Молитвослов

Молитвы ко Господу

Бо́же и О́тче, Созда́тель и Сохрани́тель всех тва́рей! Благодарю́ Тебя́ за плоды́, да́нные мне Тобо́ю че́рез благослове́ние Твое́. Серде́чно молю́ Тя, так как Ты сказа́л, что низпошле́шь Ду́ха Твоего́ Свята́го всем, прося́щим Его у Тебя́, облагоде́тельствуй Твои́х дете́й (имена) Ду́хом Твои́м Святы́м, да возжже́т Он в них и́стинный страх Бо́жий, кото́рый есть нача́ло прему́дрости и прямо́е благоразу́мие, по кото́рому кто поступа́ет, того́ хвала́ пребыва́ет ве́чно.

Облаже́нствуй их и и́стинным призна́нием Тебя́, соблюди́ от вся́каго идолослуже́ния и лжеуче́ния, соде́лай, что́бы возросли́ в и́стинной спаса́ющей ве́ре и во вся́ком благоче́стии, и да пребудут в них постоя́нно, до конца́.

Да́руй им ве́рующее, послу́шное, смире́нное се́рдце, и прему́дрость, и ра́зум, да возраста́ют в лета́х и в благода́ти пред Бо́гом и пред людьми́. Насади́ в сердца́ их любо́вь к Твоему́ Боже́ственному сло́ву, что́бы они́ бы́ли благогове́йны в моли́тве и богослуже́нии, почти́тельны ста́ршим, стыдли́вы в телодвиже́ниях, целому́дренны в нра́вах, и́стинны в слова́х, верны́ в дела́х, приле́жны в заня́тиях, сча́стливы в исполне́нии обя́занностей и должносте́й свои́х, разу́мны во все́м, кро́тки и благоприве́тливы к лю́дям.

Соблюди́ их от всех собла́знов злого ми́ра, и да не разврати́т их худо́е соо́бщество. Не допусти́ им впасть в нечистоту́ и нецелому́дрие, да не сокраща́ют са́ми себе́ жи́зни свое́й, да не оскорбля́ют други́х.

Будь защи́той их во вся́кой опа́сности, да не подве́ргнутся внеза́пной ги́бели. Сде́лай, что́бы не уви́дели мы в них себе́ безче́стия и посрамле́ния, но честь и ра́дость, что́бы умно́жилось и́ми Ца́рство Твое́ и увели́чилось число́ ве́рующих, и да бу́дут они́ на Небеса́х окре́ст трапе́зы Твое́й, как небе́сные масли́чные ве́тви, и со все́ми избра́нными да воздаду́т Тебе че́сть, хвалу́ и прославле́ние че́рез Иису́са Христа́, Го́спода на́шего. Ами́нь.

Милосе́рдный Го́споди Иису́се Христе́, Тебе́ вруча́ю дете́й на́ших, кото́рых Ты дарова́л нам, испо́лнив на́ши моле́ния. Прошу́ Тебя́, Го́споди, спаси́ их путя́ми, кото́рые Ты Сам зна́ешь. Сохрани́ их от поро́ков, зла, го́рдостии да не косне́тся души́ их ничто́, проти́вное Тебе́. Но ве́ру, любо́вь и наде́жду на спасе́ние да́руй им, и да бу́дут они у Тебя́ избра́нными сосу́дами Ду́ха Свята́го, и да будет свят и непоро́чен пред Бо́гом их жи́зненный путь. Благослови́ их, Го́споди, да стремя́тся они́ ка́ждую мину́ту жи́зни свое́й испо́лнить во́лю Твою́ святу́ю, да́бы Ты, Го́споди, мог всегда́ пребыва́ть с ни́ми Ду́хом Свои́м Святы́м. Го́споди, научи́ их моли́ться Тебе́, да́бы моли́тва была́ им опо́рой и отра́дою в скорбя́х и утеше́нием жи́зни их, и да моли́твою их спасли́сь и мы, их роди́тели. А́нгелы Твои́ да охраня́т их всегда́. Да бу́дут де́ти на́ши чу́тки к го́рю бли́жних свои́х и да испо́лнят они́ Твою́ за́поведь любви́. И е́сли согреша́т они́, то сподо́би их, Го́споди, принести́ покая́ние Тебе́, и Ты по свое́й неизрече́нной ми́лости прости́ их. Когда́ же око́нчится жизнь их земна́я, то возьми́ их в Свои́ Небе́сные Оби́тели, куда́ пусть веду́т они́ с собо́ю други́х рабо́в Твои́х избра́нных. Моли́твою Пречи́стыя Твое́я Ма́тери Богоро́дицы и Присноде́вы Мари́и и Святы́х Твои́х (перечисляются святые покровители всех членов семьи), Го́споди, поми́луй и спаси́ нас, яко препросла́влен еси́ со Безнача́льным Твои́м Отце́м и Пресвяты́м и Благи́м и Животворя́щим Твои́м Ду́хом, ны́не и при́сно, и во ве́ки веко́в. Ами́нь.

