Повесть о Тверском Отроче монастыре

Лета мироздания⁴²⁹ 6773-го, а от Рождества Христова 1265-го года составлен бысть Отроч монастырь тщанием и рачением великого князя Ярослава Ярославича Тверского и великия княгини богомудрыя Ксении по совокуплении их законного брака в четвертое лето по прошению и молению любимого его отрока Григориа, а во иноческом чину Гуриа

В лето великого князя Ярослава Ярославича Тверского, бысть у сего великого князя отрок, именем Григорий, иже пред ним всегда предстояше и бе ему любим зело и верен во всем; и тако великий князь посылаше его по селам своим, да собирает ему повеленная⁴³⁰. Случися же тому отроку быти в селе, нарицаемом Едимоново, и ту обита у церковного пономаря, именем Афанасия, и узре у него дщерь его, девицу, именем Ксению, вельми красну, и начат мыслити в себе, да оженится ею. И бояся князя своего, да некогда приимет от него великий гнев, и вельми печален бысть о сем, возлюби бо ю⁴³¹ зело, и не поведа мысли своея никому от другов своих, но в себе размышляше, да како бы ему улучити желаемое⁴³². Случися же наедине со отцем ея Афанасием, начатъ ему глаголати, да выдаст за него дщерь свою и обещается ему в всем помогати. Отец же ея вельми удивися о сем «Да како у такового великого князя имать предстояти всегда пред лицем его, и тако ли вещает мне о сем?» И не ведаше, что ему отвещати противу словес его. Шед убо Афанасий, вопроси о сем жены своея и дщери, сказа им подробну; дщерь же его, исполненна Духа Святого, возглагола отцу своему сице «Отче мой! сотвори ему вся сия, елика он тебе обещася, положи на волю его, Богу бо тако изволившу, и сие да будет».

Бяше бо девица сия благочестива и кротка, смиренна и весела, и разум имея велик зело, и хождаше во всех заповедех Господних, и почиташе родители своя зело, и повинуяся има во всем, от младых ногтей Христа возлюбила и последуя ему, слышаше бо от отца своего Святое Писание и внимаше прилежно всем сердцем своим.

Отрок же наипаче того уязвися любовию и прилежно о сем вещает отцу ея, да не устрашается «Аз бо ти во всем имаюся⁴³³ и князя умолю во всем, ты же не бойся». И тако совещастася во всем, и быти в том селе браку, и венчатися в церкви святого великомученика Димитрия Солунского, и жити ту, даже великий князь повелит. И тако повеленная великого князя исполни вся, яже повелена Быша, и возвратися во град Тверь с радостию и дивляшеся в себе вельми, яко нигде таковыя обрете девицы, и не поведа сего никому.

Отроковица же после его рече отцу своему и матери: «Господие мои! не дивитеся о сем, что вам обещался сей отрок, он бо тако совеща, но Бог свое строит не сей бо мне будет супруг, но той, егоже Бог мне подаст». Родители же ея о сем вельми дивистася, что рече к ним дщерь их.

Предреченный же отрок той, усмотря время благополучное, и припаде к ногам великого князя, и молит его со многими слезами, и возвещает ему свою мысль, да сочетается законному браку, яко ему годно бысть, красоту и возраст девицы оныя изъявляет. Князь же великий, сия от него слышав, рече ему «Аще восхотел еси женитися, да поимеши себе жену от велмож богатых, а не от простых людей, и не богатых, и худейших, и безотечественных⁴³⁴, да не будеши в поношении и уничижении от своих родителей, и от бояр и другов, и от всех ненавидим будеши, и от мене удален стыда ради моего». Однако на многи дни отрок моляше прилежно великого князя, да повелит ему желание свое исполнити и тамо жити. И тако великий князь наедине его увещавает и вопрошает о сем подробну, чего ради тако восхоте. Он же все исповеда великому князю обещание свое, якоже тамо обещася.

Князь же великий Ярослав Ярославич по прошению его повелевает всему быть, якоже ему годно и потребно, и насад изготовити, и вся воли его потребная, и люди ему тамо готовы быть имеют, елико годно будет на послужение отроку, когда приспеет время обручению и венчанию его, и отпущает его в насаде по Волге реке, бе бо то село близ Волги стояй, а кони ему обещавает прислати за ним вскорости по брегу.

Отрок же с радостию поклонися великому князю и пойде в насаде по Волге реке со всеми, посланными с ним.

