стрелами устреляет, яко ядом змииным, видением своим юных убивает, яко расслаблении удове их бывают.

Сыне мой, глаголах ти про аспида, иже зело зол вельми в роду змиевом в семидесяти родех, а сей аспид первый от них злобою, и в которую сторону вселится и сотворит ю пусту, а нравом таков есть, еже не может слышати гласа трубного, но разбивает себе о камень и скончавается. Тако и злонравная жена не может слышати доброго еи поучения и уши свои затыкает непослушания камением и непокорения жемчугом драгим, яко аспид хоботом, в которой дом такая жена вселится и сотворит его пуста. Ибо всяка печаль, зло бывает, а корень всему – женская злоба».

Рече сын ко отцу своему «Отче, апостол рече «Лучше женитися, нежели разжизатися». Якоже палима пещь огнем, такоже и юношеская плоть к вожделению женскому разжизается, ибо огнь естественный не ветром разгнещается¹³⁸⁴, но видением красных лиц прельщаются и время и место согрешению враг полагает. Женская красота мя прельщает, на ню же взирая – весел бываю».

Рече отец к сыну своему «Сыне, аще ли не разумееши словес моих, якоже рекох тебе, слыши, да скажу ти известно подробну.

Сотвори Бог человека единого и помысли, яко недобро единому быти ему, и успи его в породе райстей, и взят ребро его, и сотвори ему помошницу, рекше жену. Егда же прабаба наша Ева прельстися советом змииным, такоже и мужа своего прельсти, и посети Бог Адама в раи и рече ему «Адаме!». Он же рече «Се аз, Господи». Господь же к нему рече: «Почто заповедь мою преобидел еси?». Адам же ко Господу рече «Господи мой, Боже, жена мя прельсти, ю же ми дал». И рече ему Бог «Почто послушал еси совета жены своея? Аз бо дал тебе не советницу, ни владетельницу над тобою, но поручницу¹³⁸⁵ и помошницу тебе». И того ради изгна Бог Адама и жену его от райския пищи. И по изгнании нача Адам плакатися, сидя и сетуя, с плачем взываше «Увы, мне, раю мой прекрасный, яко мене ради сотворен еси, а Евы ради заключен еси. Увы, мне, яко погубих Божие человеколюбие и Духа Святого благодати удалихся, и коим плачем восплачуся, или которым рыданием возрыдаю, или коим сетованием воссетую! От рая мое изгнание, и в поте и в трудех терновное прозябение, и в преисподнех адских местех воздыхание помяну». И сице рече «Увы, мне, вся злая сия соделавшая и внезапу постигоша тебе ради, жено прелесная. Ты мне незрелое бессмертие пожала еси серпом лукавства змиина, ты бо мою власть на рабство преложила и во очесех светлость помрачила, и нуждею реки слез изливаю. Увы, мне, о, жено, безумная! Почто отлучи мя ангельского мирования и студным делом принуди мя? Ты, прельстившая мя, отъиде от мене, уже бо не требую к тому совету твоего пагубного и лукавого, ниже будет о тебе промышление мое от сего времени». И по Адаме правнуцы его многими напастьми и бедами пострадали от жен.

Слыши, сыне мой, како святыи пострадали от жен.

Ной праведный от жены напоен бысть квасом, смешеным с травою и увещаем от нея о тайне, иже заповеда ему ангел Господень с запрещением николиже поведати, но ум его не возможе терпети от воняния травного и отбеже от главы его, и в забытие прииде память его о запрещении, и сказа таину жене своей и яко отщетився и прииде на место, идеже ковчег делая, и виде, яко рассыпася дело его и всех живущих на земли, и плакася на месте том 40 дней.

Такоже Лот праведный в Содоме живяше с беззаконными людьми и не прикоснуся, и не восколебася им, и никогождо осуждая, и того ради Содомского запаления убежа, но от лукавства дщерей своих не может убежати, но напоен бысть виноградным вином и падеся со дщерьми своими и зачат во чревех. Последи же уведет грех свой, начат сомневатися и душею ужасатися, и плакася на горах горько, и бысть Лот дщерем своим посягатель, отец и муж.

Слышы, сыне мой, про Иосифа праведного, яже рече Писание, в раб продан бысть Иосиф и живяше чистотою душевною и красотою телесною, и лице его, яко солнце, сияя. Зряще же на него господина его жена и желаше насытитися красоты его и тщашеся ласканием запяти Иосифа. И без мужа своего призва его в ложницу свою и нача его увещевати, льстящи его и напрасно¹³⁸⁶ его охапи руками своими к падению себе. Той же отторгнуся от нея, она же ят за ризу его, он же оставив ризу свою в руце ея и отбеже от нея вне двора.

Прииде же муж ея от палаты царевы, она же взем ризу Иосифову и показа мужу своему и с великою злобою поношаше на Иосифа: «Сей раб твой восхоте мне ругатися, жене твоей, аз же не восхоте осквернити ложа твоего и возва, иже в дому нашем, он же, оставл ризу, беже от мене».

