Повесть о перстне

О вельможи цареве

Бысть убо некто воевода славен зело, егоже царь паче всех почиташе вельмож. Ему же завидяху тии вельможи и много ко царю клевещуще на него, дабы его до конца возненавидел. И случися всем вельможам быти у царя на пиру, велию брань сотворше между собою ненависти ради. Он же рече им «Почто ми, братие, завидите? Ничто же вам зла сотворих! Когда мя Господь милует, тогда и царь мя жалует».

Царь же той слышав такову речъ от воеводы, вложи враг в сердце его злую ту мысль на того воеводу. Начат гневатися и вины искати, чим его посрамити, не хоте слышати слова того когда человека Господь милует, тогда и царь жалует, и вси его любят. И запоив его без памяти, и дав ему перстень зело украшен златом. И повеле ему во утрий день таков же сотворити. Он же приим с радостию сие и сохрани у себе, во всем уповаше на Господа.

Ему же уснувшу, повеле царь тихо взяти перстень от него. И ничтоже ему ведущу сия. Царь же в той день изыде на море плавати и поверг перстень той в море, дабы его никтоже взял оттуду, хотяй тою виною воеводу своего казнити и Бога искусити. И глаголаше: «Что се будет?». А не ведый, окаянный, что близ есть Господь всегда всем, сердцем призывающим во истинну его и уповающих на милость его, никогда же человек погибнет ни в сий век, ни в будущий. Уже бо царь превознесеся мыслию в сердце своем, не хотя слышати глаголющих, уповающих на Бога во всем. Бог же, человеколюбец, самого царя уничижи, а оного мужа славою превознесе паче первыя чести.

Царь же той наутрия посла по воеводу, велит скоро прийти к себе. Он же отречеся того дне быти, ничтоже ведяше о перстни том, яко царь хощет его о том истязати.

И паки Божиим промыслом муж той восхоте рыбы ясти и посла к рыболовом на море то рыб ловити. И множество рыб яша. Принесше, начаша рыбы те чистити. И обретоша во единой рыбе перстень злат царев, и вдаша господину своему. Он же яко от сна возбудився и, ничтоже ведый царева повеления, зело радостен бысть. И пришед пред царя, покланяяся ему, прощения прося. Царь же той рече ему «Дай же ми перстень, его же ти вчера дах». Он же вда ему перстень.

Царь же той вельми удивися благодати Божии и прослави Бога, и рече «Во истинну тако есть кого Бог милует, того и царь жалует». И повеле клевещущих нань казнити, а инех от лица своего отринути. А того мужа возлюби паче первыя чести.