Наутрие же великий князь повеле готовити себе коня и всему своему сигклиту, якоже угодно великому князю, соколы и псы, да, едучи, ловы деет⁴³⁵. В ту бо нощъ великий князь сон видел:якобы быти в поле на ловех⁴³⁶ и пускати своя соколы на птицы; егда же пусти великий князь любимого своего сокола на птичье стадо, той же сокол, все стадо птиц разогнав, поймал голубицу, красотою зело сияющу, паче злата, и принесе ему в недра. И возбнув князь от сна своего и много размышляше в себе, да что сие будет, и не поведа сна того никому, токмо повеле с собою на лов вся птицы взяти; и тако великий князь пойде в ту же страну, идеже отрок, ловы деюще, тешася. Бе же великий князь безбрачен и млад, яко двадесяти лет, еще ему не достигшу возраста своего.

Той же отрок, егда прииде в насаде по реке, и приста у брега, ожидающе коней от князя, и посла вестники своя к девице, да вся готова будут, якоже есть обычай брачным.

Девица же присланным рече «Возвестите отроку, да же помедлеет тамо⁴³⁷, дóндеже⁴³⁸ сама весть пришлю к нему, как вся изготована будут, понеже бо нам от него о приходе его вести не было». Вестницы же его, пришедше, поведаша ему о всем, еже им повелено бысть от девицы возвестити:провиде бо она великого князя приход к себе, рече родителем своим, яко «уже сват мой приехал, а жених мой не бывал еще, но уже будет, яко в поле тешится и замедлил тамо, но пождем его немногое время, да же приедет к нам», – а о имени его никому от сродников своих не поведа, но токмо готовяше ему честныя дары, яже сама строяше⁴³⁹, сродницы же ея вельми о сем дивляхуся, а того жениха ея не ведяху, но токмо она едина.

Князь же великий села того не знаяше, но восхоте тамо быти наутрие или на другий день и да видит своего отрока оженившегося; и тако обначева⁴⁴⁰ на лове, бяше бо село то от града Твери четыредесять поприщ. В нощи же той виде сон прежний и наипаче размышляше в себе, что будет сие видение, наутрие же по обычаю своему ловы деяше.

Отрок же той, не дождався вести ни коней, помысли в себе «Яко аще государь мой великий князь раздумает и пошлет по мене, и велит возвратитися вспять, аз же своего желанного не получил». И тако вскоре поиде во двор той, идеже девица та, и по чину своему все изготовавше. И тако седоста вкупе на место свое, якоже быти вскоре венчанию их, отрок же повелеваше по скору вся строити и дары разносити.

Девица же рече отроку: «Не вели спешити ничем, да еще у меня будет гость незванной, а лучше всех и званных гостей».

Великий же князь в то время близ бе села того, и увиде стадо лебедей на Волге реке, и тако повеле пустити вся своя птицы, соколы и ястребы, пусти же и сокола своего любимого и поимаше много лебедей. Той же сокол великого князя, заигрався, ударися летети на село то; великий же князь погна за ним и приехал в село то борзо⁴⁴¹, забыв вся; сокол же сяде на церкви святого великомученика Димитрия Солунского; князь же повеле своим вопросити про село, чие есть. Селяня же поведаху, яко село то великого князя Ярослава Ярославича Тверского, а церковь святого великомученика Димитрия Солунского. В то же время множеству народа сошедшуся смотрети, яко уже к венчанию хотят итти. Князь же, сия слышав от поселян, повеле своим сокола своего манити; сокол же той никакоже думаше слетети к ним, но крылома своима поправливаяся и чистяшеся; сам же великий князь поиде на двор, идеже бе отрок его, в дорожном своем платье, не на то бо приехал, но Богу тако изволившу. Людие же, видевше князя, не знаяху его, мняху бо его с коньми и с потехами к жениху приехавша, и не встретиша его никтоже.

Девица же рече всем ту седящим «Востаните вси и изыдите во стретение своего великого князя, а моего жениха», – они же дивляхуся.

Великий же князь вниде в храмину⁴⁴², идеже бяху отрок и девица седяще, всем же воставшим и поклоньшимся великому князю, им же не ведущим пришествия его и прощения просящим, князь же повеле им сести, да видит жениха и невесту.

Девица же в то время рече отроку «Изыди ты от мене и даждь место князю своему, он бо тебе больши⁴⁴³ и жених мой, а ты был сват мой».