Когда дети уходят в школу или ненадолго из дома, родители осеняют их крестным знамением и произносят следующую молитву:

Го́споди Иису́се Христе́, Сы́не Бо́жий, благослови́, освяти́, сохрани́ си́лою животворя́щего Креста́ Твоего́.

Молитва ко Пресвятой Богородице

О, Пресвята́я Влады́чице Де́во Богоро́дице, спаси́ и сохрани́ под кро́вом Твои́м мои́х чад (имена), всех о́троков, отрокови́ц и младе́нцев, креще́ных и безымя́нных и во чре́ве ма́тери носи́мых. Укро́й их ри́зою Твоего́ матери́нства, соблюди́ их в стра́хе Бо́жием и в послуша́нии роди́телям, умоли́ Го́спода моего́ и Сы́на Твоего́, да да́рует им поле́зное ко спасе́нию их. Вруча́ю их матери́нскому смотре́нию Твоему́, я́ко Ты еси́ Боже́ственный Покро́в рабо́м Твои́м. Ами́нь.

Призывание помощи Духа Святаго на всякое доброе дело

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х жи́зни Пода́телю, прииди́ и всели́ся в ны, и очи́сти ны от вся́кия скве́рны и спаси́, бла́же, ду́ши на́ши.

Тропарь, глас 2-й

Тво́рче и Созда́телю вся́ческих, Бо́же, дела́ рук на́ших, к сла́ве Твое́й начина́емая, Твои́м благослове́нием спе́шно испра́ви, и нас от вся́каго зла изба́ви, яко еди́н всеси́лен и Человеколю́бец.

Кондак, глас 6-й

Ско́рый в заступле́ние и кре́пкий в помо́щь, предста́ни благода́тию си́лы Твоея́ ны́не, и благослови́в укрепи́, и в соверше́ние наме́рения блага́го де́ла рабо́в Твои́х произведи́: вся бо ели́ка хо́щеши, яко Си́льный Бог, твори́ти мо́жеши.

Молитва перед началом обучения дитяти

Го́споди Бо́же и Созда́телю наш, о́бразом Свои́м нас, люде́й, украси́вший, избра́нных Твои́х научи́вший зако́ну Твоему́, так что внима́ющие ему́ дивя́тся, де́тям та́йны прему́дрости откры́вший, Соломо́ну и всем и́щущим ее́ дарова́вший, откро́й сердца́, умы́ и уста́ рабо́в Твои́х сих (имена), чтобы уразуме́ть си́лу зако́на Твоего́ и успе́шно позна́ть преподава́емое им поле́зное уче́ние для сла́вы пресвято́го и́мени Твоего́, для по́льзы и устрое́ния Свято́й Твое́й Це́ркви и разуме́ния благо́й и соверше́нной во́ли Твое́й. Изба́вь их от вся́ких ко́зней вра́жеских, сохрани́ их в ве́ре Христо́вой и чистоте́ во все вре́мя жи́зни их, да бу́дут кре́пки ра́зумом и исполне́нием за́поведей Твои́х. И так науче́нные просла́вят Пресвято́е и́мя Твое́ и бу́дут насле́дниками Ца́рствия Твоего́, и́бо Ты Бог кре́пок ми́лостию и благ кре́постию, и Тебе́ подоба́ет вся́кая сла́ва, честь и поклоне́ние, Отцу́ и Сы́ну и Свято́му Ду́ху, всегда́, ны́не и при́сно, и во ве́ки веко́в. Ами́нь.

Молитва перед началом учебного года

Го́споди Бо́же и Созда́телю наш, о́бразом Свои́м почты́й нас челове́ки, научи́вый избра́нныя Твоя́ я́ко диви́тися вне́млющим уче́нию Твоему́, откры́вый прему́дрость младе́нцем; И́же Соломо́на и всех взыску́ющих прему́дрости Твое́й научи́вый, отве́рзи сердца́, умы́ и уста́ рабо́в Твои́х сих во е́же прия́ти си́лу зако́на Твоего́, и со успе́хом позна́ти преподае́мая им поле́зная уче́ния, в славу пресвята́го и́мени Твоего́, в по́льзу и созида́ние Святе́й Твое́й Це́ркви, и разуме́ти благу́ю и соверше́нную во́лю Твою́. Изба́ви их от вся́каго нало́га вра́жия, соблюди́ их в Правосла́вии и ве́ре, и во вся́ком благоч́стии и чистоте́ во вся дни живота́ их, да преуспе́ют в ра́зуме и во исполне́нии за́поведей Твои́х; да тако́ предугото́вани просла́вят пресвято́е и́мя Твое́ и бу́дут насле́дницы Ца́рствия Твоего́. Я́ко Ты еси́ Бог си́лен в ми́лости, и благ в кре́пости, и Теб́ подоба́ет вся́кая сла́ва, честь и поклоне́ние, Отцу́ и Сы́ну и Свято́му Ду́ху, всегда́, ны́не и при́сно, и во ве́ки веко́в. Ами́нь.