Петерфирий же ят веру словесем ея и повеле Иосифа затворити в темнице и смириша во оковах нозе его, лукавыя ради жены. И избави его Бог и сотвори царя Египту.

Слыши, сыне мой, про царя Давида, како блуда ради хотя смерть прияти. Богоотец великий во пророцех царь Давид, когда виде Вирсавию, жену Урину, красну лицем и величеством, и повеле привести во свою палату и падеся с нею, и по сотворении блуда озревся вспять и виде ангела стояща и держаща наг меч над главою его. И паде ниц на землю, молящеся и плачася горько, глаголюще «Безвестная и тайная премудрости твоея явил ми еси» – и паче рех «Воссмердиша и согниша раны моя, от лица безумия моего пострадах, яко беззаконие мое аз знаю и грех мой предо мною есть всегда, тебе единому согреших и лукавое пред тобою сотворих, отврати лице твое от грех моих и вся беззаконие мое очисти».

И услыша Господь моление его, и возвратися от него ангел Господень без крови его, и прия Давид Духа Святого благодать, и глаголаше «Аз рех, во обилие моем не подвижуся во веки».

Рече сын ко отцу своему «Отче, приях поучение твое и во уверение ми бысть. Приточник¹³⁸⁷ рече «Не пощади жезла твоего и учи сына своего, егоже любиши». Уже аз слышах от тебе все по ряду и от словес твоих уразумех, и смысл свой укрепих, и разума наполнихся, наказанию твоему и опасному житию научихся, и укрепихся, и искусен бых».

Рече отец к сыну своему «Сыне мой, несть тако, якоже рекл еси, ибо дивна сия вещь – жена злая кротима высится, а биема бесится и сворится, а подобна болезни некакой. Не превозносися, сыне мой, и не рцы во уме твоем и не уповай на премудрость твою и на мужество свое и на храбрость, еже жити со зверем сим, что укротити его свирепие, и бесстуднее сущи полских¹³⁸⁸ зверей, и невозможно сущи убежати ею. Обрели бо есми в Писаниих «Кто Соломона премудрее или кто Самсона сильнее и Александра храбрее?» И ти от жен пострадали и скончалися. Соломон в юности своей наполнися разума, яко река многотекущая исполнися притчами и гадании; яко звезда утренняя, яко облак и яко луна полна, и во дни сияя, яко солнце и яко маслина славы, от неяже сладкий плод приходит; имя его и мудрость во вся страны прослышася, жены же лукавые ум его помрачиша и, яко реку многотекущую, пресушиша, и доброту его погубиша, обратиша на пагубу, и блудом растлиша его, и прельстиша его во идолобесие, и сотвориша его поклонятися твари. И тоя ради прелести пророческого дара лишен бысть.

Слыши, сыне, про Самсона сильного, иже по благовестию родися, да будет силен, и глаголаше «Аще бы Бог укрепил колце, то бы могл всею вселенною поворотить». И челюстию скотиею по 1000 на день иноплеменных побивал, а жена любодеица не убояся силы его и напоив, на коленех своих успи его и власы, ими же силен бысть, остриже и очи ему ископа и на поругание иноплеменным его предаде.

Слыши, сыне мой, про царя Александра, яко храбр бе и палестинския страны от востока солнечного вся царствия мира сего своею храбростию к себе приклони, а от жены отравлен бысть зелием травным и скончася.

Илия пророк, славный во пророцех, иже молитвою своею на три лета и на шесть месяц небо заключи и не одожди земли толико время, и огнь с небесе сведе и пятьдесятников пожже, а жена любодеица лютостию на него дыхну и смертию ему погрози. Пророк же Божий убояся злобы и, шед, скрыся в пустыни Хоривстей.

Иоанн великий во пророцех Предтеча, глас слова, светильник света, денница солнца и воин царев, иже достоинством своим велику славу имея в зачатии и рожестве и житии своем, велику честь имея в проповедании покаяния, велик проповедник пред Богом и человеки, достоинством славы своея положи руку свою на пречестнею версе великого Бога и первие видев славу триипостасного Божества и свидетель истиннен, и житие его, яко солнце, сияя, якоже и некое зерцало пред очима нашима, ибо елико имут святии жития и сия вся имея святый Иоанн. И прия от Бога имя – ангелом наречен бысть, и в рожденных женами болии не бысть.

Терпения же и проповедания ужасеся диавол и нача трепещущи глаголати «Горе мне, что сей муж творит, и кто ми возвестит будущего гнева бежати? Горе мне, яко будущая возвещает, един стоит пришедший у народа и всех учит, укоряет и обличает Ирода и советницу мою Иродиаду! Горе мне, ничтоже могу сотворити ему, но вниду во угодницу мою Иродиаду и наполню ея гнева».

И скверная любодеица испусти гнев свой на праведного, не убояся великого во пророцех скакавши и плясавши Иродовии, и полюбися плясание Ироду, и клятся Ирод дати и до полцарствия своего. Она же, научена матерью своею, испроси главу Иоанна Предтечи. Ирод же повеле Иоанну главу отсещи, и усеченною главою Предтечевою, яко яблоком, поиграв на блюде. егоже в пустыни дивии зверие убояшася, змии и аспиды честно нозе его лижуще, а жена зла такого светильника не убояся.