Великий же князь узре ту девицу зело прекрасну, и аки бы лучам от лица ея сияющим, и рече великий князь отроку своему Григорию: «Изыди ты отсюду и изыщи ты себе иную невесту, идеже хощеши, а сия невеста бысть мне угодна, а не тебе», – возгореся бо сердцем и смятеся мыслию.

Отрок же из места изыде повелением его; великий же князь поим⁴⁴⁴ девицу за руку и поидоста в церковь святого великомученика Димитрия Солунского, и сотвориша обручение и целование о Христе, якоже подобает, потом же и венчастася в той же день; и тако бысть велия⁴⁴⁵ радость у великого князя той день до вечера, бяше бо летом, и селян повеле покоити день и нощь⁴⁴⁶. Идущу же великому князю после венчания от церкви ко двору, тогда оный сокол его любимый виде господина своего, идуща с супругою своею, сидя на церкви, начат трепетатися, якобы веселяся и позирая на князя. Князь же вопроси своих сокольников «Слетел ли к вам сокол или нет?» Они же поведаша ему «Не летит с церкви». Князь же, возрев на него, кликнул его своим гласом, сокол же скоро прилете к великому князю, и сяде на десней⁴⁴⁷ его руце, и позирая на обоих, на князя и на княгиню. Великий же князь отдаде его сокольнику. Отрок же той великою кручиною одержим бысть, и ни яде, и ни пия. Великий же князь вельми его любляше и жаловаше, наипаче же ему не веляше держатися тоя кручины, и сказа ему сны своя, якоже видех во сне, тако и сбысться Божиим изволением.

Отрок же той в нощи положил мысль свою на Бога и на Пречистую Богоматерь, да якоже восхотят к которому пути, тако и наставят; и снем с себя княжее платье и порты, и купи себе иное платье, крестьянское, и одеяся в него, и утаися от всех своих, и изыде из села того, никомуже о сем не ведущу, и пойде лесом, незнаемо куды.

Наутрие же великий князь того отрока воспомянув, что его у себя не видит, и повеле своим боярам, да пришлют его к нему; они же поискавше его много и не обретоша нигде, токмо платье его видеша, и великому князю возвестиша о нем. Князь же великий о нем вельми печален бысть, и повеле искати его сюду и сюду, по реке и в кладезях⁴⁴⁸, бояся того, чтоб сам себя не предал губительной и безвременной смерти; и нигде его не обретоша, но токмо той селянин поведа, что, де, купил у меня платье ветхое, и не велел о том никому поведати, и поиде в пустыню.

Великий же князь повеле его искати по лесам, и по дебрям, и по пустыням, да где его обрящут и приведут его; и многие леса, и дебри, и пустыни обыдоша, и нигде его не обретоша, Бог бо его храняше. И пребысть ту великий князь даже до трех дней.

Великая же княгиня его Ксения вся возвести бывшая великому князю Ярославу Ярославичу о себе и об отроке, яже напреди писана суть.