Молитва перед учением

Преблаги́й Го́споди, низпосли́ нам благода́ть Ду́ха Твоего́ Свята́го, да́рствующаго и укрепля́ющаго душе́вныя на́ша си́лы, да́бы, внима́юще преподава́емому нам уче́нию, возросли́ мы Те́бе, на́шему Созда́телю, во сла́ву, роди́телем же на́шим на утеше́ние, Це́ркви и Оте́честву на по́льзу.

Молитва после учения

Благодари́м Тебе́, Созда́телю, я́ко сподо́бил еси́ нас благода́ти Твоея́, во е́же внима́ти уче́нию. Благослови́ на́ших нача́льников, роди́телей и учителе́й, веду́щих нас к позна́нию бла́га, и пода́ждь нам си́лу и кре́пость к продолже́нию уче́ния сего́.

Когда детям не дается учеба, молятся преподобному Сергию Радонежскому и праведному Иоанну Кронштадтскому, которые сами в отроческие годы не могли сначала овладеть книжной премудростью, но по их горячим молитвам Господь послал им способность учиться.

Преподобному Сергию Радонежскому

О, преподо́бне и богоно́сне о́тче наш Се́ргие! Воззри́ на нас, раб Бо́жиих (имена), ми́лостивно и, к земле́ приве́рженных, возведи́ к высоте́ Небе́сней. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки Бо́га моли́твами твои́ми. Испроси́ предста́тельством твои́м вся́кий дар, всем и коему́ждо благопотре́бен, и вся ны споспеше́ствующими твои́ми моли́твами сподо́би в день Стра́шнаго Суда́ шу́ия ча́сти изба́витися, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.

Святому праведному Иоанну Кронштадтскому

О́тче Иоа́нне досточу́дне! Ты доброде́тельми мно́гими к Бо́гу прибли́зился еси́ и дарова́ний духо́вных от Него́ сподо́бился еси́: неду́ги врачева́ти, стра́сти прогоня́ти и ско́рби утоля́ти. Те́мже смире́нно мо́лим тя: пода́ждь неду́гом на́шим исцеле́ние и страсте́м врачева́ние, находя́щия же на нас ско́рби утоли́ и ра́дость духо́вную в сердца́ на́ша всели́. И помози́ нам подража́телями бы́ти свята́го твоего́ жития́ и всех благи́х твои́х дея́ний, я́ко да сподо́бимся с тобо́ю насле́дия Ца́рствия Небе́снаго. Ами́нь.

Под именем неудобоучащихся разумеются те отроки, которые, последуя своеволию и развращенным нравам других и закосневая в них, не являют никакой наклонности к наукам и делам честным.

Молитва ко Господу

Го́споди Иису́се Христе́ Бо́же наш, всели́выйся в сердца́ двана́десятых апо́столов нелицеме́рно, благода́тию Всесвята́го Ду́ха, соше́дшаго в ви́де о́гненных язы́к, и сих устне́ отве́рзый, и нача́ша глаго́лати ины́ми язы́ки. Сам, Го́споди Иису́се Христе́, Бо́же наш, низпосли́ Ду́ха Твоего́ Свята́го на отроча́ сие́ (имя) и насади́ во ушеса́ се́рдца его́ Свяще́нныя Писа́ния, я́же рука́ Твоя́ пречи́стая на скрижа́лех начерта́ законополо́жнику Моисе́ю, ны́не и при́сно и во ве́ки веко́в. Ами́нь.

Для просвещения их умов и исправления сердец также призываются в молитвенную помощь и ходатайство пред Богом святые первомиученик Стефан, апостол Матфей, мученики Агапий, Прокопий и Филит. Стефан – потому, что на него «воссташа неции от сонма и не можаху противустати премудрости и духу, имже глаголаше» (Деян.6:9–10). Апостол Матфей – потому, что он с детства учился книгам в Иерусалиме у св. Симеона Богоприимица и отлично преуспевал в уразумении закона. Святые Агапий, Прокопий и Филит – потому, что они в младости просветились богопознанием в такой мере и степени, что в юных же летах способны были воспринять и восприняли мученическую смерть за веру и благочестие.