А великого во апостолех евангелиста Иоанна Богослова, наперстника и возлюбленника и друга Господня, со учеником его Прохором злая жена по ланитама бияху.

А великого во святителех покаянию проповедника, вселенней учителя и светильника Иоанна Златоустого, учение же его во всю вселенную проиде, яко река многотекущая, царица властолюбица, не терпя обличения его, с престола его изгна и в дальние страны в заточение засла его.

Слыши, сыне мой, уразумех ли еси словеса моя, яко тебе про праотец и про патриарх, и про пророк, и святых апостол, и святых отец рекох, елико они пострадали от неистовства женского, толико разумных пострадали от них, ибо диавол не может сам сотворити таковыя пагубы святым, якоже наводит злыми женами, то бо есть оружие дияволе, и меч сатанин и оболгательница святым. И обретохом аз написано в «Старчестве» «Некто человек добронравен живяше со злою женою и имея семь сынов, а все в совершенном возрасте, и многого ради злонравия ея наказуя муж жезлом, она же окаянная убеже в некую пустыню к некоему затворнику старцу, толкися, глаголаше «Сего ради пришла к твоей святыни, да избуду напрасные смерти». Он же прият ю в пещеру свою. И помале прельсти его окаянная, и падеся с нею, яко со своею женою, и елико муж ея бияше, она же к затворнику убегаше в пустыню и глаголаше «Уморю мужа своего». Потом же муж ея бияше про злонравие ея, она же умори мужа своего и шести сынов умори по единому, а седьмый сын, шед во град, сказа народу, и изыдоша людие в пещеру, яша старца и жену ту и, испытавше их огнем, сожгоша».

О сей повести не могу глаголати без слез многих и горького воздыхания, понеже очи мои зельне плачют и душа моя люте трепещет. Слыши, сыне мой, кто не прослезится о сем великом старце? Зде огнем скончася, а в будущем веце зле лютей адской муце предастся! О, люте! Очи мои слезы многия испустиша, а душа моя сжалеся и сердце мое восколебася! Колико сей старец подвизався в пустыни, со многочисленными бесы боряся, а женою злоокаянною вмале прельстися и погибе, о сем всяк да восплачет умильными слезами и горьким воздыханием, сердечным возрыданием!

Слышах, сыне мой, про некоего мужа, пришедша в дом к жене вдовице, и хваляху людие ему, да ся оженит ею, понеже юн бяше. Она же, окаянная, злонравно с ним живяше неколико лет, по времени же умре жена та, он же нача продавати дети своя и ея. Людие же кленяху его, что тако творит. Он же рече «Егда возрастут и будут обычаем в матерь свою, тогда и мене продадут». И плакася по жене своей, людие же глаголаху «Почто плачешися, понеже зла была?». Он же рече: «Плачуся, дабы другая такова не была».

Некий человек рече «Аз есмь бых в трех нуждах в темницы, у висилицы, и двух нужд убежах, а от третие нужды – от злыя жены – не мог убежати».

Рече сын ко отцу своему «Отче, отяготех тягостию, рцы ми слово вкратце что лихая жена и что злоба ее, скажи ми и напиши на сердце моем».

Рече отец к сыну своему «Слыши, сыне мой, жена злая – домовная буря, многим потоп, неудержимое стремление, сердцу копие, иноком жжение, очесем поползение, покоище змиино, смертоносная беседа, неоставляющая трясовица, неутолимая огневица, мужу спящая лесть, востающая печаль, самохотная злая ратница, грехом учительница, темный вождь, хоругвии адова, ниспадаемое желание, ветвь дияволя, спасаемым соблазн, болезнь неисцельная, злоба безуветная, удобь¹³⁸⁹ уловляюща дерзость; жена злая – ветр север, день неведрян, гостиница жидовская, совокупленница бесовская, несытная похоть. Якоже ров глубок не наполнится водою и огнь дровами, тако и злая жена николиже наполнится хотения своего, и злоба их не умаляется, имея сокровище злобы, источник зла кипя непрестанно».

Рече сын ко отцу своему «Отче, слухи моя наполнишася твоего наказания, уже душа моя ужасеся, и разум мой умилися, и сердце мое восколебася, стоя пред очима твоима».

Рече отец к сыну своему «Сыне мой, не буди укоряти собою естество женское вельми есть зло. Приточник же рече «Бежи и не озирайся красот жен, яко Ной потопа и яко Лот Содомского запаления, и не буди с прилежанием зрети на чужия жены, и не объят буди руками их, и не желаи ея, та бо погубляет человеки острейша меча». Некто рече «Стретил бе на пути льва, и на распутии разбойника и обоих сих убежах, а злыя жены не могох убежати. Аще кому случится злая жена пояти, то над чужим мертвецом не ходи плакати, всегда бо ти есть у себе в дому плач».

Сыне мое и любимое мое чадо, вся сия видех и в писании обретох и согласию твоему рекох».