Великий же князь вельми печален бысть об отроке своем, глаголаше бо, яко «аз повинен есмь смерти его». Княгиня же его Ксения печалитися ему всячески не велит и глаголет великому князю «Богу убо тако изволившу быть мне с тобою в совокуплении; аще бы не Божиим повелением, како бы было мощно тебе, великому князю, к нашей нищете приехати и пояти мя за себя. Ты же не печалися о сем, но иди с миром во град свой и мене поими с собою, ничего не бойся». Великий же князь вельми печален бысть, воздохнув, прослезися и воспомяну своя глаголы «Яже глагола ко отроку своему Григорию, тое на мне сбысться, а его уже отныне не увижу». И возложи свою печаль на Бога и на Пречистую его Богоматер. И отпусти свою великую княгиню в насаде и бояр своих, иже были со отроком, во град Тверь, и повеле великий князь боярам своим, да берегут великую княгиню его, и покланяются ей, и слушают во всем. Сам же великий князь по-прежнему поехал берегом, деюще потехи своя и ловы; и прииде во град Тверь прежде княгини своея. Егда же прииде и великая княгиня его Ксения ко граду Твери, великий же князь повеле боярам своим и с боярынями, и своим дворовым, и всему граду, да выдут на встретение великия княгини и с женами своими. Вси же, слышавше от великого князя, с радостию изыдоша, весь град, мужи и жены, и младенцы, от мала даже и до велика, с дароношением, и сретоша ея на брезе у церкви архангела Михаила. Егда же прииде ко граду Твери, великий князь посла всех бояр с каретами, и тако с великою честию сретоша ю и поклонишася ей; и вси, зряще красоту ея, вельми чудишася, яко «нигде же видехом очима нашима или слышахом слухом нашим таковую жену благообразну и светящуся, аки солнце во многих звездах, якоже сию великую княгиню, сияющу во многих женах сего града паче луны и звезд многих». И провождаше ю во град Тверь с радостию великою и с дарами многими на двор великого князя. И бысть во граде радость и веселие велие, и бысть у великого князя пирование на многи дни всякому чину от мала даже и до велика. Предреченного же отрока не бе слухом слышати на много время. Божиим же промыслом той отрок прииде на реку, зовомую Тверцу, от града Твери пять на десять⁴⁴⁹ поприщ, на место боровое, и ту вселися на лесу, и хижу себе постави, и часовню на том месте, и назнаменова, где быти церкви во имя Пресвятыя Богородицы, честнаго и славнаго ея Рожества. И ту пребысть немногое время, и наидоша его ту близ живущие людие, хождаху бо по лесу потребы ради своея, и вопрошаху его, глаголюще: «Откуду ты сюду пришел еси, и как тебя зовут, и кто тебе велел тут вселитися в нашем месте?» Отрок же им не отвеща ничтоже, но токмо им кланяшеся, и тако от него отьидоша восвояси. Он же ту мало пребысть и от того места отьиде, и хотяше отъитти от града подалее, понеже уведа от пришедших к нему людей, яко близ есть град. Божиим же изволением прииде близ града Твери по той же реке Тверце на устье, и вышед на реку Волгу, и позна, яко град Тверь есть, ибо знаем ему бе, и возвратися в лес той, и избра себе место немного вдалее от Волги на Тверце и начатъ молитися Пресвятей Богородице, да явит ему про место сие. В нощи же той возляже опочинути и в сон тонок⁴⁵⁰ сведен бысть, и видит на том месте аки поле чистое и великое зело и свет великий, яко некую лучу Божественную сияющу. И воспрянув от сна, и мышляше в себе, да что сие будет знамение, и тако моляшеся Спасу и Пресвятей Владычице Богородице, да явит ему вещь сию. В ту же нощъ паки⁴⁵¹ явися ему Пресвятая Богородица и повелевает ему воздвигнути церковь во имя честнаго и славнаго ея Успения и указа ему место, и рече «Хощет бо Бог прославити сие место и распространити его, и будет обитель велия; ты же иди с миром во град ко князю своему, и той помощник тебе будет во всем и прошение твое исполнит. Ты же, егда вся совершиши и монастырь сей исправиши, немногое время будеши ту жити и изыдеши от жития сего к Богу». И тако воспрянув от сна своего, и вельми ужасеся о видении том, и размышляше в себе, яко «аще отьиду от сего места, боюся явления сего и показания месту. Яко Господеви годно, тако и будет». И помысли в себе, глаголя: «Аще ли же поиду к великому князю и увещати меня станет, однако, не хощу в доме его быти». Сие же ему мыслящу, абие⁴⁵² приидоша в той час во оный лес некия ради потребы мужие княжии зверей ради. Отрок же позна их и прикрыся от них, они же видевше крест и хижу и удивишася зело, и глаголаху друг ко другу, яко есть человек тут живяй⁴⁵³. И тако начаша искати, и обретоша его, и познаша, яко «той есть отрок князя нашего». И пришедше к нему, и поклонишася ему, и возрадовашася о нем радостию великою, той бо отрок по пустыни хождаше три лета и вящше⁴⁵⁴, и не виде его никтоже, и бе питаем Богом. И тако вземше его с собою и ведоша ко князю и сказаша ему вся, яко «великий князь