Молитва ко Господу

Го́споди! Си́ла всемогу́щая! Утверди́ не́мощную ду́шу мою́ во вся́кой доброде́тели. На недви́жимом ка́мени за́поведей Твои́х утверди́ сла́бое для вся́каго добра́ се́рдце мое́. Го́споди! И я ежедне́вно о́пытно познаю́, что без Тебя́ я ничто́; что без Тебя́ не могу́ твори́ть никако́го добра́; без Тебя́ одно зло́ во мне в ра́зных его ви́дах; без Тебя́ я сын поги́бельный. О, пренеизрече́нная Благосты́ня, испо́лни бла́гостию Твое́ю се́рдце мое́. Па́че же всего́ молю́: да́руй мне люби́ть Тебя́ всем се́рдцем мои́м и бли́жняго моего́, яко себе́. Да не бу́ду я зло́бен, горд, презо́рлив, непоко́рен, но да бу́ду незло́бив, почти́телен с не́жностью и послу́шен. Ами́нь.

Молитва ко Пресвятой Богородице

О, Влады́чице, не оста́ви нас, впа́дших в тлю грехо́вную, гре́шных и оскверне́нных вся́кими нечисто́тами, но призира́й на нас, просвеща́й, вразумля́й, очища́й и спаса́й нас, яко Ма́ти Спа́сова!

Молитва о гордом и строптивом

Го́споди, научи́ раба́ Твоего́, в диа́вольскую го́рдость впа́вшаго, кро́тости и смире́нию и отжени́ от се́рдца его мрак и бре́мя сатани́нской горды́ни!

Молитвы о любви к ближним

Го́споди! В любви́ взаи́мной жи́ти научи́ и укрепи́ Ду́хом Твои́м Святы́м; поры́вы страсте́й, запина́ющие любви́ небе́сной, ева́нгельской, укроти́ и сердца́ на́ши ме́ртвы соде́лай для сласте́й земны́х. Даждь мне, Го́споди, всем блага́м земны́м предпочита́ть всегда́ благода́ть Твою́, мир Твой, пра́вду и святы́ню Твою́ и в ней всегда́ пребыва́ть, во вся дни живота́, до после́дняго издыха́ния.

Благодарственная молитва

Го́споди Иису́се Христе́ Бо́же наш, Бо́же вся́каго милосе́рдия и щедро́т, Его́же ми́лость безме́рна и человеколю́бия неизсле́димая пучи́на! Ко Твоему́ вели́честву припа́дающе, со стра́хом и тре́петом я́ко раби́ недосто́йные благодаре́ние Твоему́ благоутро́бию о Твои́х благодея́ниях, на рабе́х Твои́х (рабе́ Твое́м) бы́вших, ны́не смире́нно принося́ще, я́ко Го́спода, Влады́ку и Благоде́теля сла́вим, хва́лим, пое́м и велича́ем, и припа́дающе па́ки благодари́м, Твое́ безме́рное и неизрече́нное милосе́рдие смире́нно моля́ще. Да я́коже ны́не моле́ния рабо́в Твои́х прия́ти, и ми́лостивно испо́лнити сподо́бил еси́, и во пре́дняя в Твое́й и и́скренняго любви́ и во всех доброде́телех преспева́ющих, Твоя́ благодея́ния всех ве́рных Твои́х получи́ти, Це́рковь Твою́ Святу́ю и град сей от вся́каго зла́го обстоя́ния избавля́я, и мир и безмяте́жие тем да́руя, Тебе́ со Безнача́льным Твои́м Отце́м и Пресесвяты́м, и Благи́м, и Единосу́щным Твои́м Ду́хом, во еди́ном существе́ сла́вимому Бо́гу, всегда́ благодаре́ние приноси́ти, и преблага́я глаго́лати и воспе́ти сподо́биши. Сла́ва Тебе́ Бо́гу, Благоде́телю на́шему во ве́ки веко́в! Ами́нь.

Кондак 1

Взбра́нной Воево́де и усе́рдной Воспита́тельнице ро́да христиа́нскаго, я́ко изба́вльшеся от злых, благода́рственная воспису́ем Ти раби́ Твои́, Богоро́дице, но я́ко иму́щая держа́ву непобеди́мую, от вся́ких бед на́ших чад свободи́, да зове́м Ти: Ра́дуйся, блага́я Воспитаа́тельнице, воспи́танная во свята́я святы́х.

Икос 1

А́нгела с Небесе́ посла́ти ча́дом на́шим исхода́тайствуй, Пресвята́я, у Сы́на Твоего́ и Бо́га на́шего, я́коже и Тебе́ по́слан бысть Гаврии́л Арха́нгел, и сподо́би ны взыва́ти Тебе́ си́це: Ра́дуйся, рожде́нием свои́м роди́телей обра́довавшая; ра́дуйся, со слеза́ми мно́гими у Бо́га испро́шенная. Ра́дуйся, моли́твы и поста́ све́тлое прозябе́ние; ра́дуйся, благочести́выя жи́зни кра́сный пло́де. Ра́дуйся, от младе́нства свята́го послуша́ния испо́лненная; ра́дуйся, благоче́стием от сосца́ ма́терня напое́нная. Ра́дуйся, любве́ всесве́тлое жили́ще; ра́дуйся, ми́лостей Госпо́дних сокро́вище. Ра́дуйся, блага́я Воспита́тельнице, воспита́нная во свята́я святы́х.

Кондак 2

Ви́дящи на́ше сле́зное роди́тельское моле́ние, умилосе́рдися, Влады́чице, о ча́дех на́ших, возми́ их под Сво́й честны́й и благосве́тлый покро́в, да воззову́т в весе́лии Бо́гу: Аллилу́иа.

Икос 2

Ра́зум ча́дом на́шим ниспосли́, е́же ка́ко до́бре Ти послужи́ти, и напо́лни сердца́ их прему́дростию небе́сною, подаю́щи еди́ну ю возлюби́ти, земно́е же презре́ти, и не возбрани́ усто́м на́шим взыва́ти такова́я: Ра́дуйся, де́тство Сво́ при хра́ме прове́дшая; ра́дуйся, во свята́я святы́х возше́дшая. Ра́дуйся, Еди́ному Бо́гу посвящ́нная; ра́дуйся, моли́вшаяся Ему́ день и нощь. Ра́дуйся, чистоту́ и целому́дрие измла́да возлюби́вшая; ра́дуйся, смире́ние свое́ всеус́рдно охраня́вшая. Ра́дуйся, моли́твою к Бо́гу при́сно пламен́вшая; ра́дуйся, похвало́ и ра́досте роди́телей святы́х. Ра́дуйся, блага́я Воспита́тельнице, воспита́нная во свята́я святы́х.

Кондак 3

Си́ла Вы́шняго да осени́т ча́да на́ша Твоего́ ра́ди неусы́пнаго предста́тельства за них пред Сы́ном Твои́м, и позна́вше Твое́ Ма́тернее милосе́рдие ко всем с ве́рою притека́ющим к Тебе́, воззову́т Бо́гу: Аллилу́иа.

Икос 3

Иму́ще от Бо́га чад н́аших, не хо́щем зре́ти их в гее́нне о́гненней пребыва́ющих, но запи́санных в кни́зе живо́тней. Сего́ ра́ди, Пречи́стая Де́во, приклони́ся ко гла́су моле́ния на́шего, взыва́ющему Тебе́: Ра́дуйся, Ма́ти Бо́га и Сло́ва; ра́дуйся, свята́я святы́х бо́льшая. Ра́дуйся, Воспита́тельнице Сы́на Бо́жия; ра́дуйся, Корми́лице Го́спода сил. Ра́дуйся, я́ко ражда́еши Спаси́теля ми́ра; ра́дуйся, я́ко расти́ши Изба́вителя плене́нным. Ра́дуйся, яко но́сиши Наста́вника заблу́дшим; ра́дуйся, я́ко Сын Твой – Госпо́дь. Ра́дуйся, блага́я Воспита́тельнице, воспи́танная во свята́я святы́х.

Кондак 4

Бу́рю ви́дяще собла́знов многоразли́чных, умно́жившихся я́ко пе́сия му́хи и скни́пы в преде́лех на́ших, к Тебе́, Благода́тная, взыва́ем о ча́дех свои́х, да избе́гнут сих и вопию́т Бо́гу: Аллилу́иа.

Икос 4

Слы́шаше глас Твой, глаго́лющий Сы́ну Твоему́: «Приими́ вся́каго моля́щагося Тебе́ и призыва́юща и́мя Мое́ на по́мощь», – простира́ем ру́це на́ша на моли́тве к Твоему́ милосе́рдию, да возме́ши чад на́ших под покро́в Свой и испо́лниши проше́ния на́ша такова́я: Ра́дуйся, от уны́ния зла́го чад на́ших избавля́ющая; ра́дуйся, от безу́мнаго весе́лия их огражда́ющая. Ра́дуйся, в несе́нии креста́ их укрепля́ющая; ра́дуйся, в по́двизех благоче́стия их утверждаа́ющая. Ра́дуйся, под покро́вом Твои́м ми́лостиво их сохраня́ющая; ра́дуйся, здра́вие душ и теле́с им подаю́щая. Ра́дуйся, усе́рдная Наста́внице целому́дрия; ра́дуйся, ми́лостивая Взыска́тельнице заблу́дших. Ра́дуйся, блага́я Воспита́тельнице, воспита́нная во свята́я святы́х.

Кондак 5

Боготе́чная звезда́ у́тренняя, Сын Твой, Пресвята́я Де́во, да возсия́ет све́том невече́рним в сердца́х чад на́ших во е́же воззва́ти им Бо́гу: Аллилу́иа.