печален бысть зело о тебе и доныне, аще же увидит тя жива и здрава, возрадуется о тебе радостию великою». Он же, сия слыша от них, с веселием идяше с ними. Егда же прииде во двор великого князя и вси узревши его, возрадовашася вельми о нем и прославиша Бога, и возвестиша о нем великому князю. Князь же повеле ввести его в верхния палаты, и виде отрока своего, и возрадовася вельми, и похвали Бога. Он же поклонися великому князю и рече: «Прости мя, господине мой великий княже, яко согреших пред тобою, опечалих бо тя зело». И рече к нему великий князь «Како тя Господь Бог хранит до сего дне и времени?» И облобызав его. Он же поклонися до земли и рече «Прости мя, господине мой великий княже, яко согреших пред тобою». И исповеда вся о себе по ряду, како изыде от него, и како Бог приведе до сего места. Князь же о сем вельми удивися и прослави Бога, и повеле своим предстоящим, да дадут ему всю его первую одежду, и да будет в первом своем чину. Он же со смирением рече: «Господине мой великий княже, я не того ради приидох к тебе, но да ты от печали свободишися и прошения моего да не презриши молю тя и прошу, да повелиши то место расчистити», – и вся поведа великому князю, како ту прииде, и како явилася ему Пресвятая Богородица со святителем Петром, митрополитом московским, и место показа, идеже быти церкви во имя Пресвятыя Богородицы, честнаго и славнаго ея Успения; и вся ему сказа о себе по ряду. Князь же, воздохнув вельми, и прослезися и отрока похвали, яко такового страшного видения сподобися, и обещася во всем помогати месту тому до совершения; и беседова с ним многое время, и повеле предстоящим пред ним поставити трапезу, да вкусить брашна⁴⁵⁵; он же вкуси малую часть хлеба и воды, а иной же пищи отнюд не прикоснуся. Великий же князь повеле по воли его быти и тако отпусти его с миром, идеже он восхощет. Отрок же отъиде на место свое и по обычаю своему моляшеся Богу и Пресвятей Владычице Богородице, и на помощь ея призывает о создании обители тоя, и тако молитвами Пресвятыя Богородицы вскоре дело совершается. Князь же великий повеле вскоре собрати крестьян и иных людей, да расчистят место то, идеже оный отрок покажет, и посла их ко отроку; слышавше же то, граждане и сами мнози идяху на помощъ месту тому. И тако вскоре очистивше место, еже отрок показа им, и возвестиша великому князю о сем; князь же прослави Бога и отрока своего о сем похвали. И тако сам великий князь прииде на то место и виде его сияюща паче иных мест. Отрок же паки припадает к ногам его и молит, да повелит церковь создати деревянную и монастырь возградити. Великий же князь вскоре повеле всем прежним людем тут работати и мастеров добрых собрати к церковному строению. И тако Божиею помощию и великого князя повелением вскоре дело совершается, и освящение церкви сотвориша. Бысть же ту на освящении церкве Успения Пресвятыя Богородицы сам великий князь Ярослав Ярославич и с своею супругою великою княгинею Ксениею, и со всем своим княжиим сигклитом, и всем трапезу устроил, и по прошению отрока своего великий князь даде ему игумена Феодосия, и братию собора, и колокола устрои. И назвася место от великого князя Ярослава Ярославича Отроч монастырь, и вси прославиша Бога и Пречистую его Богоматерь. На другий день по освящении церкве тоя той отрок Григорий пострижеся во иноческий чин и наречен бысть Гурий от игумена Феодосия. И той отрок по пострижении своем немногое время поживе и преставися ко Господу, и погребен бысть во своем монастыре. По преставлении же блаженного онаго отрока немногим летом мимошедшим⁴⁵⁶ великий князь Ярослав Ярославич и великая княгиня Ксения изволили в том монастыре создати церковь каменную во имя Пресвятыя Богородицы, честнаго и славнаго ея Успения, с приделом Петра, митрополита московского, чудотворца, и села подаде к тому же монастырю, и место то насели, идеже бе отрок прежде пришедый⁴⁵⁷. Монастырь же той стоит и доныне Божиею благодатию и молитвами Пресвятыя Богородицы и великого святителя Петра, митрополита московского и всея России чудотворца.

К тому ж монастырю дана грамота великих князей тверских за девятью печатями, а в ней писано сице Великий князь Василий Михайлович,

Великий князь Всеволод Александрович,

Великий князь Владимир Александрович,

Великий князь Андрей Александрович,

Великий князь Иеремий Васильевич,

Великий князь Симеон Константинович,

Великий князь Иоанн Михайлович,

Великий князь Борис Александрович,

Великий князь Феодор Феодорович,

Великий князь Иоанн Георгиевич,

Великий князь Андрей Димитриевич,

Великий князь Феодор Александрович,

Великий князь Михайла Васильевич.

К церкви Пресвятыя Богородицы дана сия грамота. В ней написано тако «Кто станет монастырь сей и монастыря того людей обидить, не буди на нем милость Божия в сий век и в будущий».