Икос 5

Ви́дящи на́ше приле́жное моле́ние, не отврати́ лица́ Твоего́ от чад на́ших, а́ще и отвратя́тся Те́бе, и услы́ши глаго́лы уст на́ших, вопию́щих такова́я: Ра́дуйся, я́ко науча́еши чад на́ших име́ти ра́зум на до́брое; ра́дуйся, на пути греха́ их запина́ющая. Ра́дуйся, правоше́ствовати их наставля́ющая; ра́дуйся, от лука́вства злых челове́к их огражда́ющая. Ра́дуйся, в злострада́нии их укрепля́ющая; ра́дуйся, благодари́ти Бо́га за все науча́ющая. Ра́дуйся, блага́я Хода́таице при́сно о ча́дех на́ших к Сы́ну Своему́; ра́дуйся, Спору́чнице их пред Творцо́м и Бо́гом. Ра́дуйся, блага́я Воспита́тельнице, воспи́танная во свята́я святы́х.

Кондак 6

Пропове́дует весь мир христиа́нский Твое́ всегда́шнее заступле́ние о моля́щихся Тебе́. Си́це и ны́не услы́ши многоболе́зненное сие́ роди́тельское моле́ние о ча́дех на́ших, во е́же зва́ти им Бо́гу: Аллилу́иа.

Икос 6

Да возсия́ет луча́ благода́ти в ду́шах чад на́ших, и просвеще́ннии Тобо́ю, у́зрят путь, веду́щий в живо́т ве́чный, и после́дуют по нем, сохраня́еми под Твои́м всемогу́щим покро́вом. Сего́ ра́ди услы́ши ны, зову́щия Ти такова́я: Ра́дуйся, роди́телей на любо́вь бла́гу к ча́дом свои́м подвига́ющая; ра́дуйся, сердца́ чад, во е́же роди́телей свои́х чти́ти, умиля́ющая. Ра́дуйся, прося́щим подаю́щая ра́зум; ра́дуйся, ве́рных озаря́ющая смы́слы. Ра́дуйся, всех скорбя́щих Ра́досте; ра́дуйся, Умягче́ние злых серде́ц. Ра́дуйся, Отра́до и Утеше́ние; ра́дуйся, Прибавле́ние ума́. Ра́дуйся, блага́я Воспита́тельнице, воспи́танная во свята́я святы́х.

Кондак 7

Хотя́ще ча́дом на́шим ве́чнаго спасе́ния, со слеза́ми предстои́м пред честно́ю Твое́ю ико́ною, Влады́чице, да не пре́зриши моле́ния на́шего, зову́щаго Сы́ну Твоему́: Аллилу́иа.

Икос 7

Но́вую покажи́ ми́лость на ча́дех на́ших, Влады́чице, и неизсле́димыми судьбами Сына Твоего привлецы́ их под Сво́й благода́тный покро́в, да усе́рдно зове́м Ти: Ра́дуйся, воспита́ние чад на́ших, во е́же огражде́нными им бы́ти му́ки ве́чныя; ра́дуйся, воспита́ние чад на́ших во е́же насле́довати им блаже́нство непрестаю́щее. Ра́дуйся, пробужде́ние со́вести чад на́ших на покая́ние; ра́дуйся, пита́ющая их плода́ми добротолю́бия. Ра́дуйся, премилосе́рдая Уте́шительнице всех скорбя́щих и обремене́нных; ра́дуйся, неусыпа́ющая Наста́внице всех заблу́дших и ослепле́нных. Ра́дуйся, Судии́ пра́веднаго умоле́ние; ра́дуйся, мно́гих согреше́ний проще́ние. Ра́дуйся, блага́я Воспита́тельнице, воспита́нная во свята́я святы́х.

Кондак 8

Стра́нствующе в юдо́ли сей многоско́рбной по мо́рю многомяте́жному страсте́й, ча́да на́ша где обря́щут тве́рдое приста́нище, а́ще не в Тебе́, Пречи́стая. Спутеше́ствуй же им и наста́ви их на путь и́стинный, да зову́т Бо́гу: Аллилу́иа.

Икос 8

Все́м еси́ Ма́ти ми́лующая, Пречи́стая Де́во, я́коже Христо́с Спаси́тель рече́ Тебе́, у Креста́ Его́ предстоя́щей: «Се, сын Твой», – указу́я на избра́нного от челове́к. Сего́ ра́ди вруча́ем ча́да на́ша в ру́це Твои́ и во смире́нии зове́м Ти: Ра́дуйся, чад на́ших благосе́рдая Путеводи́тельнице; ра́дуйся, те́рния грехо́вных страсте́й милосе́рдая Искорени́тельнице. Ра́дуйся, отра́ду в пусты́ни греха́ подаю́щая; ра́дуйся, в мину́ту ско́рби утеша́ющая. Ра́дуйся, в зе́млю обетова́ния путево́дствующая; ра́дуйся, на воде́ упокое́ния вселя́ющая. Ра́дуйся, соверше́нный ра́зуме наста́вников и детоводи́телей; ра́дуйся, благослове́ние домо́в и семе́йств благочести́вых. Ра́дуйся, блага́я Воспита́тельнице, воспита́нная во свята́я святы́х.

Кондак 9

Вся́каго бла́га испо́лни сердца́ и ду́ши чад на́ших, отгоня́ющи от них духа злосмра́днаго безбо́жия, нече́стия и блудоде́йства, госпо́дствующа в ми́ре сем. Сохрани́ рабо́в Твои́х в чистоте́ и целому́дрии, да взыва́ют во умиле́нии Бо́гу: Аллилу́иа.

Икос 9

Вети́й суему́дренных, лжу́щих на Твое́ всемо́щное заступле́ние, отжени́, Ма́ти Бо́жия, от чад на́ших, да не поползну́тся умо́м в душетле́нныя уче́ния и не обратя́тся се́рдцем в по́хоти безме́стныя, но при́зри на ны, ве́рно вопию́щия: Ра́дуйся, до́брым нра́вом чад на́ших науча́ющая; ра́дуйся, от злых на́выков их избавля́ющая. Ра́дуйся, му́дрых наста́вников Твои́м рабо́м посыла́ющая; ра́дуйся, от худы́х соо́бществ их отвраща́ющая. Ра́дуйся, благо́му уче́нию внима́ти призыва́ющая; ра́дуйся, су́етныя ба́сни презира́ти помога́ющая. Ра́дуйся, Бо́жие ко гре́шным благоволе́ние; ра́дуйся, ка́ющихся пред Го́сподем кре́пкое заступле́ние. Ра́дуйся, блага́я Воспита́тельнице, воспита́нная во свята́я святы́х.

Кондак 10

Спасти́ хотя́ мир, Христо́с Бог призва́ не пра́ведники, но гре́шники на покая́ние. Сего́ ра́ди моли́ся Сы́ну Твоему́ о ча́дех на́ших, а́ще и уйду́т на страну́ дале́че, оба́че взы́сканные Твои́м Ма́терним заступле́нием, возвратя́тся в сокруше́нии се́рдца к Отцу́ Небе́сному и воззову́т Ему́: Аллилу́иа.

Икос 10

Стено́ю несокруши́мою ста́ни, Небе́сная Цари́це, ча́дом на́шим, да Твои́м предста́тельством избе́гнут зми́ева приноше́ния, кра́снаго в снедь, последи́ же смертоно́снаго, и возмо́гут чи́стым се́рдцем пе́ти Тебе́ такова́я: Ра́дуйся, избавля́ющая чад на́ших от ядови́таго зе́лья; ра́дуйся, спаса́ющая их от душепа́губнаго пития́. Ра́дуйся, от блудоде́йства их сохраня́ющая; ра́дуйся, целому́дрию их науча́ющая. Ра́дуйся, потребле́ние вся́каго обольще́ния; ра́дуйся, избавле́ние вся́каго смуще́ния. Ра́дуйся, трезве́ния Побо́рнице; ра́дуйся, му́дрости Хода́таице. Ра́дуйся, Блага́я Воспита́тельнице, воспита́нная во свята́я святых.

Кондак 11

Пе́ти Твое́ необори́мое заступле́ние вы́ну сподо́би чад на́ших, да обря́щут Тебе́, кре́пкую Помо́щницу, и Твое́ю благода́тию отве́рзут уста́ свои́ воспева́ти Бо́гу: Аллилу́иа.

Икос 11

Светоприе́мною свеще́ю житие́ чад на́ших соде́лай, да при́сно горя́т любо́вию к Тебе́ и Сы́ну Твоему́, и не пре́зри ны, зову́щих Ти: Ра́дуйся, дым собла́знов разгоня́ющая; ра́дуйся, мглу страсте́й просвеща́ющая. Ра́дуйся, зре́ние храни́ти науча́ющая; ра́дуйся, блюсти́ чувствова́ния вразумля́ющая. Ра́дуйся, щедро́т неизрече́нных Ма́ти; ра́дуйся, побужда́ющая чад на́ших в благогове́нии Тебе́ предстоя́ти. Ра́дуйся, утеше́ние им в скорби живо-но́сное; ра́дуйся, от набе́га лука́вых прибе́жище непрело́жное. Ра́дуйся, блага́я Воспита́тельнице, воспита́нная во свята́я святы́х.

Кондак 12

Благода́тию неизрече́нною Ду́ха Свята́го напита́й сердца́ чад на́ших, еже возлюби́ти то́кмо Сы́на Твоего́ и Бо́га, и Тебе́, Преблагу́ю Засту́пницу, да подви́гшеся Тобо́ю, зову́т Царю́ вся́ческих: Аллилу́иа.

Икос 12

Пою́ще Твое́ милосе́рдие, и́мже ми́луеши и пита́еши чад на́ших, мо́лимся: не преста́й проси́ти о них Сы́на Твоего́, я́ко вся́ Тебе́ возмо́жна суть, и услы́ши мольбы́ на́ша такова́я: Ра́дуйся, от купе́ли свята́го креще́ния чад на́ших Восприе́мнице; ра́дуйя, к све́ту и́стины их Путеводи́тельнице. Ра́дуйся, ро́су благода́ти Твоея́ им подаю́щая; ра́дуйся, млеко́м и́стины их пита́ющая. Ра́дуйся, я́ко твори́ши чад на́ших земны́е А́нгелы; ра́дуйся, я́ко претворя́еши их в небе́сные челове́ки. Ра́дуйся, насле́дники Ца́рствия Небе́снаго их показу́ющая; ра́дуйся в оби́телех небе́сных их водворя́ющая. Ра́дуйся, блага́я Воспита́тельнице, воспита́нная во свята́я святы́х.

Кондак 13

О, Всепе́тая Ма́ти Иису́са Сладча́йшаго! Приими́ ма́лое сие́ моле́ние о ча́дех на́ших в воню́ благоуха́ния духо́внаго и возми́ их под Твой милосе́рдный покро́в. Еще́ же да́руй им мы́слити, глаго́лати и твори́ти то́чию Тебе́ и Сы́ну Твоему́ уго́дная и посли́ им в жи́зни сей привре́менней вся поле́зная ко спасе́нию душ их, да воспева́ют Бо́гу: Аллилу́иа.

Этот конда́к читается трижды, затем икос 1-й «Ангела с Небесе...» и кондак 1-й «Взбранной Воеводе...».

Молитва ко Господу

Го́споди Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере услы́ши нас, недосто́йных рабо́в Твои́х, к Тебе́ приле́жно притека́ющих. Го́споди, в ми́лостивой вла́сти Твое́й ча́да на́ша, рабы́ Твоя́ (имена). Поми́луй и спаси́ их, и́мени Твоего́ ра́ди, прости́ им вся согреше́ния во́льная и нево́льная, соверше́нная и́ми пред Тобо́ю. Го́споди, наста́ви их на путь и́стинный, ра́зум их просвети́ све́том Твои́м, се́рдце согре́й любо́вию Твое́ю. Го́споди, благослови́ их в до́ме, в уче́нии, в пути́ и на вся́ком ме́сте Твоего́ влады́чества. Го́споди, сохрани́ их под кро́вом Твои́м Святы́м от летя́щия стрелы́, от огня́, меча́, от смертоно́сныя я́звы и от напра́сныя сме́рти. Го́споди, огради́ их от всех ви́димых и неви́димых враго́в, исцели́ их от вся́кия боле́зни, очи́сти их от вся́кия скве́рны и облегчи́ их душе́вныя страда́ния. Го́споди, да́руй им благода́ть Ду́ха Твоего́ Свята́го на мно́гая ле́та жи́зни, здра́вия, целому́дрия и благоче́стия. Го́споди, умно́жь и укрепи́ их душе́вныя и теле́сныя си́лы, Тобо́ю даро́ванныя им. Да́руй Твое́ благослове́ние ча́дом на́шим на благочести́вую и, а́ще уго́дно Тебе́, семе́йную жизнь. Го́споди, да́руй нам, недосто́йным и гре́шным рабо́м Твои́м (имена) благослове́ние на воспита́ние чад на́ших и сподо́би всех ку́пно дости́гнути Ве́чнаго Ца́рствия и та́мо просла́вити пречестно́е и великоле́пое и́мя Твое́, Отца́ и Сы́на и Свята́го Ду́ха. Ами́нь.

Молитва к Божией Матери

О, Пресвята́я Влады́чице Де́во Богоро́дице, премилосе́рдая Ма́ти всех челове́к, спаси́ и сохрани́ под кро́вом Твои́м чад на́ших (имена), всех отроко́в, отрокови́ц, младе́нцев и во чре́ве ма́тери носи́мых. Укро́й их ри́зою Твое́ю, соблюди́ их во стра́се Бо́жием и послуша́нии роди́телем, умоли́ Го́спода на́шего и Сы́на Твоего́, да да́рует им вся поле́зная к душе́вному спасе́нию. Вруча́ем их Твоему́ Матери́нскому смотре́нию, я́ко Ты еси́ Боже́ственный покро́в рабо́м Твои́м.

Тропарь, глас 4

Воспита́вшейся во хра́ме во свята́я святы́х, одея́нней ве́рою и прему́дростию и безме́рным де́вством, Архистрати́г Гаврии́л принесе́ с Небесе́ целова́ние и, е́же ра́дуйся, ра́дуйся, Благослове́нная, ра́дуйся, Препросла́вленная, Госпо́дь с Тобо́ю.